.

.

تـــبـــيـــــخ الملايـــــكة  

Posted by: فاتيما in






النهاردة حصة تبيخ 
آه 
ما هو مش كل يوم نكد  نكد
كفاية
وص.ص.ج أو صديقى صلاح جاهين 
كما كان يناديه الفنان 
ورسام الكاريكتر جحازى 
بيقول 
بدل ما نطق يا ولا نضحك 
وبما ان التبيخ عندى مهزلة كبرى 
فهيا بنا نضحك شوية 








بيقولوا ف الأمثال 
آل اللى ميعرفش ..يقول عدس 
طب ليه؟
هوه العدس قلة و حيطته واطية ؟
طب دا حتى اكلة محترمة وكلها فوايد 
ليه مستقلين بيه ؟
يمكن عشان رخيص ؟
جايز الكلام دا كان زمان ... دلوقتى شوفوا 
الكيلو بكاااام





طب دنا يشاء السميع العليم 
انى المخلوقة الضعيفة الفقيرة الى الله 
و اللى ملهاش فى فن الطهى أى منظر
ولا بتطيقه
اطلع  معرفش اعمل حاجة عدلة 
من صنوف الأكلات  .. غير المذكور اعلاه 


آه والنبى 




هيوه الأكلة الوحيدة التى أتميز بها 
وغالبا الحاجة ام فاتيما مقعدانى بسببه
ف بيت ابويا و لحد دلوقتى 
أهو تطلع منى بأى منظر اكمنى 
زى قلتى فى كل حاجة تانية 
تتعلق بالتدبير المنزلى وباخد صفر
فشر صفر المونديال كست بيت






وبما اننا امبارح كنا اجازة 
عشان يوم السبت
وبما اننا امبارح الشتا ... جه بإفترا
وجاب معاه رياحه وزعابيبه وامشيره
وبما ان الحاجة ام فاتيما قررت نتغدى عدس
وعشان كل ال "بماإنات"  دى اتلمت سوا  
فلقيتها واقفة على باب الأوضة بتصحينى 
بصوت كله نعومة ورومانسية ودلع 
مبسمعوش غير ف المناسبات 
وبتقولى قومى عشان الغدا النهاردة عليكى 
و عاوزين ناكل عدس  من بتاعك






الحكيكة و اصدقكم القول 
انا كنت لسه بصحصح م النوم 
و بدعك ف عينى  وفاكراه كابوس
بس لما سمعتها بتكرر الكلام تانى وطلع بجد 
قولت ف سرى ليه كدا يا رب  ؟
دنا نايمة ف حالى بلم ف حسنات
اكمن نوم الظالم عبادة 
اقوم لا بيا ولا عليا ينكتب
 اهدر كل هذه الحسنات على حين فجأة
وبعدين دول أهلى 
وميخلصنيش اذيهم
مش كفاية اللى جرالهم من تحت راسى 
و كمان هطبخلهم ؟!!








طبعا عبثاً اقنع ماما انه بلاش 
و العمر مش بعزقة و خافوا على روحكم 
و خليها السنة الجاية .. مفيش فايدة 
الحاجة استحضرت روح حفيظة 
ف الزوجة التانية 
وعلقت على كلمة الليلة يا عمدة 
طب  خلاص  بقى
ذنبكو على جنبكو و جبتوه لروحكو 
ومحدش يلومنى و لا يعتب عليااااااااا
نغديكم وامرنا لله 
عدس .. عدس  احنا هيهمنا








قمت م السرير غسلت وشى 
واستجمعت قواى
واتجهت قدما إلى مطبخنا العامر 
والقطط ماشيين ورايا بيزفونى
بإعتباره حدث تاريخى  ومبيحصلش كتير
 انى يعنى اقعد ف المتبخ لمدد طويلة 
تعدى العشر دقايق







و ف خضم حركة الرياح العاتيات 
وهى بتخبط 
ف الشبابيك والحيطان و المثيرة للأتربة 
وعلى حس أصوات قصارى الزرع
وهيا بتقع 
ف البلكونة بتاعتنا و تعمل جو سسبنس 
وصفارات الهوا يتخللها اصوات العربيات 
وزعيق البشر واللى عملوا مقطوعة تنفع
موسيقى تصويرية مناسبة لفيلم رعب
 وصلت لحد الباب 
واذ انى على داخلة 
على منعطف تارييييييييخى ف حياة الامة
فقبل ما أخطشى عتبة المطبخ
كان لابد
من القيام بالإستحياطات التالية




(1)
الأحتفاظ ف مكان قريب جدا 
بنمرة المطافى  
(180)
عشان لو المطبخ ولع لأى أسباب
(ملهاش دعوة بيا طبعا )
يبقى الرقم جاهز منقعدش ندور عليه






(2) 
نمرة موبايل اخويا الكبير
عشان لو المطافى .. مردتش
يتصرف هوه بسرعة وييجى يلحقنى






(3)
نسخة من وصيتى 
عشان الواحد مش ضامن  ف العناية المركزة
يكون واعى و يلحق يقول اللى عاوزه 




(4)
كاسيت او راديو عشان اقعد اسمع اغانى 
ولاهوه هقعد ساعتين اتبخ ساكتة 
ويبقى تبيخ ونكد و هس هس  ؟!!





 (5)
رقم الدليل (140) عشان نجيب 
نمرة كنتاكى او بيتزا هات او جـــاد
أو أى محل أكل
عشان لما الاكل يتحرق  نجيب دليفرى










عملنا السابق ذكره 
وملناش حجة
ودخلنا المطبخ  مطمشنين 
ان كله قيد السيطرة
طيب


نبتدى بقى حصة ابلة نظيرة 
وهاتوا الورقة والقلم عشان تكتبوا ورايا
اومال البوست لازمته ايه؟
هديكوا الوصفة بتاعتى
واكسب فيكو ثواب ف ايام السقعة دى 


يلا اكتبوا ورايا 









المكاااااااااادير 
كيس عدس  - بيبقى نص كيلو غالبا
كام بطاطسية متقطعة
كام جزاراية متقطعة
كام بصلاية متقطعة
كام فص توم 
شوربة لحمة او فراخ - او مية عادية 
(وعليها مكعبات مرقة)
ملح وفلفل وكمون وكركم 
شوية زيت او معلقة سمنة صغننة 
وبس




كل اللى فات يتحط 
ف حلة محترمة و يتساب على النار
لحد ما كل المكونات دى تستوى وتتهرى
و تدوقوا طعمه 
لو محتاج ملح او فلفل تزودوه
لو طلع الملح كتير تزودو بطاطس
عشان تشرب الملوحة وتشيلوها بعد شوية ..اتصرفوا 







حد يسألنى ... يا كابتن لطيف 
ليه الكركم؟ ...  اقوله 
أصله بيخلى العدس لونه اصفر جميل 
وليه الجزر؟ ... لأنه مغذى وبيديله طعم مسكر 
و ليه البطاطس؟ .. عشان بتدى قوام متماسك
و طبعا التوم والبصل بيدوله نكهة
والكمون بيديله ريحة مميزة






فيه ناس بتحط الشعرية مع العدس 
ويسمى العدس حينها 
(كهرمان) 
و دى وصفة الامهات والجدات المعتادة
بس انا مبحبش الكهرمان دا بصراحة
ومليش فيه








اتأكدنا انه استوى 
طب الحمدلله







خلاص كدا ؟
لأ طبعا 



ناخده ع الخلاط  وينضرب وينعدم العافية 
لغاية ما يبقى شوربة 
بس سميكة وقوامها تخين 








خلاص كدا ؟
لأ  طبعا









تجيبوا عيش 
أى نوع شامى ... بلدى ... توست حتى 
تقطعوه مربعات و تحمروه ف الزيت 
 وتغرفوا العدس ف طبق
و العيش فوق الوش 







ناس بتحط بقدونس ع الوش 
ف يعمل شكل حلو  ولون ..ماشى





ناس بتقطع الفراخ المسلوقة 
 شرايح رفيعة وتحطها  ع الوش .. ماشى 





فيه ناس بتحمر الشرايح دى 
أو تجيب شاورمة فراخ كوكى م الآخر 
من باب الاستسهال وتحطها ويبقى عز الطلب 
(دى أنا..احنا لسه هنسلق ونحمر؟؟)







ناس تحمر بصل زى بتاع الكشرى 
وتحطه ع الوش ..كل واحد ومزاجه





كل دى حاجات شغالة ومش عيب 
المهم ف الآخر تحطوا المعلقة ف الطبق 
وتدوقوا ... وتدعولى 








طبعا انا خلصت العدس امبارح 
وغرفت للشعب ف البيت 
والصراحة الناس اخلاق محدش فتح بوقه 
غير بكلمة تسلم ايدك 
اللى مبسمعهاش 
غير مرتين تلاتة ف السنة



وماما امبارح قالتهالى 
و انا الدمعة تكاد تفر من عينى 
اصل نادرا لما الحاجة ام فاتيما ترضى
  عن أى حاجة بعملها
و بيبقى يوم عيد عقبال عندكم 
والواحد بيبقى عاوز يقف ف بلكونتشنا 
و يطلع الطبنجة يضربله عيارين ف الهوا
بس قولت كفاية الجو العاصف واللى عامله 
وبلاش انا





خلاص كدا ؟
لأ طبعا 


مش كل تصرف يقدم عليه المرء مننا 
بيبقاله تبعات 
يعنى دلوقتى احنا تبخنا 
مش نشوف البشرية اللى كلت دى 
على قيد الحياة و كويسين 
و لا جرالهم حاجة ؟!
ولا استعيل و أتنصل من مسئولياتى انا ؟؟!!
  






الموقف بيستلزم و يحتم عليا 
ان كل ساعتين كدا
 اعدى على ماجد اخويا ابص عليه 
واروح عند باب الاوضة 
اللى فيها ماما و خالتى واسألهم
انتم بخير يا جماعة 
واشاور بصباعى واسأل... دول كااااام 
واتاكد من ان الحواس شغالة
ومحدش عينه مزغللة
او الدنيا بتطفى ف وشه وتولع
او سامع وش ف ودانه
او فيه هلاوس سمعية وبصرية من أى نوع
وامعانا ف الدقة مفيش مانع 
امسك كف ماما واقولها شدي ايدى ناحيتك
عشان اطمن ان الأعصاب سليمة
ومفيش بوادر جلطة لا قدر الله  


 
خلاص الحصة قربت تخلص 
بس احب الفت نظركم 
مش معنى .. ان ربنا عداها على خير 
ومحدش ظهرت عليه اعراض التسمم
ف الساعات الاولى تبقى المسألة بسيطة 
ونخش ننام كدا وضميرنا مستريح 


من غير ما نحضر الآتى











حبوب مطهرة للمعدة 
و مسكنات للألم





نمرة صيدلية فاتحة 24 ساعة 
عشان طلب الأدوية السابق ذكرها 






عنوان اقرب مستشفى
فيها طوارىء ... دا لو الموكف إتطور





كارنيه العلاج بتاع النوقابة 
اللى انتوا تبعها




شنطة فيها لبس و فوطة 
و كولونيا وكلينكس 
لزوم البيات ليلتين تحت الملاحظة 
ف عنبر السموم







كتاب أدعية صغنن 
عشان تدعوا ربنا انه يمن عليكم بالشفا
وتخرجوا بالسلامة 
وكمان عشان تدعوا عليا 








نمرة المحامى بتاعكم 
عشان لو انتا او انتى اللى طابخ
هياخدوا اقوالك لما تخرج م العناية واكيد اكيد 
هتحتاج حد معاك يساعدك 
عشان متعكش ف المحضر 
اللى هيتعملك  وتتحول بيه ع النويابة
بصفتك خيطر ع الإيمن العام 
وصحة المواطشنين







وان شاء الله بعد الليلة
ما تعدى على خير 
تبقوا تفتكروا متسمعوش كلامى تانى 
و تقروا المثل اللى ف اول البوست صح
وتعرفوا انه
مش اللى ميعرفش ..يقول عدس
لأ 
اللى ميعرفش .. يطبخ ورا فاتيما عدس










وان شاء الله سليمة 
و متعملوليش فيها فافى بقى
واول مرة تخشوا مستشفيات واقسام


 





واخيراااااا 
الجدعنة تحتم عليا 
ان من دلوقتى اقولكوا 
اللى هيجراله حاجة 
فنا من بعد صفحة التعليقات وطالع 
مليييييييييييش دعوة بيه
ولا أعرفه
والبوست دا مش بتاعى 
ومش انا اللى كتباه 
دا قرينك يا زواووووى  





اقعدوا بالعافية 

بس خلاص

--------------------------




هذوها البوست
إهداء لأربع
اسخاص عزاز
 ---------------------
الأولى

 الغالية
ندى الياسمين
ست الستات وصاحبة 
اشهر مطبخ تدوينى و واقعى 
اذ انى كل ما اتزنق ف حاجة 
بجرى على مدونتها
واراجع دروسها 
وكأنى ف ثانوية عامة 
-----------------------
التانى

الغالى 
يوسف حبيبى
اللى كان بيحب 
العدس بتاعى 
واول حد داقه من إيدى 
و اول واحد قالى 
تسلم ايدك يا ماما
---------------------
التالت

الغالى 
اللى كان ف بالى 
طول الوقت وانا بطبخ  عشان
كان نفسى يدوق من العدس بتاعى 
لأنها قاعد ف حتة ما يعلم بيها الا ربنا 
البرد فيها العن من برد الكاهرة
ولو كان ينفع كنت بعت له  
 طبق بالبريد السريع
------------------------
الاخير 


يبقى مبتكر
شخصية الطباخ 
ف عرض المابيت شو 
لأنه كان طباخ مجرم بجد 
ودايما افتكره كل ما اخطشى 
عتبة أى متبخ لأنه بيفكرنى 
بواحدة صاحبتى متعرفوهااااش

-----------------------------
قلبى بيزغزغ 
روحه بروحه
علشان يمسح 
منه التكشيرة
صلاح جاهين

This entry was posted on الأحد, ديسمبر 12, 2010 and is filed under . You can leave a response and follow any responses to this entry through the .

60 كــــلام بيطــبطـــب عـــلى قــــلبى و روحــــى

أيوا بالظبط كدا

أستمري

جبتيه لنفسك

مستني بستلة عدس من عمايل ايك في أول فرصه ممكنه

ولن أتنازل ولن أتزحزح

وتحطي شطه ولون وبصل أخضر عيش فينو محمص

ويا داهيه دقي

ياعيييييييييييييييييييني علروقااااااااان
اهو هو داا التظبيط
ابعتي طبق عالطاير:)

تسلم ايدك ياجميلة

اول مره اعرف موضوع الكوركم ده

انا بستعمله في بعض الاكلات زي المقلوبه

هو مفيد جدااااااا

داده الله يرحمها كانت بتعمل للعدس توم وتحمره في سمنه فيها مستكه
ولما يدخل علي الصفار تضيفه لشوربة العدس

كمان جربي بعد مايغلي ضيفي عليه كرافس متقطع صغير

شكرا ليكي

بالهنا والشفا تسلم ايدك ياغالية
انا بعمله بنفس الطريقة وأزود شوية زنجبيل لزوم الدفء وبعمله فتة خل وتوم على وشه بدون رز وجنبه شوربة عدس يتاكل من هنا وتصبحي على خير على طول

ابنتي الحبيبه اكتب لكي الآن الساعةالثالثة والنصف صباحاًلأنني متعودةمنذ أن بدأت في قراءة مدونتك ان افتحكل صباح عليكي وانام كل مساء عليكي وادعو في كل صلاه لك ولإبنك..واحاول كل يوم ان ابعث أليكي على المدونة وافشل واقول لا ..أكيد العيب في انا واحاول تاني وتالت ورابع وبعدين الموضوع كان كل يوم بيزيد شعشعة في دماغي وكل يوم بازيد حب ليكي على البعد ولأول مرة في عمري كله اعرف الحسد وكان ابويا الله يرحمه يقول فيه نوع من الحسد محمود وهو ما يسمى بالغبطة وده ممكن يكون لمن هو افضل منك ديناً أو علماً وانا لما عرفتك من خلال حبايبك اضفت نوع تالت من الغبطة وهي غبطة اللي يعرفوا فاتيما على انهم بيعرفوا فاتيما عن قرب.. واليمين اللي فاتوا بكل ما مر فيهم من احداث خلوني يمكن اندفع شوية في الكلام في محاولة للتخفيف عنك لاللإستهانة بمشاعرك حاشالله فأنا من اكتر الناس كما قلت لكي في بداية كلامي معاكي من اكثر الناس معايشة للآخرين فكيف اكون بهذه النذالة وبالطبع لم اكن اقصد ايضاًالنيل من حبيبك ولكني اقصد انه ليس هناك بشر يستحقهذا النوع من التقديس سوى الأنبياء بالطبع..نعم نحب وننغمس في الحب ولكن ليس إلى درجة ان نأتي على انفسنا ونتركنا حطاماً..لا يوجد شيء في الدنيا لاأمل فيه الا ان يموت الإنسان ومع ذلك فلن تصدقيني ياإبنتي اني منذ ان توفي زوجي منذ حوالي سنتين وانا اتعامل مع الأحداث ومع الأشياء بتمام الثقة في اني سألتقي معه في اكرم الدارينوسأحكي له عن كل ما حدث بعد وفاته... والله والله هذا مايحدث معي أنا اشفق عليكي من كل هذا الحب ولكني اعتقد اني لو كنت انا مكانك بقلبي هذا ربما كنت فعلت ماتفعلينه الآن واكثر لكن اقول لكي شيئاًتعلمته من حياتي هناك نوع من المشاعر تبقى بداخلنا بعد الخروج من مثل هذه الحكايات لانستطيع ان نطلق عليها غير تمني الخير للآلالالالاخر الغائب او تجدي نفسك بعد زمن وقد نقشت على مقلتيك ذكرى مكان كانيحبه أو تلتفت اذنيكي الىصوت يأتي من بعييييييدلأغنية غناها لكي أومعكي في يمممموم من الأيام أو تمكثي قليلاًبجوار انسان يحمل عبير برفانه المفضل او..او..او..وصدقيني ياإبنتيلنتنتهي هذه التذكرات على طول حياتنا وتتحول مع الأيام الى (حاجة حلوة )بتنعشناوبتخلي لحياتنا معنى ان فيه حد فات من هنا واعتصر قلبه بالحب ..ثم.مضى.......
حبيبتي..انا مرضيتش اقوم انام النهارده قبل ماعتذر ليكي اذا كان فيه كلمة خرجت مني ليكي كده والا كده فلا اقصد منها سوى محاولة للتهوين عليكي وليست بأي حال محاولة للإستهانة بمشاعر انسانة نبيلة مثلك ومازلت باقول الزمن بينسي حزن وفرح ياما وصحيح باشكرك جداًانك اهتميتي بي وقريتي جواباتي رغم طولهم وكان نفسي اضفي عليكي من خلالهم جو تاني وفكرة تانية غير اللي خدتيها عني واللي كانت ردودك عليهم كلها حب وحنان لكن معلش يابنتي انا اسفة كمان مرة وعسى ان تكوني قد سامحتيني وانا على فكره زي مامتك فعلآً وليس مجازاً فأنا قد تعديت الستون مش هي برضه مرفوعة بالواو ..بس اوعي تقولي لحد.. وأظن يعني بعد الإعتراف الخطير ده اللي مفيش ست عاقلة بتعترف بيهحتسامحيني والا افضح نفسي ببلاش يعني ..يرضيكي كده طبعاًلأ.. تحياتي وحاقوم اصلي الفجر وادعيلك

السلام عليكم
بجد بجد تسلم ايدك جوعتينا فى الشتا دا ولأنه فعلا محتاج عدس خليتى الجوع يزيد
بس الاحلى من دا تميز اسلوبك
يارب تكونى فى فرح كدا على طول واللى ظاهر فى كلامك فى البوست ولو دا اللى بيفرحك خليك فى المتبخ علطووووووووووول
متنسيش تزورى مدونتى اهى تنكد عليك شوية
http://ourlife-accountant.blogspot.com/
سلامووووووووو عليكوووووووو

هههههههههههههههههه
شوربة العدس اسهل حاجة يا بطوطة
ههههههههههههههههه
كل ده علشان شوربة عدس؟؟؟؟
ههههههههههههه
و الله ضحكتيني
طيب يالله تعالى انا عازماكي على الغدا فى يوم من عمايل ايديا
و لو انى مش بعرف اطبخ يعنى..كي جي ون

ههههههههههههههه
بس اوعي تنسي تجيبي كل اللى قلتى ليه
هههههههههههههه
بوسة ليكي يا بطوطة

بالنسبه للعدس فده من الاشياء المطلوبه في الشتا فعلا .... بيدفي

وبصراحه انا مابعرفش اعمله اصلا.... فهاخد الوصفه دي وعلى مسئوليتك

بس في حد يوصف يقول كام بصله وكام فص توم ..... فين المقادير يا شيف :) ؟؟

-----------------------------------
انا قريت ردك على تعليقي اللي فات ..

بصي انا عارفه ان تحكيم العقل في القصص دي او اي شيء مرتبط بعواطفنا صعب جدااااا .... يصل لدرجه المستحيل ..

بس انا بعمل اللي عليا وانصح اي حد بكده .... وعارفه انه مش هيسمع كلامي .... ومتفهمه تماما لده ..

بس عارفه لو سمعتي كلامي .... هتدعيللي :)

وانا الحمد لله رجعت للتدوين .... الشتا جه بقا وهيبقى بيات شتوي على وهقدر اتامل واكتب بقا :)

تحياتي يا احلا تيما :)

فاتييييييييييييما
هو فعلا تبيخ ملايكة يا تيما
لانك احلى ملاك يا عيونى

تسلم ايديكِ على العدس العسول
اعتقد ان دا احلى عدس اتعمل على الاطلاق

وبعدين اخيرا لقيت حد زيي بيعتبر العدس من الطبيخ ومش سهل زى ما بيقولو
هههههههههههه
فاكرة يا فاتيما لما قلنا ان مواصفات امرأة البرج بتاعتنا مش ليها في شغل البيت والمطبخ ؟؟
اهو البوست دا فكرنى بمناقشتنا يومها وضحكنا اللى وحشنى اوى اوى معاكي

وانا علانة جدا جدا لانى مش شفتك يوم البؤجة وغيابك كان له اثر شديد على الكل بجد يا فاتيما مش تغيبي تانى عن اى لقاء يجمعنا لان وجودك بيفرق كتير اوى اوى

وبعدين انتى وحشتينى كتييييييير جدا جدا جدا
واتصرفي بقى في الموضوع دا

بكرا ان شاء الله هاجرب العدس وهاعمله بالكركم زى ما قلتي

بحبك جدا جدا جدااااااااا

ايون كدا

حلوة اوى الكلمتين بتاع صلاح جاهين

بالهناء والشفاء
فى امان الله

لا افهم فى ايه بالظبط انتم مستقصدنى ليه
هروح امبارح البيت الاقى شوربة عدس
ادخل مدونتك الاقى شوربة عدس الرحمة حلوة برضه يا جدعان والبرد قاسى والعدس مطلوب بس مش بالليل والصبح صعب يا خلق هوووووو
عامة تسلم الايادى اهو عدس عدس احسن مما فيش ههههههههه
تحياتى

بابعتلك دلوقتي بقى وأنا في حالة من الروقان النفسي اني لسه اهو قادرة اصبح عليكي على الهوا وادعيلك برضه زي ماكانت ماما الله يرحمها بتدعيلنا ربنا يحبب فيكي الرب والعبد والحصى في الأرض ويجعلك في وش الناس جوهرة وفي بق الناس سكرة يافاتيما يابنت حوا وآدم..ايه رأيك في الدعوتين اللي جولك على الصبح كده ؟
بصي بقى ياستي انا متأكدة ان 90%من ستات مصر النهارده بيعملوا عدس ودول زي حالاتي اللي عندهم المكونات كلها..أما ال10%الباقيين فدول حايعملوه بكره لأن عم شعبان البواب مش فاضي النهارده عشان يروح يجيبلهم الحاجات الناقصةوخصوصاًاذاكان العدس نفسه هو اللي مش موجود عندهم..عارفة انتي فكرتيني ..بمين بتاريخ عدى عليه سنين..ايام ماكنا بنصيف احياناًفي راس البر .. وكان احسن واحد يعمل عدس هو مطعم التابعي ..وكان كل اللي يروح هناك لازم يوصوه إنه يدوق عدس التابعي الدمياطي دلوقتي اللي حايفوت من جنبنا حا نقوله روح دوق عدس الأستاذة فاطمة.. الله يسعدك يابطوط.. ويسعد كل حبايبك بيكي.و..تحياتي

مصرى جدا
-------

هوه ايه
اللى جبته لنفسى دا ؟!!!



انا ولا أعرفففففففففك


وبعيييين عايز تدوق عدس
من عمايل ايديا وحياة عينيا
يبقى قبل ما تستلم البستلة
تمضيلى على إخلاء طرف
وتعهد بإنك مسئول
مسئولية كاملة عن أى أضرار
تترتب على ذلك


عشان لو جرالك حاجة

للمرة التانية هقولك اهو


ولا أعرفففففففففففك


ماشى؟

sony2000
--------

عونيا يا سنسن
بس طبق ايه؟

حلة بحالها يا ماما
بس معاها مطهر المعدة والمسكن
احتياطى برضو

شمس النهار
---------

ويسلمك يا شمس نهار المدونات وقمرها

الكركم دا اختراعى
وممكن كمان تحطى زعفران ميقولش لأ
اصل لون العدس مبيعجبنيش لوحده
بحسه مش مزهزه كدا وانا بحب الالوان
تبقى مبهجة ... حتى ف الاكل

سمعت عن حكاية التوم دى
بس انا لا أحبذه قوى

اما الكرفس ..فيا سلااااام
دا كفاية ريحته
وبلاش اللون والطعم


تسلم ايدك انتى يا حبيبتى

عاشــــــ النقاب ـقــــة"نونو"
------------------------------

سمعت عن الزنجبيل دا يا نونو
بس احنا مبنجيبوش
ماما مش غاويه ف الاكل
معرفش ليه
بس قيل لى ان ريحته حلوة

بألف هنا وشفا عليكى انتى
والعيال وابوهم

بعشق شوربة العدس

وكالعادة
وبكل سعادة
مكنتش فاهمة ليه بيقولوا
اللي ميعرفش يقول عدس
وتطوع ابي الفاضل وفاهمني اصل الحكاية
ومازلت بقول عدس
بس وانا عارفة

ولو عدس فاتيما
يبقي هقول تاني اهو
عدس
عدس
عدس

تسلم ايدك
مع اني مادقتش
مادقتش دي جاية من الفعل يتذوق
;0

غير معرفة
--------


يا ست الكل
الاول ازيك

هندهك بعد كدا بست الكل
لأنه مينفعش تبقى غير معرفة
ماشى؟


وحضرتك بتعتذرى على ايه؟
انتى كدا بتزعلينى قوى من نفسى
لأنى متضايقتش منك ولا حاجة



انا لو متضايقة
مكنتش كتبت رد قد البوست
و حرصت اغطى كل جزئية
عشان افهمك قصدى واشرحلك
عشان تفهمينى صح

عارفة حضرتك انتى بتفكرينى بماما
هيا نفس جيلك وتقريبا تفكيرك
هيا حكمها على تصرفاتى غالبا مختلف
وبيوجع ساعات
بس باطنه الرحمة الشديدة
انا بالنسببالها لازم انشف شوية
واخد المسألة بشكل اجمد من كده
بقالها 38 سنة معايا ومزهقتش
ومتعبتش
ومقدرتش تفهم برضو
انى كده
وان كل واحد غير التانى
وانى رغم كل اخفاقاتى
الحمدلله بخير
وقادرة اعيش
واحسن من غيرى ميت الف مرة
وان الحزن له جلال زى جاهين ما بيقول
والأعزاء لما بيرحلوا من حياتنا لأى سبب يستاهلوا ينزعل عليهم
وكون هناك من يمل من سماع انين الحزن دا او دمعة بتزعل ..فنا بعتذرلهم
لأن مش الكل قادر يتحمل
والكل فيه اللى مكفيه
والكل له اسلوبه ف تحمل الأشياء
وكل شيخ وله طريقة

وانا طريقتى جايز متعجبش ناس كتير
لكن اهى طريقتى واعمل ايه ف روحى ؟!!


نجيب محفوظ بيقولنا
اتعاملوا مع لحظات السرور
وكأنها آخر اوقات ليكم ف الدنيا
وانا بعمل كدا مع كل شىء
لما بفرح بفرح قوى
ولما احزن احزن قوى
لما اتخلى ..اتخلى قوى
لما اتمسك اتمسك قوى
الله اعلم فاضلى قد ايه
بس مظنش هيكون قد اللى راح منى
مينفعش بعد كل الوقت دا اتعامل مع الاشخاص المميزين ف حياتى ..عادى
كأنهم هيروحوا وييجى غيرهم
حتى
لو هييجى غيرهم
عارفة ان منطقى دا معيوب لناس كتير
وهيقولوا اختارى صح
بس انا نفسى كل واحد يحط نفسه مكانى بجد ..ويحكم من عيونى
وقلبى انا
مش هوه
لأنه هوه كمان ف حياته
عنده عثرات ..محدش كامل مكمل
و يمكن لو جه مكانى ..
ميقدرش يتحمل حاجات كتير ..
محدش يعرف
دى الفضيلة التى لم تختبر على رآى الله يصبحه بالخير أحمد كمال
صاحب رحايا العمر



انطباعى عن حضرتك مش وحش ولا حاجة
ومتزعليش منى لو كنت عبرت غلط ف تعليقى على تعليقك
انا محظوظة بمحبة حضرتك اللى بظهر الغيب ومكنتيش مضطرة تعلنيها حتى ولا تقوليها ولا تتعبى نفسك
وتكتبيلى أى كلام
لكن انتى عملتى كدا عشان ربنا بيحبنى اولاً
وعشان انتى انسانة قلبك كبير ثانيا

لو حد لازم يعتذر
فأنا
مش حضرتك

منحرمش من دعائك
واهتمامك
ولا من تعليقاتك


ف انتظارك دايما
يا ست الكل

مدونة رحلة حياة
---------------

وعليكم السلام


انا شاكرة ليك جدا اهتمامك
وتشجيعك
وميرسى جدا على ذوقك

وان شاء الله ارد الزيارات الكريمة دى
وان كان ع النكد
فعاتى يعنى
نكد نكد
احنا بيهمنا ؟!!

وعليكم السلاااااااااام

فاتيما حبيبتى
انتى زعلانه عشان شوية عدس
طيب ايه رايك اللى يقوم من النوم على حلة محشى ؟؟؟
هههههههههههههههه
ياريت تيجى لحد العدس

انا بعمله كدا برضوا
لازم البطاطسايه والجزارايه عشان يدوا قوام ولون جميل للعدس

تسلم ايدك يا حبى وصفه سهله وجميله
وفعلا العدس مغذى وبالذات فى الجو المتلج دا

عايزة اقولك ان بيتى غرق انبارح وبقيت اشد فى شعرى مبقتش عارفه الحقها من الميه ولا المحشى يا اوختى
ههههههههههههههه
بس الحمد لله الجو اتحسن شوى

وحشانى كتير وكان نفسى اشوفك اكتر فى البؤجه
بس المهم عندى سلامتك وراحتك

ربنا يسعد قلبك يارب

بحبك كتيررررررررررر

اولا حمد الله على السلامة وحشتينا ربي يريح قلبك دائما
تعرفي الوصفة دي مختلفة تماما عن العدس اللي بنعمله هنا عندنا مفيش لا بطاطس ولا جزر بنسلق العدس في مية مع شوية زيت وملح وبعدين نضيف عليه بعد نضجه طماطم طبيعية مطحونة معاها ملعقة او اتنتين من الطماطم المعلبة والتوابل مع بصل مفروم مع التحريك الى ان يصبح الخليط متجانس وبعد تمام نضجه يقدم ساخن وبالهنا والشفا بس من غير خلاط
شوقتيني ان اذوق الوصفة المصري ان شاء الله اجربها في يوم وكده يبقى ثأثير عدسك تجاوز الحدود المصرية وأصبح تأثير دولي ههه
دمت بكل الود يا عزيزتي

أحترت كتير قبل ما اكتب رد يا ترى هتقريه ولا هتكونى فى "أبو زعبل" بس فى الأخر توكلت على الله وقلت أكيد فى سجن النسا فيه لاب توب وأنترنت علشان الناس ترفه عن نفسها
وصفة العدس هايلة "بس معلش مش هاخاطر قصدى مش هاجربها عشان الرجيم"
وأنت بجد هايلة وكلنا معاكى بس متعمليش كده تانى :)

هههههههههههههههههههههه
بحب العدس جدا و البيت كله يعشقه ما عدا الاستاذ سيف بيحب العدس الاسود حضرتك
نفس المقادير دى بنمشى عليها دايما و بيطلع تحفه
بس الشو اللى انتى عملتيه الحكيكه فرق كتير
و يا سلام بقى لو طباخ المابيتشو هو اللى طبخ التبيخ ده يبقى فل الفل
تسلم الايادى يا جميل
و كل عدس و انت طيب يا راجل يا طيب
و بصراحه فى الجو العجيب ده مش بينفع غيره يا اوختى

تسلم الايادى يا طباختنا العزييييييييمه

والله ضحكتينى كل ده عشان شوربه عدس وشوفى مين اللى بتتكلم انا اخيب منك بكتيييييييييييييييييير لكن تصدقى برضه فالحه فى العدس وبيحبوه من ايدى كل 9 سنين كده لما ادخل المطبخ الظاهر العدس ده بتاع الخايبين ومدونتك تحفه ودمك خفيف موت

فاتيما

ايه ده كل دى وصفه للعدس انتى عارفه انى باعشق العدس الاصفر واتغذيت امبارح عدس كمان بصره هههههههههههههه

بصراحه كنت فاكره انك استاذه فى المطبخ شكلك يقول كده يا تيما هههههههههه

اقولك على سر انا بقى مبتكره اكلات واستاذة مطبخ اوعى تقولى شكلى مش باين عليه ههههههههههههههه

ربنا يهب لكى الخير والسعاده

زهراء

السلام عليكم ورحمة الله وبركاتة
اخبارك اية
مدونة جميلة بارك الله فيكى
للتذكرة بس صوم التاسع والعاشر من محرم (عاشوراء وماقبلها)1
وأما صوم يوم تاسوعاء فسببه ما في صحيح مسلم من حديث ابن عباس ـ رضي الله عنهما ـ قال: صام رسول الله صلى الله عليه وسلم يوم عاشوراء وأمر بصيامه،

قالوا يا رسول الله: إنه يوم تعظمه اليهود والنصارى فقال: إذا كان العام المقبل ـ إن شاء الله ـ صمنا اليوم التاسع. انتهى.

بحبك
قوى
قوى
قوى
قوى
قوى



ومش بحب العدس يابطتى
):
فربنا هيرحمنى من كل التجهيزات دى قبله وبعده
ههههههههه

Mafrousa
--------

يا لهوى اسهل حاجة
طب متقوليش كدا قدام ماما الله يخليكى
دنا ربنا نافخ ف صورتى بأسهل حاجة دا


وبعدين الحال من بعضه اهو

بس تعالى هنا
مبتطبخيش ازاى
طب دنا بعمل فراخ مفروسة الجميلة بتاعتك اللى عند صبرنى يا رب وبدعيلك من قلبى عشان طريقتها سهلة وسريعة واهم حاااااااااجة مفيهاش بصل يتقشر الا انا متعقدة من البصل جدااا
يبقى ازاى مبتعرفيش بقى ؟؟؟

بوسات وحضونات
واطباق عدس كتييير قوى

فتاة من الصعيد
--------------


ما قولنا برج الميزان العقلانى اللى بيدور على الطريق المباشر ويخلص مينفعش مع العالم اللى زى حالاتى !!

وانا دبعيلك من غير حاجة يا فاتى


اما المقادير يا شيف فدى انا سيباها حسب مزاج كل واحد
يعنى اللى غاوى الشوربة تبقى سميكة يزود ف البطاطس
اللى عاوز لونها يبقى برتقانى اكتر يزود ف الجزر ..كدا
بس مبدئباً اربع واحايد من كل حاجة يبقى كويس وميقولش لأ


خالص حبى يا اجمل اهل الصعيد

reem
-----

ازيك يا ريم
واعمليه وقوليلى
متحكميش الا بعد ما علاء يصحى تانى يوم كويس وفاكر اسمه وبيشتغل ايه
قبل كدا لأ

ومتأكليش البنات
الا تانى يوم للأتمئنان يعنى



ومالها امراءة برج الثور بقى ؟!!!
دحنا فلة وشمعة منورة


وبينى وبينك
ومحدش اهو بيقرى ولا حاجة
اصل التبيخ دا نَفَس
زى ما بيقولوا
ولازم الواحد يعمله وهوه مبسوط
وانا بدخل المتبخ متضررة بصراحة
ومبحبش القصة بتاعة التبخ دى
من زمااان
فبالتالى نَفَسى ويحيش ف الاكل



ونظرا لأن دايما
الليلة تقلب بغم
مغص او كرشة نفس
او التبيخ يترمى عشان منظره مش هوا
او يتحرق ويشيط
او ميتهوبش ناحيته خالص
من اساسه نظرا لأنى سوابق ف التبيخ
ونظرا لأنى مش عايزة
اسمعلى كلمتين ف جنابى والأفلام دى فبجيب من الآخر
والتزم مطرحى
ومدخلش المتبخ خالص
عشان صحة الشعب
و امن الوطن والمواطنين اللى عايشين معايا ف بيت واحد دول


بس انتى كدا قلقتينى !!!!


طب لما تعمليه ابقى طمنينى
يعنى تعليق كدا من كلمتين
احنا بخير
عشان اطمن
ان مفيش حاجة



بوسات وحضونات
يا رقيقة الرقيقات

sal
---

بالهنا والشفا على قلبك انتا
يا سال
يا غال

همس الاحباب
---------

نعم يا خويا
مش عاجبك العدس ؟!!!

نعمة دى ولا هتتبطروا بقى

وبعدين الدنيا سقعة
والست المصرية الصميمة من اقصى الخريطة ف عموم الجمهورية وكل انحاء الوطن هتلاقيها توحدت مع غيرها وفجأة كله يقرر يعمل عدس

زى ما ف العيد الصغير لازم يعملوا رقاق
وف العيد الكبير فتة
و هكذا

مش عجبك ليه
بوظولنا الفلكلور بقى
والعبوا فى العادات والتكاليد


بالهنا والشفا
يا غالى


بوسلى ببش وهموسة
وتحياتى لمامتهم
وخال ودى ليك يا اغلى اخ
و

غير معرف
-------

اولا قبل أى حاجة

ممكن حضرتك تختارى أسم حركى
ادندهك بيه
ليكن اللهو الخفى
او واحدة مكسلة تنقى اسم
أو واحدة مش عايزة تقولك اسمها
كدا

عشان بس اعرف اتكلم بثقة
معاكى

حضرتك ست الكل ..مش كدا ؟!

طيب

عموما

اتمنى بعد الوصفة سهلة بتاعتى دى يكون اليوم عدى على خير
واما اروح هشوف صفحة الوفيات زادات عن المعدل بتاع كل يوم ولا إيه
وكمان صفحة الحوادث عشان حالات التسمم الجماعى وكدا



خالص ودى ليكى

sally
-----


بألف هنا يا لولى


وبعدين متجريش واستنى هنا

تعالى اكتبى تانى
ليه اللى مبيعرفش ..يقول عدس
احكى للناس الحلوة هنا
عشان يستفيدوا


انا كنت فاكرة ان اللى مبيعرفش ..انواع الأكل وشايف شوربة ولونها اصفر فتبقى عدس ..بما انهدى اسهل حاجة تيجى على باله

وكمان كنت فاهمة ان اللى مبيعرفش ..يقول عدس اذ انه ارخص اكله واللى معلوماته ضحلة ف أى حاجة ..بينقى اتفه شىء ويقوله ...كدا


طلعت القصة حاجة تالتة
فإتفضلى ادلى بدلوك يا هانم
وقولى ..بابا الغالى قالك ايه


وحلو عدس فاتيما دا
وقعه حلو على ودانى

وعاوزة اقولك ان اللى بيتذوق
عدس فاتيما
مبيلحقش يقول
عدس
عدس
عدس
دى

عشان بيبقى واخد منوم
ف الرعاية
وسايبينه يرتاح شوية
من أثر الصدمة
بعيد عنك


بوسات وحضونات
يا شقاوة

الحب الجميل
---------

حلة محشى ياللهوووووول

كدا ف وشى تخبطينى بالمعلومة دى
محشى يا مفترية
محشى وتعرفينى ؟!!!


انا مليش غير ف ورق العنب
وكل عشر سنين مرة بقى
احنا لسه هنقعد نعمل خلطة ونحشى ونرص ويكون الواحد نفسه اتسدت
يا لهوى دنا تعبت وانا بفتكر المراحل
تخيلى الواحد لسه هيعملها
قطشع التبيييييييخ وسنينه


انا كمان كان نفسى اشوفك
بس معلش مفيش نصيب
الحمدلله انكم انبستطوا
وعقبال كل مرة
بس اكون موجودة ان شاء الله


انا كمان بحبك كتيررررررر
بوسيلى لولو

واحضنلى روحك

يا حب
يا جميل

خواطر شابة
----------

الله يسلم عمرك يا خطورتى


الوصفة بتاعتكم دى هيا الوصفة بتاعت الامهات والجدات ..بس احنا بنعمله من غير صلصة وبنحط عليه شعرية


واعمليها وقوليلى رآيك
بس لو جرالك حاجة
انا قايلة اهو وبكل ندالة
ولا
اعرفكو


بوسات وحضونات
يا ارق اهل المغرب الطيب

الحسينى
-----


ليه بس الفال الحلو دا

هوه تأريخاً بس لواقع الحال احب اقول لسيادتك إن مفيش ف منطشقة أبو زعبل
سجن للحريمات
الستات بيتجمعوا برابطة المعلم كدا ف سجن القناطر و بس
عشان الطراوة بقى
والهوا هناك يرد الروح


وبلا تفولوا علينا


خايفين على عمركو
متطبخوش


ولو طبختشوا
متكلوش وخلاص
هه


نورتنى يا فندم
واهلا بيك

صيدلانية طالعة نازلة
------------------


ازيك يا لولاّ


تسلميلى انتى

وطبعا لازم اعملهم شووو
هوه دخلوى المطبخ بالساهل كدا
لازم يبقى يوم عيد

فاكرة الطباخ دا صحيح
كان مجرم حرررررررب بجد
بيعمل بلاوى
وشغال برضو مبيمشيش
لاّ الفراخ اللى كان بيحطها ف الحلة صاحية دى ...كوم تاااااااانى
دلوقتى آل لازم ندبحها ونشيل ريشها وننضفها ونسويها وشغلانة كدا ملهاش آخر ...هيييييه دنيا


كل سنة وانتى طيبة
وكل شتا والعيال وابوهم
وانتى بألف خير
يا رب

shimaa samir
------------

انتى كمان يا مشموشتى

وحشتينى

ووحشتنى دعواتك انتى كمان

خلى بالك من نفسك
ومن عصفورك الطيب

ممكن ؟

bombona
-------

انتى كماااااان !؟؟

طيب اهلا يا دفعة
تبقى حاسة بكل كلمة انكتبشت ف البوست
وهتقدرى التضحيات اللى انعملت

مدونتى دمها خفيف ؟!!!
بتهرجى
اول مرة اسمع الوصف دا عن مدونتى


انتى متأكدة انك معملتيش العدس بتاعى
وبتكتبى رآيك بعد اول طبق ؟!!

لولا وزهراء
----------

مهو يا زوزا الأم والزوجة والفتاة المصرية شكل واحد ف عموم القطر المصرى
وبيفكروا ف اول ما يلاقوا الدنيا تلج كدا ...ان الغدا يبقى عدس خلاص

فرمان نسوى ومبيتكسرش


انا استاذة ف الطبخ
امااااال البوست دا ايه ؟؟
مش تبيخ ولا مش تبيخ ؟!!!


منحرمشى منك
يا ذات الوجه المشرق

طهر فؤداك
---------

جزاك الله خيراً
واهلا بيك

عاشقة الرومانسية
----------------

وانا كمان يا دودو


قوى
قوى
قوى
قوى
قوى


وواحدة قوى كمان
عشان ازود عليكى

:)


وماله العدس يا بت
دا عدس فاتيما
اللى عليه القيمة
مرة اتبوخه واكلك منه
هتغيرى رآيك ان شاء الله
بس ربنا يدينى الصحة وطولة العمر
وان الله مع الصابرين



كل سنة وانتى طيبة يا حبيبتى
وقطتى
وعروسة بحورى اناااااا

الاستاذ اللى تعليقه مش للنشر
---------------------------

طيب انا روحت شرحت
واتمنى يكون المرة دى واضح


مفتقدة تعليقاتك
ويا رب تكون بخير
قدر الأمكان يعنى

الأستاذ رقم (2) اللى تعليقه موش للنشر برضو
-----------------------------------

طيب ..يا طيب
انا بخير متقلقش وتتخض
ايش حال ما كنت شايف بقلبك وعارف اللى فيها ...انا اللى هقولك ؟!!

متقلقش عليا
انا بخير
الحمدلله

متغبش كتير علينا
مش عاوزة تعليقاتك تفضل موش للنشر كتير ...ماشى؟

طيييييييييب

سلام

السلام عليكم

ازيك يا ام يوسف

يارب تكوني بكل الخير

بقول إيه بقي انا عايز طبق عدس

تصدقي بقي

ده مشروع يجنن في الشتا


اعملي عدس وبيعيه تحت البيت

ومكن معاه حلبسه وبليله باللبن

وام علي بقي والذي منه

عليا النعمه تكسبي دهب

D:

علي فكره طريقه العدس ديه

والدتي غالبا بتعمل وصفه شبه وصفتك قوي مع بعض الاختلافات

بس بيطلع حتة عدس يا خرابي دمار دمار دمار ماقولكيش يعني

:)

الحمد لله بقي إننا إطمنا عليكي

إنك هديتي شويه

ربنا يطمنا عليكي دايما

ونسمع عنك كل خير يارب

دمتي بكل خير

ومستني طبقي العدس برضه

:))

تحياتي

الاول ازيك يا طمطم
كان نفسى اشاركك التبيخ الجميل دا
بس جاتلى صدمه لما لاقيته عدس ( استغفر الله العظيم) طبعا هو محترم جدا بس مش بيحبنى خالص
ثانيا انا كمان ماليش فى موضوع التبيخ والمطبخ والحاجات دى
بس فى نوايا كتيره انى اتعلم واحبه ان شاء الله
واخيرا كل سنه وانتى طيبه معلشى عدت كل المناسبات
بس عاشوراء بكره مناسبه جميله

القلب الأخضراني  

حبيبتي.. من هنا ورايح بقالي اسم عندك وان شاء الله اتمنى ان يلاقي استحساناً من جميع من يقرأ مدونتك وانا اعلم انهم كثر..حبيبتي.. انا عشان خاطر عيونك انتي بالذات وعشان اقدر اتواصل معاكي قررت أن اعلم نفسي بنفسي وكانت المحاولة الأولى وعملت لي موقع على الفيسبوك.. وكانت بداية اصراري على الوصول.. وبلأمس فقط تمكنت من عمل مدونة لي وكنتي انتي من اول من كتبت لهم لأبشرهم بذلك.. ولكني من كتر فرحتي ارسلت لكي تعليق تمهيدي وقلت لك انا حاكمل لكي بعد ماآجي من التأمين الصحي ولكن يبدو انك اعتدتي اني انسان بيستهيف وبالتالي خدتيها من قصيرها ومانشرتيش التعليق وبالأماره كان مذيل بإسم( القلب الأخضراني)وهو دهبقى الإسم اللي اخترته لمدونتي وارجو ان تكوني من أول من يشاركني بتعليقاته في هذه المدونة المتواضعةوكما كتبت في تقدمتها هي مازالت تحت التشطيب وقريباً قد انقل إلى مدونة اوسع بفضل تشجيعكم لي .. وطبعاً مش حاوصيكي عليا وعموماًادي اللينك بتاعها:http://zeinabsadekragab.plogspot.comمع خالص تحياتي وشكري وتمنياتي لك بكل الخيرفي جميع خطواتك.















































9

مجبر اخاك لابطل

بصي يا ستي
علي ما اعتقد انا

ان اللي ميعرفش في الاكل
يسيب كل انواعه
ويقول "عدس"
ال يعني هيجرب الاختيار الامثل

هههههههههههههههه
طب والله حلو زي ما انت قلت كدة انا صحيح مش بحبه اووي بس انا ولله الحمد ست بيت ........فاشلة جدا
اي نعم بعرف طبخ بس علي ادي ادي كمان
بس والله يا فاتميا لا اجربه زي ما انت قلت كدة بالظبط بس بعد دور البرد اللي عندي ده يروح الا البرد ده مشكلة بجد واكيد مش هينفع اكل عدس وانا عندي برد
وحشاني يا فاتيما اووي اووي
وعايزة ابوسك كتيييير بس خايفة عليك م البرد
تسلميلي يا رب وتسلمي للكل ويارب يخليك لنا وما يحرمنا من سؤالك ولا طلتك علينا

السلام عليكم

ام يوسف الجدعة
واقول زى سال
فا تي ما

ازيك
انا الحمد لله بخير ونعمة وفضل
بجد انا اول ما فتحت المدونة
ولقيت الناس باعتلي بجد فرحت وقلت فيكم الخير ودة العشم منكم
انتو بجد احلي صحبة واحلي ناس حتي لو بينا كيبورد وشاشات واميال يربطها السلك

ملقيتش فيها فايدة
الدنيا هكذا لازم نتعب ونتعذب في حاجات ولازم نواجه لما فكرت قلت وبعدين هابطل كتابة عشان حاجات اساسا لو وزانها برحمة ربنا لا تساوى شىء
الحمد لله اني في كتابة تخلي الواحد يعبر
الحمد لله ان في بلوجر
الحمد لله انكم موجوديين بقلوبكم الدهب
الحمد لله اننا كلنا بخير

طولت عليكي

تحياتي

z!zOoOo
-------

ازيك يا زيزو

يا فندم الحلة كلها
بالهنا والشفا

بس على مسئوليتك السخصية
ومليش دعوة بأى توابع
ماشى؟؟


عدس وابيعه تحت البيت

فكرتنى بالنجرسكو بتاع ونيس
:)


لأ يا عم
كده تهمة التسمم تثبت عليا رسمى
مليش دعوة
كل واحد يطبخه ف بيته
وياكل على ضمانته السخصية



الحمدلله انا بخير
جدا
ومنحرمشى من سؤالك
ولا اهتمامك


بجد

انا فرحانة بتعليقاتك
وودك الصافى دا

تحياتى انا اكتر

بسنت
----

ازيك انتى يا بسنتو
يا ارق دكتورة شافتها عينى

خلاص خلاص
ما دام العدس مأزمك كدا
بلاها وندلق الحلة م البلكونة


اانما التبيخ
دا شر ولابد منه
ولازم تتعلميه للطوارىء


كل سنة وانتى طيبة
يا حبيبتى
ونورتينى

القلب الاخضرانى
--------------

أولاً
ازى حضرتك



ثانياً
مبروك ع المدونة
الف مبروك




ثالثاً
اللينك مش بيفتح معايا
حضرتك المرة الجاية
ادخلى بحسابك
وانا هدوس على اسمك
واوصلك ان شاء الله



رابعا
لو محتاجة أى حاجة
ف تنسيق المدونة
تحت امرك


خامساً
تعليق حضرتك اللى قولتى عليه
لم يصلنى أصلاً
والبلوجر ساعات بيمسح تعليقات
او يمكن حضرتك مبعتيهوش صح
.. يمكن؟


سادساً
هوه انا ليه حاسة ان حضرتك
كتبتى التعليق بتاعك
وانتى متضايقة ومتعصبة ؟!!!


سابعا
شكرا ع الدعاء
وعلى الأهتمام
وعلى كل حاجة


ثامناً
الأسم اللى اخترتيه
جميل جدااااااااا


تاسعا
لأ خلاص
مفيش تاسعا ولا حاجة

sally
------

مجبرة دا ايه والنبى ؟
دنا اتذليت يا عبده عقبال ما سيادتك تعطفتى وتلطفتى وتكرمتى وقررتى تعلقى تانى
هتعملى غلبانة هنا ..

(تخيلى واحدة حاطةايدها ف وسطهاوبتقول)
يا سلااااااااااام
ع الحونية
ماشى ماشى

موشكرينلك يا ست ع الشرح
وصحيح فعلاً
اللى معلوماته ف انواع الاكل محدودة
يقول ..عدس


بوسات وحضونات
يا شقاوة

re7ab.sale7
-----------


انتى كمان يا رحوبة وحشتينىىىىىى
وسلامتك م البرد يا حبيبتى
معلش

لما يخلص ابقى جربى الوصفة

اهو تغيير عن العدس التقليدى برضو
وان شاء الله يعجب البيت كله

بس لا مانع تاخدى الإستحياطات اللازمة محدش ضامن !!!


وبعدسين متخافيش
انا موافقة اخد برد
لو كان هييجى بعد بوساتك وحضوناتك
يا ستى

ماشى ؟

Haytham Alsayes
---------------


ازيك انتا يا صاحب الفردوس
والحمدلله انك بخير دلوقتى

بص كلنا بنمر بدا
فترات الم وحزن وحالة من انعدام الرغبة فى أى كلام او فعل أو حتى أى امل

بس بتعدى الفترة دى برحمة ربنا
وكونك رجعت لقتنا
فدا الطبيعى
انا كمان لما بتعب بلاقى قلوبكم حضنانى ...الناس لبعضيها
لازم كدا


و انتا غالى على قلوب كثر يا هيثم
ومش بجاملك
بجد
انتا من قلائل الناس
اللى زعلت قوى لما عدى يوم اسكندرية وملحقتش اقعد معاهم مدة كافية واتكلم معاهم كتير
بس ملحوقة يا جدع يا طيب وتتعوض ان شاء الله قريب
خلى بالك انتا من نفسك
وان شاء الله تفرج

الغالى اللى طلب عدم نشر تعليقه
-----------------------------


اى حاجة هنا تحت امرك
من غير ما تقول
ولا تطلب
ولا تسأل

وطبعا مش هزعل
انتا اكيد عارف
حد بيزعل من اخوه ؟!!

:)

أيــــام
--------

ميرسى يا أيام على كل كلامك الحلو
ليتنى استحقه

وان شاء الله الأيام يا أيام
بيننا وتجمعنا
متعرفيش بكرة فيه ايه؟


اسمك حلو قوى
ومميز
رغم انه يبدو عادى
بس لأ ..مش عادى


انتى التعليق رقم (60) يا ست
مش 101 ولا حاجة


:)


ف انتظارك اى وقت

خالص ودى وحبى ليكى

إرسال تعليق