.

.

جــــمـــعـة وبعــــدهــالـكـــــو !!  

Posted by: فاتيما in


   

--------------------------------------------

و تسـعة تسـعة 
يعنى الجــمعة الجــاية 
و أول يوم تحــرير بعد رمضــان والعــيد 
اللى عــدوا علينا باهتنين وساكتين 
وملهمش لا طـــعم ولا حــس 
دا كان شــعورى الشخصى ع الأقــل
 
وبتكــلم عن نفسى 
لأنى مش متخيلة الواحـــد ازاى 
يقدر يفــرح برمضــان وبأى مظــهر 
من مظــــاهــــر العــيد  بجد ويبتهـــج
 و فيه ناس مصـــريين زينا و مننا 
عــــدوا الحــداشـــ(11)ـــر ألف شخص
مرمــيين فى سجـــن العسكــر كدا 
بلا حـــقوق
وبلا محـــاكمات عـــادلة
وبلا أى رحــــمة
ولا تعاطــــف 
ولا أى لمحـــة نـــور تظهــر ...



الأيام كانت بتعـــدى تقــيلة كــئيبة 
ومنظــر العســاكر و هيا بتحــوط الصينية 
وبتـــدافع عنها بشراسة 
وكأنها أرض ســـيناء ... بس على مّدور
شىء يقـــرف



 و أصلا الشهر
ابتدى بفض اعتصام التحرير 
بكل وحشية وامتهان وعنف ودناءة
وضرب لأهالى الشــهداء والناشطـــين





ثم محـــاكمة مبارك العلــــنية 
و ما صاحبها من استفـــزازت
و تطـــليع لسان للصــــباح البـــاكــر 
وكأنهم بيقـــولولنا .. مش خلاص شوفتوه 
خلاويص بقى ... مفيش تحرير تانى 



ثم جاء وداع محمد محسن
شهيد العباسية 
و اللى ربنا أراد بموته 
أن يخـــلد هذا اليوم
وينكتب سطـر جديد ف كتاب الغـدر 





بعــده جت مليونية الإحــتفال الحمضــانة 
بتاعت الصـــوفية و غـــيرهم
اللى كانت بلاستيك ف اسمنت 
بلا هــدف ولا طـــعم واتخانقوا عليها 
اكتـــر ما اتفقـــوا




 
و نتفاجىء بتحــــويل اســـماء محــفوظ 
للقضاء العسكرى بتهمة التحريض 
على اثارة الفوضى بسبب تويتة كتبتها
وينشغل الكل بعرض قضيتها 
وف الآخـــر يتنازل المجلس 
بعد ما يغلوش ع الناس شوية 
ويتحفظ البلاغ


 و ف الجلسة التانية يفاجئنا القاضى 
ان محاكـــمات الأخ مبارك هتبقى غير علنية 
وخــلاص انتوا هيصــتوا وانبستطوا
وخـــدتوا  للريس كام تصويرة للــزمن ..
عــــاوزين ايه تانى يا غجــــر ؟!!!



ورغم انى من العالم
اللى شايفة الإنغماس فى تفاصيل 
المحاكمات دى .. محض تشتيت نظر 
عن بلاوى تانية ... بتحصل وهتحصل 
بس ع الأقل العـلانية دى كانت بتظهر الاخطاء 
والأمتهانات القانونية الرهيبة 
وأبسطــــها على سبيل المثال 
ان علاء باشا كان ماشى بلا كلابشات 
وبيحـــط ايده ع الكامـــيرا 
عشان محـــدش يصــــور باباه يا كلاب
بينما اهــالى الشهداء بينضربوا برا المحكمة 
فى رعاية الامن والداخلية والجيش
كالعـااااااااااااااااااادة 




و تمشى الأيام مملة احيانا 
ومســتـفزة احيانا 
بماسورة الفـلول اللى انفجــرت ع الفضائيات

وطفحـــت علينا بكـــل
انــواع القــذارة و الدعـــارة الإعـــلامية 
  


و لحــــد ما انقـــتل وانصـــاب 
عـــدد من ولادنا ع الحــــدود 
وجت حــكاية الإعتصـــام قصاد الســفارة 
و نزول العـــلم والشحات .. عشان 
تـرفـــع م المعــــنويات شوية
وتحسسنا إن فيه بارقة امــل ف البـــلد دى
ممكن تفاجئــنا ف وسط العـــتمة
وزاد عليها نجاح الثوار الليبين 
فى دخول طرابلس العاصمة وتحريرها
وجعل القذافى يهرب ويتخفى 
ويصبح كالجـــرذان  .. حرفياً




و تغـــمر حــــمامات الدم ســـوريا الحــرة 
وتصــــمد وتأبى الإنهــــزام 
و يرجــــعوا تانى يفكرونا كل اخـــواتنا 
ف ليبيا وسوريا واليمن 
ان الثورات لا تنجـــح وتؤتى أكلها 
و احنـا قاعــدين ف البيـــوت 
و لكــــن .. بالتضحـــيات والإصـــرار





الا انه لما اترددت اخـــــبار
عن تمــــرد فى السجـــن الحــربى
من المسجونين المدنيين 
و اللى نفوها العسكر .. كعادة نظام مبارك 
الذى ما يزال يحكم بعد
فــ .. قلــــبى إنقـــبض لحظــتها قـــوى
وقــولت 
و بعـــدهالكـــو بقى  



صحـــيح فيه ناس مدنيين طلعت 
والحمدلله 
منهم كل المجـــموعة اللى اتقبض عليها 
يوم 28 يونيو قصاد الداخلية  ..تقريباً
بس لسه فيه ناس تانيـــة كتييييييير
محدش جــــاب ســـيرتهم 
ولا حـــدش عـــارف ايه اخـــبارهم 
 والأوجـــع ان فيه ناس محدش عارفهم خالص
لا هما ناشطــــين ولا حـــاجة 
وناس عــــادية 
و لا حـــدش دارى بيهم غـــير أهلهم ... وبس
ومنســـيين 
او متجـــاهلين اعــــلامياً 
لأن إســــمائهم مش معــــــروفة




اشاعات ف الاعلام عموما 
وف برنامج يا مصر قومى 
على لسان محمود سعـــد 
ان الكـــل خـــارج بعـــفو قبل العــــيد 
وتتعــلق بعض القلــوب بالامل ... وميحصلش 


والمـــؤلم أن تتـــردد اشــاعة 
تانية امبــارح 
عن مايكـــل نبيل 
الشـــاب اللى أخـــــد 3 سنين 
فى تهمة اهـــانة الجيش على تدوينة كتبها
و اللى قــــرر بكرامـــة 
الاضــــرب عن الطـــــعام
من يـــوم 23 اغسطس و لحـــد دلوقتى
و قالت الاشـــاعة انه مـــات 
و محدش عارف ايه اللى بيحصل بالضبط
 

الشباب اللى دخـــلوا السجـــن الحربى 
وكــــتبوا شـــــهاداتهم 
عن اللى شـــافوه جـــوا
والحــــكايات اللى بنقـــراها كل يوم 
عن كانت ناس ف حـــالها 
وملهاش دعــــوة حتى بالثورة أو السياسة
واتقــــبض عليهم واتسجــــنوا 
والنشــطاء والثوار واللى معــملوش حاجة 
اصلاً يعنى عشان يتقبض عليهم ...

كل دول ... 
الثــورة مقامتش 
عشان يتحولوا لمحــــاكمات عســـكرية 
ويترموا ورا القضـــبان فى اعتى سجون 
عشان بيحـــبوا البـــلد وخـــايفين عليها
بينما مبارك والفاسدين بيتدلعوا
وهرونا بحدوتة 
انهم لااااازم يتحاكـــموا مدنى 
عشان العــــدل و حـــقوقهم لا تهـــدر 
فى اشارة واضحـــة و سافرة
لأن المثول امام المحاكم العسكرية 
فيه ظـــلم بيّن 
ولن يعترف بيه العالم 
وينظــرله نظـــرة إنه عادل ومنصـــف 


الله !!!
طــب إيه ؟
مــبارك وولاده واعـــوانه .. فوق الراس
وولادنا ولاد البطــــة الســـودا ؟!!!



طيب
 
انا نازلة الجـــمعة الجــــاية 
جمعة .. 
لا للمحـــاكـــمات العســــكرية 
هنزل لأن دا 
حـــق كل واحــــد مظلوم
ومسجون ومرمى فى غياهـــب الجب 
اكتر من سبع شهور
و ذنبه فى رقـــــبتنا 


هنزل عشان كان و يمكن و ممكن قوى
اكــــون انا أو انتا  يوم ف مكــــانه


هنزل عشان ممكن قوى يكون 
اخويا واخوك فى مطرحه 
لو صدفة اتمسك ف خناقة
ولا أى موقف عابر وحظه التعس وقعه
ف إيدهم وتحول للنيابة العسكرية 
ويا مولود يا مفقود



 هنزل عشان أى حـــد منعـــرفــوش 
ومحــتاج جـــدااااا لتضـــامننا
ولو كام ساعـــة نوقفهم بيافطة عشـــانه 
ونمشــــى
مع إن المفروض محـــدش يمشــى 
لحد ما همــــا يخرجــــوا


هنزل عشان لما توصــــلهم الاخـــبار 
ان اخـــواتهم بــرا فاكـــرينهم 
و وقفــــوا بالألاف يناصـــــروهم 
ويهــــتفوا بحـــقوقهم ويطـــلبولهم الحرية 
يحـــسوا حتى .... و لو مجــــتش بفايدة 
اننا معــــاهم وحــــاسين بيهــــم 
وان اللى هــــما فيه مش ببلاش 
ولا كان غلـــط  
وممكــن يوم ينتــهى زى كل ظلم قبله 
ولى وراح




انا ملــيش دعوة بإن مايكل نبيل 
كان بيكتب ايه 
ولا افكاره عن اسرائيل والأفلام دى  كلها
انشالله يقول انا مش معترف بوجود .. ربنا 
أنا مليش دعوة .. فليعتقد ما يشاء 
وليعتقد كل منا ما يشاء 
مش هنعلق لبعض مشانق 
 انا اللى اعرفه انه بنى آدم زيى 
بيتعــرض لظـلم بسبب تدوينــة كتبــها 
وكلنا كتـبنا زيها و اللى أنقح منها 
بعد شــهور منتقدين المجلس العسكـــرى 
صحــــفيين و ناشطـــين و مــدونين
ومتــوترين وفيسبوكـــين ...الخ 
و الجدع كان عنده بعد نظر مش أكتر 
وبالتــــالى ...
قمـــة  الغـــبن ان يسجــن شخــص 
بسـبب رأى كــــتبه 
أى كان هــذا الرأى




و انا متضامنة مع مايكل ...
عشــــان متضامنة مع المبــــدأ 
مبدأ حــــرية الرأى
وحــــتى لو القــــانون بيقـــول نحاسبه 
فالأعـــلان الدســــتورى اللى دبسونا فيه
و فلقـــــونا بيه وبيحـكمونا ... 
على اســـاسه دلوقتى 
بيقول ان كل مواطــــن يجب ان يحـــــاكم 
امام قاضـــــيه الطبيعى
يعنى القاضــى المدنى 
والمحاكم المدنية 
يعـــــنى 
كل المحــاكمات العسكرية دى باطلة
وفى غــــير محــــلها
واللى عنــــده رأى تـــانى .. يقــــولى !!



هــذه الثـــــورة قامــت عشان الحـــرية 
وتااااااااااانى 
المجــــلس الاعلى .. مش ربنـــا الأعلى 
ولــو هما مش فاهــــمين كدا 
يبقوا نفهمهم 
اننا لن نرضـــى 
بأقل من كــــرامتـنا
و بكـــرامة هــــــذا الوطــــن بديــــلا





وكمـــان انا معرفش اسماء محفوظ 
ولا بشجع اسلوبها و طريقتها
لكن بحترم دورهــا هيا وغيرها 
فى هذه الثورة و بقدر حبها لبلدها
و من حـــقها عليا حتى لو اخــتلفت معاها 
انى اؤيد حـــريتها ....
ف إبــــداء رأيهــــا ما دام لن يضــر أحــد
  

 
و يعنى ماشاء الله ف الأذى 
إيدهــم كقضاء عسكرى هى الطولى 
طب مشوفناش الهـــمة دى ليه 
ف القبـــض على الفاسدين ومحاصرتهم 
من اول سقوط مبــارك و لحـــد النهاردة؟
والســـوال التاريخى بقى 
و الذى ينــــازع ســــؤال شكسبير 
بتاع اكـــون أو لا أكـــون
هـــوه مين اللى قـــام بالثــورة 
ومين عـــدوها
قـــوم نبسك عليه و نعاقـــبه 
ونسجـــنه هـــوه مش حــــد تانى  
عشان انا اتمخــــولت
وعقلى اتدهـــــول الصـراحة
إيما دهـــــولة و قربت البس كسرولة
وامشـــى بيها ف الشـــارع !!




اخمن مسبقاً ان الإخــــوان 
هيعلنوا رأيهم فى آخــــر لحظة 
لما يشــــوفوا اتجــاه الريـاح رايح فين
و لو قــــرروا ينزلوا ...
فغالبا هينزلوا عشان يخـــففوا السلخة
على المجـلس و يحبطــوا أى محــاولات
تتهـــدد فكـــرة .. الإنتخابات أولا 
اللى فـيها حــياتهم او موتهـــم 
واللى هيا أهـــم عندهم دلوقـــتى 
م الشــــعب والوطــــن


اما الاخـــوة السلفيين 
فمع احترامى ليهم ... فاتمنى 
مشـــوفش وشــهم ف اليــوم دا بالمــرة 
عشان ميسحــبوش الاكسجيــن م الجو 
ولو ان التيارات الأسلامية كلها 
عانت من الحبس والتعذيب والإهانة 
اللى تخليهم ينزلوا المليونية دى تحديدا 
دونا عن أى أعتبارات آخرى 
فمسجونيهم طوال العقود الماضية 
و قتلاهم  .. محتاجين منهم الوقفة دى
ويكفى أذكـــر الاخوة السلفيين بسيد بلال
و اللى جــــراله ...
انما عموما نزولهـــم من عـــدمه 
مش هيفـــرق قــــوى 
و يمكـــن العكــــس 
هيظــــهر قد ايه هـــم نفعيـــين  
و بتــــوع مصلحـــــتك أولا
و قـــد إيه هـــم قــــوم
بيحسبـــوا الحساباتو
عشان ف الهــــنا يباتـــوا

 
الجــــمعة الجـــاية 
يوم الحرية
المسجون عصافيرها خلف أسوار الحربى
يوم الكــــرامة  
و التى لا تتواجد ف السجـون والمعتقلات
و يوم العـــدل 
ودولة القـــانون اللى بيقولوا عليها
وانزلــــوا معــــانا
عشــان كـــلمة الحــــق 
و تقولــوا لمحـــاكم العسكـــر  ... لأ



وألـــف لأااااااااااااا
لهـذا 
الســــيف
المـــرفـــوع دايمـــا
على رقــاب الاحــــرار





و 
يا مشــــير يا مشـــــير 
تســـــعة تســـــعة ف التحـــــريــر 

أشـــوفكــــم على خـــــير

--------------------------------------------
وحــــياتك 
لأفضل أغـــّير فيكـــى 
لحــــد ما ترضـــى عليه
------------------------------------------

-------------------------------------------------


-------------------------------------

-------------------------------------
9/9 جمعة الرجل العجوز .. عمر حاذق
المساجد ... نقطة الإنطلاق 
صباحاتى الأربعاء 7 سبتمبر

رسالة .. وبس ... د.ستيتة 
سرقوا الثورة يا محمد .. سهى زكى 
صباحاتى الثلاثاء 6 سبتمبر 
سنوقف المحاكمات فور انتهاء حالة الطوارىء
صباحاتى الأثنين 5 سبتمبر 
إعتذار عن المشاركة فى الثورة..أسامة الشاذلى
صــــباحـــاتــى الاحــــد 4 سبتمبر
البيان 26 لثورة الغضب 
الطواغيت العرب .. د.ستيتة حسب الله الحمش
حركات سياسية تصف محاكمة مايكل بالمهزلة
ائتلاف مستشارى النيابة الادارية تعلن اعتصامها
حزب العمال يشارك ف مليونية 9/9..الشروق
9/9 ... تغريدات ع التــــويـــتـر 
اعتصام عمال المحلة .. 10 سبتمبر 
رسالة مايكل نبيل بتاريخ 3/9 من السجن الحربى
ليه انا نازل الجمعة 9/9 .. البديل 
----------------------------------------------
-------------------------------------------------------

This entry was posted on الجمعة, سبتمبر 02, 2011 and is filed under . You can leave a response and follow any responses to this entry through the .

16 كــــلام بيطــبطـــب عـــلى قــــلبى و روحــــى

انا متفق معاكي في كلامك
بالنسبة لاخواتناالاخوانوالسلفيين فهما هياخدو موقف المجلس العسكري اصل دول زي مانتي قولتي مصلحتك اولا بس هما نسيو ان المجلس رغم انه عارف قرفهم وتعبهم مديهم فرصتهم علشان يحارب بيهم الثوار واتلافتهم المختلفة وبعد كدة هيحط عليهم تاني وهيدخلهم جوة جحورهم بس ان شاء الله ربنا مش هيديلهم غرضهم
انا دايما بقول ان الثورة دي كانت اشبه بمعجزة ربانية ومستحبل ابدا ان ربنا يضيع معجزته او يذهبها هباء
كل اللي بيحصل دة في مصلحتنا علشان الناس اللي بتفكر تعرف مين اللي خايف عليها ومين اللي عايز يتمصلح على حسابها مش عايز مصلحتها
ان شاء الله انزل واكون معاكو ومش هنخلي اي حديسرق مننا ثورتنا لا المجلس ولا الفلول ولا ابوهم وامهم حتى

وطبعا طبعا طبعا ماينفعش اكون هنا من غير ما اقولك كل سنة وانتي طيبةيا صديقتي الجميلة ويارب ينعاد عليكي بالخير انتي وكل احبابك

اولا كل سنه وامى طيبه
وثانيا نفسى مره ادخل مودنتك القيكى شيلا هم نفسك
دايما بتشيلى هموم غيرك
وبتفكرى فى غيرك
بحبك اووى

أن شاء الله


يكون تأثرها قوى

و ترجعوا كلكم بالسلامة

مع حضرتك فى كل كلمة
ولو قامت المظاهرات فعلا عندنا فى الزقازيق هنزلها باذن الله
مع اختلافى فى رأى حضرتك عن الاخوان والسلفيين
لان فكرة التعميم على بعضها فى اى حاجة
بتكون غالبا مش صح
..
بس بجد ربنا يسترها الجمعة الجاية ومش يطلعوا يقولوا علينا بلطجية واحنا اللى بنوقف عجلة الانتاج والخرف دا
واكيد الكلام دا هيتقال
بس عايزين نجدد نيتنا ان نزولنا دا هيكون عشان ننصر الحق ونقف مع اللى اتظلموا
والله المستعان
وطبعا هعمل شير للبوست دا عالفيس
ودمتِ مصرية ^_^

mostafa rayan
-------------

وانتا طيب يا مصطفى
و الحاجة والأسرة كلهابألف خير


وان شاء الله ربنا ينفخ ف صورتنا
يوم الجمعة
ويبقى العدد كويس
عشان يكون مؤثر
وصوته مسموع

وعموما
انتا عارف مطرحى ومكانى
وبأذن الله مالم يتم احتلاله
من أى حد
هتلاقينى فيه

اشوفك على ألف خير
دايما
ومش يوم الجمعة بس

بنت قلبى
-------

اولاً
وانتى طيبة وبألف خير
و راحــة
يا رب


ثانياً
تعليقك خلانى أعيــط


ثالثاً
مش لاقية حاجة اقولها دلوقتى
غير كلمة
شكـــــــراً

غير معرف
-------

هوه انا مزعلك للدرجة دى ؟!!

يعنى لدرجة انك عاوز تتمنالى الخير
بس مش عاوز تدخل بإسمك


طيب


عموما
وبدون تخمينات
انتا مين ولاّ ايه الحكاية
انا شاكرة ليك جدا على مشاعرك
و ربنا هو الحـــافظ
بإذن الله

اللى طلب تعليقه ميتنشرش
-----------------------

انا بخير يا غالى
و الحمدلله

المشاكل مبتتحلش ..
بس انا بطنشها قدر الممكن
وبقول اودى وشى الناحية التانية
يمكن تروح لحالها ..لوحـــدها
او انا رقبتى تاخد على الوضع الجديد
ومترجعش تبص الناحية دى تانى
يعنى ...

انا كويسة الحمدلله
متقلقش عليا

ودعواتك للجمعة الجاية بقى
مش هوصيك

sara adel draz
--------------

اهلا بيكى يا سارة
ويا حبيبتى رأيى هذا يتعلق بالإخوان والسلفيين اللى بيشتغلوا سياسة بس

مش الناس الدعويين
او معتنقى المذهب السلفى او غيره

كل واحد حر فيما يعتنق
انشالله يقول انا مبعترفش بوجود ربنا
مش مشكلتى

مشكلتى الحقيقية
لما يحاول يفرض منهجه عليا
ويحكم حياتى وحريتى
حرية الفرد تنتهى عند حرية الآخرين
وللأسف
تيجى تتكلمى مع الأخوة هنا ولا هناك
تلاقيهم سحبوكى على ملعب الدين وقالولك قال الله وقال الرسول و إيه هتعترضى ؟!!!

الكلام دا على عينى وراسى
لما نكون بنتكلم ف امور الدين
لكن ف عالم السياسة
محدش يخلط الحاجات ببعض
ويحرم علينا العيشة واللى عايشنها
باسم الدين وعاوز يحكم بالمرة فوق البيعة ...


اتمنى الزقازيق واسكندرية والمحلة و اسماعيلية و المنصورة وكل شبر ف مصر ينتفض ...
الطلب دا يمس كل حد فينا بشكل أو بآخر
ولو ممكن نستنى ع الامن يرجع
او المرتب يزيد
او الاحوال تتحسن
هنفضل لحد امتى نستنى ع الإنسان المصرى كرامته تمتهن وحقوقه كبشر تتهان
بلا سبب ولا بلا عدل


ان شاء الله يكون خير
ودعواتك يا حبيبتى

أتفق معاكي في كل كلمة و إن كنت أستثني الشباب الواعي من الإخوان المسلمين الذي ينزل كل مرة قبل حسم القيادات لمواقفها و أمثالهم من الشباب السلفي

و يسقط يسقط حكم العسكر
و نقلت التدوينة دي عندي و يارب المظاهرة تنجح في كل مصر

والله لهذا قامت الثورة
قامت الثورة ليمنع اعتقال المصريين لأنهم يقولون ارائهم
حرية الرأي هو السبب الرئيسي للثورة فكيف تتم محاكمات عسكرية ويسجن كل ذي راي معارض ؟ ويتم توطيد تلك القاعدة في نفوس كل الطوائف الشعبية من يخالفني راي فيجب ان امحيه واكتم فاه فتزداد الفتن ويضيع الحق في غياهب الباطل ونظل نبحث عن سبب تلك الفتن
وتبقى حقيقة مرة وسط الضياع الذي نحياه ان تصنع سلاما بين الجميع ينتهي في لحظات ولا يتبقى منه غير الالم
السعي نحو صينية التحرير لو يكن كسابق عهده في ان الصينية هي مجرد وسيلة للضغط بل ان اصرار المجلس العسكري لعدم وصول الناس للصينية جعل منها حلما وهدفا للعديد من الطوائف فبدأ الجميع في محاولة منع الآخرين من الوصول لها حتى لا يصل غيره وفي نهاية تلك المهزلة التي نحياها لا استبعد ان يستحوذ زبايدر ورفاقه على الصينية ويطير بها بعيدا
اعلم انه الحلقة الاضعف في المجتمع المصري وان الجميع يبغضه ويكرهه ويظن انه امتداد لنظام فاسد وثورة مضادة لكن الم تلاحظو زيادة الاعداد التي تتبعه كل يوم يزدادون ربما زيادات طفيفة لكنها مقلقة
الحل حتى لا نستيقظ صباحا فنجد اننا انتهى بنا الوضع الى ما قبل 25 يناير الحل بسيط ككلام صعب ويقترب من المستحيل كتطبيق وهو توحيد الصف وتوحيد المطالب وتوحيد الشعارات وتوحيد القرارات او على الاقل ان يتم ذلك في كل محاولات الضغط على مجلس العسكر حتى نصل الى اقل درجات الحرية التي صنعنا من اجلها الثورة وهو حرية المواطن المدني في ان يدافع عن نفسه امام محكمة مدنية
تحياتي لكي واسف للاطالة

فاتيما
روح القلب الملائكية

بصى يا فاتيما
من دلوقتى السلفيين لن يأتوا لانهم مبتدئى سياسة و المواضيع دى لا تهمهم قيد انملة و كويس انهم لن يأتوا
اما الاخوان بفكرهم البرجماتى فلن يعلنوا عن موقفهم الا فى اللحظات الاخيرة لو المشهد مهيب و الصورة كبيرة لن يغيبوا عن الصورة و يحضروا لو الصورة ستكون صغيرة لن يحضروا لكى يثبتوا ان عدم حضورهم هو السبب
رغم انى مرتبط بسفر مصيف للاولاد الا انى احاول بكل جهدى الغاء السفر و الحضور
وساحضر بأذن الله

سلام يا فاتيما و سلامى الى جو

بلدنا بقت زى كثير منا منسية وقليل اللى بيفتكرها بالخير

افتيما الغالية
قلتي اللي نفسنا نقوله
وكله كووووووووم والجدار الاهبل ده كووووووووم

ان شاء الله نازلين كلنا

احنا بتعمل فينا دلوقتي اللي مااتعملش ايام المخلوع

فاتيما ياحبى
مساء الخير

انا غيرت الميعاد وشلت البوست القديم
اعلنى فى مدونتك او نزلى بوست عندك
المهم الناس تعرف بالتغيير

اى خدمه ياام يوسف

إرسال تعليق