.

.

بــرا الـدنــيـــا  

Posted by: فاتيما in






تصدق ؟
انى زعلانة من نفسى قوى 
أصل بقالى فترة مكتبتلكش مع ان 
فى قلبى و بالى .. ألف جملة وكلمة وحرف




 واصلى كمان مقولتش بحبك .. يا حبيبى
زى ما المفروض يحصل
و ايوه صحيح بقولها ...  يا حبيبى
كل يوم ..كتيييير 
وبقولها كمان بينى و بين روحى أكتر 
واوقات بندهك بين النوم واليقظة
بس برضو مبحسش
انى قدرت فعلاً انقل كل مشاعرى 
واختصرها ف الكلمة دى 







يا حبيبى 
  خلاص كدا ؟


هوه ينفع يا حبيبى دى 
تشرحلك كم الود اللى ف قلبى ناحيتك؟




ينفع يا حبيبى دى 
تفهمك معنى خوفى عليك
من اى حاجة ممكن تضرك او تضايقك
او حتى تعدى جنبك بالمصادفة ؟



ينفع يا حبيبى دى 
تخليك تقدر تتخيل همى
لأنى مش عارفة
امحى أى حزن او ذكريات وحشة من قلبك ؟





ينفع يا حبيبى دى 
تعرفك انى بعتبر نفسى ملكك ؟
وانى والله معنديش مانع 
اخالف كل انصار حقوق المرأة 
وارضى ابقى ملكك
و وقف مرهون بأسمك محدش يهوب ناحيته؟





ينفع يا حبيبى دى 
تقولك انى اختصرت فيك كل رجالة الدنيا 
وانى فجأة بقيت حاسة انى حوا الوحيدة ع الأرض ؟
ينفع ؟



صحيح بجد 
هينفع؟!






أصله احساس غريب جدا 
ومعرفش اوصفه 
مهما اسعفتنى كل قواميس اللغة 
ازاى اى لفظ ينقل احساس فيوصلك ؟
ويعرفك .. و يفهمك ؟





ازاى احكيلك عن وشى 
اللى اتغيرت كل ملامحه 
و لما ابص ف المراية واشوفنى حلوة 
فدا ... لأنى بحبك 




ازاى احكيلك عن شعرى 
لما بسرحه و احسه اطول واجمل
  ... لأنى بحبك






ازاى احكيلك عن عينى 
اللى بقت بتلمع لما افتكرك
ودا ... لأنى بحبك






ازاى احكيلك عن شعورى الممتع 
بأنى ست - جدا - و كان احساساً مفقوداً 
لأسباب كتير ..
و ان اى معاكسة دلوقتى بتعاكسها ف الشارع 
أو اى مجاملة حتى .. من أى مذكر سالم
و المفروض كانت بتضايقنى زمان وتخوفنى
دلوقتى .. بقت زى 
نقطة جديدة بتتسجل لصالحك
و تأكد قيمتك و تشيد بسحرك
و توضح قدرتك ببساطة من غير ما تقصد
وانك تعمل زى كلمات الغنوة 
وتجعلنى يا حبيبى  ... امراءة فى لحظات 










كام مرة كنت عاوزة اقولك
انى بحبك قوى 
ب ح ب ك 
فوق ما تتصور ويروح خيالك





كام مرة ابقى عاوزة اقولك 
قد ايه انى محظوظة 
لأنى شوفتك وعرفتك وقربت منك وحبيتك






كام مرة ببقى عاوزة اقولك
متخفش 
متخفش يا نور عينى من اى حاجة 
فاتت ولا حتى جاية بعدين 
لأنى هكون موجودة جنبك
و حتى وانت بعيد 
 مش هبطل افكر فيك ولا اشيل همك 
ولا هبطل زى ما بحاول احبك دلوقتى 
.. لأخر نقطة ف روحى 
انى كمان افضل احبك تانى
اكتر و اكتر واكتر 
حتى وكل واحد فينا ف مطرح






انا مبدورش على البعاد 
بس حطاه احتمال اكيد 
اصلها للأسف .. قاعدة استنها الأوائل والاوآخر 
وبتمنى قوى ... لو نقدر نشذ عنها 
ونكون انا وانتا المستحيل 
بس 
انا عارفة يا حبيبى 
اكتر منك .. ان دى معركة صعبة قوى
والأنتصار فيها فوز و مغموس بهزيمة
لأنه مجد صحيح 
بس على حساب .. اشياء أخرى
وان القيود لما تنكسر 
هتنكسر معاها .. قلوب تانية حوالينا بتحبنا 







الحكاية صعبة اكيد
لكن مين اللى قال ان كل حاجة ف الدنيا 
لازم يبقالها حل  .. وسريع كمان؟!
اوقات السكون والترقب
والإنتظار بيكون افضل الحلول 
والصبر كتييير ...بيكون المفتاح 
اللى يفتح كل الأبواب المتربسة
وينور طريق 








و عشان الإنسحاب .. وقت الجد 
هروب جبان 
ولأن قلبى بيعيش ويموت ف حبك
وعاوز يتشبث بقلبك
فانا دلوقتى يا حبيبى قررت
اكون معاك 
برا الدنيا 





برا الدنيا اللى بتخنقنى وتخنقك 
برا السلاسل ...اللى مربوطة فيها 
رجلى ورجلك ودايما تشدنا وتشل حركتنا
برا القيود ... التقيلة قوى 
الشديدة قوى 
القاسية قوى






اللحظات اللى بنتكلم فيها 
هبقى برا الدنيا
الساعات اللى بشوفك فيها كل فترة
هبقى برا الدنيا 
الأيام والعمر اللى هكونلك فيه
هبقى برا الدنيا 
البخيلة قوى
المرة قوى 
الصعبة قوى  






انا يا حبيبى من برا الدنيا
 شيفانى وشيفاك 
حمامة بيضا ... بتناجى وليفها 
وتغازله ويغازلها بأحلى كلام 
بيتعاهدوا يكونوا لبعض 
و يتواعدوا ميتفارقوش
مش حاسين غير انهم اتنين عاشقين 
و كفاية يبصوا ف عيون بعض  طول الوقت 
وميبصوش حواليهم ..ليقعوا وينكسرلهم جناح





مش حاسبين حساب الزمن والأيام 
ولا الأيدين اللى ممكن تتمد ف يوم لعشهم 
وتخطف واحد من حضن حبيبه
عشان الدنيا كتيييير بتعمل كدا 
احنا مش قولنا .. بخيلة  ؟!!







يا حبيبى ..كل شىء بقضاء 
ام كلثوم بتغنيها .. عشان تهون ع العشاق 
أى مفاجأة شايلها الزمن 
وانا راضية بقضائى .. أى كان 
لأنى عارفة ف كل الاحوال 
انك هتكون دايما جزء منه .. مش بسيط
جايز مكانك وقتها ... قد يكون بعيد او قريب 
جايز حظك وقتها ... يكون مصحوب بفرحة
او متبوع بندم 
جايز اللحظة وقتها ... تكون مناسبة
تعرف فيها ازاى حبيتك 
او العكس تماماً مين يعرف ؟!!






جايز حاجات كتييييييير 

لكن الاكيد
انى برا الدنيا ولا جواها 
بحبك ... يا حبيبى 
وهفضل أحبك ... يا حبيبى
لآخر لحظة يدق فيها قلبى ... يا حبيبى 
واستمتع بكل ثانية معاك .. يا حبيبى 
وافرح فى كل مرة بنطق الكلمة دى
 واقولك يا حبيبى
يا حبيبى
يا  حــبــيــبــى

-------------------
هذا انا
وفى نهاية الطريق ..أنت
والآخرون ..بيننا 
فاروق شوشة
------------------------------------------






This entry was posted on الأربعاء, نوفمبر 17, 2010 and is filed under . You can leave a response and follow any responses to this entry through the .

24 كــــلام بيطــبطـــب عـــلى قــــلبى و روحــــى

رائعه من أجمل و أكتر الكلام اللي قريته و لاقيته مليان احساس
للأسف كلمة"حبيبي" اللي بتحمل أجمل المعاني زي ما حضرتك كتبتي دلوقتي الناس بتقولها لأي حد للبواب للكوافيره لحد حتى مشوفتوش و لا أعرفه
كلماتك رقيقه جداً و مستني جداً
أشكرك و كل سنه و انت طيبه و في سعاده و حب

إذا أردت أن تدرك مدى حجمك الحقيقي - لا ما تصطنعه - كمذكر سالم
انظر إلى أنثاك
كيف حولتها بشكلها بكلماتها بحروف يديها لكل هذا الكم من المؤنث السالم

والعكس بالعكس يا عزيزي

معنديش تعليق غير كم من الأمنيات الطيبة ارجو من الله ان يوافق ساعة اجابة

ورغم انك قفلتي التعليقات
بس انا كل يوم قلت لك

كل سنة وانتي طيبة يا فاتيما

الله يا فاتيما الله

عارف أحساسك

بأمانة بأمانة بأمانة بأمانة بدعيلك من كل قلبى

ربنا يريح قلبك

و يجمعك مع كل اللى بتحبيهم

يااااااارب

عارفة يا فاتيما بكون عاوزك تكتبى كل يوم

علشان محسش أنى انا بس اللى حاسس الحب كدة

بجد بطمن منك على أن ممكن فى الدنيا حد بيحب حد كدة

قد ايه يا فاتيما الدنيا بخيلة

عارفة انى البوست اللى انا هنزله شبه روح البوست بتاعك

ربنا يديم الحب عليكى يا فاتيما

ربنا معاكى يا فاتيما الغالية

فاتيما

كل لحظه وانتى بحب وخير
كل لحظه وانتى بتحققى احلامك وتكون واقع على ارض الدنيا مش برا الدنيا
كل لحظه وانتى متمسكه بكل ما هو جميل وطيب

بصى يا قمر المدونه بتاعتك طبعا جننتنى بجد اكتر ما انا مجنونه ههههههههههه
كلمة يا حبيبى او اى كلام اتقال فى الحب سهل انه يتقال ونعيد فيه لكن اللى صعب ان مشاعرك توصل من نظرة عين من لمسة ايد من كلمه حتى لو مش كلام حب فى ناس مش بتعرف تعبر عن مشاعرها بالكلام ومع ذلك احساسهم بيوصل يبقى الخلاصه مش لازم تتعبى نفسك وتبحثى فى قواميس الغات الحيه او الميته العربيه او الاجنبيه عشان تلاقى كلمه توصف مشاعرك كفايه نظره ومن غير اى حاجه مشاعرك بتوصل

بالنسبه بقى لحكاية برا الدنيا خلى عندنا امل فى رحمة الله والاكيد ان رحمته وسعت كل شئ وبكره ده لسه حكايه بعيده لسه فى علم الغيب ...
احلم بيوم جميل لم يأت بعد وسوف يأتيك فيه تعويض السماء ....
دمتى متالقه

زهراء

شوفتى نسيت أقولك

الأغنية حلوة قوى يا فاتيما

ربنا يفرح قلبك قريب يا رب

(:

ليه كدا طيب

حد في الدنيا يعمل كدا

لا لا لا


والله حرام عليكي

هتروحي من ربنا فين



بئا ربنا يديكي المشاعر الجميله دي توزعيها على الحريمات تقومي تطمعي فيها

ماشي ماشي

ناس ليها فاتيما وناس ليها ترتردا مش أر لا سمح الله

هوا بس غبطه وار كمان

واللي مش عاجبه يوريني نفسه

كل اللى عايز اقوله

ربنا يسعدك وكل عام وانت بخير

يارب أكون فاهمة صح ساعتها هاقولك بقلب جامد
ينفع ياطمطم
ينفع والله
مادام احنا ناس كبار وناضجين وفاهمين كويس قوى ايه الضغوط اللى ممكن نقابلها من المجتمع وفى نفس الوقت شايفين نفسنا نقدر نستحملها ومش بنعمل حاجة تخالف شرع
يبقى ينفع ياطمطم حتى لو ده مخالف لبعض القيود المفروضة


ربنا يريح قلبك وبالك ويكتب لك الخير ويفرحك
عجبنى بدرجة لا تتخيليها كلامك عن أنصار حقوق المرأة
وعن العيون اللى بتلمع والشعر الاطول والاجمل والاحساس بالانوثة وانها اضافة لرصيده وانه ادم الوحيد وانت حوا الوحيدة
جميل قوى قوى ياطمطم
بتفكرينى بكاظم لما قال قولى أحبك كى تزيد وسامتى فبغير حبك لن أكون جميلا

وكمان خوفك وقلقك عليه حتى من ذكرياته اللى ممكن تؤلمه مش محتاج كلمة مع انها جميلة قوى تعبر عنه

متهيألى علشان خايفة اتكلم غلط بس فى حديث للرسول عليه الصلاة والسلام فيما معناه لم نر للمتحابين مثل النكاح

ربنا يبعد عنكم كل أذى ويجمع بينكم فى خير
ويكتب لكم الفرحة :)

بطوط
كل سنة و انتى طيبة يا قمرة
و كل سنة و اللى بالى بالك طيب و كويس يارب
الكلام حلو جداااا يا قمرة
بيقول انك بتحبي على روحك
هههههههههههههه
منه لله الحب ده يا بنتى على قد ما هو حلو
على قد ما بوجع القلب
و تصدقى احسن حاجة تعيشي مع حبيبك اجمل ايام حياتك
فى احلام اليقظة
اه و الله
تحياتي ليكي يا بطة
و ربنا يجمع بينكم على خير

طيب انا جايه اقولك وحشتينى ولقيت المشاعير الحلوه دى كل سنه وانتى طيبه يا طمطم ابقى طمنينى عليك حتى بتعليق مش للنشر

حسيت بكلامك قوى وعندى اسبابى
(;




وحشتينى

شيرين سامى
---------

ازيك يا شيرين
انتى منورة المطرح


بجد الكلام عجبك ؟
وكلمة يا حبيبى دى
المفروض متتقلش غير بجد


واللى بقولهاله
يستاهلها بجد

لأ

واللى بتتقاله الكلمة دى منى
دا عاوزله ابجدية جديدة
ُتخترع مخصوص عشان اعرف
الاقى الفاظ وجمل وتعبيرات
تليق بيه
وبلى ف قلبى عشانه


نورتينى





ستيتة حسب الله الحمش
-----------------

دعواتك وامنياتك وصلانى يا ستوتى
انا عارفة اللى ف قلبك يا حبيبتى من غير كلام
وربنا يشهد انى بحبك وبقولك يا حبيبتى قوى قوى قوى
وانتى ساعات بتبهرينى
لأ ساعات ايه؟
علطول بتبهرينى
لما تكتبى حاجات كأنها أنا
بوست مش عاوزاها أسهل أبداً
كان روعة
وفيه وصف ..انا تنحت قصاده مدة
لما قولتى انك بتحبى تشوفى نور عيونك وحبيبك وهوه ماشى
انا كمان يا ستوتى
لما بمشى جنب نور عينى .. بتأخر خطوات
بالقصد عشان اشوفه ماشى قصادى
بستمتع بشعور انى وراه وتابعة ليه
شكله بيعجبنى
لما قريت تعبيرك
اذبهليت
وفرحت قوى
الله مش انا لوحدى اللى ممكن احس كدا


طبعا مش هتكلم عن آخر بوست
بتاع ست الحبايب
لأنه فوق الوصف و الجمال

كل سنة وانتى وسطنا
انتى بتشعى بهجة
و حكمة
وطمأنينة معرفش ازاى
رغم كل اللى شوفتيه وبتشوفيه ويفزع جيش ..
لكن ربنا يسبغ عليه من فضله اكتر
واكتر ويطمن قلبك
وتطمنينا دايما معاكى


بوسات عشانك
وحضونات لمانوسة وعفروتو
كتيييييييييير
قوى قوى قوى





Ramy
----

ازيك يا ر ر


يا لهوى كل يوم
يا ريت
انا ف قلبى أكتر من كدا مليون مرة
بس اللغة لا تسعفنى يا عزيزى زى ما قولت ...وانتا اكيد عارف
الحال من بعضه بقى
ومش هقولك وش بيغمز
عشان امة لا اله لا الله بتتفرج دلوقتى
وخلاص بقى ..احنا ع الفضائيات

بس تعرف
اجمل حاجة تقول للى بتحبه
انك بتحبه
ايه فايدة النور لو محدش هيشوف بيه ؟
وايه فايدة الفرحة لو مدخلتش القلب ؟

الدنيا صحيح بخيلة يا رامى
للأسف الشديد
هذه حقيقة


منحرمشى منك يا ر ر

وصلنى التعليق التانى
وربنا معاك انتا كماااان



انا غيرت الغنوة معلش
وحطيت غنوة جديدة
اصله بيحب بوتشيلى
ويا رب الغنوة تعجبه

بس كدا

:)





لولا وزهـــراء
-------------
وانتى طيبة يا زوزّا

كل يوم وانتى بخير وكل سنة وكل العمر يا حبيبتى

معاكى ان الواحد مبيقدرش
بس ساعات تلاقى جواكى حاجات كتير عاوز تعبرى عنها
واوقات كتير الدنيا تمنعك
الظروف
التقاليد
مشاكلك السابقة
وضعك الحالى
الناس حواليكى
حاجات كتيييير ..تقيدك
وميبقاش فاضل غير الكلمة
يمكن تقول وتغير

برا الدنيا حل للى مش عارف يعيش جواها ..
بس عاوز يعيش
ودا الاهم

لأنى زمان
مكنتش عارفة ولا عاوزة ولا عندى امل اعيشها بالمرة ورتبت حياتى على كدا
لحد ما ربنا غير الاحوال

احنا كنا فيييييييين


ربنا ما يحرمنى من سؤال
واسفة على التقصير والتأخير وكل حاجة

مصرى جدا
--------


يا خراشى يا هانى
يا رافع معنوياتى العاتشيفية
قبل ان تهبط الى الحديد دايما

يا بنى كل الحريمات لما بيحبوا بجد
بيبقوا كدا
بس يلاقوا الردالة اللى تشجعهم
على ذلك
وميخلهموش يندموا

هما بس ديتهم يتكعبلوا فى واحد من بتوع الندم دول
فيعقدها ويخليها بخيلة وخوافة وجبانة وكل حاجة تمنعها تعبر عن مشاعرها وتحب صح وبجد ...

ييجى ابن الحلال اللى يستاهل بعد كدا
فياخد كل اللى فات دا متقطعا او مرة واحدة ... فالدنيا تقلب بغم

انما لو كل حد اتعامل مع حدوته
كأنها بداية جديدة
وكأنه انسان جديد
الدنيا تختلف


الناس اللى ليها فاتيما
يستاهلوا حب قد كدا مليون مرة
واكتر
بس القلب قليل الحيلة يا هانى


وبخصوص التهديد الآخرانى
اللى مش عاجبه يورينى نفسه دا

انا مشيت من قدامك اهو
اول واحدة
لأنه عاجبنى
وربنا يسعد قلبك يا سنيور


عيد سعيد عليك
والعمر كله انشالله





sal
---

:)

طيب
يا سال
يا غال

واللى عايزة اقوله انا كمان
ربنا يخليك ليا
وكل سنة وانتا طيب

بس انا زعلاااانة


فين
فا تى ما
بتاعتى ؟!!






حفيدة عرابى
----------

يا فدافيدوووو يا حبيبتى
انتى فاهمنى دايما
انا ساعات يتهيألى اننا مش جيل واحد بس ..لأ
بيتهيألى اننا اتربينا ف شارع واحد
ف عيلة واحدة
ف بيت واحد
قعدنا على تختة فصل واحدة
كنا سوا علطول
انتى فاهمنى زى ما بفهمك اوقات واحسك قوى كأنى بسمع نفسى

وحكاية القيود دى غصب عنى
فيه حاجات بتحصل
ومينفعش تمحيها
تخففى أثرها يمكن
لكن تمسحيها خالص
لأ
مبينفعش
اوقات زمان يبقى شبح خافت
يطاردك ف المناسبات ..يبقى طيف
خفيف ..تنفخى فيه
يجرى ويختفى

لكن فيه ماضى يبقى شبح اسود تقيل رخم كئيب قاعدلك ومركز معاكى
ولا جيش يزحزحه من مكانه
وميقدرش عليه غير رب العالمين

قيود المجتمع حدوتة تانية
لكن انا معاكى
لو حد عاوز يخالفها
صعب لكن مش مستحيل
مالم يكن حرام او عيب
يبقى خلاص
بس كتير محدش بيحس ف نفسه القدرة دى
قدرة المواجهة
بيبقى اصلاً عاوز اللى يسنده
يعنى بيحتاج القوة الاول
وبعدين يوقف ف وش الريح
بينما ممكن يكون العكس
وقوفك هوه اللى يقويك ويسند ضهرك


منحرمشى منك يا فدافيدوووو
يا حبيبة طمطم انتى

:)

بوسات وحضونات
بلا حصر
يا ذات القلب الملتفت



Mafrousa
--------

ازيك يا فروستى يا حبيبتى
وانتى اطيب وارق يا ست الستات
ومفروسة المفروسات
ومن جهة بحب على روحى دى
فأيون ..هنكر يعنى ؟
اللى يلاقى حد حب
وميحبش ..مش يبقى حرام عليه ؟؟!!؟
ولاّ ايه ؟

كل سنة وانتى طيبة يا حبيبتى
وعيد سعيد عليكى انتى وزوجوكى
وبوسات وحضونات كتييييير قوى




Empress appy
------------

الله الله
الحبايب بيهلوا ورا بعض اهو

ازى يا بيبى
وكل سنة وانتى طيبة يا قمر التدوين كله
من غير تعليق مش للنشر ولا حاجة
ع الهوا اهو
انا الحمدلله بخير
مشغولة بس حبتين عشان خالتى عندها ازمة صحية وانا وماما مركزين شوية ف خطة العلاج
لكن كله تمام يا حبيبتى
ازيك انتى وازاى جوزك
كل عيد وانتوا سوا فى اسعد حال
العيد الجاى يبقى معاكى آبى الصغننة
بتلعب مع الخروف البمبى بتاعها
وبتعيط عشان ميندبحش
:)

كل سنة وانتى طيبة




عاشقة الرومانسية
----------------

ازيك يا دودو
كل سنة وانتى طيبة يا حبيبتى

وعارفة وانا بكتبه
انك هتحسيه
وعارفة كمان
ان عندك اسبابك
وبخمنهم واحد واحد

ربنا يريح قلبك
ويسعدك
ويحققلك كل الخير


انتى كمان يا عروسة بحورى انا

وحشتينى

ياستى ما فيش مستحيل عمك الحج نابليون بونابرتا قال كدهون

اسمعى بس هاتى ودنك ايوا قربى يابخته

بيكى وبحبك وبقلبك وطعمتك وبلسانك اللى بينقط شهد انا مش بحسد انا بقر بس هههههههههه ربنا يحميكى يا تيمتى يارب

انا لو منه وربنا المعبود اجى اخطفك على اى فسزبه لالالا الفسزبه بطيئه متوسكل واطيييييييييييييير والجدع يحصلنا


ربنا يقدملكم كل الخير يارب بحق جاهه وعرشه العظيم

يارب يطمن قلبك ويوفقكم يارب يا تيما

ويهدى سركم ويجعلكم الهنا يارب

ايه الكلام ده اكتر من روعة بجد
وحشانى ياطمطم وكل سنة وانتى بالف خير يا ام يوسف
وربنا يجعلك ايامك كلها سعادة وحب

الله

بجد عنيا دمعت

ربنا يفرح قلبك دايماً واكتر من كده بمراااااااااااااااااااااحل يارب يا بطوط

انا فرحانه
مش عارفه ليه
بس حاسه كانه انا اللي بحب مثلا وانا اللي بقول الكلام ده

بجد انتي فنانه
وانا مش لاقيه كلام اقوله فعلاً

يسلم قلبك السبب في كل حاجه حلوة

(F)

وحشتيني عـ فكرة
وبحبك
وكل لحظه وانتي طيبه وفي احسن حااااااااااااااااال يارب يا طمطووومه

اختى العزيزه
اتفقنا مسبقا ان احساسك عالى جدا
اتمنى يكون عندى ربع احساسك الجميل دا
مش عارف ليه وانا باقرا البوست الرقيق دا
رنت فى ودنى على طول اغنيه عندى ثقه فيك لفيروز
وحتى الان مش عارف ان كان فيه وجه شبه بين احساسها واحساس بوستك

عندى ثقه فيك
عندى أمل فيك
بيكفى شو بدك يعنى
اكتر بعد فيه
عندى حلم فيك
عندى ولع فيك
بيكفى
شو بدك انه اموت فيك
والله راح موت فيك
صدق اذا فيك بيكفى
شو بدك منى اذا مت فيك
معقول فيه اكتر
انا ما عندى اكتر
كل الجمل يعنى عم تنتهى فيك
حبيتك متل ما حدا حب
ولا بيوم راح بيحب
-------

:)
الله ..!!
فعلاً الله ..!!
أنا حاسة بكل كلمة قلتيها هنا .. فعلا المشاعر الدافية بتعمل فرق فينا .. بتغير شكلنا و ملامحنا . بتخلي انوثتنا تنطق .. بتخلينا فعلا ناس تانيين .. ستات .. ستات جدا :)
حلوة اوي اوي ..
و بحب اشوفك مبسوطة .. ايوة انا مش باعلق عندك كتير .. بس دايما باطمن عليكي .. :)
ربنا يحفظك

وصف رائع وراقي لمشاعر راقية نقلتها لنا على الورق بكل صدق
ربي يفرح قلبك يا فاتيما وما ذلك على الله ببعيد
دمت بكل الود حبيبتي

ربنا يسعد ايامك

كل سنة وانتي طيبة وبخير

فاتيما
كل سنه وانتى طيبه
انا مش بأعلق كتير عندك بس اهو بتابع كل فتره حسب الظروف

كلامك رائع جدا وكله إحساس

انا اليومين دول بتابع هشام الجخ تعرفيه؟اتمنى يعجبك شعره

http://www.youtube.com/user/hishamelgakh#p/u/7/KyhjiCFegts

قلب وحيد

فاتيما
لو سمحتى ممكن تمسحى اللنك اللى فى تعليقى اللى فات فى كلام مش عاجبنى ومش سامعه كويس

ممكن تسمعى دى أحسن

http://www.youtube.com
/watch?v=7p6LXY_xcaw

قلب وحيد

richardCatheart
---------------


ازيك يا قطقوطتى ى ى

انتى علطول رافعة نعنوياتى كدا ؟!!

ويا ستى فيسبا ولا نخدها كعابى
انا موافقة


على مروان طبعشن
هوه انا اقدر أبص لغيره ؟!!
دنا مخلصاله
مخلصاله
حقيقى انااااااا


بوسيلى ميرهان واحضنلى عريسى
وسلامى الجامد للحاج
وان شاء الله اشوفكو على ألف خير
دايما يا حبيبتى


بوسات وحضونات
وفعصااااااااااااات
رقيقات





مى
---

يا ورد الجناين
وحشتينى ى ى ى
انتى كمان
كل سنة والعمر كله وانتى بخير
يا حبيبتى
العيد الجاى تبقى ف بيت جوزك وحامل ف الأشهرى الاخيرتووو

وكلنا بنختار معاكى اسم النونو
ونقوله خلصنا واطلع


بوسات وحضونات
يا رقة الورد





كــركــبــة دمـــاغ ㋡
----------------------

يا كراكيبووووووووووو
انتى قلبك روهيف يا بنتى
عشان كدا عيونك الحلوة دمعت
ومش لازم تقولى حاجة
انا حاسة والله اللى ف قلبك
انا كمان ساعات كتير بسكت
عشان الكلام بيبقى قليل قوى ع اللى جوا القلب

خلى بالك من نفسك
وربنا يسعد كل ايامك
يا كراكيب قلبى الغالية انتى



رحلة البحث
---------

يا غربااااااااوى
يا لهوى

انا بعشق الغنوة دى لفيروز

دايما كنت بغنيها ف سرى
لصاحب نصيبها
والمكتوبله البوست

فاكر لما قولتلى انى بقرى
تدويناتك بقلبى ؟
انتا كمان يا محمد شرحو

ربنا ما يحرمنى منك
ولا من تعليقاتك
اللى عارفة ان اللى جواك
وعاوز تقوله
ربع اللى بتقدر تكتبه فعلاً


البؤجة يوم 10 ديسمبر يا بطل
واعمل حسابك تكون معانا
ان شاء الله


خالص ودى ودعائى

قهوة بالانيليا - شيماء على
-------------------------

:)


انا اللى عاوزة اقول الله
على الجملة بتاعة
بحب اشوفك مبسوطة ...دى

انتى رقيقة قوى يا شيماء
وانا عاوزة اقولك انى لما اشوفك
هيبقالك منى حضن كبيييييير قوى
عشان اعرف ارد شوية من عبق وسحر الجملة اللى انتى كتبتيها دى

ربنا يسعد ايامك كلها يا حبيبتى




خواطر شابة
----------

منحرمشى منك يا خطورتى

وليكى منى كل ما تمنيته ليا واكتر يا حبيبتى

كل عيد واهل المغرب الطيب
فى اسعد حال يا رب




Haytham Alsayes
---------------

وانتا بألف صحة وسلامة يا هيثم

انتا الأطيب
يا صاحب الفردوس




قلب وحيد
--------

اولا
وحضرتك طيب
وتعالى ف الوقت اللى يعجبك

ثانيا
ميرسى ع ذوقك
ومبسوطة ان البوست عجبك


ثالثاً
انا مبحبش الجدع دا
معرفش ليه؟
يمطن طريقة الألقاء بتستفزنى ؟!!
يمكن لأنى حساه مختال بروحه شوية وانا مبحبش الشعراء الطاوويس
ومبحبش الرجالة الطاوويس عموما وبحبس الرجولة تقتنص ولا يعلن عنها
وهوه مش كدا ف شعره
معرفش ؟

الملخص انى
عشان مقدرش ارفض الهدية الطيبة دى
قريت القصيدة مكتوبة
بدل ما اسمعها
وعجبتنى لما قريتها فعلا

متشكرة قوى


خالص ودى
وعيد سعيد عليك

إرسال تعليق