.

.

حــــــــــلاوة روح  

Posted by: فاتيما in






كم من الوقـــت باقيلى معـــاك ؟
ســؤال و بيتعــبنى كل يـــوم
ولا أعـــرف له أجـــابة 
و ساعات بتمـــنى لو معرفــش ابدا




طب و لا حـــتى هعــــرف .. ليه ؟
ليه أحـتفظت بيا ف ايامـــك
وانتا مكنتش عــاوزنى ولا حـــاببنى
مش لاقــية تفســـير 
غير انها كانت بس  ... حــــلاوة روح




جايز لأنــك عــارفنى كـــويس
فكنت خـــايف عـــليا من ألــم فراقــــك 
ل .... يقـــتلــنى 
بس زى منتا هـذا الشخص الطيب .. بعـينه
انتا كـــمان مش هذا الشخــص ذاتـــه 
اللى هيقـبل ما لا يريد ومن لا يريد
  فى حــياته كـــدا  
طـــب إيه ؟




 يعنى جــيت يا حبيبى كدا و مشـــيت
من غير ما تعّرفــنى .. ليه اخـــترتنى
وليه قــربتّنى منــك و ليه بعـــدت ؟
و جـيت و مشــيت 
من غير تفـهمنى 
أى حاجـة ف أى حاجـة
طــب هـــوه كـــدا ينفـــع .. ؟!




I'm a big big girl
In a big big world
It's not a big big thing
if you leave me
But I do do feel that
I do do will miss you much






قربت ع الاربعــين ولا زلـــت 
بســأل عن أشـــياء قــد تبـــدو معقـــولة 
لو انشغلت بها فــــتاة ف سن السبعتاشر 
قـــلبها بيـــدق لأول مـــرة
ولا تعــــرفش .. مــاذا يخــبىء لها الغـد
عاصـــرت من الاحـــداث ... مش قليل
وقــابلت من صـــنوف البشـــر .. ألـــوان 
وما زلــت حـتى اللحـظة كالمـبتدئة 
أحـــب وكأنها المـــرة الاولى 
واحـــتار وابكـــى 
وأترعـــب من المجــهول




ومعرفـــش دا حـــظى ولا اخـــتيارى 
ولا إلاتنيــن ســـوا ؟
لكـــن اللى اعــرفه بيقــين 
انه قــدر مكــتوب 
وكان لازم هشـــوفه مهما هـــربت منه
او تصـــورت بســـذاجة 
ان كـــان مرسوملى أى طـــريق غـــيره  
وانه كــان المفروض أمشى فيه مثلاً
ومحــصلش !!


الأراوح جـــند مجـــندة
فما تعــارف مــنها ائتلـــف
ومـــا تنافـــر مــنها اختلــــف
حـــديث شـــريف 
  


كان دا احـــساسى والله 
من اول ثانيــــة .. ولا زلــــت
مــهما حاولت تبعــد عنى 
و تفـننت ف ذلك




شـــعور الالفة بيــننا 
و الذى لا يضــاهيه شــىء 
عمرى ما حـــسيته مع حـــد قـــبلك
ذاك الشعـــور بإن هذا الأنســـان الغـــريب 
أنا عـــارفاه من زمـــــااااان قـــوى
معــــرفش فين اكــــون قـــابلته
ولا ازاى حاصــل بالشكـــل دا
كـــل اللى متأكـــدة مـــنه
انه وكأنه حــــتة منى ...
محــستش بيها قبل كـــدا يمكـــن ..
بس هـــيا كـــانت موجـــودة  أكـــيد




زى نجـــمة مستخبية ف تنيات ســتاير اللــيل 
ومحــدش ف مـــرة خــد باله منها ولمحها ...
أو كــــنز مدفـــون ف قـــاع محـــيط  
و مستنى حـــد يغوص و يطـــلعه
او رســـالة شايلها فـــرد حمــام طالت سكته
بس عارف انه اكيد هيوصل للراسـل ف يوم





و كأنك يا حـــبيبى كـنت ساكن الروح
طــول عــمرى 
وسافــــرت شــوية ... ورجــعت
يا دوب رجــــعت لموطـــنك
لمطــرحك .. مش اكــــتر 
عشـــان يـنكــتبلى استطــعم معـــاك
 حـــلاوة الــروح 
ازاى لما تتــــرد ف بـــدن



هـو لا يحـيا فى العــــالم
بل فـــى معـــــانى نفــسه
وبذلك هــو دائمـــا فــــوق الـــدنيا
مصطفى صادق الرافعى





إنـتــــا ؟
إنتــــا كـــل التناقضـــات مجــتمعة
و عـــذاب الحـــيرة و لــذتــها
و عشــرميت طـــريــق للتوهــــة
كل الأشـــياء ف الدنيـــا و عكســـها  
لخبطــاتها و قوانينها التى لا تسمح بعبث 
و ما يترتب عـــلى وجـــودك من وجــــع




وجــــع المشاعـــر 
و ... روعــــتها فى ذات الوقـــت .. وآه
آه 
لو تعـــلم قـــيمة ما عـــندك ..
لما وجــعت روحــك 
و وجــعت من يحــاول الإقــترب منـــك 
ولما أوجـــعتنى أنا الآخــــرى
و خـــلتنى أحس بكـــل هـــذا العجـــز 




كنت بيتهيألى ان تفســير تصــرفاتك 
هوه مجـــرد إهـــدار للوقــت
 قــررت اتعامل مع الموقف بإيجابية أكـــتر 
و تصورت ببـــراءة ان التعــود على طباعك .. 
قـــد يكـــون هــو الحـــل الامــثل
كــان عندى من الحـــب الكـــثير .. و لا زال 
وكان عندى من التفهم الكــثير .. و لا زال 
وكان عندى من الصــبر الكـــثير .. و لا يزال





بس مكنتش أعرف ان الحـــب 
مش كــــفاية
وان الحــب مع التقـــبل .. مش كــفاية 
وان الرضـــا .. مش كـــفاية 
و بعض التمـــرد .. مش كـــفاية
و الصبـــر قبلهم كلهم .. مش كـــفاية
وان حــتى أى كـــفاية ...
مش كــــفاية





 أعــــترفت ولا أزال أعتــــرف 
إنى لست بهـــذا الذكـــاء 
ولا أملك المقدار الكافى من الحنكة الأنسانية
و لا عندى من دهـاء الأنثى نصـيب وافــر 
انا امـلك قــلبى العـــاشق و فــقط 
أحمـــله وانظـــر إلى الســماء و أسأل 
لما لا يكـون بكل مــا يحــويه من حــب
كافــــياً يا رب ؟!




و كيف يتـــأتى لمخــلوقة ضـــعيفة زيى 
ان تصطـــنع أجــنحة وتصـــعد بها
إلى ســيدها القاطـــن وحــــده هنااااك 
فــــوق الـــدنيا ؟!





طب من أين لى بكــل هـــذا ؟
و هـــل لو حـدثت المعجـزة  وصرت ملاكاً
سأكـــون عندها الصحــبة المرجـوة ؟
أم أن هذا البعـيد الساكـن ف الأعــالى
لا يريـــدنى على أى حـــــال
وفى أى حــــال و فى كل حــــال ؟




لا شـــط .. لامــرفـأ
لا صاحـــب يلقــــاك
لا غـــيمة تنبـــىء 
عــــن عاشـــق إلاك
هـا : وحــــدك الملجـــأ
فاهــرع لكـــى تلقــــاك
محجوب العيارى - حالات شتى لمدينة





طب منا كـــنت عــــارفة م الاول
مش كنت دايما أقولك ؟!
و كــل محــــاولاتى كـــانت
بس ..  محض حــــلاوة روح 




الدنيا دى غـــــريبة و عـــجيبة
تعطى بسخــــاء لمن يزهـــد فـــيها 
وتحــرم السائل الذى سيرضـى ولو بأقل القليل 
بس اللى واجـع قلبى - جنب حرمانى منك  -
ان لا احــــد يا حـــبيبى بعــــدى 
هيحــــبك قــــدى 




ولو أتت تلك اللى تحـبك و لو ربع قدرحـبى
فأوعدك انى سأهرب كل صـــباح
 من تلك المرأة 
العاشقة الغـيورة المجنونة بيك 
وساكنة فى دمـــى 
و أحــاول بروح رياضية أدعــــيلها
انها تعـــرف او تلحق او  تقــدر تسعـــدك ...
و انها تحـــاول شوية تحـبك اكتر من روحها






و أرجـــع و أســـألنى :
هل يحـــصل الإنسان ف هــــذه الدنيا 
على نفس الفرصــــة ... مـــرتين
الا اذا كان محظــــوظاً وبشـــدة ؟


انا شخــصياً لم أنتظـر أن أجيب على نفسى
لأنـى و لله الحـــمد 
أدرك بالفعـــل 
إنى تشـــبثت بك قــدر جـهدى
حتى انسلت الفرصــة رغـــم عــنى



لكــنى لآخــر ثانية و قــد أمسكـت بهـــا
ولهــــذا  يا عـــزيزى
مش ندمــــانة ...
و متأكــدة أنه لن يأتـــى اليــــوم 
و أنـــدم 



اياك من دبيـــب اليـــأس 
اتحـــصن منه 
بحـــودايت العشاق وان مـــاتوا 
باحـــلام الحـــب و حـــكايتو 
حتى لو صـــارت كلمــــاته 
مجــــرد ذكـــــرى مٌرة 
عـــلى لســــــان الأمـس 
سمير عبدالباقى 





انا عشت معــــاك قصـــة 
جــاية من كــــتب الحــــواديت
انتا كنت عــــندى بطـــل من ابطــــالها 
فــــارس نبيــــل و ... أمــــير




عـــمرى ما شـــوفتك مجـرد بس حـــبيب 
كــــنت بالنسبالى اكـــتر 
من كـــدا بكــــتير 
ولا زلــــت 




احســـاسى بيك مرهـــون بميت ألف حاجة
يمكن يكـــون أخــرها تصرفـــاتك وتحليلها
لكن أكيد هيكــــون اولها ... قـــلبى
و اللى قـــالهولى .. عـــنك
من اول لحــــظة شوفــــتك
لحــــد بكـرة اللى لسه مجــــاش




الناس بتتقــــابل وبتعــــرف بعضــها 
و بعدين ينتظـــروا ويترقــــبوا 
هياخــدوا ايه .. كل واحـــد م التــانى
واللى بينى وبينك عمـــره ما كـــان كــدا 
انا كل يـــوم كنت بفكـــر اعمـــلك ايه 
واقـــولك ايه ..
واكـــتبلك إيه .. 
عشان بيه احـــبك اكـــتر واكــــتر 




تعـــرف ؟
انتا ادتنــى أكــــتر ... ما أخــــدت منى 
انتا خــــلتنى انســـانة احـــسن 
جـــايـز بقيت حـــزينة اكـــتر 
لكن حــاسة بطــــعم الفـــرح اكـــتر 
مجــــنونة يمكـــن أكتــــر 
و بتصـــرف جــايز بعبــط أكـــتـر
بس انا اتغــيرت عشانك ..






و عشانك .. رجـعت أسكن ف الدنيا
و حبــيتها أكــــتر 
و بقى نفســـى أعيشها أكـــتر 
و أعـــمل فيها حاجات أكـــتر 
و متبقــــاش الأيام بتعــــدى و بس
انتا أثرت فيا
من غــــير ما تقصــــد




وهتفضــل لحــد أخــر لحــظة ف العمــر 
نور عـــينى و ســيد هذا القلــــب 
الذى لا احـــمل أثقـــل منه حـــملاً
انتا هتفضـــل حــــد عـــالى 
و كـبير قـــوى ف نظــــرى 
مهما اخــــتلف عليك نـــاس تـانييـــن 
ملحقـــوش ومقدروش يشوفوك بعــينى وقـلبى 


هتفضـــل أكــــتر انســـان قـــدر يغـــيرنى 
ويخـــلينى أحــس انى احـــلى 
ف الأحـساس والفكــــر والفعـــل
وحــتى ف الشكـــل
ويخلينى كمان أقـــرر انى مش هعــيش
ف الدنيـــا دى تانى .. حــــــلاوة روح



اذا طـــــرت فـــقعْ قــــريبـــاً
ابو حيان التوحيدى





لو كنت املك قــــدرة 
أن ابنـــى بحــبى لك
مــــدناً وبــــلاد لما كـفانى هـذا الكوكـــب
الذى نسكــنه بأراضــــيه و كـــل مساحـاته
بس معــــاك كنت دايمــا قــليلة الحـــيلة 
مهما عــــملت و حـــاولت




يمكن العـــيب فــــيا 
لأنى كــــنت مستعجـــلة شوية 
او متهــــورة شوية 
او بتصــــرف بأنانيــــة شوية 
أو يمكـــن لأنى انا اللى كــانت .. بتحــــبك
و كان المفـــروض اكـــون واحــدة غـــيرى
و ... مكـــنتش




مظـــنش انها غلطــتى ..
ولا هيا كــــمان غلطــــتك
و دا التفســـــير الأخــــير .. 
اللى مبقــــاش قصـــادى غـــيره




ولو جــــاز لى بعـــد كل الطــــيران

أن اخــــتار أين أسقـــط 




ففى آخـــــــر اللحظات 
خلينى أهمـــس لقلبــك و أقـــول




إنـــك 
يا حــــبيبى 
يا روح الــروح
عــمرك ماكـــنت أبـدا حـــلاوة روح
انتــا يا حـبيبى كـل حـــلاوة باقــية ف الـروح  
انتــا كــنت .. و هتفضــل دايمــا
احــــلى من سكـــن هـــذه الـــروح


------------------------------------------------

This entry was posted on الأحد, أبريل 24, 2011 and is filed under . You can leave a response and follow any responses to this entry through the .

32 كــــلام بيطــبطـــب عـــلى قــــلبى و روحــــى

البوســـت مش ســـؤال
وعــايز أى اجــابة ليه

دا مجــرد كــــلام وبس
اعتـــبروه خطـــرفة م الخطــاريف
و مش فـــارق قبل وبعد كتابته ف شىء
ولا مطـــلوبله حتى
أى تعقـــيب
دا مجـــرد حكى
من باب الفضفضة
يعنى كتبته بس
مجـــرد
حـــلاوة روح

حبيبتي واختي فاتيما جايز متكلمناش عمرنا لكن حبيتك
من احساسك
من سطورك
من قلبك الجميل
ربنا يسعد ايامك ويملاها هنا ويعوض عليكِ خيراً كما عوض على ام سلمة خيراً
ربنا اللي بيرزق وبيدي اسأليه من فضله ويسعدك ويرضيكش بقضاؤه ويقنعك بما رزقك

لولا

فاتيما
روح القلب الملائكية

تسمحيلى احاول ارد عليكى بخطروفة من خطاريفك

الملائكة لا تسكن الارض و ان سكنتها فصعب ان تتعامل مع البشر بطبيعتها

للا يوجد انسان لا يتمنى السعادة و لكن يوجد من ستكثر على نفسه السعادة و يستطيع التعايش مع الشجن

هذه ليست حلاوة روح قد تكون عودة الروح لو عرفنا اين نقف و ما هى الخطوة القادمة

الاغداق فى المشاعر قد يساوى التقطير فيها حتى المشاعر يجب ان تكون فى مرحلة معينة بحساب

اسف اعتبريها تخاريف و ليست خطاريف

خالص تحياتى

إزيك يا أم يوسف
حلو البوست وإحساسه عالى قوى
بس.... وبعدين؟ الدنيا لسه فيها كتير
بصى قدامك واللى ماينفعش مايلزمش
كل سنة وإنت طيبة وكلى رنجة وبصل كتير
سلام

وبعدين معاكى ياقلب البحر
وكأنك بتوصفى عروسه بحورك
للدرجه دى؟؟؟!!!



ليه أحـــتفظت بيا ف ايامـــك وانتا مكنتش عــاوزنى ولا حاببنى مش لاقــية تفســـير غير انها كانت بس ... حــــلاوة روح جايز لأنــك عــارفنى كـــويس فكنت خـــايف عليا من ألم فراقــــك ل .... يقتلــنى
******************
أااااااااااااااه
لا تعلييييييييق

بالرغم كرهى الشديد للكلمه دى بس مالقتش غيرها

لا تعـــــــــــــــــليق

الأستاذة الزهراء أم يوسف

أنا بس داي أجول كل سنة و سيادتك طيبة
و السنة الجاية من حبايبك تكوني جريبة
ف النسيم وف كل عيد بتاكلو كعك و غريبة
وندرن على إن حد ضايجك لخلى سنته مهببة
و ضحكي يا زهرا من جليبك ده الضحك وصفة مجربة


كل سنة و حضرتك طيبة يا روح جلب التدوين

تحياتي
أبو شوشو

اولا كل سنه وانتي طيبه وبخير وسلام ديمن يارب
ثانيا...ربنا يحققلك كل اللي تتمنيه اللهم امين ثالثا...كان نفسي تكوني اول واحد يقولي كل سنه وانتي طيبه,بس متأكدا ان الظروف عندك مش كانت متظبطا علشان كدا مش جيتي بقالك مدا......وحشاني بجد
وربنا معاكي

فعلا حلاوة روح


ازيك يافاتيما :))

هل تكفي نظرة تفهم و تربيتة على كتفك
و جلوس بجانبك في صمت ؟

لأن الكلمات كلها قد قيلت عندما حكيتي

لا أعرف حقا يا فايتما ما هو آخر ما يفعله بنا الحب

انني احتضنك بروحي إن جاز التعبير
خدي بالك من نفسك

أشعر بك

خلينى أهمـــس لقلبــك و أقـــول




إنـــك
يا حــــبيبى
يا روح الــروح
عــمرك ماكـــنت أبـدا حـــلاوة روح
انتــا يا حـبيبى كـل حـــلاوة باقــية ف الـروح
انتــا كــنت .. و هتفضــل دايمــا
احــــلى من سكـــن هـــذه الـــروح
=============================

مسك وحلاوة الروح فعلا

ربنا يسعد قلبك الجميل
بـس ....

بصراحه العيب فيكي طبعا ....

مثل كل عيوبك الجميله اللي سببها طيبتك الغريبه العجيبه دي :)

انتي جيتي في الزمن الغلط والله يا تيما .... بس هتفضلي دايما صح بس غلط علشان الدنيا مش صح .... الدنيا غلط ..

تحياتي

لماذا يرحل الصباح من مدينة بر العشق ؟ احمد الشهاوى

دائماَ أمر اقرأ و أغادر دون تعليق لا تسألينى لماذا فأنا نفسى لا اعرف فقط اغادر وبهدوء كمن يمشى على اطراف اصابعه حتى لا يشعر به احد ولا ادرى لماذا قررت هذه المرة أن أعلن عن وجودى ربما لأن خطرفتك هذه المرة كانت حادة كالسيف ناعمة كنصل السكين رقيقة كمشرط الجراح مؤلم لكنه السبيل الى الشفاء ..ربما ايضا تلك الشجاعة منك فى ان تكاشفى روحك و امام الجميع .. أن تتفتتى بقسوة كى تعودى لتلتئمى من جديد .. تغتسلى من أوجاعك على الملأ لتعودى انقى .
حلاوة الروح .. جعلتنى أخجل من الصمت بينما أنتِ تبوحين بكل هذا الحنين .
كان لزاماً أمام كلمات كتلك أن أكتب
كى تعرفى أن فضفضاتك و خطاريفك التى تستهينين بها تعيد صياغتنا من جديد و بمنتهي اليسر نذوب فيها و بها ومنها حتى نختفي .. نختفى من أحزان العالم كله .
فشكراً لكِ و شكراً لحروفك التى تعيد الصباح الى مدينة بر العشق .

سااااااااااااااااااا الخير
م هعلق ع البوست عشان كل بطل وبطله قصه
اجدر بحسابتها وموازانتها ومشاكلها وافراحها واطراحها
بجد وحشتني المدونات ووحشتني مدونتك جدا
معلش الثوره والفيس وتويتر خدتنا غصب عننا
انتي عارفه اخوكي عامل فيها احمد عرابي
بس ده ميمنعش اني اجي لحدك واقولك فينكم كلكم وياريت تظبطي لقاء نشوف فيه كل اهلنا وصحابنا وحباينا ولو كان ف بور سعيد حتي نغير جو ونشوف الناس كلها
ربنا يكتبلك السعاده دنيا واخره

طَنطْ فـآتِيمـآ ..

وِ لَو إنّي مش بحس بفارقْ السّن
اللي ممكن يِنوجدْ لما بقرآلِيكْ..

دايمـاً بحسِيكْ .. أصغر من كِده بكتيرْ..
:)
..
إحمْ .. البُوستْ مش حلاوة رُوح بسْ..
دَه رُوح كـامله فِيهْ ..
" إيمُوشنْ مبسوووط عالآخر كده " ..

دآيمـاً .. بِتقولِي الكلآم المناسبْ
فـوقت مهو لآزم يتقالْ .. :)

مش لاقية كلام يوصف
قلبي واجعني و عيني دمعت و بس
تسلم ايديكي

لا تصالح ولو منحوك الذهب
انا هاعمل كده
بقى يعدى عيد ميلادى الستين بعد المائة ومفيش حتى كل سنةوانت طيب حتى لو من غير هدية
ماااااااااااشى

انا تهت فى القراية
رحت وجيت وطرت وووقعت
حاجات كتير فى الكلام
واكتر منها بين السطور
مش عارف أقول إيه ظ

بس خلينا نخطرف
احنا ورانا إيه يعنى

اغيب اغيب وارجع الاقى تيما ارق واروع

واحن

مش ممكن الرقه والرومانسيه دى يا تيما

انتى حلوة اوى اوووووووى انتى حلوة بجد

وانا باحبك بجد ووحشتييييينى اووووووووووووى

وهادعى ليكى ربنا يفرح قلبك ويقر عنيكى بابنك وبحبيبك

ويعوض صبرك خير

باحبك اوووووووووووووووووى يا طماطم

باحبك

يااااه يا فاتيما


و كأنى أنا لو كتبت ليها عشرات و ألوف الرسايل مش هأقدر اتكب اللى انتى كتباه

غالباً فى ناس كتير هتقولك البوست احساسه عالى

لأنهم مش حاسين أن ده أكبر من أننا نسجنه فى مجرد أحساس

أنا مش قصدى اقلل من احساس اى حد

بس مش عارف هو كدة ده اللى انا حاسه

ربنا يريح قلبك يا مامت يوسف الغاليه

و انت طيبة و بخير و سلامة و يطمنك على يوسف دايما و تشفيه قريب يا رب و احنا كمان (:

دة رد ع المُعايدة ها (:

إنك
يا حبيبى
يا روح الروح
عــمرك ماكنت أبدا حلاوة روح
انتا يا حبيبى كل حلاوة باقية ف الروح
انتا كنت .. و هتفضل دايما
احلى من سكـن هذه الروح


اسمحيلى اقول انها مش حلاوه روح
ربى يسعدك

والله تسميه خطررفة .. تسميه خطاريف

هو بوست كله احساس حلو
مش مجاملة وفض مجالس ... لأ .. حقيقة
بحب أوى الكلام اللى كله احساس ده
سواء كان لحبيب ..لأم ..لابن..لأخت
كونه بيلمس الواحد ده كفاية

اشكرك يا ام يوسف لاطمئنانك الدائم
اعجبنى ... "اذا طرت فقع قريبا"
دمتى بخالص الود

عشرة بوستس يفوتوني مرة واحدة؟ ليه؟ هو إيه اللي بيحصل في الدنيا؟ وأنا كنت فين؟

ما علينا .. المهم

خطاريف 3 .. هعديها .. عشان أحافظ على عقلي يعني :-)

جعلوني مدوناً 2 .. ألف مبروك للجميع .. حاجة تفرح بجد .. وألف شكر ليكي لأنك بجد عندك دايماً كل أخبار الأصدقاء

يُتبع :-)

عُدنا
:-)

خطاريف 4 .. استمتعت بيها جدا بجد .. مش عارف ليه اختياراتك المرة دي كانت ماشيه مع المود بتاعي .. فحسيت اني: انبسطت :-)

الباقي في النهاية .. لازلت أحيي فيكِ حماسكِ الذي لم ينقطع، ولو أنني لازلت أكرر أن الأمور لا تُدار هكذا إذا كنتِ أنتِ في مكان المجلس العسكري، فهناك العديد من الأمور المتشابكة والمخاطر المُحدقة الأخرى اقتصاديا واقليميا قد تجعل المشهد أماك مختلفا، واللي ايده في الميه مش زي اللي ايده في النار

يُتبع
:-)

عُدنا

ياريت 1 .. طبعا الأمور اللي اتقالت كتيرة جدا ومختلطة والحقايق كانت لسه غايبة .. لكن اللي لفت نظري هو سلوك بعض الناس اللي ما اتغيرش بعد الثورة رغم جمالها، وده اللي ظهر في خناقتك مع الناس اللي زاحموكي وانتي شايله اليافطة .. للأسف

ياريت 2 .. نفس الكلام .. المشهد اللي قدامنا مش هو المشهد الحقيقي .. في الداخل فيه أسرار وأسرار .. والفساد كان منظومة كبيرة جدا ومتشعبة بشكل رهيب .. وأياديهم كانت واصلة لكل مكان للأسف وماسكين حاجات كتير في البلد في كل مكان .. التنظيف هياخد وقت كبير .. للأسف :-(

صاغ سليم .. قصدك خطاب مُبارك طبعاً :-) ما هو كان باين فعلا إنهم بيعطوه فرصه لتوفيق أوضاعه .. بس تقولي إيه في الغباوة :-) ما شافوهومش وهما بيسرقوا .. شافوهم وهما بيتحاسبوا :-) وبسلامته طلع بمنتهى الذكاء يقول: فتشني فتش :-))

يُتبع

عُدنا :-)

أنا رابسو .. الثلاثين سنة فساد نش رقم هيّن ولا قليّل .. ولا هيكفيه انتاج 50 سنة من الرابسو عشان ننظفُه .. لكن ممكن ينظف .. بس عايز وقت .. واحنا مستعجلين .. كلنا مستعجلين .. لكن الواقع مختلف للأسف

خطاريف 5 .. لونك كان حزايني المرة دي .. كان واضح جدا

ونيجي بقى لبوست الحلقة .. حلاوة روح .. واللي على قد ما فيه ألم لكن فيه أمل .. حالة كانت موجودة من كام شهر وكويس إنها رجعت .. ويارب يكتبلك الخير وتحققي اللي بتحلمي بيه وبتتمنيه .. ويارب نسمع خبر حلو إن شاء الله

ربنا يكون في عونك
و يكتب لك اللي فيه الخير

رجعتينى سنين لورى واكدتيلى ان لسه فيه حد بيعيش نفس الاحساس حلاوه الروح
تحبى بصدق واخلاص حد تبقى لمساه اوى وفهماه اوى وحساه اوى رغم انكم مش كتير بتشوفو بعض
تعشقى بجنون حد غامض صامت معظم الوقت حد يعلمك تجرى وتلعبى وتضحكى وتصرخى ويرجع ليكى الحياه يدخل فى صمت ويحتل كل مشاعرك ويدغدغها من مجرد نظره او كلام تستجمعى قوتك قدامه تلاقى محصلتها صفر
لا تملكى غير انك تعترفى بينك وبين نفسك انك حبيتيه بصدق واخلاص وانه احتل كل جزء فيكى فى صمت
ولما يقرر الخروج من حياتك تعترفى بمنتهى الشجاعه انك حبيتيه اوى وانك كنتى بالنسبه ليه حلاوه روح فتدعيله وتفتكريه دايما بالخير وتقولى كان الوحيد الى بيرسم ابتسامه على شفاهى ذهب ويوم ما ربما يعود
تقبلى تحياتى واحترامى وخالص تقديرى ليكى وحبى لفاتيما

طب والله العظيم انا كان لى تعليق هنا :(
ازيك ياطمطم عاملة ايه

بلوجر مالوش طعم ياطمطم وانت بعيد وبزعل جدا لما ملاقيش صباحاتك اللى غايبة بقالها كتير وتعليقاتك الجميلة
ربنا يكتب لك الخير ياطمطم

انا حاولت كتير ادور على كلام اعلق بيه على البوست ده معرفتش سواء فى التعليق اللى ضاع او ده

يارب يفرح ويسعد ويطمن قلبك ياطمطم

صحيح اسمه حلاوة روح
وهو كله حلاوة روح
ساعات روحنا بتشم نسمة هوا باردة ولطيفة مختلفة عن كل نفس حسينا بيه قبل كدة
بنبقي عاوزين نشمه اوي .. ناخده كله كاننا ممكن منشموش تاني
واللحظة دي
اللي قبلها غيرها واللي بعدها كمان ممكن يبقي غيرها بتبقي حلوة قد الروح ماهي حلوة جوانا وبتحسسنا اننا بشر حلو برده من حقه يحس بالحلو ويعيش الحلو ويتمني الحلو
قبلها كان ايه .. بعدها كان ايه .. مش مهم
المهم ان وقتها اخدتيه بكل قوتك وخلاكي تحسي انك قد كدة حلوة
ويخليكي لا تفوتي ابدا فرصة انك تلتقطي هذا النسيم مرة اخري ولا تفلتيه

تحياتي

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

إرسال تعليق