الثلاثاء، 9 أغسطس، 2011

بإخـتـصار ..... عشان مبحبش الرغـى انا

 
العواف عليكم 
الحقيقة اننى ... لم أكن أنتوى
أن أكتب هذا البوست 
لكن حسيت انى لازم اشرح وجهة نظرى 
عشان محدش من الغاليين عليا يتصور شىء
مش حقيقى والله و بالمرة 
 فيما يتعلق بوجهة نظرى 
ف أداء التيارات الأسلامية
واللى بيعنينى هنا .. الأداء السياسى
دا مربط الفرس 
انا لا بكرهم و لا متحيزة ضدهم
و لا حاجة
وأكرر .. أغلب من أعرفهم
وينتمون لهذه التيارات
هنا ع النت او ف الواقع .. ناس محترمة جدا
أنا مشكلتى الحقيقية مع قيادات
هذه التيارات
هما دول اللى عاوزين ضرب النار
ف ميدان عام غير مأسوف عليهم الصراحة ...
و اقصد ضرب النار معنوياً ... 
عشان محدش يفهمنى غلط
الله يكرمكو ... :)



عتبى وغيظى وانتقادى الدائم 
منصب ع القيادات بتاعتهم بلا تمييز
الاخوان والسلفيين واخيرا اللى طالعينلنا 
ف المقدر جديد ... الاخوة المتصوفة 
وأكرر القيادات 
وليسوا المنتمين لهذه الجماعات
العالم دى .. موصلتش لكراسى القيادة 
الا بموافقة الامن و بمساندة النظام المباركى 


ولهذا و لحد الثورة .. لم يكن لهم دور فعال 
وكانوا بالعكس .. محبطين ومهبطين 
زى السلفيين مثلا
اللى استنكرو الخروج ع الحاكم
والمتصوفة اللى دايما ف حالهم
و احد قياديهم زمان أعلن تأييده وبحماس 
لترشيح مبارك لفترة رئاسية جديدة ...




اما الاخوان فحدث بقى و لا حرج 
على مراجيحهم اللى شوية فوق
وشوية تحت 
وكله يصب ف مصلحتهم الشخصية
ومكاسبهم ولو على جثة الوطن 
ومفيش داعى أفكركم كاااااام مرة 
انسحبوا م المشهد عشان 
ميعفروش دقنهم بتراب الإصطدام بالسلطة
واللى ماسكة زمام الأمور الآن 




قصره
انا مش بكره التيارات الإسلامية 
ولا بخونها 
انا بس قرفانة من اغلب القيادات فيها
ومش هما بس  على فكرة ..دا
قيادات احزاب الوفد و التجمع والناصرى 
والجبهة والوسط و غيرهم ...
لأنهم ف أفضل احوالهم .. ضعاف ومخترقين
وف أسوأ احوالهم ... 
انتهازيين و بتوع مصلحتهم


واللى يزعلنى أكتر ان فيه الآلآف وملايين 
عندهم استعداد يمشوا عميانى
ورا العالم دى
ويركنوا دماغهم على جنب 
وهذا ما ارفضه  جملة وتفصيلاً 



طب انا مثلا و بعزم ما فيا 
أحيى شباب  6 ستة ابريل .. 
و وارد جدا انزل مسيرة معاهم 
لما احس انها وانهم .. صح
و ارحب بالبرادعى 
وبعتبره حاليا .. افضل المرشحين للآن
وياااه .. لو حمدين صباحى يبقى نائبه 
تمهيداً لأنه يكون الرئيس القادم بعده ..
يبقى هايل 



لكن
لو ستة ابريل عملوا أى حركات معيلة 
ساعتها ولاّ بيبقالهم قيمة عندى  ولا وزن
ولو لقيت حد أفضل م البرداعى وحمدين
هنقل صوتى ليه .. 
و ابدا لن أؤله أحدا 


انا ماشية بدماغى و اللى بشوفه صح 
معنديش استعداد امشى ورا تيار بعينه 
او شخص بعينه وألغى عقلى 
ولهذا لما حد بيعرض عليا الإنضمام
لأى حزب او حركة  أى كانت محترمة
بقولهم متشكرة ..





ولما حد م الميدان يتناقش معايا
ويسألنى ... انتى منضمة لأنهى حزب 
او تبع مين .. ببتسم واقولهم 
أنا مستقلة وتبع مصر ..
وبس


بنزل مع ناس .. زى محمد محسن 
وغيره من اسماء معروفة او مجهولة 
.. هولاء هم المخلصين الأنقياء اللى أتشرف
بالتواجد وسطهم ..
أى كانت العواقب لأنى بلمس وطنيتهم 
منزهة عن أى غرض 
و مطمع ف منصب سياسى
ولا برنامج او استضافة ف فضائية تشهره ..
و أو مقالة ف جرنال يعمل بيه سبوبة

ومن تيار لحزب لجبهة لإئتلاف ..
يا قلبى لا تحزن و لا تثق
الا فيما تراه حق 
و فقط 




ولهذا يا جماعة محدش يفتكرنى متحيزة 
ضد التيارات الإسلامية 
لأن عندى اسبابى ...
وأظن الجمعة الجاية بتاعت مصر مدنية
دى أصدق دليل على التبعية لأمن الدولة
والمجلس العسكرى و بشكل يقرف ...


يعنى ناخدها واحدة واحدة كدا 


بعد جمعة 29 يوليو الله لا يرجعها 
والمشهد المخيف للأخوان والسلفيين 
اللى بيلعب وماسك كل الخيوط 
ف الخلفية ومن وراء الستار
لما شاف الأنقسام هيضره أكتر ما ينفعه
و عشان يهجن القوى السياسية
  ويدخلها الحظيرة 
قال ... يضحك عليهم بقى 
ويشربهم حاجة أصفرة 
و يحسن صورة التيارات الأسلامية شوية
عشان يرجعوا يقفوا معاهم ف الميادين تانى
فيهدوا ثوريتهم و معارضتهم للعسكر 
و يحبطوا أى مليونية متمردة ... قادمة 
فيعملوا ايه ؟ .. يعملوا إيه ؟
قالك نجيب الاخوة بتاع الصوفية 
الناس الطيبة الحلوة الراضية دى 
ونخليهم يتصدروا المشهد .. 
فالشعب ينضحك عليه بالمنظر وكدا 


قوم المجلس العسكرى قالك
لأ ... التحرير لأ 
روحوا اقعدوا ف ميدان عابدين 
فالصوفية قالوا .. تمام يا أفندم





القوى السياسية 
و بمنتهى الصياعة هرشت الحكاية 
شوية منهم قالوا مش نازلين .. 
وكفاية قفا 29 يوليو اللى الشركاء فيه 
قالت ف الأجتماعات حاجة 
وع الأرض عملت حاجة تانية  خالص 

شوية تانيين خافوا من الصدام 
وقالوا مش نازلين زى شباب ائتلاف الثورة

والتلت اللى فاضل قالوا لأ .. 
التحرير التحرير 
و اللى مش عاجبه مينزلش معانا
واللى يخاف ... يروّح




 جزء من الصوفية معترض أصلا ع النزول 
والسلفيين مقموصين من شعار مصر مدنية
والاخوان قالوا مش لاعبين  خالص 
و المجلس بعت رسالة شفهية 
ان اللى هيروح التحرير هيطبق عليه
قانون تجريم الأعتصامات 
و منسق كفاية بيقول القانون دا 
احنا مش معترفين بيه أصلا ...
والبرادعى بيقول الجمع دى بلاها دلوقتى
دى بتكرس للأنقسام اكتر من الوحدة 
والنشطاء المخلصين 
بيقولوا التحرير بتاعنا 
و الجمعة معرضة للإلغاء تقريبا
وهيا اصلاً شكلها من البداية فكسانة

وغرضها من الأول 
كما يقول الصوفية .. ف حب مصر 
و البروجرام فيه فطار وصلاة و روحانيات 
وبس 



ومفهمش أنا و مش قادرة أفهم 
هيا المليونيات دلوقتى 
السياسة فيها بقت عيب 
ورجس من عمل الشيطان ؟


يعنى لو حد مثلاً خدته الجلالة
بعد صلاة التراويح
و قام هتف ضد المشير او المجلس 
هيتقاله اسكت او يترد عليه بهتاف معاكس
زى ما حصل يوم 29 برضو 
ويتقاله الجمعة دى ف حب مصر يا اخى 
واقعد ساكت .. ولاّ إيه ؟!!!


طب كما يتضح لى كدا
وعلى قد عقلى الصغير
المجلس بيزغرلنا أهو ... وبيقول 
اللى نازل التحرير يعملنا فيها ثورجى 
هينقبض عليه بتهمة المناوئة ..
واللى بالمناسبة تهمى فللى قوى 
والعيال ع التويتر قاموا بالواجب معاها ..هنا

اما اللى نازل عابدين يصلى ويفطر ودمتم
يبقى ماشى و هيعدى 
وعجلة الانتاج يا غجر ...
واللى بالمناسبة دارت و جريت
ف شرم الشيخ 
لما المجحوم غار من هناك 
الله !!!!
يعنى مش الثورة اللى كانت واقفة الحال اهو



وبمناسبة وقف الحال ..
 كل ما اسمع 
عن اضراب فى أى مصنع او شركة او هيئة
استشعر ان الخير جاى  على عكس المفروض
وزى ما بيقول الشيخ امام .. يا مصر قومى
ومصر بتقوم أهو 
ويا مسهل 



واول مرة اقرر منزلش جمعة .. دون ندم 
او إحساس بإنى خذلت حد ...
دا زائد ان التسكع ف الميدان من 8 يوليو
لحد الجمعة اللى فاتت 
خلانى أسّمر م الشمس
لدرجة تخلينى قربت أنتمى لأخواتنا 
ف الصعيد و جنوب الوادى و بلاد النوبة
و كدا بقيت  ... سمار وخفة 
و انا بقول كفاية ابقى خفة بس 
عشان الشعب يعرف يركز ف ثورته 
ومعملهموشى تشتيت ... :)




بس بجد 
وحشنى الميدان ... جدا 
و الصورة دى ملطوشة من تويتر




بس بقول كمان 
أبطل اكتب ف احوال البلد 
وأفصل زى التلاجة شوية 
عشان مزعلش الناس منى اكتر من كدا
وعشان كمان أخد هدنة .. م الإكتئاب 




 وبناء على قرار التوقف هذا ...
قررت اعمل استفتاء تدوينى  
عن التدوينة القادمة
هل


أظرفكو ... ببوست خطاريف 10 
ولاّ أوجع قلبكو ... ببوست يوسفيات 
ولا أنكد عليكو .. ببوست من ورا المشربية ؟!!


ولاّ أديكو أجازة منى بما إن رمضان كريم ؟؟!!



ايه كمان يا فطمطم ؟

آه 
بخصوص فطار المدونين بتاع كل سنة 
ان شاء الله يا خالد و يا داليا 
الناس بتبعت تسألنى .. هيتعمل ولاّ لأ ؟
فياريت لو فيه أى تفاصيل مبدئية .. 
تقولولنا يا أهل الخير 
ويا ريت تخلوه آخر جمعة ف رمضان 
نكون قبضنا وكدا :)



الغالى
حفل توقيع كتابه التانى ان شاء الله 
يوم الخميس الجاى  ف معرض الكتاب
اللى ف فيصل .. الجيزة 
من 11 لحد الساعة 4 العصر
والدعوة عاااامة
و الف مبروك يا محمد 
و من نجاح لنجاح يا رب و دايما متألق





وبمناسبة الغاليين 
حمدلله على سلامتك يا خوخة 
والتدوين من غيرك ... بايخ ودمه تقيل 
العود شربات خوخ مسكر .. يا حبيبتى
ويا رب متبعديش لأى سبب تانى






آه كنت هنسى 
بتنش ليه يا عيال ومحدش بيدخلها 
..  الا كليلاً ؟!
يعنى ملهاش لازمة و أقفلها و لاّ إيه ؟!!
عموما هيا متنفسى
بالتعليق على احوالنا اللى توكس  ..
و اتمنى ميكونش دمها تقيل على حد




وبموناسبة الناس الخفافة ... 
كنت عاوزة أسال 


هوه الحاج عوصام شرف ..
الراجل البركة بتاعنا ... راح فيييين ؟!!
الجدع ميختفى من أحداث العباسية 
ف ظروف غامضة 
و من اول ما فضوا اعتصام اهالى الشهدا
ف واحد اغسطس ما تلاه من اعتداءات 
ع الثوار و غيرها من احداث 
و الوزارة ف المغارة 
وبقول أنعش معلوماتى الدينية 
وأسألكم  .. 
هوه الإعتكاف بقى الايام دى 
بيبتدى من اول يوم رمضان 
ولاّ إيه يا اخواننا .... أفيدونا  ؟!!





وزير الصحة الجديد .. راجل اخلاق
بس ايه دا ؟!!!!
دا لو كل اعتصام ..
هيجبلنا وزير واحد عدل 
ومحافظ ولا أتنين ذوق ..
نبقى احنا كدا عاوزينلنا ...
ممممممممم بتاع ييجى خمسين سنة 
عشان يبقى عندنا وزارة ثورة كاملة
وطولة البال تنول الامل 
وإننننننن الله مع الصابرين



مقالة الأسوانى ... الجميل  
هنا 
ردت على سؤالى ف البوست الاخير 
عن ماذا نحن فاعلون ...
فهل ينفع بالمشهد الحالى وبرجاله
اننا نعمل اللى فيها ونحققه ؟؟!!
أتمنى بجد 
دايما عندى الامل اننا هنقوم تانى






خبر شخصى ... أسعدنى جدا 
تدوينة 28 فازت بصحبة 99 تدوينة تانية 
ف كتاب 100 تدوينة
ورغم انى لم اشارك ف الحملة 
و لا بعتت حتى البوست 
وكنت سخيفة جدا مع الناس المنظمة
وأهملت المشاركة ف أى فعاليات 
لكن هما كتر خيرهم .. أهتموا اكتر منى 
و لكن يبدو ان الحب الشديد 
اللى كتبت بيه التدوينة دى 
كان هو الجهد الوحيد اللى بذلته




و من موقعى هنا ..بشكر
إيثار ولبنى 
وكل فريق العمل فى هذا المشروع الجميل 
و كل اللى صوتلى يا عيال .. موشكرة قوى 
و شرف ليا ... انضمامى ليكم يا مدونين
فى أى حاجة حلوة
و فرحتونى يا فريق العمل
ويا مصوتين


و فرحتونا كلنا .. سواء الفايزين
أو اللى لم يسعفهم الحظ
و ربنا يكافئكم كل خير

 


و أخيراً 
الله يرحم هند رستم 
كانت فنانة جميلة ..
شكل و روح و سلوك و فن




 و نكتفى بهذا القدر
و اشوفكو ان شاء الله 
البوست الجاى
مع انى ملحقتش المرة دى 
أقول حاجة أصلااااان
واتنوا عارفين انى مبحبش الرغى 




إيييييه ... محدش يبصلى كدا !!!


رمضان كريم .. عليكم 
و عليكـــى يا مصــر 
يا رب

----------------------------------------

هناك 36 تعليقًا:

ابراهيم رزق يقول...

فاتيما
روح القلب الملائكية

براحة علينا شوية يا فاتيما كل دى مواضيع

اولا التان اللى انتى خدتيه ده تان غالى علينا كلنا و بمناسبة الموضة متيجى نعمل مشروع و نسميه تان الثورة
ههههههههههههه

اكتبى زى ما انتى عايزه اهم حاجة تكتبى هو فيه ايه خيخة نيجى فاتيما تعتكف انا عايزك تكتبى بنفس الروح اللى راجعة بيها نوران و تعملوا دويتو زى زمان

بالنسبه للصوفين من عشرتى ليهم رغم ان بهم مجموعة من المثقفين كثيرين الا انهم لا يحبون السياسة و مسالمين جدا اهم حاجة عندهم هم طقوسهم و عبادتهم و لعلمك هم تورطوا فى موضوع يوم الجمعة

اعتقد ان الاداء الوزارى تحسن قليلا و يارب يتحسن اكثر و اكثر

يارب يا فاتيما
انا بادعيلك فى سرى دعوة حلوة يارب تكون من نصيبك
اه نسيت انتى عارفة الوجوه اللى كنا بنقابلهم فى التحرير الوجوه الجميلة مثل الرجل الاسمر الجميل الذى يحمل اللوحة على فكرة انا سالته عنك الجمعة الماضية زى ما قلت ليكى فى التحرير يا ريت تتكلمى عنهم و عن الود و الحب اللى بيحبوه ليكى هم ابطال يا فاتيما يا ريت تديهم بعض حقهم
تحياتى يا روح القلب و ساليناز قاعده جنبى دلوقتى و بتسلم عليكى هى مستنية المسحراتى عشان بينادى على اسمها مع انه مش بيعرف ينطقه و كانت زعلانة بس احنا اقنعناها ان سالى زى ساليناز
ههههههههه

حـــواديت يقول...

اختى الغالية فاتيما الف سلام وتحية
لشخصك الكريم
لفت نظرى فى كلامك " دا زائد ان التسكع ف الميدان من 8 يوليو
لحد الجمعة اللى فاتت
خلانى أسّمر م الشمس "
طب ازاى وامته وفين؟؟؟؟ سبحان الله من اول يوم الى يوم قرار تعليق الاعتصام كنت بلف الميدان كله اكتر من مرة فى اليوم حتى البوابات وخيم المستقلين!!على أمل انى اقابل اى حد من اسرة التدوين الى كانو معانا فى لقاء الاسكندرية السنة الى فاتت !!! طب شاركتى معانا يوم 22 فى مسيرة دار القضاء العالى ؟

fafy يقول...

فاتيما كان نفسى اتعرف بيكى من زمان مدونتك تحفه وياريت نبقى اصحاب وتتابعينى مدونتى مذكرات اخصائيه نفسيه بكتب على قدى :) ياريت تتابعيها وتقولى لى رأيك حتى لو بالسلب اكيد مش تعرفينى لانى بكتب من سنه بس وكمان مش بعلق عند حد كتير كمان ياريت تقولى لى فطار المدونين امتى عشان بجد نفسى اجى واشوفكم كلكم
مستنيه ردك

فتاه من الصعيد يقول...

مش قيادات الاسلام السياسي بس اللي اداءها عاااار ..... اداء النخبه كله اليسار والليبراليين كلهم عااار

بس الاسلام الديني بسبب وجود ما يسمى المرجعيه يبدو مؤثرا اكتر

تحياتي

غير معرف يقول...

أنا بموت فيكي يا فاتيما، وبموت في رغيك إللي ما بتحبهوش ، وكمان أنا مدمنة " مدونة صباحاتي " بشكل مرضي ؛ فقبل هذه المدونة ,كنت أدخل علي جريدة المصري اليوم لإقرأ ل : بلال فضل وجلال عامر و محمد أمين وغيرهم ولكن مدونتك جمعت كل المقالات للناس إللي بحبهم وكمان تعليقك الجميل إللي يخليكي عاوزه تخلصي المقالة عشان تشوفي ليه علقت كده .
بجد أنا منبهرة بيك وكل ما أقابل حد أحكيله عن مدونتك وأبعتله اللينك .
وأكتر حاجة بتزعلني إنك أجازة جمعة وسبت , بس بتعويضهم لينا بعد كده
ربنا يكرمك يا أم يوسف يا رب ويقر عينك بيوسف ومنتظرين " خطاريف 10" .
أحبك في الله ؛؛
ديدي

غير معرف يقول...

نسيت أقولك ألف مبروك علي التدوينة الفائزة وإللي لما قريتها هزتني بجد ؛ بجد ربنا يصبر كل أم مكلومة في إنها أو بنتها بس كفاية إنها حملت لقب أم الشهيد؛
ورمضان كريم عليكي يا فاتيما؛
ديدي

خواطر شابة يقول...

فاتيما كله الا الصباحات حرام عليك انا متابعة دائمة واستمتع بتعليقاتك وانطباعاتك على كل موضوع
ربي يصلح الاحوال حبيبتي وبكره اكيد باذن الله احلى واحلى

مصطفى سيف يقول...

السلام عليكم الواحد يعلق على ايه ولا ايه
اولا الصوفية مالهمش اي اهداف سياسية وكمان المجلس الصوفي معترض على النزول في المليونية
http://ontv.masrawy.com/NewsDetails.aspx?ID=1275
وبعدين اللي قرر ينزل المليونية دي هم طريقتين او تلاتة واحنا عارفين الصوفية فيها العديد والعديد من الطرق
ثانيااتفق معاكي ان على الساحة تيارات واحزاب عديدة بتحاول الفوز بمصالح شخصية على حساب المصلحة العامة وان الانقياء الذين يريدون المصلحة العامة صوتهم ضعيف
ثالثا احنا محتاجين مليونية في حب مصر تكون بين كل طوائف مصر تتحط اهداف مشتركة متفق عليها ويتم الهتاف بها بس جربنا نعمل كده يوم 29 يوليو وفشلت سؤالي لحضرتك هو ليه احنا مش بنحترم اتفاقاتنا ومش بنحترم اراء الناس التانية يعني مثلا فوجئت من كام يوم واحد باحترمه جدا كان كاتب علي الفيس الصوفيون والليبراليون عايزين ينزلوا بمليونية ضد تطبيق الشرع ودول حزب الشيطان واحنا اللي حملنا مشاعل تطبيق الشريعة يوم 29 يوليو وهمه معجبهمش ومش عارف ايه
بذمتك ده كلام يتقال من مدون؟ خلاص التكفير بقى عيني عينك و دخل عالم التدوين وبعدين مين اللي مش عاجبه تطبيق الشريعة؟ هم ليه بيفكروا بالطريقة دي؟
رابعا الف مبروك للاستاذ محمد غالية ومن تقدم لتقدم ان شاء الله
خاما الف مبروك لحضرتك فوز تدوينتك الرائعة في كتاب المائة تدوينة وشرف لي انه يتحط اسمي في كتاب موجود فيه اسم حضرتك
وبالنسبة لمدونة صباحاتي دي مدونة مهمة جدا يا ريت متقفليهاش وعدم وجود تعليقات مش دليل انه محدش بيدخلها عدم التعليق علشان بيبقى في كذا مقال والواحد مبيعرفش يعلق على ايه وبعدين كفاية انها تبقى شعاع نور
تحياتي

فاتيما يقول...

ابراهيم رزق
------------

يوه
منا قولت مبحبش الرغى يا ابو العيال
متفعدوش تقطمونا بقى الله !!

حلوة سبوبة التان دى
وانشالله كل عسكرى امن مركزى وشرطة عسكرية و امن وطنى ياخدوا تان لحد ما يجيلهم ضربة شمس ...آميييين يا رب


الصوفيين انا معاك جدا
واحد من المديرين بتوعى تبع احد مذاهبهم ..
و عقليته ودماغه بتعجبنى جدااااا
خصوصا فيما يتعلق بالجانب الروحانى
ومسالم جدا لأقصى درجة ...
ويصعب عليا ...
ان قياداتهم .. اللى مفروض مكشوف عنهم اشياء وعارفين بمعنى كلمة عارفين ... انهم زى منتا قولت يتورطوا
او ميبقوش شايفين الحقيقة فين
او يبقى على رأسهم شخصيات أقل من المنصب اللى هما فيه ..
بس


الاداء الوزارى بيتحسن
بس فى حدود المسموح به بس
يعنى اداء الوزارة اتجاه فض فطار التحرير ..وما تلاه كان ايه ؟!!!
ولا حاجة
تعالى يا شرف على جنب
وملكش دعوة بحدوتة الامن والثوار واحنا مننا ليهم ...
ومش هوه دا اللى احنا عاوزينه

وفيما يختص بالوجوه اللى م الميدان
تاكد انى انشاء الله هكتب عنهم
لأنهم جزء منى ومن الثورة ف قلبى
والراجل الاسمر اللى بتتكلم عنه
اسمه استاذ محمد ...
من اطيب الشخصيات اللى قابلتها هناك وان شاء الله ينكتبلى اشوفه تانى
هوه وحشنى وكل الوشوش التانية الطيبة المخلصة ...
ومنعنى عنها قوات احتلال التحرير
منهم لله بقى


سلامى لسالينازة حبيبتى لحين ما أراها
ومعلش حكاية المسحراتى دى
دى ثكافة شعب ..
و الراجل بينطق الاسامى العربى بالعافية
و كتر خيره اللى لسه معتزلش المهنة اصلاااان ...
ف الايام العجيبة اللى بقينا فيها دى

:)

خالص ودى يا ابو العيال

فاتيما يقول...

حـــواديت
---------

ازيك يا اسامة ؟
كل التحية ليك انتا يا فندم

وبعدين يا عم بقولك لونى يميل للسمار وبلاد النوبة و السودان الشقيق ...
يعنى كنت متنكرة تقريبا
ولو لمحتنى مش هتعرفنى
:)

بص يا سيدى
مسيرة دار القضاء ملحقتهاش
بس انا روحت اللى بعدها ..بتاعة العباسية اللى كلنا فيها علقة دى
وكنت قبلها ف مسيرة الداخلية اللى بعد 28 يونيو .. ام علقة دى روخرا
وروحت مسيرة مجلس الوزرا اللى بعد حادثة صوباع الروينى ...
والحمدلله مضربناش فيها دى ...
وروحت كمان مسيرة من ميت عقبة للتحرير
بس روحت ف نصها تقريباً عشان الحادة وفرماناتها بخصوص التأخير ...

ومينفعش للأسف اقولك انا بقعد فين ف التحرير عموما لأن مكانى ثابت ..
بس احنا ع الهوا
وأى أشكال ضالة بتخش المدونة ممكن تعرف مطرحى وتيجى ترخم ف المستقبل
فمعلش بقى ...

المهم اننا كنا ف اطهر مكان ف القاهرة ...
وكفى ...
ربنا يعيدها أيام
ويزيح الغمة .. يا رب

رمضان كريم عليك
ونشوفك ف فطار رمضان بتاع المدونين
تابع المدونة وانتا تعرف التفاصيل ان شاء الله ...

خالص ودى ليك

فاتيما يقول...

fafy
----


اهلا بيكى يا فافى
نورتى روح قلب ماما
وشرف ليا انك متابعنى
وان شاء الله اشوف مدونتك وأرد الزيارة الحلوة دى ...

وتابعى المدونة وانتى تعرفى معاد ومكان الفطار ان شاء الله
بمجرد خالد وداليا ما يقرووا ...

تحياتى ليكى
والمطرح كله نورّ

فاتيما يقول...

فتاه من الصعيد
--------------

موافقاكى جدااااااا يا فاتى
كلهك ادائهم مش ولابد
بس يتحسب لليسار والليبرالين ان فيهم
ناس محترمة ..
صحيح ضعيفة ..بس محترمة
زى اسامة الغزالى حرب
الراجل دا اخلاق وشريف
بس ضعيف ولا يصلح يكون زعيم
عمرو حمزاوى كان واعدا ...
بس بعد شوية تحسى انه طرى كدا
وبتاع نظريات ..وساعات ينعزل عن اللى حواليه ..
ناس كتير قوى ...
بحسهم خايبين بالفطرة
اما قيادات التيارات الاسلامية
فللأسف بحس فيهم لؤم ومرواغة رهيبة
زى عصام سلطان دا ..اللى عينه عين ثعلب بتلمع بذكاء ومكر
ولاّ عصام العريان
ولاّ محمد البلتاجى ولا صبحى صالح
وتجيلهم شمال ..يجولك يمين
ويقولوا مقالوش وهما قايلين
وافلام كدا
اقبلها يمكن لو هما حزب عادى
لكن لما يتمسحوا ف الدين ..
يبقى معلش
مش هعتبرها دهاء سياسى
هعتبرها لؤم ..
ولا توصيف آخر هير اللؤم

واللئيم ف أدبيات العرب بيتفاتله بلاد عشان
انت اذا اكرمت الكريم ملكته
و انت اذا اكرمت اللئم تمردا

وانا مش عاوزة اكرم حد واحطه فوق راسى
واعمله توكيل بادارة بلادى
ويتمرد عليا ويقرفنى ...

بس

بوسات وحضونات يا أجمل بنات الصعيد

ستيتة حسب الله الحمش يقول...

انا قرأت هذا البوست فروم إي تو زد أو واي يا عيلاء
بس يا ابلتي ورغم موافقتي ومؤازرتي وكل اللي تقولي عليه
مش عارفة أحلل
او بمعنى ادق علشان احنا في رمضان والكذب حرام
مش عاوزة احلل
فقررت افصل
افصل ازاي؟
اسأليني
ايووووووووون
اروح أحلل احداث لندن
حتى حاجة جديدة ان الواحد يشوف بلطجية لوندرة
ويقول اه يا انجليز يا ولاد الدوكش
ويكفينا من ميدان التحرير
ان يجعل المجلس آخر ذكريات جمعاتنا منه
جمعة هييييييييه تكبير
عااااااااااااا الله أكبر
حسبي الله ونعم الوكيل فيك يا فخري

انا مش زعلانة من جمعة تكبيرة الذبيحة
ولا من اي جمعة كانت مليونية او كانت مئوية
كل جمعة من دول عملت فينا حاجة
زغزغت جزء من مركز التفكير
كشفت شيء للشعب اللي محدش بيستطلع رأيه ولا بيعبره ويديله اعلام منور كله فلورسنت

فاتيما
انتي وحشتيني
ووحشني آخر جلسة بيننا على الكورنيش في البرد
ووحشتني مارو وضحكتها والبه دودو مهجة الفؤاد
احمد يرسل لك قبلة وبيقول لك عارفك يا طنط انتي مامة يوسف
ومهرة بتقول لك ها ادخل الإعلام واشهيصكم تعليقات وطيب الله اوقاتكم

بحبك

Tears يقول...

انا حاسة اننا فى كابوس

http://www.almasryalyoum.com/node/484797

richardCatheart يقول...

بصى انا جايه اقولك وحشتينى

بس مش عادى كدا


فحتتتتتتتتتتتتتتتتت


كحتتتتتتتتتتتتتتتتتتتت


وبصبر فى نف امى لحد ماربنا يجمعنا تانى ياااااااااااااارب عن قريب


فعوصااااااااااااات وحضونااااااااااااااات الى مالا نهاااااااااااااااااااااايه

ايثار يقول...

احم احم هو بصراحة البوست مش طويل ولا حاجة خالص يعني :)

كدة أنا متفقة معاكي في نقطة التيارات المختلفة وما إلى ذلك.. ومع إني مش بطيق البرادعي لكن أقنعي في كثير من النقاط في مقابلة شفتاله قريب ولو حسيت إن نظرتي فيه كانت غلط أكيد هصححها
ويشاركنا الرأي بردو محمد فاروق (قلب مصري) في تدوينته دي
http://2lbmasry.blogspot.com/2011/06/blog-post.html
واللي فازت في كتاب الـ100 :))
بس أنا أساسًا تحت السن القانوني فكفاية عليا أتابع، عشان محسش بالظلم والقهر.. المفروض يعملولنا بطاقة من سن عشر سنين كدة مش عدل خالص :(

هو أنا مش فاكرة تفاصيل البوست بما إنه مش طويل يعني بس فاكرة إن في حاجة تانية كنت هعلق عليها ونستها
غالبًا مش بعرف أعلق هنا بعرف أقرا بس.. وأعيط شوية
أيًا كان البوست عن إيه ليه إحساس مختلف هنا:)
______________________________________
رغبة شخصية نفسي في بوست يوسيفيات، وإن شاء الله أكون موجودة في حفل توقيع بقايا جيل ده أساسي يعني :) نازلي مجموعة قصصية "حواس مستعارة"اتشحنت من اسكندرية امبارح للمعرض مش عارفة بكرة تكون وصلت ولا لا.. بس آمل ذلك.

دمتِ مبهجة ملهمة.. ^_^

فيلسوف زمانه يقول...

انا مش هعلق على الكلام دا لانه فالاول والاخر رغى لا يعتبر به اصلا

انتى تطاولتى اولا على ربنا
ثم بتسمى صحابى اسمه معاوية بن سفيان وبتقولى انه علم الناس النفاق
ولو اتكلمتى عن عالم دين ولا واحد بيقول لا اله الا الله بتتكلمى باستفزاز عن العظمة والاسطورة بتاعت الفنانيين اللى بتستشهدى بكلامهم اكتر من كلام العلماء والرسول عمرك ماتقولى عن صحابية زى مثلا متقولى على هند رستم

كل دا ونتيجة اصلا تعارضى اداء الاسلاميين اللى بينادو بهوية اسلامية شىء طبيعى

متبصليش كدة
الحمد لله رمضان شهر اسلامى مش شهر ليبرالى ولا علمانى هههههههههههههههه

حفيدة عرابى يقول...

الاغنية الجميلة اللى بعتبرها من أيقونات الثورة بالنسبة لى
وناوية ان شاء الله احفظها للمدرسة كلها السنة الجاية

------

الجايزة اللى طمطم تستحق اكتر منها
الف مبروك ياحبيبتى
التدوينة فعلا حلوة قوى وبتوجع لدرجة انها كانت بترجنى وانا بشوفها وحاسة انى معاها وخلاص قلت لنفسى هتموت
طريقتك كمان فى كتابتها زودت جمالها وبساطتها من غير تنسيق ولا حاجة
ارتجالية الكتابة من غير تنسيق فى موضوع زى ده كانت فكرة حلوى قوى

-----

تعليق أستاذ ابراهيم جميل قوى
سلم لى عليه بقى:)
وخصوصا جزئية ما كده
وانه فاكر الناس الحلوة اللى هناك والراجل الجميل اللى هيعمل تذاكر لطرة
ده مصر دى مشكلة وملهاش حل خالص :)

------

السياسة
موافقاك فى أغلب كلامك ماعدا تفاصيل صغننة
ونفسى مش جايبانى اتكلم بس كل اللى فى بالى دلوقت انى مهما كنت مضايقة من جمعة السلفيين فمش عايزين نقلبها جمعة الصوفيين وجمعة المدرسين حاسة ان كده الحكاية هتضيع من ايدينا وهننسى البلد والثورة ونتفرغ لبعض

عندى بس استفسار لانى اعرف ان مشايخ وقيادات الطرق الصوفية علاقتهم قوية جدا قبل الثورة مع أمن الدولة
وانهم من أنصار عدم الخروج على الحاكم واحنا مش ناقصين زى ماانت عارفة
تاريخيا كمان أعرف ان العثمانيين كانوا بيشجعوهم قوى علشان الاستغراق فى الطقوس دى بيلهى الناس عن التفكير فى الظلم الواقع عليهم

------

اوعى تغيبى وأى حاجة هتكتبيها هتلاقينى قاعدة على الباب سواء خطاريف بقى اللى بتجنن دى
يوسيفيات اللى بتجنن برضه ..ربنا يفرح قلوبكم ببعض يارب

احم
من ورا المشربية مفيش أى مانع
سلام ياحبيبتى وبوسات وحضونات

فاتيما يقول...

ديدى
----

اهلا بيكى
ولا تتخيلى تعليقك جميل قد إيه ؟!!
انا مش عارفة أرد عليه بما يليق بيه
بس اشكرك على كل حرف فيه
واشكرك على متابعتك
واشكرك على انك علقتى
وقررتى تشجعينى وترفعى معنوياتى
وتباركيلى كمان
:))

رمضان كريم عليكى ان شاء الله
واشوفك على ألف خير
يوما ما

فاتيما يقول...

خواطر شابة
----------

منحرمش منك يا خطورة
وانا قولتلك الصباحات دى
انتى ليكى فيها اسهم وسندات
ويا رب اكون دايما عن حسن ظنك

بوسات وحضونات كثيرات
يا اطيب ... اهل المغرب

فاتيما يقول...

مصطفى سيف
---------


ازيك يا مصطفى
وتعليقك عاوز رد على كل سطر فيه

احترمت جدا المجلس الصوفى وقرارته
ومعلمواتى ان الناس دى طول عمرها رامية الدنيا وراها وعايشة ف ملكوت أرحب من ضيق الدنيا ولما ينزلوا لميدان السياسة واللى هى مليانة بلاوى ..
يبقى انا قلبى يتعصر من الخوف والحزن
على ان الصوفية كمان .. بقت منظر وبرفان بيستخبى وراه اصحاب المصال
ويعملوا زى الاخوان
اللى فلقونا سنين بإن الجماعة جماعة دعوية ..
واول ما جالهم فرصة يعملوا حزب ..
شطحوا و رسموا وخططوا وباسوا الاقدام وباعوا الوطن ..مقابل مصلحتهم ..
والسلفيين فلا داعى للحديث عنهم
انتا اكيد عارف هقول ايه


المدون اللى اتكلمت عنه
معرفش تقصد مين
بس اللى انا لاحظته
وقريته مرة ف مقالة وعجبنى قوى
نظرية تمدد الفكرة
يعنى حد يبقى مخه فاضى
ومبيحاولش لا يقرى ولا يتعامل مع الأناس المختلفين عنه الا نادرا ...
لما بيدخل دماغه فكرة ...
فى عقله الفاضى الواسه ..
الفكرة بتتمدد وتبقى هيا كل حاجة
وبيوقف عندها
وميحاولش يطورها
اكتر ما يحاول يفرضها على غيره

وهذا ما ألمنى واوجعنى يوم 29 ...
ان حد يختلف معايا .. دا حقه
بس ميفرض عليا فكره
ولو عارضته
يقولى نزلتى ليه من بيتك ؟!!!

انا عاوزة كلنا نعيش ف مكان واحد
نمشى ف شارع واحد
و نتعامل ف شغل واحد
و نشترى من سوق واحد
ألخ

مش عاوزة حد يمنعنى انزل من بيتى
او انا أقصيه من الميدان


عموما الحكاية عاوزة وقت
وربنا يخلف ظنونا جميعا
وبكتب الخير للبلد


يشرفنى جدا انى جارتك ف كتاب ال100 تدوينة ...
و انا عارفة انك بتشترى من كشك الجرايد بتاعتنا يا مصطفى
فشكرا ليك ع المتابعة ...

:)

فاتيما يقول...

د.ستيتة حسب الله الحمش
-------------------

يا لهو بالى ياما
دكتور ستوتيتة
ست الستويتات عندنا
يادى الهنا يادى الهنا
انا زارنى النبى يا ستوتى
ورمضان ابتدى فعليا من تاريخ هذوها التعليق

:))

طريقتك ف الفصل دى عجبتنى جدا
بس الواحد بيرجع منها على ان معقول تكون مصر الهمت كل الشعوب ف العالم انها تثور كدا ؟!!!
تفتكرى احنا حلوين للدرجة الرهيبة دى ؟؟؟
انا مؤمنة بكدا
بس عاوزة حد يؤكد كلامى
وعاوزة كمان احس ان كل هذا الهم والإكتئاب بفايدة
و ان شاء الله تبقى هدنة ووقفة لإلتقاط الانفاس
عشان نرجع تانى نطربقها فوق دماغ ماماهاتهم
و نناوىء ف التحرير لحد ما يبانلنا ثورة تانى ...

موافقاكى جدااا على حكاية الجمعات وما أحدثته من تحريك للعقول
وكمان توضيح لحجم البعض
واظهار لفكره و توقع ما سيأتى من ورائه ...

خير
لعلها خير


بوسلى مانوسة النوسة كونوسة
احنا ف انتظارها
اما عفرتو حبيبى
فدا هياخد رده ناشف
بوس واحضان لما أشوفه ...
وان شاء الله تحاولى تيجى يوم فطار المدونين وتجيبى الولاد ...
عشااااااام خاطرى


انا بحبك أكتر
ورمضان كريم عليكى يا رب
والله أكرم واكرم

فاتيما يقول...

Tears
-----

هنصحى منه يا تيرز
ان شاء الله
مصر هتصحى منه يا حبيبتى
احنا مش قولنا نتفائل يا توتا ؟!!

خبر سينا دا رعبنى رعب
بس رجعت هديت
لأنى عارفة مين اللى سابهم يسرحوا فى سينا كدا و انتى اكيد عارفاه

انما اللى يطمنى بجد
ان اللى هيعرف يلمهم تانى
هوه الناس
اهل سينا والشعب
من غير دم ؟
أشك
بس مقدرش أتوقع السيناريو القادم
لكن متاكدة ...
ان ربنا هيورينا آياته
إقرى مقالة محمد المخزنجى النهاردة ف جريدة الشروق ...
هتلاقيه بيتكمل عن السمندل والضفدعة وطريقة تيجى تصيده يصيدك
والغرور والصلف والخيلاء الذى يصاحب الضحية والقاتل ف نفس الوقت ...
حكاية سلفيين سينا والمجلس ...
قفزت ف ذهنى اول ما قريت البوست ..
اقريه ويمكن تهدأ مخاوفك ...
وتذكرى يا تيرز
لهذه الصورة رب يحميها
ورجال اشجع من الموت
وبنات أرجل من الف راجل
و الالاف المخلصين والشرفاء
اللى مش هسيبوها كدا ...


واعملى زى بقى
افصلى شوية
عشان ميودناش العباسية ..
:)

فاتيما يقول...

richardCatheart
--------------

انتى كمان يا قطاقيطو
والله فيكى الخير

لأ خير واحد
ألف خيييير يا حبيبتى
كنتى على بالى والله
وعاوزة أبعتلك ميل
كنت هكتبلك انتى وايمان
عشان وحشتونى
وعاوزة كمان اكتب لمنى ابو السعود
عشان مقصرة معاها
وعازة اكتب لناس كتير بحبها
بس بنشغل بحاجات تمنعنى م الكتابة
بس متمنعنيش م الإفتقاد والمحبة

ان شاء الله
نخلص رمضان
ونطب عليكو ف اسكنكرية
عاوزة اشوفكو
وأشوف بحركو
وقعدتكو الحلوة الدافية الصافية

ان شاء الله
اول لقاء بعد رمضان
يكون اسكندارنى
عشان وحشنوووووووونى

سلامى لميرهان ومروان
وكل الود والتحية لجوز أختى الغااالى الحاج ريتشارد
:)

آهو
وبسيلى القطاقيط بتوعك

اسكتىىىىىىىىى
م احنا لقينا عروسة للمخسوف ميزو
وماجد هيجيبها من عند واحد صاحبه
تتجوز ميزو وتخلف منه
وبيقولوا مش عاوزين عيالها
قولنا ماشى ..
ناخدها ومن غير شطنة هدومها
ونوفق الراسين ف الحرام
ونرعى هذه المهزلة
وبعد ما تلست تربعن
نرجعها معززة مكرمة
ونحتفظ احنا بأطفال الخطيئة ..
يتربوا ف عز سى ميزو
وكدا

:)))

فاتيما يقول...

ايثار
-----

:))

ازيك يا أيثو
ودا أسم الدلع بتاعك يا جميل

بصى يا ستى
فيما يتعلق بالبرداعى وغير البرادعى
الواحد يفتح ذهنه ويسمع كل الناس
وبعدين يقرر
وميصادرش على حاجة ولا حد
لأن فيه ناس بتبقى حلوة ملمعة كويسة بتعرف تخدع غيرها ...
ودول كثر ف الدنيا وعالم السياسة تحديداً ...
دول بياخدوا وقت على ما يقعوا ف خطا يكشفهم ...
فالواحد ميبصمش لحد بالعشرة كدا
يبصم بأيد واحد كفاية
والتانية يرفعها ..تحسباً
:)

كان ف نيتى ابتدى ببوست اليوسفيات
بس بقول أكتب ومنشرش حاجة دلوقتى
وأخد فاصل احسن
واكتفى بالرد ع التعليقات حاياً

منحرمشى منك يا أيثو
والف مليون شكر على كل جهدكم الرائع ف كتاب ال100 تدوينة
وربنا يكمله على خير ان شاء الله

خالص حبى يا حبيبتى

فاتيما يقول...

فيلسوف زمانه
------------

بداية كدا
اهلا بيك ف روح قلب ماما
ونورتنى ...


ثانياً
حضرتك قولت مش هتعلق ع الرغى
لأنه لا يعتد بيه
بس علقت برضو وتناولت اجازء من البوست
والمدونة بشكل عام
ودا معناه انك متابع جيد
ع الأقل من مدة .. وروابط احدة مدوناتك بتؤكد دا
وهذا يشرفنى على فكرة
ميزعلنيش


ميزعلنيش كمان رأيك فيا
لأن كل واحد حر
بس اسمحلى أستغرب وبشدة من حاجة
(بإفتراض ان بروفايلك الشخصى ومدوناتك الاربعة وصفحتك ع الفيسبوك كلهم حقيقين ومش واجهة لشخص آخر وإنك فعلا الشاعر أحمد عامر الطالب بكلية التجارة ومن أهل سوهاج ...)

اذا كان كل دا صحيح
فأنا بصراحة مستغربة شوية
لأن الشعراء ناس بتتحرى اختيار الفاظها وبتكون مرهفة الحس
و مبتقولش لغيرها كلامك لا يعتبر به اصلاً وكدا ....

ولأن كمان
الصعايدة جدعان
وطيبين
وعمرى ما قابلت حد منهم
ولقيته متهجم وعنيف و بيقول شكل للبيع و بيهاجم بالشكل دا
خصوصا لما يكون اللى قصاده أكبر منه سناً وانا ف مقام اختك الكبيرة وبينى وبينك 15 سنة ع الأقل يستحقوا منك اظهار بعض الإحترام ف الحديث

واستغربت أكتر بقى
لأنك رجل جامعى ومتعلم
ودماغك داخلها الكهربا اهو
يعنى منتاش حد اى كلام
عشان ترمي الآخرين بتهم خطيرة
من نوعية التطاول على ربنا ...
ودى حاجة مش سهلة
انا مش عارفة ازاى قولتها
و ان شاء الله يوم الحساب هختصمك بيها امام رب العرش ...
ان لم تراجع نفسك فيها
ع الأقل مع غيرى وبلاش أنا ...

استغربت اكتر واكتر
من انك داخل عالم التدوين متصوراً ان من حقك تهين أى حد وتجرحه و تخلص تعليقك بضحكة معرفش اوصفها ازاى غير انها تقلل من قدر ما كتبته ومن قيمتك .. وتخلينى ازعل قوى ان رغم دراستك وموهبتك و حرصك ع التواصل عبر التدوين مع غيرك
انك تعبر عن نفسك بالشكل دا وتخلى منظرك مش اللى هوه ..
ع الأقل ف نظرى ونظر اللى بيخجل عندى وهيزعلى سلف ...منك


واخيراً

اللى اعرفه ان رمضان شهر هجرى
جه منين شهر اسلامى دى ؟!!!


ثم ان الصحابيات الجليلات مش متسنيين فاتيما تكتب عنهم وتقولوا في عظمتهم كلام ....
بينما مقارنتهم مع هند رستم وأى فنانة ..مقارنة عجيبة غريبة لا محل لها من الإعراب ...

ثم ان معاوية ابن ابى سفيان بجملته دى عبر عن منطقه واللى انا شيفاه بيشجع النفاق والخبث والدهاء ...
انا حرة ف رأيى
ومقارنته بهند رستم برضو لا محل له من الأعراب ..
بس انا همشى وراك للآخر واقولك
ان معاوية أدخل مبدأ التوريث ف حياة العرب والمسلمين ..
بينما الست هند رستم معملتش حاجة تأذى بيها حد ...
دا زائد انها أكيد قالت لا إله الا الله اكيد ف حياتها ...
فنتا بتنكر عليها انه تكرم منى بجملة ف تدوينتى ليه ؟!!!

وبمالناسبة
المدونة دى بتاعتى
ومن حقى اكتب فيها ما ارى
حتى ول كان رغى لا يعتبر به
فحضرتك زعلان ليه ؟

ولو زعلان منى كدا
دخلت قريت تدويناتى على مدار اربع شهور فاتت ليه ؟؟!!
و اخيرا
لو مش عاجبك المدونة وفكر صاحبتها
متوجعش دماغك بزيارتى تانى
وريح نفسك ....


كان بودى معرفتنا تبقى خير
بس معلش

حصل خير برضو

نورت

فاتيما يقول...

حفيدة عرابى
---------

هرد عليكى ف البيت يا فدافيدو عشان مروحة دلوقتى خلاص


سلام مؤقتا يا حبيبتى

همس الاحباب يقول...

كل سنة وانتى طيبة
ورمضان كريم
ان شاء الله فيه افطار كالعادة وداليا اقترحت يوم السبت 20-8 لزيارة مستشفى ابو الريش والافطار الجماعى
وسيتم نشر بوست عندها بكافة التفاصيل
تحياتى

فيلسوف زمانه يقول...

ايه دا دانتى عرفتى قصة حياتى

انا عموما عايز اوضح حكاية دخولى لتدويناتك اللى بتكرريها دى انا مدخلتش غيرها مرتين تلاتة اربعة بالكتير بالصدفة فقرائتى لجميع المدونين اللى بحترمهم كتير انا يدوبك كنت بلاحظ الحاجات اللى تنم عن شطحاتك دى عموما حكاية معاوية دى انا مش هكتب عن صحابى انتى متجيش فيه حاجة انتى وعيلتك كلها طبعا ولا هحط نفسى فموقف المدافع عنه لانك مهما ناقشتك شكلها وجهة نظر وعقيدة عندك

ودى مدونتك طبعا اللى هتتحاسبى عليها وانا لية مدونة هتحاسب عليها
انا بتمنى دولة اسلامية وبحلم بيها وهتحاسب على حلمى و(السعى اليه)
وانتى هتتحاسبى على حلمك اللى بتدافعى عنه والمفاهيم السفسطائية اكيد فى يوم هتوضح للجميع

.... ونتقابل عند رب العرش إن شاء الله
انتى بمدونتك وانا بمدونتى
انتى بمعتقدك وانا بمعتقدى وحلمى

واخيرا سبحان الله حتى كلمة اسلامى عن شهر رمضان عايزين تحاربوها حتى الشهر مش معترفين باسلاميته ههههههههه

طيب هو شهر هجرى انا معاكى
هو الهجرى دا مش مستنبطة من الهجرة
والهجرة دى بتاعت مين
الناس المسلمين
اذا زى منهج المنطق بتاع الثانوى
شهر رمضان هجرى اسلامى :)

انا على فكرة كتبت التعليق الاول نتيجة عصبية من اولا منك وسبك لصحابى ولله وحكاية الله دى علشان اكون صادق فيها انا سمعتها من بعض المدونين الذين اثق فى صدقهم وانا هدور فمدونتك وهنشوف الحكاية دى بالظبط علشان بس لما اقابل ربنا يوم القيامة إن شاء الله اوضحلو سبب غضبى
الى اللقاء عند رب العرش

فيلسوف زمانه يقول...

بما انك قلتى تختصمينى عن ربنا وانا طبعا اقصد بربنا هو الله

فدا نموذج بسيط على الماشى لفكرك انا مش بتطاول لما اقول الحاقد على .....
مش قادر اقولها وانتى اسمك فاطمة
على العموم دا رد لتدوينة بسيطة من تدويناتك
http://omeramer2000.blogspot.com/2011/08/blog-post.html

فاتيما يقول...

حفيدة عرابى
----------

ازيك يا فيدووووو
كلنا نفسنا مش جايبانا نتكلم
بس غصب عننا بنتكلم


والله يباركلى ف عمرك
منا مش هحس بأى فرحة بجد
الا بيكم
ومعاكم


الأستاذ محمد بتاع تذاكر طرة وحشنى والله
بس نزول الميدان دلوقتى ...
انتى عارفة
مش هنلاقى فيه غير الغربان
و كلاب السكك
اما اهل الميدان ومريدينه
فهيمروا عليه سريعا ويمشوا
عشان المنظر بيعصر قلبهم

ان شاء الله
هتكون فترة وتعدى
ونرجع تانى يبقى
الشارع لنا
احنا لوحدنا
والناس التانين
دول مش مننا
على رأى الغنوة ....


غالبا البوست القاد خطاريف
عشان الواقع بقى مؤلم لدرجة الانفصال عنه والخطرفة شوية ..
:)

بوسيلى ايد طنط
وسلامى لعريسنا
وخلى بالك من نفسك
لحد ما اشوفك يوم الفطار إن شاء الله
خالد وداليا حددواالمعادخلاص
يوم 20 ... يلا قولى لمنار بقى
عشان تعمل حسابها وتستعد ....
وممنوع الإعتذارات
واتنوا الأتنين تيجوا سوا ...
و لو جيتى لوحدك من غيرها
ملكيش فطار وهنروحك جعانة
هه

:)))


بوسات وحضونات وطبطبات
يا حبيبة قلب طمطم

فاتيما يقول...

همس الاحباب
---------

كل سنة وانتا شهامة وجدعنة الدنيا يا خالد
ورمضان كريم وعامر و طيب ..بحسك انتا وداليا وكل حد بيجمعنا ف الخير
خلاص ماشى
هستنى بوست داليا
ونسيح ف عموم البلوجر
وربنا يبارك ف اليوم ان شاء الله

سلامى لغادة والبنات
وليك قبلهم

بس
على جنب
انا ليه حاسة انك مقريف
ومزاجك مش تمام ؟!!

فاتيما يقول...

فيلسوف زمانه
------------

:)

بص
انا لازم دلوقتى
أعتذرلك و جـــــدا
لأنى كنت متصورة
انك انسان طبيعى زينا كدا
يمكن النقاش والدخول معاك فى حوار
قد يوصلنا لحاجة ..

بس للأسف ...
اكتشفت من تانى تعليق ليك بس ..
ان التحاور مع قطتى السيامى
قد يؤدى إلى نتيجة معقولة
.. عن الكلام معاك


فمعلش ..
عندى انا الغلطة دى



و يوما ما
قد تتوصل البشرية
إلى امكانية زرع العقل
او نقله من متوفى حديثاً الى شحص حى ..

واتمنى ساعتها انه تكون حضرتك
لسه على قيد الحياة
عشان تستفيد من هذا الإنجاز



انا بعتذرلك كمان
انى مش هنشرلك أى تعليقات تانى
لأن مدونتى ليست لأمثالك



كلمة أخيرة
ومن قلبى والله
.
.
.
.
.
.
.
.
.
ربنا يشفيك

ابراهيم رزق يقول...

فاتيما
روح القلب الملائكية

كويس انك و صلتى الى تلك الحقيقة الحوار مع هؤلاء هو الحرث فى الماء
كويس انك رديتى على فيلسوف زمانه و اوانه
انا كنت هارد بس الصراحة لقيتك واخدة حقك تالت و متلت
ما هذا الفكر المتحجر و بعدين هو فيه فلاسفة دلوقتى و بعدين هى مش الفلسفة بدعة
هههههههههههه
انا لا اهرب من حوار مع من يخالفنى فى الراى و انتىكذلك و الدليل حوارك مع الشاب الاخوانى الجميل لدرجة انك تعاطفتى معه من سخونة الحوار لكنه حوار يغلفه الادب و الاحترام
المشكلة يا فاتيما مش فى مخهم المشكلة انهم مبرمجين و البرنامج مش معاهم البرنامج بيتحكم فيه عدد لا يتجاوز اصابع اليد
تحياتى يا ام جو

عاشقه الرومانسيه يقول...

فرحت لما لقيت فى تعليق ليك انك ناويه تيجى اسكندريه
اسكندريه بتقولك وحشتيها ياقلب البحر

فاتيما فين مدونه سنه اولى تدوين؟
محتاجه حاجه منها
او ابعتى لى موقع للقوالب
اصل انا طيرت قالب مدونتى بالريدر بكله وعايزه اظبطها

Just Me يقول...

**********************************


عـذبُ الكـلام


************************************************

إرسال تعليق

الكلمــة نــور .. وبعض الكلمــات قبــور .... عبدالرحمن الشرقاوى

♪♫ روح قلب ماما ... FM ♪♫