.

.

أبــى فـــوق الشــــجرة ...  

Posted by: فاتيما in

 


لأ 
لأأأأأه 
محدش يكلمنى ولا يهّوب ناحيتى 
أنا زعـــــلانة 
لأ زعـــلانة زعـــلانة
و اخـــص على كدا اخــــص
إخــــص ع الحــلو 
لما تبهدله الإيام 
ايه اللى جـــرالك يا شعب ؟
ليه بقيت غلاوى و حئودى 
و قـلبك اسود كاروهات كدا 


ومكـنوش كـام مــيريار زورار دول 
اللى هيوقعـــونا ف بعــض
شعب و اب ؟ 


يعنى جرى ايه لما الريس بتاعكم 
يبقى رصيده ف بنوك امريكا 
ما يوازى ال 31 مليار زورار 
قصدى دولار .. و علماً بإن 
دول اللى حـدا الأخوة الأمريكان بس 
و لسه منعرفش اللى تحت البلاطة 
عند الأشكاااااء ف سويسرا وبنوك أروبا 
هيطلع كـــام ؟
بس يعنى
فلنكـــتفى بال 31 دولهمو 
ونتكلم سوا حديث المواطن لإخوه المواطن 
وإسمحلى اسأل و أزنقك و اقولك 
مالك 
كان فيه حاجة إن شاء الله 
و إيه اللى قاهرك كدا ؟!!!


الراجل يا كبدى قاعد ييجى 30 سنة 
ولا حس ولا خبر و لا بيكلمنا 
ولا بيضايقنا غيرش هما يا دوب 
شوية نقرزة على خفيف .. كل سنة  
ف عيد العمال و ذكرى اكتوبر وثورة يوليو
و افتتاح دورتى  قعدتىّ الشعب 
والشورى و ف طلعة رجب و وقفة عرفة 
و باقى السنة ... كما ابا الهول 
جبل و صابر على الهم .. و لسان حاله 
يا مواطن  يا مصرى
من برا و جـــوه فرشتلك 
وانتا مايل وإيه يعجبك  
وعمال تزود ف أنفار ف عداد السكان
وهوه يشيل ف همك وهمهم
وانتا عايم ف مية البطيخ 
ولا فارق معاك أى حاجة

جرى ايه يعنى لما الراجل 
ياخد نسبة ع الأدارة
ولا دمه هيتحرق ويتبهدل ف السفر
والشحاتة على حسك 
من كل دول و بقاع الدنيا 
وانتا قاعد بتاكل ف آته محلولة ولا همك 
وف الآخر يا قلبى .. ميلقيش 
لا حمد ولا شكرانية 
لأ وكماااااااااان 
رايحلى انتا والمودام والعيال ع التحرير 
تبات وتزعق لحد ما لوزك بانت 
وانتا بتفرج عليه امة لا اله الا الله
العالم اجمعه 
و بتقوله امشى ارحل غـــور 
وتبقى آخر خدمته لينا علقة 
وكمان مش عاوزينه بعد كل التهزىء دا 
ميخدش  مكافأة نهاية الخدمة
يا ظلمة 
يا شعب ميختشيش ؟!!


هتقولى طب إنتى مش شايفة
ان  المبلغ كتير شوية ؟
هقولك انتا ايش فهمك ف الفلوس 
يا بتاع الجنيه المعدن
و شهادات الإستثمار أ و ب و ج
والمرتب والإضافى و الحوافز وال 20%
و تيجى ايه يا غلبان ف الناس الواعية 
اللى بتعرف تستثمر مرتباتها  
وتلعب بالفلوس لعــــب ؟!!
بيلعب بالفلوس .. آه 
اومال اعلى منصب فيكى يا مصر 
هيلعب ايه ؟
  
طاولة ؟
دا مين دا اللى يستجرى يحبس عليه ؟!
دومينو ؟
دا مين دا اللى يستجرى يقفل عليه؟
شطرنج ؟
دا مين دا اللى يستجرى ينطقها ف وشه 
و يقول ..كش ملك 
وطبعا مينفعش لعبة 
السلم والتعبان 
عشان أسمها لوحده .. فيه تلقيح
ولا ينفع الليدو 
عشان كلمة ليدو دى شكلها أبيح

و الكوتشينة ... تؤ تؤ طبعا 
لأن فيها اربع ملوك ودا مرفض بوتيتاً


فخلاص بقى 
مبقاش فاضل  .. غير بنـــك الحظ 
وكلنا لعبناها واحنا عيال وهارشين
ومفيهاش حاجة لما مصر كلها 
تتحول لرقعة كبيرة من بنك الحظ 
واللى ماسكها
يبيع ويشترى ويشيل ويحط 
ويوزع ويقسم ويستلف 
ويستف ويورثّ  ويتسلى
وف الآخر ...ال 31 مليار حقه بعد التعب 
و اهم
مش لاقيين كمان اللى يصرفهم
وكله من عينيكو اللى هتفلق الحجر 


جرى ايه ؟!
مش نستهدى بالله كدا
وبلاش النفسنة دى
عشان ربنا يباركلنا ف الكام ملطوش 
اللى بنقبضهم كل شهر شقارة ونقارة 
وبيخصموا منهم بكل همة وانتظام 
الضرايب والمستنقعات
وميسكتوش على حقهم 
وبيقولولنا نستنى ع الزيادة 
الخمآشر ف المية شوية  
خصوصاً اننا داخلين على ايام صعبة 
والبورصة وقعت 
و قربنا نقع احنا كمان معاها م البلكونة 
 وحد يلحق المشابك عشان 
ميبقاش موت وخراب ديار 


وعلى سيرة الغسيل فيعنى 
 لو نيتكم بيضـــا
وكل يومين تغسلوا برابسو 
ومش باصين لغيركم ف رزقه 
مش كان ربنا فرجها علينا دلوقت
و كان واحد زى احمد عز شخشخ جيبه 
و هز المبلغ اللى عرضه شوية 
عشان يطلع صاغ سليم م المحاكمات
وخـــلاه يزيد عن المليار 
و كان خلاه بالدولار حتى 
مش بالجنيه الصومالى بتاعنا ؟!!
ولا بتاع الاخبار العهدى الفضلى 
كان ينكسف على دمه 
ويزود ال 400 مليون قد 100 ميتين كمان 
واهم كانوا فكوا زنقة ف الأيام 
الفحلوقى دى ؟
  

انتوا كدا  يا شعب
تفضلوا تنبروا ف الحاجة لحد ما تفطس 
و ياخدها الغراب ويطير   
طب اهى امريكا جمدت الفلوس 
بدل ما كنا ناخدها ونكومها حدانا 
ف الفسحة 
اكوام اكوام اكوام 
ونستفهم 
العشرات لوحديهم 
والخمسات لوحديهم  .. رزمممم


طب اهى قعدت عند الخواجة ف الديب فريزر
وحلنى بقى على ما يخرجوها و تفك 
عشان نسويها وناكلها وندفع م الباقى 
فاتورة التليفون و قسط النت 
ونقوط فرح بنت عم عب السلام البواب  
 عشان جوازها قربّ عقبال عندكو 

عيب 
عيب يا شعب 
انا مكسوفلكم والله 
وعاوزة من هذا المنزلق التاريخى 
اعتذررررررر قوى 
لكل الناس السوكرة اللى رفعوا شعار
لا للإهانة 
وإحنا آسفين يا ريس 
ومبارك هـــــو الأب 
أنا بعتذرلهم بعد ما عرفت 
حقيقة ال31 ميريار دول 
وأقر إن مبارك ابويا وسيدى وتاج راسى 
ومكنتش اعرف والنبى 
إن غلاوتنا عنده كبيرة كدا 
وانه شايلنا مكافأة المعاش بتاعه  
عشان كلنا نتروق ونشهيص بيها
بعد عمر طوييييل من التنكيد عليه يا كبدى
وهوه شايل .. وكاتم .. ومعّبى
 

لأ بقى احنا عاوزين فلوس ابونا 
الحق حق .. و دا ورث
ولا هيستكردونا و يرجعوا يقولولنا 
ف المشمش ؟!!! 

تخيلوا معايا .. حق الأبوة ف 30 سنة 
ب 31 مليار 
وإقسموهـــم  على 
ييجى 100 مليون مصرى 
هـــنا وبرا البــــلد 
و  شوفوا كل نفر يطلعله قد ...
ممممم ... يا خراشى 
قد ييجـى خمستلاف ست الاف جنيه 
ويمكن أكـــــتر
خدوا بالكوا انا بحسبها بالويم كدا
والكلكليتور مش معاياااااااا
انما الخبراء ف الإكتصاد يقدروا يفيدونا 
ف النقطة دى اكتر
بس نتلايم ع الفلوس


بس بجـــد 
الله 
الله عليك 
وربنا يخليك يا ريسنا 
وياخدك يا رب 
عشان نورث 
ونقب على وش الدنيا 
وندعــــيلك


يا سلااااااااااااااام  
حقيقى الصبر نهايته خير 
ويا ريت نصفّى نيتنا من جوه
عشان ربنا يبارك 
ومتبقاش آخرتها نرمى نوى المشمش 
ونقعد جنب الشجرة نستنى كتير

  

و
سؤال أخير والنبى 
ال 31 مليار دولار دول 
يطلعوا كام لما نيجى نحولهم 
لعملتنا الوطنية المحترمة اللى بتهز 
بورصات واسواق المال فى العاااااااالم 
الا وهى ..
الربع جنيه المخروم  ؟!!؟

---------------------------------
-----------------------------------------
---------------------------------------------------
ملحوظة على جنب 
اختكم تتوجه بندااااااااء 
انى يوم السبت مش عاوزة أروح 
الإستفتاء لوحدى مقطوعة كدا 
فأى حد داخل حدود القاهرة الكبرى 
ياخدنى معاه  
و هيكسب فيا ثواب .. 
لأنى محدثة 
وأول مرة انتخب ... ومتهيألى
لما نروح جماعة هيبقى افضل  
آه .. 
ويا ريت الصحبة يكون فيها رجالة
عشان لو إنضربت ولاّ خدت شومة 
يحوشوا عنى شوية 
و لا هنضرب لوحدى انا ؟! 
او حتى الاقى اللى يودينى الأسعاف 
او يروحنى لأمى 
و موشكرين
----------------------------------------- 
 

This entry was posted on الخميس, مارس 17, 2011 and is filed under . You can leave a response and follow any responses to this entry through the .

18 كــــلام بيطــبطـــب عـــلى قــــلبى و روحــــى

ياريت يكون ده اخر الحرامية

ربنا يستر

قلبى مش مطمن على بكره

لأ بقى احنا عاوزين فلوس ابونا
الحق حق و دا ورث
ولا هيستكردونا و يرجعوا يقولولنا
ف المشمش ؟!!!


قلبتي عليا المواجع خلينا في الدستور وهمه وسلق بيضه ده .. ياخوفي لمنعرفش ناخد الفلوس دي ويقولولنا في المشمش .. انا بموت في المشمش بس مش المرة دي .

* ملحوظة كل اسرة متوسط افرادها 5 افراد تاخد 50000 زورار اااقصد دولار هههه

لولا

إعتذروا عن الخطأ غير المقصود
و قالوا إنها زلة لسان من جون كيري
و انه كان يقصد القذافي
يعني الـ31.5 مليار دولار بتوع القذافي و ناهبهم من شعب ليبيا
بس أنا واثق إن مليارات مبارك حتظهر عن قريب

ههههههههههههههههههههههههههههههههه
هما 30مليار ونص اوعى تنسى النص اللى ملحقش يكملو ويخليهم 31
بجد بوست جميل واسلوبك حلو وخفيف
وخلاص زمن الشوم انتهى خلاص
ننتظر خطاريفك على احر من الجمر

تعالى معايا انا وماما يا فاتيما ومتخافيش وحشتينى قوى والله

شعب غلاوي صحيح

ههههههههههههههههههه

Tears
-----

تفتكرى يا تيرز ؟!!

الحرامية مبيخلصوش م الدنيا
بس المثير للسخرية
ان قاعدتهم بتبقى عريضة فى طبقات الحكام دوناً عن باقى خلق الله

يمكن السبب ف كم الثروات اللى بتبقى تحت ايدهم والمال السايب ... ؟!

يمكن

ربنا يستر ان شاء الله
وروقى كدا انا عارفة ان نفسك قافلة من كل حاجة
بس دى يبدو انها ادبيات المرحلة الراهنة ..

انتى نورتينى يا حبيبتى
:)

لولا وزهـــراء
---------------

إيه دا ؟!!!

خمسن الف زورار بس ؟!!

يعملوا ايه دول ..

طب انا بطولى
لا عيل ولا تيل ولا راجل ولا حاجة

يعنى نصيبى من الورث يبقى قليل كدا ؟!!

مكنش العشم

إهىء إهىء
عاااااااااااااااااااا

نورتينى يا لولو

مهندس مصرى
---------

لا متقولش يا محمد

بعد كل الرص اللى رصيته دا كله يطلع مش حقيقى
دنا بنيت احلام ف الخيال
وقصور ع الرمال
ويطلع القذافى ف الآخر هوه اللى على الشجرة ؟!!!

كدا يا محمد ؟!!!
تيجى منك انتا ؟
مكنش العشم
لقد صودمت صدمتن رهيبتن دلوقتى
وانتا السبب

معلش
خيرها ف غيرها
ومبارك هيطلعل اوعى م جاره
والمبلغ بتاعه هيكون كدا يمكن او اكتر
دا راجل دماغ
مش معقول الميريارات بتاعته تقل عن 30
ولا إيه ؟!!

نورت يا غالى

فيلسوف زمانه
------------

إهيه
النص قبل ال30 طبعا
بس نتلايم عليييييييييهم بس !!

ميرسى جدا على ذوقك

اما بخصوص الشوم
فيمن قال انتهى
بكرة خير دليل على كدا
نشوف بكرة هيحصل ايه
وربنا يخلف الظنون

نورتنى
واسفة لإنى مقصرة ف الزيارة
:)

كلمات من نور
-------------

مش كدا برضو ؟!!!


:)

سومه .. مجنونة فى بلد عاقل
------------------------

اجى فين يا بنتى
بقولك ف الكاهرة الكبرى وضواحيها فقط
تقوليلى اجى عندك ؟


عموما متقلقيش انا حاليا بتصرف
وبدور على حد القح جتتى عليه
وهلاقى ان شاء الله


سلمى على ماما يا شقاوة
وانتى كمان وحشتينى قوى قوى قوى

:)

قلب الملايكة
----------

وانتى كمان يا حبيبة قلبى

اخلص الإستفتاء واكتبلك بذمة ايميل طويييييييييييل واطمنك

بس مؤقتاً
انا الحمدلله بخير

الحمدلله

خلى بالك منك
وبحبك جدا

أنا شاكك إنها بتاعة مبارك رغم النفي الأمريكي لإن النفي تأخر يوم كامل
كما أن كلام جون كيري كان في غاية الوضوح و قال انه تم تجميد أموال و أصول مالية لمبارك منتشرة في عدة ولايات أمريكية بناء على طلب الحكومة المصرية
ثم إن كيري لم ينف الكلام بنفسه بل نفاه شخص آخر من مجلس الشيوخ الأمريكي أيضاً

عاشقة الرومانسية
---------------

متقلقيش يا دودو
تم الحدف خلاص

بوسات وحضونات
يا عروسة بحورى انا
:)

كــركــبــة دمـــاغ ㋡
----------------------

يا كراكيبوا يا حبيبتىىىىىىى
وصلنى التعليق
وميرسى خاااااااااااالص
ونستفتى بكرة بس وافضى ان شاء الله
وهكتبلك ايميل وارغى كتييير

بس على فكرة
انا كان معايا مصاصتين مكتوبين بإسمك ومتشالين ف شنطتى مع مصاصات العيال
وكان المفروض اديهمولك بسس اتلهيت شوية انا روخرا
وكمان كنت حزينة قوى ف اليوم دا وانتى بذكاء لاحظتى دا
ومكنش فيه وقت نحكى اى حاجة
انما تتعوض

ولحين حدوث ذلك
انتى كراكيب قلبى يا حبيبتى

الكلمة نور
---------

ميرسى يا نور

منحرمشى يا فندم

:)

مهندس مصرى
---------

والله يا محمد انا كمان شاكة زيك
لأن امريكا دى شيكا بيكا وليها حسابات وبتلعب على كل الحبال والست هيلارى تزامن التصريح دا مع وصولها القاهرة ومظنش ان الست مقالتش اطل ع الريس اطمن عليه ولا حاجة عشان يقفلوا الدفاتر والحسابات اللى ما بينهم بدل ما الراجل يفتح جاعورته عليهم ويفضح اللى بينهم ما دامت عليا وعلى أعدائى بقى
قيمكن تراجعهم دا عشان يلموا التعابين لحد ما يشوفوا اتجاه الريح والرئيس القادم هيبقى طوع برضو وعلى الحلوة والمرة معاهم ولا إيه ؟!!

ف كل الاحوال
الفلوس دى ورث
وفيها لاخفيها
لأعملوكوا ف روحى حاجة .. هه

:(

إرسال تعليق