.

.

هــّوه الضـــرب دا جـــاى مـــنين ؟!!!  

Posted by: فاتيما in



تحذير على جنب 
الفقرة الجاية م التدوينة غير نظيفة
ودا اضطرارى بس المرة دى 
و مش علطول 
ماشى؟


يحكى ان واحدة ست - لامؤاخذة -يعنى 
مش كويسة و مش تمام
 حفلات وسهرات غير بريئة
ورجالة داخلة خارجة
خارجة داخلة 
داخلة خارجة 
غّير القلم .. غيّر القلم 
صبح وليل 
وليل وصبح




المهم .. كان عندها بالصدفة 
بغبغان كدا ... قليل الرباية 
كل ما يشوفها داخلة مع حد 
يروح شاتمها وقايل بعلو صوته :
انتى ولية مش نضيفة .. بنت *تيييييييت 
انتى  ولية مش نضيفة .. بنت تيييييييت



*تيييييييت : شتيمة ابيحة 
عشان الناس المهذبة  قوى
وبتدخلى و مش هتفهم
  
 الست اتغاظت منه قوى 
لإنه بيكسفها مع إحم إحم  .. الضيوف
فقررت تبيعه وتخلص من قرفه




راحت لمحل العصافير 
وحطته قصاد البياع
وقالت : خده مش عايزاه




الراجل الفضول كاله وسألها : ماله ؟
حكتله القصة 
ابتسممممم قوى 
و قالها : سيبهولى اسبوع وتعالى 




بعد اسبوع رجعتله 
قالها : خلاص يا ستى البغبغان إتأدب 
وخديه على ضمانتى 




الست مصدقتش 
فجاب البغبغان عشان تطمن .. وقاله  :
لو ملمتش نفسك هنتف ريشك 
واحطك ف المية المغلية .. فااااااهم ؟




البغبغان وطى راسه وانكسر
وقاله : طيب 




الست برضو مطمنتش قوى 
و قالت تختبره .. فسألته :
طب يعنى يعنى يعنى 
لو شوفتنى داخلة ومعايا راجل 
هتقول ايه ؟
البغبغان : هقول عليه اخوكى 



سألته : طب لو شوفتنى داخلة 
ومعايا اتنين رجالة .. هتقول ايه ؟
البغبغان : هقول عليهم اخوكى وابن عمك 


سألته : و لو لقتنى داخلة 
ومعايا تلات رجالة .. هتقول ايه؟
البغبغان : هقول عليهم اخوكى 
وابن عمك  .. وابن خالتك

سألته : طب ولو دخلت ومعايا اربع رجالة ؟
راح البغبغان باصص للبياع و قاله  :

يا عم هات المية المغلية 
دى ولية مش نضيفة .. بنت تييييييييت





- تمت  -


النكتة الرخمة دى بتلح عليا جداااااا 
الأيام دى وافتكرها 
كل ما اشوف وجهات النظر المتابينة 
حوالين موقف بعض الناس (كتير للأسف )
قصاد الممارسات العنيفة
اللى بنشوفها تجاه المعتصمين
ف ميدان التحرير ..مثلاً 
و المفروض انهم وسبحان الله 
يفترض يكونوا معروفين شكلاً واسماً 
واللى لازم يبقوا ف كوم 
والبلطجية والغوغاء ..المعروفين برضو 
واللى لازم يبقوا روخرين .. ف كوم تانى
وأصول منحطش ابو قرش على ابو قرشين 



بس لما بيتلموا الاتنين على بعض 
ف فورة غضب بلا اسباب واضحة 
ويتعاملوا نفس المعاملة  .. المهينة
يبقى الحكاية فيها إناااااا


 
واذا كنا فوتنا الأربع  الأسود ..2 فبراير 
و فوتنا الجمعة المؤلمة ... 6 مارس 
و فوتنا الأربع الحزين .. 9 مارس 
وبما مر فيهم من احداث مؤسفة موثقة
بشهادات ناس محترمة
معروفة بخوفها ع الثورة ومصر 
فلحد امتى هنفضل ... نغض الطرف 
ونودى وشنا بعيد .. ونستعبط ؟!!




غالباً السؤال دا اجابته غير معلومة
لأنها هتكمن فى جزئية هامة 
ومحدش عارف 
بالضبط ..هتحصل ازاى 
بس هيا المشكلة الحقيقية 
مش ف الولية اللى مش نضيفة 
ولا ف البغبغان ابو لسان طويل 
و لا ف البياع اللى هيروض ابو لسان طويل 
المعضلة الحقيقية فى .. ماذا بعد ؟
ماذا بعد فضح الست دى
وماذا بعد نتف الريش 
والرقود فى حلة المية المغلية ؟!!


كيف سينتهى المشهد ف رآيكم ؟





يعنى احنا كدا مش باين اننا 
بننضرب وبنتحدف بالطوب
ولا إيه النظام ؟!!



واصلى انا حالياً احدثكم من 
على قمة جبل اليأس 
وامبارح كنت ف الميدان بحضر كالعادة 
واتفرج ع الدنيا
وكالعادة عينى راحت على مناظر 
حلوة كتير ..لكن اتوجعت معاها 
لأنها ببراءة ..بتتخنق 




ستات قاعدين جنبى شمال ويمين 
جايين من السويس
وحتت تانية بعيد 
اسرة مسيحية بالام والعيال 
جت توقف جنبنا وتهتف وتتكلم وتتناقش 
كنت لابسة قماشة اى كلام 
عليها المواد الدستورية المعدلة 
وكأنها ترقيعات 
ناس صورت المنظر وناس وقفت تناقشنى 



مكنش فيه اى ظهور واضح للجيش 
ولا حتى الشرطة اللهم بتوع المرور 
اللى قبل الصلاة بشوية اختفى اثرهم 
وسابوا الميدان للناس 
ورغم ان مفيش جيش ولا شرطة 
الدنيا كانت امان ومحصلش اى حاجة 
ع الأقل لحد ما مشيبت 




الناس كانت بتشترى الجلاد وتوزعه 
ع الكل ببلاش عشان يصلوا عليه الجمعة 
وبعد الصلاة ولاد خدوا الجلاد وعملوه 
على شكل صليب 
كنت هعيط من المشهد 
هذا الورق كان مصلية من دقايق فاتت 
والآن يتحول لصليب .. والمشهدين 
فيهم اسم ربنا يعلو على أى شر 
ايه الروعة دى ؟





انا بتأثر لأنى التصرفات دى 
تلقائية بحتة 
متحصلش غير من قلوب 
صافية ونضيفة ومحدش بيزقها 





حضور صلاة الجمعة ف الميدان 
بيخلق حالة معرفش اوصفها مهما حاولت
لحظات ركوع المصلين 
والكفوف لما تترفع للتآمين ع الدعاء
ف مطرح كهذا ..كان مجرد ميدان 
تمشى فيه عربيات 
وتحصل فيه ميت خناقة يومياً 
وتحول الآن لمطرح ..داخل التاريخ 
من اوسع باب واشرف مكانة 

حاجة لا توصف


والرائع ان
ليبيا كان لها حضورها 
ف اللافتات و الأعلام المرفرة و الدعوات 
و المناداة بالثبات ف وجه الطاغية 
مدمر القذافى




 امام جامع عمر مكرم 
يدعو المسلمين
لبناء الكنيسة بأموالهم 
والجميع يهز رأسه بالموافقة والتأييد




والميدان
آه من هذا المكان  
هذه الارض  .. اللى روتها دماء طاهرة
وزلزلتها اقدام غضبت للحق 
ويسجد عليها الآن ..قلوب طيبة 
يهرع اليه كل جمعة 
اصحاب النوايا البيضاء
والمطالبين لهذه البلد بكل الخير والعدل
راسمين العلم على وشوهم 
وهذه المرة رسموا الهلال حاضن الصليب 
لافتاتهم تدعو ببراءة للإتحاد ف وجه الفتنة
وان امن الدولة وراها اكيد 
و عارفين بنباهة ان الدستور الحالى 
بتعديلاته .. ميكلش معاهم 
و عاوزين دستور جديد
الكبار والشباب والنساء حاضرين 
والاطفال بيجروا ويلعبوا ويضحكوا ويعيطوا 



اللى جاى يطالب بحق شخصى 
او مطلب عام 
اللى جاى يرسم ع الوشوش بريشته
واللى بيبيع مناديل و مية و كروت موبايل 
اللى شايل اعلام وشارات 
و استيكرزات وطواقى وبيسترزق
واللى رافع موبايله او الكاميرا بيصور
مشهد لفت نظره 
مذيعى الفضائيات بين الناس بيسألوهم 
ومناقشات جانبية بين بشر
اول مرة يشوفوا بعض وفيه ثقة غريبة
وناس بتيجى كل جمعة وفاكرين بعض 
وف المرواح بيسلموا ويقولوا : 
نشوفكوا الجمعة الجاية ان شاء الله 


 
ف وسط كل هولاء الانقياء 
يعشش غربان الخراب ف الأركان والزوايا 
و يخططون لطمس معالم الميدان والثورة 
وحصر الحكاية ف يوم احتفائى وفقط
وكله يروح ..ويحيينا ربنا بعدين
خفية يفعلون وبنجاح للأسف 
حتى الآن


الدنيا مكنتش منظمة كالعادة 
خصوصا فيما يتعلق بالمنصة
بس الملاحظ وعجبنى جدا بصراحة 
لما قائد المنطقة المركزية 
طلعوه ع المنصة يتكلم
هوه قوبل بهمهمات معارضة 
طمسها  هتاف
الشعب والجيش ..الخ الخ 




راح ماسك المصحف والصليب 
و قعد يهتف :
مسلم ومسيحى  ..ايد واحدة
الواقفين غالبيتهم هتفوا وراه 
لكن من وسطهم 
  تعالت اصوات طالبين منه 
تفسير لما حصل ... يوم الأربع
مردش وكأنه مسمعش ولا قال كلمة






آخرين ..هتفوا  : 
الجيش والشعب ايد واحدة 
محدش ردد وارهم 
بنفس الحماس المعتاد 
الراجل لما شاف المنظر كدا 
ردد مسلم ومسيحى ايد واحدة .. تانى
وكلنا نغنى بلادى بلادى ...!!
ملقاش اى تجاوب من الموجودين 



معرفش ليه حسيت 
ان اللى حواليا فاهمين كويس
اننا بيتم تجاهلنا .. ومشوها تجاهلنا 
و فجأة حسيت فعلااااااا انى واقفة 
ف حوش مدرستى الأبتدائى 
وبيخلونى اغنى النشيد .. غصب عنى 
فسكتت 
وسكت ناس كتير حواليا 
ومحدش غنى وراه 




بصراحة 
المنظر كان يكسف
بس انا منكسفتلوش بالمرة 
غنى ايه دلوقتى 
و فيه ناس اتصعقت و اتبهدلت
والساكت ف الأحوال دى
(لو ساكت بس مش مشارك) 
يبقى معناها ..  موافق
دا غير اللى ماتوا ف الفتنة 
بتاعة كنيسة اطفيح ..و راحوا هدر





العجيب بقى 
انه لما طلع متحدث بالنيابة
عن المعتصمين ف ميدان التحرير 
عشان يشكو مما حصلهم من اعتداءات 
تحت سمع و بصر الجيش
قال ف الأول (الشرطة ) والناس صححتله
فأتك ع لفظ الشرطة تانى 
وف الآخر قال .. الشرطة يعنى الجيش 
طبعا ناس كتير حاولت تسكته 
وكأن الإعتصام مش حق لكل مواطن 
زى ماهما دلوقتى 
وافقين ف الميدان بيتظاهرو .. 
ودا حق ليهم بيستعملوه  ؟!!



والأغرب وان كان مش غريب والله
ان جرايد الملوخية 
و شخبطات سيادتك تخطيط لمستقبلنا
النهاردة ف تغطيتهم( المهنية) لليوم
مجبوش سيرة دا خالص
وكل اللى قالوه وبتأكيد .. الشعب يؤيد 
اللى قاله الجيش متمثل ف الروينى
و ان شباب الإئتلاف يدعو الشعب 
لفض الأعتصام (الوحش دا ) وبشدة !!


فعلا 
العالم دى مفيش فايدة فيها 
؟!!!



طب نعمل ايه ؟
نبطل نتكلم ؟
انا عاوزة اسكت م القرف 
بس السكوت مش حل 
السكوت دلوقتى يبقى هروب 
و انسحاب و قصر نفس 



المشهد امس يبعث على الحزن
كان المفروض يكون يوم الألتفات 
للتعديلات المنقوصة والدستور 
اللى عاوزين يسلقوه سريع سريع 
ويركّبوا بيه واحد - نقاوة- على انفاسنا 



ف ميدان مصطفى محمود 
(يا رب يسامحنا)
يتردد اسم احمد شفيق 
(اللى إختشوا ماتوا) 
وعمرو موسى يحشد امكانياته
(صباح الخير توك ما صحيت)




استبدلوا الشرطة وامن الدولة .. بالعسكر
ومازالت الوجوه العكرة تطل علينا 
زكريا عزمى و خلفه الشريف وشرور
نزولاً لتامر امين والمناوى و رؤساء التحرير
الفلتة عصرهم واوانهم 


عصام شرف المحترم يغرق الأن 
ف تفاصيل كتييييير
و بيتم الغلوشة ببراعة على 
مطالب الثوار الاهم وهى  
ان يقطع دابر الأذناب وتحجيم حركتهم
والدستور الجديد 
والأنتخابات النضيفة
اللى هتفرز نظام انضف
ولا يحدث هذا حتى الآن 
مع ان السرعة مطلوبة وبشدة 



والمشهد كالآتى
الثورة المضادة ف اروع تجلياتها 
و التركيز على شغل الحكومة الجديدة
ف كوارث جانبية وترويع  للمواطن العادى
عشان يتنسى الاهم وُتشتت الجهود




وجوه قبيحة تتصدر المشهد تانى 
وترمى بقاذورات الكلام ع الثورة 
و تستعرض سفالتها المعتادة 


واللى يتكلم عن الأعتصام  ف التحرير
يبقى عاوز يوقف حال البلد 
ويسكتوه




اللى يتكلم عن الجيش 
يبقى لازم امن دولة و خاين وعميل 
..مهما حاول يفهمهم 
انه ميقصدش الجيش وانما مستويات منه
ومبقاش فيه سعة صدر خالص 




رجعنا تانى عاوزين نبقى امورنا 
ف يد غيرنا
وعاوزين نلاقى حد ياكلنا ويشربنا 
وميخليناش نشيل هم 
الأمن والمستقبل



عاوزين نخلص بقى 
ونجيب ريس بسرعة 
عشان نخليه اله وفرعون تانى 
متناسيين ان الدستور الحالى يدعمه 
واللى لقى فرعنة ومتفرعنش 
يبقى حرام عليه وهيخش النار حدف 



عاوزين نسمع ونشوف الولاد اتبهدلت
واتصعقت وانضربت و اتعذبت 
فنودى وشنا الناحية التانية بسرعة 
ولا نطالب بتحقيق واعتذار و وعد 
حقيقى و نهاية لهذا للغدر 





هوه انا اللى لوحدى 
حاسة انى الضرب بقى جاى 
من كل حتة 
ولا دا شعور عام ؟!!!





حق الاختلاف مكفول للجميع 
ولو بعضنا موافق على كدا 
فمش كلنا عاوزين كدا 
و هذه الفئة مش لازم  تسكت 
و تقبل وتيأس م تكرار الكلام 
و لو اشتد التيار اكتر .. 
الثورة جت عشان نقول كلمة حق
ولا نخشى ظلم 




ولو دا محصلش 
ومش هيحصل قريباً 
يبقى لموا الكراريس 
وانتهى الدرس ....



اختاروا اللى ناويين توجهوا 
ضرباتكم ليه ... صح 
متضربوش اللى معاكم 
واللى بيشاور ع الخطأ ورافضه

  دى فرصة لن تتكرر تانى ف العمر 
انك لما تشوف الغدر والغش والظلم
تصرخ بعلو الصوت
م الاول ... ومتكابرش
و متستناش لما يسألوك



طب لو شوفتنى داخلة مع ...


لأ  .. على بلاطة قولها 

ياعـــــــــــم 
هات المية المغلية



ورزقك ع الله يا بنى 




--------------------------------------


This entry was posted on السبت, مارس 12, 2011 and is filed under . You can leave a response and follow any responses to this entry through the .

9 كــــلام بيطــبطـــب عـــلى قــــلبى و روحــــى

كالعادة بنزل البوستات الوطنية سوا يا فاتيما


انا زعلان والله من اللى بيحصل و اكتئبت فعلا
ربنا يسترها

انا بقول نعمل قايمة اغتيالات
ونقتل احنا بإيدينا كل اللى الفاسدين

مش احنا عملنا الثورة ؟ يبقى ناخد قصاصنا بإيدينا بقى

هاتى المية المغلية من دلوقتى انا لسة هستنا لغاية متروح وتدخل مع....
هاتيها من دلوقتى المية المغلية

VÖltaa
-------

طب ودا حل يا فولتا ؟!
اومال الحكومة لازمتها ايه ؟
و هتعمل ايه؟!


الثورة دى اروع ما فيها
انها سلمية من البداية
واى عنف حصل فيها كان رد فعل مضاد
ومكنش ضربة البداية

القصاص حق
لكن له طرقه واساليبه

ومن ناحية الأكتئاب
فعندك حق

انا اصلاً بعد ما نشرت البوست
فكرت اخليها مسودة
وحسيت انه ملوش لازمة

ولا فيش فايدة

قريت اخر بوست لنوارة نجم

http://tahyyes.blogspot.com/2011/03/blog-post_9383.html

وصدمنى طريقتها
سواء ف الكلام او التفكير
رغم انى انا بحبها جدا
بس مبسلمهاش دماغى

لكن صعبان عليا
التشرذم والفرقة دى
والنيران الصديقة

ربنا يساويها من عنده

ويسترها

ياض كل ما اشوف الصورة بتاعت البروفايل بتاعتك دى جنب تعليقك ..
اضحححححك وانا مليش نفس

:)

اصلها اختيار اجرامى
سخصية فيها شقاوة الدنيا
واللى هبه سعادتك

دا لقبك من الآن فصادعا
شقاوة الدنيا يا فولتااااا

ربنا يسعدك

واد لخمة
-------

:)


نوّرت

ههههههههههههههههههه
والله البغبغان ده غلبان وياما شاف واستحمل وخلااااااااااااص زهق

هاااااااااااتي الميه المغليه
المغليه اوي اوي اوي كمان

فاتيما
روح القلب الملائكية

اولا لا تكتئبى يااختى

لكل ثورة مكاسبها و خسائرها لكننا لا نتحمل الخسائر متضايقيش منى لو قلتلك انا اعذر الجيش فهو فى منطقة لا يجيدها بالاضافة الى الضغوط المتتالية فوارد الخطا انا سافرت اطفيح يوم الخميس و كل اللى انا متوقعه رايته هناك يبقى لازم نهدى شوية لان المصالح المضادة لا تعمل الا فى الظلام و الفوضى يبقى هما بيعملوا اعمال غير شرعية و يلبسوها ثوب شرعى و بيلعبوا على اكثر الاوتار حساسية الدين و المطالب الفئوية
واضح انك لم تقرائى البوست الاخير لى
خالص تحياتى

انا هطق بجد من كم السلبيه اللي بشوفه

دلوقتي تقولي فلان اتعذب عاااااااااادي خالص اكنك بتقولي اكل شكولاته

الرد : لازم العنف عشان يسيطرو علي الفوضي

منتهي قلة الدم

زي ما ااحمد قال وانا مقتنعه بكل كلامه

تسليم السلطة لمجلس مدني ان شاء الله يقعد سنة المهم لما نبدا نبدا علي طهارة اليد والعقل

تغير الدستووووووور لانه سقط
اصلا بالثورة

محاسبة كل فاسد مالي او له يد في ملفات الدم ( صغير - كبير ) ( آمر : مأمور ) اللي علي عينك ياتاجر

هرررجع اقزلها تاني
ااه ياني
قلبي متقطع عشر تلاف حته
ونفسي اجمعه بقا
يجد اتخنقت
مش صر نفس
بس اللي اتقال
علي رأي المسلماني
مصر تقدر تقوم تاني علي رجلا
ف12 يوم بس
اذا خلصت النوايا:((

امتا بس
يـــــــارب
حلها من عندك

أهو أنا لسه باصص في الريدر عندي دلوقت لقيت 5 بوستات ما قريتهمش من مدونتك أولهم ده
طبعاً انتي عارفة رأيي و اني متفق معاكي
بس فعلاً بسبب التصرفات المقرفة بتاعة المجلس الأعلى و تعذيب ناس و حبس ناس تانية بمحاكم عسكرية ظالمة فبأقول نعم للتعديلات و خلينا نخلص من الحكم العسكري بسرعة
و لو اني بره مصر فلا حأعرف اقول نعم و لا لأ

إرسال تعليق