.

.

يــا ريت ... 1 + تحديث  

Posted by: فاتيما in





تحديث (2)
---------------




احكى الأول حدوتة 
..... 
كان فيه ضفدع غطسان
و عقرب واقف ع حافة النهر 
العقرب مبيعرفش يعوم 
والضفدع مش بيشوف طريقه كويس
  لأنه دايما غطسان تحت المية 
فالعقرب طلب م الضفدع 
يركب على ضهره و يعديه الضفة التانية
ف مقابل انه يعرفه السكة 
الضفدع خاف و قاله :
ايه يضمنلى انك مش هتقرصنى ؟
رد العقرب : متخفش احنا مصيرنا واحد 
الضفدع صدق و ركبهّ 
و مشى بيه  و ف وسط السكة 
... العقرب لدغه 
الضفدع صرخ وسأله  :
ليه عملت كدا ؟
انتا كمان دلوقتى هتغرق 
فرد الرابض على ضهره و قال :
غصب عنى .. مش بأيدى
انا عقرب !!






ماما بتصحينى وتقولى فيه ضرب نار
طول الليل وانا نايمة قتيلة
عقبال ما قمت و قريت شوية عن اللى حاصل
كان دمى فار و قمت لبست و نزلت
كنت ف الميدان الساعة 12 ظهراً 
الناس متفرقين مجموعات
كل مجموعة واقفة حوالين
أحد شهود الواقعة وبيسمعوا شهاداتهم






عصبية وانفعال شديد من الجميع 
كلام كتير عن قتل ضابط واحد ع الأقل
ست كبيرة وصفت المشهد باللفظ 
انهم لموا الضباط الجيش 
وكأنهم زبالة ف كيس وحطوهم ف العربية
وطلعوا بيهم 
بعد ما ضربوا رصاص بالهبل وطاردونا




امهات الشهداء كانوا موجودات 
منهم واحدة مصابة قعدت تقول بحرقة 
احنا ولادنا ماتت وقعدنا هنا عشان يتقبض
على اللى قتلوهم  ومحناش بلطجية
ليه يعملوا معانا كدا ؟!




الميدان كان مغلق جميع مخارجه
بالسلك الشائك والشباب وقفوا وراه 
يبصوا ع البطاقات
احد شباب الاخوان كان ماشى 
يفرج الناس الرصاص اللى انضرب عليهم
ومنه رصاص صوت و رصاص حى
واكدوا ان الشرطة العسكرية قبل ما تمشى
لمت اللى تقدر عليه من الفوارغ 









العدد على صلاة العصر كان ف زيادة 
والهتافات كلها باسقاط المشير 
ولافتات بتقول 
بعد ما حطينا ايدنا ف ايديه
الجيش دلوقتى .. بيضرب ليه ؟
البعض حاول يعرف اسامى الضباط 
عشان يتأكدوا من هويتهم وانهم 
مش مندسين






بعض البشر انتشرت ف الميدان عشان
تدخل ف نقاشات و تخوف الناس
م الاحكام العرفية و زعل الجيش
والأيام السودا الجاية لو شيلنا طنطاوى
ولو مشى نجيب مين وكلهم فاسدين
انا جالى ذهول بصراحة ..وافتكرت مبارك
مش كانوا بيقولوا كدا ساعتها برضو
وكانوا خايفين على الفراخ الدستورى ؟




ع الساعة اربعة سادت هتافات وفرحة 
واشاعة بإستقالة عصام شرف 
وانه جاى التحرير
وبعدين اتكدبت الأشاعة وكملوا 
هتاف عادى




حصل موقف عجيب لما لقيت واحد بيجرى
وناس بتجرى وراه بعدد كبير 
ببص كويس لقيته سامح عاشور  
وبيجرى اتجاه شارع القصر العينى
وشاب بسأله بتجروا وراه ليه كدا ؟
قالى دا حزب وطنى قولته دا ناصرى
ولو وطنى حتى .. ليه بتجروا وراه ؟
لو بيقول كلام مش عاجبكم 
كنتوا سيبوه يكلم روحه و امشوا 
و محدش يعبره






العدد على سبعة بليل كان اكبر 
و الشباب سيطروا على مداخل الميدان 
وفيه تصميم ع البيات والأعتصام 
قبل ما أروح قلبى وجعنى قوى لما لقيت
شاب بيعدى علي الواقفين يقولهم 
باتوا معانا متسيبوناش لوحدنا 
كان نفسى ابات .. دا أقل شىء يتعمل 
بس الحاجة وفرماناتها
واللى كانت هارينى تليفونات طول النهار 
ارجعى ارجعى كفاية قعاد لحد كدا
انتوا عارفين .. مش هقولكوا على امى 


طيب 


بكرة هيحصل ايه ؟
الله اعلم 
الليلة دى حتى بلاش بكرة 
هيحصل ايه ؟
برضو الله اعلم 
بس كان فيه غضب رهيب مالى المكان 
ومالى القلوب والصدور 
انا نازلة بغلى اصلاً وهتجنن 
وكأن اللى مات وانضرب دول من دمى
احنا مالنا عاملين كدا ليه ؟






ليه فيه برود و قسوة كدا على ناس 
كل غلطتهم انهم بيعتصموا عشان حقوق
وحتى الضباط ..اعتصموا عشان حق
ولو فيه غلط ف الاسلوب 
احنا موافقين ع الاسلوب دا ليه ؟
ليه الأهانة والعنف والغدر والمرمطة دى 
ونرجع نموت كأننا قطط ولا فراخ ف سكة 
وداسوا عليها ؟!






انا حسيت اننا يوم 25 او ما بعده 
امن مركزى وضرب رصاص وقنابل مسيلة
ومولوتف و جرى ف شوارع وسط البلد
واصابات و مقبوض عليهم و خطف
واحجار مغطية الأرض و دم و اثار عدوان
و كأن المشهد تمام زى ما انقال
ع الولاد ف الميدان قبل تنحى المتخلى
انهم عملاء كنتاكى الخونة الاجندات
و هيضيعوا البلد ولازم يتساوا بالأرض
ما أشبه الليلة بالبارحة




اللى انقتل كام واحد ؟
بيقولوا عدد مش اقل من سبعة 
بينهم دكتور ..مدنى يعنى 
دل غير الضباط المعتصمين اللى محدش 
عارف اراضيهم فين ...
الدم اللى سال دا .. ليه ؟
المصابين كتير ليه ؟
لو مفيش اسلحة مع الشرطة العسكرية
مين اللى ضرب كل هذا الرصاص  ؟
و ليه اتسابوا اللى بيضربوا دول
تحت سمعكم وبصركم ؟
شوفوا الفيديوهات يا جماعة و احكموا 
و فيه ناس ف الميدان صورت بالموبايل 
وهنستنى و هنشوف المهازل
و بجد .. انا حسيت كأننا ف اول يوم ثورة
وقلبى أتعصر وكأننا ف قلب الغدر 
مفيش حاجة اتغيرت
 




لما وصلت التحرير لقيته حزين قوى 
زى ما يكون واحدة انلقت م العياط 
وبطلت من كتر التعب و عاوزة طبطبة
شباب اتوزعوا يلموا الطوب ويكنسوا الأرض
وكم رهيب من الصحفيين والفضائيات
عمالة تسأل شهود العيان و تصورهم
وسألت روحى بقى دا التحرير 
اللى امبارح كان .. و لا يوم الحشر
دلوقتى زى صحرا واسعة وفاضية 
بتستغيث بالبشر يملوها ويعمروها 
كان فيه مئات متفرقة فاتمنيت العدد يكتر
ودا حصل فعلا بس مش بالكثافة الكافية
اللى تحقق الهدف




والهدف ايه ؟




ببساطة ميبقاش فيه حجر ع الحرية
ميبقاش فيه قهر و دم و غدر 
احنا معملناش ثورة وخلصنا من عنف 
 و زبانية امن الدولة عشان يطلعلنا غيرهم
احنا عملنا ثورة عشان الحرية والكرامة 
وعشان ناخد حقوقنا اللى الكل معترف 
ان فيه تباطىء رهيييييييب ف انجازاها
كل دا عشان المليونية ضيقت الخناق 
ع المجحوم و هددت فعلياً بترتيب اتوبيسات
بالمرواح اعداد غفيرة على شرم؟!؟؟!!
والناس اتحمست جدا 
انتوا بتلهوا الناس وتصرفوا النظر ؟
و ايه نظام تشديد الحراسة دا ؟
خايفين يهرب ولا فعلا هيهرب
او هرب و مش عاوزين حد يحاسبكم
لما الخبر يتعرف رسمى ويتاكد ؟ !




ما زلت مصرة 
ان المجلس شىء و الجيش شىء
ولو المجلس فيه ظلم وفساد "بشهادات"
ما الغريب ان يخرج ابناء ف الجيش ضده
ويعتصموا بالميدان و بمن فيه
ليه باصين للقيادات دى بملائكية كدا 
مع انهم ضاربينا مبهدلينا قاتلين عيالنا 
غادرين بينا ف انصاص الليالى اهو 




وليه خروج ضباط على القيادة يبقى
خروج ع الوطن و ع مؤسسة الجيش؟
محنا كدا يبقى خروجنا على مبارك 
كان خروج ع الجيش والوطن .. بما انه
كان رئيسه و رأسه واعلى قياداته
واحنا كنا بنطالب عناصر الشرطة 
تتمرد على قيادتها وتنضم للشعب
اشمعنى دول قولنا عليهم خونة 
لما رفضوا ينضموا للشعب ضد النظام ؟
طب اشمعنى ؟!!!
 


اللى كانوا بيهربوا م حدوث مواجهات 
وعاوزين سلمية ومدنية و تعديلات دستورية
عشان الجيش يرجع ثكناته 
اهم .. لا رجعوا الثكنات ولا فيه مدنية 
ولا هيسيبوها الا لواحد نقاوتهم 
والرعب اللى نالهم من مليوينة امبارح 
خلاهم عملوا كدا امبارح ف الناس 
والمواجهات حصلت عشان لا مفر 




حصلت ولسه هتكبر عشان 
هذا الوحش هوه الذى يحرس الاميرة
و عشان توصل للأميرة يجب ان تتخطاه
ولن تتخطاه إلا اذا واجهته  وجهاً لوجه
ولو تخطيته ف دخولك قلعته بالحيلة 
فلازم وانتا خارج بأميرتك 
هتلاقيه مستنيك ف الوقت المناسب 
عشان يهاجمك ويستعيد منك الغنيمة
لن يتركك حياً او بخير ابدا 
لأنه خطفها عشان يحرمك منها 
و لأنه غدار و خاين و عميل 
و لأنه ببساطة ... عقرب 


اخيراً 




ذنب اللى إنقتل 
ف رقبة اللى حرض عليهم 
و بيتباهى بإنه بلغ عنهم 
و عرف الحقايق و غمى عينه 
و لسه بيغمضها  وكتب كلام مرعب
و خوف الناس و مشاهم وراه 
بكلام يزهق ارواح و يحطم نفوس 
 هقول بس جملة واحدة 




دم اللى مات امبارح ملطخ ايدك




السبت 9 ابريل - 12 مساءاً

----------------------------------------


اللهم ارنا الحق حقا و ارزقنا اتباعه 
وارنا الباطل باطلا و ارزقنا اجتنابه


------------------------------

تحديث  (1)
------------
يا خونة يا ولاد التيييييييييييييييييت
ضرب بالرصاص وقنابل الغاز وامن مركزى 
وتاخدوا الضباط من وسط المعتصمين 
وتبهدلوا المتظاهرين كدا ؟
احنا النهاردة 9 ابريل ولا 9 يناير ؟
كل اللى حصل دا و الشهدا اللى ماتوا 
والناس اللى انصابت عشان ف النهاية
نفضل لسه زى ما احنا 
بيحكمنا واكلين ناسهم ؟!!؟!!
لأ .. مبدهاش
ع التحرير ... ع التحرير 

اللى يقدر ينزل ينزل .. ميقعدش 
امبارح كان عندى يقين بنسبة 90 % 
ان الضباط دول منشقين عشان ينضفوا الجيش
وقولت 10% اخليهم لحد ما نشوف 
اهو الحقيقة وضحت اهى
ومستنوش حتى يوم و لا أتنين عشان 
 الولاد دى متشجعش غيرها ف الجيش 
زى ما المعتصمين شجعوا البلد تنزل 
بقعادهم ف التحرير 18 يوم 
ربنا ينصرهم .. ويظهر الحق 
الثورة فى خطر ..اكبر م الاول
لأ .. مبدهاش 
ع التحرير  .. ع التحرير




السبت 9 ابريل - الساعة 11 الضهر 






-----------------------------


البوست


--------------------------


- هوه قريبك ؟


- يا ريت 

دنا يبقالى الشرف



سؤال اتوجهلى ف التحرير النهاردة 
عشر مرات ع الأقل 
لأنى كنت ماسكة لافتة عليها صورته 


وصحيح اول مرة شوفته عند د.ستيتة هنا
حاولت أتجاهل قدر الممكن 
عصرة قلبى عليه 
ومرضتش أزعل قوى عشان حسيت وقتها 
ان الزعل جدا عليه مش من حقى
ومن حق اهله واللى يعرفوه
وتصورت انه أكيد .. لازم هيلاقوه ويدفنوه 
وقتها متخيلتش انه هيموت غريب 
زى ما سماه بلال فضل ف مقالة 
هتعيش للزمن بعنوان ..إبتسامة الغريب 




لما قريت المقالة وعرفت التفاصيل
وان هذا الشهيد المبتسم كما لقبوه
قعد شهرين ف تلاجة المشرحة 
و فشلت محاولات العثور على أهله 
او عثور أهله عليه .. قررت قارئة للأهرام
انها تتطوع وتدفنه مع أبوها 
والجنازة كانت من كام يوم 
خرج بيها الشهيد بعد الصلاة عليه 
وسط الزغاريط
و دعوات الناس الطيبة الممتنة 


المؤلم ان ناس كتير عدت عليا 
وانا ماسكة اللافتة وعليها صورته 
ومكنوش عارفين حكايته وإفتكرونى قريبته
و لما كنت بحكى حكايته كان الحوار بيخلص
بدعوات ع اللى قتله واللى امر بقتله 
و حزن ف العيون والقلوب
مخففوش غير .. مليونية الميدان
وااللى سبقها قبض على كام راس 
من الرموز الحلوة بتاعت النظام السابق



التحرير النهاردة ف مليونية التطهير 
كان يشرح القلب الحزين 
كنت عارفة انه هيكون زحمة خصوصا 
بعد قرار الاخوان النزول 
وعشان كدا من تسعة ونص كنت هناك 
بتاع الجرايد و الناس ف الشارع
كانوا بيحيونى عشان كنت ماسكة اللافتة
و لابسة الكاب وماشية بكل همة ونشاط
إتسئلت ف سكتى تلت مرات 
- انتى رايحة التحرير ؟
- إن شاء الله 
- ربنا يوفقكم
فإبتسم 



من بعيد و انا داخلة ع الميدان 
شفت العدد الكبير عن كل مرة
وبسرعة روحت على مكانى المعتاد 
وقعدت أقرى ف الجرنال و اتفرج ع البشر
المنصة كان منصوب عليها قفص اتهام
وصورة لمبارك جواه تمهيداً للمحاكمة
والمتظاهرين باليفط رايحين جايين 
خرجت لافتتى فسمعت لأول مرة السؤال

- هوه قريبك؟

رديت 

- يا ريت 


عدد المتظاهرين من قبل الصلاة كان كبير
وينبىء بمليونية بلا أدنى شك
صفوت حجازى يظهر ف الافق 
وبعده محمد جبريل وأمام جامع عمر مكرم
والتلاتة يتعازموا فيمن يصلى بالناس 
يلقى صفوت حجازى الخطبة 
ويؤم جبريل المصلين ويدعو من القلب 
ويبكى تقريبا كل الموجودين
بعد صلاة الجمعة والعصر قصر 
وصلاة الغائب على شهداء الدول العربية
الاسبوع الماضى تبدأ هتافات تهز الميدان 


لافتات على كل شكل ولون 
 منها الفئوى زى تطهير الرياضة 
من حسن صقر و سمير زاهر 
و طلاب جامعة القاهرة وطلباتهم
وحملت بعضها دعوة لتترك مصر للطيران
للمضيفات حرية ارتداء الحجاب 


اغلب اللافتات كانت ساخرة كعادتنا

لسه فيه ناس تنحين مانعين عنا الاكسجين
خد دواك يا ريس .. عشان تتحاكم كويس 
الزنزانة جاهزة على تسليم المفتاح
مش هنحاكم حملان احنا عاوزين العجل
عشماوى يبحث عن مبارك 
لا زمالك ولا جلابية فين فلوسنا يا حرامية ؟
صوتى يا ولية دى مليونية .. التوقيع مبارك



العرب كانوا حاضرين بقوة ف اللافتات
وف الهتافات و ف الدعوات كمان 
سوريا كانلها نصيب الأسد 
بس مش بشار ...
و إنكتب ع العلم شعارات كتير منها
الجيش السورى يا جبار 
لا تطلخ إسمك بالعار



ليبيا ... نالها هتاف جميل قوى 
ليبيا ليبيا لا تخافى 
بكرة يسيبك القذافى
أعلام الدول العربية ملت سما الميدان
علم تونس وسوريا واليمن وليبيا 
و فلسطين والبحرين وحتى السعودية
و اللى معرفش ليه اترفع علمها ؟
بس على حد قول أحد المتحدثين ف المنصة 
يا خوفك يا أسرائيل النهاردة 
ويا خوفك يا امريكا النهاردة 
فعلا المشهد كان عجيب وغير مرتب 
الناس كانت رافعة الأعلام وبترفرف جمعاء
وجامعة الدول العربية اتحققت 
رسمى فهمى نظمى



كان فيه لافتات إعتذار لتونس 
وكمان كان فيه طلب واضح محدد موجه 
للمجلس العسكرى بإنهم لازم 
يعترفوا بالمجلس الإنتقالى فى ليبيا
عشان يكسبوه شرعية اكبر  تسنده
ف حربه ضد الطاغية بتاع الزنجا زنجا دا 



كان فيه هتافات ضد سيادة النايم العام 
(النائب العام سابقاً)
بتطالب بعزله لسكوته ايام مبارك
و سكوته كمان ما بعد مبارك عن الفساد
وتعطيل القبض ع العصابة الحاكمة عن عمد
د.ممدوح حمزة اعلن عن استعدادت
جارية لتوفير اتوبيسات تطلع 
من كل المحافظات على شرم الشيخ
عشان تجيب مبارك من ديله
و المتظاهرين رددوا وراه كلمة واحدة 
هنجيبو .. هنجيبو .. هنجيبو


الدنيا إتزحمت بشكل فظيع 
والجو كان شوية شمس وشوية طراوة 
بس حصل إغماءات كتير  .. ع الأقل حواليا
حصل اربع اغماءات منهم شاب 
كان فيه لخبطة  و ناس كتيييير ياما
ولأول مرة اسمع صوت سنوفة من زمن 



وسنوفة دى فى أدبيات الثورة عندى 
تبقى الطيارة الهليكوبتر بتاعة الجيش 
اما الإف 16 فمسمياها .. البرص
سنوفة دى اللى هيا الطيارة الحشرية
اللى كل شوية تيجى 
فوق دماغك تزن زى الناموسة
و أديلنا مدة مشوفناش سنوفة دى 
والساعة اتنين الا ربع تقريباً 
كانت فوق دماغنا بتطير و تزن 
و تطل علينا عشان أكيد واحشناها 


الناس كلها باصت لفوق و اتاخدت شوية
و قالوا احنا مش كنا خلصنا 
و بعدين عادى ... الموضوع هدى 
وكل شوية سنوفة كانت بتقلل ف الدواير 
يعنى كانت بتحلق على شكل دايرة واسعة 
وفضلت الدايرة دى قطرها يكش يكش 
لحد ما لاقينها فوق دماغنا ف خط مستقيم
ذكريات الأيام السودا الأولانية للثورة
هاجمتنى وقولت خير اللهم اجعله خير
بس طبعا الميدان مكنش يسمحلهم
بأى تواجد لا بالمركبات ولا بالبشر 
ومكنش عندهم غير سنوفة يا عينى 
يلا .. اهى خدتلنا تصويرة
مش بقولكو واحشناها



قرب الساعة تلاتة اتذاع عبر المنصة
ان فيه 8 ضباط جيش انضموا للمليونية
محدش شافهم إلا بعدها بشوية
طلعوا واحد واحد ع المنصة وسط الهتاف 
الشهير بتاع الجيش والشعب إيد واحدة 
وفجأة المنصة إتلبشت و اللى ماسكينها 
قالوا عايزين نكمل محاكمة مبارك بقى 
الضباط .. واحد فيهم كان عاوز يتكلم 
و فيه ناس منعته بالهتاف 
وفجأة تحول المشهد لناس كتير ع المنصة
محدش عاوز ينزل و محدش عارف يتكلم
المنظر كان وحش جدا  و بالنسبالى 
بدا وكأنه محاولة لتحجيم الضباط
واللى اكدلى الكلام دا بعد إنتهاء
محاكمة مبارك زى ما كان متخططلها ..
ان حسين عبدالغنى مذيع الجزيرة السابق 
وجه شكر للظباط بس قال احنا ثورتنا مدنية
واهلا وسهلا بيكم من غير اللبس الميرى 
و خلى ناس تهتف وراه ..مدنية مدنية
واحد م الضباط اتكلم فعلا 
بس محدش سمع لأن المايك كان واطى 



انا شخصياً كنت عايزة اسمع هيقول ايه
و كنت عايزة اعرف التمانية دول 
ايه حكايتهم .. مبفهمش ف الرتب
بس بينهم ملازم و لبسهم مختلف
 اشفق عليهم جدا .. لو كانوا  شرفاء 
ومش مدسوسين عشان خطة ما 
لأنهم لو شرفاء فعلا وعاوزين يطهروا الجيش
فهما بمجييهم النهاردة شالوا كفنهم 
و حطوا ارواحهم على كفهم بلا مناقشة 
وبالتالى .. هم يستحقوا خالص احترامى 
واعجابى و مساندتى ودعواتى بنصرهم
اما لو كانوا مدسوسين  .. هيبان
و ان كنت لا ارجح دا لأنهم هينكشفوا 
واللعبة هتبقى مفقوسة و متخلش على حد
و هيبقوا خسروا كل حاجة 
ولا كأنهم عملوا حاجة
ولا هيأثروا مع الثورة والناس بحاجة 



و بما اننا جبنا سيرة اللى شايلين كفنهم
فلازم أذكر امهات الشهداء اللى كانوا
حاضرين ف التحرير النهاردة 
ام خالد سعيد وكام شهيد من المطرية
واللى قرروا يباتوا ف الميدان وجابوا معاهم
اكفانهم ورفعوها ف وشوشنا عشان يقولوا
ان ضباط شرطة المطرية اللى قتلوا عيالهم
قاعدين ف القسم مروقين ومبسوطين
وبقالنا شهرين ولا حد جه جنبهم 
وهما طالبين القصاص .. من اللى قتل
وطالبين محاكمة .. اللى امر بالقتل
ردد المتظاهرين الكلمة السحرية 
هنجيبو .. هنجيبو .. هنجيبو 



انا كنت بقوم واقعد ف مكانى 
مشوفتش صفوت حجازى وهما بيزقوه 
بس شوفته لما رفعوه تانى للمنصة
والناس هتفت له وهوه تماسك
وقال كلنا ايد واحدة ..ايد واحدة 
وبعدين بكى لدقيقة و مقدرش يكمل كلام
فالناس شالته ع الاكتاف ولفت بيه الميدان
 الراجل دا سبحان الله مكنتش بطيقه
والثورة خلتنى اعزه واحترمه 




كان فيه هتافات ضد المشير 
و بتطالب بإسقاطه وابرز لافتة قريتها 
بتقول : مصابى الثورة يسألون
يا مشير إنت حارس لمبارك ولاّ غفير ؟



واحد لطيف قوى كتب 
ان مطلبه فئوى وهوه عايز 
يبقى رئيس متنحى ومتهم بسرقة مصر
30 سنة عشان يسجنوه 
ف فيلا ف شرم الشيخ !



صفوت حجازى قال ف خطبة الجمعة 
 لو مبارك ف المريخ هنروح نجيبه ونحاسبه
..كنت عاوزة ارد عليه واقوله ان
الراجل معاه فلوس توديه المريخ فعلا 
لو ملقاش بلد ف الكورة الارضية .. تلمه



المنصة كانت هرجلة هرجلة لآخر مدى
وشباب ائتلاف الثورة اعلنوا انهم 
مش مسئولين عن المناظر اللى حصلت 



محاكمة مبارك كانت ماشية كويس
لحد ما المستشار الخضيرى أجل 
النطق بالحكم ليوم الجمعة الجاى عشان 
يكونوا اطلعوا على شهادات الشهود
والموضوع يمشى بنظام ....
طبعا الناس استغربت .. و هللت
النهاردة .. النهاردة .. النهاردة



ناس كتير معرفتش صورة مين
اللى انا حطاها ف اللافتة بتاعتى 
كل ما حد كان يسالنى كنت بحكيله
واختم حديثى معاه بإن اصل لو احنا 
عندنا إعلام وتلفزيون مصرى محترم 
كانت صورة الشاب دا اتحطت واتذاعت 
كتير لحد ما اهله يعرفوا مكانه ومطرحه 
وميندفنش غريب كدا ؟!



ناس قالتلى دا اكيد مش مصرى 
فرديت يا جماعة الاجانب والعرب 
سفاراتهم بتعتبرهم بشر محترمة 
وبيسألوا عنهم لو غابوا .. خصوصا 
ف اوقات عصيبة زى دى 
ثم ان اجنبى او عربى هيمشى 
ف مظاهرة مصرية فيها ضرب نار ليه ؟
دا تقصير من اعلامنا اللى لازم ينضف
وطبعا تقصير م الحكومة سابقة وحالية 



بمناسبة التقصير شاب من اللى كانوا 
ف طنطا وقت الثورة اتصاب ف عينه 
قعد جنبى يتكلم ع الشهيد 
ويتكلم كمان عن عينه اللى راحت 
وكان سواق ودلوقتى عاطل والحكومة
معبرتوش ولا سألت فيه بأى منظر 
مكنتش عارفة ارد عليه 
بغير ربنا يعوضك 
و احنا اهو بنيجى عشنا ننضف البلد
ولما تنضف هتاخد حقك ان شاء الله 



البلد دى فيها خير و طيبة ملهاش حد 
وقت ما الشيخ جبريل قعد يدعى 
والناس تأمن وراه .. و طبعا تعيط 
لقتنا شعب غلبان قوى قوى 
بنعيط عشان عاوزين مطالب بسيطة
و متعشمين ف وجه ربنا خير 
عاوزين ستر مش اكتر 
و حد كويس يحكمنا
بكانا كلنا لما دعا ربنا يتقبل شهدائنا 
الناس كلها بكت .. ف الجزء دا تحديداً
عارف لما تقدم هدية و تتمنى القبول
طب يا رب احنا قدمنا أغلى ما ف الوطن 
البشر .. و  مش أى بشر 
دول أطهر ما فينا 
اللى وقفوا ف وش الرصاص عشان البلد دى
تقوم لها قومة 
يا رب بنقول آمين وتقبل منا 
يا رب العالمين
وبنتمنى يحكمنا واحد صالح بس 
ويخسف بالظالمين بقى ..احنا تعبنا


 
المنظر النهاردة خلانى افهم انا ليه
بتجنن قوى لما حد يقول الشباب
مطالبه كبيرة وبراحة وشوية شوية
واحنا مينفعش نستعجل ..الخ الخ 
لأ .. ينفع  وممكن وجدا 
و دى مش مطالب ... دى حقوق 
دى ابسط حقوقنا كبشر ربنا كرمه 
ليه هوه يهين نفسه بعد كل دا 
ويرضى بالقليل 
ليه ؟



العلم المصرى بألوانه بيلون أى سواد
ولما شفت جنازة الشهيد المبتسم 
وهما بيلفوه بالعلم 
قولت لما مبارك ربنا ي يفتكره قريب
مش عاوزينه يتلف ف علمنا 
هل يستوى الشهيد مع الخاين والعميل
هل يستوى المقتول مع القتيل 
إتشل ولا هيهربوه برا ولا هيتسجن
ف كل الاحوال الموت آت 
ولازم ميتلفش ف العلم المصرى 



الدنيا كانت زحمة موت وكل شوية 
ييجى ناس توقف وتتزاحم حواليا
دخلت ف نقاش حامى مع بعض الواقفات
و أول مرة صوتى يعلى و ازعق 
وانا مبحبش اكون هذه الشخصية
بس كنت على آخرى بصراحة 
واتغاظت لما لقيت سخافة ف الرد 
واخت اللى كانت واقفة جنبى بتقولى 
أصل اليافطة دى كبيرة قوى
فرديت اسألها طب ودى غلطة مين ؟
قالت بكل براءة غلطتك طبعا 
بس بقى فروحت مديها اللى فيه القسمة 
عن انى من الصبح بدرى ف المكان
وحضرتك قاعدة ف بيتك تخرجى على مهلك
وانتى اللى جيتى عليا 
ولقيتى معايا لافتة كبيرة كدا
ومفرقش معاكى و وقفتى تزنقينى
عشان تتفرجى ع المنصة ومتوقفيش بعيد 
وبعدين لما اتضايقتى منى يا حرام 
واتخنقتى .. كان ممكن تمشى 
بس انتى فضلتى واقفة
والمفروض دى تبقى غلطتى انا
و انا اللى هبقى مسئولة عنك بقى
وفجأة الموقف تحاول لسجال بينى وبينها
و ناس جم متآخر زيها اتحمقولها سلف 
و ناس تهدى وتقولى معلش 
عارفين ؟
احساس لطيف قوى انى ابقى شريرة
واتعصب و أفترى و أطيح 
و حد يقولى معلش 
اصلى بقولها لغيرى ف الغالب
فنوبة من نفسى ابقى ف المعسكر التانى 
والناس هيا اللى تقولى بطلى افترا 
وأهو ميبقاش كله ضرب ضرب مرة شتيمة 



بس اللى حصل حصل 
عشان بسبب ما أسميه دايما 
بأخلاقيات الزحام 
اللى بتخلى الناس انانية و متشبثة
رخمة وعصبية وفيها كل العبر
ودا ينطبق عليا انا كمان 
بس كمان بتطلع خير م القلوب 
وكام واحدة من المتظاهرات قعدوا يهدوا
ويقولوا معلش لازم نستحمل بعض



الزحمة بتخلق حالة من التشوش 
والسمك لبن تمر هندى 
بين الناس ف الميدان وع المنصة 
وحتى ف الأراء والعقول والإتجاهات 
و دا كان واضح ف تحير الناس 
بخصوص الضباط بتوع النهاردة .. يا ترى 
دول خير للثورة و لا شر 
ورغم اعتراف كتيييير منهم ان المجلس
جزء من نظام مبارك السابق 
لكن فيه حالة انكار فيما يتعلق 
بإنهم لازم يمشوا مع رئيسهم
وتستغرب جدا اننا من 11 فبراير للنهاردة
لسه بنطالب بمحاكمته واسرته 
ورموز حكمه و شيل المحافظين 
وحل المجالس المحلية ودستور جديد 
و حق الشهدا والقصاص ..ومع ذلك 
تكتشف ان كل دا لم ينفذ للآن 
تحت سمع وبصر السلطة الحاكمة 
وبرضو تكتشف ان فيه حيرة
ليه ..مفهمش !!



بس زى ما حب البلد دى جمعهم 
الميدان كمان جمعههم 
وحاجة تانية كمان حسيتها النهاردة 
اسمها رقة القلب
الدفا والطيبة الحقيقية 
ف اهل البلد دى
الرقة دى هاجمتنى وبضرواة
اول ما قعدت و علقت اللافتة 
وقعدت اكلم واحدة جنبى ف حاجة
وإذ فجأة جه راجل عجوز بسيط
لابس جلابية وشه مريح وطيب 
زى كل جدودنا
وقف لثوانى يقرى الكلام المكتوب
وبعدها بتلقائية 
وبكل هـــــدوء 
راح مقرب على الصورة
صــورة الشهيد المبتسم
و راح بايسها .... وماشى


تانى يتردد السؤال

- هوه قريبك ؟

أرد 

- يا ريت
------------------------------


--------------------------------
الجمعة 8 ابريل - الساعة 10 مساءاً

This entry was posted on الأحد, أبريل 10, 2011 and is filed under . You can leave a response and follow any responses to this entry through the .

13 كــــلام بيطــبطـــب عـــلى قــــلبى و روحــــى

كفاية يافاتيما
محدش يجيبلى سيرة الشهيد المبتسم
هبكى عليه اكتر من كده ايه بس

يارب

Fatima، بصي علشان تصلحي الريدر (reader)، روحي للبلوج settings، اختاري site feed، وبعدين اختاري advanced settings، وبعدين عند blog posts feeds اختاري full.

قوليلي لو دا نفع معاكي، لو لأ قوليلي علشان أقولك حل تاني.

VOLtaa
------

كان لازم اجيب سيرته يا فولتا
ولو يوم حتى

ربنا يعتر اهله فيه
وياخد حقه م التكريم الواجب

ان شاء الله

وجهة نظرى
---------

عملت كل اللى قولته يا معتز
ومفيش فايدة

البلوجر مرخم معايا كدا ليه ؟
انا مش فاهمة

لو فيه حل تانى
الحقنى

:)


وموشكرين لحضرتك

يبقى يا ست هانم غيري ال-Theme بتاع البلوج لأن هو السبب. تصليح ال-feed على الوضع دا يبقى لازم تغيري في الكود. مش صعبة خالص بس أسهل تغيري ال-theme.

المهم عايز أقولك اني أنا معجب جداً بأفكارك إلي بتكتبيها .. ... نفس إلي نفسي أقوله بالظبط.

عايز أضيف حاجة، إن الثورة دي بتتسرق من جواها .... امبارح ونة بتفرج على البرامج في محطة مختلفة، الناس إلي بتتكلم كلهم بيرددوا عبارة واحدة غريبة: الوشوش إلي فالتحرير دي غريبة مشفناهش قبل كدة!! احنا فالتحرير من أول الثورة!!! ...... أن قعدت أفكر، هما فالتحرير من أول الثورة وعارفين وشوش الملايين إلي نزلوا واحد واحد؟ طيب مطالبات الثورة بقت حكر على الوشوش إلي يعرفوها بس وباقي الشعب خونة وفلول نظام؟ أنا لو نزلت قلت رأيي أبقى فلول نظام؟ بلاش... لو انتي عايزة تقولي رأيك في ميدان التحرير تبقي ثورة مضادة؟

وبعدين إيه الثقة المفرطة دي في المجلس العسكري مع إن كل الشواهد تخلي الفار يلعب في العب؟

طيب على الأقل المجلس يقلنا إيه إلي بيحصل!! طيب ليه مش عايز يعين مجلس مدني؟

ربنا يستر، لأني حاسس إن في ثورة حتحصل على الثورة، وحتكون وطنية برضوا، ويمكن أكتر من الأولى.

دول كانوا ملازم اول بس
يعنى لسه خريجين
\وصعب واحد خريخ يبقى عارف نظام الجيش لدرجة انه يطلع يطهره
الحكاية فيها ان

وربنا يستر الايام الجاية

وجهة نظرى
---------

لأأأأأأأأأه
كله الا التمبيلت يا معتز
دنا بحبه جدا و متخيلش مدونتى من غيره
هحس بغربة كدا
مفيش أى حلول تانية ؟!!!

طيب

بالنسبة لرآيك
انا شاكرة ليك جداااااا
بس يؤسفنى اقولك
اننا هنبقى قليليييين قوى الأيام الجاية و زى اليتامى كدا

انا كل ما الاقى حاجة ..
بحطها ف اللينكات
لعل وعسى .. تفرق
واللى بيقرى يعيد نظر

الناس خايفة يا معتز
عارف الست اللى خايفة لو اتطلقت
من جوزها المفترى هتروح فين ؟
دا احساسى لما بسمعهم يقولوا الجيش هيتفكك و دا خط دفاعنا الخ الخ

مش دا نفس الكلام اللى اتقال على مبارك والبلد هتتفكك وتضيع ؟

طب اهو شبه غار
ايه اللى حصل
اللى احنا فيه دا
سببه التباطىء المتواطىء
والحنية ع الحرامية والفاسدين

مش الثورة السبب
الجرح متنضفش
لأن الدكتور اللى استئمناه على روح المريضة .... معندوش ضمير
و تلميذ الدكتور القديم اللى كان عاوز يقتلها ...


عارف ؟

انا منتظرة اهل الضابط اللى انقتل
يظهروا للناس
وميتعرضوش للضغوط
ويبقوا زى اهل خالد سعيد
عشان الحقيقة تبان
والناس تعرف .. الحق فين

ربنا يستر

منحرمشى منك يا معتز
:)

الأزهرى
------

الرتبة الأقل لا تنمع ان عنده عنين و ودان بيسمع بيها كل حاجة

والرتبة الأقل بتخليه يرى القهر ويشوف الفارق الرهيب بين الطبقات ف الجيش

حتى لو الحكاية فيها ان يا زيزو

هل يبرر ذلك الدموية الحاصلة دى ؟!!
طب على رأى الاخت نوارة ..
لما الجيش عنده اخبارية من قبلها
وهيا ماشاء الله بلغت عنهم ..
معملوش حاجة حقنا للدماء وترويع الآمنين ليه ؟!!!
القصة دى فيها الف ان
اولهم
قمع حركة الغليان اللى على آخره
ارعاب الناس من فكرة الإعتصام
التعلق ف ديل جلابية المجلس والنبى ما تمشى .. وعلى مهلك نفذ المطالب
تشويه الثورة ف عيون الشعب
تمرير حاجات كتير هتحصل وتشوفها الأيام الجاية محدش قبل يوم الجمعة كان هيقبلها ويمنطقها ...

والأيام بيننا يا زيزو

وربنا يستر ف كل الأحوال

الاخ الغير معرف
-------------

انا مين عشان يبقالى تأثير ؟

دنا قلة مندسة يا بنى

متشغلش بالك بيا كدا
وتحطنى ف دماغك

ميرسى ع وصفك الرقيق


ولو مش عاجبك كلامى
شوفلك مدونة تانية اتسلى فيها
البلوجر يحتوى على مئات الآلآف من المدونات .. مجتش عليا

ومتجيش تانى

Try ONE of these:

1- Go to dashboard, click settings - Site Feed - then scrolled down to "Post Feed Redirect URL". and remove any URL written there.

2- Go to your dashboard. Under "reading list" click on Add. Then type in the URL to your own blog: http://ro7albmama.blogspot.com

خلي بالك كمان، البوستات بتاعتك مؤخراً طويلة جداً، في بعض ال-feeds بتاخد حجم فايل ٥١٢ كيلو بس، ممكن أي بوست يعدي الحجم دا بالصور والألوان .... جربي صغري حجم البوست للنص.

أساساً إنت عاملالي البلوج بتاعك السيرك القومي؟؟ مليون صورة يمين ولينكات و وإشي فيروز وإشي سعاد حسني .... إيه يا ستي فاكرة نفسك ١٠٠ سنة سينما؟؟؟ :)

حاولي تقللي شوية علشان التحميل عندك و عند الزائرين يبقى سريع.

وجهة نظرى
----------

انا عملت كل اللى قولت عليه يا معتز
انا حتى قسمت البوست لنصين
عشان الينكات ومفيش فايدة

اما اشوف حكاية تغيير التمبيلت دى
ولو انى عارفة حظى
وممكن مينفعش
اصلها قرف يا بنى
انا محظوظظظظة
انا لسه هقولك على اختك

عموما
انا شاكرة ليك بشدة وعنف
حتى تستغيث على كل الإقتراحات دى
وربنا يهدى البلوجر
او يحل عنى بغتاته دى

ميرسى جدا

:)

إرسال تعليق