.

.

خــــــطــاريــــف  

Posted by: فاتيما in





أنا بفكر فيك وشايلة همك طول الوقت 
إنتا ليه بس قربتنى منك ؟
انا بسببك مش فاكرة أى جرح حصلى
انتا تستاهل حياة احسن 
انا خايفة عليك ... من نفسك
انتا تقدر تكون إنسان سعيد لو حبيت
انا حزينة لأنى مش قادرة أنفعك
انتا لازم تبص للدنيا والمستقبل بنظرة تانية
انا بأنب روحى لأنى إقتحمت حياتك 
انتا محتاج تعامل اللى بيحبوك بشكل مختلف 
انا يمكن اكون حبيتك لحد ما بقيت عبء
انتا فعلاً حاولت تكمل ومعرفتش
انا جايز اكون انسانة صعبة
انتا .. الصعوبة جنبك طفل عمره يوم 
انا هنقهر قوى لو مفتكرتنيش بالخير
انتا صعبان عليا قوى .. لأنك بتتألم قوى
انا مفيش راجل ملى عينى قبلك
انتا بكرة يمكن تحب واحدة .. متحبكش
انا عارفة انى زهقتكّ جدا 
انتا صبرت عليا صبر غريب مش فاهمة سببه
انا بتمنالك الرضا ترضى 
انتا حزنك يا حبيبى يغطى كوكب الأرض 
وكواكب تانية جنبه
انا اسفة لأننا إتقابلنا ف الظروف دى
انتا مش مجنون .. انتا عاقل بزيادة 
انا بتمنى بعديييين .. تفتقدنى وتزعل عليا 
انتا انسان محظوظ بس منتش شايف دا
انا مش بعاتبك على أى حاجة حصلت  
انتا نعمة لا تأتى ف العمر كثيراً 
انا مش زعــــلانة منك
انتا حاولت و قلبى شاهد
انا مقبلش اكون على هامش أيامك
انتا خلاص بقيت ف دمى  
انا بحبك فوق ما يتحمل بشر
 انتا مش مطلوب منك تمتلك عصا موسى
وتحقق معجزات
انا تعبت قوى و يئست خالص
انتا بقيت مبتدى الأشياء و منتهاها


---------------------------------------
انا حاسس انى كنت ف خناقة وإنضربت بجد
عارفة ؟ .. انا نفسى أحضن حد
هيا الدنيا برد ولا أنا اللى مش واخد بالى؟!
على سلامة
-------------------------------------

This entry was posted on السبت, مارس 05, 2011 and is filed under . You can leave a response and follow any responses to this entry through the .

47 كــــلام بيطــبطـــب عـــلى قــــلبى و روحــــى

لأ الدنيا برد
بس محتاجة قلب دافى علشان يحميكى من البرد
دورى حواليكى القلوب كتير
دورى على دفئها فى قلوب أصحابك اللى بيحبوكى
دورى علليها فى قلب يوسف وكل ابن روحى بيحبك
دورى عليها جواكى لما تحطى العالم كله جوه قلبك اللى يساع كتير

أهم حاجة إوعى تسيبيه للبرد

كلامك وجعني اوي ياتم تم

طالع زي مابيقولوا من نار الفرن

بس صدقيني اللي ليها قلب زي قلبك عمرها ماتحس ان الدنيا برد

بس كلمة في ودنك كتير في عز الحر بتبقا الدنيا تلج مش برد

أزيك يا فاتيما يا مامت يوسف

اليوم كان جميل بيكم صدقينى

التبرع و التحرير

............................

مش عارف البوست حاسه صعب بالرغم بساطه

أحاسيسه جايبه من الأخر


انا هنقهر لو متفتكرنيش بالخير
انتا صعبان عليا قوى لأنك بتتألم .. قوى

الجملة دى صعابة قوى يا فاتيما

مجرد أحساس من اللى بتحبه ان ممكن يكون ناقم من الحب ده
ممكن يموت الواحد

الأحساس بألام الأخرين دون رؤيتها ده قليلون اللى عندهم ده


انا تعبت قوى و يئست
انتا بقيت مبتدى الأشياء و منتهاها

يعنى أستاذة التفاؤل بتاعتى تقول كده انا بقى اعمل ايه انتحر بقى و خلاص (:

لالالا يا فاتيما مش أنتى اللى تقولى تعبتى و يئستى

بالرغم ده من حقك
بالرغم ان الحب ده زى ما يكون الواحد بيجرى فى سباق المارثون بالرغم التعب و الأرهاق بس عنده أمل مع طول النفس

ربنا معاكى يا فاتيما يا غالية

انتى طيبه قوى وقلب ابيض
ربنا يحافظ عليكى يارب

مش عارف هو الكلام حلو وصادق برده ومن القلب جدا جدا حاجه مش اى حد يطلعها بس انا مش مبسوط
اه انا كدا اصل مقدرتش اكون الحاله اللى اتكتب فيها الكلام دا بحب انا دايما أبص لما خلف الاحداث وانا بصراحه مقدرتش أوصل للى خلف دا يلا تتعوض فى بوست تانى
اه نسيت اقولك ان الحاله مميزه وصعبه وتوجع القلب

فاتيما
روح القلب الملائكية

بص يا ستى انا حبيت اتذاكى و جمع السطور و احاول اقرا اللى بينهم لقيت اللى بينهم اكثر من طرح فعجزت عن الفهم
فبما انى مش فاهم فمش هعلق على حاجة مش فاهمها اللى لما افهمها و مش هافهمها اللى لما انتى تفهمينى و بما انتى مش ناوية تفهمينى و تسبينى مش فاهم و بنحاول نفهم اللى احنا مش فاهمينه فانا لحد مافهم اللى انتى مش عاوزة تفهميه لينا ههههههههههههه
هاقولك بدون تعليق

خالص امنيات بالسعادة و الحب و راحة البببببببببببببببببببال

ربنا يقدم اللى فيه الخير

http://www.youtube.com/watch?v=H7FYx0W6LDY&feature=related

الفيديو ده حلو قوى

هيا الحريمات كدا الشئ وضده

كان الله في عونا نحن معشر البلاليص

قصدي الرجال

الأزهـــرى

----------

واد يا زيزو
ازيك ؟

انا مبسوطة انى شوفتك امبارح جدا
حسيت امى مع ماجد اخويا
بس انتا مناكف عنه
ودماغك ناشفة
وانا وراك انا والجمعية
والزمن طوييييييل


بخصوص البوست
معرفش دا صح ولا غلط
بس اللى متادكة منه انها طبيعتى وصعب اغيرها
انا مبحطش حاجة مطرح حاجة تانية
مهما حصل

افتقادى ليوسف مثلاً
لن يمحيه انى اخلف طفل تانى

اشتياقى لراجل اعيش ف ضله
لن يعوضه اصدقاء او حياة اجتماعية


مينفعش احمل حد عبء حرمانى من حد تانى
الأصدقاء ليهم اشكال و ملامح
الحبيب له شكل وملامح
الابناء ليهم شكل وملامح

محدش ينفع بيقى شبه حد
وييجى مكان حد

دا ظلم ليهم
وكمان ليا

كل واحد لازم يبقى فى مكانه الصح
والحقيقى وميدفعش فاتورة شخص تانى

معرفش كلامى واضح
ولا لأ

عموما اعتبره من جملة الخطاريف

هروح اقرى اللينكات اللى سبتهالى ف البوست اللى قبله

حل كويس ف الامتحان يا خويا
هنجوزك بكحك ف الشهادة ازاى ؟!!

:)

شمس النهار
---------

هذه حقيقة يا شمس الشموسات

البرد بييجى ف عز الحر

لما شمسك اللى بتدفى قلبك تغيب
لأى سبب ..

منحرمشى منك ابدا
ولا من كلامك اللى يدفى القلب

:)

Ramy
----

انتا صحبتك ممتعة يا رامى
وقلبك طيب يا ر ر
انا وجعت رجلكم من كتر الوقفة
بس بجد كان نفسى نقعد اكتر

عقبال كل مرة ف الخير والفرح
ان شاء الله

انتا بالذات هتفهم كل سطر
وهتحس بيه
وبعد الشر عليك من الإنتحار
بس ساعات بتحس انها قفلت من كل ناحية
ومبقاش ف ايدك حاجة تعملها

انا خلاص
ضهرى مش بقى للحيطة
انا وقفت ..وبنوا الحيطة حواليا

انا تعبت قوى
وغلبت وغلب غلبى
مبقاش قصادى غير انى ارفع الراي البيضا وأسلم
عشان حتى ضميرى ميوجعنيش
ويفضل يأنبنى انى بضايق وبخنق حد بحبه اكتر من روحى
وبحط نفسى فى موقف صعب كدا

انا ممكن اتحط ف اصعب من كدا
بس ابقى حاسة انى هخرج منه كويسة
وصح
لكن دا مش احساسى المرة دى
حاسة ان منظرى وحش قوى


وحاسة انى يا اخد كل حاجة
يا مخدش حاجة


انا عارفة انه طمع وانانية
بس الحب كدا

متهيألى الحب كدا
زى ما بتدى كل شىء
عاوز كل شىء
عاوز تحس انك ف مكانك اللى تستاهله
وتطمن بيه على نفسك
عشان تعرف تكون كويس مع اللى بتحبه
عشان تعرف تسعده
وتقدره اكتر واكتر
ومتفضلش تضيع الوقت والجهد والأعصاب
فى الزعل والعتاب والبعد


انا رغيت قوى
بس اهى كمالة لدردشة امبارح بقى

:)

ربنا معاك انتا كمان يا رامى
ويفرح قلبك يا رب

محمود (باحث عن حب)
-----------------


ميرسى يا محمود
انتا الأطيب
ميرسى قوى ع الدعوة الحلوة

ميرسى بجد

MaNoO
-------

ازيك يا مانوووو


مش لازم يا عزيزى تكون رأى
وتفهم الحالة
انتا عملت الأهم ..
انك حسيت المشاعر اللى ورا الحالة
دا كفاية صدقنى
واهم من أى فهم

بس

:)

ابراهيم رزق
-------------

:)

انتا مش محتاج تتذاكى يا ابراهيم
انتا عندك الاهم من الذكاء

الوعى و البصيرة

وبعدين مش مهم تفهم ولو انى متاكدة انك فاهم وبتعمل مش فاهم

بس هيا خطاريف
خدها على هذه الأساس
ويبقى الفهم ملوش اهمية قوى قصادها

ولو انى زعلانة لإنك مجتش امبارح التبرع زى ما كنت قايل ..
بس دا لا يمنع اقولك

منحرمش منك

مدونة ما كفاية بقى
-----------------

ميرسى ع اللينك يا كفاية

ميرسى قوى

مصرى جدا
--------

آه يا هانى

آه ..أيوه

وآه .. م الوجع

نعملوكو ايه بس عشان تفهموا
قد ايه بنحبكم

ومنقدرش نستغنى عنكم

ومحتاجين نحس بالامان جنبكم طول الوقت
ولن يكلفكم ذلك أى مشقة تذكر
لو بس كنتوا بتحبوا بجد

لو فقط تذكرتم ضعفنا واحتياجنا ليكم و اعترافنا انكم مصدر القوة الحقيقى وامنياتنا الدائمة ان تمارسوا هذه السلطة فى مكانها الصحيح
و تترفقوا بمعشر القوارير
اللى هما احنا

قصره
ساعات يبقى مفيش فايدة من الكلام
وقلته تبقى احسن


خالص ودى يا وتد
:)

جارة القمر
----------

حقك عليا

صمت رهيب
ملامح وجه بلا اى تعبير
عيون ترغب فى البكاء وترفض بكبرياء ان تبكي
قيام من على المقعد ومحاولة للتحرك بلا اى هدف ولكن مجرد محاولة يائسة مني لطرد الإحساس الذي سيطر على روحي
محاولة لطرد الخوف من ان اتذوق هذا الاحساس يوما ما
واجد نفسي مكانك
فانا شممت رائحة عذابي فى هذه الكلمات
واعرف اننى شئت ام ابيت
اجلا ام عاجلا
سألقى نفس المصير


الأن فقط أبكي

بت خيخة واى كلام
----------------

ايه التعليق الرهيب دا يا خوخة ؟!!

انا نشرته لأنك مقولتيش موش للنشر

وهوه لازم يتنشر فعلا


تعرفى ان بينا حاجات مشتركة كتير
مش بس الطلاق والأمومة لطفل وحيد والظروف الملخبطة و الحمدلله حب خلق الله النعمة التى لا تؤتى لكثيرين ...

حاجة كمان
احنا فينا صعوبة وسهولة ملمومين على بعض متفهميش ازاى
هل دا طبع نسائى بحت والشىء ونقيضه زى ما هانى مصرى جدا قال
ولا إحنا اللى اتعقدنا وكل حاجة اتشابكت خيوطها ومبقاش ينفع تتفكك عن بعضها

احيان تبسط الامور ..بيميعها ويخلى شكلها بايخ
بيفقد الحياة متعتها

ساعات بحس انى شبههك ف الحكاية دى
انتى لاسعة عنى بمرااااااااحل اكيد

بس احنا ف النهاية بنرجع نتوحد
فى صيغة واحدة ست

محتاجة لحنان حقيقى ميروحش لأى سبب
محتاجة لأمان و ضهر تتسند عليه
محتاجة تقدير واحترام
محتاجة تحس انها مرغوبة
مش بس مرغوبة ..لكن فيه تمسك بيها وفرحة بالحصول على حبها وهيا قصاد كدا تقدم روحها لو تقدر ..

معرفش دا طمع
ولاّ دا المفروض ؟
يعنى اللى بيحب
مش لازم يحب بكل ما فيه
ولاّ يقعد يحسبها ويعمل معادلات ؟!!

اللى اعرفه
ان الحب مفيهوش ازاى وليه وحاجة قصاد حاجة

وعشان كدا بدوس بنزين
والمفروض اللى بيشاركنى المغامرة دى عارف كدا وموافق وحابب ومتمسك
ومش خايف ولا ييجى يوم يقول استوب هنا وانا نازل ....

يتهيألى انتى كمان زى حالاتى
مجنونة ومخكك طاقق
وقلبك اطق واطق
والقلب الطاقق بيخرج طاقة حب وتصرفات يعجز عنها القلب العاقل

لكن يبدو ان الميزة دى
عيب والله اعلم

بيشل اللى قصادك اوقات
ويخنقه اوقات
ويخوفه منك اوقات

الملخص
بيبقى سعيد ف البداية
والدنيا مش سيعاه
بس بعد شوية
ميت حاجة بتيجى ف الوسط ما بينكم

وفجأة لما تلاقى نفسك ف وسط السكة
ومستمتعة بالسواقة والطريق هادى والجو جميل والصحبة عاجبكى ومطمناكى وخلاص هتكملوا المشوار بقى ...
تسمعى جملة ..اقفى هنا
او مش لازم تسمعيها حتى
بس كفاية تحسى ان اللى قاعد جنبك متبرم وزهقان و انتى سامعة حواره الداخلى وهوه متردد وخايف وبيقول انا ايه اللى جابنى هنا ؟!!!

انا معرفش رد فعلك ايه يا خوخة
بس اكاد اجزم انك هتزعلى قوى من نفسك زعل شديد ومش هتسامحيها على أى اهانة لقلبك لحق بيها ....

لكن اختك فاتيما رد فعلها مختلف
هنتعمل زى دلوقتى
هتوقف العربية بمنتهى الهدوء
وقبل ما يطلب رفيق الرحلة
وتقوله انتا ساكت ليه ؟
انتا حر ومش مجبر على صحبتى
انتا من حبى ومن وجدى طليق زى ما بيقول ابراهيم ناجى
انتا قلبك حر يا حبيبى يصاحب اللى عاوزه وبس ..
ومش لازم تكون انا
ولو انى اتمنيت كتييييييير تكون انا
لكن حصل خير


تعليقك استفزنى
بس بشكل ايجابى مش سلبى

ربنا يفرح قلبك يا خوخة
ويحنن القلب القاسى ..عليكى

بوسيلى شيكو قوى

انا مفيش راجل ملى عينى قبلك

انتا بكرة يمكن تحب واحدة متحبكش

انا بتمنى بعدين .. تفتقدنى وتزعل عليا
********************
):
قلبى وجعنى

انا رد فعلي
ادام اللاب
وميلت راسي
فعلا
لناخد كلو
لبلاش
حساكي قوي
ربنا معانا كلنا يارب

هو البوست بيوجع أوى كدا ليه !!
قلبى وجعنى بجد
وعايزة أعلق على كل سطر
بس الكلام مش راضى يتقال :(
..

http://www.youtube.com/watch?v=J6qxMP3deU8
..
ربنا يحققلك اللى فيه الخير دايما
يا فاتيما
:)

الأول
----

إبتسامة رهيييييييييييييييييبة
واااااااااااااااسعة
على كمية التعليقات اللى موش للنشر
بطلب من كاتبيها

:)))))))))))))))))

مش عارفة ارد عليهم ازاى ؟!!!

هحاول وكل واحد يعرف روحه بقى

:)

اللى ضحك قوى
لما قرى البوست
عشان ... ميعيطش
----------------

فهمت كلامك وحسيته
وانا عارفة من غير ما تقول والله
أى حاجة

الحال اصله من بعضه
او زى بعضه

وساعات فجأة تحس
ان الدنيا صغيرة
والناس شبه بعض قوى
مهما حاولوا يختلفوا

كله بيقع ف نفس الوقعة
يحب
ويتعذب
ولا مفر




والسلام وصل


:)

اللى سألتها عن اخبارها
و كتبت تعليقين
----------------------


اللى قولتيه فكرنى بشعر قريته
بيقول


كفاك زهواً
إننى هو الهوى
وعلى رخامك
قلبى الزجاجى هوى


عارفة ان العبارة الجاية
اكيد هتضايقك


بس
معلش


هقولها و طالعة من قلب قلبى


ربنا.... يكسر قلبه
لميت ألف فتفوتة


بس


خلى بالك من نفسك
ارجوووكى


ربنا يريح قلبك

اللى زى حالاتى مبسطة الدنيا
بس الدنيا مش مبسطاها معانا
--------------------------

يا حبيبتى
هيا كدا للأسف


الدنيا غريبة قوى
هقولك ايه بس ؟

يا ترى فيه فايدة من الكلام ؟

مظنش

متحاوليش تفهمى

تعرفى ؟

ساعاتا بيتهيألى لو فهمت
هموت

هموت من القهرة
لما افهم ليه بيحصل

غالبا الإجابة هتكون بشعة
هتكسر قلبى لدرجة تخليه
ميرجعش يدق تانى

اضحك على نفسى احسن
واقولها أى حاجة تانية
غير الأسباب الحقيقية

بخاف كمان اظلم
مش دايما كل واحد شايفها واضحة
وانا عارفة
ان اللى مكتوبله البوست
للأسف
دنيته ضيقة قوى
لدرجة انه مش عارف يخرج براها
ويكتشف ان فيه وسع وبراااااح كبير ممكن يكون مستنيه

خايف على نفسه يمكن
خايف منى يمكن
خايف من اى حاجة يمكن

المهم
انه مش هيخرج من محيطه
اللى محبوس جواه

هشده بالعافية يعنى ؟
مينفعش
حاولت بهدوء
وبرضو منفعش
خلاص
يئست

يمكن مش انا
مش انا الإنسانة دى
اللى هوه منتظراها عشان يكملوا سوا ...
يمكن العيب فيا

وارد جدا

مش عيب ومش غلط
الواحد يكتشف فجأة
ان دى مش احلامه
ولا دى الصحبة اللى بيتمناها


و العيب بجد
انى اكتشف هذه الحقيقة
وافضل قاعدة
وعاملة ولا واخدة بالى


اظن ذلك يعنى

خلى بالك من نفسك

وسيبيها على ربنا

اللى كاتب أو كاتبة
كلمة واحدة
ف التعليق
-----------------------------

شكراً

عاشقة الرومانسية
----------------


سلامة قلبك يا دودو

معلش
انا اسفة

انا اسفة كمان
عشان مش عايزة اتكلم

انا عارفة انك هتسامحينى

إحضنيلى روحك

sony2000
--------

يا رب يا سنسن

انتى حبيبتى

:)

silver Eyes
-----------


ميرسى ع الغنوة يا سيلفر

وميرسى ع التعليق كله


و متقوليش حاجة يا بنتى
انا عارفة انه كلام ميتردش عليه
لأنه غريب ومتلخفن
انا بخطرف مش اكتر


آه

ميرسى ع الدعوة كمان

:)

ازيك ياخالتو فاتيما
ان شاء الله تكونى بخير يارب

البوست دة كل جكلة فية عاوزة تحليل وتفسير لوحدها
كل جمله فية بتحكى حكاية لوحدها
الوست شكلة بسيط بس هوة مليان مليان كلام جوة السطور

على قد ماهوة بسيط بس كلامه بيوجع مش عارفة لية وانا بقرى الكلام حسيت ان كل حرف فية زعلان كل حرف بيعيط كل حرف محتاج لدفا

(انتا بقيت مبتدى الأشياء و منتهاها)

ابدعتى كالعادة فى توصيل الاحساس

تحياتى اليكى ياخالتو

ذلك الذي ترضيه وتؤلمه
وكلما نبتعد نقترب أكثر
كأنما خلقنا معًا لنحيا معًا ونموت معًا
ونتألم معًا

wella
-----

ازيك يا ويلا ؟

انا بخير يا حبيبتى
متقلقيش

اما الجمل
فكل سطر فيه جزء من حكاية كبيرة
كل حتة فيها
جزء منى
اتوجد وانتهينا
ولو ف لحظة تم بتره
هيفضل مكانه فاضى
فيه برد
وافتقاد
وحسرة على شىء غالى
كان ممكن يفضل
ويكون حاجة كبيرة وقادرة تسعد
وتنفع
وتدفى القطب المتجمد الشمالى
والجنوبى معا

:)

انا قولت اللى ف قلبى
وكان هيقتلنى لو مطلعتوش

وبس

غير معرف
-------

انا مش فاهمة قوى التعليق
بس فاهمة ان الرضا مينفعش
ييجى معاه ألم

الرضا
يعنى تكون موافق على نصيبك
ومش شايفه قليل
ولا وحش
ولا مفروض عليك
العكس
تشوفه كتير
ونعمة
ويااااه لو الواحد حافظ عليه

ساعتها يبقى الرضا
مفيهوش أى وجع
ومنتاش شايف غير الخير
وساعتها لازم تكون سعيد
والا تبقى مش راضى بجد
وبتضحك على نفسك

الدنيا اللى عشتها
وشوفتها وبتفرج عليها دايما
علمتنى
ان الفرحة والكبسة متلازمين
الخير والشر سوا
الراحة والتعب معع بعض
الشىء وعكسه
وارد قوى يبقوا امر واقع
ينفرض عليك

السؤال ساعتها
هتعمل ايه ازاء ذلك ؟
هترضى
وتحاول تتكيف
وتقرر متعكننش على روحك
وتقلص من مساحة السخافات ؟



ولا هتسيب السلبى يخنق الإيجابى
ويحتل مساحته بوضع اليد ؟!!


اختك قررت ان الباقى م العمر
غن شاء الله
ولو فاضل فيه يوم
يكون تفاؤل وامل ومحاربة لأى سواد
وكل فرحة تقابلنى اتشبث بيها لآخر جهدى و احب بعزم ما فيا
مستخسرش نفسى ولا اعصابى ولا مشاعرى ولا صبرى ولا مجهودى ولا اى شىء ...
ف مقابل احساسى بالحياة وجمالها
لأن الدنيا مليانة خير
ربنا خالقها جنة ع الأرض
احنا اللى ساعات كتيييير نضيع الفرص
عشان نشوف دا
لأسباب كتير بمزاجنا او غصب عننا

الحمدلله
مرحلة غصب عننا دى ..انا تخطيتها
ودخلت ف مرحلة بمزاجى
قدر الامكان برضو
لأن مش كل حاجة بمزاجى

بس ما ان تقع فى مجالى المغناطيسى
لازم تبقى بمزاجى بقى
واحاول احتفظ بيها واكبرها
واخلق منها شىء


عارف اللى مزعلنى ايه دلوقتى ؟

انى فجأة بحس انى مليش لازمة
عند انسان غالى قووووى عندى
كنت اتمنى اكون ف حياته مهمة لدرجة ما
مختلفة بشكل ما
استحق يحتفط بيا
لكن للأسف ...
محصلش
او يمكن انا معرفتش اكون كدا
فتلقينى زعلانة كدا من نفسى وعلى نفسى وعلى حد بحبه ساعات كتير والله
اكتر من نفسى


انا انفتحت كدا ليه ف الكلام ؟!!
خطرفة خطرفة
متخدش ف بالك

ولو انى معرفكش بالضبط
بس نورت



:)

http://www.youtube.com/watch?v=jQ44-mKyr_c
قبل اى شئ اسمعى الفيديو ده كويس
ثانيا انا كتبت البوست ده من وحى خطاريفك يارب يعجبك
http://mero200528.blogspot.com/2011/03/blog-post.html

ثالثا شكرا يا بطه انك كنتى السبب انى ارجع اكتب تانى

رابعا بحبك ياقلب البحر

كلمات في قمة الروعه تقبلي مروري بكل ود
احترامي

فاتيما
يوم التبرع كان حلو قوى
بس هى الشيكولاتة بتطلع من الهدوم؟
عااااااااااا

كلامك يا بنوته يخلي الواحد بدون تفكير يطبطب علي قلبك الذهبي داه ...ربي يدفيكي دايما بمشاعر الحب والإيمان

انا متابعة مدونتك من زمان بس اول مرة فعلا اكتب تعليق
قعدت اقراه مرة و اتنين وتلاتة وقلبي وجعني اوي و معرفتش اقول ايه
كل اللي ممكن اقوله انك ساعات تحسي انك لازم تاخدي القرار ده بنفسك و انه ييجي منك انتي بدل ما تستني اللي قدامك ما ياخده
بتبقي عارفة ان النهاية لازم تحصل فبتمتلكي الشجاعة و تنهيها انتي
تنهيدة كبيرة و قلب موجوع :(

عاشقة الرومانسية
----------------

مسمعتش الفيديو يا دودو
قريته

انا بفضل اقرى الشعر بتاع هشام
اكتر ما اسمعه
لأن اسلوب القائه بيضايقنى شوية

لكن قريته
وكالعادة ...اختياراتك
بتيجى ع الجرح


اما البوست
فتعليقى هيكون هناك


وحمدلله ع السلامة
لازم اكسرلك قلبى فتافيت
عشان تحنى علينا وترجعى تكتبى ؟!!

طيب
خلاص عرفنا السكة

:)

انا بحبك كمان وكمان
يا عروسة البحور
وقطتى الحلوة


منحرمشى منك

وردة الحياة
----------

الف شكر ليكى

نورتى المدونة

:)

كلمات من نور
------------

ميرسى يا كلمات

الطبطبة حصلت
والدعوة انا محتاجاها فعلاً

منحرمشى منك

افكار مبعثرة
------------

اولاً
انتى نورتى
وانا بزعل قوى لما حد يقولى انه بيقرى من زمااان ومبيعلقش
ليه بس كدا ؟
طب انا اعرفكوا ازاى ؟
يعنى فرصة التواصل بالنسبالى بتنعدم تقريباً ..لما تبقى المتابعة من طرف واحد
وبستغرب ف اى لقاء تدوينى لما اجى اعرف نفسى بحد ..الاقيه يقولى انا عارفك وبدخلك ..وانا مكنش عارفاه
بزعل قوى ..
اكتبوا تعليقات ياخوانا ..هوه انا هعضكوا !!!

ثانياً
انتى فعلا يا افكار
قريتى الكلام تقريباً زى انا ما كتبته
وكأنك بتقرى افكارى
منتيش افكار مبعثرة ولا حاجة هو
:)

فاضل الشجاعة
بس مش الشجاعة بس
القلب المفترى
الواحد عاوز قلبه يتعلم يبقى مفترى
يعنى يبقى قاسى وظالم ويدوس على نفسه قبل غيره ..عشان يعرف ينفذ قراره بالبعد
مبعرفش اعمل كدا
وبحاول ازنقنى
احطنى ف كورنر قصاد نفسى
وقصادكم
يمكن اعرف بعدها
مطلعش عيلة
واكمل


انتى نورتينى

ومتقطعيش التعليقات

:)

للمرة التانية
اللى كاتب تعليقه كلمة واحدة
---------------------------

وانا بقولك ..شكراً
اقول ايه تانى ؟!!

برغم بساطة الكلمات
لكن الاحساس صعب وبيوجع
قلبك جميل ومحبتك للجميع اجمل وده ح يحسسك بالدف اكيد
ربنا يسعد قلبك

اختى فاتيما

تحياتى و سلامتى

اخى جاوز الظالمون المدى

وصلت الحالة الى منطقة صعبة بفضل فلول امن الدولة و الحزب الوطنى لان ما حدث هو عمل ممنهج والا كيف حدث فى يوم ما لم يحدث فى شهر و للاسف يستخدمون البسطاء كوقود يحرقون بهم و يحرقنوهم لذلك ادعوكى و ادعو كل المدونين و لجأت لكى لان اعرف انك محبوبة من الجميع بترك المدونات و الذين يقراها و النزول الى الناس البسطاء و توعيتهم حتى لا يتم استخدامهم كسلاح مضاد و ليكن البداية يوم الجمعة القادم كنت ساقول الان و لكن حتى يتم الترتيب له الذهاب الى قرية صول باطفيح و الوقوف لمدة بسيطة امام الكنيسة ثم النزول الى الناس البسطاء و التحدث معهم و توعيتهم فانا سبق لى الذهاب الى هذه المنطقة التى تتميز مثل بقية مصر بقليل من الغنى الفاحش و الكثير من الفقر المقدع لان المعلومات الاولية التى وصلتنى ان من حرك احداث اطفيح احد فلول الوطنى و ساكون اول من يشارك انا و اولاد مهما حالت الظروف فاتيما استحلفك بالله طريق الالف ميل يبدء بخطوة و لتكن تلك هى الخطوة من قبلنا
ارجو ان لاقت الفكرة قبولك او اضافة او نعديل ان تنشريها
خاص تحياتى

عجبتني جدا كلمة بحاول ازقني و احطني ف كورنر قدام نفسي :)
ده فعلا اللي بيحصل اوقات كتير تلاقي نفسك بتهرب منك و مش مدياكي فرصة عشان تجمدي و انتي تجيلها من هنا و من هنا لحد ما تزنقيها و تخليا تجمد وتاخد القرار بيبقى ماراثون طويل و بياخد من وقتك و طاقتك اويييييييي
و حاضر مش هقطع التعليقات :):):)

إرسال تعليق