.

.

جــــعــلونى مـــدوناً ..... 2  

Posted by: فاتيما in




الااااااااااول

و قبل أى حــــاجة





بعد قراية الخبر عند نوارة و تتبع اللينك 
وقرايته والفرجة كويس ع الصورة 
تتنيييييحة  كـــدا لثوانى
يتبعها ذهــــول شوية 
والرغــــبة ف فــرك العين و التأكد 
و تكبير الصـــورة المنشورة 
ثم ... بعدها ابتسامة كبيييييييرة 
يليهم  ... احساس رااااائع 




رائع كلمة قلـــيلة جداااا
لما تبـــص بين الأسامى 
وتلاقى فجأة 
ناس بتحبها جدااااااا 
مكــــتوبين 
و لا كنت مستنيى و لا واخــد ف بالك
بس احلى مفاجأة بجـــــد




 
بس على فكــــرة بقى 
هيا مش مفاجأة ولا حــــاجة 
لأن الأسامى دى عملت شغل جامد 
من اول الثورة ما إبتـــدت 
ويمكن .. من قبلها كمان
ومنزلوش ع الكــــلام ف السياسة 
والتغيير وبكرة بتاع مصــر بالبراشوات 


لأ
 

د.ستيتة  من اول لحظة 
عملت غرفة عمليات و طوارىء
تتبعتها بتحليلات ..  لكل موقف و حدث



مهندس مصرى من بدرى 
بيقول و ينبه و لا يأس
مسبش فتفوتة وشاردة و واردة 
الا و نشرها قبل و بعد الثورة







اما البت خيخة .. فثورجية من زمااان
ضد الأوضاع الغلط و نزلت من اول يوم
و حدفتنا معاها ف قلب وجع 
الميدان و الثورة بحق و حقيق


 
التلاتة دول شخصياتهم عاملة فرق اصلاً 
من قبل أى حاجة 
وبالتالى فرقت كمان فيما بعد 
مكنتش مفاجأة ولا حاجة زى ما قولت 


الف مـــــبروك يا بشـــر
عليكو وعلينا 
و انا بالنويابة عن التدوين وأهــله 
بقولكم 






انتوا حاجة تفــرح قوى 
و رفعتوا راسنا قوى 
وكنتوا سند  لينا قوى
و سعيدة انى بعرفكم قوى  
و بحبكم قوى 
و علطول فخورة بيكم 
و النهاردة تحديداً 
فخــــورة بيكم قــوى قــوى قـــوى


و مــــبروك كمان 
لنـــوارة نجــم .. جبهة التهييس الشعبية
الألفـــة بتاعـــت الثـــورة تــدوينياً 
و الف مــــبروك 
لخالو احــــمد الصـــــباغ
و مــــبروك عموما
لكل اللى اسمه مكتوووووب
 




إختكو المتفشخرة بيكو 
و المنشبرحة جداااااا بسببكو 
ومدهولة على عينها ومش عارفة تكتب حاجة 
من كتر الفرحة بجـــد

  - فاتيما -
---------------------------------
دا لينك الموقع الأصلى عشان 
اللى الأنجليزى بتاعه مفترى 
وعاوز يدور براحته .. دوس هنا 
------------------------------------

This entry was posted on الثلاثاء, مارس 22, 2011 and is filed under . You can leave a response and follow any responses to this entry through the .

33 كــــلام بيطــبطـــب عـــلى قــــلبى و روحــــى

فاتيما
روح القلب الملائكية

مبروك عليكى و انتى فعلا من الناس اللى تعبت يا بنتى مدونتك من كتر اللينكات اللى كنى بتحمليها كنت بقعد نصف ساعة عقبال متفتح
متستغربيش انا واحد كنت رافض اعمل مدونة و عملتها اثناء الثورة دون تفكير و مش عارف بعد الثورة هاعمل ايه لانى محتار
كل سنة و انتى طيبة و كل الامهات طيبيين
اه انا لسه زعلان منك

تعرفي يا طمطومة
انا مافرحتش اوى بالخبر لما انتى سبتهولى عندى فى التعليق
انا رحت بمنتهى البرود شوفت اللينك علشان افهم الحكاية
ولما لمحت اسمى فى الصورة ابتسمت وخلاص

بس لما قريت بوستك دلوقتى
فرحت اوى اوى اوى
حسيت انى عملت حاجة كبيرة اوى او نجحت نجاح مبهر
بس المشكلة انى مش عارفة هو انا نجحت فى ايه؟
بس كنت مبسوطة وخلاص انك بتكتبي عنى بالفرحة دى
وفصلت نفسي عن نفسي
وقريت البوست بتاعك مرة تانية ولاقتنى اتمنيت انى اكون اى حد من التلات شخصيات اللى انتى كاتبة عنهم
واتبسطت اوى لما رجعت لحالتي الطبيعية ولاقتنى فعلا منهم


اصل مش مهم يكون اسمك مكتوب
ولكن الاهم مين اللى كاتب اسمك
فكلما زادت قيمة الكاتب
ازدادت قيمة اسمك

وانتى قيمتك غالية اوى يا فاتيما
فلما تكتبي اسمى بالفرحة دى
ده بيزود قيمة اسمى



عارفة لو فيه مؤشر عن اكثر التدوينات رفعا لمعنويات للمدونين
كنتى انتى هاتفوزى

عارفة
اوقات كتيرة اوى
وخصوصا ايام االثورة

كنت بحس ساعات انك ايد بتطبطب على كل المدونين


عارفة مش ساعات بتسمعى حكايات كدة ان ايام الحرب دايما تلاقى ست مشهورة بانها فاتحة بيتها علشان تطيب جروح المصابين وتأكل الجعانين وتخبى عندها الهربانين من الانجليز

عارفة الستات دول اللى بنسمع عنهم حكايات جميلة


اهو انتى كنتى عاملة كدة ايام الثورة
ويمكن كنتى عاملة كدة علطول
بس ايام الثورة بتظهر الحاجة بشكل اوضح

كنت بحس انك بتطيبى جروحنا وبتطبطي علينا لما خلاص نيأس ونعيط ونتوجع

كنت بحس انك بتزغطينا علشان نسترد صحتنا وننزل تانى نهتف بصوت عالى
الشعب يريد اسقاط النظام

كنت بحس انك موجودة اخر الليل بعد ما الانهاك يصيبنا
ونلاقيكى مستنيانا بكوباية الشاى اللى هاتدفي قلبنا

وبترتبيلنا فرشتنا اللى هنام عليها كام ساعة علشان بعدها ننزل ونكمل المشوار اللى بداناه و ماينفعش نتخاذل او اننا نسمح ان الوهن يتمكن مننا

انتى من غير ما تقصدي يا فاتيما
كنتى خير معين فى لحظات حالكة كثيرة



بحبك

خدي بالك من نفسك يا طمطومة



سلام

اختك خيخة

ابراهيم رزق
-----------

الله يبارك ف عمرك يا هيمة
وزعلان منى ليه بس ؟!!

منا معترفة ببإنى مخبوطة على قلبى بقالى مدة وعمالة بخطرف اهو قدامكو ..
وليس على المخطرف حرج

حقك عليا لو كنت مقصرة

وكل سنة وانتا بألف خير
والوالدة والمدام
وكل اللى بتحبهم

وعقبال مدونتك يا خويا
لما نصيتها كدا ونرقعلها زغاريط

:)

بت خيخة وأى كلام
----------------

بت يا خوخة
يخربيت تعليقك

الحمدلله ان المدير بتاعى مشى
والا كان هيشوفنى وانا بعيط دلوقتى
ويقول الست اتجننت

تعليقك عيطنى
لأنه حضننى
وحسسنى انى عملت اى حاجة
ف أى حاجة

انا بجد فرحانة بيكو قوى
فرحانة لأن احساسى ناحيتكو مش رد فعلى عاطفى تدوينى بحت
لأ
دا رسمى وموثق
بشهادة الشهود اهو
اللى ملهمش دعوة بحبكم ازاى
بس حسوا بتأثيركم
انتى تحديداً يا خوخة عاوزة اقولك
ان تاخيرك واختفاءك احياناً كان برضو له تأثير ورد فعل عند الناس

صمتك كان له معنى
كان بيخوفنا عليكى
ويخلينا نتأكد ان الفار اللى بيلعب ف عبنا دا .. مش وهم دا بحق وحقيقى وانتى فيكى حاجة ومكموشة على نفسك زى حمامة حزينة ...

انتى ليكى تأثيرك من زماااان
والحمدلله ان تم تتويجه بشكل فعلى
وبإحصاء رقمى بيعكس الواقع

انا فرحانة قوى عشانك بجد
وحاسة ان انا اللى اسمى مكتوب
فرحانة ان قلبى دليلى
و ربنا بيطبطب عليه
وتيجى انتى كمان يا خوختى بالتعليق دا تكمليها


بصى الست اللى بتحكى عليها دى
بتاعت حكايات الغريب دى ...
انا ازعم انها
د.ستيتة
بشحمها ولحمها وتدويناتها وتويتتها
ومشاركتها فى حاجات كتير على ارض الواقع والميدان ..

هيا اللى كانت حضن لينا كلنا
وتقريباً منمتش خصوصاً اول كام يوم
كانت غرفة عمليات حقيقة

محمد بقى كان التغطية الإعلامية الواسعة اللى لمت كل الأراء
والمعطيات و مفيش حاجة تقريباً الا وكان باعتها ع الميل او نشرها ف مدونته و عملت فرق اكيد بدرجات وهوه ماشاء الله زيك وزى ستوتة
محبوب من كل الإتجاهات
والناس

انا بجد متفشخرة ايما فخر بيكو يا بت وفرحانة قوى
ان اللى انعمل ببساطة وتلقائية ودون ان ينتظر احد فيكم أى حاجة
اتقدر واتشاور عليه كدا

انا كمان بحبك يا خوختى
قوى .. قوى قوى

ولو سمحتى عاوزة كمية بوسس رهيييييبة تنزل على خدود شيكو شريف شكشوكة بالمناسبة العظيمة دى ...
ممكن ؟

خلى بالك انتى كمان
من نفسك يا حبيبتى

احنا بنحبك وعاوزينك يا بت
يا خوخة ومش أى كلام ابداااااا




انا بطلت عياط وببتسم قووووى اهو
:))))

فاتيما

دايما كده قلبك طيب لحد ما بتخلي الواحد والله حاسس انه جعفر الشرير

لا عدمتك اخت لي ابدا
بحبك حب غير مشروط وغير متغير مع الظروف المناخية

عارفة يافافي
عمري ما كتبت هنا وحطيت عيني ان ده له سبب غير انه بيمتعني وبيخرج معاميع عقلي وربما كان ذا فائدة
يعني كل شوية كده اراجع اللي كتبته عله يكون في صفحات الحسنات الخالية

البونص بقى اللي هو حب الناس ده مكنتش اتوقعه بس سعيدة بيه برشا برشا
وبكل صداقة ربنا رزقني بها عبر هذا المكان

بونص ان سي ان ان تنشر عني حاجات نونو او أتصنف
والله ما خطر اساسا في عقلي وبحاول ميهمنيش علشان المزاج تبعي مبيحبش حد يراقبه:))

صنفوني ياأمه
إبنك عفرتو كبر وبقى بيتصنف يا أمه
ههههههههههههههههههههههه

شكرا يا فافي
وكل سنة وانتي فاتيما
طيبة وصافية زي عسل النحل
--------------------------
ده تعليق ما قبل بوستك اللي كله مشاعير
بعد بوستك اللي كله مشاعير
انا speechless

دعوات من قلبي الجامد جدا لرب العالمين ان يكرم ويرحم ويعلي ويراضي قلب رقيق كما الفراشة الملونة
رقيق ورؤيتة طيبته تعطي الأيام شكل وطعم ولون وموسيقى كمان وترسم ابتسامة

بحبك

ازيك يافاتيما

اكيد يستحقوها بجد
مدونين رائعين من زمان اصلا
واعمل بقي زى الدكتورة
يارازق الزهرة في حضن الجبل من فوق

تحياتي

كل سنة وانتى طيبة يا ماما فاتيما ^_^

اللي فهمته أن التلاته وفقا لشئ ما طلعوا من الأوائل

صح؟

هتكلم عن اللي أعرفها

ستوته طبعا

اللي عمل الاستطلاع دا زي المعلقه الفاضيه أتحطت في قدر ملئ بالطيبات فنالت منها

ماشي يا باشا

هههههههههههههههههههههههههههههه

وهو فى ايه انا كل ما ادخل حته افضل اعيط واضحك زى الهبله كدا

اكيد العيب فيكم صح صح ؟؟؟

ههههههههههههههههههههههههههههه

مبروك الف مبروك ليهم علشان شرفونا وحسسونا بقيمه اللى بنعمله بجد

وبما انى اعرف خيخه وستيته بشكل شخصى
بين قوسين بتفشخر يا تيما

فانا مش مستغربه لانى عارفه كويس اوى ايه اللى فى عقلهم وقلبهم

تعرفى جالى احساس غريب دلوقتى كان اسمى انا اللى اتكتب ههههههههههههههههههه

ربنا يجعل كلامهم كله فى الحق وللحق
ويحميهم يارب كلهم

ويفرح قلبك زى ما انت مفرحه حبايبك يا تيما

تصدقي بالله
إنتي شخص جميل بجد
و قلبك طيب حقيقي
الله يفرحك كمان و كمان زي ما فرحتينا و فرحتي لنا يا أم يوسف
أنا والله قريت الخبر من عند نوارة و فتحته في الأهرام و ما دققتش في الصورة
لكن بعد تعليقك كتبت بوست عن النتيجة دي
أمال لو كنت في مصر بقى كان حصل إيه ؟
دا ما تعرفيش لهفتي قد ايه على الثورة اللي عشت عمري كله احلم بيها و لما قامت ما عرفتش اشترك فيها فعلياً لظروف الغربة


ألف شكر ليكي يا فاتيما على البوست الجميل ده
و مبروك للدكتورة ستيتة و لنوران الخيخة و للصباغ و نوارة و لكل المدونين المحترمين اللي بجد
اللي بوستاتهم كانت صورة للثورة المصرية على بلوجر

مساء الورووود فاتيما
انا كمان هقولك زي نوران ...اقصد خيخة...يعني المهم عندي مين اللي كتب واحساسه بيا اية ..؟
زي ما تحبي تسمعي اسمك حد معين بينطقه ومتطقيش تسمعي اسمك من شخص تاني
اممممم
بستني دايما كلامك وبحبه اووي لانه بيحسسني اووي بحاجات كتير حلوة
بحبك وبتمني اشوفك قريب وعلي خير
احنا هنبقي متواجدين في القاهرة الايام الجاية كتيييير ...
يا تري هتيجي فرصة ونشوفك...؟
بحبك

انا خلصاااااانة م التعب
وداخلة انام ..

بكرة ان شاء الله
هرد بذمة بقى

بس مؤقتاً
منورررررين


ملحوظة على جنب
انا حبيت البوست
دا وانا بكتبه ومتلخفنة م الفرحة
وبعد التعليقات اللى فيه
حبيته اكترررر

ربنا يخليكوا ليا

:)

السلام عليكم ورحمة الله وبركاته
الحقيقه لما بدخل عالمك ببقي عاوز اقفل كل حاجه حولايا عشان اركز في العالم الجميل دا وببقي مستمتع باسلوبك وروحك الجميله كنت داخل اقول لحضرتك ان مش ناسييكي و يارب يستجب دعايا ليكي ويحفظك أم جميله برقيها و كرمها و احساسها الراقي دايماً وكلمة الحق تعيشك دايما يارب .. كل يوم وحضرتك طيبه وكل امهات المسلمين

مبروووووووووووووووووووووك
يا مدونين ياحلوين وبجد حاجة تفرررررررررح(:
لولا

بخخخخخخخخخخخ
عادى ولامستغرب للحظة
سواء ترتيبهم أو حبك ليهم وفخرك بيهم
إنت انسان رائع جدا يا فاتيما وحنينه فوق الوصف
بجد كلام خيخة صح إنت القلب الحنون اللى كان بيساعدنا قت الشدة ويخلينا نضحك وحتى قبل الثورة
أنا فاكر قبلها بأسبوع كنت رايح امتحان أول مادة وبالليل دخلت على لتدوينات عندى وقريت تعليقاتك وضحكت كتييييييييير جدا وكنت فرحان ودعيت لك قبل ما أنام
وبعد الثورة وأثنائها كنت بأدخل عارف إنى هألاقى نبض المصريين هنا بقلوبهم الصافية وروحهم النقية وخوفهم على كل الناس
إذا كانوا هم روح الثورة ووقودها فإنت كنت قلبها النابض بحب كل انسان مصرى بيحارب فى الشارع علشان البلد

مش عارف أقول إيه بصراحة
جوايا كتير
والكلام صعب يوصفه
بس ربنا يجزيكى خير ويحقق كل أحلامك ويقرب البعيد ويرجع لحضنك أغلى الناس على قلبك

بس برضه لسه على موقفى من الجمعية

ستيتة حسب الله الحمش
-----------------

بصى يا ستوتة

انا كمان اسمه ايه سبيشلش دى برضو
بس عارفة كمان انك صادقة ف كل كلمة

على فكرة
انتوا التلاتة السكر نباتة وحاجة شربتاتا يجمعكم مشتركات كتير


1

بتعملوا اللى بتعملوه عن نية طيبة


2

مش منتظرين شكر وهتاف و شكرانية

3

الناس بتحبكم ف الله

4

جمعتوا حواليكم ناس من شتى المذاهب الفكرية والقلبية ...
ودا شىء نادر يحصل الا لأن فيه جهد مبذول يوم ورا يوم عشان تكونوا كويسين مع كل الناس مش اللى بيوافقكم وبس ودى مسألة صعبة جدا
متجيش الا لما اللى بيقرى او يقرب منكم يحس بالصدق الحقيقى مش الرغبة ف التميز و الشهرة الخ الخ الخ


انا معرفتش اكتب بوست يليق بيكم من كتر لخفنتى ودهولتى
وان شاء الله تتعوض فى بوستات قادمة
لأن الإخلاص بتاعكم لا أظنه سينتهى
ابدا ان شاء الله

انا كمان بحبك يا ستوتى

و حاسة ان اسمى انا اللى مكتوب والله

Haytham Alsayes
-----------------

ازيك انتا يا صاحب الفردوس ؟

والله يا هيثومة هما المفروض لو بيدوا مراكز لأكثر التعليقات تأثيراً .. تبقى انتا م المراكز الاولى يا بنى

عشان تعليقاتك كانت حاضرة تقريباً فى كل المواقف ودايما معاها لينكات لفيديوهات ومقالات و صور
وكنت شغال مراسل ف احيان كتير
و حريص تبقى همزة وصل طول الوقت وترفع من روح الناس المعنوية
ولو انتا مش واخد بالك انا اقولك يا عزيزى لإن تعليقاتك كانت بتفرق معايا انا شخصياً وتخلينى احس انى مش لوحدى وفيه ناس رومانسية ثورية طحن زى حالاتى ....

عقبالك يا سيدى لما نصيتلك
ونسيحلك ع البلوجر
كريبااااا ان شاء الله

:)

عمرو فكرى
--------



وانتا بألف خير يا عمرو
فيك الخير يابنى والله
منحرمشى منك


بس تعالى هنا ..
يا شاب انتا قولى
انتا طيب قوى كداازاى ؟!!

مصرى جدا
--------

ازيك يا سى موخيخ
وفقاً لمحرك بحث سعادتك بيقول ان مدوناتهم كان عليها دخول كتير وان لها تأثير طول مدة الثورة ...
وانا بحاول اجيب لغة العصر دى عشان اشوف اصل الحكاية وربنا يسهل والاقيها

كلامك عن ستوتة اكيد كله موافقة
وانا وغيرى متأكد ان اللى بينكتب ف مدونتها غيض من فيض ف الحياة الواقعية وانها فعلاً نموذج كدا تحتذى بيه اى واحدة بيسعدها الحظ وتدخل عندها ....

وعقبال كرينكلك اللى لو حصل على مركز يبقى ف كم الكوب اللى بيتحدف ع المدونة دى ....

وش مطلع لسانه

richardCatheart
--------------

ياااه يا قطاقيطو !!!

بقالى زمن اسمك منورش صفحة التعليقات كدا ...والحمدلله احنا زارنا النبى النهاردة

انا حاسة بيكى يا بنتى والله
لأنى ازبهليت قبلك
والله احساسى كان زى ما شوفت اسمى ف كشوف الناجحين ف الثانوية العامة وانا قولت هروح لأمى وابويا بخيبة امل اذ الاقينى من الناجحين بجموع مش بطال وداخلة مرحلة اولى كمان

نفس احساسى وانا ببص ف الصورة كدا واكبرها والاقى اسم ستيتة وخيخة ومحمد
فرحت جداااااااااااااااااااا
وكأن إسمى انا اللى مكتوب
واسمك واسم كل الناس الحلوة
لأنهم بيمثلونا فعلياً
وحتة مننا

عقبال كل اللى بنحبهم

متقطعيش التعليقات بقى
انا ما صدقت
:)

مهندس مصرى
-----------

الاول

الناجح يرفع ايده

رفعتها ولا لسه ؟!!

ايوه كدا

انا كمان يا محمد لما قريت الخبر عند نوارة مخدتش وأديت وعادى لأنها فعلا اكتر حد أثر ف مسار الثورة تدوينياً بالفعل ... بس جالى فضول اعرف مين تانى فرق مع المدونين او الناس العادية حتى اللى عملت سيرش بالصدفة فدخلت ع المدونات ...
لقيتك ولقيت ستيتة وخيخة والصباغ
فقلبى اتنطط م الفرحة عشانكم

انا عارفة انك لو ف مصر
كان زمانك رابض ف التحرير م اول ليلة يا بنى ومش محتاجة سؤال

وعارفة ان وجودك بعيد على عينك
بس انتا كنت قريب باصرارك انك تفضل سى ان ان التدوين وعرضك لكل الاراء والإتجاهات بلا كلل او ملل او يأس من أى حاجة ...

انتا كل الناس بتحبك يا جدع
وربنا يحبب فيك خلقه
كمان وكمان

ومتشكرنيش يا محمد انتا زى ماجد
و ماجد لما بيقولى شكراً.. بتوجس خيفة واقوله هات م الآخر ..
وقول عاوز ايه ؟!!
مش متعودة انا اخويا يقولى شكرا
!!!

عقبال ما اكتب اسمك دايما
ف الأفراح يا رب
:)

re7ab.sale7
-----------

مساء وصباح الورد والبنفسج يا رحوبة

والله يا رحاب ربنا عالم انا بحبكم قد ايه وبفرح زى ما اكون بفرح لنفسى ويمكن أكتر
انا كتير بحس اننا بنكمل بعض
يعنى خيخة فيها الحماسة واللسعان اللى بحبه لنفسى
د.ستيتة فيها الصداقة والامومة والأنوثة و الذكاء والإحتواء سوا
محمد فيه العقل والتدين الحقيقى والإيجابية والتواصل
كل حد فيكم بلاقى فيه صفات بحبها
وبحس اننا كلنا لما بنتلم سوا بنبقى قوة اكبر واكثر تأثيراً فينا وفى روحنا وف الأخرين
ولما بلاقى لكدا صدى من الغرباء اللى ميعرفوناش ...بفرح اكتر

وعقبالك يا ستى
وان شاء الله نعمل لقاء قريب
ونشوفكم على ألف خير يا حبيبتى

:)

مونتى بوكيه ورد
--------------

وعليكم السلام يا مونتى يا جميل القلب
أفضل ارفع ف نعنوياتى كدا لحد ما تعرفوش تكلمونى بقى
كل سنة وانتا بألف خير يا عزيزى
ومنحرمشى منك

بس انا زعلانة
:(
فين بوكيه الورد الحلو بتاع كل مرة ؟!!
ولا تعليقك ف عيد الام بتاعى هيبقى اورديحى كدا ؟!!!

:)

كل سنة وانت طيب

لولا وزهراء
----------

الله يبارك فيكى يا لولا
عقبالكن يا بنات
:)

الأزهرى
-------

شوف يختى الواااااد

مفيش فايدة برضو
لازم تيجى ف الآخر وتروح ضارب كرسى ف الكلوب برضو !!!

هوه الكلام الحلو بيقرصك ّولا صعبان عليك تكمل فاصل الحنية للنهاية ...
يا لهوووووى ع الرجالة وسنينها
حلال فيكو الجمعية و انشطتها

وتعليقات ايه ياخويا اللى ضحكتك دى و قلب نابض وابصر ايه ..
خدت ايه م الكلام دا
انا عاوزة حقى ناشف
مشفناش منكو ابيض ولا اسود ف المدونة دى ولما تشوفونا بتقلبونا ف المصاصات بتاعت العيال كمان ...

ال بتضحك ال

ماشى ماشى
يلا نعمل الخير ونرميه البلوجر
وخلى بالك
انتى دعيتلى ربنا يحققلى احلامى
ومن هذا المنطلق انا بتمنى يا رب
الواد زيزو يتجوز ونفرح فيه وبيه
قادر يا كريم

ماشى

عشان تبقى تدعيلى بعد كدا

:)


م ن ح ر م ش م ن ك

انا اساشا مكتئبه من كام يوم

وبسببك اتبسطت

مامي بجد فرحانه ليها اوي وليكي

يارب ماانحرمشي منكم ابدا

وعياط فرح:)
دي حالتي ناو

السلام عليكم

انا عارفه اني مقصره معاك في التعليق والمتابعه الفتره اللي فاتت ولكن ده كان لظروف :)

عندي بوست وطلب مهم ارجو المساعده فيه :)

http://mal2atlhash3noan.blogspot.com/2011/03/blog-post_24.html

عمرو فكرى
---------

:)))

sony2000
--------

ومين سمعععععك يا سنسن
كلنا هذه السخصية المكيتئبة يا ماما
ومفيش منها مهرب
لولا شفت الخبر
ولقتنى فرحانة زى العيال وبكتب البوست دا وانا اللى يشوفنى رايحة يفتكرنى جاية من كتر الإنشكاح ...

ربنا يكتر التدوينات المماثلة
يا رب

روقى يا سنسنتى
محدش واخد منها حاجة

والبوست الجاى هروقكم ان شاء الله

بوسات وحضونات يا شقاوة

فتاة من الصعيد
--------------

ازيك يا مروة
معلش ولا يهمك براحتك
انا عارفة ان كان عندك برد وكدا


بالنوسبة للبوست بقى
فنا قريته
وقريته كمان عند نوارة هوه
وكل اللى فاتو ولم اتحمسله بالمرة
وما زلت عند رأيى ولهذا بعتذرلك
انى مش هشارك فيه
وليا أسبابى وتتلخص فى انى
معترضة على الجهة المرسل لها الطلب
ومعترضة على المنوط بيهم رعاية الطلب
ومعترضة على رد فعل نوارة مؤخرا تجاه الأحداث الجارية بجانب هذا الطلب
ومعترضة على اسلوبها ف عرض الطلب
والتذكير تانى بهذا الطلب

واخيراً معترضة
على انه اصلاً يكون .... طلب
وينطلب بحملة توقيعات
وكأننا بنشحت او بنلم تبرعات

دا حق

كان يجب تنفيذه
من 12 فبراير الماضى
واحنا النهاردة 24 مارس
ولا حياة لمن تنادى


اولى الامر ف هذا البلد
همتهم عالية ف تحديد معاد الاستفتاء
و فض الإعتصامات ف التحرير والجامعة
و كهربة الولاد و بهدلة البنات
و ف تشريع قانون يمنع اى تجمع
او اضراب او اعتصام فئوى ...


بينما بيحتاج وقت ويتأنننننننى ف القبض على الديناصورات
والقراصنة والمجرمين
ومحاسبتهم
ويتأننننننى فى اجبار الشرطة على حماية الناس من الحرامية والبلطجية اللى ماليين الشوارع ...
ويتأننننننننى ف عمل دستور جديد بحجة الوقت ...الخ

مع هذا التناقض الصارخ
انا لا أثق فيهم كجهة اقدملها طلباتى وانا مطمنة انها هتلقى استجابة
لأنها اصلا حاجات بديهية كانت يجب ان تتم من بدرى بعد ان بح صوتنا كل الوقت و ف كل مكان وكل جمعة عشان نطالب بيها
بس اصل الإستجابة
فيها نقاوة
لناس وناس
لحاجات و حاجات
وهكذا


الملخص عشان اكون شرحت سبب رفضى
مبقاش قولت لأ
وخلاص


ومتزعليش منى يا ريت

وربنا يوفقكم ان شاء الله

بتهيألي إن صحاب المدونات اللي أساميهم موجودة مش هيفرحوا بالخبر أدما هيفرحوا بفرحتك الجميلة بيهم دي. انت بجد جميلة أوي :). أنا كمان فعلا فرحت رغم إني مش أعرف حد فيهم شخصيا. أينعم شفت خيخة، بس هي حتى مرةواحدة وزمانكم كلكوا نسيتوني لأنه كان من زمان أوي

جيت هنا بس عشان أسلم عليكي بس لقيت البوست دة :).مبروك لنوراة اللي بجدبجد تستاهلها أوي من غير مناقشة. ربنا يتقبل منها تعبها دة كله اصلا

وليكي.. بس بقوللك انت جميلة أوي و فعلا وحشاني يا تمتومة

فاتيما

على فكره مجتمع التدوين وثقافته وحريته هي اللي عملت الفيس بوك

إرسال تعليق