.

.

الجــــــمعــة العــــظــيمـــة + تحديث هاااااااااااااااااااااااااام  

Posted by: فاتيما in








يا صباح الورد اللى فتح ف جناين مصر
الاول حمدلله على سلامتك
يا خيخة 
ويا اخو جارة القمر 
ويا نضال 
ويا كل حد نعرفه ومنعرفوش رجع بيته 
ومعرفش انا يا ترى يا هل ترى
خروج الناس .. مجرد تهدئة و هيتبعها قرف
ولا خير هيمتد  ونتباشر
يعنى الاخبار اللى بتتوالى عن محاولات 
امتصاص الثورة 
وكل اللى مجلوش خرسة من الحزن
وبيقول هنشوف الشباب عايز ايه
وهنحاول نحله
هنحاول ...هنشوف ..هنعمل 
حرف الهاء دا مضايقنى قوى 
زى حرف السين ..فاكرينه 
انا هلاقيها من بش ولا ّتس 
هيكرهونا ف العربى الله .............
دى نقط بدل تييييييييت وبدل كمان 
ما أقول كلمة ميصحش اقولها 
30 سنة ولسه هتشوفوا ؟!!
طيب




اللى غريب ومش غريب
الصمت المطبق ف جوانب آخرى
يعنى فين امين لجنة السياسات 
و ديوان الرياسة  وباقى الاخوة اللى قارفينا 
ليل نهار بتصريحاتهم ان الدنيا زى الفل 
ومفيش أبيض من غسيلك يا أوكسى 
طب اهو طلع الغسيل طلع وسخ واتنشر 
على كل حبال الدنيا ... أزيكم بقى ؟
ساكتين ليه ؟
عشان ميتمسكش عليكم كلمة 
طب حكاية عماد اديب وحلقة رجال الاعمال
اللى هتنذاع النهاردة دى ؟
هل هى محاولة لأمتصاص غضب الناس 
وخلاص هتضربوا الناس الوحشة على إيدهم
وتقولوهم كخ عشانا ؟
ولا خلاص السفينة بتغرق
وانتوا لا قدر الله استوعبتوا  وبتلهوا الناس
لحد ما تنطوا ؟!!




ف كل الأحوال محدش مستنى 
انتوا بتفكروا فى إيه والشعب بيقول كلمته 
انا من الناس اللى بيعتبروا القراية نعمة 
وقراية كتابات الناس المحترمة نعمة فوق النعمة 
دا ضى قنديل وائل قنديل .... هنا 
وبلال فضل الجميل .... هنا 
دى حاجات لكل حد نازل ولسه هينزل





اما اللى ع الخط التانى اللى هما ضباط
وعساكر اخواتنا واهالينا اللى واقفين ضدنا 
النهاية معروفة ولو بعد حين 
ودايما افتكر
مقالات علاء الأسوانى ... هنا و هنا 
واحمد الصاوى وهوه بيتكلم عن النبيل
محمد السيد سعيد الذى ليته كان حياً 
ليرى معشوقته وهيا بتنتفض  ... هنا 





المدونين عاملين شغل حلو قوى
ف الأيام النوارنية دى 
و كل حد نزل ونقل تجربة وشهادة 
كان نفسى احط الروابط كلها بس دول عاوزين مدونة لوحدهم مش بوست ولا إتنين 
وان شاء الله ييجى يوم وتتلم كل الحاجات دى 
فى شهادة للتاريخ اللى بينسطر دلوقت





مؤقتا ... هتلاقوا عند دكتور ستيتة 
غرفة عمليات نشطة لا تهدأ بقالها تلات ايام
ولحد يوم أبيض ان شاء الله هنــا
وأظن الكل تقريباً متابع شبكة رصـــد هنا 
وأخيرا التويتر الموازى ... هنا 



كام خبر انسمع من يوم 25 لحد النهاردة 
وكام حدث حصل 
السويس و المحلة واسكندرية وكل حتة 
الناس اللى بالكدب وبمنتهى التدليس الفاضح 
بيقولوا عليهم قلة مندسة 
وانا بقيت اتفائل باللفظة دى الصراحة
الأرواح اللى راحت ..هنا و هناك 
الدم اللى سال وغطى الارض وطهرها
الرجالة اللى كنا بتريقة ما بيننا كحريم نقول
آخرهم راح  فى 73 وبعدين خلاص 
البنات والستات اللى كل واحدة فيهم
بستين الف راجل بجد
الناس اللى نزلت بعيالها تفترش الميادين 
وتقول احنا طب خلاص .. بس عيالنا بكرة 
بتاعهم فين ؟!!



مش دول بس 
كل الفئات تقريباً على اختلاف الإنتماءات
الموظفين والعمال و المثقفين و6 ابريل
و انضمام بقى الأطياف  اللى كانت 
لابدة ف الدرة لحد ما تشوف ونطت ع المشهد 
لما لقت التورتة ممكن تتقسم 
بس احنا هارشينهم ... زى الوفد والاخوان
و لاّ البرادعى .. يا لهوى
اللى توه ما إفتكر
وقال ... انا جاااااااى 
وغلاوتك جااااااااااااى






مصر كلها كانت ف الشارع 
اللى له ف السياسة واللى ملوش 
والعساكر وحتى الضباط اللى مش كله موافق 
وعند بت خيخة هتلاقوا موقف مشرف
و الفيديو دا بيقول إننا وقت المحن .. واحد





مشهد تانى هام جدا وهو 
تواطؤ المجتمع الدولى وسكوته اول يوم 
وتعليقه تانى يوم على استحياء 
عشان مناظرهم  قصاد شعوبهم
و تخلى البعض وترك السقف مكشوف 
يعنى نظام انتا وشطارتك معاهم 
عشان كدا على آخر الليلة العنف ابتدى 








الأداء المهنى المشرف والمحايد 
من الجرايد العالمية
اول بأول .... هنــــا 
 يقابله الأداء المخزى والمهين
للفضائيات العربية الماجورة 
طب العربية والسعودية موقفها واضح
انما الجزيرة المتشدقة طول الوقت بالحرية 
تكش وتخاف وتبقى بالشكل الفاضح دا 
طبعا مش هتكلم عن النيل للاخبار عشان 
الضرب ف الميت حراااااااام 
انما كتبة السلطان ف الجرايد الحكومية
ومانشيتتهم النزييييييييهة اللى من قلب الواقع 
فدول يعنى ... التاريخ هيرميهم ف المزابل 
وكفاية يقال عنهم زى مشهد ف فيلم الأرض 
لما الكلب جرى .... فالبيه قال للعمدة يجيبه 
منادياً  
كلب البيه يا عمدة 
و يتبقى مشهد محمود سعد كنقطة مضيئة
فى إعلام افسدته السلطة 
وصحيح الخطوة كانت لازم تبقى من بدرى 
بس وقت الجد ... هوه برضو مصرى أصلى






حاجات كتير عاوزة تنقال ف مجلدات
بس اولها وأهمها إن 
شباب الإنترنت اللى بيقوم ثورة 
مش مجرد شباب فاضى قاعد ورا الشاشات
دول احسن ناس ف البلد دى 
ناس بتحب البلد دى بجد 
ناس اتربت صح وعشان كدا عمرها
ما مدت ايدها وغرفت من حرام 
ولا مشيت غلط 
ناس اتعلمت صح .. عشان كدا رافضة الظلم
ناس انقهرت واتظلمت فى حقوق كتير 
عشان كدا بتدور على فرصة كريمة لهذا الوطن 
شباب الإنترنت هما اخواتنا و ولادنا 
بكرة بتاع البلد دى 
وهما أولى الناس .. برسم مصيره 
ووالله لو كانت القعدة ع النت والقهاوى 
تتسمى فضا و خيابة 
فهى جت بفايدة اهى ولما خرجوا 
كانوا اكثر البشر تحضراً و حفاظا على البلد  
و شجاعتهم دى 
مجتش من الكبار اللى هرونا محاضرات 
ونظريات و أمل كاذب بقالهم سنيييييين
ويحطوا لسانهم ف بوقهم 
وليقولوا خيراً أو ليصمتوا ويسيبوا بكرة 
للناس بتوعه اللى عاوزينه أحسن 
ولو كانت احلامهم رومانسية خايبة 





احنا بنعيش لحظات عظيمة بجد 
انا فخورة انى شوفتها رؤى العين 
مش بتفرج عليها ... زى ما كنا بنتفرج
على اخواتنا فى تونس 
ونتنهد تنهيدة تحرق القلب الحزين
و اول مرة اكون مطمنة على مستقبل ابنى 
وولاد كل الناس التانية 
و كام صورة حية
ف اليومين اللى فاتوا 
كانوا ملهمين ... لينا كلنا 




ميدان التحرير
اللى مظنش حد ممكن يعدي فيه 
من غير ما يفتكر هذا المشهد العبقرى 






شبابك يا مصر الجدع الطيب اللى 
اتهموه بالهيافة والجرى ورا الكورة والتحرش
والبانجو و القعاد ع القهاوى 
وقالوا انه بيحبك كلام وبس 
لأ ..دا وقت الجد رمى نفسه 
قصاد عربية مصفحة
عشانك وعشان اخواته و ناسه وبكرة بتاعك



النخبة والمثقفين اللى بجد 
اللى نزلوا الشارع مع الناس زى الاسوانى
بلال فضل ونوارة نجم وعمرو واكد 
و وائل قنديل ...الخ  من قايمة الشرف
وكله اتبهدل واتهان عشان بيدور ع الحرية 
و الجميل الطيب اللى بميكروفونه 
بينادى بالحرية لكل حد
أى كان انتمائه السياسى 
الراجل المحترم دا بيتهان فى صورة ولا أبلغ
وصحيح فيه اخبار انه خرج 
بس الصورة دى التاريخ سجلها خلاص 



واخيرا الصورة دى






وعلى نفس النهج ..بس بلافتة قصاد مئات 
من اصحاب البدل والعصى






وبمناسبة الصورة دى بقى
واللى فيها شاب بيعلن عن احتجاجه
الأخ أمين الفتة بالخل والتوم فى الأزهـر 
الذى دُنس بأمثاله 
 آل بيقول التظاهر حرام !! 
قالك عشان الأسلام منذ ظهوره لم يعرف 
هذا النوع من التعبير عن الرأى 
واللى كان عاوز يقول حاجة يا نضرى 
كان بيقولها علطول وميسكتش
..............
دى مش نقط وبس برضو
دى شتيمة عاوزة اكتبها ومش قادرة 
طاه محدش قاله ان ربنا إدنا عقل و قال شغلوه
محدش قاله فيه حاجة اسمها اجتهاد ؟!
محدش قاله مينفعش نركب جمل 
ونسافر بيه 
بعد ما أخترعوا الطيارات ؟!!
محدش  ؟!!!
طييييييب 
نحمد الله ان لسه فى الازهـــــر 
رجال يتقوا الله
زى جبهة علماء الأزهر
واللى بيانهم كان برد وسلام على قلب 
كل مسلم ومصرى .. هـــنا 
ونحمد الله كمان ان فيه ناس محترمة 
 زى جمال قطب رد عليه الرد اللى يدخل عقل وقلب أى بنى آدم بيحاول يفهم دينه ودنياه
وان كان ناقصه حاجة شتيمة معتبرة
وبعدها يقوله .. يا ريت تنكتم احسن
انتا وكل واحـــــــد
قاعد  30 سنة يهرتل
واحنا بنسمعه ونسكتله عشان عيب
خلاااااااااااص 
الصــــــبر نفــــــــــذ 







أخيرا 
دعــــاء فى قلب كل مصــرى
واكـِــرمنا بقـــبوله ... يا من ُأشتق الكــرم 
من إســــمه




يا رب 
أنصــــــر هذا البـــلد 
و اجـــعله زى ما كل الشرفـــاء يتمنوا
 يا رب الجـــــــمعة بكــــــــرة 
متبقاش الجــــــــمعة اليــــتيمة
و لا الجـــــمعة الحــــــزينة
و لا جــــــمعة الآلآم  
و لا تكون جـــــمعة اللـــــئام 
يا رب إجعلها ... الجـمعة الاخـيرة 
فى عمر الظـــــلم والظـــــالمين
 يا رب .. إجعلها الجـــــــمعة الكـــــــريمة 
الجـــــــمعـة العظـــــــيمة  
فى كل شـــبر فيكى يا مصــــــــــــر
يا رب

---------------------------

حبيبتى من تنيتها حن الوتر 
غنت سحر صوتها 
الشجر والنخيل 
بتعلم النجم البعيد السهر
وساب سماه 
وسرح ف موجك يا نيل 
حبيبتى غنوتها غيطان الحنان 
شموسة صافية نورها ما ينطفيش
ف حضنها بنرتاح ونلقى الأمان 
نعيشه ان موتنا ليلة ..نعيش
سيد حجاب 

This entry was posted on الخميس, يناير 27, 2011 and is filed under . You can leave a response and follow any responses to this entry through the .

27 كــــلام بيطــبطـــب عـــلى قــــلبى و روحــــى

Your blog is great你的部落格真好!!
If you like, come back and visit mine: http://b2322858.blogspot.com/

Thank you!!Wang Han Pin(王翰彬)
From Taichung,Taiwan(台灣)

بص يا فاتيما
الجمعة دي جمعة استرداد شرف مصر
جمعة هتبقي زي الجمعة اللي دخل فيها صلاح الدين القدس
بس مصر هتتحرر من الكلاب والخونة
من الظلمة والفاسدين والمفسدين
أنا ربما أكون قاعد ورا شاشة
بس بحاول أغير من وراها
ولولا الظروف كنت ولا بلاش
وإن شاء الله هكون

عزيزتي شعب مصر اراد الحياة
عزيزتي انا لاأملك الا الدعاء وانا أدعي من كل قلبي ان تسلم مصر وأن تكون عزيزة بأهلها
اتابع باهتمام وبشكل متواصل التطورات منذ يوم 25 عزيزتي ما حدث مشرف جدا جدا جدا ورد عملي على كل من فقد الامل في شعب مصر وفي شباب مصر
هناك صور ولقطات لن تنسى ابدا سجلها التاريخ بمداد من ذهب
الله معكم عزيزتي وتأكدي انه ما ضاع حق وراءه مطالب

انا بحبك يا طمطومة
ومش عارفة ليه عيوني دمعت لما قريت البوست ده
وخصوصا وانتى بتقولى يارب ما تبقاش الجمعة اليتيمة ولا الحزينة واجعلها الجمعة الاخيرة فى عمر الظلم والظالمين

انا عاجبني اسم البوست
وعاجبني الدعاء اوي

اللهم امين

لابد لليل ان ينجلى
ويوما سياتى الفجر بنوره
وشرارة البداية انطلقت والمارد خرج من محبسه

يا رب إجعلها ... الجـمعة الاخـيرة
فى عمر الظلم والظالمين
يا رب .. إجعلها الجمعة الكريمة
الجمعـة العظيمة
فى كل شبر فيكى يا مصر يا رب
آآآآآآآآآآآمـــــيــــن
ان شاء الله كلنا نشارك بكره
ونقدر نحرر انفسنا وبلدنا من قيد 30 سنة
ربنا معانا جميعا

البوست حلو جدا يا فاتيما معرفش ليه هزنى يمكن لانك جمعتى كل حاجه بنشوفها انا شخصيا عندى مواقف كتير جوايا وشفتها وعملتها بس مش عايز اكتب اه والله اول مره احس انى مش عايز اكتب انا عايز كل حاجه تفضل جوايا عايز افضل زى ما انا بكرا يارب يارب احنا نستحق والله دى خطواتهم الاخيره الشرطه الله يكرم الاس الكويسين اللى فيهم اتعاملوا معانا على قدر المستطاع بالادب وكله كانوا فاهمينا بس احنا بقى بكرا عايزنهم معانا قلبى بيتقطع اما حد يكلمنى من برا مصر يقولى ربنا معاكم بحس بمسئوليه كبيييره جدا
انا مش هكتب بوست عندى خالص دلوقتى عشان كدا بطول فى الرد عندك بقى شويه اتحملينى ضيف تقيل
الشعب قام واحنا اه اوقات بنكون سلبيين لكن اللى محدش يعرفه اننا لو قمنا مش هنقعد تانى الا بالنصر

superstar racing
----------------

Thank you
very much


and I am honored

MR.PRESIDENT
------------


بسام
متزعلنيش منك وتقول ورا الشاشة دى وكأنها حاجة تكسف
الدعوة بدأت من ناس ورا الشاشة
وبعدين الروح اتنقلت من قلب لقلب
واللى مسمعش كويس
سمع ووعى وفهم
واللى مشقدرشى ينزل
نقل الصورة وساعد اللى نزلوا
واللى محصلش
بكرة ان شاء الله

دى ادوار بتتوزع
و خطوات تنمشى
لحد آخر المشوار
إن شاء الله


خلى بالك من نفسك
يلى لقلبك نصيب كبير من اسمك

خواطر شابة
-----------

دعواتك غالية يا خطورة
وربنا عالم
ان زى ما كنا بنبارك لأخواننا ف تونس
ونقولهم انتم السابقون
بتمنى تقوليهالنا يا حبيبتى
و الجزاير تقولهالكم ..وهكذا حتى تصبح فى كل بلد عربى جمعة عظيمة على شعبها
وجمعة أخيرة على الظلم والظالمين


دعواتك يا اطيب اهل المغرب

بت خيخة وأى كلام
---------------

وانا كمان بحبك قوى يا خوخة
وفخورة يا بت انى بعرفك
وفرحانة قوى ان ربنا جبر بخاطرك
وخاطر كل حد نزل ومكنش متخيل ولا اشد المتفائلين انه ربنا هيورينا ايام حلوة كدا ....
جايز عيونك دمعت يا خوخة
لأنى والله كتبت الدعاء من قلبى وانا بستحضر كل اللى حصل قصادى اليومين اللى فاتوا واللى بنشوفه بقالنا عمر طويل ...
استحضرت كل اللى إنظلموا
واتعذبوا
واتاكل حقهم
شكلنا اللى بقى بشع قدام العالم
مع اننا احسن من ناس كتير
ابسط الحقوق اللى بقت خيال
بكرة بتاع عيالنا اللى لونه غامق استحضرت كل ارواح الناس اللى ماتت
على عبارة او تحت ضخرة او ف مسرح بيولع او على الطرق او ف قسم او معتقل ..وقلوب اهاليهم المتحسرة
استحضرت الناس اللى زهرة عمرها ضاعت ف سجون لمجرد انهم قالوا كلمة وبس
الظلم اللى كل يوم بنشوفه
خلانى اكتب الدعاء دا واقول يا رب
خليها آخر جمعة عليهم
واعظم جمعة لينا

يا رب

اللهم آمين
اللهم آمين
اللهم آمين

بوسيلى شيكو شريف شكشوكة
لحد ما احضنه بنفسى
واديله البوسس طازة بنار الفرن

:)

همس الأحباب
----------

يا رب يا خالد ويسمع منك
ومن كل الناس الطيبة

من كل بستان زهرة
----------------

آمين يا زهرة

اللهم آمين

MaNoO
-----

انا عارفة يا مانووو
كلنا محبوس جوانا كلام
كلام كبير قوى
اكبر من انه ينقال دلوقتى
ويكفيه أى سطور

ربنا يفرجنا يوم أبيض
وساعتها هينقال احلى كلام ف الدنيا
يليق على ام الدنيا والكون

المدونة مدونتك يا مانووو
تعالى أى وقت واكتب اللى عاوزه


ربنا معانا كلنا

اللهم اجعلها الجمعة الاخيرة فى عمر الظلم و الظالمين اللهم اننا عبادك ونرجو رحمتك اللهم يا منزل الغيث من كبد السماء اللهم انزل عليهم ملائكة تشد من أذرهم و ترهب عدوهم

الفرحة بترقص وبتتنطط بين السطور ياطمطم
يارب تكمل بسرعة ونفرح الفرحة الكبيرة لما يقول لنا أنا فهمتكم

البوست جميل اوى والصور اللى فيه هتبقى تاريخ
متهيألى بعد كده الدكاترة النفسيين مش هيصرفوا دوا لحالات الاكتئاب العارض
هيقولوا للناس روحوا شوفوا صور يناير 2011

البرادعى كان أمل بالنسبة لى لغاية وقت قريب
بس اتخنقت بجد ومش مستعدة أصبر عليه اكتر من كده

الشيخ اللى أفتى ان المظاهرات مكانتش معروفة فى الاسلام
مشكلته الرئيسية انه مقتنع بكلامه ومصدقه
مع انه لو قرأ بس الكلام اللى هو قاله
مش اللى موجود فى الكتب هيلاقى نفسه قال ان كان فيه حرية تعبير وان المرأة أصابت وأخطأ عمر
وتقريبا مش واخد باله اننا عندنا عمر سليمان مش سيدنا عمر بن الخطاب


خيخة أنا فرحانة بيها جدا وهاموت وانزل انا كمان
بس لسه مش قادرة أقول لماما اسفة
ممكن اقول للدنيا كلها
لكن بحاول معاها وبخليها تتفرج على الفيديوهات فى فيس بوك والجزيرة الملعونة
يمكن تلين


الجزيرة انتهت من حساباتى
تخلص بس الايام دى وتشوف مين هيعبرها تانى


فى البيت وفى الشارع وفى الامتحان وانا براقب على العيال ومنكدة عليهم
مش ببطل اكلم نفسى واقول
الشعب يريد اسقاط النظام

الهى ربنا يصلح حالها وحالنا تونس
اللى فرحتنا الفرحة دى


المدونين سواء اللى نزل أو لأ
انا من زمان بتشرف بمعرفتهم حتى لو افتراضية


الرجالة عايشين اهم بعد الشر محدش منهم مات فى 73
انا اضحك على ياطمطم :)

لأ لأ لو قعدت اتكلم هعمل بوست مش تعليق
انا عجبتنى قوى الفرحة اللى بتتنطط على السطور دى

يارب تكمل وبسرعة
تسلمى ياطمطم

عزيزتي بالنسبة لنا هنا في المغرب الامر مختلف نحن ملكية ولسنا جمهورية.
ايضا الملكية هنا في المغرب عليها اجماع شعبي كبير قد تستغربين هذا لكننا فعلا نحب الملك ونحترمه ونقدره
ماحدث في تونس وما يحدث في مصر حييناه وشجعناه هنا في المغرب احتراما لارادة الشعوب لكن هنا الملكية محمية باجماع شعبي يرى فيها الضامن للاستقرار.
ربي يحمييكم ويجعلها جمعة عظيمة ان شاء الله
مع ودي عزيزتي

بصراحه انا من رأى ان كل اللى بيحصل ده مش منطقى يا جماعه انتوا عايزين ايه ؟الريس يمشى؟
اللى عايز واحد يمشى المفروض يروح له لحد عنده ويواجهه ويقول له فى وشه:امشى كفايه كده يبقى معناه ايه انهم يتظاهروا فى حته تانيه بعيد عن بيته يا جماعه عشان نكون مؤثرين وبنعمل حاجه ليها معنى لو سمحتوا روحوا لعند بيت الريس واطلبوا منه يمشى ,معناه ايه التظاهر فى التحرير وجامعه القاهره ولا السويس ولا طنطا ولا اسكندريه يا جماعه روحوا لعند بيت الريس والله ده ها يوتره اكتر وكده هاتضغطوا عليه ويحس انه مكروه بجد وحتى لو مامشيش هانكون على الاقل نفسنا عن غضبنا وضغطنا عليه نفسبا ماهو ضاغط علينا عمر بحالوا, كل واحد فينايسأل نفسه لو جم تلاته او اربعه تحت بيته وطلبوا انه يمشى من بيته وهتفوا ضده هايكون شعوره ايه ؟وهو هايعرف شعور الريس هايبقى ايه وحدوا صفوفكم بكره فى مكان واحد والكتره احسن بدل ماكل مجموعه تكون لوحدها فى حته وربنا ينصرنا انشاء الله

الحمد لله هذا اليوم اثبت ان هذا الشعب لا يموت

ان شاء الله جمعة الغضب ستصبح اكثر فاعليه من يوم الغضب

شكرا على التدوينه المشجعه دي يافاتيما

تحياتي

هما مش هيلقولنا حل نفتح الفيس بوك بيه

نفسى اخرج الشارع يابطه
جوايا ناااااار
):

يا رب اطمن عليكم و على مصر قريب
ربنا معاكم :-*******************************************************************************************************************************************************************************************************************************

على الجيش المصري ان يختار بين مصر ومبارك
يجب ان يتدخل لصالح الشعب ..

أرجو نشرها

سينتصر الشعب المصري و سيسقط الطاغية و كل أعوانه

فاتيما حبيبتي طمنينا عليكي وعلى مصر وعلى الناس كلها والله رغم بعد المسافة احنا كأننا معاكم عايشين معاكم لحظة بلحظة وبندعي ان ربنا يزيح الغمة بس تعرفي والله شعب مصر بين أن فعلا هو عظييييييييييييم جدا جدا جدا وانه وقت الشدة بيبان معدنه الاصيل
عزيزتي ان الصبح قريب باذن الله فانما النصر صبر ساعة وصدق الشاعر حين قال
اشتدي ازمه تنفرجي
قد ادن ليلك بالبلج
عزيزتي لقد أن لليل مصر ان ينجلي وسيشرق غدها الباسم ان شاء الله

وحشتونى يا طمطم وحشتونى

السلام عليكم ورحمة الله وبركاته
حقيقي حاولت كتير اطمن علي حضرتك وجه في بالي كتير دعاء كنت ومازلت بدعيه يارب يكون يوسف في حضنك وهو مبسوط و هو مصري بجد وانتي بابتسامتك معاه
يارب اللهم امين
بقول يارب يصلح حال البلد من كتر ما تهت في كل دماغ مختلفه وكلهم عكس بعض
بقول يارب كلنا مندورش علي مين ال يبقي ومين ال ميبقاش وندور علي مصرحسيت ان كل واحد بيدور علي مصلحته وبس و مصر مشم هم حاسس دا احساس قوي .. مصر هي كل حاجه

في ناس بتغيب عقول ناس وفي ناس بتسعي تخرب عقول ناس وناس مش عارفه الاصح ولا الغلط الفتنه مشيت مجري الدم في اتجساد المصريين بعشوائية يارب تداوي بكاتفهم و رجوع مصر .. الوحيده ال هتضمنا كلنا
يارب
محمد متولي .. مدونة بوكيه ورد

إرسال تعليق