.

.

يا ديـــل الكلــــب عـــاوزلك كام قالــــب ؟!!  

Posted by: فاتيما in



تحديث 

يا جماعة العالم الحلوة الطيبة 
اللى جاية المصل واللقاح بكرة 
 التبرع  .. ف معاده 
ومن تسعة الصبح  ان شاء ربنا 
.. هكون ف انتظاركم 
لكن بعد ما نخلص هستندل معاكم 
واسيبكم و اجرى و اروح التحرير 
عشان اخد بحس البشر هناك ...
فبعتذر .. لأنى مش هكمل اليوم ..
بس اللى عاوز ييجى معايا و يونسنى
طبعا اهلا بيه جداااا ... و يشرفنى 
اشوفكم بكرة على الف خير 
--------------------------------------
بإختصــــار 
نهيتك ما انتهيتك و الطبع فيك غالب 
و ديل الكلب لم ينعدل 
ولو علقوا فيه قالب
---------------------------------------------------

---------------------------------------------------


-------------------- لينكات --------------------





 
هو فيه ايه ؟.. خمسة فضفضة
 لؤى نجاتى مغرد من اجل الحرية..انسانة
4 حوافظ مستندات و11 شهادة قاضى لرد جمعة
كفاية تدعو لجمعة تصحيح المسار
وقفة تضامنية مع الناشط لؤى نجاتى 


 الحرية للناشط لؤى نجاتى .. تويتر 
 شهادتى على انتقام الداخلية .. ثورة مصر
يا وسية اتكاتروا عليكى الحرامية .. Tears
فيديوهات التحرير ... نوارة نجم
قائمة محدثة بالمقبوض عليهم ومختفين ف 28 يونيو
صحيفة :جمال مبارك خارج السجن
الذين اعداوا النار الى..محمد الدسوقى رشدى
ماذا نفعل مع الداخلية..عبدالرحمن يوسف
أفيقوا المجلس العسكرى لم يحم الثورة..هويدا طه
الفا ناشط يقررون الأعتصام الليلة
 طبيب بالمستشفى:الشرطة سحلت والدة شهيد
 تجدد الاشتباكات بين المتظاهرين والشرطة العس
تأجيل النطق بالحكم فى قضية خالد سعيد 
بالصور الثوار فى الميدان من جديد .. الدستور
راكبو المتوسيكلات .. عماد الدين حسين 
اهالى الضحايا معذورون .. فهمى هويدى  
ابو الفتوح وصباحى يطالبون بأقالة العيسوى !
عودة الى الميدان ... اهداف سويف 
انها ثورة الغضب ضد المهرجين .. وائل قنديل 
بلد شعارات ... دعاء فاروق
امة تنتحر ... جلال عامر 
القصاص اولا .. فتاة من الصعيد 
نهارنا نادى ونهار الندل مش باين .. حفيدة عرابى
الشرطة تتعامل مع المتظاهرين بالقنابل والرصاص
بلطجى من التحرير ... انسانة
الامن العام : لا نستبعد وجود عناصر خارجية !! 
البرادعى يطالب المجلس العسكرى بتوضيح
 مطارادت شوارع بين الشرطة والمتظاهرين
توابع تباطؤ وتواطؤ .. د.ستيتة 
احداث التحرير دقيقة بدقيقة ..الدستور الأصلى

----------------------------------------------
على جنب وم التويتر

الحكومة تكذب 
الاعلام يكذب
الوزير يكذب 
الشرطة تكذب 
والميدان هو الصادق 
امس واليوم وغدا
مريد البرغوثى 
---------------------------------- 

هتافات الميدان امبارح بليل 

ألف لأ للمشير 
لو هنجيب بداله غفير 

بص وشوف العسكرية 
لسه بتكشف عالعذرية

يا طنطاوى غور غور 
خلى جيشنا يشوف النور 

يا طنطاوى يا حبيب حسنى
ابعت هات دبابة تدوسنى

يا داخلية اصحى من النوم 
مش هنسيب ع الكتف نجوم 

ريحة الخل والدخان 
يا روايح الزمن الجميل .. هفهفى 

انا مش جبان انا مش جبان
انا لسه قاعد ف الميدان 

اللى فاكر نفسه كبير
لسه الثورة ف التحرير 

يا شهيد فين ما تروح 
عمر دمك ما بيروح 

ضحكوا علينا قالوا تغيير 
شالو مبارك حطوا مشير
مالك عدلى 
-------------------------------------
سبحان الله العيش بيخلص الأنابيب بتخلص
والبنزين بيخلص ،كل حاجة فى البلد بتخلص
ما عدا القنابل بتاعة الامن المركزى
ليليان وجدى 
-----------------------------------------
للى بيسألوا عن البلطجية 
البلطجية لابسين يونيفورم اسود 
و كابات عليها نسر 
وكتافهم عليها نجوم ومعروفين 
بأسم الشرطة 
لارى نبيل 
-------------------------------------------


يــوم الجــــمعــة الجـــاى .. مــين قـــال أنـــا جـــاى ؟+ تحديث  

Posted by: فاتيما in

 



الاول

بوست عند .... بسكوتة 
عشان حاجات كتييير ابسطها 
اللى مش عارف ليه ينزل يوم 8 يوليو 
يعرف و يفهم ان كلنا واحد
قايمة المطالب ..  هنا  


ثانياً

التوقيت اللى هنتقابل فيه رجع ساعة 
يعنى خوخة خلته 9 بدل عشرة 


ثالثاُ

موشكرين يا مونتى ع التصييت 
ف الفيسبوك .. و هنا 
وكمان موشكرين للغالى .. أبو حميد 


رابعا 

فيه دعوة متميزة للناس الحلوة 
اللى شاركت ف تدوين شهر يونيو .
روحوا شوفوا ايه النوظام ... هنا 


وأخيرااااااااااا

اشوفكم يوم الجمعة 
كويسين و متحمسين ومبسوطين 
وبألف خير يا رب

---------------------------------------
-------------------------------------------------------

أيها الأخـــوة المدونون 
تجتاز مصرو فترت عصيبت من تاريخها 
و اللى احنا بسببه دلوقتى 
كلنا تقريبااااااً 
عندنا إكتئاب و سدة نفس جماعية 
تنفع تتدرس ف كليات الطب النفسى
على مستوى العالم كحالة نادرة و مستعصية 


طب ايه بقى 
وبعدين ؟!!


نستسلم يعنى ونكمل على كدا 
ولا نفصل و نحاول نخرج شوية م المود ؟



لأ نفصل 
بس هنرجع تانى متقلقوش 
هنروح فين من نفسنا 
واحنا مصريين قلبا وقالبا 
و موصوفلنا شيل الهم و المناهدةو فوران الدم
كل يوم على غيار الريق؟!!
وبناء على ماسبق ومن هذوها المنطلق
وعشان نلحق دمنا قبل ما تتغير خواصه تماما
بفعل ما يحدث ومينفعش ببصلة تانى 
فأختكم فاتيما بالآصالة عن ذات نفسيتها 
وبالنويابة عن البت خيخة وأى كلام 
وبتوكيل رسمى فهمى نظمى
بندعوكم لحضور يوم جديد 
من الحملة الخيخية للتبرع بالدم
دوس هـنا 
واللى المرة دى تقريباً هيكون بقالها 
  3 سنين بالتمام والكمال مستمرة ومثمرة
وانشالله العمر كله على حسكم 
وحس البت الخيخة اللى مش أى كلام 
خوخة خيخة نوران الشاملى 




والتى للمرة التانية على التوالى 
مش هتقدر تحضر اليوم لظروف خاصة 
وانا قولت استنهز الفرصة و الحق جتتى
وأعمل خيخة بدالها وأستقبلكم 
يمكن نطلعلنا بسبوبة كويسة ولا حاجة
و بكل ديمواقراطية وأريحية وسعة صدر 
مش عاوزة اسمع أى نفس ولا أى اعتراضات 
و كلام من نوعية 
اشمعنى انتى و دى كوسة
و خيخة مديكى برستيجك  كدا ليه
و الحقد يشتغل بقى
احنا حريم جدعان مع بعضيشنا
و الحاسدون يمتنعون 
ومتخلونيش أسّيب عليكم سوكومونس


وانتوا عارفين إن زعله ويحيش




بس امور البلطجة بتاعتى دى لا تمنع
انى بغرق فى ربع شبر مية 
من غيرك يا خااااااااااالد 
يا همس الاحباب 
وسيادتك مدعو لمشاركتى 
تحمل مسئولية اليوم
بأعتبارك شهامة وجدعنة الدنيا كلها 
وانا من غيرك ألوص 
وهعتبر وجودك أمر بديهى .. ماشى ؟؟


طبعا مش محتاجة أعزم واقول تعالوا 
الناس الحلوة اللى دايما بتحضر عارفة النوظام
اللى عمره ما حضر و متوجس مننا خيفة 
ميتوجسشى يا عيال 
احنا ناس كويسين والله ومبنعضش حد 
تعالوا وان شاء الله خير 
اللى مش عاوز يتبرع .. او قلقان ..ميضرش
ييجى ياخد بحسنا و يزودنا 
واللى مكسوف او محرج وميعرفش حد 
ييجى ونتعرف عليه ويتعرف علينا 
شريطة أن .. ميبقاش لبط وجاى يغتت
وساعتها هنطبق
ف زمامير رقابته زمارة شخليلة
:)
انما الناس اللى مش غتيتة 
اهلا بيهم وينورونا 


وحتى لو أول مرة تيجوا يا جماعة 
محدش يتردد او يقول معرفش حد وكدا 
احد اهداف اللقاءات دى اننا نشوف بعض 
رؤى العين زى ما بنشوف بعض كل يوم 
ف المدونات والفيس بوك والتويتر 
فبلاش كسوف و احراج ..الخ الخ 



التفاصيل كلها هنا ف تدوينة خوخة 
بس نكتب تانى


اليوم 
الجمعة 1 يوليو 
التوقيت
من عشرة لحد حداشر قصاد بوابة المركز
وبعد كدا اللى ييجى .. يدخلنا جوا 
المكان 
المصل و اللقاح - الدقى 




و لأن معييش موبايل فهبقى احط نمرة  
خالد همس الاحباب
 لما يدينى موافقة اكتبه 
للناس اللى معهاش النمرة 
و لو انى أظن ان جمهورية مصر العربية 
كلها تعرف خالد و معاها نمرته
انما برضو انا مؤدبة ... ومش هكتب
الا لما يقولى خلاص جاى يا فاتيما و اخلصي






آه 
الدعوة عامة يا جماعة 
للناس الحلوة ف المحافظات 
يعنى بتوع اسكندرية المنصورة و بورسعيد 
و كل حتة يا ريت تشرفونا
التبرع غالبا بيخلص واحدة اتنين بالكتير 
حسب عددنا 
وكالعادة بعد كدا بنروح نتغدى
ونكمل باقى الوقت نحكى ونرغى
وننقى رز على رأى د.ستيتة 



معرفش
هنروح فين بعد التبرع  ؟؟
لكن لو أبوحميد .. جاى 
(وهييجى ان شاء الله مبخدش اذنه انا)
ممكن نتغدى ف نادى المهندسين
اما .... لو مجاش 
(بس هييجى ان شاء الله مبخدش اذنه انا)
نشوف هنعمل ايه ساعتها 
(بس هييجى ان شاء الله مبخدش أذنه انا)

 الله !!




فيه ناس حلوة من دلوقتى قالت هنحضر
و هما بدون ذكر اسماء .. رامى رقيق القلب 
ومحمد الغرباوى .. و الواد زيزو الازهرى 
ومين كمان يا فاتيما يا بنت ام فاتيما 
معرفش حسنى هيكون خلص امتحانات ولا إيه 
بس احنا منتظرينك يا مستفز .. حاول
محمود الدوح يا ابو ضحكة جنان 
على حد تعبير خيخة ف انتظارك يا جدع 
و عسقلانى و ضيا ..  تعاااااااااالى
عشان اقولك اسفة ف وشك
وليد وبوبو وعمر بيكا .. هتيجوا ؟؟
مصطفى ريان و يا كل الشباب الحلو  
فيدو يا حبيبة قلب طمطم .. عاوزاكى تيجى 
ويا كل البنات اللاتى لم يخلصن
او خلصن الإمتحانات ... حاولوا تيجوا 
بت يا كيكى عوووو وحشتينى 
واستجدعى وتعالى
مروة زهرة الجنة .. مستنياكى 
غادة و رحاب صالح
وسونى يا سنسن .. قولى لريهام هاه ؟
شمس النهار يا قمرررر .. حاولى 
وبصوا مش هقعد أنده على كل واحد 
انتوا عارفين غلاوتكم عندى
و لو ينفع هكتب كل قايمة المدونات
مؤنث ومذكر .. مش هتآخر  
فاللى قادر يحضر اليوم  .. ميتأخرش عليا 
لو سمحتوا بجد ساعة الحظ دى 
زى ما بيقول المثل
متتعوضش 

بالنوسبة لحكاية اكياس الدم بقى اللى أثيرت
الفترة اللى فاتت وبيعها والكلام دا
ففى بوست خوخة تعليق ليها 
رد على معتز وجهة نظرى الغالى 
بتقول ما أتفق معاها فيها 
احنا بنتبرع لمحتاج 
محتاج للدم ... بغض النظر هوه مين 
و هوه دا الاهم وله الاولوية 
ولو ان برضو الأستغلال ... مرفوض 
لكن ربنا اعلم بالنيات ويكفى ان ما يتبرع به
بيساعد حد وينقذه ... دى كفاية علينا قوى



النصايح كلها مذكورة عند خيخة 
بس نقول تانى 
افطروا كويس واتغذوا متفضحوناااش
و خلوا بالكوا من صحكتوا 
المركز بيقيس الضغط ونسبة الهيموجلوبين 
عشان يتأكد ان المتبرع يصلح ينسحب منه دم 
ومستوى النضافة كويس ومطمئن 
فمحدش يقلق 
بقالنا 3 سنين اهو  وكله تمام الحمدلله 


كنت عاوزة اقول ايه تانى ؟
آه 
كان يفترض اننا نحضر لسفرية لإسكندرية
بس شكلها كدا مش هينفع 
لأن الجمعة 8 يوليو فيه تحرير ان شاء الله 
وخلاص هندخل على رمضان 
كل سنة وانتوا طيبين والوقت مزنوق 
زائد ان عندنا ابو الريش كعادتنا كل سنة 
واليوم دا عاوز استعداد وميزانية و كدا 
غالبا اسكندرية هتكون بعد العيد 
ومعلش يا دودو ... هنتآخر عليكو شوية 



إيه كمان ؟
لأ خلاص كدا تقريباً 
ولو افتكرت حاجة هكتبها 


بس امانة اللى جاى يكتب ف التعليقات 
عشان نشجع بعض 
وأهو فرصة نعمل حاجة مفيدة لغيرنا 
ومنقطعش العادة الطيبة دى 
وبالمرة نخرج من مود الكآبة 
وهفضل عندى امل ليوم الجمعة الجاية 
ان نوران تغير رأيها 
والاقيها فجأة جاية عليا من بعيد  
وف إيدها شريف كمان 
ويبقى كدا ميت الف فل وأربعتاشر 
قولوا يا رب 




أشوفكم على ألف خير يومها 
يا اجمل ناس وصحبة وعالم 

----------------------------------------------------
الغنوة المصاحبة 
ملهاش دعوة بالبوست 
بس بحبها وكمان اسمها 
له علاقة وثيقة  ... جدا 
---------------------------------------------------