.

.

صــاغ ســليم + تحديث  

Posted by: فاتيما in




يااااااااه  
ايوالنبى الدنيا إتغيرت فعلا
و ثورة 25 يناير ابتدت تؤتى ثمارها 
والثورة المضادة تتراجع الى الوراء وتضمحل



  
حارس الأثار اللى مجبتوش ولادة 
و الفوق أى شبهات ف المكان الصحيح 




و رجل المبادىء فى مكانه
ومحشش يستجرى المرة دى ينطق
و يقول انه جه بالتزوير يا غجر
وسيد مشعل و ماجد جورج و حسن يونس
و عمرو سلامة والمحافظين ورؤساء الجامعات
وبتوع المحليات والأمن الوطنى .. الخ الخ





مبارك ف المشتفشى 
عشان انقهر لما اتحول للتحقيق 
مش قولنا عيب نبهدل الراجل ف شيبته
يا شعب نمرود مفترى
و ربنا ما يحكمكم على ولايا



طب كدا مش بعيد ابدا الحالة تندهور 
ويضطروا يسفروه برا لدواعى امنية
عشان القصر العينى القديم
مفيهوش سرير فاضى دلوقت 
و بس لو كنتوا تبطلوا زن و تصروا الحاحاً
كان فضل بصحته فلة شمعة منورة
و كنا خدنا فلوسنا من نن عينيه ؟





 التحرير بعد الضنا
لابس حرير ف حرير

 


الإيئتلاف فضوا الميدان و كنسوه 
و نضفوه م الواغش .. اللى كانوا فيه
و سلموه للمجلس تسليم اهالى
المجلس بيشكرهم من قلبه
عصام شرف فرحان جدا 
بإخلاء الميدان 
 




المجلس بينتج اغانى و يطلع ف البرامج
يصلح العلاقات بينه وبين الشعب
اللى ظالمه وبيقول عليه ايده طارشة
و عايز يلبسه تهمة قتل هذا الشاب البرىء





 خلاص العيال دى راحت ف الوبا
و شكلنا مش هنعرف مصيرهم 



قـــــــوائم العــار 
اللى ظهرت اثناء ال 18 يوم ثورة
شكلها هتطول لحد ما تتلفع بيها
الكورة الأرضية بذات سخصيتها




والكوى السوياسية تكرر بكل أريحية
تأكيل موزاهرة الجيمعة الكاية 
عشام الحيات التبيعية تعوت
  و عشام الثورة المدادة الويحشة
و أم الفلول ينبطوا و ينكبسوا ويحطوا ساكت



و يختى كميلة يا ناس 
ربنا يهنى سيعيد بسيعيدة 
و يوفق كل راسين ف الحلال
وكل الاحبة اتنين اتنين 
 وانا ايه اللى جابنى هنا من أصله 



طيب 
ربنا يوفق الجميع وأستأجز أنا



 تصبحون على ثورة 

---------------------------------





يا نهاركو الأسود ف فوحلوقى
مصطفى الفقى مرشح بعد عمرو موسى
امين عام للجامعة العربية ؟!!



مصر رشحته رسمى 
هذا المنافق الآكل على كل الطبايق
المعادى للثورة 
عبده مشتاق الاول 
ورجل كل العصور 
دلوقتى يبقى مرشح مصر ؟!!



ليه ؟
مفيش رجالة ف البلد دى ؟!!
و خلصوا خلاويص 


و لا يا اما يبقى الامين الجديد م الفلول 
يا السعودية وكل دول العربية تقول 
مخدوش أنا 




يا وزارة النكسة الثورية مش كفاية حواس 
لازم تلمى زبالة العصر البائد تانى 
هما ماسكين عليكوا ايه ؟
دا عصام شرف الناس قالت عليه نزيه 
بس برضو  قالت عنه غلبان و طيب 

لأ .. بس إيه دا ؟!!


 توصل للفقى 

ف هذا التوقيت الحرج اللى عاوز 
واحد عروبى عنده مبادىء 
وشرف لا غبار عليه  
و استقلال ف الرأى تجيبوا العاهات دى 



دا هيوكس الجامعة اكتر من وكستها 
وهيا عايزة اللى ينفخ ف صورتها 
يا فضيحتك يا مصر وسط الامم
مبقاش الا النطيحة والمتردية وما اكله السبع
اللى يقعدوا ع الكراسى 






اختشوا على دمكو 
دا اليمن وخدانا مثال وباقى الدول العربية
اللى عاوزة تنتفض ع الظلم 
نقوم ننقى الفسلة دا يبقى واجهتنا
عشان يخسف باسم الشقيقة الكبرى الأرض



لك الله يا مصر 


بالنسبة لحكاية المجلس العسكرى 
والواقعين ف غرامه 
واصرارهم انه والجيش حاجة واحدة
(ودا مش حقيقى بالمرة )
وخايفين م الانقسام والتفكك ..الخ الخ 


ممكن اقتراح بسيط  ؟



احنا مش كنا عاوزين مجلس رئاسى مدنى
فيه نفر واحد عسكرى 
مش دا كان مطلب 
من مطالب الثورة اول ما مشى المخسوف 




طب ما المانع لحدوث ذلك
بعد مضى كل هذا الوقت بالبطء الرهيبى
وبعد ما اكتشفنا بما لا يدع مجال للشك
ان المجلس تنقصه الخبرة السياسية
ومبيعرفش يتعامل مع المشاكل غير بالضرب
احنا محتاجين ناس مدنية هادية 
و روحها مش ف مناخيرها 
تواجه المشاكل بهدوء وحلول وتسويات 
ولما يغلب غلبهم 
يقولوا للعسكر اتصرفوا





أصل لحد امتى الفيلم الاسود الحزين دا ؟!!
ومحناش ف شفافية ولا يحزنون 
انصرب رصاص .. لأ منضربش
ناس ماتت .. لأ محصلش 
معاملة عنيفة .. مش إحنا 
ونفس الأسلوب القديم متغيرش 



ويتغير ليه ؟
احنا ليه دايما ننسى انهم كانوا  
ف سلة واحدة
فريق واحد و سياسة واحدة  
بس ناس دخلت القفص وناس بقت أبطال
لكن ..  على رآى عم نجيب محفوظ 
 آفة حارتنا النسيان

 


ليه الجمعة الجاية 
متكونش مليونية  .. بس
هتافها وشعارها و لافتاتها بتقول
الشعب يريد مجلس رئاسى مدنى
أصل الجيش جاى عشان يحمينا 
مش يحكمنا بالحديد و النار
و رجوعه كفرد ف مؤسسة الحكم 
هيخليه فى حجمه العادى الطبيعى
قوم لما تحصل اى حاجة خطيرة 
يلاقى اللى يقوله
عندك بقى و أستوووووب



هتقولولى 
طب هما قالوا مش هنسلمها 
غير لرئيس منتخب 
طب دا نسميه ايه بقى
غير السيطرة و التحكم
فى مقدرات الثورة ومحاولة كبحها 
ولصالح ميييين التآخر دا ؟؟؟


 
هوه اللى بيحمى الثورة ويصونها 
ويفرض شروط ضد الغالبية بمناسبة ايه ؟
لنفرض مثلاً انى  شايلة عندك امانة 
تتحكم فيها ليه 
و تديهالى بمعادك وشروطك
انتا مش انا ؟




دا حتى مبيعاملش الثوار بمساواة
مقارنة بالفاسدين والبلطجية 
وبيفرض علينا تعديلات و عشرتشر حاجة تانية
لحد ما الباشا اتنى واتفرد ف شرم الشيخ 
وطلع قال .. انا برىء و مش هسكت 
و خلانا فرجة للعالم كله 
ولسه ياما ف الجراب يا حاوى




هوه مش المفروض تحت الأقامة الجبرية
ولاّ اقامة سبع نجوم بشرطة ؟




والنايم العام اللى الناس نادت بسقوطه 
الجمعة اللى فاتت الف مرة 
توه ما صحى م النوم و أفتكر يستدعيه ؟!!
هوه عز وجرانة كانوا اهم من مبارك 
عشان يتاخدوا ف الاول وهوه على ميهله






طب مش لو كنا عملنا مجلس رئاسى
من اول اسبوع 
مش كان زمان الخطوة دى حصلت
بإجماع المدنين ف المجلس 
ولا كان الريس المتنحى راح شمال ولا يمين 
ولا لحق نفسه وستف ورقه 



بس مين اللى رفض وقتها 
وما زال يرفض ؟!!
طبعا كلنا عارفين
بس بنودى وشنا الناحية التانية


و مفيش غير كلمة التفكيك والحماية 
و خط احمر خط احمر
اللى لبانة ف البق 
لحد ما اللون الاحمر غطى المشهد 
وبقى دم الأبرياء ف ايدنا كلنا راضى ورافض




خطوة استدعاء مبارك وولاده 
محاولة لإشاحة وجه الرأى العام 
عن اللى حصل من عنف ف التحرير 
وارجو الا تنجح المحاولة 
و الدم والحرية 
يبقالهم تمن بعد كل هذا و ميروحش هدر 





وما دام مفيش حد عاوز مواجهة 
مع المجلس و معاه  الجيش
(كما ُيزعم انهم واحد)
يبقى خلاص
نطلب بالأدب والذوق
وعلى طريقة الأخت نوارة 
نبوس راسهم
ونحايلهم و نقولهم والنبى .. والنبى 
حققولنا المطلب دا كمان 
عشام الثورة 



دا مجرد اقتراح 
و لعله يلاقى صدى 




الجمعة الجاية
ميدان التحرير 
الشعب يريد مجلس رئاسى 



وعلى رأى اسم
إحدى المدونات الصديقة


الله .. الوطن .. اما نشوف 

------------------------------------- 



يا خراااااااشى شفتو ؟
الراجل طلع صاغ سليم  اهو
و زى الصينى بعد غسيله 
يا مفتريين يا ظلمة يلى متعرفوش روبنا 
دا عنوان النزاهة والشرف والشفافية
واللى هيدور وراه .. دلوقتى 
هيلاقيه صاغ سليم 





الناس اللى لسه شايفة المجلس العسكرى 
حامى الحما و خط احمر إيه رأيهم دلوقتى ؟!
طب الفلوس وغارت 
ومفيش حاجة بأسمه هوه وام جمال 
ولا بأسم جمال ولا عيلاء 
نضرب دماغنا ف الحيط يعنى ؟!!





عرفتوا دلوقتى ليه سابوه شهرين ؟


ليه ؟!!

عشان يرتب اموره 
وعشان القضية ترسى على مفيش 
ولما يحب يخرج .. يقولوا القانون 
والنايم العام بيقول معليهوش حاجة 
والراجل صاغ سليم وعاوز يتعالج 




لأ يتعالج وبس  إيه
دا راجعلكوا يجيبكوا من شعركو
نفر نفراية 
يا لهوى دحنا عاوزين وزير اسكان خارق 
يبنى سجون تكفى الملايين
اللى إفترت عليه واتهمته بالباطل 
وقالت انه حرامى و بيتربح م المال العام 
دا التحرير بس كان فيه ييجى نص مليون
شايلين يفط بتقوله فين الفلوس
ولا النشطاء بقى والصحفيين ..يا لهوى 
دحنا عاوزين زنازين بالهبل عشان
تكفيهم كلهم لأنه بيقول انه 
لن يتهاون ف رد حقه


و كله بالقانون و سيادة القانون
وبعصا الجيش وانتوا جربتوا  زعله اهو 
وشفتوا اللى بيعارض المجلس بيحصله ايييييه
بينضرب ف ميدان عاااام من غير دية
ولا حدش بيدور عليه 



طب نفكر كدا ببساطة 
لو كان المدعى العسكرى 
عمله قضية قتل متظاهرين من 13 فبراير
مش كان زمانه دلوقتى حايس حوسة
الأرملة ع معاش جوزها ف وزارة التضامشن
ولا طال سما ولا أرض



انما لأ .. تيجى ازاى 
طب دا المدعى طلع يزفلنا الخبر 
ف مانشيت واضح  وصريح
بيقول ..لن نحاكم مبارك عسكرياً 
إصطفلوا بقى مدنياً ورونا شطارتكو 
لو قدرتوا 



طب اهو الراجل طلع صاغ سليم 
هوه والجماعة والأولاد 



هنعمل إيه ... هنعمل إيه ؟


نزعل ..لأ 
نضايق ... لأ 
نعمل إيه ؟!!!

ولا حاجة بقى 

احنا نكشف راسنا وندعى عليه 
ولاّ نكنس عليه الحسين والسيدة نفيسة


حسبى الله ونعم الوكيل 
 ف الفاسد والظالم 
واللى أعانه على ظلمه 
وضيع دم الشهدا من 25 يناير لحد امبارح




وبمناسبة الشهدا بقى
دم الولاد الضباط الأشراف لسه
شايفينه مية 
 حد ناوى يهتم و لاّ لسه مش فاهمين
ومحتاجين نميز بين مين الضلالى 
ومين الشريف  ؟!!




الشهدا دمهم ف رقبتنا كلنا 
والا نبقى احنا كمان مشاركين ف قتلهم 
و دمهم على إيدنا ملطخها
و ساعتها منبقاش نستاهل نعيش 
و مفيناش ولا واحد هيفضل  .. صاغ سليم 



-------------------------

يا ترى انتوا فين يا عيالنا ؟؟؟
 شهادة محمد مرعى .. و صور الضباط
كلمة شرف .. طاهر ابو زيد
ليلة سوداء فى التحرير ... وائل قنديل
الضابط المعتصم ازاى مات
الهجوم بالأمن المركزى والشرطة العسكرية
--------------------------------------------------------

This entry was posted on الاثنين, أبريل 11, 2011 and is filed under . You can leave a response and follow any responses to this entry through the .

11 كــــلام بيطــبطـــب عـــلى قــــلبى و روحــــى

لكى الله يامصر
لا حول ولا قوه الا بالله
لا حول ولا قوه الا بالله




انتى عارفه اكتر شئ انا مستغربه منه ايه؟؟

ان جوايا اطمئنان غريب ان حال بلدنا حيتصلح وانها هتفضل بلد الامان
اصلى بصدق قوى كلام ربنا اللى اقوى من كل طاغيه متكبر وربى قال
ادخلوا مصر ان شاء الله امنين

يااااااااااااااارب

خلاص هموت همووووووووووووت
ربنا اقوى واعظم من كل جبار وظالم

صدقينى مش مجننى حاجة غير الاعلاميين اللى اصلا المفروض انهم وطنيين و فاهمين لكن اشتغلوا تحريض على الضباط و مبرراتيه للمجلس..مش قادرة اقولك صدمتى فيهم قد ايه و كل ما بشوف حد منهم او اقرأ له احس ان ايديه مليانه بدم الضباط

بلال فضل و نوارة نجم قاموا بدور أنس الفقى وعبد اللطيف المناوى بالضبط فى التحريض على المعتصمين زى ما حصل فى موقعه الجمل و قاموا بتهيئة الرأى العام و كذبوا ان دول ضباط مفصولين و ثورة مضادة و نسوا ان مافيش واحد مأجور و لا فلول ح يجى يقول انا ح قول الحقيقة و عارف انى ح اموت و مش ح اقلع الميرى عشان أكفن بافرولى و فعلا يموت بعدها بساعات بالرصاص

الاعلام غسل دماغ الناس و فيه شرفاء صدقوا و بيخونوا الشهداء من الضباط و بيقولوا يستاهلوا

البلد لسه محتلة و ح تفضل محتله طول ما الفساد هو اللى على رأس السلطة

فاتيما هانم
روحى روحى روحى
وحشانى كتييييير جداااااا اوووووووووى خااااالص ماللللللص

اولا تعقيمى كان هيبقى انى اسلم عليكى واجرى فورا عشان حظر التجول اللى معمول عليا من القيادة العليا عندى
ومش حظر وبس دى ممشية ورايا مخبرين زى الحاجة ابلة رشا هانم (الله يسترها) بتوافيها باخر الانباء
:)
بس حقيقى كنت مفتقداكى كتييير

بالنوسبة بقى للجيش فانا صدقت كلام احمد سعيد ساعة ماكتبه فى بوست له من اول ايام مابعد الثورة
وحاليا فانا عاملة مقاطعة مؤقتة لجميع الاخبار لانى وانا بقرأ البوست بتاعك دلوقتى لاقيت ضربات قلبى زادت ورجليا سقعت وجالى بوادر حالة غم

وانا واحدة على قدى كفاية عليا اللى باشوفه من خرافى وابقارى الاعزاء
؛)

رغيت كتيييير برده مفيش فايدة
يلا هاطير انا
وهادعلك يارب تكونى دايما بخيييير
ويحبب فيك خلقه ويحبك هو كمان :)

اقول سلام على اطيب فاتيما مرت على البشرية
:)
:* (بوسة كده بعيدا عن الانظار)

فاتيما
روح القلب الملائكية

حمد الله غلى السلامة

انتى فاكرة الاعنية دى
ازعل لا
اضايق لا
اعمل ايه
اضحك طبعا اضحك
كم بكى يا مصر من مضحكات و لكنه ضحك كالبكاء
مفيش قدامنا فى المرحلة دى غير اننا نسكت و الا العواقب هتكون وخيمة و قضا اخف من قضا رجاء قراءة بوستى الاخير كتبته بعد اكتئابى بعد عودتى من التحرير الجمعة الماضية
تحياتى

وقت التنحي قالوا إن صحة الرئيس متدهورة جدا و يا حرام و معلش. دلوقتي في المستشفى..و شوية و خبر إنه رافض الأكل و الشرب.... بجد حاجة تزهق

مصطفى الفقي..بعترف إنه راجل ذكي، بس هم اختيارهم على أساس الذكاء و بس؟؟ مش حاسين بأيييي حاجة غريبة في اختيارهم دة؟؟
و طلعت السادات اللي كان طول عمره بيهاجم الحزب الوطني بشدة هو دلوقتي رئيسه!! حاسة إن كل حاجة مش في مكانها

بجد ربنـا يستر على البلد دي. بس لسة برده جوايا إحساس بعيـــد كتير بستغربه إن كل حاجة هتبقى كويسة و هننجح ننضف مصر قريب أوي

http://www.almesryoon.com/news.aspx?id=54998


وكمان سبق صحفى

ربنا يصلح الحال يارب .. الحكاية بدها شوية صبر .. في تحرك بس شوية بطيء ..
اما بالنسبة لترشيح الفقي عن جد هذه فضيحة في حق مش ح اقول مصر ولكن من رشحه .. الفقي يا عالم ؟؟
هي مصر مافيش فيها رجالةولا ايه بالضبط ؟؟ خلصوا خلاص !

آه يا فاتيما
يا خوفي
يا خوفي
يا خوفي
الا اقوم الصبح الاقيهم بيقولوا ....
والله الراجل غلبان وانتم ظلمتوه
ده حتي ممعوش فلويسس يتعالج...
احنا قررنا نعالجة علي نفقة الدولة....!!!!!!!!
ولا عزاء ....للثورة

هو انتى يا فاتيما شلتى مدونة بت خيخة واى كلام من الريدر بتاعك ليه ؟
انتو متخانقين؟

ازي حضرتك .. كل ما بحب اطمن علي بلدي بدخل هنا .. ماشاء الله عاوز اخد اسبوع اجازه عشان اعيش الجو الجميل هنا .. ربنا يحفظك

إرسال تعليق