.

.

قــولتلــهم الجــنة ... بــلادى  

Posted by: فاتيما in




طب ... بصرف النظــر عن الآتــى 
و كمان بغــض الطـــرف و لدقــايق (فقط) 
عن جثم المجلس العسكرى 
على أنفاس مصـــر و الثورة
لخنقها بالتدريج حتى قتلها
ولن يستطيعوا بإذن الله


  
الا إن هذه المقولة ستتجلى دوماً  
وتعلو فوق كل شىء 
للثـــورة رب يحــميها

و ما يحدث اليوم .... أى كانت نتيجته 
و مساره و درجة جديته ... إلخ 
فهو يوم خلاص و اتحفر 
بإسم مصـــر ف التــاريخ
ومش هنحس بيه و لا بتأثيره و عظمته 
إلا بعـــــدين
لما نخرج برا الصورة و الغلـوشات تنقشع


وحتى يأتى هذا .... البعــــدين
فقليل من التفـــاؤل ... لا يضــر
و بعض من التبــاهى بالنصــر .. لا يضــر 
و مــزيد من الإيمــان بالله  .. لا يضــر 


و كل المجـــــــد 
للشــهداء و المصــابين و المفقــودين 
و كل من شــارك فى هذه الثــــورة 
بصــدق و إخـــلاص  وعذاب لا يهدأ



المجــــد لهم جميعاً 
و لميدان التحرير
و الذي لــولاه ولولاهــم
لما وصــلنا ع الأقل 
لهـــذا المشهد العظــيم 

 
و هنكملها ...
هنكملها إن شاء الله
لسه فيه خطوات كتير جاية 
و حتى النصــر 
و أنــا .... بحــبك .... يا بــلادى 

------------------------------------

This entry was posted on الأربعاء, أغسطس 03, 2011 and is filed under . You can leave a response and follow any responses to this entry through the .

23 كــــلام بيطــبطـــب عـــلى قــــلبى و روحــــى

سبحان المعز المذل يا فاتيما ياريت الباقي يتعظ ويعرف ان الله حق وان لكل ظالم نهاية
تعرفي ايا كانت نتيجة المحاكمة فهذه اللحظة داخل القفص تاريخية بكل المقاييس ولن تمحى من ذاكرة الاجيال ولا من التاريخ
تعرفي معرفش ليه تحضرني مع المشهد كثير من اشعار عبد الرحمان الابنودي عن نهاية الظالمين
نقطة اخيرة عزيزتي رددي وسأردد معك من قلبي شعار ارفع راسك فوق انت مصري

فاتيما
روح القلب الملائكية

مجرد وقوفه هذا الموقف هو انتصار و لاول مرة من يوم المخلوع ما مشى احس ببعض زهو الانتصار وقوفه خلف القضبان و محاكمته ايا و ابنائه ايا كانت المحاكمة هو انتصار بغض النظر عن شكل المحاكمة

اولا كان ناقص يجيبوا له موتسيكالات بتطير و يوقفوا الطائرات فى السماء من اجل موكب طائرة المخلوع
اول مرة نسمع عن طائرة الترحيلات
يعنى ايه الكامب المجهز باجهزة التكيف لحجز الرئيس و الله لو كل المساجين كذلك ليس عندى مانع
لماذا لم يقم المخلوع بمستشفى سجن طره
كل عتاولة المحامين ذو الكروش الكبيرة التى تتردد اسمائهم فى القضايا الكبيرة موجودين باستثناء بهاء ابو شقة
المحامين بالحق المدنى هيضيعونا كلهم من هواة الشهرة جايين يتصوروا و شفتى المحامى السلفى اللى بيقول ان اللى موجود مش مبارك و ده شبيه ليه (ارحمنا يارب) يجب ان يتحد محامين الحق المدنى و يرشحوا عدد من المحامين الكبار ليتوحدوا تحت رايتهم لانهم ممكن يعطلوا اجراء المحاكمة
طولت عليكى
تحياتى يا ام يوسف و سلامى الى جو

اول مرة ارى سيارة

اخيرا مشهد مفرح في ارض الوطن
الطاغية خلف القضبان حتى لو بيمثل ونايم على سرير ريش نعام برضه شفناه خلف القضبان وعقبال ما نشوفه بالبدلة الحمرا
وان شاء الله غدا افضل
تحياتي

دى خطوة و لسه فيه كتير اوى بس يارب ماتكونش تمثيلية لامتصاص الغضب لانى مش واثقة فيهم خاااالص

السلام عليكم
الحمد لله الذى حفظ بلادنا وسبحانه يرى عجائب قدرته فيعز هذا ويذل ذاك
اللهم لا شماته
حفظ الله مصر وسائر البلدان والف بين قلوب أهليها

ازيك يا فاتيما
يا رب تكوني بخير و بصحة
كل سنة و انتي طيبة و رمضان كريم
عاوزه اسأل عليكي بقالي كتير بس مش راضية حاسة ان اخر كومنت ليا كان وحش او دايقك انا اسفة لو كان ده حصل انا فعلا مش قصدي حاجة و انتي بجد غالية اوووووووي عندي و محبش تزعلي مني بس انا ساعات احساسي اللي بيتكلم مش انا
و مبروووووووووووووك علي فوز قصة 28 في كتاب ال 100 تدوينة انا فرحت جدا علشانك
يا رب يجعل ايامك كلها خير ويكرمك دايما
خلي بالك من نفسك

فرحه مع قليل من الحذر :)... ربنا يستر وماتحصلش اي حرمه قرعه من بتوع المجلس ..

وواضح اننا لا نملك الا الضغط والدعاء

وثوره حتى النصر

يارب يا فاتيما
crossing hands and toes
يارب تكمل على خير مش عاوزين الجهد ده كله يضيع

برغم كل شيء لسه خايفة ومتوجسة..
يارب استرها

وكله كوووووم والصبغة كوووم يافاتيما يااختي
:))))
غيظاني اوي حكاية الصبغة دي

:)))
بس الحمد لله
حسيت ان تعب الشرافاء مارحش هدر

للثورة رب يحميها
فعلا
الحمدلله الذى ارانا هذا اليوم
اللى هنحكى لاحفادنا عليه بعد كاااااام سنة
.....
فعلا لولا الاعتصامات اللى اتهاجمت اشد هجوم فى جميع الفضائيات
ماكناش شفنا اليوم دا
ودلوقتى كله طالع يقول انه بيشكر الاعتصامات
وكان لسة شاتم فيها من يومين
...
انا فرحانة عشان عالاقل النهاردة
ام كل شهيد هتقدر تحط راسها
عالمخدة وتنام
الحمدلله
..

خواطر شابة
----------

ونعم بالله يا خواطر

تعرفى ؟
انا من يوم كدا كنت بفكر
ازاى خواطر بتحب الصباحات وتركز معاها كدا مع ان الاخبار كلها مصرية تقريباً ..
ايه اللى ممكن يشدها قوى كدا ؟
وايه يخليها معانا دايما ؟
فجأة حسيت انك مصرية وأكتر من ناس كتير ف البلد دى شايلين الجنسية ولا يستحقونها بما صنعت أيديهم ...

تعليقك دا بيقول
انك لا تقلى عنى وعن أى حد بيدخل هنا وبيحب البلد دى من قلبه
وبينقهر عشانها ..

المشهد النهاردة بغض النظر عن الآتى
كافى بالنسبالى ع الأقل
انى أسيبه بقى وافكر ف القادم
المطالب الباقية
واللى عاوزة تحرك ومجهود واصرار
وان شاء الله ربنا ينفخ ف صورتنا
ونكملها ...


قولى معايا يا خطورتى
واحنا بنتشرف بيكى
ارفع راسك فوق
انت مصرى

كل حبى يا اطيب اهل المغرب
:)

۩ .. رمضان كــريـم .. ۩

ابراهيم رزق
-----------

بص يا ابراهيم
لسه علاء الأسوانى قايلها مع يسرى فودة من شوية
وانا بحترم علاء الاسوانى جدااا
وأثق فيه وف أخلاصه
وف نظرته للامور والأستقراء للجاى

وهوه قال
ان المشهد فيه تفاصيل
تضايق ولينا عليها نقد
اما المشهد الاكبر
فهو الأهم
وان مصر بتؤرخ لمبدأ
محاسبة الحاكم العربى
ودا شىء مش هين

احنا عملنا أنجاز
ويتبقى نكمل بقى
ومنروحش ونفتكر ان كدا خلاص

كان نفسى ابعت سلامك لجو
بس غالبا هيوصل بالطريقة الغير تقليدية مش العادية ...

الا وهى جناحات الملايكة


سلامى لساليناز حبيبتى ..
بس دا بقى
بالطريقة التقليدية
:))

۩ .. رمضان كــريـم .. ۩

مصطفى سيف
---------

ربنا كبير يا مصطفى
والحمدلله اننا عشنا
لحد ما عشنا يوم زى دا

وخلاص نعدى اللحظةولا نستغرق فيها
ونبص للجاى ..
لسه قصادنا مطالب كتير محصلتش
ولازم نفضل وراها لحد ما تتنفذ ..

ان شاء الله
وربنا يسمع دعائك
ودعاء كل المخلصين

:)

۩ .. رمضان كــريـم .. ۩

Tears
-----


معاكى انها خطوة يا توتا
بس مش خطوة بسيطة
وتستاهل نخرج شوية م التوتر
ونشوف آيات الله ف عباده
بحبة هدوء


القادم فيه كتير
ولسه عدونا الأساسى قاعد ع الكراسى
وبيخنق ف الثورة
و احنا مش هنسلم ونسكت
وينضحك علينا بالجلسات والمحاكمات والأخبارات والكلام الفارغ دا ...

شاب كان معانا ف مسيرة العباسية
ربنا افتكره النهاردة
و ذنبه ف رقبتنا
ودمه عند المجلس العسكرى
ومش هنسيب حقه
متخافيش يا تيرز
و احنا صاحيين يا حبيبتى
فمتخافيش



۩ .. رمضان كــريـم .. ۩

مدونة رحلة حياة
---------------

وعليكم السلام
وسبحان الله يعز من يشاء
ويذل من يشاء

:)

۩ .. رمضان كــريـم .. ۩

MonaAbo-Elss3od
----------------

مش حقيقى خاااالص يا مونى
تعليقاتك دايما بتطبطب على روحى وقلبى ومفيش حاجة زعلتنى بالمرة

لو هزعل
يبقى المفروض أزعل انك خايفة على مشاعرى وبتحبينى ومحموقالى ؟!!!
ازاى يعنى بقى ؟!!

يا حبيبتى ابدا
انا اللى الاحداث اخدتنى وملحقتش أعلق عندك وأرد ..
أنا اسفة والله

وميرسى ع التهنئة
انا مش لاحقة حتى أرد على إيثار
والناس الحلوة اللى عاملة الحكاية دى
وكتر خيرهم ...
التدوينة دى مجرد رسالة شكر لكل واحد نزل يوم 28 وبنزوله عمل الفرق اللى خلى الثورة نجحت ومبارك اتخلع

سلامى للولاد وزوجك العزيز
وأسفة تانى للتقصير

۩ .. رمضان كــريـم .. ۩

فتاة من الصعيد
---------------

متحصلش حركة قرعة من بتوع المجلس

وهل عندكى شكون يا فاتى ان دا أكيد هيحصل ؟!!!!

يا ماما توقعى أن الحركات القرعة ستتوالى ...
مش غلط انها تحصل منهم على فكرة
الغلط اننا نتوقع عدم حدوثها
ونستعد لها
أو ع الأقل منغيرش رأينا و نثق ف المجلس ونقول مصلحة مصر والأفلام دى


انتى قولتيها
الضغط
والدعاء
والثورة حتى النصر


لكن أثناءذلك
لا مانع ..من قليل من الفرحة
بما حدث وانجزه الثوار بإعتصامهم وبدماء الشهداءو معاناة المصابين وعذابات المفقودين وأهاليهم
واحنا اللى حاسين بألم أهاليهم ..

وربنا كبير

۩ .. رمضان كــريـم .. ۩

طالبة مقهورة ..درجة أولى
-------------------------

يا حبيبتى الخوف والتوجس أمر طبيعى
واللى ميخفش ويتوجس
يبقى يا اما فلول
يا اما كنباوى
يا أما بيعمل دماغ
ومبفوقش منها خالص بقى
:)

ربنا يسترها ان شاء الله
بس احنا نفضل ثابتين ع المبدأ
دا المطلوب وفقط

نثبت
ونكمل
بس

۩ .. رمضان كــريـم .. ۩

شمس النهار
-----------

يا شموسة أعصابك
دى عالم معندهاش دم اصلاً
وكويس اللى بيعمله دا
عشان الناس اللى هوه صعبان عليهم
ينكتموا ويسمعونا سكاتهم

يعنى متهم بالقتل العمد
وليه نفسيصبغ شعره
وخايف على منظره وبرستيجه
وبيقولوا أكتئاب آل !!!

اليوم دا فارق
ولو مبارك مات النهاردة
مش فارقة معايا خلاص

احنا الشعب
والثوار ..حطيناه ف القفص
وفرجنا عليه العالم كله
ودشنا مبدأ ..هينكتب بإسمنا ف التاريخ

هذا يكفينى
ونبص بقى للجاى
وورانا حاجات كتير نعملها لسه
وثورة ثورة ..حتى النصر
ان شاء الله

۩ .. رمضان كــريـم .. ۩

ربنا يستر بس ومش يكون جابهم النهارده لمجرد انهم يهدوا الناس
ربنا يكملها على خير ويدفعوا تمن اللى عملوه بقى

كل سنه وانتى طيبه :)

sara adel draz
---------------

والله يا سارة
هذا ما أستشعره هذه الأيام

حاجات عظيمة بتتعمل
ومحدش بيحس بيها وسط الزحمة
لكن بعدين
بيبان أثرها
وتأثيرها

عارفة الطوبة على طوبة
لحد الحيطة ما تتبنى


محاكمة النهاردة
جت بعد ضغط
و حروب طاحنة
بين الثوار
والمجلس العسكرى
والداخلية
وأذناب مبارك فى مجلس الوزرا
و الاعلام الداعر
و حتى حزب الكنبة المثبط

وكل هولاء لا زالوا يحاربون الثورة
وان شاء الله
النصر حليف الحق

معرفش امهات الشهداء
احساسهم ايه
بس العدالة البطيئة منتهى الظلم
وأظن ان منظرهم ف القفص
يبرد النار ولو قليلاً ..
والله أعلم


تحياتى ليكى
والحمدلله على نصره
وبا رب يفضل معانا وجنبنا
لسه المشوار طويل

۩ .. رمضان كــريـم .. ۩

Bent Men ElZaman Da !!
----------------------

بصى يا بنوتة
تهئة او مش تهدئة
تنويم للناس او مش تنويم
تمثيلية او مش تمثيلية
ومبارك ولاّ مش مبارك
إجراءات ولاّ شكليات
....
كل دا مش يفرق
مع المحصلة النهائية ف الآخر
ان مبارك واولاده ووزير زبانيته
دخلوا القفص فى محاكمة علنية
أقامها القضاء المصرى
ممثلاً عن الشعب المصرى
رغم أنف المجلس و أعوانه و ذيوله

مبارك بقى كرت محروق
ولا اهمية له بعد اليوم
كان الهدف ان يتم وضعه اما جرائمه
وهذا ما تم ..
أو على الأقل بدأ
ويجب اننا مننجرش للتفاصيل الكتير اللى هتحصل قدام ...
وننسى الاهم

والعدو الحقيقى الان
هم العسكر
ودول اللى عليهم الدور
والثورة والثوار لهم ..
ان شاء الله

وكل سنةوانتى بألف خير يا حبيبتى


۩ .. رمضان كــريـم .. ۩

إرسال تعليق