.

.

بـدلـــة رقـــص ســــودة  

Posted by: فاتيما


 

  
حد يقولى ان انا ببالغ يا جماعة 

ممكن ؟


يعنى حد يقولى ان مش حقيقى مثلاً 
ان الحكومة دى هيا واللى وراها وجايبها
كلهم جمعاء موطين راسنا 
و مبعترين كرامتنا 
و هيجبولنا العار لحد عندنا مشفى 
صح كدا ... و لا أنا متهيألى ؟!!!



المشهد دلوقتى يبدو .. كالآتى 
مصر صوان كبيييير متقام 
و مفتوح من كل الزوايا و مبدور بكراسى
وترابيزات و بشر
و المتربصون يجلسون
وكل واحد فيهم مستنى النحتاية بتاعته
اللى هيخرج بيها م الليلة دى 






رجال الأعمال ف ركن 
و الأخوة من دول الخليج ف ركن 
واجانب بملامح مختلفة شرقية وغربية ف ركن 
و بدل ميرى و رتب ف ركن
والكل مستعد للفرجة و حجز مكان مميز
ثم التأهب للغلوصة ف التورتة 
و تعزيز النفوذ والرحرحة .. زى أيام زمان




و هناك ف آخر الصوان
على المنصة ... بشر اشكال والوان
وشوش قديمة و تانية جديدة 
الآتية من كل صنف 
اللى بيعرف يعزف و اللى مبيعرفش
وكورس اللى صوته حلو و اللى اصوات نشاز 




و حالا وزير خارجيتنا بيبتدى الفقرة بالتقديمة 
فى اول طلعة ليه ع الجماهير الغفيرة
صادحاً كالكروان .. بأن مصر حاطة الخليج 
على راسها من فوق و حياة عنيكو 
و ان ايران الوحشة .. مش اهم عندنا منيكو ...
و اخص عليكو اوعو تشكوا فينا ؟!!





بعد وصلة الغرام الحارة
يرتفع ترمومتر المشاعر درجتين تلاتة 
و تسقيفة حاااادة تيجى من ركن الأشقاء
و حالة الارتياح تسود  ..
ليخلى المكان بعدها فورا 
و ينسحب صاحب العيون الناعسة 
عشان يستعد المرسح لإستقبال 
برنس الليلة و كل الليالى 
اللى جاى م ارض تحريرها  و براه 
 و يركز سبوت النور على
 رئيس الوزرا .. ابو ابتسامة ملائكية 
اللى بيحدف القبلات ف الهوا منافسا بذلك 
هانى شاكر وسط صفافير وهتافات 
و تسقيف بتزيد وتيرته عن ذى قبل





يوطى النجم راسه ف تواضع و ادب جم
 و تبدأ الموسيقى تشتغل و الطرب يلعلع
و الحاضرين ينسجموا معاه ويقولوا ..الله
فيوقف الراجل الغنا متأثرا ..  كل شوية 
عشان يحيى الضيوف ... كل بأسمه 
الحاج فلان والأخ علان والشقيق ترتان
اللى شرفوه م المحيط للخليج



والصالة تسخن و التشجيع يزيد اكتر
و الحماس يحمى اكتر واكتر  


فيقوم شقيق من السعودية من مطرحه 
و يرمى 4 مليار تحت رجلين المغنى




فيسخن جاره الأماراتى 
وتنقح عليه كرامته بشدة  
و يشاور للنجم .... تعالالى هنا  
و عشان ميكسفوش
يسيب مطربنا الهمام المسرح 
و ينزل يروحله ... لحد ترابيزته
فيكافئه الضيف و يلبسه كام عقد محبة
.. بـ  3 مليار 
 


الأخ القطرى بعد المنظر دا .. يغير و يفرك 
بس يتمالك نفسه و يفتكر انهم سباقين
و يقول ف عقل باله لما يحسبها 
قبل ما ينزل بتقله تانى 





بينما يجلس الأجانب .. فى هدوء وثقة 
منتظرين اللحظة المناسبة 
عشان يبقى كل خطوة محسوبة 
بالورقة والقلم والا شعوبهم 
تطربقها على دماغتهم




الأعلام واقف بيصور المشهد 
من زاوية ضيقة .. و محددة
عشان لما الصورة تتنشر ميتقلش
ان البلد اتحولت لرقاصة و بينقطوها 
 أو شحّاتة ... و بيمّنوا عليها
ودول بس يا دوب جيراننا وحبايبنا 
و ..ناس طيبين قوى 





وف وسط ما الكل مشغول بالهيصة
 ف الكواليس نلمح ..  وزير المالية 
يشاور لصبيانه ما بين كل لحظة والتانية 
عشان يطلعوا  يلموا النقطة 
ويرموها ف حجره لحسن تضيع 
ودى شقا ناس تعبانة برضو




هذا و بين الترابيزات واقفين بثبات 
بلطجية بكارنيهات
يفرضوا السيطرة والايمن
و ف الركن البعيد خلف ستار يجلس 
مجلس الباشوات الجداد
اللى بيحضروا روحهم لإستلام الغنيمة
و تقسيمها ... كل واحد ونايبه 
ومينسوش يرموا شوية فتافيت للجرسونات
و العمال و الأرزوقية الغلابة
و لسان حالهم يقول
امتى  الغجر الاوباش 
القلة المندسين
الاجندات 
بتوع الأصابع الخارجية 
البلطجية المحرضين هيهمدوا 
و يبطلوا نغمة الثورة و الكرامة و الحرية 
اللى شغالة دى وطلعتلنا ف المقدر جديد 
 و يرجعوا ينخوا و يجروا على اكل عيشهم 
 و يخّدموا علينا و هما ساكتين زى زمان
و كل ليلة الحكاية دى تحصل 
و بنجاح عظيم ونلم لم ...

 
طب بذمتكم
مش دا اللى حاصل ؟




 مش بقينا كورة ف الرجلين 
و فروادة الأستغلال من كل ناحية .. أكم ؟


مش بقينا فى مرمى نيران المستغلين
من كل ملة واتجاه 
ويا ريت محدش يفهمنى غلط 
لأنى مقصدش اخواتنا العرب .. كشعوب 
انا قصدى الأنظمة و الحكومات 




يعنى مثلا انا نفسى اعرف 
أرض توشكى دى الاخ الوليد 
كان بيعمل فيها ايه بقاله عشر سنين
داخل خارج داهس ماهس 
و محدش بيحاسبه  ؟


و رغم انهم مدينهاله بتراب الفلوس 
 الا انه اكراما لمليارات السعودية  .. سكتنا
وحطينا وشنا ف الأرض و فوتناها 
 و خرج الباشا بتلت الأرض تقريبا
طيب .. ماشى ..خلاص


حد بقى يفهمنى 
  ليه دلوقتى الامارات .. بتلف من ورانا 
و عاوزة و مصرة تستثمر فيها 

ليه ؟

فيها ايه الارض دى مهم قوى 
عشان يتمسكوا بيها بشدة كدا ؟


ماهو .. يا فيها ثروات و محناش عارفينها 
 يا فيه اصرار وعند 
انها متبقاش للمصريين 
ودا يبقى اسمه استعمار بقى

و بعدين مين يحاسب الوزارة دى 
على تفريطهم ف ارضنا تانى 
ولو لأشقاء واخوة عرب بينما المصريين بالملايين 
و اولى بأرضهم وخيرها ؟!!!


 
يا حكومة ما بعد الثورة .. و اتوكسنا بيكى 
مصر مش وسية .. و لا هيا عزبة ابوكى
و لا هيا كمان ملك اللى جابك 
و سايبك و ف كل الاحوال حاميكى 

المصريين اولى بكل شبر فى أرضهم
وفلوس الأنظمة العربية 
تغور من وشهم العكر و تحكماتهم 
وعنجهية بعضهم
و لا كل ريالاتهم و دراهمهم والدولارات
هتساوي ان المصرى
يوطى راسه منكسر ف بلادهم

مصر بتاعتنا احنا
ارض و سما ونيل وبحر


و الثورة بت جدعة
حرة ... متقبلش الذل والهوان 
ومش هتطلع تعرض نفسها للى هيدفع 
و لا هتشحت على جروحها 



و مهما حصل
هتعيش بشرف 
يا حكومة العار و القرف



و اذا بلطجيتكم مصرين يبهدلوها 
ويعملوا عليها شغل و سبوبات 
و هيرفعوا عليها السلاح
و يجبروها تجامل ضيوفهم 
و ترقصلهم جنب المطرب ليلاتى .. بالغصب
فأصول بقى تعملوا حسابكو من دلوقتى
و ع الأقل تشترولها .. بدلة رقص
و تكون سودة
....
.......
احــــتراما لدمـــاء الشهــــداء

-------------------------------------------
يا مصر قومى وشدى الحيل 
-----------------------------------------------



This entry was posted on الثلاثاء, يوليو 05, 2011 . You can leave a response and follow any responses to this entry through the .

13 كــــلام بيطــبطـــب عـــلى قــــلبى و روحــــى

اسفة
لو التشبيهات ف البوست
كانت مزعجة و مش مهذبة

بس حقيقى
بقيت شايفهم كأشخاص كدا
وشايفة بيتعمل ف ثورتنا كدا

وبقت
مسخــــرة

كان الاول الكل عينة على التورتة دلوقتى برقع الحيا اتكشف والكل بيمد ايده وعاوز ينهش

لا حول ولا قوة الا بالله

=======
نسيتى ائتلافات الثورة كل واحد منهم واخد جنب وبيصفق باطراف اصابعه علشان متتوسخش

كان الاول الكل عينة على التورتة دلوقتى برقع الحيا اتكشف والكل بيمد ايده وعاوز ينهش

لا حول ولا قوة الا بالله

=======
نسيتى ائتلافات الثورة كل واحد منهم واخد جنب وبيصفق باطراف اصابعه علشان متتوسخش

فاتيما
روح القلب الملائكية

لسه مبقتش سودة لو هى سودة نمشى و نسيب البلد
عندما ننجح فى فصل البلطجية عن الثوار
و عندما ينسى الجميع عملية جمع الغنائم دون ان تنتهى المعركة و يدركوا انهم معرضون للموت او طعنة قاتلة اثناء جمعهم للغنائم لان المعركة لم تنتهى
ليس لى اعتراض غلى فوزهم بمكاسب و لكن بعد ان تنتهى المباراة
نريد عودة روح التحرير يا روح القلب الملائكية
سلامى الى جو يا ام يوسف
تحياتى

شوفي انا معديه من هنا بس عشان اقول لك ان المدونات وحشتني ومدونتك من المدونات اللي اشتقت لها كثير

اتمنى ان مصر تطلع 30 سنه قدام بدل ال 30 سنه اللي انحسبت عليها

حبي واحترامي

بقت مهزله بجد

للاسف مش شايفة اي بريق امل

أأأأخ

يا فاتيما بأمانة مش عارف اقول أيه

كتر خير الناس

ربنا يصبرنا

مش مهم لون بدلة الرقص المهم ولامؤاخذه الحشو

أبيض ومربرب بالصلا عالنبي

السلام على احلى مدونه
مش هتكلم عن البوست
لان اخواتى المدونين ردوا
انا بحب اقولك انى اتشرفت بمعرفتك كتير رغم اننا متكلمناش كتير
بس القلوب اكيد عند بعضها
ياريت تنورينى فى حفله عيد ميلادى المتواضعه

صباح الخير والنور والبركة يا شقيقة الروح

هي ضلمت اوي كده ؟ ربنا كبير

الرسول عليه الصلاة والسلام قال بما معناه ان اهل مصر في رباط الي يوم الدين .. ده الشيء الوحيد اللي لما افتكره بهدى شوية واقول مش ممكن هنتفرق مهما حصل
والاجماع في شعبنا بيدي شرعية لاي مطالب عشان كده بتمنى يوم تمانية ده يكون الاجماع شامل وعام

خايفة ما انكرش بس متفائلة اننا مش ممكن نضيع ثورتنا هباء
قولي يا رب

تحياتي لماما
ودعواتي ان ربنا يرجعلك يوسف ويقر بيه عينك قريب

بحبك هه
:*

لكـِ الله يــ مـِـصــر ـــا


لا حول ولا قوة الا بالله


:(

اه

قلبي وجعني
هي كدا فعلا

للاسف
الكل شايفها كدا

بس هي
(معركه الم...وامل)
بس خلااص

إرسال تعليق