.

.

البـــاقـى ... ف النهـــايـة + تحديث  

Posted by: فاتيما in





تحديث ولو ان الريدر مبيحدثش ولا حاجة
-------------------------------

إيه دا ماشاء الله 
جرايد النهاردة تفرح ..
حـنفية اوامــر و إنفتحت بالقبض ع الناس
هــنا و هــنا و هــنا 
و كشف عينى عينك كدا لعمايل البلوفـــر
و جر ناعم بشكل واضح .. وتاااانى يا بلال !!
 بيصالحونا ف زقـــاق و عطـــفة
بعد ما هزقونا ف وسط الشارع و ع الفضائيات
و تصريحـــات بإننا كنا معاكم 
ومضغـــوط علينا و الله من كل حــتة 
بس احنا حلوين و طيبين و بنحب الشعب
(ملحوظة :الشروق قالت كلام جديد هنـــا


يااااااااااه 


كل داااااااااا عشان جمعة بكرة ؟!!



آه يا ناس
مبتجيش الا بالمليونية


---------------------------------------

-----------------------------------------

الجمعة 1 أبريل 2011 
جمعة انقاذ الثورة  كما تم الدعوة اليها
كنت ف الميدان  8 ساعات
كنت عاوزة اكتب عن اليوم دا بعد رجوعى
بس تراجعت  ف آخر لحظة
حالة نفسية زفت مسيطرة عليا 
و بعاد يوسف من تانى  للأسف
وتعليقات سخيفة كمان جاتلى 
و الجو العام الكئيب للبلد حوالينا ..
كل دول مجتمعين منعونى
او بمعنى أدق 
شلونى عن كتابة أى حاجة 

بس 


بس الجمعة دى كانت ناجحة جدا 
و فوق كل توقعات اكثر الناس رومانسية
ولما روحت من الساعة عشرة صباحا 
ولقيت عدد محترم جدا قياساً بالجمع السابقة 
تاكدت ان اليوم هيختم بعدد كبير 
وقد كان

الميدان كان على آخره رغم غياب الأخوان
و الأعلام رجعت ترفرف وتملا السما
مكنش فيه مكان لرجل خصوصاً ع العصر
ورغم حرارة الشمس 
الكل كان واقف بيهتف ويسمع المتحدثين


اللافتات كانت ساخرة اللهجة
نعم للحوار العملى لا للحوار الجملى 
خيبة الامل راكبة الجمل 
اللى تحسبه موسى يطلع طنطاوى 
.... وغيرهم 


الهتافات كانت موجعة وصريحة 
وف العمق
الشعب يريد اعدام السفاح 
يا طنطاوى قول الحق انتا معانا ولا لأ 
قول يا مصرى ساكت ليه خدت حقك ولا إيه
يا مشير يا مشير الشرعية م التحرير 
يا طنطاوى ساكت ليه انتا معاهم ولا إيه ؟
وغيرها من هتافات تلتربعها موجه 
للمجلس الأعلى والمشير طنطاوى 
و الربع الباقى موجه لعصام شرف 
وكلها بتصب ف اللوم  والسؤال
المخلوع ورموزه برا السجن ليه  ؟!!


اتعملت محاكمة شعبية لمبارك وعيلته 
ورموز حكمه من على المنصة
و كان رئيس هيئة المحكمة
المستشار الجليل الخضيرى
و تليت الإتهامات و الوقائع 
و تم ارجاء الحكم للجمعة الجاية
واطلاق تحذير واضح جدااااا
ان لم يقبض على المخلوع ورموز حكمه 
فسيتم الإعتصام الجمعة القادمة ف الميدان 
و البيات فيه لحد الجمعة اللى بعدها 
وان لم تنفذ المطالب برضو ...
فسيذهب المتظاهرين لتنفيذ الحكم بنفسهم
..ع المتهم ف شرم الشيخ
ما دامت السلطة الحالية متقاعسة 
ولفظ متقاعسة كان اخف لفظ الصراحة
وكان بيتقال الفاظ تانية 
ووصلنا لمرحلة ان المشير لو أصر 
على عدم الأستجابة للشعب 
فينادى بسقوطه هوه كمان


خطيب جامع عمر مكرم ف خطبته
ذكر المجلس
بمطالب الثورة وبما لم ينفذ منها للآن 
وطالب اولااااااااا ..بمجلس رئاسى 
طالما الجيش ثقلت عليه المهمة كدا 
وتوالت باقى المطالب من خلع المحافظين 
ورؤوس الفساد ف المحليات وغيرها
الجمع الغفير كان موافق على كل مطلب
والميدان كان على آخره بالثائرين بحق 


غضب واضح من تراخى عصام شرف 
وعلى بقاء الجمل بكل اخطائه 
ومجىء زاهى حواس للسياحة
وكأن البلد عدمت الشرفاء
والغالبية رغم الاشادة بنزاهة شرف 
تحسرت على ضعفه قصاد المجلس 
وفلول النظام السابق  وموافقته على وشوش
كالحة زى دى 
ترجع تنط تانى ف قلب المشهد


بعض اهالى الشهداء كانوا موجودين
راجل كان ماسك يافطة عليها جملة 
بتقول ابنى 13 سنة انقتل برصاص العادلى
ومحدش اتحاكم لحد دلوقتى 
كان منظره صعب جدا 
والناس مكنتش عارفة تعمل ايه 
غير انها تعدى من جنبه ف خجل 
او شاب يروح يبوس راسه 
او حد يطبطب على كتفه 
والدة خالد سعيد اتكلمت ع المنصة 
والناس هتفوا من قلبهم لما سمعوها
كلنا خالد ... كلنا خالد
انا اتمنيت الأرض تنشق وتبلعنى
وكل اللى حواليا كانوا بيسألوا 
هوه العيال دى ماتت 
و دمهم هيروح هدر و لا إيه؟!!
وعشان مين ؟!!
وليه ؟!!




واذا كان خالد ...ودعه الاحباب والاهل 
فماذا عن هذا الشهيد المبتسم 
  الذى مات غريب و لا امه وابوه باسوا جبينه 
 ولا اخواته بصوا ف وشه لآخر مرة 
و لا صلى عليه الجيران و الاصدقاء و المعارف
و بعد شهرين ... إندفن فى مدافن غريبة
وقاتله بيصيف ف شرم الشيخ


اللى قتلوه غدر .. ذنبه ف رقبتهم 
و ذنبه ف رقبتنا احنا كمان .. لو سكتنا



احساسى اول ابريل
كأنى ف يوم 9 فبراير 
يعنى قبل رحيل مبارك بيوم تقريباً 
الغضب كان مالى الوجوه و اللافتات
والإصرار واضح على عدم التنازل

كنت كالعادة معلقة لافتة 
المرة دى كان عليها صور
الثلاثى المرح على رأى نوارة 
عزمى والشريف وشرور 
و بسأل سؤال بسيط عاوز اجابة 
الرجالة دى
مش لابسة الكلابشات ليه يا وديع ؟
انا كنت بسأل بجد 
واللى رايح واللى جاى كان بيجاوبنى 
هما سايبنهم ..عشان معاهم ومنهم

الاجابة كانت ف التحرير واضحة وضوح الشمس
والطريف ان كذا واحد عدى وقالى 
يا استاذة شيلى كلمة "الرجالة" دى 
لأنهم مش رجالة ... و لا نيلة 
خصوصاً الشريف دا
فقولتلهم معلش ..الأفيه حكم 






الميدان خلا من أى عسكرى 
شرطة او جيش
اكيد كانوا بلبس مدنى واقفين بينا 
بس بزى رسمى ...لأ 
واصلا الميدان كان متحفز 
و لو كانوا عملوا زى جمعة 
لا للتعديلات الدستورية مثلاً
فكانوا الحاضرين هيلفظهم ويحجمهم
لأن الهتافات ضد وزير الدفاع 
كانت نبرتها عالية وصارمة 
و فيها تحدى كبير أول مرة اسمعه 
وانا كنت كل جمعة بحضر
و محدش مرة هتف ضد المشير علانية كدا
اللهم عشان يقوله ..
يا مشير حسين .. حق الشهدا فين ؟



كالعادة الجرايد القومية هبطت الحدث 
والتلفزيون المصرى  ف نقله كان
نزاهة ... وطنية ... امانة مهنية  مهلبية
ونالهم من اللافتات المؤيدة نصيب
بس ربنا يسهل هيجيلهم يوم 
و يتكنس كل منافقيهم



كنت واقفة لحد الساعة 6 مساءا بفكر
ف شكل الميدان الجمعة الجاية 
هيكون ازاى ؟!!
عارفة مسبقاً و إن شاء الله 
ان اللى حضر المرة دى .. جاى اكيد 
الجمعة اللى بعدها عشان يشوف 
آخرتها ايه 
و مدى درجة الإستجابة للضغط بتاعنا 
لكن كنت بفكر كمان ف الإتجاه المضاد
واللى عاوز يموت الثورة دى ويكتم انفاسها
والعدد الكبير دا صدمه اكيد
خصوصا وان ناس كتير راهنت 
على فراغ الميدان بعد انسحاب الاخوان 
وقولة ... مش لاعبين




كنت بفكر ف رد الفعل القادم 
وهدايا ليلة الخميس زى ما بيقول 
عماد الدين حسين ف مقالته ف الشروق
عن ان المجلس بيتحرك ف آخر لحظة 
قبل أى جمعة مليونية 
عشان يخفف من حماس الناس 
و بيسأل ليه ليلة الخميس طيب ؟
ما يعمل اللى الشعب عاوزه وخلاص !!




تفكيرى راح ف الف حتة 
منهم ان الجمعة القادمة مرجح جدا 
ان هيحصل فيها عنف 
وفرض قوة بأى شكل عشان دراع واحد
فينا لازم يتلوى والقوة تفضل ف إيد طرف
يا الشعب .. يا السلطة الحاكمة




ولما تابعت اللى حصل من مهزلة
التسيب الامنى ف ماتش الزمالك الاخير 
دماغى ودتنى لسكة واحدة  
وهى 
انه دا مقصود عشان تبقى ذريعة
للتدخل تانى و التواجد ف الميدان المرة الجاية
وف أى مكان عموماً 
عشان حفظ الامن و الإستقرار
و تأكدلى الحكاية دى لما شفت عند نوارة
فيديوهات الضباط اللى بيحرضوا زمايلهم 
على الإنتفاضة ضد المظالم ف الجيش 
والنزول للميدان الجمعة الجاية 




لما شفت الفيديوهات دى 
مكنش فيه تفسير ليها غير اتجاهين 
يا الناس دى مزقوقة 
عشان تدى انطباع 
ان البلد هيحصل فيها انقلاب وفوضى 
والمجلس الاعلى تكون فرصته قوية 
ف ضرب كرسى ف كلوب الحرية
ويفرض نفوذ الثوار بعنف 
ومحدش م الشعب والمعارضين يفتح بوقه 




يا اما الاتجاه التانى
والذى ارجحه ان الغليان ف الجيش
خلاص وصل لآخر مدى 
والناس هناك بقت متأكدة 
انه الآن و إلا مفيش فرصة تانية 
واللى مش هيتحرك دلوقتى
عمره ما هيتحرك ابداً لأن عامل الوقت أزف




و افتكرت اول ما مبارك تخلى 
والجيش مسك ...سألت حد مقرب جدا ليا 
عن ميزان القوى دلوقتى ف ايد مين
فكان رده يخوف بس كان حقيقى 
ان القوة دلوقتى ف ايد رأس الفساد 
بس بدل ما كان مدنى .. بقى عسكرى 
ساعتها بكل سذاجة قولتله 
طيب ..الشعب عمل اللى عليه اهو 
وأجبر مبارك يمشى 
الدور ع الولاد ف الجيش يعملوا زينا
و يشيلوا فاسديهم 




ويظهر ان جه اوانها خلاص



ما زلت عند رأيى 
ان كل حد لازم ينضف ف مكانه 
ويحارب الفساد اللى قصاده  وحواليه
وعشان كدا ...
بلوم نوارة نجم جدا على ولعها بالجيش
لدرجة انها بتحط دايما 
الجيش مع المجلس العسكرى
فى كفة واحدة و دا مش عدل
لأن القيادات دى كانت جزء من نظام مبارك 
اللى كلنا بننادى بسقوطه ومحاكمته 




ولأن أهل مكة ادرى بشعابها 
وأى حد كان ف الجيش او لسه فيه 
أدرى بمدى الفساد و الطغيان جواه
فالضباط اللى ف الفيديوهات دول 
رغمانى  لا أثق فيهم بشكل مطلق
ومعرفهموش اصلاً
لكن لا اكدبهم ابدا .. لأن لهم منطق
يتماشى مع اللى لمسناه من بداية الثورة 



 و بعدين ... الحقيقة 
هتبان يوم الجمعة أكـــيد 
وان غدا لناظره .. قرب اهو و هنشوف 





انا متفائلة .. رغم المخاوف
والرعب القادم .. لو آت 
زى صلاح عبدالصبور ما قال
لكن من امتى الحرية ملهاش تمن غالى ؟


و المواجهة آتية لا مهرب 
والناس اللى بتودى وشها الناحية التانية دى 
هيفضلوا لحد امتى يهربوا م الواقع ؟




الواقع بيقول ان مصر 30 سنة
فساد ف الأرض والبحر والجو 
و لازم تستأصله 
ومينفعش ف ظرف تاريخى زى دا 
نعمل زى سهير البابلى و لسه نسأل بقى
طب كله ولا حتة منه 
حتة منه ولا كله ؟




كله طبعاً و مفيهاش فصال 
والجملة الخالدة اللى بتتردد ف كل مكان
انصاف الثورات .. اكفان الشعوب
والسلم بيتكنس من فوق لتحت  
زى ما انكتب على احدى لافتات الميدان 
ف عز عز الثورة


والسلالم دى بقى ان شاء الله 
كل ما هنيجى نكنسها
هنلاقى حد واقفلنا زى الحيطة  كدا ؟!!
ولما تيجى تتناقش ... يقوم يتخلق عليك 
و يقولك بص لجيش ليبيا واحمدوا ربنا
و لو فنان او ناشط  ياخدك ع المتحف
و لو بنت يعملك كشف طبى دقيق عشان 
لو باباكى جعان يقوم يتعشى ؟

 
إيه اللى بيحصل دا ؟!!!




ولما تمخض الجبل ولد فأراً 
لجنة ايه اللى اتشكلت دى لحصر اموال
العيلة المباركية ؟!!
مش كانت المفروض اللجنة دى 
تتشكل يوم 12 فبراير برضو  
يعنى شهرين بحالللللللللهم
ف صالح مين كل التآخير دا ؟
والسؤال الأهم ... ف حماية مين ؟!!




و كأنك معملتش حاجة 
غير انك استبدلت سين بصاد 
ومطالبك بتاخدها شقارة ونقارة ومتآخر 
ويمكن مفيش خالص 
و يصل بينا الحال ان نوارة تهاتى كام بوست 
و تطلب توقيعات عشان نقبض على 
كهنة معبد مبارك 
وكأننا بنشحت حقنا  ونتسوله تسول 
او بنلم عشان نبنى مستوصف مثلا



انا عاتبة على نوارة نجم اللى بعتبرها 
والله .. فخر بنات مصر و نوارتهم 
و زينة الشباب
لأنها ف التدوينات الاخيرة بعدت للأسف 
عن نبض الثوار والناس 
ومبقتش بتقدر دلوقتى تفرق بوضوح 
بين الجيش والمجلس وبتتغاضى بشكل غريب 
عن تقصيرهم الفاضح فى اشياء كتير
وعنفهم مع ناس ورقتهم مع ناس 
و انهم نعامة مع الفاسد 
و البلطجى و المتقاعسين من افراد الشرطة  
وأسد على النشطاء واصحاب المطالب الفئوية




نوارة عندها براءة و طيبة رهيبة 
لكن الحاجات دى متنفعش مع اللئام 
والناس بتحبها وتمشى وراها عميانى 
بس رد فعلها تجاه المجلس العسكرى
عمل حاجز نفسى كبير بينها وبين ناس كتير 
و هيا ف واحدة من تدويناتها وجهت لوم 
ل 6  ابريل و كلنا خالد سعيد والنشطاء
و المدونين و الأخوان ..الخ الخ 
تعاتبهم انهم مش متحمسين لتوقيعات 
القبض ع الثلاثى المرح
و بتقول متبقوش منفسنين على شخص واحد
و تسيبوا الطلب الأساسى 
بس مسألتش نفسها لدقيقة 
ليه الكل مش عاجبه ومش متحمس 


لو كانت سألت كانت هتعرف 




ان الكل رافض يطالب بحقه بالطريقة دى 
و المطلب دا كان لازم يتنفذ من شهرين
والمحايلة دى سياسة مرفوضة 
الناس مقامتش بثورة عشان 
ف الآخر 
بدل مطالبها ما تتحقق فوراً 
نقعد نكتب ف عرايض ونمضى عليها
ونقولهم والنبى عشان خاطرى
لو سمحت و من فضلك واحسانك




بلال فضل كمان صدمنى لفترة 
 بس دلوقتى بيغير ف خطابه خصوصا
بعد الإعلان الدستورى
وبعد حكاية شوفوا ف ليبيا 
بيحصلهم ايه .. دى




الأعلان الدستورى راخر
كان قفا محترم وكلنا اتسكينا
ورجعت السلطات مجمعة ف يد المجهول
اللى محناش عارفينه هيبقى مين
لو فضلنا على دا الحال 
ُيعمل فينا وبعدين يتقالنا او نكتشف
زى ما اتقال تعديلات وبعدها عرفنا 
انها هتاخد سنة و اتزود عليها حاجات 
م الدستور القديم .. ثم الله اعلم بالجاى



هيا التدوينة دى ليه ؟


معرفش


يمكن بكتبها عشان اقول انطباعى العام
ان لهذه الثورة بالفعل .. رب يحميها 
وكل مرة نروح ف سكة نتصورها ف الآخر 
هتقلب بغم 
نلاقى ف آخر الضلمة .. نور 



ويمكن لأن ف العشر تيام اللى فاتوا 
النبرة عليت ف الجرايد والمقالات والمدونات
والتويتر  وغيرهم وبتقول كفاية استكراد



ويمكن لأنى حاسة ان نهايتها قربت قوى 
وربنا هياخد بإيد البلد دى لأنها تستاهل
واحنا ولادها معاها ... نستاهل



ويمكن لأن اللى بيحصل ف بلادنا العربية
شىء يفرح واللى يفرح أكتر ان مصر 
كانت قنديل نور ليهم ودفعة قوية
زى ما تونس كانت قنديل النور لمصر
يمكن لألف سبب و سبب 

معرفش



انا مش هقول 
لحد م اللى كان ف الميدان الجمعة 
اللى فاتت أى كلام ...
لأنى عارفة انه ف جمعة 8 اابريل 
 جاي .. جاى
وربنا ينفخ ف صورتنا كلنا  
ومش هقول للمعارضين للثورة حاجة
او اللى بين بين .. برضو اى حاجة






بس بدعى ربنا ... ما دمنا إفترقنا كدا 
الفترة اللى فاتت وحصل لخبطات 
وتشوش ف الرؤى كتير 
إننا يا رب 
لو نرجع نتلم 
على الهدف تانى 
و نلحق اللى جاى 


هوه ممكن ؟ 



انا هقول اللى شيفاه قصادى 
ف كل خطوة و مفيش غيره 
رغم الخوف والقلق والفزع و الخيانة
و المخططات و الفلول و التخبط و الإنقسام
والمغرضين والمخلصين و المرشحين للرياسة
وامريكا واسرائيل وتركيا و ايران و غزة
تونس وليبيا و سوريا و اليمن و الأردن 
ومبارك و الفلوس و المجلس و الجيش 
و معنى الأستقرار و البناء و الامن الوطنى 
و الشرطة و الداخلية والفرقة والأنتهازية 
والسلفية والإخوان والمسيحين 
و يحيى الجمل و الأغبياء و المنافقين 
و وصولاً للعشاق و المجانين بحب البهية
كلمة واحدة بس تنقال



بعد العناد و التصلب و التآمر
و الظلم و الغطرسة و الإستبداد
ف النهـــاية 

الباقى ... هو الشعب



-----------------------------------------
1) 
أسفة لأن البوست طويل 


2) 
شكرا لكل اللى طبطب 
على قلبى وروحى 
بالتعليق او الأيميل او الصمت احتراما


3) 
الأخ الغير معرف 
اللى مش عاجبه كلامى عن السياسة
وصولاتى وجولاتى ف الميدان كل جمعة 
انا مش عاوزة اتحول لشخصية عصبية
بمرور الوقت واطيح ف أى حد 
مش عاجبه كلامى و اقعد اقوله
انتا مالك و مال مامتك و باباك ...الخ 
من فضلك انتا وغيرك 
متجبرنيش اكون كدا 
انا مبحبش ابقى الانسانة دى 
ولو انه مش عيب مع الحشريين و الرخماء 
بس ببساطة لو مش عاجبك مدونتى ..
وفر وقتك اللى بتيجى فيه هنا 
وسبنى ف حالى انا مش ناقصاك
و اعملها بجميلة .. كفاية عليا اللى انا فيه 



4) 
انا اسفة انى محضرتش لقاء المدونين
الجمعة اللى فاتت بس كنت عاوزة 
اكون لوحدى .. فياريت متزعلوش منى 
واسفة لأنى مبردش 
على تعليقات الخطاريف 
والحمدلله انها عجبتكم انا قولت هنضرب

 
5)
كلامى عن نوارة نابع من حبى 
واحترامى ليها 
وغيرتى على محبة الناس ليها
و رغبتى ف انها ترجع تعبر عننا تانى 
لكن اكيد كل واحد حر ف رأيه



6) 
كل ما اقرالكم بوستات عن الثورة 
بفخر انى اعرفكم و انى منكم ...



7)
بسكوتة انتى تميمة حظى



8)
حقك عليا يا يوسف
غصب عنى يا بابا



9)
انا اسفة يا احمد ...


10)
يا رب .. انا على الحافة اترنح
يا تسبنى برحمتك اقع .. وتريح الناس منى
يا تمدلى برحمتك إيد تلحقنى .. انا تعبت قوى

 ---------------------------------------------------


غدا جمعة ازلة اثار الأستفتاء .. وائل قنديل  
سنة حلوة يا جميل ... وائل السمرى
اللواء الفنجرى :لن نسلم الحكم الا لقيادة منتخبة 
حجز قضية المدون مايكل نبيل المتهم بأهانة.. 
مسيرة طلابية لتطهير الجامعات الجمعة
الأغنية فيها فيل .... محمد موافى
إدارة المصرى اليوم تطالب الصحفيين بالأعتذار ..!!!
المحتاس يجيب حواس .. مى عزام
فاصل موسيقى ... هيثم دبور 
رسالة لمعارضى الثورة .. عمرو سلامة 
هاااااااااااى .. إنت ..احمد سعيد عنبر العقلاء
لماذا تأخرت محاكمة مبارك .. محمد على خير 
شرعيتنا الثورية عايزاكم .. dr.lecter
ليه إتخرست ..د.ستيتة حسب الله الحمش
بيان اللجنة التنسيقية لجماهير الثورة .. الازهرى
الشعب بقى دبوس .... Tears
إبتسامة الغريب ... بلال فضــــل
نحن نشكر الجيش ولكن ... وائل قنديل


This entry was posted on الخميس, أبريل 07, 2011 and is filed under . You can leave a response and follow any responses to this entry through the .

11 كــــلام بيطــبطـــب عـــلى قــــلبى و روحــــى

يا ... انا بقالي كتير ماجتش هنا دنيا الفيس وخداني ولما اجي الاقي كل الكلام الجامد والكبير دة
طبعا كلامك صح جدا وموافق عليه
وان كان رايي اننا لازم كمان نلعب سياسة دلوقتي ماينفعش نسيب الساحة للاخوان لوحدهم يلعبو سياسة ويملو دماغ الناس بكل الكلام اللي هما عايزينه واحنا نقف نتفرج احنا كدة كاننا بنديهالهم على طبق من دهب لازم نتحرك وننضم لحزب ونكلم الناس اللي نعرفهم
وكل دة يحصل بنفس الحماس للمظاهرات
واهم بقي من كل دة
ازيك انتي يا صديقتي العزيزة والجميلة وازي كل اخباراتك يارب دايما تكوني في احسن حال

كنت هناك.. أنا كمان اتبسطت أوي بالعدد الحمدلله. بس بصراحة زعلت إني مشفتكيش!! بجد رغم العدد دة،كنت أتمنى أقابلك هناك صدفة :). ليكي وحشة بجد يا تومة

شفت اللافتة بتاعة الحوار العملي مش الجملي.. زعلت أوي لأني كنت بحب يحيى الجـمل جداااا وبحترمه أوي. زعلانة إنه اتغير كدةوزعلانة من اللي حاساه

بجد قلقانة أوي على البلدومش عارفة مين المسئولين اللي لسة كويسين موجودين حوالينا. ربنـا يسترها بجد و الدنيا تبقى أحسن كتير. إحنا نستاهل الأحسن

الشهيـد المبتسم.. بصراحة مستغـربةإن أهله مكتشفوش إنه هو لحد دلوقتي. أكيد طبعا الله يرحمه ملامحه اتغيرت.. بس مكنتش متخيلة إن أهله مش هيلاقوه وهيتدفن وهم مش شايفين الابتسامة دي
ربنا يصبر كل أهل الشهدا و يفرج همك يا فطومة

جبتي من الآخر
و على فكرة أحمد سعيد نزل بوست جديد رداً على بلال فضل فحطيه في لستة البوستات اللي تحت
ربنا يهدي عبيده و يفوق اللي مش فايق

آه على فكرةأنا حطيت البوست بتاعك ده في البوست الأخير عندي
:)

mostafa rayan
-------------

ازيك يا صفصف ؟
معلش انا عارفة ان نداهة الفيسبوك ليها شدتها وسطوتها ..

و اجمل مشهد حقيقى ف جمعة 1 ابريل
ان الميدان كان مليان بالغيورين بحق ع الثورة ... مش اللى واخدينها سلمة لوصول اهدافهم ...
انا بحترم شباب الأخوان وحماسهم
وناس كتير اشادت بدورهم ف حماية الميدان والتكتل مع باقى القوى التانية او الناس العادية ...

بس للأسف
تكتلهم دا بيتفسر انه انتهازية بسبب رد فعلهم تجاه الاحداث بعد كدا
سواء استفتاء او مليونية الإنقاذ
والله اعلم بالجاى ....
الكبار بتوعهم بقى
مفيش أمل فيهم
وانا اتمنى لو ان الشباب يعمل حزب لوحده بعيد عن ترهل القيادات القديمة دى ....
علاء الاسوانى وصفهم بأدق وصف قريته حتى الآن
ان الأخوان عندهم صلابة اخلاقية
لكن يقابلها ليونة سياسية
والأتنين ميتفقوش أبدا ..ف مواجهة المواقف اللى محتاجة صلابة ...

انا بخير يا مصطفى

ان شاء الله اكون بخير

خالص ودى يا الطيابة ذاتها

Wish I were a Butterfly ...
----------------------------

ازيك يا ارق فراشة ؟

كويس اننا متقابلناش
لأنى كنت هبقى رخمة ودمى تقيل جدا
انا مكنتش عاوزة اتكلم ولا افتح بوقى
ولولا الناس كانت بتسألنى ..
كنت سكتت من اول دقيقة لحد آخر لحظة
انا بكتفى باللافتة اللى ببقى معلقاها
وفيها كل الكلام اللى عاوزة اقوله
وبرضو بكتفى اكون نقطة ف بحر واسع يملا الميدان ويفهم اللى مش فاهم اننا زى الهتاف ما بيقول
متعبناش متعبناش ..
والحرية مش ببلاش
وانا مبتعبش ف حاجة
بالعكس ..انا بحس انى ف كرنفال وفرح وزفة و كل واحد بيجى بيجامل وياخد بحس العروسة والعريس ...

الجمل كان يبدو راجل كويس
لحد ما اسامة غريب كتب مقالة يطالبه فيها بالدفاع عن نفسه ضد الأتهامات الشنيعة دى ..
ومردش
وعدم رده معناه انه لما قال على شفيق
خسرناه ...
كان زعلان على نفسه وع اللى بيحميه
ومهما كان تاريخ الجمل ...
مصر أهم منه واغلى
ويستاهل الف هتاف ..مش واحد بس

المقالة هنا
اقريها لو تحبى
عشان متزعليش عليه تانى ...
http://dostor.org/authors/11/598/11/march/18/38382

وميرسى جدااااا ... ع الدعوة
انا محتاجاها بجد

بوسات وحضونات
يا من غير ما توشى
بترفلاية رقيقة صغننة

مهندس مصرى
----------


حطيت بوست احمد اكيد
هتوصينى انا ؟!!
عيب


يا رب يا محمد

انا حاسة ان فيه ناس كتير
مش مش فاهمة
او مغيبة
او مش واعية

لأ
هيا خايفة
مش أكتر ولا أقل


عارف زى اللى مش عاوز يصدق
لأنه خايف م اللى هيحصل
بعد كدا ...
وهوه مش عايز يواجهه

بس

ميرسى ع التصييت ف مدونتك
وف التويتر كمان

منتا اخويا يا محمد
دا التصرف التلقائى منك يا غالى
ايه الجديد

:)

كنت لسه بفتح أكتب بوست
وبشوف كده لقيت مهندس مصري عامل اعلان
رحت كده قرأت بوست نوارة
جيت كده قرأت بوست فاتيما
احمد سعيد بيوجع لي نفوخي ومحتاج عقلاء يقرأوا له وانا مش منهم

نهاية قررت اني احتمال كبير مكتبش
انتي كتبتي بزيادة
من القلب وللقلب
انتي منورة يا فاتيما
تشعي نورا
بمعنى الكلمة
وقلبك الصافي مع العقل البرلنت يستاهلوا كل خير
حقيقي كل خير
يارب

ستيتة حسب الله الحمش
------------------

اولاً
البوست بتاعك تقريباً مراية
لكل اللى انكتب عندى وعند احمد وعند نوارة و عند تقريبا كل حد ...
كل حد قرفان م الحاصل
بس معندوش مانع يفنده ويناقشه
ويتحمس لوجهة نظره
ثم ف الآخر يا ستوتة
كلنا نازلين ...للأسباب الحقيقية
انا شخصياً نازلة عشان الشهيد المبتسم ميروحش دمه هدر وافكر الناس بيه
نازلة عشان الحرامية بينقطونا بالقبض عليهم ..و كأننا بنشحت
نازلة عشان الدستور لازم يتعامل مع مسألة وضعه بشكل محترم مش اللى اتعمل دا والأونطة اللى اكلولهالنا دى
نازلة عشان المخلوع يتحاكم مش يتحسس عليه ويتبهدل الثوار واصحاب الحقوق
نازلة عشان المطالب اللى انكتبت ف بيان اللجنة التنسيقية اللى عند الأزهرى ... حرف حرف

مليش دعوة بحكاية الضباط اللى نازلين دول كانوا صح ولاّ مش صح

لو عددهم كان قليل
او كتير
هتفرق معاهم هما ...مش احنا
وهيدفعوا تمن نزولهم غالى
ولو الحق معاهم .. هيكملوا اكيد
وينضفوا الفساد اللى طالهم وطال مصر
زى ما الشعب طهر البلد
ولسه بيكمل تطهير ...
ومتعبناش متعبناش
والله ما تعبنا ابدا

فاصل رفع المعنويات
اللى ف آخر التعليق دا
انا كنت وما زلت
أحوج ما اكون اليه
ومنك انتى .. تحديداً بقى

ولو انا منورة يا ستوتى
فإنتى النور نفسه يا حبيبتى

يسلك فمك وايدك يا أم يوسف وربنا يحميكى ويباركلك ف يوسف. منتظرين بوستاتك القادمة

هم حاجتين حقولهم:

1- الحمدلله، إلي انتي كاتباه دا رأي كل مصر وكل حد أعرفه. حسك عالي جداً. وعلى فكرة قبل متقولي، أنا متابع كل كلمة انتي بتكتبيها.

2- أنا مستغرب من رأي نوارة وبلال فضل، ومع احترامي لكل شغل نوارة، وكل إجتهادات بلال فضل، بس أنا مختلف معاهم جداً. مش معقولة ماعندهمش حد فالجيش يقلهم الحقيقة. طب د كفاية مهزلة الإستفتاء والا سيبانهم مبارك وكلابه متسابين علينا، والا والا ......

تحياتي لكي يا أم يوسف.

إرسال تعليق