.

.

☺ ... عـــــايزة أتـصّــــور ... ☻  

Posted by: فاتيما in




طول عمرى محبش أتصورّ 
و طول عمرى شكلى مش عاجبنى
و طول عمرى مفيش صورة ليا
بتطلع ف نظرى حلوة 
وافكر اوريها لحد بثقة  




لحــــد ما عرفتك  ...
وبقيت 
زى انغام ما بتقــول
ف الغنــــوة
بحب نفسى ... 




ولأنى فى اوقـــات غــــريبة 
بحس بحاجات غـــريبة
واتصرف بطريقة غـــريبة 
مـــلهاش تفســـير 
حــــسيت 
بشــىء عجـــيب فجـــأة



حسيت بإنى حالا دلوقتــى
واقفة على قـمة جبل 
سعادتى معـاك
وانى شايفة بعينى 
الوان السما السبـــعة 
و حاسة قـــلبى طـــير عالى وبيرفرف




و إنى لاقية حبى الثابت ليك ف قلبى 
و اللى يمكن هيفضل 
كمان لبعـد ما اسيب الدنيا دى 
بقى مالى عليا الحياة بشكل مرعب
وبقى ف الهوا اللى بتنفسه





وكمان حسيت 
انه حكايتنا مش هتشوف 
أيـــام تــانى أحلى .. 
أو أسعد من كدا ...
ومعرفش ليه ؟!





معرفش صحيح ليه 
كان احساسى كدا؟!
مع ان مكنش فيه أى زعـــل بيننا  
بالعكس ..
كنت مبسوطة 
ومطمنة  
وكمان كنت حاسة 
انى فجأة كـــدا
عايزة أتصــــّور 





أيوه ... عـــايزة أتصـــور 
عــايزة أجّمــد الفرحة دى
و مخليهاش تروح وتختفى
عايزة اعلق الصـورة دى
دايما قصادى 
عشان كل ما ابصـلها أفتكــر 
انى ف يــوم ما .. وان راح و إنقضى
كنت سعيدة كـــدا 
ومش متهـيألى مثلا ولا كنت بحلم 





ف ثوانى كان القـــرار إتــاخـــد
وبسرعة بدون ترتيب 
كنت ف محل التصوير 
وقاعدة ع الكرسى
والبنوتة المصوارتية 
حاضنة الكاميرا وبتسألنى :
عاوزة الصــــورة لإيــــه؟
رديت :
لحـد غـالى عليا
عاوزاه لما يشوفها .. 
يعرف ازاى كان فــارق معايا
ضحكت وقالت :
فهـــمت 




كانت بين ثانية و التانية بتقول :
بصى هــــــناك
هاتى وشـــك كدا 
ارفــــعى دقــــنك شـــوية
مترمشيش
حقيقى ..كـــنت مركزة قــوى
و بنتظــــر كــل تعليماتــها 
وبنفذها بالحــــرف





لكن مكنتش منتظـرة بالمـــرة
إنى اسمع جملة
فين الإبتســامة الجميــــلة .. !!
لأنى كـنت ببـص للعـدسة ساعتها 
وبستحضر حالاً كل لحظـــة 
قضيتها معاك
وأفتكـــــر 





أفتكــــر 
اول لحـــظة قربت منى 
و قربت منك
وكــل مــرة بعـدنا فيها 
و رجعنا من تـانى
كــل مـرة قـولتلك 
و قولتلى ... بحــبك 
و كــل مــرة شــوفتك فـــيها 
وكـــف ايدك حضـــنت ايدى 
بحب وحنان حـــقيقى 
مش زيف أو كدب أو مضطـــر





كل مـرة مشينا ف طـــريق 
ولقتنى بتأخـــر عنك خــطوتين
يا دوب خطـــوتين
عشان اتفـــرج عــليك 
والمحـــك وانتا ماشى من بعيد  
وانا جـــاية وراك و شيفاك 
و منظرك عاجبنى
ومحسسنى بأمـــان 
والاقينى بحــــبك اكــتر واكـــــتر 





بفتكــــر 
كـــل مـــرة جمعتنا 
ترابيزة واحدة وأكلنا وشربنا
و بقى بيننا عـيش ومــلح
كـــل مــرة سامحتنى 
على انى زعلتكّ ف حاجة 
ولا كنت قاصـــدة ازعلك
و لا كنت عـــاوزة ازعلك 
وكمان ولاكــنت متوقــعة 
تقــولى بعدها .. بكل براءة
مش متضـــايق منك ابـــدا !!




كل لحظة ســمعت صـوتك 
و كـنت حاسة
إننا قريبين من بعض قوى
و اننا سوا 
رغم البعــد و المسافات

 


كـل لحـظة سعادة
عشتها معــاك يا حبيبى
ونفسى لو بس
أقــــدر اثبتــها 
على شـريط الزمــن 





كــل بهجة
خلقتها 
وإتسـببت فيها
لقلبى الضعيف
قاصد كنت
ولا متقصـــــدشى





كل هذا الطوفان من الحب 
كان كافي عشان بقـلبى 
وروحى وعينى وكـل ملامـح وشــى 
ابتســــم قووووى
و اقولك ف سـرى .... 
أنا .. يا حبيبـى .. بحـبـك





تـــــــك .. تــــــــك 
الله 
إيه دا
!!!!!!!!!
.................
خـــلاص حضرتك 
الصــــــورة إتاخــــدت  
:)



------------------------------------------
انـــــا
لست جـــميلة
و لا حــــلوة
أنـــا .... مـوجــــودة
تيرى بباوى
------------------------------------

This entry was posted on الثلاثاء, فبراير 22, 2011 and is filed under .