.

.

يا لـلــى نـــازل ... نـــازل ليـــه !؟  

Posted by: فاتيما in

  من جريدة البديل



إبدأ منين 
و أقول إيه بس يا رب  ؟


الحال دا عاجبكم  ؟!!!
يعنى زكريا عزمى يصدرله قرار افراج 
عشان قاضى أفتى بإنه مش مرتشى 
و النبى فى قانون العقوبات بتاعه
وارد جداااا انه يقبل الهدية  
و مالك يا شعب موضايق و باصص 
للراجل بغّل كدا  قصوره وممتلكاته ؟!!





وسوزان يا دوووب فتحت البوك بتاعها 
اللى بتنزل بيه سوق روكسى تشترى خضار 
ورمت لنا كل الفكة اللى حداها
فالكسب غير "المسروع " ..قالها كفارة 
بس نسى يسألها 
انتى عندك 24 مليون منين  ؟!!!
وانتى لا موظفة ولا عندك عمل خاص 
و لاّ قولتيلنا انك مثلاً 
عملتى جمعية من مرتب الحاج ابو علاء 
مع بقية الشعب المصرى 
و قبضتى التمانين مليون نفر الأول
واحنا يا بشر سوّ ضميرنا ازرق 
و تهامناكى ظلم ...





اما المجلس العسكرى فبكل براءة الاطفال
بيعمل ندوات ويطلع ف البرامج والفيسبوك 
عشان يحاول يفهمنا انه مش فاهم 
الشعب المقرف دا .. عاوز ايه بالضبط
وكأنه - المجلس يعنى - جاى من ساحل العاج
وأول مرة يعيش وسطنا  من 30 سنة 
واللواء ممدوح شاهين بيقول 
ان نعم الإستفتاء ع التعديلات 
كانت كمان نعم على المجلس العسكرى 
واما نعييييييمة ... نعمين
وقولنا نعم على كام مادة فتكاثروا ذاتيا 
بقدرة قادر وبقوا 63 مادة





الناس رجعت توقف تانى طوابير 
على انابيب الغاز
و واحد انقتل و الخناقات بالعشرات
وكل شوية يقولولنا بكرة مش هتلاقوا عيش 
و هنطفحكم منين ؟!!!






و جماعة الأخوان كل ما تجيلها فرصة 
تعمل الحاجة الصح وتنحاز لغالبية الشعب 
تهدرها بمنتهى الغباء الحيثى المستمر
من 80 سنة 
و ربنا بلاهم بصبحى صالح واشباهه
عشان الليلة تكمل وينفضحوا
وكالعادة لما تيجى مصلحتهم مع النزول 
يقولوا احنا فيها ...
ولما تتعارض مع مصلحتهم ..يقولوا مش لاعبين
ومش فاهمة انا .. انتخب الناس دى ليه
واسيبهم يعملولى دستور ليه 
وهما مرجعيتهم الجماعة وافكارها واهدافها 
مش مرجعيتهم مصر ومصلحتها وشعبها أولا ؟؟



و بعدين هيا الناس بترمى أساس
و تطلع بالعمارة فوقه
ولا بتبنى تانى دور و تالت دور
وبعدين تبنى الدور الأرضى ؟



بإختصاااااار و المفروض 
الدستور الاول



الأمن مفقود ومتخاذل ومتواطىء
بفعل فاعل  وصمت مطبق من الحكام
والداخلية كبار وصغار بيلاعبونا ملك وكتابة 
وبيخيرونا ما بين  الوجهين التاليين
يا نتبهدل منهم 
يا نتبهدل م البلطجية
وف كل الاحوال هما مرتبهم ماشى
و محاكمات زمايلهم بطيئة  والدنيا بيس 
و مفيش مشاكل



اما اسرائيل الست الكومل المؤدبة
لجل خاطر عيونها الدوبلى 
ينضرب المتظاهرين الويحشين بقنابل الغاز 
.. بس من الغالى
مش الغاز اللى بيروحلهم برخص التراب 
ويمكن التراب أغلى  ..



مرتضى منصور اللى ضد الثورة 
يطلع من تهمة معركة الجمل زى الشعرة 
و يشارك فى حوار يرسم مستقبلنا بعد الثورة
ولأ وبيدينا دروس ف الحوار المتحضر كمان 
وإكس هاذ نو إيندددددد



وزير مالية احمد شفيق بيشحت علينا 
وامريكا والسعودية بيرمولنا كام عضمة 
وحكومة شرف صورة طبق الأصل بالكربون 
من كل حكومات مبارك السابقة  
محتاسين حوسة الارملة على معاش جوزها
وكأنهم متبرمجين على نغمة واحدة 
اسمها مفيش ميزانية و نجيبلكوا منين 
 و طلباتكو كتير و مش وقته ..



اما العادلى و شركاه 
فكرامتهم فوق القانون و العدل و الحقوق
واهالى الضحايا مواطنين درجة سادسة
ولاليهم أى اعتبار 
و حتى الوحيد اللى اتحكم عليه حكم عادل 
هربان و مدخلش القفص أصلاااااا !!



وبموناسبة العدل بقى والمحاكمات
وموسم التأجيلات للجميييييع اللى شغال
وبموناسبة حيكيوة 
تحويل ابوعلاء للجنايات
هوه و العيال
سؤال بسيط بقى و يطرح نفسه... 



هوه الأجازة القضائية هتبتدى أمتى ؟


 عشان بس نعرف 
المسلسل دا 
هيبقى ألف حلقة ولا 999 حلقة بس 
عشان نلحق يعنى نحضر الفيشار و اللب ؟؟؟ 




مصابى الثورة المتبهدلين
و لا واخدين حقهم من العلاج 
وبيتعرضوا لتهديدات وضغوط من الجناة 
والمفقودين .... اللى لسه مفقودين
والمعتقلين مش كلهم خرجوا 
حد عارف حاجة  بخصوصهم
ولا هيتردلهم حقوقهم امتى ؟!!



والثوار والناس العادية اللى بيتحاكموا 
قصاد محاكم عسكرية
بينما مبارك العسكرى منصباً و انتماء 
بيتحاكم قصاد محاكم مدنية 
إيه ؟



عصام شرف اللى بصراحة 
لازم يغير وزير المواصلات بتاعنا دا فورا
عشان ميصحش رئيس الوزاراء
يعرف يلاقى صاروخ يوديه برا مصر
 ع السودان و السعودية .. بسهولة و يسر
بينما جوا مصر .. يا نضرى يقعد بالأيااااام 
على ما يلاقى مواصلة ...  لقنا 
أو لميدان التحرير حتى


آه .. الأخوة العرب ف السعودية والأمارات 
منظرنا بقى وحش قوى قصادهم 
و عاوزين يدفعوا حق قعدة ابو جمال 
ف المشتشفى 
و بيقولوا علينا اكلنا الراجل الكبرة الأمير
لحم و رميناه عضم 
و الثورة كدا هينقال عليها طلعت 
مش بنت أصول


  
و لاّ الشعب اللى على حسها 
بيطالب بمطالب فئوية ف وقت ميصحش 
و نظام انتوا مستنيين ميت سنة 
جرى ايه لما يبقوا 101 ؟ا
و لاّ الناس بتوع التحرير اللى بقا شكلهم غريب
يعنى هيطلعوها ثورة بيئة 
و مش بنت ناس كويسين



و مش بعيد شوية شوية
يقولوا عليها ماشية مشى بطال
مع عساكر الأنجليز والامريكان 
بناء على معلومات اللوا سويلم
ف حلقة آخر كلام امبارح .. مع يسرى فودة 



أو نهايتها يشككوا
انها مش بنت خالص 
فيبعتوها يتعملها كشف عذرية ميرى
و بعدين الشعب المصرى كله يتبرى منها 
و يسلمها لخالها يدبحها 
و آمنة تسأل بعد ما تفوق م الخضة :
فين الثورة ياماى 
فيرد اللى ماسكينها و يقولوا :
راحت ف الوبا



بصوا بقى 
فيه ميت ألف سبب 
واضح و خفى
و شخصى و عام 
لثورة الغضب التانية دى
ومن هتافات التحرير اللى كنت بسمعها 
انهم لما يلاقوا الناس صوتها واطى
ومش بيرج الميدان كدا يسألوهم
  

يلى ساكت ساكت ليه 
خدت حقك ولا إيه ؟؟؟

انا بقى ههتف هنا 
و اقولكم ...

يلى قاعد
  انا عارفة انك عارف 
قاعد ليه  

و مش مهم اعرف خلاص اسبابك 



لكن الاهم عندى


اللى نازل 
يبقى عارف نازل ليه ؟



لو مش عارف لحد دلوقتى 
او متحير ف سبب قوى
اختارلك أى سبب من دول 




إنزل لأنك خايف 
على بلدك



خايف عليها 
من الادعياء والمتسلقين
وراكبى موجة الثورة ليخسفوا بيها 
وانتا قاعد




إنزل لأنك خايف عليها
من التيارات المتشددة
و خايف من المتعصبين
مسلمين ومسيحيين يقسموها 
و يفتتوها .... ويفرقونا
وانتا قاعد



وخايف عليها 
من امن الدولة المتخفى 
و الحزب الوطنى المتسلل
ليرجع يكتم انفاسنا وانفاس ولادنا
وانتا قاعد



و خايف عليها من رجال مبارك و بطانته 
التى لم تسقط كل رموزها 
و ديولها بتتلوى عاوزة تسمم حياتنا 
و انتا قاعد 




إنزل لأنك خايف عليها
من تدخلات امريكا 
وإيران و الخلايجة وكل واحد عاوز يمشى 
سياسته عليك ويهيمن ويتحكم فيك 
وانتا قاعد


وإنزل لإنك خايف عليها 
ومصحصح لعدوك الرابض ع الحدود
ليغدر بينا فجأة وانتا قاعد 


 و لأنك خايف على اخواتك ف فلسطين 
واليمن وسوريا و ليبيا و كل شبر عربى
مسئول منك و واخدك قدوة وبيقلدك
فى كل خطواتك وحركاتك و حتى
 وانتا قاعد



إنزل لأنك خايف من حكم العسكر
اللى هما جزء من نظام مبارك القديم 
وخايف ليسلموها لمبارك جديد
وانتا قاعد 



إنزل لأنك خايف من بكرة منتاش 
محاوط عليه ومشارك فيه 
وخايف ع المولودة الصغننة
اللى اتولدت  على إيديك
وبقت نور عينيك و فرحة عمرك 
واللى جت بمعجزة من رب العالمين 
و شهدائنا اللى ماتوا 
وهما بيدافعوا عنها وعنك 
وسابوها أمانة ف إيديك
و بيطالبوك ضمنياً بحمايتها 
وبإنك متسمحش بتعرضها للخطر 
طول ما انتا فيك نفس و عايش




عشان دا كله 
لازم تنزل
وانتا عارف نازل ليه



اللى ناوى و قادر يعتصم ..
و اللى ناوى يحضر 
وبعدين .. يروّح
معادنا كلنا الجمعة .. 27 مايو 
ف كل ميادين تحريرك يا مصر


 
و اللى قاعد ... طبعا هوه أكيد حـــر
بس نصيحة أخوية
و صدقونى ... لن تضـــر  


ثـــوروا ... تصحــــوا 


 
---------------------------------------


تحديث 
-----------------

هوه انا دايما كنت اسمع ان الفيسبوك
فيه من العلل و الأشكال الغريبة الكثييير 
بس نظراً لأنى مبدخلوش الا نادرا 
فمكنتش متخيلة بصراحة .. فداحة الموكف 
لحد ما دخلت النهاردة الصفحة دى 




وطبعا حاجات كتييييير
واقفة على طرف لسانى عاوزة تنقال
بعد ما دخلت و قريت الكلام والتعليقات 
بس للأسف مينفعش اتكلم براحتى


ليه ؟!!؟ 


1- لأن مدونتى نظيفة


2- لو سبت القريحة تجود 
صاحب الصفحة مش بعيد 
يطالب المجلس العسكرى بإعدامى
انا روخرا 
 
3- ومش مستبعد يطالب 
بإعدام اللى هيعلقوا ع البوست كمان
وانتوا غاليين عليا ..


آه .... مش بعيدة 
ماهو كل حد هنختلف معاه ف الرآى 
هنحرض عليه السلطات والحكام 
وهنطالب بخسفه من الحياة
محنا معانا صكوك الرحمة والعقاب 
وبإيدينا الحياة والموت نحكم بيهم 
على غيرنا .. و استغفر الله العظيم 
 


طب هيا بس ملحوظة  
سنتوفة كدا
عشان مشيلش ف نِفسى
وانام اقوم الاقى جرالى حاجة 


 يا ريت المرة الجاية طيب  واحنا بنطالب 
بالتحريض على أذى اخواننا ف البشرية
و نطالب بأعدامهم صد رد كدا 
لما نيجى نقولها  
نبقى 
بنكتبها بلغة عربية سليمة 
عشان ميبقاش شكلنا
ولا اللى كأنه لسه معداش تانية اعدادى
ف مدرسة حكومة و مفيهاش مدرسين 


يعنى مبدئياً كدا 
قل تخطيط ... و لا تقل .. تخطيت
و قل حرب ... و لا تقل جرب 

 عيب لغتنا العربية قاعدة 
بتولول دلوقت على ما آل اليه حالها 

وبعدين ايه الفن التكعيبى التجريدى 
السيريالى اللى سهم نازل 
و سهم طالع فيه دا ؟!!
شغل القص واللزق دا شكله 
مش اللى هوه يعنى !!
ولا يتناسب كمان مع طبيعة الطلب الخطير 
اللى مطلوب تنفيذه 
يعنى بما انك بتطالب بإعدام شخص  ما
ونفيه من الحياة  بأسرها
فأعملها بشياكة حتى و بترتيب
وحسسنا انك تعبت شوية وانتا بتطلب 
.. مش متسربع و متلهوج
و أنظر الشكل صفحة سبعتاشر 
و زى ما يكون حد واقف فوق دماغك 
و قالك تعمل كدا ..شمال يمين 
فوق تحت .. انا تهت الصراحة
وعينى زغللت


كدا مينفعش

يا جماعة التحريض له أصوله
وعاوز تموت الراجل .. أحبك الحكاية 
عشان تقنعنا ... لأ بجد 
لازم تسبكها أكتر من كدا 
حتى عشان نصدق انك بتتكلم جد
و واخدنا جد و اللى بتكلمهم ياخدوك جد


و معلش يعنى 
دا لو المجلس العسكرى استمع لندائك 
واستجاب ...يبقى اسمحلى 
دحنا مش بس نبقى ف كارثة  
لأ دحنا كدا نبقى رجعنا الجاهلية 
وما قبلها كمان 
والبلد دى الواحد يهاجر منها 
ولا يقعدش مع ناس يا تخوّنك يا تعدمك 
ولا حل وسط بينهما !!


يا صاحب هذه الصفحة 
لو انت تدرك فداحة ما تفعله .. فتلك مصيبة 
ولو انت لا تدرك .. فالمصيبة أعظم 


الثورة دى قامت عشان الكرامة و الحرية 
و العدالة الإجتماعية


طب الكرامة والعدالة ...مش هشرحهم
وهقولك بس ان الحرية معناها
ان تعلن رآيك 
وأعلن رآيى .. ونختلف  سوياً للصبح
وترد عليا وأرد عليك
وتقنعنى أو أقنعك 
و بس .... 
و نقطة (.) عند آخر السطر 


وانتهى 


الفكر لا يحارب الا بالفكر 
والرأى لا يواجه الا بالرآى 
مش بالتحريض و المحاكمات والأعدام 



اتق الله
يا من تذكر نبى الله ف كلامك 
وتستحلف الناس بيه كى ينشروا تحريضك 
على نطاق اوسع 
اقولك ايه بس ؟!!

أقولك ؟

ولا حاجة 
انا قولت اللى ف نفسى خلاص



وأخيرا عشان مليش ف عالم الفيس بوك 
ولا أفهمشى فيه 
فيا ريت حد ابن حلال متخصص 
يجاوبنى ع السؤال الآتى 
   
ماهى  العلاقة بين صفحة "النبى " دى 
و محتوى تدوينة أحمـــد ؟؟؟



وسؤال تانى 
إيه بصحيح  حكاية الـ 20 مليون
اللى وقعوا للمجلس 
و بصموا دول 
احنا انضحك علينا  يا جماعة ولا ايه
والأستفتاء دا بصّمونا فيه على بياض
و هيطلع تصريح اللوا شاهين بجد
 يكونوش حطولنا مخدر
ف الحبر الفسفورى  ؟!!!
 ايه ؟
إييييييه النوظااااااااام
انا كدا قلقت ؟!!!

-------------------------------------

This entry was posted on الخميس, مايو 26, 2011 and is filed under . You can leave a response and follow any responses to this entry through the .

16 كــــلام بيطــبطـــب عـــلى قــــلبى و روحــــى

أن شاء الله لو فى القاهرة

هكون فى الميدان قولى يا رب


البوست دة عاوز دى
http://www.youtube.com/watch?v=k1oyEHEEVFo&feature=related

دايما بتحسسينى ان فيه امل و بتبهرينى...ياريت فيه منك الف بس كان حالنا بقى غير الحال

الاخوان باعوا الثورة اللى اصلا كانوا رافضين يشاركوا فيها يوم 25 و دلوقتى بيحرضوا المجلس على الشعب...مايهمهمش حق الشهداء و لا مصر المهم مصالحهم

ربنا معانا وعارف احنا عايزين الخير للبلد دي

أنا مش نازل

أنا طالع

وهناك فرق

مش شايف التحديث من التعب

بعدين بئا أن شاء الله

اللي غايظني موضوع ان اللي نازل يبقا ملحد وشيوعي
:)))

بجد بيهرجوا

أنا متفق مع حضرتك تماماً في اللي ذكرتيه لكن في نقطة وحيدة يجب توضيحها بخصوص التيارات الاسلامية كالإخوان وهي اننا عندما نقوم بتقييم اتجاه فكري لايمكن تقييمه من موقف واحد أو حتى عدة مواقف لأن ببساطة أي موقف سلبي يمكن الرد عليه بمواقف ايجابية من ذات النوع ولكن نقيم الاتجاه تقييم كلي حتى نقف على حقيقة الاتجاه بعيداً عن موقف معين أو اشخاص معينين لذلك فاتجاه كالاتجاه السلفي وهو اتجاه غير ناضج سياسياً يمكن الحكم عليه بما صدر منه حديثاً لأنه لايوجد مخزون تاريخي لتقييمه لكن في حالة الاخوان الوضع يختلف , وأنا وإن كنت اختلف مع الاخوان سياسياً لكن اتفق معهم في المرجعية الدينية التي تحمل داخلها التقويم الذاتي المطلوب
شكراً وتحياتي

Ramy
----

يا رب يا رامى

انتا عموما عارف مكانى
وببقى فين ..

:)

حلوة الغنوة
وبحب منير
بس حاسة ان سيد درويش
هوه اللى كلامه ماشى قوى ع الحالة
ومحدش بقى يلوم علينا
أهو دا اللى صار


كل الود ليك
يا ر ر

ويا رب تكون بخير دايما

Tears
-----

بلاش الكلام الكبير دا يا توتا
انا بتخض

:)

انا مقولتش حاجة يا حبيبتى غير اللى شيفاه وحساه وبس

وربنا فوق الكل

فوق المغرضين
والإنتهازيين
والفاسدين
والمتآمرين
والمتغابين
والأغبياء خلقة
و فوق كل شر بيحوم فوق روؤسنا
ان شاء الله وهينجلى برحمة ربنا
وتكاتفنا
ونزولنا لنصرة الحق

تعرفى ؟

انا حاسة ان بكرة خير قوى
وحاسة كمان
ان ربنا هياخد بيدنا
ويد كل حد عاوز خير للبلد دى
ومستعد يعمل كل حاجة
وأى حاجة
وكمان هياخد بيد الولاد الحلوة اللى نزلت الميدان يوم 8 ابريل و اتحكم عليهم بعشر سنين لأنهم ارجل ضباط ف جيشك يا مصر ....

ان شاء الله خير

دعواتك

:)

وعلى فكرة
الأنبهار ... متبادل
:)))

فتاة من الصعيد
---------------

يعجبنى الناس الحلوة المتفائلة دى
:)))

ربنا يسمع منك يا فاتى
وبكرة يكون خير
قلبى بيقولى كدا
احساس الخوف والترقب بتاع الأيام الاولى للثورة ... مالى الجو
معرفش دا احساسى لوحدى ولاّ غير كمان حاسس بكدا ؟!!

كل ما الوقت يقرب ..اتفائل وقلبى ينشرح ويدخله اكسجين اكتر ..

خير خير

بوسات وحضونات بقى بالمناسبة دى
:)))

مصرى جدا
--------

طاه ياخويا
إتريقأ إتريقأ
وبعدين بترجع تتهور وتتعور وتمشى بالورب
وانقهر عليك أنا ..

عاجبنى البوستات الأخيرة
واصلا عمالة افكر ف لافتة بكرة
محتارة اكتب ايه ولا إيه
دحنا عندنا ميت الف طلب
ربنا يسهل

اشوفك على الف خير
وخلى بالك من نفسك يا هانى

مش عشانك

لأ دا عشانى

اومال مين اللى هييجى يطلعنى م القسم ؟!!!

شمس النهار
---------

ازيك يا شموسة الشموسات
وحشتينى يا قمرررر

متتغاظيش ولا حاجة
دى طريقتهم الفكسانة من زمان
وعلى فكرة
الخطاب دا مش موجه لينا احنا
دا موجه للطبقات البسيطة اللى بتمشى وراهم وموجه كمان للمغسولة أدمغتهم وتابعين ليهم ...
التقسيمة دى عشان يخلوا أى واحد دماغه تزقزق انه ينزل يبقى فاهم انه هينزل وسط شوية كفرة ملحدين زنادقة و هيلوث نفسه بأفكارهم ويتحسب عليهم ...
وآل يعنى لو كان دا صحيح ...لويعنى
مهم لما قعدوا ف الميدان بعد 25 يناير كانوا بيسألوا اللى مرابطين معاهم ف كل حتة انتوا ايه ؟!!

كانوا عارفين وساكتين
عشان الهدف كان واحد

لكن دلوقتى
هما اهدافهم اختلفت
و متصورين انهم هياخدوها بطرق اخرى
فليه يرجعوا يتفقوا مع الغالبية
للأسف
العنصرية منهجهم ..مهما انكروا

ووالله انا مبسوطة جداااااااااااا
انهم مش نازلين
لأن المرة الوحدية اللى اتخانقت فيها ف مظاهرة وعليت صوتى كانت معاهم ...
وكتبت عنها ف بوست

يلا خلى الميدان رايق
و كله بيتحسب عليهم ويكشفهم ...

ربنا مع مصر

بوسات وحضونات قد كدااااااااا
وسلام خاص ..لفناننا الجميل رومانى

تامر على
--------

اولا أهلا بيك
وروح قلب ماما نورت بمجييك

:)

بص حضرتك انا لا اقيم الجماعة من موقف شخص واحد ..
دا بالصدفة البحتة بس الاخ صبحى صالح كان نموذجا صارخاً اليومين اللى فاتوا
لكن مش هوه لوحده ...مثله كثيرون
وفيه ف شيوخ وكبار الاخوان ناس محترمة كتير ..زى محمد حبيب الراجل دا محترم قوى و متوازن ..اظن ذلك يعنى

لكن حكمى على أداء الجماعة نابع من مواقف كتير
الناس دى بتكرر اخطاء سنين طويلة ولا فائدة ترجى منهم ...
اللهم شبابهم
وحتى شبابهم ... مقيد بقواعد زى الطاعة والولاء وحاجات عجيبة كدا بتثير غضبى وضيقى خصوصا لما ننزل لساحة السياسة ويبقى هذا الفكر هو المنوط بيها تسيير شئون بلدى الأربع سنين الجايين ع الأقل لحد باقى الاحزاب ما تشد حيلها ...
دا غير كارثة الدستور اللى هيبقى تحت رحمتهم ..واختيارهم للجنة تأسيسه
وربنا يسترررررر

علاء الاسوانى وصف الاخوان بجملة بديعة
اظنها خلاص كل شىء
ودايما اكررها فى حديثى مع أى حد ف الميدان عن الاخوان ...

علاء الأسوانى قال الاخوان لديهم صلابة اخلاقية ولديهم ف المقابل ليونة سياسية ....

وهى دى خلاصة الموقف فى كل مرة

الناس دى اخلاقياتهم لا غبار عليها
لكن مواقفهم السياسية .. زفت
وفيها انانية و شق للصف وموائمات وضعف وتخاذل وميت الف حاجة كدا ...

انا لا أثق فيهم
معرفش انتخب حد منهم وانا متأكدة انه هينفذلى مطالبى ...مش المطالب اللى توافق اراء الجماعة واللى متوفقهاش .. لأ

مصلحة مصر يجب ان تكون فوق مصلحة الجماعة
ووقت ما احس انهم بيعملوا كدا فعلاً

هغير حكمى عليهم

تحياتى ليك ونورتنى

فاتيما
روح القلب الملائكية

قريت البوست و مقدرتش اعلق نفسى مسدودة عن اى حاجة

بس قريت التحديث حبيت اضحك بس معرفتش

كم بكى يا مصر من مضحكات و لكنه ضحك كالبكاء

تحياتى و سلامى الى جو يا ام يوسف

إنزل عشان تفتح عنيك و تشوف سما
وتشوف سحابة أبيض في لبني مقلّمه
وتشوف شعاع بيفوت في حتّه معتّمه
يكسيها بالنور و العبير
نور مش وضيع مليان ضمير
يفرد عليها خير كتير
ويشيل حاجات كانت علينا مُبهَمه
إنزل عشان تفتح عنيك و تشوف سما
KING TOOOT

فكريني لما أنزل مصر المرة الجاية أشرحلك إنتي والأصدقاء كام حاجة كده في الإقتصاد عشان بس تعذري عصام شرف في موضوع معاش الأرملة ده :-)

فاتيما مامت يوسف الغالية

أبقى طمنينا عليكى

بما انى منزلتش ):

إرسال تعليق