.

.

عـــلى ديــن المحـــبوب ...  

Posted by: فاتيما in




لــو أمُــــرْ إنسـان أن يسجــد لإنسـان
لكنت أول بـشــــر ... أمــامك ينحـــنى
و لقبضـــت على جــمــــر دينــك 
حتى يشتعـــل قـلـبى وتخـرج من رمــاده
أول عنقــــاء ... توحــــد بعقـــيدتك  




لــو أمُــــرْ إنسـان أن يسجــد لإنسـان
لأفــــرطت فى إخـــــلاصى و سماحـــتى 
وعــــبدتك حتى أشــف و أصـــبح مــــلاكاً
ولأمــــعنت فى تمــــردى و غـــضبى
وعصـــيتك حتى تتخطفنى شياطــــين الجــــن




لــو أمُــــرْ إنسـان أن يسجــد لإنسـان
لضعت سنين بمتاهات الشــك فى وجــودك
وأنهـيت طـــريقى باليقــين
ولرآنى بعض الناس إما ساحـرة أو مجـــنونة
و لظننى البعض الآخــر قـديسة أو درويشـة    




لــو أمُــــرْ إنسـان أن يسجــد لإنسـان
لما كــــف لسانى عن ذكـر إســمك 
و لطـلبت فى لحظـات الضــعف .. عـــفوك 
ولسّبحت فى أيـــام الرضــــا ... بحـــمدك 
وكل صــــباح و مســـاء بســـطت كــفىّ
داعـــــية الا تكــلنى ... لخــوفى طــرفة عــين




لــو أمُــــرْ إنسـان أن يسجــد لإنسـان
لجـــبت برســـالــتى كل أركــــان الأرض
وإن إستغــرقتنى الرحلة ..  ألف ســــنة   
ولجمعّت الأتـــباع و المخلصــــين حــــولى
حتى يخرج مــنهم المـــريدين
فينشـرون أنـــوارك
فى كل قـــلب .. تسكنه العــــتمة




لــو أمُــــرْ إنسـان أن يسجــد لإنسـان
لكـــتبت فى آخــــر سطـــر 
و قـــبل أن ترفـــــع الصحـــف والأقـــلام 
بأننى كــــنت بين العــــالمين 
هــذا العــــبد الوحـــيد الــــذى
أحـــــب ربـــــــه
أكـــــثر ممـــا هـــو أحـــــبه


 --------------------------------------------

عنوان التدوينة مقتبس من جملة 

فى قصيدة نـــزار قبـــانى
قـــارئة الفنجان
-------------------------------------------------------

This entry was posted on الأحد, يناير 23, 2011 and is filed under . You can leave a response and follow any responses to this entry through the .

29 كــــلام بيطــبطـــب عـــلى قــــلبى و روحــــى

البوســـت
مش عن يوسف
عشان محدش يتلخبط


البوســـت
من ورا المشربية

او قدامها
مش فارق


يعنى م الآخر
مش عن يوسف وخلاص

:)


صباح الورد عليكم

صباح الحب يا ستي


جامد

\:]

(:

ياااااه يا فاتيما

كتبتى حاجة فى قلبى من فترة كبيرة قوى

بس كُنت خايف تتفهم غلط

هــذا العــــبد الوحـــيد الــــذى أحـــــب ربـــــــه
أكـــــثر ممـــا هـــو أحـــــبه

دى لخصت كُل شيىء يا فاتيما (:

عارفه بقالى ساعة قدام الكيبورد عاوز أكتب و مش عارف اكتب عمال اقراها و بس (:

..........

معلش هو انتش حاطة اغنيت ايه مع البوست علشان النت عندى بعافيه شويه (:

...............

تسلم ايدكى يا فاتيما (:

و ربنا يفرح قلبك دايماً

و يهديلك القلوب يا رب

Sally
-----

صباح الهنا يا لولى


ماما بتسلم عليكى
وبتقولك
موشكرينلك قوى
ع التصحيح المهم
اللى سيادتك
اشرت إليه

ونعيش و نعك
وتعيشوا و تصلحولنا



:)

Ramy
----

ازيك با ر ر

بص هو من ناحية
تتفهم غلط
انا عارفة ان التدوينة دى
هتتفهم غلط قوى
وتزعل ناس يمكن


بس معلش

اصل هحكيلك
عارف أحمد بهجت
؟
الكاتب والصحفى ف الأهرام

له كتاب بحبه جداااا
وخدته معايا اسكندرية
ضمن كام كتاب خدتهم
وقعدت اقرى فيهم لما تقريباً
حفظتهم

اسمه مذكرات صائم
فيه تجليات صوفية كدا ومختلطة بالواقع على الحب على نقد المجتمع
على ضعف بشرى على الف حاجة
ولأن احمد بهجت مولع بالحيوانات
خصوصا القطط ...
عمل كتاب مخصوص عن الحيوانات
اللى جه ذكرها فى القرآن
من ضمنها
أكييييد هدهد سيدنا سليمان
اكيد عارفه



ف مذكرات صائم
يا سيدى
كان احمد بهجت بيحكى
عن عذاب الشخصى
فى البعاد عن حبيبته
اللى بيحبها وكان مسميها
"نور" ... شفت الجمال !!!
وكأنها لمحة نوارنية تجلت ف سمائه ورحلت
و حاجة كدا خيال

المهم

كان بيحكى عن حكاية الهدهد
وهوه بيغازل وليفته
وبيدعوها إليه
فلما الانسة ... تمنعت
قالها
وحياتك لاقلب عرش سليمان
فسمعه ميييين ؟
سيدنا سليمان وندهه
متوعداً
بس الأول سأله
ازاى ينطق بهذا اللغو
فقالالهدهد
يا سيدى
و هل يؤخذ العشاق بأقوالهم؟؟!!
فإبتسم
وعفا عنه


الملخص ؟!!

أيوووون

العشاق لا يؤاخذون
بأقوالهم


بس

:)



والغنوة يا سيدى
للولد المنكوش ابو صوت واحساس حلو
عبدالفتاح الجرينى
اسمها
إبقى إتفكرنى
دا اللينك بتاعها

http://www.youtube.com/watch?v=kUEsjcvkoHk


ربنا ما يحرمنى من دعواتك
ولك منى مثلها
وأكتر


يا ر ر
يعنى يا رامى يا رقيق القلب

مش عارف أقول ايه

بس لو قلت أنا عارف حد هيتعور

فهسكت أحسن

بصي فيه أغنيه بالمعنى العكسي لكلامك اسمعيها
http://youtu.be/FQ2yXWi0ppw

فا تى ما


وكأنك تقولين


أيُّها الجاهِلونَ ..
مَعاني المَحَبَّةْ
ليسَ لِيَ أنْ أُبَرِّرَ هذا الشُّعورَ
فلنْ تَفهَموني
ولن تَعذُروني
لحْظَةُ الحبِّ أروَعُ ما في الوجودِ
فهل ..
تُنكِرونْ ؟
وهل .. تَهْرُبونْ ؟
أيُّها الكافرونَ
بِدينِ المَحَبَّةِ
لا تَسألوني
عَنِ الحُبِّ حتَّى
تَذوقوهُ مِثليَ
أو ..
تُؤمِنونْ


انا عن نفسى وبالاصالة عن احساسى اللى ما يخيبش واللى مش متلخبط ولا حاجة وعارف يوسف الغالى نقرة والكلام دا حاجة تانية
ربنا يسعدك

كروان جريح مضروب شعاع م القمر
سقط من السموات فواده انكسر
جريت عليه قطة عشان تبلعه
اتاريه خيال شعراء ومالوهش اثر
عجبى؟؟؟

ازيك يا فاتيما و عامله ايه
انا مش هاسقط على يوسف او غيره لكن احساسى انه خيال شعراء يرتقى لمرتبة الامنية للحلم المستحيل لانه ببساطة لا يوجد من يستحق هذا الحب من البشر
لو احساسى صح ردى عليا و محدش هياخد باله ههههههه
تحياتى و سلامى ليوسف و ربنا يخليه ليكى و يحقق حلمك سواء ليوسف او لغيره
ابراهيم رزق

تفتكري ياطمطم ياجميلة انتي
ياام قلب دهب
لسه في علي وجه الارض

كائن يستاهل هذه الكلمات او هذه المشاعراو هذا الحب

في ناس هتقول في وناس هتقول مافيش

انا هقول اه في بس
ماشوفتوش ماقبلتوش ماعرفتوش

لا بجد بجد

طاااااالما ربنا خلق الحب والاخلاااااص
والوفاء والحنيه من صفات البشر
يبقا اكيد في حد يستاهل
وياسعده ياهناه اللي يقابل هذا الكائن

تسلم ايدك ياطم طم ياقمر

أيوة باين طبعا ان البوست مكتوب من ورا المشربية

من عنوانه باين قوي
ومن تفاصيل (دين المحبوب) بانت الحكاية أكثر

حب لدرجة العبادة .. حب ماله وصف .. فيه سمو وروحانية عالية

ربنا يوعد الجميع
:-)

يجاااااااااااااااامد
ايه الكلام الكبير دا ياجودعاااااااان
لا احنا كدا بنتظبط:)

مصرى جدا
-------

مين اللى هيتعور دا ؟!!!

مش انا طبعا
انتا قولت مبتضربش الستات والبنات الحلوة صح ؟
ولا اللى مكتوبله البوست طبعا
عشان دا الباشا بتاعى ومحدش يستجرى يهوب ناحيته اشاسا .. واولهم أنا !!


يبقى مين اللى هينضرب بقاااااا
لازم اللى كاتب التعليق ؟

تؤ
ميهونش عليا
اكمن عنده انتهاب رئوى
وشفختن بيه ..هستنى لما يخف
واضربه

بس خلاص



موشكرين ع الغنوة يا فندم

sal
---

آه يا سال
يا غال
ياللى فاهم
فا تى ما ...
من غير ما تقول حاجة

وكمان بترد بالشعر
عينى يا عينى

منحرمشى من دعواتك ابدا
:)

ابراهيم رزق
-----------



ماله خيال الشعرا بقاااااا
مش هوه اللى بيفتح نفسنا كتير ع الدنيا ويخليها الطف واروق ؟!!!


وبالنوسبة لسؤال سيادتك
واللى المفروض اجاوبه
و محدش ياخد باله
هجاوبمن غير حد ما ياخد باله
اذ ان البلوجر كله واخد باله
وانا الوحيدة
اللى مش واخدة بالى
انه واخد باله



يعنى يا إبراهيم
هوه اكيد فيه بشر يستحق


بس يستحق دى
من وجهة نظر مين ؟!!


يعنى هل الواحد لازم يعمل
اجماع من البشرية كلها
عشان يتوافق على حبه الشديد
لشخص بعينه
ولا كفاية يكون هوه شايفه غالى
وعالى و يستاهل ؟!!


متهيألى المفروض كل حد
بيحب حد
يبقى شايفه كدا
حتى لو هوه مش كدا قوى
عشان الإحترام الشديد دا بيعلى الإحساس ويخليك تكون انسان افضل معاه
ولو هوه فيه شوية عيوب هيحاول يصلحها عشان خاطركزى منتا هتحاول قدر جهدك تكون شخص على قدر توقعاته الكبيرة واماله



الناس تخلى بعض احسن
مش يكسروا ف بعض
قريت جملة زمان بتقول
ان الحب ليس اعمى
لأن المحب يرى ف محبوبه
ما لا يتوقف الاخرون لينتبهوا له جيداً



وانا مقتنعة بكدا
صحيح ممكن تنخدع قوى
والمشاعر تغلبك
بس العيوب بتاخد وقت ولازم تظهر
والمفروض تحب اللى قصادك دا بعيوبه ومميزاته ... المفروض تاخده كله على بعضه ومتنقيش


انا انسانة ايجابية وببص دايما للجانب المشرق
الا وهوه لما تحب حد
انتا فعلاً بتفتن بتفاصيله وطباعه وحركاته وسكناته واللى يحبه واللى ميحبوش وماضيه وحاضره وبكرة اللى جاى معاه ...
قربك منه
بيخليك المفروض تشوف فيه حاجات محدش غيرك لاحق او قادر او عايز يشوفها لأن مشغول بنفسه
او بغيره
او لا مبالى ..الخ



لكن المفروض ... الحب كدا
انا لسه مجاوبتش على فكرة
بس هجاوب


انا بحب انسان
يستاهل كدا ... من كل قلبى
ومعاه انا حد احسن
حابب الدنيا اكتر
ومتفائل فيها خير
حتى لو مجاش


بس كدا

نورتنى

:)

شمس النهار
---------

تسلميلى يا شمس الشموسات
ومنحرمشى منك


انا قابلت هذا الكائن يا حبيبتى
واقرى ردى على ابراهيم رزق اللى قبل تعليقى دا علطول


بصى يا شموسة
كنت بكلم امبارح حد قريب منى قوى
قالتلى تقريبا كلام مشابه لكدا
قالتلى
انتى تحبى كدا وبو كدا ... ماشى؟
بس هوه بقى .. مبيعرفش يحب ربع كدا
فبتتكلمى كدا ازاى عليه وانتى مشوفتيش منه حاجات تأكد دا

قولتلها ان نظرتى مختلفة عن غيرى
انا مببصلوش على انه حبيبى وبس
انا بشوفه اخويا الصغير ..زى ماجد
بشوفه كتير ابنى .. زى يوسف
بشوفه ساعات صديق
وساعات قريب
وكتير ببصله بإعجاب لأنه حد متميز ودماغه محترمة وبيكتب حلو وبيفكر اصلاً حلو
بشوفه كأنسان طيب ومبيأذيش حد ولو انه يقدر
بشوفه من كل الزوايا
وبحطهم سوا
لو زعلت منه كحبيبة ... وبيحصل كتير بصراحة ...بسامحه كأم او اخت
لما بيتجاهل اوقات مشاعرى براعيه كصديقة واقول مشغول متضايق ملوش نفس أى حاجة وافوت
عشان كدا مبزعلش منه مهما حصل
وبزعل من نفسى قوى لما بزعله غصب عنى
احساسى معاه مختلف وغريب
و غنى جدا بكل حاجة
والأهم انى مش مغصوبة على أى شىء فيه
مبعملش او اقدم
أى شىء مش حساه او بختاره
عاوزة اشوفه كويس والله ولو هتيجى واحدة غيرى تستمتع بدا بدالى
بس يكون احسن من دلوقتى ...
تفتكرى يا شموسة بعد دا كله
ميبقاش عندى يستحق اكتب الكلام دا ؟!!


ربنا يخليكى ليا

:)

يا مراكبى
---------


يا رب يا نبع الحكمة

يا رب

:-))))))

SONY2000
--------



يا سنسن يا حبيبتى
أى خدمة

وحشتينى والله يا مجرمة
ووحشتنى شقاوتك

:)

جزاك الله خيرا على المعانى الجميله و هذا الطرح الطيب
تحياتى لك

مزيكا هادية الكون فيها انغمر
و صيف و ليل و عقد فل و سمر
يا هلترى الناس كلهم مبسوطين
و يا هلترى شايفين جمال القمر
عجبى ؟؟؟

معاكى حق فى كل اللى انتى قلتيه مش كل الناس شايفة جمال القمر و مش كل الناس مبسوطين به
بصى يا فاتيما يمكن انا ماعرفكيش معرفة شخصية لكن انا عارفك كويس جدا و متابع كل كتاباتك من اول التغريبة الى الان و عارفك من انطباعات كل اللى عرفوكى
انتى انسانة طيبة محبة بتشع بهجة و محبة فى كل من حولك تلقائية و بسيطة اثرتى فى كل من حولك لكن نصيحة من اخ اكبر بكام سنة بس ههههه قد يستحق من تحبيه كل هذه المشاعر الجميلة لكن لست معكى فى مقولة ان الحب ليس اعمى لان المحب يرى فى محبوبه ما لايتوقف الاخرين لينتبهوا له جيدا و هاخذ من كلامك وهارد عليكى وهل يؤخذ العشاق باقوالهم نعم لا يؤخذ العشلق باقوالهم لان الحب قد يصل لمرحلة من مراحل الجنون و ما يتوقف امامه العاشق قد يكون وهم او خيال او خداع انا لا اقصدك بهذا الكلام و لكن اطلب فقط التروى
ربنا يهنيكى بمن احببتى ويحقق امانيكى فيه طبعا انتى تستحقى افضل و ارق انسان
تحياتى ابراهيم رزق

الشاب الصح
----------

وشكراً لحضرتك
وتحياتى انا كمان

نورت المدونة

ابراهيم رزق
-----------

يا إبراهيم
الاول بشكرك على انطباعك الحلو عنى
كتر ألف خيرك وخير كل من أوحى لك بذلك

ثانياً
اختك فاتيما
بتشوف كل اتنين حالة بذاتها
ومينفعش يكونوا شبه غيرهم
وبالتالى انا بحكى عن مشاعرى ونظرتى للحب و عارفة جدا انى فى نظر الغالبية ببالغ او بعمل شىء غريب وآخرته عذاب او جرح وممكن جدا يكونوا صح
بس انا كمان صح
ومش مكابرة
كل الحكاية انى حاطة احتمال الفشل
قبل أى نجاح
واحتمال الفراق قبل احتمال الأستمرار
عشان كدا النهاية عندى
مش دايما نهاية
ووجع قلبى مش شبه وجع الناس التانية
ولا فرحتى كمان بتبقى عادية
انا بفرح قوى واشكر على نعمة كان ممكن قوى متجيش
وبحزن قوى واحمد ربنا على زوال نعمة = شفت منها خير

والله بشوف ف كل حاجة خير
ويمكن دا اللى بيعملى شبكة زى بتاعة السيرك كدا ...فلما اقع من ع الحبل رقبتى متنكسرش

الشبكة دى اسمها تفاؤل
واسمها كمان مراعة ظروف غيرى
وان كل شىء قابل للحل والتفاهم
و ان كمان ربنا كاتب كل حاجة وما عليا غير انى افهم ليه
ساعات افهم علطول
وساعات آخد وقت
وساعات مفهمش خالص
وساعات افهم واقدر
وساعات افهم ومقدرش
وساعات افهم واستعبط
وساعات من قبل الحاجة ما تحصل
اتوقع انها هتحصل فمبقاش محتاجة أى تفسير ولا تحليلات ليه ؟

المخلص يا إبراهيم
اذا كنت قلقان عليا
متقلقش
لكن لو قلقان ان حد ياخد كلامى ويعتبره بديهية ويقتنع بيه ويطبقه
فمتخفش .. مش كل الناس زى حالاتى عشان يعملوا زيى ..انا حالة ميئوش منها يا عزيزى
:-)


نورتنى جدااااااا

فاتيما قريت تعليقاتك عند خيخة وعايز اسألك سؤال عادي جدا ومن حقي اسأله ..انتي وغيرك مرحبين بنزول نورة وغيرها في المظاهرات وعمالة تجيبيلها خطب وتعليقات حماسية من الشرق والغرب وعلاء الأسواني ونوارة نجم وغيرهم على عيني وعلى راسي وشوفوا ارصدة علاء الأسواني كام من روايته عمارة يعقوبيان !!!!! وبعدين بعد كده وسوري في اللي حاقوله وانا مش مستني منك على فكرة اي رد المهم المعلومة توصلك وتحسي بيها :هي نورة دي مش عندها ام وعندها ابن يعني تقريبا ظروفها نفس ظروفك يعني زي مانتي بتقولي ماما ثم ماما ثم ماما من حق مامة نورة تقول بنتي ثم بنتي ثم بنتي ومن حق شريف ابنها انه يقول ماما ثم ماما ثم ماما ..فاتيما ياريت لما نلاقي حد حا يرمي نفسه في التهلكة نقوله لا لا لا لا عشان لو احنا كنا مكانه مكناش حانعمل كده..وزمان قالوا اللي على البر عوام وماحدش حا يقدر يتصور او يتخيل ساعة واحدة تتهان فيها كرامته بأي طريقة والحديث الشريف بيقول افضل جهاد جهاد النفس ياريت كل واحد يجاهد نفسه وكفى وإلا فلتنزلوا كلكم اولا وبعدين نزلوا حبايبكم ..اسفي ودموعي وانكسارتي

و الله العظيم و حياة اولادى انا خايف عليكى انا عارف انك جدعة و انك تحملتى كتير و البنى ادم مش حمل صدمة جديدة عشان كده كان طلبى فقط عدم الاندفاع لان على قدر الحب يكون الجرح لا قدر الله انا حاولت الف على الموضوع لكن انتى طلعت اشجع منى و دخلتى فى صلبه
ربنا يسعدك و يهنيكى و يفرحك و يزيد من تفأولك و يفرحك بيوسف
ابراهيم رزق

فاتيما صاحبة الحس الجميل والعزيزة جدا جدا

لكل عاشق كتابة يملك بين صفحاتة الواقع والخيال وايضا العقل والجنون لكن عندما يختلط كل هذا تكون العاصفة قوية مليئة بزخم من المشاعر والاحاسيس التى تقتل صاحبها الف مرة بعدما يعبر عن بعض ما بداخلة ، كلماتك اوقفتنى من اول العنوان ثم الصورة ثم الموضوع وانتهيت باراء زوارك.
صديقتى هذه من اجمل المرات التى ابرزتى فيها اسلحة قلمك وابداع كلماتك يمكن ان يظنك البعض انك كنتى قاب قوسين او ادني من الوقوع في المحظور لكن من انقذك من كل ذلك اشياء كثيرة اولها نيازك عشقك التى اضاءت قلوب البعض وآخرها كلمة لو التى جعلت التمنى يفيد فقط الخبر وليس اكثر ولا ابعد من ذلك
بجد جميلة اتمنى ان تصلك اصوات تصفيقي لكي
كوني بخير
سيد سعد

غير معرف
--------

بص
تعليقك استفزنى
بس بشكل أفضل مش بشكل سىء


وعندى رد والله
ورغم انى افتكرت قبل ما ابتدى كتابة
انك مش مستنيه ...
ورغم انى انا كمان حاسة من جوايا
ان مفيش فيك امل
مهما شرحت
بس لازم اكتبه
لأنى محتاجة اقوله واوضحــه
ع الأقل اشرح وجهة نظرى لناس تانية
يهمنى يعرفوا


واضح جداااااااا
انك حضرتك لا تعرفنى كويس ولا تعرف نوران ودماغها
وبتفترض حاجات غريبة زى ان البنت متهورة والناس تقولها شمال تروح شمال ويمين تيجى يمين ..وكأن عقلها مش من راسها واحنا اللى حواليها بنمشيها ؟؟!!!
دا فيه ظلم شديد ليها ..

ولينا كلنا مش انا بس


نوران وأى حد ناوى
ينزل مش مستنينى امنعه ...
وانا بشجع فعلاً
لأنى مقتنعة بكدا
ومش قادرة انفذه بسبب امى
ولأنك متعرفنيش ..
متعرفش الكلمة دى معناها ايه
ولا خلفياتها
لكن نوران تعرف ...
ومقدرة وفاهمة



والدة نوران انا شفتها فى عزاوالد نوران الله يرحمه ويحسن اليه
وسلمت عليها اول واحدة
وشريف بحبه زى يوسف
واذا كنت فاكر انى مستهترة بيهم
تبقى للمرة الألف ... متعرفنيش
ومتعرفش نوران كويس
وبتحكم من برا
وانتا قاعد قصاد الشاشة
وبتطلق احـــكام



انا لما بعتت مقالة الأسوانى كنت وما زلت مقتنعة بكل حرف فيها
وانتا يا عزيزى للأسف اللى مش فاهمهما ولا فاهمنى
البنت اللى ف المقالة دى
تعرضت للاهانة
و صحيح ..اهانة جامدة
بس هيا اكرم بنات مصر
وكل بنت وست نازلة النهادرة
هما دول اللى عندهم كرامة
ويستاهلوا نشجعهم
بينما انا وغيرى اللى شجاعتنا
ناقصة وبعافية
وليها الف مهبط ومحبط
اقل منهن



انا بعتت المقالة لنوران
لأنى مقتنعة بكل حرف فيها
واذا كنت فاكر ان اللى نازل يوم الغضب مهان ...تبقى غلطان
اللى قاعد ف بيته هوه المهان
هوه الجبان غصب عنه
او بمزاجه
ولو ربنا نافخ من روح الشجاعة فى قلوب البعض ..يبقى لازم نشجعهم وناخد بإيدهم ..مش نكسر مقدايفهم
الغضب حق لكل حد
ف الدول المتحضرة الغضب حق
ما دام لا يصاحبه عنف
وانتا كلامك بيأكد ان هيبقى فيه عنف وانتا عارف هييجى من أنهى طرف
يعنى لو مش نوران واللى زى نوران عملوا كدا ..محدش عمره هيتعلم ازاى معنى الحرية والحقوق

نوران خلاص مش نازلة
لكن نوارة وبثينة كامل وكريمة كمال وبنات 6 ابريل وكفاية و داليا ماى كورنر و ذا لوست برنسيس ..
و نون نسوة كتير نازلين
ان شاء الله فرض كفاية عننا
... دول وممن لا أعرفهن يكتبن فى لوحة الشرف بتاعة البلد دى
وأى اهانة تلحق بهن
شرف و دليل كرامة
ويا ريت تكون فاهم ..وأشك


شريف بقى
زى يوسف اكيد
وانا لو كنت قادرة انزل
فهنزل عشان يوسف وشريف وعيال اخويا وصديقاتى وكل طفل بشوفه ف الشارع ومعرفوش لكن عارفة كويس ان مستقبله اسود طول محنا كدا
عارف يوم ما حصلت اول تحرشات جماعية ف العيد
فكرت ف ابنى ..اللى مكملش وقتها العشر سنين وخفت جداااااااا
قولت يا رب .زيا ترى يوسف ممكن بعد عشر سنين كمان يبقى وسط الولاد دى ؟!
مستبعدتش ... لأنى متأكدة انه ايامه اسود من دلوقتى ... طول م الحال كدا
ولو هوه نفد بالتربية الكويسة غيره مش هينفد من الحفرة دى
المفروض مفكرش ف حد وخلينى ف حالى ؟!!
طيب خلينى ف حالى
وكل واحد يخليه ف حاله
لحد ما نبقى العن من كدا



حاجة اخيرة
مبيعات علاء الأسوانى
مزعلك قوى كدا ليه؟
الراجل اجتهد وجمهور القراءة
(اللى بيفهم ولا كلهم حمير !!!)
قدر جهده ..واعترف بيها
انتا هتبصله ف موهبته كمان ؟!!
وبعدين ايه دخل
مبيعات روايته اللى واضح انها مضيقاك بالمقالة اللى حطيت لينكها ؟!!
دى نقرة ودى نقرة والمقالة مهمة ومكتوبة بصدق لأنها نقلا عن واقعة حصلت ..بالفعل
ثم ان علاء صاحب الأرصدة
اللى مزعل حضرتك دا
نازل النهاردة مع الناس اللى نازلة .. يعنى هوه مثقف
وصاحب موقف بجد
ويجب احترام اتساق فكره مع فعله



حاجة اخيرة كمان
بين سطورك فيه اتهام صريح
ليا بالجبن
وانى بناضل بشعر بنت اختى ..
وازقها على التهلكة
واقعد انا اتفرج .. صح ؟


طيب
انا موافقة يا سيدى
بس ما هو قولك وانتا حتى
مكتبتش اسمك ولا عرفتنى لينك حسابك عشان اعرف ع الأقل هويتك
وانتا عـــدو ولا حـــبيب ؟!!!



اذا كنت جبانة
فيا عزيزى كلنا جـــــــبناء
ومتخليش روحك ناصح امين
لأنك لا تملك حتى الشجاعة لأظهار نفسك



اسفى انا كمان
بس عليـــك
وعلى اللى بيفكـــر زيك

:(

ابراهيم رزق
-----------

كتر الف خيرك يا إبراهيم
متخفش عليا انا بخير
ومن ناحية الإندفاع فالوقت عدى على كدا
اختك لما بتدوس بنزين الكل يوعى وشه
:)

انا عارفة انى ممكن اكون اوفر فى نظر كثيرين وممكن اكون بخوف ناس حلوة برضو عليا .. بس ميخافوش
كتر الحب مبيموتش
قلته هيا اللى بنتشف القلب والروح

زى التفكير كدا
كتره يخلى العقل ينجلى
مش يتجنن او يفوتّ


المسألة مرتبطة بفكرة النعمة
هتستخدمها ازاى ؟
وكل ما هنالك انى بنعمة ربى احدث
وجايز حديثى يكون بيخض شويتين

وانتا مش محتاج تلف على الموضوع ولا حاجة يا إبراهيم ودى مش شجاعة منى
اختك بس اتعلمت من كل اللى فات ان مفيش وقت لكل التحضيرات والمخاوف والسكك الجانبية ..الواحد بيضيع وقت وعمر ف حاجات تصرف ذهنه عن الطريق الاساسى اللى لازم يمشى فيه وانا ضيعت وقت كتير زمان ف سكوت وخوف ومبقتش مستعدة اضيع الباقى والواحد ممكن يموت بعد دقيقة ...
ابقى الحق اقول للى بحبهم ..بحبكم
واللى اقدر اعملهم حاجة ..اعملهم
واللى اقدر اكفيهم شرى ..اكفيهم


ربنا يحرسلك ولادك
وميحرمنيش من اهتمامك

:)

ايوه يافاتيما ..بقى انا ياريت اكون فاهم ؟ وانت سيادتك بتشكي في كده على فكرة بقى انا سيد سيدك وسيد اللي جابوكي وانا من اشد الناس قراية وفهم يا أم العريف وعلى فكرة نورة انا اعرفها اكتلر منك بكتير ومخها يوزن بلد ومش انتي ولا مية زيك اللي حايمشوها لكن انا مستنية منك انتي بالذات دوناً عن كل الأشاوس اللي نازلين انك تنزلي وتسيبي مامتك وتسيبي ابنك وتنزلي وتقولي لكل الناس واولهم امن الدولة انا اهو وعلى فكرة انا كنت باقول كنت باحبك قوي بس خلاص لأني لقيتك عايزة تسمعي امين دايماً ومش كل الناس حاتقول امين الا لله رب العالمين.. وعلى فكرة انا ليس من طبيعتي اني احقد على الآخرين ولكني افهم تماما ان اي انسان في شهرة علاء الأسواني حتى لو نزل في مظاهرة عارف حا ينفد منها ازاي لكن الغلابة اللي مالهمش حد يسندهم هم دول اللي قلبي عليهم واللي باتمنى قبل ماأي حد يشجعهم على النزول يحط نفسه مكان ناسهم اللي حايفتقدوهم وبما اني مش حمارة قراية ويادوبك بافهم على ادي انا فاكرة مرة الشاعر امل دنقل الله يرحمه كان بيقول في قصيدة ما معناه انه يخجل لو مات قبل امه عشان حايتسبب لها في حزن..ابنتي العزيزة ياريتك قبل ما تصبي على الناس الكبار اللي زيي جام غضبك -حلوة جام غضبك دي - تبقي تتريثي قليلاً لأنك لو عرفتيهم حاتزعلي من نفسك قوي والله والله حاتزعلي من نفسك قوي وانا على فكرة لست جباناًكما تعتقدين لمجرد اني لم انشر اسمي ولكني اخذت على نفسي عهد امام اناس اغلى علي من نفسي الا افصح عن نفسي ومدى قرابتي لهم وانا مازلت وسأبقى عند وعدي لهم ما حييت ومرة تانية دموعي واسفي وانكسارتي

دموعى واسفى وانكساراتى
----------------------

الف باء تواصل
انك تعرفّ نفسك للى قصادك
عشان يبقى فاهم بيتكلم مع مين
وبما ان حضرتك مفولتيش هويتك
انا مش ملزمة اخمن واملى الفراغات واتخيل مدى قرابتك من عدمها لنوران


يكفينى احس انك خايفة عليها وبس
ومتغاظة منى لأنى بشجعها
على شىء مش داخل ف قناعاتك
وانتى فشلتى ف اقناعها بالعكس
ولهذا بتصبى جام غضبك انتى ... عليا



علاء الأسوانى اللى حضرتك شايفة انه هيعرف يسلك روحه كأنه نشال ف اتوبيس دا ...وجوده بيدى قيمة للحدث حتى لو محدش هوب ناحيته وأذاه ..
بس هيشوف الاذى ويتكلم عنه والعالم كله يسمعه ويصدقه لأن له مصداقية
ودا اللى يهم
أو على الأقل ... يساعد
كان ممكن يقعد ف بيتهم ومحدش يلومه
لكن نزوله ..ليه معنى
كونه مش واصلك وشيفاه متحصن ..
طب خلاص لكى قناعاتك ولى قناعاتى
وكل واحد حر
ليه مش عاوزة تسمعى وجهة نظرى و بس عاوزة اهلل لرآيك ولازم أقول عليه آمييييين ؟!!!



ومعلش بقى
انا عايزة دايما اسمع كلمة آمين ؟!!
ومين حضرتك ف الدنيا واللى تعرفيهم مش عاوز يسمعها على كل حرف بينطقه؟!!
كل واحد عاجبه عقله وافكاره
وكل واحد متمسك بأرائه
وهوه حضرتك دلوقتى مش اللى مزعلك انى مقولتش ورا تعليقك آمين ؟!!!!
وخيخة مقلتش على تحذيراتك آمين ؟!!
كل حد ف الكون عاوز ينقاله آمين لما يكون عنده قناعات ومتمسك بيها
غريبة قوى ان حضرتك عاوزة تخرجينى من وسط العالم العادى وتطلبى منى العكس وتسمحى بيه لنفسك


وبمناسبة نوران والقناعات
انا بختلف مع نوران ف حاجات كتير
بس يبدو ان حضرتك متعرفيش عالم التدوين والكتابة كفاية وارجو ان الجملة لا تستفزك لأن مقدصش اقولك انك جاهلة ...لا سمح الله
بس كل الحكاية ان التدوين والكتابة عموما عبارة عن وجهات نظر وطرح اراء
وكل واحد يكتب والناس ترد وتتناقش وبعد كدا كل واحد حر وعقله ف راسه
لما بختلف مع نوران بسكت او اقول رآيى
ولما بنتفق بقولها وبكتب عادى
هيا بقى تتحمس لكلامى ...دا شىء راجع لطباعها وعقلها ...
متحمستش برضو شىء يرجعلها
ليه بتحملينى عواقب اختيارات هيا مقتنعة بيها وانا بس بقولها الله ينور عليكى يا خوخة !!؟؟


ثم نزولى من عدمه
هوه حضرتك هتمشيلى حياتى على مزاجك وتختارلى اعمل ايه ومعملش ؟!!!
لو بتقرى عندى كتير هتعرفى كويس ان عندى اسبابى وكونها وجيهة من عدمها دى مين يحددها ؟!!!
يعنى انتى متعرفيش حاجات كتير فبتحكمى عليا على أى أساس وتتهمينى بما أشتمه من بين سطورك ؟!!!



آخر حاجة بقى
انا مش عايزة اعرف حضرتك مين
ولا هتفرق معايا وعدتى مين وموعدتيش مين لأن على قدر المعطيات اللى انتى اديتهالى على قد النتايج اللى رديت على أساسها
وفيما يخص حبك القوى ليا
فإنا بشكرك عليه
وبشكرك على سحبه من قلبك
لأن ميشرفنيش حد يحبنى قوى وهوه فاكر نفسه سيد سيدى وسيد اللى جابونى
انا ف غنى عن هذا النوع من الحب
وخليه لحد تانى ينبسط بيه ويقولك عليه آمييييييييييين


مع بعد آخـــر حاجة

لو كلامى مش عاجب حضرتك
ولو انا عاملة ام العريف
ولو محبتى ليس على مستوى توقعك
ولو انا بشجع غيرى على الأذى
ولو لا انا ولا ألف يمشوا نوران
ولو انى بصب جام غضبى على الناس وممكن اندم بعدين لو عرفت هما مين
ولو ...ولو....
البلوجـــر فيه عشرات الالاف من المدونات المحترمة وحضرتك ممكن متجيش هنا تانى ببساطة وتوجعى دماغك وقلبك مع واحدة زيى





دقت الساعة المتعبة
رفعت أمه الطيبة
عينها ..!
دفعته كعوب البنادق فى المركبة
..........
دقت الساعة المتعبة
نهضت
نسقت مكتبه
صفعته يد
أدخلته يد الله فى التجربة
دقت الساعة المتعبة
جلست امه
رتقت جوربه
وخزته عيون المحقق
حتى تفجر من جلده الدم والأجوبة
.................
عندما تهبطين على ساحة القوم
لا تبدئى بالسلام
فهم الآن يقتسمون صغارك
فوق صحاف الطعام
بعد أن أشعلوا النار فى العش
والقش
والسنبلة
وغذا يذبحونك
بحثاً عن الكنز فى الحوصلة
وغذا تغتدى مدن الالف عام
مدناً للخيام
مدناً ترتقى درج المقصلة


أمل دنقل
سفر الخروج
اغنية الكعكة الحجرية

MKSARAT - SAYED SAAD
--------------------

ازيك يا سيد المكسرات ؟!!

بص انتا من الناس اللى كلامهم بيخلينى أتغر ف روحى قوى ..لأنك فنان حقيقى و الفنانين مبيقدروش يجاملوا ويقولوا ع الوحش حلو ...ولو شافوا حاجة وحشة ومش عاوزين يضايقوا صاحبها بيكتفوا بالصمت كأضعف الإيمان

ولهذا تعليقك من اوله لآخره
انا فخورة بيه قوى ومبسوطة
لأنك تقريباً فهمت المكتوب وحسيته جدااا
وحتى كلمة (لو) دى اللى هيا فعلا الأصل فى كل حاجة جريئة انكتبت بعدها كانت برضو نصب عينى ..انه ماذا لو وما بعدها ...
انتا شرحت اللى معرفتش اقوله
ورفعت معنوياتى يا غالى
والأهم انك حاسس باللى وراه
ولا يمكن هوه باين لوحده والصب مش بس بتفضحه عيونه دا تدوينته و عنوانها والصورة والموضوع والتعليقات !!!


منحرمشى من طلتك عليا
وسلامى لزينة يا أبو زينة
:)

إرسال تعليق