.

.

الــفـرح فـــرحـــنا  

Posted by: فاتيما in



اللى جاى معانا من الكااااهرة 
 التفاصيل كلها عند 
خالد همس الأحباب

أول باول عند دودو 

-------------------------------------------

كام مرة هقول ف الموناسبات دى 
اللى يحبنا ... ميضرباش نار؟
أصل لامؤاخدة
الفرح فرحنا 
و العروسة حبيبة الكل 
و كمان عريسها زينة الشوباب مهما كبر
اسكندرية الماريا..احلى عروسة 
و البحر حبيبها وساكن قلبها 
و ساكن قلوبنا جميعا 
واللقا ان شاء الله نصيب 
 معادنا معاهم 
يوم 2 أكتوبر الجااااى 
و على رأى
سى الاستاذ محمد افندى منير  
ف الدور اللى بيقول فيه
العاشق بينقط بهواه






عروسة البحور
دودو عاشقة الرومانسية 
بعد مناقشات مع الست ام عمر 
المعروفة بحنين القلب
قالتا ... نكسبوا فيكو ثواب يا بتوع مصر 
و يلا نعزمكو نواحينا
فهل بت المعاد يناسبكوا يا بتوع مصر ؟
قولنا أيووووون





بس تفتكروا هقعد ساكتة ف الليلة دى ؟
ايش معقول 
لازم اطلع ع المرسح انقط العرسان 
و ارقع زغروطتين افتراضى 
و اطلبلى أى حاجة 
استنهازاً لإن الماكرفوووون معايا 
احم احم ..بكل براءة و وداعة قولت
 عاوزة اروح 
متحف المجوهرات يا جماعة
قوم دودو تقولى ..بس كدا 
يعنى جيتى ف جمل


حااااااااضر






هاه ... مين تانى 
هياخد الماكرفون من ايدى 
و يسمعنا احلى كلام




ايوه 





الحب الجميل 
حبوبة الجميلة بتوصيكم
 هاتوا جواكت و شيلان عشان 
الدنيا بليل هتكون بررررررد
يا خراشى ع الدلع و الحنية 
مش هننسى ... 



حااااااااضر







جدعنة ستات اسكنكرية متجمعة
ف نفراية  واحدة متفهموش ازاى 
بتفكرنا ان الموج  بيعمل تش تش
و بتدبسنى ف اكتباس لعقد الملكة فريدة 
يا لهوى ... طب ملقتيش غير فريدة يا مارو ؟!!
دنا بحبها .. قولى عقد نازلى  ..يمشى
كناية ف الاخت نادية الجندى 
حتى كدا نلطشه وضميرنا موستريح
ماشى انا معاك يا معلمى و ...



حاااااااااااضر 






عميد مدونى القاهرة وشهامة وجدعنة الدنيا 
رمى كلمتين عن عزومة المراجيح 
زى ما يكون مش عاجبه كدا و لا حاااااجة
(وش بيضيق عينيه وبيجز على سنانه) 
و خلع على دودو لقب 
رئيس مراجيح مولد النبى 
و بعدين لم الدور و قال ...



حااااااااااضر 





و لحد دلوقتى 
من خلال الأيميلات عندى 
والتعليقات عند الاحباب 
كشف الحضور كالأتى






من الأسكندرية والقاهرة وعموم الجامهورية

 عاشقة الرومانسية(نبضات قلب ولهان)
حنونة ام عمر (حنين القلب )
خالد (همس الاحباب)
حنان الشافعى (رياح الحنين)
حبوبة (الحب الجميل)
مارو ريتشارد(قلب القطة)وجوزها والعيال 
ضياء (بيتوفل مايند)
mrmr
زهـــــراء (بالحب اتجمعنا)
احمد سعيد (عنبر العقلاء)
بدراوى (طعم البيوت)
همسات و بحر الحياة 
كريم (شاب فقرى)
رشا (مش مدونة )
محمود (باحث عن حب)
Ramy(بابى )
Haytham Alsayes(الفردوس الضائع)

محمد كمال (صوت من مصر)
dahlia ....mycorner
wa7ed w5las
ست البيت (انى أهتم)
مصطفى ريان 
حفيدة عرابى (لقد خلقنا الله احرارا)
(تخاريف زمن) Mohamed Gabriel
....................
..........................

هاه ؟
مين تانى قال جاى ؟!!





تنويهاااااااااااااااااات

 
تنويه (1)
هيوه صحيح الفرح فرحنا 
والكل معزوم و الدعوة عامة
بس امانة عليكو ... الله يخليكو
اللى بيحبنا يصفى نفساويته كدا
وميضربش نار ليكسر الأزاز  
 و معناش حق تصليحه




 تنويه (2)
تفاصيل اليوم ونمر الموبايلات 

 و آخر كلام  لحد يوم اللقاء 
عند عروسة البحور دودو





تنويه (3)
اللى جاى من مدونى القاهرة 
يا ريت يقول ف صفحة التعليقات
عشان نسافر كلنا صحبة احسن



اشوفكم يوم السبت الجاى 
على ألف خير ان شاء الله 
و يكون يوم جميل  .. زى كل ايامكم 
يا أحلى ناس و صحبة و عالم





لقاءات سابقات جميلات

حضن الأحـــبة مايو 2010
البحر بيخطفنى اكتوبر 2009
كنا هناك ..ف الجنة مارس 2009



This entry was posted on الأربعاء, سبتمبر 29, 2010 and is filed under . You can leave a response and follow any responses to this entry through the .

58 كــــلام بيطــبطـــب عـــلى قــــلبى و روحــــى

مامت يوسف الغالية

انا متفائل

مادام كنت فى القايمة

ان شاء الله جى

بس مش عارف هاجى قاهرة و لا من شرم علطول مش عارف

بس أكيد هأكد عليكم

و لو كدة ابقى خدو

المسكين حسنى معاكم يا بتوع القاهرة

مدونة مذكرات مريض نفسى

معلش هى مدونة كدة بس هو مش كدة

و نجيلك فى الأفراح دايما

يا مامت يوسف يا رب

سلام مؤقت لحد ما ربنا يسهل كده

(:

ربنا معاكى

يسلام علي الرحلات واللقاءات التدوينية

علي فكرة ممكن احتمال اجي ان شاء الله
وانا بأة اقرب منكوا يابتوع القاهرة
لاني من دمنهور يعني هي ساعة والاقي نفسي قدام بحر اسكندرية

يعني بالنسبة لي مفيش مشكلة في المواصلات اجي لوحدى واشد الرحال علي هناك
بس ادعيلي اعرف اجي في اليوم دة وميطلعش حاجة تعطلني

تحياتي

إيه دااااااااا
انا اسمى مش فى الكشف
أهىء أهىء
أمال مين اللى هياخد ويجمع الجووووووواكت منكم وانتم مروحين
هههههههههههههه
مبسوطه انى هششششششششوفك
راجعه تااااانى

اجمل حاجه فى اليووووووووم ده
انى ح اشوف فاتيما ام يوسف اللى بجد حبيتها من قبل ما اشوفها

وكمان اللى عجبنى قووى المراجيح هههههه

كفايه الصحبه الحلوه

يارب يكوووووون يوم جميل ويمر بسلالالالام

نلتقى الاسبوع الجاى باذنك يارب

أيوووووووووة كدا يا جميل
دا انا أعملها مناااااحة على البلوجر كله لو مرحتش
ههههههههههههه
انتى عارفه ان نفسى فى التجمع دا من زمااااااان وعينى فيه ...
عشان اشوفكم نفر نفر
هتنورونا بجد
طبعا دلع وحنيه
انتم لسا شفتم حاجه
دلع اسكندرانى على حق
ههههههههههههه
لو مكنش أنا ادلعكم مين هيدلعكم
كملى انتى بقا
اشوفك على خير يا روح قلب حبوبه

بعد السلام والتحايا
ربنا يوفقكوا
ويسعدكم
ويرزقك من حلاله

سلامي لجميع الحضور
انا عارف ان كل مره بطلع ندل واعتذر
بس فعلا مش ينفع لان الايام دي بجهز لسفره
ربنا يجعلها خير قادر يا كريم

ادعي لي يا فاتيما ربنا يكرمك
تحياتي للجميع

لا متقلقيش اللى زهقان من جاكتته هقوله هات عنك واجمعهم وفى الاخر فيفتى فيفتى
مع بعضينا
كلام بينى وبينك متفضحيناااااش
على اى رصيف ونسترزق
ههههههههههه

Ramy
-----

ازيك يا ر ر

انا كاتبة اسمك عشان عارفة انك هتحاول قدر جهدك تيجى و مش هيآخرك غير الشديد القوى و ان شاء الله ميحصلش

الاخ حسنى جاى بجد
و لا ايه؟
طب يسيب تعليق لو ممكن
عشان ان شاء الله يسافر معانا
من رمسيس بدل ما يسافر لوحده
خالد اكيد هيقرى البوست دا
فخليه يسيب تعليق يا ريت


اشوفك على الف خير


ملحوظة
التعليقات وصلت
و هقراها بتأنى و ارد عليك
ان شاء الله




Haytham Alsayes
---------------

ازيك يا هيثم

و يا فندم اهلا بيك
تنور و تآنس
حاول تيجى بجد
ان شاء الله اليوم يعجبك
و الصحبة تفيدك
بتبقى ايام حلوة و اسكندرية روحها خفيفة و ممتعة دا كفاية هنشوف البحر يا جدع و بلاش تشوفنا احنا !!!

تحياتى انا اكتر
يا صاحب الفردوس




الحب الجميل
----------

يا خرااااااااشى
انشك ف كيبوردى اللى نسيت

انا اسفة صلحتها اهو
طب تصدقى انى بعلق عندك و انتى بتكتبيلى التعليق هنا
القلوب عند بعضيها
بلاش اهىء اهىء دى لحسن قلبى ضعيف و هاجى اعيط جنبك بقى

جواكت ايه اللى هتلميها واحنا مروحين
ليها بيعة يعنى ؟
و لا مش هتعرفى تتصرفى ؟
لو كدا
انا معاكى
بس نصص ف السبوبة دى
طب
ماشى
متقوليش لحد و خليها ف سرك
بعدين يتنصحوا علينا
و يلبسوها قبل المراوح
و منعرفش نقلّبها


اشوفك يوم السبت
بكل الخير يا حبيبتى




mrmr
----


و انا كمان يا مرمر
مبسوطة جدا انى هشوفكم
و هشوفك انتى كمان
المراجيح بقى
ما ادراكى ما المراجيح
هتجربى بنفسك ان شاء الله

و ايون
بسلام دى و حياتك
ان شاء الله بسلام
و محدش يروح زعلان او متضايق
دى اهم حاجة

بوسات و حضونات
مؤقتا لحد ما تاخديهم بنفسك

اتمني لكم لقاء ممتع و صحبه هنيه

و يارب يديم الحب و الاخوة و الصداقة بينكم

تحياتي

فاتيمااااا هانم
الغالية ام الغالى
انا جاى ان شاء الله
علشان اسلم عليكى بس ولو فيه

ولو انى معرفش تلات اربع الناس الرايحة الا بالأسم فقط

بس امانة عليكى لو لاقيتى واحد طويل واهبل وشعره قصير ودقنه طويلة واسمر وشبه المجرمين بيجرى عليكى

متتخضيش

لأنه هيكون انا

هههههههههههههه

حبيببببببى
ووحشتينى
كااااان نفسى جدااااا
وبطريقة مش طبيعيه اروح معاكم الطلعه دى
كانت عايزة اوى اغير جو
وربنا@@@
أييييييييييه بس انتى عارفه الحاجه الولده لو قولتلها كده احتمال كبير
اتصاب كده ولاكده
بجد احضنيلى كل الى هيرووووووووووح
وانتى اولهم
وش كان نفسوا يروح اوى***
امواااااااااة
عوووووووووو

تيمااااا الجميله
أخباراتك إيه

ربنا يسعدك

سلميلي على كل أهل إسكندريه
وبالذات على المراجيييح
:))))

طبعا لقاء إسكندريه مستحيييل أجي بس أنا سمعت إنه راح يكون في لقاء قاهري فده راح أزوغ من الكليه وأجي على طووووول
عشان أشوفكوا وحشتوووووووني

بمووووت فييييكي
^_^

طب هو ينفع حد جديد خالص عليكو كلكو ييجي اليوم ده ؟؟؟ ولا لازم واسطة ؟؟
لو ينفع حد يقولي علشان اجهز نفسي واحضر الجمل اللي هاجي عليه من القاهرة ....
لو مش ينفع يبقي اتمنالكم رحلة سعيدة ..
 

السلام عليكم

وانا معاكم بس بقلبي ودعواتي ..

تحيتي

فاتيما فى تحديث مهم عندى
بليز اعملى تحديث على البوست بتاعك
والحمد لله لسه قدامنا وقت

بحبك

انى قادم يا صلاح الدين
وبظبط عشان اسافر مع الواد كيمو
عايزنى اسافر قطر
بس انا معترض لان مش هيبقى فيه كماين فى السكة
هههههههه
كل سنة وكل لقاء وانتى طيبة يارب
فقرى

انا موش هقدر اجي
عااااااااااااااااااااااااااا

عاااااااااااااااااااااااااااااا

عاااااااااااااااااااااااااااااااااا

كان نفسى ابقى معاكم بس مش مكتوبلى

اروح اسكمدرية الماريا ابدااااااا

عااااااااااااااااااااااااااا

الا ف حالة حدوث معجزة ومش هتحصل يعنى المعجزة دى خلال اسبوع يعنى

عااااااااااااااااااااااااااااا

بس خلاص بقة هابطل عياط علشان ما انكدش عليكوا

يارب يارب تفرحوا كلكم وتنبسطوا

وهاشوف هاعرف اكلمكم هناك ولا لأ

سلميلى عليهم كلهم يا تيما

واستمتعوا بوقتكم كلكم يا حبايب

بحبك اوى اه وربنا

افعصى اللينك ده كده

http://www.youtube.com/watch?v=eOPlirXYwJA&feature=related

ايوه
ياولاد بلدنا يوم الا معرفش ايه
هكتب كتابى وابقه مش عارف ايه
والدعوه عامه وهتبقا لمه
وركزى اوى على الدعوه عامه وهتبقا لمه
واقعد انا بقه فى البيت لوحدى منتظره يجوا يحنسونى على اللقاء ده
اه
بعيط
حد يجى يخطفنى
اخطفوووووووووووووونى
وخدونى

باإذن الله يكون يوم من اجمل الايام ياأم يويو
وتسعدوا فيه وربنا يحرسكم فيه من اى شر
اللهم أمين

احلى الصباحات والبقالاوات والسكرات على عيون جميله الجميلات واحلى الامهات
وست البنات فاتيمااااااااااااااااا

واللى عايز يقول هااااااااااااااااات

والفرح فرحنا والليله ليلتنا والبحر بحرنا واللى يحبنا يضرب 250 طلقه بالتلاته
وسمعنى احلللللللللللللللللللللللللى سلا
وانزل البضؤ الشاااااااااااااااارد

بعد التحيه والسلام نبلغ سيادتكم تم نقل مكان التجمع للندن الدور الثالث
نادى دار مصر جنب نادى المش مهندسين لازم لزق للعلم بالشىء صحيح انت يا جميل جاى فى الصحبه بس علشان لو حد سالك تبقى عرفه عيب نائب مدير قطاع الرحلات بنفسه مايبقاش عارف
اشطاااااااااات

العيال بيسلمو عليكى اوى اوى اوى بس احتمال كبير مش هاقدر اجبهم معايا المره دى علشان منه عندها درسين وصعب الغى فى اول الترم هاعطلهم ميرو هو اللى هايتجن بس حجرام جبيه واسابها فا الست دى امى ربنا يخليهالى هاتقعد معاهم يومها ان شاء الله بس ربنا يسهل

يارب نتجمع على الف خير ويكرمنا ربنا بيوم جميل ان شاء الله
ولعلمك موضوع عقد فريده دا تنويه خدى بالك علشان ايه انه منمره على حاجه تانيه خالللللللللللللص
ربنا يسهلنا بس ويكرمنا

بوصات وفعوصات تصبيرات ليوم لقنا ياقمر

فاتيما

انا جاى باذن الله
احجزولى مكان بقا

--------
الواد فولتا

انت بالذات متحاولش تيجى قبلها وتستندل او تعتذر
لااااااااااااااازم تيجى
علشان عاوز اشوفك

والا ................

فتوما الجميلة وروح قلب ست البيت
بس لما اشوفك
يبقى التجمع عندنا وبالصدفة بالصدفة البحتة وقعتك بيضة ولون تيكو القطقوط الجميل
احسن لك تجيبي صور القطاقيط كلهم معاكي احسن مش حيحصل طيب
مش لوزا كانت حامل
ها فين القطاقيط بقيى

وبعدين ينفع كده ؟
تروحوا متحف المجوهرات من غيري؟
احتج واشجب واعترض
ةبعدين عقد فريدة مين بالضبط اصل في فريدات كتير اليومين دول
اوعي تقصدي الليدي فريدة ؟
وبعدين المتحف غني بما لذ وطاب شمعني يعني العقد دا
عموما لو معرفتش آجي بدري
اوعكوا تقسموا حاجة من غيري
ومن نوحية البوقصماط لا تكلكي أنا لابسة جوانتي اساسا
فاحسن لكن حبة نحوي- تستنوني لما آجي

تحياتي ليوسف وميزو

صحيح يا طمتومتي مش تقولوا للواد سووو وخالو الصباغ
والاستاذ ضياء وخيخة ؟
عشان تبقى لمة حلوة

أحـــوال الهوى
--------------

كان بودى تكون معانا يا دكتور

بس ان شاء الله المرة الجاية
تكون اولنا
بإذن الله


منتحرمشى من دعواتك الحلوة دى
و لصحبة الهنية انتا جزء منها اكيد
و لو برا الحدود مؤقتاً





Volta
-----


هنمتونى كماااااان ؟؟
انحرمشى منكم يا رب

موشكرين يا سى فولتا

و متخفش مش هتخض
تعالى انتا بس و ملكش دعوة


و اصلاً انتا مطلوب بالأسم

بالاسم
مش ف القسم
بعد الشر
انتا اللى قولت مجرمين انا ماااالى


اضرب بعينك فوق كدا
هتلاقى ف التعليقات
احمد سعيد عنبر العقلاء موجهلك تهديد فى شكل نداء
و احسنلللللك ..تقول حاضر
و انتا ساكت

ان شاء الله تنور اليوم و اسكندرية
و بجد فرحانة انى هشوفك





كيكى عوووو
----------

برضو يا كيكى ؟!!!
انتى يا بت مش اتخرجتى ؟
ماتجمدى قلبك بقى و تخشى ع العالم دى بمطواة و توريهم الاجرام اللى على اصوله
لأ لأ مش بقولك تغوزيهم بيها
انتى هتهوشى بس !!

طب بلاش بلاش خلاص

حاولى و النبى محاولات تانية و تالتة و ربنا يسهل

انا كمان
بوسات و حضونات معاها
يا عووووووو





ghada mohsen
------------

ازيك انتى يا غدوغود

الناجح يرفعا ايييييييييده

ايوه كدا

يوه
اسكندرية لأ
طب ننقلك الجامعة اسكنكرية
لو عايزة


دنا قولت جنبك و فركة كعب ؟

معلش ملناش حظ

انا كمان يا حبيبتى
بحبك قوى





wa7ed w5las
------------

اولاً
اهلا بيك

ثانياً
الدعوة عامة
و مفيش واسطة و لا حاجة


ثالثاً
الحكاية بسيطة
و نمر الموبايلات ف بوست
عاشقة الرومانسية
عشان تتصل عليها اول ما توصل اسكندرية طوالى


واهلا بيك





جنى
----

و عليكم السلام يا سعيد

انتا معانا دايما
و ربنا يقرب البعيد ف يوم

تحياتى و خالص ودى انا

عاشقة الرومانسية
---------------

علم و نفذ يا قطتى


انا كمان بحبك






شاب فقرى
---------

واد يا كوكو متسمعش كلامه
تعالى معانا احنا

هوه السفر يحلى
من غير كماين و حرق دم ؟!!

طب شوف ظروفك
و المهم تيجى
دا المهم و بس





sony2000
---------

معلش يا سنسن
ملحوقة و ان شاء الله تقدرى تيجى المرة الجاية
بلا عااااااااا دى و النبى
معلشىىىىىى



мαησηα
-------
بتهرجى يا منونا ؟

دنتى جنب اسكندرية يا بنتى
لأ حاولى تانى و تالبت و عاشر
ربنا ينفخ ف صورة البيت و يوافقوا
هاتى سارة و تعالى
و المعجزات تحدث ان شاء الله

سلامك سابقك و الكل شايفه
بس ان شاء الله توصليه بنفسك يوم السبت الجاى لما اشوفك وجهاً لوجه


ميرسى ع الغنوة
انتى عارفة نكطة ضعفى

انا كمان يا حبيبتى
بحبك قوى




داليـ ـ ـ ـ ـ ـ ــــا
---------------------

هههههههه

حلو النقوط دا
الله ينور

حاولى يا داليا
لعل و عسى يعنى

ميرسى على تمنياتك الطيبة
منتحرمشى يا رب






richardCatheart
---------------

ايوووون كدا
سلام اسكندرانى اصيييل
يا لهوى


خلاص قولنا يا فندم
التفاصيشل أول باول عند عروسة البحور دودو
و لندن الدور التالت
الدور التالت
احنا هيهمنا


زعلتينى عشان حكاية الولاد

طب رغم ان نفسى اشوف ميرهان بس وراها دروس مش هقدر افتح بوقى ... بس مروان كماااان
مش جاى
هعاكس ف مين انا دلوقت؟


طب يا ست معلشىىىىى

حتى كدا مناسب عشان نعرف نلطش الحاجة براحتنا ف المتحف
لا حد يقول عاوز اروح الحمام و لا حد يقول جعان و لا الإنشغالات دى
عاوزين نركز ف شغلنا عشان ربنا يبارك


هبقى اعرف حكاية الحاجة التانية دى يوميها بينى و بينك عشان محدش ينق و يبصلنا ف السريقة الا الحاجات تى بتتنظر يا اوختشى


بوسات و حضونات
و فعصات كتيييييير





احمد سعيد
--------

اسكنكرية هتنور ياصاحب العنبر

و فولتا بعد الكام الف
اللى ف لازم دول
لاااااااااااازم هييجى ان شاء الله

بس النقط اللى بعد الا دى
معناها ايييييه ؟!!!!


وش متوجس خيفة





ست البيت
---------

ازيك يا مروة

وقعتى بيضة طب الحمدلله

كنت قلقانة
اصل دخلتك ف اول التعليق كلكتنى خالث و صور ايه قططى دول عاوزين الحدف م البلكونة عمداااا لأنهم مجنيين ماما و واجعين قلبنا
هصورهم كمان ؟
هزلت


ضياء جاى ان شاء الله
اما خيخة فقولتلها ف تعليق
اكيد قرته و عرفت باللقاء

اما الصباغ و سووو
فأظنهم هيسمعوا عن السفرية من البوستات و الفيسبوك و ربنا يسهل و ظروف التلاتة تسمح

اشوفك ان شاء الله
يومها على الف خير

تحياتى و خالص ودى





صوت من مصر
----------

هرد عليك هنا يا بنى
لازمته ايه الشحططة

ان شاء الله تيجى بألف سلامة
خلاص كدا
نكتبوا اسمك
ف الكايمة يا حمو

لقاء موفق إن شاء الله :)

تحياتي

أنا جاية يا فاتيما يإذن اللهززحطي اسمي بقى:) أشوفك على خير يا فاتيما و حتنوري اسكندرية

عااااااااا بعد ما كتبت التعليق الحلو الكهربة قطعت ..الله يقطعهم بتوع الكهربة....
مساء الورووووود العطرة يا فاتيما
انا زي غادة كدة مش هعرف اجي خصوصا اني هكون قبلها في القاهرة يعني مينفعش اسافر يومين ورا بعض هتعب اوووي, بس امانة السلام للجميع كلهم كلهم الي اعرفهم واللي معرفومش....وتسلميلي علي اسكندرية حتة حتة وخاصة قصر المجوهرات وقايتباي والكورنيش والمكتبة والسلام امانة لسعد زغلول اللي عند سيسل , والنبي دانيال الشارع الحلو ده , وطبعا جاد ومؤمن بسندوتشاتهم الذيذة والايس كريم الحلو ده .....كله كل حاجة ...
عايزة اطلب منك طلب بايييخ شوية ...الاغنية اللي كانت في البوست اللي فات ...عايزها او تبعتيلي اللينك عشان حباها اوووي

فتاة من الصعيد
--------------

ازيك يا فاتى
عقبال ما تحضرى مرة
او احنا اللى نجيلك بقى يا حبيبتى

منحرمشى من دعواتك الحلوة




dhalia...
---------

انا كنت هكتبه يا داليا
من غير ما تقولى
بس انا عارفة يوم السيت عندك ممكن يكون انشغال جامد ..فقولت بلاش اقاطع و استنى لما تاكديلى بنفسك

اسكندرية منورة بيكم يا حبيبة قلبى

اشوفك على الف خير يا رب




reh7ab.sale7
------------

ازيك يا رحوب
معلش يا حبيبتى
تتعوض ان شاء الله

هسلملك على كل حاجة حاضر من عيونى و هرجع ان شاء الله احكى كل تفصيلة و كأنك كنتى معانا

الغنوة لفريق اسمه (ببساطة )
دا لينكها ع اليوتيوب
http://www.youtube.com/watch?v=wsksW70qwYU

انتى تؤمرررررى

يا رب تكونى احسن دلوقتى
و كله تمام

بوسات و حضونات يا جميلة

يااااااااااااه

أكتوبر.. يعني عقبال ما أكون في مصر حايكون عدى على اللقاء ده 3 شهور بس؟؟

يارب مايكونش صعب يتعمل لقاء تاني شتوي
و احضره معاكوا


وحشتيييييييييييييني يا فاتيما قوي ي ي ي

نفسي اشوفك قوي
و مقابلتي ليكي في حفلة توقيش الباشمهندس المراكبي خلاكي توحشيني اكتر و اكتر لانه كان الوقت قصير زي ما يكون سرقة من الزمن

للاسف غيابي عن المدونات مخليني مش عارفة كتير من الاسماء اللي قلتي انها حاتحضر
بس متأكده اني كنت حابقى سعيدة بتعرفي عليهم و خسرانة كتير بالغياب ده

وحشتوووووووووووني قوي
و حاكون فرحانة قوي يوم 2 اكتوبر وانا حاسة انكم في حبيبتي اسكندرية

يااارب يكون لقاء جميل و ناجح
مستنية بلهفة الاخبار
وحشتيني بقوة

فاتيما
جاى ان شاء الله
بس ربنا يسهل واروح مع كيمو
ويارب يسهل بس والحالة تتعدل
لان شكلى مش هتحرك
لكن ان شاء الله خير :)

فاتيما الجميلة والعزيزة والغالية
بعد الاشواق والسلامات والتحيات وكدة يعنى
فانا كان بودي امسك الميكرفون واطلع على المسرح معاكو بس المسرح عندي مشغول وبغننى في الميكرفون اغينه جميلة تانية .. فانا قلت ادي فرصة للشباب ( انتي ومارو وخالد ودودو وحنين ومن يستجد بقى ) يعنى تغنو براحكتو وتظهروا مواهبكو واهو الكبير لازم يشجع الشباب ويديهم الفرصة
وبناء عليه ان شاء الله هحاول انوركم وادخل الفرحة والبهجة والسعادة على قلوبكم واكون معاكو في اليوم دة
ويلا بقي سلام عليكم خلوني اجهز يا جمااااعة

طمطم

ممكن؟

ممكن يعنى أقولك بالنسبة للاخوة مدونى القاهرة وضواحيها
ناويين تتقابلوا فين ؟
والساعة كام؟
وناويين ترجعوا امتى؟
والطريق بياخد اد ايه تقريبا؟
وياترى عندكم مكان يبات فيه الاخوة بعد الشر اللى ممكن يتأخروا ومامتهم مش تدخلهم البيت خالص؟

بس خلاص

Hannoda
--------

لأ متقلقيش يا هند

ان شاء الله على ما تيجى يكون فيه لقاء تانى
و لو مش ف اسكنكرية يا ستى
يكون ف القاهرة او المنصورة
او اى مكان ..المهم نشوفك


انتى كمان وحشتينى يا هنودتى
و اسكندرية المرة اللى فاتت
لما كتبت البوست بتاعها حطيت صورة مدونتك ..عشان انتى كنتى معانا برضو
مسيرك ترجعى و تستقرى
و انتى اللى ترتبى الأيام دى مع دودو و حنين و كل الحبايب هناك
ان شاء الله

عموما
لا تكلكى
اختك فاتيما
هتقولك على كل سنتوفة و همسة حصلت
و كأنك معانا ..متخافيش
انا عارفة ان ناس كتير بتبقى نفسها تحضر
و البوستات التفصيلية بتكون نوعا ما كويسة ليهم ..و دا اللى بيخلينى اطول فيها و احاول اقول كل حاجة قدر امكانى



خلى بالك من نفسك
و لو ع الأسماء
اديكى بتعرفيهم من عندى اهو
و بكرة تشوفيهم وجهاً ..لوجه


بوسات و حضونات
يا احلى قمراية اسكندرانية
و عيون حلوة
عيون حلوة
عيون حلوة

و بتنكثف





شاب فقرى
--------

اهيييه
يعنى بعتنا يا كوكو
بقى اقولك تعالى معانا
تقولى رايح مع كيمو
ماشى ماشى
خليك فاكر
بس عوكاباً ليك بقى
لا تكلمنى
و لا تيجى ناحيتى
و لا لسانك يخاطب لسانى
اثناء اليوم
و لا بعده
مكاطعة
تاااااااامة
شااااااااااملة
كااااااااااملة
و اما نشوف


(اللى فات دا هزار طبعا)


خلوا بالكوا من بعض يا شوباب
و تيجوا بألف سلامة
ان شاء الله




mostafa rayan
-------------

لأ ملكشى ف الميكرفون يا مصطفى
انا لسه فاكرة جملتك الحلوة بتاعة مكانتى الادبية و الفكرية دى .. اللى قولتها لوليد الدوغرى
و عجبتنى جدا بصراحة
فحرصاً على عدم اهتزازها انتا تقعد زى الباشا وسط المعازيم والحاجة تجيلك لحد عندك يا باشا
بجد انا بطمن لما اكون معاك انتا و خالد و ضيا و بقيتكوا يا جدعان
السفرية اللى فاتت كانت حلوة

بس و النبىىىىىىىىى
امانة
بلاش هريسة النوبة دى
عاوزة ارّوح لأمى بدررررررى

هنستناك كالعادة ف المكان اياه
اشوفك على الف خير
يا الطيابة ذاتها







حفيدة عرابى
----------

يا عيون طمطم

بتهرجى ؟
بتفكرى تيجى ؟
طب يا رييييييييت


بصى يا ستى
التفاصيل كلها كالآتى

احنا بنتقابل بدرى
ع الساعة سبعة .. سبعة و نص
فى حتة متفق عليها ف ميدان رمسيس
و بنركب سوا ميكروباس ..
بنبقى ف اسكنكرية بمشيئة المولى
على عشرة او عشرة و نص بالكتير
و قصاد النادى يمكن حداشر او قبل حداشر


المرواح بقى ..عادة بنركب الساعة ستة ..عشان نكون ف مصر تسعة
... تسعة و نص فى ميدان رمسيس
حيث يتوقف الميكروباس
فيه ناس بتنزل ف سكة الرجوع
عشان مواصلاتها اقرب لجامعة الدول
و كدا

هوه المرة اللى فاتت
إتاخرنا شوية و رجعت لماما
بعد منتصف الليل بربع ساعة
و كانت ليييييلة
بس ان شاء الله المرة دى
خمسة و نص هنركب لمحطة مصر
و ستة ان شاء الله
نكون ف السكة.. بلا فصااااال

بالنوسبة للأخوة
اللى بعد الشر .. ممكن يتآخروا دول
فدول ليهم ربنا بقى
يعنى ارض الله واسعة.. اى عتبة جامع
و عندنا الحسين
اقرب حاجة من وسط البلد
نروح نقضى الليلة على قهوة لحد الفجر و نصليه جماعة
و ندعى ان اهالينا يفتحولنا البيبان واحنا راجعين بعد الشغل
اذا اننا اكيد هنروح اشغالنا
و بعدين نروح عليهم بقى
يكونوا ف البيت هديوا شوية
و خرجوا من مرحلة
الغيظ مننا ..
لمرحلة القلق علينا
بس خلاص

اهى بسيطة
ومتقلقيش يعنى


لو بتفكرى جدياً تيجى
يا ريت

لو عملتيها
ليكى عندى حاجة حلوة
و هتعجبك ان شاء الله يلا
ادينى بغريكى
اهو


بوسات وحضونات
يا حبيبة طمطم انتى

:)
طيب ياطمطم
لما تتفقوا هتتقابلوا فين بالظبط فى رمسيس بلغينى
أو لو فى أى تطورات جديدة تخص السفر

بوسات وحضونات كتير
على ماييجى يوم السبت ان شاء الله وتبقى كتير قوى قوى
:)

ان شاء الله جاى ويارب يكون لقاء جميل واتعرف على الأصدقاء المدونين من كل حتة فيكى يا مصر
واحلى سلام يا اجدع ناس ونتقابل ان شاء الله

سأنتظر بفارغ الصبر تقريرك عن اللقاء ان شاء الله فأجعليه مفصلا من فضلك
سلامي وتحياتي للجميع
دمت بكل الود

انشاء الله يكون يوم جميل

مع خالص تمنياتى بالاستمتاع باحلى بلاد الدنيا


تحياتى لكم جميعا

داستور ياهل البلوج
ثانى زيارة ومن رائع لاروع ..

تتر المسلسل ده أنا باعشقه وقعدت أسمعه فوق العشرين مرة وأسمحيلى انى سرقته كمان وسجلته :d

ثانيا أنا جاى هنا عشان أهنى وأطلب طلب : أولا الف مبروك مقدما للعروسين وبالرفاء والبنين وطلبى ياريت لو تعملوا لقاء قاهرى إن شاء الله فى أقرب فرصة عشان نفسى أتعرف على المجتمع التدوينى بجد عن قرب ..
إسكندرية ماريا وانا باعشق هواها وبدوب فى جمالها بس للأسف أخر مرة كنت هناك فى مكتبة إسكندرية فى ديسمبر 2007 من فترة بعيدة يعنى ،صحيح كنت أتمنى أن أكون وسط الرفقة الحلوة دى بس حقيقى أنا معرفش حد وربما أكن يومها منشغلا ببعض الأعمال فغاية أملى الان هى أن ادعوا لكم بيوم سعيد إن شاء الله على أمل أن نتلاقى فى القاهرة لو رتبتوا لقاءا جديدا إن شاء رب السما وطابت الرياح ! أطيب تحياتى القلبية لكى

محمد ناصر الدين الهلالى

شوفي بقى انا مش هاجي
بس هتصل واكلمكم كلكم

تيما هو الكومينت الطويل العريض جالك ولا ايه حبيبتى طمنينى

طنط طنط
انا مسافر معام ميكروباص ممكن
والله خليت وليد معانا
وياريت حد يتصل بكريم يعرف دماغة هتروح لفين

ربنا يخليك ياطمطم
ومايحرمنيش منك ولا من ذوقك أبدا
جاية ان شاء الله ومترقبة متعة اليوم الجميل ده ان شاء الله

لقاء موفق وسعيد إن شاء الله

ويا رب تنبسطي يا تيما إنتي وكل حبايبك :)

تحياتي

حفيدة عرابى
---------

و انا كمان مستنياااااكى يا فيدو

خلى بالك من نفسك
لحد ما توصلي رمسيس
بعد كدا بقى
متقلقيش
هتبقى دى مهمتى
انا


بوسات و حضونات مؤقتا





Mohamed Gabriel
----------------

ماشى يا محمد
احنا هننور اسكندرية
و انتا هتنور اللقاء ان شاء الله
و تشرفنا
خالص ودى ليك




خواطر شابة
------------

حااااضر يا خطورتى
يا خراشى دنتى تؤمرى
لأ يا لهوى دنتى تشاروى بس
حاضر يا حبيبتى
عينيا





momken
------

الف شكر لحضرتك
و كلك ذوق






محمد ناصر الدين الهلالى
-------------------

دستورك معاك يا استاذ محمد
و زياراتك شرف لينا بجد

ثانياً
التتر دا انا حبيته من اول مرة سمعته لما اتعرض المسلسل من ييجى خمأشر سنة و لا حاجة ... حنان ماضى اصلاً بحب غناها و الحان ياسر عبدالرحمن و اسكندرية اغانيها شبهها ..حلوة و شقية و حنونة و كل حاجة حلوة

ثالثاً
ان شاء الله تتعوض
و نشوف حضرتك
اقرب لقاء تدوينى عام هيكون التبرع الخيخى بالدم و دا اول نوفمبر حي التوقيت الخيخى لنوران
او ف قول آخر
البت خيخة و اى كلام

عموما
حضرتك تابعنى ان شاء الله و انتا تعرف الأاخبار اول باول مكان و معاد و صحبة و كدا


الف شكر على تمنياتك الطيبة لينا
دى كفاية و الله
و كتير كمان

شرفت



sweet angel
-----------


يا لهوى يا انجل ؟!!
هتكلمينا كلنا ؟!!
دنتى هتدفعى فلوس قد كدا بقى
دنتى تجيلنا أرخص يا بنتى .. ههههههه


معلش تتعوض المرة الجاية
ان شاء الله
و مننحرمشى منك




мαησηα
------

وصل يا منونتى يا قمورتى
و حيث ان الموضوع كبير
فهرد عليكى ف ايميل مطول بقى

ماشى؟

طوااايب





صوت من مصر
-----------

و حياة طنط طنط دى انا كنت عارفة
و قولت لكريم شاب فقرى
مسمعشى النوصيحة
اديك بعته على اول ناصية اهو
(انا بهدى النفوس)

طييييييب
من مدونتى اوجه النوداء للأستاذ كريم الشاف اللى مش فقرى خالص القاطن بدير النحاس
تعالى معانا يا كريم و التفاصيل كلها عند خالد همس الأاحباب
و متسمعش كلام كيمو تانى
اسمع كلام فاتيما يا بنى


اشوفكم انتا الجوز على الف خير
بعبكرة بقى




فتاة من الصعيد
--------------

ميرسى يا فاتى
مننحرمشى منك يا حبيبة قلبى

كل سنة و انتى طيبة يا فندم
و مش هسأل كام سنة بقى

تحياتى انا و بوسات و حضونااااتى قبلهم




مهندس مصرى
----------

الله يبارك فيك يا محمد

احنا قولنا الولاد بيحبوا بعض من صغرهم بقى و مش هنوقف ف طريق كصة الحب الضاربة بجذورها ف عمك التاريخ دى و اهو نلمهم على بعض و نجوزهم و نشيل عيالهم

عقبال ما نفرح بمهندس مصرى الاول
ان شاء الله
انا بتباشر بتعليقك اهو
و ربنا يسمعنا عنك كل خير دايما


السفرية الجاية تكون معانا
ان شاء الله
:)

حبيبتى فاتيما

وانتى بتحكى خليتينى نفسى ابقى معاكوا
:(
ماتجربوا تعملوا لقاء فى البلد الفقريه بتاعتنا دى ماهى مليانه مدونيين
:))
سلامى للجميع ...وابقوا افتكروا اللى معرفوش يحضروا
يارب تقضوا وقت سعيد وجميل
مستنيه البوست الجديد اللى هتحكى لنا فيه كل حاجه بالتفصيل
حتى صوت البحر اللى بيقول تش
اوعى تنسى اى حاجه

حبى وتحياتى للجميع

حبيبتى فاتيما
وانتى بتحكى
خليتى نفسى اتفتحت انى اكون معاكو
بس معلش هابقى معاكوا بقلبى وامرى لله

تحياتى للجميع ويارب لقاء جميل وممتع
مستنياكى لما تيجى
ومستنيه البوست اللى هتكتبى فيه كل حاجه حصلت
حتى صوت البحر اللى بيقول تش
:))
سلام ياطمطومه ورحله سعيده انشاالله

انا مش حقر :-)
لانى كنت هناك من اسبوع تقريبا
بس كان نفسى انى اركب الاتوبيس ابو دورين و الف اسكندرية بالطول :-((
معلش المرة القادمة
امتى ؟؟الله اعلم
بس امانة انبسطولى معاكوم كده شوية ب10000000 قرش :-)

و ترجعوا بالسلامة
:-*********************************************************************************
القبلات لفطوم طبعا و بس
اما الاحضان
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX
فاللبحر و اصحابه و احبابه

انا رجعت اهو يا معلمة و بنطمنك ان البضاعة ادشدشت كالعادة:-))
علشان محدش يفهمنى غلط البضاعة مكونه من شوية كحك العيد سربته من الحكومة المنزلية :-)))))

قرات الاصطباحات طبعا
متعرفيش و النبى اميل للفخرانى
علشان نفسى نطالبه كلنا بانه يرفع على الوزاء الحلوين قضية قذف و تجريح علنى علشان يتلموا الناس الى بيجبهم الرايس قبل ما يشوف بيعرفوا يتكلموا و لا بيرموا دبش
بس حنقول ايه اصلهم مبيخفوش من الاكبر

تيما الغاليه
مساءك سكر ياروح قلبى
ان شاء الله يكون اللقاءحميل
عارفه لاول مرة انوى من مده طويله انى احضر لقاء وكانت العين على لقاء اسكندريه ومن يوم مانويت والدنيا اتلغبطت ههههههههههه ادعيلى الظروف تسمح واكون بكرة باذن الله موجوده لانى نفسى بجد اشوفكم جدا
ربنا يسعد ايامك دايما

ازيك يا فاتيما..يا رب تكوني بخير..يحيي من امبارح سخن و بيرجع..ادعيلي يبقى كويس بكرة عشان اقدر أجي.. و لو مقدرتش أجي فيااا رب تقضو يوم حلو..بحبك

وجهة نظرى
---------

ازيك يا معتز

انا زى منتا حاسس تمام
الحمدلله احسن بكتير
اما موضوع يوسف فعاوز قعدة كبييييرة
هبقى احكيلك على رواقة ان شاء

المهم افتح مدونتك يا عم
بطل كسل بقى




قوس قزح
-------

:(
انا كمان

عشان المدارس مش كدا ؟
مقدرش اتكلم و لا افتح بوقى طبعا
غير بجملة
كان نفسى تكونى معانا جداااااا




دودو
----


بلاش التكشيرة دى و النبى
المرة الجاية تكونى معانا ان شاء الله
سلامك وصل اهو من دلوقتى
وحاضر هقول كل تفصيلة بس انتوا متزهقوش منى بس

و سؤال برىء لأنى فعلا موش عارفة
البلد الفقرية دى تبقى ايه؟
عشان لو ينفع
اعملولنا تجمع يا ستى و احنا نيجى مش هنقول لأ محنا بنروح بورسعيد و المنصورة و بنكون مبسوطين جداا

يا لهوى على طمطومه دى
منحرمش منك يا رب




wanda
------

خوياااااااااانة
تروحى اسكنكرية من غيرنا؟

ماشى ماشى

هننبسطلك برضو متقلقيش

بالنوسبة للبوسات و الاحضان فوصلت و حصلت و راحت ف كل حتة اهو

اما الكحك فبالهنا و الشفا يا ون ون

اما الفخرانى
فانا متهيألى انه ساكن ف كل بيت شريف ف مصر
و ساكن ف كل قلب نضيف ف البلد دى

:)





ليس فقيراً من يحب
--------------

بجد يا رانيا ؟
ممكن ينفع تيجى ؟
طب يا ريييت
حاولى و ان شاء الله ربنا ييسرها و تعرفى تيجى

هنستناكى يا حبيبتى

ربنا يسعد ايامك انتى يا حبيبتى



dahlia...
----------
ازيك يا داليا
سلامة يحيى الف مليون سلامة
ان شاء الله يبقى احسن و زى الفل
و ينفع تجى و لو شوية و تمشى بلاش كل اليوم

انا كمان بحبك
و سلامة يحيى الف سلامة





الحب الجميل
----------
يا خراشى يا حبوبة
انتى بتوصينى على ايه؟
كفاية تقول انها تبعك و تنشال فوق الراس ... و جوا القلب
حاضر متقلقيش
هاخد بالى
عينيا

اشوفك بكرة ان شاء الله
بوسات و حضونات موكتااااااا

جيالك يا قمر باذن الله اوعو تمشو من غيرى

نفسى اشوفك يا تيما اووووووووووووووووووى واشوف كل الناس الحلوة

وحشششششششششتيني

وبحبك

وعاوزة اشكرك على كل حاجه بجد عملتيها معايا في الايام اللي فاتت

وكلامك ليا كله
اللي خفف عني كتير واثر فيا قوي

واسفه اني ماكنتش بر

والله ما كنت بقدر افتح ولا اشوفه

مكنتش حكاهي اني مش رايقه لسه

لاني مجرد ما اشوف كلامك والله ما اقدرش اتاخر في الرد عنه حتى لو ايه

بجد شكرا يا فاتيما

انا بحبك قوي

قوي بجد

وحقيقي مش لاقيه كلام اقوله

انا كل مرة بقولك كده وتلاقيكي زهقتي مني

بس اعمل ايه

مش في حاجه اقولها فعلاااااااااااااا

بحبك

اخيرا يا تيما شوفتك ايه الطيبه دى كلها زى العسل بجد انا سعيده بيكى اوى والله
ربنا يسعد ايامك يا حبيبتى ويفرح قلبك ويفرحك بيوسف وعمالين العيال يقولو ماما
وهما شحطا دا انتى نونو خالص ههههههههههه باحبك اوووووووى بجد

من امبارح بالليل لحد دلوقتي و انا دخلت هنا ييجي ميت مرة
:)

ايه الصمت ده
قلقت انا كده

إرسال تعليق