.

.

انهـم يكـــردنون الثــورة .. فماذا نحن فاعـــلون ؟؟  

Posted by: فاتيما in




والكردنة لامؤاخذة 
اشتقاقة من الكردون 
يعنى التحويط و محاصرة جمع ما 
من جميع  الجهات 
و المكردنين علينا هنا يبقوا 
أخواننا وحبابيبنا 
الشرطة العسكرية والأمن المركزى
أما الذى تم كردنتهم 
فهم .. شوية الثوار 
والمواطنين والناس الطيبة 
اللى صلت الجمعة النهاردة ف عمر مكرم 
ثم صلت صلاة الجنازة  على احد المتوفين
ثم صلاة الغائب على شهيد العباسية
 محمد محسن
العدد مكنش كبير
مئات قليلة .... 
بينما اللى حاوطهم كانوا 
أضعاف أضعاف أضعاف أضعاف
سواء اللى كانوا واقفين برا المسجد 
او المتمركزين فى مناطق أخرى 
ف أنتظار الأشارة
و بمجرد خروجنا من الجامع وبدأ الهتاف 
كان الإتجاه المؤدى للميدان بالفعل مغلق
بصف عساكر الجيش 
وعلى الجانبين صف شمال و صف يمين
وأحنا ف النص مية و خمسين ميتين بالكتير 
و بدأ التحرك نحو الميدان بالهتاف 
لحد الصف المانع .. وكالعادة ولأنها سلمية 
... وقفنا 





لحد كدا وكويس ومتوقع
قعدنا نهتف لدقايق 
وحصل بعض التحرشات بين الجهتين 
و كام شخص كانوا متعصبين
و الجو إبتدى يتوتر 
و كام شخص من أعضاء 
اللى نظمت المسيرة دى 
ومحمد محسن الله يرحمه كان أحد أعضائها
و محمد واكد .. وقف يتكلم 
مع احد من اللواءات 
عشان يفهم ايه المشكلة مثلاً 
ف اننا نتحرك و نلف الصينية
ونهتف إكراما لمحمد الشهيد ونروح !!

 
وما بين شد وجذب
لقينا الجهة التانية اللى بعد المسجد
هيا كمان بتنقفل ... بصف عساكر 
وبقت الجموع الواقفة محبوسة 
فى مربع مقفول 
وتم كردنتنا بشكل تام 




الأعصاب ابتدت تفلت والتوتر يزيد 
والهتافات ضد المشير تتعاظم 
وبدا الموقف واضح 
ان سيناريو العباسية قد يتكرر وبأعنف 
المشاورات بين الناس الواقفة وبعضها 
أدت بعد دقايق لقرار بفض المسيرة دى 
لأن عددنا قليل ... مقارنة بعدد الامن 
واللى عددهم يفوقنا بمرااااحل
ولو حصل أى احتكاك غير متوقع 
من حد مندس وسطنا عاوز يشعللها
فالموقف هيتكهرب 
اكتر ما هو متنيل متكهرب 
وهتنذر بكارثة جديدة ضحاياها اكتر 
وهما أصلا بيتلككولنا ...
تم تهدئة بعض الشباب المنفعل والثاير 
وتم فتح ثغرة ف اتجاه المسجد 
وخرجنا منها مجموعات مجموعات 
عشان محدش يتمسك 
أو يتم الإستفراد بيه
 و شاب جدع اسمه محمد 
رفيق ميدان و مظاهرات ومسيرات 
بقاله شهور وصلنى لحد اول قصر النيل 
عشان يطمن عليا .. و رجع لزمايله تانى 







عندى شوية ملاحيظ 
وكام سؤال بعدهم


محمد عبدالقدوس كان حاضر النهاردة 
فرحت جداااا لما شوفته 
الراجل دا كتلة من الاحترام 
تمشى على قدمين
و جميلة اسماعيل كمان حضرت 
وكانت واقفة عند أول صف وكأنها بتحمينا 
الإنسانة دى .. تستحق كل احترام 
مشوفتش وائل قنديل للأسف 
وان كنت أتمنى اشوفه 
ونوارة نجم كانت حاضرة  





الشرطة العسكرية والجيش 
نوارة الاعين .. كما يصفهم العوا 
ولن أنسى له هذا الوصف 
ولو عشت الف سنة و انا قلبى أسووود
الشرطة العسكرية النهاردة كانوا واقفين 
ماسكين سلاحهم و الدرع الشفاف وعصايا 
بنبص ف العصايا انا واللى جنبى 
لاقيناها عصاية شماسى 
من بتاعت البحر دى .. عارفينها ؟
ام سن من تحت دى و بيتدق ف الرملة
ومن فوق فيها حتة معدن 




الحقيقة .. لحظتها افتكرت عبحليم حافظ 
وميرفت امين ف ابى فوق الشجرة 
وكمان افتكرت ... محمود سعد 
لما كان بيقول الجيش دول ناس متعلمة 
ومعاهم دكتوراهات 
و على درجة علمية وبتاع 
وكان محقااااا




الناس الصراحة جابيين أسلحة متطورة
و على مستوى 
اومال هيضربونا بأى كلام ؟!!
ثم انه ساعة الطحن لما حد يتعجن
هيقولك انا سيادتك ضربته بالخشبة بس 
و الحديدة هيا اللى جت فيه موتته
انا مالى ؟؟

 


أجمل هتاف سمعته النهاردة كان 
يا عسكرية يا ابو بندقية 
تعالى موّت الثورة ديا 
واجمل ما ف التظاهرات 
مدى التلقائية من الناس اللى واقفة 
بنوتة رقيقة كدا لو عسكرى بس
مش ضابط .. نفخ فيها ممكن تقع 
وقفت قصاد واحد برتبة 
ونافش ريشه كالطاووس
وقفت تجعجع بكلام زى حرام عليكم
و باللى بتعملوه دا هتروحوا الجنة ..
وكلام كدا رقيق و رومانسى لا يتناسب 
خالص مع العالم اللى بيتقالها الكلام 
بس سبحان الله الراجل سكت 
و كلهم تقريبا كانوا واكلين سد الحنك 
وبقوا يبصوا للمتظاهرين ببلادة وصمت 
و طبعا واخدين أوامر بكدا ..
مش محبة منهم يعنى




و لما واحد من الشباب 
اللى اتعصب م المنظر
جه شاب تانى حب يهديه
ويقوله معلش الجيش جيشنا ودول اخواتنا 
مش هيضربونا يعنى ...
(بيهزر طبعا ويقولها بصوت عالى وسخرية )
الشاب رد عليه بنفس النبرة المتهكمة
لأ انتا بتتكلم ازاى  ...
الجيش دا حبيبى 
دا صاحبى م الفجر للعصر 
ومن قبل المغرب بس يبتدى ضرب






بصراحة ..المنظر يخلى الواحد 
يضحك ويبكى
وأول أصلا ما قربت للتحرير 
وشفت الأعداد الرهيبة دى من الامن 
قولت زى عادل امام 
... أومال مين اللى ع الجبهة ؟!!!


سؤال بقى تانى 
عشان انا عاوزة حد يجاوبنى
هوه فيه أيه بالضبط ؟!!
يعنى احنا كل ما هننزل مظاهرة
او مسيرة أو أى حاجة سلمية كدا 
هيكردوننا ويعملولنا ام القلق دا ؟






طب المرة دى العدد كان قليل 
والعقلاء لموا التعابين و قالوا نمشى 
طب المرة الجاية .. لو العدد زيادة
وأصروا يفضلوا ومايمشوش ؟!!
راجل عجوز واقف جنبى قالى 
لو عددنا كبير يا بنتى 
مكنش نفر فيهم يستجرى يهوب هنا
ويعمل دكر ...
الراجل كان صح  ...
بس كمان ... ايه خلاص كدا ؟!!




يعنى الخطة انهم كل مرة 
يطوقونا و يخوفونا و يقرفونا و يطفشونا 
ويتقبض على شوية لحد ما نبطل ننزل
يعنى ولا إيه ؟!!!
أصل لو دى الخطة 
تبقى فاشلة 
لأن محدش م اللى بينزل هيبطل 
لأنه مقتنع بالمبدأ 
ومحصلش للآن ما يجعله يحيد عنه 
.. سوى تخلى الجبناء
و المؤلم و جداااا 
ان العدد ف الشارع م الناس العادية
رجع تانى يتفرج من بعيد 
و مش هتكلم عن الناس المتأجرة 
عشان تهتف ضد الثورة والثوار 
لأن دول دورهم و سحنتهم العفشة 
حتى بقت معروفة
هتكلم ع الناس العادية .. المصريين
المواطن اللى الثورة دى رفعتله راسه
ساكت ليه دلوقتى ؟
وعايز يوطى راسه تانى  ؟!!




و اذا كانوا ف كل مرة هيكردنونا 
ف الكردنة يا اخوان مش حاجة وحشة
احنا قولنا دا تحويط ومحبة 
والناس بتحاوط علينا برموش عينيها 
وقلبها ودرعها وعصيانها 
و المرة الجاية أصول نهتفلهم ..
دقوا الشماسى 




والناظر لميدان التحرير دلوقتى هيكتشف
ان الثورة وكأنها لم تأت 
واحنا كأننا ... قبل 24 يناير 
تطويق وكردنة ومطاردة نشطاء 
وضرب نار و اضطهاد و غربان سودا بعصيان
اسمها الامن المركزى 
واللى زاد وغطى .. حكم العسكر 
و اللى صعبان عليهم مبارك .. ربنا ينتقم منه
قبل ما يمشى ... كان لازم يبلينا بمصيبة 
و شكلنا لسه ياما هنشوف ايام غم


و ملحوظة هامشية .. 
بس قبل ما انسى 
الاخوة بتوع الامن المركزى 
الذين أحتلوا ميدان التحرير ووافقين
بعربيات بالهبل عند بداية شوارع 
محمد محمود
وقصر النيل 
وباب اللوق 
جنود الامن المركزى البواسل دول 
بيتحرشوا بأى مؤنث سالم تعدى جنبهم 
ولو كانت أنثى الخرندق 
ومحدش يسألنى يعنى ايه خرندق ؟؟
بصراحة حالهم يصعب على الكافر 
بس احنا ف رمضان و كدا ميصحش 
وبعدين المعاكسات يا ريتها مثلاً 
يا قمر .. يا جميل .. يا مسمسم
لأ دى كلها 
يا سكر .. يا عسل .. يا مانجة 
العيال جعانة و إبقوا اكلوهم 
بلاش فضايح
وللكل كليلة .. عيشو بشرف بقى 
جاتكو القرف







زائد ان التحرير بقى 
ثكنة عسكرية امن وطنية امن مركزية
وانا فرحانة ف اصحاب المحلات 
اللى مكنش عاجبهم بتوع التحرير 
يستلموا بقى قرف الامن 
وبلطجته عليهم ..





وف النهاية 
أحنا آسفين يا محمد 
لأننا معرفناش نودعك بالشكل اللائق
وصحيح صلينا صلاة الغائب ..
ودعالك المئات
وذكرك بالخير الشيخ مظهر شاهين
خطيب الثورة 
لكن معرفناش نعملك مظاهرة توديعية 
من ميدان التحرير ... تليق بيك 
عزائنا انك شهيد الوطن
والملائكة تزفك لمكان أرحب و اطهر
و ربك يملى للظالم يا محمد 
و هياخدلك حقك و حقنا كلنا 








و الثورة لسه ف الميدان 
والعيال رجعت تانى تفطر هناك 
وتهتف .. 
يا نجيب حقهم يا نموت زيهم 
ومع ذلك بيتعرضوا للضرب تااااااااانى 
والهجوم بلا مبرر ...
هوه الفطار ف التحرير حُرُم يا كفرة 






ولو حد بيقرى وبيفهم ويبص ف الوشوش 
يعرف ان الجيل دا و بما صنعه 
مش هيفرط ف الحرية مهما عملوا
و لو التحرير دلوقتى بتاعهم .. 
فهذا مؤقت
و لازم يكون فيه تفكير مختلف 
و خطط مختلفة لمواجهة الثورة المضادة 
اللى توحشت وتكاد تقضى على ثورتنا 
ومعرفش ازاى ...
بس اللى أعرفه 
ان السؤال دا محتاج اجابة و فورية 
عن حدوتة ..  انهم ف كل مرة هنخرج 
لعرض مطالبنا او التظاهر لأى سبب 
و بشكل سلمى بحت
فتكون النتيجة انهم بيكردنوننا


ايه ؟
هنفضل نتحاصر كدا  و ننضرب 
لحد ما العزم يوهن 
و الثـــورة تضيع ؟!!!
انهم يحاصروننا ويكردنون الثورة يا اخواننا 
فماذا نحن فاعلون ؟!!!

----------------------------------------





 عن الندالة والمبدئية .. باسل رمسيس
من رماك بحجر يا محمد ..أمل هاشم 
عزاء شهيد العباسية بحضور البرادعى وأيمن
ثورة الغضب تدعو للنزول للتحرير الجمعة القادمة
اللعب بصكوك الأستشهاد ... وائل قنديل 
 كان فيه مرة ثورة ... محمد فتحى
فليترك كل منا عجله الذى .. الطائر الحزين 
مليش دعوة .. د.ستيتة حسب الله الحمش 
الجيش والشرطة ايد واحدة .. ابراهيم رزق
العسكر والثورة .. لقد خلقنا الله أحرارا
نسرين يوسف واصابتها 
صور الأفطار 
ناشطة : أرغمونى على الركوع 

الجيش يفض افطار التحرير ويعتدى بالضرب 
البرادعى فى عزاء محمد محسن 
الجيش يهاجم 300 مواطن تجمعوا للأفطار 
   

This entry was posted on الجمعة, أغسطس 05, 2011 and is filed under . You can leave a response and follow any responses to this entry through the .

24 كــــلام بيطــبطـــب عـــلى قــــلبى و روحــــى

طب انا كنت نازبه انا واخويا بس ظروف شغله منعتنا النهارده ننزل

ايه القمع دا

كدا فهمونا غلط وفاكرين اننا ممكن نتنازل بسهوله

بجد صعبانين عليا اوي

الريدر مستقصدك بشدة
حتى البوست التانى مظهرش كمان
ولا يهمك
البوست جميل والأحداث محزنة
والمحزن اكتر من الضرب وقلة الادب فكرة الكردنة واننا رجعنا زى ماقلتى ليوم 24 يناير من تانى
بس ده مؤقتا ان شاء الله
تربية مبارك بيستعرضوا قوتهم بغباء وفاكرين ان الدنيا راقت ليهم والبلد اتسلمت لهم تسليم أهالى بجمعة الالف تحية للمشير من التحرير وبمشهد المحاكمة
ومش عارفين يفهموا ان المحاكمة أصلا حقنا ومش فضل من حضراتهم وانها جت بالدم

سيبك انتى
عجبنى فى وسط الاحداث النكد دى انها بتدى فرصة لروح الشر اللى جوايا انها تنطلق وتعيش بقى بدل ماانا بكبتها
بقى العساكر بيعاكسوا البنات
كده ياطمطم تشوهى سمعة الأمن المركزى والشرطة العسكرية
الظاهر والله أعلم ان فيه حاجة فى جو التحرير بتساعد على التحبرش وكده والا مكناش سمعنا عن العلاقات الكاملة هناك
بتاعة المعتصمين الوحشين بتوع كل الموبقات دول
عالم بتستهبل والله

وكمان الأمن مضايق أصحاب المحلات
صيامى هيضيع ياناس ...بس بالشفا عليهم الأمن
مكانش عندى مشكلة ابدا انهم يعترضوا يعنى ان اكل عيشهم مش نافع
لكن يحرضوا ويشجعوا ويشتركوا ويفرحوا لفض الاعتصام اللى خلاهم شافوا مبارك فى القفص كان كتير والله

كفاية كده على روح الشر وادخلها مكانها تانى علشان بقت خطر

تصبحى على مصر زى ماتستاهل وزى مانتمنى

فاتيما
روح القلب الملائكية

طبعا انتى السبب
انا دورت عليكى لقيت مكانك قاعد لواءت جيش و شرطة و كل الرتب قاعدنا نتكلم معاهم انا و بنتين و يهزورا مع ساليناز جيت اروح ساعة المظاهرة معرفتش اوصل لانهم قفلوا السكة
واضح انى ملحقتكيش انا لحقت جميلة اسماعيل و ابنها كانت بتعمل حوار
منظر التحرير اوحى لى ببوست طويل اول ما جيت كتبته على طول يا ريت تقريه و هو ده اللى خطر على بالى
تحياتى و سلام

حتى الشرطة العسكرية شكلها عامل زى الأمن المركزى نفس بصة الغباء بتاعتهم

طب بعد ما مبارك قالك ان قرار قطع الأتصالات دى فكرة طنطاوى ايه العمل

مش هيمسكوا ف بعض و ينشرو غسيلهم الضيف قدامنا

انا عاوزهم يهوهوا على بعض

كل اللى بيحصل بيزود الناس حماس و هما برضه لسه دماغهم زى دماغ المخلوع

ربنا يهديهم او يهدم المهم الأسرع

.........

على جنب

يا خسارة مكنتش معاكم

حزينة من اللي حصل النهارده جروا الشعب وضربوهم
كل ده ليه علشان يخرسوا الناس تاني
مااعتقدش ان الناس هتخرس تاني
ده بعدهم
الشعب المصري مش هيضرب تاني

مش ح ننكر ان الناس تعبت مش بس جسديا بس نفسيا اكتر

العسكر همه مبارك بس على اغبي شوية

الحل هو النزول باعداد كبيره والحشد المسبق لانهم بدأوا يستهبلوا ..

انا كرهت كل حاجه لابسه ميري جتهم القرف

حسبنا الله ونعم الوكيل نعم المولي ونعم النصير
واحد صاحبي ملازم في الجيش
هو صاحبي وجاري لازم بتعمد لما نتقابل ونقعد مع اصاحبنا نفتح المواضيع دي
للاسف الشديد يعني في فئة ومش عاوز اقول كله بينظر الي الثوار حتي الان وخاصة فيما بعد 11 فبراير انهم مخربون بمعني الكلمة مصدقين بدة ومؤمنين بكدة
رأى المتواضع قلته لصاحبي
البلد مش هتتعدل برضه الا لما الجنرالات اللي هما قاداتك تتشال
قالي دول جيش محدش يشيلهم قلتله هما فين الجنرالات لما كان بيسرق 30 سنة
نجيب من الاخر الجيش محماش الثورة
ايون
ولا حمي الثورة ببصلة
الجيش استفاد من الثورة ان الكابوس انزاح والكابوس هو ننوس عين ابوه جيمي خلصنا مابعدذلك لا الثورة تضروا وتضر قادة الجيش
من النهاية الثورة في نظرى مش هتنجح الا لما رئيس جديد شريف يجي بانتخابنا
مجلس شعب محترم يجي بارادة الشعب طنطاوى وشلته علي المعاش ويا حبذا في السجن لانهم مجرمين حرامية ومحدش يقولي الجيش نضيف
بس خلاص


والثورة هتنجح غصب عن عين الطخين في البلد ثقة بقي ويقين في رب العالمين


تحياتي يا افاتيما الجدعة

رأيى الشخصى
كفايه بقى مظاهرات
وندى الناس فرصه تشتغل

vanllia scent
-------------

أهلا بيكى يا فانيليا
وأتمنى يفضلوا بهذا التصرف
رغم قسوته
ليه؟

عشان كلما أزدادو غباء
كلما انكشفوا أكتر
وكلما تقدمت الثورة خطوة أوسع


الثوار يستحقوا كل احترام
ومشكلتهم للأسف مش بس عدم وجود قيادة و تخطيط محكم ...
مشكلتهم كمان البراءة التى تصل احيانا لدرجة العبط ....
البنوتة اللى وقفت تنتقد أداء الشرطة العسكرية وانا بتفرج عليها بقيت عاوزة أروح أقولها ...
بتكلمى مين يا بنتى وفرى جهدك ودول مينفعش معاهم كلام ...
بس محبتش اخدش براءتها دى ...
عارفة العصفورة وهيا واقفة قصاد فيل ممكن يدوس عليها ف ثانية يفشفش عضمها ؟؟
الموقف كان كدا

عموما
مكنش عاجبهم النشطاء والجامعيين و العيال الجدعان ...
يستلموا بقى الموجة القادمة والتى ستقضى على الأاخضر واليابس وهتخلي الثوار نفسهم ميخرجوش من بيوتهم ...
من كتر العنف واللخبطة

ربنا يستر
ويخلف كل الظنون
وينصر هذا البلد
ويجعله آمن .. رغم كل شىء

نورتى

حفيدة عرابى
----------

لأ يا فيدوووو الريدر أستجدع أهو
وطلع البوست ...
مش هيبقى هوه والمجلس علينا
:))


انا اللى هيكلمنى عن الاخوان تانى ...
هسيبه وأولع ف نفسى
دول أخوان ليسوا من الأخوة
وانما من الخيانة ...
دى بقت قناعتى
حتى يتطهروا من الأنتهازيين والخونة
ويبقوا مصريين بجد ..


بالنوسبة لعساكر الأيمن المركزى
فنا الاول اتخضيت من منظرهم
وبعدين بعد دقيقة أستوعبت
وشمتت شماتة أبلة ظاظا ف أصحاب المحلات
اللى كانوا مستفيدين من اعتصامات التحرير والمليونيات أيما استفادة
خصوصا محلات الأكل والقهاوى ...
المتضرر كان محلات الهدوم جايز
بس أصلاً أصلا أصلا
هما كانوا بينشوا من قبل الثورة
ولاد التيييييييت كانوا بيعملوا تخفيضات ولا حياة لما تنادى
الناس معهاش فلوس أصلا تشترى لبس
هما بيستهبلوا علينا ولا إيه؟؟!!

عموما خليهم
يشربوا بقى


هما وكل واحد قرفان م الثورة
وصباع رجله الصغير بينقح عليه
فيقول الثوار السبب ..

كلهم يستاهلوا
وجاتهم القرف
ماليين البلد على مفيش

أنا شوريرة أهو
وروح الشر بتاعتى طليقة
اكتم ف نفسى ويجرالى حاجة عشانهم ليه ؟؟
انشالله ينوكسوا
اكتر ماهم موكوسيييين


تصبحى وتتمسى بألف خير يا فدافيدوووو
يا حبيبة قلب طمطم

:))

ابراهيم رزق
------------

أنا عملت ايه بس ؟!!!
دنا بروح سلمية وارجع سلمية
هوه مشكلتنا ان الثورة دى طيبة واخلاق وبنت ناس ومش وش لبط ؟!!!

مكانى استحالة كنت أقف فيه
انا روحت قبل صلاة الجمعة
وخرجت منه ع الهيصة ...

كدا تاخد ساليناز ف وضه خيطر كدا
متعملهاش تانى والنبى
احنا داخلين على أيام سودة
و ربنا يستر

قريت البوست بتاعك
وضفته للبوستات الصديقة ...
والشعب مش بس بقى لوحده
الثوار هما اللى بقوا ف ناحية
يا ابراهيم والشعب ف الناحية التانية
وهو دا أحزن ما ف الموضوع

ان شاء الله اشوفك على خير
انتا و حبيبتى ست القمرات ساليناز ..

تحياتى لأم العيال وزياد
:))

Ramy
----

ازيك يا ر ر يا غالى

والله فيلم المحاكمة دا انا مش بالعاه ومش داخل دماغى ...
هما عاوزين يشغلوا الناس بالحدوتة دى
و الجلسات تبقى حقن بنج كدا
كل ما تاخد واحدة قبل ما يروح أثرها يدوك التانية ...

الجلسة الاولى
جه بعدها حركة المحافظين
وفض اعتصام التحرير
والتنكيل بالثوار وأهالى الشهدا

الجلسة الجاية
اذا كانت هناك جلسة جاية لمبارك
فالله اعلم ..تمنها هيكون ايه

الناس اتخدرت جامد
ودى المشكلة

واتمنى يفوقوا بسرعة
لأن الوقت دايما ف صالح عدوك ..

وكويس انك مجتش يا رامى
عشان البهدلة دى خلاص
مبقتش جايبة همها
و الموضوع عدى المسيرة والمظاهرة
ولازم يكون فيه شكل تانى ... للتعامل

ان شاء الله تنزل القاهرة بألف سلامة
ويكون خالد وداليا حددوا معاد الفطار ونشوفك يا غالى
:))

خلى بالك من نفسك

شمس النهار
----------

لأ يا شموستى
من ناحية الشعب هينضرب تانى
فشيكله كدا لسه هينضرب تااااااااااانى
بس المهم
النتيجة
يعنى هننضرب ونسكت
ولاّ هننضرب و نقع ونقوم نقف ونكمل ؟!!
وهنكمل ازاى ؟
يعنى هنفضل ننضرب بس ؟
ولا هيكون فيه طريقة لصد هذا الضرب ؟
ولا خلاص نبطل لحد ما تخلص على كدا ؟
وكفى الله الثوار شر النضال ؟
وحلال عليك يا عسكر ..
البلد اهى اتسلمتلك لوزة مقشرة ؟!!!

دى الأسئلة اللى عاوزة اجابة

ولك كل الحق ف حزنك
الموقف ستدعى كل الحزن يا شمس

سلامى لكل العيلة الكرية والحفيد
وسلام مخصوص والنبى ى ى ى ى
للفنان الجميل سعد رومانى ..
ممكن ؟

Tears
-----

الناس مش بس تعبت
دى أنهكت يا تيرز
ودا جزء م الخطة
الإنهـــــاك
وقد نجح

امبارح ابراهيم عبدالمجيد مع محمود سعد قال كلام زى الفل ورفع من معنوياتى شوية ...
قال الثورة موجودة وكامنة وبتغلى تحت كرسى الحكام بتوع البلاد ولو خمدت ف التحرير هتطلع من أى مطرح تانى
ممكن يكون الصعيد المحلة اسكندرية
اللى حاكمين ميقدروش يتوقعوا الغضبة القادمة جاية منين ..
لأن الثورة لا زالت موجودة ...

كلامه رفع معنوياتى
لكن خوفنى ...
لأن ممكن المرة الجاية
تأتى كما تنبأ البعض ممن أحترم دماغهم جدااااااا زى احمد سعيد عنبر العقلاء
وهويدا طه الصحفية وناس تانية ...
بأن الفقراء والبسطاء و الناس اللى ملهاش حسابات هيا اللى هتقوم بالثورة وتنتفض
وساعتها العملية مش هتكون منضبطة ولا محسوبة ولبا سهل السيطرة عليها
لأن الأعداد هتكون رهيبة
وغير موحدة على هدف
و معندهاش تفاهم
ولا فرملة
و النخبة والنشطاء هيكونوا على هامشها ومش هيعرفوا حتى يحطولها إطار والبلد هتدخل ف دوامة ...
وربنا يستر

والعسكر هما مبارك
و أكثر غباء
لأنه كان بينقى ناس أقل منه
عشان يعرف يسيطر عليهم ...
ودا يفسر كل اللى احنا فيه دلوقتى
وما كنا فيه 30 سنة عدت ...
من مهازل

:))

فتاة من الصعيد
--------------

لأ يا فاتى
المسألة عدت خلاص حكاية المليونيات والتظاهرات والمسيرات وعدت كمان الإعتصام ولازم تتطور لشىء تانى ...
معرفش ايه تحديدا
بس لازم يكون فيه تصعيد
الأعتصام حله الفض بالعنف
وخلاص مبقاش مجدى ...

جون كيندى كان بيقول
الثورة تصبح عنيفة
لأن هناك من جعل سلميتها
شىء مستحيل ...


ويستحملوا بقى
والشعب المتخاذل يستحمل
وكلنا نستحمل

وربنا يستر

Haytham Alsayes
---------------


انتخابات ايه بس يا هيثم ؟!!!
بذمتك دى حالة بلد هتحصل فيها انتخابات نزيهة و تجيب ناس محترمة و تفرز رئيس شريف ؟؟!!!

طب انا اكاد أجزم ان الأنتخابات دى مزورة من دلوقتى
ونتيجتها متحددة
والشعب هينزل يختار ناس
ويلاقى ناس تانية
و يقف مذهول ...
دا اذا عدت على خير وبلا بحور دماء ف الدواير بين التيارات الاسلامية والباقى من الفلول ....

مجلس الشعب القادم هيبقى مهزلة
والأصرار على حدوث الأنتخابات بهذه السرعة بيؤكد ان الناس دى بتطبخها كويس ومينفعش يقعدوا الطبخة اكتر من كدا لتحمض ....

اللى افهمه ان حاكم خاين وعمبل
لا يمكن يسيب الأامور تمشى ف نصابها الصحيح
من أجل مصلحة البلاد ...
وبالتالى
طالما اول خطوة كانت غلط
أى شىء هيتبنى عليها هيكون غلط ..

مفيش غير جملتك اللى ف النهاية دى
ان ربنا ينصر الثورة غصبن عن عين التخين وبأيدينا ..
ان شاء الله

نورتنى يا هيثومة
يا غالى على أختك فاتيما
ويا صاحب الفردوس

:))

blue-wave
---------


ازيك يا دكتور ؟

والف حمدلله ع السلامة

ومع كل الأحترام لرأيك
عندى بس سؤال صغير ....

أنهى ناس دول اللى نديهم فرصة يشتغلوا؟؟!!

يعنى الناس دول ناس محترمة ومخلصة وقلبها ع البلد
ولا دول ناس ولاد تييييييييت جزء من نزظام قديم مش قادرين ينفذوا مطالب الثورة ويتقالهم تور يقولوا احلبوه ؟؟!!!

حضرتك اقرى ردى السابق على هيثم السايس لأنى شرحت فيه وجهة نظرى
واللى بيعبر عنها المثل الشعبى البليغ اللى بيقول

يا مستنى السمنة من بطن النملة
عمرك ما هتقلى ...

والشرح بتاعه :
يا مستنى ان الحداية تحدف كتاكيت ..
خلى رقبتك يا مسكين يا طيب
ملوووحة كدا لفوق ... للسنة الجاية
وبرضو مش هتلاقى كتاكيت نازلالك
م السما ...


وهذا والله اعلم
رأيى المتواضع

وتانى ...
حمدلله ع السلامة يا دكتور
:)))

اولا بحييكى على الاغنية
اللى اول ما سمعتها عينيا دمعت
ثانيا
الصبر
الصبر
الصبر
مش هيدونا حرية ببلاش كده
لازم يتفضحوا الاول
والناس كلها تشوف بلاويهم
ويتشالوا وناخد شوية حرية
فمعلش اصبروا وصابروا ورابطوا
وربنا معانا يارب
..
وبالمناسبة الثورة قامت عشان اقلية قامت واتكلمت
وانتو اقلية
:))))))))))
ربنا يحفظكم من كل سوء يارب

ازيك يا طمطومة
واحشانى جدااااااااااااا

حاسة ان بقالى كتير مدخلتش الاوضة دي
:)


انا مش جاية اعلق على البوست

انا جاية اسلم عليكي واقولك ان اغنية الشيخ إمام اللي انتى حاطاها على المدونة
روووووووووعة
تسلم اختياراتك

كل سنة وانتى طيبة ياحبيبتي

سلام
اختك خيخة

أتشرف بدعوتكم لحضور حفل توقيع كتابــى الثانى ..

( بقايا جيل ) عن دار ليلـــى (كيان كورب )

يوم الخميس الموافق 11-8 -2011
بمعرض الكتاب - رمضان 2011

من الساعة 11:4 وحتى الساعه 4 عصراً (قبل الفطار )

المعرض موجود بـ أرض هيئة الكتاب بالطالبية - فيصل - جيزة

sara adel draz
--------------

لأ يا سارة
احنا مش أقلية يا ماما
احنا قلة مندسة ...

:)


نورتينى

بت خيخة وأى كلام
---------------

انا لازم أعمل حاجة مهمة الأول

أهى

http://files.fatakat.com/2009/6/1243893239.gif

وأرد بقى

الاوضة دى متوحشاكى جدا
كيف وا هيجولوا الصعايدة
والشيخ امام .. لو اغانيه متتسمعش بودن مختلفة دلوقتى ...
هتتسمع امتى

عارفة يا خوخة
انا بحس ان الثورة دى
خلت لحاجات كتيييير قوى طعم ومعنى
العلم .. الأغانى الوطنية .. الحرية
الغضب ... التحدى ... الكل ف واحد .. الأحساس ان البلد دى بتاعتى ... المشاركة ف صنع يومى وبكرة .. التفريق ما بين الباطل والحق ...
حاجات كتيييييييير الثورة صححت معناها ...
واحنا مدينين ليها ياما
اغانى الشيخ امام و نجم ..
انعكاس لدا ...

كل سنة وانتى طيبة يا خوخة
وربنا ما يحرمنا من وجودك وسطنا
ولا يحرمنى من طمطومتى دى ابداااااااا

ولا من توقيعك الدائم الحنون
ف آخر التعليقات بــ :

سلام
اختك خيخة


:)

mohamed ghalia
--------------

الف مبرووووووووك يا غالية يا غالى
وعقبال كل كتاب جديد

كان بودى اوعدك انى جاية
بس المعاد صعب عليا قوى قوى
...
بس ان شاء الله هشتريه ...
وتمضيهولى ..

الف مبروك يا فندم
وكل رمضان وانتا بألف خير يا رب

إرسال تعليق