.

.

الـــدنـيــــــا بــــرد  

Posted by: فاتيما in




حــــاســـس

كــــأنى كـــــنت ف خــــــناقـة

وإنـضـــربـت بـجــــــد 






عـارفــــــة 

أنـا نفـــــسى احــــضـن حـــــد







هـــى الـدنيـــا بـــــــرد


وّلا أنــــــا 

اللــــى مــش واخــــــد بالـــــى



  

---------------------------------------------- 

يـــا قـــــلبـــى  

Posted by: فاتيما


يا أيـها القـــلــب الحــــــــرام 
أغــويــتــنى 
وتـــركـــتــنى
عــند مفــــرق الـوقــــــت 
قــتيـــــلاً 
لا الـــورد مـنثـــور عـــلى شـعــــرى
ومـا أهــديـتـنـــى 
حــقــــلاً مـن الليمــــون 
او صـهيـــــلاً 
وأخـــــذت منى 
فـــــرحـة الكـــــــلام 

رفعت سلام 
- إشراقات -

فــى حــــيـاة آخــــرى ...  

Posted by: فاتيما in




أنا بحبك .. ممممم
عشان بحبك و مش عشان محتاجلك 
  معرفش بكرة ايه .. بس اللى أعرفه
انك حلمى اللى إستنيته
طول عمرى .. و خلاص اتحقق





انا مش زعلان منك يا ماما 
وفاهم كويس انك بعدتى عنى 
وسبتينى غصب عنك
وانك مبطلتيش تفتكرينى و تحبينى 






انتى مخذلتنيش يا بنتى 
واللى جرالك نصيب مامنوش مهرب
و لو الزمن اتعاد من الاول
مش عاوزلى بنت غيرك







 متشليش هم حاجة
 طول محنا على وش الدنيا
و مش هتتحوجى بعد ربنا .. لأى بنى آدم








معرفش ليه كنت قاسى عليكى
و حاسبتك وضايقتك
 و ف الآخر جرحتك ... مع انك مكنتيش
مضطرة تعتبرينى حد من دمك 







صداقتنا كانت المفروض تكون عندى 
أهم من غضبى 
وانتى ملكيش ذنب فى إخفاقاتى
غلطتك انك كنتى ف وش المدفع وبس 









صحيح منقدرش نرجع حاجة م اللى خدناها 
ولا نعوضك عن العمر اللى ضاع
بس احنا مقصدناش أذيتك 
قد ما اضطرينا نساعد اخونا ف حربه ضدك






دى الحقيقة فعلا 
انا اتجوزتك عشان كنت بدور 
ع الحياة السهلة وانتى كنتى مفتاحها 
اللى إنفتح بيه الباب
وبعد ما دخلت.. مبقاش للمفتاح لازمة






اهلى ربونى أبقى كدا
و احمدى ربنا انك مش ف مكانى
يا ريت كان عندى اب وام زي اللى عندك






يا ريت رجوع يوسف بهدوء لحضنك
يكون محاولة اعتذار صادقة 
وكافية تنسيكى .. كل اللى حصل بيننا





يا حبيبتى انا مش عاوز .. واحدة غيرك 
و لو حتى كانت احلى وأصغر وأعقل 
وأشيك وأريح وألطف  ..
و معندهاش مشاكل ولا حياة ملعبكة زيك






مبروك يا ستى
انتى حامل ف بنوتة زى ما اتمنيتى 
هتسميها عالية زى ما قولتليى 
ولا هتغيرى رأيك ؟




 اللى عملته فيكى حصل
عشان كنتى  .. تحت رحمتى 
ودى فرصة كان لازم أستغلها








كان المفروض أهتم بيكى فعلاً
و أستنى وأسألك ... فيه إيه مالك ؟
لكن خطوبتنا كانت غلطة من الأساس






أيوه ... زمالة الدراسة والعمل 
ما منعتنيش 
اخد شغلك وانسبه لنفسى 
بس غصب عنى وإلا كانوا هيمشونى






 انتى بنتى الوحيدة 
وهياخدك احسن راجل ف الدنيا
وحتى دا كمان .... لازم يتعب شوية
عشان اوافق يخطفك من حضنى






فاطمة 
ترضى تتجوزي
واحد مجنون زيى ؟





-----------------------------------------------------
لا تحزن 
خلقت الاحلام كى لا تتحقق
احلام مستغانمى 

حـــواء ... وحـــواء  

Posted by: فاتيما in



يا عزيزى
إنتبه
النساء قد يختلفن 
و لكن ... فى نهاية الامر
كلهن ســــواء 

وحواء المنشودة
ستكون حتما
واحدة من إثنتين

 حواء خُلقت ... كى تعطيك
 وحواء خُلقت ... كى تأخذ منك


 
قدرك المحتوم يا مسكين 
يختبىء بينهما 
فلتكن واثق كل الثقة فيما تهم 
بنطق الكلمة



فحينها لا رد لقضاء 
ولن تتمكن عقارب الساعة 
من العودة أبداً ... للوراء



فذكائك الذى يضللك
سيجعلك تأخذ عطايا حواء الأولى
وتمنحها بكل بساطة .. لأخرى تمد يدها
لتغدو من بعدها كسيراً ...مفلساً
خالى القلب و الروح  

وستنسل من بين اصابعك
  حواء الاولى 
و مقدار حزنك ... وقتها على فراقها 
لن يساوى واحد على ألف



من جبال الهموم الشامخات
التى ستعلو بقلبك 
بسبب اختيارك البقاء مضطراً ودائماً
مع ... حواء الثانية
------------------------------------
-----------------------------------------------


فى أى طريق
تذهب 
لن يكون قدرك إلا 
 صورة من نفسك
(مصطفى محمود)
دوس هنا

الألـــ {1} ـــفـة  

Posted by: فاتيما in






أينعم 
الألفة .. مش عارفينه؟!!
اول فصله و اشطرهم و اللى عليه العين
والألفة بتاعى النهاردة 
مقصود بيه هذوها السخصية 
اللى كانت اول حد يدخل مدونتى المتواضعة ويسيب تعليق  على اول بوست فيها 






كان مين ؟
د.زين عبدالهادى 
صاحب مدونة تسابيح 
وفى قول آخر كما اناديه د.زين الغالى 
واللى بالصدفة كان بوابتى الذهبية
لعالم التدوين 
هوه اصلاً استاذ كبير ف مجال المكتبات
ويبقى الريس بتاع تلاتة من دفعتى 
و ريس اتنين من اعز الناس كمان
لأنه رئيس قسم المكتبات باحدى جامعاتنا
وانا بدور على آخر اخبار المجال ..بالصدفة 
الاقى خبر عن تهنئة لدكتور زين 
على انشاء مدونته و محطوط لينكها 
فبدوس عليه ...ببساطة
لقتنى بدخل ف عالم
انتم عارفين رأيى فيه واللى متغيرش 





مدونة د.زين كانت مساحة بالنسبالى 
للفضفضة والتعليق  من ورا ستارة 
بستخبى من دنيا لسه عاملالى رعب
كنت بكتبله دايما عن كل حاجة 
ومتخيلتش انى ممكن يبقى عندى مكان شبيه 
لحد ما تشجعت شوية بشوية 
وعملت ..روح قلب ماما 







الألفة بتاعى ..كان السبب بعد ربنا 
ف معرفتى بيكم 
وكان السبب بعد ربنا ف تواجدى وسطكم
عشان اتبدل من حال إلى حال 
و كان السبب بعد ربنا ف معرفتى بناس حلوة 
قوى كانوا من زوار مدونته زى 
اللى دايما كان يشجعنى الاقى 
مطرح بين السحاب فسميته العصفور 
المسافر دايما على حدود المجرة









وكمان الألفة بتاعى
كان السبب ف معرفتى 
بالرقيقة نبضات اللى سألتنى
وقتها بكل بساطة ازاى معندكيش مدونة 
وكأنها بتشوف المستقبل 
عشان كدا لقبتها بعرافتى الساحرة 
لأننا كمان اشتركنا ف حب موسيقى عمر خيرت









 الألفة بتاعى كان السبب 
فى معرفتى بالساحرة الطيبة 
مش الشريرة سهى زكى ام نهى 
واللى قلب بيمشى على رجلين
ومصطفى إزاز الشفاف اللى قلبه 
بينكسر من مجرد الهوا يعدى جنبه
وكريم بهى .. الرقيق الكريم والبهى 
والنص الاولانى من الفولة  
دوّدا هانم وست الهوانم 
و النص التانى ..  ميومة البهية مى بهاء
وفاوست ابو دماغ عالية ... الطيب
و سدورة سدرة المنتهى .. اللى اختفت
و آخر عنقود الغاليين ..ايمان فوزى 
مدونة شخابيط الرقيقة اللى شبه نسرين








الألفة بتاعى صحيح هجر مدونته 
وابتلعه عالم الفيسبوك 
لكن هيفضل الألفة بتاعى 
وصاحب اول تعليق 
على اول بوست 
وكان كالآتى



إلى يوسف 
حبيب قلب امه فاتيما 
يعنى بيتهيألى إن ماما ستلقى اليك 
بحجر الامومة المقدس ..فإستمع وأنصت 
ولا تلقى كثيراً من الأسئلة 
أعلم جيدا أنك 
طفل (عيل يعنى )يعنى هتسأل كتير 
بس مش مهم ..إسأل برحتك 
فكثير من الأسئلة ليس لها إجابات 
خالص مودتى لك ولأمك الاديبة





الجميل بجد
ان تعليقه كان موجه ليوسف مش ليا
وكأنه بيوصيه عليا 
وبيفهمه ويفهمنى ويفهمنا كلنا 
ان مش كل سؤال ف الدنيا هيبقاله اجابة 
وتلك حقيقة معرفش للأسف ولاّ لحسن الحظ
بس حقيقة ف كل الأحوال  






الألفة بتاعى كان وشه خير عليا
كفاية انه السبب ف تواجدى هنا 
فى مكان بحبه وحساه جزء منى 
طول عمرى بحب اكتب وبتمنى اعبر عنى
بس بلا ضغط ولا تمحيص  ولا مواعيد
ولا حد يعلقلى مشنقة او يقعد يحاسبنى 
والتدوين كان المتنفس على كل المستويات
عشان اخرج اللى جوايا 
وكان ممكن يخلص عليا ويقتلنى حتة حتة









الألفة بتاعى راجل طيب وشيك 
و مفيش مرة اشوفه صدفة .. فى أى حتة 
الا ويقولى بحماس .. هاتيلى حاجاتك 
انا عاوز انشرلك اليوسيفيات  بتاعتك دى
ابتسم واضحك وانكسف
واقوله شكرا وكأنه فعلا عملت كدا 
دايما كنت اشكره 
على ما يكتبهولى من تعليقات 
واشكره كمان على ما لا يعرف ... انه عمله 
وهوه كل المذكور اعلاه







وبما انها جت الفرصة عشان اقولها 
فيا ألفتى 
انا بشكرك من كل قلبى
على كل حاجة 









كدا البوست خلص ؟
لأ مخلصش 
انا قولت مين الألفة بتاعى 
ونشرت تعليقه 
وبهديله الغنوة المصاحبة للبوست 
لأنه من عشاق عبدالوهاب جدا 
وانا بحب الغنوة دى قوى كمان
و الدور عليكم 
كل واحد ناوى يعلق 
يقولى مين الألفة بتاعه 
ويعمل كوبى من تعليقه 
و يقولنا بالمرة كان عنوان البوست ايه؟




آه 
اللى عاوز يهدي الألفة بتاعه 
غنوة .... ماشى مفيش مانع 
او قصيدة شعر او حكمة أى شىء 
تحبوه  وتختاروه وشايفينه لايق على صاحبه

 




و يا ريت تتحمسوا وتشاركوا 
يمكن نلاقى حد كان صاحب اول تعليق 
لأكتر من مدونة 
يقوم ساعتها يبقى الفة الألفة








جوايز للألفة؟
لأ مفييييش 
هيوه انتوا مبتعملوش حاجة لوجه الله ابتتتتتن
يا خرااااااااااااااشى عليكو 






آه قبل ما أنسى 
اللى عنده اكتر من مدونة 
يختار أقدم واحدة بما انها اول حاجة
و بس خلاص 



بتبصولى كدا ليه؟!!
يلا كله على ارشيف مدونته 
اول سنة
اول شهر
اول بوست
اول تعليق  
عشان نعرف مين الألفة بتاعه
يلااااااااااا



ملحوظة مهمة

البوست دا إهداء للرقيقة 
ليس فقيرا من يحب 
اللى استوحيت فكرة البوست 
من تعليق ليها عندى 
 قالت فيه انى كنت 
اول نفر دخل مدونتها وساب تعليق  
لقتنى فرحانة زى العيال 
وعينى بتدمع وحالى حال 
يا رانيااااااااا .. البوست كله عشانك يا جميلة

---------------------------------------------
---------------------------------------------

بــرا الـدنــيـــا  

Posted by: فاتيما in






تصدق ؟
انى زعلانة من نفسى قوى 
أصل بقالى فترة مكتبتلكش مع ان 
فى قلبى و بالى .. ألف جملة وكلمة وحرف




 واصلى كمان مقولتش بحبك .. يا حبيبى
زى ما المفروض يحصل
و ايوه صحيح بقولها ...  يا حبيبى
كل يوم ..كتيييير 
وبقولها كمان بينى و بين روحى أكتر 
واوقات بندهك بين النوم واليقظة
بس برضو مبحسش
انى قدرت فعلاً انقل كل مشاعرى 
واختصرها ف الكلمة دى 







يا حبيبى 
  خلاص كدا ؟


هوه ينفع يا حبيبى دى 
تشرحلك كم الود اللى ف قلبى ناحيتك؟




ينفع يا حبيبى دى 
تفهمك معنى خوفى عليك
من اى حاجة ممكن تضرك او تضايقك
او حتى تعدى جنبك بالمصادفة ؟



ينفع يا حبيبى دى 
تخليك تقدر تتخيل همى
لأنى مش عارفة
امحى أى حزن او ذكريات وحشة من قلبك ؟





ينفع يا حبيبى دى 
تعرفك انى بعتبر نفسى ملكك ؟
وانى والله معنديش مانع 
اخالف كل انصار حقوق المرأة 
وارضى ابقى ملكك
و وقف مرهون بأسمك محدش يهوب ناحيته؟





ينفع يا حبيبى دى 
تقولك انى اختصرت فيك كل رجالة الدنيا 
وانى فجأة بقيت حاسة انى حوا الوحيدة ع الأرض ؟
ينفع ؟



صحيح بجد 
هينفع؟!






أصله احساس غريب جدا 
ومعرفش اوصفه 
مهما اسعفتنى كل قواميس اللغة 
ازاى اى لفظ ينقل احساس فيوصلك ؟
ويعرفك .. و يفهمك ؟





ازاى احكيلك عن وشى 
اللى اتغيرت كل ملامحه 
و لما ابص ف المراية واشوفنى حلوة 
فدا ... لأنى بحبك 




ازاى احكيلك عن شعرى 
لما بسرحه و احسه اطول واجمل
  ... لأنى بحبك






ازاى احكيلك عن عينى 
اللى بقت بتلمع لما افتكرك
ودا ... لأنى بحبك






ازاى احكيلك عن شعورى الممتع 
بأنى ست - جدا - و كان احساساً مفقوداً 
لأسباب كتير ..
و ان اى معاكسة دلوقتى بتعاكسها ف الشارع 
أو اى مجاملة حتى .. من أى مذكر سالم
و المفروض كانت بتضايقنى زمان وتخوفنى
دلوقتى .. بقت زى 
نقطة جديدة بتتسجل لصالحك
و تأكد قيمتك و تشيد بسحرك
و توضح قدرتك ببساطة من غير ما تقصد
وانك تعمل زى كلمات الغنوة 
وتجعلنى يا حبيبى  ... امراءة فى لحظات 










كام مرة كنت عاوزة اقولك
انى بحبك قوى 
ب ح ب ك 
فوق ما تتصور ويروح خيالك





كام مرة ابقى عاوزة اقولك 
قد ايه انى محظوظة 
لأنى شوفتك وعرفتك وقربت منك وحبيتك






كام مرة ببقى عاوزة اقولك
متخفش 
متخفش يا نور عينى من اى حاجة 
فاتت ولا حتى جاية بعدين 
لأنى هكون موجودة جنبك
و حتى وانت بعيد 
 مش هبطل افكر فيك ولا اشيل همك 
ولا هبطل زى ما بحاول احبك دلوقتى 
.. لأخر نقطة ف روحى 
انى كمان افضل احبك تانى
اكتر و اكتر واكتر 
حتى وكل واحد فينا ف مطرح






انا مبدورش على البعاد 
بس حطاه احتمال اكيد 
اصلها للأسف .. قاعدة استنها الأوائل والاوآخر 
وبتمنى قوى ... لو نقدر نشذ عنها 
ونكون انا وانتا المستحيل 
بس 
انا عارفة يا حبيبى 
اكتر منك .. ان دى معركة صعبة قوى
والأنتصار فيها فوز و مغموس بهزيمة
لأنه مجد صحيح 
بس على حساب .. اشياء أخرى
وان القيود لما تنكسر 
هتنكسر معاها .. قلوب تانية حوالينا بتحبنا 







الحكاية صعبة اكيد
لكن مين اللى قال ان كل حاجة ف الدنيا 
لازم يبقالها حل  .. وسريع كمان؟!
اوقات السكون والترقب
والإنتظار بيكون افضل الحلول 
والصبر كتييير ...بيكون المفتاح 
اللى يفتح كل الأبواب المتربسة
وينور طريق 








و عشان الإنسحاب .. وقت الجد 
هروب جبان 
ولأن قلبى بيعيش ويموت ف حبك
وعاوز يتشبث بقلبك
فانا دلوقتى يا حبيبى قررت
اكون معاك 
برا الدنيا 





برا الدنيا اللى بتخنقنى وتخنقك 
برا السلاسل ...اللى مربوطة فيها 
رجلى ورجلك ودايما تشدنا وتشل حركتنا
برا القيود ... التقيلة قوى 
الشديدة قوى 
القاسية قوى






اللحظات اللى بنتكلم فيها 
هبقى برا الدنيا
الساعات اللى بشوفك فيها كل فترة
هبقى برا الدنيا 
الأيام والعمر اللى هكونلك فيه
هبقى برا الدنيا 
البخيلة قوى
المرة قوى 
الصعبة قوى  






انا يا حبيبى من برا الدنيا
 شيفانى وشيفاك 
حمامة بيضا ... بتناجى وليفها 
وتغازله ويغازلها بأحلى كلام 
بيتعاهدوا يكونوا لبعض 
و يتواعدوا ميتفارقوش
مش حاسين غير انهم اتنين عاشقين 
و كفاية يبصوا ف عيون بعض  طول الوقت 
وميبصوش حواليهم ..ليقعوا وينكسرلهم جناح





مش حاسبين حساب الزمن والأيام 
ولا الأيدين اللى ممكن تتمد ف يوم لعشهم 
وتخطف واحد من حضن حبيبه
عشان الدنيا كتيييير بتعمل كدا 
احنا مش قولنا .. بخيلة  ؟!!







يا حبيبى ..كل شىء بقضاء 
ام كلثوم بتغنيها .. عشان تهون ع العشاق 
أى مفاجأة شايلها الزمن 
وانا راضية بقضائى .. أى كان 
لأنى عارفة ف كل الاحوال 
انك هتكون دايما جزء منه .. مش بسيط
جايز مكانك وقتها ... قد يكون بعيد او قريب 
جايز حظك وقتها ... يكون مصحوب بفرحة
او متبوع بندم 
جايز اللحظة وقتها ... تكون مناسبة
تعرف فيها ازاى حبيتك 
او العكس تماماً مين يعرف ؟!!






جايز حاجات كتييييييير 

لكن الاكيد
انى برا الدنيا ولا جواها 
بحبك ... يا حبيبى 
وهفضل أحبك ... يا حبيبى
لآخر لحظة يدق فيها قلبى ... يا حبيبى 
واستمتع بكل ثانية معاك .. يا حبيبى 
وافرح فى كل مرة بنطق الكلمة دى
 واقولك يا حبيبى
يا حبيبى
يا  حــبــيــبــى

-------------------
هذا انا
وفى نهاية الطريق ..أنت
والآخرون ..بيننا 
فاروق شوشة
------------------------------------------






انا بس بـطـمـن .....  

Posted by: فاتيما


اللوحة بريشة الفنان ... محمد حجى 
والصورة مقتبسة ببجاحة و بدون إذن .. من
مدونة العزيز أحمد كمال  ... (رحايا العمر )
---------------------------------------------------------------------
دوس هنا

فـــرحـــــ ☺ ـــــة  

Posted by: فاتيما in






 العواااااااااف عليكم 
مش هبتدى بوحشتونى 
لأنه .... امر مفروغ منه 
و مش هعتذر ع الغياب 
 اصول تكونوا اتعودتوا على ندالتى
وخلاص مش هقول اسفة
لأنى مبردش ع التعليقات 
عشان انتوا دلعتونى 
و اللى حصل حصل
 






طاه بعد كل دا 
ليكى عين عادى كدا تعترفى ؟
ما قولنا خلاص بقى وسامحونا
طيب انجزى و لخصى 
حاضر هدخل ف الموضوع  علطول اهو 







بوست النهاردة مش حكاية وتنحكى
و لا موقف و حصلى و بسجله 
لأ .... دا طلب و هطلبه منكو
بس الأول
هسأل سؤال بسيط
حد جرب فيكو ولو مرة
يدى ولد او بنوتة صغنونة 
حتة شكولاتة او اى حلويات ؟!؟





أكيد حصلت .. صح ؟
إيييييه؟!
محدش يهز راسه بلأ 
هجيب زمارته من رقبتها
قصدى رقبته من زمارتها 
ايون 
انا معرفش ناس بخيلة
و مش قصدى .. بخل الفلوس أكيد 







طيب
حد فاكر كويس 
ملامح و وش الطفل الصغيور 
بعد ما يشوف الحاجة الحلوة دى 
..بيكون ازاى ؟!!
حد بيلمح الفرحة اللى بتنط فجأة
ف عينه و كأنه لقى كنز ؟!











حد بياخد باله كمان 
من مدة ايده لما بيفردها
و يخطف الحاجة دى من ايدك 
او حتى ياخدها و هوه مكسوف 
بيبقى  ايه؟!؟






كلمة واحدة مظنش هتتغير 
الفرحة 
كلمة الفرحة وقتها بتتجسد 
 شكل وصوت وصورة 






اذا كان الفرحة دى بنشوفها 
ف الكبار اللى غاويين يمثلوا دايما 
انه مش هاممهم وعادى
فما بالكم بالعيال 
اللى لسه متعلموش يخبوا 
و يداروا الفرحة ومفيش اى اعتبارات 
تجبرهم على كدا؟








طب يعنى تفتكروا لو الطفل 
عنده اب و ام 
و اخوات كبار و قرايب و جيران
و مدرسين و أى نفر تانى فى محيطه
فاكره  دايما 
و بيجيبله الحاجة الحلوة دى 
بإستمرار  
و يديهاله كل ما يشوفه 
مش دى حركة شيك قوى
وتأثر ف نفسيته للاحسن ؟







طيب 
تخيلوا لو الطفل المذكور اعلاه 
طلع معندوش ناس كتير فاكرينه 
او عنده ناس ..بس معندهمش فلوس 
او معندهمش نفس 
او معندهمش استعداد .. يعملوا كدا 
يبقى ايه الحل ؟!!









خلاص كدا نحرمه م الفرحة 
اللى هيا حقه و جدا ؟!
و لا نحاول نساعده يلاقيها 
قدر امكاننا 






كام حد فينا بيعدى يومياً 
على طفل ف الشارع 
قاعد جنب واحدة ... بتبيع مناديل 
او بتشحت بيه او بتشغله بدالها 
ممكن تكون امه 
او تكون مأجره 
او خطفاه 
او اى حاجة ف دول 







كام طفل بنلاقيه شغال ف ورشة 
او شايل المكوة 
او ف محل و رايح يوصل طلبات ..الخ 
كام طفل من دول 
بتصادفوه ف يومكم ؟
حد بيفتكر العيال دى 
و طفولتهم  المسروقة منهم 
بفعل فاعل 
وبفعل اللى حواليهم
سواء اللى حواليهم دول 
قاصدين او ناسيين او متناسين؟








اكيد فيه منا قلوب كتير 
بتفتكرهم و نشيل همهم 
و فيه منا اللى بيحاول يساعد 
و فيه اللى مبيقدرش 
او مبيلحقش 
او بيخاف يعمل حاجة فعلاً
..ليفتح على نفسه طاقة جهنم 



طب  يبقى ايه الحل ؟
الحل .... ممكن يكون مادى 
انك لما تشوف طفل كدا 
تديله فلوس  مثلاً
او هدوم على قده تستره  
أو أى حاجة فى متناول ايدك و امكانياتك 
و دا للأسف مش حل صح
.. و بيجيبلى احباط 
لأنى غالبا لما هعمل كدا 
ببقى عارفة ان الفلوس دى هتتاخد منه 
و الهدوم ممكن ميلحقش يلبسها
و الأشخاص اللى بيستغلوهم هما 
اللى هياخدوا كل حاجة ف النهاية 








طب وبعدييييين ؟
والموقف يومياً يتكرر قصادى 
ملايكة ف سن البراءة مضطرين يشتغلوا 
او يقعدوا ف الشوارع ساعات طويلة 
ف ظروف سيئة و استغلال اسوأ 
و اتضايق انا من نفسى
لأن مفيش ف حياتهم أى بهجة كدا 







و لهذا ... دورت على حل مؤقت
 قد يبدو عبيييييط حبتين
لكن اهو على قد دماغى وتفكيرى
اللى بيحدث الآتى 
كل يوم بشترى كام مصاصاية 
و اشيلهم ف شنطتى 
و اى ملاك صغنن بصادفه ف طريقى
  ف الشارع
ف المترو 
ف أى حتة ... بطلع مصاصاية
و اديهاله 








معرفش اوصف المنظر 
بس اتمنى تعملوا كدا و تجربوا 
و تشوفوا بنفسكم 
الفرحة اللى لحظتها هتلاقوها 
بتركب جناحات 
و تطير وترفرف حواليكم 
و تحصلكم حتى بعد ما تمشوا خطوات 
بعيد عن الطفل دا 
اللى بيكون مشغول وقتها 
بفتح غلاف الغنيمة بكل لهفة 









ناس دلوقتى مش هيعجبها الكلام 
و هتقولى يا فاتيما 
طب كنتى هاتيله رغيف ياكله 
و لا حتى باكو بسكوت يقوته 
مصاصة ايه و بتاع ايه؟





اقولكم لاااااااااا 
اصل انا عندى نظرية ف الحكاية دى 
و استنوا عليا 
هشرحها اهو
متخلونيش اتنرفز و ازغرلكم








أصل زى ما قولت 
مش كل واحد من العيال دى 
بيبقى مع امه فعلا 
دى بتبقى واحدة بتستغله
وهوه بالنسبالها مجرد عدة للشغل 
لو اديته باكو بسكوت او اكل وارد
تقاسمه فيه 
و يمكن تاكله كله كمان ومتدليوش حاجة 
وارد جداااااا
اوقات بشوف خوف ف عيون الولاد  
فاقوم اقطع علي الست دى السكة 
و ادي الولد المصاصة و كلى ثقة و رضا 
عشان... 


(1)
هيا مينفعش تاخد منه المصاصة 
و تحطها ف بوقها عشان المنظر العام 


(2)
اكل المصاصة  بيستغرق وقت
عن أى حاجة حلوة تانية  
 يعنى بنطول ف وقت الإنبساط

(3)
المصاصة لونها و شكلها مبهج 
بيغير ف كآبة الحياة المعتادة 



و اللطيف بقى 
انى بقيت بقدر اخمن غالبا
العيل دا مع امه و لا واحدة غريبة 
لو واحدة مآجراه 
لما بدي الولد المصاصة 
بتبصلى بغيظ او لا مبالاة او استخفاف 
لكن لو مامته .. علطول تدعيلى
او المح ف عينيها شكر ولو كانت ساكتة
ساعتها بس بتأكد انه ابنها
لأنها زى أى ام حقيقية 
بتكون ممتنة .. لما حد يفرح ضناها








مش عاوزة حد يستصعب الفكرة 
لأنها ... مش مكلفة 
و مش لازم كل يوم 
و مش لازم المصاصات الغالية 
فيه كل الأشكال و الأسعار




و ممكن نعمل كدا مع أى طفل 
مش اللى ف الشارع و بس 
الفرحة حق اصيل لأى طفل 
وكل طفل ف الدنيا...و لازم توصله 
بأى شكل و طريقة  ... لازم توصله 
و تخيل لما تكون انتا الجناح
اللى بينتقل عليه الخير ولو بسيط
من مطرحه ... لحد صاحب نصيبه
اللى هوه مستحقه الحقيقى




 الملخص عشان محدش يقولى 
عاوزة ايه  يا رايقة
والبوست لازمته ايه 
انا م الآخر كدا
مبحبش المصاصات صحيح
بس دا لا يمنع 
ان لو حد يعرف 
صاحب مصنع حلويات 
يبقى يخليه يبيع لى بسعر الجملة
و ليه عليا .. هعمله دعاية محترمة 
هنا ف البلوجر
وكفاية الثواب اللى هياخده






و عاوزة كمان من موقعى هذا 
ابدى امتنانى لصديقتى الغالية 
و زميلتى ف الشغل 
اللى لما بتحب تعزمنى على حاجة 
ساعات اقولها .. هاتيلى بدالها 
مصاصات 
 فتوافق بإبتسامة و رضا خالص






و عاوزة بالمرة ما دمنا ع الهوا 
اتشكر كمان 
واقدم عميك احترامى لحركة الجدعنة
اللى جت من صاحب الكشك
الكائن تحت بيتنا 
عشان قرر ف لحظة شهامة 
يدينى المصاصات
من هنا ورايح بسعر مخصوص 
بعد توجس و تشكك دام اسابيعاااا
من عدد المصاصات اللى قعدت اشتريها 
كل يوم منه
و لسه سألنى النهاردة ف ساعة صفا 
يا ابلة اكيد حضرتك 
بتشتغلى ف حضانة ؟!!




و عشان متفتكروش البوست
دا لله كدا 
وجب عليا اوضح إن الأمر لا يخلو 
من بعض الاستفادة والجوايز
اصل من يومين 
وانا رايحة اركب المترو ..كالعادة
ولقيت الست اللى بتبيع المناديل  ..كالعادة
و معاها الولد و البنت بيلعبوا حواليها  ..كالعادة
طلعت المصاصتين ..كالعادة 
واديتهم للعيال ..كالعادة 
بس المرة دى .. على غير العادة 
لقيت البنوتة بتقولى .. انا عاوزة بوسة 
تنحت طبعا لثوانى 
وبعدين اديتها خدى .. وخدت المنحة
من غير ما اطلبها و لا أستناها 
بس بجد ..كنت محتاجها جدااااا 
ولما جيت اسألها .. عن اسمها 
عارفين الاجابة كانت ايه ؟
ببساطة ردت
اسمى 
فرحـــة
!!!!!!!! 
آه والله العظيم .. دا اسمها 








طلب أخير  +  الطلب الاولانى
لو ربنا فاتح عليكم 
إبقوا نقوا مصاصات شكلها يفتح النفس 
والوانها حلوة كدا وفرايحى
وعلى رأى د.ستيتة الغالية 
حاجة بهججة







واخيرااااا
اللى عجبته الفكرة ..يتكل على الله 
واللى مش عاجبه 
ميحبطنييييش والنبى


 




كل سنة وانتوا طيبين
يا احلى ناس وصحبة وعالم
عيد سعيد عليكم 
مليان رضا و انبساط و بالونات 
وحلويات وشكولاتات و مصاصات 
و فرحــة 
--------------------------------


و طالما جبنا 
سيرة المصاصات
فنا بحب 
الصورة دى جداااا

---------------------
و مينفعش الاقى مصاصات 
على شكل عريس بنتى 
المستقبلى 
و مجيبهاش يابساكيتو 

---------------------

و اذا ذكرت المثاثات 
ذكرت البنوتات العسولات 
دول عشانك يا كيـــــارا 


------------------

و كراكيب قلبى 
يا كركبة دماغ 
يا حبيبتى دول عشانك

----------------------

و لولى الشكولاتة
 البيضا والشقاوة
مصاصات من نوع خاص
--------------------

و اى حد عاوز .. يتفضل 
يلا انشالله 
ما عن حد حوش 
العيدية السنة دى مصاصات

----------------------
ودول جايين
طلب مخصوص 
عشان العيال 
يوسف 
وعادل 
وبسكوتة













--------------------

 

ملحوظة  أخيرة
الغنوة صحيح 
ملهاش دعوة 
بالتدوينة 
بس..... 
وايه يعنى 
لو العشاق 
ف دنيتنا يزيدوا اتنين 
وايه يعنى 
لو الدنيا بتسعدنا
و لو ساعتين
ناخدهم 
من الحياة سرقة
-----------------------
انا عاشق