.

.

مـــش إحـــــنــا  

Posted by: فاتيما in



مش المفروض دلوقتى إنى اقول 
مساء الخير عليكم 
بس الحقيقة انى لازم أقولها 
لأن هناك خير يلوح ولو ... من بعيد 
ولو كان نوره ضعيف وباهت 
بس أيوه ... فيه خير 
والنيران اللى بتندلع دلوقتى .. فيها خير
لأنها هتطهر وتنضف وتصفى القلوب 





يا جماعة الخير 
اللى بيخربها دلوقتى ...مش إحنا
واللى بيخلي البلطجية المرتزقة 
يضربوا ف الناس ... مش إحنا 
اللى مخلى الدنيا فوضى 
وملهاش كبير ولا صاحب ... مش إحنا 
اللى قتل الولاد الأبرياء 
وسفك الدماء ... مش إحنا 
اللى متخلى عن مسئوليته كراعى
لأكبر بلد ف الشرق ... مش إحنا 
واللى مبيحاسبش الفاسدين
المقصرين ... مش احنا 
و المسئول عن تطور الاحداث 
لهذه الدرجة البشعة ... برضو مش احنا 





كبر السن .. مش عذر ويمحو الاخطاء 
بل بالعكس .. كبر السن
يعنى الحكمة 
أين ذهبت هذه الحكمة الآن ؟!



نصر اكتوبر ... لا يمنح تفويض عام 
لأن الشعب كله شارك ف هذه الحرب
وكلنا نستحق التقدير .. مش واحد بعينه
كلنا نستاهل نعامل بإحترام



 
كل هتاف و شعار اترفع ف التظاهرات 
لم يكن كذب او تدليس او محض افتراء
فيه وقائع و مآسى 
أو حتى احكام قضائية تدعم ذلك 





ولو ع الحجة بتاعة الأمان 
والأستقرار دى
انا عاوزة بس اجابة صادقة 
على سؤال واحد 
من حمى البيوت والشوارع والحرمات 
من يوم الجمعة الماضى
وحتى اللحظة  ؟!!




الأجابة ببساطة 
الشعب والناس ..مش حد تانى 






الخطاب اللى وجع القلوب
ومعرفش ليه بصراحة 
مفيهوش أى شىء ملزم ناطقه
ومفيش حاجة هتتغير 
واظن ما حدث اليوم ف ميدان التحرير 
يثبت ان نية الأصلاح ... محض أكذوبة 
عمرها 30 سنة تتكرر وكل مرة نصدقها 
ومش فاهمة انا ازاى واحدة جوزها 
بيخونها بقاله  ميت سنة
و جاى السنة ال101 يقولها سامحينى 
وعمرى ما هعملها تانى 
و مع ذلك لسه بتصدقه ؟!!!






يا جماعة الخير 
فليصدق كل واحد ... اللى هوه عاوزه 
بس زى ما بيطلب من المتظاهرين 
ومن يشجعونهم ان يتعقلوا 
هما كمان اكيد هيطلبوا نفس الطلب 
أن تتوقفوا انتوا كمان وتسألوا روحكم 
هل ترضى لنفسك هذه المعاملة الفوقيه والمتغطرسة من المسئولين المقصرين
قلبا وقالباً مش هقول 
من عشرة عشرين سنة
لأ .. طب من اسبوع بس ؟!!!




وحاجةكمان
الناس الطيبة اللى بتقول 
ان النظام الحلو  .. انقذنا من الدخول 
ف حروب ودا لوحده انجاز 
معلش بس  ... ثوانى 
حروب اييييييه ؟!!
تقصدوا اسرائيل كعدو اساسى؟




طب والنبى اسرائيل ماهى محتاجة 
ترفع علينا بندقية ولا تطلق رصاصة واحدة 
مهى هزمتنا من زماااان 
وبمنتهى السهولة 
كل يوم بتهزمنا  
بتهزمنا 
بالغاز بتاعنا 
بضرب جنودنا ع الحدود ولا حساب 
بالإستفراد بأخواتنا ف غزة وتجويعهم
ببعترتهم كرامتنا ف كل مناسبة 
والتشدق على لسان رئيس مخابراتهم 
ببجاحة منقطعة النظير
انه تم اختراقنا بنجاح ولا فخر


يا جماعة 
اسرائيل مش محتاجة تعلن علينا الحرب 
احنا مهزومين خلقة

اما امريكا بقى ..فحدث ولا حرج 
والطينة م العجينة 






طب مين المسئول عن هذا ؟!!!
الشعب ؟
اكيد الشعب مسئول ..بتخاذله سنين
بخوفه على اكل عيشه وحياته وامنه 
لكن وبعدين ؟
مهو ليها آخر  ولازم هتخلص 
محدش بيهرب من مصيره
والآخر .. لا بقى فيه عيش
ولا حياة 
ولا أمن 






والراعى المسئول عن رعيته لو قصرّ
لازم نقوله يمشى
كل بلاد الدنيا المحترمة بتعمل كده 
احنا مش عجبة ولا اختراع 
ولا جايين م الفضاء وهنألف حاجة محصلتش 
ف كل جمهوريات وبلاد الدنيا !!





والمسئول من اعلى راس لأقل مطرح 
لو كبر .. او صغر .. مش دى القصة 
القصة يستاهل نمشيه 
ولا بنتجنى عليه
واظن اننا لا نتجنى .. اطلاقااااا
احنا بس شعب طيب و بننسى





وبلاش احنا 
كفاية واحد بس ... من اهل الضحايا 
اللى ماتوا ف الأسبوع اللى فات 
واللى قوام اتنسوا
يا كل من تدافع عن الكرامة والبلد
لو كان اخوك او ابن خالتك او ابن عمك 
هوه اللى مات وانداس 
تحت عربية امن مركزى 
او برصاصة طايشة
لمجرد انه ماسك يافطة 
مكتوب عليها جملة 
مجرد جملة وبس اسمها حرية وتغيير 



سؤال بس بسيط ... يعنى 
لو كان المقتول
اخوك او من دمك 
هل ساعتها هتقول عفا الله عما سلف 
وعيب علينا نعمل كدا ؟!!!
مظنش 
لأن الروح الواحدة غالية 
و الدم غالى .. غالى  .. غالى




أرجوكم يا جماعة
يلى بتحبوها بجد و خايفين عليها 
رآيكم انتوا حرين فيه  أكيد 
ومسئولين عنه أكيد 
لكن فيه مسئولية جماعية
 دماء الأبرياء
الأعتراض على الظلم 
البحث عن خلاص 
الرغبة ف الإحترام 
المستقبل الذى هذه البلد تستحقه 
حقنا كلنا ف الحياة الكريمة 



متخافوش 
ما يحدث الآن ..تمن الحرية 
تمن الكرامة 
تمن العدل 
ومفيش حاجة ببلاش 
دفعنا ارواحنا يا ما ف مراكب رايحة ايطاليا 
وع العبارات و ف القطارات و ع الطرق 
و الدم سال ف كل مكان وببلاش 
خلوه المرة دى طيب يبقى .. بتمن وبقيمة 





البلد دى .. تستاهل والله 
دى ف اسبوع رفعت سعر البترول
وعملت لخبطة ف أسواق المال العربية
اسرائيل مرعوبة و امريكا كل ساعة بحال 
ومفيش وسيلة اعلامية ولا جريدة
مبتتكلمش عن شجاعة الشعب المصرى
ولا تخفى انبهارها ... بميدان التحرير 
ولا بيوم التلات المليونى اللى دخل التاريخ



لو مكنش حد شايف اوجه الخير فيما حدث
أوعدكم ان بكرة هتفخروا بالولاد دى 
وبالأيام دى 
وتشوفوا الصورة صح 




لكن لحد ما يحصل دا 
يا ريت تعيدوا نظر وتفكروا تانى وتالت 
قبل ما تقولوا كفاية 
محدش ينفع ببساطة يقول للكرامة كفاية 
وللعزة كفاية 
وللإستقلال والحرية والتغيير كفاية 




اللى ينقالهم كفاية 
معروفين بالإسم 
وجاثمين على الانفاس والقلوب بقالهم عمر
هما الذين يستحقون غضبكم و كل نداء منكم 
 هما السبب ف اللى إحنا فيه 
ومينفعش يفضلوا تانى بعد كل هذا الفشل
والظلم والإستبداد والغطرسة 


هما اللى ينقالهم كفاية 
مش إحنا 
هما الخراب .. مش إحنا 
هما مشعلوا النار .. مش إحنا 
وهما اللى هيلعنهم التاريخ .. مش إحنا 


مش إحنا 


وقولوا ... يا رب 

-----------------------------

This entry was posted on الخميس, فبراير 03, 2011 and is filed under . You can leave a response and follow any responses to this entry through the .

29 كــــلام بيطــبطـــب عـــلى قــــلبى و روحــــى

يااااااااااااارب
يااااااااااااااااااااارب
انا مايهمنيش نفسي...
مايهمنيش اي حاجه غير بلدي
يارب يحصل اللي فصالحها ياااااارب

بصي يافاتيما انا مش كنت متوقعه منك كده
انا مشتغلتش بالمؤهل بتاعي زي زي كل الناس عندي قرايب اخوان واعتقلوا زي زي كل الناس اخويا سافر احد الدول العربيه وابويا وشافوا القرف المعامله زي زي كل الناس وعارفه انه قرف ومتاكده انه منزل بتوع الحزب الوطني النهاردة زي ماكل الناس متاكده وهو زفت وقرف ويستاهل ودم الشهدا في رقبته وبنحرص الشارع زي كل الناس ومحلي لسه داخله في شريكه في الدواجن في حدايق حلون اتكسر زي كل الناس بس مش كده
ده الشعب المتحضر اللي بينضف الشوارع ايه لزمته الجزم والمناظر الهمجيه اللي علي التلفزيون دي (شفتها بعيني كمان يوم الجمعه اللي فاتت)
ايه لزمته الدخول في صدام تاني هو ماشي ماشي خلاص مفيش التفاف ولا نيلة وكلنا متاكدين كده انه ماشي ليه الدم والمجزرة اللي حاصله في الشوارع حتي لو هو السبب فيها مااحنا بايدنا نوقفها ليه نساهم فيها وهو ماشي ليه مزيد من الشهدا وهو هيغور دم اي حد خساره فيه خلاص احنا حصلنا علي اللي عوزينه في ايه بقي ياجماعه فوبيا وجنون عظمه مسكنا طيب هو دلوقتي في تيار بيقولك لامش حسني بس يمشي وعمر سليمان يتحاكم وطلعوا الراجل عميل اسرائيل خلاص يافاتيما حطي في دماغك كمان الشحن الاعلامي ده خلاه يكسب تعاطف والناس اللي خسرت قوتها ومحلاتها وشغلها منساقة دلوقتي وده اداله تعاطف علي فكرة لو استمر اعتصام ومظاهرات التحرير الجايه هنبدء نخسر حاجات كتير من اللي كسبناها
والايام بيننا وهتشوفي ان الثورة هي اللي هتخسر من الاستمرار فيها وربنا يخيب ظني

يارب

اقتنعت يافاتيما

احداث ميدان التحرير بعد ساعات قليله من كلامى معاكى اقنعتنى

وثائق الداخليه اللى قريتها واللى ماليه النت اقنعتنى

طيبه قلب الشعب الطيب ده اللى مخلياه صابر علشان لقمه العيش 30 سنه وتصديقه لكلام التعبان ده اقنعتنى


ربنا يسترها
حزييينه على بلدى وناسها
ونفسى انها تعدى من المرحله دى بقى بسلام

هما الي كفايه
كفايه 30 سنه ذل وقهر واستعباد
اسبوع كامل واحنا بنتظاهر بسلام
الأمن بهدلنا وضربنا
وبعدين هربوا وسابوا البلد تخرب
واحنا برضوا بنتظاهر بسلام
ليه ده بيحصل دلوقتي ليه الخناقات ده حصلت النهارده
ايه الي قالوا في خطابه خلى الناس تتعاطف معاه ولا فيه اي حاجه اثرت فيه
الي مأثر فيه عصيان الأمن المركزي الي زرقت جسمي يوم الجمعه
قلبي الي واجعني النهارده من الرعب وسط البلطجيه
دموع امي الي مش عايزه تقف من الي شايفاه في البلد
خلاص لازم يمشي كفايه عليه كده
هو الي خرب البلد
لسه كام ساعه معديه على كلامه عن انه هيوفر الأمن والأستقرار للبلد وسايب الدنيا تولع
ولا يطلع حد منهم ينطق بكلمه
ده معناه انه مشترك وعارف
فاكر انه هيخوفنا وهيقدر يفرقنا
طيب مش هنمشي وبكره هرجع تاني على التحرير
ولو قدرت ابات للجمعه هعملها
والناس متخفش الدنيا مش هتتخرب وهنلاقي أمان اكتر من كده

ربنا ينتقم منه هو وكل الخونه الي حوليه

اختى العزيزه الغاليه فاتيما
الله عليكى
اثلجتى صدرى وانا خارج البلاد وامر بظروف صعبه
اكاد اجن انى ارى انبهار العالم كله بالشعب المصرى وقى ثانيه ينجح ببعض مساعديه واصحاب المصالح والبلطجيه والمرتزقه فى قلب الموازيين للاسف
اننى فى قمه الاستياء حينما ارى احد الاصدقاء على الفيس بووك يدافع عن هذا المجرم
عفوا للجميع
حسنى مبارك لم يكن ولن يكون ابى
حسنى مبارك لم يحارب وحده ابى قضى فى الجيش 6 سنوات من عام 69 الى عام 75 ويخرج برتبه نقيب ليعاودعمله كمهندس زراعى ويتوفاه الله نتيجه لاصابته بالسرطان عام 85
كل بيت مصرى منه شهيد او محارب
لايشفع ولن يشفع له اى شيىء حتى الرئيس الراحل السادات رجلالحرب والسلام تم قتله فلماذا تستكثرون على هذا الطاغيه الاعتزال بعد 30 عاما من اذاقتنا كل انواع الهوان
لم ولن انسى شهداء العباره والمقطم والقطار وقصر ثقافه بنى سويف ومصنع الاسكندريه لن انسى اكثر من مائه الف شخص قتلوا فى حوادث طريق بمعدل 3 اشخاص فى اليوم
لن انسى تصدير الغاز لاسرائيل باقل من سعر التكلفه وبيع عمر افندى وخصخصه القطاع العام ومشروع تشوكى للامراء العرب
لن انسى خالد سعيد ومروه الشربينى وبلال
لن انسى الفتنه الطائفيه بين المسلميين والاخوه الاقباط
لن انسى عندما تم تفتيش سيارتنا وتفتشينا ذاتيا الساعه ال7 صباحا فى كمين
لن انسى استفسار امن الدوله فى المطار لمجرد انى لم احلق دقنى لمده اسبوع
لم انسى الاطفال الذين يولدون بالسرطان الان
لم انسى فيروس سى الذى اصاب امى رحمها الله
لم انسى اننى تخرجت بجيد جيدا مع مرتبه الشرف وترتيب بين العشرين الاوائل على الكليه لاظل سنه فى البيت ثم اعمل ب 300 جنيه فى القطاع الخاص
لم انسى رئيس محكمه شمال القاهر عندا ضرب على ايدى عساكر الامن المركزى
لم انسى هشام طلعت مصطفى ومن الاعدام الى الخروج قريبا بعد قضاء نصف المده
لم انسى اننى لم استطع الانتخاب وعمرى الان 30 عاما لاننى اعلم تماما انى صوتى مصيره الزباله
لن انسى اهدار كرامتنا داخل وخارج مصر
كل ما حاولت ان اتذكر لهذا الشىء اى حسنه لم اجد
لا اعلم ما هى وجهه نظر من يوالون هذا الرجل
المنتفعيين نعرفهم جميعا ولكن هؤلاء فى مكاتبهم يحاولن ربط كرفاتاتهم والبلطجيه لغتهم المال
اما شباب مصر المثقف لماذا هذا التحول
لكى الله يا مصر
وحفظ الله مصر بشبابها الحر وحفظهم لها
وليتذكر كل شخص ان ما يحدث الان سوف يكتبه التاريخ
وكل منا يحب بعد عشرون عاما عندما يقرأ ابنائه التاريخ ان يقول لهم انه كان فى ذاك الوقت فى الجانب الصحيح
------
معذره اختى العزيزه للاطاله ولكنها كلمات حاولت ان احبسها داخلى كثيرا ولم استطع
--------
خلى بالك من نفسك
ولا اله الا الله

هقولك ايه بس...
عهد مبارك من أوله لآخره كان عبارة عن هزيمة باردة في صورة سلام...
كفاية انهم خايفين جدا ع المتحف و مفيش قيمة لكل اللي ماتوا في الميدان ، ده يعرفك اد ايه احنا رخاص بالنسباله...
حسبي الله و نعم الوكيل ، المفروض الناس تكون متماسكة عن كده مش بس يظهروا التعاطف مع الدول المحتلة و لما يقابلوا أول محنة يتخاذلوا بالشكل ده ، أنا مش متعاطف مع اي حد مات من مؤيدي مبارك لإنه يستاهل اللي جراله علي جبنه...
و النهب و السلب و القتل و كل ده مفروض كان يكون متوقع ، أمال عايزينها حرية بدون تمن...

yeslam fomek ya fatoma, we ta7ya masr!

يارب
الامن
الصبر
الامل
الحق
النجاح
يارب

حساكى بدافعى عن المضروبين ؟ ليه يا فطوم؟؟؟؟
العالم كل بيدين العنف ضد المتظاهرين
يعنى معروف ايه الى بيحصل و مين الى بيضرب و بيحرق و ليه

8 مليون ملوا شوارع مصر بيقولوا كفاية و مفيش اى كسر و لا حرق و موت و لا ضرب
و ضلع الالاف قابضه تقول عايزنه و الدمار ملى البلد

ياه التاريخ بيعيد نفسه
حريق القاهرة 1952
و يظهر بدل ما يحرقوا الاوبرا قالوا نحرق المتحف
المتحف الى بيحميه الشباب بجسمه
فعلا انتم مصريين يا شباب
ربنا يحميكم للاخر المشوار و ينولكم الامل

مدفعيش هما مش متهمين
الحقيقة واضحة و بتصرخ بره مصر
الله اعلم بيكم جواه مصر

:-***********
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

الناس اللى بيقولوا كفايا اتفرجوا على ميدان التحرير

فا تى ما

لا تقلقى ...ان الله معنا

والله انى ارى الفرج قريييييب

Sony2000
--------

ان شاء الله ميحصلش غير الصالح يا سنسن
لأن المرة دى الناس عملت اللى عليها
قدمت الأرواح والدم والإصرار
وربنا يثبتهم
وينصر مصر

ادعى وبس
مش مطلوب حاجة تانى

:)

mayada
------

معلش يا ميودة اهدى شوية
انا عاوزاكى تبصى لكلامك
وتشوفى سطورك بنفسك بينها كل حاجة


ليه يا حبيبتى كل هذا الظلم لا ينتهى ؟
ماذا ينقصنا كبشر عشان نتعامل بكرامة ونحصل على اقل حد من الستر و العيشة الكريمة ؟!!!

محناش قليلين ابدا
ونستاهل احسن من كدا

انتى بتقولى هوه السبب بس ف ايدنا نوقف دا ...
نوقفه ازاى ؟!!
بالسكوت والمشى جنب الحيط
مشينا 30 سنة كانت ايه النتيجة ؟
النتيجة كل القرف اللى حكيتى عنه يا ميادة
النتيجة كل اللى كتبه رحلة البحث فى تعليقه
النتيجة كل القهر والبهدلة و مصر اللى بقت ف ذيل الامم ...

فوبيا جنون العظمة
مش مسكانا احنا والله
دى ماسكة واحد الكل عارفه
هوه اللى معندوش مانع نموت بالآلآف
ونتحرق ونغرق والبلد تولع ..
ويبقى هو

الشحن الأعلامى لو كان أثر علينا
فهو أثر عليكى انتى كمان يا حبيبتى
بس كل واحد فينا واخد جنب مختلف
شايف الموقف من زواية مختلفة
كل واحد زاويته بتوسع وتضيق حسب وجهة نظره ...ومن حقك تختارى المنطق اللى يرضيكى

انا بس هطلب منك طلب
بصفتك دارسة تاريخ وهتدرسيه بكرة للعيال لما تشتغلى شغلانتك ف مستقبل انضف من الحالى
تحاولى تقرى اللينكات المكتوبة ف آخر البوست وتشوفى وجهات نظر الآخرين دول
اللى زيك
عاوزين مصر بكرامة وعزة
عاوزين بكرة من غير خوف ولا طوارىء
عاوزين الدنيا تبقى صح
واحنا نستاهل دا والله
كفاية اللى فات


ان شاء الله ربنا يكتب لكل مخلص ف هذا البلد ما يتمناه
وانتى وكل حد بيتمنى حاجة كويسة
تحصل واللى احسن منها

كل ودى وحبى
يا قاف ميم

عاشقة الرومانسية
---------------


ربنا ان شاء الله هيستر يا دودو

انا مبسوطة قوى بكلامك
ومبسوطة انه ربنا خير الماكرين واظهر لينا كلنا بسرعة ان الخطاب مجرد تنويم مغناطيسى وان الأنتقام زى ما قولتلك هوه سيد الموقف و دى مجرد وعود ف الهواء ولن تنفذ

ربنا يعديها على ألف مليون خير
ادعى انتى بس من قلبك الطيب الجدع
وربنا يستجيب يا حبيبتى

واحنا بندعى بالخير وربنا عالم

من كل بستان زهرة
----------------

انا خدت آخر بوست عندك يا زهرة وحطيته عندى ف البوست ...
ومفيش كلام بعد كلامك فيه يا حبيبتى

غير
ربنا يسمع منك
وينصر هذا البلد

رحلة البحث
----------


ازيك انتا يا محمد
ومش انتا لوحدك يا غالى اللى دمك اتحرق
بس معلش ...
دى حرب اعلامية
اومال النت رجع ليه ؟!!!
عشان تبتدى اللخبطة دى
وقد اتت بعض ثمارها للأسف

على فكرة
التعليق بتاعك عاوز يبقى بوست لوحده
من كتر ما فيه كلام كبير قوى
انشره ف بوست لو قدرت
وهعمل منه لينك اضيفه للقايمة اللى ف آخر البوست
لعل وعسى ..يفرق مع اللى بيقراه
اتمنى ذلك

ربنا يرجعك بالسلامة
وتكون مصر بقت زى ما بتتمنى

منحرمشى منك
ابداااا
ولا اله الا الله ..هوه انا هروح ف الوبا يا ولا ؟!!
طب ابقوا هاتولى عيش وحلاوة بالشكولاتة او البندق ..ماشى ؟

:)

طيب

محمد رسول الله

ELMOSTAFEZ
---------


لأ بلاش انتا يا حسنى
اعصابك يا جدع

ان شاء الله ربنا ياخد بيد البلد
وساعتها مش عاوزة اسمع منك كلمة انا تعبان ومتضايق وعندى اوكتئاب والااااااااااا عتنضرب بقى

اللى حاصل الايام دى
حاجة تشرف كل مصرى وتخلى راسه للسما
بشهادة العالم كله ...

وربنا يديمه وينصر مصر
يا رب

غير معرف
-------

مين بيدلعنى ويقول يا فطومة ؟!!

يا لهوى هم كثر لا أعرف عنهم

تيب

موشكرينلك يا فندم

:)

Wanda
-----

انا بدافع يا وندا
عشان فيه ناس كتير مش شايفة الصورة واضحة ولسه عندها ثقة فيمن لا ينفع معاه الثقة
وشايفة الحاصل تخريب ..مش ثورة
وهى ثورة بيضاء .. بيتم تشويهها للاسف

ميزعلنيش ان فيه منافقين ومأجورين ومنتفعين ..بيطبلوا

لكن اللى يزعلنى ان ناس طيبة بريئة وقلبها ع البلد فعلا .. اتأثرت بالحرب الأعلامية دى و مختلطة عليهم الاوراق بينما الحكاية واضحة قوى ...
عموما ...
التواصل معناه الحوار والنقاش
ودورنا كل واحد يقول رآيه وينفع غيره

اتمنى ان لا ننقسم ف توقيت احوج ما نكون للتوحد والإستعصام بحبل الوطن

اتمنى


انا قولت كدا لما شوفت المنظر
قولت دا حريق القاهرة 2011 ..معقول !!

أنا كمان
********************************
و
××××××××××××××××××××××××××××××××

أعقل مجنونة
----------


الكل اتفرج يا حبيبتى
اتمنى يكون بس اتفرج صح

:)

sal
---




انا مش قلقانة يا سال
بالعكس
انا متفائلة جدا جدا

:)))


وان ينصركم الله فلا غالب لكم
ان شاء الله

دعواتك يا ســـال .. يا غـــال ودعوات كل القلوب الطيبة ف هذا الوطن ...

عارفه يا فاتيما
انا هتجنن واله العظيم انا دماغي صجعت من كتر التفكير انا بعيط دلوقتي حالا عارفه ليه؟
عشان مبقتش عارفه ايه الصح وايه الغلط ايه اللي المفورض يتعمل وايه اللي ميتعملش
مين معانا ومين ضدنا انا تعبت
كل اللي عاوزه كرمتنا وعزتنا وفخرنا بنفسنا اللي نسناه من زماااان ورجاله ترجع تاني وفي نفس الوقت امان وبلدي متصبهاش حاجه والشباب ميموتش منهم حد ومصالحنا وحياتنا ترجع لا بلاش ترجع زي الاول لان مكناش عيشين الاول عاوزه بلدي افضل من الاول بكرامه وعزه واماااااااااان
نفسي في حجات كتير وكنت بحلم بيها وبتمناه وحاسه اني بقيت قريبه منها اوي وفي نفس الوقت خايفه تقلب علينا ونبقي زي العارق ولا اي دوله مشتته لا كسبنا ده ولا ده
انا مكنش عجابني الوضع اللي كنا فيه وكنت قربت اكره مصر وشباب مصر بسبب الامبالاه والمعاكسات وقله الادب بعد 25 يناير حسيت انهم رجاله وان احنا بلد بجد فخوره بيها والعيب مش فينا بس خايفه علفينا بردو وخايفه نكون بنستغل لمصلحه حد تاني واحنا مش واخدين بالنا
اعمل ايه؟
افكر ازاي؟
اسمع كلام مين؟
انا تعبت وعاوزين كلنا نرتاح زي ما بنحلم ونتمني

لحد يوم الجمعه كنت حاسه ان احنا منتهي الرقي والشجاعه
يوم السبت اكتئبت مش بسبب الشعب لان نظرتي زي ما هي العناصر اللي عملت كده هل هي الحكومه زي ما بنقول؟
هل عناصر دخيله واجانب؟
هدفها عدمك استقرار البلد
حل الناس اللي اتكلت ونزلت من علي كراسيها واتجننت وقالت مسبهاش كده لازم اولع في البلد دي؟
مييييييييييين؟
وليييييييييه
سواء اي حد انا عاوزه نطلع بقي من اللي احنا فيه من غير دم من غير ما شباب تضيع والله انا مخنوقه اوي ومش عارفه

معلش انا بكتب اكتر من تعليق معرفش ليه يمكن عاوزه اكلم مع حد حد يكلمني ويقولي هو في ايه ؟ ويمكن انا بستريح لما بكلم عندك انتي بذات
عارفه انا من كام شهر كنت بحلم بحجات كتير في البلد واقعد اقول في الشغل والناس تضحك عليا وتتريق واقعد اقولهم في البيت ويقولوا خلاص نعينك وزير واقعد احلم واحلم لو البلد يحصل فيها كذا لو نخلي كذا لو نعمل كذا ياااااه ونبقي احسن من اي بلد ونعيش صح كلنا مش شويه فووووق وكتييير تحت وارجع اقول طب ازاي وفين ومع الحكومه دي اقعدي ونبي علي جنب واقعد اقول بصي انا هكتب البوستات اللي نفسي البلد تبقي عليها واقعد انظم التعليم ازاي والصحه والشغل والمرتبات اهو حتي لو متحققش اه حلم ويكون علي ورق لعل وعسي يحصل حتي لو محصلش اهو الواحد ينفث عن نفسه عارفه لما حصلت المظاهرات دي كنت برقص بقول يااااه ربنا حنين اوي اخير هيحقق حلمنا كلنا وفرحت جدا وقلت والله مفيش حاجه بعيده علي ربنا ولحد يوم الجمعه قلت احنا شباب زي العسل ونرجع بقي كل واحد يقول رايه وفكره حتي لو حجات مش منطقيه بس ناخد برأي بعض والحجات اللي تنفع نطرحها ونقول تتعمل ونعرضها علي الجهه المختصه وقلت انا هقسم البوستات وهدعوا الناس معايا كل واحد يقول افكار في كل مجال علي حدي سواي تعليم ونبدأ بيه الاول عشان عندي افكار كتير اوي بس عاوزه تترتب ونضعه اهم مجال لانه هو اللي هيسعدنا علي المجالات التانيه وحجات كده يا فاتيما وقلت اخير هيحصل اللي نفسي فيه وكنت بدات خلاص اكتب ولما لقيت اللي حصل في ميدان التحرير لاء ميأستش ولا حاجه بس زعلت مش عاوزه نقطه دم مش عاوزه الموضوع يتطور نبقي زي البلاد التانيه وحد يحتلنا واحلامنا كلها تقع وتدمر
هو انا غلط يا فاتيما؟
محدش هيحتلنا ووسعت مني وهنبقي زي الفل و حاجه هترجع احسن من الاول ومحنه وتعدي انا بحلم كتير من غيرما استغطي؟
انا مبنمش يا فاتيما اقسم بالله العظيم ما في حد بينام عندنا في البيت انا مش عارفه هنوصل لفين ومش بلوم الشباب بتوع التحرير بالعكس كنت اتمني اكون معاهم وانول الشرف ده وانهم بدأو في تحقيق حلمي وحلم كل الشعب بس خايفه علي بلدي مش لوحدي كلنا
ومش عارفه الصح من الغلط انا بعترف انا مبقتش عارفه

سمكة واحدة
---------

ازيك يا سموكتى

بصى
انتى زيك زى ناس كتير طيبة ومخلصة وقلبها دافى وعمران بحب البلد دى و خايف عليها ومتشوش بمليون حاجة
ودا وقت التشويش والله
انتى مش لوحدك اللى بيحصلك كدا


كلنا مرينا بلحظات امل وبعدها يأس
بس سير الاحداث بيقول ان التظاهرات دى ثورة حقيقية والعالم كله بيقول كدا معانا ..محللين سياسين على ارفع المستويات و ف كل مكان
مش احنا الناس العادية بس
واللى يقلب ما بين القنوات الاخبارية كلها جزيرة عربية بى بى سى المنار ال cnn وحتى التلفزيون المسخوط المصرى ..
يقدر يفهم بشكل كامل الصورة ...
العالم مذهول بينا وبالمسيرة المليونية
مذهول برغبة الشباب ف التغيير
و ترهل النظام الحالى و عجزه
اللى حاصل دلوقتى امر طبيعى
لازم ينقال ان فيه اصابع خفية وحماس واسرائيل وابصر ايه جن احمر ..
لأن خلاص انكشفوا تماماً ومبقاش فيه غير ورقة التخويف بالخارج
بينما السبب ف كل خراب هوه الداخل
امريكا ولا اسرائيل ...مش لسه هتتخدل يا حبيبتى ..هيا نايمة ف حضننا اصلاً

انتى صح يا سمكة ف أملك
العيال دى خيرة شباب البلد دى
وعندك حق ف خوفك
بس خوفك لازم يتوجه لمصدر الخطر الحقيقى
والخطر الحقيقى ف اللى ماسكينها دلوقتى
مش من برا بس

الحلم ف التغيير والديموقراطية مش حلم مستحيل ابداااااا
دا قرب ..ومخدش غير عشر ايام صمود ونفض الخوف والشجاعة واللى مجتش غير من الجيل الجديد ...لأن القديم خلاص زمنه راح ومبقاش ينفع
كون فيه لخبطات وبوادر فوضى
مش حقيقى
كل ثورة ليها خطواتها
ولو الخطوات عندنا لم تحدد بعد
فلأن وبشهادة كل المحللين والناس اللى دارسة تاريخ وسياسة ف العالم بيقولوا
ان المصريين عملوا شىء غير مسبوق
وبالتالى المستقبل بيتسطر بشكل مختلف
اتمنى ثقتك ف الولاد دى ...متتهزش
مش مطلوب مساندة
بس ولا تكسير مقاديف طيب


معرفش انا حطيت اللينكات اللى ف نهاية البوست دى عشان يمكن تفرق مع حد لو قراها او قرى جزء منها

انصحك مدام أرق بأرق وقلة نوم زى حال كلنا ..انك تحاولى تقرى فيها ويمكن تجاوبك على اسئلة محيراكى ويمكن كمان تملى الفراغات ... كلهم ناس محترمة وموثوق ف حبهم لبلدهم ..و كلهم مستويات ثقافية و اجتماعية مختلفة ومن كل لون ...

يلا اقرى
وشوفى .. ربنا معانا كلنا
ويثبت قلوبنا يا حبيبتى

كل الود ليكى

قصيدة الثعلب والديك لامير الشعراء
برز الثعلب يوما
فى شعار الواعظينا
فمشى فى الارض يهدى
ويسب الماكرينا
ويقول الحمد لله
به اله العالمينا
يا عباد الله توبوا
فهو كهف التابينا
وازهدوافى الطير ان
العيش عيش الزاهدينا
واطلبوا الديك يؤزن
لصلاة الصبح فينا
فاتى الديك رسولا
من امام الناسكينا
عرض الامر عليه
و هو يرجو ان يلينا
فاجاب الديك عذرا
يا اضل المهتدينا
بلغ الثعلب عنى
عن جدود الصلحينا
عن ذوى التيجان ممن
دخلوا البطن اللعينا
انهم قالوا و خير
القول قول العارفينا
مخطىء من ظن يوما ان للثعلب دينا
مخطىء من ظن يوما ان للثعلب دينا
مخطىء من ظن يوما ان للثعلب دينا
مخطىء من ظن يوما ان للثعلب دينا

بدون تعليق

حالتى النفسية سيئة جدا
رجاء قراءة تعليقى عند نوران او تيريز
تحياتى ابراهيم رزق

للأسف ناس كتير مش فاهمة الكلام ده
بتلوم الضحية بدل ما تلوم الجلاد المجرم البلطجي

عايزين الدم يقف قولوا لمبارك يوقفه و يسيب التظاهر سلمي

مش تطلبوا من أشرف ناس في الارض ينسحبوا من معركة الحرية

كنت اطمع انك تقرى تدوينتى الاخيرة :)

http://amrfekry.blogspot.com/2011/02/2011_03.html

إرسال تعليق