.

.

أنــــا رابـــســـو  

Posted by: فاتيما in






التحديث ف آخر البوست 
------------------------------

آه يا أيها الرابسو 
كم من الجرائم سوف ٌترتكب بإسمك 



آه يا رخيص يا غلبان يا طيب 
يا منضفنا يا مطلع بلاوينا 
يا قاهر البقع و الاوساخ 
و انتا تغسل بدون مجهـــــود 




بداية كدا 
 جمعة التطهير 
بكل احداثها وهتافاتها و تدعياتها وصولاً
لفجر السبت الدامى 9 أبريل 
كانت وبلا شك الرصاصة التى أصابت الهدف 
ف مقتل و اللى دفعت السلطة الحاكمة 
للقبض على مبارك وولاده بعد تمنع شهرين



اللى مش موافقنى هذه الرأى 
 ميكملش قراية  


لأن قناعتى ببساطة ان اللى حصل 
عمل فارق كبير و شكل ضغط اكبر




الهتافات ضد النايم العام 
والمطالبة بمحاكمته على تعمده التباطؤ
الهتاف ضد المشير لعدم قبضه على مبارك للآن
الأصرار ع الزحف لشرم الشيخ الجمعة الجاية 
نزول بعض ضباط الجيش للإعتصام مع المتظاهرين
ثم الرد عليهم بعنف ودم و اعتقالات 
و توتر الموقف بين الشعب والجيش 
بعد انكار حدوث عنف 
ثم نزول فيديوهات توضح العكس





كل دا ..خلى حاجات كتير تنكشف
وبوضع قطعة بازل يوم السبت 9 ابريل 
... بجانب قطع بازل
اربعاء المتحف
و جمعة مجلس الوزرا
و 2 فبراير و الحياد السلبى ف معركة الجمل 
مع البطء الشديد ف أشياء عدة
مع عدم الضغط ع الأمن للعودة بشكل تام
و السرعة ف محاكمات النشطاء 
و ترك الشعب ينقسم بسبب التعديلات الدستورية 
و عدم الأستجابة لباقى مطالب الثورة ..الخ


بعد كل هذا الصورة 
بقت شبه مكتملة للى مكنش شايف
والناس بقت تسأل 
ليه اللى حاكمينها بيعملوا كدا ؟!!
هما معانا ولا ضدنا ؟




ولإن السؤال نبرته عليت 
مبقاش فيه غير الحل التقليدى 
وهوه محاولة تصحيح العلاقة و تلطيفها 
ابتدينا بالأغانى و الظهور ف البرامج 
وحنفية مقالات وانفتحت ف الجرايد تحذر 
وتهلل وتقول عيب .. وميصحش 


ولما الحاجات دى مجبتش نتيجة سريعة 
مع أصرار البعض بالبقاء ف التحرير
مبقاش فيه غير الحل الفورى
اللى تم تجنبه مرارااااااا
وهوه 




 التضحية بالراس الكبيرة
ما دامت السجادة هتتسحب من تحت الأقدام 
و الناس باتت مصرة تسافر 
تجيب مبارك من قفاه 
و الجيش هيبقى ف النص شكله مش اللى هوه
وهنرجع تانى لما قبل تنحى مبارك 
ولازم يبقى تخيير  و فيه انحياز لطرف 



فالمرة دى خلاص
يا روح ما بعدك روح 
ويا مبارك ... لامؤاخذة  ... منعطلكش 
و معاك ربنا



و جرى جرى ينقبض عليه 
و جمال وعيلاء و سوزى شرحو 
و الناس تفرح وتنبسط و تهيص و تهلل
و فورا ينخرس لسان كل نفر قال 
كان فيه صفقة
و خلاص عاوزين ايه تانى ؟
نفذنا مطالب الشعب والثورة 
و كل واحد ينبط بقى 
بس أثناء ما كل واحد ينبط 
يتم تمرير حركة تغيير المحافظين 
واللى كالعادة .. بنفس معايير
و اختيارات النظام القديم 
و كأن مفيش فرق بين ما قبل الثورة 
ولا بعدها .. و الإختيار الأمنى هوه المسيطر 





وسؤال على جنب 
بمناسبة المحافظين 
محافظى سينا شمال وجنوب تحديداً 
متغيروش ليه مع ان اهل سينا استجاروا منهم ؟






الجرايد والأعلام 

ما زالو على عهد الهوى باقيين
نفسي النفاق والتملق و تصالح المصالح



و الفرق بين القديم والجديد 
ان الإعلاميين الجدد مهنيين افضل شوية 
من سابقيهم واقل كراهية بين زملاءهم
وعارفين ازاى يلبسوا البسطاء الاونطة 
لكن هذا التلميع لن ينفى توجهاتهم السابقة 
و يخلينا ننسى معتقداتهم 
و اللى متغيرتش بعد الثورة 
والا نبقى احنا نستاهل الاونطة فعلا





و مجرد بس مثال 
جريدة الأخبار ف عدد 13 ابريل 
بمنتهى البراءة ف الصفحة الاولى 
تحط رسم كاريكاتير
للأخ مصطفى حسين راعى الثورة 





و اللى واضح فيه
انه سخرية من شاب ثورجى 
و مش عاجبه العجب 
و بيخّون امة لا اله الا اله 



و أى شخص ثقافته بسيط بيقرى الجرنال 
يوم ورا يوم يتكون عنده صورة عامة 
عن بتوع التحرير والثوار عموماً
انهم متمردين ع الفاضى و عاوزين يمشوا 
أى حد وخلاص بمبدأ التخوين
و انهم ملهمش قضية محددة
و ... حاجة تقرف 





احب افكركم ان هذا الرسام 
الذى لا يستحق موهبته 
بعد خطاب مبارك التانى 
نشرتله الاخبار الرسمة دى 




ولا تعليق 


 
واحد كمان بيعود للكادر و هو
الاخ البرىء ... مصطفى الفقى 
اللى مالى الدنيا صريخ وعويل 
انه مناضل ومع الثورة من اليوم الاول



أيوالنبى .... من اليوم الأول

الاول
اخدين بالكوا 
على اساس اننا مكناش بنسمعه
وهوه بيتنقل من فضائية للتانية زى فرقع لوز 
يدافع عن اسياده 
ويقول كفاية لموا الدور يا غجر التحرير
والبلد راحة ف داهية .. وكدا 
دلوقتى ..بقى منينا وعلينا 
و فى ربيع الشعوب العربية الحادث الآن 
يأتى هذا الشخص ليجد مقعد مهم زى كدا 
ويتقاله ..  أهلا وسهلاً أتفضل اقعد 
ازاى ؟!!!


انا نفسى اعرف الأختيارات دى بتتم ازاى ؟
يعنى قبله كان مفيد شهاب المرشح 
و لما الناس كانت هتجيلها جلطة جماعية 
تم السكوت و التعمية عن الحكاية



قوم لما يتمخض الجبل 
يلد الفقى ؟!!!



ليه يا دكتور عصام يا شرف 
يلى قال فيك الزملاء و الرفاق قصايد شعر 
موافق ع اختيار هذا الراجل 
بعدما ادلت نهى الزينى بشهادة حق 
تؤكد فيها نجاحه بالتزوير المبين .. إزاى ؟



واذا كان هوه
و لاّ زاهى حواس ... المتقدم فيه بلاغات
واذ فجأتن القطع المسروقة م المتحف 
واللى سكت عنها ثم فضح امره 
فعلت اصوات تطالب بالمحاسبة
فإذ بالقطع ترجع و بقادرة قادر 
ويلاقوها ف محطة مترو 
بعد مسكانه للوزارة بأيام 
و الراجل دا له كرامات ومعجرات
يا سبحان الله



سؤال بديهى وبسيط 
هيا البلد دى مفيهاش رجالة ؟!!





يا دكتور عصام انتا محووج للأسامى دى ف ايه ؟
ما الذى يدفعك للموافقة عليهم ؟؟
هوه التسونامى ساب اليابان 
وجالنا و خلص ع المواطنين المصريين
ومبقاش فاضل غير دول ؟!!



مش هتكلم عن طلعت السادات 
ونفخ الروح ف الحزب الوطنى من تانى 
بوشوش جديدة محدش بعدها 
هيستجرى يقول
الحزب الوطنى راجع بناسه القدام 



ولا كمان هتكلم عن مجلس الشعب الجاى 
والمهازل اللى هتحصل ف الأنتخابات
وخصوصا ف ظل عدم شفافية أى تحقيقات 
بتحصل بعد العنف 
واللى هيحصل بالهبل ف الأنتخابات دى




 ومش هتكلم برضو عن حقوق الأنسان
اللى بيختارولها ناس هتضيع حقوق الأنسان 
اللى فيه نيه قادمة .. للنيل من حريتهم 
ودا يقودنى لأنى متكلمش برضو

عن الأعتقالات اللى حصلت 
و اللى لسه هتزيد ف الفترة الجاية 
كأجراء لتكميم الأفواه كما العصر البائد
و كله واحد يتلهى ويلف حوالين روحه
عشان نكش كلنا .. و نخاف و نكن 






و الأعلام "الحر" بتاعنا دلوقتى
بقى موجه بشكل مخزى .. 
موجه لشغل الناس والشعب بحواديت
اهل و سكان سجن طرة

يعنى 

مبارك اكل ايه و زعق لمين النهاردة
العادلى بيضربوله تعظيم سلام ف السجن
الشريف مكتئب و سكره وضغطه عالى 
سرور بيقول آخرتها البس كلابشات
مش لاقيين سرير بطول نظيف
الهانم بيحققوا معاها والقناطر تستعد لأستقبالها 
عيلاء جمال  ...   هايدى و ديجا 
الجيش يطهر التحرير من الغوغاء والبلطجية
 الجيش يفرج عن المقبوض عليهم 
الجيش ينضف التحرير ويعيد تبليط الحتت المتكسرة




وحركة المحافظين ... بتتم
والأمن مية مية اهو 
ونشوف بقى احوال البلد اللى وقفت 
الأكتصاد الاكتصاد 
ويا بتوع الثورة اقعدوا ف بيوتكوا 
و لا تحرير بعد اليوم 




طب باقى الحاجات فين ؟






المجلس الرئاسى المدنى ؟
ورجوع الجيش لمكانه ودوره الطبيعى ؟ 
والدستور الجديد ؟
وانتخابات الرئاسة قبل انتخابات مجلس الشعب؟
و حل الحزب الوطنى؟
و حل المحليات؟





مع العلم بأن مفيش تعارض
بين حدوث كل هذا
وبين إن البلد تتحسن
واحوالها تمشى 
والمطالب يتم المناداة بيها والأصرار عليها 



واهم من كل هذا 



الحـرية 
الحــــــرية
هذه الكلمة السحرية 
اللى بتمام حدوثها .. يحل الامن و الطهارة
والبلد دى تشوف ايام خير من تانى 



ممكن سؤال تانى ؟؟



حد واخد باله و لو شوية 
مما يحدث من محاولات لغسيل السمعة
والتاريخ الاسود 
و اللى بيحصل الأيام دى 
على ودننننننننننه ؟!




و طلب بالمرة بقى 
لو ممكن نعمل مليونية للمطالبة و بشدة
بتخصيص منطقة صناعية كاملة 
تركز مصانعها على خط إنتاج يومى
لسد إحتياجات السوق المصرى 
من الرابسو  وكافة مساحيق الغسيل 
ولو تم اللجوء للأستيراد
فالعائدين من وحل المستنقع السابق 
لو جبنالهم كميات تغسل البحرين 
الأحمر والأبيض ... و لا والله هتكفي


و يأيها الرابسو 
كم من الجرائم ٌسترتكب..بأسمك 





 

آه قبل ما أنسى 
ثوار اليمن و ليبيا .. بيكلموا الطغاة 
بقلب جامد قوى بعد القبض على مبارك 
وبيقولولهم الحقوا روحكم من نفس المصير 


الله عليكى يا بلدى 


يلى قزموكى و رخصوكى و قلوا قيمتك 
لما تكونى نور ودليل و سند لأخواتك 
ربنا يحفظك من الذئاب التى ما زالت ترعى 
و عاوزة تخسف بيكى تانى برا و جوا 



وانا .. مش هبيع الصدق بالاكاذيب 
ولا قولش للحمل الوديع يا ديب 
ولا قولش للديب ... يا أعز حبيب 
مهما حصل 




مهما حصل

-----------------------------

تحديث 
----------------


الف مبروك لحل الحزب الوطنى 
الخبر يفرح بجد و يفتح النفس ع الدنيا


و شمتانة جداااااااا ف طلعوتة


وإذ إنى مش غاوية النكد 
 فعاوزة أسأل الأخ غير معرف ابو تعليق
مش هنشره عشان مفرحوش  بشبابه


سؤال واحد


انتا حاطط ابو قرش على أبو قرشين ليه ؟


 اللى حل الحزب الوطنى مش المجلس
فهشكره على إيه ؟ 
مش لما يكونوا هما اللى طلعوا قرار بكدا
او اللى رفع القضية واحد منهم ؟!!




انما لما يكون تحقيقه 
منجز فردى ثم شعبى ثم قضائى بحت 
يبقى هنحشر المجلس ف النص ليه 
و انتا عاوز ايه دلوقت ؟!!




وبعدين بخصوص سؤالك عن ماهية مصريتى
يعنى هوه ثابت بالاوراق الرسمية 
انى مصرية و الحمدلله 
سواء بشهادات ميلاد ابويا وامى 
و بشهادة ميلادى و جواز السفر 
و شهادات مراحل الدراسة المختلفة
و ورقتى الجواز والطلاق و مؤخراً الرقم القومى 


وفوق دا كله .. مش بقول للبامية يع




فمبقاش مصرية ازاى يعنى ؟!!

-----------------------------------
----------------------------------------------------


ظهر الجند دائرة من دروع وخوذات حرب 
ها هم يقتربون الآن رويداً ..رويداً
يجيئون من كل صوب 
والمغنون فى الكعكة الحجرية 
ينقبضون 
وينفرجون 
كنبضة قلب 
يشعلون الحناجر 
يستدفئون من البرد والظلمة القارسة
يرفعون الأناشيد فى اوجه الحرس المقترب
يشبكون أياديهم الغضة البائسة
لتصير سياجاً يصد الرصاص
الرصاص ..
الرصاص .. 
وآه 
يغنون : نحن فداؤك يا مصر 
نحن فداؤ ...
و تسقط حنجرة مٌخرسة 
معها يسقط اسمك - يا مصر- فى الأرض 
لا يتبقى سوى الجسد المتهشم ..
والصرخات 
على الساحة الدامسة 
دقت الساعة الخامسة 
دقت الساعة الخامسة 
وتفرق ماؤك - يا نهر - حين بلغت المصب 
المنازل أضرحة 
والزنازن أضرحة 
والمدى أضرحة 
فأرفعوا الأسلحـة 
أرفعــــوا 
الأسلحــة 
أمل دنقل - قصيدة الكعكة الحجرية 
الأصحاح السادس - العهد الثانى - 1972
--------------------------------------------



أعزائى المشاهدين:نكتفى بهذا القدر ..وائل قنديل
طب مترشح الجنين .. عشان ننتخبه بقى
عن الدكتور البرادعى .. عمر طاهر 
احتكار وأشياء آخرى ... احمد الصاوى
الشعب يريد تشغيل البلطجية .. هويدا طه
سبوع فريدة ومفتاح مصر .. محمد أمين
رسالة الى السادة المحافظين .. أيمن الجندى 
مظاهرات حاشدة بقنا ضد المحافظ الجديد
المئات يتظاهرون امام سفارة تونس فى السعودية
هحبسكم يا رعاع .. إبراهيم رزق
----------------------------------------------------


ملحوظة 
المدونة بتاعتى بتعانى من مشاكل 
اى بوست مبيطلعش ف ريدرات الناس التانية
و فيه تعليقات بتتحذف ومبلاقيهاش
و فيه مدونات بتخرج م الريدر بتاعى 
فمعلش .. أى حاجة كدا مش مقصودة 
و الغير معرفة اللى بتصطاد ف المية دى 
مفيش مية متعكرة اصلاً 
انا وخيخة زى الفل .. اطلعى انتى بس منها 
و شكرا
------------------------------------------

This entry was posted on السبت, أبريل 16, 2011 and is filed under . You can leave a response and follow any responses to this entry through the .

46 كــــلام بيطــبطـــب عـــلى قــــلبى و روحــــى

البلد هتنظف ان شاء الله سواء برابسو ولا اومو
وقطنة ابلة نظيرة ما بتكدبش
والثورة هتنجح ان شاء الله لان ربنا راعيها لحد الان وهو السبب الاول والاخير فى نجاحها وفى يقظة الشعب المصرى بعدطول غياب ونوم فى العسل
متفق معك فى وجهة نظرك بكل تاكيد لابد من اليقظة والمحافظة على مكتسبات تلك الثورة
تحياتى

:)))))))

انا ببتسم قوووووووووووووى
عشان

انا بكتبلك تعليق ف مدونتك
وانتا بتكتب واحد عندى
تقريبا ف نفس اللحظة

القلوب عند بعضيها
:)


مش قولت اخويا
ومكتوبة ف البوطاقة



وفيما يتعلق بالمخزون الاستراتيجى
من الرابسو
فيا رب يا خالد
ننضف بيه الواغش
مش هما اللى ينضفوا بيه صورتهم وسمعتهم وافعالهم السودا ويبقوا ف النهاية
رجال العهد الجديد ..برضو

انا عمالة اردد العبارة دى
زى المحاذيب

للثورة رب يحميها
للثورة رب يحميها
للثورة رب يحميها

عشان الناس ابتدت تلخبط
وتتلخبط قوى

وبلاش أومو
عشان كنت باخد عليه تريقة بسبب الأعلان
بتاع راحة فين يا فاطمة
وجاية منين يا فاطمة
وطبعا فاكره ...
:)


ربنا يخليك لأختك
ومنحرمشى منك ابدا

فاتيما
روح القلب الملائكية

متفق معاكى ان الجمعة الماضية هى السبب فى تسريع الاجراءت لكن انا رجعت من هناك وانا مكتئب مش هى الناس دى اللى قامت بالثورة الناس اللى انا شفتها فى التحرير ممكن تودينا فى سكة اللى يروح ميرجعش

يبقى احنا نكتفى مؤقتا بالمكاسب اللى حصلت و نحاول نتقدم خطوة خطوة

لو على مصطفى الفقى الجامعة العربية ماتت من زمان هل يضير الشاه سلخه بعد ذبحه بلاش نفتح مواضيع كتير
اما مصطفى حسين فهو موهبة بلا عقل فقدت كل بريقها عندما ابتعد عنها احمد رجب
من متابعتى للوجوه الجديدة فى الصحافة من الممكن ان نرضى بها مؤقتا يكفى لبيب السباعى شخصية محترمة احنا كنا فين و بقينا فين انت فاكره ممتاز طشة الملوخية و اسامة تعبيرية عبدالله كمال المنافق و كرم جبر المطبالتى
فاتيما ميدان التحرير الجمعة اللى فاتت كان ممكن يكون قنبلة تنسف كل اللى حصل بالوجوه اللى قفزت عليه
القادم افضل باذن الله
تحياتى و سلامى الى روح قلبك جو

يا فاتيما، ألف ألف ألف مبروك، البوست دا جالي على الريدر :) أتمنى تكون المشكلة إتصلحت.

كلامك كويس يا أم يوسف.

ازيك يا فاتيما

انا الندل قصدي الريس
عاملة ايه يا حجة اتمني إنك تكوني بخير وبصحة وبسعادة وبسلام .

في حجات محيره الخلق الأيام دي مين مع مين ومين علي ايه ولا مع ايه وتزيط في الحقايق والحقايق بدل الوضوح بقت مفارق .

جمعة التطهير أحلي جمعة .

انا محاسبة الجيش كمان بس مش حالا .

والبلد عايزه شوية كلور وزهرة معدش ينفع معاها رابسو

وعايز حجر عشان يشيل الجلخ اللي علي بدنها .. وينضفها من الأوباش .

أما سي حواس افندي ابو برنيطة فبيقولك الثورة قامت عشان احد الأثريين نفخ في بوق الحرب بتاع واحد ناسي اسمه من الفرعنة أيوا توت عنخ أمون . ودا اللي قوم الثورة .

الفقي طبال ونخاع وكتير غيرهم .. علي رأي الأخ باسم دول ناقصين يقولوا إنهم مفجرين الثورة .. وقالوها والله .

ربنا يستر علي البلد .

معاكى جدا و بعتقد ان موضوع الضباط هو السبب الرئيسى فى كل اللى حصل و من يومين على مودرن حرية كان عبد الحليم قنديل بيكلم مع معتز مطر و قال ان من اهم العومل وصول معلومات لجهات سيادية عن احتمال انقلاب عسكرى

ابراهيم رزق
-----------

ازيك يا ابو العيال

انا كمان يا ابراهيم
لما روحت كنت متضايقة بس لأسباب مشابهة
لأن التواجد الكثيف للاخوان ..قلقنى
واصلا كانواخانقنى طول اليوم
واللى اتخانقت معاهم كانوا مجموعة كبيرة
من بنات أخوانيات جم وقفوا قصادى
بشكل عنيف و زهقونى ف عيشتى
لكن جنبهم كان فيه اخوانية تانية طيبة جدا و اسلوبها مهذب كانت قاعدة قريب منى طول اليوم واتعاملت معايا بحميمية شديدة وكان معاها ولادها الصغيرين وقعدت العب معاهم شوية ...

بص وارد جدا ف وسط الزحام
تحصل حاجات كتير
وييجى ناس كتير
ومناظر كدا متعجبكش
لأننا خلاص يا ابراهيم
دخلنا فى مرحلة جديدة تماماً
مرحلة تقسيم التورتة
وللأسف ..المهرولين عليها اغبياء
بيهرولوا قبل الاوان
وقصة العصا للرافضين
يساندها الجزرة للمشتاقين
وما حدث ف التحرير يومها كان كدا

ويبدو اننا لازم نتعود
من هنا ورايح ..ع اللخبطة دى

بس اثناء اللخبطة
من يحمى مطالب الثورة ؟

طب انا لا تبع الاخوان
ولا تبع شباب 6 ابريل
ولا جبهة التغيير
ولا ائتلاف الثورة
ولا أى حزب
ولا عاوزة ...
انا تبع بلدى وبس
اعمل ايه لما يبقى فيه دعوة للنزول
غير انى اشوف اسبابها مقنعة ومنطقية وبالتالى انزل ولا لأ ...

متهيألى كل حد بينزل بيعمل كدا
له اسبابه ودوافعه

وربنا يحفظ هذا البلد
يا رب


الصحفيين متكلمنيش عنهم يا هيمة
عشان يا عزيزى انا ابويا كان صحفى
وانا عشت عمرى اعرف كواليسهم
وعارفة ان كل واحد فيهم مجاش المنصب دا الا لأنه هينفذ التوجهات ويمشى ف التراك المسموحله بيه ...
وانا قولت ف البوست ان الرؤساء الجدد فيهم مهنية محترمة عن سابقيهم ..
بس دا السم ف العسل ..للأسف

عموما
بكرة هيبين
ولو انى عارفة من دلوقتى
مالم يظهر الصحفيين تحت ايدهم ..
تغيير يتناسب مع الأحداث ....

خالص تحياتى ليك يا فندم

وجهة نظرى
---------

ازيك يا معتز

الله يبارك فيك يا غالى

بص وانا بكتب البوست
لقيت خدمة جديدة عاملها البلوجر
للأبلاغ عن مشاكل النشر
ندهت للواد ماجودة اخويا
كتبلى اللى فيه القسمة
والحلوة اتكلمت وطلعت قماش

منحرمشى منك
وربنا يهدى البلوجر ..آميييين

MR.PRESIDENT
------------


ما عاش اللى يقول عليك ندل يا ريس

الريس الندل كان واحد بس
وكلنا عارفينه


وكويس احنا متفقين تقريباً اهو

بس اللى هيخلينى اتجنن يا بسام
ان الكلام دا لو من 3 شهور
يبقى منطقى
انما لما يتقال دلوقتى
ونكافىء اصحابه ..
ونخلى واحد وزير
وواحد امين عام ...
ابقى يجيلى جلطة ولا نخليها أزمة قلبية كفاية ؟!!!

ربنا يستر ان شاء الله

Tears
-----


والله يا تيرز
ع الأقل

اللى اتعمل كانله تمن
وقيمة
لكن ..
تفتكرى ربنا هيسامحنا
على هذا السكوت ؟

مظنش


ادينا قاعدين
و بنتفرج


مفضلش غير الفرجة للأسف

و الكلام ...

و الدعاء ..

وبس

:)
صح جمعة التطهير والمظاهرات هية اللى سرعت فى محاكمة مبارك وشلته الحلوة
من غيرها ماكنش حصل حاجة
ربنا يبارك فى ثورتنا يارب
ثورتنا هتكمل وهنتجح لان ربنا حاميها وشعبنا ذكى وصاحى

أتاريكي زعلانه مني

والله يا طمطم ما قريت الكام بوست اللي فاتوا ولا ظهروا عندي أساسا


عموما

رابسوا ولا برسيل مش مهم المهم النضافه

على فكره انا قريت للاخر

ان شاء الله مش هنحتاج لربسوا
كله جاي ومادام الشعب مصحصح كله ان شاء الله هيبقا تمام
موضوع المحافظين لفت نظري فيه ان اغلبهم اسماء مش معروفة للناس واللي عايز يعرف يدخل جوجل يعمل بحث
هيلاقي التوليفة غريبة حبتين

ورغم كل شئ عندي امل
مادام اللامبارك دخل الكلابوش ان شاء الله هيبقا كله سهل

ازاي القمر. يارب تكوني بخير وسعادة وحب وهنا ويسعدلك ابنك يارب وتشوفيه زي ما انتي عايزة ...

اعترفلك بأن جمعة التطهير اللي سبقت الجمعة دي كان ليها اثر كبير جداااااااااااااا
في محاكمة باقي الحكومة السابقة
وورت للعالم كله ان شعب مصر مختلف ومنفرد ولاول مرة حاكم عربي يتحاكم على ايد شعبه مش ايد تانية غريبه عنه

ووفرت كمان حق المواصلات للي كانوا رايحين شارم خير وبركة :d


* بالنسبة لمطصفى حسن هو فنان يا فاتيما واحساسه وده وده ريشته للرسمة بتاعتة سطوع شمس حسني ... مهما اختلفنا في الاراء فلكل واحد وجهة نظر بيعبر عنها احترمها رغم اختلافي معها

لولا
لولا

السلام عليكم
أزيك يا فاتيما .. أدعوا الله ان تكونى فى خير حال اختى الغالية..
بوست رااائع و تحليل هايل بجد للاحداث ..
أتمنى أن الرابسو الموجود يكفى علشان نقدر ننظف البلد .. مع كل أسف كانت وصلت لحد ما ينفع فيه رابسوا ,, عاوزة مطهرات اقوى كثيير .. لكن ان شاء الله ربنا حينصفنا و يسترها معانا يااارب ..
تقديرى لقلمك غاليتى ..
تحياتى و اكثررر

معلش إن تعليقي خارج إطار التدوينة

جيت أقول لفاتيما الجميلة.. أم يوسف..
جيت أقولك شكرًا بحجم رقتك ودفء قلبك

http://unique100.blogspot.com/2011/04/blog-post_16.html

شكرًا من قلبي

هاتي بوسه :* :))))

والله انا هعتزل كل الاماكن واجي البلوج سبوت لانكم عاقلين والله ... اعقل من بتوع الفايك بوس ده :d

ولا تويتر اللي هيجنني :((

عموما ربنا معانا ونكمل المشوار :)

تحياتي

بجد بوست روعة بكل الصور

ماشاء الله على حضرتك بجد وعجبنى اوى موضوع الرابسو ده

ربنا يحمى مصر وشعبها والامة العربية كلها يارب

لك كل التقدير والاحترام

متفق معاكي في كل كلمة
بس ما عدا الإنتخابات الرئاسية قبل البرلمانية
أنا عايز إنتخابات محلية الأول و بعدها برلمانية و أخيراً رئاسية
من تحت لفوق يعني

لكن متفق معاكي في كل كلمة في البوست
و حانشره هو و البوست اللي فات عندي



السلام عليكم

تعرفي يا أم يوسف إننا وبدون قصد أوقات بنتصرف بنفس الديكتاتورية اللي قامت الثورة بسببها , بمعنى أول البوست قولتي اللي مش متفق معايا ميكملش التدوينة !! دي ديكتاتورية :)
بأحط ابتسامة عشان تعرفي إن الكلام بدون تشنج وبروح طيبة خاصة إني متفقة معاكي في كثير مما قولتيه

ممارسة الديكتاتورية علينا لعقود خلتها في الجينات بتاعتنا رغما عنا وده اتضح بعد الإستفتاء وقبله كمان فمن قال لأ هو مع الثورة ولم يفرط يف حق الشهداء وذكي وبيفهم ومش بينضحك عليه واللي قال نعم , غبي ومش بيفهم ومن ميدان الكنبة ومضحوك عليه وشاريينه بإزازة زيت أو خايف يروح جهنم !!!
دي ديكتاتورية أيضا مثل ما قال بوش من ليس معنا فهو عدونا !!
من المفترض أن نسمع لأراء بعض حتى لو لم تعجبنا فلعلنا نستفيد أو نغير قناعات أو ندرك أبعادا أخرى لا يمكن ادراكها من زاوية رؤيتنا أنا عن نفسي عندما أجد كل التعليقات تؤيدني لا أجد كلاما أقوله وأرحب بمن يخالفني لأنه يتيح لي الفرصة لأعرض وجهة نظري بصورة أكبر وقد أتفق معه وقد أختلف ولكن من المؤكد أن كلامه لن يمر مرور الكرام وقد أستدعيه لذهني في مواقف أخرى ولهذا فلا بد أن نعود أنفسنا على قبول الرأى المخالف ونناقشه ونؤيد ما جاء فيه من أراء محترمة ونختلف دون نسفه منه فكما قلت لك سابقا لا أحد يحتكر الحقيقة ونحن لا نعرف ماهي الحقيقة ولكننا نظن أن هذا حق فنتبعه أو هذا باطل فنتجنبه ونسأل الله أن ينير لنا بصيرتنا لأن الحق واحد والأباطيل كثيرة,


معك تماما أن الضغط الشعبي ومنذ البداية هو من جعل المجلس العسكري يأخذ جانب الشعب لأن لا بديل أمامه سوا هذا, المتحولون بسبب الثورة أكثر مما تتخيلي ومنهم من صدق في تحوله ومنهم منافقاً وما زالت الأيام تحمل مفاجآت لنا
الضغط الشعبي حاجة وتخوين المجلس حاجة تانية لأننا أيضا لا نعرف ما وراء الكواليس
لا بد أن يستمر الضغط الشعبي إذا حدث تقصير لكن بدون التخلي عن الحكمة وحسن تقدير الأمور , لما طلب الله تعالى من موسى أن يذهب إلى فرعون الذي طغى وتجبر وذبح وقتل وأفسد في البلاد ونصب نفسه إلهاً طلب منه أن يقول له كلاما ليناً فهذا ليس نفاقا بل حسن تقدير للأمور
الحكمة تقتضي أن نعرف متى نغضب ومتى نثور ومتى نتكلم ومتى نصمت , لم يعارض أحد خروج مليونية الجمعة الماضية للضغط لاسراع الخطى لكن تخوين المجلس وتأليب الشعب عليه ليس من الحكمة
صورة الكاريكاتير لمصطفى حسين الساخرة من الثوار عندك حق فيها لكن قد يدهشك أن هذا أصبح رأى كثير ممن أيدوا الثورة بل و شاركوا فيها وليسوا من المتحولين , معنى هذا أن بعض الثوار لم يتعلموا متى يصمتوا
وأعود وأقول , الثورة ليست ميدان التحرير بل كل ميادين مصر والثوار ليسوا فقط ثوار إئتلاف الثورة وثوار التحرير بل ملايين من الشعب المصري فيجب أن نستمع لهم وليس لصوتنا فقط ومن أجلهم نضغط وبإصرار حتى تتحقق كل الأحلام ومن أجلهم يجب أن نتصرف بحكمة
وأعلم أننا مختلفون على هذه الجزئية وكمان مختلفة معاكي على رابسو :)

دي كانت نضافة امبارح لكن نضافة النهاردة توماتيكي توماتيكي نضافة وريحة وتوفير
وفي لمح البصر
إيشي خيال يا ناس
:)
تحياتي وتقديري

wella
-----

يسمع منك ربنا يا ويلا

يا رب

مصرى جدا
---------

مين دى اللى زعلانة ؟!!!

انتا بتحلم شكلك

خلاص يا سى حزومبل
انتا دخلت ف دايرة الأسخاص اللى مبقاش ينفع ازعل منهم مهما اختلفت معاهم

اصل فيه ناس كدا
الواحد مبيعرفش يزعل منهم
لأن عارف غلاوته عندهم
وعارف انه لما ييجى يتكلم ..
لا هما هينقمصوا
ولا هوه هيكش ويخاف الدنيا تتلخبط


انا مزعلتش
انا تصورتك قريت البوستات
وتحدفوا علينا طوب اكمنى عارفة اللى ف ضميرك توجاه عضوات الجمعية
وضميرك البنفسجى

انا بهزر طبعا

والمهم النضافة فعلا
بس مين اللى هيتعمله غسي مخ ف القصة دى ؟؟
الشعب
ولا العالم الخارجة من المستنقع دى ومفيش فايدة فيهم ؟!!

نورت يا سى حزومبل

شمس النهار
---------

المحافظين يا شمس
و الأسامى القادمة أظنها هتكون بحسابات
النظام السابق اللى لسه مسيطر بفكره و بلاش رجاله على الادمغة ..


الجانب الامنى كمان اللى عامل رعب للناس
وموقف حال حاجات كتير
واللى دلوقتى فيه اتجاه عام لصب مسئوليته على بتوع التحرير والثورة .. وكأن المسئولية الامنية المتردية و ما شابها مكنش مسئولية نظام بقاله 30 سنة بيربى فى ضباع ..وبيطلقها لمصلحته
ولما راح اللى مربيهم .زمش قادرين يستقيموا ...
دى غلطة مين ؟

وعدم البحث عن حل سريع وناجع
لحل المشكلة دى
غير بتعيين محافظين ليهم خلفيات امنية برضو بدل ما يبقوا بفكر مختلف
واحنا عارفين ..
اللواءات لما بيمسكوا انشالله شركة صغيرة بيديروها بأى فكر ...
طبعا منهم ناس زى الفل
بس دول فلتات ... صدف يعنى
انما الغالبية .. لأ


انا بسأل ببساطة
دا ف مصلحة مين ؟

هل فى صالح الهدوء والأستقرار ؟
ولا ف صالح رجوعنا لدوامة من جديد
والشعب ينشغل بقى ف احوال المعيشة من تانى و يسيبه م السياسة والأعتصامات والأحتجاجات و مين هيمسكها ومين لأ ..

انا خايفة من كدا

واتمنى منرجعش زى الاول
ونستغل الظرف التاريخى دا
قدر الممكن

اللامبارك دخل الكلابوش صحيح
بس اشباه اللامبارك وتلاميذه وحواريه .. لسه

ربنا يسهل
ويستر

لولا وزهــــراء
--------------

ازيك انتى يا لولا
قمر ايه بس ..دا قمر بالستر !!

طب احنا متفقين تقريباً فى كل حاجة
بس هنختلف ف جزئية مصطفى حسين دى
لأنى يا لولا يا حبيبتى مقصدتش اعترض على رأيه و وجهة نظره
انا بتكلم عن حاجة تانية خالص
اسمها استخدام تأثيرك ف غسيل العقول
يعنى زى غسيل الاموال كدا

الراجل دا .. للأسف
مع احترامى الكبير لموهبته وانا م طفولتى وانا متربية على رسوماته ف قصص الأطفال بتاعة المكتبة الخضراء و غيرها

لكن دا ميمنعش لما كبرت
وتابعت سيرته يوم ورا يوم
وخصوصا ف الفترة الاخيرة انى اكتشف
انه عامد متعمد ..حدوث ذلك

اصله لا هوه عيل و لا لسه اخضر و لا مشافش تجارب دول حواليه ولا هوه محاط بناس هايفة ولا هوه ف مطبخ عالم السياسة بالفعل ...ولا ثقافته ضحلة عشان ف النهاية ميعرفش يكون رأى صحيح و يعرف من الطغاة ومن الزعماء الحقيقين ....

انا بقولك كدا يا لولا لأن والدى الله يرحمه كان صحفى ..
وكنت بتفرج من خلاله على عالم الصحافة الغريب المبهر دا
وعاوزة اقولك ان دخولك الديسك او صالة التحرير فى أى جريدة قعداك ساعتين تلاتة ..كفيلة بإنك تسمعى كمية اخبار وفضايح وبلاوى تعرفك البلد دى حاصل فيها ايه واللى مبيتنشرش على الصفحات الرسمية بس الصحفيين عارفين لأن بيوصلهم المسكوت عنه اول بأول ...

فمينفعش بعد ما الواحد يتحط ف موقع وتوصله كم المعلومات دى اللى اكتر عشر مرات م اللى بيوصلنى انا وانتى كقراء عاديين وشعب بسيط ..
وييجى ف الآخر يقولى مبارك حل وزى الفل


طيب
دا رآيك الخاص
وانتا شايفه كدا
متستخدمش ريشتك فى تلميعه

طيب قررت تلمعه لأسبابك الخاصة

متجيش ف وقت حرج زى الثورة
وفيه شباب بيموت
وانتا عارف دمه ف إيد مين
وترسم رسمة زى دى
وانتا تدرك جيدا أنها هتأثر على اللى بيقرى الجورنال تانى يوم
واللى ممكن جدا ميصدقش ممتاز القط واسامة سرايا ...لكن هيصدقك انتا لأنك محبوب عنده ...


هوه دلوقتى بيستخدم ريشته فى نفس الأتجاه
وهوه غسل دماغ الشعب البسيط
وخلق صورة نمطية للثوار على انهم غاضبين طول الوقت و عاوزين يهدوا الدنيا وخلاص ....


هوه دا اللى مخلينى بحتقر تصرفاته
لأنه يسيىء استخدام موهبته
ويضعها ضد مصلحة الناس
اللى هوه بيقبض مرتبه من فلوسهم
و بيعامل بإحترام بسبب محبتهم
و احترامهم ليه


ارجو اكون وضحت وجهة نظرى

ونورتى يا حبيبتى

rovy
----


ازيك يا روفى

وحشتينى والله
بقالك مدة مش باينة
وانا كالعادة ندلة ومبسألش
بس فيكى الخير

ميرسى على رأيك

وانا بقول نوفر تمن الرابسو والمطهرات
و لما واحد زى الفقى دا نبعده عن أى منصب رسمى ...يبقى احسن

يعنى عاوز منصب وهيموت عليه
يدخل انتخابات مجلش الشعب تانى
ولا الشورى ولا أى منصب يكون بالأنتخاب
عشان لما ييجى ...يبقى فيه ناس عاوزاه ومختاراه

لكن يتفرض علينا تانى
هوه ومن على شاكلته ... ليه ؟

متعبوش سياسة وتعبونا و قرفونا معاهم
وبقينا نتمنى يغوروا او تيجى اللحظة اللى يقعدوا ف بيوتهم ويريحونا من وشهم
لحسن الواحد ورم منهم

انا عاوزة استعير جملة الراجل بتاع تونس واقول ..

لقد ورمنا .. ورمنا
حتى هذه اللحظة التاريخية ...
اللى هيغوروا فيها للأبد

ومجتش لسه فيما يبدو ..
للأسف

نورتينى يا روفى يا جميلة

لبنى احمد نور
-----------


ميرسى يا لبنى

انا مش عارفة اقول ايه

بس انا حاسة ان التعليق دا
معناه كبير قوى
وكأنك بتشكرى فيه حاجات كتير
وناس كتير
مش انا بس

انا هشكرك بطريقة يوسف
وبتعبيره الخاص لما كان بيحب يشكر حد
ويقوله


موتشكر يا حضرتك


فتاه من الصعيد
--------------

خدى بوستين يا ستى
:-* :-*
ومش واحدة بس

:)


انا مليش ف الفيسبوك
بس عملت حساب ع التوتير عشان اتفرج على احوال الدنيا حداكم
وخدت قرا مكتبش حاجة
وخلينى متفرجة بس

التويتر شبه اسمه
متوتر وكله توتر
طبيعته يمكن بتخلى الناس فيما اشبه بسوق عكاظ الادبى من جدال و دوشة وخناقات ورودو سريعة بلا تفكير كافى و حاجات كدا

بس ميزته الحقيقة فى كم المعلومات والروابط والصور والتواجد السريع فى قلب الاحداث و لا أجدع فضائية ...

عموما كل حاجة
وليها مميزاتها وعيوبها


انا مبسوطة من مجييك قوى
:)

وردة الجنة
---------

انتى توعى عليه الرابسو دا يا وردة ؟!!

اصل دلوقتى برسيل واوموى و ايريال و تايد وكل الأسامى التانية ...
خلته يا عينى زى الكتكوت اليتيم

:)

ربنا يسمع منك
ويحقق دعواتك يا رب

نورتينى ى ى

مهندس مصرى
----------

ازيك يا محمد
وموشكرين على التسييح عندك
منحرمشى

:)

بالنوسبة حكاية الإنتخابات مين فيهم الاول ...

انا مش عاوزة الشعب الاول يا محمد لأنهم هيتحكموا فى الدستور الجديد و يقيفوه على مزاجهم ونرجع لقصة التعديلات
يديلك حاجة مسخوطة كدا
ويا تقول آه يا تقول لأ

انا مش ضامنة التشكيلة القادمة
ولا ضامنة المناخ اللى هتحصل فيه الأنتخابات دى ..
واللى باين من دلوقتى هيبقى مناخ اسود ومنيل وملوش ضابط ولا رابط

وبما ان المجلس العسكرى مش ناوى يسيب الحكم الا لسلطة منتخبة ...
فننتخب رئيس ..الاول
ونقولهم مع السلامة يا جيش
انتوا تعبتوا معانا ..ومتشكرين
زى ما الكل عايز


واظن ان معلوماتنا عن المرشحين وقدرتنا على الاختيار ما بينهم مش هيكون بنفس الصعوبة بتاعت مجلش الشعب
لأنك بالفعل الصورة عندك شبه واضحة

وبعدين تدى فرصة
لظهور اشخاص اكتر .. و تديهم فرصة ينزلوا للناس ويعلنوا عن نفسهم

وكمان الاهم يا محمد
يكون الأعلام العرة بتاعنا تخلص ولو شوية من سطوة من يكبلونه
وعاوزة اقولك ان فيه ناس ..مكبلين خلقة ربنا ...
يعنى حسب تعبير احد الغاليين على قلبى لما قالى ...
فيه ناس زى الطير اللى انحب سنين ف قفص و فجأة انفتحله الباب ...
فوقف مكانه ومش عاوز يطير
مع ان الحرية قصاده

بعض الأقلام كدا
لسه رغم قدرتها ع التعبير بحرية
عاوزة تمشى بتعليمات
او جايز باصين لمناصب بعدين
الله اعلم

عموما
ف كل الاحوال
الشعب مبيخترش دلوقتى للأسف
والفترة الجاية ...
هنتفرج اكتر ما هنشارك ...

ترجع بألف سلامة يا غالى

مجداوية
-------

:))))))


الأبتسامة الكبيرة دى
سببها ان حضرتك دخلتى فيا شمال
(بدون تشنج وبروح طيبة برضو )
بينما الحكاية متستاهلش كل دا


أنا قولت اللى مش متفق معايا
ميكملش التدوينة ...
كتعبير ادبى مش اكتر
لأنى عارفة ومتاكدة
ان حتى بعد الجملة دى
...لازم القارىءهيكمل
ولو من باب الفضول حتى




انا بعبر عن وجهة نظرى بحماس
وتحيز لمنطق شيفاه صح مش اكتر
و كون هذا التحيز ..
قد يبدو ديكتاتورية فى وجهة نظر حضرتك .. الشعب بيقع فيه نتيجة موروث ثقافى سياسى بقاله زمن
فنا كدا لازم اتهمك انتى كمان
بنفس التهمة ...
لأن حضرتك بتدافعى عن وجة نظرك
بشدة وقوة
قد تكون اقرب للديكتاتورية

وطبعا عمرى ما هستجرى
اقول كدا
عن حضرتك أكيد


محدش بيخون المجلس يا عزيزتى
كل الحكاية ان الناس من حقها تسأل
اللى بيحصل بيحصل ليه
واشمعنى دلوقتى مش قبل كدا
وطب وبعدين هيحصل ايه تانى

دى تساؤلات مشروعة جدا
ومقبولة جدا

خصوصا ان المجلس فى وجهة نظر الشعب
حاكم سياسى ..
وليس عسكرى

وهيا دى نقطة الخلاف الجوهرية
بينى وبين المهللين والمطبلين والمحبين والموالين و المحترمين و المهادنين للمجلس وكل ما يصدر عنه
من قرارات وافعال


و لو حضرتك خدتى بالك
انا صنفت المؤيدين للمجلس درجات
حسب وجهة نظرى الخاصة
ولا أفرضها على احد
دى وجهة نظرى ..
وتانى
لا أفرضها على احد
وكل واحد حر ف قناعاته

انا سعيدة بتعليق حضرتك
وبمجييك هنا عموما
وانتى نورتى
روح قلب ماما

:)

تيما حبيبتي اخبارك ايه ؟؟؟

انا الي هيموتني اليومين دول يا تيما
موضوع الي اسمه الفقي ده
خلاص يعني الناس المحترمه خلصت من البلد
دابوا مع الرابسوا ولا ايه


هو احنا مكتوب علينا كام وش كده يفضلوا مزهقنا يتنقلوا من الكرسي ده
للكرسي ده زي الشطرنج
ايييييييييه مفيش بشر في مصر

مفيش غير المتلون ده الي اسمه الفقي
فعلا رجل كريه

اما بقى موضوع الحزب الوطني
فأنا كمان شمتانه اوي في مستر طلعت
علشان ميبقاش يطلع تاني
ويفتكر نفسه هيرو
و يبطل ضحتكه المستفزه دي
وهو فاكر نفسه الصادق الأمين

سؤال بقى
أشمعنى رابسوا
مع اني اسمع ان ديتول مطهر جامد جدا
وكلوروكس مبيض رائع
جربيهم ومش هتندمي

♥ ♥ ♥

فيه حاجات منها حصلت !! وادينا علقنا التظاهر لحد ما نشوف ؟ انا حالليا منتظر المحليات بس

فاتيما مامت يوسف الغاليه

يا نهار ازرق

بيشكك فى وطنيتك

يا ادى النيلة عليا كنتى نشرتيه يا فاتيما و لا هتعملى زى محمد صبحى

انا هتشل لوحدى

عارفه لو عنده اى شجاعة و عامل فيها فونت قوى كان قال هو مين

بالنسبة للبوست

ما انا قلت لك لو الشعب كان شاف فى المجلس العسكرى رجالة مكنش طلع مظاهرات

مش خوف لأ

بس كان هيعرف ان فى رجاله فى ضهره

كتر خير الناس

على فكرة صحيح

انا مش هقول للباميه يع بكل انواعها (:

فاتيما

اقول ايه كالعاده مسابقه ناس كتير

فعلا في امور كتير لازم الناس تاخد بالها منهم

ونبطل حكاية لقمة العيش اللي جابتنا ورا دي ...

احنا اثبتنا ان المطالب بتتحقق لما احنا بنطالب بيها

وبرضوا الجيش مش عايز يظهر مبارك ومقعده في المستشفى

لكن فعلا المجلس العسكري فيه حاجه غلط

والمحافظين كلهم غلظ في غلط وكلنا قولنا كده

ومازلنا بنسأل ليه

احييكي يافاتيما على الرابسو ده

اقصد البوست ده

تسلمي

تحياتي

فاتيما
فكرتيني برابسو ياااااه من زمان الواحد ماشفشي العلبة الصفرة دية
المهم انا حاسس ان ربنا كتب للبلد دية تنضف وتبقي حاجة ليها لازمة وان شاء الله نقدر نعمل ده
بالنسبة للمشكلة اللي عندك في المدونى
غيرى الباسورد وشوفي كده هتفضل نفس الملكلة ولا لأ
كوني بخير سيد سعد

يا نهار أ[يض
طيب أنا بأقول للباميا يععععععععع
يبقى موقف مصريتى إيه ؟

بقى بعد كل ده تبيعينى يا نصة ؟

لا حول ولا قوة إلا بالله
الدم بقى ميه يا جدعان

ألف مبروك للجميع

واستنى لآخر الأسبوع فى أخبار أحلى وأحلى

ما جاوبتيش على التاج لحد دلوقت
http://egyptioneng.blogspot.com/2011/04/blog-post_4885.html
و لن أقبل أي أعذار
:)
أديني قلت أهوه

من كل بستان زهرة
----------------

ازيك يا زهورة يا حبيبتى

يا بنتى اعصابك
انتى الثورة دى هتجيبلك انهيار عصبى
براحة يا بنتى
وان شاء الله الفقى دا
تجيله فرة تاخده
قادر كريم


بالنسبة للرابسو
فلأنه من التراث بتاع جيلى
وانا ست اصشيلة

وكانله شنة ورنة الرابسو دا متستهونيش بيه يعنى
:)

بوسات وحضونات
يا
من ♥ كل ♥ بستان ♥ زهرة

ameen
-----

اهلا بيك

المحليات دى بلوة سودة
كنت لسه امبارح بتناقش مع المدير بتاعى وبندورلها على أى تصريفة او حل ...
ملقيناش ومخنا وجعنا
المحليات دى كارثة
متتحلش اثارها قبل وقت طويل

نورت روح قلب ماما

Ramy
----


آه والنبى يا رامى

النبى بتاعى وبتاعك
:)

طلعنى من الهوية المصرية
عشان اللى بكتبه


دا سخصية بتحبنى قوى معرفهاش
بس اسلوبها مش غريب عليا
زعلان منى من بوستات ميدان التحرير
لما كنت بكتب عن انطباعاتى هناك
ومش عارفله بصراحة

هوه م المضادة
ولاّ من المضادة للمضادة

اصل انا تقريبا من وجهة نظره
من عملاء الثورة المضادة
بس مش قادر يقولى انتى فلول

انا بين البينين
وعاوزين توصيف للعالم اللى زى حالاتى بقى عشان احطه ف الكارنية بتاع الثورة ان شاء الله

والحمدلله ان البامية موجودة
عشان الواحد يلاقى حاجة يرد بيها ع الأتهشامات الظالمة دى


:)

انا بخير والحمدلله
والمذكور كمان بخير ..حتى الآن

منحرمشى منك يا رب
ابداااا

ماجد العياطى
------------

والله سؤال الساعة ف كل حاجة يا ماجد

ليه ؟

ليه المحافظين دول
وليه الشخصيات دى
وليه السكوت عن الأنتهاكات ؟
وليه البطء ف حاجات كتير
ليه
ليه
ليه
لآخـــر السنة الجاية

ميرسى يا فندم على رأيك
ف البوست
وف الرابسو

:)

MKSARAT - SAYED SAAD
--------------------

ازيك يا سيد المكسرات

لأ الحمدلله مشكلة المدونة اتحلت خلاص
وبقت كويسة اهى

الرابسو
آه
التفولة وذكرياتها بقى

كلنا يا سيد بنقول كدا
ان الثورة دى ربنا اللى حافظها
ونافخ ف صورتها
بس الواحد يصعب عليه
ف المزنق التاريخى دى
حاجات تفوت كدا ..ومتتعالجش
او حد تانى له مصلحة يهد
يتدخل ويتصدر المشهد
ولا كان فيه حاجة ...

بس

نورتنى يا غالى

متغبش علينا يا أبو زينة

:)

الأزهرى
------

بسسسسسسسسس
امسك عندك

انا بدورلك على سبب للمليونية الجاية
بلاش الجواز
خلاص رمينا طوبتك

نخيلها مليونية ف حب الباميا

مبتحبش الباميا ليه سعادتك ؟!!

دا اللى ملوش خير ف الباميا
ملوش خير ف مصر

انتا دلوقتى هتتهاجم
وانا مش هعرف ادافع عنك
انتا ف منعطف تاريخى دلوقت
وربنا معاك بقى

انا ؟

معرفكش

دنا الندالة بعينها

:)

وغيه نوظام آخر الاشبوع دا ؟

اما نشوف يا خويا
بركاتك يا زيزوووووو

صباح ومسكا زى الورد ان شاء الله

مهندس مصرى
----------

ازيك يا محمد

والله ناوية اجاوب
بس مش دلوقتى

عاوزة استنى شوية
تكون اتضحت حاجات كتير
عشان اعرف اكل دماغكو كويس
واجاوب حلو


و انا بطلت اجاوب تيجان
عشان انا بالفعل قايلة كل حاجة عنى
وانتوا زهقانين خلقة ..منى

بس انتا عارف غلاوتك
انتا مقدرش اقولك لأ

حاضر
:)

إرسال تعليق