.

.

♣ .. بـرج الحـــ (2) ــظـ .. ♠  

Posted by: فاتيما in










الأول
كل سنة وانتوا طيبين
واحنا كلنا بخـــير سوا ف هذا العالم الجميل
المسمى تـــدوين




ثانياً
ربنا ما يقطعلنا عادة
و تدوينة برج الحظ وجبت
و كنت عاوزة ابتدى السنة بيها
بس حادث الاسكندرية حرمنى
وحرمنا كلنا من بهجة الأعياد و الأحتفاء بيها
لكن جت تونس الحرة و ردت فينا الروح
وربنا يحفظ هذا البلد وكل شبر فيك
يا وطننا العربى ... من كل شر
إن شاء الله




ثالثاً
مش عاوزة حد يا ريت يقولى التنجيم حرام
والإعتقاد فيه معرفش ايه
الا انا قاعدة بحضر في البوست دهون
بقالى زمن ومش قاصدة اذلكم ولا حاجة
بس أذكر مجرد معلومة عابرة
و حيث انى اتمتع بقدر عالى
من الديموقراااااااااااااااااااطية
والسمااااااااااااحة
و ثقافةالأختييييييييييلاف
فاللى هيعترض ملوش عندى غير
زغرة الغاااالى سوكومونس





رابعا
هيوه انتوا ليه يا جماعة مبتحطوش
خانة البرج فى بروفايلاتكم ؟!!
يعنى دلوقتى لما أختكو تيجى تكتب
تدوينة زى دى .... تتصرف ازاى ؟!
طبعا كان فيه وسائل مساعدة
زى تعليقات السنة اللى عدت
وبرضو ميمنعش أتلصص على الشريط الجانبى
ف مدونة .... بيت المدونين
اقعد ادعبس على بوستات وتعليقات التهنئة
من الاحباب لبعضيهم فى اعياد ميلادهم
بس فيه ناس معرفتش بالمرة
اجيب ابراجهم
ويصعب عليا البوست ينكتب من غيرهم
زى sal و جارة القمر و ناس كتيييير غاليين
فإبقوا ساعدونى الا انا ... هنجم
وافتح المندل كمان يا خراشى !!!!




خامساً
إسمحولى أتفشخر شويتين
بتوقعاتى بتاعة السنة اللى فاتت
واللى حصل منها حاجات ... بالحرف
وحاجات حصل منها ... نص آه ونص لأ
و صحيح فيه حاجات محصلتش بالمرة
بس أفيش مشكلة عادى ... بتحصل
و متقفوليش ع الواحدة بقى ياختشى






خامساً
أى حاجة هتتحقق من المكتوب
حلوة كانت ولاّ وحشة مش مسئوليتى
وانما على عهدة الراوى
و اللى هيا الست الكومل اللى ف الصورة
وإشمعنى ماغى فرح تحديداً ؟!!
يمكن لأنها تقريباً الوحيدة
من وسط اقرانها .. وهم كثر بالمناسبة
اللى ساعات ..ساعات بتقول كلام زى الفل
وبيتحقق منه كتير من باب .. ولو صدقوا
وادينا بنتسلى


وبمناسبة التسالى بقى
فالست ماجى للعام الثالث
على التوالى
أو التوازى ... مش فارقة
بتتوقع لبرج التور أنه آل هيتجوز آل
و أمنعوا الضحك
عشان انا مليش نفس دلوقت
وعيب لما نهرج ف موقف جلل زى دا
احنا قولنا متسلطة من اومى و مازالت مصرة
ومين عارف المرة دى ...
يمكن تصدق ... مش بيقولوا التالتة تابتة
وبينى وبينها ...تدوينة السنة الجاية
إن شاء الله
لو كان لينا عمر
بس الشهاداااة لله .. والحق يقال
كل اللى ماجى قالته
السنة اللى فاتت تقريباااا اغلبه .. حصل
و كنت موفقة جدا على الصعيد المهنى
والمادى والتدوينى والأسرى والصحى والعاطفى
مشاكلى كانت يسيرة ...و تقريباً مفيش
و يعنى لولا بعاد يوسف عن حضنى
كنت اتمنيت سنة 2010 تشبهها
كل سنين عمرى الجاية
من كتر الحاجات الجميلة اللى إتلمت فيها
و صادفتها ... على غير توقع
فالحمدلله على كل شىء
حصل أو محصلشى



ومــــاجى
بتقول للجوزائيين .. السنة دى تعويض
عن كل ما فات من متاعب وصدمات
وللجدى .. بتقول لموا التعابين وخليكم حذرين
وللحوت ... نجاح على اصعدة كتير ابرزها الفلوس
وللميزان ..كن واركز ف حتة و تجنب المشاكل
والعذراء احوالك هتتحسن بس اديها وقت

و .... انا هرغى ليه
ما تقروا انتوا براحكتو !!!


برج الجدى

سنةالتجارب المربكة

إنّها سنة الاستحقاقات والعراقيل
والتعقيدات الكثيرة المربكة و عليه أن
يكون متأنياً وحذراً منذ الشهر الأول
في السنة ليخرج بسلام
وانتبه جداً أيها الجدي
إذ يتحدث الفلك عن تغيرات كبيرة
وانتقال إلىمكان آخر
إنّها سنة التحديات التى لم تخطر ف بالك
وتتطلّب الانضباط الشديد 
وقد يضطر لتقديم 
استقالته أو الانتقال إلى مكان آخر
وقد يجد نفسه في محاكمة أو يُحاسب
إذا ارتكب أخطاء في الماضي
لكن الانفراج يأتي فيالشهور الثلاثة الأخيرة
كأن عصا سحرية قلبت الأمور
و عاطفياً قد يلعب الخارج دوراً مهماً فيحياته
يمر بفترة حساسة ودقيقة وحرجة 
حتى فصل الصيف ابتداءً من يونيو
يلتقي بنصفه الآخر إن كان عازباً
----------------------------------------
مشاهير البرج 
ستيتة حسب الله الحمش - محمد الغرباوى
بت خيخة وأى كلام - ابن حجر العسقلانى
أبو حميد - احمد سلامة m.coffee
عمر بيكا - بدراوى - نسرين بسيونى
لجين ابوالدهب - طارق الغنام
خواطرى مع الحياة - (ست*جنى*الحسن)

------------------------------
التوقعات بالتفصيل هــــــنا



برج الدلو


سنةالتجدد والقرار
تدعمه الأفلاك ويخدمه حدسه في الخروج

من مأزق في الوقت المناسب
لا سيما في الأشهر الأولى
ابتداء من فبراير تبدأ دورة الأرباح
وهيدورة جيدة للتغييرلكن فى يونيو
يتغير المشهد وتهديد الاستقرار
مما قد يعني بيعأو شراء عقار
أو بعض الممتلكات العائلية
قد يتعلم جديداً أو يؤلف كتاباً
لكن الفلك يحذّره بين يونيو و أغسطس
من المضللين والمخادعين
النصف الأول من السنة قد يعنيله المغامرات
أو التغيرات أو الانفصال ، بينما النصف الثاني
يعني الاستقرار وبين أغسطس ويوليو
يشير الفلك إلى لقاء استثنائي
-----------------------------------------
مشاهير البرج 
ندى الياسمين - حرووف - خواطر شابة
الطائر الحزين - محمد كمال كيمو - سكرة
إنسانة - اسامة عبدالعال - شيماء سمير
إيمان بنات افكارى - angel love
استاذ sherif لست الا .. بعض الاوراق
LadyE - mrmr
-------------------------------
التوقعات بالتفصيل هنـــا


برج الحوت

سنة النجاح والإزدهار
سنة المشاريع والأرباح والمال وفى اول يونيو
ينتقل من عمله أو إلى جديد
ويقتحم الساحة بجرأة واقدام والفلك يحمل
له فرصاً ومفاجآت لم يعرفها من قبل
قد يجد دعماً من قبل البعض فى السلطة
ويشير الفلك إلى إن يوليو يحمل معه فرصة لقاء
الشخص الذى يحلم به وإذا لم يكن الحوت
مغرما فقد يفعل فى أكتوبر 
-----------------------------------------
مشاهير البرج
Baskouta - adel
امـــى - رندا حياتى ف كلمة 

رانيا القدر وانا - بيطرية ومش بإيدى 
 الحب الجميل - بنت مصرية - sally رؤية 
حنان الشافعى - Heba
---------------------------------
التوقعات بالتفصيل هـــنا

برج الحمل

 
سنةالتغيرات والمفاجآت
سنة مليئة بالأحداث التي تخضّه
النصف الأول من السنةيحمل انقلابات طارئة
لا يتوقعها وينهي دورة ويتجه نحو جديد
يواجه مفاجآت سلبية وأخرىإيجابية
وقدتتغير كل عاداته
يشير الفلك إلى انفصال أو فراق 
ولو لفترة قصيرة لكن شهر مارس يحمل غراماً
من النظرة الأولى وزواجاً محتملاً في أغسطس
و نوفمبر سيكون أكثر رومانسية 
-------------------------------------------
مشاهير البرج
 رانيا ليس فقيرا من يحب - موناليزا  
يا مراكبى - بطوط حبوب - بنت القمر - نـــور 
 غادة محسن - مى رحيق الورد - الأزهرى
وليد هى وظروفها
Mano - ana keda - amr
-------------------------------
التوقعات بالتفصيل هـنـــا


برج الثور



سنة التطورات الإيجابية
سنة جيدة وتكون أفضل في نصفها الثاني
يبحث عن جديد ويتحرى ما كان مخفياً عنه
ويوسّع دائرة أعماله إلى الخارج.
قد يقع في حب شخص غريب أو أجنبي
وتتغير أحداث حياته خلال السنة حيث يفاجئه
كوكب أورانوس بتنقلات وأمور غير متوقعة
تغيّر مصيره ابتداءً من مارس
وبين أبريل وأغسطس يكتشف الحقائق 
ويصل إلى مكانه ويرافقه الحظ
وقد يطل على زواج إذا كان عازباً
تشهد حياته العاطفية تغيرات إيجابية
في الأشهرالأخيرة ابتداء من شهر مايو
 ------------------------------------------
مشاهير البرج 
سوما - داليا قوس قزح - فاوست  
تغريد صديقتى - reem - (أحمد talk )  
نبض اسكندرية - بنت الاسلام
  sony2000 - MR.PRESIDENT
-------------------------------
التوقعات بالتفصيل هنــــا

برج الجوزاء

 
سنة التحرر والانطلاق
إنّه البرج الأكثر حظاً هذا العام
يشهد تعويضات عن 7سنوات ماضية مؤلمة
أفضل فترات الحظ تكونبين 22 يناير
و4 يونيو تكون سنة ممتازة له
إذا حلم بسفر .. سيحققه وتفتح له الأبواب
ويستقبل وجوهاً جديدة
ويناضل من أجل هدفه ويصل إليه
إن كان قد عانى سابقاً من عدم الاستقرار
العاطفي سيتوصل هذا العام إلى تسويات
أو حب مميز،إنّها سنة التعويضات 
بالنسبة إليه يحظى بحبّ مميز 
و قد يكون شخصاً ذا مكانة 
والفترة الواعدة له في أوائل الصيف
وأوائل الشتاء حيث تعني الزواج
--------------------------------------
مشاهير البرج 
زهـــراء - كاميليا - المعتصم - مها زين
صيدلانية طالعة نازلة - ياسمين فنانة مفروسة
عبير صديقتى - محاسن عاوزة اتطلق و
ريم بين ضفتى عقل - مس فينوس
دعاء مجرد حلم صغنتوت - اخويا الكبير
bobo - nigro - im the crazy one
NeVen صباح ومسا - Brownie -
Haythem Alsayes
----------------------------------
التوقعات بالتفصيل هنـــا


برج السرطان



سنةالتحديات الكبرى
سنة صعبة جداً تحمل تغيرات جذرية
في مجال العمل وتبدأ السنة بأجواء متوترة
تسودها الثورة والغضب والاحتجاج والعصبية
بدءاً من 5 يونيو يستعيد توازنه
وينطلق من جديد بقناعات مختلفة
يخضعلعلاج إذا كان مريضاً ولا يجب أن
يستهتر في الأمر وفي النصف الثاني
من السنة يلتقي بنصفه الثاني إذا كان عازباً
أويعاود اللقاء بأحباء بعد غياب
أو يحصل على المنصب الذي يصبو إليه.
يشهد السرطان زوال علاقةعاطفية بالية
ويعيش ولادة علاقة أخرى
لكن ابتداءً من يونيو تتغير الأمور لمصلحته
---------------------------------------------
مشاهير البرج 
شيماء قهوة بالفانيليا - خالد همس الاحباب
مسدس صغير - طالبة مقهورة درجة جدا
حفصة الناس والعالم - اسكندرانى أوى
قلب القطة قطاقيطو
Doba - re7ab.sale7 - A.Samier

محمد عمود نور - مــــــنونا
-----------------------------------
التوقعات بالتفصيل هنـــا




برج الأسد


سنةالتألق والإبداع
تبدو الشهور الخمسة الأولى الأفضل
يخوض خلالها مجالات جديدة وينتقل إلى
أماكن أفضل تألقاً وبريقاً
ويهتم بقضية مالية أساسيةولديه تطلعات
جديدة يطرق أبواباً للمرة الأولى وابتداء
من شهر يونيو يخف الوهج
تبدو حياته العاطفية واعدة حتى فصل الخريف
حيث يلتقي غراماً من النظرة الأولى
وربما يدخل القفص الذهبي خلال الأشهر
الأولى من السنة
 -----------------------------------------
مشاهير البرج
يوســـــف ابنى
  رنا بنت قلبى - لماضة - سوووو 

شاب شنكوتى - ميادة ايامنا الحلوة 
 اميرة على كوكب مهجور - مهندس مصرى 
 أحمد سكر - شريف باشا - Ramy
خايف من الحقيقة - لـــولا - أحوال الهوى
عمرو يسرى - ( أحمد -k )
------------------------------
التوقعات بالتفصيل هـــنا


برج العذراء


سنةالانتصارات التصاعدية
ينتهي العذراء من سبع سنوات ماضية مؤلمة
وقد بدأ يرتاح مند العام المنصرف ويكمل ذلك
هذا العام حيث يعيش مغامرات لا ينساها
ويتلقى عروضاًضخمة،وإذا كان قد طلّق سابقاً
أو أجبر على الانفصال من مؤسسة فسيعود
عروض جديدة تأتيه بين يوليو و سبتمبر
الخبر الأفضل في برج العذراء أنه
كلّما تقدمت نهاية السنة كلما ازدادالحظ
عاطفياً يدخل سنة التحرر و ربما سنة الزواج
--------------------------------
مشاهير البرج
 king tooot - bosbos - wanda 
فيدووو حفيدة عرابى - جـــــارة القمــــر
عفرتو مستعجل دايما
أحمد الصباغ - سارة رحيل - مايكليتو
سالى حاجات جوايا - احمد عبدالعدل
آخـــر بهدلة - حسنى المستفز - dr.lecter
انجى هات م الآخر- سنابل قمح - sal 
داليا (mycorner) - خطابات لم ترسل بعد
كلمات من نور - star in the sky
------------------------------
التوقعات بالتفصيل هنـــا

برج الميزان


سنةالانقلابات المفاجئة

يواجه الميزان انقلابات مفاجئة
وتجارب متنوعة وفريدة ويعاني من أعداء
ودعاوى قضائية أو طلاق
وسيعيش خيارات تفرضها الظروف رغماً عنه
ابتداء من مارس ينتقل إلى برجالحمل
مما يعني شراكة أو زواجاً أو عملاً جماعياً
أو انفصالاً عن حزب سياسي
وابتداء من يونيو يدخل فترة أكثر إنتاجية
توحي بنجاحات مادية تأتي عن طريق شراكة
أو إرث أو تغيير للعمل أو مكان الإقامة
وقديعيش حباً جديداً
-----------------------------------------
مشاهير البرج 
 أحمــــد ســـــعيد 
نبضات - كيكى عـــووو - كيــــارا  
محمد هاى فولتا - حـــنين القلب
شيماء جمال - فتاة من الصعيد
سارة من السعودية - محمود باحث عن حب
ابراهيم العدوى - سنوهى - بنت من بنات حواء 
- joudy - i wish i were a butterfly
dodda - مازال البحث جارياً - ويكـــــا
قول يااارب - كركبة دمـــــاغ

------------------------------------
التوقعات بالتفصيل هنـــا


برج العقرب
سنةالارتباطات المتينة
إنّها سنة الاستقرار والعلاقات المتينة
قد يكون المناخ
العام للعقرب مربكاً لكنه يعمل بسرعة 
سيما في الشهور الخمسة الأولى
تغيرات كثيرة مفاجئة تحدث لصالحه
بين أبريل ويوليو
يواجه قراراته بإيجابية ولو مر بفترة مراجعة
حسابات تتعلق بشراكةربما أو بمشاكل قانونيةيسافر إلى الخارج ويقف إلى جانب أحد
مقرّبيه المرضى أو يدعم شخصاً في نجاحه
كما يوحي الفلك باحتمال زواجه من
شخص ثري ويعيش رومانسية خاصة
----------------------------------------
مشاهير البرج 
واحدة مفروسة - أم بتول - شاهى
ميرا وومن - خاطر سامح عزت
محمد عبدالرحمن شحاتة - دعاء مواجهات
Manamino - شمس الدين - مصــرى جدا
ماجد أخويا - sagy - سى محمد
محمد التركى - شيرين سامى

----------------------------
التوقعات بالتفصيل هنــا




برج القوس

سنةالإنجازات
يفتح صفحات جديدة ومفاجئة حلوة
يغامر في ميادين متنوعةومميزةويتعرفإلى
ما كان غائباً عنه... الشهور الأولى تبدو الأفضل
لكن ابتداءً من 4 يونيو يصبح أقلوهجاً
يمر بفترة تغير في مجال العمل
وقد يشهد حدثاً جميلاً كزواج أو ولادة
خلال الأشهر الخمسةالأولى
يدعمه الحظ المطلق ابتداءً من مارس 
--------------------------------------
مشاهير البرج 
دودو عاشقة الرومانسية - آخر أيام الخريف  
زهرة .. لم تنبت - أحمد شقير - رنيم 
غادة عبدالعال - عاشقة القمر Appy - shimaa
bent men elzaman da
----------------------------------
التوقعات بالتفصيل هنـــا






إيه دا ؟!!!!
بتهرجووووو  
لسه فيه حد قاعد وممشيش 
 أو نام ف وسط البوست ؟!!! 
طب كيويس والله 
 نيجى بقى لتوقعات برج الحـ(2)ــظ 
----------------
نبضات هتدخل بيت الَعدَل
ويكـــا هتقابله مشاكل بعد وصوله مصر
وتعمله ارتباك وتتحل
بسام مستر بريذدنت هيجيله
اعارة او عقد عمل  
خالد همس الاحباب هيتحمل أعباء جديدة 
 ف شغله وتنقله نقلة واسعة
أحمد عبدالعدل هينشال من على
كتافه حمل قديم
مانمينو قلبه هيبطل ينوجع
بطوط حبوب هيفترق عن غالى ويرجعله تانى
  سووو هينشر كتابه الاول 
مهندس مصرى هيترقى لمنصب اعلى
سارة هتغير مكان سكنها لحتة تانية
وندا هتسيب أوربا وتستقر ف بلد المحبوب
سونى هتنخطب
البت خيخة هتسيب اكتوبر اللعينة
عاشقة الرومانسية هتغير شغلها
وهتقابل أميرها عن طريق المطرح الجديد
عادل هيتقدر على حاجة كتبها او شارك
فيها و بشكل رسمى من جهة معترف بيها
رامى هيغير مكان شغله لحتة أفضل
وليد كنج توت كل مشاكله هتتلاشى وبعد عناء 
كيكى عووو قلبها هيدق بحب ..دوم ..دوم ..دوم
يا مراكبى هيفكر يرجع مصر نهائياً
ماجد اخويا هيعيش قصة حب جميلة
حنان الشافعى هتشتغل ف حتة بتحبها 
 فيدو هيتعرض عليها شغل ف مكان غير متوقع 
زهـــراء هتدخل مجال جديد عليها وتتميز فيه 
هانى مصرى هيتحصل على مبلغ محتررررم
محمد التركى هيلاقى فرصة شغل كان
بيتمناها و مصحوبة بسفر
نيجرو هيكافىء على تميزه ف شغله  
بعد طول تجاهل
دوبا هتنصدم ف موقف شخص قريب
وتطرده من حياتها  
ليكتر هيرجع لناس كان فارقهم و بعد عنهم
كركبة دماغ مش هتسيب دار علوم
رغم سخافاتها
أحمد شقير هيمسك منصب صحفى كبير
فى موقع مميز
الحب الجميل ربنا هيكرمها بحدث فوق تصورها 
  هبة بوبو هتحمل فى أخ لعمر بيكا 
منونتى هتلاقى شغل وتتألق فيه 
كيــــارا هتلبس الدبلة ف اليمين قبل آخر السنة 
سالى رؤية هتروح شغل جديد على نص السنة
آبى هتحمل فى آبى هانم بتنجاني صغننة
بدراوى هيلاقى بنت الحلال
رحاب صلاح هتعانى من وعكة صحية
وتنتهى منها بخير




 
أما بسكـــوتة قلبى 
هيجيلها فلوس من شغل جــــديد
وهتقابل سى كــــــوكيز على أول الشتا



وانا هفضل زى
كل سنة اتمنى


إن يوســــف ف يوم يرجع

 
 
أخييييييييييييراً



الموقع دا حلو للى لسه فيه نفس
يقرى
آل بيدى نصايح آل
للجنس اللطيف يعملوا إيه
مع احبابهم بناء على سمات أبراجهم
وكأنه هينفع !!!!




وفيه كمان لينك يقولنا
ننيل إيه كلنا
عشان المركب تمشى
آل يعنى برضو ... هينفع






ودا لينك عااااام
مليان حاجات لطيفة
قلبوا فيه و ميخسرشى




أى نفر هييجى هيقولى بعد كل هذا الرص
طب دى الأبراج العادية يا فاتيما
و فين الأبراج الصينية ... !!!
عشام ساعتها هخلى كرشه بيسين 
و أنط فــــيه
كأقل واجب ينعمل


كل سنة وإنتوا طيبين


وبألف خير
وامنياتكم كلها متحققة
ويطيب لى أن اختم التدوينة
بالمثل العجيب الذى يحضرنى حالا وبيقول



مالك ليه يا بخت
من دون البخوت ... لبخّت ؟!

----------------------------------

على جنب
الغـــــنوة إهــــــــداء
للراجــل الغامـض بسـلامته
و مـــش .... متخـفى بنضــارة

This entry was posted on الثلاثاء, يناير 18, 2011 and is filed under . You can leave a response and follow any responses to this entry through the .

27 كــــلام بيطــبطـــب عـــلى قــــلبى و روحــــى

معلش يا لولى
عدت البوست تانى

بس احتفظت بالتعليق البليييييغ
أهو

Sally

لاااااااااااااااااااااااااااااءه بقي
لااااااااااااااااااءه


:)

لاء بقه يعنى انا استنى البوست وفى الاخر تقوليلى مش اعرف انتى برج ايييييييه

تصدمينى كدا ماااااااااااااشى ما انا قلتلك فى الايميل انى برج العذراااء اللعين

يلا بقى ورينى يا ستى التنبوءات

لاء يا فاتيما لاء لاء لاء
بتغلطي كدة...انا رحاب صالح مش برج السرطاااااااااااااااان
انا برج الاسد....
احم احم
نهاية السرطان وبداية الاسد
بصي انا برج الديك ف الابراج الصينية
ههههههههههه
اية الداخلة دي ...
معلش والله بجد برغم اني مش بحب الابراج وكدة يعني بس انا حبيت اللي كتبتيه
يعني مبعلقش نفسي بالكلام
بس بحب اعرف طباع كل برج وصفاته وكدة يعني....
انا ناوية السنة دي احقق حاجات كتيرة وان شاء الله ربنا يوفقني بدعواتك يا حبيبة قلبي ...
مفيش شيء هيخليني محققش احلامي...
هنسي اللي فات وكل جرح هتعلم منه...
لكن اللي انت كتبتيه ده ممممممممم
مش عارفة ...بس اوشوشك ف حاجة كدة...بتمني كل حاجة حلوة قلتيها تتحقق مش ليا انا لاء لكل النااااااااااس الحلوة دي
وبتمني امنية وبددعيلك بيها ...يار ب تتحقق...قولي آمييييييييين

☆ Sally ★
----------

نعم يا هانم ؟!!!

معنديش لأ أنا
آه ثم آه ثم آه

والأيام بسننا

لأ
الشهور بيننا

ويوم 1-7 -2011 هدخل عليكى المكتب واقولك إيه اللى مقعدك هنا ؟!!!

عاوزة تفلسعى قبل المعاد
ماشى
مش هنقول لأ

المهم تروحى حتة احسن
او اللى بتتمنيه
وفيه الخير ليكى
ولو إنى هفتقدك جدا

انا اصلا بفتقدك من دلوقتى
ودى مناسبة حلوة عشان ابعبعلك بللى ف نفسى واكتبه واسجله للتاريخ

ان زمالتك ليا خلت للشغل طعم بجد
وخلى الوقت اللى كان بيمر بملل ف ساعات كتير ... مميز

انتى انسانة جميلة
ومحترمة لأقصى حد
وانا محظوظة بوجودك معايا
وقبل اول سبعة
أو بعده

ف كل الأاحوال هفرح عشانك
وهزعل عشانى

بس هقول بركة يا جامع برضو
وأهو يخف التعداد ف المركز شوية
وبالمرة اخلص من خليكى شوية
هنروح سوا
وتقعدى تسلفينى ف تذاكر المترو
وتذلينى على سندوتشات الكريب
والجبنة ام طماطم
وتتأففى من المج اللى مش مملى لحد آخره
ومن مستوى النضافة العاااالى
و نكلم بعض ف تليفون الشغل بقى وتقوليلى اطلعى برا تليفونى
واقولك انتى اللى مكلمانى ..
وبابياى الحلوة بتاعتك
وقشطة
فقولك عنب

وكفاية كدا
نكمل ف تعليقات آخرى

:-)

إن شاء الله حظك م السما يا لولى
ويحصلك كل الخير يا حبيبتى

كل سنة وانت طيبة يا ام يوسف
ويارب السنة الجديدة تكون سنة خيرعلينا جميعا
ويارب توقعاتك الخاصة ببرج الاسد تتحقق عدا موضوع القفص الذهبي(بلاش لحسن نروح في داهية)
وكمان يوسف لسه صغير

المهم
يارب ناس تانية من برج تاني هي اللي تخش القفص
تحياتي

جــارة القمر
☆--------★


وأدى تانى لأ
ف البوست دا

بس انتى عندك حق يا حبات اللولى
كان المفروض أصلاً اخمن
انك برج العذراء

بس متقوليش لعين
دا برج لايق عليكى قوى
انتى هيا الإنسانة العاطفية بشدة
ومخلوقة للحب والوفاء دائها


طيب يا ستى
برجك عموما قايل حاجة
تنفع تكون شبههك
بيتكلم عن ان 2011 سنة التحرر
التحرر من كل قيد خانقك
و مين عارف ؟!!
مش يمكن ف نهايتها ييجى جدع ابن حلال وبيفهم ف اللولى الحر ويقرر يطلع فووووق يسكن جار القمر ؟!!

ياااااااارب
كل الخير يتحققلك يا مى

:-)

كل سنة وانتى طيبة
يا حبات اللولى

re7ab.sale7
☆---------★


وادى تالت لأه ف البوست
مالكم يا عياااااااال


اولا كل سنة وانتى طيبة
يا رحوبتى

ثانياً بروفايل حضرتك بيقول
انك سرطانية المنشأ
هفهم انا اكتر منه ؟!!!


ثالثاُ
الأبراج بتفرق يوم عن بعض
او يومين ف الغالب
بس انتى مش أسد خالص يا رحاب

وازعم انك سرطانية صرفة
لأن أنثى هذا البرج اسرتها عندها ف المقام الاول وبتعرف تمشى الامور بحكنة جنرال متمرس ومسكيها أى مشروع
او شغلانة او مهمة
وتتمها على أكمل وجه
وتوازن بين أطرافها
وتخلى كل واحد فاكر نفسه زى الفل
ومن غير ما ترفع صوتها
او تعمل مديرة

بينما برج الأسد ستاتهم
شديدة حبتين فيما يتعلق
بأدارة دفة الامور


السرطانية مدلدقة حب وحنية
ف اظهار مشاعرها
وبتقبل جدا
تكون تابعة لحبيبه او راجلها
حتى وهى عارفة انه اضعف منها
لكن الأسدية لما بتتولى زمام الموقف
تحب يعترف بفضلها دوما
والا تعتبره تقصير ف حقها


وبعدين السرطانية موهوبة
دمعتها قريبة
زعلها ينقشع بعد وقت
يعنى م الآخر يا رحوبتى
انتى سرطاااااانية مهما قولتى
أنا أســــد

بس خلاص


ربنا يكتبلك كل الخير يا حبيبتى
ويسعدك ويبقى دايما حظك م السما
وف السما

:-)

خايف من الحقيقة
☆------------★


يا لهوتينىىىىىىىىىىىىىىىىى

أعدلونى ع القبلة
وحد يتشاهدلى


محمود ؟!!!
والنبى صحيح

انا روحت اشوف البروفايل تانى ليكون حد منتيحل سخصيتك ولاّ حاجة

طلعت خايف من الحقيقة الغالى
يا خراشى لو كنت أعلم ان بوستاً كهذا هيخليك تطل وتكتب تعليق
..لكنت من فورى كتبت

الف حمدلله على سلامتك
روح قلب ماما نورت
لأ نورت إيه؟
دا الفيوزات كلها هتضرب دلوقت
وهنقلبها ضلمة
بس تنور تانى بنجوم السما

إن شاء الله تبقى سنة زى الفل
عليك وعلى كل حد يا محمود
وأيوه ابعد انتا عن القفص الذهبى دا
مش عاوزين المودام تمسك ف رقبتى

يوسف بيكبر يا محمود آخر مرة شوفته
من سنتين وشوية
كان ما شاء الله طولى
راجل كدا و علطول افتكرت لما كان صغير شوية وقصير ونبقى عاوزين نرقص سوا سلو وميبقاش طايلنى واقعد اقوله امتى هتطول بقى ؟

هانت
كلها اقل من عشر سنين والاقيه بيقول بحب وعاوز اتجوز ...
:-)

نورتنى يا غالى
و المدونة وقلب صاحبتها نورّ بمجييك

ورغم اني غلسة
وها أقول من وقر في قلبه تصديق شيء من ده لم تقبل صلاته اربعين يوم
ايوه غتته جدا

بس من غير ما يقر في صدري ولا قلبي شيء منه لازم اشجع بوست تعبتي فيه حبا في كل الناس دي

ولازم احلل الأبراج انا كمان
هيييييييييييييييييييييه

برج الجدى

ميرسي يا مسيطاني
اي نعم انا 5 ينايم :)

سنةالتجارب المربكة
----------------------
فعلا جربت اشد حبال الغسيل لوحدي وكانت تجربة سودة

إنّها سنة الاستحقاقات
-----------------------
رحت فعلا الإستحقاقات وطلبت مفردات مرتب لأخويا ها يعمل لي بها حاجة بس علي النعمة ما فاكرة ها يعمل لي ايه اساسا

والعراقيل والتعقيدات الكثيرة
---------------------------
شفتي أهي الذاكرة ابتدت تدوب
ها تعرقل اكتر من كده إيه

و عليه أن يكون متأنياً وحذراً منذ الشهر الأول في السنة ليخرج بسلام
--------------------------
حاضر طاقية عبد السلام النابلسي والنضارة المكبرة وها أهريكم شك وجرب نار الغيرة وقولي
وبعدين مش كفاية حادثة القديسين اللي نكدت عليا لحد يوم سبعة
خلاص يا أول شهر
احترم نفسك



وانتبه جداً أيها الجدي إذ يتحدث الفلك عن تغيرات كبيرة وانتقال إلىمكان آخر
--------------------------
يارب يارب جايزة في باريس
اسبوع انتقال لباريس يارب
اظن قمة التواضع أهو

إنّها سنة التحديات التى لم تخطر ف بالك
---------------------------
تفتكري ابطل سجاير واشيل حديد؟


وتتطلّب الانضباط الشديد
----------------------------
لو انضبطت أكتر من كده يطلع لي دقن وشنب حقيقي مش مجازي
لأ ده انا ناوية بعونك وبإذنك يارب اتسيب السنة دي مش عاوزة عوء
ده انا حتى ببص للبنتاكور بقى لي كام يوم وعاوزة ألبسه وانحيرف بقى


وقد يضطر لتقديم
استقالته أو الانتقال إلى مكان آخر
-----------------------------
محل الكشري
من غيره مفيش استقالة
بس ممكن عادل يخليه حلو ونكتب اول فيلم مع بعض ونعيش


وقد يجد نفسه في محاكمة أو يُحاسب إذا ارتكب أخطاء في الماضي
-----------------------------
أنا بورسعيدية
مبتهددش يا ماجي يا ولية انتي


لكن الانفراج يأتي فيالشهور الثلاثة الأخيرة
-------------------------
يالهويتيني يا أمه ها استنى ده أنا نار على زيت حار
لأ من الأفضل للفرج ان يأتي سريعا علشان صحتي الإنجابية وبشغتي


كأن عصا سحرية قلبت الأمور و عاطفياً قد يلعب الخارج دوراً مهماً في حياته
--------------------------
انا ضايفة اوباما على تويتر يمكن
ويمكن البرادعي
مش مقصرة برضه وحاطة حمدين ونور
مظبطة هيئة البرطمان الموازي يعني لو كان داخليا
لو خارجيا اوباما اسمر بس انا مش عنصرية
اوباما ما ما ما ماشي


يمر بفترة حساسة ودقيقة وحرجة
--------------------------------
على العموم انا في الميدل إيدج كرايسس الحمد لله وكله دلوقتي لي يجووووووووووووووووووووووز
ماعدا صحتي الإنجابية
آه
أنا نبهت أهو


حتى فصل الصيف ابتداءً من يونيو يلتقي بنصفه الآخر إن كان عازباً
------------------------------
الإجابة عذراء الربيع زينات صدقي
حسبو حسبوللي حسبولتي


علشان تحرمي بوست الحاجات ده
ولسه

أهم حدث لي السنة دي

محمد
محمد اللي يحمل كنية عائلتي
ابن اخويا
محمد اول نونو في نفس عيد ميلادي

ماهو انا حدث منيل لا يتكرر في العائلة الا كل 42 سنة

خدي بوسة بقى بعد الرغي والتحليل اللي نشف ريقي ده :)

ههههههههههه
يا صباح البنفسج والورد الابيض الجميل اللي كنت ببوسه النهارده ع الصبح كدة ومرسل لك شوية منه ومعاهم شوية بوسات وحضونات كتييييييرة ...
مش عارفة بقي اسد ولا سرطان المهم بحس اني متناقضة وكل وقت مش زي التاني بس فعلا في حاجات كتيرة بتقوليها صحيحة
وعموما كدة او كدة
المهم نحقق كل امانينا
ويلا بقي يا ست العرفة قوليلي بعيد عن اني هصاب بوعكة صحية وده مفروغ منه طبعا ....هحب من اول نظره امتي ههههه ده مستبعد يمكن...
تعرفي انا كنت كاتبة قصة عن الحب والعرافة زمان من كام سنة كدة ....
بس تضحك اووي
افتكرتها دلوقت...
شوفي مهما كان ومهما هيكون المهم اننا نتغلب علي كل شيء يضايقنا ونعيش ونحب ونصاحب ونجري ونلعب ...
ونقضيها حياة ....مش العكس...

فاتيما
:-*********************************************************************************************************************************************************************************************************************

معنديش غير كلمة واحدة
يارب
تتحقق تنبؤاتك

:-)
معللش اعذرينى
العودة المرة دى كانت اصعب
مححتاجة ليومين استعادة توازن
و انه مكنش حلم جميل
لا ده واقع اجمل بس عايز صبر

قبل ما امشى
تعالى و خذى حضن
اصله فاضى :-((

:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

فا تى ما

يا ام الخير
اقدر تماما ديمقراطيتك
اكتبى فى الابراج او الادراج
الجدى والدلو والنعاج
هههههه
كله مقبول من مامت يوسف

توقيع
واحد من مشاهير او مقاطيع برج
العذراء....رغم انى متزوج من زمان
هههههههه

بوست لذيذ
حاروح اشوف حكاية الكرسى الجحيمى

(:

يارب يا فاتيما

هو الواحد يكره اللى مكتوب ده

و كمان يوسف معايا فى نفس الفصل دا انا محظوظ قوى بقى (:

(:

تسلمى يا مامت يوسف

http://www.youtube.com/watch?v=fYb-_QyxodQ

و دى أغنية البوست ده (:

عليا الطلاج بالتلاته من نسواني التنين

أنا برج العقرب

ستيتة حسب الله الحمش
☆--------------★


ما عاش اللى يقول عليكى غلسة يا كبيرة
دا اولاً


ثانياً
انتى عارفة انى بكتبه من باب التفاؤل بسنة جديدة انما اعتقادى مش بجد والا كنت انقهرت لأنه للسنة التالتة وببنجاح منطقطع الحدوث ...
يتقالى يا بنتى
هتدخلى بيت العدل
ومدخلش
دنالو كنت بعتقد ف الحاجات دى
كان زمانى ف مصحة بتعالج
وانتى بتبعتيلى ورد كل اسبوعين
وازازة كولونيا خمس خمسات
:)


من حسنات البوست بجد
انى عرفت ان عفرتو عذارئى
وانا اقول انا وقعت ف غرامه ليه بسرعة كدا ؟!!!

اتاريه برج الرجالة ..
لما تحب يا خرابى الحب اللى بجد


ابعتيله سلامى وحبى وحضوناتى
لحد ما تيجى الفرصة واديهمله بنفسى
ومش بس السنة دى ..لأ
ربنا يسعد كل ايامك وسنينك
يا ست السوتيتات انتى

re7ab.sale7
☆---------★

يا رحوبة اسمعى كلامى
انتى برج السرطان يا ماما
مفيهاش فصال

وهروح اقرى التدوينة اللى قولتى عليها
بس تعالى هنا الاول

ليه مستبعد ؟!!
دنتوا برج الغرقان ف الحب لشوشته
ومهواش مصدر العقل دايما ف علاقاته
ساعات كتير بيسيب روحه للتيار
وينجرف
مش مستبعد بالمرة
مسمعتيش الغنوة اللى بتقول
الحب بييجى ف ثانية
ملوش وقت ومواعيد ؟!!

ان شاء الله الأمنية دى تحصل
والسنة الجاية لو ربنا احيانا
ف برج الحظ (3) هفكرك واقولك ..
شوفتى يا هاااااااانم

:)

كل سنة وانتى زى الفل يا رحوبة

wanda
☆----★

أعذرك على ايه ؟!!!
يا بت انتى عروووووووووسة
احنا ما صدقنا حد ف البلوجر الموكوس دا يفرحنا ويرفع راسنا نحن النسوة
تقوليلى أعذرك
عذرك معاكى خاااااالص
ولا يهمك


وان شاء الله يا ون ون
هيحصل
وحياة عيونك الحلوة دى
ليحصل يا حبيبتى

ويتلم الشمل ف حتة واحدة
و تبطلى سواحة ف الكون
وتسكنى حضن واحد مفيش غيره
ياااااارب


*********************************************************************************************************


×××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××

و

بيحبك قوى
وفرحانلك قووووووى
وبيدعيلك ربنا يسعدك قوووووووووووى

sal
☆--★


ياللهول
انتا برج العذراء يا سال
:)

الأبتسامة دى سببها حاجتين
اولهم
ان برجك لايق عليك قوى
وانا بتدلع على حس الفلك احلى دلع
وتانيهم
انى حاسة انى محظوظة جدا
لأنى محاطة بعذرائيين كتير
و من بختى الحلو عترت فيهم ف البلوجر

نضيف سيادتك حالاااااااا
لمشاهير برج العذراء
ومنقدرش احنا على زعل الحكومة دى فوق راسنا وجوا عينينا
و اختك فا تى ما
بتمنالك كل حاجة حلوة فيه
وأى متاعب تنتهى
ان شاء الله
طول السنة ... مش على أخرها بس

:)

Ramy
☆---★

:)

يا رامى يا ريت يسوفة يبقى ف حنيتك
ورقتك وطيبتك
ابقى كدا مطمنة عليه
وعلى اللى حواليه

وحاسة ان ربنا هيحبب فيه خلقه
طول ما هوه ماشى كدا



وميرسى ع الغنوة
انا بحب انوشكا
والغنوة دى ليها ذكريات عندى
لأنها طلعت وانا ف الكلية
فكرتنى باحلى أيام يا رامى

ربنا يسعدك ويحققلك كل الخير
يا ر ر

إبتسامة منى على ابتسامتك الحلوة
:)

مصرى جدا
☆------★


خلاص يا عم حاضر
انتوا هتضربونا
عقرب عقرب


تصدق لايق عليك


بس انتا برضو
تدى على ميزان
اصلك بيكون مزاجى جدااا
والعقرب كلاسيكى ثوابته جبال لا تهتز
و كمان الميزان قدرى .. بس عقله ف راسه
وعاطفى .. بس يجنن اللى امها وامهات الشارع اللى ساكنة فيه داعييين عليها و تفكر .. بس تحبه
لأ متفتحنيش ف برج الميزان
الله يخليك
احسن انا على آخرررررررى منه
وحفاظاً على صحتى العقلية
ورغبتك ف ان تكون عقرباً
هنقلك لمشاهير العقرب
حاضر


بس برضو هيجيلك فلوس
وتشوفنى بحاجة
ولا هشوف البخت ببلاش انا ؟!!

كل سنة
وانتا طيب يا هانى
وبألف خير



:)

حاضر هسكت مع أن النقاش في الموضوع دا مستهويني جدا ( في الحر دا)

خصوصا حكاية الثوابت دي

بس خلاص علشان خاطرك هسكت

وبعدين ما عنضربش حد وبالذات البنات الحلوه

بنطخ بس

وطن القلوب الخضرا

وحشتينى اوى

يارب يارب بجد كل امنياتك لكل الناس الحلوة دى تستجاب يارب وانا فيهم
دى احلى حاجة ان السنة دى انا فيهم :)

تانى حاجة بقه مش عارفة اوصفلك بجد احساسى وانا عمالة اقرا البوست
بجد انتى ملاك مش بشر زى حلاتنا كده انك تتعبى نفسك كل التعب ده علشان خاطر حبايبك يبقى انتى ملاك

ربنا يارب مايحرمنا ابداااااااا من البوست ده ف كل اول سنة

وان شاء الله ان شاء الله كل امنيتنا تتحقق يارب

فاتيما ليكى حضن وبوسة قد ما انا بحبك

يعنى اكتر ما انتى فاكرة وعارفة

هانى مصرى جدا
☆----------★

ما عنضربش البنات الحلوة ؟

طيب
يبقى انا نضرب سيادتك
لأنى مش بنات حلوة

انا ستات حلوة
:)


وحكاية الثوابت دى مفيهاش فصال
انتوا برج لما بينشف دماغه على حاجة
صعب حد يغيرله دماغه
ويا لهوتينى بقى لو راجل كمان
يعنى اضرب ف اتنين
عناد عشان عقرب
وعناد عشان راجل
وكلمته متنزلش الأرض


هوه صحيح من جوا العقرب لما بيكتشف خطأ نظرياته بيبقى عاوز يتخلى عنها
بس برستيجه بينقح عليه قوى
وبيبقى عاوز حد يفوتله ويعمل نفسه مش واخد باله
زى غالبية الرجالة برضووووو


الملخص
انا هعمل نفسى مش واخدة بالى دلوقت
ومتسكتش يا هانى
اكتب اللى انتا عاوزه انشالله عشرين تعليق ..دى مدونتك يا وتد يللى قلبتنا البلوجر ساحة قتال بالعيارات اللى ف فرح وندااااا

عقبال فرحى يا خويا
اما نشوف هتعمل ايه ساعتها


:)

мαησηα
☆-----★

انتى كل سنة فيهم
إن شاء الله يا قلب الملايكة
ويا حبيبتى انا لو عليا
اكتب اكتر من كدا
وربنا يحيينى ويقدرنى
وتكون حاجات مفيدة
ولو مش مفيدة
فمتضرش



سلامتك الف سلامة من البرد
ولو كنتى معايا
كنت هقولك
كل ما تعطسى
زى ما كنت بقول ليوسف
بعد كل عطسة طوالى


يرحمكم الله يا ابو سريع ومش انا اللى عطست يا ريس اومال مين انتا لا مش انا انتا لا مش انا يبقى لازم فيه حد غريب معانا يا رجالة


كل الجملة دى ورا بعضها
كدا كانت بتنقال


وبعدين
يرحمكم الله يا يوسف
فيرد
يرحمكم الله يا ماماو يصلح بالكم


:)



وانا كمان بحبك يا منونتى
يا قمورتى
يا قلب الملايكة

نص توقعك ليا السنه دى تم بالفعل
عقبال النص التانى يارب
(;
هاروح اشوف الست ماجى كاتبه ايه عنى؟

مدونتك زلتنى علشان ادخلها
الرحمه ياااارب
ده اشد عذاب عليا على صفحات الشبكه العنكبوتيه

http://www.youtube.com/watch?v=fYb-_QyxodQ

البوست بتاعك فكرنى بالاغنيه دى
كنت باموت فيها
وكنت حفظاها رغم انى كنت عيله عندى 10 سنين تقريبا
يعنى لا كنت لسه حبيت ولا عرفت الحب

فاتيما انتى بديعة والله
لحد اليوم كلامك عن برجى انا واحمد صح مليون فالميه
وربنا يستر
انا اسماء هه هه

إرسال تعليق