.

.

يــوم الجــــمعــة الجـــاى .. مــين قـــال أنـــا جـــاى ؟+ تحديث  

Posted by: فاتيما in

 



الاول

بوست عند .... بسكوتة 
عشان حاجات كتييير ابسطها 
اللى مش عارف ليه ينزل يوم 8 يوليو 
يعرف و يفهم ان كلنا واحد
قايمة المطالب ..  هنا  


ثانياً

التوقيت اللى هنتقابل فيه رجع ساعة 
يعنى خوخة خلته 9 بدل عشرة 


ثالثاُ

موشكرين يا مونتى ع التصييت 
ف الفيسبوك .. و هنا 
وكمان موشكرين للغالى .. أبو حميد 


رابعا 

فيه دعوة متميزة للناس الحلوة 
اللى شاركت ف تدوين شهر يونيو .
روحوا شوفوا ايه النوظام ... هنا 


وأخيرااااااااااا

اشوفكم يوم الجمعة 
كويسين و متحمسين ومبسوطين 
وبألف خير يا رب

---------------------------------------
-------------------------------------------------------

أيها الأخـــوة المدونون 
تجتاز مصرو فترت عصيبت من تاريخها 
و اللى احنا بسببه دلوقتى 
كلنا تقريبااااااً 
عندنا إكتئاب و سدة نفس جماعية 
تنفع تتدرس ف كليات الطب النفسى
على مستوى العالم كحالة نادرة و مستعصية 


طب ايه بقى 
وبعدين ؟!!


نستسلم يعنى ونكمل على كدا 
ولا نفصل و نحاول نخرج شوية م المود ؟



لأ نفصل 
بس هنرجع تانى متقلقوش 
هنروح فين من نفسنا 
واحنا مصريين قلبا وقالبا 
و موصوفلنا شيل الهم و المناهدةو فوران الدم
كل يوم على غيار الريق؟!!
وبناء على ماسبق ومن هذوها المنطلق
وعشان نلحق دمنا قبل ما تتغير خواصه تماما
بفعل ما يحدث ومينفعش ببصلة تانى 
فأختكم فاتيما بالآصالة عن ذات نفسيتها 
وبالنويابة عن البت خيخة وأى كلام 
وبتوكيل رسمى فهمى نظمى
بندعوكم لحضور يوم جديد 
من الحملة الخيخية للتبرع بالدم
دوس هـنا 
واللى المرة دى تقريباً هيكون بقالها 
  3 سنين بالتمام والكمال مستمرة ومثمرة
وانشالله العمر كله على حسكم 
وحس البت الخيخة اللى مش أى كلام 
خوخة خيخة نوران الشاملى 




والتى للمرة التانية على التوالى 
مش هتقدر تحضر اليوم لظروف خاصة 
وانا قولت استنهز الفرصة و الحق جتتى
وأعمل خيخة بدالها وأستقبلكم 
يمكن نطلعلنا بسبوبة كويسة ولا حاجة
و بكل ديمواقراطية وأريحية وسعة صدر 
مش عاوزة اسمع أى نفس ولا أى اعتراضات 
و كلام من نوعية 
اشمعنى انتى و دى كوسة
و خيخة مديكى برستيجك  كدا ليه
و الحقد يشتغل بقى
احنا حريم جدعان مع بعضيشنا
و الحاسدون يمتنعون 
ومتخلونيش أسّيب عليكم سوكومونس


وانتوا عارفين إن زعله ويحيش




بس امور البلطجة بتاعتى دى لا تمنع
انى بغرق فى ربع شبر مية 
من غيرك يا خااااااااااالد 
يا همس الاحباب 
وسيادتك مدعو لمشاركتى 
تحمل مسئولية اليوم
بأعتبارك شهامة وجدعنة الدنيا كلها 
وانا من غيرك ألوص 
وهعتبر وجودك أمر بديهى .. ماشى ؟؟


طبعا مش محتاجة أعزم واقول تعالوا 
الناس الحلوة اللى دايما بتحضر عارفة النوظام
اللى عمره ما حضر و متوجس مننا خيفة 
ميتوجسشى يا عيال 
احنا ناس كويسين والله ومبنعضش حد 
تعالوا وان شاء الله خير 
اللى مش عاوز يتبرع .. او قلقان ..ميضرش
ييجى ياخد بحسنا و يزودنا 
واللى مكسوف او محرج وميعرفش حد 
ييجى ونتعرف عليه ويتعرف علينا 
شريطة أن .. ميبقاش لبط وجاى يغتت
وساعتها هنطبق
ف زمامير رقابته زمارة شخليلة
:)
انما الناس اللى مش غتيتة 
اهلا بيهم وينورونا 


وحتى لو أول مرة تيجوا يا جماعة 
محدش يتردد او يقول معرفش حد وكدا 
احد اهداف اللقاءات دى اننا نشوف بعض 
رؤى العين زى ما بنشوف بعض كل يوم 
ف المدونات والفيس بوك والتويتر 
فبلاش كسوف و احراج ..الخ الخ 



التفاصيل كلها هنا ف تدوينة خوخة 
بس نكتب تانى


اليوم 
الجمعة 1 يوليو 
التوقيت
من عشرة لحد حداشر قصاد بوابة المركز
وبعد كدا اللى ييجى .. يدخلنا جوا 
المكان 
المصل و اللقاح - الدقى 




و لأن معييش موبايل فهبقى احط نمرة  
خالد همس الاحباب
 لما يدينى موافقة اكتبه 
للناس اللى معهاش النمرة 
و لو انى أظن ان جمهورية مصر العربية 
كلها تعرف خالد و معاها نمرته
انما برضو انا مؤدبة ... ومش هكتب
الا لما يقولى خلاص جاى يا فاتيما و اخلصي






آه 
الدعوة عامة يا جماعة 
للناس الحلوة ف المحافظات 
يعنى بتوع اسكندرية المنصورة و بورسعيد 
و كل حتة يا ريت تشرفونا
التبرع غالبا بيخلص واحدة اتنين بالكتير 
حسب عددنا 
وكالعادة بعد كدا بنروح نتغدى
ونكمل باقى الوقت نحكى ونرغى
وننقى رز على رأى د.ستيتة 



معرفش
هنروح فين بعد التبرع  ؟؟
لكن لو أبوحميد .. جاى 
(وهييجى ان شاء الله مبخدش اذنه انا)
ممكن نتغدى ف نادى المهندسين
اما .... لو مجاش 
(بس هييجى ان شاء الله مبخدش اذنه انا)
نشوف هنعمل ايه ساعتها 
(بس هييجى ان شاء الله مبخدش أذنه انا)

 الله !!




فيه ناس حلوة من دلوقتى قالت هنحضر
و هما بدون ذكر اسماء .. رامى رقيق القلب 
ومحمد الغرباوى .. و الواد زيزو الازهرى 
ومين كمان يا فاتيما يا بنت ام فاتيما 
معرفش حسنى هيكون خلص امتحانات ولا إيه 
بس احنا منتظرينك يا مستفز .. حاول
محمود الدوح يا ابو ضحكة جنان 
على حد تعبير خيخة ف انتظارك يا جدع 
و عسقلانى و ضيا ..  تعاااااااااالى
عشان اقولك اسفة ف وشك
وليد وبوبو وعمر بيكا .. هتيجوا ؟؟
مصطفى ريان و يا كل الشباب الحلو  
فيدو يا حبيبة قلب طمطم .. عاوزاكى تيجى 
ويا كل البنات اللاتى لم يخلصن
او خلصن الإمتحانات ... حاولوا تيجوا 
بت يا كيكى عوووو وحشتينى 
واستجدعى وتعالى
مروة زهرة الجنة .. مستنياكى 
غادة و رحاب صالح
وسونى يا سنسن .. قولى لريهام هاه ؟
شمس النهار يا قمرررر .. حاولى 
وبصوا مش هقعد أنده على كل واحد 
انتوا عارفين غلاوتكم عندى
و لو ينفع هكتب كل قايمة المدونات
مؤنث ومذكر .. مش هتآخر  
فاللى قادر يحضر اليوم  .. ميتأخرش عليا 
لو سمحتوا بجد ساعة الحظ دى 
زى ما بيقول المثل
متتعوضش 

بالنوسبة لحكاية اكياس الدم بقى اللى أثيرت
الفترة اللى فاتت وبيعها والكلام دا
ففى بوست خوخة تعليق ليها 
رد على معتز وجهة نظرى الغالى 
بتقول ما أتفق معاها فيها 
احنا بنتبرع لمحتاج 
محتاج للدم ... بغض النظر هوه مين 
و هوه دا الاهم وله الاولوية 
ولو ان برضو الأستغلال ... مرفوض 
لكن ربنا اعلم بالنيات ويكفى ان ما يتبرع به
بيساعد حد وينقذه ... دى كفاية علينا قوى



النصايح كلها مذكورة عند خيخة 
بس نقول تانى 
افطروا كويس واتغذوا متفضحوناااش
و خلوا بالكوا من صحكتوا 
المركز بيقيس الضغط ونسبة الهيموجلوبين 
عشان يتأكد ان المتبرع يصلح ينسحب منه دم 
ومستوى النضافة كويس ومطمئن 
فمحدش يقلق 
بقالنا 3 سنين اهو  وكله تمام الحمدلله 


كنت عاوزة اقول ايه تانى ؟
آه 
كان يفترض اننا نحضر لسفرية لإسكندرية
بس شكلها كدا مش هينفع 
لأن الجمعة 8 يوليو فيه تحرير ان شاء الله 
وخلاص هندخل على رمضان 
كل سنة وانتوا طيبين والوقت مزنوق 
زائد ان عندنا ابو الريش كعادتنا كل سنة 
واليوم دا عاوز استعداد وميزانية و كدا 
غالبا اسكندرية هتكون بعد العيد 
ومعلش يا دودو ... هنتآخر عليكو شوية 



إيه كمان ؟
لأ خلاص كدا تقريباً 
ولو افتكرت حاجة هكتبها 


بس امانة اللى جاى يكتب ف التعليقات 
عشان نشجع بعض 
وأهو فرصة نعمل حاجة مفيدة لغيرنا 
ومنقطعش العادة الطيبة دى 
وبالمرة نخرج من مود الكآبة 
وهفضل عندى امل ليوم الجمعة الجاية 
ان نوران تغير رأيها 
والاقيها فجأة جاية عليا من بعيد  
وف إيدها شريف كمان 
ويبقى كدا ميت الف فل وأربعتاشر 
قولوا يا رب 




أشوفكم على ألف خير يومها 
يا اجمل ناس وصحبة وعالم 

----------------------------------------------------
الغنوة المصاحبة 
ملهاش دعوة بالبوست 
بس بحبها وكمان اسمها 
له علاقة وثيقة  ... جدا 
---------------------------------------------------

This entry was posted on الثلاثاء, يونيو 28, 2011 and is filed under . You can leave a response and follow any responses to this entry through the .

33 كــــلام بيطــبطـــب عـــلى قــــلبى و روحــــى

مامت يوسف
فاتيما الغاليه


بأذن الله جى

زى ما قلت فى التعليق اللى فات (:

بس التوكيد ضرورى (:

و بأذن الله الواحد حجز و عزم

ربنا يمنع الموانع بقى

و ان شاء الله يجى استاذ خالد علشان وحشنا بأمانة

(:

إلى لقاء قريب بأذن الله (:

هحاول أكون موجوده يا فاتيما بس ياااارب الظروف تكون متسهله
بس لو جيت أنا معرفش حد هتلاقيني واقفه مكسوفه كده على جنب :)
نلتقي يومها ان شاء الله
تحياتي ليكي

ياريتني كنت قريبة وياريتني كنت اقدر أحضر
وحشتيني جدا جدا وربي ما يقطع لكم عادة ابدا

نفهم من كده ايه
اننا اتدبسنا واللى كان كان
وبما انها تدبيسة والسلام فمن هذا المزنق لا يسعنا الا ان نلبى الدعوة ونحن مغمضى العينين فاغرى الفم ونقول سمعا وطاعة يا فندم بس خلوا بالكم انه هيكون 1 يوليو ويوم جمعة وده هيكون تقفيل جرد وبداية الاشتراكات السنوية يعنى هزوغ منكم بعد الصلاة ان شاء الله
اللى اوله شرط اخره زوغان
جزاكى الله خيرا يا ام يوسف
ونشوفكم على خير باذن الله
تحياتى

حاجه كويسه اوى بجد
ان شاء الله احاول اجى معاكم :))

إن شاء الله من غير مقاطعة جاى
وبعدين إنت ما تاخديش إذن
حضرتك تؤمرى

طبعا مش جاى
أنا لما بأجى بأضرب
وإيه لزمتها

وألا أقول لك جاى علشان بصراحه وحشنى لناس

وألا المفروض صحيح مش جاى أساسا أنا اسمى المفروض يتحط فى الأول مش رامى انا قلبى أبيض من قلبه بكتييييير

وألا لأ هأجى أهو ناخد الثواب وأمرنا لله

لالالالالا مش جاى أنا عندى امتحانات
ومذاكرة وأصلا أصلا مش فاضى لكم


وبعدين بقى فى قلبى الطيب
خلاص جاى ورزقى ورزقكم على الله
يعنى هتيجى من مادة ما كلهم مش عارفين نل فيهم سواء مذاكرين ولا لأ

ولا لأ
جاى
لأ
جاى
لأ
جاى

ما علينا

عموما رقمى لأى حد تايه علشان بلاش يتصل بيه بدل ما أتوهه أكتر
ومش عدم معرفه بالمكان بس
غلاسة كده
وإذا كان عاجبكم واللى مش عاجبه يسأل فى الشارع وهم يتوهوه براحتهم
يعنى الغريب أحسن منى

0174247210

سلام بقى بلا غم
قال فاتيما اللى هتمسك تبرع قال
يعنى مش كفاية الامتحانات
هيبقى الامتحانات وفاتيما كمان


رحمتك يا رب

أخييييييييييييرا

بقال 3 ساعات تقريبا علشان اكتب التعليق ده

http://fritend.blogspot.com/2009/04/blog-post_09.html

دى هدية العدد

الكتابات القديمة فيها كنوز كتييييييييييير

تصدقى بالله

انا امبارح كنت جاى اقولك انى هاشوفك الجمعة الجاية ولا لا وبعديمن قلت استنى يومين لحد بكرة الجمعة عشان يبق قبلها باسبوع واشوف هاتيجى بدل خيخة ولا لا

حبيبه قلبيييييييي

وحشاني وربنا
والله
وحشاني اويييي اوي

وصدقيني محتاجها اوي اوي اوي
ومحتاجه اشوفك واخرج معاكو

الحمد لله انها جت :)

هنبنه علمدونين علفيس وانزل البوست هناك
اوكي؟

العواااااااااااااااااف عليكم
----------------------------

معلش يا جماعة
الجهاز بتاعى استندل
وانا داخلة شحاتةمن جهاز اخويا
واللى طبعا بيذلنى عقبال ما يفضيهولى ربع ساعة ادخل اشوف إيه النوظام ..
معلش
:)

مش هلحق ارد ع التعليقات كلها
بس مبسوطة ان فيه ناس حلوة جاية ومتحمسة
ميرسى يا خالود ..دا العشم
و هتنورنا يا ر ر
و بطل لبط يا زيزو انتا اصلا جاى من غير مناقشة ...
وياأبو حميد انتا دايما تعمل حركات الشياكة دى و ربنا يخليك يا رب
شيرين بجد لو جاية هفرح جدااااااااااا انى هشوفك ومتنكسفيش ولا حاجة ..متشيليش هم خالص
وانتى كمان يا بنوتة ..حاولى يا ريت
بت يا سنسن انا فرحاااااااانة انى هشوفك واعلنى زى ما تحبى
عمرو ..
التبرع هينور
وانتا ليك خطروفة ف بوست خطاريف 9 ابقى روح استلمها على يد محضر ..
:)
اما انتى يا خطورتى
فنتى ولو ف كوكب تانى والله
انتى معانا
عشان انتى ف القلب
وربنا يكرمنا ويكرمك
وتنزلى مصر ..عشان نعملك لقاءمخصوص
وتشوفى كل حبايبك بالعين زى ما بتشوفيهم بالقلب كدا
انتى وحشتينى قوى
وكل يوم اكتب صباحات فيه بقول يا رب خواطر تكون راضية .. ومبسوطة
:))

كفاية لحسن ماجد واقف فوق دماغى
ولما يتصلح الجهاز ادخل تانى
او لما ارجع الشغل بقى
ابقى ارد تانى على أى حاجةجديدة
سلام مؤكتاااااااااااااااااا
يا أغلى ناس على قلبى

عاشقة الرومانسية
----------------

والنبى يا دودو عشان خاطرى
بلاش التكشيرة دى
ومتزعليش
اصل الوقت مزنوق
و لولا اننا متعودين فطار رمضان يكون ف ابو الريش والناس هناك بتستنانا كنت طلبت من داليا وخالد فطارنا السنةدى يكون ف اسكندرية ...
واهى تبقى جنونة حلوة ونضرب العصفورين بحجر ...
بس السفر هيكون صعب
وكمان مش عاوزةنقطع العادة بتاعت ابو الريش ...
وعاوزةنلحق نقعد معاكم مش نجرى من حتة لحتة وكدا ...
ان شاء الله نجيلكم بعد العيد ف الروقان و نقضى اليوم كله سوا ..
وحياتى ما تزعلى وتكشرى
وتدعيلنا الدعوات الحلوة بتاعتك
وتقوليلى ان شاء الله تتوفقوا يا بطتى
عشان اليوم يبقى متبارك بالإسكندرانى بقى
ممكن؟

بحبك جدا يا عروسة البحور

وأنا كمان جاية ان شاء الله
وسلامة جهازك الف سلامة ان شالله أجهزة الوحشين
ادعى لى بس الاخ هيموجلوبينى مش يكسفنى قدام الناس
بوسات وحضونات طيارى كده على مااخدهم رسمى ان شاء الله :)

لا يابطتى خلاص مش زعلانه كل الموضوع انك وحشانى قوى
:)


منتظراكى على مدونتى رايك فى البوست الاخير يهمنى قوى

بحبك ياقلب البحر

الله علي الاحساس الجميل دا ..
الاول بسأل عليكي وبتمني يارب تكوني بخير دايما انتي ويوسف وكل ال بتحبيهم
و فرصه جيمله اوي للخير و هعملها شير عندي في المدونة ان شاء الله وعلي صفحتي في الفيس بوك
و كمان نسفي اكون معاكم في اليوم الجميل دا يومها عندي فرح في شارع الهرم .. ياريت اقدر أحضر و استأذن الدكتور أتبرع ..
ربنا يجازيكي كل خير ويجازيكم كلكم الخير و كل ال بتتمنوه و يارب يشفي كل مريض و تتلاقوا في الخير دايماً
:))

هو الرد بتاعي موصلش
:$:$:$:$:$:$:$

أنا نفسي آجي بجد
وعاملة حسابي على كدة
بس معرفش الظروف هتبقى عاملة ازاي

نفسي أشوفك وهحاول ان شاء الله

لولا الأنيميا دى :)

الله الموفق وربنا يجعله فى ميزان حسناتكم يا رب

وإنما الأعمال بالنيات :)

تحياتى

ضروري بقى ولازم تشتركي
ممكن حضرتك تكوني سمعتي عن مشروع المئة تدوينة او لا المهم يعني
ده مشروع لتجميع التدوينات اللي اتكتبت في شهر يونيو في كتاب الكتروني واحد وكل مدون يشترك بتدوينة واحدة
ونعمل تصفية للتدوينات من خلال التصويت والـ100 تدوينة اللي ياخدوا اعلى تصويت يتجمعوا في كتاب الكتروني عشان تبقى ذكرى لينا كمدونين

أنا من فريق العمل وبصراحة قلت لازم اقولك في بوستات هنا بحبها أوي
ونفسي تشتركي بواحدة

دي صفحة الفيس بوك
http://www.facebook.com/100posts

ولو ملكيش فيه في مدونة خاصة بالمشروع على اللينك ده
http://100posts-ebook.blogspot.com/

ولو فيه اي استفسار ممكن تكتبيه في تعليق على المدونة
او أنا موجودة او حضرتك ممكن تقوليه لاي حد من الفريق

إلى اللقاء :))

بصراحة بصراحة
أنا عارف إني مقصر جدااااا

وكنت جاي المدونة هنا وانا في غاية الكسوف والخجل

وكان سبب الزيارة دي بوست نشرته
http://3arfah.blogspot.com/2011/06/blog-post.html

وللأمانة هو مكتوب من مدة بس كان في العلب زي افلام السينما :)

المهم مطولش عليك البوست ده عن مسرح العرائس

وبصراحة بصراحة أنا اعرف إنك من المغرمين بالنوع ده من الفن

وعلشان كدة كنت جاي أهدي البوست ده للأخت العزيزة فاتيما

بس لقيت هنا الصراحة شوية حاجات كدة جميلة وتغيظ في نفس الوقت

ألا وهي

1 يوليو يوم التبرع بالدم ده
واللي مع الأسف محضرتوش ولا مرة لعدم وجودي أثناءه ولا مرة

8 يوليو يوم الجمعة واللي هيكون فيه مظاهرة في التحرير هو نفس اليوم اللي مفروض أوصل فيه مصر إن شاء الله وهمووووووووووووووت واكون في التحرير
ودي كمان تاني أمنية وطارت مني


مفضلش غير زيارة أبو الريش وبإذن الله يكون لي نصيب في زيارتها

ان شاء الله هاجي علشان وحشاني قوي
وكل الناس الحلوة وحشاني موت ونفسي اشوفهم

حفيدة عرابى
----------

دا احلى خبر يا فيدوووو
ويا حبيبتى ولا يهمك
الهيموجلوبين منخفض ..مش مشكلة
كفاية هترفعى نسبة الفرحة ف قلبى
لما هتيجى ان شاء الله
دا لوحده دعم لا يستهان به ف انجاح اليوم و لا ايه ؟


وسؤال بقى ويطرح نفسه الىن
هل هناك امل ان تاتى بيطرية الغلبانة وموش بإيدها
ولا مينفعشى ؟

البوسات والحضونات بتوعك
ف الحفظ والصون
:))

عاشقة الرومانسية
----------------

طب الحمدلله يا حبيبتى
و ان شاء الله هعوضهالك

هروح اقرى البوست حاضر

انا كمان بحبك يا عروسة البحور

مونتى بوكيه ورد
--------------

ايه دا يا مونتى
بص بقى

انتا هتنضرب دلوقتى

قولى ليه يا فايما

اقولك انا ليه

بقى هتبقى ف الكاهرة
ومش هنشوفك ولو ساعة وتمشى ؟!!!

النوظام دا مينفعشى معانا
دى فيها رقاب تطير ودم يراق و عضم هينفشفش وحاجات كدا

يا عم تعالى ومتتبرعش ..
مش مشكلة
بس تعالى نورنا

حاول بجد تيجى
وعقبال فرحك ان شاء
بس من غير تبرع
:)

ايثار
-----

اولا
ميرسى يا إيثار على ذوقك
وحماسك
ويا ريت لو ينفع تيجى ف أى وقت ف اليوم تعالى ومتتأخريش
ان شاء الله نكون صحبة كويسة ليكى
وتروحى وانتى مبسوطة
وانا كمان يشرفنى ويسعدنى اشوفك


ثانيا بقى
موضوع الميت تدوينة طبعا سمعت عنه
بس انا لا ينطبق عليا شروطه متهيألى
لأنى لم اشارك فى حملة التلاتين يوم تدوين ولا حاجة ...
انا كتبت بنفس وتيرتى العادية
وبالتالى هينفع اشترك والناس اللى واظبت شهر بحاله ...ونبقى متساويين ؟

مش عارفة
بس لو سألتينى ارشحلك ايه ف شهر 6 التدوينى بتاعى
فأكيد هرشحلك بوست (28) لأنى حبيته من قبل ما اكتبه وانا بكتبه وبعد ما كتبته و فى وجهة نظرى الغلبانة هوه اقرب حاجة لقلبى كتبتها السنة دى مش شهر يونيو بس ..

لو له صدى ..وتنطبق الشروط عليه
تقدر تعتبرينى مشتركة بيه
ولينكه اهو
http://ro7albmama.blogspot.com/2011/06/28.html
بس معنديش فيسبوك ..

ولو انطبقت عليا الشروط قوليلى
ازور المدونة المعنية واسيب اللينك هناك

وميرسى ليكى ف كل الاحوال
وربنا يوفقكم ان شاء الله
يونيو او برا يونيو
:))

اشوفك ان شاء الله على خير
الجمعة الجاية يا أثورة

مدونة ما كفاية بقى
-----------------

يا بنتى ولا يهمك
انيميا انيميا احنا موافقين
تعالى طيب نتعرف وتقعدى معانا
وتشوفى مناظرنا ع الطبيعة بيبقى شكلنا ازاى ...
يمكن تغيرى رأيك وتبطلى تدوين من وشنا
ويمكن العكس وتفضلى علطول ..
:)))

حاولى وتعالى
ان شاء الله يكون يوم حلو على وشك

عارفة ... مش عارف ليه !!!
------------------------

وليييييييييييييد
يا خراشى يا لهوى
نازل مصر خلاص
الف حمدلله ع السلامة مقدما
طب بص بقى
ابو الريش ان شاء الله انتا معانا انتا ومهند حبيبى ى ى ى

اما الجمعة بتاعت 8 يوليو فولا يهمك يا غالى
مبدئيا 6 ابريل ناوية تعتصم وتبات ف الميدان ...
وغالبا ناس هتشاركها
وكدا اضمنلك ان الجمعة اللى بعدها فيه تحرير برضو وساعتها نتلم ونتقابل هناك ان شاء الله وتحضر مليونية من الأيام اللى انا شخصيا بعتبرها .. اغلى ايام مكن أى مصرى يمر بيها ...

اشوفك على الف خير يا رب
وترجع بألف مليون سلامة انتا والولاد ومامتهم ...
وهروح اشوف حكاية مسرح العرايس دى
فيك الخير والله انك فاكر انى بحبه
:))
منحرمشى منك ابدا

مصطفى ريان
----------

يا صفصف
انا قولت كدا برضو
منحرمشى منك
واشوفك ان شاء الله على الف خير
:))))))

الغاليه فاتيما
** ** ** ** **
الله هتضرب منك انتي دا انا كدا ضمنت ان اكون انسان ناجح و ايجابي ومتفائل و كل حاجه حلوه في الدنيا طيب ياريت
صدقيني انا لو ليا نصيب أجي يومها يارب و أقدر اساعد بأي حاجه هبقي جاي مش عشان الفرح ابداً عشان برتاح لما بكون معاكم وبشوفكم

بس زميلتي تطلع جدعهمعايا وتيجي مكاني يوم السبت وان شاء الله أتمني اشوفكم علي خير يارب و طبعاً هعمل الدعايه من دلوقتي و هستند لتدوينتك و لتدوينة بنت خيخه ومش اي كلام و كل ال هيعمل دعايه هضيف اللنك بتاعه عندي ان شاء الله

ووصيتي ليكي لو ليا عمر ان شاء الله تتبرعي وتشرفيني انتي ويوسف ربنا يحفظك :))

لا عادي الموضوع مش مرتبط بالحملة في ناس لسة عاملة مدونات دلوقتي وهيشتركوا عادي

كانك بتقري افكاري كنت لسة بفكر في البوست بتاع 28 بجد رائع كان طويل بس قريته كامل ممتع أوي:)
ابقي ابعتي التدوينة في اي وقت ابتداء من يوم الجمعة الجاي 1/7 على المدونة دي
http://100posts-ebook.blogspot.com/

وشكرًا مشاركتك رفعت من معنوياتي ^_^

يارب يكون يوم جميل
وربنا يجازيكوا كل خير عليه يا فاتيما
..
تحياتى :)

انا ماكنتش خدت بالى فعلا عشان بلوجر ماكانش ظهرلى ان فى خطاريف 9 اصلا


انا بحب خطاريفك دى جدا على فكرة

إرسال تعليق