.

.

المـحـــدش  

Posted by: فاتيما in





خليـــك كـــدا 
بطــولك أحسن 
لوحــدك ... 
محـــدش ويــاك
عشـان لحظـــة ما تقــــرر
تبــقى إتنــين مش واحــــد
المحـــدش 
 ساعتها هــّوه اللـى هيرفــض
 يســتنى معـــاك

(................)
-----------------------------
-------------------------------------

This entry was posted on الخميس, سبتمبر 08, 2011 and is filed under . You can leave a response and follow any responses to this entry through the .

35 كــــلام بيطــبطـــب عـــلى قــــلبى و روحــــى

ترجعى بألف سلامة


و السلام هيوصل أن شاء الله


و مستنين تحكيلنا عن اللى يحصل

ربنا يوفقكم

ربنا معاكى و يحفظك و يحفظ الجميع

فاتيما
روح القلب الملائكية

اختلف الجميع
لكن محدش اختلف عليكى

بأذن الله سنتقابل غدا
فى التحرير

تحياتى

المحدش !!
كلمة عجبتني جدااااااااااا

إيد على إيد
تشيل
صوت على صوت
يغنو

الحياة مشاركة وتعاون وود وصدق ومحبة ولازم لازم المحدش والحد يبقى الاتنين ف ايد بعضيهم

أكيد هيبقو أقوى وأفضل

وحشتينى جدا بقى

الله

المحدش هو اللي هيرفض يستنى معاك

حتى الوحدة هترفض تصاحبُه

تعبير جميل

وهو شكلُه يستاهل اللي يجرالُه :-)

إيه ده ؟

انتى بتسمعى عمر فاروق يا طمطومة ؟

وانا اللى كنت فاكرة ان محدش يعرفه غيري


انا اول ما دخلت عندك وسمعت الموسيقى اذبهليت

والمقطوعة دى بالذات بتعمل فيا عمايل مش كويسة خالص


للمرة المليون تسلم ذوقك فى اختيارك الاغانى و الموسيقى



سلام

اختك نورا

مش عارف
احيانا الوحدة بتكون حلوا
بس علي الأقل لما تكون متأكد ان
مهما طالت وحدتك في " حد " لما لو وسط الناس و " المحدش " مش موجود شئ مؤلم

----

بعيدا عن الحد والمحدش بعتذر للغياب بس انا اتلعنت بلعنة الفيس واتمني الشفا منها

سلامي ليوسف يا أم يوسف يا أطيب الناس واحنهم

حسيت بحاجة بتغمزنى فى قلبى
^_^

المحدش

بعيد

بأختيار

مش اجبار

جتنا نيلة فى حظنا الهباب

http://www.youtube.com/watch?v=2Nn2Kyc1Qzc

يا فاتيما لو سمحتي قولي لخيخة تفتح التعليقات لكل الناس
مش عارف ابعتلها تعليييييييييق

المحدش مش حايمشي ماتخافيش
مهما كنتي بعيده وما بتعبريش
هو إمتى الفجر ساب النور و هاجر
ولا إمتى البحر قال سمك مافيش
وعجبي
________________________
KING TOOOT

تصدقي انا كمان كنت قلقانة عليكي؟ وليد كويس الحمدلله.. هو راح فعلا بس رجع قبل ما الدنيا تولع هناك.. كان نفسي اجي لقاء اسكندرية بس الظروف مسمحتش.. نفسي اشوفك واشوف ستيتة.. يا رب تتبسطوا.. بعتالك ايميل ابقي اقريه.. بحبك موت

soso_eldagoy@yahoo.com
فراق الاحباب شئ صعب

حاولنا كتير


ولسه هنحاول


بكرة جاى ولازم نعيشه

وساعتها الحد هيحس بخسارة الوقت اللي ضيعه و المحدش اللي ضاع منه
تحفة بجد
تسلم ايديكي و تحياتي

كيف حالك أبنتي و حال يوسف عساكم بخير أفتقدك كثيرا أبنتي

بس كتير بندور على المحدش ونفسنا يبقى هو الحد الوحيد الا لما نلاقي محدش جنبنا يبقى هو جنبنا ولما يبقى معانا نحس ان محدش معانا كاننا بنكلم نفسنا وكلامنا محدش يعرفه غيرنا ويفضل اللي مابينا محدش يقدره ولا يعرفه غيرنا

غير معرف
-------

ادينا رجعنا يا غالى
والحمدلله بألف سلامة

ربنا ما يحرمنى من سؤالك الطيب عن اختك دايما

والمليونية الجاية تكون معانا بقى
ان شاء الله

ابراهيم رزق
-----------

محدش بيعرف يكتب تعليق متضفر من جوا التدوينات ببراعة زيك يا إبراهيم
انتا ووليد كنج توت

بس هوه بيرد بسحره الخاص
بالشعر والرباعيات الجميلة

انتا تخصص صلاح جاهين
وكمان تخصص رفع المعنويات

سلامى ليك
وبوساتى وحضونات لساليناز القمراييييييييييييية
وحشتنى بنت الإيه

شمس النهار
---------

انا كمان يا شموسة

عجبتنى فكرة المحدش دى
وكمان عجبتنى فكرة
ان المحدش دا
ف وقت ما
بيكون كل حد ف الدنيا
وهوه مش مهتم
او مش حاسس
او مش فارق معاه


نورتينى يا شمس نهار المدونات
وقمرهااااااااااااا

Doba
----


انتى كمان يا دوبى
وحشتينى قوى
قوى


الحياة بجد مشاركة
بس لما تلاقى نفسك
كل ما ييجى الحد اللى المفروض عاوزاه يشاركك الحياة دى ...
مش عاوز
تعملى إيه ؟
تتمسكى بيه قدر الممكن
وأكتر م الممكن

بس بعدين تلاقيه بيبعد
ومفيش فايدة
عشان ربنا مش رايد

تتوجعى قوى
وتقولى لروحك
ماكان م الأول

طيب

يبقى الاحسن الواحد يفضل لوحده
يفضل حد واحد وحيد
وميدورش ع المحدش
ولو لاقاه
يبعد
عشان وقت الجد
هذا الحد
هيسيبه ويمشى
ويتعب قوى
ويرجع يقول لروحه
ما كان م الاول

يبقى الاحسن

وهكذااااااا



بس

بوسيلى يسوفة وعمر
وسلامى لأبو العيال
ولشاهى والنبى

يا مراكبى
--------

والله انا اللى شكلى أستاهل
يا نبع الحكمة ....
بتعاقب يظهر ولا إيه
ولاّ يمكن فيها خير
ولا يمكن الحكاية لسه مخلصتش
ولا متعرفش فيه ايه

معرفش
بس عموما
انتا فهمتها المرة دى بالعكس
يا راجل يا طيب

و كنت بكلمنى انا يا غالى

سلامى للجماعة والعيال

نوران الشاملى
-------------

والله يا نونو
كانت صدفة حلوة
ومحمد فوزى الله يمسيه بالخير
هوه اللى خلانى أسمعه
ويشكر على ذلك
وعلى كل حاجة حلوة شوفتها منه
وبتخلينى تقريبا مش فاكرة أى حاجة تزعل خالص

مبسوطة انا ان المزيكا بتعجبك
والمدونة مدونتك يا جميلة


و بوسيلى شيكو لو سمحتى

MR.PRESIDENT
------------

ولا يهمك يا بسام
خليك براحتك

بتوحشنى تعليقاتك اكيد
بس انا مقدرة والله
وعارفة نداهة الفيس بوك والتويتر
وشدتها الجامدة


اما الحد والمحدش
فالمؤلم فيه ان المحدش وقت ما بيقرر ياخد موقف ..بيكون الحد خلاص
بقى المحدش عنده هوه الهوا اللى بيتنفسه
ومبيبقاش المحدش متخيل قد ايه
ان غيابه بيخلى الحد كأنه
لا عايش ولا ميت


اسكت احسن بدل ما اخطرف


بس قبل ما اسكت اقولك
انى مبسوطة قوى بتعليقك دا

sara adel draz
--------------

طيب
دا كويس ولاّ إيه ؟!!!

sony2000
--------

صح يا سنسن
المحدش بيبعد
بإختيار
مش اجبار


بس الحد بيتعذب
اجبار
مش اختيار


بوسات على جبينك
وحضونة كبيرة يا جميلة

ازهرىىىىىى
----------

اتلم ياض
بقى عاوزينا ننزلكو التحرير كدا
دحنا كنا نجرى على الامن المركزى والكناصة وناخد منهم البندجة ونطخ نفسينا عيارين ....


ولمعلوماتك بقى
البنات القمرات دول
طلقة فشنك واحدة بس
وتلاقيهم نص جرى
ونص مغمن عليه


والسؤال هنا
انتوا عاوزينا ف المظاهرات
نبقى قصة ولا مناظر ؟!!!!

KING TOOOT
----------

الله يا وليييييييييييد
بجد
الله عليك

مش بس وحشتنى رباعيتك
انا وحشنى الطبطبة اللى فيها
ووحشنى قوى المعنى بتاعها المرة دى
ولو انى عارفة
او حاسة
او لأنى نكدية
ومش قادرة استوعب قوى
بس جرت العادة يعنى
ان المحدش بيمشى ... حتى لو فيه سمك ونور برضو ...
عشان قليل البخت يا عزيزى
يبقى اول حرف من اسمه .. فاتيما

ربنا ما يحرمنى منك
ولا من هبة وعمر
ولا من طلتك عليا
ولا من رباعيتك
وطبطباتك يا راعى الملك

بوبو
----


حمدلله على سلامته
دى أهم حاجة
والحمدلله انكم بخير


يوم اسكندرية كان حلو قوى
وان شاء الله السفرية الجاية نسافر سوا

شفت الايميل
وربنا ما يحرمنى مننننننننننك ابدا

انا كمان يا أرق مخلوقات الله
بحبك جداااااااا

نبض اسكندرية
------------

ربنا معاكى يا اسماء
ويطيب خاطرك يا حبيبتى

هبعتلك ان شاء الله
ومعلش لو إتأخرت عليكى شوية

الازهرى
------


ان شاء الله نعيشه يا زيزو
ربنا مبيعملش حاجة كدا
بس احنا اللى فهمنا واستيعابنا قاصر

وساعات بيبقى الحزن ضرورة
عشان نبقى ناس احسن
ساعات أحس كدا

تعرف ؟

اوقات احس انى لو كنت مشيت ف حياتى بشكل معتاد مفيهوش مشاكل او حاجات وحشة من وانا عيلة ...
كان ممكن اكون واحدة غيرى
كويسة يمكن
مرتاحة يمكن
بس ممكن محسش بحاجات كتير
بناس كتير
ابقى حد من اللى انا بشوفهم ومبحبهموش دول من كتر ما هما مستغرقين ف التفاهات وفى نفسهم وف اللى محصلوش عليه وسايبين اللى عندهم ...

اوقات كتيييير بحمد ربنا
على كل اللى عندى
بس لحظات انانية كدا تيجى
تخلينى اقول
ليه؟
ليه اللى احبه ميحبنيش
و مبيبقاش عاوز يفضل معايا ؟

وارجع بعد شوية زعل اقول
القلوب بإيد ربنا
مش بإيد صاحبها
احاسبه ليه واعذبه بيا
كفاية اتحملنى شهور وايام
وهوه مش عارف يقولى لأ
عشان ميجرحنيش
هوه تحديدا كشخص
ميعرفش يعمل حاجة غصب عنه
او تزنقه فيها ولو بالإحراج ...
وكونه يعمل العكس تماما معايا
فدا بيقولى حاجات كتيييييير
اولها واهمها
انه انسان طيب
ويستاهل كل اللى ف قلبى ...
حتى لو مش عاوزه
او مش قادر يرده


كفاية كدا
انا عمالة اخطرف
انتوا راشش ايه ف التعليق بتاعك
منا عارفاك ...
زيزو المجرممممممممم

افكار مبعثرة
------------

ازيك يا فوكيرة


والله يا حبيبتى بصى
من وجهة نظرى
ان حجم الالم أو السعادة بتتقاس مدى المعرفة

يعنى لو المحدش دا وصلته من المعرفة القدر الكافى اللى يخليه يحس بالخسارة
او المكسب ...
يبقى كدا ماشى

لكن لو لم يعرف ...
تفتكرى هتفرق ؟!!!

معرفش اتكلم قوى عن المحدش

بس اقدر بكل ثقة اؤكدلك
ان الحد مش حاسس بخسارة أى وقت
لكن حاسس بفداحة خسارة المحدش ..
لأنه بيحبه بجد

والحب بجد
يعنى متحسبيهاش


ولإن الحد مبيحسبهاش
فالوقت حينها ..مبيفرقش


نورتينى يا جميلة

ابوخالد
-------

حمدلله على السلامة يا بابا

انا كمان مفتقدة حضرتك جداااا
وبسأل عنك خالد والله


انا بخير
الحمدلله

يا رب انتا اللى تكون تمام
وكله كويس

وايمان وخالد والحاجة بخير يا رب

eng_semsem
----------

ايه يا أسامة دا
دنا اللى كاتبة البوست تهت يا جدع !!

هههههه

بص
الوحدة احيانا افضل
بس اختك من انصار انك لما تلاقى نصك التانى ...
تبقى نعمة النعم ولازم بنعمة ربك تحدث
وتتمسك بيها وتحافظ عليها
خصوصا انها لا تأتى مرتين ف العمر

ولو لم تأت
يبقى ملوش لازمة تعذب حد معاك
وتكون المحدش بتاعه
وتقربه منك وبعدين تسيبه
يبقى حد ..لوحده

بس يبدووووو والله اعلم
ان الحد والمحدش دايما يتقابلوا
عشان يفترقوا
ونادرا لما يفضل حد مع حد
وعشان كدا الدنيا
مليانة وجع قلب

عموما
كل اللى يقسمه ربنا
خــــير


انا اتشرفت بمعرفتك
وبجد كان يوم اسكندرية ممتع
وربنا يجعلها معرفة خير يا رب

سلامنا للعروسة
واللقاء الجاى تكون بقت الجماعة
والحكومة والمدام ...
قول انشالله

إرسال تعليق