.

.

♥ .... بــــاب الجــنـة .... ♥  

Posted by: فاتيما in





الكاسيت شغال بأغانى مبهجة
دوشة حواليها ف كل مكان و زحمة 
اهل و اصحاب و جيران برا ف البيت 
و هيا جوا قاعدة قصاد المرايا 
بتبص على روحها ..ف اللحظات الاخيرة 
قبل ما تطلع لعريسها
عشان يلبسها الدبلة 



مكنتش عارفة ليه ساكتة كدا 
و مش عارفة تفرح قوى
زى ما المفروض يحصل 
يمكن لأنها حاسة بمسئولية كلمة 
أيوه
اللى نطقتها لما سألوها ..ايه رأيك  ؟
و يمكن لأنها خلاص بجد 
هتدخل دنيا جديدة
و يمكن لأنها خايفة دايما من الفشل 



كل دى يمكنات 
لكن الاكيد 
انها مشتاقله قوى 
و كان نفسها يكون موجود 
من اول لحظة ..لحد دلوقتى 
كان هيشاركها القرار و الإختيار 
كان هيتحمل عنها العبء كله 
و يشيل كل الخوف من بكرة 
و يشيل كل الهم 
و يشيل عنها كل مسئولية
و يسيب لها حاجة واحدة بس 
هيا ... الفرحة 



آه يا بابا لو كنت هنا 
كنت عرفت أرجع عيلة صغننة 
مش ف بالها 
غير انها تلعب و تفرح 
و تضحك و تجرى و بس 
تخلص مكياجها و اللمسات الاخيرة
وتقوم  تخطى ناحية الباب 
تيجى مامتها  من وسط الدوشة 
عشان تبص عليها فتسكت حبة وتقول 
زى القمر ما شاء الله ...و ....
متكملش عشان صوتها يتخنق
بدموع فرحة و سعادة انها خلاص بقى 
هتتطمن علي البنت الحيلة
و ربنا هيكرمها اخيراً براجل ابن حلال 


تبص الام لمرات ابنها 
فتفهم علطوووول المطلوب 
و ترقع زغروطة طويييييييييلة 
ترن فيرد عليها الحبايب من برا الشقة
و برا البيت و ف كل الشارع 


تخرج عروسة البحور لعريسها 
يبصلها ..فيتنح شوية كدا 
و بعدين ... يبتسم قوى 
هوه عارف انها حلوة 
و ضحكتها دايما تجلجل
و خفة دمها هيا اللى جبته 
لحد عندها شارى و مصّر تكونله 
 بس هيا النهاردة ..احلى و احلى 
من كل مرة
يقرب منها .. و يستنى لما تقعد 
و يقعد جنبها وقلبه بيرفرف 
و الزغاريط حواليهم مبتبطلش



الكل بيبارك و بيسلم 
و بيقف جنبهم يتصور 
و هوه مش عارف يقولها 
و لو كلمتين على بعض 
 محدش سايبهم لوحدهم لدقيقة 
و هيا مكسوفة و ساكتة على غير العادة 
يا ترى بتفكر فى إيه؟


اخو العروسة بيتلقى التهانى 
و مامتها مخووتة بالمعازيم و مضايفتهم 
مرات اخوها شايلة البنوتة الصغننة 
و بتبصلها ... بفرحة صامتة  و زغروطة عالية
من حين لآخر
صديقتها الغالية .. مبتبعدش عنها لحظة 
و كل شوية تضحكلها بعيونها الطيبين
و تقولها يا رب 
حظك يبقى من اسم خطيبك
و تجيب ابنها الصغير تقعده على حجرها 
و تهمس ..عقبال ما اشيل عيالك
و افرح بيكى 
زى ما وشك كان حلو عليا
و دخلتى دنيتى و معاكى الفرحة



صوت من وسط الدوشة يعلى 
الله ... ما تيالله يا إخوانا 
كلبشوا العروسة بقى قوام قوام 
و لبسوها الدبلة 
العريس يرتبك و يبتسم 
و يطلع العلبة من جيبه
و يبص لعيون عروسته بحنان ويمد ايده
عشان يلمس ايدها النهاردة 
و لأول مرة من يوم ما شافها 
و صحيح كان مستنى اللحظة دى 
بس مكنش ف باله ان اول مرة دى 
هتحصل و الف عين عليه ..ايه ده !!!


تمد ايدها و هى بتضحك برقة 
يلبسها الدبلة ... و هيا كمان 
زغاريط ترن و ترن و ترن 
و يقرب منها شوية عشان يهمس 
... ألف مبروك  ...
فترد عليه بدلع اسكندرانى 
بطعم البحر و ريحته و شدة موجه و رقته
.... الله يبارك فيك  .... 


كان عاوز يقولها حاجات كتيييير 
كان عاوز يقول
انه حاسس بنعمة ربنا عليه انها اتقدملها 
و انه هيعوضها عن كل حزن شافته 
و انه هيكون سندها و ضلها 
و انه ما صدق لقى اللى تخرجه للدنيا 
و انه جايز مقلش لحد دلوقتى انه بيحبها 
بس يوعدها يقولها دايما و بكل شكل ممكن
لو هتديله الفرصة 
كان عاوز يقولها 
انها غالية عنده و انها سكنت قلبه 
من اول لحظة شافها 
و انه كان و ما زال حاسس انها نصيبه الحلو 
اللى ربنا آخره شوية 
عشان يكافئه بيه
و انه اتعذب كتير و شاف مر ..بس 
قلبه بيدله انها الملاك اللى نور حياته
عشان و هوه ع الأرض 
يدخله الجنة  و يفتحله بابها

كان عاوز يقول كلام كتيييييير 
بس الزحمة و الناس ..خلوه يسكت



اما هيا 
فكانت عاوزة تقوله حاجات كتير  برضو
كانت عاوزة تقوله
انها وافقت عليه لأنها حاسة 
انه انسان طيب و حنين 
و انها محتاجة سكن ودفا مش أى راجل و خلاص 
وكانت عاوزة تقوله 
لو يا ريت يوعدها يحافظ عليها بجد 
و يقدر اخلاصها  و حنانها اللى
اللى لو اتوزع على سكان الأرض 
هيفيض منه لكواكب تانية 
وانها فرحانة بيه بس مش عارفة مالها كدا 
مخضوضة و ساكتة 
كانت عاوزة تقول حاجات كتيييير 
بس الناس و الزحمة خلوها ..تسكت


كانوا مشغولين بالمعازيم و المباركات
و الليلة بكل تفاصيلها 
بس كل واحد فيهم 
كان مستنى اللحظة 
اللى هيمشى فيها الناس 
..و يقفوا لوحدهم شوية 
عشان يسلم عليها 
لأول مرة بعد ما بقت خطيبته رسمى


صحيح لما جت اللحظة دى 
كانت مكسوفة و باصة ف الأرض 
و صحيح هوه ارتبك و معرفش يقول كل حاجة 
بس اتفق معاها يكلمها قبل النوم 
عشان يقولها تصبحى على خير 
ضحكت و بصت ف الأرض تانى 
و قالت ... طيب 



الكل خلاص مشى و دخلت اوضتها 
اصوات برا بترتب البيت اللى إتقلب كيانه 
و هيا بتغير هدومها و تترمى ع السرير
بعد يوم طويل و الف حاجة انعملت فيه 
تبص لصورة باباها المتعلقة ع الحيطة 
و تساله ...يا ترى لو كنت هنا يا حبيبى 
دلوقتى كنت هتعمل ايه؟



انا عارفة 
اكيد كنت هتدخل تشوفنى نمت ولا لسه؟
كنت هتسألنى 
مبسوطة يا بت بعريسك و فرحانة ؟!!
كنت هتقولى .. لو الواد دا زعلك قوليلى
و انا هرميهولك ف المالح طوالى
كنت هتقولى بس متخفيش .. آه 
أصل الجدع شكله ابن حلال و طيب
و بعدين 
حتى لو انا مش موجود يعنى
مانا مربى بنت بألف راجل 
يعنى انتى تغلبيه ب 999 نفر 
عاوزة اييييه بقى ؟!!


تسمع اصوات من جوا قلبها تقولها 
إفرحى يا دودو و ميهمكيش
اللى ربنا كاتبه هيكون و انتى تعبتى كتير
يمكن هوه اللى جاى يعوضك 
و يخلى حياتك احلى ما كنتى تتمنى 
سيبى بكرة ..لبكرة 
و اديله فرصة .. زى ما بيقولك 
هوه انتى كدا دايما خايفة تفرحى
و خايفة تحبى 
و خايفة تعيشى و تتأملى خير 
يا بت سيبك من اى خوف 
الغالى بنفسه اهو قالك اهو 
متخافيييييش 


ابتسامة تطلع من قلبها 
و تمسك موبايلها عشان تشوف 
كام رسالة و مكالمة فاتتها 
اول ما تمسك الجهاز ... يرررررررن
و تلاقى اسم عريسها ع الشاشة 
مستنى تفتح عليه  ..الخط 
و مستنى تفتح عليه كمان
باب الجنة  










---------------------------------------
اهو هوه دا 
اللى هيصونا يا قلبى
و هيحافظ علينا 
انا و انتا يا قلبى





This entry was posted on السبت, أكتوبر 16, 2010 and is filed under . You can leave a response and follow any responses to this entry through the .

58 كــــلام بيطــبطـــب عـــلى قــــلبى و روحــــى

ألف مبروووووووووك
يا عروسة البحور


جه البحار خلاص
اللى هيخطف العروسة من حزنها و وحدتها
و تعيش معاه اجمل حدوتة

ربنا يسعدك يا دودو
و يخلى نصيبك من اسم خطيبك
و تفرحى
و تتهنى
يا رب

الف مليوم مبروك يا قطتى
و عقبال ما اكتب بوست كتب الكتاب
و الفرح
و اول عروسة بحور صغننة
تاخد روحك الحلوة
و قلبك اللى بوسع البحر دا

الف مليار مبروك يا حبيبتى

فاتيما

الله على وصفك تحفه بجد

مليون مبروك يا دودو
ربنا يفرح قلبك ويسعد ايامك يارب

بجد فرحانه بكلامك اوى يا فاتيما وكانى باتفرج على فيلم مش باقرا بوست
يارب على طول بوستاتك فرح وخير وحب


زهراء

البوست ده علشانى بجد؟
انتى وصفتي كل شئ وكانك عايشه جوايا مش بس جنبى
انا عيونى دمعت من الكلام ومن الصور
ومن اول كلمه ومرسوم على وشى ابتسامه كبيره ومعاها دقات صوتها عالى من قلبى
بجد انا مش لاقيه كلام يتقال

ربنا يفرح قلبك انتى فرحتينى بجد ياام يوسف

النهارده انا رحت شغلى
حصل كام موقف ضيقونى وكنت قاعده مهمومه ونسيت كل ده لما قريت البوست
وكانه نقطه عسل حلت ميه البحر


ربنا يبارك لى فيكى ياقلب البحر وروح قلب دودو من جوه

بحبببببببببك
بحــــــبك
بـــــحبــــكــ

وربنا ياختى انا اللى صوتى اتنبح من الزغاريت وحيلى اتهد من طلوع السلالم والتصوير

المهم انها كانت بجد زى القمر
ربنا يسعدها واشوفها بقى بالفستان الابيض

اسكتى يا فطوووووووووووووم
الناس دول مش عشونى والبت دودو وخطيبها كلوا الجاتون والفراخ واللحمه وكله
بس الحمد لله ام رودينا لحقتنى بالزور بتاع الفرخه ولونها كانت خرسه زورها صغير اوى
يلا ما علينا تتعوض فى الشبكه
دودووووووووووووو
انا فى الشبكه عايزة فرخه من بابها
ماااااااااااااااشى
ههههههههههههههههههههههه

ربنا يسعدك يا حبيبتى
ويجعله حنين وطيب وفاهمك ويحتويكى

فطوم
كلامك عسل يا ام قلب اصفى من العسل

لوووووووووووولوووووووووووووولى الف مبروك يا دودو وعقبالى يارب انا وكل البنات

وماما وروح قلب ماما فاتيما تنزل ببوستات زى الفل كده والله يا تيما انا حسيت انى كنت معاها

انتى بجد هايلة حبيبتى يا فاتيما

الف مبروك يا دودو ولو سمحتى اقرصيلى ركبتك اوى لحد ماتزرق
بذمة يا دودو لو سمحتى ههههههه

ربنا يسعدك يا حبيبتى ويهنيكى ويفرحك فرحة ماتحزنى بعدها ابدا
يا احلى عروسة بحور ف الدنيا

جميلة جدا جدا ..بجد تسلم ايدك :)

لولولولولولوولولولوولولولوولولولوى

ولوولولوولولولوولولوولولولولوولى

ولوولولوولولولوولولولوولولوللولولى

الف مليوووون مبروك يا دودو

ربنا يتمملك بالف خير ويسعد ايامك ويفرح قلبك دايما انتى تستاهلى كل خير يا حبيبتى

فاتيما انتى ارق حد ممكن اعرفه

والبوست ده مكتوب بحب اوى واى حد يقراه هيحس باحساسك العميق بالفرحه وهيحس كمان بحنيه قلبك وطيبتك

انا باحبك اوى يا فاتيما

بووسه كبيرة على جبينك يا ارق الناس

الف ملين مبروك ليها يا رب :)

ربنا يسعدها ويسعدك يا تيما :)

تحياتي

هو انا ينفع اذغرط
انبي ينفع
واهو
فرحه كام ضمن الفرح بتاعي الاسبوع دا
هيييييييييييييه
هييييييييييييييييييييييييييه
لولوللوووللوولوليييييييييييييييييييييييييييي
لولوولوولولييييييييييييييييييييييييي
لولولووللولوولولوللوللوولويييييييييييييييييييييييييييييييييييييييييييييييييييييييييييييييييييييييييييي
لولوولوولولوللولوللولوولووولوولووييييييييييييييييييييييييييييييييييييييييييييييييييييييييييي:))))

الف مبروووووووووك
ومقدرش اعلق ان اقول ربنا يسعد عبيده
كلهم ويريح قلوبهم
وعقبالي


تحياتي يامامت يوسف الجدعة

مممممممم
مع إن الكلام فى إدعاء كتير عن إحساس الأنثى
لكن بلاش نناقشه النهارده
خليها فى المناسبة الحلوة وصاحبتها الأحلى

ألف مليون مليون مليون مبروك لدودو وربنا يتمم لها على خير بإذن الله

لولولولولولولولولي
وأهي دي أحلى زغروته إفتراضيه
لأاحلى دودو

ربنا يسعدها يارب ويباركلها في أيامها اللهم أمين
^^

فاتيما .. كالعادة .. بتسعدي كل إللي حواليكي .. ربنا يحرصك ويخليكي لينا يااااااارب ...

وربنا يكتر أفراحنا يااااارب
^_^

احلى زغروته لاجدع عروسه
لولولولولولولولولولولولولولولولولوى
زغروته صعيديه مش اى زغروته
مبروووووك يا دودو ربنا يسعد ايامك
ويكمل فرحتك بخير

لمسه حب حلوه منك يا طمطم
تعيشى يا غاليه لما تعملى بوست بناتى

لالا لسه بدرى على بناتى

بوست نجاحهم باذن الله

قبلات واحضان بقى

احلى وصف
واجمل سيناريو
من اكبر قلب طيب
بيحب الخير للناس كلها

تسلمى يا مامت يوسف يا ام الخير

ودامت الافراح

والف مبروك
تحياتى

مبرووووووووووووووووووووك
لولولولولولولوى
ايوه كده هى دى الاخبار اللى تفتح نفس الواحد على الدنيا

الف مبروك يادودو يا عروسة البحور

و الف مبروك يا طمطم و عقبال كل احبابكم لما تفرحى بهم كلهم ولاد و بنات يارب

تحفة بجد
الف مبروك
بارك الله لكما وبارك عليكما
:]

فطوم

خذ عندك :-*X*X*X*X*X*X*X*X*X*X*X*X*X*X*X*X*X*
س ايه الرادارات ديه كلاها
لا رادير قلب فطوم ولا ده قمر صناعى فطوم مخصوص للحبايب :-) دا انت غلبتى الجوجل ايرث
:-))

ياخوفى المخابرات بعدين يشغلوكى معاهم :-) و تقوللهم الاعداء فرحانين ازى :-)

بس اعتقد
الردار القلب ده ميعرفش اعداء
و الكل عنده حبايب
عقبال ماتحكى من واقع الاحوال
قصص حب ثانية كثيرة و عقبال يوم فرحتك يا فطوم
:-*X*X*X*X*X*X*X*X*X*X*X*X*X**X*X

أولا مبرووووووك لدودو

و ربنا يتمم لها على خير

بأمانة بنت بمية راجل

جدعة جدعة بصراحة انا يمكن ملحقتش اكتب بوست عن يوم أسكندرية

و الناس الجميلة الأسكندرانية

اما أنت يا فاتيما مش هأعرف أقول حاجة

غير بأذن الله تفرحى بيوسف

(:

ربنا يفرح قلبك دايما يا فاتيما الغالية

ربنا يكون معاكى دايما

انتى عايزه تقوليلى انك كنتى بتوصفى حد !!!!

يخرب بيت كده.

المره دى احسنتى قوى .... قوى خالص.

أنتي ايه؟

ملاك ولا ملاك

اكيد ملاك

مبروك يا بت يا دودو واذا كان عالرمي في المالح بسيطه
مش عارف ادخل مدونتك خالص

مستغرب أنا من قوقل ... عملت أدوات
كتيره لترقية المدونات دى
وجات عند التعليقات وخلتها كدا
يعنى الواحد ميعرف يبعت لحضرتك
بوكه ورد ......الله يسامحك ياقوقل

ممكن تسمحيلى اقرأها تانى ......وتانى

الف مليون مبروك لدودو
وعقبال الليلة الكبيرة
وعقبال ما تفرحى بيوسف واحفاده
تحياتى

مساؤكم افراح وردية وليلكية
طبعا شكلي كدة اني الوحيدة اللي معرفش العروسة
بس مبرووووووووك ليها وربنا يسعدها ويكتب لها الخير يا رب اللهم امييييييين

الف مبروك يادودو ربنا يتمم بخير ويسعدك
انت فعلا بنوتة بميت راجل مع ان المدة اللى شفتك فيها كانت قليلة
بس انت بنوتة عسولة
يارب يكتب لك الخير دايما


اما انت ياطمطم
فده تانى اجمل بوست فرح اقرأه بعد فرح الباشمهندس محمد

عسولة قوى لدرجة انى تخيلت انك عندك تفاصيل او حتى سافرت حضرت الخطوبة
بس مش غريبة عليك
انت خليتى قلبك يتلفت ؛)
عقبال ياطمطم مانحضر فرح عسولة كده فى اسكندرية على محمد فوزى
ولما تجيبى العربية ال128
وفرح يوسف وولاده ان شاء الله

نقابل بعض من بنى البشر فى الحياه
نراهم مصابيح نور وضياء اشعاع للكثيرين
ثم نرى جانب خفى لا يجعل سعادتنا تكتمل
ونبدء فى وضع علامات الاستفهام لما يقدر احد فى هذا الزمان قيمة تلك المصابيح
وسناء قلبها وصفائه

ونظل نتعجب مع دورة الحياه
تاءتى البسمات وانطلاق نوافذ الاوكسجين
لتعلن عن هواء نقى يمر وترتشف منه الصدور فتهدأ وتنمو فينا كل مشاعر السعادة

من فرح هنا يا سيدتى ليست العروس
وانما فرحت القلوب التى كانت تراقب وتدعو فى صفاء ان يتم الله فضله على من نحبهم

ورحمة الله ولجوء عبده اليه لا يغلق بابه امامها

فحدث الفرح يا سيدتى

لذا التهئنة واجبة للملكة المتوجة وهى العروس
وللحراس الذين كان يتمنون كل الخير
مثلك سيدتى

ربنا يهب لك نقاء النقاء ويزين قلبك بصفاء الصفاء

تقديرى الكامل

اولا باشكر كل الناس الجميله اللى هنونى هنا او عندى فى مدونتى
وشكر خاااص جدا ليكى يابطه ولو ان كلمه شكر قليله عليكى قوى

ثانيا بالنسبه للبت حنين والله يابطه هى اكتر واحده عارفه ان اليوم ده مفيش حاجه دخلت معدتى طول اليوم .. اوعى تصدقيها دى كداااابه صاحبتى وانا ادرى بيها ياعااااالم


ثالثا
بابا هانى مش عارف تدخل المدونه ليه يامتر؟ انا اديت البواب اجازه مفتوحه
طيب جرب تنط من شباك المنور بتاع جوجل او قابلنى فى بلكونه الياهو
اتصرف لان عندك استدعاااء يافندم
فى عروسه بتعمل فرح من غير ابوها ياناس؟ كده هتعلى حسى وتخلينى اصووت؟؟؟!!!!

معلش يابطه انا عارفه ان الكلام ده بيجيب لك حساسيه بس لكل مقام مقال والمتر هانى مش هيفهمنى الا بالطريقه دى لانها شغلته

لولا و زهراء
-----------

ازيك يا زوّزا

انتى دايما كدا شيفانى بعين المحبة
و عين الفنانة كمان


عقبال ما اتكبلك بوست زى دا
مليان حب و اشراق يا ذات الوجه المشرق


الله يبارك فيكى
يا حبيبتى

عاشقة الرومانسية
----------------

الف مبروووووووك يا عروستنا
و شوفى بقى انا قلبى كان حاسس انك مش هتعرفى تفرحى قوى ..عشان غجر الشغل و غجر الحياة الكثر
بس انا قولت لا يونكن ..لازم نهيص و ننبسط
احنا عندنا كام دودو ؟!!!
حاولت اتخيل المناسبة
و اشوفك بقلبى
و الحمدلله ان البوست عجبك

عقبال بوست الفرح يا حبيبتى
و بوست اول عروسة بحور
و اول بحار صغنن

انا كمان بحبك قوووووى

و سلامى الحار لنصك التانى
الطيب

حنين القلب
---------

يل لهوتينى !!!!

هيوه انا بكتب البوست عشان نبارك للبت و لا نسيحلها ؟؟

لأ خلاص خلاص
فرختك عندى انا
و الشبكة ان شاء الله
محدش هيهوب عند البوفيه قبل انتى ما تخدى طبقك يا أمى

انتى كنتى ام العروسة التانية
انا عارفة غلاوة دودو عندك
فطبعا لا تعرفى تاكلى و لا تشربى و لا تلفتى يا بنتى
ربنا يخليكم لبعض يا حبيبتى و انتى اكيد مش محتاجنى اقولك هيا بتحبك قد ايه انتى لو اختها .. مش هتحبك كدا !!

الف مليون مبروك يا حنونتى
و عقبال بوست اخت عمر بقى
و بوست فرحه على رودينااااااا

هي وصلت السطل معايا لكده؟
لأ ده كتيييييييييير
اتز توووووووو ماتش
يعني مش بس دودو تتخبط
لأ وكمان عاملة لها عزف منفرد صولو كمانجات
كل ده ولا ادخل اعمل اي منظر؟
وده ان دل يدل على ان مرسي ابن المعلم الزناتي مش طبيعي خالص يا رجالة

انا مش ها ابارك لدودو بكلام تقليدي
انا ها اقول لها اني ها ادعي لها بالخير الكثير وابواب رحمة الله وفضله لحد ما تقول كفااااااية .. متبسطهاش اكتر من كده :)
اما بالنسبة للبوست
فها اقول ايه بس
فاتيما
ملكة في الإحساس

ربنا يفرح ايامنا كلنا
آمين

انا دمعت

يارب يكون الزوج الصالح اللي يسعدها ويهنيها ويكون سندها وحاميها يااااارب ويباركلهم في بعض

في الحقيقه يافاتيما

انا عمري ماشفت ليلة خطوبه بالجمال ده

الوصف اللي انتي وصفتيه حببنا كلنا في الجواز

سبحان الله ...قد ايه دي نعمه نعمة الحب والجواز والاولاد والاسره

شكرا جدا يافاتيما يااحلى ام في الدنيا

تحياتي 

мαησηα
-------

يخليكى لينا يا منونتى

البنات الجدعة الحلوة دى
عقبال بوستاتك يا حبيبتى اكتبهمولك من قلب قلبى ى ى ى

و حوار الركب دا عن تجربة
و لا بيجيب نتيجة يا أومى
و ما بينوب العروسة الغلبانة دى الا وجع الركب و بس


بوسات و حضونات يا قمورتى

آخر أيام الخريف
--------------

انتى الأجمل يا فوفى

:)

انتى الاجمل يا حبيبتى
و عقبااااالك

ليس فقيراً من يحب
--------------

ايوووون
زغاريط رانيا الجميلة شكلاً و قلباً و روحا ... اعاكس و لا ايه بقى ؟!!

انا فعلا كتبت البوست بكل الحب اللى ف قلبى لدودو ..و يمكن معرفتش اعبر كفاية
هيا تستاهل الفرحة
و تستاهل الواحد يكتبلها احلى من كدا ميت مرة
بس احيانا الكلام
بيعاكسنى قوى

انا كمان بحبك يا حبيبتى ى ى ى ى

فتاة من الصعيد
--------------


الله يبارك فيكى يا فاتى
عقبالك يا حبيبتى
ان شاء الله

منحرمشىىىىى منك

sony2000
--------

يا خرااااااااااشى
يا لهوى ع الجدعنة و البناتيت الحلوين

عقبالك يا سنسونتى
و عبقال ما اكتبلك بوستات كلها حلويات زيك كدا ...ايون انتى حلويات و سكر و بونبونى

عقبال ما نزغرطلك
و اكتر من زغاريطك الحلوة دى
يا سنسن
يا رب


Haytham Alsayes
---------------


الله يبارك ف عمرك يا هيثم

عقبالك يا فتى
بجد و الله هفرحلك قوى
انتا ابن حلال
و البونية دى اينما كانت و من هى
امها داعيالها ف ليلة القدر


عقبااااااااالك عن قريب
انشالله

الازهرى
-------

ولا يا زيزو

إدعاء !!!


طب ثانية واحدة بقى
هات الطبق اللى ف ايدك دا و مليان جاتوه و حلويات
و شيلولى ازازة البيبس من قصاده

نعمممممم
ماذا تكصد سيادتك بالإدعاء ؟؟

و بعدين بلاش نناقشه ايه
منتا رزعت الكلمة و خلصنا

هوه حرام الواحد يتخيل الفرحة يعنى
و بعدين انتا ايش حشرك وسط الحريم
احنا ستات و بنات ف بعضيشنا
و انا عارفة اليوم دا شكله عامل ازاى و مريت بيه .. زائد احساسى بشوية حاجات عن البونية فكتبتها من وحى تخيلاتى .. ايه بقى
شكلك عاوز تنضرب !!!

خلاص خلاص
رجعوله الطبق و الحاجة الساقعة
اخونا برضك و مش هننكد عليه و الراجل مكلف خاطره و جاى يبارك


عقبالك يا ازهرى
ان شاء الله

ghAdA mOhsen
------------

الله يبارك فيكى يا غدغود

عقبالك
و عقبال رانياااااااا
و نفرح بيكم يا رب
و اكتبلك بوست حلو زيك
و رقيق
و رشيق
و بيلبس حاجات لايقة على بعضيها قوى

:)

mrmr
-----

يا خراشى
زغروطة صعيدى
يا هناكى يا دودو
الجمهورية كلها بتضرب نار ف فرحك اهو
و خصوصا الصعايدة ..اجدع ناس


و عقبال نجاح البنات و فرحهم
جرى الزمن يجرى
ربنا يفرحك بيهم يا مرمرة دايما


بوسات و احضان بقى
انا كمان

:)

sal
----

ربنا يخليك يا سال

دايما
رافع
نعنوياااااتى كدا

منحرمشى منك يا رب

قوس قزح
-------

الله يبارك فيكى يا وش الخير

عقبال هنا يا رب
لما نكتبلها بوست الفرح و نباركلك
و نقولك يا ام العروسة

بوسات و حضونات من هنا
لحد آخر الدنيا

sally
-----


الله يبارك فيكى يا لولى
هيا السابقون و انتى اللاحقون
لأ أستنى
انتى السابقون و هيا اللاحقون

يوووه
انا اتلخبطت
المهم انكما لبستوا الدبل و قريتوا الفاتحة و خلصنا بقى
عقبال الشبكة
و كتب الكتاب
و الفرح
يا شقاااااااااوة


:)

wanda
------


ايه الاحضان اللى معشقة ف البوسات دى ؟!!!

شكلها حلو قوى على فكرة
:)

و اصلا انا قاعدة ف مطرحى و قلبى قلقان و مخى شغال و خيالى بيسرح
حاولت اتخيل و الحمدلله
اللى كان ف بالى
مكنش بعيد قوى عن الحقيقة

ربنا يسعد قلب دودو
و كل البنات
و الناس يا رب

و عقبال ما اكتبلك بوست يا هانم
عن قريب بقى
هيبقى بوست ونداوى سواحى يليق بيكى
ان شاء الله ..يلا خلصونا منكم

******************************
و
××××××××××××××××××××××××××××××

يا ونداتى الحلوة

Ramy
----

يخليك لينا يا رامى

عقبال بوست خطوبتك
و جوازك و عيالك
يا ر ر

يا لهوى !!!
انا اصلا مش متخيلة لما اكتبه هيبقى عامل ازاى ... بجد


عقبالك يا رقيق القلب
قريب ان شاء الله

ويكا
----


ايوه يا ويكا

كنت بوصف حد


بس بوصف حد

بحبه
قووووووووووى

مصرى جدا
--------

الملاك هيا دودو يا هانى


اللى تخطف قلبك و تخليك تفرحلها و انتا بعيد و هيا قريبة قوووى و كأنها جوا القلب ..

و بصفتك ابوها يا خويا
اما نشوف
هترمى ف المالح بجد
و لا مش هنشوف وشك

منتا كل مرة تقول جاى اسكنكرية
و مبتجيش لما خلاص يئسنا منك

لما يزعلها ... هنشوفك يعنى ؟!!

طيب

ماشى
اتفقنا

بت يا دودو
دبى خناقة مع خطيبك بقى

بهزر يا بت
متسمعيش كلامى


عقبال عيالك يا هانى
ان شاء الله

خالد احمد محمود
-------------

اهلا باهل السودان الطيبين
حضرتك شرفتنا

و عقبال عندكم
و كأن بوكيه الورد وصل فعلاً

كلك ذوق


بت يا دودو
بيجيلك تهنئات من برا الحدود اهو
و بوكيهات ورد افتراضية كمان
شوفتى العريس
وشه حلو عليكى ازاى ؟؟!!

خالد همس الاحباب
--------------


االله يبارك فيك يا خالد

عقبال همس و شابى
و عقبال ما تشيل عيالهم

انا ليه حاسة انك مش مبسوط الايام دى
او مشغول و مضغوط قوى ؟؟

يا رب بس تكون كويس و بخير
و ان شاء الله دعوة الخير اللى انتا عاملها تجيب اثر ..معلش انا عارفة انك محبط ..بس الناس كلها ظروفها صعبة ..و ربنا يفرجها على الجميع


منحرمشى من اسمك
ف اى صفحة تعليقات
و اى بوست ابدااااااا

er7ab.sale7
-----------

يا خراشى على الليلكية دى
تجننننن

منحرمشى منك يا بنفسج بيبهج انتى
و عقبال يا حبيبتى ما اكتبلك بوست فرايحى عشانك زى دا

سلامى لكل اللى عندك
لحد ما اشوفكم قريب ان شاء الله

بوسات و حضونات
أأأأأأأأد كدا

حفيدة عرابى
----------


الله يبارك فيكى يا فيدو
عقبال ما اكتبلك بوست كدا
انا نفسى افرحلك قوووووووووووى


و الدعوات الحلوة بتاعتك دى
لما كتبتيها ف التعليق
خرجت من قلبك ..على باب السما
ان شاء الله لو اتحقق منها أى حاجة
هتكونى من اوائل الناس
اللى هتعرفى
و تفرحى
و تيجى تحضرى كمان


انا بحبك
قووووووووووى
يا ذات القلب المتلفت

SHAPE YOUR LIFE (ABOALI)
-----------------------

طب يعنى بعد كل الكلام الحلو دا

ممكن ارد اقول ايه؟؟!!


منحرمشى من طلتك علينا ف صفحة التعليقات و لا من مشاركتك الحلوة ف الفرح و الزعل
و لا من اى حاجة طيبة زيك


عقبال ولادك ان شاء الله

عاشقة الرومانسية
----------------

كدا يا مجرمة تهربى من الواجب المكدس و مترديش ع التعليقات ؟!!

عروسة اونطة و لا خلسه بتردى ع الجدع ف النوبايل
طيب خلاص مش هقطع عليكى
ربنا يسهلك يا عم


و لا حساسية و لا بتاع
دا حتى هانى المحامى التدوينى بتاعنا
و ان شاء الله خير خير خير


بس متغبيش بقى
و طمنينا عليكىىىىىى


الف مليون مبروك يا قطتى الحلوة

ستيتة حسب الله الحمش
-----------------

يا لهوتينى يا ستاتيتو
سطل ؟!!
دنتى اكتر واحدة مصحصة ف الدنيا
لكل حاجة و حد
انا عارفة ان مودك مش اللى هوه
على رأى شيماء الشعب ..الله يمسيها بالخير
حالة ال(هه) دى ..و عذراكى و الله

عقبال ما نكتب بوست لمانوسة النوسة كونوسة
اما عفرتو بقى ..يا خراااااااااشى
دنا هعمله بوست سبع ليالى

دعواتك كفاية
واحلى و الله
من اى كلام ينقال تانى

ربنا يسعدها و يهدى سرها
و يفرح قلبها دايما
يا رب


بوسات و حضونات
يا ست الستيتات
و حبيبة قلبى ى ى ى

كيـــــــارا
-----------

عقبالك يا كوكىىىىىىىى

عقبال ما اكتب بوست خطوبتك
و اكون حاضرة بقى
دى فرحة البنوتات العسولات
وانتى قاهرية و نواحينا بقى
و مليش حجة
هاجى هاجى ..ان شاء الله

عقبالك للمرة الألف
يا حبيبتى

ماجد العياطى
-----------

و الله يا ماجد انتا اللى شخص جميل قوى
و طيب قوى

انتا فعلا استخدمت الوصف الصح
النعمة

ربنا ناعم علينا بحاجات كتير حوالينا من كتر وجودها احيانا ..بنفتكر انها عادية و بسيطة و مش مهمة قوى ..ايه يعنى

بس الحقيقة انها غالية قوى
و مهمة قوى
و الأحساس بيها بيخليها اجمل و اغلى
بس ميبقاش فيه غلوشات على العيون و القلوب و نعرف نحسها

افهم من تعليقك انك مش متجوز ؟!!
طيب
عقبالك يا سيدى
و عقبال ما اباركلك يا رب
عن قريب


انتا منورنى داااااااايما

إرسال تعليق