.

.

الألـــ {1} ـــفـة  

Posted by: فاتيما in






أينعم 
الألفة .. مش عارفينه؟!!
اول فصله و اشطرهم و اللى عليه العين
والألفة بتاعى النهاردة 
مقصود بيه هذوها السخصية 
اللى كانت اول حد يدخل مدونتى المتواضعة ويسيب تعليق  على اول بوست فيها 






كان مين ؟
د.زين عبدالهادى 
صاحب مدونة تسابيح 
وفى قول آخر كما اناديه د.زين الغالى 
واللى بالصدفة كان بوابتى الذهبية
لعالم التدوين 
هوه اصلاً استاذ كبير ف مجال المكتبات
ويبقى الريس بتاع تلاتة من دفعتى 
و ريس اتنين من اعز الناس كمان
لأنه رئيس قسم المكتبات باحدى جامعاتنا
وانا بدور على آخر اخبار المجال ..بالصدفة 
الاقى خبر عن تهنئة لدكتور زين 
على انشاء مدونته و محطوط لينكها 
فبدوس عليه ...ببساطة
لقتنى بدخل ف عالم
انتم عارفين رأيى فيه واللى متغيرش 





مدونة د.زين كانت مساحة بالنسبالى 
للفضفضة والتعليق  من ورا ستارة 
بستخبى من دنيا لسه عاملالى رعب
كنت بكتبله دايما عن كل حاجة 
ومتخيلتش انى ممكن يبقى عندى مكان شبيه 
لحد ما تشجعت شوية بشوية 
وعملت ..روح قلب ماما 







الألفة بتاعى ..كان السبب بعد ربنا 
ف معرفتى بيكم 
وكان السبب بعد ربنا ف تواجدى وسطكم
عشان اتبدل من حال إلى حال 
و كان السبب بعد ربنا ف معرفتى بناس حلوة 
قوى كانوا من زوار مدونته زى 
اللى دايما كان يشجعنى الاقى 
مطرح بين السحاب فسميته العصفور 
المسافر دايما على حدود المجرة









وكمان الألفة بتاعى
كان السبب ف معرفتى 
بالرقيقة نبضات اللى سألتنى
وقتها بكل بساطة ازاى معندكيش مدونة 
وكأنها بتشوف المستقبل 
عشان كدا لقبتها بعرافتى الساحرة 
لأننا كمان اشتركنا ف حب موسيقى عمر خيرت









 الألفة بتاعى كان السبب 
فى معرفتى بالساحرة الطيبة 
مش الشريرة سهى زكى ام نهى 
واللى قلب بيمشى على رجلين
ومصطفى إزاز الشفاف اللى قلبه 
بينكسر من مجرد الهوا يعدى جنبه
وكريم بهى .. الرقيق الكريم والبهى 
والنص الاولانى من الفولة  
دوّدا هانم وست الهوانم 
و النص التانى ..  ميومة البهية مى بهاء
وفاوست ابو دماغ عالية ... الطيب
و سدورة سدرة المنتهى .. اللى اختفت
و آخر عنقود الغاليين ..ايمان فوزى 
مدونة شخابيط الرقيقة اللى شبه نسرين








الألفة بتاعى صحيح هجر مدونته 
وابتلعه عالم الفيسبوك 
لكن هيفضل الألفة بتاعى 
وصاحب اول تعليق 
على اول بوست 
وكان كالآتى



إلى يوسف 
حبيب قلب امه فاتيما 
يعنى بيتهيألى إن ماما ستلقى اليك 
بحجر الامومة المقدس ..فإستمع وأنصت 
ولا تلقى كثيراً من الأسئلة 
أعلم جيدا أنك 
طفل (عيل يعنى )يعنى هتسأل كتير 
بس مش مهم ..إسأل برحتك 
فكثير من الأسئلة ليس لها إجابات 
خالص مودتى لك ولأمك الاديبة





الجميل بجد
ان تعليقه كان موجه ليوسف مش ليا
وكأنه بيوصيه عليا 
وبيفهمه ويفهمنى ويفهمنا كلنا 
ان مش كل سؤال ف الدنيا هيبقاله اجابة 
وتلك حقيقة معرفش للأسف ولاّ لحسن الحظ
بس حقيقة ف كل الأحوال  






الألفة بتاعى كان وشه خير عليا
كفاية انه السبب ف تواجدى هنا 
فى مكان بحبه وحساه جزء منى 
طول عمرى بحب اكتب وبتمنى اعبر عنى
بس بلا ضغط ولا تمحيص  ولا مواعيد
ولا حد يعلقلى مشنقة او يقعد يحاسبنى 
والتدوين كان المتنفس على كل المستويات
عشان اخرج اللى جوايا 
وكان ممكن يخلص عليا ويقتلنى حتة حتة









الألفة بتاعى راجل طيب وشيك 
و مفيش مرة اشوفه صدفة .. فى أى حتة 
الا ويقولى بحماس .. هاتيلى حاجاتك 
انا عاوز انشرلك اليوسيفيات  بتاعتك دى
ابتسم واضحك وانكسف
واقوله شكرا وكأنه فعلا عملت كدا 
دايما كنت اشكره 
على ما يكتبهولى من تعليقات 
واشكره كمان على ما لا يعرف ... انه عمله 
وهوه كل المذكور اعلاه







وبما انها جت الفرصة عشان اقولها 
فيا ألفتى 
انا بشكرك من كل قلبى
على كل حاجة 









كدا البوست خلص ؟
لأ مخلصش 
انا قولت مين الألفة بتاعى 
ونشرت تعليقه 
وبهديله الغنوة المصاحبة للبوست 
لأنه من عشاق عبدالوهاب جدا 
وانا بحب الغنوة دى قوى كمان
و الدور عليكم 
كل واحد ناوى يعلق 
يقولى مين الألفة بتاعه 
ويعمل كوبى من تعليقه 
و يقولنا بالمرة كان عنوان البوست ايه؟




آه 
اللى عاوز يهدي الألفة بتاعه 
غنوة .... ماشى مفيش مانع 
او قصيدة شعر او حكمة أى شىء 
تحبوه  وتختاروه وشايفينه لايق على صاحبه

 




و يا ريت تتحمسوا وتشاركوا 
يمكن نلاقى حد كان صاحب اول تعليق 
لأكتر من مدونة 
يقوم ساعتها يبقى الفة الألفة








جوايز للألفة؟
لأ مفييييش 
هيوه انتوا مبتعملوش حاجة لوجه الله ابتتتتتن
يا خرااااااااااااااشى عليكو 






آه قبل ما أنسى 
اللى عنده اكتر من مدونة 
يختار أقدم واحدة بما انها اول حاجة
و بس خلاص 



بتبصولى كدا ليه؟!!
يلا كله على ارشيف مدونته 
اول سنة
اول شهر
اول بوست
اول تعليق  
عشان نعرف مين الألفة بتاعه
يلااااااااااا



ملحوظة مهمة

البوست دا إهداء للرقيقة 
ليس فقيرا من يحب 
اللى استوحيت فكرة البوست 
من تعليق ليها عندى 
 قالت فيه انى كنت 
اول نفر دخل مدونتها وساب تعليق  
لقتنى فرحانة زى العيال 
وعينى بتدمع وحالى حال 
يا رانيااااااااا .. البوست كله عشانك يا جميلة

---------------------------------------------
---------------------------------------------

This entry was posted on السبت, نوفمبر 20, 2010 and is filed under . You can leave a response and follow any responses to this entry through the .

26 كــــلام بيطــبطـــب عـــلى قــــلبى و روحــــى

يا ترى انا اول تعيق
ولا
هاعتبر نفسى انى اول تعليق
واقول---------
---------

اولا
كل عام وانتى بخير

اخبار

الفته

واللحمه

ايه

اتأخرت شويه
اصلى كنت باقرأ البوست
وشدنى جدا
جميل بجد اننا نعترف بفضل حد فى حياتنا او دور لشخص ويكون له اثر فى تغير وتبديل حال انا شخصيا اكن لصديقتى صدى الصمت الفضل فى دخولى عالم التدوين وهى ترجعالفضل الى اخوها المراكبى فى دخولها عالم التدوين ايضا يعنى هتلاقى حلقه كبيره من الاشخاص كان لهم ادوار فى حياه بعض

جميله الاغنيه
احييكى على اختيارك
دومتى بكل الود
تحياتى

كل سنة و انتى طيبة يا قمر و دمك خفيف زى مانتى كده :)

الالفه بالنسه لى هى حور الجنه صديقتى من الجزائر وهى اللى عرفتنى على عالم التدوين ومن خلال مدونتها عرفت مدونه روح قلب ماما
وهى اللى عملت لى مدونتى واختارت معايا الاسم والعنوان والتوقيع بتاعى وسهرت معايا للصبح تاخد راى علشان كل شئ فى المدونه يكون بزوقى وبعدها اتعلم

الالفه بالنسبه لى كان اول تعليق من ستيته ومنك عندى وكنت طايره فى السما بيه

الالفه كان اكثر من شخص

وكل انسان بحبه وعرفته من خلال التدوين هو الالفه بالنسبه لى




وهتفضلى انتى وستيته وحنين وكيارا الالفى على قلبى للابد



بحبك ياقلب البحر

جميل جدا الموضوع دة
انا دخلت عالم التدوين دة بالصدفة المحضة زى مابيقوله وعموما اكتشفت عالم جميل بتهيقلي مقدرش استغني عنه والحمد لله محبتش الفيسبوك عشان كدة مش هاسيب التدوين الا في ظروف قاهرة جدا ان شاء الله
بجد بشكر ربنا ان في تدوين

اول بوست بقي كان عن شخصية اسمها زرياب
بس كانت محاولة ساذجة جدا للكتابة بعديه محاولتين كمان وبطلت اكتب لمدة 6 شهور بعد كدة رجعت وبدأت اكتب باسلوب جديد خالص اللي انتوا بتقروه وربنا يستر مايجليش احباط لاني قريب منه تقريبا

اما عن اول المعلقين ممكن افتكر واحد منهم عمو فشكوول لو تعرفيه لان باقي الناس اما اللي هجر المدونة او مبدخلش عندهم لاسباب خاصة وهما بالمثل

عموما الموضوع اهو

http://haythamalsayes.blogspot.com/2009/07/blog-post.html

شوفتي عملت الواجب كله اهو فين الجايزة بقي

تحياتي ياام يوسف الجدعة

الأول أشكر هذا الألفة الرائع
الذي حفز وشجع وأتى إلينا بهذه الهدية الغالية
أم يوسف
واحدة من أجمل وأمتع وأصفى من عرفتهم في حياتي كلها
وليس في هذا العالم الإفتراضي فقط

إنتي عارفة اللي في قلبي بقى :)

مليش دعواااااا
هيه بقي هيه
:)
ازيك يا فاتيما الخير
يا فاتيما البركات
يا فاتيما كل حاجة طيبة
في زمن ربنا اللي عالم بيه
كل سنة وانتي طيبة
وكل مدون ومدونة تزداد حبا
للمدونة وصحبتها الجدعة أم يوسف
كل سنة وانت طيبة
معلش كانت فترة عدم توازن بالنسبة
لي
عشان كدا كانت سلامتي متأخرة حبيتين

كل سنه وانتي طيبه

شوفي ياستي البدايه كانت من قبل مااعمل مدونتي بكتير قرب السنه كده نقدر نقول من 2007 عرفت المدونات عن طريق ابن خالتي وكنت بدخل اقرا واتجول
لحد ماقال لي اعملي مدونه
وفضلت الفكره مركونه لحد يوم عيد ميلاد مامتي في 2008عملت البوست وطبعا اول من علق هو وكذلك فوكسلوجيا اللي هو صاحب الكيت كات
وتاولت البوستات
بس خلاص
:))

حااااضر عيوووووني
وهتتعمل فبوست مستقل
وابقي تعاااالي عندينا بقي
ولا انا مش وحشااكي
قري واعترفي:))

يا حلوياتك يا شرباتاتك

طبعا اول تعليق دا زى اول عيل ماتنسيش ابدا فرحتك به

البت قرفه والبت ننوس شدو شعر بعض على اول تعليق بس قرفه سبقت ههههههههههه

ووصلت للخط الاول

بس احساسى يومها بتعليقات كلها انها اول تعليق الحقيقه

هو انت ليه كل حاجه منك حلوه؟؟؟؟؟

كل سنه وانتى طيبه يا طمطم
يارب تكونى بخير
وخالتووو كمان تكون بصحه جيده
ربنا يفرح قلبك
اما عند البوست حاضر لسه ح ادور فى الارشيف لحسن الزهيمر خارب الدماغيغ خالص هههههه

ازيك ياطمطم
فكرتك جميلة جدا ورسمت ابتسامة كبيرة جدا فى قلبى
شوفى ياستى
عندك وقت ؟


الالفة بتاعى أستاذ طارق مؤمن صاحب مدونة عابر سبيل وتعليقه كان فى أول مدونة لى وكنت عملهالى اخويا بايميله وحسابه وكنت كاتبة موضوع نارى عن خطبة كان ألقاها أسقف القوصية فى أمريكا
وكلام أستاذ طارق كان مؤيد لى بس للاسف بحركة ذكية تنم عن تعامل متميز مع التكنولوجيا الحديثة مسحت المدونة ومكنتش أعرف أنى ممكن أرجعها تانى ومكنش فيها غير الموضوع ده وتعليق أستاذ طارق

وبعدين
عملت مدونتى الحالية وأنا حاسة باحباط شديد انى لوحدى فى الفضاء الافتراضى وبالصدفة عرفت أعلق عن الباشمهندسة رانيا ( سبهلله ) ماهو مكنتش عارفة ابعت التعليق ازاى :$
وفى يوم صحيت الصبح بروق المطرح وبرش المياه وناوية أبخر المدونة يمكن حد يطل عليها لقيت مكتوب التعليقات (1)
طبعا كان قلبى هيقف فيها دى
ولقيتها سبهلله وكان ده تعليقها على تدوينة كانت بتتكلم عن متابع شرفنا من الوزارة وقال لنا بالحرف ان التاريخ مادة مالهاش لازمة وان لو الامر بايده
كان خلاه مادة نشاط وعليه اربع درجات بس
المهم ده أول تعليق فى مدونتى حبيبتى



(هو التعليم باظ من شوية
ولما التاريخ مالوش لازمة
كل دول العالم بتفخر بتاريخها ليه وعملاله متاحف ليه؟؟
ولما الجغرافيا مالهاش لازمة كل دولة فى العالم عاملة لنفسها حدود وحاطه عليها حرس وياويله اللى ياخد سم من البلد الى جنبه
دى بتضيع فيها رقاب وتقوم بسببها حروب
تعرفى ان الراجل اللى قال الكلمتين دول فعلا راجل مالوش لازمة
حسبى الله ونعم الوكيل
الواحد متحسر على التعليم اللى ضاع
ربنا يستر على ولادنا)


انتهى كلام سبهلله
الاجمل ان تانى تعليق كان من مدونة اسمها يوميات مصرية بس مش موجودة تقريبا دلوقت

التعليق الثالث بقى كان من أستاذ طارق مؤمن :)
ودى كانت واحدة من الاحداث الحلوة لانه وصل لمدوناتى منين مش عارفة
وكل واحدة كانت باسم وحساب مختلف وكانت أول كلمة ليه فى تعليقه ملهمة قوى


(أحسنت البيان ياحفيدة عرابى )

طبعا طرت من الفرحة وبقيت بكلم نفسى
مشيها بقيت لانى طول عمرى بكلم نفسى عادى جدا :)

وبقت كلمة حفيدة عرابى هى الجائزة اللى باخدها منه لما أحس انه راضى عن موضوع كتبته
وده تعليقه الاول فى لقد خلقنا الله احرارا عن مقال مكنش عاجبنى لابراهيم عيسى مع احترامى ليه عن منتظر الزيدى وضرب بوش بالحذاء الهى ينضرب فى قلبه البعيد

(احسنت البيان يا حفيدة عرابي
مع كامل احترامي للأستاذ ابراهيم عيسي
ولكن ليس امثال بوش من يستحقون الأحترام بل ان بوش نفسه يعلم مقدار كراهية الشعوب العربية له و لكنها العنجهية و الرغبة في الاذلال هي التي تدفعه لعقد مؤتمرات ببلادنا
تحياتي)



سبهلله وأستاذ طارق أهديهم ايه ؟
مش هقدر بجد غير دعوة لله يسعد أيامهم زى ماأسعدونى ويبارك فى صحتهم وأزواجهم وأولادهم
بالرغم من انى لسه ماشوفتش حد منهم
لكن غاليين جدا على قلبى وحاسة انهم وكتير جدا للامانة قرايبى وأهلى ومش بحس معاهم بغربة ودى الحاجة الجميلة المبهجة الغريبة العجيبة اللى حصلت لى من أول ماعرفت التدوين

الاستاذ المحترم اللى فكر فى فكرة المدونات له جزيل شكرى وامتنانى ليوم القيامة
الالفة الغير مباشر يبقى ...
بس كده حرام بقى
التعليق بقى بوست كامل

تسلمى ياطمطم أنت وأفكارك الحلوة ويارب تكونى دايما بخير وتفرحى جوه الدنيا مش براها
وغلاسة يعنى سلامى للاستاذ محمد فوزى :)

كل سنه و انتي طيبه
و زي ما قلت لك يوم ما شفتك لاول مرة انك تملكين طيبه و حنيه تخطي العالم كله بدفئك و فضلك
ولانك كما توسمت فيكي تكتبين لتزيني بالفضل نياشين لاصحابك حتي لو كان تاثيرهم غير مباشر في سعادة مررت بها

سيدتي ادين بالفضل لكلماتك لانني اتصلت بصديق فعل معي مثلك و لكنني قصرت بحقه

كل سنه و انتي طيبه

تحياتي

انا الالفه بتاعتي

سهير زكي

اه وربنا

بنوته زي العسل

اختفت ربنا يوفقهاا

اولا
ازيك يا فاتيما
موضوع جميل جدا
ونشكر صاحبة الفكرة
ومن موقعى هذا
اقر واعترف
ان الفضل يرجع فى فكرة انى اعمل مدونه هو حازم شلبى
لما كنت بعلق عنده من سنه 2007
عجبتنى الفكرة والموضوع فعملت مدونتى
وبرضوا افتكر انه كان اول تعليق هو حازم شلبى وانتى يا فاتيما تانى تعليق
عمرى ما انسى مع انى مسحت التدوينات قبل كدا
بس عمرى ما انسى
ومع الاسف الشديد مدونيين من احسن المدونيين اختفوا ومبقوش يظهروا الا كل فين وفين مع ان كتابتهم من اجمل ما قريت فى عالم التدوين
ومنهم حازم شلبى
ادعيلى اقدر اجى بؤجة الخير
وحشانى يا حبى

فرحت قوي لما عرفت إنك قسم مكتبات يا فاتيما أصل أنا قسم مكتبات اسكندرية و بغذن الله أدخل مدونة استاذك حالا و أتوجل فيها كمكتبية قديمة ...بس انا مشتغلتش بس كنت في السنين اللي فاتت بساعد كتير من الطالبات زمايل اخواتي اللي بيدخلوا القسم بتاعنا .....بوست كله ألفه تسلم إيديكي

إية الموقف المحرج ده احم احم احم
شوفي يا فاتيما يا ام يوسف يا غالية عندي اووي وعند كل الناس ...
انا زي ما قلت قبل كدة اني عملت المدونة عشان بس اعلق عند مدونات اصحابي وفضلت سنة وشهر مكتبتش فيها غير كلمتين اتين ...اهلا وسهلا ...
مكونتش اعرف اعمل اية ولا ازاي اضيف موضوع والا اكتب تعليقات ومدونتي كان شكلها عيالي خالص خالص هههه مناسب معايا طبعا بعدها اتقابلت مع غادة صديقتي العسولة اللي وقفت جنبي وكنا عندها ف البيت ولسة طعم النسكافية اللي يسرا عملته لي فاكراه ولسة فاكرة ازاي كنا بنختار الموضوع وانسقة وانشره واضيف صورة ده كله طبعا بتوجهات حبوبتي غادة محسن العسولة ....نشرت ثلاث موضوعات وكانت غادة بتقولي تعليقها عليهم ...لكن وقتها غادة نسيت تضيف المدونة عندها عل المدونة بتاعتها القديمة لانها كانت مشتركة مع شخص اخر ف المدونة دي ...وبعدها غادة عملت بستان افكاري وبدأت تعلق عندي ...فاكرة ان اول تعليق كان من شخص غير معروف ....ولغاية دلوقت معرفتوش وكان الموضوع اسمه ما تيجي نحب وتعليقه وبعدها كان تعليق من شخص اسمه زكريا المصري ...انا دلوقت دخلت مدونته عشان اعرفه والله ...بس انا بعتبر ان أول تعليق والالفا عندي هو استاذي اللي مش هقول اسمه لاسباب كتيرة مش حكاية حب ولا كلام من ده ولا غرور ولا اني بعمل نفسي عارفة ناس كبيرة والكلام ده لكن لاسباب اخري احب الاحتفاظ بها لنفسي ..هو صحفي وناقد سينمائي وكاتب سيناريو تليفزيوني وسينمائي ...اعرفه منذ سنواتي الاولي لمراسلة جريدة الدستور المعارضة ودائمة الاتصال به عبر النت والفيس بوك اول ما استخدمناه في مصر واتصل به علي فترات عبر الموبايل بجد شخصية محبوبة جدا ...واعتز بمعرفتي به جدا جدا جدا يكفي اني اخجل من كلماته لي برغم اني اعرف انه لا يجاملني اطلاقا وكم من مرة يكتب لي تعليقاته علي كتابات كتبتها علي الفيس بوك وكانت مفاجأة لي ولاصدقائي ان يشيد بما اكتبه بهذا الشكل وبصراحة انا مش تقليل من نفسي بس بجد كنت شايفة اني اقل واحدة من اصحابي بعرف اكتب ...لكن شهادة استاذي جعلتني اطلق الثقة في نفسي اكثر واكثر واهتم بكل ملاحظاته لي وتوجيهه سواء علي الفيس بوك او المدونة او عبر الايميل اذا لم يكن متاح الوقت لدية ...وكفاية انه اختارني في يوم من الايام اني ادخل معاهم ورشة السيناريو واشتغل ف مسلسل مشهور جدا جدا جدا بس للأسف بابا موافقش وكنت مضطرة اني اقوله ان شاء الله مرة تانية ...واصحابي اشتغلوا معاه وحققوا نجاح كبير وفرحت لهم اووي اووي وبرغم اني زعلت علي نفسي بس قلت الحمد لله اكيد ربنا مقدر لي شيء احسن ....يااااة ذكريات جميلة اووي ...كنت بتجنن لما بشوف جنب كلمة تعليقات رقم واحد او اتين معلقين ...بس يمكن لاني مكنتش اعرف عالم التدوين الا مدونات اصحابي وبس لكن لما دخلت مدونات ناس معرفهومش العالم بقي ارحب وارحب اووي اووي وعرفت عوالم وناس عمري ما هنساهم ابدا ابدا ...فاتيما بموت فيك وف افكارك وف كل حاجة فيك وف كل كلمة بتكتبيها امووووووة يا رب اشوفك قريب

حبيبتى واختى

وحشاااااااااااااااااااااااااانى اووووووووووووى اووووووووووووووووووى يا تيما

مقصرة معاكى النت فاصل معظم الوقت ومش عارف اتابع

خسارة تفوتنى كميه الطيبه والحنيه

والرقه اللى باشوفهم فى بوستاتك

انتى حقيقى من اروع الناس اللى عرفتها

شخصيه كده تحسى انها جايه من الجنه
طيبه من غير حدود وحنان من غير حدود اكتر حاجه بتشدنى فى اى انسان هى حنيته وده شدنى ليكى قوى يا تيما
حقيقى انتى حنينه وعنيكى حلوة وقلبك حلو بيشوف الناس بطريقه تانيه وبيشوف عيوب اى بنى ادم بطريقه رقيقه قوووووووووى
باحبك وربنا

انتى صح اول تعليق لقيته عندى
على اول بوست يوم 30/6 سنه 2009
متتصوريش يومها فرحت بالتعليق ده ازاى بقيت باتنطط كده وانتى طبعا عارفه فرحتنا بالمدونات فى الاول تقريبا كان الواحد ساكن فيها
بابص ع التعليقات لقيت تعليق منك ويومها قعدت اضحك واتنطط واقول لاختى الصغيرة جالى تعليق جالى تعليق ههههههههههههههههههههههه والله يا تيما يوميها انتى دخلتى السرور على قلبى بجد

انتى عارفه هاهديلك اغنيه ايه

اغنيه كده لمحمد منير اسمها عنيك حلوين

اسمعيها ولعلمك مع انى صوتى منيل الا انى ممكن اغنيهالك عادى خالص ههههههههه
احم

عنيك حلوين هادين صافين مليانه حنين بيخطفنى
وعنيك طعمين رايقيين دافيين هتاخدنى لفين لفين وتسرقنى

يا احلى حاجه شافتها العيبن تيما

عارف عنايا بتعشق مين تيما بردو

ههههههههههههه كفايه ازعاج

باحبك ويعلم ربنا
ربنا يجمعنا فى الجنه باذن الله

ازيك يا فاتيما..وحشاني قوي قوي..يا رب تكوني بخير..بالنسبة للأجابة على أسئلتك..أنا قررت أعمل مدونة بعد ما قريت كتاب"أرز باللبن لشخصين و كتاب عايزة أتجوز فزرت المدونة بتاعت غادة و انتي كنتي معلقة هناك ..زرت مدونتك.. و انتي عارفة الباقي بفى..:)يعني نقدر نقول ان انتي الألفة بتاعتي لأني عملت المدونة بعد ما قريت مدونتك كلها.

مبروووووك
وعقبال الالفيه الجاي والباشا يوسف معاكي

تقبلي مروري

وصباح الخير.....

انا اول تعليق كان من الرقيقة صاحبة حقل التيوليب الاحمر
برنسيس دودو
اللى للاسف تغيبت عن التدوين من فترة

وحشتنى يا طمطم
و مش هاقولك زى باقى الناس على يوم البؤجة
لانك صاحبة مكان خلاص
اشوفك على خير يومها

عارفة نفسى فى ايه ؟
نفسى اعيط فى حضنك :(

مدونتك رائعة جدا أعجبتني
أرجوا زيارتي في مدونتي وإبداء رأيك فيها
http://helmalomomah.blogspot.com/

إرسال تعليق