.

.

دليــل المـــرأة الـذكـــية .. لبــرج القــاهـــرة كـــندا العــــباســـية  

Posted by: فاتيما in





بصوا 
مبدئياً كدا 
هما أربع حتت مفيش غيرهم 


(1)
برج القاهرة 
ف وضعية الوقوف ع السور


(2) 
مستشفى العباسية 
بأحد سراير عنبر الحالات الخطرة

(3)
متن طائرة متجهة لكندا 
بعد قرار نهـــــــائى بالهجرة

(4)
او تحت شاهد احد القبور 
بترب الامام  أو البساتين
عشان هواها بيرد الروح 


و مفيش مطرح خامس حاليا 
يتفتق عنه ذهنى 
وأقدر اخمن بيه اين ممكن تذهب اى واحدة 
سبقتنى فى هذه المأساة التى بدأت 
لما فكرت ف يوم ... تحب الجدع دا 



واللى بيسأل الجدع دا مين  ؟
بعيد عنكو 
وعن السامعين 
وربنا يسترها عليكو  ويكفيكو شر طريقكو
يبقى السخصية الاسطورية الخزعبلية 
اللى طلعتلى إذ فجأة من كتاب ألف ليلة وليلة 
وملهاش مثيل ولا زى  ولا شبه
ف السابقين ولا اللاحقين
وعشان ربك رب قلوب و شكله رااااضى عنى 
خلانى اقابلها و اعجب بيها و انتص ف قلبى 
ومش بس أحبها 
دنا حبيت ودبيت 
و دوبت و اتسحلت 
ووقعت من سابع سما ولا حدش سمى عليا 



ولا حدش قالى حاسبى يا فاتيماااا
ولا خلى بالك 
ولا حد هوب ناحيتشى
ولا نسحنى نسيحة .. صريحة مريحة 
مع ان الستات لبعضيشها 




وانا اقول راحوا فين ... راحو فييين  ؟؟!!
اتاريهم يا عينى 
متوزعين جغرافيااااا
 عباسية 
كندا 
البرج .... و البساتين 
بينما لحد دلوقتى لسه مخترتش
و أحدد بعد اتجاهاتى 
و يتملكنى التردد والقلق
لحد ما بقيت ف حالة يرسم لها
و  يا جماعة شوفولى حل ف القصة دى
عشان انا خلااااااص 
أستوييييييييت



آه والنبى ولا ليكوا عليا حلفان
ومش هخبى عليكو
واحنا جيران اديلنا بتاع 3 سنوات ونيصف
و الأخوية .... تلزمنى ابعبعلكو
والجدعنة .... تلزمكو تلحقونى



و يعنى أصله مش معقول الحب
هيبقى بالشكل دا
كله ضرب ضرب
ومفيش شتيمة خالث ؟!!
و يعنى برضك انا مش كل ما هكبر شوية
و اقول خلاص يا بت يا فطمطم
انتى هترتاحى و ربنا هداكى 
قوم يطلع بعد الصبر وطولة البال مفيش فايدة
والاقينى بعانى من اعراض المانخوليا ساعات
و البارنوايا اوقات
وصداع نصفى ف دماغى م الناحيتين
و الاستبحس بيتطور و بقى واصل لمراحل نهائية
 و بعد الغدا يومياً الاقينى بقف
ساعة ف البلكونة 
عشان أحلى بمشابك الغسيل


و بجد ... الحالة بقت خيطرة
و اعملولى كونصلتو لأنقاذ حياتى 
اشمعنى مبارك ؟





و أصل الراجل اللى بحبه دهون هيجننى
و هو صحيح من قبل ما اعرفه 
وانا كنت صواميل مخى فاكة شوية
بس مع احتفاظى ببواقى عكل
 اللى يشوفنى كان بيتخم 
و يقول عاقلة ورزينة 
الا ان من ساعة ما حبيت سيدنا الأفندى
و البرج الوحيد اللى كان فاضل جابوله امر ازالة 
مما ينطرررررنى للجوء لبرج القاهرة 
عشان اتمم المهمة



وصحيح كمان حبيب قلبى اللى مغلبنى 
قالى من اول لحظة عرفنا فيها بعض 
انه مجنون رسمى فهمى نظمى  
و انه أشبه بكائن فضائى
واللى تستحمله بقى تورينا شطارتها  
و غالبااااا بعد الضنا والعذاب اللى هتشوفه
هتكتفى بإن يبقالها الجنة و متدورش ع الدنيا 



بس يعنى سيادته كنت عاوزة أقوله
يا رييييت ميعبش ف مخلوقات الله
ويفترى عليهم 
 لهو الكائنات الفضائية الكومل 
تيجى ايه ف غرابته ؟!
 وتيجى ايه ف تصرفاته العجيبة؟!
وتيجى ايه ف استحالة توقع خطواته القادمة ؟!
و تيجى ايه ف قربه فجأة وبعده فجأة ؟!
وتيجى ايه ف رقته وقسوته سوا مجتمعين ؟!
وتيجى ايييييه اللى بيعمله فيا 
من ساعة ما حبيته ؟!!



دى اغلب م الغلب 
دى تعتبر عيل لسه مولود من نص ساعة
دى تعتبر حمامة وديعة جناحاتها لسه بتنّبت
دى تيجى ملاك لسه نازل حالاااا م الجنة
دى تيجى جبل جليد على خط الأستواااااء
المخلوقات الفضائية دى بائسة
بالمقارنة بالضنا والعذااااب والحيرة 
اللى بيشوفوهم سكان الأرض
لما يقعوا ف غرام نفر ما و يجننهم زى حالاتى 
ويخليهم يمشوا يسألوا اللى حواليهم 
ويسألوا كمان نفسهم 
هوه انا كويس؟

هوه انا حلو ؟
هوه انا غلطت ف حاجة ؟
 هوه انا كان مفروض اعمل ايه و معملتوش ؟!

طب انا عملت ايه و كان المفروض 
ميحصلش طيب .. عشان معملوش تانى  ؟؟!!



وتيجى الاجوبة من كل حدب وصوب 
كلها عكس بعض
لأ ... اصل انتى بتدلعيه قوى 
لأ ... أصل انتى لازقة فيه بزيادة
لأ ... اصل انتى مش قادرة تفهميه 
لأ ... أصل انتى فهماه لدرجة بتخوفه منك 
لأ ... أصل انتى بتدلدقى عليه الحب بهبل
لأ ... أصل انتى بتخنقيه وبتسقطى عليه مخاوفك
لأ ... أصل هوه بيحبك بس مش عارف يتصرف
لأ ... اصل انتى المفروض تبعدى لأنه مش عاوزك 
يا لهوووووووووووووووى 
طب  مع احترامى للجميع
انا قررت اعمل الحاجة الوحيدة 
اللى بعرف اعملها 
و هيا انى أحبه وبس
بس سيادته يبعد جنانه دا حبة 
و بس يسبنى اتنيل احبه 
وبس يبطل يقف لقلبى كل شوية 
ويعملى مطبات ؟!!





ويخلينى أسأل روحى كل يوم تقريبااااا
الله.. هوه الراجل دا بيعمل معايا كدا ليه ؟!!؟

 
اكونشى بفكره بمدرسة
كانت بتضربه ف تفولته المعذبة 

ولا اكونش شبه مدير او رئيس عمل 
كان مفترى وظلمه ف يوم ما
ولا اكونش رخمة وتقل دمى 
ينافس ف كثافته غتاتة جمال بن مبارك 
 
ولا اكونش قتلتله قتيل 
فى عالم موزاى لعالمنا
وانا مش واخدة بالى مثلااااا 
فالجدع كدا تلاقيه مش طايقنى  
 اوقات و من غير سبب منطقى  ؟




آه صحيح
هوه ماله بيعاملنى كدا ليه  ؟
طب دنا بحبه و بموت فيه
كل يوم و بسأل عليه
اتصالات وبتصل 
ايميلات و رسايل و ببعت
وسؤال عن اخباره وبسأل
واهتمام بأحواله و مش ببطل
بتابع كل كلمة وحرف يكتبه وينكتبله
وينكتب عنه
واكلمه بحرارة .. فيرد بالقطارة
و من حبه كل لحظة بقاسى 
و الراجل الغامض متخفى
و عاوزة امسك نضارته دى ادشدشها 
ميت الف حتة
بس حد يلايمنى عليها وعليه



ايه بقى ؟
طب لو مش عاوزنى ... يقول
امشى يا ست انتى
انما .. غالبا مبيقولشى
و لو صحى م النوم مكتئب مرة 
وكاره الدنيا و قالها .. بيرجع ف كلامه



و انا كمان .. 
ميت مرة اقوله ... نبعد
واطلع عيلة و تنهار مقاومتى العنيفة الضارية
بعد تقريبا ساعتين وتلات دقايق
لما الاقيه وحشنى و قلبى خطفنى عليه 
والاقينى عاوزة ابعتله رسالة او ايميل
 او نفسى اسمع حسه او اطمن على اخباره
 او اعمل أى حاجة ف أى حاجة ... كالمعتاد
لأنى مش متخيلة اصلا ان ايامى
و حياتى كلها 
ميكونش فيه حاجة منه 
ولا تخصه ولا تبعه ولا عشانه




 و بحبه والله
حب بيخوفنى عليه كأنه ابنى 
حب بيقلقنى عليه كأنه اخويا 
و يدوبنى فيه  كأنه تؤام روحى
وكمان حب بيغيظنى ويفرسنى
واللى زاد وغطى و .... جد
انى بقيت بغير عليه جدا من أى حاجة 
و أى حد أو حدة تحديداااااا تقرب منه
ولو قريت تعليق لواحدة بتكلمه 
ولو بلطف واخوية
اتقمص ساعتها .. روح واحد من أخوة 
سيدنا يوسف وابقى عاوزة ارميها للذئب 
بس ذئب بجد و بحق وحقيق 
مش زى الحكاية الأصلية 


او على أخف الاحوال 
لو نقحت عليا إنسانيتى
افكر بس انى اعلقها مثلاعلى عامود ف ميدان التحرير 
الساعة 2 العصر لمدة اسبوع .. مممممم 
عشرتياااام بلا ماء و وبعدين انزلها تانى 
وكفاية ... عشان مبقاش مفترية






وهما صحيح البنات بتكتبله عادى و بأدب
وهوه كمان بيرد بادب
بس انا ساعتها بيركبنى عفاريت 
تفتقر تمامااااا لأى نوع من الأدب
وبتخلينى انكش على حل جذرى للقصة دى
ملاقيش ... غير حاجة م التلاتة


1
يا امّوت كل البنات والستات
على كوكب الأرض

2
يا ابطل احبه 
فبالتالى ابطل اغير عليه 

3
يا نقرر نتجوز فالكل يعرف انه محجوزلى
ومفيش واحدة بقى تحط جريت اكسبتيشن
وتهوب ناحيته لأغوزها واريحها وارتاح 



ونظرااااا لأن الباشا ... ممكن يقبل يعترف
انه قتل قتيل و هوه مقتلوش
ولا يقبلش يقول لواحدة عموماااا .. نتجوز


ونظرااااا لأنه من خامس المستحيلات
انى ابطل احبه 


فيبدو ان الحل الوحيد انى اتقمص 
روح الاختين الحلوين ... ريا وسكينة 
واعمل مع كل الحريمات ف البشرية 
الانسانية
وافتحلهم المندرة 
فيا لهوبالى ياما الحقووووونى 
وشدونى من على حافة الجريمة 
لهبقى قتالة قتلة 
و اخلص على نص الكوكب
و هبقى خطر ع نفسى
وع الامن العام بسبب الراجل دا 



طب اعمل ايه ف الورطة دى 
اعمل ايه ؟ 
اعمل ايه ؟ 
و الجدع دا هيموتنى ى ى  ناقصة عمر
عاوزة اقتراحات قابلة للتنفيذ 
يعنى اعمل ايه معاه  ؟


 جالى اقتراح اجيب الأليكتريك شوك 
بتاع الشرطة العسكرية واكهربه 
عشان ميبعدش عنى اكتر من تلاتة متر
بس صُعب عليا .. 
ثم انا معنديش وطنية ؟!!
لهو السد العالى اتعمل 
عشان نهدر الكهربا ف الحاجات دى برضو؟!



وجالى اقتراح تانى انى اخطفه 
و اعمل لأهله فضيحة
ولكنى تريثت وعقلت و قولت لأ .. بلااااش 
سمعته برضو و احنا عندنا اخوات صبيان



طب ايه 
اعمل ايه اعمل ايه ؟!!
ادونى إقتراحات 



  من ناحية انه تقيل وراسى
آه
 هو كذلك
بس لو التقل صنعة
 محنا حلوين يعنى ونتحب برضو
و لا يعنى 
 كل ذنبى شدة حبى
على رأى الله يرحمه شاعرنا ابراهيم ناجى


 وأكمن احنا رومانصيين
على حق ربنا  قوم حبايبنا يعملوا فينا كدا ؟؟!!




لأ بقى 
دا ظلمون بين
فين المنظمات الحكوكية
اللى نشطت إبان الثورة
وفين اليونسيف بتاعة العيال المنطهدة 
 وفين الامم المتحدة بكل مؤسشتها
تيجى تلحقنى و تلحق قلبى
اللى كل المواثيق الدولية لحقوق الأنسان 
ف العالم أجمع لا تقبل بأى حال من الاحوال 
اللى بيجراله بوتيتااااا




انا بتعامل معاملة لا تليق بسمعة مصر 
ومكانتها بعد الثورة
وبلاش يبقى على قلبكو مراوح
لبعدين هيلارى تسبلنا عينيها و .... ترتجل 
و تطلع تقول بوقين وحشين ع البلد
وتبرطملها بكام كلمة ع الشرعية
ومش بعيد نلاقى الناتو بدباباته جايين 
من ناحية ليبيا وترجعوا تندموا 
وتقولوا يا ريت اللى جرى ما كان




و ايش معقول كل دا يحصل 
عشان انتصيت ف قلبى وحبيت
لأ ....  
حبيت ايه
دنا اتنيلت
اتدهولت 
اتكعبلت 
اتكعورت
ادحدرت
وقلبى راح ف الوبا
واقر واعترف انو انضحك عليااااا



و زمان كانوا بيقولولنا ان الحب بهدلة
بس محدش قال انه بهدلة
وبعترة وشحتفة و عياط 
و قلق واكتئاب و انزواء
و سهر و خوف وترقب
و حنان وغرام وانتكاااام 
و جنان اصلى بتاع بلاده 



ولو عبناصر الله يرحمه تخيل و لثوانى 
ان انجازه العظيم يوما ما 
هيكون وسيلة مواصلات للآخرة 
كان نسف البرج دا 
أو مبناهوش من الأساس 
انما نقول أيه .. دنيا 
ربنا بيسخر ناس تبنى لناس 
وناس توصل ناس 
و ناس تحب ناس 
وناس تجنن ناس
وناس تتجنن بناس 


وقصره وم الآخر كدا
و انا و قلبى هرمنا ..هرمناااااااااااااااا
واستويتنا والنبى



و الحقونى عشان مهوبش 
نواحى البرج ويقعدوا يقنعونى ساعتين 
انى مش بالونة او طيارة ورق


ولا اهاجر على كندا كمان 


زائد انى مليش مزاج اتكهرب الأيام دى
و يقال ان تحت الأرض كتمة خصوصا ف الحر

واكيد مش عاوزة اروح القناطر
عنبر السفاحات الفاتنات

 
وحيث اننا ف ايام مفترجة
 و كل سنة وانتوا طيبين
و رمضان كريم 
و يجعلها سودا ع اللئيم

فياريت توجهوا معايا نوداااء انسانى
لكل العالم اللى بنحبهم 
و بندوب ف تراب رجلهم
و بيشحتفونا عاتيشفيا رغم كل الحب


ونقولهم 
  شوية حنية يا جماعة 
الحنية مبتضرش

وشوية اهتمام من فينة لآخرى 
الأهتمام مبيعضش

وصحيح حبيبك يبلعلك الزلط 
بس اوقات ممكن يجيله عسر هضم


فلو كان حبيبك عسل 
اوعى الزلعة تنكسر


و دلعونا حبة .... تزدادو محبة


و التوك توك دا انا جيباه تقسيط
و بعت عشانه عفش البيت


ومتبصليش بعين رضية
انا استوييييت يا عنيا


وانا بحبك يا حبيبى 
و حياة ربنااااااااااااااااا
ليه بتعمل ف قلبى كدا ؟!!

والصبر من عندك يارب


وانا عادى ولا يهمنى اصلاااان

عاااااااااااااااااااااااااااااااااااااااااااااااااااا 
--------------------------
--------

بحبك
وحشتينى
انا آسف على التنفيض
أنغام (بتصرف)
------------------------------------------------------------ 

This entry was posted on الثلاثاء, يوليو 19, 2011 and is filed under . You can leave a response and follow any responses to this entry through the .

17 كــــلام بيطــبطـــب عـــلى قــــلبى و روحــــى

فاتيما
روح القلب الملائكية

انا اله الوجد رب الهيام
اضرب بسهم الوهم وهم الغرام
و هم الغرام من كتر ماهو لذيذ
رشقت انا فى صدرى كل السهام

يا عينى عليكى يا فاتيما ده انتى حالتك بقت صعبة قوى ده انتى رشقتى السهام و السكاكين و السيوف و المطاوى و كل اسلحة الغرام فى صدرك

ده على راى اسماعيل ياسين و شكوكو الحب بهدلة خرنى قندلة

بصى يا ست فاتيما انتى تزودى النظارة بتاعته بصاعق مثل صاعق النموس كل ما تطلع نظرة من عنيه تصعق فورا و بكده نقضى على كل النظرات او نزود النظارة بشبكة

ربنا يسعدك يافاتيما و يريح بالك و يريح قلبك يا روح القلب الملائكية

تحياتى

الكوميديا السوداء


برغم كم التهريج الواضح و ما يُخفى الحُرقة اللى ف القلب

مش عارف اقولك حل يا فاتيما

انا محتاس حوسه بقى انت عارفه بقى

بس هى كده تقسيمتها متجيش غير كده حد يحب و حد يتقل

لغاية ما احنا نفرقع

بش عارف اقول ايه يا فاتيما

بس أأمنك أمانة لو لقيتى حاجة ابقى قولى لأخوكى عليها

علشان انا فرفت خلاص

(:

و منقدرش نقول غير

ربنا يهدى

ههههههههه

ماشالله عليك

ما بطلتش ضحك والجيرن اتلموا

مقال فى منتهى الروعه

حنفيه نكت يا بنتى

بس دليل تمام احيانا بعمل زيك

ابقى هاتى سباك يغير الجلده لانغام

وحشانى كتباتك ياقمر

انا كنت دخله زى كل بوست اقرا وامش

ههههههههههه

غلبتينى المرادى

تحياتى

أنتى بس عرفينى هو مين وأنا ماعدتش أدخل عنده خالص ولا أكتب له أى تعليق من أى نوع
ماهو برضه العمر مش بعزقة :)

ماشى ياطمطم :)

أنا ابتسمت وزعلت وضحكت وعنيا دمعت

ربنا يسعد قلبك وقلبه ياطمطومتى

وفاكرة الوصية بتاعتك اخر مرة اتقابلنا ماتقلقيش

طبعا أنا مع سيادتك انت عارفة وخصوصا فىموضوع الاخوات العزيزات اللى بيتكلموا بأدب دول وبيترد عليهم بمنتهى الادب :)
وحاسة بشعورك جدا
والمفروض بقى المواقع الاجتماعية يبقى فيها اوبشن زى جهاز كشف الكدب كده بس على حاجة تانية
يبقى مثلا جهاز كشف الحب
علشان الاخوات العزيزات يعرفوا من بدرى ان الاقتراب من هذا الرجل محرم دوليا وانسانيا وعاطفيا وممنوع حتى ولو الاغراض بريئة جدا
وخصوصا اننا فى الاخر ملناش الا بعضينا يااوختشى
احنا مش ناقصين الغيرة كمان من الفريندز ..ايه البهدلة دى ؟ :)

تفرح قلوبكم قريب قوى ان شاء الله ياحبيبتى
وأنا أشهد معاكِ والله انك ماجصرتى :))
بس التجربة تستاهل ..مش كده ؟؟ :)

ضحكت من قلبي يا فاتيما ربي يفرح قلبك دائما ودائما

وحشتينى موت موت يا فطمطم ويخرب بيت دماغك العسل السكر ايه كل ده عموما انا معجبة بالبوست علشان كله فسح بس ما عدا البساتين هههههههههه

كل سنه وانتى طيبه صديقتى ام يوسف

مش عارفة اقوللك اية
مش هعرف اقوللك كلام يطبط على قلبى

الحب بيذل الحب بهدلة بجد

اصبرى يمكن يحس لوحدة وهوة اكيد هيقرى الكلام اللى انتى كتباه دة
ابقى قولنا على النتيجة ياخالتوا

يا امّوت كل البنات والستات
على كوكب الأرض

موااااااااااااااااااااااااااااااااااافق
وبشدة على الإقتراح ده

ولو مش هتقدرى يبقى اطلعى على كندا أضمن لك فى أونتاريوا شقة فى مكن راااااااااائع ومع صحبة زى العسل كمان
معاهم تنسى الدنيا وما فيها

انوى انت بس

طيب انا جاي اصبح وامسي علي الناس الحلوة واللي لما بدخل مدونتها بحس بعالم جميل ولذيذ وواقعي وخيالي في نفس ذات التوقيت
عالم سحرى يعني

ونسيب العوالم اللي هي جمع عالم ونيجي للحل المقترح
معنديش حل جدى لهذه المعضلة
بس المثل بيقول اللي ملوش كبير يشترى له كبير وبما اننا بلد من غير حاكم وكبيرنا ميشو فاكتبي رسالة اولها بسم الله الرحمن الرحيم واخرها الله الموفق والمستعان وحشوها شكوى حلزونية لسيادة اللواء الركن المشير حفظه الله تعالي وهو هيقوم بالواجب ههههههههههههههههههه

ربنا يسعد ايامك


تحياتي

ده أنتي ست العاقلين وعهد الله

يلا يا ستي شوفتي أني على حق ودائما

ماهي الحريمات مالهنش حل غير التخلص منهن نهائيا


شدي حيلك ولو محتاجه مساعده من عونيا

مش هقتل

بس

هدفع فاتورة الكهربا

ملحوظه:

ولا بلاش

هههههههههههههههههههههه ضحكتينى كتير والله يابطه

يابخته ياستى
والله الحال من بعضه

والحمد لله انى مش باعلق عنده ولا بقوله صباح الخير حتى هههههههههههههه
العمر مش بعزقه ياماما


وحشتينى موت ياقلب البحر

بسم الله الرحمن الرحيم.... الإجابة: تونس

اقولك انا حل

خدينى معاكى كندا ينوبك فيا ثواب

مستغربة الكـلام أوي :))). مش عارفة ليه

بس بجد فرحت بالكلام و ضحكتيني كتير..خصوصا تقل دم جمال مبارك دي،وحتة الإجابات الكتيرة اللي كلها بتبدأ بـ"لأ"دي أنا معاكي جداااااا فيها :).كانت بتتعبني جداجدا بجد

يارب ربنا يسعدك يا أحلى فطوم في الدنيا،و يارب.. مكونش بعلق هناك ولا عمري علقت :). بتهيألي فعلا مش بعلق عشان مش بظهر كتير أصلا .. بجد بتمنى تقدري تحققي كل اللي بتحلمي بيه يا توما..أنا رديت على تعليقك في البلوج.شكرا أوي تاني يا قمرة

إرسال تعليق