.

.

شـــــهـيـد العــباســـية  

Posted by: فاتيما in







محمد محسن  .. شهيد العباسية
واللى نزل ف مسيرة سلمية 
فخرج منها مصاب .. ثم صار شهيد 


محمد محسن  .. شهيد العباسية
واللى إنصاب لأنه رفض يسيب المكان 
ف عز التوتر والهول بتاع الموقف 
ولما قالوا ان فيه سور ممكن 
ينطوا من فوقه 
ولأنه راجل  ... رفض يهرب 
ووقف يدافع عن الموجودين 
لحد ما خد طوبة ف دماغه .. عملتله نزيف 
و قعد بعدها فى حالة حرجة
من 23 يوليو  ولحد 3 أغسطس بليل 


محمد محسن 
أستشهد لأنه ببراءة تصور
ان المطلوب منه 
فقط ان يطلب حقه و حق هذا البلد 
وبشكل سلمى بحت 
فخرج خالى اليدين من أى شىء
يحمى بيه روحه
و يمكن لأن كان سلاحه الوحيد
إخلاصه و مشاركته و صوته و الهتافات 
فكان العقاب بأن يصمت للأبد



محمد محسن 
ربنا أراد انه ميعيش
عشان يخلد بموته هذا اليوم 
اللى أتغدرت فيه الثورة 
وظهر فيه وجه المجلس العسكرى بقبحه
أو بحقيقته ونواياه 
وهى ضرب الثورة ف مقتل
 هو يوم من أيام الغدر والتحريض
و بسببه تارنا عند المجلس العسكرى 
و كل من ولاه 
ومحمد اللى بقى شهيد العباسية 
بقى كمان تخليد لموقعة العباسية 
عشان محدش ينساها .. و ينساه



محمد محسن 
خد طوبة ف دماغه
عشان أنا و غيرى اللى ميعرفهوش يمكن 
بشكل شخصى ولكنهم شاركوا ف المسيرة 
محمد إنصاب عشان أنا وغيرى 
يروحوا لأهلهم و يعودوا لبيوتهم سالمين 
بينما هو .. لن يعود 
إلا جثمان ... فى صندوق 





محمد محسن 
شهيد العباسية 
بقول لقاتليه ..  ان ربنا المنتقم 
ويا ريت وانتوا بتبصوا ف وشوش اولادكم 
كل يوم على الفطار تفتكروا 
ان أم فى أسوان .. هتتحرم من الطلة 
ف وش ابنها  ونور عينيها كل رمضانات الجاية 
و كل العمر اللى فاضل
و دمه اللى بلون البيريهات
ملطخ إيديكم .. و سلاحكم و بدلكم الكاكى


محمد محسن 
شاب فى عمر الورد ...  23 سنة 
اتخلى عن مستقبله وحياة جاية بكل ما فيها
من شباب و حب واولاد واحفاد 
عشان كان عاوز يشوف مصر حرة 
رافعة راسها فوق 
ودفع عننا التمن ..شهادة و كرامة 





محمد محسن .. شهيد العباسية 
النهاردة الشرطة العسكرية 
رخمت ف خروج جثمانه من معهد ناصر 
وأصروا على شوية اجراءات متعنتة و غبية 
و بسببها اتصلى عليه الجنازة 
فى مسجد المعهد .. وفى جمع قليل 
ولهذا 
محمد ..
ينتظرنا فى وداع أخير .... غدا 
بعد صلاة الجمعة 
ف مسجد عمر مكرم .. لأداء صلاة الغائب
و أرجو من كل من حضر المسيرة تحديداً 
ومن كان قلبه معانا ف البيوت 
و من يسكن القاهرة  ويقدر ييجى التحرير
يا رت كلكم ... متتأخروش  على محمد
و لله وحده .. البقاء
و المجد كل المجد .. للشهداء 
والحساب قادم 
يا قتلة القلوب الطاهرة والأبرياء 
------------------------------------------

This entry was posted on الخميس, أغسطس 04, 2011 and is filed under . You can leave a response and follow any responses to this entry through the .

10 كــــلام بيطــبطـــب عـــلى قــــلبى و روحــــى

ربنا يرحمه

بس ينفع ادعى على اللى عمل كده بالمثل

و لا أدعى له ربنا يفتح قلبه و يشوف انه بيقتل زهوووور بلده

اخدتها فيس بوك بعد اذنك ياطمطم
أنا صعبان عليا جدا جدا انه مات بالتحريض
سعادة اللواء الروينى وبيانات المجلس 69 و70 و6 ابريل العملاء والناس اللى جاية تحدف عليكم مولوتوف ياأهالى العباسية الشرفاء واتصرفوا بقى
واتصرفوا
أبشع حاجة حصلت ان الأهالى تكره الثوار وتحدف عليهم طوب حتى لو مختلفة معاهم

رحم الله الفقيد وأنعم على أهله بالصبر والسلوان

---

أنا سافرت كتير جداً خلال الشهرين اللي فاتوا منهم زيارة لمصر لحفل توقيع كتابي الجديد اللي غبتي عنه المرة دي :-) رغم تنبؤاتك بيه من ديسمبر اللي فات :-)

وفاتني كمان 19 بوست هنا في المدونة قريتهم كلهم دلوقت، إنتي خلاص بقيتي مؤرخة للثورة، مش للمدونين وبس

ربنا يحفظك وتكوني دايماً بخير

الله يرحمه ويرحم كل الشهداء

فاتيما
روح القلب الملائكية

ربنا يرحمه و ينتقم له

تعرفى يا فاتيما انا اعرفه و اتكلمت معاه كثير اثناء الثورة لكن اول مرة اعرف اسمه الا لما استشهد كل اللى اعرفه انه كان شاب مصرى اصيل صعيدى
تحياتى و سلامى

ربنا يرحمه ويسكنه فسيح جناته
ويلهم اهله الصبر والسلوان
رمضان كريم يا ام يوسف

الله يرحمه ..... كان لابد ان تتلوث الايادي التي تحاول خنق ثورتنا بدماء حتى تكون عليها شهيده يوم القيامه ..

اما الشهيد فله الجنه ..

عارفه يعني ايه ظابط جيش تتلوث ايده بدم مدني حتى ولو بالتحريض .... يعني مجرم

هو بالتأكيد شهيد
ولكن شهيد من؟؟؟؟؟؟؟؟؟
شهيد من قتلوة؟؟؟؟؟؟؟؟
ام شهيد من حرضوا على قتله؟؟؟؟؟؟
ام شهيد من اوهموة انهم يحافظون على عرضه؟؟؟

حسبنا الله ونعم الوكيل

ربنا يرحمه يارب

ودمه في رقبة كل واحد كان سبب في اللي حصل دا

منهم لله

اللهم اضرب الظالمين بالظالمين واخرجنا منهم سالمين

إرسال تعليق