.

.

يا مفـرقـــّين البومــبونى .. أنا مـخــدتش  

Posted by: فاتيما in



مـــن عـــــند نــــــوارة 
-----------------------------------------------




---------------------------------------------



تحديث -3
---------------------------------


البوست دا غريب شوية 
او مش غريب ولا حاجة 
هوه بس ماشى بسرعة مع الاحداث
ويمكن لأنى حاسة انى عاوزة اسكت
و انتظر فرج ربنا الذى يأتى كالعادة
ف اللحظات القاسية دى 


امبارح 
كنت ف التحرير ورايحة كلى يأس بداريه 
وبغالبه عشان كنت فاكرة هلاقينا 
عددنا قليل
بس اكتشفت لما روحت 
(واللى راح صعب يخالفنى ف الكلام دا)
ان عدد الحضور والروح الثايرة 
والمناخ العام كله بيقول  .. لأ
احنا ما زلنا قلقانين وخايفين 
ومحناش مسلمين دماغنا لحد 
لغاية ما نشوف المطالب بتتحقق
والصحصحة موجودة والحمدلله 
انا روحّت الساعة 6 تقريباً ومقعدتش
ظروفى متسمحيش بالبيات 
ولو انى اتمنى انول هذا الشرف 
محضرتش المواقف ولا المناظر السخيفة 
اثناء النهار اللى قال عليها فولتا فى تدوينته
متبهدلتش م الشرطة العسكرية او البلطجية
حسب روايات البعض ومكالمات الجزيرة
او جت بسيطة حسب روايات البعض
التانى والشاهد عيان .. زى نورهانتى



انا بحب جيشنا اكيد وبثق فيه 
بس لا أثق اطلاقا فى قياداته اللى هيا
جزء لا ينفصل من نظام الرئيس السابق
مبطمنش للأحزاب الحالية ولا الإخوان
لكن بثق ف اشخاص بعينهم 
وبقول هشوف بكرة فيه ايه 
لما ييجى وقت الإختيار  والحسم 


مش عاوزة البرادعى ولا موسى روساء
لكن سايبة الباب مفتوح لأى حد يقنعنى 
ببرنامج كويس والاهم تدعمه قيود دستورية 
تمنعه يبقى اله و يتجبر علينا



مستنية دستور محترم .. ياخدنا كلنا للأمان
و منيش مطمنة لحد ما اسمع اراء 
فقهاء الدستور والقضاة والناس فيه واطمن


فاقدة اى ثقة ف الشرطة الحالية 
وقياداتها ورموز النظام كلهم كلهم 
حتى المعقول والشبه محترم فيهم



عاوزة اشوف وشوش جديدة صحيح 
بس نضيفة و مخلصة 
مش ضحك ع الدقون واستنى واشوف 



عارفة ان كل حاجة عاوزة وقت 
بس فيه اشياء لازم ينضرب على راسها
وهيا ساخنة وبتفرفر عشان نخلص منها



فاهمة ان فيه ناس مش فاهمين حاجة 
وناس خايفين 
وناس متشائمين 
وناس عاوزين يغمضوا ويفتحوا يلاقوا 
كل حاجة خلصت والدنيا إستقرت بأى شكل 
اتصور كلنا كدا 
وبتتغير الحالة يمكن كل وقت والتانى
عارفة ومتأكدة احنا بشر 
والوقت عصيب حتى لو بنهزر ونقلبها كوميدى
بحكم الجينات والشربات الذى يتنازع 
مع كرات الدم الحمرا والبيضا ف الدم المصرى
مشكلتى ومأساة حياتى انى ست متفائلة
وخدت قرار انى لما اتمنى الخير هاجده 
ان شاء الله ولو بعد مدة 
ف التحرير كانت عينى دايما رايحة
على نقاط النور والمشاهد الجميلة و بس 
طبيعتى دى اغلب الوقت 
بتخلينى مبصش ع المساوىء 
ومعنديش دقة ملاحظة على الأطلاق 
ودى مشكلة و نعمة ف الوقت ذاته
مشكلة انى ممكن افوتّ حاجات كبيرة
بس كمان بتخلينى ادى فرصة لبكرة ييجى
هوه صحيح جاى جاى من غير حاجة 
بس ع الأقل بنتظره بأمل و حبة تفاؤل 
يسندونى ويخلونى اتحمل المرارات 



اللى ملاحظاه اليومين اللى فاتوا 
اننا رجعنا تانى نخاف بشدة ونترعب 
ونفقد الامل من جديد ف أى خير جاى
أرجووووووووووكم 
بلاش اليأس دا 



الاختلافات ما بيننا امر طبيعى
فيه حد بيشوف المميزات ونقاط النور بس
وحد يلاحظ العيوب او المخاوف وبس


حد شاكك ف المجلس على طول الخط
وحد واقع ف غرامهم على طول الخط


حد رافض أى ثقة مهما المجلس عمل 
وحد بيحايل فيهم عشان البديل أسوأ


حد قلبه وجعه من كتر التحليلات والكلام
وحد مش لاقى كلام يقوله 


حد  فاهم وشايف الصورة شبه كاملة
وحد مش فاهم وبيتمنى يفهم 


م الآخــــر 
كلنا بنتخلف اكيد 
بس كلنا برضو متفقين 
متفقين اننا عاوزينها ثورة مكتملة 
وهدفنا ف النهاية ختام .. كما نتمنى 
ممكن ارجوكم نتمسك بكدا 
ونسيب أى حاجة تانية بتشتتنا ؟



مش مهم رأيك او رأيى ف الجيش دلوقتى
المهم اننا متفقين .. هننزل الجمعة الجاية
بإذن الله 
مش مهم اعتذار الجيش 
- الغير كافى بالمناسبة - لكن المهم 
الحرص طيب على انه ميحصلش تانى
وان المطالب تتحقق
ولو لم تتحقق ... يحصل تحركات تانية 
اللى قادر ينزل كل مظاهرة .. ينزل 
اللى قادر يبات ويعتصم  .. يبات
اللى قادر يكتب كلمة مشجعة .. يكتب 
اللى عنده اقتراحات ..يقترح 
واللى عنده سؤال .. يسأل 
اللى زهق وانتابه يأس .. ياخد هدنة 
واللى قرب يتعب ... يلتقط انفاسه ويرجع
محدش قال انها بالساهل ولا بسيطة
دى بلد كانت قاطعة النفس وف غيبوبة
ورجعت بعد موات 
المنتفعين من رقادها ..هيستميتوا 
والفرحانين برجوعها ..لازم برضو يستميتوا




واللى شايفها غامقة وبتخلص 
يفتكر بس بعد خطاب الرئيس التانى 
و اثناء الأربعاء الأسود 
الثوار اتعرضوا لحملة شعواء ازاى  
والحالة كانت تتجه لسحقهم وقمع الثورة 
وساعتها حطينا ايدينا على قلوبنا
وقولنا خلاص
و طلع مخلاصشى ولا حاجة 
عشان ربنا فرجها وفتحها من عنده
الفتح المبين 
حد كان يقول اننا مش شهر كنا بحال 
والنهاردة بحال تانى تمامااااا
ومجدى احمد حسين من شهر يادوب
الكل كان بيناشد  وبيشحت
خروجه - القانونى- ... ومبيخرجش
دلوقتى هوه اللى حر 
فأين جبروت خصمه ؟
خالد سعيد الطلقاء قاتليه 
قبل ماتمر سنويته ربنا ينتقمله وياخد بتاره 
فأين جبروت خصمه ؟ 
سعد الشاذلى ف نفس اليوم 
الذى يرقد فيه ف تراب الوطن
 يرحل اللى سجنه وشرده واهان اسمه 
فأين جبروت خصمه ؟



سبحان المعز المذل 
سبحانه كان ينتظرنا نتحرك 
وادينا اتحركنا ..المطلوب منوقفش 
مهما حصل ..نتكاتف رغم اختلافنا 
ومنوقفش



الميدان وكل حتة ف مصر  من 25 يناير
تكاتفت كل الاطياف عليه واتفقت ع الهدف
ولهذا الخطوة وسعت وكبرت  وانجزت
خلونا نتفق دلوقتى .. ع الهدف الأهم 
ونسيب المهم .. لبعدين
نبقى نشد ف شعر بعضينا ونزعل



متنكروش ان كل ما يحصل حاجة سيئة
بتجيب نتيجة عكسية ..بعد شوية
وينقلب السحر على الساحر 
رب ضارة نافعة 
و حبذا اللى حصل م الشرطة العسكرية 
يبقى جرس إنذار ..لمن يثقون الثقة العمياء
وتأييد لقلوب اللى م الاول مش مطمنين


منظر احمد شفيق دلوقتى اسوأ
بعد اتفاق الكل على رحيله 
وبعد منعه اذاعة حلقة ابراهيم عيسى
محمود سعد رافض يظهر معاه ف التلفزيون
ونوارة نجم مقترحة حاجات كويسة
والناس من منصة التحرير قالوا اقتراحات
حلوة والله وقابلة للتنفيذ وادينا هنشوف




حبة صبر صغيرييييين 
وحبة امل
و عشر حبات ثقة ف شرفاء هذا الوطن
وعشرتلاف حبة ثقة ف الله اكتر يا عيال 
ممكن ؟

 
--------------------------------




تحديث  - 2
-------------------------------------------

حقائق مؤكدة 

بتوع التحرير صح من اول دقيقة لحد الآن 
رئيس الوزراء طلع اغلى م اللى جايبه
البلد لازم تنحكم بمجلس رئاسى يمنع التسلط
 عمر الجيش ما كان ملايكة بجناحات  
و البومـــبونى وصـــل

----------------------------------- 
هتاف مليونى بليغ
 عيشوا بشرف ... جاتكو القرف
-------------------------------------




إهىء إهىء 
عاااااااااااااااااااااااااااااااااااااا


كدا برضيك يا كابير 
مكنش العشم فيك 



بقى أقف ف الميدان على رجلى 
ييجى سبع ساعات  .. بحالهم 
مستنية مراسيلك يهلوا عليا 
و يطلعوا بالبسكوت 
و يبرزوا البومبونى  ف عين اتخن تخين
و ف الآخـــر ... تخـــلى بيا




والقصة بدأت لما
 قررت احضر جمعة الإصرار 
و لو انى نازلاها بمود اكتئابى عاااااام
 يحدونى .. ويغمرنـا جمعااااااااء 
بسبب الأخبار النيلة
اللى عمالة ترف على دماغنا 
م الشرق و الغرب ولا تسرش القلب
فقولت طب مبدهاش ..انا هروح عشان 
ابقى مجرد .. نقطة ف مجموع 
تملى المشهد من فوق وبس
يكون شكلنا كتير و مشجع 
ومش ههتف حتى .. مليش نِفس





وبالفعل ... كتبت لافتة قبل نزولى
من وحى اليأس الرهيبى ..نصها الآتى

طـــــز 
الكبير مشى صحيح 
بس انا لسه قاعد ..
التوقيع 
محجوب عبدالدايم 
القاهرة 2011

اصلى كنت متغاااااااظة جدا 
وف دماغى عشر اسامى ولا حاجة 
لمحجوب عبدالدايم بتاع القاهرة 30 و لسه
قاعدين على الكراسى 
ويتغير سيدهم اللى بيخدموه 
 ويفضلوا هما يطلعولنا ف لسانهم 





المهم 
 عنها و نزلت يا مؤمنين 
جرنالى ف ايدى 
وبطاقتى ف جيبى
و نضارة الشمس على عينى 
و حزنى واليأس والغيظ اغالبه 
والأبتسامة ما تزال ف وجهى
وعديت حاجز التفتيش ودخلت الميدان
ولقيت كم محترم من الناس الحقيقة 
بالنوسبة لساعتين قبل الصلاة
والعدد كان مشجعاً بالفعل






قوم نقيت موقع استراتيجى
اشوف منه المنصة
بتاعة الأذاعة عشان  اسمع الناس
و قعدت اقرى ف الجرنال 
واعمل شوية مكالمات ارزل بيها
ع اللى بحبهم







يا دوب ساعة والعدد زاد اكتر 
والهتافات عليت 
واستعد الكل للصلاة وابتدت الخطبة 
امام مسجد عمر مكرم .. ربنا يفتح عليه
شجع الثورة وشدد ع المطالب 
والدعاء لإخواننا ف ليبيا 
الصلاة انتهت وصلاة العصر تقديم 
وبعدهم صلاة الغائب على شهدائنا
وشهداء ليبيا الحرة
وقداس اخواتنا المسيحيين
ثم انطلق الميدان كما عهدناه كلنا 
هادر ثائر على قلب رجل واحد








العدد مكنش زى الجمعة اللى فاتت
بس كان عدد ممتاز وكافى لتوصيل الرسالة
وكمان الهتافات كانت رائعة 
وطالعة م القلب 
لأ .. دى من قلب القلب
كلها احساس عميق بالظلم
مليانة غضب لمقتل الشهداء 
و حبس المعتقلين
حنق شديد من مقتل سواق الميكروباص
على يد ضابط الشرطة
رفض لصلف وعنجهية وزير الداخلية
حكاية الدير والهجوم عليه 
وحريق مبنى تابع لوزارة الداخلية ..الخ
الألفاظ المستخدمة ف الهتافات
وكلمات الصاعدون على المنصة 
كان فيها تعبيرات
واضحة عن نفاذ الصبر 
والإحساس انه كفاااااية استعباط علينا 
شهر بحاله وكلهم لازم يمشوا 
وهيتحاكموا 
اتكلم ناس محترمة كتيييييييير 
هقول مين ولا مين .. بس كان الكلام 
والناس والجو العام وكأن الثورة
فى أوج اشتعالها مهديتش يوم







بعد شوية لقتنى بقلب اليافطة بتاعتى 
وبكتب هتاف جديد خالص ...

 
آه  .. منا لقيت الجماهير بتهتف لمصر
وقايمة بالواجب وزيادة 
قولت ابقى انتهازية  واخرجلى 
بطلب فئوى و لا انا مليش نفس ؟!!






أيوه 
انا مخدتش حاجة
فين البومبونى يا حكومة
ربنا ع الظاااااااالم
و ناس تعدى و تصورنى 
و ناس تقرى اللافتة وتبتسم
و بعد ساعات من الحماس الثورى 
و الهتاف .. لما اللوز بانت
صعبت على مواطن بسيط من الشيعب 
وادانى واحدة هولز اللهى يسعده
بس سألته الاول انتا معانا ولا مع التانيين
ومطلعش جاى من عند شفيق برضو
خيااااااااانة 


لأ ... انا مقهورة 
ومصـــرة إن الوزارة دى لازم تمشى
هوه مش فى حوار سابق رئيس وزراءنا
قال هيبعتلنا بومبونى وبسكوت 
ما أن ننوى التظاهر ف التحرير
ولا انا بيستهيألى ؟




طب انا مسامحة ف نص الحكاية
إذ إن بنوتى حبيبتى
بسكوتة 
بسكى بساكيتو  و ربنا يخليهالى
و عندى اكتفاء ذاتى م البسكوت البمبى
انما البومبونى بقى
ومخزونى الإستراتيجى منه 
اعمل فيه ايه  ؟
وإذا أنا عديت المسألة كدا ... 
ماذا تفعل الأجيال القادمة من بعدى ؟
اهو دا أمر لا يمكن التفريط فيه
دا مستقبل وطن يا جماعة .. عنهرج ؟!!







آخـــــر الكــــلام ...
  





الناس اللى قلقانة م الثورة المضادة 
(يعنى كلنا تقريبااااا
الحمدلله
احنا اهو .. زى الفل
والنهاردة اتقال شوية اقــتراحات ممتازة 
منها .. المرابطة ف الميدان  والبيات
ومنها .. الأنتظار للجمعة الجاية
لتنفيذ المطالب ولو لم تنفذ يتم 
الأنطلاق نحو وزارات الخارجية والعدل ..الخ
لمنع الوزراء المرفوضين كلهم .. من دخولها
لا تنازل عن محاسبة ديول النظام 
ومحاكمة الرئيس السابق والذهاب لشرم
والجديد والجميل المرة دى 
انه على هتاف رائع 
يطالب بإقصاء النائب العام بصفته
شيطان اخرس على كل المظالم والمفاسد 
وحق الشهدا لم ينسى 
ولا كل حاجة تقريبا تم الإبطاء ف تحقيقها 
وليبيا لم تنسى ولا العراق ولا اليمن ..


و والله احنا شعب رائع 
فبلاش نفقد الثقة ف نفسنا 
خلونا نسمع بعض و نسند بعض 
ونطمن ان ما زال سقف الطلبات 
عالى والحمدلله
والقلوب لسه مشتعلة 
وكأننا النهاردة كنا 
ف 25 يناير ..مش 25 فبراير






اما الاخوة المتفائلين قووووى 
و اللى كانوا بيدافعوا  عن أحمد شفيق
ميحاولوش معانا تانى بقى يا ريت
 أصل انا بعد وقوفى ساعاااااااات 
ف انتظار مبعـــوثه
قولت وبكل ثقــة
الوزارة دى لازم ترحــل 

الراجل .. وعدنا وعود و ملتزمشى 
 خلاص .. يمشى
أصل .. ببساطة كــــدا 
اللى مش قادر يبعتلنا شوية بومبونى
هيقدر يعدى بينا الفترة الإنتقالية ازاى ؟!!!


متوجعوش دماغنا  تانى
واسمعوا اجابة الناس ف الميدان
 
اللى بيسأل يمشى ليه 
حسنى مبارك جابه بإيديه




طب بذمتكــو 
وانا عارفة انها فــلة و طـــبق بنـــور
حصل ولا محصلشى ؟!!





كل مظاهرة مليونية وانتوا طيبين
:)


------------------------------
----------------------

This entry was posted on الاثنين, فبراير 28, 2011 and is filed under . You can leave a response and follow any responses to this entry through the .

54 كــــلام بيطــبطـــب عـــلى قــــلبى و روحــــى

أنا أخدت كان بيبسي

هههههههههههههههههههههههههه

حصار مجلس الوزراء حاليا

أهم من التحرير

نقلنا الموقع

واخد لي بالك يا عم الحج

ازيك يا تيما


مليش دعوه انا كمان عايزه بومبوني
(ياريت يكون بالفراولة)

انكل شفيق مطنشنا خاااااااااالص
وياريت يا انكل كمان مصاصه

للأسف انا معرفتش انزل
بس البركه فيكم لازم تصروا على تحقق وعد البومبوني
قصدي القضاء على الفساد

يااااااااااه انا مش مصدقه ان شهر عدى
كأننا لسه امبارح بدأنا المظاهرات
يارب نقدر نستمر
علشان نغير بلدنا للأحسن

حضن كبييييييييييير اوي مني ليكي يا حبيبتي
:) :)

لسه العدد ده مؤمن ان احنا لسه منضفناش البلد ومسابش قناعاته وقعد يكنس الشووارع وهما بيكنسوا المستندات ويفرموها , ونفسيتهم متعبتش من البشر اللي متعبش من قولة كفاية من قبل 25 يناير وهما بيقولوا كفاية ولغاية دلوقتي بيقولوا كفاية زي ميكون زرارهم علق على الكلمة دي والنايل سات قطع ارسالهم على لقطة كفاية
ربنا يطمنك

الوضع بقى صعب بجد

وزي ما أنا توقعت قبل كده إن المدينة الفاضلة دي حلم مش موجود على الأرض .. ولا حتى في أمريكا ولا أوروبا .. وكل الدنيا قايمة على لعبة التوازنات .. تحقيق التعارض بين المصالح المتعارضة

تخيلي .. الجزء التاني من الصورة مؤلم جدا .. مليون ونصف مصري عائدين من ليبيا + زيهم موجودين في مصر هيفقدوا وظايفهم لأنهم كانوا شغالين في آلاف الشركات والمصانع اللي كانت تتبع النظام السابق

وبقت الثورة بين شقي الرحى .. ولازم عجلة الإقتصاد تدور بسرعة وإلا الآثار هتبقى بجد فظيعة

ربنا يستر على مصر بجد

للأسف يافاتيما
فيه اخبار زفت لسة عارفينها
ادخلى شوفيها عندى لو تحبى تتغمى

محتاجين نخلص من حكومة الفسدة بتاعه شفيق الاول


وزير البترول الجديد عضو مجلس إدارة شركة توريد الغاز لإسرائيل

http://www.almasryalyoum.com/news/%D8%A8%D8%A7%D9%84%D9%85%D8%B3%D8%AA%D9%86%D8%AF%D8%A7%D8%AA-%D9%88%D8%B2%D9%8A%D8%B1-%D8%A7%D9%84%D8%A8%D8%AA%D8%B1%D9%88%D9%84-%D8%A7%D9%84%D8%AC%D8%AF%D9%8A%D8%AF-%D8%B9%D8%B6%D9%88-%D9%85%D8%AC%D9%84%D8%B3-%D8%A5%D8%AF%D8%A7%D8%B1%D8%A9-%D8%B4%D8%B1%D9%83%D8%A9-%D8%AA%D9%88%D8%B1%D9%8A%D8%AF-%D8%A7%D9%84%D8%BA%D8%A7%D8%B2-%D9%84%D8%A5%D8%B3%D8%B1%D8%A7%D8%A6%D9%8A%D9%84

طيب بكل قلب تعبان وحقيقى جدا قلقان
هل العدد كان كويبس ومهيب فعلاً
هل الناس ما همدتشى بجد؟؟؟

هل فيه امل ان لو الجيش خزلنا هنقدر نجبره؟؟؟؟

ولا شكل الناس بدأت تكبر دماغها خلاص؟؟؟

انا ليه مش من القاهره
انا ليه مش ساكن فى التحرير ولا فى الاسعاف ولا رمسيس كنت هروح مشى
كان نفسى ابقى موجود النهارده
النهارده فى المنصوره الداخليه الكلاب ضربوا المتظاهرين حجاره وقنابل وبيقولوا ان فى ناس احتكت بيهم انا لسه معرفش الروايه كامله بس عايز اقولك ان المنصوره لغايه من 3 ساعات كانت الدنيا نار هما اللى بيعملوا كدا فينا وهما اللى بيخلونا نتعصب ما تسيبونا هاديين ونفذوا بالراحه
طيب اقسم بالله العظيم ودا تجديد لقسم الثوره ان لا ارتاح ولا اهدأ ولا ابطل احرض الناس اللى اما يتحققلنا مطالبنا ونحس بالمصداقيه واللى خلانا نعمل ثوره يحكى بيها العالم من يوم 25 نعمل وحده تانيه اجمد وندخل بيها الموسوعه تانى ونختار يوم جديد
فاتيما بقولك ايه الناس دى اصحاب مليارات عشان كدا هعترض على البونبونى مع ان هو اللى قال انا عن نفسى مش هرضى الا بقالب شيكولاته من سويسرا

هحاول انزل الجمعه الجايه ان شاء الله يااارب

فاتيما روح القلب الملائكية الثورية

مخطىء من ظن يوما ان للثعلب دينا

راجل بيشتغل اه خلى مطار القاهرة مثل مطارات اوربا على عينى و راسى لكن الواحد بقى يشك فى صوابع رجليه مش ايديه طب متريحونا كان نفسى اروح التحرير لكن كان عندى ظروف
اه صحيح عمالة تقولى براحة براحة و انتى ولا بتزورينى و لا عايزة تشربى حتى كباية شاى

حمد الله ع السلامة يا فاتيما

كُل مُظاهرة و أنت طيبة يا فاتيما

معاكى يا فاتيما فى كُل كلامك

لما مقدرش ع البنبون هيقدر ع تحقيق الوعود

عارفه لو فى القاهرة كنت نزلت الجمعة دى كمان

علشان زى ما قلتى أزيد العدد و نكتر كده و نملى العين

العين اللى مبتملهاش إلا التراب

العين اللى مش راضيه تستحى

العين اللى عمله مش من هنا

العين اللى هنحط فيها عود بأذن الله

بس انا هكون أجدع من شفيق

و البنبون عندى يا فاتيما ماشى (:

دى غير الشيكولاته ان شاء الله

ربنا يوفق الجميع

سلامى يا أجدع فاتيما (:

صحيح كُنت هنسى بحب قوى الأغنية دى
(:

:-******************************************************************************************************************************************
المشكلة انه كعسكرى مبيقبلش حد يقوله لا او يناقشه
و اذا كان الناس نازل تشكرات فيه و كلام جميل اشوف عميله
مطارات القاهرة الاربعة المتاهة
ما نا بلف فى مطارات العالم و بصراحة احسن مطار فى مصر كان مطار القاهرة القديم 1 لما اتوضب و بعده كله للاسف مفيشششششششششششششششششششششش

و كفاية المطار الجديد الى بقى قديم
الموضوع مش بتغير قشانى و رخام و كراسى جديدة التصميم اساسه بايظ

بس معرفش اقول ايه
اخرته لسبتمبر نصبر عليه و لا لا ؟
و لا الجيش حيقعدوا فى بيته و يقول لنائب قوم انت بالشغل

وطاويط النظام لما بتطلع من الكهف لازم بتظلم السماء باعدادها
اصلهم للاسف كثثثثثثثثثثثثثيرررررررر
بس ديه اكيد بتهرب و الشمس حتظهر ثانى و حنشوف كل حاجة على حقيقتها علشان نعرف نصلحها
و منها مطار القاهرة :-))) الى اعتقد لازم يتنقل من مكانه و نبتدى فيه من الصفر بتصميم صح لقرون جيه علشان نعرف ننافس دبى على الاقل :-)))

انشاء الله يا فطوم فيه امل لاتقلقى
و نصيحة حتى لو وزع عليكم بونبونى متاخذيش اش ضمننى فى سلامتها ؟:-)

وخذى احضان قليلة القيمة الغذائية بس عالية القيمة المعنوية تصبيرة :-)
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

تسلم الايادى يافاتيما على البوست وعلى التحديث اللى فاهم الصورة كويس وشرحها باختصار

مش عارفة ليه احنا كده ؟
ليه سقف مطالبنا قليل وأحلامنا متواضعة
ليه مصرين نبص تحت رجلينا وفاضل نترجى مبارك يرجع يحكمنا من تانى

ليه عاملين زى يهود موسى لما عدوا البحر
وبعد ماربنا نجاهم طلبوا من نبيهم يصنع لهم أصنام يعبدوها علشان اخدوا على كده خلاص
انا دماغى هتنفجر وهتكلم كتير من غير مناسبة ولا ترتيب
انت قولتيها
التحرير صح من أول لحظة لغاية النهاية اللى انا معرفش هتبقى ايه

اكبر غلط وقع فيه سيدنا على بن ابى طالب انه ساب المنافقين معاه فى جيشه
والنتيجة معروفة

صحححححححححححححححححححححححححححححححح

واللى مش عجبه يولع بجاز وسخ ولو مش لاقى نجبله جاز ونوسخه

أنا مليش دعوة بالثورة ولا غيره أنا عايزة شيكولاتة سنيكرز حالًا
وصحيح لو مش قادر يجبلنا بونبوني ازاي
يعدي الفترة الانتقالية؟!!

البوست ده أعاد لي بعض التفاؤل
شكراً

http://www.islam-nogodbutallah.blogspot.com/

بالفعل لو أنتهت الثوره ولو خمد وميضها لأستغل ذلك أذيال النظام السابق في تنفس الصعداء وترتيب أوراقهم والإجهاز من جديد على شعب مصر ومقدراته
فلابد أن تستمر ثورتنا حتى تنفذ جميع التغييرات المطلوبه فرجال الرئيس السابق مازالوا يحكمون وإليه بالتقارير يرسلون،
لا تنازل قبل حل جهاز أمن الدوله والتحقيق في جرائمه وحل مجلس الوزراء الذي قال رئيسه عن الثوره واصفا إياها بأنها حركه والقبض الفوري عن رموز الفساد كصفوت الشريف وزكريا عزمي وجمال مبارك وليس فقط أتباعهم في الفساد كباش الفداء ،
والله هو الموفق والمعين
سلمتي يا فاطيما وسلم كل ابناء مصر المخلصين

كل مظاهره وانتى طيبه يا فاطيما:D
انا ماكنتش اعرف ان الموضوع فيه بومبونى
عارفه انا لو اعرف كنت نزلت :D
المشكله انها كل ما تتصلح من حته تبوظ من حته تانيه
المظاهرات مش هتخلص قريب لان البلد مش هتتصلح بسهوله بعد كل اللى خربوا فيها دول
ربنا يعدى اللى جاى على خير

مصرى جدا
--------

بيبس ؟!!!
كوووووووووووسة
كنت واقف فييييييين
انا خدت بومبوناية من مواطن
ولد صغير قد يوسف كدا
ادهالى بتحريض من باباه ومامته اكمنى صوعبت عليهم وشكلى يقطع القلب

آه استنى
شركة فلورا وزعوا علب مناديل دعاية
ومرسوم عليها علم مصر

أستنى كماااااان
واحد ادانى شارة الزقها ع اليافطة
مكتوب عليها عاوزين حكومة تكنوقراط


لأ لأ منا رزقى واسع اهو والحمدلله
بس جت م الشعب ولا جتش م الحكومة برضو
مفييييش فايدة


:)

عموما يا سيدى
اى كان الموقع الجمعة الجاية
انا متابعة اول بأول
وهكون هناك ان شاء الله

خالص ودى يا وتد

من كل بستان زهرة
----------------


ازيك انتى يا زهورة يا حبيبتى

لأ استنى
البومبونى بتاعك عليا
انتى فاكرة لو كان بعت بجد
كنا مدينا ايدنا وخدناه
لااااااااااااا
دحنا كنا جرسناه يا ماما
وقولنا
طب كنتوا ابعتوا رغيف حواوشى
ولا رغيف عيش فيه طعمية سخنة لو معكمش فلوس كفاية
اهو نطلع منكو بأى منظر
انما مفيش فايدة
اللى فيه داء ميبطلوش
دى حكومة تصريحات وبس
انما بومبونى على أرض الواقع
لأ


وبخصوص حكاية النزول او لأ
انتى يا بنتى نزلتى ف الأيام الأصعب
والأكثر قلق ورعب
ارتاحى ومتشيليش هم انتى
اللى قادر يعمل أى حاجة يعملها
وكفاية

انتى كمان ليكى منى حضن كبيييير
وان شاء الله تاخديه لايف ف يوم

:)))

واحد من الناس
-------------

والله يا واحد المشهد كان حلو جدا
بص
الجمعة اللى قبلها كانت احتفالية
صورايخ واعلام وتصوير و شموع و اغانى كأنك طالع من استاد كورة مثلاً ..

انا مزعلتش وقتها
لأنى قولت وقتها لضياء وحفيدة عرابى وندى وعمرو .. المهم منظرنا من فوق يبقى كبير عشان برا وجوا يفهموا ان نزولنا الميدان امر سهل ..ولو ربعنا بس جه الجمعة الجاية ..يبقى خير وبركة

ودا اللى حصل
اللى جم امبارح كانوا مش بيحتفلوا
لأ
كانوا بيهتفوا بذمة
مطالبهم واضحة
وصوتهم عالى
وقلبهم قوى

الجزيرة مشغولة بليبيا ..ربنا معاهم
و هم اكيد الاولى مننا بالتغطية
بس مسيرنا ف يوم يبقالنا فضائية اخبارية محترمة بلا انحياز لنظام او صاحب رأس مال خايف على نفسه

ان شاء الله

ربنا يطمن قلوبنا جميعا
:)

يا مراكبى
--------

الوضع صعب يا مراكبى فعلا

بس عارف ايه الأصعب ؟

ان الحلول موجودة وواضحة جدا
سواء ف سياسات او أشخاص
لكن المؤلم ان هناك من يلتف حولها لكسب الوقت و الضحك ع الناس وبس

الشركات والمصانع اللى تتبع النظام السابق ..قادرة توقف تانى وحد يمشيها ويشغلها ويحافظ على مصالح العاملين فيها ..لو جابوا حد محترم

والعائدين م ليبيا فيه امكانية لإستيعابهم ..برضو لو جابوا حد محترم ينظم حال البلد ويعرف ازاى يستغل الطاقات دى

تعرف ؟

دعائك الجميل اللى ف النهاية دا
بقيت بقوله كتير بينى وبين نفسى دلوقتى
بشكل مختلف عن شهر فات

من شهر فات
كنت بقوله بيأس قااااااتل
بقوله وانا حاسة اننا منستهلوش
لكن دلوقتى
بقوله
وانا حاسة ان ربنا ساندنا
وهيسترها ..ان شاء الله
عشان من يتق الله يجعل له مخرج
ولشعب لأول مرة بيتقى الله فعلا فى وطنه ويردع الظالم ...
فإن شاء الله ربنا معانا
وع الفاسدين


تحياتى وخالص ودى
يا نبع الحكمة

سلامى للحكومة والعياااااال

:)

VOLtaa
------

قريت يا فولتاااااااا
واتغميت اكدي

بس مش قوى قوى
اصلها غالبا ماشية كدا
كر وفر وسجال وحرب شوارع وحارات
وان شاء الله
العبرة بالخواتيم
وان شاء الله
الخاتمة للحق

طولة البال يا برج الميزان
الله يخربيت بحثكم المطلق عن العدل والمثالية اللى مخربة كل بارقة امل ممكن تشدكم م الصورة الكاملة ...
ومخلياكم على شعرة طول الوقت كدا

بص
انا حضرت المشهد بتاع عربية الشاى دى
بس تابعته من بعيد ومسمعتش تفاصيله
متكلمتش عنه عشان عادى
انا بقى بصيت للجانب المشرق ف الحدوتة
انى قعدت ف الميدان كام ساعة
عدى عليا بتوع كشرى وسندوتشات وعصاير ومية وكلينكس وستيكرزات و حتى لما رصيدى خلص لقيت حد بيبع كروت شحن
فإكتشفت ان الميدان بقى فيه اكتفاء ذاتى بشكل رائع وتكافلى كدا

وافتكرت الناس اللى حضرت الأيام الأولى واكيد مكنش فيه أى حاجة من دى وكانوا محبسوين مزنوقين ومتعذبين
ومع ذلك رابطوا وصبروا وانتصروا


افكارى دايما تصب ف جوانب ايجابية
انا شكلى عاوزة اتعالج يا عيال
لأنى عايشة ف عالم كارتونى ولا إيه ؟!!!

بس انا شوفت الصورة كدا
وفسرتها كدا


الناس اللى واقفين حواليا كانوا لطاف جدا وقعدنا نرغى كتييييير
منهم اطفال وستات اول مرة ييجوا وناس جت كتير وناس بسيطة وناس العكس
اتعاكست من شاب لطيف خالص كان مكسوف اكتر منى ..
شكله من دور عيالى او اخويا الصغير على اكثر تقدير ..
صورنى عشان اليافطة عجبته
وقعد يضحك كل ما ييجى حد يصورنى برضو
كنت عاوزة اقوله يبنى معلش
انا اصلى مرتبشطة بمخلوق جاى م الأساطير الأغريقية القديمية اسمه محمد فوزى و صحيح كصة الحب دى جاية عليا بخسارة و كنت اتمنى اطلع من الثورة دى بجوازة او خطوبة حتى ...
انما متش فرصة بثى وروحت قبل ما أصدمه نفسياً وعاتيشفياً

اتعاكست معاكسة سخيفة ترقى لدرجة التحرش ..بس اتصرفت يعنى
كنت قاعدة وواحد جه لزق جنبى
فروحت قايمة وبعدت
انا واخدة ع المعاكسات الرخمة دى
فعشان كدا معتبرتهاش حاجة تضايق قوى
مهى بتحصل ف اى حتة
مش هتحصل ف الميدان ليه ؟!!

جايز يطلع ف الآخر العيب فيا
ولاإيه يا عيال ؟!!

المهم انى روحت وانا مبسوطة
وحاسة بتفاؤل

بس


انا رغيت قوى
معلش

Tears
-----

ميرسى ع اللينك يا تيرز

والمكتوب فيه متوقع
المرء على دين خليله
والوزير على دين رئيس وزرائه

عادى

نورتينى
وعاجبنى جدااااا اصرارك
وتماسكك
و املك انك تغيرى ولو بتعليق ولينك وخبر وصورة

احييكى بجد

:)

ويكا
----


متهيألى أى اجابة دلوقتى ملهاش لازمة يا ويكا واكيد شوفت العدد ف القنوات الفضائية الخاصة والجرايد ..

مظنش ان الناس همدت ولا حاجة

والجيش مش هيخذلنا .. مضطراً ان شاء الله
مدام بالرضا مش نافع

والناس مكبرتش دماغها ولا حاجة
دى حالة يأس عارضة
او تعب مؤقت
او سدة نفس مفاجأة
او خلاف مع الاخرين ف حاجات
بس ف النهاية
ان شاء الله
متفقين
ومحدش يكبر دماغه ف مصير بلده

يعنى مشينا كل الخطوات دى
ونيجى دلوقتى نوقف ؟!!!

MaNoO
-----

ومالها المنصورة يا مانوووو ؟!!
دول احلى ناس والله
والأعداد عندكم حاجة تفرح
ومظاهراتكم مشرفة علطول

كلامك عين الصح
وانا كتبته ف تحديث البوست
التصرفات دى بتجيب نتيجة عكسية
وتسخن الناس اكتر واكتر

معاك كمان ف حوار الشكولاتة السويسرى دى ...

يا حلييييييلة
هناكل شكولاتة راكبة طايرة
شوف ازاى ؟؟!!

:)

ابراهيم رزق
-----------

ازيك يا ابراهيم

بص قصة المطار والكلام دا
انا بتعب منه نفسيا قوى

اصل المفروض دى حاجات بديهية
لما اسمعهم يقولوا الكبارى ومابصر محطات كهربا ومش عارفة ايه والبنية التحتية والفوقانية والتليفونات والعربيات و هم ما يتلم

يا جماعة
هوه انتوا عاوزينا سنة 2011 ومنبقاش عندنا نت و عربيات وخطوط تليفونات شغالة و موبايلات وكبارى ..الخ ؟!!!

الحاجات دى لازم تنعمل تلقائى

وبعدين المفروض التفكير يبقى بالعكس
يعنى كام قرية مفيهاش كهربا ومية نضيفة ومستوصف محترم ومدرسة و توفير حياة مستورة للناس ؟؟

الأنجازات دى واجبات اصلاً
يعنى لما المطار يتعمل حلو ويشتغل كويس
ماهو لااااااااازم طبعا
دا مطار القاهرة
مطار مصر
اللى السياحة رافد هاااام فى ميزانيتها وبيجيبلها فلوس ...

يعنى تجيب طالب مثلاً
مستواه متوسط
وتحطه ف فصل كل مدرسينه ممتازين
توفرله كتاب مدرسى كويس
تديله وقته يذاكر
و تكافئه معنويا بالتشجيع كمان
عاوزاه ف النهاية ..مينجحش ؟!!

دا المفروض يتفوق كمان
انما النجاح بس
امر بديهى

معلش انا اسفة لأنى بتأخر على زيارتك
انا مقصرة مع الناس كلها
انا اسفة

:)

Ramy
----

ازيك يا رااااااامى

عاجبنى قوى تعليقك
وكل جملة بعد كلمة ..العين


وبخصوص البومبونى والشكولاتة
فنتا مش محتاج توعدنى يا رامى
يا بنى ونا مغمضة .. مطمنالك

:)


انا كمان بحب الغنوة دى
من فيروز
ومن على الحجار ..
وحساها لايقة ع الأيام الملخبطة دى
قوى

ربنا يورينا ايام نصر يا رب

ويسمعنى عنك كل خير يا غالى
روق يا ر ر
وسيبها على ربنا
هتفرج ان شاء الله

ان شاء الله

Wanda
-----

والله يا ون ون انا شوفت المطار الجديد دا مرة واحدة وحيدة زمااااااااان سنة 88 وكان لسه معمول ...

مليش ف السفر ولا المطارات زى حالاتك
بس اللى اعرفه ان وجوده كل هذه المدة فى وزارة أى كانت هيا إيه ..ملوش غير معنى واحد ...
انه مرضى عنه من اولى الامر

ولما يكون أولى الأمر كدا
يبقى هوه زيهم
او ف احسن الاحوال
ساكت عن غيهم
وقابل يكون منهم لأسبابه الخاصة
ولاء او احترام او اعتداد او حب ف المنصب او أى حاجة ..متفرقش



سؤالك عن نستنى عليه دى
اجابتها هتكون عنوان مقالة شفتها النهاردة وملحقتش اقراها ..بس عجبنى عنوانها اللى بيقول

مصـــر مش مطـــار


ونا مكنتش هاخد البومبونى يا ونداتى
كنت هقولهم هاتوا بداله
حاجة تانية
و هرفع سقف توقعاتى
واستنهز الفرصة ...
زى ما عملوا الولاد يوم 25 يناير

:)

خلى بالك من نفسك يا ون ون

حفيدة عرابى
-----------

وتسلميلى يا فيدوووووو

انا عارفة انك معايا على نفس الخط
وان شاء الله النهاية خير
واحسن مما نتمنى
وربنا خير الماكرين

خلى بالك من عقلك
احنا عاوزينك
:)

richardCatheart
---------------

عارفة ان دا هيبقى رأيك يا قطاقيطو
واعصابك يا بنتى
عشان نفسك والعيال ومحمد والقطط

انا بقول مش مهم حد يعجبه ولا ميعجبوش
المهم نتفق ع الهدف

ف الميدان كانت كل الوان الطيف السياسى ف مصر وماللى ملوش ف السياسة خالص
بس كلهم اتفقوا على هدف واحد

الجدع جدع
والجبان جبان
والليلة يا جدع
قاعدين ف الميدان

لحد ما اهم طلب ..حصل

بس بعد سفك دماء
وبهدلات وخوض ف وطنيات
وطلوع روح و يأس
وعياط واغماءات وذهول
وحاجات كتيييير

استحكمت الحلقة وفرجها ربنا

ان شاء الله تفرج دلوقتى
من تانى
فرج لا ضيق بعده

ياااااااا رب


بوسيلى العيال والقطط
ومحمد كمان ولاّ ملوش نفسه
دا هوه الخير والبركة

:)

ايثار
-----


أأأأأأأخ

الشعب اتمرع ومش هنقدر عليه
سنيكرز مرة واحدة ؟!!!

طيب قولى كورونا ولا الشمعدان
داخلة ع المستورد علطول كدا

هوه كمان واعى
مبعتش حاجة
عشان عارف الشعب النمرود وعمايله
إحنا أخرتنا يافطة وبومبونا وشكولاتتنا عليك يا رب

:)

نورتينى

مهندس مصرى
---------

لأ يا محمد
اوعى تفقد الأمل
دنتا من الناس اللى بالها طويل وصبرها كبير وعلطول همتك ف درجة عالية

بصى فيه فريق دعم معنويات كدا
يتضمنك انتا وحفيدة عرابى ود.ستيتة وخالد همس الاحباب وسال وكام حد كدا .. عندكم القدرة دى

بتاعة الثبات ورفع المعنويات
وخصوصا ف عز الأيام الغامقة
اللى محدش بيبقى مركز فيها يشوف كويس او بهدوء

انتم عندكم هدوء وتعقل
واحكام مبنية على معطيات
ويدعمها ايمان راسخ

والمفروض انى اشكرك انا دلوقتى
لأنه عادة مبيجيش مناسبة للكلام دا يا محمد ...
انتا من الناس اللى دعمتنى من اول ما عملت المدونة أى كانت مواقفى وردود افعالى ... كنت حاضر سواء بتعليق او حتى بالصمت لو مش عجبك الكلام ...
وربنا ما يحرمنى منك يا غالى
يا رب

خلى بالك من نفسك
وربنا يسمعنا كل خير
ادعى يا جدع
دنتا جنب الكعبة
استغل الموقف احسن استغلال بقى

:)

واحد من الناس
-------------

شكرا ع اللينك يا فندم

:)

ahmed_k
--------

ان شاء الله تستمر يا احمد
وربنا ينصرنا

معاك ف كل كلمة
انا اللى غايظنى قوى
ان الناس نسيت هوا كدا ان احمد شفيق استهزأ بالثورة من اول لحظة ...
وكان رئيس وزراء الاربعاء الأسود
وكونه غير فى تصريحاته بعدين
مش معناه التغيير فى القناعات ...
ولا الرؤية
دا تسجيد وتهدئة وبس
مش اكتر


ازاى الناس مش شايفة كدا
وبتقول ندى فرصة ؟!!!

طب انا ايه يجبرنى اشتغل مع واحد لا اثق فيه وهزأنى وأذانى وقادر يعملها تانى لو اتوربت عنه ..ولو متوربتش حتى

انا حقيقى مستغربة
بس هقول ايه
لله فى خلقه شئون

نورت يا احمد

:)

Bent Men ElZaman Da !!
----------------------

وانتى طيبة يا فندم
عاش من قرى تعليقك
:)

مخدتش مخدتش
دى هولازية يتيمة ومن الشعب
مش من مجلس الوزرا

اللى كانوا هناك خدوا بومبونى من نوع تانى مفتخر قوى ...
لكن معلش
كله بيتسجل ف دفاتر الزمن
ومحسوب عليهم

ان شاء الله البلد حالها ينصلح

البيت لما بيتفور ويتعمل فيه ترميم
بيحتاج لوقت وذمة وتضحيات
لكن ف الآخر .. يرجع لعهده ويصلح ينسكن فيه ويبقى تحفة كمان الناس تيجى تتفرج عليه وتنبهر بيه ..وتتمنى تسكن ف واحد زيه ...زى زمان

ومش زمان قوى

عارفة
ف نص التمانينات كنا ف الامارات
كانت زميلتى الامارتية بتحسنا احنا المصريات على مصر
كانت بتتمنى لو تعيش ف مصر
مع ان الأمارات كانت متمدنة جدا مقارنة بمصر يعنى ...
عندهم احدث وانضف واشيك حاجة
بس معندهموش روحنا ولا تاريخنا ولا خفة دمنا ولا تنوع اطيافنا ولا فننا ولا كل حتة عندنا وليها طعم وروح


ربنا يعدى اللى جاى ان شاء اللع
على ألف خير

نورتينى

:)

تعليقا على البوست اللى رديتى بيه عليا ياست الكل :D

انك طيبة يافاتيما طيبة وحنينة ومتفاءلة

انما انا متشاءم للأسف وزعلان من الجيش
اه والله
وتعبت وزهقت وقررت اكتأب واشرب عرقسوس عشان انسى

لكن مقولتيش ليه انك نازلة كنا قابلناكى انا وفقرى ووليد الدوغرى واهو حماية عشان اللى يعاكسك ندبحه

بس يكونش انا اللى عاكستك :D

اصلى حاولت اعاكس واحدة لطيفة كده كانت بتبصلى وتضحك قلت اظبط يمكن اطلع بعروسة ولا حاجة هههههههههه

الميدان من قبل التنحى وانا بنزله وبيت هناك كمان وكان فيه اكتفاء ذاتى بردو
ومن ايام الضرب والقنابل كانت فيه اكتفاء .. كانو يوزعو علي الناس كولا وخل وبصل عشان القنابل وموسعات شعب هوائية

..
عموما ربنا يسترها الايام الجاية دى والجيش يعمل حاجة يكسب بيها الأرض اللى هدمها فى نفسويتنا من اللى عمله

وبالمناسبة احنا نازلين الجمعة بردو انا ووليد وفقرى لو حبيتى نتقابل ياست الكل بلغينى بالتفاصيل

الله معاكى :)

ايه دا
اشمعناااااااااااا
خيااااااانه
طب ماانا نزلت يوم الجمعه
مابعتشي ليييييه
انا عاوذ واحدا والا هعتصم فيتنا
اعاااااااااا:)))

للاسف يا فاتيما ده اللى صار على راى الاغنية
اصبح من يؤدى عمله فقط صاحب انجاز
بصى يا فاتيما كثر الناس اللى بتتكلم عن الثورة ده مش فى مصلحة الثورة و بالذات اللى اسمه شادى الغزالى حرب
يجب اختيار واحد او اثنين للتحدث و انا ارشح علاء الاسوانى و هشام البسطويسى احدهم عاش بالخارج و احتك بالمجتمعات الاروبية و الاخر ملم بالقانون و ليمن اختيارهم عن طريق التصويت على النت

ازيك يا فاتيما..وحشاني.شكرا لأنك عاملة لينك للبوست هنا لأهميته..أرجو المتابعة باستمرار و جزاكي الله كل خير..ربنا يستر على مصر.

يا بختك يا فاتيما
انا كنت اتمني بجد اني اروح حتي ولو ساعة واحدة بس المظاهرات
للأسف ميدان التحرير اللي كنت عمال علي بطال هناك من يوم 14 يناير مشفتوش غير في التليفزيون وبس
معارضة طبعا من كل اهلي اني اروح
معاك في كل حاجة قلتيها
وبجد بتمني الجاي يكون احسن
وربنا ييسر الاحوال لمصر

يسلم كلامك وحسك الفكاهي يافاتيما

انا كنت هناك وسمعت كل حاجه اتقالت

وعشان كده اغلب الناس وافقت على الاسبوع الجاي

ولو ماحصلش حاجه تبين الموقف ساعتها هنبتدي التحرك فعلا على كل الاتجاهات

وربنا هينصرالثوره دي ان شاء الله

اشكرك على الامل يافاتيما ولو اني لسه مافقدتهوش لكن كان عندي نوع من الاحباط

الاحباط اللي هيخليني استمر وابقى زي مانتي قولتي نقطه في بحر الاحبا في ميدان التحرير

يارب

صورة واقعيه 100 % للأحداث الجارية بس محتاجه ناس واعيه تفهم بقى علشان تنجز

يارب يعوا بقلوبهم وعقولهم و يدركوا ما نحتاجه جميعا

تحياتي

VOLtaa
------


ازيك يا فولتاااااا

مين دى اللى طيبة يا واد ؟!!

دنا شوريرة جداااااااااااااااااااا
عارف اشرار بتوع الأفلام الهندى كدا

انا هذوها السخصية
شر مطلق بلا رحمة

وغالبا مش انتا اللى عاكستنى يا واد
عشان انا تقريبا عارفة شكلك من صورةتك اللى حاططها ف المدونة
والشوباب اللى بحكيلك عنه مش نفس الملامح ... يلا مفيش نصيب
:)

حلو الاكتفاء الذاتى بتاع ايام الإعتصام الدائم دا ..
عارف ؟

اجمل حاجة ان الروح الساخرة لم تختف للحظة ...
انا عندى فكرة بوست عن الحكاية دى وان شاء الله اعمله قريب لما نطمن شوية على الأحوال وشفيق يتشال بإذنك يا رب


بمناسبة شفيق بقى والجمعة الجاية
احنا عندنا تبرع بالدم ان شاء الله عند المصل واللقاح ف الدقى الساعة عشرة ...
انا ناوية بأذن الله اقعد ساعة ولا حاجة .. وبعدين أطلع ع التحرير واللى عاوز ييجى معايا ..ييجى


انا وليد كلمنا لما كنت ف اسكندرية وقالى نتفق لو روحتى الجمعة الجاية ...
بس انا مبحبش اوجع قلب حد

اصل بص
انتوا شباب و تحركاتكم اكيد كتير
انا ست كوبرة بقى ولما بركز ف حتة مبحبش اسيبها وبفضل مطرحى

زائد انى مش عاوزة اكون عبء عليكم لو لاقدر الله حصل أى امور عنف وهتبقوا ملخومين فيا ومش مركزين ف اى حاجة تانية

الجمعة بتاعة اشهدا والأحتفاء بيهم
كان ضيا معايا تقريبا من اول اليوم ..و كان كالعادة واخد باله منى جدا
وروحنى لأقرب مكان لبيتى وكان ناقص يركبنى الأسانسير ويبص بعينه ويتأكد لو قادر .. عشان يثق انى وصلت بيتنا بخير ...
انا عارفة انه كان شايل همى
حتى لو مقلش بلسانه
بس بيتصرف كدا علطول

مش عاوزة اشيلكم همى انتوا كمان


لو جيتوا التبرع بالدم وطلعنا سوا ..
يبقى هايل

ولو ملحقتوش ..ان شاء الله يبقى فيه نصيب ونتقابل برضو ...

:)

بخصوص حكاية المعاكسة السخيفة بقى
فمتقلقش
انا متعودة ع السخافات دى ف أى مكان
والتحرير بينزله ناس كتيييير
وكل واحد نازل فى جهاده الخاص
اللى نازل يتظاهر لأسباب عامة
واللى نازل يتظاهر لأسباب خاصة
واللى نازل يهتف
واللى نازل يساعد
واللى نازل يخرب
واللى نازل يتفسح
واللى نازل يشتغل
واللى نازل يراقب
واللى نازل يغطى حدث
واللى نازل يتحرش
واللى نازل بمزاجه
واللى نازل غصب
فيه الف سبب وسبب

عشان كدا متخضتش من اللى قولته ف البوست بتاعك ..لأنه بيكمل البوست بتاعى ...
واحنا الاتنين اكيد نقلنا اللى شوفناه
بعيوننا

برضو رديت ببوست على تعليقك
يا واد بتفتح نفسى ع الرغى
اعملك ايييييه ؟!!!

:)

sony2000
--------

ما قولنا يا سنسن

الحكومة دى وعودها ف الهواء
اومال لو كان وعدنا بوظيفة ولا شقة بقى
دول شوية بومبونى ..
ويا ريتهم جم

انا حزييينة على مستقبل بلدى
وبومبونيه

:)

وحشتنينى يا مجرمة انتى

ابراهيم رزق
-----------

ازيك يا ابو سالزيااااد

بص يا سيدى

اجمل ما ف الغنوة من وجهة نظرى
تعبير

قولى عن اشياء تفيدنا

آه
المفروض كدا
محدش يلوم على حد
ويخليه ايجابى ..لعل وعسى
ربنا ينفخ ف صورنا جميعا

عارف الجملة اللى الواحد كان دايما يسمعها ف كل المشاكل والمعضلات وخصوصا القانونية وما اكثر ما مرت اختك بيها وعرفت معنى الجملة دى قوى
جملة
اذا خلصت النوايا
الجملة دى سر اى عمل جماعى ..
لو النية خالصة و الكل مؤيد
هتلاقى الامو بتمشى بأمر ربنا

المرة دى
انا حاسة دا
كلنا خالصين النوايا (الشعب اقصد)
بس السكك بتاعتنا مختلفة
زى المرواح للتحرير كدا
له الف سكة ومدخل
فيه السهل وفيه الصعب
بس المهم نوصله ف الآخر

الأسماء اللى بتقولها هايلة انا اكتر شخص اوافق عليهم

بس اجمل ما ف الثورة انها مش بتاعت حد بعينه
ولا اسامى بعينها
ودا مصلحة اكتر منه مشكلة
لأنهها تقينا شر الإنقسام والتشتت
لأننا مشتتين اصلا ف اتجاهاتنا ...
بس متوحدين ع الهدف ...


انا نفسى اشوف علاء الأسوانى وزير لثقافتنا ..هيشرفنا ف العالم ويرفع راسنا اكتر واكتر ..

ونفسى اشوف البسطويسى نائب عام مثلاً

نفسى اشوف يحيى حسين عبدالهادى وزير قوى عاملة

واتمنى حمدى قنديل يمسك التلفزيون المصرى وينضفه من الغربان


ونفسى ونفسى ونفسى
اشوف اسامى شرفاء كتيييير يمثلونا ...

ربنا كرمنا
ونرى هذه الأيام

يا رب


انا يوم التبرع بالدم
طالعة ع التحرير علطول بعدها ..
لو انتا جاى يومها التبرع
متتأخرش عشان الحق اشوفك واسلم عليك لأنى مش هقعد ف التبرع كتير


اشوفك على الف خير
ان شاء الله

:)

dahlia...
---------

ازيك انتى يا داليا

انتى وحشانى اكتر واكتر واكتر
وكنت اتمنى اشوفك ف اسكندرية
بس قدرت انك لسه مش مستعدة تشوفى حد
وتتكلمى عن أى حاجة

معلش

تتعوض

وشكرا على ايه
احنا كلنا بنكمل بعض يا حبيبتى
واللى عنده كلام ينفع التانى ..ميسكتش ويقول ويا رب كله بفايدة

بوسيلى العيال
وخلى بالك منك
ارجوكى

بوسات وحضونات دافية
علشانك يا غالية

re7ab.sale7
-----------

يا رحوبة ولا يهمك
احنا مكانك يا بنفسج بيبهج

ودعواتك دى مش شوية
ملايين مقدروش ينزلوا
لكن السنتهم وقلوبهم دعت ع الظلم والظالم لحد ما ربنا كرمنا وزاحه عننا

وعقبال الباقى ان شاء الله

استمرى ف الدعاء
دا مش قليل يا حبيبتى ابدا

خلى بالك من صحتك يا ريت

:)

ماجد العياطى
------------

يا ماجد يا طيب يا رافع معنوياتى

بمناسبة انك كنت هناك بقى
تعرف انا واقفة اغلب الوقت بتفرس ف وشوش الناس وعمالة افكر فى حاجات كتييييييييييير

كان منها ان مثلاً
كام حد اعرفه ف التدوين ولسه مشوفتوش لحد دلوقتى واقف هنا ؟!!

لما شوفت مرة ليكتر حاطط صورة صورها من الميدان ...ف يوم كنت انا فيه تقريا ف نفس المطرح ...
ساعتها قولت يا خراشى ..يعنى ممكن الشاب مثلاً اللى كان واقف جنبى يكون ليكتر وانا معرفوش ولا هوه يعرفنى ؟!!

وبعدين قولت دا ينطبق على ناس كتير عارفهم بالأسم لكن بالوشوش لأ

زيط وزى ابراهيم رزق وآخر بهدلة وليكتر ومن كل بستان زهرة وناس كتيييير ...

وخلصت بعد تفكير جهيد
ان دا احد اسباب انى متونسة بالوقفة والمطرح
انى اعرف ناس فيه
ولو متقابلنش
بس الميدان دا فيه اهل واحباب ليا
ولو لا أعرفهم بالمرة ...

ومن اول يوم
اللى انجرح فيهم ..انا محموقاله
واللى اتهان واتبهدل .. متغاظله
واللى ربتا افتكره .. انا مش مسامحة ف حقه وهاجى اطلب بحقه وحقوقنا لحد ما تتنفذ ان شاء الله

لا تحبط يا ماجد
نقطة ورا نقطة
ينحتوا الصخر يا عزيزى

قول يا رب دايما
وبس

:)

كلمات من نور
-----------


ان شاء الله يا كلمات
بيان شباب ائتلاف الثورة كويس
وربنا يسهل ويتفعل وأسرع من كدا

انتى قولتى حاجة مهمة جدا ف تعليقك

الوعى بالعقل والقلب معا
لأن واحد فيهم دون التانى .. زى الماشى على رجل واحدة ..

لازم الإتنين سوا
عشان نجرى وننجز زى ما قولتى

الله عليكى بجد

تحياتى انا اكتر يا حبيبتى

ست كوبرة مين

فششششششر D:

بعدين متقلقيش انا مكسح اساسا وكل شوية بخليهم يقعدو ف حتة يعنى مصلحة بردو ليكى ياست الكل

وعموما انا هتشاور مع الشوباب و هشوف نروح التبرع ولا لأ

بس انا مش عايز اروح عشان مبحبش التجمعاااات الكتير وناس معرفهاش وانا راجل خجول انتى عارفانى بتكسف من ضلى
ههههههههههههه

السلام عليكم

كيف حالك يا فاطيما وصباح الثورة والحرية والكرامة والعزة ..

ما تخافيش مش ممكن نتسرق تاني وزي ما قمنا بيها بدمناها نحافظ عليها بدمنا ..

وبرضه ما تخافيش من الاخوان .. الاخوان مش ايران ولا السودان .. بصي على حزب العدالة والتنمية وتجربتة في تركيا ها تلاقي الاخوان ورحم الله نجم الدين اربكان ..

VOLtaa
------

:))))

ماشى يا فولتا
ان شاء الله نتوفق ونشوف بعض

بس تعالى هنا
مين دا اللى بيتكسف من ضله ؟!!!
دنتا بلوة مسيحة يا بنى
وتكسف بلد
عليا برضو ؟!!!

:)

وبعدين لما تيجى التجمعات دى
فانتا عارفنى انا على اقل تقدير
وانا
دنختضك ياض
حد بيتكسف من دنخضته!

جنى
---

وعليكم السلام يا جنى ى ى ى

ربنا يطمن قلبك
والثورة تفضل ثورة ثورة حتى النصر

انا مش خايفة م الاخوان
لو الدستور حدد العلاقة بين حاكم ومحكوم
وانا مش خايفة من ايران على فكرة
انا عاوزة نكون ف قوتها
هيا وتركيا
ولو ندخل فى حلف بصفتنا شريك قوى
ندخل قصادهم .. ومعاهم ف نفس الوقت

يعنى نكون قوة زيهم
ومتقلش عنهم ف الثقل
لأن دى مصر
ودا قدرها

اخاف من ايران لو هبقى تابع
وانا مش عايزة اكون تابع
وهذا يحدث
لما اكون مستقلة وقوية

والأستقلال والقوة ليهم شروط
سيادة القانون
والعدل
والحقوق


الأخوان لو مش هيمنعوا حريتى
التى لا تضر الآخرين ...
اهلا بيهم يحكمونا
ميقولوش الموسيقى حرام
والسينما حرام
والأدب والشعر حرام
ميمنعوش ولد وبنت يمشوا او يقعدوا سوا فى مكان عام
ميمنعوش التعبير عن الرأى
يطبقوا الديموقراطية
وميبقوش متعصبين ..زى ما طيور الظلام ما كانوا متعصبين ف الفساد
ميحرموش العيش والعيشة واللى عايشنها

وانا انتخب المحترم منهم
واقوله على عينى وراسى وتعالى احكمنا


التجربة التركية مميزة
اوافق عليها جدا

يا ريت


نورتنى يا سعيد
واعز التفاوءل بتاعك دا جداااااا
والله

إرسال تعليق