.

.

الله يخــربــيييييت اللى حــدَفَكْ عــليا  

Posted by: فاتيما in




----------------------------
 مشهد (1) اول مـــــرة
-----------------------------



جمال عبدالناصر رئيس لمصر

 

جمال عبدالناصر : أصل انا لقيت الدنيا شايطة 
وهوه ساكت ومهاود و لابد ف الدرة
قولت أجيبه أهو يسد خانة
وأقرف بيه ناس تانية انا مش عايزهم يمسكوها
 
-----------------------------------
الرئيس جمال عبدالناصر فى ذمة الله 
ومحمد أنور السادات .. رئيساً للجمهورية
بمباركة قوى خارجية و تصفية الخصوم 
وبسط نفوذ و التلميع داخلياً و الجيش معاه
----------------------------------- 
 
الشعب المزبهل : يا نهار أسوووووود 
بقى هوه دا اللى ف الأخر يحكمنا ؟!!
  
--------------------------------------
من القـــبر 
عبدالناصر : سامحونى مكنش قصدى
---------------------------------------
 

الشعب ف سره : منه لله اللى حدفك علينا









----------------------------
 مشهد (1) تـــانى مـــــرة
-----------------------------


أنور السادات رئيس لمصر





أنور السادات : أصل انا لقيت الدنيا شايطة 
وهوه ساكت ومهاود و لابد ف الدرة

قولت أجيبه أهو يسد خانة
وأقرف بيه ناس تانية انا مش عايزهم يمسكوها
---------------------------------------
الرئيس أنور السادات فى ذمة الله 
ومحمد حسنى مبارك .. رئيساً للجمهورية
بمباركة قوى خارجية و تصفية الخصوم
والتلميع داخلياً و الجيش معاه
---------------------------------------

الشعب المزبهل : يا نهار أسووووووود 
 بقى هوه دا اللى ف الأخر يحكمنا ؟!!



-----------------------------------------
من القـــبر 
أنور السادات : سامحونى مكنش قصدى
-----------------------------------------


الشعب ف سره : منه لله اللى حدفك علينا



----------------------------
 مشهد (1) تــالـــت مـــــرة
-----------------------------

حسنى مبارك رئيس لمصر 



حسنى مبارك : أصل انا لقيت الدنيا شايطة 
وهوه ساكت ومهاود و لابد ف الدرة
وإنتوا رخمين و مش عايزين جمال ...
قولت أجيبه أهو يسد خانة
وأقرف بيه ناس تانية انا مش عايزهم يمسكوها

-----------------------------------
مبارك يتخلى بالغصب عن المريسة
ويرمى التخلى ف وشنا .. ويهج
و أحمد شفيق رئيس وزراء لمصر 
ما قبل الثورة و بعدها 
متفهموش تيجى ازاى !؟
لكن تحصل برعاية قوى خارجية ... دوس هنا
و بيتلمع داخلياً و حتى هذه اللحظة...
الجيش معاه
------------------------------------------- 

الشعب المزبهلللل : يا نهار ولــــيل

لونه أسود م البلوفـــر 
مبقاش فاااااضل 
غير دا اللى هيحكمنا ؟!!
--------------------------------------

من شـــرم 
حسنى مبارك : قاصـــد وان كان عاجبكم
--------------------------------------



الشعب يرقع بالصوت الحياااااانى : لااااااااااااااااااا بقى
و حياة الست الوالـــدة 
سؤاااااال وعايز إجابة 
هوه إحنا عملنالهم إيه ؟!!
عشان كل واحـــد قبل ما يتكل على الله
يرميلنا نصـــيبة .. ويمشى
بجــــد 
لأ بجـــــــد يعنى
هيا القـــصة دى ملهاش آخــر
؟!!!؟؟؟!!!؟؟

------------------------------------------

 
هتاف الجمعة الجاية
      
الشعب يريد إسقاط البلوفـــر


----------------------------------------

تحدييييييث (1)


صباح الخير 
والحرية والكرامة 






متهيألى كلنا شوفنا الفريق شفيق امبارح
فى قناة اون تى فى
ومعاه الجميل علاء الأسوانى 
و ضى القناديل .. حمدى قنديل
انا للأمانة مشوفتش الفقرة كلها 
لأنى كنت تعبانة وروحت ف النوم
بشكل عجيب 
بس النهاردة وانا بلبس .. وجاية الشغل 
سمعت اجزاء ع اليوتيوب





وإيه دا ؟!!!!
إييييييييه دااااااااااااا ؟!!
مش حد ينبهنى قبل ما أسمع عشان 
اخد قرص مهدىء وحاجة للضغط واتنين ريفو





إيه داااااااا ؟!!! 
الراجل دا قاعد لحد دلوقتى ازاى ؟!!



البلوفر 
هوه السر ف البلوفر 
دا اللى مسكتنا عليه  لحد دلوقتى 
كان عاملنا فيه عمل باين ومخبيه 
تحت الكم اليمين 





بس امبارح خلاص 
يا حلو بانت لبتك 
بعد ما قلعت البلوفر 
و لبست جاكتتك 



إيييييييه داااااا ؟!!
ايه كم التسويف ف الكلام 
و التتويه للى بيسمع  ؟!!
والتنغيم ف الكلام والرقة والخضوع 
وقت الكلام عن الاخطاء 
والزعيق والحمقة وعرق العسكر يتنفر
وقت سرد الأنجازات





وإنجازات اييييييييييه ؟؟
الله يخربيت ام دا مطار اللى هيذلنا بيه
نروح بشوم نهده يعنى
ونسافر بعد كدا بجمال وحصنة ؟!!






هوه دا مش كان شغله 
وبياخد عليه مرتب ؟
بيتفضل علينا بإنه أدى عمله كويس ؟
احنا مش كنا خلصنا م النغمة دى
بتاع سيدكم و تاج راسكم واحمدوا ربنا عليا 
ولا النظام القديم هوه هوه 
و لسه حاجتى عند جارتى 
مرجعتش






وبعدين ايه نظام التخبيط فى مبارك دا ؟
هيا حبوب الشجاعة استنت
تجميد ارصدة مبارك 
عشان تبتدى تعمل مفعول ؟!!




وايه نظام مبارك ملوش دعوة بطلعاتى الجوية 
يا نهاااار اسوخ 
انتا كمان ليك طلعات وهتطلع بيها عينا
  و تجبى علينا انتا روخر ؟!!
بتتفضل علينا بقيامك بواجبك كطيار  ؟
و بتمن علينا بأداء مهامك كريس قوات جوية ؟؟
يا لهووووووووى 






الله يخربيت كدا كرهتونا ف الطيران 
والطيارين والطيارات
يا ريتنا كنا خسرنا الحرب يا رب
وإتذلينا م الأسرائيلين ولا إتذلينا منهم
كانت تبقى مبلوعة 




وايه نظام اللجان الشعبية دى ؟!!
هيبقوا زى المجلس المحلى كدا بعد شوية 
ولهم نفوذ  مش كدا ؟!!
طب مين بقى اللى هيختارهم ؟!!
والقضاء راح فين بتتجنبه ليه بشدة 
ولاّ عشان نظام شريف وعاوز يستقل  ؟





وتيجى تكلمه عن فساد امن الدولة 
يدخلك ف الواجب الوطنى للجهاز
تكلمه عن المحاسبة ع الأخطاء 
يقولك خلاص 
هما معايا هيبقوا حلوين وشاطرين
ويغسلوا سنانهم وهيشربوا اللبن 
وهيناموا بدرى



علاء الأسوانى يقوله ام كل شهيد
بتسأل 
من قتل ابنها ؟
تطنييييييش رهيب 
ولا كأنه سؤال ومطلوب اجابته بضمير 




ودخلنا فى قصة 
انا مش وزير سياسى انا تكنوقراطى 
وانا عملت وسويت وانجازاتى و مطاراتى 
وشوية شوية كان هيقول .. يحز فى نفسى





والا لما إتسئل عن الرقم القومى والإنتخابات 
رمى الكورة ف ملعب القوات المسلحة
وعامل مش عارف
شغل حاورينى يا كيكة 
و التنويم شغال يونيفرسال 





لأ ..اظن اللى لسه عنده ذرة امل
ف هذا الراجل ووزارته
يسكت خالص وميفتحش بوقه
دى الطينة م العجينة 
وهوه هواه نفس المضمون والتجمد
والصلف و الغرور والمن
ونظام .. اعمالى وشغلى وسمعتى 
و حبة وكان ناقص يقول 
أنا المجد .. أنا المطار ... من إنتم ؟




الطف حاجة سؤال ريم ماجد عن البلوفر
وضحك كل الموجودين ف الأستوديو
و كمان ضحك البشر كلها قصاد الشاشات 
ف كل مطرح ف العالم بيتفرجوا
اللهى يحظك ويسعدك يا عادل  
يا فاشش غلنا يا بنى 






ملحوظات سريعة ع اللقاء 
ريم ماجد مميزة  ويا رب متصدمش فيها 
دى ماتصدمت ف منى الشاذلى كدا
يسرى فودة كان مهدى الجو كدا ليه؟؟
ساويرس .. موقفه لم يختلف ف نظرى 
عن زمان.. رجل اعمال وفقط 
مصلحته المهم والتهدئة والموائمات 
و انا مش شيفاه مع الثورة و لا نيلة 
معرفش ليه غيرى شايفه كدا ؟!!
حمدى قنديل متكلمش كتير صحيح 
بس صمته كان فى أحيان .. بلاغة
علاء الأسوانى .. نور من انوارنا 
ثابت ولا يهادن .. ذكى وتنطبق عليه 
مواصفات المؤمن .. الكيس الفطن 
الراجل دا بتمناه  بجد يكون وزير الثقافة
عشان هوه احسن واجهة لمصر و شعبها






اخيرا ... بكرة الجمعة 
حدثين مهمين .. التبرع بالدم والميدان 
انا مش هقعد كتير يا جماعة ف التبرع 
سامحونى معلش 
هفضل ساعة ولا حاجة 
وبعدين نطلع ع التحرير 
اللى ناوى ييجى معايا .. ماشى 
من بدرى يكون موجود .. من عشرة يا ريت 
عشان نلحق نروح ونلاقى مكان مناسب 
ونلحق نسمع الخطبة وكدا



و الهدف اسقاط الحكومة برئيسها 
ووزراء عدلها وداخليتها وخارجيتها 
وقواها العاملة .. الخ الخ


وياحنا يا البلوفر ف البلد دى


اشوفكم على ألف خير بكرة 
ان شاء الله


--------------------------
تحديييييييييث  (2)
---------------






الف مبروك يا عياااااااال 
شفيق يا راجل مشى 
 وانا عمالة اكتب ف يافطة نصها الآتى
شفيق يمشى .. البلوفــر لأ 
كدا ضيعوا عليا الأفيه .. منهم لله
ماشى ماشى  فداكى يا مصر 







ولا يا عاااااااااااااااادل 
يا بركاتك يا سيدنا 







بالنوسبة لعصام شرف بقى 
من مصادر مقربة منه .. حد من دفعته
وزملاء له فى كلية الهندسة 
الراجل دا نضيف جدا ومحترم 
وزميله لما قولتله الخبر 
قالى حرام ..صعبان عليا 
دا طيب واخلاق ..هيمشى مع الغجر اللى م النظام القديم ازاى ؟!!
والعهدة على الرواى
انهم عينوه وزير للنقل
بعد حادثة قطر الصعيد الحزينة
فلما ابتدى يشتغل و حاول يرفع الحراسة
عن النقابة بتاعة المهندسين 
اتشال عشان معجبهموش موقفه الوطنى
يعنى لما لاقوه محترم كدا .. لفظوه
يبقى خير اهو 
عمومااااا ننام بعين مفتوحة 
والتانية مغمضة 
لو جايبنه للتهدئة وبس .. هيبان 
و لو هوه كويس جدا زى ما بينقال عنه 
نسانده  و نطالب انه يقعد كمان 






بالنسبة لسؤال بكرة الجمعة 
هنعمل إيه ؟؟؟
فاكرين لستة المطالب ؟
هيه خلصت ؟!!!
لسه مخلصتش سيادتكم 
يبقى بكرة .. نقف نطالب بالباقى
ومنزهقش ولا نيأس 
و ما ضاعت ثورة .. ورائها متظاهرون
و أهو بالمرة نحتفل بإستقالة البلوفر 
ونطالب بتجميد خيوطه وتسليمها لعادل 
:)




---------------------------------------


أنا الشعب لن اعيش فى بلوفر أب ..د.ستيتة
صباح الرحيل .. من كل بستان زهـــرة 
إستقالة شفيق .. الأزهــــرى 
مبروووووووووك استقالة  ..يوميات شاب منوفى
عمرو البحيرى كان معايا ... نوارة نجم 
هيا إلى الميدان ... بلال فضـــل
عمو شفيق بتاع البومبونى .. أسامة غريب 
ليس بالبلوفر وحده يحيا الإنسان ..وائل قنديل 
وجدى الحبوبّ ..محمود مسلم 
اللهى يولع فيكم يا بعدا 
لأ ..ال 47 مليون دول علشان يأكلونا بيهم الاونطة
تنظيم العبث ... احمد الصاوى
لماذا يجب الغاء مباحث امن الدولة..محمود قطرى
أسباب للخروج يوم الجمعة ..عمر طاهر  
دعوة للضمير ... محمد المخزنجى 
حول الوضع الراهن ..عنــبر العــقلاء
لا وقت للإكتئاب فيه حل .. نوارة نجـــم


--------------------------------

This entry was posted on الخميس, مارس 03, 2011 and is filed under . You can leave a response and follow any responses to this entry through the .

41 كــــلام بيطــبطـــب عـــلى قــــلبى و روحــــى

لالالالالا
المشهد بإذن الله تعالى له نهاية
ونهايته قربت جدا كمان

ثلثة أخبار فى غاية الجمال والنصرة على الفساد عندنا فى العياط
وأد الفتنة الطائفية
استرداد الأرض اللى خصصت للشركة الكويتية واللى كانت واخدة الظهير الصحراوى بالكامل تقريبا مما يعنى الإختناق
الإتفاق على تجميع لجان العمل المنفصلة على مستوى المركز فى ائتلاف واحد يتحدث ويتحرك باسم العياط

بجد الموضوع كان عامل لنا مشاكل كتير وخاصة واحنا بنحارب الرقاصين بتوع الحزب الفاسد لكن بفضل الله تم على خير

وربنا يستر الأيام اللى جاية فى باقى المشاكل على مستوى مصر كلها

السلام عليكم..ازيك يا فاتيما أنا عايزة بس أوضح حاجة مهمة عندك و يا ريت لو اتأكدي منها تنشريها بسرعة الانتخاب بالرقم القومي..لكن يجب تسجيل اسمك بالقوائم الانتخابية و ذلك بالتوجه الى القسم التابع له و تسليم صورة لبطاقة الرقم القومي...أخر ميعاد 9-3 !!!! أنا لسة جاية من القسم و سألت المسئول ليه مش بتعلنه عن ده..بصلي باستهزاء قالي يمكن يمدوها شوية ميين عارف؟؟

معلش يا فاتما أنا بعت التعليق اللي فات من أكونت أختي الانتخاب بالرقم القومي..لكن يجب تسجيل اسمك بالقوائم الانتخابية و ذلك بالتوجه الى القسم التابع له و تسليم صورة لبطاقة الرقم القومي...أخر ميعاد 9-3 !!!! أنا لسة جاية من القسم و سألت المسئول ليه مش بتعلنه عن ده..بصلي باستهزاء قالي يمكن يمدوها شوية ميين عارف؟؟

لألألأ والنبي ياتيما بلاش البلوووووووفر
لحسن ده كان عاجبني اوي لما طلع بيه
الواد روش وشيك شكله برنس
علشان خاطري اختاروا هتاف تاني


المشكله بقى يا تيما اني مش قدره اقتنع ان الجيش مع عم شفيق
لأ انا عندي احساس ان شفيق بينفذ أوامر الجيش


مش المفروض ان الجيش اعلى من الحكومه وان الجيش هو الي بيحكم حاليا
يعني المفروض ان شفيق بياخد أوامره منهم

ماهو محدش يقنعني مثلا ان الجيش الأيام الي فاتت لما كان شفيق بيغير الوزراء
مقدروش يضغطوا على شفيق انه يغير
الخارجيه والعدل
ولما شفيق زي ما بيتقال انه اتصل ومنع برامج انها تظهر ان الجيش مش على علم بالكلام ده

مش عارفه انا حاسه ان في لعبه بتتلعب في الكواليس
ياخوووووووووووفي الجيش يكون هو الي بيضحك علينا

مش عايزه اصدق الكلام ده
بس ............

المهم سيبك انتي من الكلام ده كله
انتي اخبارك ايه؟
يارب تكوني مبسوطه يا حبيبتي
:) :) :)

الازهـــرى
---------

والله اخبارك فرحتنى يا زيزو
عقبال ما تبقى ف كل مطرح ف مصر

خير

ان شاء الله خير

dahlia...
---------

ازيك يا داليا
ولا يهمك يا حبيبتى
انتى تدخلى بأى إسم يعجبك


الحكاية دى جاتلى ع الأيميل
ومتهيألى راحت لناس كتير برضو واتنشرت نوعا ما
بس محدش عارف الحقيقة فين ؟


بصى
الأفضل تكتبى بوست عندك
بالحكاية دى
ولو تفاصيل سريعة زى ما قولتى ف تعليقك
وانا هاخد لينك من عندك بيها
ماشى؟

طيب

خلى بالك من نفسك

من كل بستان زهرة
----------------

ازيك انتى يا زهورة
انا بخير يا حبيبتى


بصى
شفيق مع الجيش
ولا الجيش مع شفيق ... أيهما أقرب

متهيألى متفرقش قوى

اصل هما فاهمين ان الشعب معندوش ادنى استعداد يمسكه واحد عسكرى تانى
فجابوا شفيق
يركب دقن ويروح لأبونا
أل يعنى لما يلبس البلوفر ويتكلم بكلنة برنسات ويعمل غلبان احنا هيخيل علينا وننسى انه عسكرى ف المقام الاول ومسنود ؟!!

الوجوه بتتغير يمكن
والنيولوك
بس السياسة هيا هيا
إحكام السيطرة كى لا تخرج عن النطاق المسموح به وتحجيم الثورة تمهيداً لإخمادها بالذوووق وبشياكة عشان العنف مبيجبش الا ناتيج عكسية وهما مجربين بقالهم شهر ..

خوفك ف محله
ولازم تصدقى ..
مش لحاجة اكتر من ان تفضل دماغك مستعدة لتلقى كل الاحتمالات
وتقارنى دا بالحاصل ف الواقع وما يستجد
وتشوفى ..سوء ظنك كان من حسن الفطن
ولا كان مش حقيقى

ف كل الحالات
سوء الظن حالياً
احسن حاجة تنعمل

إلى أن يثبت العكس


وبالنوسبة للبلوفر بقى فمتحاولييييييييييش تغيرى رأيى

الشعب كله قايم عليه
وع اللى لابسه

واعتصام اعتصام
حتى يسقط البلوفر

:)

والله الواحد زهق بقى و حاسس بملل و اكتئاب جاى ف السكة

ياتشيلو شفيق وتتعدلو يإما فولتا هيكتأب وما ادراك اما فولتا يكتأب
ههههههههه

VOLtaa
------


نعم ياخويا !!!

سمعنى تانى كدا

تكتئب ؟؟

تكتئب دا إيه !!!!

لا وحياتك
تأجيل لحد يوم السبت الجاى
قبل تاريخه
كآبة ممنوع

طب إياك اشوفك مكشر وانتا داخل عليا
يوم التبرع
ولاّ أى فيمتوثانية هبصلك فيها
الاقيك ضارب بوز

معنديش انا النوظام دا


وان شاء الله هنشيله


مهو يا نشيل شفيق
يا هيلبسنا كلنا بلوفرات
... قصدى طرح

:)


اشوفك على الف خير

انتى زعلانه من البلوفر ؟؟
دا حتى راجل لبيس واستايل جدا هههه

انا احترت فعلا مبقتش عارفه مين مع مين
الجيش فعلا مع شفيق ولا لا
ربنا يهدى الحال

وحشتينى يا فاتيما
اقعدى بالعافيه

عااااااااااااااااا
انا زعلانة جدااااااااا
اصل كتبت لك تعليق كدة يعني
حلو اووي وقبل ما خلاص ع الاخر
بخ........الكهربا قطعت
اهيء اهيء اهيء
انا زعلالالالالالالالالالالالانة

بس تعرفي اني بجد ضحكت كتير اوووي
والله يا فاتيما انا خايفة اوووي
ومش عارفة لية الاحساس ده بيزيد جوايا خصوصا لما الاقي اللي كنت بحسبه موسي طلع فرعون

بقي يا رب هو كل واحد يطلع العن من اللي قبله....؟؟!!!
طيب ربنا يستر ع اللي جاي

هههههههههههههه
وحييييات الست الوالده بتاعتي
انتي عثل عثل عثثثل
وهناخد البلوفر الغالي بتاعواا:)

الشعب يريد حرق البلوفرات
خلاص قرفنا من كل البلوفرات من هنا ورايح مش هنلبس بلوفرات وربنا يعدي الشتا على خير
بصراحة اللي بيحصل في مصر مهزلة قلنا الشعب اسقط النظام ومع ذلك شفيق ده قاعد على قلبنا مش عارف ليه القوات المسلحة متباطئة في اقالته
ان شاء الله على يوم الجمعة شفيق يعلن تنيحه قصدي استقالته ماهو كلهم بيمشوا الجمعة
تحياتي وسعدت بتواجدي في مدونتك التي ابهرتني في اول زيارة

فاتيما .. صباحك سكر يا سكر

الاول بجد انا ضحكت ضحك عليكى اختيارات

ف الاغانى جامدة بجد ههههه بتنشنى صح يا

تيما الجميلة

ثانيا للاسف احيب اقولك انى احبطت احباط شديد انا كمان للاسف

حاسة بجد ان زى مايكون مكتوب علينا نشوف الغلب ده زى مايكون هو دمنا

مزود احباطى البلد اللى انا عايشة فيها حقيقى عددها مش قليل ومش بيفهموا بجد الصح فين ؟ حاجة بجد تقرف


ثالثا لسه عندى امل بس بقه ضئيل اوى ف ان بكرة هيبقى احسن كله ع الله

رابعا زعللانة انى مش عارفة اشارك ف المقاومة باى بوستات لان حظر التجول رجع تانى ومابقتش اعرف اقعد نت :(


خامسا ربنا يخليكى بجد ع تعبك ومجهودك واستمرارك ف تشجيع الناس الهى يارب يارب ينصرنا ومايضيع تعبك ولا تعب كل الناس دى يارب

سادسا انتى وحشتييييينى جدااااااا بقه

وانا مش عارفة اعمل ايه ؟

عندك حل يا اوختى ؟؟

شفتي بقي عادل
هههههههههههههههههه
انا اول واحد عرفت من تويتر وكنت عارف انها هتفرقع وهتوصل بقالي يومين مقضيها ضحك لغاية حسيت اني هموت من كتر الضحك

شكرا يادولا

الشعب يريد احراق البلوفر وطرد اللي جواه ولو اعترض يتحرق معاه
هههههههههههههه

تحياتي يافاتيما

فاتيما
روح القلب الملائكية

بصى يا فاتيما احنا بنعانى ات مفيش حد بيتكلم باسم الثورة كل واحد ينام و يقوم يقولك دى مطالب الثورة صفوت حجازى بيهدد الجيش و يقولك دى مطالب الثورة و شادى الغزالى بيتهكم على الناس و يسخر منهم و يقولك دى مطالب الثورة
يجب اختيار لجنة من المحترمين ساسة و قانونيين و حقوقيين و يجتمعوا و يحددو المطلوب
خالص تحياتى

بصراحة مش فاهمة يا فاتيما
هو لية اسود ف اسود ...
اقصد البلوفر يعني
هو بيقولنا هي دي ايامكم الجاية والا ايييييييييية...؟

http://alkadarwana.blogspot.com/2011/03/blog-post.html#comments

http://www.facebook.com/photo.php?fbid=196257663727824&set=a.191412130879044.43504.191115070908750&theater

http://www.facebook.com/photo.php?fbid=196257663727824&set=a.191412130879044.43504.191115070908750&theater

عااااااااااجل
اقالة احمد شفيق
وتكليف د\عصام شرف
برئاسة الوزراء

البلوووووفر خلع شفيق
لولولولوليييييييييي

طيب ايه بقى
كدة فشنك يعني
جمعة البلوفر
جمعة شفيق كدة اتضربت بالنار

طيب هنسميها ايه
جمعة ايه
جمعة بلا بلوفر

الان نحن بلا بلوفر ولكن الجيم لسة مش اوفر

كنت عامل يافطة عليها الشفيق لازم يرحل وجاى بيها بكرة
خاف منى اظاهر D:

نتقابل ف التبرع وبعده التحرير ان شاء الله ياست الكل

ومبروك اقالة شفشق و يارب الوزرا القاعدين يتشالو واحد واحد عشان نفرح بذمة

استريحتي يا ختي طفشتي الراجل
نجيب بلوفر منين بقى تاني حلو مقطقط كده
ده كفايه اكسكيوز بتاعته
ياخلاااااااثي

بجد الراجل ده شلني امبارح
رفعلي الضغط ينهار ابيض
وبعدين هو كل واحد يمسك منصب في البلد دي بيبقى ليه افضل وانجازات
انا كان نفسي يفتحوا التليفونات امبارح كنت هتصل واقوله
الطيران على الي اخترع الطيارات يا شيخ
وبعدين هو كان فاكر نفسه قاعد على شازلونج ممد اوي وواخد راحته
واحنا قاعدين نحرق في دمنا
الراجل ده عايش في قرن فات مش حاسس بحاجه
يمكن واخد حبوب هلوسه من بتوع القذافي
حججه كلها خايبه
وكلامه كله ميدخلش عقل طفل

بس الحمد لله انه استقال هو التاني
وده تحذير لكل شخص من النظام المخلوع
الدور الدور موعود يلي عليك الدور
يلا عقبال باقي الطلبات
:) :) :)

ربنا معاكم يا فاتيما .. والله قلوبنا معاكم على طوووول واحنا متابعين اول بأول .. ربنا يوليها للصالح يارب ,, بالنسبة للبوست عجبني كثير كثير .. دمتي بكل حب وعز.

mrmr
----

hازيك يا مرمرة
انتى كمان وحشتينى يا حبيبتى

ومش انا لوحدى ياأوختشى اللى زعلانة من البلوفر
دى مصر كلها
وينوب عنا الشيخ حافظ سلا..
قصدى الشيخ عادل ..المجررررررررم
:)


واهو راح شفيق و بلوفره
وراحت خيوطه خلاص


أقعدى بألف عافية يا مرمرتى

:)

re7ab.sale7
-----------

:))))

مبسوطة انك مبسوطة
وانك ضحكتى شوية
و احنا ربنا ادانا جينات خفة دم
فيجب أن نستغلها
عشان اللى لقى ضحك ومضحكش
يبقى حرام عليه

وهما للأسف كدا يا رحاب
كل الاسماء دى محدش كان يتخيل انهم يمسكوها ابدااااا
وسبحان الله تتقدر لهم
ويبقوا هما الرؤساء بتوع مصر

الحمدلله ان شفيق طلع برا
اذا كان الطامعيبن لم يتغيروا وبيسلكوا نفس السكة القديمة
فالشعب مبقاش زى زمان
مواصفاته اتغيرت ..وبقى يرفض ينحكم بالشكل المخزى دا
ومش بس المصريين
دا العالم العربى كله من حوالينا اهو
واتارى عشان كدا الأخ معمر جالة لوثة فوق اللوثة عشان مش مصدق ان شعبه اتغير ومبقاش يحبه ..زى الست اللى عاوزة تطلق من جوزها اللى كبس على نفسها 30 سنة مثلاً وبيقول مالها دى مهى قاعدة ساكتة وبتحبنى وراضية ...
ميعرفش انها خلاص جابت اخرها ولو قعدت اسبوع كمان ممكن تنط ف كرشه او تعمل ف روحها حاجة ...

الحمدلله
البلوفر سره باتع
وربنا ريحنا منه


خلى بالك من نفسوياتك

بحبك قوى

sony2000
--------

وانتى سكر سكر سكرررررررر

هتيجى التبرع يا سنسن ؟!!!

مصطفى سيف
----------

اهلا بيك
روح قلب ماما نورت يا فندم
وميرسى جدااااا على ذوقك

شوف تعليقك يا مصطفى
اهو من قبل الجمعة اهو ..اتشال
بص بقولك
متكتب تعليق عن امن الدولة ...
عشان يتشالوا هما روخرين
مادام وشك حلو كدا
:)

نورتنى وتعالى كتيييير

мαησηα
------

صباح الفل والقرنفل والريحان والورد البلدى والياسمين وكل بساتين الكوكب الأرضى يا قمرررررررررر


بجد عجبتك الغنوة
اصلى دورت على غنوة تقول انتا بتعملهم علينا واحنا هارشينك ..لقيت نانسى قايمة بالواجب وزيادة ...
واحنا اتهرينا ولاد ارندلية وحلانجية
لما قولنا يا بس ....


الامل يكبر لو سمحتىىىىىىىى
خلاص رحل البلوفر الجاثم على صدر الوطن إلى غير رجعة ان شاء الله اهو

ننشكح ونفرح شوية بقى


انتى كمان وحشتينىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى
وحياة يوسف

ولازم نشوف حل اكيد
بس الى حينه
سلامى لماما الغالية وسارة
و خلى بالك منك
يا قلب الملايكة لو سمحتى
ومتخليش حاجة تزعلك ابدا

بوسات وحضونات كثيرات جدا

Haytham Alsayes
---------------

شفت يا هيثم

عادل دا مجرررررررررم


ربنا يحرسه
فش غلنا وخد بتارنا من البلوفر
يا لهوى دحنا من شهر وحصلنا كدا
اومال لو كان قعد كمان ؟!!

الحمدلله
غمة وانزاحت

والله الشعب المصرى يستحق يبقى فوق كمان وكمان وكمان
ليه نقبل بأقل من الحرية والكرامة والكفاءات و الأمان والستر والتميز ألخ الخ الخ ...

دحنا حتى التهريج والهزار
مميزين وفارقين

حد يقول ان شفيق يمشى بالتنكيت عليه
البلوفر والتريقة عليه
فضحه ..فضح هيافته وزيفه واستعباطه للشعب بشوية حركات مظهرية

يا خراشى دحنا مُلك قوى
حتى ف سخريتنا

تحياتى انا اكتر يا هيثم

والله حى

الباقى جى

ابراهيم رزق
------------

انا كل مرة بنسى اقولك
....
ميرسى يا ابراهيم جدا
ع اللقب الحلو الذى تنادينى بيه
بس كتير عليا قوى كدا
هتغر ومش هتعرفوا تكلمونى
منحرمشى

(وش مكثوف)


الأول مبرووووووووك
ثانيا هرجع اقولها ..لأنى عندى قناعة بيها رهيبة يا ابراهيم

اللخبطة اللى بنبقى فيها دى والغير مقصودة بحس انها خير اكتر منه شر

قد نبدو مشرذمين
لكن احنا الحقيقة ..مختلفين عشان التباين فيه رحمة
بيدينا فرصة نشوف كل حاجة ونسمع كل الأاراء
بس اجمل حاجة ودى رحمة ربنا أكيد وكمان نوايا مخلصة ..كلنا ف النهاية بنتوحد على مطالب وومتفق عليها ضمنياً عشان اغلبنا معندوش مطامع ..كلها طلبات متعلقة بالخطوط العريضة
مصر تبقى حرة
ونضيفة
ومستقلة
وآمنة

بس
تأتى تحت هذه الطلبات
كل حاجة تانية

خالص ودى ليك يا فندم

الأزهرى
------

حطيته يا زيزووووو
وميرسى ع اللينك بتاع البيان
انا عملت هوليلة ف الشغل النهاردة بسببك ...حصريا بلغتهم بالخبر اول نفر

وطلع مديرى دفعته
وقالى فيه شعر ...
رفع معنوياتى بصراحة
الاختيار كويس جدا
ويتبقى نسمع اسامى الوزارة بتاعته
ونشوف
ان شاء الله خير

اشوفك على الف خير يا جدع
:)

غير معرف
-------

الحمدلله

متهيألى جمعة بكرة تبقى لأمن الدولة
والمعتقلين
هما اللى التركيز لازم يبقى عليهم من الآن فصاعدا ...
خصوصا ان المجلس الأعلى قال الدستور مسئولية الرئيس القادم ..يعنى زحزح الطلب دا لقدام ...

يبقى نولى الاهمية دلوقتى للمظالم اللى مينفعش تستنى اكتر

انا متوقعة لو وزير الداخلية اتغير بواحد مدنى ...والقيادات كلها فيما أصغر اتغيرت ان يحصل فوضى اكتر م الأول من اللى هيمشوا ويفقدوا كل حاجة ..

ربنا كريم ان شاء الله خييييير

VOLtaa
------

فولتااااااااا

ازيك ؟

اظن خلاص
لا أكتئاب ولا عتنضرب


انا بمخمخ ف يافطة
لو عرفت اعملها ..هاجى بيها بكرة
ربنا يسهل ان شاء الله
واشوفك بكرة على الف خير

الف مبرووووووووك ياض

:)

من كل بستان زهرة
----------------

آه ارتحت
ايه يعنى
ما يطفش
خدنا ايه م الرجالة غير الزعيق والنكد
!!!!!

وهوه اصلا من زمان والصحفيين كانوا بيشتكوا منه ومن لسانه وعصيبته عليهم وعلى موظفينه ....

قوم لما الناس كانت بتقول دا ابن ناس و برنس ولكنته ابصر ايه اقول الله!!
اومال زمان راح فييييين ؟!!

الله يكرم اصله بقى ويخليه لينا علاء الأسوانى ...مخلش عليه شغل الجلا جلا دا
وخلاه يظهر بوجهه الحقيقى
ويستفزه
استفز عنجهيته وغروره
فراح طالق علينا رشاش انجازاته وطلعاته الجوية دى
على رأى د.ستيتة الله يحظها ...
مش عايزين اى وزير طيار عشان ميتعوجش علينا بطلعاته وسنينها دى ابداااااااا

عاوزين واحد ع الأرض

ومظنش انه استقال
اكيد مشوه بعد ما خلى الحكاية خل
بس قالوا يمشوهزى ريسه .. بأدب


الف مبرووووووك رجوع البلوفر لأرض وتراب وطنه ...
وجلاء الللى لابسه عن المشهد


يسمع منك ربنا
ادعى يا زهورة
انتى م الأحرار يا بنتى

:)

وجع البنفسج
-----------

اهل بأغلى الحبايب
واهلنا ف فلسطين

ربنا معانا ومعاكم يا حبيبتى
انا فرحانة بتعليقك قوى
وبكل كلمة فيه
عقبال ما ربنا يقدرنا ونعمل الواجب المفروض علينا من زمان تجاهكم وكنا مأسورين ومحتلين زيكم ومش قادرين نعمل أى حاجة ...

ربنا كريم
والف الف شكر ليكى

دمتى انتى بكل الخير وربنا يسلمك

يااااااااااااااااااااااارب
اصحى الصبح ألاقى الجمعية بكل أعضائها وأجنحتها

يعنى لما أتأخرت معاكم رجعت لقيتهم حاطين اسمى فى المجلس التنفيذى للمجموعة بتاعت المركز عندنا
يعنى واحد ما كانش حاضر أساسا وينتخب
فى كده فى الدنيا يا جماعة

المهم اللينكات أهى


http://fritend.blogspot.com/2009/07/blog-post.html



http://fritend.blogspot.com/2009/04/blog-post_09.html


http://fritend.blogspot.com/2009/09/blog-post_22.html


http://fritend.blogspot.com/2009/09/blog-post_26.html


http://fritend.blogspot.com/2009/09/blog-post_28.html


http://fritend.blogspot.com/2009/10/blog-post.html

المهم مع الموضوع التعليقات
وهتلاقى كوارث فى التعليقات من الكل وعلى رأسهم زعيمة الجمعية

ضحكتيني ياتم تم بجد

:))))))

وشفيق اهو خد الشر وراح

وعقبال امن الدولة
وتبقا كده فله ونركز بقا في اللي جاي

بس هنعمل ايه احنا بقا ده حتي البلوفر كان مسلينا
:)))))))))

وحشتيني يافاتيما ياام قلب دهب

إرسال تعليق