.

.

س .... قــــهـــوة ســــــادة  

Posted by: فاتيما in







انا مش واجعنى بشاعة الجرم
ولا واجعنى الأراوح التى حصدت
فى ليلة عيد للجميع




ولا واجعنى المشهد المزلزل للكنيسة 
وهى ترتج من آثر الإنفجار 
وخوف كل من فيها




ولا واجعنى حالة الذعر الأنسانى الواضح
فى لحظة المفروض تكون شديدة الامان
لأنهم فى بيت الرب



ولا واجعنى منظر الأشلاء 
وهى ملقاة 
فى الأرض كأنها مخلفات غير بشرية
فى منظر مرعب



ولا واجعنى الهم الذى ربض على القلوب 
كلها مسلمة ومسيحية 
و صبغها بالحزن و قلة الحيلة



ولا واجعنى ان بابا الفاتيكان 
بيطالب بحماية الأقباط فى مصر 
وكأنهم جالية تتبعه هوه
وليسوا اصحاب بلد زينا




ولا واجعنى السواد الذى يغيم 
على السما فى اول يوم من سنة جديدة
وكأنه بيقولنا الآتى أكثر سوادااااا






ولا واجعنى ان الحادثة ادت فرصة 
للمناظر اللى ربنا مش عاوز ياخدها 
لحد دلوقتى ويخلصنا منهم
عشان يدونا دروس فى التكاتف 
ووحدة الوطن وكأنهم شايفين شغلهم
والغلط مش عليهم 






ولا واجعنى تلقيح الخطأ على 
القوى الخارجية المتربصة
وكأنها متربصة ببلد تانية غيرنا
ومكنوش عارفين مثلاً 
وجيالهم تحذيرات مسبقة



ولا واجعنى  ان رغم فداحة المصاب
الا ان الاخ سرور يقرر يبعت وفد
من مجلس الشعب يتفقد مكان الحادث
وكأن من ماتوا ليسوا فى قيمة قتلى
تفجيرات سيناء ..  اللى اعلى راس 
ف الدولة راحت بنفسها تتفقدها
عشان هناك فرق 




ولا واجعنى ان الميت تمنه 20 الف 
وفيه حيوانات و هيا عايشة تمنها 
أغلى من كدا ضعف زى الحصان أو الجمل




ولا واجعنى ان رئيس الداخلية 
لسه قاعد فى منصبه
ولم يقال او يستقيل فى حلقة جديدة 
من مسلسل منظرنا اللى يوكس
قصاد الدنيا كلها 





ولا واجعنى أى حاجة
فى أى حاجة



أنا اللى واجعنى بجد
حرف الـــ (س) اللى سابق كلمات 
سنلاحق .... مرتكبى الحادث
ستفشل .... قوى الظلام
سنقطع .... يد الارهاب 
سنتعقب .... المخططين


حرف الـ (س) دا 
حارق دمى بصراحة



هيا التهديدات دى
مش بقالها مدة طويلة ؟!!
وهيا الكنايس دى حمايتها 
مش مسئولية الامن ؟!!
وهيا ليلة راس السنة دى 
مش فرصة مغرية 
للعالم الإرهابية
عشان  تصيب اكبر عدد ممكن ؟!!

 
طب الحادث دا وقع ليه؟
الأرواح دى راحت ليه؟
و أى إجراءات بعد الحادث تفرق فى إيه؟



 
حد قالك يا عمدة ... انا هولع فى قريتك
واقتل اللى ساكنين هناك
سمعت بودنك التهديد 
و استخفيت بيه ومعملتش حاجة 
وف ليلة صحينا كلنا .. ع البيوت بتولع 
و اللى فيها كمان 
طب بعد ما حصل اللى حصل 
 لما تقول هروح اجيب اللى هددكم يا ولاد
وانتقملكو منه واكسر شوكته 
إسمحلى يعنى ... ارد اقول ايه؟!!



وماذا يفيد ذبح الشاه
بعد سلخها ؟!!
ماخلاص اتعذبت واللى حصل حصل 




سؤال واحد بس مفيش غيره 
حرف الــ (س) دا 
لازمته ايييه ومعناه اييييييييه ؟!!!!
ملوش عندى غير معنى واحد 


س ... سادة 
س .. قهوة سادة 
على روح هذا الوطن
اللى لا يخشى عليه من يملكون
قدرة حمايته وآمنه ولا يرف لهم جفن
وفقط يكتفون بالظهور على الشاشات 
عشان يقولوا ... س 
س .. قهوة سادة
ومُرة علقم 
س  .. قهوة سادة 
س كبيرة بطول هذا الوطن وعرضه 



البقــــاء لله
فـــــــينا كــــلنا 

This entry was posted on السبت, يناير 01, 2011 and is filed under . You can leave a response and follow any responses to this entry through the .

45 كــــلام بيطــبطـــب عـــلى قــــلبى و روحــــى

حسبى الله ونعم الوكيل
ربنا ينتقم منهم ياااارب
منهم لله

ربنا يرحمنا برحمته

البقاء لله
مفيش كلام ينفع يتقال
لان الكلام مش حيرجع اللى راح
و مش حيبرد قلب ام راح منها ضناها غدر
و لا حيهدى الناس الغضبانه و الحزينه

ربنا يرحمنا برحمته
و يرحم كل الشهداء فى العمليه دى و اللى جاى بعدها
لانه حيتكرر حيتكرر

عشان احنا اصلا مابنفهمش ولا بنسمع ولا حتى بنحاول نشوف

لا تعليق على اللى حصل دا فعلا

بسم الله الرحمن الرحيم

{ إنما جزاء الذين يحاربون الله ورسوله ويسعون في الأرض فساداً أن يقتلوا أو يصلبوا أو تقطع أيديهم وأرجلهم من خلاف أو ينفوا من الأرض ذلك لهم خزي في الدنيا ولهم في الآخرة عذاب عظيم )

صدق الله العظيم

وفوق كل دا
ماحدش واخد بالوا
السودان اولاا
واحنا وراها
ربنا يستر فالي جاي

ولا واجعنى ان رغم فداحة المصاب
الا ان الاخ سرور يقرر يبعت وفد
من مجلس الشعب يتفقد مكان الحادث
وكأن من ماتوا ليسوا فى قيمة قتلى
تفجيرات سيناء .. اللى اعلى راس
ف الدولة راحت بنفسها تتفقدها
عشان هناك فرق

" دي بقى وجعاني "



ولا واجعنى ان الميت تمنه 20 الف
وفيه حيوانات و هيا عايشة تمنها
أغلى من كدا ضعف زى الحصان أو الجمل




ولا واجعنى ان رئيس الداخلية
لسه قاعد فى منصبه
ولم يقال او يستقيل فى حلقة جديدة
من مسلسل منظرنا اللى يوكس
قصاد الدنيا كلها


" دي بقى حرقاني"



ولا واجعنى أى حاجة
فى أى حاجة



أنا اللى واجعنى بجد
حرف الـــ (س) اللى سابق كلمات
سنلاحق .... مرتكبى الحادث
ستفشل .... قوى الظلام
سنقطع .... يد الارهاب
سنتعقب .... المخططين

" دي هتجنني ... حسبي الله ونعم الوكيل في كل مفتري وظالم وقاعد على كرسي هو موش قدة ..اصلنا منشبهش اجانب شارم ايش جاب لجاب ...هما مرفهين حتى وهما ميتين واحنا طافحين الدم من ساعة مكنا مولودين مش ذنبنا ومش ذنب بلدنا ذنب اللي قاعدين...متفرجين "
لولا

دى اخرة التطرف وادعاء الحق المطلق
بح صوتنا ونحن نحذر من المضى فى طريق الانغلاق والتحجر وادعاء امتلاك الحقيقة
وادعاء الفرقة الناجية وما اليه

ذلك هو السبب
سواء تم بمساعدة ايدى خارجية او
كان تدبيرا داخليا محضا

لا حول ولا قوة الا بالله العظيم

:(( كفيتى ووفيتى يا فاتيما

http://www.youm7.com/News.asp?NewsID=328455

تصبحون علي وطن !!!!!!!!!!!

انا مش عارف اقول ايه
حسبى الله ونعم الوكيل فى كل ظالم
منهم لله
ربنا ينتقم منهم كلهم
يارب انته العالم المطلع
انا خسرت اعز اصحابى مش عارف اقول ايه
اعزى اهله واقولهم ايه
كان لسه معايا ولسه مكلمه واقول سنه حلوه عليكم وعلينا
دقايق واسمع الانفجارتا واعرف الخبر اللى رجليه مش شيلانى من سعتها
يارب انتقم لينا يارب
يارب احنا مظلومين يارب
مسحيين ومسلمين
مظلومين فى البلد اللى حاسين انها مش بلدنا

وجعنى قووووى قوووى بقى

ولا واجعنى ان بابا الفاتيكان
بيطالب بحماية الأقباط فى مصر
وكأنهم جالية تتبعه هوه
وليسوا اصحاب بلد زينا

ليه احنا هما وهما احنا
مع بعض على الحلوه والمره
بيوتنا جو بيوت بعض
الجامع فى وش الكنيسه
والكنيسه جانب الجامع
بناكل ونشرب مع بعض
بنسهر مع بعض
بنفرح مع بعض
وكمان بنحزن وايه بعض

اللهم ارحم كل الضحايا يارب
مسحيين ومسلمين
وعوضنا فيهم خير يارب

السلام عليكم
س معناه سوف
يعنى بعدين
اقصد مش دلوقتى
لو كان عندنا وقت
او لو كان باقلنا عمر
او لو كان حد لسة مااتصابش
او ............. لماربنا يسهل
البقاء لله
يارب سترك

نعم عزيزتي مسؤولية الدولة كبيرة فيما حصل لانها تلقت تهديدات وكان من المفروض ان تأخذ هذه التهديدات محمل الجد وتتخذ التدابير الوقائية لاستباق اي عمل ارهابي لكنها للاسف لم تفعل وهذه مصيبة.
رحم الله الضحايا ورزق اهاليهم الصبر ولك الله يا مصر

وحشاااااااااااااااااااااني اوي والله
بس خلاص

اولا البقاء لله
ربنا يرحم الضحاياه
ويصبرنا جميعا
ثانيا مش دفاع عن الحكومه بس كان فيه فعلا اهتمام امنى قبل الحادث قد يكون ماكنش كفايه بس انا شوفت بعينى امام الكنائس عندنا حرس زياده عن الطبيعى وسمعت ان المسحيين نفسهم كانوا بيتفتشوا قبل دخول الكنائس والحادث عربيه مفخخه انفجرت شئ مش متعودين عليه فى مصر فسقط سهوا احتمال حدوث شئ بالطريقه ديه كان فى امن واخد احطتياطه ولكن فى حدود ماتعود عليه لم يكن عنده رؤيه جديده وماكنش واخد احتياط على ماهو جديد

وادي الحكومه

وادي الامن

مش عارفين يدافعوا غير عن النظام

لكن الشعب يتفلق ويتحرق

وفي الاخر بتدالفعوا عن حسني مبارك؟

حسبي الله ونعم الوكيل

الحب الجميل
---------

صباح الخير يا إيمان

الرحمة
اظن ان طلب الرحمة
هى أول شىء نطلبه فى هذه المحنة

صيدلانية طالعة نازلة
-------------------

للأسف
كل سطر ف تعليقك صح يا علا
المشهد هيتكرر
طول ما الأشخاص نفسهم موجودين
ومفيش شىء بيتغير

جارة القمر
----------

والله يا حبات اللولى
فينا اللى بيسمع واللى بيفهم واللى بيشوف
بس دول للأسف لا يتصدرون المشهد
ابطال الحدوتة
اما أدعياء التدين والمتطرفين
او شيوخ المنصراللى ماسكين الزمام
أو الضحايا اللى بيدفعوا التمن

وبس

momken
------

الآية اللى حضرتك كتبتها
مقصود بيها مين
وإيه ؟
ممكن توضح لأنى مش فاهمة ؟

يااااااااااااارب ارحمنا

sony 2000
---------

متخافيش يا سونى
اهل مصر فى رباط ليوم الدين
بس التمن لحدوث ذلك
غالى قوى للأسف

ربنا يستر

لولا وزهراء
----------


انا واجعنى كل حاجة انكتبت يا لولا
بس اللى واجعنى اكتر
فكرة تصدير المشهد للعالم
كما لو كنا كلنا فى جانب واحد
حكومة وشعب
ودا مش حقيقى بالمرة
احنا فريقين
مش مسلمين ومسيحين
لأ
احنا نظام و اهالى

ونقطة النور الوحيدة
قى كل هذا السواد الحاصل
ان الاخوة المسيحين بيحملوا مسئولية ما حدث لأصحاب الجرم الحقيقين

ودا ف حد ذاته
شىء كويس جدا
ف عز الصدمة دى

ويكا
----

ومُرة علقم يا ويكا
متنشربش

sal
---

وانعدام الشفافية يا سال
واحتكار كل نفر لحاجة مش من حقه لوحده

قصة كاميليا وقبلها وفاء و ...و...
حالة التعتيم والإحتقان
عدم تدخل الجهات السيادية رغم علمها مسبقاً بالتوترات اللى حاصلة
الرغبة فى ان الخلافات تفضل موجودة من باب فرق تسد
التعامل بإستهانة ونبعت المطافى تطفى فى آخر لحظة

ثم ان المرة دى حتى لو افترضنا
ان الحكاية جاية من برا فعلا
وان كنت مبصدقش بصراحة
بس لو افترضنا
حماية الداخل من الخطر الخارجى
شغلانة مين ؟
امكانية تلقى المعلومات مسبقا
قدرة وامكانات مين ؟
حماية الارواح والممتلكات
مسئولية مين؟

ربنا يصبر اهل الناس اللى راحت
واللى لسه بيتعالجوا
يخرجوا من هذه المحنة

мαησηα
------

كان نفسى اكتب اكتر يا منونا
كل الكلام ميعملش حاجة
قصاد الدم اللى سال
والأرواح اللى راحت
والرعب اللى حصل
ولسه بيحصل

:(

Haytham Alsayes
--------------

تفتكر يا هيثم
بعد ليل اسود مغموس بالدم
أى صباح بعده سيكون ؟!!!

محمد التركى
---------

البقية فى حياتك يا محمد
وربنا يصبرك
ويصبر اهله


كلنا موجوعين حتى لو منعرفش حد فيهم

انا اول ثانية فكرت
يا رب
هوه انا عارف حد فى اسكندرية
من المدونين المسيحين
ملقتش
قولت الحمدلله
وبعدين كرهت نفسى قوى على الكلمة اللى طلعت منى تلقائى
انا بحمد ربنا على ايه ؟!!
انى اللى ماتوا معرفش حد فيهم ؟!!!

وبعدين قولت لأ
انا بحمده ان اللى اعرفهم وبحبهم بخير
عادل ومانمينو ومايكل و رامى ..

لكن قلبى اتوجع تانى
وقولت كأنى اعرفهم
والكنيسة دى كانت ف اسكندرية


طب (بعد الشر ) لو كانت
فى القاهرة
ساعتها كنت هعمل ايه؟
كنت هبقى زى المجنونة
وزى الناس اللى بنشوفهم بيدورا على اللى بيحبوهم وعاوزين يطمنوا عليهم ويسمعوا أى خبر او حاجة

انا دلوقتى عرفت واحد فيهم
صاحبك اللى بتحكى عنه
:(

ربنا يصبرك يا محمد
قلبى معاك
وقلوبنا كلنا أكيد

مدونة رحلة حياة
---------------

لأ يا عزيزى

س معناها

كلمتين نجمل بيهم الوش القبيح
وبوقين نعمل بيهم مسيطرين ع الموقف
وحركتين نّثبت بيهم اللى هيطلعونا مقصرين

خواطر شابة
----------

الله يفتح عليكى يا خواطر
انا فرحانة قوى بتعليقك
دا وتعليقاتك كلها عموما


عارفة ليه؟

لأنها بتحسسنى دايما
ان كل حركات النفاق وشغل الحواة والجلا جلا اللى حاصل دلوقتى ..
زى ماهو مش نافع يخدعنا لمصريين
كمان واصل لإخواننا فى كل حتة
ف بلادنا العربية
اللى قلبهم علينا أكيد


ويهمنا يكونوا شايفين مصر صح
مصر الحقيقية
مش اللى بتطلع ع الشاشات
..تقول س


انتى كمان نقطة نور
ف العتمة دى

عاشقة الرومانسية
----------------

عندك حق يا دودو
عندك حق

sony2000
--------

وانتى كمان يا حبيبتى
انتى كمان

عمرو يسرى
---------

ازيك يا عمرو

مع احترامى الكبير لكلامك
جملة واخد احتياطه فى حدود ما تعود عليه دى غريبة شوية ..
لا شويتين كمان

الامن بتاعنا ما شاء الله
ميزانيته محترمة جدا
وادائه على أعلى واحدث مستوى
بس فى حاجات وحاجات

اقرى مقالة وائل قنديل ف الشروق
وانتا تفهم قصدى

لما بيحبوا يأمنوا
بيعملوا كدا

وحكاية سيارة مفخخة دى
او حد لافف نفسه بحزام
أى كانت الطريقة
حجم الخساير بيقول ان المسألة مكنتش صغيرة ومحدودة
ولو اليوم عادى اقولك ماشى
لكن دى ليلة راس السنة والكنايس مفترض تكون محتشدة على آخرها
يعنى لازم يكون فيه استنفار

جايز تقول عليا ببالغ
او مش براعى الظروف

لكن اشلاء الأبرياء
وعشرات المصابين
و منظر الكنيسة وهيا بتترج
والرعب الحاصل وخيم على الكل
مخلينى اكون كدا


البقاء لله

dr.lecter
--------

غضبك فى محله تماماً يا ليكتر
مقدرش الومك يا عزيزى
اغضب يا غالى لأقصى حد


عارف اللى فارسنى
ان فيه ناس بسيطة
هتركب الموجة
وتتصور ان كلنا ف خندق واحد
اسمه الدفاع عن امن مصر وامانه
والحرب على الإرهاب
والكلام الكبير دا


بينما احنا ف اول وآخر الامر
منفصلين عن بعض
احنا لو ف حرب فعلا
نبقى متفرقين شعب ونظام على خندقين
واحد فيهم بيردم التانى باللى فيه
بس بالتقسيط
حبة حبة



عموما
انتا احتسبت من ظلموا
الذى لا يغفل ولا ينام
ومفيش بعد الجملة دى
أى كلام

من كل بستان زهرة
----------------

اللهم آمين

حسبي الله ونعم الوكيل في كل بني ادم تعمد اذيه وموت انسان

استاذه فاتيما
اعرف ان المسئله مش صغيره ولم انكر تقصير الحكومه فى حمايه مواطنيها لان الحكومه عندما تفشل فى حمايه مواطن واحد بيكون دا تقصير منها مش لازم تفشل فى عدد كبير عشان نسميه تقصير لكن انا مش عايز ينصب غضبنا من الحادث على الشرطه
و مقال الاستاذ وائل قنديل جميل جدا وانا عارف انهم لو عايزيين يامنوا حاجه هيامنوها كلام جميل
ولكنى يراودنى سؤال ممكن يكون سبب كلامى الغريب شويتن ثلاثه كمان ويمكن اربع شويات عندما امنوا مولد ابو حصيره والصهاينه اللى اتوا يعكننوا علينا هما كانوا بيامنوا مكان واحد او منطقه واحده معروفه وخط سير الصهاينه من اول ما يوصلوا مصر ببيترصد وبيكون معروف ولكن احنا بالرغم من اننا عارفيين ان كان فى تهديد سابق احنا عندنا فى مصر كام دار عباده اصلهم بردوا ماكنوش بيامنوا كنيسه القديسين فقط ولكن بيامنوا جميع الكنائس فى مصر يعنى الموضوع مش حكايه كنيسه واحده يعنى الموضوع مختلف مش سهل زى موضوع ابو حصيره هناك اختلاف وطبعا عارف ان دا مش مبرر بس بردوا الموضوع مش سهل زى موضوع ابو حصيره وبالتالى طبيعى انه يحدث خطاء صحيح خطاء فادح بس لصعوبه الموضوع انت بتائمن كام مليون مش عدد صغير
ربنا يرحم الضحاياه

عايزه اشرب قهوة سادة علي روح حد تاني انا :(

قولوا للظالم كفايه ذنبهم ايه الضحايا

مصر بتموت يا فاتيما
كنت الاول مصدق ان مصر بتمرض بس مش ممكن تموت لكن دلوقتى فعلا خلاص مصر بتموت
الله يرحم اللي مات والعايش
والقهوة على روح الكل

فجأة ارتج المترو وصرخت عجلاته الحديدية تتحرك وهى تحملنا جميعاً، وانخرط كل راكب بهمه الشخص، في حين ألح على ذهني هم واحد لم يفارقني، أليس ثمة ما يجمعنا نحن جماعة أقباط المترو مسلمين ونصارى، بعد أن أغلقت الأبواب وحيل بيننا وبين الخروج حتى نصل وجهتنا بسلام وصرنا نسيجاً واحداً شاء من شاء وأبا من أبا.

من تدوينةقديمة من مدونة بيتنا القديم

مساء الحب في الله .. من يوم ما كتبتيها وانا كل يوم عاوز اعلق عليها .. عاوز اسمعها للدنيا و برضه ال بيوقفني هو حرف ال ( س ) .. حاجات كتيره بتوجع اوي و ال بيهون علينا ان لسه في قلوب طيبة الحمدلله ان بشوفها يارب دايما بخير

سلام به تمام مهمانان و کاربران
مردان ، زنان ، نوجوانان : لطفا ، به برخی از اطلاعات در مورد سایت های دوستیابی محبوب را به من بدهد .
تشکر

إرسال تعليق