.

.

إرفـــع راســـك فـــوق ... إنتــا مـسلم !!!!  

Posted by: فاتيما in

الكاريكاتير لــ .. عمرو عكاشة

-------------------------------------------------
يـا ريتنى كنت مّـت قــبل مـا أسمعهـا 
--------------------------------------------------
--------------------------------------------------


بداية ... اسفة لأن البوست رخم 
بس انا الحمدلله هديت كفاية 
عشان اعرف أحكى عن جمعة 
ما أسموها بــ ....لم الشمل 
فإذا بها تبعتر كل احلامنا ف التوافق 
أدراج الرياح




وصحيح هذه الجمعة كان معروف سلفاً
انها للاخوان والسلفيـين
وباقى التيارات الاخرى اللى ضيوف عليها 
الا ان الذى تم الإتفاق عليه كان حاجة 
وما حدث حاجة تانية خااااالص 
وصحيح من قبل الجمعة بيوم واتنين 
والاخبار والمشاهد ف التحرير تنبىء
بملوينية وحشد واستعراض عضلات
التيارات السياسية المتأسلمة 
و لكن ....
وآه من كلمة لكن 






آه ... لأنه رغم ما كان من حذر وتنويه 
ان الجو هيكون مختلف عن كل الجمعات 
فإن أشهر كتاب المسرح العبثى
ف العالم ... مهارة 
لم يكن يشطح بخياله فيصل بمسرح التحرير 
لهذا المشهد الهزلى الكوميدى الأسود 
المر الذى شهدناه 






ومش هتكلم عن نظريات ورؤى 
انا ست غلبانة وعادية ودماغى بسيطة 
و على قد حالى 
وف سنة أولى سياسة وثورة 
و نزولى التحرير دايما سببه انى عاوزة
اكون مواطنة إيجابية وبتحاول تعمل فرق 
و لو ضئيل ف الدنيا اللى حواليها 


بنزل عشان اكون نفر زيادة 
ياخد بحس الناس المرابطة و الثوار


بنزل عشان اقول رأيى ف يافطة
واتناقش مع اللى حواليا 
ونتبادل الأراء .. و يا أقنعه ويقنعنى 

بنزل عشان اشوف وارجع انقل شهادتى 
لعلها تفرق مع غيرى اللى مقدرش 
يحضر و لا يشوف 




وعلى هذا الأساس 
من 8 فبراير تقريباً و انا مبفوتش جمعة 
 الا للشديد القوى 

و بنزل احيانا ف اوقات
مبيبقاش فيه غير 200 او 300 نفر 
و بقعد ف مطرحى المعتاد 
من اول النهار لحد آخره
احكى واتكلم واقول.. قدر جهدى 
و اقول لروحى لكى لا أحبط 
يعنى لو منفعتش حد 
ف ع الأقل نفعت نفسى ...
و ضعيت وقتى فيما يفيدنى
و بتمنى لو اعمل قد كدا ميت مرة 
بس الظروف ...
و ربنا ينفخ ف صورتنا جميعاً ..





وانا من المؤمنين بشدة بالاختلاف 
وان كل بنى آدم ف هذه الدنيا حــر 
يؤمن ويعتقد ويحس ويفكر 
ويحب ويكره ويلبس ويعيش كما يشاء
شريطة أن ... لا يؤذى غيره 
ويعمل ما يشاء بعد هذا 
وعلى هذا الاساس بعيش 
و أقبل غيرى .. فيما يؤمن به 
طالما لن يتعدى عليا ..
بهذا الفكر والأعتناق 




واللى حصلى ف الميدان 
كان العكس تماماااااااا




لما نزلت و وصلت ع الساعة عشرة 
كما توقعت و شفت قبل مجييى 
ف الجزيرة مباشر 
ان العدد غفيييير 
وحاشدة حاشدة كما يتمنون


بصيت على مكانى المعتاد ..
لقيت حتة فاضية 
روحت و وقفت وعلقت اليافطة 
و سكتت وقولت متكلمش مع حد
ورغم الصداع اللى مسكنى 
بسبب الأصوات العالية من كل ناحية
والزحمة والشمس 
الا انى وقفت حوالى ساعة أستمع 
للأناشيد و الهتافات و اقرى اللافتات 
اللى جابتلى اكتئاب خفيف 
زود من درجته الاعلام المرفوعة
والشعارات اللى كانت كلها ماشية 
ف سكة واحدة هى تطبيق الشريعة 
و رفض الوثيقة الحاكمة للدستور 


و لحد كدا عادى ماشى مفيش مشاكل 
لغاية ما احدهم ردد هتاف ع المنصة 
بيحذر فيه الاخ أوباما 
ان كلنا هنا .... اوسامة 


وحاولت أركز و ادور ف ذاكراتى 
على مين أسامة دا ؟!!  
فغير أسامة بن لادن ... ملقتش 
فسألت اللى واقفة جنبى .. فأكدتلى 
و هالنى بقى انى ألاقيها بتردد 
و عدد رهيب ف الميدان كله 
بيردد الهطل دا 
و أسفة لإستخدام لفظ الهطل ...
 
أسفة .... للهطل 



المأساة ازدادت لما أحد الشيوخ صعد للمنصة
وابتدى يبشر الاخوة بنصرة المسلمين 
بناء على رؤية شافتها واحدة منعرفهاش 
و  مقلش أسمها ايه حتى .. معرفش ليه  !!
بس بناء على هذه الرؤيا
دخل المسلمين و منهم بعض المصريين
مصر منتصرين 
و لذا التفسير بيقول ان نطمئن انه 
مصر ... لهم
وستعود اسلامية ...



وكان بيتكلم  وكأنه يخطب ع المنبر
ويبكى و الناس حواليا بتكبر و تبكى 
وانا واقفة مش مستوعبة قوى ..
وبقول لروحى طب لو كان قال مصدر الرؤيا
 عشان يمكن أقتنع وأصدق .. و اعيط زيهم ؟!!



الحقيقة كان فيه مناظر ياما 
تخلينى أعيط  بقناعة راسخة
بس الوضع ظل متماسك و مقبول
وبعدين كل شوية  كانت
بتيجى اخت وتقف جنبى ..
وبعدين تنده واحدة تانية صاحبتها 
او تكلمها ع الموبايل تقولها تعااالى 
.. فتيجى تقف معاها
وواحدة تالتة تيجى فتقف ورايا 
وتانية قصادى لحد ما بقيت واقفة 
محشورة بينهم .. ف النص 
واليافطة رغم حجمها الكبير ...
محدش كان شايفها 
وعددهم كتر وكتر .. لحد ما اتخنقت 
و بقيت مش قادرة اتنفس فعلياً 
ولقتنى كدا هدوخ من قلة الاكسجين 
و يغمى عليا  ومش ناقصة
فقررت أسيب مطرحى  ..
و اروح ادور على حتة تانية 




الصداع زاد 
فروحت ماكدونالدز أشرب قهوة
و ف الرجوع سمعت .. صفوت حجازى 
بيقول ان هيا دى مصر .. 
ودى مطالبها 
تطبيق الشريعة 
و ايد واحدة ايد واحدة 
الجيش والشعب إيد واحدة



و القطعان بتردد وراه و بكل حماس
فقررت اكبر دماغى من المنصة دى 
وكفاية اللى سمعته عشان أفهم 
باقى الليلة ماشية ازاى 
وقولت ادورلى على مكان رايق اقف فيه
بيافطتى براحتى و لما الزحمة تخف
أرجع مطرحى تانى 



مشيت ولفيت لحد ما لقيت مكان 
شبه رايق بعد الكعكة الحجرية 
و ف الأتجاه ناحية المتحف المصرى كدا 
وعلقت اليافطة تااااانى .. و وقفت 




ورايا ف جنينة الرصيف قاعد جماعة 
و قصادى الناس ... رايحة وجاية 
بتصور اليافطة وتقف تتكلم معايا
وتناقشنى .. 
طب ليه روحتوا العباسية 
والأهالى اللى ضربوكم و لا مين ؟
وقعدت أحكى واشرح واقول 
وناس كتير اتجمعت ...
فأذا بالاخ اللى واقف من ورايا بيزعق
ويقول
امشى يا ست من هنا 
عشان عاوزين نسمع الخطبة 
وبما ان المنصة بعيدة عنهم جدا
وبالتالى فيه صعوبة شديدة انهم يسمعوا 
و مش هينفع حد ييجى يكلمنى
ويسألنى فاسكت و مردش عليه
زائد ان مفيش مكان رايق تانى اروحه 
و هما ماليين الميدان
فلكل هذه الأسباب ...
رديت عليه بكل أدب ...
أنا اسفة حضرتك 
مينفعش اتحرك من مكانى
واديته ضهرى 
و كملت كلام مع الناس  وخلاص 




لأ خلاص إيه ؟


مفيش كام دقيقة و حصل هرج ومرج
و الناس بتجرى ناحيتنا 
و بعدين اصوات تانية تطمنهم و بتهديهم 
متجروش متجروش 
 طلع فيه إيه ؟

دى منصة وقعت فالناس أترعبت 
طب حصل خير 
وكله رجع تانى مكانه
 


خلصت صلاة الجمعة بلا مشاكل
وانا ف مطرحى
واللى رايح واللى جاى 
بيصور اليافطة و يناقشنى 
وفجأة لقيت أخ سلفى .. واقف متحفز
وبيطلب منى أفهمه المكتوب ف اليافطة
بدأت بسؤاله ... 
حضرتك بتشوف سينما ؟
فرد بعصبية .. شوفت الفيلم وبعدين ؟
فحاولت أشرح وجهة نظرى 
لقيت تعبيرات وشه مبتتحركش وثابتة
على رد فعل واحد فيما معناه 
مش فاهم  ومش ناوى أفهم
لما لقيت الموقف كدا 
أعتذرلتله وقولت أنا أسفة حضرتك 
انا مش عارفة أشرحلك أقصد ايه 
فكان رده ..
ولما أنتى مش فاهمة اللى بتكتبيه
نزلتى ليه ؟
فرديت .. بهدوء .. أنا فاهمة حضرتك 
بس مش عارفة أفهمك .. وانا أسفة 
فإذا بيه بيقرب منى و أقسم بالله 
بينى وبينه .. ميكملش عشرة سنتى 
و صباعه ف وشى وبإنفعال شديد بيقول
لما انتى مش عارفة اللى بتقوليه 
يبقى تقعدى ف بيتك .. ومتنزليش




لحد كدا .. المشهد كان بيقول 
انى هنضرب خلاص
وأتسبب ف مشكلة ..
فرجعت خطوة واحدة يا دوب لورا 
و ربنا سندنى ... بولاد الحلال 
ولقيت اتنين فجأة عن شمالى ويمينى
واحد بيقف ف وش اللى بيهاجمنى 
والتانى واقف جنبى بيحجز بينى 
وبين العشرات اللى اتلموا عليا يتفرجوا


الجدعان وقفوا يقنعوا ف الاخ السلفى 
اننا نازلين الجمعة دى لحرية الرأى 
وان دى زى أختك ..
وواقفة بإحترامها أهى 
ومن حقها تقول رأيها
وانتا تقبله او ترفضه ..



وخلاص  الجو ابتدى يهدى 
فإذا بالاخ اللى ف الجونينة ورايا
(بتاع أمشى يا ست من هنا )
يقرر يجامل 
و يعمل واجب ويحيى الليلة
و صوته على بزعيق .. 


يا جماعة خلاص 
انتوا كدا بتنفذولها اللى هيا عايزاه 
وهيا عاوزة الناس تتلم عليها وتتفرج 
اقروا يافطتها وامشوا
و هيا هتزهق وتمشى كمان شوية 
و هما مش بيصوروا اليافطة 
دول واقفين بيصورها هيا ...



تنهيييييييييييييييييدة 


 أنا فين دلوقتى ؟



لحد الجملة ... ما قبل الاخيرة 
كنت واقفة و مبتسمة ابتسامتى 
اللى انتوا بتشوفوها ف وشى دايما 
و محتفظة بهدوئى
اللى انتوا عارفينه عنى
والذى أحيانا يصل لحد البرود 
و لكن ... الجملة الاخيرة و بطريقة نطقها
خلتنى ألف جسمى لا شعوريا 
وأقف أبصله دقيقة وانا مذهولة 
ومش عارفة أرد
واقول أى حاجة ف أى حاجة 




واحد من اللى بيدافعوا عنى 
قعد خمس دقايق 
يترجانى أسيب المكان
واروح أقف عندهم ..
كان من شباب 6 أبريل بالمناسبة
فشكرته و قولتله 
لأ .. مش همشى 
هما ف كل مكان ف الميدان اصلا 
هروح فين ؟ انا كدا بنطرد 
وفضلت واقفة 





بعد شوية المولد أنفض 
و لقيت أخ تانى سلفى برضو ..
والمرة دى مكنش بيتهمنى 
ان بكتب حاجة مش فاهماها لا قدر الله
لااااااااااااااا
دا اتهمنى اتهام تانى خاااااااااالص 
وهوه انى بهذه اللافتة
  ضد الشرع و الدين
لأن المرأة مكانها البيت يا أستاذة 
وانتى خرجتى ليه من بيتك أصلااااا
ورفع ايده  كلها مش الصباع المرة دى
وصوته جلجل وكأنه بيخطب ف الجموع 


و تاااااااااانى الجدعان وقفوا بينى وبينه 
عشان يفهموه ان اليافطة مش كدا
والست يا حااااج متقصدش  
ولا حياة لمن تنادى


الاخ اللى ف الجونينة اللى ورايا 
(بتاع امشى يا ست من هنا )
مش يسكت ؟
لأ طبعنننننننننننننن
راح نازلى المرة دى ولم حواليه أنصاره 
وبدأ ف الهتاف أسلامية اسلامية 
رغم أنف العلمانية 




العلمانية دى مين يا حضرات ؟
أختكم ... و الله أعلم



وشاب أعصابه بايظة كدا
ماسك يافطة مكتوب فيها ان

مصر اسلامية 
راح قاعد تحت رجلى 
و رافع ايده بيغطى عليا ...
فروحت متزحزحة بهدوء
فإذا بسيادته يقف بين الناس الملمومة
وبتهتف ويحرك اليافطة قصادى
بهدف الأستفزاز
وانا ببصله وببتسم ....


فضلنا ف المنظر المؤسف دا شوية 
يزعقوا ويهتفوا 
و الناس تتلم علينا وتهتف معاهم 
وانا أتزحزح خطوات لمنع الاشتباك 
لحد ما حناجرهم تعبت
و ف مطرحى البعيد عنهم .. بكام متر 
وقفت اتكلم مع اللى معدى عليا 
لحد الساعة اربعة ..



وقررت بعد لفة ف الميدان 
اكدتلى انى مستحيل هعرف 
أشوف حد أعرفه وسط كل هذه الوجوه
الغريبة التى جعلت الميدان غريباً
فروحت ... كسيرة القلب 




وهذا يا اخوانى 
بإختصار اللى حصلى 
كمواطنة عادية 
نزلت جمعة لم الشمل
كان عندها بصيص امل ف عالم .. 
تقصف رقبة أى امل ف العالم 




وملاحظاتى كالآتى 
واستحــملونى معلــش


الاخوان منهم ناس وخصوصا الشباب 
حاجة زى الفل 
و من أعرفهم تحديداً هنا 
ف المدونات ... بجد 
حاجة تشرفنى وأفخر بهم 
وبقلوبهم الطيبة الحنونة المحترمة 
كمان الملتحين والمنقبات 
هنا وبرا النت على عينى وراسى 
عشان بس محدش يتصور انى ضد الجميع 



بس هوجه اولا كلامى لبعض الثوار
وبعض الناس اللى بتتكلم عن التوافق 
واسأل .. 
الا نتعلم من الدروس الماضية ؟



يعنى بنظرة متعمقة كدا
حد يجاوبنى والنبى

  
من امتى الأخوان بيصدقوا وعدهم ؟
ومن امتى الجماعة الأسلامية ضد العنف؟
ومن أمتى السلفيين (الحاليين) بيقبلوا الآخر؟




و إيه إتغير ف فكرهم و تصرفاتهم
عشان نتوافق معاهم ونديهم ضهرنا 
دون الخوف من طعنات الغدر 


وأفتكرلك أيه يا بصلة 
و انتى كل قطمة فيكى بدمعة ؟!!



انا م العالم التى تؤمن بالاختلاف جدااا
والشكل واللبس تحديدا 
لأن دا حرية شخصية 
وصحيح ان شكل الدقون الكبيرة بيرهبنى
لكنى أحترم حرية كل شخص
ف اطلاق لحيته
بس عندى سؤال بسيط 


ليه الوشوش مكفهرة و مكشرة كدا ؟
ليه فيه عصبية ف الكلام ؟
ليه اللى بيعدى بيبص بقرف واحتقار ؟
ليه فيه تعليقات جارحة بتترمى دون احترام؟
وليه فيه رفض للآخر بعنف كدا ؟






ليه لما أكتب او أقول شى 
و مش عاجبك
المفروض أقعد ف بيتى ومخرجش ؟
دنا ابويا الله يرحمه 
والوحيد اللى كانله سلطة عليا 
عمره ما قالى الجملة دى 
و بالعكس .. كان بيشجعنى أقرى 
و اتفرج ع الأفلام  واسمع الاغانى 
و كان بيعلمنى أقبل غيرى وافكاره 
و محكمش على حد بشكله ولبسه
و أفتقدته جدا وانا واقفة وشخص غريب 
بيشوح ف وشى بصباعه
وعاوز يطردنى 
من الميدان اللى بعتبره بيتى
ومكانى ومطرحى 
ابويا مقليش اقعدى ف بيتك 
تيجى انتا تقولهالى ... بأى صفة 
ومين ادالك حق الوصاية عليا ؟




ولما تمسك سلطة بقى 
هنتعمل فينا احنا كنساء خصوصاً
وكشعب عموما ؟!!!




والاخ اللى كان واقف ورايا دا
(بتاع امشى يا ست من هنا )
إيه طريقة خالتى فرنسا بتاعته دى 
ف الاختلاف مع من لا يعجبونه  


ولما الناس دى تدخل البرلمان 
هيجبولنا مين يعمل دستور 
وهيوافقوا على أنهى مواد
ويرفضوا إيه ؟!!




ومش كدا وبس 
هيرعوا مصالحنا الأربع سنين الحرجة
الجاية دى أزاى ؟
يعنى ناويين يعبروا عنا ازاى بصدق 
وهما باصينلنا كدا وبعااااد قوى كدا ؟




شىء تانى ضايقنى جدااااااااا
ورغم ان النزول لمظاهرة او مسيرة 
فيه نسبة خطر ومقبولة ..
بس بما انى انسانة و بحاول يكون 
عندى دم واحساس برضو منيش حيطة



من المؤلم جداااااااااا
ان حد المفترض فيه 
 يكون متدين ويرمينى بما ليس فيا
وهوه يعنى مدخلش ف ضميرى
وعرف انا واقفة عشان أستعرض وأتصور 
ولا انا عندى هدف تانى
ثم بأى حق يحكم عليا ويعلن الحكم 
و يستعدى عليا الناس 
و يزفنى ف التحرير كدا   ؟!!!






ولاد الحلال الأخلاق 
اللى ظهروا فجأة .. وكتر الف خيرهم 
ولا أعرفهم و لا يعرفونى 
لو مكنوش موجودين وقتها ..
كان هيحصلى ايه؟؟




والاخ السلفى دا
اللى كان بالمناسبة
لابس لبس باكستانى الهوية 
ولولا نطقه باللهجة المصرية كنت قولت
انه يمكن مش مصرى ولا حاجة 
بأى حق يهاجمنى فكرياً 
و يرهبنى كدا 






ولاّ الهتافات بقى 
الهتافاااااااااااااااااااااااااااااات 



مصر عاوزينها إسلامية ازاى يعنى ؟
احنا مصر بلدنا حاجة تانية 
و محدش كان قايلنا ؟!!



ويعنى ايه الشعب يريد تطبيق الشريعة
 هوه احنا قبل كدا 
كنا بنطبق شريعة حمواربى ؟!




و كله كوم 
وارفع راسك فوق انتا مسلم 
دى كووووووووووووووم تانى 
ليه يا جماعة ؟!!!




و مصر راحت فين ؟
و اخواتنا المسيحين راحوا فين ؟
و المفروض يوطوا راسهم 
ولا إيه بما انهم مش مسلمين بقى ؟ 




ليه الارهاب والتقسيم و الإقصاء دا ؟!!
ليه يكرهونى ف الأسلام
اللى لو هينسب ليهم  بالفكر دا ؟
ليه يخلوا شكل مصر كدا قصاد العالم ؟



وليه يخلونى أقف اسمع سؤال 
هوه حضرتك مسلمة .. دا 
خمس ست مرات 
مع انى محجبة 
وباين عليا الأسلام مظهرياً حتى 






طب ماذا لو كنت مش لابسة حجاب  ؟
واذا لو كنت لابسة صليب  ؟
كانوا هيعملوا ايه معايا ان شاء الله ؟!!


انا إتسئلت حضرتك مسلمة دى 
بشكل مستفز  ومهين خلانى أخاف 
أخاف على رامى ومانمينو و مارى 
وطنط ام صفاء و كل جيراننا ف العمارة 
وكل حد مسيحى أعرفه ومعرفوش 
و قعدت أفكر ...
لما انا اللى معايا شهادة ميلاد مكتوب 
ف خانة الديانة بها ...  انى مسلمة 
و حاسة بخوف و إرهاب كدا 
اومال هما يعملوا إيه 
ويفكروا ازاى 
و حاسين بإيه دلوقتى ؟!!!






الجو المرعب دا .. سببه ايه 
ومين اللى خلاه يطفح ع السطح 
و بوضوح صارخ كدا 
ومين له المصلحة ؟!!!






الأسئلة دى ليها اجابات ؟
أكـــــــــيد 


بس الاجابة النموذجية أظنها 
عند جهة واحدة
 متأكدة منها 
الا وهى ...المجلس العسكرى




اللى بالجمعة دى 
بيبعت رسالة للشعب 


اما أنا .. وأما المتطرفين دول 
و اما أنا .. والأنفلات الأمنى 
واما أنا .... واما الفوضى 
والله يمسيك بالخير يا أبو عيلاء 
عرفت تربى والله 




ملحوظة من واقع الميدان 
و شهادة حق 
عدى عليا واحد .. من الاخوان 
قعد يناقشنى نص ساعة عن جدوى 
المسيرة بتاعت العباسية من عدمها 
و كان مهذب ومحترم جدا 
ولما قولتله انضربنا واتبهدلنا 
ممن يفترض بهم حمايتنا 
وهل يرضيك حتى لو كنا رايحين 
بدون ترتيب جيد  واستعداد يحصل دا
فقالى انتى زى اختى و مقبلش حد 
يمّسك ولو كنت هناك كنت هدافع عنكم 
ولو مش مقتنع  ...
انا صوتى اتخنق وقتها وانا بقوله ..
شكرا .. حضرتك كأنك عملت كدا فعلا 




راجل كبير وقف ساعة بحالها 
يناقشنى ف انه بيحب ولاد التحرير 
بس يهدوا شوية ويسيبوا الأقتصاد يتحرك 
ولما الكلام خدنا أقتنع بكلامى 
لدرجةان لام جدا على شباب التحرير 
واقترح عليا انهم ينزلوا يشرفوا على الأفران
ويضبطوا الحركة والشغل فيها 
عشان الناس لما تلاقى رغيف العيش حلو 
تحبهم وتبطل تشتم فيهم وف الميدان !!






ناس كتير عادية وقفت تهاجم 
فكرة خروج المسيرة لوزارة الدفاع من أصله 
ولما بوصل معاهم ف النقاش لنقطة 
طب انتوا شايفين المجلس عدو ولاّ حبيب 
الاقيهم بيقولوا انه ضد الثورة طبعا
فأبصلهم بذهول .. وأسال 
طب الحل يا جماعة
والقط ماسك مفتاح الكرار ؟!!!


فيردوا الرد العجييييييييييب بتاع 
نستنى الإنتخابات
ونمشيهم براحة!!




طب فرضنا يا إخواننا 
قرروا يمشوا بسلاسة
ودا عند ام منص طبعا ...
بس ماشى .. مشيوا 
هيمشوا وهما مسلمينا
لمجلس منتخب شكله عامل ازاى ؟!!




يعنى حشد الجمعة والميدان 
بمن كانوا فيه مبيديش مؤشر كدا 
لشكل السيطرة على الدواير الإنتخابية ؟
وكيف ستكون قمة ف التحضر و التنوع 
وحرية الرأى 
واحترام الآخر 
وعدم الارهاب
وعدم اللعب على فقر الناس 
و نظرتهم لمن يصلى ويربى دقن 
وتلبس نقاب على انهم ناس بتوع ربنا
و كل من يختلف عنهم
علمانى كافر ميرفعش راسه فوق
لأنه مش مسلم ؟!!!!




الأنتخابات ... يا أخوان و سلف 
يا حزب وطنى متخفى ف وجوه جديدة
وكام نفر م الاحزاب الحمضانة كالوفد وغيره


وهل يفترض مخفش لأن كل هولاء 
هيختاروا مين يحطلنا دستورنا
لميت سنة جاية ؟!!




منه لله مبارك ونظامه 
اللى جعل هذه الشعب فقير و غير متعلم
فشوية متطرفين يلعبوا ف دماغه 
ويتحكموا فيه بهذا الشكل المهين 
الذى يجعل البنى آدم اللى ربنا فضله 
بالعقل عن باقى المخلوقات .. يقرر
يتخلى عن  مخه ويسلمه لشخص تانى 
هوه الشيخ اللى يفكر بداله 
وياخد القرارات بيداله 
وهوه ينفذ 
ويسمع ويطيع وفقط 




نقطة كمان بهذا الصدد 
حالة الأنفصام ما بين الواقع
و ما يصرح بيه قيادات التيارات الأسلامية
ف الأعلام واصل لدرجة رهيييييييييييييييبة 
يعنى الشمس تبقى طالعة م الشرق
فيقولوا للمذيع لأ يا اخى 
دى طلعت م الغرب
وانزل بنفسك شوف و تلك ارادة الشعب
وكأن الكاميرات لا ترصد و الناس مبتشوفش
ومنتهى الأستخفاف بالعقول
و  شىء لا يوصف 
ولا يصدكه عكل  الصراحة





سؤال كمان
فين هتافات الثورة و مطالبها ؟
فين الضغط ع المجلس كى يسمع جيداً
فين حقوق الناس والشعب ؟
و لحد ما مشيت كانت كلها هتافات دينية
و حتى وصلنا 
لأرفع راسك فوق انتا مسلم 
كنت خلاص 
حاسة انه هيجيلى جلطة
فقررت أمشى  قبل ما يجرالى حاجة 






و صحيح التعميم مرفوض
بس بشكل عام .. كنت أظن 
ان الاخوة ف التيارات الأسلامية جمعاء
متواطئين مع المجلس العسكرى 
رغبة ف المصالح والجزرة
لكنى أكتشفت بما لا يدع مجال للشك 
ان الناس دى مش بتخطط بخباثة 
دى معندهاش دماغ اصلا تفكر بيها
او عندها و راكنها على جنب
و بتردد الشعارات والكلام 
بلا خمس ثوانى  صمت حتى 
عشان تفكر فيهم .. هيا بتقول إيه




هم يسيرون نياماً ...
وهل يستيقظون قبل ما يودوا البلد 
و يودونا كلنا معاهم ف داهية ؟ 



أنا بعتذر لكل حد 
توقعت أشوفه ويشوفنى 
وملاقنيش ف مطرحى المعتاد 
... بس غصب عنى 
مكنتش أقدر أقعد أكتر 
مع انى عرفت
ان الدنيا أتحسنت بعد العشا 
وعلى حد قول ظرفاء التويتر 
لما الأخوان والسلفيين مشيوا 
والكفار رجعوا الميدان :)




و لو بقت كدا .. فأنا و لا فخر 
من معشر قريش 
وأبو لهب عنده مدونة وساكن جنبى
و بعلق عنده يوماتى وان كان عاجبهم



جمعة لم الشمل 
كانت حزينة مؤلمة 
ولو هولاء البشر بعقولهم تلك 
و إرهابهم و تصرفاتهم تلك 
و تخاذلهم وتراجعهم وتصريحاتهم تلك
هم من يجب علينا 
أن يتلم شملنا عليهم 
فأبو مين اللى عاوز يتلم عليهم 
وأبو مين اللى يقبل إرهابهم الفكرى 
و أبو مين اللى عاوز يعتبرهم حلفاء 
وأبو مين اللى عاوز ينزل معاهم ف ميدان
وأبو مين اللى يصدقهم ف حاجة مستقبلاً
وأبو مين اللى عاوز يعرفهم تانى





و مصر ... البهية 
لا أسلامية و لا علمانية
و لا غربية و لا شرقية 
 و لا عسكرية و لا مهلبية
و لا بندق و حلاوة سمسمية 
 ولا احنا نقبل نبقى 
لعـــبة ف إيد حـــد 
مصــر
 علمت العــالم يعنى إيه دولــة
مصـــر تسعنا كلـــنا 
و هنتساوى فيها كلــنا 
و هنرفـــع راســنا فووووووووووق 
لأننا مصـــريين
مش عشــان انا مسلمة
أو لا عشان انتا مطلعتش مسيحــى
ومصـــر مدنـيــة 
مصـــر بهــية 
و بهـــية هويتها 
و توصيفها ف خانة الجنسية 
ف الأوراق الرسمية 
  مصـــرية 



مصـــرية 
يا غجــــــــــــــــــــر

-----------------------------------------
وتانى 
أسفة على حدة البوست 



This entry was posted on الأحد, يوليو 31, 2011 and is filed under . You can leave a response and follow any responses to this entry through the .

56 كــــلام بيطــبطـــب عـــلى قــــلبى و روحــــى

فاتيما
روح القلب الملائكية

انتى عامله ايه انا لم استطع الوصول اليكى اليوم لقد تم احتلال مكانك و ساليناز كانت هتضيع منى اليوم من كثر الزحام
قال تعالى
الذين يوفون بعهد الله و لا ينقضون الميثاق
صدق الله تعالى
لكن السؤال المهم هل هم اوفوا بالعهد الذى قطعوه على انفسهم جمعة لم الشمل ام جمعة فرد العضلات
طمنينى عليكى و اسف لانى لم استطع الوصول لكى و سالى بكت عشان كانت عاوزة تشوفك

كل سنة و انتى طيبة

فاتيما...بعد الشر عليكي للأسف مكنتش أتصور إن الموضوع يوصل للدرجه دي و الثوره إتقلبت دعايه إنتخابيه و شعارات ماهاش أي دعوه بأهداف الثوره اللي محدش جاب سيرتها إنهارده.

كل سنه و إنتي طيبه رمضان كريم و إن شاء الله اللي جي أفضل و ربنا قادر يحفظ مصر

ابراهيم رزق
-----------

انا اسفة يا ابراهيم
لأن مكانى زى ما قولت
تم احتلاله وطردى منه من الاخوات
اللى قعدوا يزحزحونى ويتكاتروا
لحد ما سبيتلهم المطرح

وروحت مكان تانى
وتعرضت بسبب اليافطةبتاعتى
لهجوم من الاخوةالسلفيين
واوشك واحد يتعدى عليا ...
لولا ولاد الحلال اللى طلعولى فجأة
عشان يبعدوه عنى

انا اتسئلت النهاردة
انتى مسلمة؟
اكتر ما اتسئلتها ف حياتى
مع انى محجبة
وباين عليا انى مسملة


وتعرضت لإرهاب وضغط
ووقفت قدر امكانى ...
وبعديت قررت امشى والعصر بيدن


وبسأل نفسى
طب لو كنت مش محجبة ؟
طب لو كنت مسيحية ؟
كانوا عملوا فيا إيه ؟!!


كنت هكتب بوست
عن اللى حصل
بس قولت مفيش داعى
يمكن انا نازلة بروح عدائية
او مستنفرالهم و بتلكك


الناس دى لو وصلت لسلطة
معرفش هيعملوا فينا إيه

الاخ اللى اتعدى عليا
كاد يضربنى
وقالى انتى خرجتى من بيتك ليه ؟!!
لمجرد انى ماسكة يافطة
عن المجلس العسكرى


الناس دى مش متواطئة مع المجلس
الناس دى أغبياء بالسليقة
مفيش مخ تقريباً
عشان تعرف تتخاطب معاهم


والشعارات اللى رفعوها
كلها حاولت اسمعها
الشعب يريد تطبيق الشريعة
واسلامية مصر اسلامية
...الخ
وحاولت اتقبل منطقهم الأعوج
حتى جاء شعار
ارفع راسك فوق
انتا مسلم دى ...
وسكينةاندبت ف قلبى
دبحونا بسيكن تلمة
وخلونى انكسف للأسلام
اللى ابتذل على ايديهم
وخلنى أحزن على انهم شالوا اسم مصر من الهتاف الرائع اللى كلنا كرامتنا رجعت بمجرد نطقه ف جنبات الميدان


منهم لله
زادوا جبال الهم
جـــبلاً


انا أسفة جداااا
كنت جايبة لسالى فانوس رمضان
صغنن ليها و لزياد
بس منهم لله ...
خلونى مشوفش أى حد من اللى كنت ناوية اشوفهم النهاردة

دى مش جمعة فرد العضلات
دى جمعة الحزن

كل سنةوانتا طيب

واسفة تانى

معلش يا فاتيما اعنبرى الفانوس وصل لكن فعلا ساليناز كانت جاية مخصوص عشان تشوفك و زعلت و عيطت لما معرفتش اوصلك لان الزحام انتى كنتى شايفاه و لا يوجد نظام ناس متعصبة و مش فاهمة حاجة الاخوان ممكن تتكلمى معاهم لكن دول لو عايزة تتكلمى معاهم متعرفيش تكلمى مين
انا كنت قلت ليكى انى مش هاكتب عن الثورة و السياسة لكن لما جيت مقدرتش اسكت و حاولت اكتب بتخفيف و اول حاجة كتبتها الشهادة من كثر ما اتسألت السؤال ده انهاردة انت مسلم و لا لا يا ريت تشوفى اللى انا كتبته اول ما جيت البيت
تحياتى

حاولت الوصول لمكانك اليوم
في عقلي عدة تساؤلات عن البوست إللي فات وعلى لساني سلامات كتير من بوبو صديقتك وزوجتي ( كان نفسها تكون موجودة النهاردة بس الحمد لله أنا رفضت ) ، إنجرفت مع بحر البشر إلى أن وصلت إلى مكانك
لأجد مكانك وقد إحتله أحد جهابزة السلفيين ، يحمل ذقنه و حقده و يافطة مليئة بالأخطاء الإملائية
سُرقت مني فرحة الميدان
وسُرق من صديقي وليد الموبايل
غادرت و أنا في قمة الإحباط و الحزن
القادم اسوأ حتماً

للاسف كنت متاكده ان دا اللي هيحصل

بس كنت بقول يارب يحصل العكس لكن للاسف

للاسف بجد

انا حزينة بمعنى الكلمة والمضمون

لا يافاتيما ..زمش نازلة بروح عدائية ولا حاجة ...إكتبى ...إنشرى الحقيقة
انا النهاردة كانت فى الميدان لأول مرة أحس بخوف ...لأول مرة ما أهتفش بفرحة ...ما أهتفش أساسا ...لأول مرة معرفش أقابل حد من صحابى ...لأول مرة الميدجان بكل وسعه ما يسعنيش
والسؤال إنتى مسلمة ده إتسأل لكتير النهاردة للأسف وكأنهم بقوا الحكامين بأمر ربنا فى الأرض
ربنا يستر على مصرنا ...وربنا ينور بصيرتنا :(

تسمحيلى ؟
هاخد جزء من تعليقك على إبراهيم هشيره على الفيس وإحتمال أستخدمه فى نوت
ممكن ؟

ياحبيبتى ياطمطم
أنا من أول مادورت عليكِ ومالقتكيش فى مكانك قلت اليوم ده مش بتاعنا
معلش ياحبيبتى هتعدى وهتتدبر
اليافطة بتاعتك طبعا عملت للبيه مشكلة فى دماغه اكتر ماهو

مكانش فيه ستات فى الميدان الا قليل قوى ولما كنت بدخل فى نقاش مع حد كنت بلاقينى لوحدى فى دايرة فيها على الاقل 15 راجل ..أقصد ستات غير المنتقبات اللى جايين معاهم
لو كنت استنيتى شوية كنت شفت الانسحاب الساعة سبعة

كل ده مقصود علشان البيه المجلس عنده أمل نترجاه خليك معانا ..احمينا منهم
معلش ياحبيبتى
هتعدى على خير ان شاء الله
بس والله قابلت واحد منهم واتناقشت معاه ومخه بالملايين اللى فى الميدان

وقابلت عيال التحرير اللى بقوا صيع مظاهرات ..زى السكر والله وتحسى ان عندهم خبرة فى الكر والفر ومجرمين حقيقى
طبعا صيع دى صيغة فيس بوكية للمدح مش للذم

واحدة هناك عيطت بحرقة قوى وقالت فين الثورة النهارده والعيال السكان الاصليين للتحرير اتلموا عليها يطمنوها
كلامهم وعقلهم والطلة فى وشهم بالدنيا

معلش ياحبيبتى روقى وهتبقى زى الفل
فاكرة الخطاب الاول وربنا ياخدك
طب الخطاب التانى ولا ياشيخ
ولا التالت ويانهار مش فايت ده بيقول سأظل :)
روقى بالله عليكى

مش مستني حد يقول لي علشان أرفعها

بالمناسبه يا طمطم

الحجاب عند بتوع الجلاليب الكابوليه يوازي بالظبط المايوه البكيني

الوليه عندهم بيلفوها في بتاع أسود كدا ويخرموا خرم لعين واحده علشان ما تشوفش خلئهم

ويا عيني مكلكعين كلكعه عجب


القصد

وحشتينا

أزيك يا فاتيما

الحمد لله ان مفيش حاجة حصلت

دة انا اخدت نمرة استاذ ابراهيم علشان اطمن عليكم

و لكن فؤجئت بيه ماشى بدرى و اساساً موصلكيش

بس الحمد لله ان انتى وصلتى بالسلامة يا غالية

و لازم يطلعلك و لاد حلال يحموكى يا فاتيما لما انتى ما يطلعلكيش ولاد حلال امال مين اللى يطلعلوا يعنى

ربنا يحميكى دايماً

حمد الله ع السلامة يا فاتيما

مش عارف اقول ايه

غير ربنا يساعد مصر

اختي العزيزة
اعلم ما تشعرين به من حزن واسى فكل منا قد يقبل اي شيء في الكون الا ان يشكك في تدينه
اشعر باسى شديد على ما وصلنا له اليوم
على من يظنون انفسهم حملة شرع الله ومع ذلك ينقضون العهود
حسبي الله على كل متاجر بدينه
اعلمي اختي العزيزة فحقك لن يتركه الله وسيعود اليكي فالله يجازي القلوب بما فيها ولا يعلم ما فيها الا هو
وينصر المظلوم على الظالم واكبر ذنب هو التشكيك في الاسلام لقلب مؤمن بالله
حسبي الله وكفى
اسف ان يكون تعليقي الاول هنا في بوست بذلك السواد اتمنى ان تكون زيارتي القادمة لشيء يدعو للتفاؤل في غد افضل
حفظ الله مصر من كل سوء

يااااااه وقدرتي تستني لحد اذان العصر ؟
بجد انتي حمول يا فاطيما
أنا اعصابي مااتحملتش لغاية (المسلم يريد اقامة الصلاة ) هو كان حد منعها قبل كدة ؟

السلام عليكم يا فاتيما
أنا لسةراجعة حالاومبطلتش عياط طول السكة..أنا حزينةقوي على مصر يا فاطمة.أنا مشزعلانة انهم كانوا كتير بس مش لدرجة 4مليون زي ما صفوت حجازي بيقول.أنا حزينة ان الناسدسكان اهم حاجة عندها استعراض العضلات والفلحسة مع انهم لمينهم من كل حتة في مصر..يعني لو الكنيسة لمت الأقباط في اتوبيسات مش حيعملوا 4 مليون؟!فين مصر في اللي حصل النهاردة؟فين دم الشهدا؟و الوحدة الوطنية مكنتشبسمع هديرهم غير في اسلامية اسلامية و كأننا في السويد مش في مصر.هو دة العهد؟ هو دة الوجه السمح و الكلمة الطيبة؟هو ده الاسلام؟عارفة بدأت أعيط امتى؟الساعة 8 كدة لما شفت علم مصرتاني في الميدان..و شفت المصريين مليينه تاني..أينعم مش 4 مليون..بس اللي فيه بيحبوا بلدهم بجد و عارفين نازلين ليه مش عشان الشيخ قالهم لازم تنزل.أحلى تعليق قريته النهاردة"ياللحية يالدبابة؟حتخلوا مصر خرابة" و هي دي كانت رسالة المجلس لينا النهاردة..حسبنا الله و نعم الوكيل..ياخسارة كل نقطة دم سالت

مستنية ايه يعنى يا طمطم
دى غزوة التحرير استكمالا لغزوة الصناديق
والبلد بلدهم على راى حسين يعقوب واللى مش سلفى وبدقن وجلابية قصيرة ونقاب يبقى مش مسلم
انتى فاكرة اصلا ارفع راسك فوق انت مسلم ده يشملنا
تبقى طيبة اوى
ده هتاف قاصر عليهم بس
اما المسلمين اللى زينا مش تبعهم
عندنا النهارده فى دمياط كان اللى يقول تحيا مصر بيهجموا عليه ويطردوه من الميدان ويقولوا اسلامية اسلامية .. كأن مصر قالعة راسها ولا حاجة
وهتاف تانى ( وحد صفك كتفى بكتفك حركه وطنيه وحده ) برضه طردوا اللى بيقولوه
وقعدوا يقولوا خيبر خيبر يا يهود جيش محمد سوف يعود
واللى يحب الله يجى الناحية دى
مهااااااااااازل
بجد اتخنقت
حرام حرام حرام
ده استهبال رسمى

شوهوا صورة الاسلام والمسلمين ورجعونا لايام الجاهلية
هو حد قال ان مصر مش اسلامية ولا مش هتبقى اسلامية
مهى مدنية اسلامية هى هياها مع اختلاف ان اللى هيحكمنا ميكونش رمز اسلامى ونقدر نحاكمه ونحاسبه ونعزله
هو فيه ايه ؟؟

النهارده امريكا حذرت رعايهااللى فى مصر من نزول التحرير عشان هيحصل اشتباكات بين المتظاهرين

شوفتى الفضايح

بجد أسوأ جمعة مرت علينا
دى جمعة الغضب كانت اهون

ربنا يسترها معانا ومع البلد دى اللى متستاهلش البهدلة دى من ولادها خالص


المهم انك وحشتينى اوى ومن زمان مجيتش هنا ولا مدونتى الحقيقة
ومعسكرة عالفيس لما جابلى الفسافيس فى دماغى ^_^

أخبارك ايه واخبار يوسف
يارب تكونوا فى احسن حال

بوسيلى يوسف كتير
وكل سنة وانتوا طيبين
رمضان كريم

حمد الله علي سلامتك يافاتيما

ارجوكي اكتبي اللي حصل بالتفصيل لو سمحتي

وبرضوا لسه عندي امل وهقول تاني
مصر فرمت وهضمت اعتي الحضارات اللي دخلت عليها اخدت اللي يوافقها ورمت الباقي

مصر هتفضل مسلمة وسطية معتدلة متدينة اكتر من اي دولة في العالم

مصر هتفضل غالية عليه
اسلمي يامصر

كل عام وحضرتك بخير

http://www.facebook.com/notes/ahmed-kamal/%D8%AE%D9%88%D8%A7%D8%B7%D8%B1-%D8%AD%D9%88%D9%84-%D9%85%D9%84%D9%8A%D9%88%D9%86%D9%8A%D8%A9-29-%D9%8A%D9%88%D9%84%D9%8A%D9%88/10150265622032226?notif_t=note_reply

والقلب يلهج : ربح السلفيون ـ مؤقتاً ـ وخسر الوطن كله ..

أعلم أنّ الضجيج وارتفاع الأصوات يُخمِد صوت العقل ويطمس الحكمة ..

وأعلم أنّ نشوةَ الانتصار ـ ولو كان موهوماً ـ تحول دون الاستماع أو الاستجابة ..

ورغم اجتماع هذه الظروف فإنّ علينا أمانةً نؤدّيها ، وإنْ لم يستمعها مَنْ وُجِّهت إليه ..



لقد كانت هذه المليونية " ضرورة " فرضها تغوّل الليبراليين وشطط مطالبهم ، لذا خرجنا..

كما كانت " فرصة " رائعةً لحوارٍ بنّاء يؤسّس لمستقبلٍ يؤمّله الجميع .

فلماذا أخذتنا الحميّة بعيداً عن مواطن الحكمة ؟!

ولماذا فعلنا مع غيرنا ما نُنكِره عليه ـ من التحرّش فضلاً عن الإقصاء ـ ؟!



يا أهل ديني : لو سألنا عشرةً من إخواننا الكرام المطالبين بتحكيم الشريعة :

ما الشيء الذي لو حدث في البلاد لأيقنتم أنّ الشريعة مطبّقة ؟! فهل تظنّ أنك ستحصل

على إجابةٍ واحدة من عشرة أشخاص ؟! فكيف بمائة ، فكيف بألف ، فكيف بمليونين ؟!



إخوتاه :

إذا كنا نحن أصحاب الهمّ نختلف حول الأمر ، فكيف الظنّ بغيرنا ؟!

بل كيف الظنّ بقوم ساءت علاقتنا بهم لعقود طويلة .. كيف يفهمون الأمر ؟!



كان أمامنا الكثير والكثير لنغنمه من هذا الموقف التاريخيّ

ولم يكن لذلك كُلفةٌ عليكم إلا ما وصّتكم به شريعتكم التي جأرتم بضرورة تطبيقها

فقط أنْ تملكوا أنفسكم ، ولا تنساقوا وراء أهواء النفوس بالتباهي والاستعراض

لقد أضعتم جهود كثيرين مهّدوا بالخير لنزولكم ، واستقطبوا الشباب إليكم

فلم يكن عليكم سوى أن تقطفوا ثماراً غرسها ورواها غيركم

ماذا لو أنكم صافحتم مخالفيكم ، وأهديتم مبغضيكم ، وابتسمتم في وجوه الناس ؟!

إنكم لن تسعوا الناس بأموالكم ولكنْ يسعهم منكم بسط الوجه وحسن الخلق ..

ماذا يكلّفكم ذلك ؟!

وكأننا لا نذكر رسول الله صلى الله عليه وسلم حين دخل مكة ؟؟!!

إننا دعاةٌ قبل أن نكون ساسةً .. رحمةٌ قبل أن نكون حزماً وردعاً

وإنما يرحم الله من عباده الرحماء .. ومن لا يَرحم لا يُرحَم



أخذتم فرصتكم فضيعتموها ..

وأعلنتم المواثيق وخالفتموها ..

فهنيئاً لكم جولة اليوم الخاسرة ..

واعلموا أنّ الحياةَ أكبر من موقف ، وأعظم من مجرّد جولة

فإن تماديتم فأبشروا بعواقب الجهل والبغي عاجلاً غير آجل

وإن تعتذروا عن الخطأ فذاك الظنّ بالكرام .. وكلّ بني آدم خطاء

هذا كلام

انا هعمل تدوينة اكتب فيها هذا الكلام
هذا كلام احد شيوخ السلف المشهورين

مش عارفه ليه حسه انى متفائله

بالرغم من كل الكبوات دى

عارفه ان الجاى احسن بكتير

مهى كل البلاوى دى والافكار الغبيه دى كانت موجوده

مش جديده هى يا طماطم كل الفكرة ان التعابين طلعت بس من جحورها

والتراب اتنفض من عليها فظهرت وبانت وبكده ممكن نعرف نطفشها

ازيك يا قلبى وازى اخبارك

يارب تكونى بالف خير

كل سنه وانتى طيبه ورقيقه وحنينه وذكيه وقلبك شفاف

انى احبك فى الله

كل سنة وانت طيبة وكان حلم جميل وصحينا .....

:(:(

الثورة ومصر ليهم رب يحميها يا فاتيما
وكفى .

رمضان كريم عليكى

الف شكر ليكم يا جماعة على التعليقات

انا بخير

وما حدث ف البوست الجديد
والتعليق للمرة التانية
بفانوس هدية

:)

كل سنة وانتوا أحلى صحبة
وناس
وعالم

فاطيما
أزيك أولا مش بعلق علي تدوينات ولا بكتب في مدونتي الأ ما ندر يمكن لي انشغالي في الشغل ومتابعة الديوان بتاعي وتريباتة ومكتفي بناقشات علي الفيس بؤك بس بتابع تدوينات وبتابع اللى بيحصل في مصر
اللى حصل يوم الجمعة مش سيء علي اطلاقة لي اسباب كتير بس علي الاقل حيخلي بعض القوي السياسية والحزبية تضاعف شغلها علي الارض في الشارع بعيد عن القاعات المكيفة وتويتر والفيس بوك
حيعرفوا اني السلفين بمشايخهم واحزابهم لا يعتمدا عليهم وغير مأموني الجانب فحيبقي آي تحالف معاهم ضرب من الجنون

كويس أنك بخير وبعد العيد حنتظر اشوفك في حفل التوقيع إن شاء الله

يا فاتيما
يا شقيقة الروح

انا بكيت دموع مُرة اوي
اول مرة اسمع هتافات الله اكبر واحزن كده
تفتكري حرام شعوري ده

كنت بتابع لحظة بلحظة عالتليفيزيون اذاعات غير مصر طبعا لسه تليفزيونا اهبل زي ما هو ووغد

وقاعدة شبه متشنجة ومش طايقة كلام اخواتي وبابا وحزينة حزينة حزينة لاقصى درجة
مش عارفة حتى اعبر بكلام
لما قريتك دلوقت لقيتني ببكي ان في كلام عبر عن اللي جوايا
فاتيما اصبري ورابطي وارفعي راسك فوق انتي مصرية حرة اصيلة

كل سنة وانتي اطيب واسعد واقرب الي الله ولمن تحبين
ويا رب رمضان القادم يكون يوسف رجع حضنك
انا بحبك اوي وكنت عايزة احضنك واقولك كده دلوقت
بحبك اوي

:*

وماذا كنتي تنتظرين من جموع قال لهم شيخهم هناك فسطاطين فسطاط الشيوخ وفسطاط الناس الآخرين وهيبقى منظرك وحش لو سبت الشيوخ ورحت للناس التانيين
مشايخ السلفية قسموا الناس نصين يا معانا يا علينا بالتالي المسلمين معاهم واللي مش معاهم الله اعلم بيهم
لما الشيخ يقول لما الشيخ يقولك حاجة لازم تسمع كلامه وتنفذه وحتى لو انت مش مقتنع بيه يعني حط مخك في الفريزر او ارفع الفيشة بتاعته وافصله الشيخ هيفكرلك يبقى حضرتك منتظرة ايه من ناس المشايخ بيفكرولهم وهم بس بينفذوا
بالنسبة لمسيرة العباسية بالرغم انا مقتنع باهدافها الا انني معترض على طريقة تحقيقها زي ما قلت قبل كده وعرضت اسبابي لأن كان رايي عمر ما المجلس العسكري هينفذ المطالب دي بطريقة التحدي وكان البديل وحدة الصف اللي للاسف فشل وحدة الصف مع الضغط من التحرير هتنفذ كل المطالب محتاجين نتجمع تاني على اهداف مشتركة والا المجلس العسكري هيقولك دي مطالبك انت بس ومش مطالب انفذلك مطالبك واسيب الباقيين واعتقد ده نفس اللي حصل في مظاهرة 27 مايو اللي كان فيها اعداد اكبر بكتير من مسيرة العباسية الا ان اهدافها متحققتش
بس بالرغم من اعتراضي على المسيرة الا اني طبعا ضد العنف اللي تم ممارسته على مسيرة سلمية تكفل الجيش بحماية كل المسيرات والمظاهرات السلمية لكنه للاسف خالف وعده
كأن مخالفة العهود ونقض المواثيق اصبحت من شيم المجتمع المصري سواء شعب او حكومة
ربنا يستر على مصر
ويا رب رمضان يجمعنا
كل سنة وحضرتك طيبة

عاشقة الرومانسية
----------------

بقيت بخير يا دودو
الحمدلله
متقلقيش يا حبيبتى
:)

طل سنة وانتى بألف خير
ورمضان كريم يا قطتى

۩ ζ ۩ ζ ۩ ζ ۩ ζ ۩

ابراهيم رزق
-----------

حص فعلا يا ابراهيم
شاب اخوانى وقف يتكلم
وأسرنى بذوقه واخلاقه وتفهمه للأختلاف ف الرأى والتعبير والتصرف ...

بس هوه واحد من كام ماشيين بمنطق العافية والإقصاء ؟؟!!

هروح أقرى البوست
معلش أنشغلت عن قرايته
وفانوس سالى موجود
وهيفضل معايا لحد ما تاخده
ولو آخر يوم ف رمضان
هه

:)

كل سنة وانتا وكل العيلة بألف خير
ورمضان كريم عليكو وعلينا

۩ ζ ۩ ζ ۩ ζ ۩ ζ ۩

KINGTOOOT
---------

ازيك يا وليد ؟
متحرزنش قوى
ربنا كبير


عارف ؟

انا اللى تاعبنى
ان الناس اللى نيتها صافية
ومش عاوزة مناصب ولا غرض
هما المتبهدلين ومش بإيدهم قرارات
واللى ف وش الثورة ..بيعكوا جاااامد ويوكسونا كلنا معاهم ...

معلش
مقولة نجيب محفوظ
عمن يحصد ثمار الثورات
و نظريتك انتا عن جيلنا
بيخلونى أستوعب شوية ...

هلة كانت هتكتئب
وهيا أرق مخلوقات الله
كويس انها مجتش
بس كنت جايبلها فندام ..
وفانوس لبيكا ...
معلش ..ملحوقة

وهتستغرب لو قولتلك
انى مبسوطة انى مشوفتكش
عشان لو حصلت القصة دى قصادك
كنت هتقوم فيهم تبهدلهم
وأقعد أنا احوش فيك وأعييييط
فكويس اننا متقابلناش بقى
:)))

اشوفك على ألف خير

أكيد هشوفك ف الميدان ف رمضان
احنا خلاص ...
التحرير بقى نداهتنا

كل سنة وانتا وهبة وعمر
بألف خير يا أجمل ناس بعرفهم
والسنة الجاية تبقى اربعة بقى
و خلصونااااااا

۩ ζ ۩ ζ ۩ ζ ۩ ζ ۩

كيــــــارا
-----------

وانا كنت متوقعة قلق يا كوكى
بس مش بالشكل المهين دا

حصل خير

كل سنة وانتى طيوبة
يا بنوتات يا عسولات
ورمضان كريم يا حبيبتى

۩ ζ ۩ ζ ۩ ζ ۩ ζ ۩

المنسى
-----

حمدلله ع السلامة يا منسى ى ى ى

احساسك كان عام بين ناس كتيييير
والبوست كله تحت أمرك يا سيدى
انا كتبت تفاصيل أكتر
المهم
اوع القطرات تدخل ف بعضيشها

وكل سنة وانتا طيب
و رمضان كريم
۩ ζ ۩ ζ ۩ ζ ۩ ζ ۩

شيرين سامى
---------

ميرسى يا شوشى
منحرمش منك يا حبيبتى

وانا بخير
انتى قولتى حاجة فرستنا كلنا
من اول عشر دقايق نول
وهى ...فين المطالب بتاعت الثورة
اللى إتفقنا عليها ؟!!!!!


كل سنةو وانتى بالف خير يا حبيبتى
انتى وكل عيلتك الجميلة .. زيك

۩ ζ ۩ ζ ۩ ζ ۩ ζ ۩

حفيدة عرابى
----------


كتبت تفاصيل يا فيدو
اقريها يا حبيبة قلب طمطم
وانتى تعرفى ...
ليه مشيت بدرى

ندمانة انى مقعدتش
بس الموقف كان ضاغط جدا


انا روقت خلاص
وبقيت زى الفل

وكل سنة وانتى طيبة
انتى وطنط
واخواتك
ورمضان الجاى مصر تبقى أحلى
واغلى
وانبل
واعلى من كل حاجة تانية


بوسات وحضونات كتييييير
يا فدافيدووووووو

۩ ζ ۩ ζ ۩ ζ ۩ ζ ۩

مصرى جدا
-------

انتا كمان يا هانى
وحشت اختك يا فندم

ويعنى كل شوية قفل التعليقات دا
والعكننة علينا ...
ويعدين تيجوا تقولوا وحشتونا ...
ماشى
هنفوتها عشان رمضاااان

:)
واللبس حرية شخصية يا سيدى
بس محدش يتحكم ف حد
ولا حد يحاسب حد
خصوصا انى كنت واقفة محترمة
وكويسة
ومبعملش حاجة تستفز ...
اقرى التفاصيل
وانتا تعرف اكتر اللى حصل

وكل سنة وانتا بألف خير
ورمضان كريم عليك
وعلى كل حبايبك
يا وتـــد

۩ ζ ۩ ζ ۩ ζ ۩ ζ ۩

لا انا كنت متوقعاه كدا لان في زميل ليا سلفي ودا عمره ما راح مظاهرة

وكان ضدى علطول الخط في اي شئ من بدايه الثورة لحد الان


لقيته بيقول انه نازل المظاهرة بتاعت الجمعه وبيتصل بناس اد كدا ولازم تنزلو الشيخ قال كدا
ناس من الشرقية وبنها وعمال يجمع

قلت بس الموضوع مش معدى علي خير لاني عارفه دماغه وطبيعي المرء علي دين خليله يعني العينة بينة

كل سنة وانتي طيبة ياحبيبتي

يارب افرجها علي مصر

Ramy
-----


الله يسلمك يا رامى
انا بخير يا ر ر
وولاد الحلال كتير
الحمدلله

كل سنة وانتا طيب
ورمضان كريم علينا كلنا
وهستناك يوم افطار المدونين
ان شاء الله

۩ ζ ۩ ζ ۩ ζ ۩ ζ ۩

مصطفى سيف
---------

اهلا بيك يا مصطفى
ويا فندم تعليقك ف اى بوست يشرفنى
وبقيت كويسة الحمدلله

وفيه جملة قريتها النهاردة
تلخص كل ما فى قلبى من سبب للخوف

قالها عمر حاذق ف الدستور

بأنني
غير خائف أبدا من شرع الله
لكنني خائف جدا مـمّن سيعتبر نفسه
ممثلا لهذا الشرع
فاهما له مؤتمنا عليه من دوننا
http://www.dostor.org/opinion/11/july/30/49773

هوه دا مربط الفرس

هل هولاء من سيحكمون بشرع الله
ولاّ هيحرموا علينا العيش والعيشة واللى عايشينها ؟؟؟

وعمر طاهر كمان قالها
لكن بالله عليك قل لى
كيف أأتمنك على شرع الله
وأنت أصلا مالكش كلمة؟

http://www.facebook.com/notes/tahrir-news/%D8%B9%D9%85%D8%B1-%D8%B7%D8%A7%D9%87%D8%B1-%D9%8A%D9%83%D8%AA%D8%A8-%D9%81%D9%89-%D8%A7%D9%84%D8%AA%D8%AD%D8%B1%D9%8A%D8%B1-%D8%AC%D9%85%D8%B9%D8%A9-%D8%A7%D9%84%D8%A5%D8%B3%D9%84%D8%A7%D9%85%D9%8A%D9%8A%D9%86/155398004536617

لأنهم وعدوا بالتوافق
ثم انتهزوها فرصة للإستعراض

..

وعن مسيرة العباسية
فاسمحلى يا مصطفى أقول رأى هنا
فيما يتعلق حكاية الضغط ع المجلس العسكرى دى ...

المجلس لن ينفذ مطالبك
ف كل الاحوال ..بسلاسة
وبأريحية
و لا بمزاجه حتى ... لو عايز

المسألة عدت مرحلة ضغط شعبى
واديك شايف
مليونية الجمعة دى
كما يقول المثل العامى
ريش على مفيش
رسايلها ..كلها أبعد ما تكون عن الرسالة الأاولى اللى حصل عليها توافق ...وهى الضغط لتنفيذ المطالب


والأيام ستشهد ان شاء الله
وان كان الست شهور شاهدين
مفيش حق بييجى
الا بتصعيد و قوة واستبياع ف الاصرار
اما الذوق والشياكة والوقوف ف الشمس بيفط ..
فبراحتك وعلى مهلك
وخليهم يتسلوا ....


كل سنة وانتا بألف خير
ورمضان كريم عليك يا عزيزى

۩ ζ ۩ ζ ۩ ζ ۩ ζ ۩


آه كنت هنسى
دى مدونة صباحاتى
اللى بقرى فيها المقالات والجرايد
يمكن تلاقى فيها حاجات تعجبك

سلام

http://sabbahttii.blogspot.com/2011/07/31.html

سنابل
-----

ازيك يا سنبلة الدهب الأصلى

اقرى التفاصيل يا ماما
وانتى تعرفى اكتر


ومعلش
جمعة وعدت


كل سنة وانتى طيبة يا حبيبتى
ورمضان كريييييم
۩ ζ ۩ ζ ۩ ζ ۩ ζ ۩

dahlia...
---------

يا أدفى كورنر ف قلبى
انتى قولتينى
فى كل سطر كتبتيه

وانا أسفة لأنى معرفتش أشوفك
ولا اشوف أى حد

وعلى رأى وائل عبدالفتاح
دى كانت جولة خاسرة
ولسه مخسرناش الحرب

ان شاء الله خير

كل سنة وانتى طيبة
يا حبيبتى ى ى ى ى
والولاد وزوجك العزيز بألف خير

وبراحة على نفسك
احنا عاوزينك يا دودى
:)

۩ ζ ۩ ζ ۩ ζ ۩ ζ ۩

حاجات جوايا
-----------

لا فض فوك يا سالى
انتى كفيتى ووفيتى


وفعلا زى ما كتبتى

دى أسوأ جمعة مرت علينا
بجد


ومعلش خليكى براحتك
انا عارفة نداهة الفيسبوك دى
هيا والتويتر كمان
ومقدرة ...

كل سنةو وانتى طيبة يا حبيبتى
ورمضان كريم

بوسيلى دودو
:)

۩ ζ ۩ ζ ۩ ζ ۩ ζ ۩

شمس النهار
---------


الله يسلمك يا شمس نهار المدونات وقمرها

وكتبت يا حبيبتى التفاصيل
لما لقيتنى مش لوحدى اللى كنت حاسة بغربة واستعداء و حزن جارف

اقرى بقى التفاصيل

ومصر هتفضل غالية علينا كلنا يا حبيبتى...

كل سنة وانتى والبنات والحفيد الغالى
بألف خير يا رب

و رمضان كريمممممممممم


۩ ζ ۩ ζ ۩ ζ ۩ ζ ۩

الطائر الحزين
------------

ازيك يا غيهاب

الاول أسفة ع التعليق التالت اللى طار
لما حدثت البوست
وضميتهع اللى هنا ....


ثانياً
قريت الوصف لليوم
اللى ف الفيس بوك
واللى كتبه يبقى الباشمهندس احمد كمال الغالى صاحب رحايا العمر ولا انا غلطانة ؟!!!

ف كل الاحوال هو مكتوب بوجهة نظر متوازنة مهذبة لا تتناسب مع ما شاهدته ف الميدان
الميدان كان غاضب حانق متوتر
متحفز و عنفه اكتر من سلميته ...

الموقف بتاعى اتلم
لأنى انا شخصياً لميته حرصا على سلامتى ثانياً وسلامة اليوم اولاً ...
لكن لو انا واحدة أعصابها فالتة
او صعب عليها روحها
كان ممكن تتخانق وتعلى صوتها وتفرج عليه الناس وتعمل مشكلة و بهدلة والموقف يتطور ...الخ الخ
لكن دا محصلش عشان التعقل
لكن تضمن ان دا هيحصل ف كل الخطوات القادمة مع أشخاص غيرى ؟!!!
وف اللحظات الفارقة ف عمر البلد
ينفع دول يبقى ف ضهرى ؟!!
واعتمد عليهم ؟
وأثق فيهم ؟
وآىمن جانبهم ؟
وأقبل احتقارهم وعنفهم ؟
وأقبل تحكمهم وسيطرتهم ؟
وأرضى بالوصاية ؟

ليه ؟


قرين مقالة الشيخ محمد عبداللطيف
وبهرنى بصراحة بعقله واتزانه
بس السؤال المؤلم بقى

هوه فيه كام واحد منه
داخل هذا الفصيل السياسى ؟
ومدى تأثيره ايه ؟
وكان فين يوم الجمعة ؟
وقبل الجمعة ؟

خسارة ان واحد زيه
ميكونش هوه الغالبية


عموما اقرى الصباحات عندى
هتلاقينى برفعله القبعة والله


كل سنة وانتا بألف خير
انتا وكل العائلة الكريمة
وكل اهل طنطا الغاليين

يا رب


۩ ζ ۩ ζ ۩ ζ ۩ ζ ۩

انا مروحة يا جماعة
لما أرجع ابقى اكمل رد ع التعليقات
ان شاء الله

:)))

حمدالله على سلامه حضرتك

وكل سنه وانتي طيبه

انا مش عارفه اعلق على البوست بصراحه
لاني بدأت أكره كل الي احنا فيه

وهي دي مشكله الجماعات بكل انواعها

كل مجموعه شايفه ان هما الي فاهمين بس والباقي لا
وهما المسلمين بس والي يخالفهم في العمل او الرأى يبقى كااااااافر بكل ما تحمله الكلمه من معنى

كل سنه وحضرتك طيبه

ههههههههه
كان الله فى عونك
ارفع راسك فوق انت مسلم

ارفع راسك فوق انت قبطى
ولمدة 10 ايام امام ماسبيرو
من الواضح ان الناس. مش عايشة فى الواقع
ونزل عليهم يوم الخميس شعب من السماء او من الواق واق
فوقوا
ما كانش عاجبكم صباع الفنجرى
شوفتم. يد السلفى
ههههههههههههههههههههههه

كل سنة وانتي طيبة وبخير وصحة وسعادة
ربنا يتقبل منك الصيام والقيام


وشكرا انك كتبتي اللي حصل

هرجع مره تانية اقراه علي رواقة

هههههههههههههههههههه

معلش بس غصب عني ضحكت ...... اصلك بتفكريني بافلام خسئتي وكدهون :))

في واحده في اسيوط دخلوها النار وقالولها كاسيات عاريات ... اه والنعمه :)))))

خدي الامور ببساطه .... ناس راكنه مخها ع الرف وجايه لاول مره .... ضيف تقيل ومشي .... وانتي صاحبه مكان استحملي :)

هابي رمضان ..... هابي مسلسلات فلوليه :)

وحاولت أركز و ادور ف ذاكراتى
على مين أسامة دا ؟!!
فغير أسامة بن لادن ... ملقتش

عيييييييييييييييييب امال انا رحت فين ؟؟؟؟؟

على فكرة
وانت واقفة فى مكانك المعاتد كان فى يافطة جبهو علماء الأزهر على يمينك
يافطة بيضاء كده
كنت انا اللى كاتبها
ما انا من التيار الاسلامى برضه انت نسيتى
بس ما رجتش يوم الجمعة
انا رحت يوم الاربعاء لما رجعت من الجبهة
وقعدت فى نفس المكان
ودورت عليكى وحت لفت الميدان قلت ممكن تكونى نزلتى تتمشى وتساندى الناس كالعادة

تعرفى كانت دموعى قربت تنزل
لإنى كنت عارف اللى هيحصل
وعارف مين رايح ومين لأ
وعارف كل واحد رايح ليه
وعارف اكتر منكم كمان الصفقة ماشية ازاى
عارفة لما تلاقى البلد بتدبح قدام عينك وانت قاعدة
دا اللى حصل يوم الاربعاء
قمة الغباء فى التخطيط
وضياع الهدف
ومع إنى متوقعه جدا جدا جدا
وعارفه سواء على مستوى تاريخ الثورات المعتاد كجزء من فترة التخبط
او لإنى مشارك مع الناس وعارف دماغها

بس برضه كنت زعلان جدا إننا مش قادرين نختلف ونبنى طبعا لموروثنا الحضارى ونسرع العملية البنائية

الحمد لله على كل حال

عموما تابعى وانت هادية
الأيام الاية وخاصة بعد بكرة هتخليكي تضحكى كتيييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييير جدا جدا جدا جدا


كل سنة وانت طيبة

ازيك يا تيما

بصي بقى انا مش هعلق على البوست لاني منهاره بما فيه الكفايه


اولا من الي شوفته لما نزلت يوم تمزيق مصر
والكلام الي سمعته والاهانه الي حصلتلي بس انا بقى طلعت غبيه وكملت اليوم
صحيح العند يولد الكفر يلا ربنا يهديني


ثانيا من الي حصلك من ناس المفروض انهم بيؤمنوا بأعظم دين الي هو دين الرحمه


فخلااااااااااااااااااص مفيش كلام عايز يطلع مني في الموضوع ده


انا بقى جايه اقولك
كل سنه وانت طيوبه وحبوبه وبخير
وربنا يتقبل منك صيامك وقيامك ويعتقك من نيرانه ويرزقك في شهره الكريم دعوه لا ترد ويريح قلبك


وحشتيني جدا ♥ ♥

خالتو
والله انا زعلانة جدا من يوم الجمعة دة بجد حسيت وانا بتفرج على التلفزيون انى بتفرج على اندونسيا مالزيا مش بتفرج على مصر خالص

حاجة تقهر

المشكلة انهم مش عندهم قابلة انهم يسمعوكى او يفهموا

اولا كل سنة و انتى طيبة و جدعه و مليون راجل :)

ح قولك رايي بصراحة بدون ما تزعلى الجمعه اللى فاتت اللى نزلها يستاهل اى حاجة تحصله لان الموضوع كان واضح جدا و انا استجدعت اوى الجمعية الوطنية للتغيير لما اعلنت انها لن تشارك بكل بوضوح قبلها بفترة

و انا مش دبلوماسية و ح قولك بالمختصر..دول عالم تجار دين و انا مش بآمن لاى واحد فيهم مايفرقش معايا اخوان و لا سلفى...اى حد مدخل الدين فى السياسية فى نظرى واحد جاى ينصب عليه

هم الغالبيه يا فاطمة

فاتيما

مش عارف اقول ايه
انا متابع وشايف اللى بيحصل فى مصر وانتى عارفه انى بعيد عن البلد لكن والله كان نفسى اكون فى مصر معاكم اليوم ده بالذات

صديقتى العزيزه فاتيما للاسف النظام القديم بينتقم من الثوار بطريقته المعتاده
بمعنى

ايام الرئيس المخلوع كان دايما بيخوف الشعب من التيارات الدينيه المتشدده بهدف الاستمرار فى الحكم والتوريث بل كان ينظم تفجيرات للكنائس وينسبها للاسلاميين

وحينما حدثت الثورة لم يشترك فيها تيارات اسلاميه . بالعكس كانو يرفضون الثوره بفتوى من شيوخهم تقول حرام الخروج على الحاكم

بعد تنحى الرئيس المخلوع هناك من يحاول ان يثبت ان مصر مقبله على دوله دينيه كعقاب للشعب على ما فعل من ثوره

اما التيارات الدينيه نفسها فهى مجرد اداه فى ايدى فلول النظام السابق ولهم مصالح مشتركه مع النظام السابق منها التمويل المادى للقنوات الفضائيه والجمعيات الدينيه

صديقتى انا لم اتفاجأ من جمعة لم الشمل وما حدث فيها ولكن انا اتمنى ان تمر محاكمة رموز النظام على خير وبسرعه


بالنسبه لتمويل هذه التيارات الدينيه فله مصدرين هما مصدر داخلى
هو الحزب الوطنى ورجاله .
ومن الخارج السعوديه

الجماعات الدينيه تقوم بما لم يستطع ان يقوم به البلطجيه يوم موقعة الجمل او موقعة العباسيه


للاسف ان معظم الشعب ينخدع فى الشعارات الدينيه

مش عارف امتى الناس هتفهم
والله انا حزين جدا لكن عندى امل كبير فى الله ان يحفظ مصر ممن يتاجرون باسم الدين لخدمة مصالح شخصية



تحياتى

كل سنة وحضرتك طيبة :)

نتايج التصويت في كتاب الـ100 تدوينة اتنشرت امبارح.. وتدوينتك "28" كالمتوقع يعني فايزة:))

دي قائمة التدوينات الفايزة
http://100posts-ebook.blogspot.com/p/html.html

وطلب صغير عايزة اميلك عشان يتم التنسيق بخصوص التدوينة
تقدري تبعتيه على الاميل ده
lan200687@gmail.com

دمتِ مبهجة

مصر عاوزينها إسلامية ازاى يعنى ؟
احنا مصر بلدنا حاجة تانية
و محدش كان قايلنا ؟!!




و مصر ... البهية
لا أسلامية و لا علمانية


اعتقد انك اثبتي اللي نفيتيه , انا مش جاي اتناقش ولا اقول ايه الصح ولا ايه الغلط , بس حقيقي دي نصيحة مخلص متخليش كراهيتك او ضيقك او اختلافك مع فصائل الاسلام السياسي تاخدي موقف من ثوابت مش ملك فصائل الاسلام السياسي دي ملكنا كلنا كمسلمين .

إرسال تعليق