.

.

مـنـصـــــــورة ... بإذن اللـــــــه  

Posted by: فاتيما in


تحــــــــــدييييييييث
ازيكم ازيكم 
يللى احنا جايين عنكم 
يا جماعة خلاص بكرة إن شاء الله
السفر للمنصورة الجميلة
انا عارفة ان المعاد كان مفاجىء 
لناس كتير وكانت ارتبطت بمواعيد تانية
او بشغل  او مش نافع تيجى لأى سبب
فمعلشى .. تتعوض 
الجودة بالموجود وباللى رايحين  مننا 
من هنا وهناك
لحد دلوقتى ابو حميد هوه الوحيد اللى 
واخد بحسى وقال جاى .. 100%
وهانى مصرى جدا 
خالد همس الاحباب هيحاول قدر الامكان 
ولسه فيه غالية بتشاور ظروفها :)
اللى ناوى يسافر تانى .. يبعتلى ع الأيميل 
عشان منسيحش ع البلوجر 
هنستنى فين والساعة كام وكدا  ..ماشى؟
واهو نسافر صحبة 
بدل ما كل واحد يسّوح فردانى
ايميلى اهو 
modynoty@gmail.com
اشوفكم على الف خير بكرة
وكل وقت 
كل سنة وانتوا طيبين
 




----------------------------------------


 تحــــــــــدييييييييث
---------------------------

اللى جــــــاى لازم يختار 
ويسيب تعليق هـــــــناك
ف التكعــــيبة

-------------------------------------------------------------------------


لقاء موازى ف الخير للتبرع لحالة
عاجلة ... ربنا يشفيها 
والتفاصيل كلها عند 

---------------------


الاول العواااااااااف عليكم 
وازيكم  وهل بت منتو بخير 
قولوا ايوه وخلصونى عشان نخلص الديباجة 
ونخش ع المفيد



كله يطلع ورقة وقلم و يسطر صفحة بلوجه
و يتملى الآتى
التاريخ ع الشمال فوووووق 
الجمعة
31/12/2010
ف نص السطر اللى بعده 
المنصورة بإذن الله 
وتحتها عشر خطوط يا عياااال 


الصورة بعدسة  ليساندرا 

الدعوة جاية من عمدة التدوين 
ف المنصورة ستات الستات صباصيبو 
المعروفة تدوينياً ب "ندى الياسمين"
عبير الياسمين وعطره 
بتعزمنا بالآصالة عن نفسها وبالنويابة 
عن كل مدونى المنصورة الكرام 
اننا نيجى حداهم 




ما هى الأهداف الرئيسية من هذوها الزيارة ؟
اكتبوا على على جنب
الأهدااااااااااف 
وتحتها خط 



(1) 
التبرع لدار ايتام فيها ولاد 
والتبرع لدار تانية فيها بنات 
الطلبات كلها هتلاقوها ف التكعيبة 
 
بس نقول تانى و ميضرش 
الولاد 
عاوزين هدوم شتوى 
عدد الولاد 11 ولد بس
البنات 
عاوزين خزين أكل يعنى
جبنة - مربى - حلاوة - لانشون - حبنة نستو 
بيض(لو فلوسه ماشى )
وفيه منهم بنات على وش جواز 
وبيجهزوا فلى يقدر يساعد سواء بفلوس 
او هدوم أو حاجات بيت .. يعنى
يبقى كتر خيره قوى   
وان كنت ارجح رأى ندى الياسمين 
ان الحاجة العينية احسن من الفلوس 
ضمانة لوصولها ليهم اسرع و افضل 


(2) 
تقضية باقى اليوم 
بعد تسليم الحاجة  فى مكان 
فيه قعدة لطيفة و فطير مشلتت 
وجو ريفى مميز ..  ان شاء الله



(3)
لأ خلاص كدا هنروح بقى 
عشان اللى عاوز يعيثو فسادا 
ليلة راس السنة
يلحق مكانه تحت الشجرة وكدهون






واستنوا لما أرغى معاكو شوية 
أصل آخر مرة اختكم كانت 
المنصورة كان لقاء تحففففففة  بجد
ولما قريت البوست تانى ... دوس هنا
قلبى رفرف كدا واتباشرت خير 
وبناء عليه اكتبوا على جنب راس عنوان 
ملاحظااااااات هامة 
وتحتها إيه ؟
سطر برافو عليكو مصحصحين اهو 







(1) 
اليوم بدايته خير 
وان شاء الله يخلص على خير 
القلة المندسة اللى جاية ناوية تقرفنا 
انا على آخرررررى منهم 
اللى جاى فاكر المفروض نسليه 
ونزغزغه و نضحكه ونعمل ارجواز
فدى مش شغلتنا والأفضل ...ميجييش
واللى جاى فاكر هيضبط حد...
معندناش حاجة كدا و الأفضل ...ميجييش 
واللى جاى فاكر هيتطاول ويقل ادبه 
واحنا هنسكتله مثلا مش هيحصل 
والأفضل ... مييجيش
 احنا مجموعة من البشر لينا افكارنا
ودماغاتنا المختلفة صحيح 
بس بنتجمع على الخير وبس 
اللى هيعكنن علينا 
ملوش مكان وسطنا 
و بعدين عشان انا سخصيا 
عاوزة الحق  حتى أرخم على حد 
قبل السنة دى ما تخلص ومش لاقية 
فالقلة المندسة تبعد عن وشى
عشان انا ما هصدق بصراحة 
ماشى؟؟

طيييييييييب 




(2) 
من قبل ما أروح وارجع 
لازم من اولها ومن تاريخه 
اوجه عمييييك الشكر ولو انها مش مستنياه 
لعطر الياسمين و عبيره
ندى الياسمين 
اللى عندها دايما اصرار تلمنا ف الخير
موشكرين يا صبصب








(3) 
الصحبة الحلوة اللى بسافر دايما معاها
محدش فيهم يقول لأ  و ظروفى
واخص بالذكر الشوباب الطيب 
ضياء بيتوفل مايند ومصطفى ريان
وفيدووووووو .. انتى جاية 
ومش هقول
خالد يا همس الأحباب 
عشان انتا طبيعى واساسى وتلقائى 
جاى جاى غصب عنك
لأنه مفيش لقاء تدوينى من غيرك ..دا اولا 
و لأنك لو مروحتش اومى مش هتخرجنى
من باب بيتنا أصلااااا ..دا ثانياً 




(4)
الاسامى الجميلة اللى كانت 
مالية سطور البوست القديم 
هل اطمع فى حضورهم تانى ؟
يا وليد كنج توت ويا هبة بوبو ..ممكن؟
خيخة يا ريت تيجى يا بت
وانتى يا ميرا و انتا  يا عسقول 
عمرو يا أن نوون .. لسه فاكرنا ؟!!
و طبعا هانى مصرى ..انتا جاااااى يا خويا
عشان مين هيطلعنا م القسم ؟؟!!








(6)
العالم الجميلة اللى اتعرفنا عليهم 
بعد البوست القديم  ..سكان القاهرة يعنى
واللى ماشاء الله عددهم يفرح
مش هقول الاسامى دى عايزة بوست لوحدها
ومش هقعد اقول 
النبى تيجوا و إحياتى و القصص دى 
انتوا مش محتاجين عزومة 
هه 








(6)
فريق المنصورة بقى
استاذنا عبد الجليل ..بتمنى اشوف حضرتك 
وايمان سما مصر تعالى اليوم من اوله 
ويا سكرة عارفة ظروفك بس فرحانة 
انك بخير والحمدلله 
ومش هتكلم عن باقى الناس 
وهسيب صبرنى عليهم تتصرف معاهم
بصفتها العمدة مش هتعدى الإختساسات 






(7)
العالم اللى جاية 
من باكى المحافظات
اهلا بيهم وينورنا 
ويا ريت يسيبوا تعليقات مين جاى 
عشان نشجع بعضيشنا






(8)
آه ...استنوا هنا 
ايه نظام الأكل ؟!!!
عشان معانا عالم تاكل عيالها  ؟
طب انا مليش ف الفطير 
و مش مسألة مبحبوش 
انشالله ما اوعى بحبه طبعا
بس معرفش اكله وسط جمعون غفيرون
عشان انا بحب اكله بمزااااج  و زروطة
ومبحبش حد يبصلى والعسل ينقط ع الهدوم 
فطمنينا يا صبصب 
فيه اختيارات اخرى متاحة 
ولاّ الفطير سؤال إجبارى ومادة نجاح وسقوط ؟





(9) 
أى تفاصيل تستجد 
ان شاء الله هعمل بيها تحديث 
والبوست قاعد اهو على قلبكو 
لحد يوم السفر
عشان محدش يقولى ..اهيييه
هيوه كان فيه سفرية للمنصورة 
ومتقولوليش يا وحشين ؟؟
هارشة الحركات دى انا ومتكلش معايا 






يلا منتظرة التعليقات 
والتأكيدات 
واجابات الإستفسارات 










ملحوظة هااااااااااااااااااااامة  بقى 


اللى مش جاى 
ومعندوش سبب قهرى لعدم الحضور
ملوش عندى غير زغرة 
الاخ سوكومونس 






بس خلايص






اشوفكم على خير 
يا احلى ناس وصحبة وعالم






بوستات صديقة 
---------------- 

This entry was posted on الخميس, ديسمبر 30, 2010 and is filed under . You can leave a response and follow any responses to this entry through the .

55 كــــلام بيطــبطـــب عـــلى قــــلبى و روحــــى

السلام عليكم
ازيك ياتوما
انا كنت معدي قولت ارمي السلام
انا فرحت لما لقيت في لقاء للمنصورة بحسبه الجمعة الجاية ماتخليها الجاية وخلاص
عشان انا في المنصورة من 7 صباحا بس الجمعة الجاية لكن اللي بعدها لا اظن انا
عموما ربنا يوفقوا للخير دايما ويكون يوم مميز
سلاماتي ليوسف

متجمعين فى الخير دايما ان شاء الله

كالعادة .. الندالة ليها أثر عليا
بصي يا ستي ، جوز اختي لسه جاي من
السفر ، واول زيارة هيكون عندنا يوم
الجمعة .. وهوا هيسافر قريب ..
فلو محضرتش معاه .. هتعتبر بتقاليد المنصورية " قلة ذوق " .
طبعا فيه سبب تاني .. أنا بقالي 3 شهور مقضتش من المعهد .. يعني من أول ما اشتغلت عشان اجي لازم استلف .. دا دا طبعا علي أساس إني جاي فاضي ..واللقاء اصله التجمع للخير .. قبل الحضور عشان المدونين . فدا يعني هستلف مرتين لو حبيت أجي .
أنا عارف إن حججي خصلت من زمان يا فاتيما .. بس استحليني إنتي والمدونين .. ورغم إنك مش دقهلوية . قاهرية .. فأنا هتعبك معايا .. وأبلغك تبلغي السلام وهحاول أتصل بيكم أغلس عليكم شوية .. كالعادة :)
تحياتي ليكم .. وأتمني إن فيه حد غلس يجي .. عشان تديه بونتين في عينه .
سلامتي ليكي وسنة سعيدة جديدة مجيدة وأي حاجة في ده في النهاية .. عليكي

نفسى أجىىىىىىىىى

هحاول والله أظبط أمورى وأجى وممكن أجيب حد معايا عشان اتأخر براحتى

نيييييييييييياها
ضوحكة شريرة

وبالنسبة لموضوع الأكل انا برضة بسأل نفس السؤال مفيش أختيارات تانية طيب واللى زى حالاتى ومالوش فى الأكل أصلا ومش عايز ياكل خالص يعمل ايه
هههههههه

امممممممم
ربنا يسهل الامور
ان شاء الله يكون يوم جميل بيكم
تحياتى

هتنورا بجد المنصورة واتمنى حقيقى انه يكون يوم فى جمال اللقاء اللى فات كنت اول مره اقابل ناس جميلة كتير لايف :)
حقيقي بجد يوم مايتنيسش ونأمل ان شاء الله ان الجاى يكون كده

فى انتظاركم

ان شاء الله يكون لقاء ناجح وجميل

وتنبسطوا كلكم

:))

ايه يا خويا البلطجه دي؟؟؟؟؟؟؟؟؟؟؟

بس بجد فطستيني من الضحك

عموما

لسا بدري جدا

وبعدين هعيث في الأرض فسادا أزاي وأنا مش نايم كويس!!!!!!!








(.........................)


كلام كتير أوي

بس مش عارف أقوله

ياااااااااااااه
والله العظيم كلكوا وحشنا
تنورا المنصورة
وفى انتظاركم بأذن الله

لا لا لا لا لا لا لا لا لا

انا احتج

مدونات كتير كاتبة عن اللقاء المنصورى

واللقاءات اللى فاتت

ولو قدرت ببقى اسلم عليكى فون


المهم يبقى اليوم جميل ان شاء الله
ويديكم على قد نيتكم فى الخير
وسلامى لكل اللى هيحوا

:)

السلام عليكم
ازيك يااستاذه فاتيما
يارب تكونى بخير
ودايما متجمعين فى الخير ان شاء الله انا اسفه عشان قولتلك المره اللى فاتت التعليق مش لنشر بس انا كنت خايفه انه يكون فى حاجه مش تعجبك فيه
بس طبعا مدام عجب حضرتك انشريه
يارب دايما تنورى مدونتك الجميله
خالص احترامى وحبى لكى
صفا حسن

يارب يوسف يرجع ليكى ياروحى


قلب وجعنى بجد
رحمتك بعبادك المظلومين يااااااااااااااااااااارب

اعااااااااااااااا
انا مش هاجي
بأولاامر العليا
الالده والوالد باشا
امروا
اني مش هروح
يبقي مش هروح
بس
وكان نفسي اكون معاااااااااااااكو
اعاااااااا:((

بصى بئه ياأم يويو
انا مقهووووووووووووووره قهره سواد
اه قوليلى ليه
عشان انا منتظره لقاء المنصوره ده بقالى سنه وتيجوا تعملوه الجمعه وخطيبى بيجيلى الجمعه
انا من المحله الكبرى يعنى قريبه من المنصوره ومنتظره اليوم ده بفارغ صبر وانتم كده ببساطه تضيعوه منى
لالالالالالالالالالالالالالالالالا
مستحيل
بعيط من كل قلبى
طيب قولوا الجمعه الا فى السنه الجديده يكون سافر
قولوا الخميس
السبت
الاحد
الاتنين
التلات
الاربع
انما الجمعه ويوم 31
لالالالالالالالالالالالالالالالالالالالالالا
مقهوره بجد
ايه الحظ ده

ازيك يافاتيما

ربنا يقدرك علي فعل الخير دايما
وتتجمعوا في الخير دايما

تحياتي ليكي

فاتيما حياااااااااتي

انشاله يخليكى ليا يارب

ايه الكلام الجميل ده يا توته


بالنسبه لموضوع الاكل حاضر عنيا هاكتب لكم المينو النهارده وانزله هنا وهناك وفى كل مكان صحرا ان كان او بستانه :)

وهيه هاشوفك ان شاء الله هيه هيه

المينو اهي يا فاتيما

اولا انا نزلتها عندي فى بوست منفصل

http://ndaelyasmeen.blogspot.com/2010/12/blog-post_27.html

وبرضه قلت اجبهالك هنا احتمال حد يكسل يركب تاكسي لمدونتي :)

قائمة كافيه بامبو

سندوتشات
كفته بانيه – هامبورجر – هوت دوج- فراخ بانيه سوبر بريمو-فاهيتا مكسيكى- فراخ فرايداي – شيش طاووق – كبده اسكندراني
كل السندوتشات دي تقريبا فى حدود عشره جنيه الواحد


حواوشي بامبو 5.5


____________________

اطباق سريعه
مكرونه فتوتشينى == 18 جنيه
مكرونه بلوينز == 7.5
مكرونه بالسي فود === 35
مكرونه بالجمبري === 25
مكرونه بشاميل === مش مكتوب 

فتة سوري فراخ ===35

فته موزه بالخل والتوم ===35
نصف فرخه مشويه مع ارز بالخلطه ===30
طبق خضار مشكل ====7
____

ثم نأتي للمطبخ الفلاحي

معمر
طواجن خضار فى الفرن
فته بالكوارع
ممبار
( ايه ده احنا راحين مسمط ولا ايه نيهاهاهاهاها )

فطير مشلتت فلاحي ( جبنه قديمه + جبنه قريش + عسل + قشطه + بيض ) 35 جنيه

الشيف الى هناك قالي الفطيره ممكن تكفي فردين ... وبرضه مش عارفه من ضمن تمنها الحاجات الى بتنزل معاها دي ولا ايه ... مكسله اسأل بقى بلاش رخامه 

فى اصناف كتيره متكوبه فى المينو بس مش عليها اسعار فمش عارفه اساسا هى بتتقدم ولا ايه

المهم كفايه عليكم كده مش هاتنهبوا بقى 

اه وفى قايمه كريبات كامله كمان بس برضه مش عارفه اسعارها
فى العموما المكان اسعاره معقوله اوي

فى قايمةعصاير
وقايمه حلويات ... ام علي كريم كراميل فروت سلات ايس كريم الى الخ الخ الخ

وفى مشروبات طبعا بقى ساخنه وبارده ابقوا عيشوا بقى

ياريت كل حد جميل ناوي يجى اللقاء يقولي هياكل ايه او يستحسن ذلك بدل ما يفضل باصص لنا فى اللقمه وكده واحنا بناكل

وطبعا الى مش عايز يتغدى برضه براحته عااااتي

المهم تقلولي قبل يوم الخميس عشان ابلغهم فى الكافيه

واشوفكم على خير ان شاء الله يومها

يا وهو كتبت هنا تعليق يا فاتيما بالمينو بس مش عارفه وصل ولا لا النت فصل وانا بانشره

عموما لو مش وصل قايمة الطعام اهو عندي

http://ndaelyasmeen.blogspot.com/2010/12/blog-post_27.html

انت تامر يا جميل

حلو اوى اللقاء دا يا بختكم انا من محافظه بعيده شويتين

http://www.youtube.com/watch?v=pQc3eUWMYBo&feature=related


مكنتش هناك .. هشام الجخ
حسيت انه لايق عليكى قوى

Mano
----


ازيك يا مانوووو
عاش من قرى تعليقك يا شاب يا طيب
كان بودى تكون معانا

احنا دايما حظنا معاك كدا
ليه؟
معرفش !!!

المهم انك بخير
وتعليقك بيطمنا شوية

خالص ودى وكل سنة وانتا طيب





الطائر الحزين
------------

موشكرين يا إيهاب
بس يعنى مفيش فرصة نشوفك ؟
هتكون جنبنا ولا المشوار بعيد؟
ف كل الاحوال
حسك معانا برضو
وشكرا على التشجيعالذى لا يكل
ولا يمل ابدا
:)





عاشقة الرومانسية
----------------

ايه الجمل الرسمية دى
تتمنى لى السعادة
!!!

طب منا عارفة يا بت
هوه من امتى انتى لا تتمنى لى السعادة
دا غصب عنك
هيوه عروسة البحر ينفع لا تتمنى السعادة
لقلب البحر ؟!!!
تيجى ازاى يعنى ؟



ميرسى ع القصيدة
انا حطتيها فوووق
من كتر ما لمستنى
بجد

خلى بالك من نفسك
يا قطتى الحلوة
بوسات وحضونات
بعدد موج البحر اللى انتى عروسته

MR.PRESIDENT
-----------

يا عم خلااااص
لا تقولى ولا أقولك
يا بخت من كان النايب عمه
:)

متقولش حاجة يا بسام
وان شاء الله تقوم بالواجب
وتلحق تيجى تشوفنا لو فضل وقت
ولو مقدرتش خالص
معلش
تتعوض ان شاء الله

كل سنة وانتا بألف خير
يا من يحمل قلبه
نصيب كبييير من اسمه

bos bos بسمه عبدالباسط
----------------------

يا ريييييييت يا بسبوستى

يلا شدى حيلك وان شاء الله تقدرى
هنستناكى يا حبيبتى


صبصب قالت على قايمة الاكل
وفيها ما لذ وطاب
نقى واختارى بقى

اشوفك على ألف خير يا حبيبتى
سلامى لماما الغالية

:)

خالد همس الاحباب
--------------

لأ
من غير امممممممممم دى
انتا تحديدا متقولش امممممممم
مش منقولة من مطرحشى من غيرك
إتصرف
آل أمممممممممممم آل

ربنا يسهل
و تبقى اولنا كالعادة
يا أبو هموسة وببش

:)

رحيل
-----

المنصورة منورة بأهلها يا سارة
وكل الناس الحلوة بتوع المرات اللى فاتت


بس المرة دى احلى
ان شاء الله
عارفة ليه؟
عشان هنشوفك
ويكون معاكى حبيب قلبك
يعنى فرحة مضاعفة اهو


ان شاء الله يبقى يوم حلو
وربنا يجعل كل ايامك حلوة يا حبيبتى

شمس النهار
---------


اللقاء هيبقى حلو لسببين

1- الناس الحلوة اللى بتحضر
2- الناس الحلوة اللى مبتحضرش وبتشارك من بعيد و بتدعيلنا ف التعليقات وتتمنى لنا الخير

:))))))))

مصرى جدا
--------

بلطجة ؟!!!!

انتا لسه شوفت حاجة
دنا بلوة سوخة
دنا بقفل بلاد بشوارعها
اومال انا بقولك تيجى تلطعنا م القسم ليه؟؟؟
عشان الرعب اللى هعمله



اللى بين قوسين دا ايه؟؟
طب لما اشوفك
تعترفلى واحنا بننصص ف سندوتشات المية الساقعة ...ماشى؟


اشوفك على ألف خير يومها
يا سنيور

Darsh Basha
-----------


ميرسى يا مصطفى
يا جماعة كرمكم وترحيبكم سابقنا
ومخلينى فرحانة من قبل ما اروح
اومال لما نيجى عندكو هتعملوا ايه؟؟؟


كلك ذوق يا مصطفى
اشوفك ان شاء الله
على ألف خير

:)

star in the sky
---------------

ايه ؟

احتجاج ؟!!!

وقفة احتجاجية يعنى ؟
ليه بس عملنا ايه؟

غيرانين مننا
اعملوا زينا
وتعالواااااااا
وعرفتوش تيجوا
بلاش حكد دحنا غلاااااااابة والنبى

ان شاء الله تيجى المرات الجاية

وسلامك وصل يا نجومة
من قبل اليوم ما ييجى

:))

صفا حسن
-------


ازيك انتى يا صفا

انا بخير يا حبيبتى
و تعليقاتك كلها حاجات حلوة وخير
ايه يزعلنى بس ربنا ما يجيب زعل ولا حاجة


هوه ينفع تيجى اللقاء دا
لو كنتى قريبة او ظروفك تسمح ؟؟
انا بعزم اهو عشان لو مكسوفة ..متنكسفيش خالص واهلا بيكى
آه حاجة كمان ...
هتعملى مدونة امتى بقى ؟؟!!


خالص ودى ليكى
وميرسى على سؤالك الدايم

غير معرفة
وبخمن ..القلب الاخضرانى
وانا وحظى
---------------------

ميرسى لحضرتك ع الدعوة الطيبة
وانا بخير
متتخضيش كدا

:)

sony2000
--------


عااااااااااااا على العاااااااااااااااا بتاعتك

ليه بس كدا ؟

طب مفيش امل فى تغيير رأى الكيادة السوياسية لحد يوم الجيمعه ؟؟

حاولى تانى يا بنتى
و اديها زن بناتى .. لعل وعسى

انا كمان نفسى تكونى معانا
بجد

:)

داليـ ـ ـ ـ ـ ـ ــــا
---------------------

سلامتك م القهرة يا داليا


طب خطيبك نظامه ايه؟
عارف مدونتك وكدا ؟

طب لو عارف ما تجيبيه وتيجى
ولاّ ممنوع الخروجات الخطيبية باوامر عائلية؟؟؟

لو الخروج مسموح بيه
يعنى اعرضى عليه الأمر
اذ ربما يوافق
والحظ يسعدنا ونشوفك

جربى كدا
اللقا نصيب يا حبيبتى

لو محصلش المرة دى
هينكتب ف وقت تانى اكيد


وبلاش قهرة
وسودا كمان
يا خرااااشى
الف بعد الشر عليكى


:)

Haytham Alsayes
---------------


ازيك انتا يا صاحب الفردوس
وفين الخير دا انا معملتش حاجة البركة فى ندى الياسمين ودعوتها الطيبة


حاول تيجى
معرفش المسافة بعيدة ولاّ قريبة عليك

بس لو تقدر تيجى
تعاااالى يا جدع بدل ما تقضى راس السنة لوحدك اهو ناخد بحس بعض

ماشى؟

طواايب


:)

ندى الياسمين
-----------


يا صبصب
انتى تؤمرى
وانا ورااااك يا زعيم علطوووول

انا عملت تحديث
والدور والباقى ع العيال يجولك وكل واحد يقول هياكل ايه ولو اننا انفوضحنا ع الهوا كدا وامة لا اله الا الله هتبصلنا ف السنكوتشات وانا نجمى خفيييييف و هزور واكح ..
بس لو حصصصصل فعلاااا
اللى هيحصل وز وز
هرجع اطلعه عليهم ف البوست بط بط
انا بحنذرهم اهو

يبصولنا بعين رضية
ميبصوش للسنكوتشات اللى ف ايديا

هه



انا كمان فرحانة والله
انى هشوفك وانى جاية بلدكم الطيبة
الجمييييييلة دى ...


اشوفك على الف خير
يوم الجمعة
يا ست الستات

:)

اعقل مجنونة
----------

شويتين لحد فين طيب ؟

طب من غير ما اعرف
كان بودى تيجى

وربنا يسهل ونعمل لقاء قريب من محافظتك
وساعتها تقدر تحضرى اول واحدة
ان شاء الله

:)

أزيك يا فاتيما (:

ربنا يخليكى لينا

كان نفس أجى يا فاتيما بجد بس الظروف المرة دى أقوى منى

أن شاء الله هاخد أجازة طويلة شوية كدة و ربنا يسهل يكون فيها يوم خير برضة نتجمع فيه

كل سنة و انتِ طيبة

و السنة اللى جاية يحقق لك عكس الأمانى اللى فى مدونة نط فى الكوز (:

ربنا معاكى يا غالية و يوفقك

جزاكم الله خيرا وربنا يوفقكم جميعا

والدال على الخير كفاعله

هحاول بكل طاقتى لانى فعلا نفسى اشوفكم واغير جو

ربنا يسهل إن شاء الله

السلام عليكم
يارب دايما بخير يااستاذه فاتيما
وانا الحمد لله بخير
انا بشكرك اوووى على دعوتك الجميله عشان اللقاء بس الظروف هتمنعنى انا بتمنى طبعا اكون معاكم فى يوم جميل زى دا ويارب دايما متجمعين فى الخير ياارب
انا نفسى اووى اعمل مدونه وياريت يجى اليوم دا بس مش عارفه هيكون امتى
انا عاوزاه اقول لحضرتك كل سنه وانتى طيبه ويارب 2011 تكون سنه سعيده عليكى وتحققى كل اللى بتحلمى بيه ويارب دايما اشوفك سعيده و بخير

خالص تحياتى لكى

صفا حسن

ان شاء الله يكون يوم جميل بوجودكم
و بكرم اهل المنصورة

طيب أنا عاوزة أسلم على ناس زي أخواتي قابلتهم في يوم، ممكن:)

لكن همشي يا فاتيما لأن محدش عارفني ومش هحب أحس إني غريبة بجد:)

وكمان، مش هقدر أشترك في شيء يومها للأسف:) ممش هعرف اعمل حسابي خالص:)

لكن عاوزة أسلم عليكي وعلى الناس ، وأمشي تاني.عاوزة أرحب بيكي واسلم عليكي بجد، ولو قابلت الناس من جديد أسلم عليهم، ممكن:)


الله يكرمك يارب:)


هتتجمعوا الساعة كام:)

هسلم وأمشي بإذن الله:)

Ramy
----

ازيك انتا يا ر ر

كل سنة وانتا طيب يا فندم
ومعلش انا عارفة ظروفك
وربنا يعينك
ان شاء الله التجمع الجاى تكون معانا
وحاضر اول واحد

انتا قريت عند هانى ؟!!!
اعمل ايه مهو اللى حتى وهيوه بيكتب بوست حلو بيعاكسنا
نعاكسه احنا كمان
اشمعنى بقىىىىىى !!!


كل الود ليك يا ر ر
وان شاء الله السنة الجديدة
تهل عليك
وملاكك ف حضن قلبك مبيخرجش منه
ولا بالطبل البلدى ى ى ى

:)

كلمات من نور
------------

دايما كدا زى اسمك يا كلمات
منورة وتعليقك حلو زيك

ميرسى يا حبيبتى
عقبال ما تشساركينا بحضورك
زائد الدعوات الحلوة دى

إن شاء الله

:)

bos bos بسمه عبدالباسط
---------------------

يا ريت يا بسبوستى
يا مسسسسسسهل

:)

صفا حسن
-------

وعليكم السلام يا صفا

ان شاء الله ييجى اليوم
اللى تعملى مدونة
واليوم اللى تحضرى معانا فيه

انا كمان
بتمنالك سنة سعيدة
والعمر كله يا رب

:)

قوس قزح
-------

ان شاء الله يا وش الخير

كلامك بيقول انك مش هتقدرى تيجى
انا فاهمة صح؟


عارفة انك اكيد ارتبطتى بمعاد مع حموزة والعيال ...

معلش تتعوض
ودعواااااتك يا وش الخير

:)


كل سنة وانتى واحمد والعيال بخير
وكل احبابك يا رب

ممكن اطلب منك طلب ؟

ممكن تسلميلى على حماتك الغالية
اصلها هفت على قلبى وبالى من كام يوم معرفش ليه ..بس حبيت بمناسبة تعليقك ابعتلها السلام ...

ممكن؟

طيب

:)

بوسات وحضونات يا الوان السما السبعة

sammasr
-------


يا لهوى كل دى ممكنات يا إيمان

طبعا يا حبيبتى
ممكن
وممكن
وممكن كل حاجة

تعالى وقت ما يعجبك
ومش لازم تكونى عاملة حسابك وتجيبى حاجة معاكى ..تعالى خدى بحسنا وكترينا
وسلمى على اخواتك


ودى نمرة صبرنى بتاعة التجمعات
وهتكون مفتوحة اكيد من بدرى
عشان تكلمينا تشوفينا فين

اهى

0126379796

اشوفك بكرة على الف خير
إن شاء الله

:))))

فاتيما يقول...


تيما انا زعلانه من نفسى جدا
من ساعه ماقريت تعليقك دا لانى كنت لسه فى عندى شويه زعل منك ومن ساعه ماقريت كلامك اللى مفعوله مفعول الكلور مطهر ومنظف للبقع والاوساخ والجراثيم وانا زعلانه لانى من الناس اللى لازم تقدر اووووووى دا لانى متاكده انك من جواكى انسانه غير
ارجدوكى تقبلى اعتذارى واسفى انى زعلت منك ولو حبه لانى مش قادره اسامح نفسى


الصوره مريهان بردو قالتلى فيها منك ياماما هههههههه

واضح انك انت وصحبتك متفقين

ومافيش بعد اختيارك لكلام نجم يا تيما

انت كمان وحشتينى اوووووووووووووى
ودا اللى زعلنى والله كان نفسى اشوفك يا ام قلب بفته بيضاء
ربنا يهديلك الحال يارب ويطمنا عليكى
وياريت تسمحينى وتقوليلى سامحتك يابت يا مارو

سلام مخصوص من الحاج وبوسات من حبايبك منه وميرو
وحضن بفعصه تترقع الضهر منى
يارب سنه سعيده وكلها هنا عليكى وعلى ماما وماجب وحبيب الروح يوسف



الرد دا انا منزله اخو عندى وجبتهولك علشان اتاكد انك شوفتيه
وعايزكى تنزليه علشان الكل يشوفه

مممممم الواحد بس يبدأ الكلام و يقول اية :)
أنا عارف اني مقصر معاكي و ومع ناس كتير جدا , بس معلش , اعذروني , مش عايز حد يكون زعلان مني ,أنا حياتي ملخبطة بقالها فترة كبيرة و عمالين نضرب في بعض
بقالي فترة مش بعدي على حد و مش قاري مدوناتكم بقالي كتير جدا .. أتمنى انكم تقضوا يوم جميل و ربنا يقدركوا على فعل الخير دايما

richardCatheart
---------------

يا قطاقيطــ♥ــو
يا حبيبة فاتيما جدا جدا

مكنتش ناوية انشر التعليق
بس بناء على طلبك
اتنشر اهو
بس مكنش له لزوم خالص وحياة يوسف
لأنى انا اللى غلطانة ف حقك
وليكى كل الحق انك تزعلى منى
وانا مشرحتش اسبابى ...
انا اللى بعتذرلك
وبقولك سامحينى
لأن الغلط مكنش مقصود
وعدم مجييى كانله اسبابه

يا حبيبتى احنا بنتلم
ونتجمع فى الخير والود
وان شاء الله هنفضل كدا علطول
ومفيش حاجة تعكر دا ابداااااااا
مهما حصل


بوسات وحضونات وفعصات
كثييييييييييييرات

amr...
-------

يا خراااااااااااااشى يا عمرو
لازم اكتبلك نوداء انسانى يعنى عشان الاقى اسمك ف صفحة التعليقات ؟!!!

طواااايب
ليك عليا كل بوست
اكتب اسمك بقى



كدا نهون عليك متسألش علينا
كل المدة دى ؟!؟
دا مكنش عيش
وملح
وشكولاتة كورونا يا جدع ...!!!



انا سخصياً مسامحة ف حقى
وعذراك
بس متخدهاش حلوانة ف سلوانة بقى
وتروح وتقول ..عدولى ى ى ى


ان شاء الله الانشغالات
تخلص على خير
وتروق و نشوفك من تانى

طبعا كان نفسى تيجى
بس معلش
المرة الجاية


اما المرة دى
ملكش عندى
غير زغرة سى الأستاذ سوكومونس


و :)

يعني هو انا يوم ما آجي أسلم .. ألاقيكي خرجتي وسايبة المدونة وهتسافري؟

يا مراكبى
--------

يا نبع الحكمة
مجييك على عينى
انتا عارف انى بستنى تعليقك
ولو على فترات

كل سنة وانتا طيب
وبألف خير انتا والحكومة والولاد
والوالد الغالى


وبعدين متقلقش
دى فركة كعب لحد المنصورة وراجعة
بإذن الله
انا قايمة البس اهو
وانزل
ان شاء الله
السفرية الجاية تكون ف مصر
وتكتب تعليق بصيغة تانية
وليكن
متتآخريش يا فاتيما انا عارف انك بتيجى بدرى
وبعدين إبتسامة

:)


كل سنة وانتا طيب
يا نبع حكمتى

وشد القلوع يا مرااااكبى
ليها ف يوم رجوع
يا مرااااكبى

ان شاء الله

إرسال تعليق