.

.

واحــــــــــــــــــــــد  

Posted by: فاتيما in ,






السلام عليكم يا جماعة 
هاه 
واخدين بالكو من التحية ؟
السلام 
يعنى عكس الحرب والتطاحن
والشقاق والفرقة و الفتنة
وكل شىء مفسد ف الأرض


أما بعـــــد 


 معرفش البوست ممكن يتقال عليه 
جايز يكون هجومى
وسخيف اللهجة وكلامه مكرر ومعاد
بس انا عارفة اسبابه 
ومكنش ينفع مكتبوش 




هوه صحيح هجومى بعض الشىء 
لأ ..كل الشىء 
بس معلش استحملونى 
م كله بيهاجم الايام دى 
اشمعنى انا اللى هعمل 
مؤدبة وذوق بقى






وكل الحكاية ان ليا زميلة ف الشغل 
مسيحية قبطية مصرية صميمة
وحظى الحلو انها اول واحدة 
اتعرفت عليها لما استلمت الشغل
كنت مرتبكة جدا ومعرفش حاجة 
ف شغلانة السكرتارية دى ولا افهم فيها 
لولا هيا كانت بتساعدنى 
وترد دايما بلا ملل على اسئلتى العبيطة 
بتاعت فين الفاصلة و اعمل جدول ازاى ..الخ






ورغم ان المكان كان فيها زميلات ياما 
هيا اكتر حد ارتحتله من كتر ما هيا خدومة 
بتحب الناس وتعرض المساعدة 
و لا تبدى أى زهق من خيابتى 
يعنى بجد من الناس اللى ينقال عليهم 
حضن واتخلقله بنى آدمة 






علاقتى بيها كانت عادية لأنى محبتش 
اوثق علاقتى بحد قوى  ف البدايات
بس كمان لقتنى بحكيلها 
عن يوسف 
لأنها الوحيدة اللى سالتنى .. عليه 
سؤال من أم ..لأم 







و يوم الحد اللى كنت عاملة فيه حسابى 
اصبح على زميلتى العزيزة 
واهنيها بالعيد  
لقتها غايبة ومجتش للأسف 
اتخضيت لتكون تعرف حد من ضحايا الحادث 
بس تانى يوم اطمنت انها واللى تعرفهم 
بخير و سألتها اخباركم ايه 
والكنيسة بتاعتكم متأمنة كويس 
كان ف عينها حزن ..وبتقول آه فيه حراسة
بس ..بعد إيه؟!!






مقدرتش افتح بوقى طبعا 
لأنى سالت نفس السؤال دا قبلها 
بعد إيه؟!!







طبعا مش دا موضوع البوست اكيد 
بس الموضوع بقى
ان لينا زميل مشترك 
المفروض انه كل يوم يصبح عليها 
ويقف يرغى معاها ومعايا ومع الكل وعادى
تمام ومفيش جديد 


النهاردة فوجئت بالاخ اياه
اللى بياكل معاها عيش وملح 
وزميلها من قبل انا حتى ما اعرفها 
فى مناقشة جانبية بينى وبينه 
وبين كام نفر تانين
بيقول كلام تااااااااانى خالص 
غير اللى كنت اتصوره يطلع منه 
واللى للأسف اكتشفت انه صورة طبق الاصل 
من كلام اهبل كتير بينقال ع بعض المنتديات والمدونات و الفيس بوك وايميلات بتوصلنا







كلام من عينة 
انتى مزعلة نفسك ليه يا أستاذة
دول كفرة
دول نصارى وحدودهم ف الإسلام معروفة
هما اصلا بيكرهونا بس ساكتين وشايلين
مصر بقرة وبيحلبوها وبعدين يهاجروا على برا 
دول بيستقوا بالغرب ومصلحتهم اهم
السحر مالى الكنايس وبيستعملوه ضدنا
دول لما بنت بتسلم بيخطفوها ويخلصوا عليها
ومنعرفلهاش طريق 
احنا لازم ننصر ديننا قبل ما يندثر بسبب
الهجمات الصليبية عليه
واخواتنا ف بلاد المسلمين اولى بينا  
كلمة التسامح دى بتستخدم غلط 
و يا ريت منكونش منافقين 
على حساب العقيدة
و البلوفر اللى حضرتك كنتى  لابساه
من كام يوم كان عليه صلبان 
وانتى مش واخدة بالك وانا محبتش اقولك
بس ما دمنا فتحنا الموضوع بقول 
لأنك هتتحاسبى وانا هتحاسب 
عشان دى شهادة حق وانا بكتمها 
ومترليووووس وانفتح ف وشى 
بعيد عنكم







انا طبعا ف الاول كان عندى حالة تتنيح
كارف على ذهوووول يصاحبه رغبة ف القىء 
بس مسكت نفسى لحد ما جاب آخره 
وبعدين دخلت ف مناقشة وسجال
ارد على كل جزئية قالها 
وآخر المناقشة كانت حتى ان 
سلامو عليكو  بتاعة ربنا
ميصحش تنقال بيننا تانى 
بعد الكلام اللى انطرش قصادى 
و خلانى اتمنى الارض تنشق وتبلعنى 
ولا كنت عشت يوم 
وسمعته بودنى يا لهوى






لأ يا لهوى ؟!!!
دا يا لهوتينى ؟؟!!
يا عشرتلاف لهوى ف بعض ؟!!!
هيا الناس مخها اتلحس ولا ايه؟
بقى هوه دا الدين بتاعنا 
ودى نصرته من وجهة نظرهم  ؟!
انا طول الوقت اقرى هذا الكلام
واقول دول عالم مخاليل 
لكن اول مرة اشوفهم وجهاً لوجه 
واتصدم ف زميل بقاله سنة شكله 
حجة ف الأخلاق و الذوق والتدين 
اللى أتاريه تدين مزيف متطرف 
لونه اسود غطيس 




مين قال ان النصارى كفرة ؟!!
بمناسبة ايه ؟
اللى اعرفه ان كل من يؤمن بإلله 
فهو ليس كافر 
كافر بالإسلام ..ماشى 
لكن كافر بربنا ازاى ؟!!
مش فاهمة  !!!




وبعدين ايه حكاية الصليبين دى 
اللى طالعلنا ف المقدر جديد ؟؟!!!
هوه مش سنة 2011 جت يا اخواننا 
ولا احنا لسه ف العصور الوسطى
و انا مش واخدة بالى ؟!!



والناس اللى مزعلاها الصليب قوى 
ماله فيه ايه ؟
مش رمز ليوم خلدته الإنسانية 
وبيفكرنا بسيدنا عيسى (عليه السلام)
اللى هوه روح الله وكلمته ؟!!
وايه يعنى لما يبقى ف هدومى
او على شنطتى  او ف أى حاجة 
دا هيغير من اسلامى فى شىء ؟



وايه نظام البقرة وبيحلبوها دى ؟!!
والأستقواء بالخارج ..الخ 
مكنش بقى دا حالهم يا بنى 
اللى بيعملوا كدا كام نفر ومعروفة توجهاتهم
واجندتهم وتمويلهم 
انما باقى المسيحين زيهم زينا 
كلهم نفس المعاناة ف طوابير العيش 
والأنابيب والمستشفيات و الكوسة 
والتدوير على وظايف 
ونفس الأمراض والحوادث والمصايب 
بتنقسم علينا 
ونفس الفساد بينهبنا كلنا
و لو فيه طبقة معاها فلوس
فزيهم زى المسلمين اقليه
عدد محدد .. اما السواد الاعظم 
فمطحون و كلنا هذا المواطن المهضوم حقه
لو مكنش مسنود بسلطة او فلوس 



حكاية السحر دى مش هعلق عليها
اصل دى عايزلها كلمة ابيحه
مقدرش اكتبها بصراحة  عشان
دى مدونة نظيفة حتى الآن 
ولسه مفكرتش اغير التوجه 




لكن اللى عاوزة اقوله بجد
احنا ليه بقينا عاملين كدا ؟
ليه بنقسمها حتت وهويات وملل 
ليه فاكرين البلد دى لازم تبقى بتاعت
حد بعينه من الفريقين ؟!!
يا بتاعت الأقباط يا بتاعة المسلمين ؟
ماهيا طول عمرها سيعانا سوا 
و لا اشتكت ولا قالت لأ 
فضلت و زى ما شاهين قال 
مصر هتفضل غالية عليا 




ليه بنتمحك ف ربنا ؟!!!
طب يللى عامل نفسك غيران على دينك
هوه مش ربنا سامحلك تتجوز مسيحية  ؟!
عارف يعنى ايه جواز؟!!
يعنى حضرتك ..ام ولادك اللى هتربيهم
هتبقى لابسة صليب ف رقبتها 
ومدقوق صليب على معصمها 
ومعلقة صورة العذرا والمسيح 
وبتروح الكنيسة كل اسبوع والأعياد
ومتقدرش تكرهها على تغيير دينها 
وملزم تحميها 
وتحترم عقيدتها طول حياتها





عارف يعنى ايه تبقى ام اولادك  ؟
يعنى لها كل حقوق الزوجة المسلمة
يعنى تديها اسمك وتبنى معاها بيت
من الألف للياء و تقاسمها حياة مشتركة 
يعنى تنام ف حضنها و تختلط بأمك واخواتك 
يعنى تاكل من ايدها انتا وكل ضيوفك 
يعنى اخواتها يكونوا اخوال ولادك
يعنى تثق ف انها هتحفظك ف مالك وعرضك واولادك وشئونهم الصغيرة والكبيرة 
يعنى ترثك بعد موتك 
يعنى تبقى جدة احفادك  
فيه اقرب ليك من كدا إيه؟؟؟




وربنا قالك اتجوز مسيحية وعادى 
مقلش بقى ...متكلوش معاهم 
ومتقعدوش معاهم 
ومتنكشفوش عليهم يا ستات
عشان دول اجنبيات
..الخ ألخ من الكلام الغريب المريب 
اللى بنسمعه يوماتى دا ويحرق الدم 
وبعدين معلش 
ربنا قال لا إكراه فى الدين 
يعنى متغصبش حد يغير دينه 
وخلقنا شعوب وقبائل وكان قادر سبحانه 
يخلينا ملة واحدة وعلى دين واحد 
بس دا محصلش لحكمة واسباب 
نيجى احنا ونعمل روحنا فاهمين قوى 
ونرفض أى دين مش على نفس مسارنا 
ونقعد ننصب انفسنا قضاة والهة 
ونقول دا كافر ودا أبصر ايه 
و هنغير على ربنا أكتر منه 
وكأننه مستنى دفاعنا وحمايتنا احنا 
احنا ؟!!!
احنا مين وفاهمين لحد فين ف ديننا ؟!!






طب اذا كان ربنا بيقولك اتجوز 
وناسب المسيحيين
 وتعايش معاهم فى اسرة واحدة
مش هيقولك تعايش معاهم 
فى وطن واحد ؟!!
ازاى يعنى ؟!!
هيا الدنيا ماشية ازاى 
والعقل دا انشال
واتحط مكانه ايه حد يفهمنى ؟؟!!



 
انا محرقش دمى من كل المناقشة
بصراحة غير كلمة 
منبقاش منافقين دى 




إهييييه
لا يا شيييييخ 
طب اولا هلا شققت قلبى وعرفت اللى فيه؟
طب انا متمسكة بدينى الحمدلله
وف نفس الوقت مخلصة ف حزنى
ع اللى راحوا ولو انى معرفش حد فيهم 
معرفة شخصية 



ثم يعنى انا لما بكلم الست
  واواسيها فى مصابها وكنت لابسة 
مرة بلوفر فيه صلبان ومش فارقة معايا
ابقى كدا بنافق على حساب دينى ؟!!





اومال انتا يا بعيد يللى بقالك زمن
بتصبح عليها وتاكل معاها عيش وملح 
وتجاملك ف المناسبات
وفطرت معانا ف رمضان وسابت جوزها 
وعيالها كرامة لينا 
و قعدت معاك على ترابيزة واحدة 
تبتسم ف وشها عمال على بطال 
بينما رآيك فيها وفى الصنف كله كدا 
اسميك انا ايه ؟!!





وايه روح الشماتة دى ؟
احنا مالنا يعنى ايه 
ومتزعليش نفسك كدا ؟!!
مهو الاذى اللى فاكرينه 
ملوش دعوة بينا النهاردة 
بكرة ييجى لحدنا  ويبقاله دعوة ونص وتلتربع
والسكوت معناها الموافقة 
والموافقة تمشى ع الكل بقى 
ولا تكونش فاكر الجهل والتطرف هينقى 
ويبقى عنده منطق مثلاً 







طب لاش المواطنة وصاحبنى ف الوطن 
بلااااااش 
طب فين الانسانية ؟
يعنى لامؤاخذة لو حصلت حادثة دلوقتى
ف الشارع قصادى و حد داسته عربية
وبينزف اجرى عليه ..ولا ّابص الأول 
ف ايده صليب .. ولا لأ قبل ما انجده؟!!!
طب فرضنا طلع مسيحى 
اسيبه وامشى يعنى
ولا هيا بقت كدا ولا إيه ؟؟!!
يعنى بلاش الواحد يتعاطف مع جيرانه
ف الوطن الواحد 
والبلد الواحد 
والشارع الواحد 
والبيت الواحد 
وتختة الفصل الواحدة 
وبنش الكلية الواحد 
والأتوبيس الواحد 
واوضة المستشفى الواحدة 
و المحنة الواحدة
الخ 
الخ 
الخ
والا سكننا ف كل دول سوا 
ونيجى ف الأزمات و فجأة ... هنفترق ؟!!






انا نفسى افهم هذا النوع  من البشر
بيفكر ازاى 
يعنى يا تورى يا هل تورى 
جوا الجمجمة دى فيه مخ 
ولا غالبا هلاقيه متحول بقدرة قادرة 
عند بتاع الكبدة 
اللى ع ناصية الشارع وانا رايحة الشغل ؟!!








طول ما كان زميلى بيتكلم 
و انا ف جاى ف ذهنى صورة الساحرة 
ام اخضر دى بتاعت فيلم الساحر اوز 
فاكرينها؟؟؟
اصلها ف طفولتى كانت رمز للشر المطلق 
اللى معندوش تفاهم 
ومينفعش معاها غير انك تمسك
مقشتها دى وتديها بيها على ام رأسها 
يمكن بعد الإرتجاج تتعدل و ترجع طبيعية
وطيبة وكويسة وبتفهم 




المقشة ممكن تستخدم استخدام آخر 
(مش زى الإقسام خلى قلبكو ابيض)
ممكن يتكنس بيها الدماغ دى 
وكل الادمغة المشابهة 
عشان تنضف م الواغش اللى ماليها 
وتعرف ان ربنا خلقنا عشان نعمر الأرض دى 
مش نخربها بأفكار كلها تطرف
واظن حادث كنيسة القديسين 
مينقلش عليه غير لفظة الخراب






الخراب ف الارواح والممتلكات 
و ترويع الامنين
وبث الفتنة 
و محدش مستفيد غير الأعداء 
ف الخارج والداخل
واحنا مفروض نلتفت لكدا 
ومنمشيش ورا أى حاجة تانية 




انا كتبت كل دا ليه ؟؟



كتبت عشان دايما كنت اقول ليوسف 
ان جد جد جد جدنا كان قبطى 
زى احمد بهجت الجميل
ف كتابه مذكرات صائم ما قال 
كل مصر عرقها لسابع جد مسيحى



كتبته عشان الصليب دايما يفكرنى
بمفتاح الحياة
وعشان مشهد الصلب أى كان اختلافنا
على نهايته فهو فكرة ببساطة 
بتقول ازاى لحظة العذاب الشديد 
ممكن تلهم ملايين البشر 
وتخليهم يفكروا ف الخير والرحمة 
مش الإنتقام والدم 



كتبته عشان دمى محروق 
زى كل واحد ف البلد دى بيحبها 
و قلبى واجعنى على الناس اللى راحت 
والدم اللى غرق أرض بنيت لذكر الرب







الرب بتاعنا وبتاعهم 
اللى هوه واحد 
والواحد مبينقسمش
و احنا واحد صحيح 
وعمره ما هينقسم ابداً 
قولوا آمييييين

-------------------
تدوينة صديقة 
من كان منا بلا خطية .... Manamino



 











البوست دا اهداء بائس على قد حاله 
لزميلتى الطيبة ف الشغل 
و لعادل و رامى ومانمينو ومايكليتو
ولجارتنا وانا صغيرة وكانت بتاخد بالها منى 
وماما مسافرة وتحمينى زى بناتها
ولطنط مارى اعز صديقات ماما  واصدقهم حباً
ولمارى زميلتى اللى قعدت 6 سنين 
تولعلى شمعة ف كنيستها وتدعى
عشان ارجع لأهلى بسلام انا ويوسف
و لفيروز ست الحزن والجمال 
اروع صوت ف زماننا 
و ليوسف شاهين
اللى علمنى احب السيما
لكل حد ف البلد دى بيحبها بجد
مسيحى 
و لا مسلم 
و لا جن أحمر حتى
 
-------------------------------

This entry was posted on الثلاثاء, يناير 04, 2011 and is filed under , . You can leave a response and follow any responses to this entry through the .

80 كــــلام بيطــبطـــب عـــلى قــــلبى و روحــــى

اه ثم آه

فا تى ما

انا حاسس بالبوست دا بشكل لا نهائى
ومعاك فى كل حرف مش فى كل كلمة
وسعييييد ان كلامى اللى قولته عندى
ومعجبش ناس ياما
الواقع بيأكده

ربنا يعلى مراتبك

عرفه
فالجو دا كلو
ليا واحدا صحبتي
ماجي
كنا بناخد مع بعض كورس الكمبيوتر فالجامعه
من سنتين تقريبا...وكنا جروب كبير
بعد ماخلصنا ماحدش عبرني غير هي وشويه وفضلنا نكلم بعض لحد مالحياه اخدت الكل
لقتها من كام أسبوع بتكلمني قبل أمتحانتها....بتطمن عليا
قالتلي كنت عوذا اكلمك من بدري بس رقم فون الموبيل ضاع قعدت المدا دي كلها تدور علي رقم البيت لحد مالاقتو
حسيت بجد اد ايه احنا كلنا مع بعض ومش محتاجين كل الشعارات دي
بذمتك أسيب برضو حد ذيها ونسيب بعض كلنا
اذاي بالعقل وبالمنطق
ربنا يارب يحببنا كلنا فبعض
ونفضل مع بعض علي طول

بصراحه انا مستغرب فى كلامك الجمله ديه
انا نفسى افهم النوع دا من البشر
بيفكر ازاى

معقول حضرتك مش عارفه ان التاس اللى زى دول مابيفكروش اصلا ماعندهم الابشن دا
انا اعتقد اصلا انهم اساسا مش بنى ادمين ولكن ملامحهم تشبه البنى ادمين زيهم زى القرود كدا
واحتمال القرود تكون افضل منهم
بكتيير

ازيك يا فاتيما واحشاني جداااا
و الله يا بنتى لساني عاجز عن اني اقول اي حاجة
قلبي فيه غصة كبيرة و زعلانة جدااا و مفروسة جداااا
احنا فينا حاجة غلط يا فاتيما
زمان انا كتبت بوست عن الاقباط و انهم جيران و اصدقاء و اهل
و جاتلى تعليقات بتقول كلام اهبل عبيط انهم كفرة و ان الواحد لا يسلم عليهم ولا ياكل معاهم و غيره من الكلام العبيط اللى فرسنى
النهاردة بعد اللى حصل
لاقيت نفس الناس كاتبة عن انهم جيران و ان النبي وصى على الجار
و غيره من الكلام
انا زهقت يا فاتيما من امخاخ الناس اللى بتقول ولا تفعل
اللى كلامها مختلف عن ما تكنه فى صدورها
انا مضايقة جداااااااااااا

فاتيما
ازيك حبيبتي...
كنت بكلم بنت عمي ف الموضوع ده تاني يوم حصل الحادث قالتلي كلام مشابه...
ما تولع الكنايس كلها ف داهية...
انت بتحامي عنهم كدة ليه والله شكلك هتبقي زيهم...انت شكلك بتحبي واحد مسيحي والا حاجة....
يا بنتي هو المسيحي ده مش انسان....؟
مش بني ادم خلقه ربنا
من حقه يعيش ف سلام وامان
من حقة يصلي ف كنيسته من حق يحتفل بعيده من حقه يقيم شعائره
والا بس من حقي انا كل ده....؟؟؟؟

فاتيما احنا جيل الحمد لله فينا كتير فاهمين وواعين ومثقفين مش بس كلام
ان شاء الله تنزاح الغمة دي
وتطلع مصر بخير وتفضل مصر للمصرين
مش للمسلمين ولا للمسيحين
للمصــــــــــرييــــــن

فيه اشياء مغلوطة
اتمنى ان يتسع صدرك للنقاش حولها
كلنا تعاطف مع ما حدث ونستنكرة و هناك شيوخ افاضل تناولوا الامر بكل حكمة

مين قال ان النصارى كفرة ؟!!
بمناسبة ايه ؟
اللى اعرفه ان كل من يؤمن بإلله
فهو ليس كافر
كافر بالإسلام يمكن ..ماشى
لكن كافر بربنا ازاى ؟!!
مش فاهمة !!!

ده كلامك

لَقَدْ كَفَرَ الَّذِينَ قَالُوا إِنَّ اللَّهَ ثَالِثُ ثَلاثَةٍ وَمَا مِنْ إِلَهٍ إِلَّا إِلَهٌ وَاحِدٌ وَإِنْ لَمْ يَنتَهُوا عَمَّا يَقُولُونَ لَيَمَسَّنَّ الَّذِينَ كَفَرُوا مِنْهُمْ عَذَابٌ أَلِيمٌ

لقد كفر الذين قالوا إن الله هو المسيح بن مريم . وقال المسيح يا بنى إسرائيل اعبدوا الله ربي وربكم

فرق كبير بين المعاملة والاعتقاد

فاتيما
إزيك يا أم يوسف
مالك يا ستى بتزعقى فينا ليه؟
بصى أنا عندى شوية أسئلة وشوية ردود ماشى؟
ماشى
1- هل المسيحيين كفرة أم لا
المسيحيين كفرة وده كلام القران

2- هل المسلمين أهل ديانة سماوية فى نظر المسيحيين؟
ج- لا المسلمين أهل دين وضعى ونبيهم مدعى (ده من وجهة نظر المسيحيين)

3- هل معنى التسامح والإخاء والمعاملة الحسنة إن كل واحد يقول على التانى صح ومش كافر؟
ج- لا توجد علاقة بين المواطنة والعقيدة لأننا شركاء فى الوطن ولكن ليس معنى ذلك أن يقول كل شخص على الأخر ما يناقض دينه

4- لو المسيحيين مش كفرة رد فعلك إيه لو إبنك جه قالك إنه حيعتنق المسيحية؟ والسؤال لنفسه لأى شخص مسيحى بيقرا البوست ده
ج-......................

5- ما هى شروط الزواج من كتابية؟
ج- مش عارف فيه شروط ولا لأ

6- هل يجوز تعليق صليب أو التبارك به أو تقديسه للمسلمين؟
ج- لا يجوز

يااااااااااااارب يرحمنا من الأشكال الضاله دي
مش ممكن مين قال ان الصورةالي عليها الهلال والصليب حرام ولا السلام على غير المسلمين حرام فيه آيه قرانية بتقول كدا..في حديث شريف بيقول كدا

هو دا اللي جابنا لوره هو دا اللي مخلي الأرهاب في بلدنا
انا مصرية ومحدش ليه دخل لا بديني ولا فكري

يارب رحمتك

والله يا تيما بالرغم ان كلامك دا طبطب عليا

بس مش قادره اوصفلك حزنى اسكندريه

مولعه ناااااااااااااااااااااار

فوق ماتتخيلى الارض اللى ضمت مليون ديانه من شرق الارض وغربها

بقت نار

انا خلاص لاقادره اقرا حاجه ولا اسمع واكتب
كل اللى مسيطر على دماغى حزن ووجع

ربنا يكرمك فى الكلمتين دول اللى قدرتى تقوليهم
يارب يوصلو لاكبر عدد

sal
---

ازيك يا سال
يا غال


وارد جدا ان كلامك ميعجبش ناس ياما
ووارد كمان البوست دا ميعجبش ناس ياما
زى كلامهم مبيعجبنيش ياما

بس المهم نفضل نتجادل بالتى هى احسن
وعدم الإتفاق ما بيننا
ميخرجش من حيز الكلام
لحيز الفعل العنيف والملطخ بدم

يا لهوى ع الدعوة الحلوة
ربنا ما يحرمنى منك

sony2000
--------

دا المقصود يا سنسن
النظر لجارك على إنه انسان كامل زيك
مختلف عنك ف العقيدة
لا يجعله فى مرتبة اقل من احترامك
ونظرتك وتحرم معاه العيش والعيشة واللى عايشانها

كل الود ليكى

أحب اوضح حاجه بس يجماعه
كل الكلام دا
لو مسلم ولا مسيحي
كويس ولا ولاحش
نابع من التربيه وأخلاقوا
علي حسب مااتربي علي أيه
بس خلاص

عمرو يسرى
---------

ازيك يا عمرو


لأ أنا عارفة يا عزيزى
ان الناس اللى بتفكر
بالشكل دا موجودين كتير


ومع تحفظى على توصيف القرود دا لأنه مش مريحنى بالمرة
بس ما زلت بندهش
من ان ازاى بيبقوا احيانا على درجة
من الوعى والثقافة والعلم فى اشياء وييجوا لحد منطقة معينة
الخاصة بالدين وفجأة المراجعة
واعادة التفكير والمرونة تتلاشى ويرددوا اشياء بمنطق وتفسيرات
لا تصلح للواقع
ومتنفعش معاها تعيش فى سلام
مع غيرك
لأنه فجاة بيتحول لعدو موقوت
وارد ينفجر فيك اى وقت !!



اللى بيزعلنى ان بشر
يتكلم عن بشر زيه
بالكيفية دى وكأنه
متأكد انه الاحسن منه
مفهمش جايب الثقة دى منين ؟!


نورتنى

فاتيما الغالية

شكراً ليكى

و مش شكراً علشان متزعليش (:

علشان احنا اخوات منشكرش بعض

شوفى انا هقولك حاجة

الطائر الحزين
و ابو حميد

أنا متفق معاكوا جداً مفيش اى مشكلة
ممكن اكون اول ما قريت التعليق أضايقة

بس فى الأخر كلامك منطقى

طب ماشى اوكى مفيش مشكلة

طب ينفع نعيش منغبير منسأل بعض انت ديانتك ايه

انا مش هغير فيك حاجة

و لا انت هتغير فيا حاجة

غير اننا نكون بحب بعض كناس

كبنى ادمين دة لو ينفع

على فكرة انا مبتنقش فى الدين و لا بحب دة

عندى كُتب اقراها
عندك كُتب اقراها

عندى مخ افهمها
عندك مخ تفهمها

عند قلب فى قدرة على حب الأخر
عندى قلب على حُب الأخر

ارجو مكنش ضايقت حد

و صدقنى صدقنى
أنا مش زعلان بأمانة

و يمكن دة ما يهمكش زعلان او لأ بس بحاول افهمك انى مش زعلان

لو ده يهمك

شكراً

بصي يافاتيما بجد انا مش لاقيه حاجه اقولها غير اني عماله اعيط علي اهلي اللي راحوا دول وبعزي نفسي فيهم قبل ماعزي اصحابي الاقباط
ممكن بتاعك اتكتب كمان
1_ علشان نرمين صاحبتي اللي في موت جدتي فضلت مقيمه معايا اكتر من اسبوع علشان خايفة عليه
2_لزميلي عزت ملاك اللي بيعملنا الملخصات علشان نذاكر منها وبنصور منه المحاضرات ونجيب تقدير زيه واحيانا اعلي منه وهو مصر يعمل ذلك بكل حب وود ودون مللك وبيبدا كل المحاضرات بكلمة بسم الله الرحمن الرحيم
3 لطنت ايمان جارة تيتيه في المهندسين اللي كانت اول واحده في البيت يوم موت تيته وحضنتي حضن حسيت في بحضن امي وهدتني لحد ماامي وصلت
لطنط ام نرمين وجوزها واولادها اللي بحبهم حب زي ابويا وامي من حبهم ليه
لمدام وفاء سكرتيرة القسم اللي علي طول بتطلع معانا الرحالات وتعملنا احلي شاي ونسكافيه وعلي طول لمانا حواليها زي ولادها
حتي هنا الكوافيرة اللي لما بشوفها واشوف ابتسامتها الجميلة بقولها علي طول النهار هيبقي هنا ياهنا
لكل الناس دي لازمموضوعك يتكتب
واي حد هيعلق هيلاقي في حياته مينا ومايكل ومريم وانجيل احنا معشقين في بعض زي لوحة ازاز معشق لو حته اتكسرت منها باظت اللوحة ويارب دايما نكون معشقين والصورة تفضل حلوة زي ماهي

Mafrousa
--------

ازيك انتى يا فروستى
انتى وحشانا كلنا

من ناحية الغلط
فأحنا فينا غلط ع الجانبين
لكن المهم ...احنا بندور ع الصح
ولا نمشى ورا الغلط


يعنى لما طلع من الاقباط من يقول اننا ضيوف ...الم توجعنا الكلمة ؟
ردينا ومحدش سكت اكيد
لكن خلاص لزقت ؟!!
أبدا
لأننا عارفين انها تقال من شخص محدد بهدف محدد ف وقت محدد لغرض محدد
انما مش هوه كل الأقباط
ولا هوه الناس كلها
انا احاسب - لو جاز لى ان احاسب- المنطق ولا الشاذ عنه ؟!!

اللى حاصل دلوقتى رد فعل لقيم مغلوطة وبقت شبه قاعدة والمفروض نتعامل على اساسها ؟!!
لأ

انا اسفة

انا هتعامل على الفطرة
والصح
مش على ما يفرض عليا
ولو كان السائد


ربنا يروق الاحوال

يا عيااااااال
عندى شغل ومضطرة استأجز بعده
اول ما اروح هرد ع التعليقات

ماشى


سلام مؤكتااااااااا

رامى

والله العظيم يا رامى قسما أحاسب عليه أنا حبيتك فعلا مع إنى قابلتك مرة واحدة ولو تفتكر أنا ضفتك بعد اللقاء على طول فى الفيس بوك فاكر؟
إنت إزاى تقول إن زعلك ما يهمنيش؟
بص يا سيدى... إقرا تعليقى كويس وشوف الأسئلة دى وجاوب عليها بينك وبين نفسك بمنتهى الصراحة وقولى رأيك إيه... ماشى؟

يا رامى مش معنى إننا نحب بعض ونحترم بعض ونتعامل مع بعض إننا نغير فى دينا
أنا ماينفعش أطلب منك إنك تعترف إن رسولى مرسل من عند الله لأن ده ضد أساسيات دينك وما ينفعش كمان أطلب منك إنك تقول إن دينى وإن القرأن ده كناب ربنا لأن ده برضه ضد أساسيات دينك
صح ولا أنا غلطان؟
يا رامى أنا عندى أصدقاء مسيحيين كتير وجيران أكتر وعمرى ما عاملت حد معاملة وحشة علشان دينه ومش معنى كده إنى أنفى أو أخبى أو أغير أيات فى كتاب ربنا اللى أنا مؤمن.
يا رامى أنا قولت إن العقيدة لا دخل لها بالمواطنة كلنا لينا نفس الحقوق وعلينا نفس الواجبات
أنا إتكلمت بصراحة هنا وكنت قولت الكلام ده مرة عند الدكتورة ستيتة تعليقا على عادل لما قال إزاى الناس تقول إن الإنجيل محرف هو ربنا حيسيب الناس تغير فى كتابه كأنه كتاب القراءة بتاع تانية إبتدائى؟
أنا ساعتها رديت وقولتله إنه ماينفعش مسلم يعتقد إن الإنجيل مش محرف وما ينفعش مسيحى يعتقد إن القرأن ده كلام ربنا لأن الكلام ده ضد عقيدة كل منهم

صح يا رامى ولا أنا غلطان؟

السلام عليكم مدام فاتيما
ازيك؟ عاملة إيه؟ إن شاء الله تكوني تمام التمام وعال العال.
انا بتفق مع جزء كبير من الكلام اللي كتبتيه، إلا في حتة معينة مش بتفق معاك، مش عشان لي رأي مختلف، بس هو عشان الجزئية اللي كتبتيها خطأ واعتقادك بيه خاطئ، طبعاً أنا بتكلم عن ظاهر الكتابة لأني اليوم ماليش نفس إني أركز في أي حاجة قدامي، ويمكن كمان تعليقي بقى مكرر.
المسيحي كافر، واليهودي كافر، لكن ده ما يمنعش إني أحب وحدة مسيحية والا يهودية، مش عشان انا بدعي الوسطية ومن كلام المهرجين والامعيين واللي كل واحد بيقلد الثاني وهو مش عارف ليه بيقلد واللي طلعوا في الفترة الأخيرة، لأ، لكن لأن ده هو من صميم ديننا كمسلمين، فالرسول صلى الله عليه وسلم كان يحب عمه أبو طالب أشد الحب حتى أنه قد سمي العام اللي توفي فيه عمه بعام الحزن، وهو قد كان كافراً ومات على ملة عبدالمطلب، وكان عمه يحبه أشد الحب ويؤازره ويناصره لكن ذلك لم يشفع له عندما توفي على ملة الكفر أن يكون المسلمين.
فالحب حاجة مش بايد الواحد ومايقدرش يتحكم فيها، يعني لما أحب وحدة مسيحية وأدوب فيها فده مش غلط، أو حتى اتجوزها، هو زي ما ذكر احد الاخوان ان الاعتقاد حاجة والحب والاحترام حاجة تانية، ولينا شواهد كتيرة في حياة الرسول صلى الله عليه وسلم، منها على سبيل المثال لا الحصر:
-كما ذكرت حبه لعمه.
-عند كتابته رسالة لهرقل ملك الروم، بعث له خطابا وبداية نصه كالآتي: (من محمد رسول الله إلى هرقل عظيم الروم)، فشوفوا الأدب والذوق والتواضع، ما كتبش الكافر أو الفاجر أو الضال هرقل.
-ونهانا الرسول أثناء الحرب، أن نهدم صومعة أو نقتل راهب أو كمانا نتعرض لامرأة أوشيخ أو طفل.

والتعايش كان موجود بين المسلمين والكفار حتى بعد وفاة الرسول صلى الله عليه وسلم، فمين اللي قتل سيدنا عمر رضي الله عنه؟ زي ما نحنا عارفين هو أبو لؤلؤة المجوسي، كافر من عباد النار، وده رد على كل من يفهم النصوص الشرعية غلط ويستشهد بحديث(أخرجوا المشركين من جزيرة العرب) وهو مش عارف إيه معناها.

الكلام بيطول بس هدا اللي كان في بالي حالياً.

عموماً مرسي مدام فاتيما على كل كتاباتك الغالية على قلبي.

ومعليش تعليقي تكرر أكثر من مرة.

تحياتي
أحمد

أبو حميد

أزيك يا باشا (:

افتكرتك ايوة (: انا يا ابنى ما اختلفتش معاك فى رايك على فكرة

انا بطلب انى خلاص

الشخص لما يعامل اللى قدامة يعامله على اساسا انسانى
مش دينى

علشان كدة انا قُلت انا متفق معاك


مش مثختلف معاك على فكرة

كل سنة و انت طيب

بصي يا فاتيما
اولا
لازم تعرفي يعنى ايه كفر

فى اللغه كفر الشيء اي غطاه

ولما نقول فلان كافر اي انه مؤمن ولكنه اتى فعلا كفر به على ايمانه

كأن يكون مسلم موحد ولكنه لا يؤمن بالبعث
عليه هو كده كافر

المسحيى مؤمن بالله ولكن فى شرعنا كفر على ايمانه بجعل الله له ولد

الى اقصده هنا ان مش المسحيى بس الى ممكن يكون كافر ولكن المسلم كمان
حتى فى حديث بيقول تارك الصلاه كافر
وان كان مختلف فى تفسيره ولكن الحديث صحيح

لكن حتى الكافر والمشرك عندنا مش انسان مالوش حقوق ومالوش ديه

وعليه الى بيحصل ده غلط

موضوع السلام والتهنئه بالعيد انا كتبت فيه موضوع كاااامل ياريتتشوفيه يا فاتيما
http://islam-as-i-see.blogspot.com/2008/05/blog-post_05.html
بالنسبه لموضوع الصليب عفوا يا فاتيما لو عادي لابساه ومش واخده بالك مافيش مشكله
انما التبرك بيه وتعليقه فىالبيت عشان المسيح

لا معلش ده ما ينفعش لان اساساعندنا المسيح وما قتلوه وما صلبوه ولكن شبه لهم


المسيح عيسى بن مريم نبى كريم على عينى وعلىراسي

المسحيين والنصارى برضه على عينى وراسي وهما احرار فى دينهم

ولكن انا مش لازم اوافقهم على دينهم

ولكن ما دام لا يؤذوني ماليش حاجه عندهم

المسحيين بيبالغوا هما كمان فى ردة فعلهم
وده لانهم مصريين اصله زينا بالظبط
وكمان لان ملعوب فى دماغهم وهبل ومصدقين

احنا ليه بنبالغ فى كل حاجه

احنا ليه حاسين اننا مجرمين ؟؟

لا يا فاتيما
المشكله ان التطرف موجود على الناحيتين

يعنى يعنى شوفتي المسحيين الى ضربوا المسلمين الى راحيين يتبرعوا والى كسروا الجامع

اه ردود افعال
بس مبالغ فيها

وبعدين صدقينى احنا كلنا اصلا لا نملك الى ردود افعال

انا علقته هنا تعليق هنا كبير جدا

مش عارفه نزل ولا لا مش راضي يقبل تعليق مش عارف ليه

عارفه يا تيما
من بعد اللى حصل ده و انا متلخبطه جدا
حاسه ان فيه حلجات كتير اتكسرت جوانا من ناحيه بعض
مع اننا كمسلمين و اكاد اقسم بالله مش مرتكبى الجريمه و لا جوانا اى احساس بالذنب
بس برضه فيه وجع ان شكوك المسيحين اتجهت لينا اول حاجه
طب ليه؟؟؟
هل كل اللى بينا من زمان اووووى و علاقاتنا مع بعض اتنست؟؟؟
هل كل اللى بينا كان نفاق و ضحك على الدقون و لا ايه؟؟
اصل اللى بيحصل دلوقت مالوش معنى غير كده
مبقتش عارفه ارضى مين و اتاسسف لمين و اصالح مين
اطبطب على حد مسيحى تلاقى شويه من المسلمين يجوا يقولولى زى الكلام اللى اتقال ليكى
اجى اعترض على اسلوب تعامل المسيحين معانا بعد الحادثه الاقى المسيحين زعلوا
يا جماعه اللى حصل مقصود و متحضر و متوضب ليه من زمااااان
بلاش ندى حد الفرصه يحكم و يتحكم فينا
ساعتها مش حنجنى غير الندم

أختي الغالية علينا كلنا
أولا إحنا بخير و الحمد لله ، ومعلش الأيام إللي فاتت كان عندنا ظروف قاسية جدا كنا بنمر بيها أنا و بوبو ، لكنها حاليا في طريقها للحل و الحمد لله ، إدعي لنا .
ثانيا بخصوص البوست الجامد ده أنا عندي إجابة على سؤال كتبتية في التدوينة بيقول
"يعنى يا تورى يا هل تورى
جوا الجمجمة دى فيه مخ"
أنا أقول لك فيها إيه
الجمجمة دي فيها من جوّه صندل ( مع خالص إعتذاري للصندل )
مع الأسف العالم دي جهلاء و سعداء بجهلهم ، ومع الأسف تاني دي اصبحت سمة عامة و ثقافة مجتمع ، كلنا بنفتي في إللي مالناش فيه و بنمشي بسلوك القطيع
ولأن الجهل ساد
و زاد
و ملى كل البلاد
ومحى عقول العباد
يبقى لازم ييجي الخراب
والدمار
والممات
_____________
على العموم
تحية جامدة ع التدوينة
والتعليق
وسلامات
KING TOOOT

كلامك مضبوط طبعا وزعلانه منك انك ضيعتى وقت فى الرد على اخينا ده ده عشان تقنعيه لازم يتولد من جديد وللاسف فى زيه كتير والطريقه الوحيده للقضاء على جدال قتله وهو فى المهد

re7ab.sale7
-----------

ازيك انتى يا بنفسج بيبهج

معاكى يا رحاب
بس تعرفى اللى يزعل بجد إيه؟!!

ان المفروض اللى انصابوا وماتوا دول
مش مجرد ناس ف آخر الخريطة من بلد وجنس ودين تانى ومنعرفش عنهم حاجة
ويفترض برضوا نتعاطف معاهم
ف محنتهم لو حصل عندهم شىء مشابه
من باب انهم يا ستى
اخواتنا ف الانسانية

طب اقباط مصر ينقال عليهم ايه ؟!
بالمقارنة ؟!!
اللى المفروض عدوا مرحلة اخواتنا ف الإنسانية دى لأخواتنا ف الوطن وف الشارع وفى الشغل وف المدارس وف الحروب ..الخ ألخ

حاجة بصراحة تحزن


كل الود ليكى يا حبيبتى

Baskouta
--------

:)

انتى
حبيبتى
يا بسكوتى

الطائر الحزين
------------

ازيك يا إيهاب

ممكن ابتدى كلامى من آخر جملة فى تعليقك؟

فرق كبير بين المعاملة والإعتقاد

طيب

ماهو قولك انى بعتبر ان أى انسان يعتقد فى وجود رب لهذا الكون هوه اللى خالقه و مسيره وبيده كل شىء

كمان بعتبر من يسجد لهذا الرب
ويستعين بيه ف الحزن والكرب
ويشكره فى الرضا والفرح
و يبنيله بيوت تذكر اسمه
و يكرس قيم الحب والخير و السلام
وكل الفضائل
ويبغض الشرور بكل اشكالها ....
الشخص دا أختك فاتيما بتعتبره
(مؤمن)
وليس كافر


الكافر عندى هوه من يكفر
بوجود ربنا
وبس


كون معتقداته مختلفة عنى
فدا مش مبرر يخلينى ارفع فزاعة التكفير ف وشه واعتبره ادنى منى وكأنى ملكت ناصية الإيمان و متأكدة انى فى صف ربنا وهوه اللى برا الحسبة


دا اللى اقصده

وانتا قولت
اعتقاداتى يجب الا تؤثر فى تصرفاتى
وبالتالى
يجب الا اتصرف مع المسيحى على انه عكسى
وانه كافر عشان انا مؤمنة


وكالعادة هقولك
ودنا لا يفسده أى خلاف
إن شاء الله

:)

السلام عليكم
الواحد من كتر الهم من اللى بيحصل فى بلدنا مبقاش عارف يضحك ولا يعيك ولا يمشى متنح زى اللى ماشيين فى الشارع ولا يركن عقله وعينه ولسانه وايده فى اى جنب ويدور له على كهف يتدارى فيه
عمرنا ما كان بينا اختلاف ولا فتنه
قال الله (ولتجدن أقربهم مودة للذين أمنوا الذين قالوا إنا نصارى ) وقال (لا ينهاكم الله عن الذين لم يقاتلوكم فى الدين ولم يخرجوكم من دياركم أن تبروهم وتقسطوا إليهم )
هو احنا مبنقراش سيرة ولا تاريخ وشاطرين بنتكلم وخلاص
صحيح اللى ما يعرفش يقول عدس
ربنا يستر عليكى يا بلادنا
اللهم ألهمنا وألهم اخواننا الصبر والسلوان وأؤجرنا خيرا فى مصابنا ومصابهم واجعل مصرنا أمنا أمانا وسائر البلدان اللهم امين
تقبلى مرورى

أبو حميد
--------

انا مبزعقش يا باشا

:(

طب دنا حتى البرد لسه عندى
وفيه ضفدعة قاعدة ف زورى مش عايزة تتعتع بقالها كام يوم
عااااااا



بص يا سيدى

1-
المسيحيين كفرة ولا مش كفرة
واستناداً للقرآن حسب وجهة نظرك
مش هيخلينى اقولك أيوه وانكتم
ليه؟
ببساطة
لأن القرآن الكريم كلام ربنا ومطلوب مننا نتدبر معانيه ونستوعبها وربنا سبحانه وتعالى قال (أفلا تعقلون؟)
صيغة الإستمرارية دى معناها انك طول الوقت لازم تقرى وتشوف بعين مختلفة
تفتكر ليه الحث على قراءة القرآن
مع ان ربنا لن ينقصه شىء من كم القراءة ؟!!
مش عشانه ..اكيد عشاننا
عشان كل ما نقرى
كل ما نشوف ونعرف ونكتشف اكتر

التفسير اللى انتا استندت اليه
من وجهة نظرك ومن فسروه مش آخر تفسير
أنا شخصياً فاتيما الفقيرة الى الله
من حقى اتدبر معانى القرآن كما أعييها وفهمى وتجربتى توصلنى
واللى انا شيفاه ان المسيحية دين سماوى ..وكون هناك اشخاص او طوائف او حقب تاريخية حتى عليها استفهام او ضد معتقداتى الدينية ..فدا مينسحبش ع المسيحية كلها ولا معتنقيها



المسيحين اللى اعرفهم ..محدش فيهم كافر
لو تقصد كافر بدينى انا
ماشى
موافقة
ودى أجابة رقم
2-
هوه حر
موافقته على معتقداتى من عدمها
مش فارقة معايا بجد
طالما بيحترمنى وبيعاملنى كمان استحق وبأمن جانبه زى ما بيامن جانبى
خلاص
مش فارق معايا
كل واحد ايمانه جوا قلبه
احنا هنقعد نفتش ورا بعض ليه؟!!!


3-
معنى التسامح انك متجرحش ف دين الآخر
لو بيعبد بقرة او الشمس او النار او أى منظر ...
كلمة كافر مؤلمة وقاسية وعنيفة و متحيزة وفيها كل الموبقات من وجهة نظرى الشخصية
ومن كان يؤمن بالله واليوم الآخر فليقل خيراً أو ليصمت
مش يقول كافر !!!

تكملة


أبو حميد
--------




4-
السؤال دا مخضنيش يا باشمهندس
لأن يوسف فعلا قالهولى
عارف اللى خضنى ايه؟!!
طريقة صياغته ومكانها


كأنك بتقولى مثلا
رد فعلك ايه لو ابنك جه قالك هرتكب كبيرة من الكبائر ... حاجة كدا
الطريقة ...موووووجعة جدا
بس هجاوبك

يوسف سألنى فعلا
ليه منبقاش مسيحين عشان طبعا قولتله عنهم احلى كلام
ففهمته ان جدنا كان كدا قبل الأسلام ما يدخل مصر ..فخلاص احنا فينا عرق مسيحى ...
ثم ايه وجهة اعتراضك ع الأسلام
مردش
طبعا كان صغير
السؤال دا لو اتعاد تانى وهوه كبير
تفتكر رد فعلى هيكون ايه ؟!!!
لو يوسف حي يغير دينه
يبقى اكيد السبب هيكون انه مش شايف الأسلام صح او كفاية او بيرضيه
وساعتها الخلل مش ف خطر خارجى من دين آخر
قدر ما خطأ فى اقناعه بدينه اللى ولد بيه
المسيحيين بيمروا بنفس الحكاية
وعندهم حالات كدا
هيا اللى عاملة مشاكل أكيد كل فترة
انا بس عندى سؤال

واحد من هنا او هناك
يغير دينه ...
تفرق ايه ف الميحية او الأسلام
حالة الذعر دى سببها ايه؟

اقولك انا سببها
انك كمسلم وكمسيحى مش عارف دينك صح وكفاية وبدل ما تحبب اولادك فيه وتخلق عندهم حالة انتماء ..بتربى كراهية تخليهم فى يوم لما تيجى الفرصة يتخلوا عنه وعن دينيتهم كلها لو أضطروا

الخلل وقتها ف مين ؟
ف الدين نفسه
ولا ف الأشخاص ؟!!

لو هتطالبنى ابنى قناعاتى ومرجعياتى على الأشخاص فقط ...
يبقى حرام

اشخاص دلوقتى على الجانبين
محتقنين
ومضحوك عليهم
متطرفين
مليش دعوة بيهم انا
انا ليا دعوة ان ربنا جمعنا
نعيش سوا
وكل واحد دينه ف قلبه


5-
بقى
معرفش الشروط بس ارجع واقولك انا بشغل دماغى واستفتى قلبى
ربنا بينظر الى قلوبنا وليس الى صورنا وبالتبعية مفيش فرق بين شخص والتانى ولا أى تمييز ...يبقى ليه المسيحية هتعامل معاملة مختلفة ؟!!


6-
كلمة التبرك دى سمعتها النهاردة كذا مرة ومعرفش ليه
يا جماعة لبسى لشىء عليه الصليب ليس تقديس ولا تكريس لأفكار
لو علقت صورة للسيد المسيح ف حضن امه .. زى اللى مع البوست دى على حيطة ف بيتنا مثلاً هبقى كدا بقدس واتبرك ؟!!

هوه ابداء احترامى لمعنى ولقيم عظيمة
معناه التقديس
يعنى اهانة بالتبعية لمقدساتى انا بقى ؟!!!

ليه يا أخواننا كدا ؟!!

ليه ان لم اكن مع شىء
ابقى مع ضده ؟

ليه ميبقاش دى حاجة
ملهاش دعوة بحاجة تانية

ليه كله داخل على بعضه
ولازم شىء
يهدد كيان شىء

من عشرين سنة مكنش المنظر كدا يا احمد
اشمعنى ؟
لأن كل واحد كان محترم عقيدة التانى ومش معتبره كافر ولا حاجة


بالمناسبة عشان بقى التعلق كدا كدا طويل
ف عيلتنا فيه حالة زواج مسلم من مسيحية والدنيا كانت زى الفل
والست دى خلفتله اربع بنات وولدين
كلهم متدينين التدين الحقيقى
ومامتهم ...نوّنا
زى ما كلنا كنا بنندها
ماسلمتش الا بعد سنين من الجواز
اهلها مسيحين ..واتصالهم كان بيها وبولادها لآخر لحظة ف حياتها
عيليتنا فيها عرق مسيحى حتى الآن اهو
والدنيا ماشية ومفيش حاجة

يمكن اكون عشان كدا بتكلم عادى وحالتى استثناء ...
بس لأ

لسه هقولك
لحد وقت قريب
كان التعايش موجود
وكلمة كفرة دى مبقتش تتقال الى من بعد رجوع المصريين من الخليج والتشدد اللى طال العقول وغمى القلوب وركز ع المنظر وساب الجوهر

تحياتى ليك يا عم
و شوفولنا حل ف الضفدعة اللى مسنترة ف زورى دى ومش راضية تطلع
عااااااااااا

من كل بستان زهرة
----------------

ازيك يا زهرة

الحقيقة ان الاراء دى بتكتب كتير
واصحابها حرين فى قناعتهم
انهم ميحطوش الصورة عندهم
لكن يطلقوا الاحكام على غيرهم
ويجرحوا فى الآخر
دا الغير مقبول

رحمة ربنا وسعت كل شىء
وان شاء الله تسع هذا الوطن الطيب

انا لسة طالع من جدال بيزنطي مع بعض من افكار الناس دى
ياجماعة الخير
انا عاوز اقول كلمة واحدة بس
خاصة لابو حميد ورامي
القرأن بيقول لكم دينكم ولي دين
لا اكراه في الدين
كل واحد عنده دينه ومعتقده وبيحبه ومش عاوز يغيره تحت اي ظرف وتحت اي ضغط
كل واحد يعتقد باللي هو عاوزه
كل واحد يعبد ربنا علي طريقته
اذا كان ربنا قال " من شاء فليؤمن ومن شاء فليكفر " ربنا هو اللي قال الكلام دة

ارجوكم بلاش التدخل في الكلام في الدين في الوقت دة بالذات
الوقت دة اسمه وقت فتنة
عارفين يعني ايه فتنة يعني ممكن تطور لحرب اهلية زى لبنان
ومحدش يقولي استحالة مصر تتحول زي لبنان ليه تتحول طبعا واول الفتنة الكلام
وانا عاوز افكر ابو حميد بحاجة فاكر قصة اليهودى اللي حاول يوقع بين المسلمين في المدينة ويفكرهم بالذى مضى من حروب خاصة بين الاوس والخزرج
فاكر الرسول قال ايه ؟؟؟
انا اللي فاكره من القصة ان الرسول خطب فيهم ومعني كلامه عليه الصلاة والسلام ان يجتنبوا الفتنة وافكار الجاهلية وانهم اصبحوا امة واحدة

بلاش الكلام في الدين
المسيحي بيعتقد والمسلم بيعتقد بس لازم نتعايش ونعيش علي الارض دي عشان في الاخر لو ضاعت منك ومنه ومنها يبقي عليه العوض وتقولوا ياريت اللي جرى ما كان ....


تحياتي لكي يافاتيما
معلش بقي انا حبيت ارد بشكل مختلف

richardCatheart
---------------

اسكندرية الماريا
يا قطاقيطو
آه
هقولك ايه بس

اقولك كلمة جدتى
وامى وامك وكل الناس الطيبة
وقت الحرايق المرعبة


تبات نار
تصبح رماد

بإذن الله

Ramy
----

:)
كويس انك لحقت روحك
وسحبت الشكر يا ر ر


لا تعليق على كلامك لأبو حميد
غير انى موافقة على كل كلمة فيه اكيد
وبطبقها وانتا كمان بتعمل كدا فعلياً
وربنا يديم الود بيننا


انا مبسوطة بالمناقشة دى
واللى المفروض تحصل وتنتهى عند حد النقاش و فقط
مش مناصبة العداء واكتر

ربنا يعدى الأزمة دى على خير
ويصبركم على المصاب

متغطسش بقى وتقلقنا عليك
ماشى؟

طيييييييييب

:)

خالص ودى يا ر ر

غير معرفة
--------

اعتبرى البوست اهداء ليهم
دا يشرفنى جداااااا

وربنا يسمع منك

:)

أحمد
---

وعليكم السلام يا أستاذ احمد

شكرا على ذوقك ومجاملتك
كلام حضرتك على عينى وعلى راسى
اسمعه واتقبله واقولك شكراً

لكن كمان اقولك مش مقتنعة
ولا اعتبر المسيحى واليهودى كافر
الكافر عندى من لا يؤمن بالله

اما الكافر بدينى
فدينى مش فارق معاه
وهوه حر
وكلمة كافر قاسية ان اصف بها حد بيقول ...يا رب


آه
بمناسبة كلمة المشرك
اسمحلى بس اقول حاجة واستحملنى

الشرك بالله معناه ايه؟!!
اشرك مع الله الهاً آخر ..صح كدا ؟

طب دا معناه ان أى سخص دلوقتى ممكن اسميه لحضرتك ف البلد دى تقريبا كدا بيعبد الفلوس وهيا اهم عنده من أى حاجة حتى ربنا ...
مش دا يبقى مشرك ؟!!
اللى بيعبد السلطة
او السادية وتعذيب الأخرين
ومبيعرفوش ربنا زى ما بينقال
دول كفرة ولا مشركين ؟!!!
ناخد المعنى الدينى ولا الإنسانى ؟!!


حضرتك شوف تعليق ندى الياسمين اللى بتعرف فيه وتستشهد بالحديث اللى كلنا حافظينه
ما بين المؤمن والكافر ترك الصلاة
طب يعنى اللى موحد بالله ومسلم بالميلاد والعشيرة وبيعمل خير و..الخ ..الخ
و مكسل يصلى ..يبقى كافر ؟!

طبعا لو انا قولتلك دلوقتى
لأ
انا مش بعتبره كافر
ممكن تعلن عليا الحد واتحدف بالطوب

بس معلش سامحنى
واسمعنى
ربنا اكبر من انتظاره لصلاة احدهم من عدمها
والأيمان مش الصلاة وبس
وكم واحد بيصلى وعامل بلاوى وكبائر
ربنا رب قلوب
مش بشجع على ترك الصلاة
بس مش هاخدها مقياس لتصنيف الناس مين الكافر ومين المؤمن بقى
لأن دى فى علم الله

حكاية الظاهر دى كمان
بتعملى ارتباك
كم شخص ظاهره التقوى وهوه فرعون
والعكس صحيح

نحكم ازاى
لما لا نترك الامر لصاحب الأامر
ونعيش ف هدوء وسلام
ولا نلقى بعض بقاسى الكلام

يا لهوى


البلد دى ناقصها مليار الف حاجة عشان تقوملها القومة اللى تستحقها واحنا قاعدين نتكلم ف اييييه ؟!!!


نورت

:)
بس كدا

نورتنى

ندى الياسمين
-----------

صباصيبوووووووو

اقرى التعليق اللى قبلى طوالى
فيه اجابات كتير على تعليقك

وبعدين بصى احنا دلوقتى وصلنا لأيه؟!!

الفرق بين مؤمن وكافر

والفرق بين مسلم ومسيحى

طب تعريف المسلم هو
من سلم الناس من لسانه ويده
صح؟

يبقى فيه مسيحيييييين كتير كدا
ويهود كتيييير كدا
وملحدين كتير كدا بالمرة
مش كدا

الأسلام الذى بلا مسلمين اللى شافه رفاعة الطهطاوى ف باريس لما سافر


احنا ليه سيبنا الحكاية الأهم
مسكنا الفرعيات

المهم دلوقتى امن البلد دى من كل شر يتهددها
بس

حكاية الصليب دى هختلف معاكى فيها يا صبصب لأنى يا حبيبتى لا أتبرك به والله
كونى احترمه
مش معناه اقدسه واتعبد بيه
احترامى لا يعنى تقليلى من مساحة حبى لدينى ومعتقداتى

جايز اكون ببالغ ف كلامى
بس انتى عارفنى
انا بحس بكل حاجة قوى
واديها حقها بشكل يمكن غيرى يشوفه زيادة
لكن الدنيا لازم تتعاش كدا
لازم نحترم كل شىء حلو بزيادة
ونديله حقه لأنه نعمة من ربنا
غيرنا مش لاقيها
او عنده ومش حاسس بيها

بس


التعليق اتنشر يا ست الصبصوبات
هوه البلوج يستجرى يمسحه ؟!!!!
هزلت بقى

بوسيلى العيال
وسلامى للغالى استاذ رضا

صيدلانية طالعة نازلة
-------------------

اللخبطة وضع طبيعى يا علا

كل حد فينا كان
عنده قناعات راسخة من زمان
طبيعى انه اتهز


لأن اكتشف ان الدنيا بقت غير الدنيا
وان اللى بيحصل ملوش دعوة
بلى عاش العمر متربى عليه


انا مش متوقعة كلام البوست
ينال تصفيق بصراحة
لأنى عارفة انه هيستفز قناعات آخرين برضو
مختلفين معايا شكلا او موضوعا
أو الأتنين
دا وضع طبيعى

انا يهمنى مشاعرى
ومشاعر من يشاركنى نفس رآيى
ان كلامنا يوصل لأصحابه
اللى محتاجين يسمعوه فعلا


ربنا يعدى الأيام دى على خير

KING TOOOT
----------

يل لهوتينى يا ولييييييييييييد

لو مكنتش الظروف
كنت عملت فرح ف صفحة التعليقات
بس الظرف مش مناسب بالمرة

اخيراً يا غالى
شفت اسمك ف صفحة تعليقات اختك من تانى ؟
الف مليون حمدللله ع السلامة
وعقبال ما اقرى اسم بوبو كمان
ويطمنى عليكم عن قريب

مش هغلس واسأل ايه وليه وازاى
المهم رجوعكم بألف مليون سلامة
وبس

ان شاء الله الغمة تنزاح
وربنا يجبر بقلوبكم
يا رب
يا رب


وحشتوناااااااااااااااااااااااااااا
من هنا لآخر الدنيا



ميرسى على رآيك ف البوست
يا لهوى ميرسى دا ايه
دنا زاعقلى نبى النهاردة
انتا مش أى حاجة تعجبك اصلاً
دنا عملت انجاز بقى
يا لهو بالى ياما
انحرمشى منك يا رافع نعنويات اختك


عودا حميداً يا راعى الملك
وسلامى لأرق مخلوقة ف الكون
قوى
قوى
قوى

:)

bombona
-------



لا ضيعت وقت ولا حاجة يا بونبانية
الكلام دا لازم يتقال
حتى لو مش فارق مع اللى معارضه

زى ما اتقال
ومفرقش معايا
و بالعكس خلانى اثبت على رآيى


مش دى المشكلة

المشكلة اننا نوصل لدرجة ان منسمعش بعض ولو سمعنا لازم حد رآيه ينهزم اما الآخر

انا اصلى بسمعها كتير الجملة دى
وبتغظنى قوى
ان لازم حد يفرض كلمة النهاية على التانى لمجرد انه مقتنع بأسانيد
وحجج
ولازم انا اغير قناعاتى عشانه

طب مينفعش كل واحد يبقى حر ؟!!


خلاص طب نسمع بعض حتى
اضعف الايمان يعنى



نورتى

مدونة رحلة حياة
----------------

ربنا يسمع منك


اللهم آمين

Haytham Alsayes
---------------

الله يفتح عليك يا هيثم

ردك فعلا مميز ومختلف

وبصراحة بقى
الكلام فى الدين فى أى وقت بيسبب فتنة
مش بس وقتنا الحالى

واللى بلاحظه للأسف
ان الواحد يبقى غيور على دينه من وجهة نظره ويبدى تعصب شديد ف حمايته ودفاعه ..الخ الخ
ثم يستنكر نفس الفعلة لو اتت من مسيحى بيعتبر دينه هوه الصح

يا جماعة ما كل واحد لازم يشوف دينه كدا
وكل واحد اتولد واتربى بقناعات راسخة
انا سمعت جملة النهاردة ان المفروض الواحد لو اتولد مسيحى أو على أى دين
ربنا ادله عقل يدرك بيه وختار
لو مخترش الأسلام ..يتحاسب

الله
هيا ببساطة كدا ؟
اذا كنا كمملمين ممكن ناخد عمر عقبال ما نعرف ديننا
ايش حال صاحب دين آخر


الجملة اللى قريتها النهاردة فى مقالة احمد الصاوى وعجبتنى جدااااااااا

ضع نفسك فى مكان الآخر


الحسابات هتختلف اكيد

اول حاجة هعملها لما بحط نفسى مكان الآخر
هقول لكل حد ..انا مش كافرة
انا مؤمنة بالله

متقولوش الكلمة دى وتدبحونى بيها
أى كانت تفسيرات دينكم ليها

بس خلاص

نورت يا صاحب الفردوس


تعليقك اكتر من رائع يا هيثم
:)

*انا عندي كدا ملاحظة بعد إذن حضرتك:
- أولاً المدونة دي تملكها وحدة حسب ما يظهر أنها مسلمة، يعني لو شفت منها حاجة غلط وخاصة فيما يتعلق بالعقيدة راح أبين لها وهي حرة في إنها تتقبل أو لا.
-ثانياً في حاجة لازم نعتقد بيها، وهي أن الاختلاف قائم إلى قيام الساعة (ولو شاء ربك لجعل الناس أمة واحدة ولا يزالون مختلفين)، فالاختلاف مستمر، وأن وجود المسيحي واليهودي وغيرهم قائم إلى قيام الساعة، وأن من اعتنق لجهله فكرة أن عليه أن يتخلص من كل مسيحي ويهودي، فهو بذلك قد خالف هذه السنة الإلهية.
-ثالثا المسيحيين أصحاب ديانة سماوية، وهم من أهل الكتاب، وأن إطلاق لفظ الكفر عليهم وارد في القرآن والدليل : (إن الذين كفروا من أهل الكتاب والمشركين).. الآية.
-رابعاً الشرك هو الإشراك بالله في ألوهيته وربوبيته وأسمائه وصفاته.
ألوهيته: تشرك مع الله في عبادته. وتشمل العبادات البدنية والقلبية.
ربوبيته: تعتقد أن هناك للكون مصرّف آخر غير الله. مثلاً: الإحياء الإماتة.
أسمائه وصفاته: تعتقد وجود مخلوق يتصف بصفات الله التي لا يتصف بها إلا هو.
عدا هذا الإطار لا ندرجه تحت الشرك، بل نستطيع أن ندرجه تحت التعلق، وأكيد في أدلة كثيرة بتحذر من هذا الأمر إذا تجاوز عن حده.
-خامساً إنتي دخلتي كذا موضوع مع بعض: مسيحي ومسلم يصلي ومسلم ما يصليش وحاولتي تخلطي بينهم. مع إن كل نقطة لها تفصيلاتها.
-سادساً: المشكلة الحاصلة في مصر ولبنان بسبب التنوع الديني، سببه أن العرب هم كده مجبولين بالفطرة على التنافر والعداءات، فمن الطبيعي إن المسلم راح يتهجم عالمسيحي، والمسيحي راح يتهجم عالمسلم، وهذه العداءات موجودة حتى بين أصحاب الدين الواحد، إيه معنى برا في العالم الغربي بنلاقي المسيحي واليهودي والسيخي والمسلم عايشين كلهم وما بيناتهم أي حاجة.
-سابعاً كل ده ما يمنعش إن يكون في تعايش بين كل أصحاب الأديان، وطبعاً نحن كمسلمين أكيد في أحكام توضح لنا ازاي نتعايش.
-ثامناً: انا حقيقة بعتذر على أسلوبي الجاف.

من القصص الطريفة وهي حقيقية، إن في أحد التلامذة وهو مسلم كان جالس مع دكتوره من الجامعة وهو يهودي، وكان الدكتور بيشرب، فسأله تلميذه: إزاي إنت يهودي وبتشرب خمر والخمر محرم عندكم في اليهودية، فرد عليه: أنا يهودي كافر. فضحك الطالب من رد دكتوره.

أيضاً من الأشياء اللي أحتفظها لنفسي ومش أمانع من ذكرها هنا، أنا لي علاقة حب مع وحدة غير مسلمة، وهي من أكثر البشر قرباً إلى قلبي وبحبها من كل قلبي، ومع ذلك مافيش يوم هي تكلمت في ديني أو أنا أتكلمت في دينها، علاقتنا من أقوى علاقات الحب على الإطلاق، وربنا يخليها ليا.

السبب فى اللى بيحصل ده بيزنس الدين اللى بيكسب اكبر من التجارة فى المخدرات و من شارع الهرم القنوات الدينية من الطرفين القنوات كثيرة و عشان تتميز و تجيب اعلانات و فلوس لازم الاختلاف ما اهو لو حد بيتكلم بصوت واطى و هادى فى الشارع محدش هيسمعه لكن لو زعق و شتم الناس هتتلم و تقعد تتفرج ده بالظبط اللى بيحصل وده التطور العصرى لرجل الدين من الناحيتين و كل طرف ميعلى بالصوت الطرف التانى يعلى اكثر و تدور معركة الفضائيات وانتى عارفة المعركة محتاجة لوقود و الوقود للأسف المواطن البسيط اللى بيتحرق بافكارهم او بيحرق بافكارهم و النتيجة كنيسة القديسين والاحتقان الناتج الان
حاجة تانية فى التعامل انا لما باتعامل مع انسان باتعامل مع الجانب الانسانى و ليس الجانب العقائدى و من هذا المنطلق ممكن يكون لى اصدقاء من روسيا او كوبا او حتى ممكن اتطرف فى رائى و اقول من اسرائيل مع ان ده مش هيحصل طالما ارتفع مستواه الانسانى فانا لى عقيدتى و هو له اعتقاده مش عايز اطول بس المصيبة لينا كلنا و العزاء لنا جميعا
تحياتى ابراهيم رزق

بصي زميلك ده زي زميله معانا قالت نفس الكلمه قلتلها لا حضرتك دول مش كفره
دول اهل كتاب مين قال انهم كفره!!!!
وانا وغير واهلي واسكندريه كلها حزينه مش نفاق ولا استهبال ربنا عالم مدي الكئابه اللي حصلت لنا كلناهنا والشوارع عامله ازاي والناس عامله ازاي لا عشان مسلم ولا عشان مسيحي
عشان روح وعشان بني ادمين
وعشان اطفال ورعب دخل في قلوبهم زنبهم ايه ناس في حالهم رايحه تمارس طقوس دينهم وفرحانين بالسنه الجديده وفي حالهم ملناش دعوه بقي بغض النظر عن اختلاف العقيده واختلاف الاديان
لكم دينكم وليا ديني
اللي بنقوله انه انسان مصري عايش في بلده من حقه يحس بالامان وهو في الشارع وهو في بيته وهو في اي مكان
مصر بتعتنا كلنا
فعلا كلامك صح لو حصلت حادثه هنبص في ايده الاول ونشوف مسلم ولا مسيحي
بس انا بختلف معاكي في حاجه واحده بس واسمحيلي في موضوع الصليب معرفش يمكن انا فاهمه غلط
كل الي انا عاوزه اقوله ان ليا اصدقاء مسحيين كتير وبحبهم جدا وبحترمهم يمكن كمان بستريح معاهم في المعامله
مش اشخاص مسحيين لا اشخاص مصريين مختلفين في العقيده والدين وكل واحد حر دينا نفسه مش قايم علي الاكراه
في ايه ياجماعه ما نعرف دينا صح ونفهم بلاش كده بقي
فين التسامح وفين العقل والحكمه والدين الاسلامي الصح
ربنا يجعل مصر بلد الامن والامان ويحميها ويبعد عننا التخلف والجهل

فاتيما
إزيك وإيه أخبار البرد
بصى أنا مش فاهم حاجة... فعلا مش فاهم
واضح إن الناس كلها بتقول أى حاجة
هو ليه ماحدش شايف إنى أنا ورامى متفقين فى رأيى مع إختلافنا فى العقيدة وبنحترم بعض

يعنى إيه (أفلا تعقلون)؟ معنى كده إن أية صريحة أجيبلها معنى تانى من دماغى؟ طيب أفلا تعقلون دى جت فى أنهى موضع؟ ما ينفعش نقص الأيات على طريقة (لا تقربوا الصلاة)
لو فى أية صريحة بلاش نلف وندور حواليها
أوعى تفتكرى إنى عاجبنى كلام زميلك ... لا والله وإقرى تعليقاتى تانى وإنت تفهمى
بصى... أنا مش عايز أجادل كتير علشان إحنا الإتنين ما نغلطش ونلخبط أكتر من اللخبطة اللى مالية الدنيا هنا
بس أنا عايز أقول حاجة مهمة من وجهة نظرى... بلاش نفسر الأيات والأحاديث حسب هوانا أو زى ما إحنا فاهمنها أو عايزين نفهمها... لأن لو حضرتك حتفسرى وتفهمى على مزاجك ما تلوميش أى حد تانى إنه يفسر ويفهم على مزاجه المتطرف

أحمد
----

يا أستاذ أحمد هوه حد زعلك ؟!!


انا مرفضتش رآى حضرتك وقولت اهلا وسهلاً
و قولت كمان من حقى اقول انى شايفة حاجة مختلفة
ومن حقى كمان ادخل حاجات فى بعض
زى ما كل حد بيقول رآيه ممكن يدخل حاجات ف بعض ويشوفها منطقية من وجهة نظره
انا كمان لى منطقى وقناعاتى ولو مش عاجبه أى حد من حقه يعترض بس مش من حقه يقول الكلمة الاخيرة ويفرضها عليا لأنى انسان ربنا مديله عقل وقلب و محدش يرهبنى فكرياً فأتخض وانكتم مثلاً


انتا اللى متزعلش منى لو كان كلامى مش داخل دماغك وشايفه غلط من وجهة نظرك


لكن التعايش بين المسلم والمسيحى
اولى بتطبيقه برضو بين المسلم والمسلم
لأننا حتى تحت لواء الدين الواحد
بنختلف جذرياً ساعات
لكن مع ذلك الاختلاف يجب الا يتعدى حدود النقاش و يصل للتكفير والدم

نورت

ابراهيم رزق
-----------


ازى حضرتك ؟
انتا فين غايب بقالك مدة
وخوخة قافلة التعليقات للأسف
فتعليقاتك تقريباً مفيش


متفقة معاك فى حاجات كتير
انا روحت مرة لخالى ازوره لايته فاتح قناة من هذه القنوات اللى بتقول عليها ..مش اكرة بصراحة اسمها
بس اللى فاكراه ان بعد تلات دقايق الأخ اللى كان بيتكلم كان بيعنف ست بتقول انها بتتعامل مع جارتها المسيحية ودا حراااام من وجهة نظره وبيقولها ازاى تنكشف عليكى وتشوف شعرك وهى اجنبية وتروح تحكى لجوزها ولوادها ..الخ
كلام كدا حسسنى ان اللى ساكنة قصاد الست دى اسرائيلية مش مصرية زيها

استغربت قوى
يا لهوى ؟!!!
دا طنطن ام صفاء جارتنا اللى كانت ساكنة قصادنا عشرين سنة ف بيتنا القديم كانت بتاخدنى وسط بناتها وتخاف عليا اكتر من امى احيانا لأنها كانت من الناس الحنينية قوى مش شخصيتها قوية قوى زى ماما
استغربت ...ازاى واحد يتكلم بأسم الدين يمنعنى اتعامل معاها كأنها امى او خالتى ؟!!!


الحوار دا سمعته من ييجى سنة مثلاً
بس مش نسياه


جايز يكون فيه اسانيد وحجج
بس عقلى اللى ربنا ادهولى
بيقولى ان ربنا العظيم
مبيقولش اكرهوا بعض
وخافوا من بعض
و اتعاملوا كدا
عشانى


العزاء زى انتا ما قولت

عزاءنا جميعا

نورت
ومتقطعش التعليقات يا إبراهيم

سمكه واحدة
---------

ازيك يا سموكتى
عاش من قرى تعليقاتك
وانا عارفة ان اهل اسكندرية مصابهم مضاعف وربنا معاكم


ويسمع كل دعواتك يا حبيبتى

:)

تسمحى لى ارد من بداية ردك على ردى
(ماهو قولك انى بعتبر ان أى انسان يعتقد فى وجود رب لهذا الكون هوه اللى خالقه و مسيره وبيده كل شىء)

طبعا يكون مؤمن

لكن من هو هذا الرب الذى يؤمن به؟
يعنى لما اقول ان الرب هو النار يبقى كدة رب
لما اعرف ان فيه رب لكن بسجد لصنم يبقى كدة انا تمام ومؤمن بالله

لست من دعاة التفرقة ولا التشرذم ومن انصار العيش تحت مظلة الحب والرحمة والمودة بين كل البشر والاجناس

لكن يا فاتيما هناك اشياء القول فيها فصل لا يحتاج لتأويل
وما كان لمؤمن ولا مؤمنة اذا قضى الله ورسولة امرا ان يكون لهم الخيرة من امرهم

فعندما يقضى الله بحكمة على شخص اذا فعل كذا يكن كافر
انا بالتبعية اردد كلام الله ولا حكم فوق حكمة

بصرف النظر هل ستنالة رحمة الله ام لا


و التعامل مع الكافر له اصول وقواعد مش معنى انه كافر يبقى حلال دمة وهذا ما اقصدة بالتعامل

لكن العقيدة تنبع من حكم الله ما فيه فصال

وهقول تانى التعامل شىء والاعتقاد شىء اخر

أبو حميد
-------


ازيك يا باشمهندس


انتا مش فاهم ايه ؟
كلامى انا ولا الكلام اللى ف التعليقات كله ؟


لو تعليقاتى انا يبقى احتمال لأن الضفدعة الآخرانية ما زالت متمركزة ف زورى ومش عاوزة تفط من مطرحها ؟!!
احتمال

اما الآخرين وتعليقاتهم
فإسمحلى
يعنى انتا حكمت على اللى مكتوب انه لخبطة على أى اساس ؟
قناعاتك انتا الشخصية والدينية

طيب

لما لا تمنح هذا الحق للآخرين ؟!!

منحته خلاص
وهتقفل النقاش


هايل

نبقى وصلنا للمربع صفر تانى
اللى هوه


كل واحد ميفرض على التانى
قناعاته ونظرته
حتى لو كان مدججاً بالأسانيد



آيه افلا تعقلون اللى مزعلاك دى
لو لم تكن فى أى سياق
معناها لا يكفى ؟
ربنا طلب منا اعمال العقل
طول الوقت وطول العمر
لازم احط الآية فى سياق زى ولا تقربوا الصلاة - واللى بالمناسبة مقارنة ظالمة ومش ف محلها خالص من وجهة نظرى - طب لو متتحطش فى سياق
الا تعد نصيحة فى محلها ؟!!

وايوه بعد اذنك انا من حقى
اقرى دينى وافسره على مزاجى
انتا هتدخل بينى وبين ربنا يا أبو حميد ؟!!!

أوعى تقول أيوه
عشان افهمك غلطك


لأن ايش عرفك انك صح ؟
وانى انا اللى غلط


طب منا موافقة على تفسيراتك انتا للدين ومعترضش ابدا
قولتلك انتا حر
بس متفرض عليا قناعاتك
وزى ما بنعمل كدا انا وانتا فى ديننا الواحد
اصول نعمل كدا مع صاحب الدين المختلف عنا
عشان كل واحد حر


كلمة الحرية هنا ارجو الا تستفزك وتستفز أى حد

مقصدش بيها تبديل المفاهيم
وتغيير الثوابت

انا اقصد ببساطة
استيعابى لدينى ودرجة تشبعى بيه

حضرتك يجوز جدا تكون احسن منى الف مرة وفاهم دينك صح
ويجوز انا ابقى افضل


بس افضل عند مين ؟

عند ربنا
ولا عند الناس ؟!!!

بصراحة
ميهمنيش رآيك فيا بعد البوست دا
اذا قولت مخى مفوت وعقلى عاوز يتفرمت وانى مش فاهمة الدين صح

بجد مش فارق معايا
زى ما هو مش فارق معايا
اللى يشوفنى لابسة بلوزة عليها شكل الصليب او معلقة صورة العذراء والمسيح ولا ممكن اقتبس حاجة من الانجيل اللى ثابت لدينا انه محرّف ...

مش فارقة يتقال دا
لأنى متعشمة فى ربنا وهو ادرى ما بقلبى


كونى بكتب هنا رآيى
وقناعاتى
وتتفهم صح او غلط
او بين البينين
مفيش مشكلة والله


كلاللى عاوز يقول حاجة يقولها يا فندم
انا مش معترضة

اعتراضى الوحيد
ان يصر الآخر على ان رآيه آخر كلام
ويصر يفرضها عليا



بس و انا وحياة يوسف ابنى
لا الوم احداااااااااااااااا
وزى الفل



بس شوفولنا حل ف حكاية الضفدعة دى الله يخليكو اختكو انا برضك

ماشى ؟

:)

الغالية اختنا فاتيما

أزيك (:

خلاص يا فاتيما رجاءاً

مش عاوزين الموضوع ياخد اكبر من حجمه

ياهيثم على فكرة زى ما قال ابوحميد

انا و هو مش مُختلفين

لكن نحترم بعض

و ان كان فى احكام يا أستاذ الطائر الحزين

مفيش مشكلة دة دينك و قايلك كدة فمش هتغيرها مظبوط
انا موافقك جداً صدقنى

فاتيما

الموسيقى اللى انت حطاها جميلة على فكرة

دى بتاعت مسلسل اوان الورد تقريباً

(:

الطائر الحزين
-------------


ازيك يا إيهاب


تزعل منى لما اقولك
ان كلامك برضو مغيرش رآيى ؟



عارفة انك مش هتزعل
وهتقول بعاند فى الحق
ومصرة على عندى


بس تسمحلى
طيب اناقشك كما تناقشنى
ومتتضايقش من كلامى ؟



عارفة اكيد انك هتسمح
:)


بص يا سيدى
انا قولت

(ماهو قولك انى بعتبر ان أى انسان يعتقد فى وجود رب لهذا الكون هوه اللى خالقه و مسيره وبيده كل شىء)

صح كدا ؟


يبقى طيب دا معناه ايه؟

تفتكر معناه عندى
ان اللى يعبد بقرة او نار
يتساوى معاهم ؟!!



يعنى انتا يا إيهاب رآيك فيا
مثلاً كدا
ان دماغى فيها بلاليين لهذه الدرجة اللى تخلينى مفرقش
ومعقلش
وموزنش الأمور
و كل حاجة لهذه الدرجة
واحط ابو قرش على ابو قرشين ؟!!!



كمان استيعابى لكلام ربنا
والحكمة وراءه
اليس ذلك مسئولية كل شخص فينا
وسيحاسب عليها ؟

ليه بنتفترض اننا كبشر وصلنا لنهايات الأشياء
وخلاص بقى فهمنا لها نهائى
وغير قابل للنقاش والأستيعاب



وليه يا عم بتفترض فيا
انى هبقى مضللة لو فتحت الباب
لكل شىء وحاولت انفتح على كل الأراء


وليه بتفترض انك دخلت قلبى
وعرفت آخر حاجة استقرت فيه
يا فندم ؟

وليه بتفترض انى ممكن اوصل فى مراحل التفهم لدرجة انى اشجع مذهب حد بيعبد نار او بقرة ؟؟


وليه التفهم كارف على ايمان ؟
والإحترام ملوش غير معنى التقديس ؟

ليه؟


صباحك كله خير يا ايهاب
أى كان اعتقاد كل قلب يا عزيزى

خالص ودى
يا طائرى الحزين الطيب

:))

Ramy
-----


أيوه يا رامى
دى اوان الورد يا فندم

:)

صباح الورد يا جماعة
ابو حميــــــــد ورامـــــــــي
من غير ما ارد علي اسألتك يا ابو حميد هقولك شيء من غير ما ندخل ف اطار اتجوز مسيحي او اتجوز كتابية ....
ربنا خلقنا كلنا من آدم وحواء
ومن حقنا كلنا ان نعيش
طيب قولي لو كنت انت مسيحي ...؟
ورامي مسلم....؟
يعني غيروا الاماكن
لازم تحط نفسك مكان الغير عشان تعرف ترد صح.....
الاول انا عمري ما هغير ديني لاي سبب كان ....ومتهيء لي لو كنت مسيحية برضه كنت مش غير ديني لاي سبب كان....
ف الاول والاخر كل واحد فينا نفسه يعيش صح...
يبقي لازم كل واحد فينا يحط نفسه مكان الاخر عشان يعرف يعيش ويسيب الاخرين يعيشوا
يارب كلامي يكون خفيف عليكم انتم الاتنين ....رامي مشفتوش قبل كدة بس حبيته من كلامه....
ابو حميد يمكن اكون قابلتك يوم ابو الريش بس مش متذكراك...
وبما اننا كلنا بنبغي الخير فأعتقد اننا لازم هيكون كلامنا خفيف علي بعضنا

طيب عاوزه نقول ايه ما أنتي قلتي كل اجه

يتبقى

هل تختلف مطالب المسلمين عن المسيحيين؟

في كل شئ

لا اله الا الله
يا فاتيما حاشا لله ان اتهمك او اتهم غيرك بعدم الاتزان فكل منا يقول رأية فيما تم عرضة
فاتيما فيه اشياء بالفعل وصلت لنهايتها
يعنى لما اقول لك العصر اربع ركعات تيجى تقولى لا انا هصلى 5 مع انك كدة بتزودى
يبقى فيه حاجات وصلت لنهايتها ولا لا

انا لا اقرر فلان يدخل النار وفلان يتعافى منها
انا بقول اللى ثابت فى شرعنا فى كتاب الله
وكما انه ثابت عندنا ان من يتخذ المسيح الها او ابنا لله هو كافر
فنحن عندهم كفرة لاننا لا نؤمن بهذا


ايه فى كلامى بيقول ان افترضت انك هتكونى مضلة فة فتحت الباب لكل الآراء؟؟؟!!!
انا لم ادخل قلب احد وقلت لك اننا نحكم على ظاهر الاعتقاد كما نسمعه من لسان القائل
اما ما استقر فى القلب لا دخل لى به
وقولى ما يسجد لبقرة او نار لتقريب المعنى يعنى لو شاهدت من يفعل هذا فانا احكم على ظاهر فعلة ولا علاقة لى بما يحوية قلبة

كمان استيعابى لكلام ربنا
والحكمة وراءه
اليس ذلك مسئولية كل شخص فينا
وسيحاسب عليها ؟

وليه التفهم كارف على ايمان ؟
والإحترام ملوش غير معنى التقديس ؟
مش فاهم يعنى ايه؟

:)))))))
ومرة اخرى انا لا اؤيد اى هجوم حتى ولو على شخص بدون ملة ما دام دخل البلد بصك أمان ولم يعتد على من فيها
يارب اكون قدرت اقرب وجهة نظرى

نفسي الايام الجايه تعدي

على فكره صاحبتك وجارتك وكل المسيحيين اللي حواليكي كل واحد فينا حواليه ناس زيهم ..

دايما بفتكر مشهد فيلم الرهينه لما الممثل سال التاني هما بيكرهونا ليه ..

وطلع في الاخر هما دول هما هما جيرانه واصحابه

بنتكلم عن المسيحيين كانهم من كوكب تاني .... وهما معانا ووسطينا

تحياتي

يا نهار مش فايت
إلحق يا رامى كل اللى داخل بيهدينا إحنا الإتنين
مع إن تصدقوا بقى كلكم الوحيد اللى أنا وهو تقريبا بنتكلم بنفس المنطق هو رامى
فكك منهم يا رامى وتعالى أعزمك فى المكان اللى يعجبك لما تيجى القاهرة... ماشى؟ وكل الناس اللى مش فاهمين كلامنا مالهومش فى العزومة

بعدين رحاب صالح... إزيك الأول
هو يا ستى أنا قولت حاجة عن إننا من أدم وحوا أو عن التعايش والمحبة والإخاء ... يا جدعان غنتم بتنقوا من التعليق الحتة اللى إنتم عايزينها بس؟
وبعدين هو أنا ما حطيتش نفسى مكان رامى؟ مش أنا بقول إن دينه بيخليه لا يعتقد فى كتابى أنه من السماء؟ يا ستى لو هو قال غير كده يبقى مش عارف دينه صح وأنا ما أقدرش أطلب منه حاجة ضد دينه

هو فى إيه يا جماعة؟؟

حدد يا رامى ميعاد ومكان العزومة وعلى الله ألاقى حد من الناس اللى مش فاهمين إحنا بنقول إيه

الطائر الحزين
إيهاب أتفق معاك قلبا وقالبا
شكلك معزوم إنت كمان

:)))))))

re7ab.sale7
-----------

صباح البنفسج يا رحوب
وكلامك وصل
يا حبيبتى اهو

:)

مصرى جدا
-------


ولا حاجة يا هانى
كلنا بنى آدم
ومطالبه واحدة

بس

بس تعالى هنا
انتا بتكلمنى ليه دلوقتى وانا زعلانة منك ؟!!!

زعلانة ليه ؟

اعمل مش عارف بقى

مش عارف بجد ؟!!


عشان مجتش المنصورة

:(

الطائر الحزين
-------------

يا لهووووووى

الاول مضللة
بالفتحة
يعنى تم تضليلى
مش انا اللى ببضلل البشر

دا الأول


ثانياً
انا لا اقصدك انتا تحديدا يا إيهاب
انا عارفة (نوعا ما ) انك بتثق ف دماغى وتفكيرى ومش هتعتبرنى بفكر بسطحية ...
بس ممكن جدا حد تانى ياخد الفكرة دى لمجرد انى قولت شىء وهوه بياخد بالظاهر ومعندوش استعداد يستنى يعرف وجهة نظرى ولو استنى بيبقى عاوز يسمع عشان يطلع رأيى فيه حاجة ...



اللى مش فاهمه ف كلامى يا إيهاب
انى اقصد ان اظهارى للتفهم لمعتقدات الىخرين ليس معناه ايمانى بيها
واحترامى للصليب ليس تقديس ليه ولا انا موافقة على كل شىء متعلق بيه
انا محترمة قيمتهو معناه عند رامى وعادل واى مسيحى ف الكرة الأرضية
ولكنى لا أقدسه ومؤمنة انه متعارض مع دينى لكنى لا أرفضه لغيرى

دا المقصود


وجهة نظرك واصلالى من اول حرف فى أول ايميل بعتهولى والله

بس انا حريصة رآيك يتنشر هنا
وارد عليه
لأنك غالى عندى يا إيهاب

:))))

فتاة من الصعيد
--------------

كلنا عيوننا على بكرة
وقلوبنا على الكل
مسيحيين ومسلمين
على مصر كلها يا فاتى

تحياتى انا اكتر يا حبيبتى
:)

عزيزتى أم يوسف
أولاً الرسول صلى الله عليه وسلم قال "من آذى ذمياً فقد آذانى" وقال "أستوصوا بالقبط خيراً"
يعنى الموضوع منتهى محدش يدعى أنه بيحب الرسول صلى الله عليه وسلم ويأذيه أو مينفذش وصيته.
ثانياً مفيش إنسان سوى يرضى باللى حصل ده لأن ربنا مقالش موتوا الناس وروعوهم فى حالةالسلم ده حتى فى الحرب كانت وصية النبى صلى الله عليه وسلم لا تقطعوا شجرة ولا تقتلوا شيخاً ولا أمرأة ولا طفل ولا تهدموا بيعة ولا صومعة "أماكن التعبد لغير المسلمين" وده فى حالة الحرب ما بالنا ودول ناس عايشة فى وسطينا مش ناس بتحاربنا.
يعنى موضوع الشماتة غير مقبول بأى شكل من الأشكال.
لكن فى أحاديث بتنهى عن تعليق الصلبان وبيعها بالنسبة للمسلمين و منها حديث فيما معناه أن الرسول صلى الله عليه وسلم ما رأى شيء فيه تصليب إلا نقضه.
يعنى مينفعش نلبس حاجه فيها صليب والصليب ده مش رمز لحاجه أساساً ولا لحظة خالدة ولا الكللام ده.
حاجة كمان المسلم لا يرث غير المسلم والعكس بالعكس حتى لو كان أبوه أو أبنه
وبس :)
تقبلى كلامى بسعة صدر وبلاش ضرب من فضلك :)))

ابراهيم رزق  

معلش يا فاتيما انا هاعلق تانى مع ان الاستاذ ابو حميد اوجز الموضوع و نهاه انا نفسى الجميع ميقولش دينى و دينك و يدور على نقط الاختلاف دينى بينى و بين ربنا هواللى يحاسبنا على عقديتنا و يبقى جوهر الدين اللى هو الواجهة او الفترينة و هو الدين المعاملة اى انسان بيعامل انسان (ولو كنت فظا غليظ القلب لانفضو من حولك)
انا مش عايز اطول عشان الموضوع ميتهش منى
تحياتى ابراهيم رزق

بصي يافاتيما
اولا انا باشكرك جدا علي البوست وعلي التعزية واهداء البوست
وان كانت التعزية واجبة لكل الشعب المصري
ثانيا انا مش هارد علي اي حاجةفي كلامك
لان البوست اللي انا نزلته دلوقتي فيه الرد وبزيادة
انا هاقولك موقف واحد بس ماقلتهوش عندي يمكن تفهمي انت والناس اللي ليهم كل الاحترام مني اللي بيردوا عندم ومعترضين علي كلامك
جدي حكالي انه زمان في التلاتينات والاربعينات قبل العصر الناصري المبارك كان ليه واحد صاحبه جدا الروح بالروح يهودي
كانوا دائمي الزيارات لبعض
وجدي كان معلق في الصالون بتاع بيتهم صورة للمنارة السباعية الشهيرة بتاعة اليهود علشان صاحبه اليهودي لما يدخل صالون بيت جدي يحس انه في بيته ومايحسش انه في مكان غريب
وصاحبه اليهودي كان معلق صورة السيدة العذرا والسيد المسيح في صالون بيته علشان جدي لما يزوره يحس انه في بيته
وكلنا عارفين حساسية اليهود بالذات ناحية السيد المسيح
لا جدي بقي يهودي
ولا صاحبه بقي مسيحي
ولكن لحد جدي ما مات كان يفتكر صاحبه اليهودي بكل خير ويعيط كل مايفكر ايامهم وعشرتهم مع بعض وده كان من اكبر اسباب كرهه لعبد الناصر
يارب يكون المعني وصل

معلش نسيت اعمل متابعة للتعليقات المرة اللي فاتت
فكتبت تعليق تاني علشان اعمل متابعة

بعد كل الكلام اللي زي الفل ده
مش هلاقي كلام يتقال
المشكلة فينا ان في ناس مننا مش فاهمين ديننا صح
ده الرسول صلى الله عليه وسلم تزوج السيدة مارية القبطية وأنجب منها سيدنا ابراهيم
ووصى بأهل مصر خير ...أهل مصر الأقباط لأن فيه نسب وصهر بينه وبينهم

ازاي نفكر بالتفكير اللي بتحكي عنه ده
مش عارفة بصراحة

وبغض النظر عن الديانة
" ومن قتلها فكأنما قتل الناس جميعا "
ربنا مقالش من قتل مسلم لا عمم قتل أي نفس بشرية

للأسف الواحد محبط نفسيا من كل اللي بيحصل في البلد
ومفيش أي تعليق ممكن ينفع غير حسبي الله ونعم الوكيل

الحسينى
------


الأول ازيك ؟
ويا رب تكون دايما بخير


ثانياً
على عينى وراسى كل اللى قولته
ف اولا و ثانيا و ثالثاً
وتقبلته اهو بسعة صدر ورحابة



بس تعالى هنا


بلاش ضرب يعنى ايه؟!!

طب دنا عاملة المدونة دى
مخصوووووص عشان انفس عن غضبى
وحكدى وعنفى ف القراء الغلابة
اللى بيوقعهم حظهم التعس ف سكتى
و بالمرور من هنا ...
تقوم تيجى تقولى بهدوء كدا ولا يرف لك جفن .. بلاش ضرب ؟!!!

بقى كدا اختكو فاتيما
تهون عليكو
و تكسروا نفسوياتها كدا
مكنش العشم

عاااااااااااا


:)

ابراهيم رزق
-----------


علق زى ما تحب يا إبراهيم
وقول كل اللى انتا عايزاه


الحرية ف العقيدة
امر بديهى و خلاص مفيهوش نقاش


وما دمنا اقرينا بالحرية دى
مينفعش (من وجهة نظرى) انى احط حدود لكل واحد بينه وبين ربنا وبينه وبين نفسه ..يفكر فيها ازاى ويعقلها

اللى مزعلنى حقيقى وبسببه كتبت البوست
مش الأاختلاف فى نظرة كل واحد لدين الآخر ولا حاجة

اللى مزعلنى بجد النفاق الإنسانى اللى على أشده
وازاى تبقى باصص لغيرك النظرة الدونية الرهيبة دى وبعدين تضحك ف وشه وتاكل معاه عيش وملح و تعتبره صديق او زميل وانتا من جواك شايفه كده وتتحجج ان الأسلام هوه السبب وانك كدا بتحافظ على دينك وتنصره ..الخ الخ


هوه دا اللى مضايقنى بس
لكن كلام ابو حميد او أى حد
على عينى وراسى

اسمعه و احترم كل ما فيه
لكن ينفرض عليا أقول بعده
أيوه
من غير ما اعقله واقتنع
لأ


تحياتى ليك

Manamino
--------

لا شكر على ما ف قلبى يا مانمينو
وربنا معانا كلنا

المعنى واصلى انا شخصياً من بدرى ومن زمان لأنى من جيل متربى على حاجة شبه بتاعت باباك ...
واستغربت جدا لما بسأل اخويا اللى ف العشرينات ليه مفيش ف الشلة بتاعتكم صديق مسيحى ..فقالى من المدرسة والجامعة واحنا منفصلين فى شلل بشكل مقصود
ايام انا كانت المدرسة والجامعة والشغل ...مفيهموش المنظر دا بالمرة
وعشان كدا انا فاهمة اللى انتا بتحكيه
وفاهمة كمان التطرف النفسى والفكرى الموجود دلوقتى دا ..جاى منين
فكرة خوف ورعب كل واحد على دينه كما لو كان الآخر هيصيبه ف مقتل
بينما لو كل حد فينا شافها بشكل تانى ..
الدنيا هتبقى اهدى واصح
زى ما كانت دنيتى ودنيا باباك
ومصر اللى احنا نعرفها
مش اللى عاوزينها بقاها دلوقت
بتاعة
احنا وهما


هروح اقرى البوست بتاعك
واشوف ايه المكتوب


كل سنة وانتا طيب
ومصر كلها بخير

يانهار أبيض

انا اسف جدا

لأنك طالما زعلانه أبئا أنا غلطان

بس اذا كان ربنا كاتب لنا لقاء قريب هحكي لك

وساعها هنشوف هتسامحيني ولا لأ

ولأنك طمطم فأنا متأكد انك بالفل سامحتي



نيجي بئا لموضو البوست

المسلمين والمسيحيين عاملين زي اتنين أصحاب جدا

همومهم واحده ومشاكلهم واحده

واحد منه لئا بصيص أمل لحل مشاكله(اللي هيا في نفس الوقت مشاكل صاحبه)

عمل ايه بئا

راح بايع صاحبه

مش بس كدا

دا بيتهمه أنه اللي جايب له المشاكل

دا الموضوع ببساطه وتلخيص شديدين

still-searching
---------------

ازيك يا لؤلؤة

الله عليكى يا الاء
شوفتى بقى انتى ف كلامك قولتى حاجة
انا شخصيا طول عمرى حساها قوى
مسيحو مصر مميزين
عن كل مسيحى الدنيا
وشركائنا فى الوطن
ومن قبلنا موجودين
انسباء الرسول عليه الصلاة والسلام
و لنا معهم نسب يتجدد دايما
اتوصينا بالجار لأنه زى الاهل وهم جيراننا الأقرب احيانا من اهلنا الحقيقين واللى بالدم
مطالبين بنجدة الضعيف فى أقصى بقاع الأرض فما بالك بمن يسكن حيك وشارعك ومدرستك وجامعتك وشغلك ومواصلاتك و كل حتة حتى ممكن يسكن بيتك
وسريرك لو هناك نسب وقرابة

ربنا يعدى الايام دى على خير


خالص ودى ليكى

اشكرك على جرائتك
لان الصراحه والمواجهه مع النفس او مع الغير خير و اول طريق للحل
انا فى نقاشى مع زمايلى المسيحيين وخصوصا جرجس جارى وزميلى واخويا الصغير والسكرتيره ولناذكريات و علاقه عائليه قويه
قالوا:ان الهجره الى امريكا اصبحت امر واقع ولا مفر الا لها الان
وخصوصا ان جرجس 2 اخواته وابوه هناك
وهو يعيش هنا مع امه واخت عروسه من اشهر واخ اصغر خريج جديد
وهى راييها ان من ضمن الكليبات مسلمين بيضربوهم بعد الحادثه
وضابط بيقول بعد الحادث دول شوية كلاب
وان الحكومه كدبت الكدبه و صدقتها
وان بياع المصاحف اللى انصاب بيبيع ايه الساعه 12 ليلا
قولت لهم اعيد عليكوا ولا لا
قالوا لا
القداس عندنا فى اسيوط الساعه 4 مساء بدل الساعه 12 ص حدادا
وهى مش بتروح قداس العيد لكن العيد ده اول مره حتروح وخايفه على ابنها
 

والله كنت مستني لحد الأخر أشوف الكلام. شوفي يا فاتيما الموضوع سهل أوي وخد أكتر من حقه أوي أوي.

- هو حصل التفجير من هنا والدولة وكل المدونين وكل المحطات ولا إلي على راسه بطحة وكأن المسلمين هما إلي فجروا القنبلة وقتلوا الناس. طيب عايز أعرف كان حيحصل العكس لو القنبلة انفجرت في جامع؟ وحيتبرعولهم وحتروح وفود لشيخ الأزهر تعزيه؟ وحييجوا في مولد النبي يلموا كل المذيعين النص كم في حب مصر؟ وكل مسيحي حيطلع يحكي قصص الكفاح المشترك لشركاء الوطن؟

عارفة أنا بقول الكلام د ليه؟ علشان احنا كلنا مصريين والقنبلة انفجرت جوة مصر ولما نعمل كل إلي فات دا معناها إن فعلاً في فرق بين المسلمين والمسيحيين في مصر وأن فعلاً في إضطهاد وفعلاً في تضييق على المسيحيين وفعلاً وفعلاً وفعلاً ...... د على أساس إن الإسلام دين إرهاب وأن مسلمين هما إلي عملوا الجريمة!

- كل دا أساسه سياسة الدولة في "فرق تسد" .... النهاردة عاملين زي لما عيل يقع و "يالاااا هيييييه، يا حبيبي قوم مفيش حاجة، يالا يا أرض يا وحشة أأ أأ، أهو حنضرب الأرض" تخلف عقلي .... ولما الناس تنسى حترجع ريما لعادتها القديمة، يضغطوا على دول شوية ودول شوية علشان كله يفضل تحت الضرس ويبقى في ورقة مفاوضات لما يحتاجوها.

- مين الكافر ومين مش كافر دي يحددها ربنا مش احنا. معتقداتنا الشخصية ومعتقدات دينا دي لنفسنا وبينا وبين بعض في نفس الدين، انما مش علشان نعاير بها حد تاني.

- تفسير الأيات والأحاديث مش شغلتنا يا فاتيما، ولأ متقدريش تفسريها بنفسك لأن معندكيش العلم ولا اللغة إلي تساعدك على كدة. انتي وأي حد تاني قدم فتوى في التعليقات. حتى لو كان التفسير ضد أي حاجة إتعلمناها أو أي حد عايز يعلمها لنا.

- زي المسيحيين ما لهم شكاوي من المسلمين، المسلمين لهم شكاوي من المسيحيين .... عارفة إيه الحل؟ قانون محايد يطبق على الجميع بدون إستثناء. أنا في اعتقادي القانون المصري متوازن جداً، ومحدش يقدر يقول اننا بنفرض الشريعة الإسلامية مثلاً. ولكن يجب الأخذ في الإعتبار رأي الأغلبية. و دي نقطة مهمة. وما عدا قوانين المواريث وقانون مدني للزواج، معتقدش في مشاكل. ما كل دول أوروبا عندها اقليات من أديان مختلفة، كلهم بيتطبق عليهم قانون واحد موحد في كل حاجة.

- يفضل التعامل بينا أفراد للشعب محدش ليه دعوة بمعتقدات التاني ولا ليه دعوة التاني بيعمل إيه، ليا دعوة بالتعامل مع جاري وزميلي وصاحبي ومديري وبس.... عادي، دولة طبيعية.

- متزعليش إن في ناس مسلمين ناقمة على المسيحيين، لما تشوفي المسلمين بيتقتلوا في كل مكان والقاتل مسيحي، نقدر نفهم الفكر المتطرف الإسلامي جاي منين. ومع إن التطرف حاجة مش مقبولة أبداً، انما لو تلاحظي إن بعد حادثة الإسكندرية قام شباب مسيحي بمظاهرات شتيمة، وإعتداء على شيخ الأزهر والمفتي، وكل واحد كان بيحاول يلاقي مبرر للخيبة دي، تخيلي لو كان الموقف بالعكس، كان حد حيبرر، ولا حنغني في حب مصر؟

- في مسيحيين متطهدين في مصر؟ عايز أسمع حالة شخصية واحدة .... طيب روحي شركة صاحبها مسيحي، وشوفي حيحصلك إيه. بس برضه مش دا المهم، المهم إلي عايز يعيش كمواطن ويبقى ليه حقوق مواطن ميستضعفش ويتمسكن وينزوي في شركاته ومحلاته ومناطقه السكنية ويقعد يصوت على إتطهاد مزعوم. كلنا واخدين على قفانا بطريقة أو بأخرى، ومش ناقصة، وألا حايولد تطرف مضاد. على الله حد يفهم.

ما علينا، كل سنة وأنتي طيبة.

Zoukas
------

عندهم حق للأسف
الخوف والذعر مسئولية أى بنى آدم فى البلد دى
وكونه لم يحدث فى مسجد مش معناه انه لا يطالنى
الكليب اللى اتعرض عند نوارة نجم للكنيسة وقت الإنفجار مشهد مرعب بجد
مكنش مشهد من فيلم سينما
ولا معروض عن بلد تانى غيرنا
دى كنيسة فى مصر
بغض النظر عن وجهة نظر البعض ان دا مش بيت الرب ...انا مش شايفة كدا
انا شايفة ناس واقفة بتقول يا رب
وبس
كوننا مختلفين فى نظرتنا ومعتقداتنا عنهم
دا شىء تانى
والمفروض ملوش دعوة بالحاصل
بس فيه ادمغة بتخليه كدا
له علاقة بالحاصل
للأسف

بس

نورتنى

وجهة نظرى
----------

ازيك يا معتز
وحشتنى دروبشاتك يا جدع
انتا فيييييييين ؟!!


كنت مستنى ؟
طيب
المهم انك بخير


كلامك هتلاقينى بقول رآيى فيه
ف البوست الجديد
عشان فيه اتنين قريتلهم قالوا كل حاجة بكل وعى ونظرة شاملة


هختلف معاك فى حاجة واحدة قولتها
تفسير الأيات والأحاديث مش شغلتنا يا فاتيما

لأ

شغلتنا يا معتز

انا اسمع التفسيرات واقرى ف كل اتجاه وناحية ومعتنق وفى الآخر اكون وجهة نظرى ...يا وجهة نظرى
:)

حتى لو معنديش العلم واللغة
انا عندى قلب استفتيه
وعقل اشغله
ويقين اوصله
أو افضل وراه لحد ما اوصله
احترم كل الاراء
واسمعها جدا واحييى كل نفر على اجتهاده بس فى النهاية انا فين؟

البنى آدم يا معتز هيفل يعيش العمر لحد آخر نفس بيتعلم ويكتشف الأشياء
علم ربنا مبينتهيش
والعلم هنا معناه ايه؟!!!
المعرفة يعنى
والعارف بالله دا
مهما عرف
هيوصل لحد فين ؟!!!
عمره ما هيوصل لنهايات الأشياء
لأن علم ربنا واااااسع ولا ينتهى

مش معنى كلامى
ان ممكن نصحى فى يوم فعلمنا ويصلنا اننا مش آخر الاديان وفيه بعدنا او المسيح صلب مثلاً ..الخ الخ
لأ طبعا مش دا قصدى
بس قصدى ان رآيك صواب يحتمل الخطأ
ورأيى خطأ يحتمل الصواب
ويكفينى تؤمن بالله عشان اصاحبك فى الوطن ومعتبرش نفسى احسن منك لأنى فهمت الأيات كدا ...

اخيراً بقى
الدولة المدنية فى ظل النظام الموجود
فكرة خزعبلية ولن تحدث
لأنهم منتفعين
فعمرهم ما هيسيبوا خيوط اللعبة تقلت من ايدهم ببساطة كدا

ومن ناحية قفانا المتاخد عليه
فهو ورام يا عزيزى
لأقصى درجات الورم

:)


كل سنة وانتا وكل الدنيا بخير
يا غالى
:)

البوست بتاعك فكرى بمسلسل اسمه الحاجة ايفون و ده اللينك بتاعه
الحلقة التالتة
http://la3ya3nyno.blogspot.com/2011/05/blog-post_31.html

الحلقة2
http://la3ya3nyno.blogspot.com/2011/05/blog-post_22.html

الحلقة1
http://la3ya3nyno.blogspot.com/2011/05/blog-post_526.html

إرسال تعليق