.

.

واحـــد ... ســبــعــة ... واحــــد  

Posted by: فاتيما in






الخطوة رقـــ(1)ـــــم  
ان يدرك القلب و يؤمن 
بفكرة
ان ربنا هيخلق عشانه بنى آدم 
هيكون ليه لوحده و بس 
و مينفعش يكون لحد تانى غيره
و لو عاش وسط الآلآف البشر

الخطوة رقـــ(2)ـــــم  
ان القلب يفضل يتخبط ف الدنيا 
و يعيشها و يضيع ف وقت 
ويتكعبل ف ظروف و ناس
و هوه بيتمنى انه يلاقي اللى بيترجاه

الخطوة رقـــ(3)ـــــم
ان القلب صدفة ف لحظة سحرية 
وفارقة من عمر الزمن  
يلاقى هذا الشخص اللى مخلوقله
 ف الحياة الواسعة دى 
و بعد يأس من طول الإنتظار




الخطوة رقـــ(4)ــــم  
ان القلب و نبيه المنتظر 
لما تجمعهم الصدفة 
يكتشفوا انها مش صدفة ... خالص
و يشوفوا بعين صافية 
رغم أى غيامات أو غلوشات حاصلة 
انهما هذين الشخصين اللى مينفعوش
يكونوا لحد تانى ... غيرهم

الخطوة رقـــ(5)ــــم  
إن يكتشفوا انهما متورطين ف الحب
لأن مينفعش غير فعلاً انهم .. يكونوا كدا 
و إنهم اتخلقوا عشان يكملوا رحلتهم 
متصاحبين .. رغم أى فروق و أى حواجز
و أى أسباب قوية عاتية 
قادرة دايما .. تفرقّهم 

الخطوة رقـــ(6)ــــم 
انهم يقرروا 
بعد هذا الأكتشاف المذهل
انهم يستنوا سوا 
عن طيب خاطر ورضا 
و بكل خضوع و استسلام لقدر محتوم






الخطوة رقـــ(7)ـــم 
ان تتجلى لهم المعجزة واضحة 
ولو بعد حين 
بعد ما امنوا عن يقين 
بإمكانية حدوثها فى الخطوة
رقــــ(1)ــــم 


------------------------------------------------------


 لو جاز لرب 
أن يرسل انسانا كهدية لأحدهم 
لكنتى هدية عمرى 
مرسلة فى ظرف إستثنائى 
و مكتوبة فى تلك الهالة النوارنية المرسومة 
دوما فوق روؤس الملائكة و الشهداء
هذه فرصة عمرك 
مع بالغ عطفى و الرحمة 
المرسل : ربك 
ملحوظة : فلتمض الوقت معها فى شىء 
أفضل من كتم الحب لتبدو كرجل هادىء
أخبرها انك تعلم انها مرسلة كهدية
و قل احبك أكثر من كل الأشياء 
و لتشكرنى 

This entry was posted on الأربعاء, أكتوبر 20, 2010 and is filed under . You can leave a response and follow any responses to this entry through the .

52 كــــلام بيطــبطـــب عـــلى قــــلبى و روحــــى

:-**********************************************************************************************************************************
:-) العنوان فيه سر خطير
اول ما افوق حعمل عليه بحث فظيع
و اكشف السر الرهيب
:-)))))

سؤال هل فى كل علاقة الاثنين بيقول كلمة الحب شفاهيا ؟؟ و لا فعليا ؟؟ و لا روحيا ؟؟
هل فرض الكلمة فرض كفاية :-) يعنى يكفى حد يقولها علشان تمثل اطرفين ؟؟؟

ايه الاسئلة الفتوية ديه كلها ؟؟

معلش هو خلاص دقيقة و تلاقينى نمت
فعذرا لخطرفتى
يا فطومتى

بس اصل كان فيه موضع جدال فى الشغل
اجمعت النساء
ان العصبى فى علاقة زوجة ناجحة عادة طرف واحد و الثانى بيمتص العصبية بهدوء
و لو الهادئ كان مع شخص ثانى اهدئ منه ممكن هو يبقى العصبى :-)

هل الحب بنفس الاسلوب ؟؟؟؟؟

ان ابطل كتابة
ز ادخل انام و ابقى اصبح بعقل بكرة :-))

:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

بعد السلام والتحايا
أما بعد
فيه اختلاف ليكي معايا
يا فاتيما

مش شرط ان القلب يقابل قلب عشان يكون فيه توافق ويجتمعوا
بالعكس في حالات كتير من القلوب المتقابلة فشلت إنها تكمل المسيرة وبعد 3 سنين .

هو ربنا كاتب لأي حد نصيبه .. ودا شيء حتمي بس مش شرط يكون في توافق أو حب أو عشق أو هيام .. بالعكس في رحلات بتكمل وبتكون عاديه جدا .. بس ربنا بيحط بينهم المودة والرحمة .

طبعا أنا كلامي بعيد شوية عن البوست .. كلامك يحيي الأمل في النفوس وكلام يزهق أي أمل .

لكن أتمني لأي حد إن ربنا يوفقه ويسعده ويكرمه كرم لا حدود له .

تحياتي ليكي وليوسف ..
في أمان الله .
ورضوانه .

نهار أبيض يا فاتيما

يا مامت يوسف الغالية

أيه ده

دا لسه بقول فاتيما مختفيه

و لسه بأمانه هأجى أسأل

ألاقى البوست اللى خلانى أدمع دة و كمان كأنك بتشرحى أنا عاوز اقول اية

زى ما يكون البوست مكتوب ليا

مش عارف اقول ايه يا فاتيما الصراحة

غير تنهيدة طويييييييييلة


ربنا يريح قلبك يا فاتيما

و يديكى على قد قلبك الطيب

و كلامك الجميل دة

ربنا يوفقك دايما

ان يدرك القلب و يؤمن
بفكرة ان ربنا هيخلق عشانه بنى آدم
هيكون ليه لوحده و بس
و مينفعش يكون لحد تانى غيره
و لو عاش وسط الآلآف البشر


انا لما قريت الجزء دة دمعت

بجد مكنتش متصور ان ممكن حد هيفهم دة

ملحوظة : فلتمض الوقت معها فى شىء
أفضل من كتم الحب لتبدو كرجل هادىء
أخبرها انك تعلم انها مرسلة كهدية
و قل احبك أكثر من كل الأشياء
و لتشكرنى


حاضر (:

شكراً

فــاتيما

المشكله ان مش كل الناس مقتنعه بكده
مشكله كمان ان الرجل بيكابر اوى فى اظهار مشاعره
مشكله تالته ان المجمتع الشرقى بيرفض البنت اللى بتصرح بمشاعرها
مشكله رابعه يوووووووه كفايه مشاكل

بجد البوست تحفه وبيحمل مشاعر راقيه ورقيقه

تسلم الايادى

زهراء

سلامو عليكم

ازيك يافاتيما


موضوع جميل وجايب من الاخر
عارفة انا مؤمن بكدة برضه
كل الخطوات دى هتخوضها لو ربنا بيحبك
وعلي فكرة ملناش يد في تغيير او تبيل اي خطوة

بجد موضوع جميل ورائع جدا

تحياتي لكي

الواحد مش عارف يقولايهبعد الكلام ده

التشكيلة دي تخليني أكسب حاجات كتييييييييير أهمها نفسي

عايز أشكرك على الإدراج المميز ده و يا ريت حضرتك تتعودي عليه علشان هيتكرر في كل موضوع .

القلب ونبيه المنتظر!!!!!!!!!!!!!!

انا توقفت عن القراءه تماما لحد ما أستوعب كم الروعه اللي في التعبير دا

الخطوات كلها أجمل من بعض
بس 6 لما جت بعدها 7 وأكدت على واحد
خلتنى فرحانة بشكل غير عادى
ربنا يفرحك ياطمطم ويحقق لك كل اللى بالك
واوعى تقولى ان ده بوست ادبى وفى المطلق
علشان كده هازعل تانى

صباحك فل يا فاتيما
عجبانى جدا الخطوات منظمة ومرتبة وبتواصل بعضها
ووصفك ليها جميل وبيكملوا بعض جدااا
تسلم ايدك يا قمرى
احلى الصباحات على عيونك

واحد سبعه واحد

ميرو جمعهم طلعولنا 9

ياعنى تسعى فى الخير

بس لما سألأت محمد قالى دى تقسيمه خطه كره قدم ههههههههههههههههه

منه بقى قالتلى انا بكره الرياضه خلينى فى الدرسات يا ماما

انا بقى سألتنى واستفتيت قلبى

قالى كلام كتيييييييييييييييييييير كببببببببببببببببببببببير

اخدت على جنب وسكت اصله بصراحه حلو وطعمه مسكر

وحشانى يا احلى القلوب واطيبها

بوساتى وحضوناتى وكامل فعوصاتى

الإعجاز حصل في رقم (1)
هو دا السر كله

لما رقم (1) تحصل هييجي بعدها خطوات ممكن يكونوا 7 أو أقل من 7 أو أكتر من 7
مش مهم
المهم تصدق رقم (1)

واحشانيييي بجد

الخناقه بقى


بقى يا استاذه يا طيبه يا مبجله ، نبقى عاملين فكره جديده ، مش عايز اقولك استوحتها من اسلوبك مع الناس ومدى اهتمامك بيهم ، والناس كلها تيجى وتعلق عليها وتهتم بيها وانتى يا مولاى كما خلقتنى وشك ولا وش الضيف ؟!!!

دا انا كنت مقتنع جدا ان اول واحده الموضوع هيعجبها ، وهتفرح بيه ، وهتبهدلنا افكار ومقترحات هى انتى .

وكنت متخيل ان اول عضو هينضم للفريق بتاعها هو برده انتى ومنونه ، ومنونه بس مشغوله لكن فعلا مظبطه حاجات مع ايمان (الحب الجميل).

وكمااااان يبقى فيه عيد ميلاد واحد من المدونين ولا نسمعلك حس؟؟؟؟؟

الناس عاملينله فرح وانتى اسمك مش فى النص ؟؟؟؟؟


لا لا لا لا
توء توء توء توء

عيبٌ عيبُ عليكى ان تفعلى

مش عارفه اقول حاجه
غير ان البوست ده يجنن
احلى بوست تكتبيه من فتره
ده رأيى انا
مليش دعوه بغيرى
الحب ده نداء قدرى بنفضل ندور عليه و نستناه و نتعب و يا ناس نقابلها غلط
و فى لحظه سحريه فعلا نلاقى اللى دورنا عليه واقف قدامنا
و لا نملك فى هذه الحظه سوى الرضوخ له و الاستسلام له
الحب فعلا قدر و نصيب

جميله جدا الكلمات والمعانى وعميقه موت والأغنيه مناسبه جدا لوصف الحاله أما الصورة فتجننننننننن
انتى انسانه جميله ورقيقه جدا وفيلسوفه كمان فى التعبير
اتمنى لك ان تجدى الحب الحقيقى اللى يستاهل هذا القلب الرقيق مرهف الحس

صباحك معطر بالورود والفل والحب والأمل فى بكره

بكره أكيد احلىىىىىىىىىى كتير من اليوم

" فا... تى .... ما "


يارب يكون اللى فى دماغى صح

واحد + سبعة = واحد


تحياتى ودعواتى

طمطومة...
آه من الكلام الجميل اللى بيوجع ده ...
بنفضل ندور على الحب فى كل مكان وفى كل وقت وفى كل سن .... وساعات ربنا يوفقنا ونلاقيه ... وساعات يعوضنا ربنا بحاجات تانية زى حب أخت تجنن ولا أم حنينة ولا ابن يبقى حتة مننا

بس فى الآخر مبنقدرش نعيش من غيره

دمتى بخير وصحة وسعادة وحب يا أم يوسف

ان يدرك القلب و يؤمن
بفكرة ان ربنا هيخلق عشانه بنى آدم
هيكون ليه لوحده و بس
و مينفعش يكون لحد تانى غيره
و لو عاش وسط الآلآف البشر

عجبتنى قوى هذه الخطوه
ياريت فعلا كل رجل وامراه يدركوا هذا

خطواتك جميله ومنظمه ومسلسله
نالت اعجابى حقا

مساء الورووود يا فاتيما
انا كنت لسة في سيرتك مع دعاء عمرو امبارح...
معرفش ليه لما قريت العنوان حست بحاجات كدة متتقلش...بس بجد انت كتبتي كلام جمييييييييييل اووووي اوووي
ومش عارفة اقولك اد اية انا سرحت ف معانيه

مش عارفة اقولك حاجة ولكن كلامك بجد اجمل حاجة قريتها من فترة

وعارفة الصدف بتعمل احلى حاجة فى حياتنا وكتير بتحصل لنا صدف وتبقى هيا عوضنا عن كل حاجة ضاعت مننا

اتمنى انى اتنقل للخطوه رقم 3 علشان اوصل للرقم 7 وارجع للرقم 1
حد فاهم حاجه؟
ههههههههههه

جميله كالعاده والبوست فكرته جميله بجد




باعتذر عن عدم الرد على التعليقات بس انتى الخير والبركه يابطه
يعنى مش كفايا البوست؟؟
لا كمان الرد على التعليقات
ده ايه العروسه الخنيقه دى؟؟!!!

بس النت عندى بعافيه شويه الايام دى معلش


بحبك جداااااااااااياقلب البحر

أنا حبيت البوست كتير، لأنه بيوصف مشاعري لوحدة مش حبيتها وخلاص، إنما حبيتها لأنه ما ينفعش نكون إلا لبعض، وأنا مؤمن بده الشيء.

بقرأ لك كتير ومن فتره
و مش بغلق الا قليل
بس المره دي البوست خطير خطير فعلا
عنوانه شديني جدا وكلامه بيوجع لانه حقيقه بنعيش فيها غالبا
تفتكري في راجل شرقي هيفهم الكلام ده يجوز ولكن و اه من لكن ربنا فعلا خلق لكل حد فينا واحد تاني يبقاله جايز ما يقبلوش يمكن يقابله في وقت غلط ممكن اوي لكن ينتظر قدومه اكيد ويكون نبي قلبه ..وجعتي قلبي بالكلمه دي مش عارفه اقول ايه جوايا كلام كتير بس مش عارفه اعبر عنه
دمتي بخير دائما

سبحان مقلب القلوب :)

تحياتي

WAW!!

بوست في الجول بجد .. هي الحياة فعلا كده .. وهو ده اللي بيحصل في الحياة فعلا .. لكن المهم والأهم إن الظروف والواقع المحيط - أثناء حدوث الخكوات 4 و5 - تكون مهيأة لإمكانية حدوث الخطوات التالية رقم 6 و7 .. وإلا تبقى مشكلة كبيرة قوي لو حدوثهم مستحيل .. بيبقى الألم رهيب إن الواحد يشوف نُصّه التاني قدام عينيه ومش قادر يطولُه

تصفيق حاد على البوست ده بجد

يا عيني على الكلام الجامد

ايه الفلم العربي ده ...بس بصراحه تسلسل الاحداث غير عادي

له جرس موسيقى تطرب له القلوب قبل الآذان

تدوينه جميله يافاتيما

فعلا إنتي فسرتيها صح يافاتيما

ربنا يسعد كل قلبين بيحبوا بعض

وربنا يربط كل قلب وحيد بالقلب إللي مستنيه
^^

ربنا يسعد قلبك باأم يوسف الغاليه على قلبي
^_^

السلامو عليكم
فاتيما

أزى حضرتك وحشتنى مدونتك جدا
سامحينى عن طول غيابى
واعزورينى

واحد سبعه واحد
والله والله الله الخطه ديه مرسومه ليا بالظبط
ياريت ياريت يحصل ده معايا
وياريت اقدر اعمل كده
وامن واطمن ان الخطوه الاولى جايه جايه
بس مشكلتى انى مش مصدق ان الخطوه الاولى ممكن تحصل اساسا
بس اكيد ايمانى بالله عز وجل كبير
مفيش حاجه بعيد عن اللى خلقنا وخلق قلوبنا
سبحان مقلب القلوب

يوست رائع رائع
انا اعصابى كلها اتحركت مع البوست ده والله

ربنا يبارك فيكى يافاتيما

تقبلى تحياتى

محمـــد التركـــى

wanda
-----

العنوان ؟!!

ههههه
انا بعد ما كتبته و نشرته
اكتشفت انه ممكن يتفهم غلط
و بعدين قولت اللى هيقرى البوست
هيعرف بقى ..انها خطة .زمن عدة خطوات
اولها جايب آخرها و العكس

سؤالاتك تمخول
و لو كنتى مصحصة و انا كمان مصحصحة زيك ... بس حكاية التكامل دى حاجة كويسة جدا ..لو انوجدت

لكن افرضة الجوز عصبيين ..يحصل أيه؟
الحياة تمشى برضو
بس واحد يوعى من وش التانى
الساعة دى

الموائمة
او المرونة
او بعض التنازل
أى حاجة ف السكة دى

لو بتسألى الحب يبقى بنفس الاسلوب

أكيد
دا هوه الأسلوب نفسه

الحب يا ونداتى ..يعنى كل حاجة مكنتش بتنعمل مع كل البشر ..فجأة تلاقى روحك بتعمليها عشان شخص واحد مفيش غيره ..ليه ؟
من غير ليه


********************************************************************************************************
و
×××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××






MR.PRESIDENT
------------

اختلف زى ما تحب يا بسام
على قلبى زى العسل يا سيدى

و بعدين كلامك مش مزهق لأى امل و لا حاجة

انا ف البودست دا بتكلم عن حالة
لما اتنين اتقابلوا و لقوا بعض بالفعل و قرروا ميضيعوش الفرصة دى و يهدروها

بص انتا كلامك صح برضو
ان ممكن لو حد معرفش يعيش مع نصه التانى زى ما بيقولوا ..بيقدر برضو يلاقى حد تانى و يبنى معاه حياة و بتكون ناجحة ..مبقولش ان دا مش حقيقى

انا بتكلم عن حاجة نادرة مبتحصلش كتير ف الدنيا ..انك تلاقى الشخص اللى ربنا خالقه عشانك و تعرف ان هوه ده و تتمسك بيه ..دا قصدى

منحرمشى منك
يالى قلبك له نصيب كبير من اسمك





ستيتة حسب الله الحمش
-----------------

صمتك بلاغة يا ستوتى

منحرمشى منننننننننك





Ramy
----

كنت عارفة يا ر ر
ان البوست دا هيلمسك
و هيكونله صدى عندك
..

ربنا يقرب البعيد يا غالى
و يحققلك كل ما تتمنى
و أحسن

اعتبر البوست دا اهداء منى
لملاك الحارس ..اللى واجعة قلوبنا كلنا معاها
مش قلبك انتا بس
و لو انه وجع جميل ..نبيل
يليق بيك يا رامى
و لايق عليك قوى

:)

لولا و زهراء
----------

لأأأأأأ
يا زوّزا ..مش عاوزة مشاكل خالص
انا البوست دا فرحانة قووووووى
و مش طالبة معايا مشاكل و لا نكد

تسلم الأيادى دى
تتقالك انتى يا ذات الوجه المشرق





Haytham Alsayes
---------------

و الله انا من اول تعليق ليك عندى يا هيثم و انا بقول الجدع دا رومانسى
هما ليه دايما بتوع التاريخ و عشاقه عندهم رومانسية مستترة و خفية كدا مخبينها ورا الكلام الكبير اللى بيعتنقوه ؟!!
عندك تفسير لكدا
تكونش كتر الحكايات
و غرابتها
و جنانها ساعات ؟

مش عارفة

بس اللى اعرفه
ان الدنيا فيها متسع لكل الأفكار و الخيالات و الأمنيات و ممكن فعلا يبقالها صدى لو بس تصبر عليها

منحرمكشى منك يا صاحب الفردوس



ولد تحت الصفر
------------

ازيك يا محمد
نورتنى و بقالك مدة غايب
مبسوطة جدا ان البوست عجبك
هحاول أخلى بالى المرات الجاية اكيد
و كلك ذوق




مصرى جدا
--------

آه يا هانى
ما كل واحد منتظر النبى
اللى هيأتى فى آخر الزمان
عشان الدنيا تستقيم
و الظلم ينتهى من الأرض

القلب برضو
له مهديه


انتا دايما تقرانى بقلبك
و تعلق كمان .. بقلبك

حفيدة عرابى
----------

لأ يا فيدووووو
متزعليييييش
زى منتى فهمتى يا حبيبتى
ربنا يخليكى ليا و يخليلى قلبك الشفاف دا .. المتلفت دايما على الفرحة
و انشالله دايما ع الفرحة
و الحزن ..لأ

و اصلى انا بحبك قوى بقى







الحب الجميل
----------
تسلميلى يا حبوبة
انتى الاحلى يا حبيبتى




ويكا
----

صح ؟؟!!!

طييييييييب
:)



richardCatheart
---------------

يا قطاقيطوووو

خطة كورة
عملية حسابية
مؤسسة خيرية
المهم انها تحصل و خلااااااص
احنا كنا فين و بقينا فيييين

قلبك الحلو الطيب الجدع دا
قالك ع اللى فيها

انتى كمان وحشاااااااااانى موت
و يا ريت تحاولوا تيجو التبرع بالدم تعالوا
و هنوديكو الحسين زى ما نفسك تروحى
يلا زنى ع الحاج ريتشارد الله يخليه
و مننحرمشى منووووووووووو

انا كمان بوسات
و حضونات
و فعصات
كثيراااااااااات





يوم جديد
--------

انا مصدقة و الله
كل الأرقام .زمن واحد لسبعة لواحد تانى
بس هوه المهم يحصل او خطوة و تكمل للآخر ..
لو كملت يبقى المعجزة تحصل
و يبقى نعمة النعم ..حد طايل ؟!!

انتى كمان وحشاااااااااانى جدا

ما تحاولى تيجى التبرع بالدم يا يم يم
يا بنتى
نفسى ى ى ى ى
أشوفك ك ك ك ك

مينفعش كدا خالص





sally
-----

ماشى سا شقاوة
اغمزى زى ما تحبى

بس خلى بالك
انا المفروض اغمز انا روخرا
عشان
انتى معايا ف التقسيمة دى

يعنى انتى و سى محمد
من واحد ... لسبعة .. لواحد تانى
آه

D:

ويكا
----

يا اهلا بالمعارك

بص يا ويكا


(1)
الأستاذة الطيبة
المبجلة بتقول لسعادتك
بمنتهى البساطة
شكرا على حسن ظنك بيها


بس كمان عاوزة تقولك
انك متعرفهاش كويس
زى منتا متصور
و حكمت عليها من برا ..
و عاوز تمشى حكمك بناء على رؤيتك ليها من غير حتى ما تسألها

و دا مربط الفرس ...


مربط الفرس انك
لو كنت متابعنى من مدة
كنت هتعرف انى مبحبش اشارك
ف مدونات مع ناس تانيين
أى كانوا عزاز على قلبى ..
و انى مبحبش اشتت نفسى
فى أكتر من مدونة ..
و ان مدونتى بكتب فيها كل حاجة ..سواء الاجتماعيات او اليوسيفيات او حتى رأيى ف الأحداث اليومية متمثل ف الصباحات ....الخ
و حتى لما حد بيبقاله
اكتر من مدونة بقوله يختارلى واحدة
بس ازوره فيها



كل الرص اللى فوق دا ليه ؟


عشان اقولك انى مينفعش
تعتبرنى مشاركة فى حاجة ..
انا متعودة معملهاش
و القاعدة ثابتة من بدرى بدرى
و لا جديد لتغييرها


(2)

تعليقك نبهنى لحاجة مهمة
انا مشغولة الفترة اللى فاتت دى
بخالتى لأنها مريضة و بروحلها كل يوم المستشفى و متلخبطة شوية
و عدم مرواحى بيت المدونين
تجاهل اكتر منه انشغال ...

و كدا بقيت محسوبة بأنى
بتجاهل و مقصرة ؟!!

و بيت المدونين كدا
هتخلى اللى ميشاركش
و لو بالتعليق فيها عيب عليه ان يفعل أو بالاحرى ألا بفعل ؟!!!

طب دا كدا المدونة دى
هتبقى عاملة زى دفتر الحضور
و الانصراف و فكرة الحرية
و كل واحد يعمل اللى يعجبه
هتنتفى


و دا ينقلنا لرقم (3) بقى
و هى


انى ف عالم التدوين بقالى 3 سنين
و عن متابعة اقدر اقولك
ببساطة ان المدونات اللى على غرار بيت المدونين ..
سبق و اتكررت قبل كدا كذا مرة
و بدون ذكر اسماء ..
و مكنتش ناجحة بالشكل المطلوب منها
مش قصدى اكسر مقاديفكو و الله
..ربنا يوفقكو ان شاء الله


بس اصلاً فكرة التدوين
احد اركانها الحرية
و عدم وجود كيانات ..
ممكن تعمل قيد ف المستقبل ..
و الواحد بيتوجس خيفة ..عن اسباب



و سبق و ظهر ما يسمى باتحاد المدونين المصريين و لا ابصر ايه مش فاكرة ..
و الكل تقريبا استنكره
لأنه كان خنقة و ظهر سريعا
انه كان تبع الحزن الوطنى
و مات ف مهده ....


برضو مش قصدى اقول انكم كدا
لأنكم ناس محترمة و احنا عارفينكم
انا قصدى ان النوع دا من الأفكار لا يلقى قبول واسع و لا استمرار غالبا


و ف نفس الوقت مقصدش احبطك
بس فيه كذا موقع كويس
زى موقع تدوينة ...
و مرصد المدونات ..
ومجمع المدونات المصرية ابو تنين بمبى
و هو اقدم و ارسخ ...

كلهم كويسين و شغالين

بس مبيفرضوش على حد يسجل اسمه
و يعلق
و اصحابهم بالهم طوييييييييل
ع العالم الكسالى
والمتمردين امثالى
واللى لما ييجوا يقولوهم ..
اشتركوا
و يعتذروا زى ما هعتذر دلوقتى
حالاً
مش هيزعلوا
ان شاء الله



ربنا يوفقكم


و ارجو متكونش الخناقة
قلبت بغم

يمكن يجد ف الامور أمور
و التدوين يميل بينا
و نحتاج لمعاش استثنائى من عندكم
و لا حاجة فيبقى العلاكات بايظة
و احنا ميخلصناش

نورتنى يا باشمهندس
:)





صيدلانية طالعة نازلة
-------------------

بجد يا علا ؟!!

رأيك كان يهمنى بجد
و مبسوطة بتعليقك

بوسيلى العيال

و سلامى لدكتور أشرف
و ربنايديم عليكم الأحساس بنعمة
الرقـــ(7)ــــم

وشى منك فى الأرض

ايوة

الأول ألف سلامة لخالة حضرتك

تقوم بالسلامة ان شاء الله

بعد كدة

أنا بجد أسف بس بجد يدوب بقيت بكون ع النت انهاردة و انبارح

قبل كدة مكنش كتير

تخطيف على رأيى ايهاب توفيق

عارفة ...

بجد أنا بؤمن برقم 1 اووووي ...

وبجد مستنية الانسان دا ... يا ترى هيكون مين دا ؟ ...
متشوقة أعرفو ... بس كل تأخيرة فيها خيرة ... و أهو أشوف المستقبل مخبيلي إيه ...

كلام جميل بؤمن فيه ... :) ... و بؤمن برضو ... انو مفيش حب قبل الجواز ... على الاقل بالنسبة ليا ... :)

فاتيما

اولاً شكراص على ردك الوافى دوت .

وانا اعترفلك انى ما كنتش اعرفك الا ظاهرياً زى ما قولتى ....
بس ده كان فرصه جيده فعلاً سواء النقاش دوت او غيره ، انى اعرفك اكتر.

كنا نتمنى تشاركى معانا لاننا لما دورنا على اكتر حد ملم باخبار المدونين (كما هو ظاهر لنا ) لقينا انه هو انتى ، فكنتى هتبقى بمثابة مصدر طيب لاخبار الناس ، وهنا يكون مربط الفرس.

الا وهو ، ان هذه الفكره الجديده الى حد ما مختلفه شويه عن كل اللى ذكرتيهم.

وان كنت اتمنى انها تنجح ان شاء الله ، لاننا بنحاول فيها يبقى العمل جماعى اكتر من انه فردى

بس بالكلام اللى انتى قولتيه ده عن فشل ناس تانيه والحاجات دى بصراحه بدأت اقلق وخايف احبط ....

لكن عموماً .... من الروح الموجوده هناك انا متفائل ان شاء الله .


وان شاء الله هتجدى افكار كتيره قريب هتسر الجميع باذن الله.

واهى ياستى تجربه مش هنخسر حاجه ، سبيها انتى بس على الله ودعواتك معانا.


لكن هرجع واقولك برده ، بما اننا كنا بنقترح عليكى انك تمدينا بالاخبار بتاعت المدونين اللى تعرفيها ، وبما انك مش موافقه ، يبقى برده ما تبخليش علينا باى خبر عن الناس لاننا عايزين نبقى كلنا بنتابع اخبار بعض .


اااه قبل ما انسى .... موضوع الحريه ؟!!!!

انا مستغرب انك فهمتيه كده ..... عمر ما حد يقدر يغصب حد على اى شئ وبالذات فى عالم التدوين .....

لو كنت بهرج معاكى وانتى فهمتى كلامى كده .... يبقى لا خالص والله .....

ياباشا اهلا بكى ضيف كريم فى اى وقت ....
هتلاقى كم جاتوهات وعصاير ومسقعه وفول وطعميه لا تتخيليهم.


سلام يا باشا

أزال المؤلف هذا التعليق.

نبضات
-----
ازيك يا نبوضتى
انا فرحانة بتعليقك دا قوى قوى
و حاسة فيه انك مبسوطة عموماً
و يا رب تكونى انتى كمان ف خطواتك ماشية و لو كانت ببطء بس بثقة زى ما بيقولوا وصولاً لرقم سبعة ثم واحد ...


كلمة ف سرك و على جنب
محدش شايف
أمنيتك ليا ..اتحققت
يا عرافتى الساحرة

بوسات و حضونات
و صباحات معطرات
جميلات ..رقيقات
زيك




sal
---

صح يا غالى

منحرمشى منك
ابدااااا





shimaa
------

هذه حقيقة يا شيماء
الحب بياخد اشكال و درجات
و ساعات بيعدى قصادنا و منخدش بالنا منه و نسيبه يهرب ..
زى الفرصة بتاعت محمد منير اللى راكبة عجلة ببدال و العاقل لو يلحقها ..فيتبدل بيه الحال

اوقات كتير عشان النصيب
منشوفش الحب و المحبوب
كويس
او نشوف و نطنش
او نشوف و نخاف
اون نشوف و نتغابى و منتمسكش بيه
او نشوف و نتمسك و نيجى ف سوط السكة و نستسلم
..حاجات كتييير بتحصل
بس لو شوفنا و إتاكدنا و قدرنا نحتفظ بهذه المعجزة كى تظل بين ايدينا ..يبقى ليه لأ ؟؟
هيا هتتكرر كام مرة ف العمر ؟

دمت انتى بكل الود و السعادة يا حبيبتى





mrmr
----

ايوه يا مرمر

يا ريت يدركوا دا
لأن الادراك و الوعى نعمة
عشان تنوجد عند شخصين ف نفس التوقيت
حاجة نادرة .. صعب تحققها

مبسوطة ان الفكرة عجبتك
بوسيلى البناااات





re7ab.saleh
-----------
مساء البنفسج
و عطره و بهجته
يا رحوبة
كنتوا ف سيرتى ؟
و انا و لا كحيت و لا شرقت و لا حاجة
ينفع كدا ؟!!

هههههههه
معلش انا اسفة
العنوان شكله مش حلو
بس والله ما كنت اقصد
هيا جت كدا
كنت عاوزة حاجة تجسد معنى الخطة الربانى ..اللى بتمشى ف خطوات محدش يشوفها بس بتحصل ..و تتابع لحد ما ترجع تانى للأول

المهم انه عجبك يا حبيبتى

انا مبسوطة انى هقدر اشوفكم قريب
و يا رب اشوفكم دايما على ألف خير
يا عطر البنفسج و بهجته





bos bos بسمه عبدالباسط
----------------------

آه يا بسبوستى
هيا صدفة و مش صدفة
حد متقدرلك ..انتى و مفيش غيرك
و هوه و مفيش غيره
بس الصدفة لازم تجمعكم
و بعدين تعملوا كل ما تقدروا عليه
عشان متبقاش صدفة و تروح لحالها

بفرح يا بنات (انتى و رحاب صلاح يعنى )
لما الاقى ناس مهنتها الكتابة
و بيعجبها نكش الفراخ
المكتوب هنا دا !!!
بترفعولى نعنوياتى علطول
و بفتكر بابا الله يرحمه و اقول يا ريت يكون حاسس انى عملت حاجة قريبة من اللى كان نفسه فيه

بوسيلى روحك و احضنيهالى
لحد ما نتقابل
يا بسبوسة

و طمنينا على ماما يا بنتى
عاملة ايه دلوقت ؟

عاشقة الرومانسية
----------------

انا فاهمة يا شقااااوة
و ربنا يا حبيبتى يجرجر قلبك لحد الخطوة 7 ثم 1 بكل يقين و ثقة


و بتعتذرى عن ايه
خلاص عروسة بقى و بتتدلعى ...
و لو مش هتتدلعى علينا
هتتدلعى على مين ؟!!

انتى مش عروسة خنيقة خالص

انتى عروسة
من قبل ما تبقى عروسة

يا عروسة البحور
و قطتى ى ى ى
الحلوة


انا كمان بحبك يا حبيبتى
و خلى بالك من نفسك
لو سمحتى
ممكن ؟





P A S H A
----------

:)

و يا شياكتك
يا شريف باشا


بس رغم تعليقك الجميل
اللى مطمنى عليك شوية دا
بس انا زعلانة جدا
و مضايقنى .. قفلك لمدونتك
و محترمة الأسباب من غير ما اعرفها
بس اتمنى متبقاش مجرد خطوة
نحو الانسحاب التام
يا ريت


خالص ودى
واحتراماتى يا فندم
و يا ريت نشوفك يوم التبرع بالدم
ان شاء الله لو نفع تيجى




فيشة بنت كبس
------------

:)
ميرسى يا فندم
نورتى

أنتى بالذات
نورك زيادة ...
والفولت عااااالى

ههههه

بس ايه الأسماء الغريبة
اللطيفة دى صحيح ؟!!



أحمد
---

نورت يا استاذ احمد
و مبسوطة ان البوست عجبك
انا كتبته من قلب قلبى


بس واضح ان قصة حبك
للأسف
لم تكتمل
و الحزن باين بين سطورك


مش عارفة اقول ايه

بس هقولك
اهلا بيك دايما

nor
---

ازيك يا نور
صحيح يكفينى متابعتك من بعيد
لكن تعليقك
اسعدنى جدا


حكاية رجل شرقى
و يتفهم دى
بصى بقى

انا بقالى 37 سنة ف الدنيا دى
قاعدة كدا .. بتفرج
و الحكاية ملهاش دعوة براجل شرقى من غربى ..اد ما ليها دعوة
براجل حقيقى
و لا مش راجل حقيقى

ايوه
اصل فيه رجالة منظر
فشنك
كلام ع الفاضى
الراجل الحقيقى
مينكسفش من مشاعره
و لا مشاعر اللى قصاده
و وقت الحب
مفيش فرق بينه و بينها
اللى ميقبلوش من اى حد
لازم ييجى لحد الحب .زو يتغير
المفروض لو بيحب واحدة و قالتله كلام زى دا ..
يفرح ...
لأنها شالت الحواجز بينها و بينه
و مبقاش فيه فواصل
و حدود و متاريس و خطوط دفاع
و دروع و ميت الف حاجة
بتلخبط الدنيا بينهم ...
مش بتخليها احلى و اروق
و دا المفروض ف الأصل

المفروض
ان الدنيا تبقى سلسة و بسيطة
يعنى هما الاتنين
يتكاتفوا سوياً
عشان قصادهم حاجات كتير ف الحياة هتواجههم و تتعبهم
و لازم يحاربوها
او ع الأقل يصمدوا قصادها
قدر امكانهم


انما لو هما هيضيعوا الوقت ف اللف حوالين بعض
و مشاكسة بعض
هيستنزفوا روحهم
و مشاعرهم
بينما كان من باب اولى
يحطوا القوة دى مجتمعة
ف مكانها الصح


اى راجل حقيقى ..
و اى امراءة حقيقى
لو جتلهم اللحظة السحرية
اللى يشوفوا فيها الحقيقة دى
و يستوعبوها
و يقرووا ميخلوهاش تفلت من ايدهم
و تبقى خطة حياتهم
يبقى حلال فيهم المعجزة
و يستحقوا بقائها


اما لو طرف ف المعادلة اختل
او الجوز بقى
قلبهم لم يبصر

يبقى اللى بتقولى عليه
هيحصل للأسف


انتى نكشتينى بتعليقك
شوفتى بقى ..انتى لطيفة ازاى ؟؟؟


نوتى يا نور





فتاة من الصعيد
--------------

أيوه يا فتاى
سبحانه و تعالى
مفيش حدود .. لنعمه
و عطفه


تحياتى انا و بوسات و حضوناتى
يا مروة

يا مراكبى
---------

يا لهوى على WAW دى لما تيجى م المراكبى
و بعدها علامتين تعجب كمان
!!
يا خراااااشى

انا خدت نجمة ف الكراسة النهاردة
نجمة حلوة فضية بتلالى


هيا فعلا خطوات
متتاليات
و المحظوظ اللى ف مراحل معينة
خصوصاً الاولى
يبقى عنده بعد نظر
لما سيحدث ف الآخر
من معجزة
هتتحقق لو هوه بس صبر
و استنى شوية
و جاهد بكل قوة ..للأستمرار


يا لهوى و كمان تصفيق حاد

يا دعواتك يا ام فاتيماااااا

منحرمشى منك
يا نبع الحكمة الصافى
و الغالى



ماجد العياطى
------------

بجد يا ماجد
عجبك فعلاً
و لا بترفع من معنوياتى بذوقك
زى ما بتعمل دايما ؟

طب من غير ما تجاوب
انا بشكرك
و بقولك
مننحرمشى يا فندم




ghAdA mOhsen
------------

يا رب يا غدغود
يسمع منك ليكى و ليا و لك الناس
يا حبيبتى

كل سنة و مدونتك طيبة
على حسك يا عسوووولة




محمد التركى
---------
و عليكم السلام يا محمد

و ولا يهمك تعالى براحتك
كلنا بننشغل
مجراش حاجة


ليه مش مصدق يا محمد ف الخطوة الاولى ؟
دى هيا اهم حاجة ف الحدوتة

بص

انا معاك
ان تجسيد الفكرة فى البنى آدم الصح هيا اكبر مشكلة
لأن ممكن تلاقى حد .زو تتصور مخدوعا انه هوه دا .. و مفيش غيره
و تمشى ف كل الخطوات و بعدين تكتسف ف توقيت ما ..انك كنت موهوم
و انه مش هوه

عادى
ما بتحصل يامااااا
و نتكعبل
ف ناس و ظروف و دنيا

لكن اظن ان فيه كدا يا محمد
فيه حد يكملنا
موجود فى مكان ما .زحوالينا
بس لسه ما قابلنهوش
او قابلناه و عدى من قصادنا
او عدى و احنا عملنا مش شايفين
او عدى و احنا منغمسين ف مشاكلنا
او أى سبب


ربنا يحققلك كل ما تتمنى يا محمد
و مدونتك متبقاش ماضى
لأ
تبقى مستقبل ..يصنع حب
و نفرح بيك بقى
ان شاء الله

تقبل انتا تحياتى
و خالص ودى ليكم يا أهل بحرى
يا مجدع





Ramy
----


وشك ف السما يا رامى
انا كمان يا بنى مشغولة و مقدرة و الله انشغالك ..
كفاية بس بنطمن على بعض
و ميرسى على سؤالك عن خالتى
هيا بتتحسن الحمدلله شوية بشوية
بس احنا ملخومين شوية معاها
و لحد ما تروح معانا البيت و كدا
هناخد وقت عقبال ما الدنيا تستقر

خلى بالك من نفسك
دا المهم

قطرة وفا
--------

اكيد يا قطرة
كل تأخيرة و فيها خيرة


حكاية الحب قبل الجواز دى
ممكن نختلف أو نتفق فيها


الحب أصله ملوش وقت
و مش مرهون بمواعيد

مرهون بالشخص اللى قصادك


اول ما تشوفيه
تلاقى نفسك علطول كدا
بتحبيه

او الحكاية محتاجة وقت
بينك و بينه
عشان تكتشفى
انك بتحبيه

و لا الوقت و الظروف و كل الدنيا هتجتمعة ف صفه
و برضو تلاقى نفسك مش بتحبيه

يعنى

لا تستثنى نفسك من شىء
انتى متعرفيش بكرة فيه ايه و مكتوبلك
بس ان شاء الله يكون المكتوب
كله خير ف خير

نورتينى يا قطرة
و اسمك حلو قوى
قوى





ويكا
----

لأ التعليق وصل اهو يا ويكا
حكاية الأيرور دى بتحصل كتير


و موضوع فشل بعض المدونات السابقة دا حكمى الشخصى .زمتخدوش على انه نتيجة نهائية ...بس اللى تاخده على محمل الجد فعلا ..حكاية النفس الطويل و الصبر ..لأن نجاح المدونات اللى م النوع دا متوقف على الاستمراية اكتر


حكاية مصدر االاخبار دى
مش محتاجة موافقتى يا عم
تعالوا هنا كل يوم
و خدو الاخبار اللى تعجبكم
و انشروها .. هوه انا هفتح بوقى و لاّ أعترض
خصوصا بعد التلويح بسندوتشات الطعمية ...
بس انا عندى شرط

اذ ان فيه ازمة و كيلو الطماطم غالى
فأنا لو لقيت السندوتش مفيهوش طماطم زى ما بيتباع دلوقتى ف المحلات .... هرفع عليكو قضية و أجررجكم ف المحاكم ..انا بقولك اهو

اسلوبك راااااااااائع
تحياتى لحضرتك

السلام عليكم

فاتيما فاتيما فاتيما

انا بس جاية اسلم دلوقتي وليا عودة للتعليق يا حبيبة قلبي .. بس جيت اسلم عليكي واشوف اخبارك واخبار يوسف .. يا رب تكونو بخير يا حبيبتي :)

صباحك معطر بأجمل ورود الدنيا وكل الحب والأمل
قرأت ردك على التعليق ...عين بتغمز

بحبك اوىىىىىىىىىى يافاتيما ودائما قلبى ودعواتى معكى

بكره أكيد أحلى

انتى من أجمل الشخصيات التى جمعتنى بها صدف الحياه و هذا العالم الأفتراضى


أرق الأمنيات لك بان تحقق لك كل أمانيكى

تحياتى
عرافتك الساحره
قلب بيحبك

كلام 100 100 واللهي D:

وحستيني اووي بقا :)

بنت بتحلم
---------

ميرسى يا فندم
نورتينى




" يـ ألوناتك ! "
-------------------

ازيك يا الواناتك
وحشتينىىىىىى قوى
انا بخير
المهم انتى عاملة ايه ف الدنيا
و اخبار اهل غزة الجميلة ايه ؟

حمدلله على سلامتك





نبضات
-----






I'm The CraZy One
-----------------

و انتى كمان يا هند
وحشتينى يا حبيبتى
قوى قوى

إرسال تعليق