.

.

لعـــل وعـســـى ...  

Posted by: فاتيما in



سؤال و يطرح نفسه بشدة 
هوه انا ليه 
مش عارفة ابقى زى الاول  ؟
نشيطة
مهتمة بالآخرين 
متواجدة
و عندى نِفِس لأى حاجة ؟؟!!


معرفش بجد مالى و فيه إيه
و كل ما أنوى اكتب صباحات 
يحصل حاجة و تمنعنى و تقفل يومى
قفلة كحلى ف أسود


اخويا طلع عنده جلطة ف المخ
بس بسيطة و لحقناها و الحمدلله 


بسكوتة مش عارفة اسمع صوتها 
بس ان شاء الله تكون بخير 
و دعواتكم ليها 


البقاء لله يا كركبة دماغ 
و مقصرة معاكى قوى .. معلش 


 اسفة لكل اللى بيعلق 
ومبردش عليه أو مبعلقش عنده
انا بقيت وحشة قوى 


بؤجة الخير الصيفية تفاصيلها هنا
هحاول آجى بس ف كل الاحوال 
ربنا يوفقكم يا اهل الخير 
و ان شاء الله .. اليوم يبقى ناجح


انا مرهقة
جسدياً و معنوياً



على جنب 
انا مفتقداك
يا خالد يا شهامة و جدعنة الدنيا 


الثورة هتبقى بخـــير 
و جايز دا إحساس شخصى مبنى 
على خزعبلاتى الشخصية .. يمكن 
بس هذه الثـــورة معجـــزة ربانية فعـلا
فوق البشر الساكنى هذا البلد
بكل شرهم وخيرهم

  
انا ضهرى مش مكشوف 
وعندى قلوب دافيه كتير بتحمينى
و صحيح شايلاهم لوقت عوزة
بس النعمة الحقيقية إنى 
مش منتظرة العوزة تحصل .. عشان اعرف
ربنا ما يحرمنى منكم 



يوسف وحشنى قوى 



انا أسفة لأنى خذلت ناس طيبة 
توسمت فيا أى خير يرجى 



انا كويسة 

والصــــباحــــات 
من هنا و رايح هتكون 
وأهى محاولة بزق بيها روحى للعودة 
أتمنى و عساها أن تدوم


صباحكم ومساكم دايما 
و بإذن الله .. زى الفـــل

This entry was posted on الاثنين, مايو 09, 2011 and is filed under . You can leave a response and follow any responses to this entry through the .

35 كــــلام بيطــبطـــب عـــلى قــــلبى و روحــــى

الف سلامة على اخوك وان شاء الله يشفيه
وبرضه كله خير

ويوسف لازم يوحشك ده واحش بلوجر كله
ربنا يهون وتبقى فيه حاجة حلوة من ناحيته قريب

وانت ان شاء الله تبقى كويسة قوى مش كويسة وبس

عادى ياطمطم
خدى وقتك بس ماتطوليش

ذوقك ماشاء الله حلو قوى ياطمطم فى اختيار تصميم المدونة الجديدة ولمساتك جواها فى منتهى الرقة
تصدقى بالاضافةلحبى لصباحاتك بس كان بيصعب عليا انها تتمسح علشان صباحات غيرها
تسلم الايادى ياقمر
لو رايحة البؤجة عرفينى لو سمحتى ..ممكن ؟
ربنا يفرح قلبك دايما ياطمطم

ألف سلامة على أخوكى يا فاتيما
ربنا يطمنكم عليه يارب

ويطمنا على بسكوته وتكون فى حال افضل وربنا يصبرها يارب

ربنا يقدركم على فعل الخير
كان نفسى اشوفكم بس مع الاسف مش هقدر عشان الامتحانات

جزاكم الله كل الخير

كفايه طلتك حتى ولو من بعيد يا ام يوسف بتنورى المكان
شخصيه زيك لها كل التقدير والاحترام

ربنا يصلح لك حالك وحالنا وحال الجميع

وتشوفى يوسف على خير يارب

سلام يا اجمل فاتيما

فاتيما
روح القلب الملائكية


الدنيا من غير الربيع ميتة
ورقة شجر ضعفانة و مفتتة
لا يا جدع تأمل و شوف
زهر الشتا طالع فى عز الشتا
عجبى ؟؟؟

زهر الشتا طالع فى عز الشتا
ربنا يجعل فصولك كلها زهر و عطر و رياحين

حمد الله على سلامة اخوكى و ربنا يقومه بالسلامة و يخليه ليكى يارب
فى وسط ظلام الليل يا فاتيما ممكن نبحث عن النجوم ان لم نجدها حتما سنجد قمر ان اختفى القمر فمن المؤكد ان الفجر اتى و لابد ان تشرق الشمس
تحياتى و سلميلى على يوسف

سلامتك فاطمة من كل ارهاق نفسي او جسماني

افتقدك يا شقيقة الروح واتمنى ان تكوني بخير دائما

محبتي
هدى

فاتيما مامت يوسف

مبروك ع المدونة الجديدة

هى حالة مستشريه فى بلوجر كله

علشان الأحوال المتلخبطة بس

ألف سلامة لأخوكى و يقوم بالسلامة أن شاء الله

و ربنا مع بسكوتة و يقف معها فى محنتها

و ربنا يرحم جدة كركبة دماغ

لا تتأسفى يا فاتيما

كل الناس اللى بتحب بعض بتقدر ظروف بعض

ربنا معاكى و تطمنى على يوسف و تشوفيه قريب يا رب

واهنا اقول هي بطلت تزورني ليه طلع عندك كوبيتة
بصي يا فاتيما زي ما بنمر بمراحل زهق بنمر بمراحل فرح وان شاء الله الفرح يدق بابك قريب بايد يوسف

اتمنى ليك كل السعاده
سيد سعد

الف سلامه يا قمر على اخوكى ، وان شاء الله الاحوال عندك تتحسن ، الجو كله لا يشجع على العمل ، دا عادى فى الظروف الحاليه

تصدقى لما بروح اقرا اول تدوينات لى اقول بردو لنفسى انا ازاى كنت كده ..انا عايزة ارجع زى الاول

الف سلامة على اخوكى .. بس لازم ياخد باله و يتابع على طول فى الكشف على الضغط و السكر وكده

بسكوتة ربنا معها و يعينها

البؤجة انا كنت حاسة قبل ما اكتب التعليق اللى فات انك هتعتذرى بس كنت باعند مع نفسى و اقول احتمال

عارفة عقد اللولى اللى من كتر حلاوته ينحسد و ينفرط .. حاسة ان المدونين بقوا كده :(

الف سلامة على سلامة اخوك ، ربنا يقومه بالسلامة ان شاء الله .. ربنا يشفيه ويخليه ..
وربنا يجمعك بيوسف على خير ..

ولا يهمك ساعات كثيرة الانسان بيكون مشغول وساعات بيكون مالوش نفس يتكلم او حتى يعلق ..

انا سعيدة بمروري وترك بصمة ولو صغيرة .
دمت بخير انت وأحبائك ..

:)


كلنا هذه التيما ... واكتر شويتين :)

بس انتي اللي حساسه بزياده وحاسه انك مقصره .... ده انتي اصلا كده كتر خيرك بصراحه ..

وكل الناس اللي بتحبك دي بتحبك علشان انتي ماينفعش غير انك تتحبي :)

ربنا معاكي يا رب ومع كل اللي بتحبيهم :)

الف سلامه لاخوكي ... وسليمه ان شاء الله

كانت وحشانى صباحاتك يا فاتيما جداااا
هروح اشوفها حالا اهو .. :)

اخوكى .. ربنا يشفيه شفاءا لا يغادر سقما ويعافيه يارب
ان شاء الله يكون بخير وربنا يطمنكوا عليه .. وحمدلله على سلامته

يوسف .. وحشنا احنا كمان أوى , ربنا يحميه :)

بسكوتة .. ربنا يعدى الايام الصعبة دى على خير ويصبرها ويقويها يارب

فاتيما .. الصعب بيهون لما ربنا بيريد .. ربنا معاكى :))

تنهيدة عميقةةةةةةةةةةةةةةةةةةةةةةةةة
يا ام يوسف ...
.........
ربنا يطمنك عليه ويطمنا على مصر
يارب
.........
ويطمنك على اخوكى ويقومه بسلامة يارب انشاء الله (جنزبيل + وقرفة )
.........
وكالعادة متنشريش التعليق لو سمحتى

........
مبروك على صباحاتى معرفش هى قديمة ولا جديدة بامانه لكنها مش عندى على الريدر اللى عندى فى المدونة
.......

هترجعى لنفسك يابطه قبل ما ترجعى لاى حد فينا
عارفه ليه ؟
لان هى كده لما تضيق قوووى تُفرج قوووى
الف سلامه على اخوكى يابطه ابقى طمنينى عليه والنبى

وحشنى كلامك
بحبك

حفيدة عرابى
-----------

ازيك يا فيدووو

ميرسى على كل اللى انكتب
وغالبا مش جاية البؤجة يا حبيبتى
ومعلش بقى
:)
البركة فيكو
وف وش الخير داليا
وشهامة وجدعنة الدنيا خالد
والبت خوخة
ان شاء الله

مبسوطة ان الصباحات عجبتك
انا لاحظت انها فارقة مع ناس حلوة كتير بتدخل هنا
فقولت مبدهاش بقى ..نحطها ف مدونة
وأهى تقعد كأرشيف لأى حد محتاج لمقالة او خبر ...
انا هحاول اشوفها طريقة أرشيفية كويسة تساعد ...
ربنا يسهل
اروق بس
:)

بوسات وحضونات يا فدافيدوووو
و يا حبيبة قلب طمطم

الحـــب الجمـــيل
---------------

منحرمشى منك يا إيمان
ميرسى يا حبيبتى ع الدعوات
كل حد ف التدوينة دى محتاجلها فعلاً

منحرمشى منك ابدااااا
والقلب دا عشانك
مخصوص

ابراهيم رزق
-----------

ازيك يا ابو العيال
يا رافع معنوياتى اينما أنخفضت بروح التفاؤل اللى عندك دى ...
:)

انتا م الناس اللى احسبهم ف ضهرى يا ابراهيم
بجد
معرفكش غير من مدة قليلة
لكن عارفة ان وقت الجد
انتا ساندنى

سلامى للعيال وام العيال
وأبوهم

:)

rainbow
--------


ياااااااااه يا هدى !!!

الف مليون حمدلله ع السلامة يا حبيبتى
العود احمد و اجمل والطف وكل حاجة ملونة وحلوة ...

حمدلله على سلامتك يا حبيبتى
ونورتى البلوجر تانى

انا فرحانة قوى برجوعك دا
وفرحانة بإن المدونة تانى انفتحت
عساها اخر مرة تغيبى علينا كدا

:)

انا بخير يا هدهودة
وكلها شوية ابقى تمام
يبدو انها حالة عامة فعلا
اكتئاب صيفى ولاّ ايه متعرفيش

كونى انتى بكل الخير يا سيدة الالوان

فاكرة اللقب دا ؟؟

Ramy
----



طب اقولك ايه يا ر ر ؟؟!!!

بجد
انا مش عارفة اقولك ايه ؟
انا ساعات وانا بكتبلك رد على تعليقاتك بحس انى عاوزة اسكت لأنك هتسمعنى بقلبك وتفهمنى وتقدر وتقولى ف الآخر معلش
انا فاهم ..وعارف

ربنا يخليك لأختك فاتيما يا رامى

وخلى بالك من نفسك

MKSARAT - SAYED SAAD
--------------------

وأى كوبيتة يا سيد

دا كوبيتة ما يعلم بيها الا ربنا

أنا كويسة اهو
وعارفة انها شوية وتعدى
بس بزق ف نفسى كدا عشان مقفش ف مطرحى

بس بينى وبينك
انا عاوزة اقف مطرحى
تعبت فجأة
وحل عليا كل اللى فات
وخلانى عاوزة هدنة ..
وعلى رأى الجميل على سلامة

معرفش ليه تنحت للدنيا كدا ؟!!!

منحرمشى من دعواتك يا أبو زينة

وسلامنا لمامتها
ولسيد المكسرات الغالى
الذى هو أنتا
:)

أعقل مجنونة
----------

يبدو ذلك يا جنونة
يبدو انها حالة عامة جايبة كآبة للبلد كلها مع اننا لسه ف عز سخونة الاحداث

معرفش فيه ايه ؟!!!

بس ربنا يسهل

نورتينى

قوس قزح
-------

بلاش التكشيرة دى يا دوللى

انا بعتلك ميل بشرح فيها ملابسات الموقف
ومش عاوزاكى تزعلى منى

انا نفسى مش عارفة مالى كدا
وان شاء الله كل حاجة هتبقى تمام

وبالنسبة لعقد اللولى اللى إنحسد وانفرط
فأظن اننا زى أى حاجة ..ف الدنيا
منحنيات و صعود وهبوط
ودلوقتى احنا ف مرحلة مش لطيفة واحسبها هتتغير ...اتمنى ذلك يعنى

بس متفقة معاكى جدااااا
وساعات كتير ارجع لتدويناتى القديمة اقراها واقرى التعليقات اللى عندى أهم م البوست والله
فإكتشف ان فيها ناس حلوة قوى مشيت
وناس حلوة لسه موجودة
وناس طلعت فشنك
وناس طلعت اغلى م الماس
والحاجة الأكيدة اللى بخرج بيها كل مرة من الحالة دى
اننا الحمدللله
لسه متواجدين ف حياة بعض
ومبعدناش ...رغم أى ظروف

دا اهم

الكيف وليس الكم

يمكن زمان كنا اقرب بشكل مكثف
لكن دلوقتى ..الوضع اتغير
بس مبعدناش برضو

انا وانا بكتبلك الأيميل مثلاً
حسيت انى بكتبه و انا لسه شيفاكى امبارح ...
حبل المودة بينى وبينك منقطعشى ولا الثقة ...
ودا اهم شىء عندى
معرفش حد يوافقنى ولا يستغربنى

بس المحبة ملهاش دعوة بالتواجد المكانى
قوى قدر ما ليها دعوة .. باللى ربنا حاطه ف القلب

القلوب هيا الاماكن الحقيقية


انا بخطرف دلوقتى على فكرة

طب كفاية كدا

:)

وجع البنفسج
-----------

انتى نورتى يا بنفسجة
والمدونة بيتك ومطرحك
واهلا بيكى ف أى وقت

ميرسى جدا على دعواتك الطيبة

:)

فتاة من الصعيد
--------------

آه يا فاتى ... على جمالك
وجمال قلبك
وجمال تعليقك
وجمال دعواتك

وكفاية جمال لأفكرك باللى ما يتسمى وقاعد ف طرة دلوقتى ...

:)


منحرمشى منك يا حبيبتى

Silver Eyes
-----------

ميرسى يا سيلفر

ازيك الاول ؟؟

وحشتينى قوى على فكرة

وشكرا يا حبيبتى على كل اللى كتبتيه
وربنا يسمع منك

وكويس ان الصباحات دى حد هيعبرها اهو والمدونة مش هتنش

:)

ألف سلامه على أخوكي يا تيما ربنا يشفيه ويعافيه

وربنا يصبر بسكوته على مصيبة الموت

صباحاتك وتخاريفك وكل كلامك بديع ياتيما
يارب تكوني دايما في أحسن حال

ويرجع لك يوسفي عن قريب

غير معرف
-------

انتامكتبتش تعليقك بحسابك
وبالتالى ..
لقيته يصلح للنشر

ويا ريت اعرف انتا مين
لو ميضيقاكش


بس شكرا على كل اللى فيه

والصباحات دى كنت بكتبهتا زمان واحطها ف الشريط الجانبى وتتمسح يوم ورا يوم ويتكتب غيرها
فقولت اخليها ف مدونة لوحدها افضل

وشكراعلى ذوقك
ونورت يا غير معرف

:)

فاتيما يا ام قلب ابيض
الف سلامة على اخوكي و ربنا يطمنك على يوسف
الحالة دي طبيعية و ساعات كتير تلاقي نفسك مالكيش نفس لحاجة بس اوعي تخليها تطول و ان شاء الله كله خير
:)

دي اسمها استراحة مُحارب .. حاربتي كتير وكافحتي كتير في الشهور الللي فاتت .. وده بيكون مُجرد ارهاق نفسي على بدني وكده

شوية بعد الراحة هترجعي لنشاطك السابق من تاني ما تقلقيش

ربنا ينور الدنيا فى وشك يا رب اغيب ارجع اتلاقى النشاط اتبخر كده
لا انشالله تكونى زى الاول واحسن وربنا يطمنك على يوسف اللهم امين كونى بخير

حبيبه قلبي


وحشاني كييييييييييييير جدا
ونفسي اشوفك يومها



البقاء لله يا كركبة دماغ
وربنا يشفي كل مريض

بجد منتظراكي

سلامي ليكي

ألف سلامة لأخوكي يا أم يوسف
و ربنا يكرمك و يقرب البعيد و يسعد قلبك
و حأحاول أتابع الصباحات هناك
:)
شدة و تعدي إن شاء الله

الف سلامه على اخوكى
وبعيد الشر على الجميع
وربنا يتم شفاه على خير يا رب

الف مليون سلامه على اخوكى
وبعيد الشر على الجميع
ويتم شفاه على خير يا رب

كل سنة و انت طيبة

يا فاتيما (:

يا مامت يوسف

http://paabe.blogspot.com/2011/05/blog-post_2444.html

اولا الف سلامه على اخوكي يا حبيبتى وربنا يجيبها سليمه ان شاء الله ويطمنك عليه
ثانيا انتى حلوه وعاجبانا كده انتى زعلانه ليه

وثالثا كل سنه وانتى طيبه يا قمر وان شاء الله سنه سعيده عليكى وعقبال ميت سنه سعاده وهنا يارب

إرسال تعليق