.

.

إســتـفــتى قـــلبك  

Posted by: فاتيما in

 
 
 
 
 
الجمعة 18 مارس 2011 
جمعة موجعة مخيفة 
من عشرة ونص تقريباً و انا ف التحرير 
الغالبية متجمعة عند منطقة المنصة
التى كانت لم تنصب بعد 
والهتافات شغالة 
انتشار  للشرطة العسكرية ملفت 
بلا دبابات و العنصر البشرى اكتر عن كل مرة
 
 
 
أتخذ مكانى المعتاد عشان اعرف
اشوف المتحدثين والمشهد العام
الشمس تلهب رؤوس الجميع 
ويتجول المصورين بالكاميرات 
والموبايلات تسجل لقطات تحدث 
 
 
 
أطلع جرنال و أقراه فيستفزنى تصريح 
على لسان  المدعى العسكرى 
و الذى يخبرنا ان مبارك لن يحاكم عسكرياً 
واستغرب من حال الدنيا
يعنى اللى أمر عساكر جيشه ان يقتلوا 
بنى وطنهم و هذا ثابت بشهادة الشهود 
لن يتهم بالخيانة العظمى و يحاسب
بينما يحكم على الناشط عمرو البحيرى 
 ب 5 سنين و غيره اخرين ... ؟؟!!!
استجمع هدوء روحى و اتأمل الميدان 
والبشر بيتلموا على بعض ف استحياء 
 العدد ما زال قليل مقارنة بالجمع السابقة
 
 
 
المنصة تنصب و الهتافات تعلو 
وأصحاب البيريهات الحمر بحركة مسرعة
يمسكون ب 3 شباب ويجروا بإتجاه المتحف
يرتعب الناس و يهرعوا نحوهم 
فيلحق بهم عدد اكبر م البشر 
و يجتمعون فى دائرة حول الشباب والشرطة 
و يهتف الجميع ..سيبوهم سيبوهم 
يتجه البعض ومعهم شيخ بعمامة..لأكبر رتبة 
فيصدر الأخير .. امر بتركهم
يتوتر الجو  ويزداد سخونة 
ثم يهدأ الجميع مذكرين بعضهم بالآتى
مش عاوزين ندى حد أى فرصة 
 
 
 
تبدأ خطبة الجمعة .. بلا طعم وحماس
و امام عمر مكرم ... مش موجود 
شيخ آخر (اللى توسط للشباب ) بيقول
الخطبة ومحدش سامعه
لأن الميكروفون كان واطى
 
 
 
بعض الشباب يسعى لغلق الميدان 
من ناحية شارع القصر العينى كعادة كل جمعة 
فيتصدى لهم افراد الشرطة العسكرية 
يصرون ..فتأتى فرقة سريعا .. ثم تبتعد 
وكأنهم يستعرضون قواهم لإرهاب الجمع 
تبدأ الصلاة بالفعل .. والعدد قليل 
ينتهون ... فتبدأ بعدها مباشرة الهتافات 
 
 
 
يحاول الناس غلق مدخل مرور السيارات تانى
فينتشر اصحاب البيريهات الحمر تااااانى
ويصرون على تعدية العربيات وبحزم 
شريط طويييل من العساكر 
يطوقون الجمع الواقف امام المنصة 
وبدا المشهد واضح جدا 
ان الهدف تضييق المساحة
والإيحاء بإنها مجرد وقفة احتجاجية ودمتم 
مع هذا تناثر المتظاهرون رغم اليأس
ف الميدان 
وانتشرت لافتات كلمة ..لأ 
 
 
 
بتوع نعم ... كانوا هناك 
ولكن بلا أى يافطات 
 يندسون وسط الناس ويشاركون 
كلما وجدك احد منهم  تقنع شخص بلأ
يتدخلون ويقولوا .. والله التعديلات كويسة 
وخطوة مهمة وبعدين هستقر 
 
 
 
المنصة خالية من الاسماء المعروفة 
اللهم جورج اسحاق ومشوفتش حد 
تانى لحد الساعة خمسة تقريباً 
النقاشات تحدث بين الواقفين 
واللى اول مرة يشوفوا بعض 
وبعضها يشكك فى نزاهة الإستفتاء غدا 
ونزاهة انتخابات مجلس الشعب ف الغد القريب  
 
 
 
بعض سائقى التاكسى بيعدوا ف الميدان 
و يشتبكون مع المتظاهرين 
و الجملة الأشهر .. كفاية وقفتوا حالنا 
هذه المناوشات تنجح مؤقتاً فى تعكير الصفو
وانجاح خطة الخبثاء فى افشال المظاهرة 
يتدخل العقلاء للتهدئة الجو .. وبالفعل يهدأ
 
 
 
اغلب سائقى السيارات الخاصة 
يشيرون لنا .. هنقول لا 
وبعضهم يعلق لافتات تحمل الكلمة 
على زجاجه الامامى والخلفى
شباب زى الورد يوزع منشورات عن الحدث
وينتهز فرصة تباطىءالسيارات ويقول 
لمن يقودها .. قول لأ
ينهزم اصحاب كلمة نعم .. قصاد الإصرار 
وفى غمرة حماسى ألاقى
بنت ف الجامعة وست بيت جايين 
يقفوا جنبى و يسألونى
احنا متحيرين بين نعم و لا .. نعمل ايه؟
ندخل فى حوار طوييييييل ينتهى بأن ..لأ 
ف النهاية لن تضر .. قدر كلمة .. نعم 
و ان لا .. نفس سكة نعم 
بس أطول 
 
 
 
كنت أعيد على جميع من رأيتهم اليوم 
سؤالين اساسين واطلب اجابة
(1) 
تخيل معايا كدا 
ماذا لو كانت المظاهرة تأييد للتعديلات 
كنا هنلاقى الشرطة العسكرية بتعمل كدا؟
والاجابة كانت .. لأ أكيد!!
(2)
ماذا  لو كتب جنب خانة (نعم) وخانة (لا)
خانة (اريد دستورا جديداً)
كنت هتختار ايه 1 أو 2  ؟
كان الرد من الجميع .. هنختار رقم 3
طيب  .. خلاص انتا ليه قابل
تحققلهم غرضهم  ؟
اذا كانوا هيخيرونى مكرهة ..
فلأختر اقرب شىء لمطالبى أنا
ولو كلفنى وقتاً
وان شاء الله لن أندم
 
 
غيظ رهيب من قعاد مبارك ف شرم 
و بقاء زكريا عزمى ف الرياسة
وصفوت الشريف و فتحى سرور متسابين
ليه لحد دلوقتى ؟؟
 
 
 
الغالبية متفقة ان الأخوان المسلمين 
خسروا كثيييرا من رصيدهم بقولة ..نعم 
ومخاوف الناس منهم تتزايد 
ضابط طيار خرج من الجيش من 20 سنة
وله مظلمة .. أتى ليرى الفرحة بعينه
ويحكى ازاى انه حاول يقابل مبارك
بقاله عشرين سنة و معرفش
بينما طلعت زكريا قعد معاه ساعتين 
خرج من عمله بمشاكل واذى وظلم
وجه النهاردة مع مراته بس عشان 
على حد تعبيره بدقة
هنا بيحس انه بياخد شوية من حـــقه
 
 
 
زوجة مستشار فى محكمة النقض
قالتلى ان جوزها و زملاءه تم تجاهلهم 
فى الإشراف ع الإستفتاء
ووجدوا اسماء زملاء لهم ماتوا 
واخرين اعيروا للخارج 
و قد ارسلت لهم التكليفات ؟!!
المستشار و زملائه راحوا لنادى القضاة 
وعملوا قايمة بإساميهم وارسلوها للجنة
عشان يضعوها فى حرج 
انباء عن هل انه هيبقى فيه طبيخ 
ف الإستفتاء دا ؟!!
و تشكك واسع فى ان بعد كلمة نعم 
سيأتى أى خير فى مجلس الشعب الجديد 
 
 
 
 كلما رأيت كلمة لا فى اللافتات 
و مناقشاتى مع الناس مؤيد ومعارض 
وفى كل ملمح حولى 
أحمد ربنا .. انى منذ بداية المحنة
وحتى اللحظة .. شايفها بوضوح تااااام 
مبعث حزنى ان كل من سيقولون غدا 
نعم 
هم اما ... منتفعـــون 
واما ... مغـّــيبـــون 
واما ... مرتبكــــون 
 
 
 
الأولانين .... ربنا ياخدهم 
والتانيين .... ربنا ياخد بيدهم 
اما المرتبكين فهم سبب وجعى الرهيب
فخالص حزنى انهم 
بيقولوا أيوه على تعديلات لا ترضيهم 
و يظنون ان بكلمة ..نعم 
سيعود الجيش إلى ثكناته خلاص 
ويرحل عنا بأذاه و شره
ونبقى شعب ومدنيين ف بعضينا وهنتصرف
وغافلين عن انه هولاء بقوتهم الغاشمة 
و أذاهم ... لن يعـــودوا ببساطة
حتى يسلموننا لقوة غاشمة آخرى تؤذينا 
و ما دام الظلم حاصل .. والغدر كامن
فكأنك يا ابو زيد ... ما غزيت
تشويح نظرنا عن الأذى لما نبص لناحية تانية 
لن يجعله ينصرف و يتلاشى .. للأسف  
 
 
سألنى الناس النهاردة اسئلة كتير
وجاوبتهم
لكن السؤال الوحيد الذى فاجئنى فعلا 
و لم افكر ف اجابته 
ماذا سيحدث لو النتيجة غدا  ..نعم 
زور أو نزاهة .. انتهت  بــ ...
نعم ... للموافقة ع للتعديلات 
ونعم لإحياء الدستور المهلهل بتاع قديمه
ونعم لتسليم دستورنا المرجو للمجهول
ماذا سيحدث 
لو كانت النتيجة ... نعم ؟
 
 
الشاهد مما حدث اليوم فى الميدان 
ان نعم .. لو  غدا حدثت بنزاهة 
فستكون جاءت بالحرية والديموقراطية 
وبالتالى لازم احترم رأى الأغلبية .. اكيد 
وبالتالى .. لن انزل التحرير تانى
لن اطالب بأى تغيير تانى 


الجمعة دى الجيش طوق المتظاهرين 
المرة الجاية هيضيق الحلقة اكتر واكتر
المرة اللى بعدها سيوصم المتظاهرين 
بإثارة البلبلة و الفوضى
وبعدها سيمنع حق التظاهر إلا بإذن 
وبعدها سيمنع التظاهر من أصله
وبعدها سيمنع الكلام فى فكرة التظاهر
وبعدها سيمنع أى كلام  ...
وسنعود لما كنا عليه ايام الغاااالى 
بس بالراحة و واحدة واحدة 
  شوية شوية 
وشــــويبس أهى جـــاية
الآن أجيب على السؤال و كلى ثقة ..
لو بكرة كان نهايته ...  نعـــم 
فالتى ستعــــود حينها إلى ثكنات صمتها  
أنــــا 
------------------------------------
وصل بحــــالنا الزمن 
بدل اغتـــصاب البدن 
بقى إغتـــصاب للوطـــن 
من الخــــونة والفاســــدين
---------------------------------------
 

This entry was posted on الجمعة, مارس 18, 2011 and is filed under . You can leave a response and follow any responses to this entry through the .

42 كــــلام بيطــبطـــب عـــلى قــــلبى و روحــــى

كل واحد ليه قراره لكن لو الناس تعرف أن نعم هيه اللى هتوصل مصر لبر الأمان وأن نعم هيه بدايه التغيير الحقيقى فى مصر صدقينى كله هيقول نعم

بصى هقولك حاجه

بكره قبل ما تروحى الاستفتاء صلى ركعتين إستخاره بقلبك ووبعدين روحى واللى فيه الخير بجد ربنا يقدمه انا هعمل كده ويا ريت انتى كمان تعملى

علشان خاطرى فكرى بعقلانيه لمره أخيره فى نعم والله المستعان

تحياتى لكى

ربنا يعدي بكرة على خير
و ما أظنش الشعب حيستسلم بسهولة لو الجيش حاول يقمعه كله تاني و لو واحدة واحدة

الجيش الان يلعب لعبة غير شريفه وللاسف اى تصادم بين الجيش والشعب سيخسر الطرفين انا لدى يقين ان النتيجة ستكون نعم غضب واقتدار انا هسيب البلد واغور فى داهيه احسن ليه انا بعيط انا شفت الموت بعينى وشلت ناس مصابة وميته مستحيل الناس دى تموت علشان يحصل كده فى الاخر لو حصل تزوير اعلن رحيلى عن البلد او اموت احسن حسبى الله ونعم الوكيل فى كل من فرط فى دم الشهداء واضاع مجهود الشباب هدارا

مدونة ما كفاية بقى
------------------

:)

اولا يا كفاية
بخصوص حكاية صلاة الإستخارة
يا حبيبتى
اللى بيصلى استخارة بيكون حد متردد ما بين أمرين او مش عارف ياخد قرار فى حاجة
انما انا الحمدلله واخدة قرار من بدرى جدا وبالتالى مش محتاجة اتأكد من صحته
لأن قناعتى فيه مبنية خطوة خطوة
يعنى انا وصلت للمطرح بتاع لأ دا بعد مشوار طويل ابتدى من قبل الثورة بكتيييييير وانتهى لهذه اللحظة

ثانياً
ثقتك فى نعم توزاى ثقتى فى لا
ودا شىء كويس جدا

لأن دا معناه ببساطة
ان الفيصل ما بيننا هيكون بكرة
ومش قصدى بكرة السبت 19 بس
انا قصدى بكرة بتاع مصر


يعنى لو نعم غلبت لا
صاحب نعم هيكون متحمل عبء اى ضرر ينتج عنها ف المستقبل ..
والعكس صحيح
اللى قال لأ .. هيدفع تمنها اكيد
واظن اصحاب كلمة لأ ..دافعين تمن غالى لحد دلوقتى ويمكن دا اللى مخليهم حاسين ان نعم هتضيع عليهم كل ما انتظروه وببساطة لأن حد بيقف بينهم وبين تحقيق حلمهم وبيقول .. العكس

ولهذا
الايام فيصل بين نعم ولا

وان شاء الله خير ع البلد يا رب
سواء بنعم او لا

خالص ودى ليكى

مهندس مصرى
----------

تفتكر يا محمد ؟!

وهيا كلمة نعم عشان نخلص م الجيش دى مش معناها انهم بيبتدوا بالفعل فى القمع تانى بس واحدة واحدة ؟

نوارة عمالة بتقولها
وكذا اعلامى وصحفى بيقولهاصمتا وجهرا
وحتى الناس النهاردة ف الميدان كانوا بيقولوها ..اللى قالتلى هقول نعم قالت عشان الجيش يمشى اصل الدنيا هتبتدى تبقى حر وخلقهم هيزيد اكتر وهما مش مستعدين لكدا !!!

بخصوص بكرة بقى
فربنا يستر
وعارف ؟
متهيألى احنا عمرنا
ما هنبطل نخاف ونتخض

اصل كل واحد بيحب بإخلاص البلد دى قلبه واجعه عليها وخايف
والثورة عاملة زى الطفل الصغير اللى من اول ما اتولد
وانتى مينفعش تتورب عنه
دقيقة من كتر خوفك عليه

واظننا هنفضل ف الخوف دا كتير
مهما حصل

خالص ودى يا غالى

يوميات شاب منوفى
---------------

روق يا جدع كدا واستهدى بالله

بص
الثورة دى ربنا اللى حافظها مش الناس وبس
الشهداء زكوا بدمائهم جذوتها
والشرفاء كملوها
المطلوب الكل دلوقتى يتكاتف ويحميها
لكن للأسف احنا دلوقتى مختلفين
ودا بداية التراجع

ارجع واقولك
فاكر بعد معركة الجمل ..
وفاكر لما قالوا ع الولاد عملاء
وفاكر لما شفيق جثم على نفوسنا
وفاكر لما رفضوا يحلوا امن الدولة
وفاكر ...
احساسنا ساعتها باليأس والخوف وقلة الحيلة ؟
هذا الغحساس يعود الآن
وان شاء الله
زى ما ربنا حماها وخيب مخاوفنا وظنونا
يخيبها بكرة كمان ويخسف بكل ما يتآمر ضدها ولو ف كلمة نعم الخير ...
يبقى نعم مش هتضر
ولو ف لا شر مستخبى
يبقى بلاش منها

ربنا يساويها من عنده
احنا نعمل اللى علينا و خلاص

روق كدا
وسيبها على ربك

:)

ازيك يافاتيما ..
وحشتينى

لقيت اسمى مكتوب بالحبر السرى قلت لازم أقول كلمتين

أنا مش مرتبكة يافاتيما
كل الموضوع انى بشخصيتى وطريقة تفكيرى وقلبى وعقلى مع لا من غير تفكير

لكن لما الاقى عقلى بياخدنى بقاله أسبوع مثلا وبيشدنى من لا المطلقة لنعم المشروطة المتخوفة يبقى أكيد فى أسباب مش منها الارتباك

أنا استفيت قلبى وعقلى وقرأت وسألت فى تفاصيل كتير جدا
ووصلت لقناعة معينة
انى ممكن أوصل للى أنا عايزاه واللى أنصار لا عايزينه بس باسلوب تانى

أنا مش من أنصار يوم واحد زيادة يفضل فيه المجلس العسكرى فى السلطة
وشايفة ان أى اختيار تانى قدامنا أرحم مليون مرة من حكم العسكر

شايفة ان المجلس العسكرى رفض تماما فكرة المجلس الرئاسى

فاهمة ان الاعلان الدستورى الغامض اللى هيصدر منه مش ممكن ابدا هيكون ملبى لطموحاتنا
بس على الاقل التعديلات أرحم من الاعلان الدستورى

قرأت للواء شاهين عضو المجلس العسكرى كلام مش عارفة بنتجاهله ليه
الشرعية عند المجلس العسكرى مش الثورة
الشرعية من الشعب والثورة والدستور

المجلس العسكرى بطريقة ما شريك فى الثورة مش مجرد ملبى لمطالبها ...ده كلامهم مش كلامى

الحفاوة المبالغ فيها بعبود الزمر فيها ايحاء خبيث للامريكان وغيرهم بخطر الاسلاميين مما يستدعى قانون طوارىء ...أحكام عرفية ...احنا ونصيبنا بقى

اصرار المجلس العسكرى على فض اعتصام التحرير
تعذيب المعتصمين والمحاكم العسكرية

التاريخ عن ثورة يوليو من 52 ل 56
وازاى الشعب والاحزاب القديمة اقنعت الجيش يستمر فى الحكم

خطر الاخوان والوطنى اللى مش ممكن يكون أشد من المجلس

الاجراءات البطيئة جدا للمجلس فى ملاحقة عناصر ورموز النظام السابق

انا يقين بالله كبير واعلم ان الله سيحمى الثورة التى قامت من اجل ان تعود مصر لدورها فى قيادة هذة الامة المنكوبه

انا مش معترض على قول نعم لكن ياتى بنزاهه وساعتها ساحترم قرار الاغلبية واساندها بقوة ولكن الامور التى تجرى تؤكد ان النتيجة كده اوكدة هتكون نعم وللاسف الاخوان انتهازين ببجاحة فعلا ناس مقرفه لا يبحثون سوى عن مصلحتهم حتى لو كانت ضد مصلحة البلد ودماء الشهداء انا من الريف واعرفه ما سيفعلونه غدا سيستخدمون كل الوسائل لحشد البسطاء للذهاب للجنة الاستفتاء وقول نعم باسم الدين كما يفعلون فى الانتخابات والسلفين يكفرون من يقول لا ويعتبرون نعم واجب شرعى وهم من حرموا المظاهرات من الاساس وسموا مبارك بامير المؤمنين ومستخدمين المسيحين كفزاعه للبسطاء والاميين انا هقولها لا وانا مسلم غضب عنك وعن اهلك

المحاكمات المدنية للوزراء والعسكرية للمعتصمين

النفاق الرهيب للجيش من الاعلاميين والمشايخ
اقتنعت جدا برأى المستشار البشرى ان التعديلات مش ملبية لكل طموحاتنا لكنها مناسبة لفترة انتقالية حرجة
وان التعديلات بعيوبها ومميزاتها اللى ذاكرتها مليون مرة هتعدينا بسرعة من المرحلة الانتقالية

اقتنعت كمان بكلامه ان فى حالتنا دلوقت لازم يكون عندنا برلمان وبسر عة وبعده ريس علشان الدستور الحقيقى اللى هينظم البلد لازم يتم مناقشته ووضعه اولا فى بلد على الاقل شبه مستقر وعنده برلمان وريس

اقتنعت ان اللجنة التأسيسية اللى هتشكل الدستور وهيختارها النواب اللى اغلبهم اخوان ووطنى ارحم ميت مرة من اللجنة المعينة اللى هيختارها المجلس العسكرى

اقتنعت ان الدستور اللى بحلم بيه لو اتعمل حالا أقل حاجة هنواجهها هى فتنة طائفية علشان المادة التانية

اقتنعت اننا صدقنا الاعلام اوى الايام اللى فاتت مع انه كان مغرض جدا أيام مبارك والاستاذ تامر من غمرة ليس ببعيد

اقتنعت ان الاخوان بخطاياهم وانتهازيتهم ...مصريين زينا اشتغلوا طول عمرهم فى السر وتحت ضغط من المخلوع
ومفيش مانع طالما ايديهم مفيهاش دمنا ولا فلوسنا زى اياهم اللى بيحميهم المجلس العسكرى ..مفيش مانع ياخدوا فرصة يشتغلوا فى النور ويغلطوا واحنا كمان نغلط ولا افتكرنا اننا هنعمل ديموقراطية ونمارسها صح فى أيام


اقتنعت ان الوطنى مش حزب ...دى انا عارفاها من زمان ..وانه شويه ناس ليهم مصالح والفساد جمعهم
بس اقتنعت كمان ان عدد كبير منهم كده كده هينجح فى الانتخابات بسبب الفقر والتربيطات والعصبيات حتى لو أجلنا الانتخابات سنين


حزينة جدا وأنا بقولك انى أيام مبارك لما مكنش ينفع نقول لأ
قلتها انا ومكناش فيه عندى اختيارات تانية ابدا غيرها


دلوقت بحارب فى جبهات تانية ممكن تكون أخطر من مبارك
بس الظرف اتغير ويمكن ..أنا بقول يمكن لأ المطلقة دى ماتكونش مناسبة دلوقت

اقتنعت ان الثائر الحق لازم يهدأ علشان يبنى


فهمت انى عايشة فى منطقة شعبية وفاهمة تفكيرهم وشايفاه قدامى تمام ولو فرصة البرلمان السريع دى ضيعناها
متأكدة ان ملايين وبكرر تانى ملايين هتخرج تقضى على أى حاجة ليها علاقة بالتحرير
وان الجيش عرف يكسبهم فى صفه تمام
ومحدش منهم هياخد خمسين جنيه ويخرج من مصطفى محمود

سمعت وصعقت من طالبة مسيحية عندى فى اولى اعدادى ومبتعرفش تكتب بالمناسبة وبنعملها محو امية من أول السنة مش عارفين
وبتقولى أنا مش عايزة الماة التانية ولا الاخوان دول هيقطعوا ايدينا لو سرقنا
وهيطردونا بره بلدنا

اقتنعت ومن غير ارتباك يافاتيما
ان حالا لازم نرسم شكل دولة تعرف تعملنا دستور بأقصى سرعة

أنا استفيت قلبى وحكمت عقلى وعلى الاقل هاخد أجر المجتهد
وكان ضمانى الوحيد فى اختيارى انى بعد النتيجة أيا كانت هبقى مع أنصار لا
لو النتيجة نعم ...نساعد بعض نخلص من أى خطر ممكن ييجى من الاخوان والوطنى وغيرهم
ولو النتيجة لا
هبقى لازم معاكم علشان نتسند على بعض فى السكة الضلمة اللى مستنيانا

أنا مش مرتبكة ياطمطم
أنا واحد دمه خفيف على فيس بوك خبطنى تعليق دمه خفيف زيه
علشان قلت انى لو هاتجوز الدستور ده مكنتش تعبت وفكرت وسألت وعيطت وطلبت مدد من ربنا ينقذنى من الحيرة كده
----------
وما نكست أعلامي

وصنت العشب الأخضر فوق قبور أسلافي

----------
زعلت جدا من وصف الارتباك ومن صمتك المتوقع لو النتيجة لا
وكنت متخيلة ان الحرية سهلة ومكنتش أعرف ان نعم بعد مبارك أصعب من لأ

استمتعت جدا بسردك بس بسجل اعتراضى على جملة لا هى نعم بس بطريق أطول...لان بيقولوا اختار الرفيق قبل الطريق...و نعم الطريق فيها لا يمثل الشعب بل يمثل فصائل نفعية من الشعب

انا من الناس اللى قلتى عليهم اللى بيشككوا فى النزاهة و عندى أدلة مش مجرد تحليلات

استمارات التصويت اصلا فى الشارع من تلت ايام و مع الناس حتى فى الصعيد و بيكتب فيها نعم و يدوها للناس عشان يحطوها فى الصندوق و يرجعوا بالفاضية فياخدوا مكرونة و زيت و صلصة و فيه ناس تانية بياخدوا منهم صورة الرقم القومى (زى الوراق مثلا) و يدوهم فلوس او اكل فى المقابل

بقول لا طبعا لكن ارى الان انها بقت تمثيلية زى كل مرة و مش فارق حاجة و الاسوأ ان دى بروفة لانتخابات الرئاسة مش الشعب بس و بالتالى احنا رجعنا لنقطة ما قبل 25 يناير و همه ح يعملوا اللى عايزينه و الاهم ان التعديل بتاع المادة 76 اللى المفروض ان يتوافق عليها بيمنع الطعن على نتيجة انتخابات الرئاسة يعنى ح يزوروا الرئيس القادم و ماحدش يفتح بقه و لما يبقى يجى رئيس جديد نتيجته مشكوك فيها يبقى يحط دستور هو و مجلس الشعب اللى ح يبقى مش ممثل للشعب بعد فيلم الاستمارة الدوارة ده

الاستمارات اللى فى الشارع بقالها تلت ايام هنا

http://www.facebook.com/album.php?aid=647424&id=522785413&fbid=10150448781095414

بالمناسبة فى تلميع لشفيق جامد و الحزب الوطنى بيغير اسمه و ح يرشحه

معلش اسفه انى بعلق تانى بس عايزة اكتب كلمة لكل اللى بيقولوا نعم عشان امان و استقرار و بداية التغيير لان مرارتى مفقوعه مع انى عارفه ان الموضوع مطبوخ اصلا و كل دى كهربا على الفاضى

سأقول ( لا ) لأن مصر المرهقة لا تحتمل أن تجري انتخابات لمجلس الشورى ثم مجلس الشعب ثم انتخابات الرئاسة ثم استفتاء على دستور جديد ثم اذا صدر دستور جديد فإن مقتضى ذلك سقوط المجلسين والرئيس لنعود مرة أخرى الى انتخابات الشعب ثم الشورى ثم الرئاسة ، فاذا كنا نسعى الى دستور جديد فلماذا هذه الدورة المرهقة ، ولماذا لا يكون الدستور الجديد أولا ؟

هل تعلم نوعية نواب مجلس الشعب المستعدين لصرف الملايين لدخول مجلس شعب يعلمون انه سينتهى بعد بضع شهور؟ و هل تفهم ما غرضهم اذن؟

هل تعلم أن التعديل الحالي للدستور يتيح يوما واحدا لإجراء الانتخابات مما يستحيل معه تعيين قاضي علي كل صندوق؟

هل تعلم أن المادة‏139‏ لاتعطي نائب رئيس الجمهورية أي اختصاصات ولا أن يكون منتخبا من الشعب‏ و لا يمنعه شىء من تعيين ابنه او زوجته فى هذا الاختصاص؟

سأقول ( لا ) لأنني أرفض أن تكون قرارات لجنة الانتخابات الرئاسية محصنة من الطعن عليها أمام أي جهة قضائية دون ضمانة حقيقية تضمن خلو قراراتها من المطاعن والعيوب

سأقول ( لا ) لأن هذه التعديلات ليست هي التي ستحل مشكلة غياب الأمن في مصر ، وليست هي التي ستعيد الجيش الى ثكناته ، وليست هي التي سترسو بمصر على شاطىء الأمان وتحميها من مخاطر الخارج كما يحلو للبعض أنم يروج ، بل هي التي ستدفع بها الى المزيد من عدم الاستقرار

سأقول ( لا ) لأنني ضد أن يأتي البرلمان القادم بمجلسيه الشعب والشوري بذات العلل والتشوهات التي يحفل بها الدستور الحالي ـ والتي لم تصححها أو تمسها هذه التعديلات ـ فيأتي لنا برلمان نصف الأعضاء المنتخبين فيه على الأقل من العمال والفلاحين ، ومخصص للمرأة فيه حصة كبيرة من مقاعد مجلس الشعب ، ويكون من بين مهام هذا البرلمان المشوه أن يرشح أعضاؤه لنا من يحكم مصر رئيسا ، وأن يختار لنا الجمعية التأسيسية التى ستكلَّف بوضع الدستور الجديد،

اخطر ما فى كلامك هو ان لو نتيجة الاستفتاء جاءت بنعم لن تذهبى للتحرير مرة اخرى

سواء كان نعم او لا كلنا فى حالة ترقب حذر جدا وصدقينى اى ضحك او لعب او استخفاف بالعقول ستكون عاقبتة وخيمة

فكلنا معا سواء قلنا نعم ام لا لان فى النهاية كلنا ينظر للمصلحة من وجهة نظرة

زى ما بقول ان الاجابة بنعم ستظهر سريعا ما يخفى فى الكواليس

اهم شىء الا نبعد فكرة التظاهر اذا لم تتحق المطالب وان يدب اليأس فى قلوبنا

حفيدة عرابى
----------

اولاااااااا
انتى وحشتينى اكتر واكتر

ثانياً
انا اسفة لو كلمة ارتباك ضايقتك
بس انا مقصدش بيها غير اللى شيفاه
لما يكون حد مقتنع بحاجات ومعتبرها مسلمات ولا جدال فيها ثم يتراجع

تراجعه دا مش بالمعنى المتخاذل
ولكن بمعنى يرعبنى انا شخصياً
انا قريت البوست بتاعك
وقهرنى جدااااا

لأنى عارفكى كويس
وعارفة ان لأ ..هيا اختيارك الأول
ولازم يكون الاخير

اللى قهرنى اكتر
انى حسيت بتعبير حد غالى عليا
حاسة انك زى ما يكونوا بيدبحوكى وبيسألوكى نفسك ف ايه ...

انتى هتقولى ايوه غصب عنك
و كأنها بتطلع معاها روحك
وجعنى قوى دا
ومكنلوش عندى غير معنى الإرتباك

لأنى م الأول زى كل الناس
معروف اننا عاوزين دستور جديد
كنا بنطلبه ف احلك الظروف
ولازم نفضل نطالب بيه
وكل اللى حصل
اننا استبدلنا حكم الشرطة بالعسكر
ولما العسكر هيمشوا
هيسلمونا لحد تانى
والدنيا مش هتتغير خلاص

دا اوانها
ولو محصلش دلوقتى
مش هيحصل بعدين
محدش هينزل تانى خلاص
ع الأقل اللى كانوا متحمسين


رجوعى الثكنات مقصود بيه
عدم الكلام ف السياسة واحوال البلد تانى
وهخلينى ف يوسفياتى وهذيانى وخلصنا
هبطل اتحمس لأى حاجة
ولا لأى حد
المقدمات المتشابهة تؤدى الى النتائج المتشابهة
والأمور دلوقتى ماشية ف سكة التراضى والتهدئةى وملايمة الامور والخنوع والرجوع للمربع صفر بس بوجوه جديدة وتسويف جديد ...

وربنا يستر

انا اسفة تانى لو ضايقتك

وان شاء الله خير

سلامى لماما
وروقى
والخفيف بتاع الفيسبوك دا رخم قوى
قوليله بلا خوتة
الدستور اهم م العريس يا عبيييييط
خدنا ايه م الرجالة احنا
؟!!

بوسات وحضونات يا حبيبتى
وحقك عليا

يوميات شاب منوفى
---------------

مش الغخوان كلهم يا منوفى

الشباب الصغيرين زى الفل والله
كانوا ف الميدان من اول الثورة
ومش راضيين عن تصرفات القيادات بتاعتهم
ودلوقتى فيه حركة انشقاق وربنا ينفخ ف صورتهم

الاخوان كما وصفهم الجميل علاء الاسوانى
عندهم صلابة اخلاقية
يقابلها ليونة سياسية

هما كدا بالضبط
عشان كدا مواقفهم السساسى دايما اقل من تعاملاتهم مع المجتمع اللى بيحبهم
لكن مش بيحترم تصرفهم وقت الازمات
زى موقفهم الأيام دى اللى فيه تغليب لمصالح شخصية عن مصلحة البلد كلها

ربنا يستر
ويعدى بكرة على خير يا رب

Tears
-----

والله يا تيرز انا قولت الجملة دى للبنوتة الجامعية وهيا بتقولى انا خايفة من مسئولية كلمتى ..حاسة ان صوتى هيفرق وخايفة وبقول مش عارفة

قولتلها خلاص متروحيش
واكفى المعكسرين شر ترددك
قالتلى برضو قعادى ف البيت غلط

طب اعمل ايه
ف الآخر قولتلها ان لأ اسلم حل
لأنها ف النهاية هتنفذ اللى عاوزه مؤيد نعم بس بعد مدة اطول شوية
وقدعنا نحسبها ..لقينا ان المطلب لنعم ولا ف الآخر واحد
وهوه الدستور الجديد
بس فيه واحد يؤدى للتانى اكيد
وواحد غالبا مش هيؤدى للتانى الا بمعجزة

فقالت خلاص ..هقول لأ

كل كلامك الفيصل فيه بكرة وممارساته ومراقبة القضاة الشرفاء والمجتمع كله واى حوادث تحصل اظنها ستفضح اكيد لأن حرية الأعلام المتاحة الآن (بحدود برضو) تقريباً النعمة الوحيدة المتبقية هذه الأيام وبنعرف بيها الحقايق ونفضحها ولو انهم انتقائيين برضو ومش كل حاجة بتنذاع

خير
ان شاء الله خير يا حبيبتى
وان غدا لناظره قريب

:)

الطائر الحزين
------------

انا فاقدة نصف املى يا إيهاب
وبعد نعم .. سأفقد النصف الآخـــر

ان لم يكون الآن
فلن يكون ابدا فى أى يوم

قد اكون انسانة يائسة
بس معلش

ربنا يخلف ظنونى
ويجعل فى أى كلمة بكرة
خير لينا وللبلد

بس

:)

ربنا يكرمك يا فاتيما ياا رب..بجد اللي بتعمليه ده حاجة عظيمة قوي..أنا كمان طول اليوم بكلم الناس في الشوارع..أدخل المحلات و أشتري أي حاجة عشان أفتح كلام..أركب تاكسي و أنزل منه أركب ميكروباص..و في الأخر لقيت ان الاستفتاء ده أصلا مفيهوش فرصة عادلة..لأن الجيش و هو بيعمله بيشاور للناس على نعم..حتى شوفيها كدة حتلاقي لونها أخضر و لون لا أسود و منيل بنيلة..فيه ناس أقدرت أقنعهم..وفيه ناس قالولي حنفكر..وفيه ناس قالولي هو احنا خدنا ايه من الثورة دي أصلاً!!أنا كمان يا فاتيما حرجع للثكنات معاكي و مش حتزحزح منها لو جابولي ألف نوارة و ألف بلال فضل..يااااا رب.

وحدى الله يا أم يوسف وبلاش التشاؤم ده
وبلاش كمان نتكلم على اللى حيقول رأى مخالف كلام ممكن مايكونش حقيقى
أنا حقول لأ
وأعرف ناس كتير بيحبوا البلد جدا حيقولوا نعم عن قناعة وفهم وتفكير عميق

كنت متاكد ان ده هايكون رايك

زور ينى لو عندك وقت
http://amrfekry.blogspot.com/2011/03/blog-post_15.html

شوفي، إنت عارفة أنا كنت في بلد شكلها إيه، أنا حضرت ثورة برتقالية هناك، صحيح مفيهاش إلغاء دستور ولا جيش، بس فيها طرد حكم شيوعي، وبعدها حضرت مرتين إنتخابات رئاسية ومرتين مجلس شعب ومجالس محلية.

ما علينا، أنا نزل أقول لا كبيرة قوي، أنا وكل إلي أعرفهم وكل جيراني وكل حتى البوابين وتجار إلي في نفس المنطقة.

لا ليه:

- علشان النهاردة فرصتنا يبقى عندنا دستور جديد. مش مضمون بعد شهر يحصل إيه. طيب ماالدستور الجديد ياخد أكتر من شهر ...... لا يا سيدي، الناس إلي عارفة في الدستور أكتر مني ومنك جاهزين وقالوا كدة كذا مرة، الدستور بالإستفتاء بسلطاته اخره شهرين. يبقى نرقع القديم؟ وبفرض الدستور ياخد سنة (و دا غير منطقي)، إيه المشكلة؟ محنة قاعدين وربنا يطول في عمرنا.

- علشان الجيش قاعد قاعد، سواء في مجلس شعب و رئيس أو لأ، طيب إيه الفرق؟ على إيه السربعة؟ موراناش حاجة، ما احنا خدنا على قفانا في صمت 50 سنة.

- بالدستور دا و تعديلاته، مجلس الشعب حيدخله إلي معاه فلوس بس، إلي يعرف يكسب بفلوسه، ولي يعرف يوزع شنط أكل على الفقراء. وشباب الثورة يروح من غير مطرود. وحنشرب رئيس جمهورية بنفس الطريقة ليه كل السلطات، وهو إلي حيحدد النائب وأعضاء لجنة تحديد الدستور، و هو دا إلي عندنا لو كان عاجبكم ... ما أنا عملت لجنة أهو، وحطوا دستور بعد 6 شهور من إنتخابي ومش عاجبكم، إستنو بقى كمان ٦ شهور و كمان ٦ شهور وقابلوني ومعنديش دساتير تانية.

- رئيس الجمهورية بالاغلبية، يعني لو الاغلبية كانت ٢٠٪ هو دا الكسبان، مفيش ٥٠%+١. يعني لو ٢٠٪ بس من الشعب موافق ودي كانت أعلى نسبة، يبقى هو دا.

- علشان لزم نحد من صلاحيات رئيس الجمهورية ونقسمها بينه وبين مجلس الشعب ومجلس الوزراء، يناكفوا في بعد لصالح الشعب، ويراقبوا على بعض، محدش فيهم ينفرد بالسلطة.

علشان لو الجيش عايز يمشي فعلاً زي مبيقول، يبقى ألف سلامة عليه وحنوصلوا لحد الباب ونبوسه. ممكن يحط مجلس رئاسي فاضي ونفسه طويل. اشمعنى لما عرف الناس عايزة عصام شرف جابه، خايفين دلوقتي يجيب مجلس رئاسي وحش؟ لأ هما عارفين كويس الشعب عايز إيه.

- علشان محدش عايز يلغي المادة التانية، ولا المسيحيين، دول عايزين ينضاف عليها إن يطبق عليهم قانون أحوال شخصية خاص بهم. بس كدة. و دا مش متعارض مع الشريعة في شيء.

- و أهيف سبب، علشان كل الناس إلي فاهمة وأيدهم في السياسة محدش حيقول نعم.

أزال المؤلف هذا التعليق.

انا هقول لا للتعديلات الدستورية

عرفه انا بقالي كام يوم بفكر فأيه
اللي احنا فيه دا

فكرني بستنا هاجر

لما قالت اذن لن يضيعنا
انا بثق فربنا بس

انه مش هيضيعنا
دا اللي اقدر اقولوا

فاتيما
روح القلب الملائكية

انا بمر بظروف خاصة صعبة و كنت قررت الابتعاد لكن حسيت لو امك مريضة هتبعد عنها عشان مشغول بظروفك الخاصة

بصى يا فاتيما لسه الامانى ممكنة سواء بنعم او لا لان فى جيل بيفتح اقسم بالله بيفتح امس اقاموا امسية لتكريم امهات الشهداء حضرها عدد كبير من الناس و نجوم المجتمع حاول اعضاء الوطنى او الاخوان الالتفاف عليهم و عرضوا اموال لكنهم رفضوا و قرروا اقامة لجان منهم لمراقبة الانتخبات و قرروا اقامة مجمع انتخابى لاختيار عضو مجلس الشعب الافضل و تدعيمه و الدعاية الانتخابية له لن ينجحوا لانهم لن يستطيعوا شراء كل البشر اللى قرروا يذهبوا و هو ده الامل اللى خفف بعض احزانى الشخصية

مبروك علينا كلنا...الصور تفرح...انا فخور بمصر وان انا مصرى...صباحك حرية

انا رحت وقلت لا
لقيت ان بعضهم بيبصلى كأنى كفرت او فجرت انا سمعت ان علماء الامة بالاجماع قالو انو واجب انك تقول نعم حماية للاسلام وللدين
انا بصراحة مش عارف ليه كل حاجة تتقلب حزب مسلمين ومسيحين
ربنا بجد يستر الايام اللى جاية

لأ يا تيما يا حبيبتي
وترجعي لثكناتك ليه انتي تفضل قاعده على قلبهم وتحرقي في دمهم
اييييييييييييييوه

انا روحت النهارده ولفيت في كل اللجان الموجوده عندنا في المعادي
كنت عايزه اعرف الناس هتقول ايه
80% بيقول لأ
وانا بصراحه ثقتي في الله كبيره
لأننا معندناش اغراض شخصيه زي بتوع نعم
احنا عايزين مصلحة البلد وبس

وان شاء الله ربنا يكتب لبلدنا الخير

dahlia...
---------

ازيك انتى يا ساكنة ادفى كورنر ف قلبى
وحشتينى قوى يا داليا
وانا اول مرة احس انى لازم انزوى ومتكلمش ف السياسة تانى لو كانت النتيجة نعم عشان خلاص كدا خلصت و هتروح خالصة مخلصة للإخوان والوطنى وريس بدستور فرعونى النزعة ودمتم ...

ربنا يخلف كل ظن
اصلا من قبل النهاردة اغلب اللى اعرفهم قالوا لأ ومقتنعين بيها جدا
والنهاردة ف اللجنة والطابور بيمشى .|. كان الغالبية بتقول برضو ..لأ
ع الصعيد التدوينى اهل لأ اكتر من اهل أيوه ... نوعا ما
وحتى نص اللى بيقولوا نعم ..بيقولوها لأسباب ملهاش دعوة بالتعديلات
واتمنى قدام يعرفوا قد ايه فرطوا فى حق غالى لما سمحوا لحاجة تجبرهم على التصويت بعكس ارادتهم وقناعتهم الحقيقية ...

نوراة وبلال فقدوا نبض الشارع للأسف

بس اللى صدمنى فعلااا رأى فهمى هويدى
لأن هذا الرجل المحترم جدا دايما يدعونا الا نقبل انصاف الحلول و لا يرهبنا اى مخاوف حتى لو كانت قوية لأن ف النهاية لن يصح الا الصحيح ..واذا به يرضة بدستور مهلهل بدلا من التمسك بدستور جديد تماماً ...


عموما
ربنا ان شاء الله يكتب الخير لمصر
اظن منظرنا النهاردة
يخلى اللى حاسس انه قليل ..
يبطل بقى يحس بكدا
ويدوس بنزين كمان
وميهموش حاجة


بوسيلى العيااااااال
واحضنيلى روحك
:)

عمرو فكرى
---------

وانا كمان يا عمرو
كنت متأكدة ان رأيك لأ
وربنا يثبت قلبك

بس يخربيت البوست بتاعك
دا طويييييل قوى
انما محترم قوى و وافى قوى
الله ينور عليك يا بنى

:)

وجهة نظرى
----------

موافقة على كل حاجة قولتها يا معتز
خصوصا حكاية الجيش دى
اصل قاعد قاعد دى هيا مربط الفرس
وهيا اللى عاملة رعب للناس
وعاوزين يوافقوا على تعديلات معيوبة كدا عشان بس يخلصوا من عشرة الجيش وعنفه ..مع ان الحكاية مش بالبساطة دى

والجيش مش عاوز يمشى
الا لما ييجى واحد يضمنله حاجات
والواحد دا مش هييجى غير بمجلش شعب اما نعيمة نعمين دا (نعم الوطنى ونعم الاخوان)

اللى يغيظ فعلا استخدام فزاعة المادة التانية م الدستور
غايظنى قوى ان لسه فيه حد متخيلها قابلة للحدوث ...
طب دا اذا تم تعديلها
وهيتم الإستفتاء عليها ..
كام مليون مسلم ساعتها من ال65 مليون ... هيقول نعم ؟!!
مش نشغل دماغنا شوية ؟

ربنا يكرمنا ان شاء الله
ونعم او لا ..اى كانت
تبقى ف الصالح

تعرف يا معتز ؟
كل ما يحصل مصيبة او حاجة غلط
بلاقيها بتبقى الضارة النافعة
وبتكشف المستخبى ..اكتر ما ترسخه
اتمنى اى كام ما سيحدث يبقى فيه الخير

منظرنا النهاردة ف كل مكان
حاجة تفرح
واحنا نستاهل احسن حاجة

ان شاء الله

نورت يا فندم
وانتا ف مصر ؟!!

اتاااااارى النور بزيادة
ف المنطشقة .. الأيام دى
:)

sally
-----

انا خمنتّ كدا برضو
لولى العسلة هتقول نعم برضو ؟!!!

انا بعتلك رسالة
بس نوبايلك مقفول
شوفى بقى تآمر العدة بتاعتك دى

انتى وحشتينى جدا

:)

sony2000
--------

الله يا سنسن

حلو قوى الكلام دا
يا بت

ونعم بالله يا حبيبتى

:)

ابراهيم رزق
-----------

ربنا يهون عليك يا هيمة
وان شاء الله تكون بخير

متفقة معاك يا ابراهيم فى وعى بعض الناس
لكن انا بتكلم على حاجة تانية

الناس كارهة الوطنى طول الوقت
ولو تفتكر الإنتخابات ما قبل الماضية الاخوان حصلوا على اكتر من 80 مقعد بسبب اساسى وهوه (بعد موافقة امريكا) ان الناس عادة بتدى اصواتها لمرشح الأخوان نكاية ف مرشح الوطنى المكروه ...عند يعنى
وهذا الموقف غالبا سيتكرر
لو حصلت انتخابات قريبة
والمستقلين فرصهم هتكون اضعف
لأن ملهمش قواعد عريضة ف المحافاظات والأقاليم والصعيد والأرياف ..الخ

الفرصة هنا غير عادلة
ليه يتفرض عليا هذه الأختيارات وانا طالبة شىء تالت

ليه التعديلات أه ولأ
وانا عاوزة واحد جديد وقايلة م الأول
وليه مجلس شعب اخوان ووطنى ونتفة مستقلين وانا طالبة قاعدة مرشحين اوسع وكله ياخد فرصته فى تعريف الناس بيه وبنواياه لصالح البلد ...
ليه ؟!!

الأمل
لولا الامل على رأى الست ام كلثوم

ان شاء الله خير

وروق يا ابو العيال
اومال لما اكتئب مين اللى هييجى يطبطب عليا انا ؟!!!

الكلمة نور
----------

صباح الحرية يا نور

وصباح احلى حسيته النهاردة قوى

صباح العزة والكرامة والفخر

:)

فيلسوف زمانه
------------

علماء الامة بالإجماع ؟!!
انهى علماء وانهى امة و منين الإجماع دا
يا فيلسوف ؟!!!

جايز الإجماع على الذهاب للإدلاء بصوتك
كواجب وطنى على فكرة ...
لكن واجب دينى ..لأ
افرض انك مكونتش رأى كافى
وحاسس ان صوتك هيروح لفريق ويضر التانى اكيد لأن ممكن صوتك دا يرجح كفة عن تانية ..
يبقى متروحش خالص لأن الأمتناع ساعتها هيكون موقف برضو ..
يبقى ساعتها ارتكبت حرمانية ؟!!

ايه اللى دخلّ الدين ف السياسة ؟


ان شاء الله خير يا فيلسوف
ان شاء الله خير

من كل بستان زهرة
----------------

اقصد ثكناتى الروح قلب ماماية يا زهرة
ارجع اكتب ف الهذيان واليوسفيات واى حاجة
وابعد عن الكلام ف احوال البلد
لأنها غالبا لن تسر وهنرجع زى زمان بقى
نشوف العجب العجاب
واقعد اتحسر على ان كان ف ايدنا الفرصة وضيعناها و نتعذب تانى وتالت وعاشر

طب الأول كنا بنتعذب بسبب البلاء اللى كان راكبنا ..دلوقتى بعد ما جت الفرصة اننا نخلص منه ..ليه نرجعله تانى ونتخلى عن تحقيق احلامنا ومطالبنا لأخر درجة ؟

انا كمان اغلب اللى اعرفهم وقابلتهم هيقولوا لأ ...

ان شاء الله خير
من هنا لبكرة ..قربنا خلاص

:)

بتقولي:
مبعث حزنى ان كل من سيقولون غدا
نعم
هم اما ... منتفعـــون
واما ... مغـّــيبـــون
واما ... مرتبكــــون


هأختلف معاكب مرة من نفسي بقى
:-)
أظن من حقي مش كده؟
:-)

فيه حقايق تانية غايبة كتيرة .. و المشهد اللي قدام الناس مش هو المشهد الحقيقي .. الحقيقة للأسف مرة زيها زي كل الحقايق بلا استثناء .. لكن عزاؤنا الوحيد ان في أسوأ الأحوال هيكون اللي جاي أحلى وأجمل من اللي فات .. بس زي ما قلت قبل كده: لن تكون المدينة الفاضلة

ربنا ما خلقش الدنيا كده .. خلقها فيها الخير والشر .. خلقها دار ابتلاء وتعب مش جنة وراحة

أنا هقول نعم على فكرة
:-)

أنا مدونتى ضاعت للأسف
ربنا يسهل وأستطيع إسترجاعها

ولسه كتييييير
كل يوم بتظهر حقايق تقول إن الكلام بين السطور أكتر من اللى باين قدامنا
وإن فى خطة أكبر من اللى شايفاها عنينا
وربنا يستر ونعدى المرحلة دى على خير

يا مراكبى
--------


طبعاً من حقك تختلف يا نبع الحكمة
أكيد

ولازم اقبل دا

بس كلامك بيقول انها المدينة الفاضلة التى لن توجد ع الأرض ..
وبالتالى لا وجه للتفاؤل هنا
لأن المسألة مسألة وقت
حتى نعود لما كنا عليه من جديد
لكن بأشكال اخرى
ووجوه اخرى


اختلف معاك ف ان اللى جاى أحلى واجمل
انا رأيى تنتظر تركيبة مجلس الشعب الجديد الاول ..قبل ما تحكم

ورأيى تستنى كمان المجلس التأسيسى بتاع الدستور هيكون مكون من مين ؟
وهيتمخضوا ويلدوا ايه ...

وبعدها نشوف هيبقى احلى ولا أجمل

متشائمة ؟!!
أبداً

انا بقيت واقعية من اليوم
لأن خلاص
النهاردة اتحط الخط ما بين الثورة
والقـــادم من الأيام
اللى مش بإختيار الثورة وغالبية اللى شاركوا فيها ...للأسف

اتفقت واختلفت
بس هرجع اتفق معاك تانى

تعب هى الحياة
فما أعجب من راغب فى إزدياد

:)

النهاردة كنت بتصفح ف عليك واحد
وقريت تانى حصة الشعر الجميلة
وعايز ارقص تانجو و غيرهم
و ضحكت كالعادة مع انى بقرى الحاجات دى للمرة العاشرة يمكن ...
بس بيحصل كل مرة
ان اضحك برضو
وادعيلك ربنا يسعد قلبك يا رب


:)


كل الود ليك يا عم مراكبى
قولت لأ ... أو نعم
او مقولتش أى حاجة

ابو حميد
--------

ايه اللى حصل يا باشمهندس ؟!!

طب اسأل علا صيدلانية طالعة نازلة
لأن الموقف دا حصل معاها ورجعت المدونة تانى ..قالت انها جابتها م الريدر تقريباً ومعرفش ازاى بس الحمدلله رجعت
فيمكن تلاقى عندها الحل

ان شاء الله خير وترجع

ربنا يسهل

الازهرى
------

يا رب يا زيزو

وان كانت نتيجة الأستفتاء بتقول ان اول القصيدة كفر خلاص ...

ربنا يستر

وفتقداك يا جدع يا اخلاق انتا
ويا رب تكون بخير

:)

إرسال تعليق