.

.

لـيـلـــــة عـــــــ ♥☆♫♥☺♥♫★♥ ـــيـــد  

Posted by: فاتيما in



من قبل المنبه ما يرن كنت صاحية 
وبفتح المدونة والأيميل اشوف آخر الاخبار 
تعليق لطيف م المراكبى 
وايميل من حفيدة عرابى بتقول متقدرش تيجى
احباط خفيف بس اكمل 
لبس واستعد واحضر الحاجة كلها 
واجرى حديث سريع مع ماما ف المطبخ




على باب الشقة ابص ف موبايلى 
الاقى اتصال من دودو عاشقة الرومانسية 
على ما اوصل رمسيس تكون بتكلمنى 
تصبح وتطمن وابتدى بيها يومى الحلو 



وبعد لحظات الاقى ابو حميد جاى 
خالد ع الموبايل بيقول خمس دقايق
اكون عندكم
وبعد شوية نكون كلنا ف ميكروباص 
متجه لعبود عشان نركب ميكروباص 
آخر للمنصورة 



السكة هادية وبلا منغصات 
بس الجو شوية شمس
وشويتين غيوم تنذر بأمطار 
ابو حميد جايب شمسية يابانية 
هدية من صديق تحسباً 
ولحسن الحظ لم نستخدمها 



نوصل المنصورة الجميلة فى سلاسة
وعند دار الأياتم بتاعت البنات نقف 
نستنى صبرنى يا رب 
 ندى الياسمين حاليا
تليفونات واتصالات وحديث متبادل
لحد ما صبرنى توصل
هيا والأستاذ رضا زوجها العزيز
العربية بتاعتهم مليانة خيرات للولاد والبنات



إيهاب الطائر الحزين يهل من بعيد
و نمشى كلنا  لحد مسجد عباد الرحمن 
عشان صلاة الجمعة 



بعد الصلاة نروح ع الدار الخاصة بالبنات 
وفريق من الشباب يروح دار الولاد
عشان يسلمهم السخان اللى كانوا عاوزينه
المشرفة ف دار الأيتام تستلم الحاجة
وتقيدها ف الدفتر وتنده للبنات المخطوبات
عشان ياخدوا بنفسهم حاجاتهم
يحصل موقف عجيب صبصب تحكيه
احسن منى ..بس انتهى على خير



العرايس يتلموا حوالين صبرنى 
وتتفق معاهم على زيارة تانية 
عشان عروسة فيهم فرحها بعد اسبوعين 
وناقصها شوية حاجات


بنات المدونات يسلموا ع العروسة
ويتمنولها السعادة
إيمان سمامصر تلحقنا على باب الدار
وتسلم بحفاوة وخجل شديد كالعادة 
وتستأذن عشان وراها سفر 


 نتجمع كلنا مؤنث ومذكر 
عشان نروح المكان اللى هنكمل فيه يومنا 
نتوزع ع العربيات والمواصلات 
وبعد دقايق نكون ف (البامبو)


البــــامــبـــو
مكان جميل وهادى و فيه سحر الطبيعة 
مكان وسط أرض زراعية وفيه كل مفرداتها
الاماكن عاملة زى الناس 
ليها روح  و طلة
مكان تلاقيه كئيب و رخم 
 شيك بس بارد  و مش مريح
ومكان تلاقيه دافى وبيحضنك 
وعاوز تقعد فيه ومتخرجش لأنك حاسس بالونس
والمكان اللى روحناه كان كدا 


رغم برودة الجو ...كنا قاعدين على راحتنا 
ناس استمتعت بركوب الخيل 
وناس قعدت ف المطعم تحكى وترغى 
وكالعادة بتنتظر الاكل على ما يخلص
وناس روحت زى حروف عشان مشوارها طويل 



الوقت بيعدى بسرعة ونتكلم شوية
أمجد خطيب سارة رحيل يتحفنا 
ببعض قصايده العامية وبعده كمان 
نسمع خاطرة للطائر الحزين
 و صبرنى تدى فكرة عن مدونة ليالى مصرية 
و بعدها  كله يستعد للرحيل
لأن الوقت أزف 
سلامات من الجميع بحرارة
صبرنى توصلنا لحد باب التاكسى 
ومحمد متولى يوصى علينا السواق 
وف دقيقيتن نكون بنسلم على إيهاب 
وبنركب الميكروباص على القاهرة 
عشان يخلص اليوم الجميل ..على خير
والحمدلله جدا جدا جدا 



كالعادة 
أحباب معرفوش ييجوا لكن 
بيسألوا بالموبايلات
reem
star in the sky
عبده الرايق 
 الجواز وسنينه
أحمد سكر 
ضياء بيتوفل مايند 
داليا قوس قزح وش الخير
إيمان - الحب الجميل 



واكيد ناس اتكلمت ف موبايلات الآخرين 
فيعذرونى لأنى مش كاتبة اساميهم




وكالعاااااااااادة 
حصيلة التبرعات وصلت لحوالى 2000 جنيه 
اتصرف جزء على ما سيأتى ذكره 
(1)
السخان 
وكمان يوم او اتنين بالكتير هيروح محمد 
بوكيه ورد يتأكد من تركيبه
(2)
أطقم ملايات - كوفرتات -بطانيتن
فوط - اطقم كوبات ..للعرايس 
(3)
بقالة تشمل لانشون - جبنة شيدر
جبنة بيضا - جبنة نستو - مربى 
حلاوة - زتون ...برضو لدار البنات 
وتبقى حوالى 1100 جنيه هيتجاب بيهم 
 بلوفرات وخزين للولاد 
و حاجات البنات طلبوها ضرورية




قايمة الحضور 
--------------
خالد - همس الأحباب 
أبو حميد 
الطائر الحزين  - راجى عفو الله
حروووف
ميادة قاف ميم - ايامنا الحلوة
إبراهيم العدوى
دعاء سلطان  - مجرد حلم
محمد متولى -بوكيه ورد 
سارة رحيل - محاولات للبحث عنى 
أمجد - خطيبها العزيز 
الاء - ما زال البحث جارى 
أسماء - الحياة حفلة تنكرية
أخت إسماء 
مصطفى - فك زنقة 
إيمان - سما مصر 
محمد الغرباوى - رحلة البحث 
ليساندرا - ع الهامش
عبدالحميد احمد - مدونة الحياة


ولو نسيت حد يا جماعة معلشى ى ى
العتب ع البرد والإنفلونزااااا 



ملحوسااااااااات عامة 



ميادة ايامنا الحلوة حرصت تحضر وتسلم 
علينا وفرحت قوى لما شوفتها 


خالد كان مزنوق جامد ف الشغل
وافصح عن ذلك ف التعليقات والإيميلات 
بس انا قولتله ف آخر أيميل بيننا
انه كان بودى اعمل مؤدبة 
واقولك متشغلش بالك و شغلك وبتاع 
لكن انا ندلة و مش هقول عشان لازم تيجى 
والحمدلله ..لم يخذلنى


أبو حميد صحبته طيبة وممتعة 
و مكنش فاطر فإتعذب م الجوع وعذبنا سلف 
لما طلب الغدا وإتآخر عليه  هوه وخالد 
و الفراخ بتاعتهم كانت هربانة الظاهر 
وبيجيبوها من على حدود ليبيا 
وسؤال يطرح نفسه بقى 
هيوه احنا أى مطعم فى أى بلد نروحها
عددنا كتير ولاّ معقول ولا قليل 
يسوحونا ليه عقبال ما يخلصوا الطلبات ؟!!
شكلنا بيقول جوعوهم 
مش فاهمة أنا ؟!!




صبرنى يا رب اللهى يكرمها يا رب 
كانت عاملة كيكة الشكلاتة الطعمة
بتاعتها لولاد الدارين 
واحنا معاهم والكيكة سدت جوعنا 
لحين وصول الاكل والباقى روحت بيه 
وبقووووول من دلوقتى 
لو حد ف بيتنا كل م الكيكة و جراله حاجة  
هحملكم المسئونية كاملتتتتن




الطائر الحزين كان فرحة اللقاء 
وليا انا شخصياً وانا بكتب اسمه 
ف النوتة بتاعتى 
لأنى مبكتش اسمه كتيييير 
بس حضوره كان مؤثر واظن الكل هيشاركنى انطباعى ويؤكده ..لأن سيماهم على الوجوه
وعقبال ما تونسنا كل مرة يا إيهاب 
وحاضر ..حاضر .. حاضر




دعاء مجرد حلم شخصية لطيفة قوى 
ركبت الحصان وتقمصت سخصية صلاح الدين 
وعملت أحلى شغل ورفعت راسنا 
فى ميدان الفروسية 
وكانت حريصة تتعرف ع الناس كلها بالاسم والمدونة
وصديقتها الاء ..متتخييرش عنها ف الرقة 
واسم مدونتها غريب قوى 
ما زال البحث جارى عن ايه ومين طيب ؟
مردتش
:)






سارة رحيل حضنها كان كله صدق 
وترحيب وهيا بتسلم عليا 
انا بحس بالحكاية دى أصلى 
وحسيت انى وحشاها بجد ومش بتجاملنى
لما قالتها ف حضنى ...انتوا نورتونا 
أمجد خطيبها شخصية طيبة قوى
القلة المندسة اللى هما المتجوزين يعنى
(خالد وابو حميد ) 
حاولوا يأثروا عليه ويقولوا انطباعات 
غير حكيكية ع الجواز ... بس احنا الأغلبية
الحريم يعنى (صبرنى وانا )غلوشنا عليهم 
قدر الامكان وشطبنا اقوالهم من مضبطة القعدة

والجواز سيد قراره
وبالمناسبة قراره احلى قرار
وربنا يسعده مع رحيل الجميلة
بجد من الثنائيات القليلة اللى شوفتهم 
وكانوا لاقيين قوى على بعض 
أمجد كمان شاعر  عامية كبير 
قال كام قصيدة مرعبة واحنا قاعدين 
كنا قلقانين لنقضى بعدهم الهابى نيو يير 
ف البوكس ..بس ربنا ستر
:)




حروووف 
المرة دى مش هكتب اسمك بس 
وهكتب انك وحشتينى 
وان مجييك رغم انك ملحقتيش تقعدى ولا تاخدى نفسك ..كان حركة شياكة كبيرة منك
وان شكلك كان مرهق و تعبان 
واكيد السفر ست ساعات والتنقل متعب 
بس انتى كنتى اجمل من انك تفوتى الحدث
ومتكونيش معانا ...كل الحب ليكى 
:)


ابراهيم العدوى شخصية ظريفة قوى 
و بيفكرنى بماجد اخويا قوى 
:)




محمد متولى بوكيه ورد كمان 
حد خدوم قوى وذوق ...اصر يوصل حروف 
ويركبها م الموقف واستنى لحد ما ركبت
واتأخر ع الغدا بتاعه واكله بارد 
وكمان وصلنا لحد التاكسى وشيعنا بالتمنيات الطيبة 
كل لقاء تدوينى بلاقى حد كدا 
ربنا موقفه للبشر التانية ف الخير 
تلاقيه حابب يساعد ويشيل هم الآخرين
م الآخر حد جدع وشهم 
والمرة دى ..كان محمد ..رجل المباراة
زى ما بيقولوا
:)



مصطفى فك زنقة هادى وساكت قوى 
وحبيت انكشه ... معرفتش 
إيه ياخواتى الشوباب الهادى الأخلاق دا ؟
:)



محمد الغرباوى كان شكله متضايق 
ومش ف المود وعنده اسبابه 
بس لو مكنتش جيت يا محمد 
...كنت هفتقدك جدااااااا
و شكرا بجد ...على غلاوتنا عندك 
:)




ليساندرا كالعادة شيك وكلها ذوق
واحمد عبدالحميد ...بورسعيدى اصيل
وكنا هنشتبك ف حديث كروى 
ونقوم نولع ف الزراعات حوالينا 
لكن ربنا ستر 
:)




ايمان سما مصر ..كالعادة خجولة وطيبة
وبتبعت سلامها ليكى يا (ام شريف )خيخة 
وليكى كمان يا (ام عمر) دوبا 
سامعين يا ستات 
أدينى وصلت السلام اهو عشان متوصية
:)



كان فيه معيز ف المنطقشة 
اكمنها من الديكور الفلاح وكدا 
داخلين نسلم عليهم بسلامة نية 
لاقينا كلبين رابضين ف سلم فوقيهم كدا 
وشكلهم حلو قوى وطبعا رحبوا بينا 
إيما ترحاب وخلونا نمشى من قصادهم 
مش خوف ولا حااااااااجة ..ابتتتتن 
دحنا محبيناش نقلق راحة المعيز بس ونخضها
اكمن وشهم كان ساكت كدا وعيونهم فيها حزن
والواحد كان لو وقف كمان خمس دقايق 
كان هيكتب فيهم شعر
:)






أه ... شويكار بتقول وانا معاها
انا واحدة ست 
انا عندى برد 
وصوتى كان مغشلق وبالعة تلات ضفادع 
ومتهيألى أغلب الناس مكنتش 
مميزة نص كلامى ..بس بشياكة
كانوا بيهزوا راسهم آل يعنى فاهمين 
فيعذورنى ع العطل الصحى والفنى 
بس بصراحة اليوم كان مهم جدا عندى 
وحمدت ربنا ان البرد خف عليا
عشان اقدر آجى 






وهذا ينقلنى للجزئية الهااااااااامة
ف هذوهاالبوست ألا وهى 
صبرنى يا رب 
صاحبة اليوم الجميل بكل ما فيه 
بداية من الفكرة والسؤال ف الدار ولاد وبنات
وشرا الخزين والتدوير وتنقية حاجات العرايس
وعمايل الكيك و الإهتمام بكل التفاصيل
بينما احنا جايين ضيوف وجدا بنتدلع
فيه كام لمحة كدا سمعتهاو منها النهاردة 
متطلعش غير من ام حنونة بجد 
لما ناس قالتلها تأجل اليوم لمعاد تانى
عشان الدنيا برد والجو وحش 
فقالت دا سبب أدعى اننا نييجى 
و نجيب السخان للولاد
اللى عددهم 19 ولد
وبيستخدموا سخان واحد لأن التانى متعطل 
وكمان قالتلى على خطتها لشرا بلوفرات للولاد 
والخزين و خلافه 
وبتتكلم وكأنها بتجيب لعيالها
وكلها حماس رغم سخافات مدير دار الولاد ف البدايات ..لكن الاصرار والرغبة ف عمل الخير 
لمتنا معاها دى .. ف يوم زى دا 
..ليها معانى كتير 
بجد يا صبصب ..انتى انسانة جميلة 







والاستاذ رضا ..شخصية محترمة 
و زوج كدا بيفكرنى بحسين رياض 
عماد حمدى ..الرجالة الكومل دول 
بتاع افلام زمان
اللى محدش بيشوفوهم الا فيما ندر
ربنا يسعدكم يا صبرنى  يا رب
ويقعدلك كل الخير ف ولادك يا رب
:)



إيمان الحب الجميل حرصت تتصل
وتطمن علينا ف الرجوع 
 يومهم عدى كويس 
صحيح العدد مكنش كتير ..بس قضيت 
والحمدلله
 :)



اللى لسه عنده امكانية يتبرع يا جماعة 
يكلم صبرنى وميتآخرش 
لأن واضح ان دار الولاد محدش بيتبرعلها كتير
منعرفش ليه ودى حاجة غريبة شوية 
:(



ضياء بيتوفل مايند كان صوته تعبان 
بسبب البرد بس فرحت قوى بمكالمته
وكالعادة بسؤاله عنى وكأنى اخته الصغيرة
مش الكبيرة ..ربنا ما يحرمنى منك
يا بيتوفل مايند وهارت 
:)






داليا قوس قزح 
مركبة كامرااااا سورية للمراكبة 
آه 
اصل كنا لسه بنقول دوللى مجتش 
عشان تاكل الفطير اللى صبرنى اختارت
المطرح الحلو دا مخصوص عشان بيعملوه
راحت داليا متكلمة ف ذات اللحظة 
عشان تسلم علينا وتقول ازيكم 
القلوب عند بعضيها يا وش الخير 
ولو مجتيش كنتى سبب ف قعدتنا 
ف المطرح الجميل 
شوفتى بقى انتى وش خير علطول ازاى ؟
:)



كان نفسى بسكوتة تجيى كالعادة 
بس منفعش للأسف
 ولو ان النية نت موجودة
المرة الجاية يا حبيبتى 
ان شاء الله 
:)




ريم عندها برد رهيب وباين على صوتها 
بس بعتت السلام للجميع 
وسلامتك يا رقيقة الرقيقات
:)






تم الإتفااااك مع دودو عاشقة الرومانسية 
ان السفرية الجاية هتكون 
اسكنكرية الماريا فى اول شهر مارس 
وعليكم خير 
أما اقرب لقاء تدوينى  
فهيكون معرض الكتاب بإذن الله
:)








star in the sky
لطيفة قوى وكانت متحمسة وبتتكلم 
بكل ود وفرحة ف الموبايل 
انا اتشرفت يا نجومة 
:)




أنا إتشرفت بيكم كلكم النهاردة 
وبجد ... اليوم فرق معايا جدااااااااا
من اول ما تم الإعلان عنه وانا مصرة أروحه 
عشان يوم زى دا ..السنة بتخلص فيه 
عادة بيكون يوم دمه تقيل على قلبى 
صحيح كشف حسابى الحمدلله جميل وخير 
والحمدلله عليه الف مرة 
لكن منكرش انى بفتقد فيه 
اقرب الناس لقلبى
أكتر أشخاص بحتاج اقضى
الليلة دى ف حضنهم
ودا مبيحصلش ..بس معلش 
لأنى النهاردة وبفضلكم كنت ف بلد تانية 
مع ناس بحبها جدا وبتستقبلنى بكل الحب 
وبنفرح ناس تالتة غريبة عنا منعرفهموش 
واليوم يعدى فى صحبة كلها خير 
من اول دقيقة فتحت فيها عينى 
لحد ما هطفى الجهاز وأنام ..إن شاء الله 








عقبال كل مرة 
وكل سنة وانتوا بألف خير يا عيااااااااال 
بحبكم 
يا احلى صحبة وناس وعالم
و قولى يا ست الحزن والجمااااال 
وغنى

ليلة عيد
ليلة عيييد 
الليلة ليلة عيييييد
تييييييييرااااا را رااااا



----------------------------------


يوووه قبل ما أنسى 
الصورة الرئيسية للبوست اهداء للباشمهندس
أبو حميد من وحى راس السنة 
وكل عيد كنت اشترى شجرة 
وهذا العيد ستكونين انتى الشجرة 
:)






كل سنة وانتا طيب يا يوسف
وكل سنة وانتا طيب يا حبيبى
وكل سنة وانتى طيبة يا بسكوتة
كل سنة وانتى طيبة يا ماما 
ويا ماجد ويا هانى وعيالك ومراتك
كل سنة وانتى طيبة يا عبير انتى والعيال 
وطنط واخواتك وجوزك
كل سنة وانتى طيبة يا تغريد انتى والعيال 
و جوزك والعيلة الكبيرة و كل احبابك
كل سنة وانتى طيبة يا سالى انتى وسى محمد 
وكل سنة وكل الناس الحلوة
فى قايمة مدوناتى المذكر سالم والمؤنث 
بألف مليون خير

----------------------------------

---------------------------------

بوستات قبل الحدث 
ندى الياسمين ... لقاء مدونى المنصورة 



This entry was posted on السبت, يناير 01, 2011 and is filed under . You can leave a response and follow any responses to this entry through the .

12 كــــلام بيطــبطـــب عـــلى قــــلبى و روحــــى

من غير كلام خليها دعوات جوة القلب أحسن

ويارب خير يارب

يارب خير

وربنا ييسر الأمور للخير
ويبدل الأحوال للخير يارب
للخير في كل حاجة

دعواتك

والخير للكل يارب:)
يارب:)
يارب:)

فيه والله كلام كتير جوايا..لناس كتيرة

بس خير

بس

الله اقدر اعمله دلوقتي

هدعي بالخير ان شاء الله للكل

لاننا

كلنا

محتاجين الدعا ده
مع السنة الجديدة

يارب
الخير يارب
وابعد عنا شر السنة يارب

واحلل الخير يارب. على أمتك كلها. وعلى البلد يارب


وأولادكم يارب


وأهالينا كلها

والبلد يارب

والدعوة منك بإذن الله:)

أنا كان نفسي أتعرف على حروف
بس المهم دلوقتي
نتطمن عليها
في اسكندرية
وبإذن الله يارب خير

انتي بجد تتحبي وتدخلي القلب على طول
وكنت سعيدة فعلا بوجودك امبارح
اشوفك على خير يارب دايما

كنت مبسوطة اوي انك جيتي
بجد اليوم كان روعة بيكم كلكم

متجمعين دايماً على الخير يااا رب
ربنا يفرح قلبك مع بداية السنة الجديدة.. علشان قلبك يستاهل ده :)

samamasr
--------


ازيك يا إيمان
كان نفسى تقعدى معانا اكتر
بس ان شاء الله
المرة الجاية تتعوض


حضورك كان خير
ودعواتك الطيبة
ان شاء الله
يكونلك النصيب الاكبر منها
يا حبيبتى

:)

رحــــيل
--------

انتى كمان يا سارة
وربنا يا حبيبتى يسعدك انتى وامجد

بجد انا حسيت بفرحتك
وبصدقك
ودا لو له دعوة
فهيبقاله دعوة بيكى انتى اولاً
لأن حد بسيط و صافى من جواه

ربنا يسمعنى عنك كل خير
واخبار حلوة دااااايما



سلامنا للشاعر الكبير
:)

مجرد حلم صغنتوت
--------------

اليوم كان احلى بيكم يا دعاء
المرة دى قعدت معاكى اكتر
وشوفتك عن قرب
انتى انسانة جميلة وبريئة وعلى طبيعتك
ومرحبة وحاجات كتييير كدا

ان شاء الله نتجمع ف الخير
وتكونى من اول حاضرينه
يا مجرد حلم ضغنتوت
ساكن قلب كبييييير قوى

من اول لحظة شوفتك فيها وسلمت عليكي وانتي دخلتي قلبي كدهو بدون استئذان

بأمانة اتبسطت كتير اني شوفتك وشوفت كل الجروب الجميل اللي جه اللقاء

ربنا يجمعنا دايما على خير

still-searching
---------------

يا لؤلؤة انا كمان ارتحتلك قوى
وبدلعك اهو من اول تعليق
آه
حاكم انا اللى احبه ويدخل قلبى
لازمله اسم دلع او لقب علطووول

ان شاء الله تتكرر اللقاءات
وادينى عرفت طريق مدونتك اهو
وآخر بوست كتبتيه عجبنى قوى
شكلك حكاية يا بنت انتى
وحكاية حلوة اكيد

كل سنة وانتى طيبة
وكل اهل المنصورة ومصر بخير
:)

انشاله يخليكى يا جميل

ربنا يكرمك يارب

ايه ده اتكسفت من كل الكلام الجميل ده

بجد يا فاتيما انتى بتعملي فرق كبير معايا فىاللقاءات

وبجد بتوحشينى

ربنا يخليكى لينا ياام يوسف
وشكرا بجد انتم نورتونا

كل سنة وانتي طيبة يا فاتيما
ويارب السنه دي احلامك تحقق فيها
باروع مما تتخيلي
وربنا يتقبل منكم ويجعله في ميزان حساناتكم يارب

مساء الورد و الصدف السعيده و الحياه الحلوه و الاحساس الراقي والابتسامه الجميله ال شفتها بجد من اول لحظة جمعتنا بحضرتك وبندي الياسمين يوم اللقاء
هو كان يوم عيد بجد عشان حسيت فيه بالعيد بتاع زمان .. اجمل حاجه لما الواحد يصحي من بدري وهو مبسوط انه هيعيش يوم جواه حب وخير حقيقي .. و من اجمل الصدف ال قابلتني ان اتعرفت علي حضرتك و علي كل الناس الجميله اللي نوروا المنصوره ليلية راس السنه
اول ما شفت حضرتك حسيت ان شايف م.داليا قوس قزح بتملك نفس الروح الجميله دي ..
و كان نفسي اشوف كل الناس ال كانت معانا في يوم ابو الريش .. و اتبسطت اوي لما عرفت ان منهم كتير اتصل وانا بره .. بتمني ان كنت اكلمهم واقولهم ان اليوم دا كان محتاجلهم بجد .. كنت حاسس ان الدنيا جواها نور بنور قلوبكم و لمتنا وكلنا اسره واحده علي صوت امجد وهو بيقول شعره الجميل .. من يومها وانا عاوز اطمن علي حضرتك و نظراً لانشغالي الشديد .. اطمنت بالبوست دا و قولت ارد بسرعه و اقول لحضرتك حمدالله ع السلامه ويارب يسلم قلبك ويسلمك كل ال نفسك فيه و علي يقين من قلبي ان دا هيحصل باذن الله
بشكرك علي لقبك الجميل كدا اخدت لقبين
رجل المباراه
و godfather من ومازال البحث جاري
طبعا ندي الياسمين .. ادتني ثقه كبيره و كانت بتوجهني بادارة حكيمة .. بشكر ربنا لانه جمعني بالناس الجميله و يارب دايما نتلاقي ع الخير
كلامك جميل جدا .. و مبسوط لان دخلت العالم الجميل دا

إرسال تعليق