.

.

ضــــــــــى قــــــــنديـــــــلك  

Posted by: فاتيما in






يارب انا بكلمك 
لأن مفيش غيرك قادر 
يسمع كل حرف مش عارفة اقوله
و مفيش غيرك قادر 
يحس بكل ذرة حزن جوه قلبى 
ومفيش غيرك قادر 
يعرف اللى بعمله و مبقاش خلاص بينفع
مفيش غيرك






لأن اللى خلق شىء 
وحده بس اللى عارف ... ضعفه وقوته 
عارف .... جـــواه وبـــراه
عارف .... صـــدقه وخــــداعه
عارف .... بدايتـــه ومـــنتهاه
ومفيش غيرك








وانا يا رب حبيته بكل ما فيا 
حبيته وانا عارفة من الاول ... آخرها 
كنت عارفة انه انسان عجيب 
ومختلف ومش عادى
واللى غيرى يشوفه فيه عيب 
مش هشوفه انا أبداااااا ... كدا 





كنت عارفة 
انه حنون و انه جدا هيكون قاسى 
و انه بجد طيب و بعزم ما فيه هيبقى أنانى 
وانه ضعيف ..بس هيستحضر قوة الدنيا فيه 
وانه شجاع ومستبيع لدرجة التهور  
و ف ثانية يخاف من نفسه ومن أى حد
و أى حاجة متعاملش معاها 
وهتكسر روتين ايامه اللى اتعود عليه








كنت عارفة انه بسيط جدا و معقد 
وخيوط الصوف شابكة ف بعضها وصعب تتفك  
بس مكنش عندى اى مشكلة
كنت فاهمة من غير ... ما يضطر يشرح 
وكنت حاسة من غير ... ما يحتاج يشتكى 
وكنت موافقة من غير ... ما يفكر حتى يسأل 
كنت بحمد ربنا على نعمة وجوده 
وبقول معقولة اكون محظوظة 
لأنى ببساطة كدا قابلته
والناس ياما بتعيش ف الدنيا وتموت 
من غير ما تصادف نصها التانى وتعرفه حتى
وصحيح مش لازم يشاركوا بعض حياة واحدة 
لكن كفاية لحظة اللقا دى ... جت 
و أى كان بقى ما سيحدث بعدها من عذابات







انا مش بلوم عليه يا رب 
إنه مقدرش يستنى 
ولا بلوم عليه انه سمحلى أقرب منه 
ولا بلوم عليه انه مش عارف يعمل حاجة 
الحب مش بإيدين حد 
و القلوب بين اصابعك انت
ازاى بعد هذه المعلومة الاكيدة أفكر مجرد تفكير
انى احمل هذا العبء لمخلوق 
خصوصاً لما يكون خايف وجناحه مكسور 
وعاوز اللى يسنده ؟




انا مش بعتب عليه 
زى ما اغلب المقربين منى وبيحبونى بشدة 
بيغضبوا من رد فعله ويستنكروا 
وبيقولوا انه بيضيع من ايده قلب بيحبه 
ومش هيلاقيه تانى 
مش قادرة الومهم فى أحكامهم 
ولا قادرة ادافع عنه كفاية .. ساعدنى يا رب 
لأنهم مش شايفينه بعينى 
ولا حاسينه بقلبى 
ولا لامسينه بروحى
هما زعلانين عشانى أكيد
وشايفين قلبى محتاج تقدير اكتر و وجع اقل









قد ايه انا محظوظة باللى بيحبنى
 واللى كمان مبيحبنيش
سيد حجاب بيقول ف الغنوة
بين غربتك ف ديار اهلك 
وغربتك فى بلاد الله 
لو ضى قنديل زهزهلك 
مش ترمى كله وتجرى وراه 
مين اللى ميحبش فاطمة 
مين اللى ميحبش فاطمة
الغنوة  لما بعتتهالى بنت قلبى
 عشان تساعدنى وتسعدنى
اكتشفت لما سمعتها تانى وتالت 
إن اللى مبيحبش فاطمة 
 هوه الشخص الوحيد اللى فاطمة 
بتحبه وعاوزاه ف الغنوة والقصة
 وكمان ف الدنيا  






 فجأة لقتنى بقيت  عاوزة
اكون انانية يا رب 
عاوزة اخد بعضى وانزوى ف ركن بعيد 
عاوزة افكر فى انى معملش حاجة لأى حد 
عاوزة اعيط براحتى و مبطلش بكى 
عاوزة ازعل علي بعاده كما ينبغى الزعل 
عاوزة أحزن لأنه يستاهل أحزن على فراقه 
عاوزة الكل يسبنى اقول انى بحبه 
وانى مش زعلانة منه مهما عمل 
عاوزة محدش يلومه ولا يقول ربع كلمة
تجرحه لأن حد سكينها هيدبحنى قبل منه








مش عاوزة اكون سبب فى أى تعاسة له
مش عاوزة يفتكرلى غير الخير وبس 
مش عاوزة حد يقولى 
انتى بتستعذبى الالم
وانتى بتعملى كدا ليه ف نفسك 
عاوزة أخد وقتى عشان ارجع اتوزان 
أصل النور فى قلبى يوشك ينطفى 
وانا مكنتش قنديل نوره اللى هيخليه 
يمشى ورايا  زى ما بتقول كلمات الغنوة
هوه اللى كان النور لروحى  
زى نور يوسف اللى بينطفى كتير ويرجع
وبدل ما بقيت احن لغالى و حبيب واحد 
بقوا اتنين
بقوا اتنين يا رب 








طب انا راضية خلاص
ودلوقتى بتمنى
لو يتركنى الجميع  .. أحزن فى صمت
حزن يليق بالوجع والفقد وبضعف قلبى




مبقاش عندى كلام غير انى بحبه 
زى ابنى واخويا وابويا  وحد من دمى
و أصل خلاص مبقاش ينفع 
يكون حد بييجى ويروح ويتبتر من حياتى
غضبى منه مبيخدش اكتر من دقايق
 مهما عمل
وفرحتى بيه ممتدة طول الوقت 
حتى لو معملش أ ى حاجة
قادرة اسامحه واقدر ظروفه
 وافهم ليه هوه بيعمل كدا
وقادرة اتجاوز عن خسارة ما اتمناه لنفسى
ويبدو عدم حدوثه ليا منتهى الظلم 








شيفاه قدر ما هوه لا مبالى بيا 
قدر ما هوه مضطر يكون كدا غصب عنه 
كل لحظة قسوة ظاهرة منه بفسرها لصالحه
عشان مهما لسانه وتصرفاته قالت شىء 
انا قلبى شايف قلبه كويس
وعارف انه طفل صغير بيقول وبيعمل حاجات
مش متصور فداحة تأثيرها 
لكن بيقولها ..لأنه عيل صغنن 
وبيتدلع على الأنسانة 
اللى بفطرة وذكاء حاسسها امه
و عارف انها هتسامحه مهما قال وعمل 








يا رب انا حزينة قوى 
حزينة لأن كان نفسى ....
كان نفسى اعمل قد اللى عملته عشر مرات
كان نفسى اضم كل الوجع 
اللى سابه كل اللى سبقونى لقلبه 
كان نفسى احاول اغير فى نظرته للدنيا 
عشان هوه يستاهل حياة احسن
كان نفسى افهمه اللى مش عارف
يفهمه لأنه مستغرق فى ذاته 
ومش قادر للأسف يخرج من الجب 
اللى ألقوه فيه عمر بحاله
كان نفسى اعرف اخد قلبه ف حضنى 
ومخليهوش يخاف ويكش ويرفضنى 
كان نفسى امحى كل حاجة هيعملها 
و هتأذيه مستقبلاً 
وتخلى الدنيا بتاعته متتغيرش
و يبقى زى صلاح جاهين ما بيقول 
وقف الشريط فى وضع ثابت
كان نفسى اكون ضى قنديله
وانور له سكة و طريق 







كان نفسى افضل اصبح عليه دايما 
بكلام طالع من قلبى  واقول كلمة بحبك
وانك وحشتنى وبتوحشنى قوى 
وانك راجل بجد وعظيم فى نظرى 
ولأنك عظيم 
فحبك عظيم و فرحك عظيم 
وغلطاتك عظيمة والمتوقع منك عظيم 
والأحباط منك عظيم 
والزعل عليك ..اكيد هيكون عظيم 
كان نفسى ف حاجات كتير قوى 
لكن مش كل شىء 
بنتمناه .. بيحصل





من اول لحظة هوه قرب منى فيها 
كنت عارفة انه ماشى 
وكنت عارفة انى هتعب فى بعاده 
بس كنت عارفة كمان 
ان الخير والفرحة والسعادة
اللى سببهالى ولسه 
هتكون اكتر بكتير من كل الحزن 






وانا مش زعلانة منه يا رب 
انا زعلانة عشانه 
وعارفة ان الحب اللى متشال 
ف قلبى ليه .... يساع الكون
وان كل الزعل هيتلاشى
و ميبقالوش مكان بمرور الوقت 






الوقت
الحل الوحيد لكل معضلة تبدو بلا حل 
و يكفينى احط جبينى على الأرض دايما 
فالاقينى بدعيله برضو و زى اول يوم عرفته فيه 
بمنتهى الرغبة والحماس والمحبة 
والتمنى  انك تستجب لى يوم
فترد كيد اعدائه يا رب
وتحفظه من كل شر يا رب
وتوسع رزقه يا رب
آمين





صديقة غالية من يومين
قالت قصادى كلام رائع عن تصنيفات الحمد 
و يقال انه نوعين 
حمد على النعم  .. حمد شاكرين 
و حمد على البلاء .. حمد صابرين  
و انا يا رب  النهاردة وبكرة  وطول الوقت
هحمدك على ما فات ويأتى 
 حمد الشاكرين
لأنه كانلى نعمة
و حمد الصابرين  لأن النعمة بتزول
وترحل الآن من أمامى مبتعدة


الحمــــــــــدلله.. الحمــــــــــدلله


 
---------------------------------
التعليقات مفتوحة وبدون إشراف 
و اللى عاوز يكتب حاجة .... براحته
---------------------------------------------------------
1
اسفة
لأنى غبت و قلقتكم
وشكراً لكل اللى سأل
-----------------------
2
 اسفة
لأنى مش هقدر
غالباً ارد ع التعليقات
----------------------
3
 اسفة
لأنى بتابعكم ف صمت
---------------------
4
 اسفة
لأنى مش قادرة
اكون أقوى
واقوم بالتزاماتى
و واجباتى المعتادة
-----------------------
5 
اسفة
يا وندا
و يا اهل اسكندرية
و يا كل حد كان جاى
و كان عايز يشوفنى
لأنى مش جاية البؤجة
--------------------
6
لو هتفتكروا 
تدعوا ليوسف
...كدا يكون
منتهى أملى
--------------------
7
اختكم بخير 
وبتحبكم يا احلى
صحبة وناس وعالم

--------------------------------

This entry was posted on الخميس, ديسمبر 09, 2010 and is filed under . You can leave a response and follow any responses to this entry through the .

83 كــــلام بيطــبطـــب عـــلى قــــلبى و روحــــى

عينى جريت بسرعة على البوست
بس فى كل الاحوال وانا بفتح صفحة الريدر كنت باقول يارب تكون كتبت حاجة النهارده
على اد ماكنت زعلانة انك بتكتبى بوستات بتوجع قوى كده على اد مازعلت اكتر من صمتك التام الايام اللى فاتت
نفسى جدا تيجى البؤجة علشان نفسى اتكلم معاك كتير
لو فكرت تانى ولقيتى نفسك مش قادرة خلاص ولا يهمك
كنت عايزة اقولك بس انى فاهماكى جدا وحاسة باللى انت عايزة تقوليه
وضاقت فلما استحكمت حلقاتها ..فرجت وكنت أظنها لا تفرج
وبحبك

له كل الحمد وكل الشكر
علي كل العطايا والبلايا
فبهما نعرف مقدار تذكره لنا
وحدة يحمل لنا الخير كله
وقدرتة فقط تمنع عنا الشر كلة
صبرك الله وأسعد قلبك
وبكل تأكيد
من الذي لا يحب فاطمة
...
تحياتي

ربنا معاكى ويصبر قلبك يارب يا فاتيما
مش عارفه اقولك ايه
بس الحمد لله على كل شىء
ربنا يسعد قلبك ويشيل عنك الحزن والم البعاد
ربنا يرجع يوسف لحضنك ويخليه يارب وتشوفيه احسن الناس

طبعا زعلت انك مش جايه البؤجه
بس مش هقدر ألومك
لانك اكيد فى حاله ربنا اللى اعلم بيها
بس يمكن لما تيجى البؤجه تخرجى من الحاله اللى انتى فيها ولو شوية ..
كان نفسنا نشوفك
واحنا اللى جاين المرة دى .. متكونيش موجودة؟؟


ربنا يريح بالك يا حبيبتى يارب

دمتى فى حفظ الله

حسه بكل كلمه من كلماتك
لدرجه ان عنيا دمعت
لاني
فيوم وكل يوم
بكون كدا
ربنا يوفقك
ويوفق الجميع
لما فيه الخير ليهم يارب
ومحدش عارف
بكرا فيه ايه
ولا اللي كاتبهولنا ربنا
فصبرا جميلا والله المستعان

السلام عليكم
النبى علمنا ان البلاء لا يكون الا لمن احبه الله
ان الله اذا احب عبدا ابتلاه
ومايزال البلاء بالمؤمن حتى يلقى الله وما عليه خطيئة
متنسيش تمسحى دموع كلماتك فانها اغرقت المدونة

ان مش عارفه أواسيكى ازاى لانى مش عارفه الحكايه بالظبط

بس اللى اقدر اعمله انى هدعيلك وهدعى ليوسف وده وعد منى

ربنا يصبرك ويعوضك كل خير

تعرفي يا فاتيما
انا حصل معايا موقف مؤلم جدا جدا جدا من يومين ومتعرفيش حالتي كانت عاملة ازاي لانها من صديقتي العزيزة للأسف
وانا خرجت عن شعوري وقلت لها كلمة برغم انها حقيقية جدا الا انها زعلتني قبل ما تزعلها هي ...وبرغم انها قست علي اوووي وحطتني في موقف غبي جدا جدا الا انها جات تصالحني ...وتقولي سامحيني ومش همشي غير لما تضحكي ومشفش حزن في عينك ...بس انا مقدرتش ...
ضحكت ضحكة مفتعلة ..كنت بهرب من عينيها ...
عشان عارفة نفسي ...مقدرش اقول حاجة مش من قلبي
مقدرش اقول سامحت وانا مش مشامحة
لازم اخد وقت عشان اهدي وفوران غضبي وزعلي يروح واكون فعلا سامحت...
هو انا قلت الكلام ده لية ...؟
مش عارفة...
بس تعرفي انا فرحت انك فتحتي التعليقات ....وانك كتبتي اللي جواك والي عايزة تقولية حتي لو كتير من الناس هنا جات وقرت ومفهمتش ....
المهم انك تطلعي الشحنة اللي جواك ...تطلعية سواء كان حزن او غضب او عتاب او انفعال اوي اي شيء
هقولك زي كل مرة اقول ...قولي يارب ..ووالحمد لله
وخدي وقتك ...وبراحتك وكفاية تكتبي عشان بس نشوفك ولو من بعيد لبعيد
انا كدة انا كمان مش هروح لقاء المدونين ..لاني كنت عايزة اشوفك
فاتيما....حبيبتنا كلنا وبدون مجاملة من حد بنقولها كلنا مين اللي ميحبكيش انت يا ام يوسف يا غالية ...
ربنا يفرج كربك وهمك...وبدعيلك بقلبي ولساني وبكل شيء
اللهم اكتب لها الخير حيث كان ثم ارضها به...اللهم آميييييييييين

مش عارفة اقولك حاجة ولا عارفة اعملك حاجة بس حسيتك عايزة تحزنى بعيد ونقعدى مع نفسك علشان كل مابدخل بدخل ابص وامشى

فاتيما يا احب خلق الله لكل خلق الله

انا بحبك وبس

يا وطن القلوب الخضراء الطيبة

عايزاكى علشان خاطرى تبقى قوية

:)

محدش يقدر مايحبش فاطمة

انا كنت رايح البؤجه مخصوص علشانك

بصي بئا

هوا سؤال

ومش مستني رد

من الأكثر ابتلاء؟

ما رديتيش يعني؟

طيب

لأني أكثر منك خبره في موضوع الكوارث والابتلاءات

اه والله ما تستغربيش

واديها ماشيه

اي نعم متنيله بتعرج

لكنها ماشيه

تجاوزي أحزانك يا فاطيما

وخلي أملك في الله

وطالما المصيبه مش في الدين

تهون

استرجلي بئا
طب بصي

تعالي بكرا واناهجيب لك بيريل

لو عايزه

امممممم ما عنديش تعليق بصراحة
لانك جاوبتى على نفسك وكنتى متوقعة كده
يبقى انتى زعلانة ليه طالما عارفة النهاية
عامة انتى عودتيناعلى الشجاعة ومواجهة المحن بكل صبر واقتدار
السؤال انتى مش جاية البؤجة ليه؟؟؟؟؟!!!!
وبعدين الناس اللى جاية تشوفك مخصوص ذنبها ايه
مع ان لسه احساسى بيقولى انى هشوفك اول واحدة بكرة ان شاء الله
واتمنى ان ما يطلعش احساس كداب
نشوفك على خير دايما يا ام يوسف
تحياتى

اللهم اني أمتك و بنت أمتك , ناصيتي بيدك , ماض في حكمك , عدل في قضائك , أسألك بكل اسم هو لك سميت به نفسك أو أنزلته في كتابك أو علمته أحدا من خلقك أو استأثرت به ي علم الغيب عندك , أن تجعل القرآن الكريم ربيع قلبي , و نور صدري , و ذهاب حزني و جلاء همي
اللهم اقذف في قلبي رجائك و اقطع رجائي عمن سواك حتى لا أرجو أحداً غيرك.. يارب ضعفت ولا غيرك يقويني يئست
ولم أفقد فيك يقيني لقد ضللت ولا سواك هاديني لقد غرقت وأنت فقط منجيني
يارب إلى من أشكووأنت موجود ولمن أبكي وبابك غير مردود ومن أدعو وأنت فقط
المعبود ومن أرجوورجائي فيك غير محدود يارب اجعل عفوك عني دائم ورضاك علي
قائم واجعلني عن الذنوب نادم.اللهم اني اشهدك أني سلمت لك قلبي فاملأه بما تحب وبدّل لي ما أحب بما تحب فأنت أحب اليّ مما أحب..وجميل سترك عليّ غاية ما أحب فارزقني مولاي ووفق لي بين ما أحب وما تحب .
قال الغزالي: إذا رأيت الله يحبس عنك الدنيا ويكثر عليك الشدائد والبلوى..
فاعلم أنك عزيز عنده .. وأنك عنده بمكان .. وأنه يسلك بك طريق أوليائه
وأصفيائه وأنه يراك ..

معنديش كلام اقول يا فاتيما غير اني حسيت بكل كلمة قلتيها وكان نفسي اضمك واطبطب عليك
دوما كنت اعتبر الحب ضعف ومسبب للالم وتدوينتك اليوم تصب في نفس الاتجاه حتى لو استعذبت انت هذا الالم لكن هذا لايغير من طبيعته شيئا.
فاتيما انسي واعلي على كل الظروف الحياة لن نعيشها الا مرة واحدة حرام ان نهدرها بين الالم والدموع
احبك في الله عزيزتي

معنديش تعليق
ولا حتى باقي في عيني دموع
ممكن اقتبس كام جملة من عندك واقول انهم من عندك
مزنوقة فيهم قوي

آه
ربنا يخلي يوسف ويفرحك برؤيته وهو المعوض المخلف سبحانه
آه
طب احضنك ازاي انا دلوقتي
ده انا كنت ها اجي عشرة الصبح اشوفك واحضنك واجري
آه

طبعا حاسه بكل حاجه بتقوليها ومش هاقولك انتى بتعذبى نفسك لانى عارفه انه غصب عنك وده نفس احساسى بس الفرق بينى وبينك انى بحاول ادعى انى ناقمه وساخطه عليه وبتمناله كل شر لكن فى الحقيقه جوايا غير كده

ربنا يوفقك يا اجمل القلوب

أزال المؤلف هذا التعليق.

أزال المؤلف هذا التعليق.

فاتيما الغاليه

عارف و فاهم و حاسس كل اللى قولتية

و اللى مقلتيهوش

و أكيد انتى عارفة

ربنا معاكى يا فاتيما

ربنا معاكى

ربنا معاكى

لسه كًنت فى الكنيسة و كان فى مبنى جديد و عملين فيه صورة لوالدة موسى النبى و القصة بتاعتهم كنت لسه بفكر فيكى و بدعليك و شفتها قلت ربنا بيطمنى
صورتها و كنت هعملها عندى فى المدونة
و أهديهالك

فاتيما انا مش عارف اقول ايه بس انتى اكيد حاسة باللى عاوز اقوله

بس بدعيلك دايماً صدقينى

ربنا يريح قلبك اللى شااااايل كتييير

ربنا معاكى يا فاتيما

كل اما بتوحشينى باجى اسلم

يارب يجمعك باللى قلب اختاره ويكون هو اللى ربنا كاتب لك الخير معاه

وياااااااااااارب يفرحك بيوسف

أختي في الله
ما قريتش البوست بس اتوجعت
واحترت أقوللك إيه ؟
ربنا يهدينا جميعا لدعاء يزيح همك ويفرج عنك كربك ويتقبله منا بظهر الغيب اللهم آمين

ياريت يابنتي تقدري تخفي رسالتي السابقة لأنها خاصة بك وليست للنشر وشكراً

صديقتى الغاليه فاطيما

من حقك ان تحزنى على حب غالى فقدتيه لظروف خارجه عن إرادتك وأستسلام منه وليس خطأ فى شخصه

لكن الحياه لقتال ...والحب قتال

من حقك ان تحبى من يحرك قلبك لكن ليس من حق أى أنسان ان يفوز بقلبك إلا من يقاتل مع كل الظروف لكل يكون معكى فى النهاية مهما كانت الظروف صعبه ...مافيش مستحيل أبدا فى الحياه المهم عدم الاستسلام أبدااااا
من يستحق الحب هو الانسان الذى بذل مجهود لكى يحظى بهذا القلب ولم يستسلم أبدا

من حقك انك تحبى يافاطيما ومن حقك تحزنى.. خدى وقتك ..لكن تأكدى انه مهما كان شخصيه جميله ومهما كان يحبك لكنه لا يستحقك لانه أستسلم ولم يقاتل من أجل ان تكونى له فى النهايه
مهما كانت الأزمات

عارفه اللى يستحق قلب حد هو اللى يقاتل عشانك حتى ولو مش شخصيه اتمنتيها لكن تاكدى اللى يقاتل عشان أنسان بيكون عنده قدره انه يسعده ويحافظ عليه ويعطيه الاحساس بالامان فى الحياه

والحياه مليئه بالمفاجأت يمكن تتغير النهايه وممكن تحصل معجزه يمكن يلحق القطار قبل مايغادر المحطه على أخر لحظه عشان الحياه مش بتدينا حب حقيقى بسهوله

ولا الشخصيات الجميله موجوده كتير

ولو مش لحق القطار ...تأكدى انه مش هو يافاطيما ..مش هو الأنسان الذى يستحق قلبك انتى ويوسف ..وان الأنسان اللى يستحقك لسه مقابلتوهوش مهما كان شخصه ومهما كان حبه ومهما كان حبك

لا للأستسلام يافاطيما

قلبى معكى ودعواتى الدائمه لك

عرافتك الساحره

بلا حب بلا كلام فاضى

مفيش حاجةاسمها حب فى الدنيا

فى جملة مية مية شوفتها فى مدونة بتقول

لا للحب فى زمن ضاعت فية المفاهيم

انا لمه كلمونى دلوقتى من البؤجه وسألتهم عليكى قالولى لا مجتش
انا قلت كده يبقى فى حاجه كبيره...ونظرا انى مابقتش اوى اتابع بلوجلر زى زمان
فانا لسه مكتشفه البوست
********************
انا مش هقول ولا اعيد كلام تانى بس
كل الحكايه انك قلبك ضحك لشعاع النور الى جالك الى خليكى تحسى بالامان وطبطب عليكى من جواكى اوى بس
بس انتى قولتى
اهوووووووووووووووو
انك دايما هتفتكرى بالخيييييير
فى مثال جه ع بالى ينفع اقوله ولا لا؟؟
انا هقوله وامرى لله
نص العمى ولا العمى كلوا
اقصد يعنى
حتى لو عيونك مش شايفه زى الاول
على الاقل شايفه بنص عين
حتى لو قلبك مبقاش يطبطب عليه زى الاول
على الاقل انتى فاكره بالخير
*انتى فاهمه قصدى صح***
حتى
لو
لو لو لو لو
انا واثقه انك هترجعى زى الفل الفل كمان
اه وربنا لانك بتبصى للحواليك هتلاقى طالع منهم حب ليكى نقى اوى يافاتيما
ده انتى الغاااااااااااااااليه
اه وربنا
معلش ايام وهتعدى
وربنا
وربنا
وربنا
حلو وحش منيل بنيله اكتر كلوووووووا بيعدى
ازى الحال بقى؟؟
بقيتى احسن
طب ع فكره وحشتينى انا امتى اخره مره شوفتك يالهوى من ايام رمضان
هممممممممممممم
تتعوض تتعوض
الاقوليلى صحيح
انا عكيت فى التعليق اصلى والله لسه صاحيه وقاعدلك شعرى شبرين لفوق ماشاء الله يعنى ومش شايفه وحاجات كده
احم اقولك
تصبحى ع خير داخله انام تانى
اه والله
خدى بالك من نفسك
فاتيما فاتيما
كلناااااافاتيمااااااااا
كيكى عوووووو

شوفتى رجعت تانى اهو بعد ماقفلت الجهاز وروحت صليت وداخله انام
افتكرت حاجه ممكن تخليكى (تنشكحى ..شويه صغننه)
يااااااااااااارب تكونى مش شوفتهيا يارب يارب
*****************************
http://www.youtube.com/watch?v=IedYwb6jTmQ
************************
ياربى تنشكحى وهو المطلوب اثباته
بصى لو مش اشتغلت معاكى خشى على اليوتيوب واكتبى رقصه الكفار
هااااااااااااااااااااا
انشكحى بقى
اااااااااااااانشحكى ونبى
كيكى

إزيك يا فاتيما
اولا كل سنه وأنتي طيبه
وثانيا ليه بنحب نحزن بل احيانا بنعشق الألم والحزن ؟؟؟ ليه بنضيع أجمل لحظات عمرنا في التفكير في حالنا ونحزن عليها ،ولربما لو تناسينا وخرجنا للمجتمع وخلعنا عنا ما يحزننا لأدركنا ان الدنيا كلها لا تساوي لحظة ألم ولحظة قلق ولحظة ضيق ،
فيا فاتيما اخرجي وأقعدي مع صديقاتك ولا تدعي الحزن والضيق يجثم على صدرك فهو أثقل من الجبال
فلا تحزني على حب لم يكتمل
بل احزني على يوم ضاع في ضيق والم
وفقك الله لكل خير

حبيبتي

اللي قلبه زيك من دهب ملفوف في حرير
ربنا هيطبطب عليه

اختلي بنفسك
وخدي وقتك

فاتيما الغالية...انا انتهزت فرصة انك فاتحة النهارده وقلت لما ادردش معاكي براحتي







































































فتيما الغالية.. انا انتهزت فرصة انك فاتحة النهاده وقلت لما ادردش معاكي براحتي..بصي ياستي .. ام كلثوم قالت إيه قالت الزمن بينسي حزن وفرح ياما عارفة يابنتي احنا بييجي علينا وقت بيبقى المخزون عندنا من افراح واحزان ينفع يفصل جنبنا انسان تاني كده عمره 13-14سنة ويمكن اكتر شويه ماتزبهليش كده وتعملي نفسك مش مصدقة يعني تخيلي كل واحد فينا ماشي وساحب معاه ملحق الذكريات بتاعه ولما يعوز يفتكر حاجة قديمة حبتين يجيب الملحق ده ويمد ايده في كرشه قصدي في مخه ويطلع اللي عايزه ويرجعه تاني والا بقى لو يوم نسيناه في المترو ونزلنا وكان بقى عنوان البيت في شوية الذكريات اللي عندنا احنا -الأصل- شوفي بقى ياحبة عيني الواد ده يعمل إيه من غيرنا..ايوه كده عايزة اشوف البسمه دي على وشك..ودايماًدايماًتأكدي إنربنا ما بيعملش حاجة وحشة لحد.. وزي مانتي متشحتفة عليه كده افتكري انتي حاربتي قبل كده علشان انسان كانت الدنيا كلها بتقول لك لأ وانتي الوحيدة اللي واقفة في وش الريح وضد التيار ما كفياكي بقى يابنتي تعب وعيشي اللحظة بحلها ومرها وحاولي تطلعي من احزانك دي كلها بحاجة لطيفة ليه ماتعمليش كتاب وتسميه-خواطر فاتيما- وووالله أنا متأكدة ان الكتاب ده حايعمل ضجة اااكتر من كتاب عايزة اتجوز لأن اسلوبك انتي رائع مش عايزة أقولك كمية الإستمتاع اللي باحس بيها وأنا باقرالك والمشاعر بتاعتك الليعاملة زي شمس الشتا الرقيقة-تدفي لكن ماتحرقش- حلوة دي ماحنا بقالنا كتير بنقرالكم بقى أكيد نولنا من الأدب جانب ...مع اجمل تمنياتي وشكري وروحي اسمعي اغنية (ربك لما يريد) لمحمد منير ولسه انا ماتعلمتش التقنيات بتاعتكم لكن وحياتك عندي لاتعلمها والمرة اجاية تدوسي على كلمة محمد منير يطلعلك محمد منير ياللا انشالله ماحد حوش وقبل مانسى صحيح هو طريقة الخظظظظط اللي بتكتبي بيها دي اسمها ايه والبنط كام وشكراً

الصبر جميل

حلو التسامح والتفهم ده :)

بس كبري دماغك من اي حوار هيتعبك كده يا ريت

عارفه ان نصيحتي قاسيه ... بس هو كده لازم تجيبي من الاخر

تحياتي

ربنا يكون في عونكو انتو الاتنين ويصبركوو

بحبك وحاسة بكل نقطة دم نازلة منك

تحبى تدخلى الجنة من اى باب؟

فا تى ما

من يوم ما نزل البوست دا وانا بأقرأه كل شوية وعايز اكتب مش عارف اقول ايه

عارفه احساس الواحد بالعجز انو يكون ايجابى ويبادر باغاثة الملهوف
ياااااااه
يا ام الخير
كان قلبى حاسس وقلت لك فى تدوينة سابقة
يارب يطلع اللى فى دماغى صح
ورديت وقولتى ايون صح

من حقك يا فاطنة تحبى ومن حقك تقولى اللى جواك ....
ومن حقك تزعللى وتفضفضى
بس مش من حقك تكونى قاسية
على فاطمة بالشكل دا
دى انسانة رائعة تملك قدرا من الرحمة
والانسانية تكفى مليون انسان
فكيف لنا نحن المريدين ان نرضى ان يحتكرها انسان واحد
نحن فى حالى احتجاج حتى تعود فاطمة
ذات القلب الكبير والايمان العميق

الى محبيها العارفين قدرها الكبير الذى تستحقه عن جدارة

فا تى ما
والله انا كنت حاعمل بوست
حاكتب فيه فا تى ما
فقط
اخر بوستاتك حسستنى انو فيه حاجة
ذهبت الى مدونة يوسف ذهبت لبعض المدونات اللى انت بتابعيها
عايز اعرف اى خبر مش لاقى
واخيرا ...كان هذا البوست
.............

والله ما لم تناليه اليوم
غدا سيأتيك ما هو خير منه

ولا ترددى الا
الحمد لله
الحمد لله
الحمد لله

أنا عمالة أعيط
ومش عارفة اكتب اى حاجة
خااااااااااااالص

ياغالية مش هينفع جلد الذات وحرمانها والبكاء على اللبن المسكوب
ياغالية ماتلغيش حياتك وتوقفيها يوسف هيرجع باذن الله لكن امشي في الوضع اللي يرجعه ابداي حياتك وادي لقلبك فرصة يبتدي ويحي ويتحب بس اكيدهو اتعلم كتيرفهيختارصح وهيختارانسان يحب بجد ويحتويكي ويقف معاكي في كل حاجة
يافاطمة الدنيا حلوة بالحب وبالناس اللي بيحبونا لازم نجمعهم حوالينا مفيش نصيب ليكي في الحب دة اكيد كان ناقصه حاجة ولعله خيرانه بعد لان اكيد باذن الله اللي جي اجمل بس ادي لنفسك فرصة العمر
بحبك يا انا

يا رب تكوني احسن الفترة الجاية يا فاتيما/يارب تكوني بخير ويكون ربنا بيختار لك الاحسن مع الوقت ها تتاكدي من ده

الجميييييييييييييل
بقى عامل ايه دلوقتى؟؟
هااااااا

قدر الله وماشاء فعل
ان شالله تستري نفسيتك وحبك للحياه بعد الازمه دي

فاتيما الغالية

أخبارك أيه يا رب تكونى أحسن

معلش مش عارف أخفف عنك

أنا أسف

بس ربنا معاكى و بدعيلك دايماً

ربنا معاكى

النهارده يافاطمة باكلمك وانا وكذلك انتي بالتأكيد اقل توتراً وأكثر اتزاناًمن الأمس انا بالنسبالي عشان خلاص أيقنت ان مشاعري وصلت لك واني حاقدر ان شاء الله اكتب لك واعبر عن كل اللي جوايا من ناحيتك ..وانتي اكيد بقيتي اكتر واقعية وقوة ومن اجمل الكلمات اللي قريتها مرة لأنيس منصور ووووعجبتي قوي بيقول ايه:(اسرع يد تمتد لمساعدتك هي اليد التي في نهاية ذراعك)ايه رأيك بقى إن الحكمة دي بافتكرها كل ماأكون في ازمة والاقيها ميت صح واربعتاشر
بصي يافاتي ما..انا بعد اذنك حاضيف نفسي لقائمةالأمهات اللي ممكن بعد كده نكون اصحاب وباتمنى اكون مثلاً مثلاًزي الأخت الفاضلة د.ستوتة الحمش وبالمناسبة تحياتي لها على البعد ويمكن نتقابل ماحدش يعرف..ونقول بقى المهم:ا
اولاً:لاتجعلي الأمس يستغرق وقتاًطويلآمن اليوم .
ثانياً:انا على اد فهمي لموضوعك ده من قرايتي للبلوج وتقريباًمتابعاه وإن كنت مش مشاركة فيه-بناءًعلى رغبة صاحبته- وبالمناسبة اذا كنتي ناوية تقفلي تاني البلوج المحترم ده في وش الناس الغلابة اللي زيي فأمنتك امانة تقوليلي أنا شخصياً ازاي ادخل لك وانتي عندك كل معلوماتي اللي ممكن توصلي لي بيها..باقول من خلال فهمي لموضوعك أنك كنتي رابطة ارتباطك بالشخص ده ومأجلاه لحد ما يوسف يرجعلك إن شاء الله..صح الكلام؟ اذا كان الأمر كده فإيه المانع إنك تفكي نفسك من الشرط ده .. والحياه يابنتي مش حاتقف عند حد او عند حاجة ..الحياه ماشية والشاطر هو اللي يعرف يداديها عشان ياخد منها أكبر قدر من السعادة.. ويوسف كده كده راجعلك إن شاء الله .. ومادام يابنتي هو ماقدرش يصبر معاكي ماتحاولي انتي تخطي خطوة لقدام .. والا الأمور اصلاًمش كده وسايباني اعك من ساعتها..كده برضه تعملي في والدتك كده ..الله يسامحك .
ثالثاً:طبعاًلو ان الأمور انتي شايفاها مستحيل ترجع يبقى على رأي الغنوة :قالولي نار تطفي نار ..شوفلك حبايب غير اللي غابوا هي بالباء والله مش بالراء.. وانا حالياًباغطي وشي بالمخدة ودي اقوى وسيلة دفاع عندي
عرفتي ياستي حاتعملي أيه؟ حفكك انا من التنشنة دي اللي حاطة نفسك فيها وحاقولك حاجة تريحك وإسألي فيها نفسك أولاً ثم إسألي فيها أي ست متجوزةوياستي ماتسأليش أيٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍٍ ست ..لأ إسألي اللي متجوزين عن حبقوليلهم كام مرة في حياتكوا لعنتوا ابو اليوم اللي اتجوزتوا فيه؟ وردي عليا بعد كده اذا كان عندك الشجاعة..ياشيخة قومي قومي شيلي القمطة اللي انتي عاملاهالي دي والبسي احلى حاجة بتحبيها ونقي اهلس فيلم في السينما وادخليه وعيشي دنيتك انتي فاتيمااااا وقولي بعلو صوتك دي دنيتي انا ايامها محسوبة عليا انا مش على حد غيري ومش حاتحاسب على ذنوب حد غيري والدنيا دي فيها إله واحد بس هو اللي الهنا كلنا ومش حاوصل حد تاني لدرجة الألوهية واقعد اعبد فيه لأنه في الأول وفي الآخر بشر مخلوق من تراب يعني لو نزلت عليه شوية مية يبقى طين يعني حضرتك قافلة على نفسك كل البيبان وعمالة تتشنهفي علشان حطة طين ..عارفة حاتكرهيني وتقولي ماتقوليش عليه كده امال هو إيه بذمتك..هو كائن دخل حياتك في ظروف انتي فيها زي الصيني الرقيق اللي يتخاف عليه من الكسر وانتي من الأمل عرفتيه كده لكن هو ما قدرش يجيب فرخ سيلوفان يلفك فيه وخبطك عند أول حيطة قابلتكم ..اعقليها شوية وماتحاوليش تنضفي قميصه من دمك وتقولي لأ دا دم الذئب ..خليه هو يقولها ..لكن انتي متقولهاش معاه..ارجو ان يكون ماوراء كلامي وصلك وتفوقي من اللي انتي فيه وقومي ياللا جمعي مدوناتك لأن وحياتك عندي ماحد حايمشي المشوار معاكي في الحلم ده إلا أنا ياأم يوسف..وبالمناسبة مش شايفة اناحنا دخلنا يوسف في القصة بتاعتكوا من غير مانقصد(وجاءوا على قميصه بدمٍ كذب)صحيح قبل مانسى بما انك انتي اللي عرفتينا على الألفة بتاعك د.زين عبد الهادي ممكن تبقي تبعتيلي الإيميل بتاعه اللي بيرد عليه لأنه انسان فاضل وموسوعة وباندم اني ماعرفتوش ايام ماكان عنده مدونة والنبي ماتنسيش حاتعملي فيا معروف كبير وأخيراًتحياتي ودعوتي لكي ربنا يريح بالك ويطمن قلبك بذكره عز وجل

ازيك يا فاطيما
يارب تكونى بخير

حفيدة عرابى
----------

عارفة يا فيدو

انك شايلة همى
ومنتظرانى لما اروق على مهلى
ومقدرة كل حاجة


وعارفة كمان محبتك
وانا كمان يا حبيبتى
بحبك
يا من قلبها دوماً
على احبابها يتلفت

غير معرف
-------

كتر ألف خيرك



الذين لا يحبون فاطمة
موجودون ..
دا امر طبيعى
ومقبول
ومنطقى جدا
المؤلم
ان يكون الذى لا يحب فاطمة
تطلع فاطمة بتحبه
لآخر حتة ف قلبها

بس


تحياتى انا اكتر
وطيبت خاطر قلبى
بدعائك

الحب الجميل
---------

معلش يا حبوبة
المهم ان اليوم الحمدلله
كان جميل وانبسطتوا

اوعدك اعوضهلكم
لما الظروف تساعدنى
والأحوال تتحسن

وعارفة انك هتحسى بيا
وتقدرى عدم مجييى حتى لو مشرحتش فيه ايه ...القلوب عند بعضها
يا حب
يا جميل

منحرمشى منك
وبوسيلى لولو

sony2000
--------

معلش يا سنسن بكيتك
غصب عنى
انا بكتب من قلبى
ومبعرفش الكلمة هتطلع عاملة ازاى
قد ما ببقى عاوزاها تطلع عشان خلاص بتكون قربت تخنقنى

منحرمش من دعواتك وسؤالك يا حبيبتى
معلش انا مقصرة معاكى
ومعاكم كلكم
سماح

مدونة رحلة حياة
---------------


حضرتك نورت
ومش عارفة اشكرك ازاى
على اهتمامك بإنك تعلق
وندعى
وتطبطب

اتشرفت بزيارتك
والف شكر

مدونة ما كفاية بقى
------------------

معلش يا كفاية
مش مهم التفاصيل
وكفاية اهتمامك

نورتى المطرح كله

re7ab.sale7
-----------

يا رحوبة انتى حبيبتى
وانا بقرى بين سطورك اللى عايزة تقوليه والله وربنا عالم
وعارفة كمان انك حاسة وفاهمة ومقدرة
وببقى عارفة مسبقاً اول ما اشوف اسمك ف صفحة التعليقات انتى هتقولى ايه ؟
غالبا هيكون كلام انا حابة اسمعه
وهيكون طيب ورقيق زيك
وهيكون كلام شبههى
لأنى بحس انك شبههى ف قرايتك للناس ولكتابتهم
انا اسفة لأنك مروحتيش البؤجة بسببى
بس غصب عنى
وان شاء الله اللقاء الجاى
هبقى اقولك على كل الأسباب

خلى بالك من نفسك
ويا رب تكون صحتك دلوقتى افضل

بحبك جدا

мαησηα
------

يا قلب الملايكة
سلامك وسؤالك كان بيوصلنى دايما
مع بساكيتو انتى ومحمد الغرباوى الغالى وسارة الطيوبة وكل حد

انا كمان بحبك يا منونتى
و رغم ان البوست بتاعك كتيييييير عليا جدااااااااا
بس متتخيليش فرح قلبى ازاى
مكنش مستغرب منك
بس خلانى اتخض
واكتشف ازاى الدنيا مليانة حواليا بناس حلوة وطيبة ومعطاءة زيك

ربنا ما يحرمنى منك
ابدا

مصرى جدا
--------

ازيك يا هانى

البؤجة لصحابها يا فندم
وصحابها هما الناس الحلوة اللى عاوز تعمل خير و انتم لها يا راجل يا طيب

انا كويسة يا هانى وبخير
مش نافع اقول كل حاجة
بس اللى مكتوب ف البوست من ضمن الأسباب اللى مخليانى مجتش ومش قادرة اعمل أى حاجة زى الاول


وبيريل ايه
انا عاوزة بيبسى دايت
عشان الريجيم

ماشى؟




ربنا يخليك ليا

خالد همس الاحباب
--------------


معلش يا خالد
انا بعتلك رسالة وقولتلك اللى فيها
وكالعادة انتا قدرت الظروف
لأنك خالد الغالى
اللى برمى عليه حمولى دايما
وانا عارفة انه هيشيل معايا وهوه ساكت ومش متضايق و مستعد يشيل قد كدا ميت مرة ...انا متأكدة

اقولك على حاجة ؟
من حوالى عشر تيام او اسبوعين
مريت بموقف .. ف حتة اول مرة اروحها
الموقف الحمدلله عدى بسلام
بس فكرت بينى وبين نفسى
لو كان معداش
كنت هعمل ايه ؟
لو مكنتش لقيت هانى او ماجد اكلمهم
اكتشفت ان اول شخص
كنت هتصل بيه ييجى يساعدنى
كان انتا

آه

بجد

انتا يا خالد
انتا اخويا بجد
اللى شيلاه لعوزة ولوقت ضيق
عشان كده مش عايزاك تزعل منى
لأنى لما مجييش يوم زى كدا
يبقى فيه اسباب قوية

كل بؤجة واحنا طيبين
والبركة فيكم
والحمدلله ان اليوم مر بنجاح
وانبستطوا


سلام يا غالى

dahlia...
---------

يا داليااااااااااااااا

انـــــا
بحــــــــــبك
قـــــــــــــــــوى



خواطر شابة
----------

وحشتينى يا خطورة
وكان قلبى بيقولى
هقرى تعليقك ف البوست دا
عشان احس بطبطباتك كالعادة

الالم والدموع
زى الفرح والضحكات
اشياء .. يجب ان توضع ف مكانها
وتذهب لمن يستحقها
وتأتى فى موعدها الصحيح
وهذا ما يحدث الآن يا حبيبتى
هذا فقط ما يحدث

متقلقيش عليا
انا بخير
وانا بحبك انا كمان
يا أطيب
اهل المغرب

ستيتة حسب الله الحمش
-----------------

انتى لسه هتحضنينى يا ستوتة؟

ما خلاص حصل


تعرفى ؟

انتى اخترتى اكتر كلام ف البوست انا وانا بكتبه حسيته ملخص كل شىء
هوه دا اللى انا عاوزاه ووصلته وكل امنياتى وسبب حزنى واللى عندى ومبقاش نفسى غير انى اقوله ..واقول من بعده يا رب


ربنا ما يحرمنى منك
ولا من شفافيتك دى

بوسيلى مانوسة النوسة كونوسة
وعفروتو حبيبى

bombona
-------

اولا
اسمك حلو قوى
يا بونبونة

ثانيا
تعليقك حلو قوى
لأنه فاهم يعنى ايه
متبقاش زعلان من حد المفروض
انه مزعلك
لان حبك ليه أضعاف اضعاف اضعاف
زعلك منه


ثالثاً
انتى نورتينى قوى
وف انتظارك دايما

ويكا
----

:)

الأبتسامة دى
ليها اسباب كتيييير


مبسوطة انك بتعلق عندى
بعد غياب


ومبسوطةانك مش ناوى
تدينى كلمتين ف جنابى دلوقتى
من باب الزعل عشانى و عليا


ومبسوطة من دعوتك الطيبة
اللى محتاجها جدا ومنك اكيد
لأنك عزيز عليا


بس كدا

حج مبرور وذنب ان شاء الله مغفور
يا ويكا يا ويكا

عاشقة الرومانسية
----------------

انا قولتلك ف الايميل ليه يا دودو
خلاص بقى متزعليش منى

وتكشرى كدا
زعلك على عينى

والحمدلله انكم انبسطتوا
واليوم كان حلو


تتعوض ان شاء الله

ربنا ما يحرمنى
منك
ولا من حنيتك
ولا من دلعك
ولا من خوفك عليا
ولا من تفهمك
ولا من كل حاجة حلوة
يا قطتى الحلوة

u&i
-------


غالبا من الصورة
هخمن انك مؤنث سالم
واتكلم على هذا الأساسي
ماشى؟


ملحقتش اقرى التعليق للأسف
بس اتصور انه
كان حاجة من تلاتة



يا حميمى قوى
كان المفروض الا يكون للنشر
على الملأ كدا
فقررتى تشيليه


يا كان صعب وموجع قوى
وبعد ما اتنشر حسيتيه قاسى
فروحتى شيلاه


يا كنتى عاوزة تدخلى بدون معرف
واتسجل بحسابك
فقولتى تتراجعى عشان محبتيش تظرهى بهويتك اللى برضو مش معروفة ليا بس جايز تكون معروفة لغيرى


او سبب رابع ومعرفوش



ف كل الاحوال



انا اتشرفت
حتى لو ملحقتش اعرف
فيه ايه

Ramy
----

عارفة يا رامى
انتا بالذات انا مش محتاجة اشرحلك اى حاجة ولا أقول ربع كلمة
انا عارفة والله


مبروك وصول الاميرة الصغننونة
وعقبال ما نباركلك على وصول ولى العهد واميرتك انتا بقى


ربنا يجمعك على خير
مع ملاكك الطيب


انا بخير متقلقش عليا
ولو ان القلق دا عادى
اختك ولازم تقلق


يا رب تكون انتا كمان
بخير

ربنا معانا كلنا
ر ر
يا رقيق القلب

star in the sky
---------------

كلك ذوق يا نجومة
انا عارفة انى مقصرة معاكى

بس معلش
انتى الاكرم

وانتى كمان وحشتينى والله

P A S H A
---------

متقولش حاجة يا شريف
كتر خيرك ع السؤال
حتى لو مكنتش قريت

نبضات
-----

ازيك يا نبوضة

هقولك ميرسى ع السؤال
رغم انى عارفة انشغالك
بس عارفة كمان
انك لازم هتيجى وتطبطبى
لما تحسى انى محتاجة شوية ونس
ف لحظات صعبة كدا


انا مش مستسلمة يا نبضات
انا بحزن ف هدوء
وكما ينبغى



و مش هناقشك كمان
ف اذا كان هذا الشخص
مناسب ولا مش مناسب
لأنى عديت النقطة دى من زمان



دعواتك تكفينى
وقلبك ربنا ما يحرمنى منه


ربنا يسعد كل ايامك
وعقبال ما افرح بيكى قريب
وانتى لابسة الطرحة البيضا بقى

غير معرف
-------

بلا حب بلا كلام فاضى ؟!!



الحب مش كلام فاضى


اللى قلبه من جوا فاضى
هوه بس
اللى ميعرفش معنى الحب
ولا قيمته



كلامك محبط بصراحة
و غريب قوى
ومش منطقى الا لو كنت عايش ف صحرا


دا حتى الصحرا
هتلاقى فيها اللى تشتاقله
وتفتكره و تحبه


الحب موجود ومالى الدنيا
و صحيح مش دايما حاضر بقوة
بس زى اللون درجات


اذا كان فيه ناس مش عارفة تعبر عنه
او تلاقيه
او تقدره
او تعيشه
فدا مش معناه
انه مش موجود
او انه ....
كلام فاضى



و الجملة دى موجعة
لأى حد بيحب
خصوصا لما يكون بيتألم




عموما دا رآيك
وانا قولت رآيى

و على كل حال

اهلا بيك

كيكى عوووو
----------


يا كيكى
لو قعدت اقول انتى حبيبتى
من هنا لآخر الدنيا
مش هيكون كفاية

عارفة ليه؟


لأنك كالعادة
تغطسى ف غياهب الفيسبوك بوك
لكن قلبك هنا معايا
واول ما عرفتى انى متضايقة
جيتى ف لمح البصر
وسبتى كلام ..اقل حاجة اقولها عنه
انه طالع من قلب قلبك
كله اهتمام بجد
وجدعنة بجد
براءة بجد
وحب بجد


طبعا شوفت رقصة الكفار
ومش بس ابتسمت
انا ضحكت قوى
عشان انتى مجرمة
وملكيش حل

انا بخير يا حبيبتى
لما تسألى عليا بقلب كدا
ابقى أكيد بخير

بحبك يا كيكى كيكى
انتا صديقى

ahmed_k
-------

ازيك انتا يا أحمد
وكل سنة وانتا طيب
وبألف صحة وسلامة

شكرا على النصيحة
والدعاء

حمدلله على سلامتك

شمس النهار
---------

انتى كمان حبيبتى يا شمس
شكراً
مش عشان التعليق والمجاملة
شكراً
لأن الظروف جمعتنا وعرفتك
وشكراً
لأنك انسانة جميلة كدا

غير معرفة
-------
الاخت الغير معرفة
النقط كتير وعاوزة ارد عليهم




1)
اهلا بيكى
وانا محظوظة لأنى فتحت التعليقات
المجهولة عشان اتعرف عليكى
وبيكى


2)
اسفة لانى قفلت المجهول
بس ظروف وحضرتك عارفها
لأن واضح انك متابعة


3)
انا معرفش سنك بس يتهيألى
مش هيطلع الفرق بيننا يستاهل قوى
انا عندى 38 سنة يعنى زى اختك الصغيرة ولو زى بنتك ..اكيد يشرفنى


4)
حلو قوى تعبير تدفى ومتحرقش
وكلك ذوق بجد
بس انا فين وغادة فين
دى ست البنات وانا جنبها على قدى جدا وكنت ف دار الشروق من كام يوم وشوفت كتابها ع الرف بقى قلبى فرحان كأنى انا اللى محطوطلى كتاب ..مش هيا
ربنا عالم بمحبتها عندنا كلنا مش انا بس وخواطرى ع المدونة اهو وتحت امرك


5)
حضرتك متعرفيش تفاصيل عن حكايتى
فيما يتعلق بالبوست
بس واضح انك تعرفى تفاصيل عن حكايتى بأبو يوسف كويس .. ودا معناه انى مثار اهتمامك من زمااااان
وانا بجد مكنتش متخيلة انى ممكن ضايق حد عشانى قوى للدرجة دى واشيله همى كدا فنا بعتذرلك


6)
مع تحفظاتى على كلمة
تشهنفى و كائن دخل حياتك
والكلام الصعب اللى حضرتك قولتيه
انا مش هكرهك اكيد بعد قرايته
بس انا مستغربة جدا
من جملة حتة طين دى
لأن الناس عندى مش حتة طين
يوسف مش حتة طين
اهلى واصدقائى مش حتة طين
الأحباب هنا وحضرتك معاهم مش حتة طين
الناس عندى مش كدا
الناس عندى غاليين
وقيمتهم عالية
والرسول عليه الصلاة والسلام قال
حب لأخيك ما تحبه لنفسك
وانا بتعامل مع كل اللى بحبهم بنفس المنطق
بعاملهم كما اتمنى واحب ان يعاملنى الآخر
كون اللى قصادى مش كدا
فدا مش دايما ذنبه
ممكن يكون تقصيره او احجامه لأسباب ملهاش دعوة بيا وليها دعوة بيه
من حق حضرتك ان تصبى غضبك عليه
لكن انا ؟؟؟
لأ اكيد
لأنى ادرى الناس بيه
ولو لم اتفهم طبيعته واشوف بعين مختلفة عن غيرى
ابقى ازاى بحبه و ادعى هذا الحب
انا مبطلبش من حد يدافع عنه
انا بطلب الناس تسبنى احزن على ما اراه يستحق ويمكن هما ميشوفهوش كدا



7)
شوفلك حبايب دى
مش نظريتى ولا طريقتى ف الحياة
انا مببدلش حد مكان حد
الدنيا مبتمشيش عندى كدا
لا الأحساس بزرار ادوسه فينطفى ويولع
ولا الناس فراغات يتملى حيزها بالمتاح



8)
يوسف داخل ف القصة
وفى أى قصة وموقف بيحصلى
ومتخافيش حضرتك
انا فكراه كويس
وعاملة حسابه كويس
وعارفة انه ان شاء الله راجع
وعارفة كل حاجة
حضرتك عاوزة تقوليها
ومستنية الوقت المناسب لنطقها


9)
للأسف معنديش ايميل د.زين الغالى
بس حضرتك ممكن تسيبيله تعليق
ف مدونته واكيد هيرد عليكى
ولو مردش اعذريه
لأنه مشغول جدا وكان الله ف عونه

10)
الفونط اللى بكتب بيه
اسمه tohama وحضرتك
ممكن تعمليله كوبى بست من صفحتى
والدرجة اكبر حاجة large



حضرتك نورتينى
وللأسف انا ما زلت عندى قواعدى القديمة انى مبفضلش الأتصالات الهاتفية والموبايلات وكدا
بس هما ف امان وتأكدى حضرتك انهم لن يساء استخدامهم

اما التعليقات المجهولة
فنيتى لقفلها تانى كانت موجودة
انما عشان خاطرك
هسيبها ان شاء الله
لو ربنا اراد و المدونة فضلت
ومحصلش حاجة


الف شكر ليكى
ويا ريت متكونيش زعلانة من أى حاجة قولتها لأنى انا كمان
مش زعلانة
ومقدرة جدا اهتمامك

تحياتى وخالص ودى

فتاة من الصعيد
--------------

الصبر جميل والتسامح والتفهم اجمل
وبرج الميزان العقلانى اللى ماشى على قطر ومعندوش تفاهم دا ..أحلى واحلى

معرفش ارد اقول ايه يا مروة
نصيحتك مش قاسية
دى نتاج حب وخوف عليا
وتعقل ومنطق منك ..انا فاهمة

بس تطبيقها ف الواقع بتاعى
مبينفعش
لست انا يا فاتى
هذه الشخصية التى تكبر دماغها يا حبيبتى
مكنش دا بقى حالى
انا كدا بقالى 30 سنة
ولو ربنا مد ف عمرى
مظنش هتغير كتير
الأنغماس ف الأشياء حلوها ومرها
زى ما له متاعبه
له كمان متعته
وانا مضيت ع العقد دا من زمان
ومش ناوية ارجع ف كلامى
وادفع شرط جزائى واكبر دماغى
مش لأنى معييش ادفع
لأ
لأنى ماضية العقد بملء ارادتى
لم اندم حتى هذه اللحظة على شىء

يا رب تكونى بخير
وبطلى تغطسى كل شوية كدا
ومنعرفش اراضيكى فين

تحياتى انا اكتر يا حبيبتى

كيـــــارا
----------

الطائر الحزين
------------


السؤال دا على اساس
انى داخلها اصلاً يا إيهاب ؟!!

:)

sal
----

آه يا سال
يا غال


عارفة انك فاهمنى
وحاسس بيا



فا تى ما
عارفة انكم زعلانين عشانها
وقلقانين
عشان كدا فضفضت معاكم
ونشرت حزنها على احبال قلوبكم
و بتقول كفاية عليها بتسمعوها
وهيا بتقول آه
وتطبطبوا
او حتى تسكتوا
أو تستنوا لما الدنيا تروق
ومسيرها تروق
ان شاء الله



انتا مدينى اكتر من حقى بمرااااحل
انا انسانة عادية
وكتير بحسنى مقصرة
وبتمنى اكون عندى طاقة وصبر
وقدرة اعمل اكتر من كدا
واجى على نفسى شوية ...
لكن للأسف مبعرفش


ف توقيتات معينة
زى الأيام دى
بحس انى ضعيفة وهشة
ومحتاجة اخد هدنة


ببقى عارفة انى هشغل الناس اللى بتعزنى ف الله عليا
فبقول اكتبلهم واقول فيه ايه


احس بعد الكتابة
انى ضايقتهم وشيلتهم همى اكتر
بس اعمل ايه
انتوا جزء منى وغالى قوى


اتمنى الرد ع التعليقات يكون فيه نوع من التقدير ولو قليلاً لكل الناس اللى اتخضت وسألت واتوغوشت
ورد بعض من محبتهم
وقلقهم عليا
انا محظوظة بيكم بجد


بعادى له اسباب عدة
آخرهم حكاية البوست
اللى كملت
على اللى فاضل فيا
من قدرة ع المقاومة
والتماسك


اصلى يا سال
تعبت قوى


بجد




الحمدلله
حمد الشاكرين
والحمدلله
حمد الصابرين


منحرمشى منك
يا سال
يا غال

Doba
----

حقك عليا يا دوبا
بس انا عارفة
انك بتقرينى بقلبك
وبتحسى بكل كلمة
واللى بين السطور دايما




متقوليش حاجة
انا كل ما اقرالك تعليق
أى كان فحواه
بفتكر حاجة حصلت بينى
وبين جدتى زمان قوى ...
وفرصة احكيهالك ؟




زمااااان قوى
انا صغيرة
وجدتى كانت بتستعد للصلاة
فحبيت اعمل ناصحة
وقولتلها قبل ما تقول ... الله اكبر :


- ادعيلى يا ستو
ربنا يدينى الف جنيه


بصتلى وابتسمت
وسكتت
وابتدت الصلاة
وانا جنبها منتظرة التسليم
والدعا اللى بعده
لقيتها بتدعى بحاجة تانية
خالص غير اللى طلبته منها




اتقمصت جدااااا
واستنيتها تخلص
وعاتبتها ...
قولتلها الدعوة دى
مش زى بتاعتى



قالتلى
- يا عبيطة هوه انتى بتدعى
عشان عايزة فلوس ..صح؟
عايزة الفلوس ليه؟


قولتلها
- عشان اجيب كذا وكذا وكذا
و ... الخ


قالتلى
- يا خايبة مهو الدعوة اللى دعيتهالك دى
هتجيبلك الفلوس
والشغل
والستر
والصداقة
والمحبة
والأستقرار
والونس
والصحة
والرضا
والخير من كل صنف ولون


معجبنيش كلامها
بس وافقت وقولت ماشى
اهى دعوة والسلام



لما بقرى تعليقاتك ساعات
بفتكر كلام ستو


عارفة كانت بتدعيلى
تقول ايه؟


(ربنا يحبب فيكى خلقه)



:)


بوسيلى يسوفة وعمر
واحضنلى قلبك

عاشــــــ النقاب ـقــــة"نونو"
------------------------------


ازيك يا نونو

انا اسفة لأنى مقصرة معاكى
يا رب تكونى مبسوطة ول قليلاً ف المطرح الجديد
انا متابعكى بس معلش مش قادرة اكون مفيدة و بساعد

ربنا معاكى ويكرمك
خلى بالك من نفسك والعيال

انا كمان يا حبيبتى
انا كمان

بنت القمر
---------

ازيك يا امانى

لو قولتلك تعليقك دا
غالى عندى ازاى
مش هعرف اوصف أواعبر
دايما تأسرينى بمحبتك
اللى نورها خافت زى ضى القمر
بس مؤثر وبينور قلب العتمة ف ثوانى


ربنا ما يحرمنى من طلتك عليا

dr.lecter
---------

انا مش لاقية رد يوفيك يا ليكتر
اسمك كفاية ف صفحة التعليقات
عشان أبقى احسن

بجد

بدراوى
------

ربنا يصبحك
بألف خير يا بدراوى
انتا فين يا طيب
وحشتنا ومفتقدينك


و لولا نداهة الصحافة
التى اعلم سطوتها و سلطانها
كان زعلى يكبر حتى يصبح اشجارا

ميرسى ع البوست
الذوق مش غريب عليك

شكرا على سؤالك يا بدرا

فاتيما أختنا العزيزة
أنا مارضيتش أعلق مع إنى قريت من زمان
وكنت مش ناوى أعلق غير لما تردى وأطمن عليكى
رأيى يمكن تكونى عارفاه (معلش بقى برج الجدى وكملت بإنى مهندس)
أنا مش عارف تفاصيل بس عارف إنى من الأول طالما ماينفعش يبقى ليه؟
متزعليش منى ولو مش عايزة تنشرى التعليق موافق طبعا

ربنا يطمنا عليكى وعلى فكرة الدنيا مابتقفش على حد ولا على حاجة

طيب معلش حطول عليكى (قوليلى لأ براحتك) عارفة إيه أصعب أنواع الفراق؟؟؟
فراق الأب والأم لأحد الأبناء أو البنات
ومش فراق زى فراقك ليوسف, لأ أنا أقصد فراق الموت يعنى أب أو أم يفقد إبن أو بنت بالموت
أنا أعرف دكتور عيون من أكبر دكاترة مصر معرفة شخصية... الراجل ده عنده 3 أبناء واحد منخم بس اللى خد نفس الخط وكان بيجهزه إنه يمسك المركز بعده لأنه عنده مركز من أكبر مراكز العيون فى مصر
المهم الشاب ده مات فى حادثة سيارة وكان الخبر مفجع للجميع وناس كتير قالوا إن الموضوع ده حيكسر الدكتور... لكن لا تتصورى مدى الإيمان والتماسك اللى الراجل كان عليهم... طبعا حزن كتير بس رجع بسرعة ورضى بقضاء ربنا وكمل حياته بجد مش تمثيل وكان شايف إن ربنا خد منه حاجة عزيزة جدا بس إداله حاجات كتير
دورى يا فاتيما على الحاجات الكتير وحتلاقيها وإوعى تضيعى عمرك ندم على حاجة راحت
أنا فى حاجة دايما بقولها دايما (لأنى بعمل كده) بحزن كتير لوقت قصير وخلاص

أسف على الإطالة لأنى رغيت كتير قوى وفى حاجات كتير

أبو حميد
-------

لا تأسف يا ابو حميد على أى حاجة
وانا فعلا عارفة رأيك من قبل ما تكتبه
عشان برج الجدى ومهندس كمان


اقرى البوست الجديد
وانتا تطمن
ومتقلقش عليا
من أى حاجة
انا بخير
وزى الفل
وببص للحاجات الكويسة والله


يا رب تكون بخير
انتا وكل احبابك

ومنحرمش من سؤالك
يا برج الجدى ومهندس

:)

السلام عليكم

ازيك يا ام يوسف

يارب تكوني بكل الخير

انا قريت البوست برضه

وماكنتش عايز اعلق

عشان ماتقريش تعليقي

تفتكري إنك حزينه

مش عارف إذا كان الكلام ممكن يعبر ولا لا

بس كتير بلاقي الكلام مش بيكون كافي او يقدر يحاكي او يعبر عن الي بنحسه

وإن الكلام نفسه عاجز ولساننا عاجز عن ترجمه الي جوانا

عارفه

كتير بتخيل حياتي من غير حزن او من غير شيء يأرقني بحس إن حياتي مالهاش معني

مش معني كده إني بحب الحزن

لكن تقدري تقولي الحزن بيهذب مشاعري
وبيعلمني حاجات عمري ماكنت هتعلمها وانا فرحان علطول

أي إنسان مننا بيحس في لحظه إنه قوي قوي ومش فارق معاه اي شيء

وساعات تانيه بتعدي بتحسي قد إيه انتي هشه وضعيفه زي الطين الي مخلوقين منه

ومابقاش عندنا قدره كفايه عشان نتحمل زياده

لكن ساعتها بنفتكر إن ربنا فاكرنا حتي ولو بالابتلاء او بالمحن

وإنه عايز يختبر قلوبنا ويكشف حقيقتنا لنفسنا

يمكن ماكونتيش هتعرفي غلاوه يوسف او اي شخص تاني غير لما بعد عنك

يمكن كتير بنحس بناس غاليه عندنا

لكن مش بنحس بنفس قدر الغلاوه غير لو بعدوا عننا

ساعتها بنحس بجزء جوانا إتبتر

لكن اهم حاجه إن الناس ديه بخير

وأكيد بيفتكروكي زي ما انتي فاكراهم

فيه اخر قصه عندي ياريت تقريها

أعتقد هتكون مقاربه شويه للحاله الي انا شايفها مع إختلاف التفاصيل

أهم حاجه نفسي اقولهالك

كوني واثقه إن مافيش حاجه بتفضل علي حالها وإن كل شيء ممكن يتغير إلا من يغيرها

وده بيدينا أمل إن بكره ممكن يكون أحلي طالما ربنا موجود وهو اقربلنا مننا وارحم بينا من نفسنا

إحزني وابكي وابعدي وإنعزلي وإعملي كل شيء يحسسك إنك إنسانه .. وإرضي واشبعي مشاعرك

لكن الاهم تكون فيه هدنه مش هقول نهايه لكل ده

تقدري ترتبي فيها افكارك وتطبطبي فيها علي نفسك

وأحلي حاجه انا شايفها بجد ما شاء الله هي دعوه جدتك الي بتحقق

وهي إن ربنا يحبب فيكي خلقه

وإن القلوب الدهب مش هتتجمع غير علي قلب دهب صافي

:)

يارب دايما تكوني بخير

وتطمنينا عليكي دايما

وهوني علي نفسك

الحياه أقل من أننا نزعل عليها

عشان لا هي باقيه

ولا إحنا باقيين

ربنا يريح قلبك ويوهبك نفس مطمئنه ويطمنك علي حبايبك وينور بصرك وبصيرتك ويهدي نفسك ويرزقك كل خير

يارب

معلش بقي إني طولت

كل سنه وانتي طيبه

تحياتي

انا يمكن اول مرة اعلق عندك بس انا متابعك و متابع كل اللى بتكتبيه التلقائية و التواضع و القلب الطيب و الدموع اللى على شفاه بتبتسم و الحب اللى بيفيض على اللى حواليه و ده مش رائى ده راى كل عرفوكى ومفيش حاجه اقدر اقولها ليكى غير كلمات حبيبك و فيلسوفى جاهين
يا حزين يا قمم تحت بحر الضياع
حزين انا زيك وايه مستطاع
الحزن مبقلهوش جلال يا جدع
الحزن زى البرد زى الصداع
وعجبى

طول ما حنا عايشين طول ما فى ده و ده وربنا قال خلق الانسان فى كبد

ربنا يفرحك فى حياتك و يفرحك بيوسف
تحياتى ابراهيم رزق

وعلى فكرة متشكرين على وصفة العدس واحلى حاجة اليومين دول هو العدس

z!zOoOo
-------


ازيك يا زيزو

مكنتش عايز تعلق
عشان مش عاجبك الكلام ؟
ولا عشان متوجعنيش بتعليق يضايق
ولا عشان حاسس ان مفيش فايدة
ولا إيه؟؟



انتا قولت جملة ف وسط كلامك روعة
واحييك عليها
لأنها من قوانين حياتى للأسف ولحسن الحظ
حكاية ان الحزن بيعمل حاجة ف نفسية الأنسان وتغيره
هوه يفترض تغيره للاحسن
ودا اللى الأيام بتأكده او تنفيه

غالبا الحزن معايا بيعمل كدا
بيخلينى احسن شوية
زى فترات النقاهة كدا
اللى الواحد فيها بيبقى خارج من عملية صعبة وموؤلمة وهوه ضعيف ومناعته أضعف ونفسيته نيلة وكل حاجة وحشة ...ويفترض بيه يقوم ويبقى كويس ف وقت قياسى عشان الناس اللى حواليه اتعودت تشوفه واقف على رجليه لأنهم معتمدين على قوته
مع انه زيهم
محتاج يضعف
محتاج يئن
محتاج يبقى تعبان شوية
محتاج يسيبوه يحزن ف صمت

هوه مبيقدعش يصدر احكام على اختياراتهم ف الحياة
بيتمنى لو هما كمان ميعملوش كدا حاليا
يعملوا كدا علطول ماشى .زحق الصداقة والاخوة والعشرة واى حاجة
بس فيه توقيت حرج
مينفعش فيه غير كلمة معلش
وبس


انتا نورتنى

وانا شاكرة ليك جدا
اهتمامك
بجد

ابراهيم رزق
-----------

يا ابراهيم ازيك
انا بتابعك من عند خوخة
يشرفنى مجييك
ومتابعتك
وحضورك هنا

وص.ص.ج محدش ينفع ميحبوش

لو هتعمل العدس
خلى بالك من روحك
انا حذرت اهو ...


نورتنى

إرسال تعليق