.

.

أبــــدأ  

Posted by: فاتيما in



تشيل بنتها وتحطها على السرير 
عشان تحضن الجد المقعد لسنين
الحفيدة تبوسه وتطبطب برقة على شعره
وتديله بسكوتاية فيضحك ويوعدها :
- بكرة أخف و امشى على رجلى
و هفسحك و اخدك معايا 
 كل حتة مرحتهاش مع امك

 
يرغى ف كلام كتير عن زمان والنهاردة وبكرة
و فجأة بدون مقدمات يقول لبنته :
- انتى زعلانة منى ؟
تتخض 
ومتلقيش حاجة تقولها غير
- ليه بس السؤال دا دلوقتى ؟
- انا اسف لو كنت عملت حاجة و ضايقتك
- ..............................
- انا مش عارف قوليلى
هوه ليه كنتى دايما متضايقة منى ؟
احساس غريب داهمها 
كانت منتظرة تسمع السؤال دا من زمان 
و ياما حضرت اجابات و استعدت 
عشان تعاتبه و تحاسبه و تقول كل 
اللى ف نفسها 
ليه دلوقتى لما جت الفرصة
بقت حاسة انها مكسوفة  ؟
و انه ميصحش يقّولها ... انا اسف؟
وانه اكبر من انه ينطقها ؟
 تتحصن بحضن بنتها وترد بهدوء
-  متقولش الكلمة دى تانى 
انا مش زعلانة منك ابدا
ربنا يشفيك و يخليك لينا يا بابا

وتبص ف السقف وبعدين ف الأرض 
وتسكت .....






فلاش باك 
كام سنة لورا


- انا مش عارف 
انتى بتكرهينا كدا ليه؟
زى ما نكون يهود .. احنا عملنالك حاجة ؟

كانت عاوزة تقول حاجات كتير 
بس حست انه كالعادة 
النقاش هيبقى بلا جدوى فترمى جملة بآلية
- انا موافقة و متمسكة بيه
- احنا عاوزين مصلحتك
انتى بتعاندى نفسك 
وبكرة تدفعى التمن لوحدك 
وهقف اتفرج عليكى 
وانتى بتقولى الحقونى 
ساعتها مش هعملك اى حاجة 
عشان تبقى عارفة
- طب وايه الجديد  يعنى ؟
- قصدك ايه؟
 مردتش و مكنش قصادها غير انها
تبص ف السقف وبعدين ف الأرض 
وتسكت....







فلاش باك 
كام سنة لورا

بتلملم ف هدومها و تحاول تتوزان 
عشان تقدر تقوم وتخرج م المكان بسرعة
- انا سايبك بمزاجى 
لأنك خلاص متلزمنيش 
و لا ليكى قيمة ومحدش اصلاً هيفكر يقربلك
وبكرة تشوفى ..... و .... و.....
مكنش تاعبها ان اللى بيقول كدا 
جوزها اللى مفروض يحافظ عليها
و ان محدش موجود عشان يحميها منه
مكنش فارق معاها ألم الجسد 
قد ما وجعها كلامه بكل ثقة
  انها هتبقى زى الارض البور 
و عمرها ما هتخلف عيال تانى
كل ما تعدى سنة و هيا على نفس الحال 
تفتكر كل عباراته و تنبؤاته 
فتحزن بس تقول .... نصيب
وتبص ف السقف و بعدين ف الأرض 
و تسكت....





فلاش باك 
كام سنة كمان لورا



تخلع الدبلة 
وتحطها لخطيبها على ترابيزة الصالون
بقلب بارد و جملة وحيدة على لسانها 
- مش عاوزة اتجوز  حد
محاولات الأم و الحماة لمعرفة السبب تفشل
و مكنش ينفع ترد على سؤاله 
بانها متقدرش تتجوزه لأنه ببساطة 
واحد ميعرفش عنها اى حاجة 
و ميقدرش يساعدها لأنه كمان مش فاضيلها 
 وانها متقدرش تحكيله اى شىء
لأنه ببساطة بيعتبر حماه مثله الأعلى 
و تواجه عاصفة الغضب 
والتوعد من ابوها المتحمس للعريس
- خلى بالك انا لو جالى ملاك م السما 
و قولتى عاوزة تتجوزيه .. مش هوافق
احسنلك تنطقى تقولى فيه إيه
و إلا هتبقى انتهيتى
  و موتتى خلاص بالنسبالى ؟
فتبص ف السقف و بعدين ف الأرض 
و تسكت ....




فلاش باك 
كام سنة كماااان لورا


اقل من دقيقة صحيح بس مرت عليها ساعة
و هيا مزنوقة ف أسانسير العمارة مع حيوان 
تجسد فى شكل بنى آدم 
خلى الرعب يشل صوتها و حركتها
 مقدرتش تصرخ و تستنجد بحد 
كل اللى كان هاممها الدور الاول ييجى
و الباب ينفتح ... عشان تجرى
و مكنش ينفع تشتكى ..لأنها عارفة 
انها هتتسبب ف أذى لكل اللى حواليها
و مكنش ينفع كمان تفسر 
- يعنى ايه تنزلى و تطلعى ع السلالم 
كل يوم  و فيه اختراع اسمه 
اسانسير...انتى بتستهبلى !!؟
تبص ف السقف و بعدين ف الأرض 
و تسكت 







فلاش باك 
كام سنة كماااااااان لورا




تقعد ف صالة البيت الغريب 
متكومة ع الأرض 
و الكل لسه بيصحى م النوم 
فيلمحها الراجل اللى شكله مقرف
ينده ع الست الضخمة يسألها
- البت دى بتعيط ليه ع الصبح؟
- اهو .. بتزن عاوزة تروحّ لابوها 
- هيا كانت مع سماح ؟
- اه
- ليه كدا ؟.. يا بت اسكتى لا...
مش كنتوا وديتوها لأبوها و خلصتونا 
دلوقتى تحكيله وييجى يبهدلنا 
- لأ .. متخفش هيا شاطرة مش هتقول كلمة
(تعلى صوتها بنبرة محذرة
عشان ابوها لو عرف هيزعل و يكسر دماغها 
ويقطعها حتت كمان 
اوعى تقولى يا حبيبتى لحسن هتنضربى
اعملى نفسك وكأنه محصلش حاجة 
تكتشف انه ممكن يكون دا مصيرها فعلا
فتبص ف السقف وبعدين ف الأرض 
وتسكت






فلاش باك 
كام سنة كمااااااان لورا 



- خدى الشكولاتة دى انا جايبها عشانك
يلا تعالى ف حضنى و .....
سنانه الصفرا و ريحة بوقه كانت اوحش 
من كل مرة 
مترضاش تاخد حاجة و تتخلص من قبضته
و تقرر تتشجع و تطلب منهم
يمشوا الراجل دا من البيت وفوراااا
تجرى منه  لباب الأوضة التانية
 تخبط وتنده بصوت عالى
- ماما .. ماماااا ... ماماااااااااا
صوت الأب يعلى من جوا ويزعق
- عاوزة ايه ؟
- .........................
سكوت تام
فتخبط تانى جامد .... فيقول الصوت
- عاوزة ايييييه؟
-..................................
سكوت تانى 
فتخبط من الغيظ اكتر و اكتر
فجأة ينفتح الباب 
و يظهر من وراه 
الوش احمر متعصب و متنرفز
يكاد يمد ايده هيضربها  صارخاً
- عاوزة ايييييييييييه
يابنت ........ فيه حد يخبط كدا 
ايه .. جرى ايه ف الدنيا ؟
- ..................................
-  انطقىىىىىىى
مكنتش عارفة تقول اى شىء
 ارتباكها .. ضيع نص الكلام 
و الخوف ...ضيع النص الباقى
مبقاش قصادها غير انها تقف ف مكانها ثابنة
وتبص ف السقف وبعدين ف الأرض 
و تسكت ......







صوته بيرن ف ودنها و هوه بيصرخ 
و مش فاهم فعلاً
- انا مش عارف
انتى بتكرهينا كدا ليه؟
زى ما نكون يهود .. احنا عملنالك حاجة ؟




يعدى الوقت وتفرقهم أيام
تفتكر نبرة صوته و هوه بيقولها 
لأول مرة ... بحنان حقيقى
- انتى زعلانة منى ؟
تروح عيونها على صورته المتعلقة ع الحيطة 
و تقول ف سرها 
- أبداً 
تبص ف السقف و بعدين ف الأرض 
و تبتسم ....
و تقراله الفاتحة






وحده الزمن
سيدلك على الصواب
عندما يفقد الآخرون صوابهم

-(فوضى الحواس)- 






This entry was posted on الأربعاء, أكتوبر 06, 2010 and is filed under . You can leave a response and follow any responses to this entry through the .

47 كــــلام بيطــبطـــب عـــلى قــــلبى و روحــــى

كده يا طماطم
وجعتيلى قلبى بجد

فاتيما : : : بقالي كتير مكتبتش كومنتات عندك . بجد البوست تحفه عجبني بجد اووووووي انا مش عارفه ايه الحكاية بس البوست بجد رائع شدني جامد مش عارفه ليه بس حسه اني حبته حبته اوي البوست ده

تحياتي يا فاتيما وبجد وحشتيني

مع اني مش فاهم حاجة كالمعتاد يعني، بس الكلام شكله أدبياً حلو. تحياتي وسلامتي.

السلامو عليكم

فاتيما

أنتى تغيرى أسم البوست ده وتخليه
وجع القلوب

بجد كلامك فى البوست ده يوجع القلب قوى
عيشتينى قصه مع وحده معرفهاش
لكنها موجوعه قوى وقلبها تعبان من كتر الجروح
ومع ناس معرفهاش لكنهم قاسيين جدا معندهمش قلب يحسو بيه
ولا ضمير

عشت القصه من أخرها لأولها
كأنى فى وسط أحداثها

بسم الله ماشاء الله عليكى
أسلوبك روعه
يجنن
خيال

ليهم حق يتجننو بيكى
بس أنا محظوظ
أنا شفتك فيس تو فيس كده
ههههههه

ربنا يبارك فيك يارب
ويارب دايمآ فى تقدم

تحياتى لأجمل ملكه على عرش التدوين

محمـــد التركـــى

هي كدا خلاص ؟؟
خلصت!!

اتلخصت الحياة كلها في دقايق فلاش باك؟
كل اللي مرت بيه في حياتها في سنين مر في أقل من ثانية من الدقايق دي

ومبقاش منه غير جملة (انتي زعلانة مني؟)
اللي نهى بيها كل حاجة

مدونتك يارب ترضى عن تعليقي ده وتنشره
لأنها منطهداني ومش بتنشر تعليقاتي ، وبعت لك ايميل ، وكتبت لك عندي في المدونة كل بوست أكتب لك حاجة وأنتظر مع كل تعليق تكوني انتي
بس مش بتكوني

"انتي زعلانة مني؟"

اكثر من رائعه يا فاتيما
بجد عجبنى جدااااا البوست
بس هو كم مؤلم كثيرا
انتى احساسك فيه صادق جدا
تسلم ايدك

القصه
صدمتنى

وجعتنى

وجعتلى خيالى

بس مقدرش انكر انها رائئئئئئئئئئئعه اسلوب ومضمون

مش قادره اقول هى غلطتتها انها سكتت وبصت للسقف وبعدين للارض وبعهدين سكتت
لان ماحدش علمها تتكلم اساسا

تسلمى يا تيما

صباح الفل
:-*********************************************************

:-)
بعتلك اصطباحة وندلية تاكيد لدخولى
فطوم
فاهمكى بس بشكل مختلف
السكوت و الخوف من الكلام كان عندى ناحية الام اكثر فى طفولتى
بس لما كبرت و الادوار عندى اتغيرت بقيت بتكلم معاها و بحكى
و الحاجز ده اتكسر

مش حسالك ليه انت محاولتيش تقعد تتكلمى بجد لان اكيد المواقف وقتها ده التصرف الوحيد الى كنت تقدرى عليه و خصوصا مع شخصيتك و طبعك

عارفة لما اخويا كان بتعصب على بنته قصادى و يشخط فيها لدرجة انها تتجمد خوفا و متقربش منه لما يناديها
كنت بحضنها و اوشوشها متخفيش ده بس تهويش عمره ما حيضربك و صدقينى كده و قربى عليه و علشان تغلبيه اجرى فى حضنه و خبى وشك فى حضنه و هو مش حيقدر يرفع ايده ساعتها
عملت الى كنت بقولها عليه بس ساعات برضه كانت تخاف و تنسى نصيحتى
مستغربة اخويا قوى لانه شاف عصبية والدى و ضربه و ده كان عامل حاجز نفسى مابينهم لحد ما كبر و اتجوز

بس الزمن الجينات التربية ؟ معرفش ايه؟ خلته اقرب لطبع ابويا من عكسه

لسه فاكرة سؤال والدتى و هى بتقول : هو بيعامل بنته زى ما ابوه كان بيعامله ؟ و انا استغربت انها عرفت منغير ما تشوف او تكون موجوده و الاجابة الوحيدة الى عندى : ايوه

الحب و السماح الى منحتهوله يا فطوم
حب اجبارى متقدريش تمسحيه او تشطبيه
حب اعتقد انك متخيله انه لو اتقلب كره كانت الدنيا لدربكتها حيبقالها معنى

الزمن مر و الالم انشاء الله يمر و ربنا يرحمه و يسامحه و يكرمك من كل نعيمه يا فطوم :-*****************
و يكفى اننا ندعيلك بان يوسف عمره ميخاف من ابوه و لا امه و يحكلهم لما يلاقى حاجة تعباه و مخوفاه و يلاقى عندكم الامان النفسى
يارب

اه استنى خذى لسه دول
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

مش عارف اقولك ايه.

:(

عشت معاكى القصه ، واتمنى انها تكون ما حصلتشى لاى حد ، وان كان انا عارف انها بتحصل كتيير وكتير.

ولما البنت بتكبر شويه ، بتبص ف السقف (وهى عضه طرف شفايفها برعشه مكتومه ) وبعدين ف الارض وهى لسه عضه على شفايفها بألم ، وماسكه دامعه من الفلب اوى ، كلها حسره والم . ومش راضيه تنزل.

وفى اثناء ذلك كله ، لهيب فى القلب ليس له مخرج ، غير انها تبص ف السقف وبعدين فى الارض وتسكت ......

كلامك وجعنى جدا جدا جداااااااااااااااااااااااااااااااااااااااااااااا

صباحك فل يا جميل

موجع اووووووووووووي :(

اول مرة النهاردة اتصفح المدونة بشكل اوسع اليوسيفيات حلوة اوي وجع قلب ودموع ربنا معاكي

مامت يوسف
ام الخير
فطومة

تدوينة رائعة
النص "حرفيا وادبيا" اراه اكثر من جميل
وبالموناسبة عندك كام نص تستحق ان تجمع وتنشر

اما من ناحية المعنى
ف أه ثم أه
ويا ويلتى لو لم يسامحنى ابنائى

الاباء والابناء اسرى وضحايا هذا المجتمع الذى نعيش فيه بكل احباطاته وعيوبه
وتخلفه...ومن منا يدعى انه سوى
فهو واهم ...ولذا ليس لنا الا التسامح
والغفران
ربنا هو التواب الرحيم
ارحموا من فى الارض يرحمكم من فى السماء

ادعيله بالرحمه وسامحيه يرحمكم الله

البوست دا عايز كلام كثييييير

تحياتى وتقديرى

حبيبتي فاتيماأأأنا مش حقولك وجعتيني..انت قرتيني و كتبتيني!!بجدالبوست ده خلاني أدمع..لأني رجعت فلاش بك سنين كتير ورا و افتكرت نفس كلام الأب و نفس رد البنت و احساسها ان الناس دي مش فاهماها ولا حساها..ورجعت سنين تانية لورا و افتكرت الهدوم اللي بتتلم ووجع الجسم اللي مبيروحش و كلام الزوج اللي بيقتل ووعد انك عمرك ماحتفلحي و لا حتخلفي تاني..و برغم المحاولة انها تثبت انها غلط بس كتير قوي بتحس ان كلامه ده لعنة صابتها و عمرها محتتخلص منها..الأب موجود و البنت نفسها كل مرة تشوفه تقوله ان كان صح و انها هي بس اللي بتدفع التمن..بس الكلام بيتحشر في القلب و مبيطلعش والبنت برضه بتبص في السقف و الأرض و تسكت..لحد ما السكوت بقى مع كل الناس..حتى مع نفسها..لأنها مش قادرة حتى تشتكي لنفسها..لأنها قرارتها هي و اختياراتها هي..غلطة في الأول تجر وراها ميت غلطة بيتبنو فوقها لحد مبقى سد عاليي قويييي خايفة يتهد على راسها هي برضه.أنا بحبك قوي يا فاتيما

ياااااااه عليكى يا ماما

بجد والله بكيت مع كل ثانيه


ربنا يارب يرحمنا برحمته

كنت سعيد برؤيتك فى اللقاء وبكت عيونى مع كل حرف هنا

صباح البنفسج يا فاتيما
اصلهم بيقولوا البنفسج زهر حزين .....وانا بموت ف كل درجات اللون ده ...مع اني ولا يوم افتكرته زهر حزين لاني دايما حساه بيبهج روحي ويطلقها في الجو طفلة مشاغبة ...افتكرت بس انه حزين دلوقتي لما قريت البوست ده ....مش عارفة اقولك اية بجد .....فلاش باك ورا فلاش باك خلاني مش اتوه ولا حاجة بس خلاني احس نفس الاحساسات اللي انت كتبتي عنها ......بكل ما فيها من حزن ...واستسلام ....واقول لنفسي واسألها لية نستسلم ...؟ وتكون الاجابة ...ان احيانا بيكون الاستسلام هو الحل الافضل....واحيانا كتيرة ميكونش غيرنا ادامه لان الشخص ده مينفعش انك تقوله حاجة او ترد عليه بعلو صوتك ...مينفعش ...مش عارفة انا كدة وصلتلك قصدي والا ....؟
وحشاني كتير كتيييييييير وبتمني اشوفك في اقرب وقت

بجد مش عارف اعلق اقول ايه بس
قصة جميلة ومعبرة وموجعة جدا
ومصدمة للغاية
وشيقة جدا
بس اعمل ايه
ابص للسقف وبعدين الارض واسكت خالص

تحياتي يا ام يوسف ياجدعة

القصه دي بتوجع اوي :(

بس ماتعقدش ان الغضب ممكن يقل بعد كل ما فعل " بضم الفاء " بالغلبانه دي وتقول مفيش ... هو يمكن بيتحول الغضب لوهن

تحياتي

يااااااااه على وجع القلب
والغصه في الحلق

ساعات الخوف بيدمر حياتنا كلها

بس رائعه وجميله جدا تسلمي

دمتي بحب

يا تمتومة ده؟؟
تحفة يا بنتى
و الله بجد حلوة جداااا
بس خلتيني اعيط
و حسيت انى مخنوقة
انا بتصعب عليا اوى المواقف ديه
تحياتي ليكي يا قمرة
و على بوستك
مووووووووووه

أسلوبك جميل أوي في حكاية القصة.. استنيت لما أوصل لنهاية الفلاش باكوبجد شدتني أوي القصة إني أعرف آخرها

رائعة في إحساسك انت


امممم... حاجةبعيدة عن البوست خالص.. بس كنت عايزة أشكرك و أستغربك في نفس الوقت
:$
هو انت بجد فاكرة يوم ميلادي؟؟
طب ليه و ازاي؟؟!بجداستغربت أوي
بس مش عارفة أنا فرحت أد إيه لما لقيت منك التعليق دة في الوقت دة. بجد كنت هعيط من الفرحة :). ربنا يكرمك يا تمتومة بجد. ميرسي أوي بجد إنك افتكرتيني..و انك أصلا لسة فاكراني.... مش عارفة أقول حاجة،ومش عارفة أقول لك حاسة بإيه... بس بجدشكرا

اوقات كتير بيكون قله الكلام رااااااااحه
او زهد
او لان الانسان بيحس ان مفيش فايده من الكلام فبيزهد فيه
انا كمان بيحصل معايا موضوع الفلاش باك ده
كالعاده هذيانك راااائع ياقلب البحر

رغم إن البوست لا يخرج بالتأكيد عن كونه مأساة إغريقية , وتمنيت أن تكون قصة خيالية لا أكثر

لكن هوه فيه أسلوب أدبي جميل
اسلوبه كمان رائع

يارب تكون قصة خيالية

تصدقيني لو قلت ليكي ان جسمي قشعر في النهاية وكنت علي وشك ادمع .

اكثر حاجة تقهر إن الواحد يكون مظلوم طول حياته ومش يتكلم ولما يجي يتكلم كلمة يقول عكس اللي هو عايز

بجد يا فاتيما انتي ابدعتي جدا في البوست ده ربنا يكرمك يا رب انتي ومن تحبي .

اغرب شىء اننا نأذى اللى بيحبونا من غير ما نحس

و الاغرب منه انهم بردو يفضلوا يحبونا

متقدرش ترد لانه اب ومن المفروض اننا مش نزعل منهم ابدا وميصحش انهم يعتذرولنا مهما حصل منهم
وهى اخلاقها عاليه جدا لانها تفهمت انه مش يصح يعتذر ولا يصح انها تعاتبه

اوقات بيكون كلام الاب جاحد لكن بيضطرو لعمل ذالك لانه فيه المصلحه لكننا لا نعرف ابدا
ودائما ناخد كلامهم على انه كرهه لنا وفى الحقيقه حب لنا ليس اكثر

وهى معزورة فى تعبيراتها واحساسها لانه احساسها يقتلها كل لحظه
شده الاب وقسوه قلبه تجعل قلبها يمتلىء بالحقد والكرهة وعدم الامان بين احضان الاب والام
فهذا الناتج الطبيعى لتعاملهم معها

قصه جميل جدا ومع الاسف تتكرر دائما فى واقعنا وهذا يؤدى الى دمار الكثير من الفتيات

احسنتى اختيار قصتك يا تيما
بجد قصه روعه جدا

تسلميلى يا قمر

وجع قلب وألم وذكريات وفلاش بالك لسنين بتعدى من عمر الإنسان وكل لحظه بتعدى معاه
رائعه يا حبيبتى
تسلم إيدك
دمتى بخير

نحن ما الا خبرات الماضى آهاتة

جميله جدا ومعبره جدا يااحلى ام في الدنيا ....

سبحان الله الدنيا فيها افعال غريبه

الله ينور يافاتيما

فى لحظات قليله جدا مرت من امامها شريط ذكرياتها شافت فيها كل الم ومراره لكن بعد ما تحس انه خلاص ح يقابل رب كريم كل ذلك يتمحى ولا يجوز له غير الرحمه والدعاء له

حاجه توجع القلب ربنا ما يكتب على حد مراره هذه الذكريات

بوست هايل يا اجمل فاتيما

انا سعدت حقا بوجودى فى اللقاء واسعدنى اكثر انى شفتك واتعرف على شخصك بالرغم من انى مش قاعدت معاكى
لكن عايزه اقولك انى رسمت ليكى صوره فى خيالى قبل ما اشوفك وكان هذه الصوره طبق الاصل من اللى فى مخيلتى
شئ غريب حقا لكن هذا هو احساسى
لذا انا مندهشه حقا فلماذا انتى بالذات الصوره تتحقق بهذا التدقيق

ربنا يسعدك ويفرح قلبك ويجمع شمل الاحبه باذن الله

ايه وجع القلب ده

حرام عليكي هو انا كنت ناقصه

حلوة يا طمطومة ... آه بتوجع .. بس حلوة

بصى بقى انا بجد لسه واصل اسيوط وتأخيرى بسبب شغلى اللى بين اسكندريه مقر شغلى ومتابعه فى السويس واسرتى فى اسيوط بس لازم ان شاء الله بكره فنجان قهوه ليكى وفنجان للعرابيه يعنى هشرب اتنين قهوه عشان اعرف ارد عليك اما المدونه اللى انا كنت بقصدها فهى مدونة ( آه منك يا دنيا ) فلقد استفدت انما واولادى منها كتير اوى ربنا يحميها ويحميكم والحمد لله رب العامالمين اللى بيكرمنى بناس كلها خير .
عمك مدحت

كتاباتك عاوزه تركيز الى القاء فى صباح الغد بأذن الله مع اطيب امنياتى بالتوفيق .
عمك مدجت

الحزن موجود في كل القلوب مزروع من احزان كتير عايشها
كلامك روى حزني وصحى اليأس في فكري بس عارفه رسالتك فكرتني ان في حاجات كتير بنكرهها ومش عارفين نخلص منها بس في الاخر لازم نتعايش معها ولو جه من بعدها نور ينور طريقنا مش هيمسح سنين الالم القديمه

خير الجميل مش باين ليه؟؟؟

فاتيما .. تحيه خالصه لحضرتك على القصه ويبدو انها رمزيه وبينى وبينك ما فهمتهاش رغم القهوه والتركيز الشديد منى مش عارف هل هيه عوامل سن ام أن ليس لى فى القصص الرمزيه رغم ان هوايتى القراءه وان كان معظمها تاريخى وسياسى .... التحيه الكبيره بجد على لقاء يوم 2 اكتوبر كنت اتمنى مشاهدته ولو من بعيد خاصة وأن الجمعه والسبت اجازه بس بقى ظروف شغلى (مكتوبه بالتفصيل الممل عند حفيدة عرابى ) المهم ربنا دايما يوفقكم وياريت تسمحوا لمن هو فوق الخمسين بالمشاركه ولو من بعيد وخاصة فى اللقاءات الخيريه بجد هتكسبوا ثواب كبير ... ربنا يحببكم فى بعض مع خالص تحياتى .
عمك مدحت

فاطوم يا فطوم
ازيك
بجد انا مبسوط لاني حاسس انك فرحانلنا ورحاب برضو حاسه بكده بجد ربنا يكرمك

وميرسي على التهنئنة الي بره ديه
بجد احرجتيني
:$
كلك ذوق
:)

أزيك يا فاتيما

معلش عارف متأخر قوى بس بجد انا كنت و لازلت بأخطف النت خطف كدة (:

مش عارف ليه

حسيت ابنت جدا

و حسيت بتعبها و كلامها اللى متقلش

و حسيت أنى قلبى وجعنى ليها

بس يارب تخلى بالها من ده مع بنتها

ربنا معاكى دايما

يعني اتجوزت واحد غصب عن ابوها وطلع ندل وطلقها....ودلوقتي عايشة مع ابوها وبنتها؟ طب مين الراجل ابو سنان صفرا وبقه ريحته وحش وفي بيتهم وجايب شيكولاتة ومش ممكن يكون ابوها لانه بيتكلم بعدها علي طول؟؟؟ انا بصراحة مش عارف مييين؟ اوعي يكون متحرش زي بتاع الاسانسير؟؟؟ سابت خطيبها واكيد قبل جوزها لانه ماتعرفه بس ابوها كان حابب الخطيب ده...الراجل اللى شكله مقرف عمل ايه هو كمان؟ اعتدي عليها؟ طب الست الضخمة ساكته ليه؟ وميين سماح؟سوري للاسئلة بجد ...مكتوبة بغموض.

:((((((

بجد أنا مش عارفه أقول اي حاجه عن البوست ..

عشان فكرني في حاجات كتير بحاول أنساها

فاهكتفي بالصمت
:(

موناليزا
-------

انا اسفة يا مون مون
معلشى حقك عليا






ranim
-----
انتى كمان وحشتينى
يا حبيبتى
مبسوطة ان البوست عجبك كدا
:)




وجهة نظرى
---------
معلش يا معتز
المهم انه ادبياً نال الرضا




محمد التركى
----------
ميرسى يا محمد
بس بلاش الملكة والحاجات دى
عشان مبعرفش ارد اقول ايه عليها





يوم جديد
--------
حياة الواحد غالبا فلاشات باكات
و لو كان ينفع الفلاش باك
بدل ما يبقى باك ..
يبقى للفيوتشر
كانت الدنيا بقت جنة
انا عمرى ما ازعل منك
يا يم يم ابدا




حنين
----

تسلميلى يا حبيبتى
كلك ذوق




richardCatheart
---------------

انتى قولتى حقيقة فعلا
محدش علمها غير انها تبص ف السقف
و بعدين ف الأرض
و تسكت ...
تسلميلى انتى يا قطوطتى





wanda
-----
متفقة معاكى يا ون ون
و بستغرب زيك
ازاى حد يعانى من شىء و يكرره مع اطفاله او اغلى الناس عليه ؟!
أنا كمان
************************
*************************
و
××××××××××××××××××××××××××
×××××××××××××××××××××××××




ويكا
----

متقولش حاجة يا ويكا
انا معرفتش اقولك عندك حاجة برضو
يبقى بصرة
:)




ندى الياسمين
----------

صباحك ندى و ياسمين
يا صباصيبو
يا جميلة



sally
-----

معلش يا لولى
مش تبطلوا تكلوا رقاق بقى
:)



Mona Abo - Elso3od
------------------

ميرسى يا منى
نورتى المطرح كله




sal
---
انتا من الناس اللى عارفة
انهم هيقروا بإحساسهم
و غالبا عارفة عاوز تقول ايه
و كأنك قولته يا فندم




dahlia...
---------





اسير الجراح
---------
انا كمان انبسطت لما شوفتك يا احمد
بجد كانت مفاجأة حلوة
منحرمشى منك



re7ab.sale7
-----------
دا حقيقى يا رحاب
احيانا الأنحناء للعاصفة حتى تمر
بيكون وقتها
اسلم الحلول و اعقلها
البنفسج لون البهجة و الحزن ف آن واحد و شبههك قوى ..على فكرة





Haytham Alsayes
---------------

:)
تعليقك من الطف التعليقات
ع البوست يا هيثم

بجد
وابتسامة كبييييرة اترسمت على وشى
و انا بقراه

منحرمشى منك

فتاة من الصعيد
--------------
جايز يا فاتى يكون الغضب تحول لوهن
او تخاذل
او خوف
او نضج
او خبرة
او أى حاجة
بس عاوزة اقولك حاجة يمكن اكون غلطانة فيها او اكيد غلطانة ..الله اعلم
بس تعليقك خلانى عاوزة اقولها

الواحد لازم يفهم انه معرض لأزمات
و محن طول الوقت ..لازم
مكتوبة عليه و مقدرة و هيشوفها
مش هى دى المشكلة
المهم ما بعدها
يعنى الواحد يتصدم
و يُفعل به ما يُفعل
يتألم و يتعذب ..
و بعدين
يقوم من تانى
و لا ينكسر ؟!!
دا اللى المفروض يشغل تفكيرنا بعد المحن و الصعاب
هنعمل ايه ؟
مش اتعمل فينا ايه..
عشان الواحد لو قعد يزعل على نفسه هتركبه هموم الكون و مش هيقوم من مطرحه يا فاتى و لو اتهدت الدنيا من حواليه ...
يا رب اكون قدرت اشرحلك وجهة نظرى
تحياتى ليكى يا حبيبتى اكتر



واحدة مفروسة
------------
مبسوطة انه عجبك يا فروستى
منحرمشى منك
و لا من سؤالك
و تعليقاتك




Wish I were a Butterfly ...
---------------------------
مبسوطة ان القصة عجبتك يا هبهوب
و يا ستى كل سنة و انتى طيبة
و الحكاية مش صعبة قوى كدا
زمااااان عملت بوست عن الاراج و اعياد الميلاد و بستعين بيه ف معرفة تواريخ ميلادكم ..بس كدا سهلة
متقوليش حاجة
المهم تكونى بخير وسنة حلوة يا من غير ما توشى
بترفلاية رقيقة صغننة .. كبرت سنة





عاشقة الرومانسية
----------------
بت يا دودو
انتى بتقولى كلمة راااائعة دلوقتى
لما يبقى مفيش فايدة
الواحد بيزهد فى الكلام
دى حكمة ..بس جاية نتاج الوجع
للأسف
يا رب تكونى بخير يا قطتى




د.ياسر عمر عبدالفتاح
-------------------
هههه
أغريقية ايه بس يا دوك ؟!!

و الله انتا علطلول كدا
محسسنى انك براءة الدنيا
و انا فكرتى عن الدكاترة دايما
انهم شايفين اسوا ما ف المجتمع بحكم شغلهم مع الامراض و التى يصاحبها امراض نفسية بالتبعية
و لهذا بحس انهم دايما قرفانين
و نفسهم مقفولة
و معندهموش امل فى أى حاجة
غبرتلى الفكرة دى خالص انتا بجد

طب خلاص عشان متتخضش كدا
هنمشيها قصة خيالية

منحرمشى من زياراتك
و تعليقاتك




MR.PRESIDENT
------------

انتا اللى بتبدع دلوقتى ف تعليقك يا بسام
الواحد فعلا كتر سكوته بيخليه وقت ما ييجى ينطق ..ميعرفش او يقول العكس زى انتا ما قولت

مبسوطة جدا ان البوست عجبك
منحرمشى من طلتك




قوس قزح
-------

لأ ..مش غريبة
انهم يفضلوا يحبونا يا داليا

الحب مش مقايضة
و له تمن
الحب اللى بجد
يفضل موجود حتى لو الف حاجة عاكسته
ووقفت ف سكته
و حاولت تمسخه و تشوهه
بعد ما يفوت الوقت
و المحن تنتهى
بيرجع تانى منزه عن اى شوايب
زى الدهب لما ينصهر كدا
و يرجع نقى
يفقد شكله يمكن
لكن يفضل غالى ..
و يغلى بمرور الزمن ف قيمته

انا عاوزة اقول انى بحبك جدا
ممكن ؟

ألوان
-----

نورتى يا الوان
ميرسى على ذوقك
و اهلا بيكى دايما





gogo!sf
-------
كلامك صح ف كل سطر فيه
منحرمشى منك
و انتى اللى قمررررر





الحب الجميل
---------

اجمل حاجة
انها فلاش باك يا حبوبة
دى ف حد ذاتها نعمة لا يدركها كثيرون

دمتى بكل الحب يا حبيبتى





الطائر الحزين
------------

فعلا
هذه حقيقة مؤكدة
يا إيهاب




ماجد العياطى
------------

الله ينور عليك يا ماجد
ميرسى قوى
كلك ذوق
و دايما رافع معنوياتى كدا





mrmr
-----

انا الأسعد و الله يا مرمر
و عادة انا ببقى يا فوق التوقعات يا تحتها ... معاكى الدنيا جت بالمضبوط
معرفش دا سببه ايه؟
اكيد انك شفافة قوى
فشوفتينى بقلبك قبل عيونك
و الأتنين اتفقوا ..
منحرمشى منك ابدا




sweet angel
-----------

اسفة يا انجل
حقك عليا يا ستى



shaimaa
-------

بجد يا شيماء
طب الحمدلله
انها عحبتك





راجل صعيدى
----------

معلش يا استاذ مدحت
يبدو انى كتباها بطريقة
مش واضحة قوى ..لأن حضرتك مش لوحك معاك وجهة نظرى و تراكيب ..
يعنى حصل خير
و ان شاء الله المرات الجاية حضرتك تشرفنا و تنور اللقاءات كلها

حضرتك نورت المطرح كله




eng_semsem
----------
اهلا يا باسمهندس

تعرف ؟
تعليقك فكرنى بتشبيه سمعته زمان مش فاكرة فين بيقول برضو ان ماضينا بيحصل فيه حاجات و بندفنها قدر الأمكان فى اعمق ارض ..فتتحول لبذرة ..تكبر شوية بشوية لحد ما تبقى جذر و ينبت و لو مقتلعناش الضار منها بياخد المية من الزرع اللى ساكن جاره و ممكن يموته لو اتساب و اهمل

حاجة كدا يعنى
و اهلا بيك دايما





الحب الجميل
---------

انا اهو يا حبوبة
و انتا الجميل
يا حب
يا جميل




Ahmed Mubarak
-------------

ازيك يا احمد
و الف مليون مبروك ليك انت و رحاب
يا بنى انتوا فرحتوا قلبى
بس انا مش عارفة احتفى بيكم كما يجب
ان شاء اله ف كتب الكتاب هعملكوا هوليلة و الفرح بقى هينذاع ع الفضائيات .. اقل واجب يعنى

:)

ربنا يسعدكم و يهدى سركم
الف مليون مبروك يا احمد




Ramy
----

معلش يا رامى ربنا يعينك
المهم تطمنا عليك من حين لآخر
عشان اخواتك بيتخضوا عليك

بص انتا ف تعليقك دا
قولت جملة عبقرية
صديقة ليا قرت القصة و سألتنى
واحدة زى دى ليه تمر بكل دا و هل ينفع تبقى بعد اللى مرت بيه دا تبقى راضية و مسامحة كدا وخلاص ؟؟
قولتلها ان فيخ خير مستخبى
ف وسط كل هذا الالم
انها تكون حريصة على بنتها
متوقعش ف نفس المصير
و انها تحذر صديقاتها
انهم يخلوا بالهم من بناتهم
و لادهم كمان

متغبش يا رامى
عشان بتوحشنا يا ر ر



Tarkieb
-------

ياه يا باشمهندس ؟
دنا لو جاوبت سؤالاتك دى كلها يبقى لازم امسح البوست و اكتبه من اول و جديد ..واضح انى كتبته بطريقة مربكة
معلش ... المرة الجاية هركز اكتر

انتى نورتنى
و حمدلله ع السلامة



ghada mOhesn
------------

و ماله يا غدغود
الصمت بلاغة

و ميرسى ع التعليق التانى
بس مش هنشره عشان هنتحسد بقى
لكن انا كمان يا حبيبتى
انا كمان




мαησηα
------

ان شاء الله ربنا يهدى الاحوال
و تقدرى يا حبيبتى
هبقى ابعتلك ميل عشان عاوزة اقولك على حاجة ..ربنا يسهل و الزهايمر ميشتغلش بس و انسى انا مش عارفة مالى الايام دى ...
خلى بالك انتى من نفسك
يا منونتى

الله
كتبتيها باتقان اوى
وجعايللى قلبى بجد
عجبنى اوى اوى البوست دة انا حسيت من كتر مااخدنى البوست انى انا البطله

خالتى انتى احساسك عالى عالى

على فكرة مش لازم كل الأحداث دي كلها تحصل لإنسانة واحدة بس .. ممكن تكون فلاشات باك من حياة فتياة كتير

المؤلم إن كل الأحداث دي تكون حياة فتاة واحدة بس .. كتير قوي ده

لكن الأكثر إيلاما هو إن الأهل ما بيجيش في بالهم الألم النفسي والجسدي اللي ممكن يلحق بالصغيرين .. وإنهم بيكونوا في سن بيكون أقرب للخوف منه للجرأة في المواجهة

إرسال تعليق