.

.

مــراجــيــح مــولـد النــبــى  

Posted by: فاتيما in






اللينك دا مهم .. ودا كمان 

----------------------

من  البداية اسفة
لأن البوست طويل 
معلش 
:)
وكمان م الاول وعلى بلاطة 
التدوينة دى موجهة لأشخاص بعينهم
لما يقروها هيعرفوا نفسهم 
و مش هقول أسماء 
مش عشان ليهم غلاوة عندى ولا نيلة
لأ ..الحمدلله قلبى لما بيقفش من حد 
من بدايات زيارتى لمدونته 
ببقى متأكدة إن احساسى ف محله
ويتبقى تيجى مناسبة فتأكد حدسى
واهى جت  اهى
على حظهم اللى زى وشهم 



و العالم المتأرجحة دى 
طول الأيام اللى فاتت
كانوا ماشيين بنظام 
معاهم معاهم عليهم عليهم 
بطريقة مستفزة جدا تخلى التمثال 
اللى ف الصورة فوق دا ..ينطق 



 المدة اللى فاتت كنا فى ايام صعبة
ولسه الصعب جاى 
ولما كنت بقرى تدويناتهم الموجعة
كنت بسكت واعدى عليها
واحاول اتجاهلها ..بس اكيد مكنتش بتجاهل
رد فعلها السلبى خصوصا 
ع الناس الحلوة 
اللى كانت بتنزل وتشارك فعلياً ف الثورة
 واللى كانوا محتاجين
ع الأقل لو مش هتشجعهم 
فمتكسرش مقاديفهم  يا أخى
او تخونهم زى ما حصل وكلنا عارفين


والموقف حصل كالآتى

من قبل ما الثورة تبدأ حتى
ومن وقت اطلاق الدعوة للتظاهر 
وهما نازلين تريقة  على شوية ... العيال
ثورة ايه اللى بمواعيد وبلا خوتة 
وكان غيركو اشطر وعطلة ع الفاضى 
وقولولنا نبعتلهم ساندوتشات 
(الشهادة لله مقالوش من كنتاكى )
و نهايته .. دول شوية عيال 



ثم بعد يوم25 يناير لقيوا الالاف نزلوا 
وانها مظاهرة بجد فاتعدلوا ف لهجتهم
ومبقاش العيال عيال ... لأ دول رجالة



تكررت المظاهرات كام يوم 
ورد الأمن بعنف فرجع الخوف تانى 
ورجع الرجالة .. عيال 



السويس يسقط اوائل الشهداء فيها 
وتستبسل ويبينوا كرامة تليق بالسوايسة 
..فإنكسف الغجر على دمهم 
ومنفعش يقولوا غير انهم رجالة 



ثم بعد احداث 28  وانسحاب الأمن  
وخروج المساجين ..بفعل فاعل عارفينه
رجعوا تانى يقولوا كفاااااية .. اتبهدلنا 
و البلد خربت على إيد العيال

 
بس لما العيال اتلموا يحرسوا البيوت
اتحلف بحياتهم من تانى واتقال رجالة



اصر الشباب ع المطالب ..فصرخوا محدش هيستجيب واسكتوا وكفاية .. يا عيال



فإتغيرت الحكومة والريس قال خلاويص 
مش هعيد الانتخاب يا كلاب 
ولا انا طايقكم اساساً جاتكو القرف
عيطوا و نهنهوا و دوروا اسطوانة الكبير كبير

    
ولما غزت الدواب على اربع و رجلين الميدان
وعلى الفضائيات تحدث مذبحة التحرير 
وتُحصد ارواح 
حبة شباب زى الورد متعلم ومتربى 
وشكله اكيد مش وش بلطجة
فيلتزم البهوات  .. الصمت التاااااام المريب
ولا قالوا عيال بقى ولا رجالة 

  
ولأن العيال .. ف الأصل كانوا رجالة 
اللى باقى منهم دافعوا عن الميدان
وصمتوا الصمت النبيل بعد هجمات الأعلام 
الفاجر عليهم فرجعوا المتأرجحين 
ف كلامهم تاااانى
و غيروا النبرة 
وقالوا يا بتوع الكنتاكى والاصابع الخارجية
و من اجل حفنة دولارات
وتخطت التهم الأستهتار والمعيلة
وانسحبت الى الخيانة العظمى
وبقوا عيال ..مش أى عيال 
دا كل واحد فيهم ... عيل أجندة



واخيرا لما تنحى المذكور ..ف ليلة تاريخية
واول مطلب طلبوه العيال .. اتحقق
رجعوا العيال وبقوا ابطال و رجال من تانى 
لأ تانى إيه ؟!!!
عاشر خمأشر اثنا عشر 
وسبحان الذى يغير ولا يتغير
ويا مراجيح مولد النبى 
كل سنة وانتوا طيبيييييين
أنا دوووووووووووخت
حد يسندنى 



مش دا اللى حصل برضو 
صح ولا محصلشى ؟!!!

أيوه .. صح 

وأيوه .. حصل 


طب ماذا نفهم من السابق ذكره ؟

حاجة مهمة جدا جدا 


ان اللى مكنش عارف م الاول 
ينوكس دلوقتى 
و ميعملش نفسه ابو العريف


واللى مكنش شايف م الاول
ينوكس دلوقتى
و ميعملشى روحه زرقاء اليمامة 



واللى مفهمش الصورة لا ف الاول 
ولا ف الآخـــر كمان .. والنبى 
يحط على خيبته كاتم صوت 
و يحاول يفهم بالتقسيط المريح على جنب
وميقرفناش ف عيشتنا
و يجرب يفكر شوية قبل ما يصيغ عباراته 
ف تعليقاته ونظرياته حول المستقبل
اللى شوية عيال  عاوزين يخربوه 
وان كفاية كدا بقى 
وكأنهم محرموش قولة ... كفاية 
وقولة ... دول عيال 




يا ريت الموكوسين دول يعرفوا 
ان مصر دى مش بتاعتهم لوحدهم 
وان اللى شال روحه على كفه من 25 يناير
ومن قبلها وبعدها ولحد دلوقتى 
عارف مصلحة البلد برضو 
ولولا دماغهم النضيفة مكنش التمديد توقف
والتوريث بقى وهم والدنيا بتتغير اهى والله





وأى واحدة او واحد عامل فيها مناضل 
وقلبه ع البلد اكتر من العيال هسأله ببساطة 
كنت فين من يوم 25 لحد النهاردة ؟!!
شاركت ف الثورة بأى جهد ؟!
يعنى كتبت ف مدونتك او شجعتهم ؟
اتكلمت مع ناس حواليك معارضين عشان
تقنعهم بالثورة دى والخير  اللى وراها ؟
نزلت مرة واحدة .. تساند اخواتك بهتاف  ؟
اتبرعت بأى شىء .. دم او دوا او حبة بلح ؟
بيّت ف الشارع معاهم ف عز التلج والمطرة ؟
سيبت شغلك واهلك وحياتك المستقرة ؟
اتهمت بالعمالة وإتهنت من جيرانك وزمايلك؟
اتبهدلت واتسحلت و شميت غاز لما عميت ؟
اتاخدت ومحدش عارف عنك حاجة لدلوقتى؟ 
طب بلااااااااش دا كله





بلاش دا كله .. 
جربت تقى اخواتك ف الوطن دول 
شر لسانك و احباطك و تخوينك ليهم ؟!!

حتى دى ... معملتهاش

طب عذرناك عشان الأيام دى 
كانت ايام فتنة ومحدش مطمن 
وخايف على نفسه الثورة تفشل 
والمؤيد ليها يتبهدل و يضطهد ..ماشى
معلش .. الخوف حق مكفول لنا جميعا 
وانا اول نفر  لا أستثنى نفسى
بس فيه اوقات بتقدر توازن بين خوفك
وانك متحطمش غيرك وتكسر حلمه 
أو اضعف الأيمان .. لتقل خيراً او لتصمت 


خلاص حصل خير 
وانتصرنا 



دلوقتى عذرك ايه ؟!!!


و على فكرة بقى 
انا عارفهم واحد واحد كويس 
وعارفة مين اللى احجم عن الكتابة وليه
مين اللى مكتبش ... لأنه جبان 
ومين الى مكتبش ..لأنه ملوش ف السياسة
ومين اللى مكتبش .. لأنه خايف لأسباب وجيهة
ومين اللى مكتبش .. لأنه مش مقتنع بالثورة
ومين اللى مكتبش ..عشان ملحقشى اصلا
ومين اللى مكتبش ..عشان يبقى ع الوشين
الثورة نجحت وماله ... فشلت احنا ف السليم 
عارفهم والله ... واحد واحد
وخلاص خلصت  والغربلة حصلت



الاحداث العظيمة زى اللى احنا فيها
فرصة ذهبية لترتيب الاوضاع وتصحيحها 
وانا من 25 يناير لحد النهاردة 
عرفت وإتاكدت من حاجات كتير 



اولها ..ان اللى مبيكتبش ف السياسة
مش عيب يتعلم يكتب ويفهم ويعرف 
و ناس كتير خرجت من الأيام دى 
عارفة بلدها وفاهمة قوى
والاهم مقدرة قيمة الكلمة وخطورتها



ثانياً .. اللى كل شوية يغير رأيه
و فاكرنا مش واخدين بالنا
يبقى غلبان قوى
وان كنتوا نسيتوا اللى جرى 
هاتوا ارشيف البلوجر ينقرى 
ولو مسحتوا التدوينات .. الريدر موجود




ثالثاً .. كل واحد من حقه يقول رأيه 
ولهذا ..موضوع الجيش اللى مزعل الناس
انا مش فاهمة مضايقكم ف ايه؟
هوه احنا مش من حقنا نتشكك او نقلق ؟
هوه قيادات الجيش دول مش من النظام
القديم اللى كلنا مخنوقين من رموزه ؟!!
ولا هما كانوا من اهل الكهف وصحيوا
ثم طيب 
افترضنا انهم كويسين 
طب ما المانع من التساؤل كل شوية ؟
هوه احنا هنرجع لعنب ديبو 
ونخلق من الجيش اله 
وفرعون محدش يحاسبه ؟
امال الثورة دى قامت ليه ؟
عشان امرنا يبقى ف ايدنا ولا خلاص
اتعودنا على اننا نروح بيوتنا ننام 
وحد يمشيها بدالنا 
تاااااااااانى ؟!!
هنرجع تانى ؟؟؟؟
طب خلاص بقى
منتوا بتقولوا على القائمين بالثورة 
عيال وبيلعبوا ومتسرعين .. الخ 
خلاص ... ما كل واحد يقول رأيه
هتكتمونا ليه؟!!!



رابعا .. انا معرفش أى حد من الإئتلاف
اللى اعرفهم مدونين وبس 
ومش كلهم معرفة شخصية حتى ..
ولو انه شرف اتمناه اكيد 
بس منهم ناس بحبها لله زى نوارة 
و الباقيين اغلى الناس عندى
زى خيخة وعادل 
ود.ليكتر و ضياء و شاب فقرى و زيكا
و داليا ماى كورنر و sal وجارة القمر  وازهرى
و كيمو و وليد الدوغرى ومن كل بستان زهرة 
واعقل مجنونة واحمد كمال وهانى نط ف الكوز 
و وليد كنج توت و آخر بهدلة وشاب منوفى 
وابراهيم رزق وواحد من الناس .....وكتييييييير
قايمة الشرف المضيئة
اللى عاوزينها تتوثق عشان الناس دى
نور على جبيننا كلنا كمدونين
وكل الشخصيات العامة المتميزة
ادباء وفنانين وسياسين و اى مهنة 
كل الشرفاء اللى خاطروا بنزولهم وبقاءهم 
الناس دى من اول يوم .. فخر لنا 
وكانوا مدينيى ثقة اكبر ف نفسى 
وفى قناعاتى و فى أنى شايفة صح 
ومهما انقال كل الأيام اللى بعدها 
كنت متأكدة .. يوم ورا يوم 
انهم صح وربنا هينصرهم 
لأنى عارفهم كويس 
وعارفة شرف مقصدهم وشايفة بقلبى 
قبل عينى ..ان الهدف نبيل وهم كانوا أنبل
واطهر و احسن ناس عرفتهم بجد 
وانحيازى لهم ..كان منطقى وطبيعى 
ولما لقيت عالم بتهاجمهم وتتهم بالعمالة
قررت اقولهم .. انكو مش لوحدكم 
وكلنا معاكم وجمعت التدوينات المؤيدة للثورة
والحمدلله ..كسف الله المعارضين
والعيال جابلونا النصر واذهلوا العالم كله
يعنى مش احنا بس اللى عندنا اوهام 
او هلاوس سمعية وبصرية 
لأ ..دا بشهادات دول العالم الأول والتانى
والخامس .. كلها بتباركلنا 
وتشد على إيدنا



إنما ايش يسكتوا بقى بعد دا كله ؟!!!
لاااااا ..لازم يطلعولنا كل شوية زى الخازوق
ويدونا محاضرات ف حب الوطن
واننا مش لازم نمشى ورا العيال 
طب محنا لما مشينا ورا العيال ..إنتصرنا 
دلوقتى لأ ليه؟
ولا هوه الحكاية عندكو بالتقسيط 
ونمشى على سطر ونسيب سطر 
واما نشوف اتجاه الرياح 
وبعدينمعلشى يعنى 
هوه العيال حلوين وقت الضغط
و المطالبة بالحقوق والبهدلة ف الشوارع 
و حماية البيوت و تنضيف الميادين 
بينما وقت الكلام ف المستقبل 
وأى سيناريوهات واحتمالات ومعلومات
لأ ..يسكتوا هيبوظولنا الدنيا  ؟!!



الله يخربيتكوووووووو




خامساً..اللى ملوش حد ف ال350 شهيد
وملوش حد مختفى او مسجون 
واللى منزلش التحرير يحارب  وانضرب
واتبعترت كرامته واتهان
او يتظاهر ولو لساعة
او يكتب كلمة ف مدونته او تعليق 
حتى يساند بيه الثورة وقت المحنة 
واكرر (وقت المحنة) .. عشان تفرق قوى  
مش من حقه يعملنا دلوقتى وصى 
و كبير وفاهم ويقول ع الرجالة .. عيال 
ويقول على اصرارهم على حقوقهم ..لعبة
ويخسف بدورهم ا الأرض 
لمجرد ان واحد فيهم بيتكلم بعفوية 
او ان بنوتة صوتها مسرسع حبتين كدا
ويستحملهم ..أصلهم مفضيوش يتعلموا
فن مخاطبة الجماهير
وكانوا مشغولين بحاجات تانية هايفة 
زى اسقاط النظام و رموز الفساد 
وحل مجلس الشعب والشورى
وكل المطالب ..اللى هتخلينا مواطنين 
عندنا كرامة وحرية وعدالة اجتماعية





سادساً ..اللى زعلان ان فيه مظاهرات 
فئوية ومطالب شخصية 
معلش يعنى 
ايه الغلط ف كدا ؟!!
العيب على مين ف القصة دى ؟
تخيل نفسك عندك مظلمة  ف شغلك
ورئيسك مكفرك ومطلع تربنتينك
وانتا ثرت عليه وع الأوضاع او اشتكيته
ولا حياة لمن تنادى 
ثم قامت الثورة  وانتا فرحان 
ان الثورة ع الظلم والفاسدين
وتتفاجىء سيادتك انك راجع شغلك 
فتلاقى نفس المسئول الفاسد 
قاعد على مكتبه ..و مغرش ف داهية 
لأ وكمااااااااان .. بيطلعلك لسانه 
وبيقولك ان كان عاجبك يا (.......) 
كلمة ابيحة تمنعها الروقابة
وبيان الجيش بيقولك ..
الوزارة الحالية تسير الأعمال
ونفس الوجوه العكرة الكالحة 
قاعدة كاتمة على انفاسكو
متوقعين  ايه ؟!!
لو كان الوزراء اتغيروا مش كنا خلصنا ؟!
الناس هارشة القصة بمنتهى البساطة 
الجيش عدده لا يكفى للتغلغل بشكل كاف
ف النظام الادارى للبلد ومينفعش اصلاً دا يحصل 
فقرروا يشيلوا الشيلة للوزارة القديمة 
اللى فيها قراصنة ..من كل صنف ولون 
يبقى فين التغيير ؟!
هتقولى مفيش تغيير بين يوم وليلة 
هقولك نعممممممم 
وحياة رئيسك اللى انشال والبلد مشيت
وكلنا عشنا وكلنا وشربنا واتحركنا 
وأى مشاكل حصلت كان وراد تحصل 
ف ايام عادية ...ولا إيه؟
الناس المعترضين دول ..عندهم الف حق
لأنهم لقوا نفس الوشوش
نفس السياسات 
بالعكس بقى 
المسئولين رجعوا ..عشان يلموا ورقهم
ويأمنوا حالهم من المحاكمات 
اللى ف انتظارهم
حد فاضى يصلح اوضاع الموظفين والعمال ؟!!
ماكانوا صلحوها من زمااااااان 
و الجيش مش فاضى ..خلاص 
يبقى كل فئة تصلح احوالها 
زى الصحفيين ما بيعملوا 
وغيرهم ..الخ الخ 
واجمل جملة قريتها ف ميدان التحرير
كانت الآتى 
السلم بيتكنس من فوق لتحت 
واظن المعنى واضح ودرجات السلالم
العليا ..منضفتش لسه 
لسه طبعا 
فزعلانين ليه ان فيه ضغط  ؟!!
محنا فهمنا ان الضغط بيجيب نتيجة اهو
وراجع ال18 يوم السابقة
ولا تااااااااااااااانى 
هوه العيال حلوين وقت الضغط
و المطالبة بالحقوق والبهدلة ف الشوارع 
و حماية البيوت و تنضيف الميادين 
بينما وقت الكلام ف المستقبل 
وأى سيناريوهات واحتمالات ومعلومات
لأ ..يسكتوا هيبوظولنا الدنيا  ؟!!




أخيرا بقى عشان دوشتكم 
انا ف العادة ... مبحبش انتقد الآخرين 
ولا إتعودت اقف اردح لحد 
ولا اصدر احكام على أى شخص
بس الواحد سكت كتيييييير وكظم غيظه
واوقات المواقف تستدعى الرد  
ايام الثورة .. سكتنا عشان 
منقطعش ف بعض
وقولت نأجل الكلام بعدين ..
يمكن الناس ربنا ينور بصيرتها 
اما لو فضل المتأرجحين  على حالهم 
يبقى الواحد يقول اللى ف نفسه
و كل ما أقرى تدوينةمعارضة ومحبطة
كنت اقول بلاااااااااش اعلق 
و نركز الجهد على مساندة اخواتنا 
ولو بالكلمة
و الحمدلله 
فيه ناس ساندت بأضعف الايمان ..بالقلب
وهما عارفين روحهم 
وفيه ناس غيرت قناعاتها والحمدلله
هما عارفين روحهم برضو






وأخيرا 
المشوار لسه طويل 
ومن شارك ف الثورة بأى دور 
من حقه يفضل يطالب بالحقوق
لحد ما تتحقق كلها ويدعو للى شايفه صح
لأن هم من بدأ 
واستمر  وأتخاض ف شرفه ووطنيته
ورابط وظل صامد حتى انتصر
بينما الغالبية 
كانت تناضل من تحت البطاطين 
وبتتفرج ع الجزيرة مباشر






هولاء هم العيال 
الأبطال هم 
و كل الشهداء اللذين صعدوا
للسماء على أجنحة الملائكة 
مصحوبين بالدعوات الصالحات من كل قلب
وكل من ساندهم من شخصيات عامة محترمة
كلهم 
منتظرينكم الجمعة الجاية 
فى جمعة الشهداء
الأهالى هيكونوا هناك عشان يشوفوا
ولادهم ماتوا عشان يحصل ايه ؟
ولسه حد بيدور على حقهم ويقتص
ولا هيروحوا يناموا تحت البطاطين
والمؤيدين والمناصرين وعشاق البهية
من كل مكان ..هييجوا يصلوا صلاة خشوع
فى حضرة انضف مكان ف القاهرة 
واللى اتغسل بأطهر وازكى دماء
دماء العيال




المكان :ميدان التحرير 
المعاد : الجمعة 
الدعــــــــوة عامـــــــــة
و لا عزاء لبتوع مراجيح مولد النبى
------------------------------

 اللهم ارنا الحق حقا وارزقنا إتباعه
وارنا الباطل باطل والهمنا إجتنابه

This entry was posted on الخميس, فبراير 17, 2011 and is filed under . You can leave a response and follow any responses to this entry through the .

48 كــــلام بيطــبطـــب عـــلى قــــلبى و روحــــى

توضيح
-----

تدوينة د.ستيتة الاخيرة

لازم نثق فى بعض شوية

اكيد مش مقصودة بكلامى
لأن د.ستيتة دورها واضح من اول ما أبتدت الثورة خصوصا قبل النت ما ينقطع وما بعدها فى تثبيت القلب الخايفة ..

دا توضيح بس عشان الناس اللى هتصطاد
ف المية اللى مش رايقة

:)

بس

حتقوليلى رايقة يا وندا
ايوه رايقة و فايقة و بحب
كل يوم و احنا كلنا بنحب
بنحب نفسنا و الى حولينا و المكان الى عايشين فيه و مستعدين نموت ليه

معرفش ليا فى الكلام و لا لا ؟ بس معتقدش
جه انت الى سكتنى زمان خوفا علينا من مجرد تريقة خفيفة و تعليق و ربط لاخبار مستفزة
و ده الى خلانى استغرب لما دخلنا فبراير و النت رجع مصر و اطمنت على اهلى و ناسى لقيت التون هجوم و دفاع
و الحمد لله طلعوا وائل الى بدموعه لحق العيال الى كانت بتتذبح و لا بتقتنص من البعد
مش حنسى عمرى المناظر
بجد قلقت على الكل حتى على اصحاب الدقون و على العيال الى شكلها فنكى (شكلها معلش القالب لسه كان مسيطر )
كفاية فيديو الامريكانية الى صورت ضرب النار من العمارات على العيال
ولا ............. مش حعيد
ايام عدت بس لازم تتعاد
لازم يستلفوا الشرائط من اذاعات الخارج كلها بلاش الجزيرة الى وجعاهم
و اهل مصر يشوفوا الى شوفنا

ياهههههههههههههههههههههههههه
انا متخيلتش انهم يوصلوا لده بس هو فعلا هرم مخوخ بالسوس من جواه وقع بالصوت بس

كل مولد يا فاتيما و انت بخير
و اقولك انا عملت ايه
كنت بقراء النظرة الاخرى علشان اكون موضوعية بس بعد فترة بطلت لان النغمة المهجمة ما بتتغيرش

الا قوليلى من المرشحين
و هل الانتخابات حتكون بالرقم القومى و لا ؟ اصل البطاقة الانتخابية بتاعتى طبعا فى مصر
و هل حيسمحولنا بره نشارك و لا لازم نرجع ؟؟؟؟اصل التوقيت حيكون صعب بس ممكن نحاول علشان الجاى بحس انه جه صح مش هابط من فوق :-)

بلغينى الاخبار والنبى اختك مدعوكة فىالشغل دعكة و الباقية فى دعكة اخرى :-)

اه ليا ملحوظة بالطلبات الفئوية
فطوم
انا الى طفشتنى اكمل درستى بره كانت مديرتى المسيحية الى كلوا حقها فى منصب كبير و ادوها بداله حقوق و امتيازات و سلطات على خلق غلابة تشترى و تبيع فيهم براحتها علشان تسكت
يعنى الظالم بداء بظلم و استفحل علشان يتسكت

لو هى كانت اخذت حقها كان ممكن تكون انسانة احسن من كده ممكن ؟

:-****************************************************************************************************************************************
توابع الاعياد :-)
:-***********************************************************************************************************************************************************************************

:-)
الاحضان بلاش علشان شكلك مش طايقة حد يلمسك :-) اليومين دول
و هابى فالانيتن داى يا فندم :-))))))

فاتيما
انا قرأت كلامك تلات مرات
ومش قادره ابطل عياط
كلامك وجعني اوي
يمكن لانه جي على الجرح
كان جوايه الكلام ده
بس كنت بحاول اركنه على جنب

عارفه يعني ايه تلاقي ناس حوليكي بيقلولك انك خاينه
وانك معندكيش اصل وبتبهدلي ابوكي لما كبر
كأن ابويه ده كان شيلني في نني عنيه
ورحمني انا وغيري

واحده في الشارع قالتلي
واحده زيك محتاجه ايه شكلك بنت متبغدده طالعه تخربي في بلدك الي لحم كتافك من خيرها ليه
انا بخرب في بلدي !!!!!!!!!!!


وشخص تاني قريبنا قال عليه ان اهلي مربونيش علشان بطلع في المظاهرات
والي يقول هي اهلها مش خايفين عليها


اكيد العيال الي طلعت التحرير دي اهلهم مش لاقينه في الشارع
اكيد بيخافوا عليهم
انا اتضربت يوم الجمعه من الأمن
وجسمي ازرق
ولقيت تاني يوم والدي وهو مسافر بره
بيكلمني وبيقولي انزلي


الغريب ان الناس الي بتتكلم طالع عنيهم ومذلولين ومتهانين وابسط حقوق الحياة مش متوفره عندهم

بدل ما يطلعوا يطالبوا بحقوقهم او حتى يقعدوا مكانهم ويسكتوا كانوا بيحبطونا ويكسروا في عزيمتنا


كنت حاسه بقهر وقلبي واجعني
بس اكيد كان في ناس كتير بيشجعونا

انتي كنتي من الناس الي كانت بتشجعني
لما قولتيلي اني بعمل كده علشان بلدي مش علشان كلام الناس

حسيت ان في ناس كتييييييييير في البلد دي لسه عندها احساس وكرامه
وحاسه بقيمت الي بيتعمل

انا عارفه ان في ناس كتير كانت معذوره انها متشاركش بس كفايه انهم فضلوا في الظل ومكنوش ضمن كتيبة التحطيم والأحباط


الحمد لله ان ربنا نصرنا
ولسه المشوار طويييييييييييييل
بس اهم عقبه اتزاحت

ربنا يحفظ بلدنا
ويجعلها احسن بلاد العالم

كل سنه وانتي طيبه يا فطومه
مولد نبوي سعيد
وفلانتين سعيد
واتمنالك سنه كلها حريه وكرامه
ويتحققلك الي بتتمنيه

ازيك يا فاتيما عاملة ايه
بصى يا ستى انا مرة قلتلك تعليق انى مش قادر اكتبلك تعليق لان حالتى النفسية وحشة وارجو قراءة التعليق عند تييرز او خيخة اعتقد انك مش فاكرة
بصى يا ستى انا حالتى كانت فى الارض ليه انا بعد سبعة ايام فى التحرير من يوم الجمعة ليل و نهار خرجت فى مظاهرة من ميدان المطرية الى عين شمس الف مسكن مصر الجديدة جسر السويس روكسى الخ الخ حتى التحرير انا بقولك الاماكن ليه لانه طوال الطريق الناس تؤيد المظاهرة و ترفع الاعلام فى البلكونات الكبار فى البلكونات تدعى و الشباب بعضعم ينضم و البعض يلقى علينا بزجاجات المياه و العصائر طوال الطريق هذا ما كان بذهنى طوال سبع ايام من اجمل ايام حياتى قضيتها فى التحرير حتى الاربعاء الدامى بعد مكالمة تليفونية من زوجتى و هى تبكى و لم استجب لها ثم مكالمة من والدتى وهى تبكى ايضا واعترف بانى ضعفت و رجعت الى المنزل وانا مقهور ولكن الذى ذاد قهرى التحول الذى حدث فى بعض الناس بعضهم يكلمنى عن وقف الحال فى العمل والاخر يكلمنى عن زيادة اسعار السلع وما زاد الطين بلة موضوع الاجندات والاموال ووجبات الكنتاكى اقسم بالله وباولادى اننى عندما القى ظهرى وانام فى الميدان لا اعرف من ينام بجانبى مسيحى اخوان بهائى ناصرى زى حالاتى او عندما نتجمع حول النار المشتعلة ونتحدث لا يسال احدنا عن اسم الاخر انما نتكلم كاخوة واصحاب ونتفرق ونلتقى ونقتسم اللقمة هذا هو مازاد احباطى الشائعات التى تطلق على اطهر ناس قضيت معهم اجمل ايام حياتى شباب و فتيات
ناتى للنقطة الثانية التى تحدثتى فيها بصى يا فاتيما لو على المدونون فالامر بسيط جدا لكن يا فاتيما ظهر على السطح مجموعة من المرتزقة تحاول الصعود بسرعة على اشلاء الشهداء وتتغذى على دمائهم وتشرب من دموع امهاتهم وابائهم هؤلاء اسميتهم المتلونون والمفسدون لانهم افسدوا من جاء من قبل و سيفسدوا من سيجىء من بعد و القائمة طويلة تضم رجال اعمال و ساسة و اعلاميين و فنانين و رياضين و رجال دين احاول ان اجمعهم وساعرض مواقفهم قبل و بعد فقط على الناس حتى نسقط اوراق التوت من عليهم وارجو ان تساعدينى و ارجو من الجميع ان يفعل كل شخصية متلونة فاسدة نعرض مواقفهم قبل و بعد حتى لا يفسدوا الثورة فهم الخطر الحقيقى
ناتى لنقطة الرقابة رقابة ايه يا ماما انتى نسيتى انك فى عصر جديد قولى كل اللى انتى عايزاه بدون رقابة
اسف جدا جدا على الاطالة
تحياتى ابراهيم رزق

فاتيما ياحبي
أذيك وأيه الاخبار معاكي
يارب تكوني بخير
الحمد لله بجد من كل قلبي
ان الحق ظهر وبان
كانت حرب برا فالشارع
وجوا فالنت وعلفيس بوك
من كتر مالواحد كان بيتكلم وبيكتب علحقيقه...بتيجي ناس تعمل مشاكل ومافيش أكتر منهكم
الله يخليكوا..خافوا علبلد
كلنا منتهييييييين والي زوال
وهي بس ربنا اللي حارسها وحاميها بناس نضيفه بجد
خلي بالكوا منها

والله يا فاتيما
انا لا أفهم في السياسة يمكن خالص
بس انا كتبت من وجهه نظري المتواضعة فقط....وحتي ده كنت حاسةى انه مقالش اللي جوايا كله
بس تصدق كل يوم كان دمي يتحرق ع الصبح من الناس ...لييييييش عشان انا معارضة للحال المايل ...
في البداية لما قالتلي صديقتي عن يوم 25 كان نفسي اروح اوووي
بس مقدرتش لان كنت مقبله علي امتحانات
بس اللي بجد ادهشني ان المظاهرات تستمر وده كان بجد اجمل شيء حصل
كتبت ...وكنت مبسوطةاوووي
ان هو ده جيل الشباب جيلي اللي بيقولوا عليه جيل بايظ...
كنت كل يوم ادعي
ودعيت للشهداء ولسة بدعي لهم
وكل يوم ادعي لمصر
بس عمري ما غيرت رأي ...
حتي لما كتبت وقلت نفكر بهدوء ...كان قصدي اننا نحاول ناخد حقوقنا وحق الناس اللي استشهدت دي بما ان عمر سليمان رافض الكلام غير لما يسيبوا الميدان....
بس كل يوم بيتضح لي ان شباب التحرير كان اجمل شيء حصل في تاريخ مصر ...
شفت كتير واتصدمت كتير ولسة بتصدم لللأسف ....
امبارح وانا في شغلي ...والحديث عن الثورة ...وشخص متعمد توجيه اللوم والتقريع لي ...ومش عاجبه كلامي عن الثورة وعن الشباب ...لقيتني مرة واحدة بطنشة وبقول لصاحبيتي اللي جنبي ..." بقولك اية معاك مراية " يعني مش عاجبني كلامك واسكت بقي زهقنا من انكم الفاهمين والخايفين علي البلد وانت معاهم معاهم عليهم عليهم ...
بجد اتصدمت في ناس بشكل غريب ...بس انا كنت بعتقد ان الناس اللي بتقول عن نفسها ثورية وحرية ومش عارف اية يبقوا بالشكل ده
مكنتش اتخيل حد كان بيكتب في جريدة الدستور اكبر جريدة معارضة في مصر في اوج مجدها قبل ما تنتقل للوفد يبقي سلبي وغبي بالشكل ده ...للأسف
مش انت لوحدك يا فاتيما اللي اتصدمت
انا معاك علي فكرة او انا زييك في اني قلبي دليلي في كل شيء ....واحساسي او انطباعي الاولي هو الغالب دوما
لهذا أتعذب بسببه كثيرا
قاتيما ....كل سنة وانت طيب بمناسبة عيد الحب والمولد النبوي وانا دعيت لك كتيييير يا بر الدعوات تستجاب اللهم آميييييييين

كلامك جه فى وقته

تعرفى انا كل مرة افتح المدونة واقول هكتب وارد على كل واحد بيقول علينا عيال ولا بيتلعب بينا من ايدى خارجية ولا بناكل كنتاكى كنت برجع واقفل واقول مكانى مش هنا ولا دول يهمونى ارد عليهم اصلا

كنت ببقى على الفيس بتناقش مع الناس و اصحابى اللى مش فاهمين وكل واحد يتريق او يشتم كنت بقول حسبى الله ونعم الوكيل

انا و اخواتى هناك من اول يوم ... انا بصراحة مش كنت بروح كل يوم عشان بابا كان بيرفض احيانا خوفا عليا انا واختى لكن لما كنا بننزل كنا بننزل كلنا بابا و ماما وانا واختى

كان نفسى بس اللى يتكلم علينا ينزل يشوفنا هناك بنعمل ايه ويحاول يفهم بس كان يحاول يفهم ماكناش عايزينه ينزل معانا بس على الاقل لا يخوض فى أعراضنا واعراض اهلنا

كان بيتوجع قلبى لما تسمعى حد يقولك الشهداء دول مش شهداء اصلا


قلبتى المواجع يا فاتيما

يارب حد من اللى بيقول الكلام دا يقرا تعليقى

احنا ماكناش عايزين منصب ولا جاه ولا سلطان كان بس عايزين مصر عايزين بلدنا حريتنا عايزين نحبها عشان احنا بنحبها مش عشان مجبروين نحبها مش عشان اتولدنا قالولنا فى الكتب لازم نحبها

يا إلاهي ده أنا اسمي في اول تعليق:)
إطمئني يا فافي
أنا مخي قد مخ الديناصور المنقرض وعمري ما باخد حاجة على صدري:)
وكل واحد فينا علشان يرسي الدولة الدكروماطية لازم يشوف اختلاف غيره ويحترمه حتى لو قطعوا بعض خلافات

يادي النيلة اقرأ البوست بقى
بس بقى يا كماحة

جزاك الله خير , انا اول ما قريت البوست قلت انا شكلي من الناس اللي حتنضرب في البوست ده , شويه وقلت لا الكلام مش عني خالص , شويتين ولقيت اسمي اعتقد اني مدين بالشكر , لان اللي مات احق بكل تكريم هوه والمصاب انا لما كان حد بيشتمني وازعل افتكر اللي مات فانسى
الحمد لله انها جت على قد كده وربنا يتمها على خير والبلد محتاجة الناس كلها دلوقتي , اللي كان واقف بعيد او حتى بيشتم وعايز يبني دلوقت مفيش مشكلة يقدم اعتذاره ويعلن ندمه وتوبته مش لينا بينه وبين نفسه وروح علشان يبني
بالنسبة للمطالب الفئوية : فعلا الحكومة مش حتقدر تعملهم معظم طلباتهم دلوقتي وخصوصا المادية منها ومع ذلك مش المفروض ان احنا نقف منهم نفس الموقف اللي وقفوه مننا ناس احنا بنطالبهم دلوقتي بالاعتذار واعتقد ان الحل معلهم ان كل فئة ينزل مسئول يكلمهم ويتفاوض معاهم ويديهم ضمانات ومعتقدش انهم حيصروا على موقفه كتير لانهم شبيهين بتوابع الزلزال وعدم احتوائهم بالحسنى حيؤدي الى زلزال اكبر مطالبه الاولى اقتصادية بحته ودي مش سهل السيطرة عليها ولا احتوائها بتنازلات سياسية .
الحوار هو الوسيلة الوحيدة امام الجميع الان , الحوار ثم الحوار ثم الحوار
شكرا تاني

ازيك يا تيما اخبارك ايه يارب تكونى بخير يارب اتمنى ياقلبى الحمد لله قدر ولطف وربنا يكرم بالشفا يارب محمد بيسلم عليكى اوى اوى وكان نفسنا نكون معاكم بس اهو ادى الله وادى حكمته ربنا يسهل بس ويطمنى عليه عايزاكى تدعى بضمير بقى اوى وتركزى ههههههه ماشى ربنا يخليكى يارب ومايحرمنيش من سؤالك ابدا يا تيما ويطمن قلبك يارب بوساتى وفوعصاتى يا قلبى

Wanda
-----

لأ انتى بالذات يا ونون تروقى وتهدى نفسك ولا تزعليش
انتى عروستنا يا بنتى وحقك تفرحى وتعيشى كل مناسبة حلوة لأنها المرة دى مع حبيب القلب
(عيون باصة لفوق وبتبربش )

بصى
انا فعلا كنت متغاظة ومش طايقة روحى وانا بكتب البوست ..
عشان الناس اللى بتكلم عنها دى عملت زى الجرايد الحكومية والتلفزيون بالمللى ...
بس بصراحة الاخوة ف الحتت دى ليهم عذرهم ..اكل عيش وخافوا عليه
وبعدين اولياء نعمتهم ف خطر فخافوا من الناس وعلى كراسيهم ..
ماشى موافقين جنب القرف منهم طبعا

لكن الاخوة المدونين بقى
عذرهم ايه؟
لا حد فيهم اكل عيشه م التدوين
ولا حاجة
تغيير المواقف دا معناه ايه ؟!!

طيب كل واحد حر ف رأيه
بس راعى مشاعر هولاء الناس اللى نزلوا من اول يوم وشاركوا وانتا عمال تهين فيهم ..وانتا قاعد تحت البطانية ولا حسيت بأى حاجة

سؤالاتك كلها ف محلها يا وندا
متهيألى لازم المصريين برا يشاركوا
دا حق اصيل

ومديرتك اللى بتحكى عنها
الومها وملومهاش
معرفش ازاى واحد ينظلم ويرضى الظلم على غيره ؟
بس كل واحد وظروفه

كل سنة وانتى طيبة
واعملى حسابك
مولد النبى الجاى ان شاء الله ..
هنجيب عروسة لون ون الصغننة وحصان لأخوها التوائم
انا مصرة

:)

سلامى لسى السيد بتاعك
وكل سنة وانتى طيبة يا ونداتى

********************************************************************************************************************************************
و
××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××

من كل بستان زهرة
----------------

انا اسفة انى عيطتك يا زهرة
بس انا عارفة انك وغيرك انبل واكرم من انكم تردوا على حد
وفيه حالة اكتئاب مستترة كدا انا حساها وفهماها و مقدرة اسبابها نوعا ما وان اختلفت ف درجتها من حد للتانى

بس الملخص
ان اللى منزلش ولا رحش ولا عمل أى منظر غير الكتابة والتنطيط من بوست لبوست حسب الاحوال ...ياخد جنب
ويهدى شوية ويراجع كلامه
وتعليقاته


ومتفقة معاكى جدا
ان فيه ناس كتير محترمة كفت الكل الأحباط
لو قالت كلام غير مشجع
بسبب مخاوفهم او ان الصورة مش واصلالهم كفاية او حتى معارضين جدا
ودول انا ارفعلهم القبعة
وعارفهم برضو
واحد واحدة


كل سنة وانتى بألف خير يا زهرة
وانا فخورة
انى عرفتك يا بنتى
:)

ابراهيم رزق
-----------

ازيك يا إبراهيم

لأ فاكرة طبعا التعليق
ولما قريته
حزنت قوى قوى
بس الحمدلله
ربنا محى الحزن وحط مكانه اصرار وعزيمة
لأن الحق كان معاكو يا ابراهيم
واللى يمشى ورا الحق
عمره ما يزهق او يتعب
بس بيفضل ف القلب غصة
ودا اللى خلانى اكتب البوست دا
بالنيابة عنكم يللى نزلتم
لأنى عارفة انكم اكرم ..من انكم تكتبوه بنفسكم وتخاطبوا ناس بعيدة كدا ويبدو ان مفيش أمل فيها

بس هيا تنفيسة عن الغضب
الا يجرالنا حاجة


بخصوص المتلونين
فللأسف رأيك صح
وهما دلوقتى بيرجعوا تانى
عشان يلاقوا مكان تحت الشمس وناجحين للأسف لحد دلوقتى ف خداع الغالبية

بس هرجع واقولك
الحق حبيب الله
واللى عملوا الثورة مكنوش اللى قاعدين ف البيوت و مش فاهمين او كل ساعة بحال ..
ودا اللى مطمنى شوية


ممكن اطلب منك طلب ؟
ممكن متعتذرش عن الإطالة تانى

دى مدونتك يا ابراهيم
وانا اتشرفت بيك
وربنا يخليها خيخة هيا السبب
فى معرفة الخير دى
من فضلك طول زى ما تحب
دى مدونة اختك يا عم

:)

SONY2000
--------

هذه حقيقة يا سنسن

وانا قعدت اقول النت رجع ليه
رجع ليه
من امتى الحداية بتحدف كتاكيت ؟!!


اتاريهم كانوا محضرين للحرب الأعلامية الشعواء اللى خاضت ف سيرة الشرفاء
وللأسف استسلملها البعض ورددوا الكلام الساذج بتاع الخارج والعمالة ومصر هيحتلوها وكلام عجيب كدا ..

لكن ربنا خير الماكرين
وارتد السحر على الساحر

عشان الناس دى كانت عاوزة خير للبلد
مش العكس ...

بوسات وحضونات يا شقاوة

:)

تسلم إيدك :)
وشكراً :)

وأهم حاجة الدعاء للشهداء والجرحى وأهاليهم وكل ضحايا الصهيوني زوج الماسونية سوزي

لو نعمل
banner
في المدونات النشيطة بحيث يفكر الناس بالموضوع ده على طول

ونحاول ننشر فكر الناس المحترمة زي المسيري ودكتور مصطفى محمود والشعراوي الله يرحمهم وغيرهم الكثير

والمشروعات اللي هدفها تصلح حال البلد زي مشروع فاروق الباز ومشروع الاستشاري ممدوح حمزة واللي عرضه على الأوربيت


والرابط بتاع الحلقة هنا
http://www.youtube.com/watch?v=eXqjJgQmhDM
http://www.youtube.com/watch?v=yRbUzvTfo0Y


وزيارة المصابين في القصر العيني وأي مكان. وطبع صور المفقودين ومحاولة إيصالها لوسائل الإعلام والجرايد

حاجات كتير قوي ممكن تتعمل واللي كانوا بيتنططوا بناءاً على جهل أو مشاعر متضاربة أو مصالح صغيرة خايفين عليها ... ممكن يشتركوا برضه والثورة بدايتها الحقيقية المفروض تبقى يوم التنحي

اللي قبل كده كانت شرارة كبيرة للثورة
شرارة متعبة ومؤلمة ومرهقة وطويلة

بس ما زالت شرارة
الثورة الفعلية في الكنس الحقيقي للسلم والصبر لحد ما ده يتحقق ونجيب حق الشهداء والمصابين وأهاليهم

ونرجع المفقودين ومنقصرش في البحث عنهم

ونرجع بلدنا بقى

أهم لحظة في حياتي أعتقد كانت صرختي الباكية ورا ماسبيرو. البلد دي بلدنا
صرختها يوم 28 قصاد ضابط رتبة كبيرة و2 صغننين وكذا عسكري واقفين في نقطة ورا ماسبيرو كده بينه وبين رمسيس هيلتون

توقعت يضربوا عليا نار لأني كنت لوحدي ومش حواليا ناس كتير في الأفق

بس ضحكوا وسكتوا
شكلهم محترمين أو على الأقل خايفين لأن في أي مكان هيهربوا فيه هيلاقوا تجمعات للمتظاهرين المرهقين

بس البلد دي بلدنا

وأغلب الناس اللي بتنتقديهم هنا لسه عندهم فرصة يشوفوا إن البلد دي بلدنا ... بلد ال 80 مليون المخلصين النية لوجه الله

تسلم إيدك :)
والله ما قصرتي :)

re7ab.sale7
-----------


يا بنفسج بيبهج عارفة قصدك

بصى يا رحاب
انا اقصد ف كلامى ان الثبات ع المبدأ
اهم شىء

انا معنديش مانع تبقى مع الريس
او نظامه
او سياساته ..الخ


زى ما غيرك ضد على طول الخط

كل واحد حر

بس لو حصل
والدنيا اتغيرت
وانتا اكتشفت اكتشافات مذهلة
لو قولتها لعيل صغير ف ابتدائى
هيستوعبها
وبعدين انتا غيرت رأيك
مترجعش تانى بقى لورا ..وتقول العكس


اصبت
اختار
والتزم بموقفك
متبقاش معاهم معاهم
عليهم عليهم

لأن الموقف واضح
دى لحظة تحول
مينفعش تغير اقوالك
لأن فيه حكم مترتب على كدا


عاوز تبقى محايد زى ملايين قعدوا
ف البيوت وسكتوا
ماشى
ما دا موقف برضو

بس اختار
والتزم

متبقاش متأرجح
وراكب المراجيح
وعاوزنا نشوفك حبة فوق وحبة تحت
ونعديها

طيب
انا عديتها والله

بس بجاحتك تخليك
ترجع تهين الناس الحلوة
وتقول بيلعبوا ؟!!
لأ بقى
دنتا اللى عاوز يتلعب ف وشك ×O


خالص حبى يا رحوبتى
ويا رب تكونى بخير

:)

أرق مخلوقة ف الكون
----------------

اللى تعليقها موش للنشر
والله كنت عارفة من غير ما تقولى
مش كنت عارفة
كنت متأكدة

هوه انا لسه هعرف الغالى
واعرف ممكن يطلع منه ايه ف ايام زى دى
انا عاوزة اقولك
ان يوم الأربع بليل
كنت هموت وانا بتفرج ع الcnnوهيا بتجيب المشاهد من الميدان واقول يا رب يا رب انا ليا بين الناس دى اكيد غاليين اعرفهم ومكنش ف ايدى غير أدعى
والحمدلله
ربنا نصرهم

فاضل الباقى بقى
نطمن كلنا

ربنا يطمنى عليكم
ولو عرفتم تيجى يوم السبت اسكندرية
يا ريت

بوسات وحضونات
بعدد نجوم السما

جارة القمر
----------

يا حبات اللولى الحر


تعرفى ؟
كلامك فكرنى بحاجة حصلت فعلا

واحد زميلى ف الشغل
طبعا ضد الثورة على طول الخط
دخلت معاه صدفة ف نقاش ع الناس ف التحرير وقالى ان اصدقائه ندهوه وقالوله تعالى معانا عشان نعمل دماغ ف الميدان ..
انا بصيتله
وطبعا مكنتش عايزة اقول كلمتين مش كويسين واقوله ايه الإصحاب اللى يشرفوا دول ..
قولتله حاجة تانية
نفس جملتك

انتا فكرت تروح الميدان لو لساعة واحدة وتمشى؟

قالى لأ

قولتله

روح الاول
وبعدين تعالى نتكلم تانى بعدها
اوعدك ان نظرتك هتتغير
لأن ليس من سمع كمن رأى

طبعا هوه كبر دماغه
وكلامه اغلبه ان البلد هتدخل ف فوضى
والناس الموجودة مش وحشة
وادوهم فرصة ..
والعيال دى مش هتقدر تصمد
ولو نجحوا انا هسافر واسيب البلد
.. الخ


طبعا مفيش داعى اقولك
انه دلوقتى مكبوس كبسة ويحشة جدااا

وانا سيباه ف حاله
عشان اول جملة هقولها
حجزت التذكرة ولاّ لسه ؟!!!


انا لسه بقولها
اللى منزلش الميدان
فاته نص عمره والله

وبتمنى يوم الجمعة الجاى
تبقى فرصة ..للتعويض


بسيلى روحك واحضنيها
وسلامى لبابا وماما واخواتك
بجد
ربنا يخليكم لبعض

:)

ستيتة حسب الله الحمش
------------------

يا ستاتيتو انا واثقة فيكى
ثقة عميااااااااااااء

الكلام لأى حد تانى
هيفهم غلط
او يتعمد يفهم غلط


وربنا يخليلنا دكرمواطيتك دى
هوه احنا نقدر نعيش من غيرها يا كابيرة ؟!!!

بوسات وحضونات مؤقتاااااااا

واحد من الناس
--------------

:)

ليه يا فندم قولت كدا
طب دنتا موقفك كانت واضح وثابت
من البداية
ومناقشتك ونداءاتك كانت متوازنة
ومفيهاش إستهانة بحد

انا بتكلم عن الناس اللى كانت
وما زالت تسفه من هذا الأنجاز الرائع الذى لا تصفه كلمات والعالم كله من اقصاه لأدناه ..بيصقفلنا عليه

المؤلم انهم منا فينا
وانا كنت اتصور ان
التدوين عالم حر
وافكاره مش خاضعة لسلطان جائر
او مصالح
وكتاباتنا بتنور لبعضينا الطريق
مش العكس

فلما نتجاهل تجاربنا الصادقة دى
ولما يثبت مين الصح ف الآخر
ولما يظهر الحق
يبقى بعد ذلك تفضل تكابر برضو
وتدى نفسك حقوق اكبر من غيرك
بينما انتا لم تفعل خيرا
وبالعكس
احبطت غيرك وسديت نفسه
وشككته ف روحه
وهزيته
ف وقت احتاج للثبات والتطمين
طب مصلحتك ايه ؟


بس

انا معاك ف الحوار
بس تتحاور ازاى مع واحد بيغير كلامه
كل شوية ؟!!

اما حكاية المطالب الفئوية
فللأسف البعض باصلله بإستهانة ومجنب الإحساس بالناس على جنب

يعنى فيه ناس مرتاحة ف شغلها ومعندهاش مشاكل
مجربش مرة يبقى مديره راجل حرامى قرصان وقارف الكل ف عيشتهم
وترجع تانى تلاقيه برضو قاعد متبت ع الكرسى وعمال يظبط ف اموره ومش فايقلهم ...والمطلوب منهم يرجعوا ينصربوا على قفاهم تانى
طب ازاى ؟!!

الحل متاح وسهل
الرئيس انشال ف 3 اسابيع
والدنيا مشيت
يبقى الوزراء والمسئولين الفاسدين
لأ ليه
الحكاية فيها إنا
وهوه دا اللى مخلى الناس تثور
جنب ثورتها عشان حقوقها


ومتشكرنيش يا عزيزى
انا اللى إتشرفت بيك
وبمعرفتك

:)

richardCatheart
---------------

ازيك انتى بيا قطاقيطووووو

والف سلامة ع الحاج
وربنا يطمنا عليه
وهحاضر هدعى بذمة
واشمر دراعى اهو

:)


ربنا يا حبيبتى يقومه بألف سلامة
سلميلى عليه قوى
وبوسيلى العيال

Diyaa
-----


شكرا على ايه يا ضيا
دا اقل كلام ينقال
ف حق كل حد شارك ف الأيام الطيبة دى


افكارك حلوة قوى
وانا يحضرنى ف الموقف دا
انى اشير لمدونة ثورة الغضب

http://thawrt25eg.blogspot.com/

اللى عملاها شمس النهار مع ناس حلوة تانية
واظن انها تصلح تكون أرشيفنا للثورة
وتحمل كل قديم وجديد
وتتحدث بإستمرار


الموقف اللى إنتا حكيته
يتحط ف فيلم يا ضيا
انا تخيلته وتخيلتك
وكل ما بسمع الموقف دى واركبها جنب بعض بفهم بشكل اوضح ..
ليه الامن انسحب ومقدرش يكمل اكتر من اربع تيام ..
حتى لو منسحبش بأوامر عليا
كان هيصيبه الأنهاك
مش بس البدنى
لأ
الإنهاك المعنوى
لما يشوفك ويشوف اللى زيك
فاتح صدره للموت ومش هامه غير انه يقول كلمة الحق ويصر عليها


الذين انتقدتهم يا ريت يقروا كلامك
ويعرفوا عن مين ..بيتكلموا
ويا ريت رأيهم يتغير

تسلملى يا غالى
واشوفك على الف خير
قريبا

:)

فاتيما
مشموشتك مش بتسالى عليها خالص ومش بتوحشك تقريبا:(
بس انا جاية اقولك بحبك
وكل سنة وانتى طيبة
ومبروك الحرية ان شاء الله تستمر صح
ويارب تكونى بخير

shimaa samir
------------

لأ وحشتينى طبعا يا مشموشتى اكيد
بس انتى شايفة الوضع والظروف
ومفيش وقت اعلق عند حد

بس انا متابعة التدوينات
ومطمنة عليكى
اول بأول
انتى وكل الاحباب
طالما بيكتبوا يبقى كله تمام
والدنيا ماشية
ولو فيه اخبار وحشة-لاقدر الله- هتنعرف
ومفيش والحمدلله

خلى بالك من نفسك
وسلامى للعصفور الطيب

:)

فاتيما
ألف مليون مبروك
الميدان كان شكله يفرح
كل حاجة كانت مثالية
ولسه
وحياة الأحلام الكبيرة إللي حلمناها كلنا كجيل لترجع مصر لأدينا تاني
مصر بجد
ماشوفتيش الواد بيكا وأنا شايله فوق كتافي و هو بيهتف ( مش هانمشي ، هوّ يمشي ) والله كنت حاسس ساعتها إن راسي طايله السما
بوبو لما سمعت أغنية منير ( إزاي ) وكانت وسط الأيام العصيبة و لسه مش باين هزيمة ولا إنتصار ، كانت بتبكي بحرقه ، لكن من يوم إنتصار إرادتنا مابقتش تبكي لما تسمعها ، وبتقول لي ، أنا مش حاسة أنها بتعبر عني خلاص .
مرة تانية ألف مبروك ليكي و لينا
ومليون مبروك لبيكا و يوسف
وخللي بتوع المرجيح يتمرجحوا كمان و كمان
وماتقلقيش دا أنا هابدهم تدوينة عندي من العيار الأبيح
تحياتي يا أختي العزيزة
KING TOOOT

طمطم
ازيك ياحبيبتى
انت كتبت التدوينة دى امتى ؟
محتاجة جدا أقولك انى بحبك ياطمطم لانى امبارح تحديدا كنت وصلت لمرحلة من الاكتئاب والقلق مالهاش حل


ده انت فى بلوجر الدنيا معقولة انما فى فيس بوك مش بلاحق على الكلام والاخبار

لما لقيت البوست بتاعك حمدت ربنا ان فى بينقذنى فى عز الخنقة اللى انا فيها لانى مش عارفة اكتب ولا كلمة

جميل جدا انك قسمت الناس ووضحت ان اسبابهم مختلفة وان كلهم مش زى بعض

والاجمل انك وضحتى انهم معروفين خلاص
مش مستحملة اقرأ كلامهم وحاسة ان ده ضغط شديد على اعصابى ومينفعش الايام الجاية اللى واضح انها هتكون أصعب نضيع وقتنا واعصابنا فى متابعتهم
وانا حاجات أهم


مع انهم فعلا معاول هدم وبيشتتوا التركيز

عن نفسى الثورة دى كانت حلم حياتى وان ربنا سبحانه وتعالى خلاها تحصل وانا عايشة وشوفتها ده فضل كبير لربنا صاحب الفضل والمن وشكره سبحانه وتعالى هيكون حفاظنا عليها


رجالة التحرير أقسم بالله جميلهم اللى طوقوا بى رقبتى هاشكرهم عليه ليوم القيامة

ان الثورة دى لاقدر الله تفشل لأى سبب من الاسباب الله لا يقدر
ده هيخلينى حاجة من اتنين

ياانسانة غرقت فى احباط مالوش حد
ياانسانة شريرة ومش ضامنة نفسى ممكن اقول ايه لأى حد وقف ضدها

مينفع يبقى عندى فرصة مش هتكرر انى اعيش انسانة وبلدى تبقى حرة وارفضها لاسباب تافهة

الرسول عليه الصلاةوالسلام قال
( انما النصر صبر ساعة )
وهم مش عايزين اننا نصبر اوننتصر

انا اسفة ياطمطم لكلامى الحاد بس انا امبارح بعد ماقرأت بوست أحمد سعيد ونجرو كمل عليا وكان حاطط فيديو لاجرام الشرطة وصلت لمرحلة من الغيظ والغضب مش لاقية حل ليها

ياريت الاخوة اياهم بمنتهى الرغبة فى مصلحتهم يبعدوا عن طريقى انا تحديدا الايام دى على مانخلص من اللى احنا فيه

اسفة تانى على الحدة

لو تعليقى وصل اكتر من مرة اتصرفى انت معلش :$
وحشتينى جدا على فكرة :)

KING TOOOT
----------

الله يبارك ف عمرك يا وليد
ويخليكم لينا

انتا م الناس اللى كنت متأكدة
زى منا متأكدة ان يوسف ابنى كدا ..
انك هناك
ومشارك بكل اخلاص
ولما كنت بشوف اسر بعيالها
كنت بقول اكيد لما نفع ..جبت بوبو وعمر
يابنى انتا من الأحرار ..
من بدرى بدرى
انتا م المهاويس بحب البهية
ومش لسه هعرف

أنا محبتش غنوة منير
معرفش ليه ؟
يمكن لأن لهجتها كانت صعبة
او المزيكا عنيفة ةفمرتنى ببتوع الهيفى ميتل دول ...و محستهاش

عجبتنى غنوة عزيز الشافعى
لأنها شبهننا اكتر
وغنوة انغام حلوة
وفيه غنوة جديدة الواد ماجد اخويا عاملها مونتاج واخراج .زوان شاء الله تتعرض قريب ..واول ما تنزل هحطها هنا .. ولما ندانى اشوفعا ..اتفلقت عياط و انقهرت ..
انتا عارفنى نكدية
واموت ف النكد زى عنيااااااااااا


ربنا يقينا شر المتأرجين
ويثبت القلوب على حب الحقيقة

تدوينتك ضحكتنى قوى
واصل حكاية الصوابع دى
مش كويسة ف حق مصر خالص الصراحة
ومعرفش طلعولنا بيها ازاى
بس هتيجى اغلى م الأجندات
والحاج كنتاكى اللى إتخاض ف شرفه ؟!!؟؟؟
يلا

سلامى لبوبو الغالية
وبوسيلى عمر الشقاوة

خالص ودى
يا غالى

الطائر الحزين
------------

ويباركلى ف عمرك
يا إيهاب


:)

حفيدة عرابى
---------

الاول
انا كمان بحبك قوى يا فيدو
وحاسة بيكى جدا
لأنى لاقيكى مختفية
وانا عارفة لما بتختفى
تبقى الأسباب اكتئابية بحتة
وربطها باللى بينقال اليومين دول
من كلام مايع
واضح جدا

ثانياً
الريدر عامل مؤامرة ضدى
من غير اجندة ولا كنتاكى ولا اصابع
مش حاطط البوست ف الريدرات بتاعة الناس وكأنه متضبط ومدفوعله ولا إيه؟!!


ثالثاً
انا مش محتاجة اشوف الفيس بوك
وكفاية اتابع الوسائل الأعلامية المختلفة واتفرج ع الوشوش العكرة اللى بيلمعوها دلوقتى عشان تاخد مكان الوشوش القديمة اللى بقت كوخة ومحروقة بما فيها الريس المخلوع نفسه
دلوقتى عاوزين يركزوا على البناء والأستقرار ومتابعة الحياة وفى نفس الوقت يقفلوا البنوك والجامعات والمدارس
يقولوا تطهير و محاسبة و فى نفس اللحظة يستدروا عطف الناس مع الشرطة و كأن الدم اللى سال كان بيبسى و مية
يقولوا تغيير واحنا هندعمه وفى نفس التوقيت يرفضوا يعملوا اى تحرك ايجابى عشان يردوا للناس حقوقها او يسمعوا مطالبها وسايبين الرووس الكبيرة مطرحها ومحدش بيهوب ناحيتها لأ والجديد بقى ان وزير البترول يطلع لسانه للناس ويقول مش ماشى ولا استقالة
مع ان كل الوزارة دى وكل روساء التحرير وبتاع الازهر وكل المسئولين على أى كرسى المفروض يقدموا استقالات جماعية ويورونا جمال خطوتهم ..لو كانوا نادمين
انما انتاى بتكلمى مين ؟!!!
لسه التشبث بالكراسى
ومحاولات حماية نفسهم قائمة
وللأسف
اللى بيحميهم ..
الناس بيجيلها ارتكاريا لما تجيبى سيرته وكأنك عاوزة تخربيها


للأسف هولاء لهم ناس موازية ف العالم الإفتراضى ..وحزنى ان راكبى المراجيح دول بيبعوا دماغهم ببلاش وبلا مقابل حتى

يعنى لما روساء الصحف حكومية مستقلة يبيعوا شرفهم المهنى ..
مفهومة
كله خايف ع المكاسب وعلى كرسيه وع الفضايح اللى هتظهرله ..
انما الناس العادية هنا ..
ليه ؟
مصلحتهم ايه ؟؟

مش فاهمة
بس مش عاوزة افهم
ومش عاوزة اشوف خلقة أى نفر فيهم صدفة ولو شوفته هعامله بللى يستحقه وهرفض مجرد القعاد او الوقوف معاه
لأنهم غير موثوق فيهم
وانا لا آمن على روحى معاهم
لأنى عارفة ان وقت الجد
مش هلاقيهم حواليا


ان شاء الله بكرة
ربنا ينصرنا وياخد بيدنا
انا سمعت ان الشيخ يوسف القرضاوى
هيصلى بالناس
ودى بشرة خير
وكل اللى له مطلب فئوى ولا عام ..
ان شاء الله ييجى
وربنا ينفخ ف روح الناس
ومتخلصش على كدا

اطن الكام يوم اللى فاتوا فهموا الناس كويس
ان التسويف والمماطلة مقصودة لخدمة السابقين
مش خدمة الشعب

وربنا كريم

وبتتأسفى على ايه يا فيدو ؟!!!
على ان عندك دم ؟!!

وبعدين يا بنتى انتى عرابية
يعنى براحتك قوى

وكمان انتى بتتكلمى صح
يعنى براحتك قوى قوى

واهم حاجة بقى
انتى حبيبتى
يعنى براحتك قوى قوى قوى

:)

سلامى لماما الغالية

ثقافة الهزيمة .. أنها حقا عائلة محترمة‏

فى 6 فبراير 2011 نشرت شبكة الأخبار الأمريكية CNN كشفت صحيفة الجارديان البريطانية نقلا عن محللين مختصين بشؤون الشرق الأوسط قولهم أن ثروة الرئيس المصري حسني مبارك بلغت نحو 70 مليار دولار، جزء كبير منها موجود في بنوك سويسرية وبريطانية، أو على شكل عقارات في لندن ونيويورك ولوس أنجلوس، أضافة إلى ممتلكات خاصة على طول شاطئ البحر الأحمر، وقال تقرير أن المصدر الرئيسي لهذه الثروة هو أطلاع الرئيس على صفقات أستثمارية حققت مئات الملايين من الدولارات لمصر، ولهذا تم نقلها إلى حسابات سرية في بنوك أجنبية، أو أستثمارها في البورصات العالمية والعقارات، وأكد التقرير أن علاء وجمال مبارك هم إيضا من أصحاب المليارات، ونقلت الصحيفة عن أماني جمال، أستاذة العلوم السياسية في جامعة برينستون، قولها أن ثروة العائلة تتراوح ما بين 40 و 70 مليار دولار، وهي أرقام تقارب ثروات بعض من زعماء دول الخليج، الغنية بالنفط...

باقى المقال ضمن مقالات ثقافة الهزيمة بالرابط التالى www.ouregypt.us

اقسمت عليك /ى بالذى رفع السموات الطباق ان لا تتجاهل رسالتى دا فى عنقك حتى يوم المحشر ابعته لغيرك وبسرعة لكن امنتك بالله لاذم تشوفه


http://www.youtube.com/watch?v=r3QqyuaJZ7Y


تانى لينك

http://213.251.145.96/cable/2008/12/08CAIRO2572.html

تالت لينك

http://www.telegraph.co.uk/news/worldnews/africaandindianocean/egypt/8289698/Egypt-protests-secret-US-document-discloses-support-for-protesters.html


رابع لينك


http://www.telegraph.co.uk/news/worldnews/africaandindianocean/egypt/8289686/Egypt-protests-Americas-secret-backing-for-rebel-leaders-behind-uprising.html



5-very impor...خامسة الرجل دا قاعد فى وشنطون امريكا؟؟!!! .


http://www.youtube.com/watch?v=PANW_J18z4Y&feature=related

6 ودا قبل يوم من النزول للشارع

http://www.youtube.com/watch?v=tX-6aN4uHoI&feature=related


وفية اكتر واكتر لكن اللى عاوز يشوف يدور ارجوا الاهتمام والقاء لو نظرة بسيطة

أولا: هو البوستات بتاعتك مش بتظهر ليه فى الريدر عندى؟
ثانيا: كده تروحوا إسكندرية من غيرى
ثالثا: فى أحداث الثورة أنا شوفت أيام طيييييين بس مش هنا.... فى سيناء
غير إن العرب كانوا بيضربوا نار ...وغير إنى كنت بصحى كل يوم الساعة خمسة الفجر وأروح مواقع فى وسط البحر بمراكب أو بهليكوبتر.... شديت مع مهندس هناك من مؤيدى مبارك بس بصورة مستفذة من بتوع ينفع تعمل فى أبوك كده.. بس الحمد لله عدت على خير بعد ما كانت حتتطور لخناقة ممكن تفسد العلاقة بين الشركتين... أصله كان مستفذ قوى

سورى
حاجة كمان مهمة
الثورة دى لازم كلنا نعرف إنها أول خطوة فى طريق الألف ميل
طريق بناء دولة عظمى
عندنا شغل كتير قوى قوى قوى
فساد تلاتين سنة محتاج شغل كتير قوى علشان الإصلاح

فاتيما حبيبتى عايزة اقولك انى عيطت اوى وانا بقرأ البوست بتاعك

بجد انتى قولتى كل اللى انا عايزة اقوله للناس اللى انا بردو عرفاهم نفر نفر وع رايك كلنا عارفينهم

عارفة لما قولتلك انا كل مرة كنت باجى عندك ابقى عايزىة اقولك انا قلبى واجعنى اووووووى

كان بسبب الناس دى

تصدقى اقسم بالله بجد مش متخيلة ازاااااى محدش فاهم اللى بيحصل ؟؟؟

ازاااااى محدش واخد باله انه ده كله ضحك ع الدقون ؟

وكان صعبان عليا جداااااا الناس اللى ف الميدان وانا كل يوم اسمع اللى تقول يارب تمكطر عليهم حجارة واللى يقول يارب يغرقوا مطرة لييييه ؟
وعلشان ايه ؟؟ واخدين ايه من الفساد والقرف

بس عرفت لما نزلت بعد الثورة بيوم البلد عندنا البلد المتخلفة دى بجد اللى ناسها كلهم وحشين وقلوبهم سودة اسود من الليل الكالح

الناس وحشين اوى يا فاتيما ورجعت بكيت تانى ع شباب مصر اللى راح ف الثورة بكيت المرة دى بردو الم ووجع

عايزة اقولك انى محبطة بشكل مبالغ فيه

كنت بفتكر ان القلوب هتنضف وتصحى ونبنى بلدنا بجد بنضافة بس للاسف مافيش فايدة يا فاتيما

بس قررت انى اتخذ اسلوب الزن ع الودان لحد ما اقدر اغير حتى تفكير اللى يدخل يقرا عندى وربنا يسهل يارب

بجد بجد بجد تسلم ايدك بوست رائع حقيقى كل اللى قولتيه صح

تسلمى لنا يا وطن القلوب الخضرا

انتى وحشتينى اوى بقه

ادعيلى كتير

بحبك انا اكتر ما انتى فاكرة وعارفة

فطوم
فين الاخبار ؟؟ الاصطبحات مش حترجع؟؟

احلى حاجة الواحد قاعد يسمع افكار جديدة ثورجية فعلا لتعمير الصحراء و تنمية مصر
الناس العوجيز بقوا جراءة فى العرض يظهر اتجراؤا من الشباب

اخر تعليق الى محلفك :-)
اغلب الى حطه شوفته من زمان من ايام الثورة و الانتفاضات
و عمر عقيقى يقولهم التلفزيون و يسيبوا التحرير الشباب يقعدوا فىالتحرير و بعديها بيوم يروحوا لمجلس الشعب :-) بيتهئلى نقطوه :-)

المقصود ؟؟؟ نشكر امريكا على انها عايزة تشيل مبارك قبل ما يجى يسلم على الرئيس الخمس و اربعين الامريكيانى لانه نقطهم بسمع الكلام؟ و لا شكلهم عايزين يوفروا ال1و نص بليون دولار :-) بسبب الازمة المالية
ماشى ياعم حنشكر بس بصراحة مش فاضية اشكر امريكا انا مستنية نص التعديلات الدستورية و حقى فى ابداء رائ
بص لقدام و اختار الى يحمى مصر من امريكا

بالمناسبة سعر الغذاء فى العالم كله حيغلى و الدول العشرين مش عارفين يتفقوا يمسكوه
عندى هنا فى اسعار حتوصل للضعف يعنى حنخس ثانى :-) عادى
يعنى ربنا معاكم ياللى فى مصر و بغض النظر عن الثورات
و شكل حنرجع لسيد درويش و شد الحزام

الغير معرف (1)
-------------

من غير حضرتك
ما تبعت تعليق
اكتر من مرة

نشرته اهو


:)

غير معرف (2)
-----------

ومن غير ما تقسم يا فندم

كنت هنشره والله

:)

أبوحميد
------

اولااااااااا
الريدر غضبان عليا يا باشمهندس
ومتآمر وبياكل كنتاكى


ثانياااااااا
كل نفر سافر اسكندرية
مكنش عارف لحد ليلتها
انه هيتفع يسافر



ثالثااااااا
الأستفزاز هو سيد المشهد هذه الأيام
يبدو ذلك


رابعااااااا
اللى بيبنى يا باشمهندس
مش لازم يمهد عشان يرمى اساس
واللى بيزرع مش لازم الأول
الأرض تتخلص من الضار فيها


متفقة على الشغل الكتييير
بس انا كل اختلافى
على جملة واحدة واحدة دى
والوشوش دى
والأفكار المتحجرة دى
فى مواقف ممكن تخلص بجرة قلم
زى اخراج المعتقلين
والغاء الطوارىء
وحل امن الدولة
وتغيير الوزارة
و ارضاء كل الفئات
(اشمعنى الشرطة اتراضت ب 100% ؟!!)

بس


ترجع بألف سلامة ان شاء الله

мαησηα
------

العياط غالبا لسببين

1) احساسك بالقهر لإخواتك الشرفاء
عارفهم او متعرفيهموش بالأسم

2) عشان قلب الملايكة اللى جايبلك الكافية دا ..
:)

متفقة مع كل كلامك
بس عاوزة اقولك منظرنا يوم الجمعة
كان مفرح ويشجع ويخلينا لا نيأس أبدااااااااا
البلد دى مليانة خير وناس حلوة قوى
اكتر بكتييييييير من الفاسدين والمنافقين و العملاء و الأغبياء والعمياء قلوبهم

البوست مجرد محاولة
لرد بعض جميل الناس اللى نزلت من يوم 25 ولحد دلوقتى وبكرة وبعده

انا كمان بحبك يا قلب الملايكة
اكتر مما تتصور

:)

Wanda
-----

صباح الفل يا ون ون

ناوية والله
بس براحة كدا وواحدة واحدة عليا
اصلى كنت مضغوطة الفترة اللى فاتت دى شوية

انا مقرتش اللينكات لسه
فمش عارفة ارد عليكى قوى

بس نظرية شد الحزام دى هتيجى على هوايا
عشان الريجيم
:)

انا عاوزة اسمع حلوة قريب
واتصرفى

:)

صباح الهنا يا ونداتى الحلوة

**************************************************************************************************************************************
و
××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××

sal
---

يا فندم انتا ع العين والراس
هوه انا اقدر

:)

تم التصحيح الفورى

ابراهيم رزق
-----------

حاضر يا هيمة

:)

بت خيخة واى كلام
--------------
حاضر

بس هرد عندك بقى

:)

هدي نفسك كده
:-)
ماعاش اللي يزعلك

وبعدين احنا في زمن الديمقراطية .. يعني لازم الناس تختلف معاكي وتتفهمي ان ليهم وجهة نظر بيتكلموا من خلالها

مش معنى ان أي حد بيقول كلام عكس كلامك يبقى من الأعداء

بس بجد عجبني عنوان البوست
:-)

فاتيما
طيب أنا زعلانة من حاجات في الثورة
وزعلانة إن حد يشيل حد دم حد
يبقى كدة حرام عليا
ولما بقول رأيي بشيله
يبقى حرام عليا؟
أنا آسفة!
آسفة لسؤالي
لكن فعلا
فيه حاجات زعلانة منها

زعلانة، من حاجاات كتيرة قوي فيها
يبقى حرام عليا
آسفة
بسأل بجد
لو عبرت برأيي في ده
يبقى حرام عليا بجد
فيه حاجات زعلانة منها
وكنت عاوزة نستقر
زعلانة علشان ناس ماتت، ومش قادرة أقول إني مش زعلانة علشان إهانة الرئيس
فعلا زعلت علشانه
بس كل ما بكتب، بشيل كلامي بجد
زعلانة لما بشوف مبنى محروق، حتى لو كان مبنى الحزب الوطني
وزعلت على الشباب
وزعلت ان حد يشيل حد دم حد
زعلت قوي
أنا آسفة
أبقى غلط في رأيي
لو عبرت
زعلانة يا فاتيما
لأن بعد ما الرئيس مشى
مش كل الشعب هو بس شباب 25

كدة يبقى حرام عليا؟
أنا آسفة!
آسفة لكن بسأل بجد
كدة يبقى حرام عليا؟
آسفة

غصب عن الواحد،لازم يعبر باللي حاسه، وبرضه يخاف على زعل الناس
بس لو عبر
يبقى حرام عليه؟

البوست ده لسه ظاهر عندي في الريدر النهاردة

إرسال تعليق