.

.

كــمــيــن العـــباســــيـة  

Posted by: فاتيما in






أينعم ... كان كميناااا
أو " كماشة " كما وصفها بدقة 
الاستاذ وائل عبدالفتاح ع التويتر امبارح 
كان مرتباً و معد سلفاً و بمنتهى الوضاعة 
اللى ظهر توابع افعال اصحابها
 على وجوه بعض المتظاهرين بالأمس
وانا حقيقى استغربت لاستغرابهم 
واستغربت اكتر رومانسيتهم ومثاليتهم 
لما جم مضروبين و متبهدلين 
وبيقولوا ازاى الجيش بتاعنا واقف يتفرج
علينا واحنا بننضرب ؟!!! 


واقف بيتفرج ؟!!!
طب ما هو يوم موقعة الجمل
كان واقف بيتفرج 
و لما سلمنا تسليم أهالى
للعالم المنوط بيها 
عمل ال dirty job بدالهم
و اتكررت الحكاية تانى 
قصاد الداخلية ف 28 يونيو
تحت سمعهم وبصرهم .. إيه الجديد يعنى ؟



يمكن الجديد .. ان قبل تحرك المسيرة 
ومن وانا ف ميدان التحرير الساعة خمسة
و الجو مغيم كدا و فيه توتر و ارتباك  
ومن قبل اصلا ما انزل وانا سامعة 
طراطيش تصريحات 
بتقول ان بتوع مسيرة النهاردة رايحين 
يسقطوا المجلس ومعاهم آل مولوتف واسلحة
ولأن الهجص دا معتاد فمخدتش ف بالى 



لما قالوا 6 ابريل مش نازلة المسيرة 
برضو مخدتش ف بالى 
ولما روحت الميدان ولقيت العدد قليل 
و لن فيه بعض الاحزاب المعتصمة
 خدت قرار متروحش
عشان تحمى الميدان برضو مخدتش واديت
ولأنشغالى ف الكلام مع احد حراس الميدان
لقتنى اتأخرت و قررت اركب تاكسى
 لحد مسجد النور
وعينك ما تشوف الا النور


سواق التاكسى فلول فلول على حق 
كعادة اغلب سواقى التاكسيات ف بلادى
ولما لقى الدنيا زحمة قعد يبرطم ان
احنا شعب كلب 
ولازم مبارك كان يضربنا بالنار 
الدنيا اتعطلت واتبهدلنا 
هما عاوزين ايه تانى 
ربنا ياخدهم بحق جاه النبى 


طبعا ف العادة كنت بدخل ف مناقشات 
واكسبها ف النهاية بالمنطق مع امثاله
بس ساعتها حسيت لأول مرة 
ان الكلام خسارة
واحوش صوتى للهتاف ... أنفع  


قعد يدخل من شوارع جانبية 
وف النهاية لقيته بيمشى جنب المسيرة
وطبعا بيشتم كموسيقى ف الخلفية
فقلت : وقفنى هنا 
رد : هنا؟
استنى اركنلك بعيد ع الناس دى 
فرديت
 انا من الناس دى
و نزلنى عشان ربنا ياخدنى ..



المهم
نزلت ولقيت العدد ماشاء الله حلو 
و الصوت عالى جهورى والمسيرة ماشية
 زى الفل 
عنها و علقت اليافطة بتاعتى 
وفيها صورة مقسومة 
نص مبارك ونص المشير 
وتحتها عبارة 
شالوا مبارك حطوا مشير
وامتى يا مصر تشوفى تغيير 
وقعدنا نهتف 
يا اهالى العباسية
المسيرة دى سلمية 

وانزلوا انزلوا 
وهتفنا بكلام كتير مش مستفز
ع المجلس بصراحة 
عشان محدش يقول بس اننا كنا بنشتم
 .. محصلش 
و كان فيه مراعاة لأبعد حد
اننا منستفزش الناس العادية ف الشارع




  
محصلش كمان ... ان المسيرة 
كان فيها مولوتف و اسلحة بيضاء
الا لو اعتبرنا غطيان ازازير المية البيضا
 سلاح 
ولو اعتبرنا المساحة البيضا ف علم مصر
 واليفط واللافتات اللى كنا رافعينها
سلاح 
ولو اعتبرنا التيشيرتات اللى الناس لابساها
و البلوزة بتاعتى انا سخصياً 
 اللى كان لونها أبيض 
سلاح !!
كدا يبقى فيها كلام تانى




المسيرة كانت ماشية ف هدوء 
والشباب من الجانبين بينظموا الحركة
 ويفوتوا العربيات والدنيا سلسة 
و تقريبا يكاد يكون مفيش اى احتكاك يذكر
الا من فوق كوبرى حد رمى علينا بودرة
 خضرا كدا معرفش دى ايه بالظبط
بس البلوزة اتبهدلت و منهم لله بقى 
انا قولت البس حاجة بيضا 
عشان الثورة بيضا 

انما يلا معلش 



 عرفت ان فيه ناس ف مسيرة الجمعة 
رمت مية من بلكونة ما
ولما عدينا قصاد عمارتهم المتظاهرين 
هتفوا :المصريين اهم .. عشان يحييوهم 
و يبستفوهم على خفيف
:)




بعض الأهالى م البلكونات
كان بيشاورا بعلامة النصر ويناصرونا
وبيصوروا بالموبايلات والكاميرات وكله آخر تمام




الدنيا مشيت كويس جدا
 لحد ما قربنا لمسجد النور 
ولما وصلنا ... وضمينا على بعض
 لقينا مدرعات الشرطة العسكرية 
والعساكر مترصصين فوقها  بأسلحتهم 
و ف وضع الأستعداد




الجموع وقفت مطرحها .. وقعدنا نهتف 
ومحدش عارف تحديدا الخطوة الجاية
و منتظرين رأى المنسقين
والناس الكبيرة 
واللى منهم اسماء ف 6 ابريل 
اللى طلعت انضمت
للمسيرة اهو ... ومعتذرتش ولا حاجة


المهم
مفيش ربع ساعة 
وفجأة لقينا طوبة جاية علينا
من شارع جانبى على اليمين 
الناس تراجعت 
وبعدين اتجه شباب من وسطنا
 يأمنوا المدخل دا 
بعد شوية قلق واستطلاع
جت المعلومات الاكيدة 
ان دول بلطجية واقفين ومستحلفين 
الشباب اتصدولهم وعملوا خط امامى 
والبنات والستات رجعوا لورا
 ناحية المسجد ومستشفى الدمرداش
وبعد ييجى نص ساعة تقريبا
قالوا نرجع التحرير منعا للإشتباك
 مع الشرطة العسكرية لأنها سلمية ..سلمية 
ونكمل المسيرة هناك
 بعد ما سدوا علينا الطريق 
وادينا حققنا جزء من الهدف وخلاص 





بيرجع مننا شوية عودة لللتحرير ..
لقوا صف بلطجية محترم 
سادد طريق الرجوع 
وبقينا زى ما قيل .. بين طرفى كماشة 
الشرطة العسكرية من امامنا
والبلطجية من ورانا 
وجنبنا كمان 
 والمشهد توتر



الشباب وزعوا نفسهم 
وبدأت المعركة
متهيألى الفيديوهات والأخبار
 هتحكى لوحدها 
بس اللى حصل ..مش مهزلة 
و لا فوضى و لا بلطجة 



اللى حصل كمين باللفظ الدقيق 
اللى حصل عار وخيانة منظمة مدبرة 
اللى حصل حاجة تخلينا نصر نكمل  طريقنا
ف الثورة دى وبحماش لا يفتر
لأن المشهد كان أشبه
 بموقعة الجمل الثانية  بكل مفرداتها 





الولاد بتواجه البلطجية بصدور عارية 
وأيدى خاوية وعزيمة لا تلين 
البنات بتكسر ف طوب الرصيف
وتديهم المدد 
وناس بتخبط ف الحديد
عشان تعمل صوت يرهب 
و ناس بتتكلم ف الموبابلات
 عشان تنقل الصورة 
وناس بتثتغيث بالتحرير طالبين مساعدة
و ناس قاعدة متنحة مش مصدقة 
وناس اوشكت ع البكاء و بتتماسك 
و ناس بتشيل ف المصابين 
وناس تجرى تساعد و تطبب 
وناس نازل عليها الصمت زيى 
 بتتابع المشهد عشان تنقله
 لو روحت سليمة




ونسيت اقول ان سنوفة
الطيارة الهيلكوبتر بتاعتهم 
كانت بتطوف فوق راسنا 
زى الدبانة 





ع الصعيد الشخصى 
مهياش اول مرة احس بكدا 
بس اول مرة احسها ..
 ومعايا جموع كتير 
كان فيهم أطفال على فكرة
ودا ينفى نية اللاسلمية
محدش هياخد عياله معاه وهوه ناوى
على خراب ودم
ولأول مرة استشعر يعنى ايه 
تبقى فــار ف مصيدة
او عصفور ف قفص و متقيدة حريتك 
 ومنتش عارف 
اللحظة الجاية ايه 
احساس غريب وموجع 

 
خصوصا لما يكون السبب ف كدا بقى
الأشخاص المنوط بيهم حمايتك 
و تخليصك من الأسر ..ف الاحوال العادية 
فإذا بيهم هما اللى حابسينك 
وحطينك ف حفرة وبيتفرجوا عليك 
وبيتسلوا 
  


ما حدث عار و خيانة 
ومش عاوزة اسمع كلام من عينة :
انتوا اللى روحتوا لحد عندهم
انتوا اللى استفزيتوهم 
انتوا اللى جبتوه لروحكم
كنتوا فضلتوا ف الميدان وبس  
عشان
احنا مش رايحين نحتل وزارة الدفاع 
احنا رايحين ف مسيرة سلمية 
نعلن مطالبنا بصوت عالى ونرجع
دا حق مكفول .. ما دمت ماشى سليم



و المجلس الاعلى
مش ربنا الاعلى 
عشان يبقى الخروج على سياساته
جريمة نكراء ومحض افتراء وكفر
ومحدش كان معاه سلاح لا ابيض ولا اخضر
واحنا بنأكد ع المطالب ..وبس 







والذى حدث بيقول حاجة واحدة
ومفيش غيرها
ان مبارك لم يرحل بعد  
وان البدلة السودا .. يا دوب بدلوها بالكاكى
والبلطجية .. شغالين الله ينور
 تحت السمع و البصر و الطلب و الأمر 




وعاوزة أسأل سؤال برىء


طب الداخلية منصابة 
و هيبتها بعافية
و مش قادرة ع البلطجية 




الجيش كمان مش قادر ؟!!!


يعنى دلوقتى ف المشهد الراهن 
مش المجلس هوه السلطة الحاكمة للبلاد 
يعنى بفترض بيهم حمايتنا برا وجوا 
اومال فين الحماية بقى 
وهما واقفين يتفرجوا علينا واحنا 
شاطر و مشطور و بينهما بنتعجن ؟!!!


وكأنها موقعة الجمل 2 زى ما قولت 
بس وقتها كان فيه مبرارت للتخاذل 
ومضغوط عليهم 
انما دلوقتى ..إيه عذرهم  ؟!!


التفاصيل كتييييير
وخايفة انسى حاجة 
بس هقولهم بلا ترتيب محدد 
حسب ما أفتكر 


انا شوفت وشوش كتير معروفة 
حضرت المسيرة من اولها
او بعدين 
لما الموقف اشتد ضموا علينا 
اتذكر منهم نوارة نجم وزيادة العليمى
وشادى الغزالى حرب وبثينة كامل
 و اهداف سويف 
ورشا عزب واكيد كان فيه ناس اكتر
نار على علم 
بس انا معرفش شكلهم 
لكن فيه وجوه مألوفة كتير كانت هناك 
ودا بعض من شواهد 
على ان  المسيرة
دى سلمية من ساسها لراسها 
وكان المشاركين فيها مش رايحين
يهدوا البلد 
ويولعوا ف المجلس ولا حاجة


خطيب مسجد النور
كان راجل ولا كل الرجال 
بداية من صلاة المغرب و خطبته 
اللى استشهد فيها بأيات عن الشيطان 
والإستعصام بالتوحد ونبذ الفرقة 
وتغليب مصلحة الوطن
و الدعوة للثورة بالنصر 
لحد ما ابتدى الموقف يشتد
 وعلى صلاة العشاء
كان بيخاطب الجيش يفتح للثوار طريق
يخرجوا بأمان ويطالبهم بالحفاظ
على ثورة مصر 
وشبابها الطاهر اللى بيفتك بيه البلطجية
 تحت سمع وبصر البريهات الحمر
والكتافات
ولحد كمان ما فتح المسجد بعد ما بدأ 
     الامن المركزى يحدف علينا القنابل المسيلة
 للدموع والمتظاهرين دخلت
 ما بين حالات اغماء 
وعدم قدرة ع التنفس ..الخ 
ورغم ان كان جايله اوامركما تردد
 بغلق المسجد
الا انه فتحه وفتح كمان السكة
 على الشارع الخلفى اللى ع المترو
عشان نروح منه بعد الدنيا ما هديت شوية 
الراجل دا يستحق كل اشادة واحترام 
ويا ريت كل رجال الدين يبقوا زيه 
كان زماننا ف حال غير الحال 


كان فيه بنات منقبات معرفش متظاهرات 
ولا من داخل المسجد .. وأظن ذلك 
كان ماشيين بيننا وقت العركة بأزازير مية 
يسقوا الناس اللى كان ريقها ناشف 
و رغم ان العبايات اللى كانوا لابسينها 
لونها أسود كعادة المنقبات
الا انى كنت شايفهم ملايكة
لابسين ابيض ...
بجد 

 
الدكاترة كمان اللى خرجوا م المستشفى
 عشان يعالجوا الاصابات ..
والدكاترة اللى كانوا مشاركين ف المسيرة 
الكل اتحرك بحرفية وسرعة
وعربيات الأسعاف كمان ..ما قصرتش 
وف البداية كان بين كل اصابة والتانية
 خمس عشر دقايق 
لكن بعد كدا بقوا بييجوا ورا بعض 
و اللى بينكسر يربط ايده 
او يمشى يعرج ..
بس المهم ..يرجع تانى يساعد زمايله


وبمناسبة زمايله بقى  
سواق التاكسى اللى كان عاوز مبارك
 يولع ف الشعب ابن الكلب دا  
والذى اوشك يحبطنى .. و لكن 
لولا ما شاهدته بالأمس 
من خيرة شباب هذا البلد الولاد 
...لأ الرجالة 
و خلانى احس اننا صح جدااااااااااا
و ان ربنا ف ضهرنا




الرجالة دى اظهرت شجاعة 
لا توصف ف كلمات 
اول ما ظهر البلطجية .. 
سريعا اتاخد قرار
الحريم ترجع لورا
والشباب ينظم نفسه 
وكأنهم عارفين دورهم ومطارحهم 
وما بين ولاد البلد بتوع المناطق الشعبية
وموتسيكل ظهر ينقل الجرحى 
وما بين الطبقة فوق المتوسطة
والفوق متوسطة 
الكل انصهر واندمج ف فصيل واحد
 وابتدى يدافع وكله بقى شبه بعضه
جندى بيدافع عن المبدأ 
ويقوم بالمهمة بلا لحظة تردد 
او خوف تبدو على وجوهم 




حتى بعد ما سفينا الغاز و فرفرنا زى الفراخ 
هما تقريبا عشر دقايق بالمللى
وخرجنا م المسجد تانى  
وف الخروج .. كان الهتاف بيرجع يعلو
الشعب يريد اسقاط المشير 
ورغم انى سمعات هتافات 
ف الميدان بعدد شعر راسى 
الا انى اول مرة اسمع النبرة والتون دا 
الزئير اللى بيقولوا عليه 
صوت كدا .. جاى من قلب القلب 
صوت فيه غضب واصرار وعند 
صوت ميطلعش غير من ناس عندها كرامة 
اترنينا علقة آه .. بس واقفين بعدها 
ومش هنسلم
 ولا نخاف
ولا نطاطى 



البنات كمان والستات 
حاجة تخلى الواحد يفخر انه
واقف وسطهن 
بداية من الهتاف والهمة والعزم 
ومرروا بتكسير الطوب والأمداد 
والتشجيع والدعاء 
ونهاية بالمشهد الختامى عند الخروج 
لما البنات اصرت متسبش
 الشباب لوحدها
وتروح ع التحرير من غيرهم رغم الألحاح 
ولما يبتدوا يرددوا كلمة
 هنرجع ع التحرير 
يلا عشان هما بايعنا للبلطجية 
خلاص القرار اتاخد ومنديهموش فرصة
فتلاقى الجملة دى على كل الألسنة 
يا نرجع كلنا
 يا نقعد كلنا
 و ننضرب كلنا 




بجـــــــــــــــــــد
طول ما البلد دى فيها الناس دى 
ولا ألف طنطاوى و مجلس 
هيقدروا يركعوها تانى 


المجلس بقى 
نوارة الاعين ... كما وصفه العوا بيه 
حدث ولا حرج 
لكن ابلغ كلام ينقال عنه ..
 انه واكل ناسه
عميل من ساسه لراسه 
بيألب الشعب دلوقتى على بعضه 
و زاقق الجماعة الاسلامية على بتوع التحرير
وزاقق البلطجية وبتوع روكسى ع الثوار
و واقف ف الركن وراسم وش البراءة 
و مشغل كتبية الأعلام الساقط بتاعه
وبركاتك يا اسامة يا هيكل
اتمنى تكون بتقبض عكمة ومرتب محترم 
يوازى بيعك لناسك يا فندم





آه ..اهالى العباسية يا جماعة 
مضربوش المسيرة
 ولا نيلة
ولا اللجان الشعبية بتاعت المنطقة 
دا كلام الأعلام الداعر
اللى طلقهم المجلس علينا
وأى حد يشوف الفيديوهات هيعرف
ان اللى حدف المولوتف واللى ضرب
ناس محترفة ... مدربة ... قابضة 





ومن شهود عيان
كانوا واقفين ف الخطوط الامامية
ان الامن المركزى كان واقف
 ورا الحاجز الحديدى
يفسج المجال للأخوة البلاطجة والشبيحة
يضربوا 
وبعدين ما ان يستعد الثوار بالرد
حتى يعود البلطجية للوراء
وينتظم صف الأمن المركزى تانى
فالشباب ميضربوش ....
يعنى يضربوا الأمن المركزى ؟!!!
عشان يقولوا 
بنهاجم الداخلية تانى وعاشر ؟




بأختصار ..احنا على حد تعبير صديق
اتعجن ضرب وشاف المشهد من اول صف
... احنا لو يهود واسرائيلين
مش هيعملوا معانا كدا
وعشان الظلم يا جماعة حرام 
خطيب الجامع بعد صلاة العشاء
صلى صلاة الحاجة وبعدها بدأ يدعى
والكل يأمن وراه
و ف النهاية استغاث ... بأهالى العباسية 
ينزلوا يحموا اخواتهم المحاصرين  
وبالفعل نزل عدد كبير منهم ف الآخر
وساعدوا ف تخفيف الضغط علينا 
لحد ما رجعت المسيرة اغلبها لميدان التحرير


التغطية الاعلامية للحدث بقى 
انا رجعت ع التحرير مع بعض الناس الطيبة
ثم رجعت للبيت عشان امى وقلقها
اتفرجت على محمود سعد 
ومش هقول هالنى ما سمعته
لأنى متوقعة أى حاجة
وأول الرقص حنجلة
والمشهد كان مترتب من اولها  
 الغيطانى بيطبطب .. ع المجلس المظلوم
ود.عمار كان متوازن .. نوعا ما 
لكن القصة اتشوهت ولم تذكر كاملة
واظنها هتحتاج شوية وقت لحد ما تتضح
بكل جوانبها للجميع ..


لكن مبدئياً محدش هينفع يتجاهل 
طريقة وعدد المقبوض عليهم 
و حالة التخاذل
 لدرجة الخيانة
ممن هم مفروض يدافعوا عنا 






و نظرية .. رنهم علقة .. عشان يتربوا 
واللى مصّريين يعاملوا بيها الثورة 
وكأنها مراهق جامح بكرة هرموناته هتركز 
ويتهد وياخدله جنب 
ويريحنا من مشاكله
و من وجع الدماغ 




ملحوظة كمان .. مع احترامى للاخوة 
بتوع الانتخابات اولا وهيا بنا ننتخب 
من واقع المشهد وتجلياته 
- ومن زمان والله وانا بقولها -
دى بلد ينفع ينعمل فيها انتخابات حرة ؟!!!




يعنى معلش
 احنا تم محاصرتنا ف مساحة 
تقريبا كدا قد ميدان طلعت حرب 
ف وسط البلد
المكان كانله خمس مداخل
الشارع الرئيسى
و شارع جانبى 
و مدخل خاص بمسجد النور 
و بوابة خروج مستشفى الدمرداش
واخيرا طريق الرجوع 



خمس مداخل و مخارج اهو 
وتم غلقها ف دقايق معدودة
والموقف اتكهرب 
واتحاصرنا بالبلطجية المحترفين
وبلطجية امن مركزى و حيطة الكاكى 
واتفرض علينا موقف ما
تطور لحدوث صراع واصابات
ويقال فيه ناس ماتت و لسه هنتأكد 




طب ايه ؟

لما موقع واحد يتلبش بالشكل دا
و ف دقايق
اومال كل الدواير الانتخابية
 ف اكتر من مطرح
 هيحصل فيها ايه وقت الجد ؟
و دى ايام شعارها الأول والاخير
يا كرسى ما بعدك روح 
لما الدواير يحصل فيها كدا
بحماية بلطجية بفلوس وملايين
حرامية الحزب المنحل ..
مين ه يتدخل ويفضها بقى ؟!!
الجيش ؟
يا لهوى

الداخلية؟ 
يا لهوتينى 

المواطنين ؟ 
يا عشر لهوات 

اومال مين ؟!!
الناتو أظن




ولا خلاص
نمشيها حزب وطنى 
ببلطجيته الحلوين 
او اخوان بتعبئته و اعداده الغفيرة ؟
وعدوا الدورة النوبة دى محبة
 ونبقى نعوضهالكم 
المجلس الجااااى ؟!!!




دى بقى الانتخابات النزيهة
 اللى ناويلنا عليها 
وعاوزينها تحصل بسرعة بسرعة 
دا اهالى العباسية كمثال
من رعبهم 
قفلوا البلكونات
وخافوا ينزلوا
 و طبعا عندهم حق 
سامعين ضرب رصاص ف الهوا 
والمولوتف على رؤوس الأشهاد
وكاوتشات مولعة وناس منصابة ودم سايح 
وكل الرتب واقفة تتفرج على فيلم الاكشن
وناقص كيس الفشار و اللب 
و كوباية البيبيس عشان الفرجة تحلو



متوقعين ايه ؟!!
ومتوقعين من الشعب دا كله ايه ؟


اقولكم انا 



متوقعين نرجع تانى نكش ونخاف 
وندخل الجحور 
ونخلينا ف اللقمة والهدمة
ويلهونا بشوية مخاوف واخبار و يشوهوا 
ف صورة الثورة والثوار
 وكفاية بيان المجلس
عن العمالة والخيانة وصربيا 
و  الروينى اللى فاضل كام يوم و يقول
زى سواق التاكسى ع الثوار
ربنا ياخدهم ... وش كدا 


و وليد كنج توت الغالى
صدمنى بوجهة نظر 
اظنها حقيقة للأسف 
بس صح و لعلها ..  خير برضو 
احنا جيل .. تعب ف الماضى 
ومش عايش الحاضر بسلام 
ولا هيلحق يجنى ثمار الآتى .. 
يمكن ولاده هما اللى يحصدوا الزرعة
بس هو مضطر يشتغل ويتعب ويتحمل 
ويحاجى ويدافع ويتمرمط ف الثورة دى 
عشان بكرة ..
وعشان الأمانة اللى شالها 
مينفعش يسيبها ويمشى ..بعد كل دا
بعد ما ربنا اداله الإشارة 
والبشارة 
و منتظره يكون قد الحمل والمسئولية 




اللى بيلوم علينا 
ليه عملنا المسيرة
احنا عملناها عشان نعلى صوتنا 
ونوصل رسالة 
ان هذه الثورة حية 
ولن تستعبد بعد اليوم لأى حد 
مهما كان  
و هذه الثورة لن توقع على بياض
لأى حد بعد اليوم 
مهما كان
و هذه الثورة لها جنود مستعدون
ميرجعوش بيوتهم تانى 
و لو رجعوا ... يرجعوا بكرامة 
وبشرف المواجهة ع أقل تقدير 


واحنا صحيح اتحطينا ف مزنق 
و اترنينا علقة سخنة 
لكن متعبناش متعبناش 
مش هنسيبلكوا مصر بلاش 




ومستعدين لمسيرات ..تانى وتالت
و زى ما خدنا الهدر زمان .. ورجعنا ثبتنا
و ردينا القلم .. وارد يحصل تانى 
و لهم ف الداخلية اسوة حسنة 
بس مين يفتكر 
ويقرى الدرس ..  ويعتبر


آخر حاجة بقى قبل ما أنسى 
انا بالمشاهدة كدا وبالنظر
عاوزة أشيد بحاجة 
ومحدش يقولى دا وقته
ولأ .. انتى بتهزرى 
 عشان بتكلم بجد

انا شوفت امبارح 
وف مرات سابقة .. طوب بيترمى 
 بمهارة منقطعة النظير
و من الجانبين ..بلطجية وثوار 
و إيه الحلاوة دى ؟
والله العظيم احنا لازم نعمل لعبة 
ونسجلها بإسمنا 
ونشارك بيها ف الاولمبيات
نسميها رمى الطوبة ..
زى رمى الجلة كدا 


بجد وحياة ابنى 
الطوبة بتعبر مسافات 
و تمشى بزواية 
وتنشن ع الهدف بحرفنة وشطارة 
.. وأذى أذى تقفيل بلاده  
و المصريين لو احترفوها 
هيضربوا فيها الارقام القياسية
و يمكن محدش ينافسهم فيها
 الا اهلنا ف فلسطين
و بعض الثورات اللاحقة 
اللى هتفكر او تنضطر تستخدم
الطوب ف رد هجوم النظام والحكومات 


بجـــــــــد مبهزرش
 احنا لازم نكلم وزير الشوباب والرياضة
يرعى الفكرة دى و يقننها
ونبطل عشوائية بقى واهدااااار للفرص



وبموناسبة الوزرا و الوشوش القديمة 
والشىء بالشىء يذكر ...
ف وسط القلق والضرب .. بتاع امبارح 
افتقدت و بشدددددددددة 
احمد شفيق 
 الله يصبحه بالخير والبومبونى 
وقولت فين أياااااااااامه
لما قال قبل موقعة الجمل 
سلامة الولاد ف رقبتى 
وبعدها وقف محتاس مش عارف
 يرد على الصحفيين بـغير ... يا فندم 
ومعرفش و معنديش فكرة و هنحقق
و ع الاقل ..  كان أرحم من عصام شرف
اللى طلع يقول 
 نبل المطالب و نبل الوسائل وابصر ايه 
 كدا كلام مايع صايص ملوش لون ولا طعم 


و من شفيق عبد مأمور لمبارك 
لعصام عبد مأمور للمجلس ..
 يا قلبى لا تحزن 
  
  

واخيرا
كل مسيرة وانتوا رجالة وجدعان 
وكل علقة واحنا قدها 
وكل كمين و حسابك بيتقل .. يا مجلس
وإحيييييييييياة النبى كانت سلمية 
ولا كانش معانا مولتوف و لا سيوف
والمسيرة دى مش ورث
دى جاية بخلع الضرس 
و فكرونى النوبة الجاية 
ملبسش بلوزة بيضـــا
عشان اللى بيتحدف علينا بالألوان 
من كل ناحية دا  
:)

------------------------------------------

الكيميائى ... أحمد سعيد عنبر العقلاء
شاهد من سكان العباسية : بلطجية انتشروا ..
6 ابريل أربع مشاهد ورسالتين :سيد فتحى
احالة بلاغ احمد غربية ضد أدمن آسفين
صديقى ... نجلاء بدير 
تحليل نجلاء بدير عن موقعة العباسية: هنا و هنا
الشيخ حسنين النجار : شهادة عن التحرير
امام مسجد النور ... هشام الصباحى
من التحرير إلى العباسية ..زكى سالم 

صباحاتى الأربعاء 27 يوليو
اهلا وسهلا وصباحه ومساه عسكر 
موقعة العباسية بالفيديو ..المصرى اليوم 
شهادة علاء عبدالفتاح عن معركة العباسية
صباحاتى الأثنين 25 يوليو

This entry was posted on الأحد, يوليو 24, 2011 and is filed under . You can leave a response and follow any responses to this entry through the .

56 كــــلام بيطــبطـــب عـــلى قــــلبى و روحــــى

ينفع فى وسط كل النكد ده أقولك يابختك انك شفتى وحضرتى موقف زى ده
طبعا مش عشان الذعر والضرب مع انهم فى المواقف دى بيبقى ليهم معنى عمره مايتنسى وذكريات تحكيها ليوسف وولادك التانيين ان شاء الله
ان البلد دى كان فيها حاجات وحشة ماسكة فى رقبتها بس ربنا من حبه فيها رزقها برجالة ولاد وبنات هى تستاهلهم وهم يستاهلوها

انا اخدتها فيس بوك بعد اذنك
ونهارنا نادى ونهار الندل مش باين

ينفع يا فيدوووو

ينفع جدا
لأنى فعلا فخورة
أنى كنت هناك

اقولك على حاجة
نسيت اكتبها ف البوست
يمكن حسيت انها ممكن
تكون احساس شخصى بحت
بس بجد حسيتها قوى انها عند الموجودين واللى معرفهموش

اللى كان معاه مية خلصت بعد ساعة تقريبا م الحصار دا
لما ابتدوا البنات المنقبات يوزعوا علينا المية
كل واحد فينا وأكدا اجزم وازعم وكل حاجة ....ف هذا السياق
اكاد اؤكدلك اننا كلنا كنا بناخد بوق واحد ونقف ..
عشا بنفكر واحنا بنشرب
طب لو قعدنا اكتر
طب لو فضلنا كدا لحد بكرة وبعده
طب لو حد حالته سئية
فقينا نشرب بوق وندى الازازرة لغيرنا
رغم ان ريقنا ناشف وعطشانين
بس احساسك ان اللى موجودين كلهم بيشاركوكى ف المية دى
ولازم تعملى حسابهم ومتفكريش ف نفسك
انا تصورت ان لوحدى بعمل كدا
لقيت اللى جنبى واللى بعدى والكل تقريبا عمل كدا
يا دوب بق واحد
ويجرى يشوف هيعمل ايه

لما خرجت م التحرير كنت رايحة المسيرة لأنى مقتنعة بهدفها والمطالب بتاعتها
بس كمان رغم معرفتى بالخطر اللى ممكن يحصل ..
كنت عاوزة اروح عشان ازود عددهم ..
معملتش حاجة يمكن
بس حسيت انى اصفت
ولو بنقلى بعدين للى حصل

نهارنا نادى
طول ما فيها قلوب كدا

و كل ندل ان شاء الله
هيحصل اللى جابه


المدونة كلها تحت امرك
يا حبيبة قلب طمطم
:)

انا شيرت البوست عندي في الفيس وفي بيج المدونة كمان

وبعد اذنك هنزل بوست فيه لينك البوست دا

الحمد لله انك بخير

والحمد لله ان مصر لسه فيها الخير

يارب احمي البلد دي وانصرها

ألف الحمد لله على سلامتك يا فاتيما
ربنا ستر إمبارح والحمد لله
عارفة بقى أول مكاسب المسيرة دي إيه ؟
روح الميدان رجعت تاني
روح الثورة بجد
كنا واقفين بالليل وكأننا في يناير

اتمنعت رسمي من النزول امبارح
وكنت هتجنن علشان انا مابعرفش اسمع الكلام بس اللي حصل بقا

وكنت منهاره وانا بشوف وبسمع الاخبار
بس عملت لنفسي مهمه من البيت ان اعقل كل اللي بيقولوا خربتوا البلد

وماكنش ليه حيلة غير العياط عياط ماعيطوش من وفاة بابا

وحسبي الله ونعم الوكيل في اللي عايزين البلد ترجه لورا
بس مصر مش هترجع لورا والمصرييييين مش هيضحك عليهم تاني
والثورة مستمره رغم انفهم كلهم

وحمد الله علي السلامة

كــــــــيارا
-------------

الله يسلمك يا كوكى
والمدونةكلها تحت امرك
يا بنوتات يا عسولات

اتفضليها يا حبيبتى


وعلى جنب
انتى كمان
وحشتينى
:)

kingtooot
----------

الله يسلمك يا وليييييييد
انا بخير يا غالى
والحمدلله


كان قلبى حاسس
عشان كدا اصريت اروح
رغم اللى سمعته من صديقك العزيز
واللى اتمنى مكونش ضايقته ولا حاجة



عارف؟
اللى بيحصل دا
انكشاف
حاجةكدا من ربنا
ترفع بيها الغمامة عن العيون
ليها تمن
بس يستاهل تعبه

الحمدلله انها اظهرت غبائهم
و عملت فرق

الحمدلله
تبقى العلقة بفايدة
آه قبل ما انسى
سلامى لبوبو وبيكا
واللينك اهو
:)

http://www.youtube.com/watch?v=xwfucVfNJ-g&feature=player_embedded

شمس النهار
----------

ازيك سا شمس نهار المدونات وقمرها
معلش
مش لوحدك اللى اتمنعتى
ناس حلوة كتير
ولهذا
اللى كان ف ايده ينزل
متاخرش لأنه كان حاسس كدا
ان الحكاية فيها قلق

الحمدلله
وبعمل زيك كتييييييير يا شموسة
وعندى ف الشغل والشارع ..الخ
بس احنا خلاص
عدينا مرحلة الكلام
وفيه حاجات مش هينفع تسيبيها تبرد لازم تطرقيها وهى ساخنة
والا هنرجع تانى للى فات
انا شخصيا
معنديش استعداد ارجع تانى لورا
اموت احسن
وان شاء الله كلنا نعيش
وهما اللى يغوروا من على قلب البلد اللى لسه عاوزين يخربوها
كمان وكمان
وياخدوا اللى فات والحالى واللى جاى كمان
وفاكرين المصريين هيسكتولهم

خالص الحب ليكى يا حبيبتى

وانتى كمان وحشتينى جدا


عارفه يافاتي الفتره دي بتفكرني بالضبط بالفتره بتاعت حسنى

نفس التفكير العقيم ونفس ردود الافعال هما مش بيفكرو

حافظ نش فاهم

مش فاهمين ان الناس خلاص صوتها طلع وانفجر بركانها ويستحيل يخمل تاني

----
بحبك

طبيعى جدااااااااااااااا ان اى حد كان عايش فى زمن مبارك ورضى بالفساد اللى كان فيه استحالة يعنى هيجى فجأة وهيكون حابب الاصلاح والتغيير .. اكيد هيكون ماشى على خطاه
فى كام واحد كده لو تلاحظى كان عمرهم مااتغيروا طول المليون الف سنة بتاع حكم مبارك .. كان بينهم زفت الطين وصفوت الشريف .. عاملين زى الفار الملزوق بصمغ

صفوت الشريف ده كان عامل اصلا شرايط مصور فيها افلام اباحية لجمال مبارك .. ماسك عليه زلة عشان عمره مايطلع من الحكم وده اللى كان حاصل فعلا .. واكيد طنطاوى نفس الحال والعمس صحيح .. اكيد برده مبارك ماسك عليهم زلة او عارف بلاوى عنهم

كان المفروض راس التعبان دى تتقطع من جذورها .. وقت الثورة كان المفروض كله يتشال ...


بالنسبة لسواق التاكسى .. فى ناس كتير من كتر ما اتعودوا على التنازل فى حياتهم عن حخقوقهم مقابل ان مفيش اى خناق او مشاكل والحياة بيس ... فبقوامستغربين الوضع

ربنايهدى بجد

متنزليش بعد كده الثورة ببلوزة بيضة .. حرام هتبوظ

انا صعب جدا انى اقرى بوست طويل .. بزهق من القراية على الشاشة وخصوصا ان الشاشة عندى اصلا بايظة

بس البوست جميل قوى واول مرة احس ان الحقيقة بتتنقل من واقع الحدث .. كل الاعلام عمال يعك والناس عمالة تعك وتنقل كلام غلط ..

اخر حاجة .. انا من زمااااااااااااان جداااااااااا وانا متابعة مدونتك دى على فكرة واسمها كان دايما على بالى .. اسمها حلو قوى ... بس نادرا ما بدخل اعلق ونفس الحكاية عند خيخة برده .. فتأكدى انى دايما بقرى كل بوست بتعمليه

فاتيما
روح القلب الملائكية

اولا حمد الله على السلامة

انتى عارفة يا فاتيما انا لبست انبارح و رايح التحرير لكن شعور بالاكتئاب و القرف مسكنى فقررت انى مروحش
لكن لما عرفت بموضوع العباسية حبيت اروح لكن الطريق كان مقفول من كوبرى القبة ففشلت فى الذهاب
فاتيما رب ضارة نافعة لعل ما حدث يرجع روح التحرير اللى انا شفتها فى البوست بتاعك التكافل و الحب و الايثار الكل فى واحد و لعل ما حدث يجعل التحرير يبدء فى التنظيف الذاتى و يطرد كل دخيل
انتى عارفة يا فاتيما الاعلام يظهر اسوء ما فى التحرير حتى الوجوه التى تتحدث عن التحرير لا تستطيع ان تكسب ارضا حتى لو كانوا مخلصين كل من يتحدث من التحرير يا عصبى لا يستطيع ان يوصل وجهة نظره يا متعالى يفقد تعاطف الناس معه يا جاهل يثير سخرية الناس عليه يجب اختيار الوجوه التى تمثل التحرير

لحظة هدوء لالتقاط الانفاس و اعادة التفكير و البناء افتقدتك امس و حزين لعدم ذهابى و اهو درس تعلمته
حمد على السلامة يا ام جو

شقيقة الروح
انا فخورة بيكي يا فاتيما
تقريبا مش ببطل خناق مع صديقاتي ومع اهلي علشان فاهمة كل اللي حكيتيه اووووي وشايفة الكماشة اللي اتعملت ومتفهمة جدا يعني ايه عايزين يوصلوا صوتهم لاقرب مكان يمكن مش سامعين اولي الامر .. لكن كلهم هاجموني وقالوا ليه يروحو يستفزوا المجلس واهل العباسية والخ الخ
كلام يحرق الدم من عينة :بيتحدوا المجلس وكده
قلت وايه يعني حتى لو اتحدوا المجلس العسكري ما دام على حق وعايزين حق وسلمية ما حدش سمعني
بجد سعيدة انك وضحتي الصورة لاني محاصرة وممنوعة اني اشارك
وسعيدة انك انقذتيني من حزني كنت خلاص ابتديت ايأس اني فاهمة حاجة خصوصا اني متابعة جيدة لقناة التحرير واللي حصل منهم امبارح احزنني جدا

الحمد لله على سلامتك ربنا معاكي
ومع كل شباب مصر الشرفاء
واي حد هيتقال عليه اجندة او ممول او بيتحدى المجلس والكلام ده يبقى اكيد اكيد مصري ووطني اكتر من اللي بيقول

محبتي

الحمد لله على سلامتك يا فاتي

وبجد دي حاجة تفتخري انك حضرتيها وكمان حكيتي عنها وكإني أنا وكل اللي قرأ الأحداث اللي حصلت كنا معاكي


في تعتيم اعلامي غريب عن اللي حصل في العباسية

وفعلا لو الثوار كانوا اسرائليين وصهاينه مكنش حصل معاهم كده واتقال عليهم كم الكلام المقزز ده انا مش عارفه ايه اللي حصل للناس وروح يناير راحت فين ولا زي ما بلال فضل بيقول ان في بلدنا كل شيء ينسى بعد حين ولا الناس أخدت على الذل والهوان ولا في ايه !! سواق التاكسي ممكن نقول انه مش فاهم لكن اللي على الفيس او المدونات او تويتر عذرهم ايه ليه مش فاهمين ان المشكله في اللي مش بينفذوا المطالب مش في اللي بيطالبوا بحقهم

سعيدة جدا برصدك للأحداث وبتدوينتك


بعد اذنك هاخد لينك البوست ده عندي في تدوينة

ربنا يكتر من امثاللك يافاتيما ربنا يكتر منهم بالفكر والفعل

صحيح كمين العباسية ولسة ياما هنشوف كمين ورى كمين

هوة احنا فاكرين ان الثورة هتنجح بالساهل كدة

اكتر حاجة بقيت اكرها فى الناس لما يقولوا كفاية كدة بقى انتوا عاوزين اية
نفقس الجملة بيقلوها من اول خطاب لمبارك كفاية عاوزين اية وتانى خطاب لحد مااتنحى وقالوا كفاية برضة وهيفضلوا يقلوا كفاية لانهم جبناء او مش مستوعبين ان ممكن يحصل اكتر من كدة مش مستوعبين ان مصر ممكن تتنضف من الحرامية والعملاء


بس انتى اوعى تتنازلى وتقلعى البلوزة البيضاء خليكى لابساها فى كل مسيرة وكل ماتنزلى التحرير

عشان دلوقتى ثورة نضيفة ضد ناس وسخة

كـــيارا
--------
معاكى حق يا كيارا
دا احساسى انا كمان
والجمعة الاخيرة ف الميدان
لما شفت العدد هزيل
بشكل محزن
قولت لروحى ..الثورة رجعت غريبة
زى ما ابتدت غريبة

بس المسيرة رجعتلى حماسى
وتفاؤلى

انتى كمان حبيبتى
يا بنوتات يا عسولات

riri
----

ازيك يا ريرى
بصى

انا كمان عارفكى جدا
وبقرالك كتير
وكتيييييير ببقى عاوزة اعلق عندك
مبعرفش
وسقت عليكى عمرو يقولك
معرفش قالك ولاّ لأ
انتى بتكتبى حاجات بتلمسنى قوى
و كنت منتظراكى يوم التبرع بالدم
عشان اخدك ف حضنى اول ما اشوفك
وبدون ابداء اسباب ..
بس انتى زوغتى
:)

روح قلب ماما
نورت ..
ويا ريت متغبيش عنى
وعن انك تطمنينى عليكى
وافتحى التعليقات ساعات
عشان اللى عنده كلمة محشورة ف قلبه ..يطلعها يا بنتى
:)

كل كلامك ف التعليق ع البوست
متفقة معاكى فيه جدااا
وملحوقة بإذن الله
انا متفائلة

سلامى لعمرو
وربنا يسعدكو

ابراهيم رزق
-----------

ازيك ياابو العيال
ولا تندم
ملحوقة بإذن الله


واما عن المتحدثين حاليا باسم الثورة
بص يا ابراهيم
انا عندى نظرية ف الحكاية دى
وغيرها
وعارفة انها نظرية قد تبدو غير عقلانية بس بتجيب معايا نتيجة

القراية الكتييييير بتفرق
وعدم الإعتداد للأسماء اولاً قدر الأنتباه للكلام و زى حتت البازل تحط حاجة جنب حاجة كلمة جنب خبر جنب تعليق لحد ما توصل لصورة شاملة ..
يمكن تكونغلط
او ناقصة
او أى حاجة
بس عينك هتلقط المشهد

انا بقرى الكلام بقلبى
وبقرى الناس بقلبى
ولهذا حكمى شوية بينحى العصبية والتهريج والهيافة وحب الأستعراض والغرض والمصلحة ...الخ
وبحاول اعرف ..فين وازاى
النزول للتحرير
والشارع عموما
يعرفنى الحقيقة
لو معرفتهاش م القراية
بس احتراف قراية الجرايدمن صغرى
فرقت معايا
والله يرحمه بابا ..
ادانى كنز لا يقدر والله

اشوفك على الف خير
وسلامى لسالى وزياد والمدام
:)

rainbow
-------

ازيك يا سيدة الالوان
انا كمان زيك
بقف اتناقش كل يووووووم
تعليقا ع الاحداث
ومسمينى ف الشغل الثورجية
اللى عاوزة تخرب البلد
اول الثورة ما بدأت كنت لوحدى ومعايا 2 من المديرين و صديقة مقربة ...

دلوقتى بقى معايا اربعة خمسة كمان
مع الثورة وعن قناعة
وكل يوم يسالونى
التحرير هيعمل ايه
وايه رأيك ف كذا

بصى حتى لو غيرتى رأى نفر واحد
دا إنجاز

الله يسلمك يا حبيبتى
و كل مسيرة وارجع احكيلكم
ان شاء الله
بس من غير ضرب بقى


:)

Lady E
------

الله يسلمك يا لولووووووووو

انا فخورة وجدااااااايا حبيبتى
ومن هذا المنطلق كتبت
عشان تشاركونى كالعادة

والناس اللى بتسألى عنهم دول
هما اصلا من بدرى
مش مؤثرين
ومحبطين ..كدا كدا

واتفضلى المدونة كلها
تحت امرك

سلامى لخالتك العزيزة
وبوسات وحضونات ليكى
:)

Wella
-----

يا ويلا
دا سؤال الساعة
انتوا عاوزين ايه تانى ؟!!!


فرد عليهم فورا
طب هوه فين الاولانى ؟
مبارك اتحاكم
ولاده ووزرائه طلعوا اللى نهبوه
الضباط اتحبست وبطلوا افترا
الداخلية بتتغير
المجلس بينفذ طلبات الثورة
العمال والموظفين والشعب حاسس بتغيير حقيقى والتفات لمطالبهم
رجال الأعمال قيد السيطلرة ..
ايه
فهمونى حصل ايه
واحنا نبطل قعاد ف الشمس
نبطل امتناع عن الأكل
ونبطل شغل العيال

ووررنى كمان
ايه حصل ف البلد
من غير ضغط والحاح

والمجلس زى الفل
بس ليه مبيحاكمش مبارك
ليه مبينفذش طلبات الناس
ليه مبارك قعده طول العمر دا
وهوه اختياراته لرجالته ليها مواصفات وكلنا عارفينها
ومش هوه اللى مش مبارك
اللى مشاه ضغط الشعب
و ......
و............
يووووووووووه
وأقعد اخش ف نقاشات
لحد ما اكسبها غالبا
مش لأنى لمضة
لأ
لأن الحق معاينا
ومع الثورة الطيبة دى
ان شاء الله
طول ما احنا بنتحرك
وبنبذل كل جهد ممكن


وماما سمعتنى كلمتين ع البلوزة
لأنها هيا اللى بتغسل
و قولتلها البلوزة تخضر احسن
ولا تحمر .. م التعاوير
احمدى ربنا يا ام فاتيما
واغسلى وانتى ساكتة
:)

جملتك الاخيرة بليغة
الله ينور

تحياتى وخالص حبى يا ويلااااا

انا شيرت البوست على الفيس فى جروب كلمات قبل ما انزل الشغل
ومن غير أحم ولا دستور
طبعا مش روح قلب ماما مدونتى؟ والبيت بيتى ومطرحى :)

ولما رجعت حطيته فى مدونتى لانه بجد يستحق

تسلم ايدك
وتسلمى انتى وكل اللى معاكى من كل شر يااااااااااااااارب

ربنا ينصركم

عشان دلوقتى ثورة نضيفة ضد ناس وسخة

مليون لايك ياويلا

لا تعليق. عايز بس أعمل هاي لايت على دي:

بتوع الانتخابات اولا وهيا بنا ننتخب
من واقع المشهد وتجلياته
ومن زمان والله وانا بقولها
دى بلد ينفع ينعمل فيها انتخابات حرة ؟!!!

دا كلام مظبوط، و أول إنتخابات لازم تكون بطريقة تانية

حمدالله على سلامتك يا فاطيما وسلامه كل مصرى اصيل كان فى المسيره
انا كتبت ان مش هينفع بردوا ننقلب على المجلس العسكرى كدا هنخسر اصوات الشعب (حزب الكنبه) المتعاطف معاه والى مختلف عن حزب روكسى ومصطفى محمود
الصوره وضحت اوى دلوقتى
الواحد حزين بجد
بس فرحانه بيكم
ربنا يحمى الثوار علشان مصر

عاشقة الرومانسية
----------------

طبعا يا دودو
المدونة بتاعتك
و ميرسى يا حبيبتى

انا كمان عجبتنى جملة ويلا
:)

طمنينى عملتى ايه
ف انطحان الأكتصااااااااااد
يا بت ؟!!!
وش رافع حاجبه الشمال
وبيجز على سنانه


هه

حمد الله على السلامة يا فاتيما


مش عارف اقول ايه

وجهة نظرى
---------

مش كدا والنبى يا معتز
انتخابات ايه اللى عمالين يزقونا عليها كدا والدنيا متلبشة
غير ان الحكاية مريبة جدااااااااا
والمقصود يتصعد ناس
ويوصل للكراسى ناس معينة
واهل الثورة ياكلوا درة وترمس ف التحرير الأربع سنين الجايين بقى

الوضع الامنى
مقصود يكون منفلت و خارج السيطرة
عشان يتمرر عبره حاجات معينة
معرفش رؤيتى صح
ولا انا ببالغ
بس المشهد كل شوية بيأكد كدا
المسالة تآمرية بحتة
مش ماشية جهجهونى
كله مترتب

وعاوزينا ايه
نسكت ؟

بسنت
-----

الله يسلمك يا بسنتو
و يا عزيزتى
عبدالرحمن الأبوندى بيقول فى كلام الغنوة
انا مش هبيع الصدق بالأكاذيب
ولا قولش للحمل الوديع
يا ديب
ولاقولش للديب
يا أعز حبيب

فكرة مهادنة المجلس لحد ما نعدى
مش هتنفع
عارفة قصة العقرب والضفدع ؟
اللى يثق ف العثرب
هيتلدغ منه ...
ويموت
مفيهاش فصال دى

والذى يتصور ان الحكاية هتيجى بالهداوة كدا والمسايسة
يبقى برىءقوى

حزب الكنبة دا بقى
يسكت ويسمعنا سكاته
معملوش حاجة ف الاول
عشان يفرضوا علينا نظرياتهم دلوقتى
يقعدوا ع الكنبة مستريحين
واحنا هنجيبلهم الأنجازات مقشرة لحد عندهم
ونوعدهم هنكون ارحم من مبارك عليهم
فى كم الخسارات ...
لو خسرنا

خالص ودى ليكى

Ramy
----


متقولش حاجة يا رامى

حمدلله على سلامتك انتا
يا ر ر

:)

الحمدلله انك بخير.. وليد بعتلي يسالني على رقمك عشان يطمن عليكي بس للاسف قلتله انه مش معايا وفضلت قلقانة انا كمان..فكرت اكلم ستيتة خفت اعملها قلق ومش معايا نمرة خيخة.. بركة انك انتي والبلد بخير.. البلد بخير رغم كل اللي بيحصل

كل ده تمام ومشروع

لكن قوتنا فى وحدتنا لابد من اتفاق ضمنى على اى خطوة بين الثوار ولا داعى للتشرذم - يعنى انا اتصور لو كانت المسيرة لم تكن تحت مسمى 6 ابريل ما تعرض لها احد ولابد ان نذهب ليس لمجرد الذهاب لكن ما بايدينا هو الجمع الغفير يعنى نتفق ونجتمع على هدف واحد ونفعله كلنا كلنا دون استثناءات
ربنا يوفقك

انطحان الاكتصاد عدى على خير الحمد لله
وعملت كلللللل الرسومات بتاعته صح
وعموما انا رديت والله وبعت لك ميل يابطتى

ربنا مايحرمنى من قلقك عليا ياقلب البحر

بوبو
----

الله يسلمك يا بوبو
ويسلم بيكا ووليد
انا بفرح لما بشوفه قوى
وببعت السلام الجامد
ومتخافيش عليا
عمر الشقى بقى
:)

هقولك زى ما بقول لماما كل مرة
انتى عارفة النصايح الأمومية اياها
1- خلى بالك من نفسك
2- تركبى العجل اول ما يحصل حاجة
وانا أهز راسى واقول
حااااااااااااااضر يا ماما
وامشى

لما رجعت م العباسية بقى
ماما كانت ناوية تعمل اللى معملوش البلطجية وتهفنى بطوبة ف دماغى عشان عمايلى
طبعا هيا متابعة الجزيرة مباشر وشايفة اللى حاصل
وسألتنى خلاص اتربيتوا
ومنتيش نازلة
قولتيلها مين دول ؟
المسيرة القادمة انا اول نفر هيروح
ودخلنا ف نقاش طوييييييل
وانتهى بنفس الجملة الختامية
بتاعت كل مرة
يا ماما يا حبيبتى
حد بيموت ناقص دقيقة واحدة من عمره ؟
لو مكتوبلى اموت النهاردة
هيمنعنى حد او حاجة ؟
الرد بيكون اكيد :لأ
فبس خلاص المناقشة تنتهى عند هذا الحد
:)

وانا زيك
دايما اشوف خير ورا الأحداث دى
كفاية غباء التعامل معاها
وما يكشفه
بس عالله الكل يشوف بوضوح

بوسيلى روحك
واحضنيلى بيكا عمورى حبيبى

الطائر الحزين
------------


ازيك يا أيهاب
عاش من قرى تعليقك يا غالى
وعندى ملحوظتين بقى
1)
6 ابريل سبب رئيسى فى نزولى رغم عدم اتفاقى مع بعض خطواتهم احياناف الثورة ...لكن انا ضد تخوينهم واذا ابتدوا بيهم هيدورا ع الأئتلافات والحركات والأحزاب التانية والناس المستقلة حتى زى حالاتى ..انا نازلة احميهم واساندهم واساند نفسى لأن كلنا هدفنا واحد ..التصدى للى عاوزين يرجعونا لورا تانى
ف6 ابريل جزء مهم م المسيرة دى

2) ودى هختلف معاك فيها وجدااااااااا يا إيهاب
أى مسيرة ضد المجلس العسكرى هتقابل بالهجوم والتعرض والأصابات والبهدلة
أى مسيرة فيها تصعيد للهجة الثورة والأصرار ع المطالب هتتعرض لكدا يا ايهاب
وعلقة العباسية هدفها تركيع العيال بتوع التحرير كلهم عشان يعرفوا ان الله حق ويبطلوا يخرجوا ويعلوا صوتهم ويخلوهم ف التحرير لحد ما الناس تزهق منهم ويروحو يطردوهم ...
الخطة ماشية بتأليب الشعب ع الشعب
وبالتالى
العنف جزء أصيل فيها
سواؤء بوجود 6 ابريل من عدمه
وبالعكس بقى
ظهور 6 ابريل ف المسيرة
ادى ثقة لناس كتير جت
ان كلنا سوا وقت الجد ..نتكاتف
عشان نحمى ضهر بعض

ومنحرمشى من طلتك علينا يا فندم
:)

حسبي الله في من لايفهم ولا يعي حسبي الله فيمن يريد لمصر الخراب والدمار حسبي الله فيمن يساعد علي الفوضي الخلاقة حسبي الله في زمن الرويبضة الذي يجعل قليلة ادب مثلك تتكلم فيما لا تفهم ولا تعي اللهم ارزق صاحبة تلك المدونة بمن يذيقها سوء كلامها وافعالها وغبائها وقلة ادبها اللهم خذها اخذ عزيز مقتدر يارب عربية طايشة تا خد اجلها واجل امثالها ممن ركبوا الباطل بالحق وقالوا ثورة وهي ثورة بانجو نسبة لخالد سعيد الله يرحمة الا كان بيشرب بانجو وقالوا شهداء و90 في المائة منهم مسجليين خطر والان لم يتبقي لنا سوي المجلس العسكري فارادوا النيل منة حسبي الله ونعم الوكيل فيكم ويارب بقدرتك يقع بيت الحيزبونة دي وينجو الجميع الا هي انك نعم المولي ونعم النصير

يبقى لا نعطيهم الفرصة يا فندم
--- وعلى الاقل انا بعلق ----

الغير معرف
----------


يا خرااااااااااااااشى

قليلة الادب

وحيزبونة

وعربية طايشة تاخدنى

والبيت يقع عليا

يا لهوتينى


ليه يا حاج كدا
قلبك أبيض
انا عملت ايه بس
عشان دا كله ؟

دنا كتبت روايتى لحدث عشته
قطعت الثورة لو هتزعل الناس
من بعضيشها كدا
:)


صحتك واعصابك
وانا مستاهلش تنقهر
وتدعى عليا بحرقة كدا
البلد محتاجلك
والمجلس العسكرى
ميستغناش عنك

:)

طب كفاية هزار
وشوية جد


على فكرة
انا عارفةانتا مين
وعارفة قصتك
وحكايتك
ومن غير ما حد محدد
يحكيلى ويقولى
قريتها ما بين السطور
وبجــد والله
ودون هزار
او سخافة منى
او اهانة ...

بجد

انتا صعبان عليا

عارف ليه ؟

لانك بتكتب كلام سخيف
عشان تأذى بيه حد معين انا وانتا عارفينه
مش بتكتب كلام سخيف
عشان انتا معتقد فيه ومقتنع بيه

وصعبان عليا أكتر
لأنك ف يوم
هتندم على كل اللى بتعمله دا
ندم شديد
يمكن لو اللى أذيته
هيسامحك عليه
انتا يمكن ساعتها
اللى مش هتقدر تسامح نفسك ...


ربنا يهديك
ويهدينى
ويهدينا جميعاً


ونرجع للهزار والجد سوا
لو شايفنى زى ما بتقول
قليلة الادب
متضايقش نفسك
وتيجى تعكنن روحك
وتقرالى تانى ....
ولا تتعب نفسك بالتعليق
وسيبنى لربنا يا سيدى
هو قادر و يتكفل بعقابى
ويرد مظلمتك
انتا والبلد كلها
ولا إيه ؟


بس

:)

الطائر الحزين
-------------

منديهموش فرصة ازاى يا ايهاب
بالانسحاب والهدوء مؤقتا
لحد امتى
لحد ما تترسخ فكرة الخيانةوالعمالة
ونبقى ملقف ؟!!

الحديد يجب ان يطرق وهو ساخن
والا يبقى مفيش فايدة

عموما
انا من بتوع نظرية المجلس متواطء مش متباطىء
وكمان من بتوع نظرية
ان الثورة هتنجح بتضحيات ..
مش بالسياسة والحيلة فقط ..


وآخر جملة دى عتاب وبستفة ..
صح ؟

متزعلش منى يا طائرى الحزين الطيب
انا بقرى كتير
بس التعليق قليل
ومعلش
استحملونا
اومال بس احنا اخواتك و بتاع
:)

و الله العظيم انتى جدعه و بمليون راجل و بتدينى امل فى البلد

سواقين التاكسى نوارة قالت على تويتر ان اغلبهم مرشدين للامن و متوصيين يقولوا طقم الكلام ده لكل راكب

ده التويتر بتاعى
@Tearsdemo3

ربنا يحميكي

ليست فكرة تعليقات وحسب
طيب ابقى تعالى اقراى التدوينات اللى فاتت وتعرفى انه معى حق

لو قراتى تدوينة عندى كنت تعرفى انى مش مع المجلس العسكرى واعتبرة من النظام السابق وهو لم يحم الثورة ولا شىء لكنه وقف دور المحايد وهذا يعتبر من وجهة نظهرهم نصر

وطرق الحديد وهو ساخن بمعنى ايه؟؟؟
وطرقه على مين؟
يعنى مثلا كل من طلع و علق من ائتلافات الثورة المختلفة قبل التشكيل الوزارى وتوقعاته قال لا يهمنى الاسماء وعندما اعلنت الاسماء لقينا البعض بيعترض على مجرد الاسم
======
انا شايف ان يكون فيه مطلب محدد نلتف كلنا حولة
مثلا
المحاكمة ونتفق على حد اقصى لهذه المحاكمة
مش نرفع كل الشعارات فى وقت واحد وعايزنها كلها تخلص حالا
ولا تقولى لى توضع اليات التنفيذ كل واحد هينقض هذه الاليات بما يتماشى مع فكرة ومرجعيته وكمان مصلحته

يمكن مش عارف اوصل لك وجهة نظرى بس بالفعل فيه حركات وائتلافات بيجى لها تمويل وبينصرف عليها وهم من منطلق حبهم وقناعتهم بان هذه هو سبيل التغيير ماشيين فى هذا الاتجاه ويمكن كمان بدافع حبهم للبلد لكن لا ينفع ان نحب البلد فى هذه الفترة كل واحد بطريقته لازم طريقة واحدة لحب البلد وان اختلف كل منا فى طريقة حبه للبلد يبقى نرضخ لطريقة الحب التى يمثلها الاغلبية
-==========
شكرا واسف على الاطالة

للاسف يعني واحدة مطلقة زيك معرفتشي تحافظ علي بيتها الصغنون عايزة تفهيمينا انك تقدري تساهمي في المحافظة علي بيتنا الكبير والله عجبت لك يازمن فعلا نحن في زمن الرويبضة ولك الله يامصر فعلا انها ثورة البانجو ولتكن جمعتكم القادمة شعارها بانجو لكل مواطن وعريس لكل مطلقة حيزبونة وعمل لكل فاشل خيبان

وعلي فكرة انا مقتنع بكل الا بكتبة لاني لست من الفاشليين ومقتنع جدا انها ثورة الفاشليين وبتوع البانجو وان 90 في المائة من مايسمونهم شهداء مسجليين خطر وان كل ما حدث لعبة امريكية سميت من 7 سنوات باسم الفوضي الخلاقة وان كثير من المصريين بما فيهم حركة 6 ابريل ظالعيين في مخطط الفوضي الخلاقة ومعاهم شوية اغبياء ركبوا الموجة ذي حضرتك بلا عقل وانما ليفعلوا شيئا يغطوا بة فشلهم في حياتهم الخاصة وفعلا انا بتعب نفسي لكن الساكت عن الحق شيطان اخرس وبعديين اليست تلك هي الديمقراطيييييييييييييييييية

وبعديين انا اذيت ميين انا عمري معرف ااذي حد انا بس باذي الا بياذيني

عاشقة الرومانسية
----------------

وصلنى الأيميل يا قطتى
وأيوه كدا
انا معنديش عرايس بحر
يحلوا انطحانات ويحش
:)

ربنا يوفقك يا حبيبتى
ف كل امتحان

:-*

Tears
-----

ازيك يا قمررررر
بصى انا ع التويتر مجرد متابع
وحرامى صور ولينكات وفقط

انما مبكتبش
بحس التويتر دا
زى الفيسبوك كدا
شقق حلوة صحيح وع الموضة
وف حتة كويسة ... الخ
بس انا ست دقة قديمة
بحب مدونتى وبحسها بيتى القديم
اللى ف حتة زى وسط البلد او المنيل او السيدة او أى مكان قدييييم

بحبها بالدفا بتاعها
والدوشة
والرغى
والجيران
و الحيطان القديمة بتاعتها
ومش عاوزة أنقل وأعزل واسيبها
حتى لو ناس كتير من جيرانى عزلوا
وفاتونى
يمكن يوم يرجعوا يطلوا
أو يطمنوا
أو ميرجعوش
معرفش
انا ف مكانى كدا
مبسوطة


وتعليقاً على تعليقك
انا لسه قايلها ف ايميل لغالى من الغاليين على قلبى ...
فين الجدعنة دى ؟
دنا لم أنل شرف ضرب أى حد م الاخوة البلتجية
و قولت لواحد من الشباب الجدع اسمه محمد و عشرة 3 شهور ميدان التحرير
اجى أزقل معاكو بالطوب
قالى ارجعى
والرجالة أصلا اول ما ابتدت الأزازير والطوب يتحدف شخطوا فينا
عشان نرجع للمستشفى وناخد جنب
وبصراحة سمعنا الكلام
مع انى محبش حد يشخط فيا
بس دى شخطة رجالة
ومش أى رجالة
دول أسود والله
وعيب لما مسمعش كلام
وحسيت انى هربكهم بحمايتى انا وغيرى
فرجعنا وسمعنا الكلام
وقعدنا بس نهدى ف بعض
ونسند بعض
ونبتسم ف وشوش بعض
ونفوق اللى مغمى عليهم م الغاز
وندعى ...لحد ما ربنا كرمنا
ولمينا بعضينا
و رجعنا التحرير

فين بقى الجدعنة ؟

احنا اتاخدنا على خوانة
كنا رايحينها سلمية
ومحدش قال انها هتقلب بغم لدرجة 300 أصابة ...
فالمرة الجاية ان شاء الله
هبقى اعمل احتياطات جادة
اجيب بيبسى ومناديل أكتر
ومية كتيييير
و أصر أحدف طوب معاهم
انا شولة و هجيب زوايا عكسية ..

:)
منحرمشى من تعليقاتك يا جميلة

الطائر الحزين
------------

أولاً
أيه اسف ع الطالة دى ؟
عيب يا إيهاب
دى مدونة أختك
طوّل زى ما تحب ...

ثانياً
انا متابعة كل اللى بتكتبه
بس مختلفة معاك ف الاجراء بس
وطرق الحديد معناه مش عنف
معناه السرعة
الحسم
الفورية
عشان كل دا بيدى رسايل
وبيخلع روس فساد من جدرها
ويدى رسالة للى جاى بعدها
ان موقعه مرهون بإاردة الناس
مش ادراة المجلسين ...


ثالثاً
الاختلافات والأنشقاقات متفقة معاك فيها...
بس من امتى مصر بتتفق ؟
من امتى احنا شعب منسجم ؟
الثورة جمعتنا ف لحظات الخطر الداهم
لكن الخلافات بيننا موجودة
وأظنها شىء صحى
انتا عارف المشكلة فى ايه ؟
ف الخساير
محدش متقبل فكرة اننا لازم زى ما بنكسب حاجات
بنخسر قصادها حاجات
واحنا مش ملايكة
بس فيه بديهيات واصول
واحنا قعدنا سنيييييين تايهين
ومش عارفين ولا فاهمين
وارد جدا كل دا يحصل
بس المهم المحصلة النهائية

كلنا بنحب البلد يا ايهاب
و الثوار اختلافهم رحمة
اما التيارات والاحزاب
فنا اصلا مش منتظرة منهم خير ابدا


نورتنى
:)

غير معرف
-------

ايه اللى جاب القلعة جنب البحر

طب ايه دخل حالتى الأجتماعية
ف احوال البلد دلوقتى ؟!!!

يا فندم
المطلقة التى فشلت ف الحفاظ على بيتها
يمكن تكون إتعلمت م الدرس
وعرفت تستفيد من التجارب السابقة
وبقت تقدر نوعا ما
تنفع نفسها واللى حواليها
وتحاول تحافظ على بيتها الاكبر..
ليه لأ ؟
مش يمكن ربنا هدانى
وعرفنى السكة الصح
ولا كتير على ربنا ؟!!!!

والبلد بتاعتى آه
وبتاعتك انتا كمان
وكل واحد يحكم فيما يملكه

انتا شايفها ثورة بانجو
وانا شيفاها ثورة كرامة
ومجراش حاجة لما نختلف
و لو لم أكن اناصر الديموقراطية
مكنتش نشرت تعليقاتك البوست دا
لأنها أقل شخصنة عن التعليقات المعتادة

وبخصوص الأذى ..
انتا ليه مش مصدقنى
لما بقولك
انك بجــد ... صعبان عليا ؟؟

ربنا يهدينا جميعاً

:((((
منكرش ان حضرتك خليتينى ادمع
بجد
الثوار مظلومين اووووووى
والله اوووووى
والاعلام تيييييت
والمجلس العسكرى بيحاول ينجح فى تفرقتنا
والناس فاهمة ان اللى بتعملوه
فعلا زى ما حضرتك وصفتى فترة مراهقة
وعييييييييب كده ياولاد
..
الموضوع كبير اوى
ومش هيهدى بسرعة وحاجة زى اللى حصلت فى العباسية مش بعيد تتكرر
تانى وتالت ورابع
..
الصراحة انا مبسوطة جداااااا
انى جيت هنا
فى المدونة دى
دايما كنت بسمع المدونين بيتكلموا عن فاطيما
لغاية ما دخلت هنا
وعرفت همه بجد بيحبوا ييجوا هنا ليه
واكيد دى مش هتبقى اخر زيارة ليا
هنا..
أسعدنى المرور كثيرااااا

الأخ الغير معروف
بعد إذنك يا فاتيما
هو إنت يا أخ يا غير معروف فاكر إن فاتيما دي مالهاش أخوات يعرفوا يردوا عليك ، ولا فاكر إن قلة الأدب مش سهلة ؟ إنت مال اهلك مطلقة ولا مش مطلقة ، ومال أهلك تنزل في مظاهرة ولا لأ ، وثورة بانجو إيه دي إللي تسقط حكومة و رئيس و حزب زي حكومة و حزب مبارك
طيب فاتيما علشان مؤدبة و بنت ناس مش عارفة ترد عليك بإللي إنت و أمثالك يستحقوه
وإنت لو راجل اصلا كنت دخلت بأسمك مش مستخبي زي النسوان
وطبعا لو فاكر إن دخولك بالشكل ده حايخبي شخصيتك تبقى غلطان لأن أي مهندس شبكات بثلاث تعريفة يقدر يعرف الآي دي بتاع جهازك من متتالية التعليق هنا في المدونة و يعرف إنت داخل النت منين بالظبط ، وبعدها بقى خد عندك ، هاكات و إختراقات و تتبع و يبقى نهار إللي إتنيلوا و غلطوا وجابوا أشكالك للدنيا كحلي منقط بإسود
لم نفسك ياض يا تيييييييت و ماتجيش هنا تاني
فاهم يا بتاع البانجو

sara adel draz
--------------

أهلا يا سارة
نورتى روح قلب ماما
وشكرا على ذوقك

الناس اللى بتتكلم عنى
بيخجلونى بمحبتهم
و بعد ربنا هم جميعا
وبدرجات متفاوتة
كانوا سندى للخروج من نفق مظلم
كان ممكن مخرجش منه واشوف النور
انا ممتنة ليهم من كل قلبى
ولكل حد بييجى هنا
وقاصد خير


ثانياً
انا معملتش حاجة
غير انى نقلت اللى شوفته
جايز اكون ف نظر البعض ببالغ
او ببص لحاجات مش وقتها
بس حقيقى
انا كنت واقفة وسط ناس
لو مكنوش رجالة وجدعان كدا
كان زمان البلطجية دخلوا علينا
احنا البنات والستات ..بهدلونا
مكنتش اعرف من اللى وافقين غير شاب جدع اسمه محمد عشرة ف الميدان من شهور
لكن كل اللى حواليا محدش عارفنى
ومع ذلك تلاقى فجأة انتى مسئوليتهم
ورايحين ينضربوا ويتبهدلوا
ويتصابوا عشانك ..
وعشان الهدف اللى جاينله
وعشان الجملة اللى سمعتها كتيييير
احنا مش اقل م اللى راحوا
...
لو اتكررت العباسية عشر مرات
هنزل برضو
وان شاء الله ارجع
واحكيلكم
:))

نورتينى
واهلا بيكى ف أى وقت

KING TOOOT
----------

يا هوى ع القزحة دى
يا ولييييييد
هدى أعصابك
الشخصية دى انا اعرفها
ولما اشوفك ان شاء الله يوم الجمعة ف الميدان
فكرنى أحكيلك حكايته ...

انا مش زعلانة منه والله
لأنى فاهمة هوه بيقول كدا ليه
هبقى اقولك بقى

وربنا يخليك ليا
ومنحرمشى من حمقتك دى
يا خراااااااشى ع الرجالة المجدع
بوسيلى جبين هبة
واحضنلى بيكا حبيبى ابن اخويا
:))))

اشوفك على ألف خير يا رب

ازيك يا فاتيما..و الله وحشاني..أنا حاولت أشوفك كذا مرة في الميدان في المكان اللي قلتي انك بتقفي فيه بس ملقتكيش..يوم 8 يوليو و الجمعة اللي بعدها..ان شاء الله أنا جاية الجمعة دي..قوليلي حتبقي فين بالظبط و من كام لكام..ربنا معاكي..و أنا فخورة بيكي جدا جدا جدا انك شاركتي في اليوم العظيم ده....يا رب استرها مع مصر يا رب

فاتيما

الاخ اللى غير معرف اللى انتى عرفتيه احيكى على ذكائك
لكن ما تمارسيه معه ليست ديمقراطية و تبادل حوار
حله عندى و انا عملته معاه
البيه المحروق اللى انا عارف محروق ليه علاجه التجاهل التام لانه اصغر من تراه العين فحله التجاهل و يمكن ندوس عليه و نفعصه و احنا ماشين من غير ما ناخد بالنا
اما السفسطة و ادخال المواضيع الشخصية فتلك عادته و تلك سبب حرقته على فكرة هو كان بيكتب الرويبضة غلط و انا اللى صححته له اهو كويس اتعلم حاجة
هو واضح انه مش عارف غير الحديث ده
ربنا يشفى كل مريض
و احيكى مرة اخرى ان كشفتيه
اقول له موت بغلك

dahlia...
---------

انتى كمان يا داليا
وحشتينى قوى

كنت بفكر مروحش بكرة
بس غيرت رأيى بعد تفكيييير
وقررت اروح
عشان متخلاش عن مكانى وميدانى وثورتى
والناس اللى بعرفها وبتعرفنى
هروح عشان احكى عن اللى حصلنا ف العباسية
وعن الخطة الحالية لتطويق الثورة وترويضها
عندى غضب رهيب ناحية بعض اللى ماشيين ورا التيارات الأسلامية متصورين اننا بقينا حبايب واخوات
واعلم مسبقا ان الجمعة هيتقال عنها ما ليس فيها ...
ورغم ان وجودى هيزو اطراف مبحترمهاش نفر زيادة والميدان هيتزحم ..
لكن معلش
انا مش هتخلى عن هدفى
وهنزل بيافطة ضد المجلس
وهتهف ضده
ومش هقول الجيش والشعب ايد واحدة
والأستقرار
و العجلة
و لم الشمل
وكل الكلام الحق الذى يراد بيه باطل دا ...
هنزل عشان لو حصل قلق للناس اللى بعزها ف الميدان
اكون معاهم ...
وميكونوش لوحدهم
او حد مستفرد بيهم


انا ببقى ف مكانى المعتاد
وان شاء الله هكون طول النهار موجودة
ومستنياكى يا حبيبتى
:)

تيجى بألف سلامة

ابراهيم رزق
-----------

صباح الخير يا أبو العيال
هدى اعصابك يا ابراهيم
معلش
ربنا يهدينا جميعاً

اشوفك بكرة ان شاء الله
وهبقى اشرحلك وجهة نظرى
وليه فعلا
هوه صعبان عليا جدا

دا لو اصلا انتا ناوى تيجى

:)

سلام

ياااااه يافتيما ..ليكى وحشة كبييييرة
انا بقالى كتير مش جيت هنا
يارب تكونى بخير
تغطية أكثر من رااااااااااااااائعة
للأسف مقدرتش أكون موجود فى الملحمة دى
ربنا يتوب علينا من المجلس أبو بدلة كاكى ..ويفرح الشعب إللى نفسه يفرح ده بقى ...الفرحة وحشتنااااااا

إرسال تعليق