.

.

حـــواء ... وحـــواء  

Posted by: فاتيما in



يا عزيزى
إنتبه
النساء قد يختلفن 
و لكن ... فى نهاية الامر
كلهن ســــواء 

وحواء المنشودة
ستكون حتما
واحدة من إثنتين

 حواء خُلقت ... كى تعطيك
 وحواء خُلقت ... كى تأخذ منك


 
قدرك المحتوم يا مسكين 
يختبىء بينهما 
فلتكن واثق كل الثقة فيما تهم 
بنطق الكلمة



فحينها لا رد لقضاء 
ولن تتمكن عقارب الساعة 
من العودة أبداً ... للوراء



فذكائك الذى يضللك
سيجعلك تأخذ عطايا حواء الأولى
وتمنحها بكل بساطة .. لأخرى تمد يدها
لتغدو من بعدها كسيراً ...مفلساً
خالى القلب و الروح  

وستنسل من بين اصابعك
  حواء الاولى 
و مقدار حزنك ... وقتها على فراقها 
لن يساوى واحد على ألف



من جبال الهموم الشامخات
التى ستعلو بقلبك 
بسبب اختيارك البقاء مضطراً ودائماً
مع ... حواء الثانية
------------------------------------
-----------------------------------------------


فى أى طريق
تذهب 
لن يكون قدرك إلا 
 صورة من نفسك
(مصطفى محمود)
دوس هنا

This entry was posted on الخميس, نوفمبر 25, 2010 and is filed under . You can leave a response and follow any responses to this entry through the .

22 كــــلام بيطــبطـــب عـــلى قــــلبى و روحــــى

بعد السلام والتحية
اما بعد
من رئيس الجمهورية

مقصر كالعادة ، أما حواء فأنا
هفضل أحلم واحلم باللي في نفسي
حتي لو محصلش نصيب وجه اللي في
نفسي

اتمني أن ان تكون زوجتي المستقبلية
متوازنة في الأخذ والعطاء قادر ياكريم
حتي لا تتركني كسير مدغدغ

كلام حضرتك صحيح مية فى المية

ما اروعها من كلمات
ابدعتى عزيزتي في الطرح
جزيل الشكر

صباح الخير
صباح الجمعة
صباح حواء
صباح نص الدنيا

اللي بيحب مش بيشوف
ولو هو بيحب مش هيشوف عطاء الاولى على انه الميزة اللي علشانها لازم يفضل معاها ...هو بيحبها وخلاص لان الحب ملوش اسباب
ولو بيحب التي تأخذ ولا تعطي ...برضه مش بيشوف ان دي احد عيوبها اللى علشانها لازم يبعدعنها
الحب مش بيشوف
-----------
انما ان يقف حائرا بين حواء وحواء
فهو حتما لم يحب عطاء الاولى ولن يؤرقه اخذ الاخرى ...فهو يحيا لطرف ثالث لا هو بحواء الاولى ولا حواء الثانية هو يحيها لنفسه الحائرة في اختيار الافضل لا الاقرب
----------
تحياتي البسكوتيةالبنوتية

الله يافاطيما
جميلة جداااا

تسلم الأيادى
ياأم يــــوسف

فاتيما الجميلة

الست والرجل

فيهم اللي بيدي بس وفيهم اللي بياخد بس

وياسعده ياهناه اللي يقابل
الانسان المتوازن اللي بيدي وياخد

:)

حلوه الرساله دي أوي بس هو مينفعش حواءواحده تعطي و تأخذ :)

السلام عليكم

تقدرى تقولى حواء بوجهين

ربنا يجعلنا حواء ذات الوجه الاول بس ببقى فيه المقابل اللى احنا بنتمناه

تحياتى لكى

جميلة جدا
وكلمات مصطفي محمود ف الصميم
بس تفتكري حواء المعطاءة لها نصيب ف الدنيا دي ...؟
بالعكس بتاخد علي دماغها دايما
اساليني أنا
تحياتي يا فاتيما وان شاء الله اشوفك يوم البؤجة ولو اني مكنتش عايزة اخرج بجد اليومين دول لاني مخنوقة اووي ...بس اعتقد ان يوم مع ناس بحبهم اكيد هيفرق كتير

امممممممممم
جيت على الجرح يا ام يوسف وضغطت بكل ما تملكى
ههههههههه
متفق معكى جدا جدا فى وجهة نظرك
تحياتى

رائع ما شاء الله مدونتك كلها بهجه

آه من حواء. حسستني إن في جنة حواء مطلقة ونار حواء مطلقة، يا أبيض يا أسود. الحاجة الوحيدة إلي ثابتة إن ..... ولا بلاش مش ناقص بتوع حواء يقطعوني (:

لو إلي قلتيه دا شعر فأهلاً وسهلاً متشكرين، انتي عارفة علاقتي بالشعر زي علاقة الصيني بالجزمة مقاس 45, نادرة أوي (:

انما لو إلي قلتيه د تجربة معينة، يبقى اسألني أنا .... مدوباهم اتنين ..... (:

اه
استر يارب
البوستات بتاعة الستات وحواء دى بتعملي بوليكة في دماغي
واقول ياترى ياهل ترى اتجوز واحدة شكلها ازاى واخلاقها ازاى وهتكنن عليا ولا لا انا مش ناقص عكننة اساسا
ههههههه

بس كلامك في الجون
مظبوط جدا

وربنا يستر

تحياتي

الله عليكي يا طمطم جبتي من الاخر

بس المرأه الاولى هيا العقرب

استني بس
أنا قصدي عقرب الساعه

ابدعتي .. وصدقت كلماتك
تقبلى المرور بود
دمت بخير

كلام سليم

وأزيدك من الشعر بيت: لكل اختيار ثمن

قصة الأمس واليوم والغد .. للأسف .. قصة تتكرر ولا أحد يتعلم منها أبدا

MR.PRESIDENT
-------------

بعد السلام والتحية

اما بعد

من شعب البلوجر لرئيس الجمهورية خبط لزق
منتاش مقصر يا فندم ولا حاجة
ومقدرين مسئولياتك والله
ومتشغلش بالك


كمان متشغلش بالك بحوائك المستقبلية
انتا برج التور يا بنى
يعنى زمل
يعنى لما بتحب ..بتندلق
ومبتحسبهاش
وغالبااااااااااا
حواء بتاعتك مهما أدتك
برضو مش هتكون زيك

ولا تكسير ولا دغدغة ان شاء الله
وربنا يكفيك شر الندم يا من يحمل قلبه نصيب كبير من اسمه





احاسيس آيوشه
------------

يا لهوى على حضرتك دى !!!

ازيك يا آيوشتى ؟
يا رب تكونى بخير

انا عارفة ان نون النسوة غالبا هيأيدونى ..
لأن النساء فى بلادى غالبا الصنفين دول وملهمش تالت


تحياتى يا حبيبتى وخالص حبى



tote soly
---------

نورتى المطرح

ميرسى جداعلى تعليقك

كلك ذوق

Baskouta
--------

صباح البسكوت البمبى يا بساكيتو

اخيرااااا تعليق بسكوتى

تعرفى ان البنوتة ف الصورة فكرتنى بيكى
احتمال عشان فستانها
وبراءتها
والقلب اللى مسكاه دا

يمكن


كلامك صح

بس عندى مداخلة ف الحلقة بقى

الراجل لما بيحب ..بيشوف برضو
مش زى الست

الست عاطفتها بتغلب
فبتدى

لكن الراجل أى كان حبه
الست برضو جزء من حياته
تاخد منه نصيبها

لكن الراجل كل حياة الست
وعشان كدا
لما بتحب
بتدى كل حاجة


دى خلقة ربنا
فطرة وطبيعة

والتكامل هوه نتاج الحب
لما القلب والعقل يتلموا على بعض


بوسات وحضونات قد البسكوت
اللى ف كل مصانع الدنيا ومخابزها
عشان التعليق الحلو دا

norahaty
--------

ميرسى يا نوهانتى

دايما كدا مشجعانى

يعنى افهم من التشجيعات
انك موافقة على كل المكتوب ؟

طييييييييب

تسلميلى يا حبيبة أم يوسف







شمس النهار
---------

ازيك يا شمس نهار المدونات وقمرها

كلام حضرتك صح

فيه راجل اتعلم ياخد بس
وراجل اتعلم يدى بس

وللأسف بقى
من اللى بشوفه وشوفته

الراجل اللى بيدى
غالبا بيدى لواحدة ..اتعلمت تاخد بس

والست اللى بتدى
حظها دايما مع راجل ..اتعود ياخد وبس

حاجة غريبة
ويمكن تكون تقسيمة عادلة

معرفش

بس اللى اعرفه
انه التعاسات منتشرة بسبب هذه الانانية من طرف تجاه الآخر

للأسف


تحياتى يا ست الشموسات

:)





شيرين سامى
---------

ينفع يا شيرين

اكيد ينفع


بس برضو
هتلاقى جانب بيطغى

العطاء والانانية
صفتان فيهما ديناميكية
بمرور الوقت بيتعاظموا
يعنى اللى بيدى ...أو بياخد
بيتفنن بمرور الزمن فى موهبته
وطبعه بيغلبه


نورتينى





مدونة ما كفاية بقى
------------------


ازيك يا كفاية

أقرى التعليق اللى فوقك طوالى
هتلاقى اجابة مشابهة للى عاوزة ارد بيه على تعليقك

حكاية الوجهين دى يعنى


تحياتى انا اكتر ليكى

re7ab.sale7
-----------

ازيك يا رحوبة


آخ
انتى سالتى السؤال الصعب اللى غجابته قد تحبط

لكن انا شخصياً شايفة ان أيوه

حواء المعطاءة ليها نصيب
جايز منوافقش عليه
ونلومها على رضاها بقلة بختها
بينما هيا تشوفها كويس جدا وكفاية


سعادة الآخرين فى اشياء
قد تختلف عن سعادتنا احنا

والمفروض كل واحد يختار
سعادته
او شقائه

والمهم
ميرجعش يندم بعدين

البؤجة هتنور بيكى يا رحوبة
وكلنا مخنوقون يا حبيبتى
وتجمعنا بيخفف الهموم ..كفاية مرواحنا عشان حد غيرنا ...ان شاء الله تنبسطى وتروحى كويسة

خلى بالك من نفسك
وسلامى لكل اللى عندك




همس الاحباب
---------

هههههههه

انا بضحك دلوقتى
وطبعا انتا عارف عشان ايه ..صح؟

أيووووووون

عشان سيادتك من صنف آدم
اللى بيدى علطول
مش بيستنى حتى انه ياخد

انا قصدى على المستوى الإنسانى
مش العاطفى
لحد يفتكرنى بخبط ف الحلل ولا حاجة
لا عشت ولا كنت
دا الموادم حبيبتى وست الستات
و ربنا يهدى سركم


اشوفك يوم البؤجة على ألف خير
يا غالى





نور الأدريسى
-----------

:)
الف شكر ليكى
و نورتى المدونة






وجهة نظرى
---------

يا لهوتينى يا معتز

اخيرااااااااا ظهرت

حمدلله ع السلامة يا رهين المرعبين

وايوه سعادتك الستات صنفين ..يا كدا يا كدا مفيش تفاهم

ومش شعر يا مفترى ..انا بتاعة شعر برضو هتزعل منى الشعراء يا جدع
دا نكش فراخ خاطرة أى كلام ..اللى تشوفه بقى مش هدق معاك

وما دمت مدوبهم اتنين
متقولنا يا سيدى خلاصة التجربتين
ومنكم نستفيد

:)






Haytham Alsayes
----------------

ليه بس يا هيثم
لا بوليكة ولا حاجة
قول اللى تقوله ومتخفش
هوه احنا بنعض؟!!

ما مصطفى محمود قالك
انتا هتختار فى الطريق نفسك
الحكمة دى كانت ف كتاب اسمة
55 مشكلة حب
وكان بيرد على واحد بعتله مشكلة
انه اضحك عليه من ست لعوب وهوه اللى كان مقطع السمكة وديلها
فرد عليه الجميل ..مصطفى محمود
بعن ميترلينك قال ان العدالة تقتضى ذلك وكل واحد فينا بيقابل قدره الذى يشابهه
يعنى لو كنت لص هيقع ف سكتك اللصوص
لو كنتى عابثة هتقابلى الطامعين
لو كنت كاذبا هتلاحقك الاكاذيب
وحسب ما تختار حياتك تمشى ازاى ..هتلاقيها بقت شبههك
وبالتالى
نقيس على ذلك

لو اخترت واحدة عشان طمعان فيها
هتدفع تمن الطمع دا قدام
لو سبت واحدة واتخليت عنها بلا مبرر
هتقع ف حب اللى تتخلى عنك ف يوم
ألخ


و انتا ان شاء الله نصيبك
هيبقى شبههك يا هيثم

يعنى هيبقى زى الفل يا بنى
دى مفيهاش نقاش


نورت يا صاحب الفردوس

مصرى جدا
--------

ههههه

لحقت نفسك يا سينور



بص بقى
حواء الاولى ...نعمة
لكن نعمة متعبة

آه

ما النعم متعبة برضو


لازم تبذل مجهود للحفاظ عليها
من الزوال

صح؟

شوف بقى كام واحد
عنده استعداد يعمل كدا ؟

غالبا عقبال ما يدرك ان بين يديه نعمة
تكون خلاص زالت
لأننا كبشر عموما مش رجالة بس
لا ندرك قيمة النعمة
الا بعد رحيلها

للأسف



منحرمشى منك يا فندم
ولا من تعليقاتك





أسماء عبدالعزيز
--------------



الف شكر ليكى
نورتينى

ومتقبلة مرورك بكل الود أكيد







يا مراكبى
----------

يا نبع الحكمة يا غالى

كنت هزعل لو ملقتش تعليقك
ف البوست دا


انتا من الناس القليلة
اللى بتدرك معنى الفقد
والإشتياق
واحترام النعم ولو زالت
و ان كل قلب بصمة ف الوجود
ولا تتكرر فى غيره....

و ربنا يخليك ليا
ومنحرمش من طلتك


سلامى للأسرة الغالية






الى الغالى
اللى طلب عدم نشر تعليقاته
-------------------------

طيب مش هنشرها
ومش هعرف اجاوب كمان هنا

بس ربنا يسعدك
واشوفك دايما على خير

إرسال تعليق