.

.

ســـــلالــم للســــما  

Posted by: فاتيما in ,




هما يا دوب 
تلــت دعـــوات 
من ســــاعة ما عــــرفــتك 
وانا بقـــولهم ف اليـــوم 
 ييجــــى عشــر مــــرات .. وأكـــتر
 
يـــا رب 
وســـع رزقــه 
و حــــبب فيه خــــلقك
و احــــفظه من كــل شــــر




بقــــالى اهـــو 
اكـــتر من ســـنة و نــص 
تلت دعــــوات وانا بـــرددهم 
كل صـــبح و ضــهر وعصـــر وليـــل
بين صحـــيانى و نــومـــى 
زعـــــلانة مــنك او فرحــــانة
متخــــانقة معاك او متصــالحـــة 
واحـنا بنفـــترق او لسه بنقــاوح 





تلـــت دعـــوات و مفكــــرتش 
لمــــرة إتشجـــع 
و ازوّد علـــيهم الدعـــوة الرابعـــة 
و اطـــلب من ربنا ...
اننا نكــــون لبعــــض 
ونفضــــل ســــوا ومنبعــــدش 
و مش هقــــول معرفــــش ليه 
لأنى عــــــارفة  ...



عـــــــارفة ومن زمااااان 
ان الدعــــا حــــمامة بيضــــا 
بتشـــيل الأمـــنيات على جـــناحــاتها
وتطـــلع بيـها لســـابع ســــما
عشان تحـــطهـــا بســـلام 
على الباب ف إنتظـــار القبول و الرضــــا





ولهذا كنت لازم دايما وابدا 
اخــــلى بالى 
وانا بحـــّمل طــــيرى الامـــانة 
ان الشـــيلة ... تكـــون خــــفيفة  
طـــاهرة ... 
خــالية من الريـــاء
و بحاول ميتقّــلش وزنها الطــمع 
عشان الجـــناحات الرقـــيقة 
تقـــدر تتحــــملها 
وتســــافر بيهــا مســــافات لفـــوق


كنت حريصـــة و لا زلـــت
عشــــان وانا صــــغيرة 
مريت بمواقــــف صعبة خـــلتنى أتصـــور 
ببراءة العـــيال وعبـطــــهم 
ان ربنا مبيحـــــبنيش 
لأنى لما كنت بدعـــيله ف لحظات الخطر 
مكـــنش بيلحــــقنى و ينقـــذنى
زى ما كنت بستنى






كانت الحكاية غالبــــا بتقــــلب بغــــم 
ومـــرة ورا المـــرة ... 
بقيت أزعـــل منـــه 
وأخــــاصـــمه بجـــد 
وأبطــــل ادعـــيله 
عشان ... 
منا عــــارفة مســـبقاً 
انه هيســـبنى لوحــــدى  !!


لما كنت صــــغيرة 
كــــنت مش عــــارفة ليه ؟
وانا عملت ايه عشان استاهل دا !!!
بس لما كــــبرت شـــوية 
لقتنى بتحـــول من الزعل لغضـــب
لأنى اكتشفت انى كل ما احاول
اكون كـــويسة 
... يحصــــلى ع العكـــس 
شــىء مؤلــــم  أكـــتر
فيتراكــــم جـــوايا الغضـــب اكــــتر واكــتر



ومبقـــتش أســـتنى 
ولا اتمـــنى 
ولا أتأمل خــير 
ولا كــــمان ... بقيت أدعـــى




 
وشـــالتنى الايــــام  و حطــــتنى 
وعرفــــتنى اللى معرفتش اشوفه ... زمان
اللى مشـفتوش وسـط ضــــباب المشاكل
واللى خـــلانى بعدين أحــس
انى احـــسن من غـــيرى كتيييييير 




وان المصـــايب لما بتــنزل تــّرف
مش دايمـــا بتكـــون عــــقاب 
وان جــــايز يكـــون ربنـــا بيحـــبنى 
مش العكــــس 
بس انا اللى غشيمة  وخايبة
ومبفهمش الأشـــــارات والعلامـــات صح



 و ف عـــز ما المـركــب بتنقـــلب بيا 
ف عرض البحـــر وبصـــارع موجــه
وارد قـــوى انى العـــن القـــدر 
واخـــاف و ابـــقى منهكــــة 
و مقدرش استوعــب أى شىء





بس لما القـــى روحـــى بعد عــــناء 
على شـــط و لسه حـــية اتنفـــس 
يبقى ساعــــتها لازم افـــهم 
ان المحــن بيجيلها اليوم و تخـــلص 
وان ربنـــا ادانى بمنتــهى الكرم
... فرصـــة تانيــــة
وكـــام واحــــد ف الدنـــيا دى 
بتجــــيله ف حـــياته 
فرصــة تـــانية ؟!!




وانتـــا 
كنت النعــــــمة دى
لما شوفتك و عرفـــــتك
و حــــبيتك





و مكنتش فاهمة ليـــه 
بس كنت حاسة
ان ربنا قابلــــنا ببعــــض لسبب
لهـــدف 
لحـــاجة و هتنكشــــف
وكنت حاسة انها مسألة وقت 
مش أكــــتر



و لما كنت بدعــــيلك 
مكنتش أتصـــور
انك هتكــــون إشـــارة وعـــلامة 
و ان ربنا ممكـــن يكـــون بيســمعنى
وعاوز يجــــبر بخــــاطـــرى 
بيـــك  
وعـــن طـــريقـــك 


بعد كل الوقـــت دا ما بيننا 
وأى كان ما وصلنا اليه ف قصـــتنا 
.. لما ببصــــلك 
و بكتشف ان دعــــواتى الثــلاث ..
تقــــريبا اتحــــــققوا 
بحس لحظتها انى ممـــتنة
لرب العـــالمين من قلـــب قلـــبى




لما الاقـــى ان ممكن يكون رزقــــك
زاد و لو حـــتى شوية صـــغننة
و ان ربنا حـــبب فــــيك ناس وبشر اكتر
 من اللى كان يخطـــر ف خــــيالى
وان الحــــمدلله شـــر اعـــدائك 
بعـــيد لحد دلوقتى عـــنك
الاقينى بينى و بين نفســـى 
فرحانة لنفسى ..
وليك ..
و الأهــم انى فرحـــانة ان ليا خــاطــر
عـــند ربنا كـــدا !!!



وفرحانة اكـــتر لما الاقى ناس طـــيبة
فجــأة تبعـــتلى تقول انها رايحة عمــرة 
و تســـألنى ... عــاوزة ايه 
فأطـــلب بكســوف انهم  ...
بس يدعـــولك
فيدعـــيلك الكل بحماس حتى 
اللى .. ميعرفكـــش منهم غير بإسمك 
اللى بيسمعوه لأول مرة !!!


و افرح لأنى بكـــــتشف
بعد كل هذا العمر
ان ربنا مش زعــــلان منى
و اكــــبر من عشـــمى 
وانــه معــــايا 
و ســـامعنى 
و بيستجيب
عشان سبحــــانه
مطلع ع اللى ف قلــبى وحـاسس بيا


و عــــارف انى ف كل مـــرة كنت
بخلص الدعـــاء التالت 
ابقى اكـــاد اقـــول 
يا رب خليه نصـيبى 
ومتحــرمنيش منه
بس ف آخــــر ثانية 
 بتراجــــع 
واقــــول يا لســـانى ....
 أسكـــت 
و لأ


لأ 
 مش عــــاوزة اطــــلب 
لنفسـى حـــاجـــة 
قصـــــاد اللى بتمـناهـــولك 
وكــأنى عـــاوزة المقـــابل 
و يبقــــى للدعـــا غـــرض و تمن  
و الكريســــتالة الصــــافية ... تتخـــدش 




و كمان لأنى بحس
ان اللى عـــندى الحمدلله ... كـتير 
ولو طـلبت لنفسـى يبقى بَطَر فعـلاً


حتى يوســـف ..
مبقتش ادعى كتير زى الاول انه يرجعلى 
قــد ما بقـــول ربنـــا يحــفظه
ف مطــرحه
لأنى بقـــيت شــبه متيقـــنة 
ان ربنا باعــده عن حضـــنى
لأن دا الاحــسنله 
وانه اخــــتارله الأفضــل 
وهـــــوه أعلــــم بصالحـــه 



 بســـببك ... بقـــيت مطـــمنة 
ان ربنا بيســــندنى
و انتا يا حبيبى 
قصــــاد عينى .. اكـــبر دلـــيل



زمان الدعا عـــندى
كان رسالة متشالة 
على جـــناحات حـــمامة بيضا 
دلوقتى و بسببك
بقى عـندى كمان
ســـلم للســـما
 أشـــيل الامـنية على كـــفى
والحمــامة تيجــى تقـــف عـلى كـتفى 
تونســـنى و تحـــكى معـــايا 
طول السكــــة ف حكــايات عنك
و نطـــلع ســـوا لآخــــر سلــمة
و نسيـب الدعـا على عتبة الباب ... وننـزل
وأنــــا راضـــية واثــــقة
مطــــمئن قلـــــبى 



حــاســة ولامســـة وشــايفة 
ان ربنا مـوجود ف مكـان قـريب مـنى
مش سـايبنى ابـــدا لوحـــدى
واخـــد بخــاطـــرى
و عـــارف اللى ف قـــلبى 
و بإذنـــه و رحـــــمته و كـــرمه
انشـــالله دايمـــا
.............
هيوســــع رزقــــك 
وهيحــــبب فــــيك خلقــــه 
وهيحفظــــك من كـــــل شـــر 
و .............
...........................
اللهم آمــييييييييين

---------------------------------
----------------------------------------------
السلالم
تعرف رائحة الصاعدين
وتعرف خطو المقيمين والزاشرين
ولكنها فى صباح جميل كهذا
رأت وردة تتهجى بهاء المكان
وتحبو على الدرجات
رأت سيد العاشقين

محمد فريد ابو سعدة 
ذاكرة الوعل

-------------------------------------------


This entry was posted on الاثنين, سبتمبر 19, 2011 and is filed under , . You can leave a response and follow any responses to this entry through the .

67 كــــلام بيطــبطـــب عـــلى قــــلبى و روحــــى

:)
مش عارف اقولك ايه واتكلم عن ايه ولا ايه
اولا ربنا كريم ومفيش دعاء مش بيقبله سواء استجاب له في الدنيا او رفع بيه بلاء او حفظه لكي في الآخرة يمكن نفوسنا الضعيفة بتوسوس لينا ان ربنا مش بيستجيب نقوم مندعيهوش لكن بالعكس ربنا بيحب اللي بيدعيه وبيستجيبله باي طريقة من التلاتة اللي قلتهملك
ثانيا استغربت انك بتسمي انك تفضلوا مع بعض رياء بالرغم ان دعائك لربنا محدش بيطلع عليه حتى هو يبقى رياء ازاي؟ وواضح انك عايزة تفضلي معاه دايما و ده من كل قلبك يبقى ازاي رياء
فاتيما عيشي الحياة دوري على النور فيها شيلي اي غشاوة من على قلبك هتنكد عليكي وادعي ربنا كتير وكتير اوي علشان اسمه الكريم ومادام كريم مش بيرجع حد ايده بيرفعهاله صفر اليدين
دوري على ربنا جواكي هتلاقي حاجات كتير حققهالك و زي مانتي قلتي يمكن بعد يوسف عنك علشان ده احسنله يبقى تدعي ربنا انه يرجعلك ويكون معاكي احسنله
يمكن ربنا محققش دعوتك في وقت الخطر علشان ده احسنلك ان تمري بالتجربة دي اللي هتصنع شخصيتك وتشكلها
ربنا لطيف بعباده ورحيم بعباده فسبحانه
استمتعت اوي بالجانب الرومانسي اللي استغرقني فيه
ربنا يحققلك اللي فيه الخير دايما
وعلى فكرة انا صايم قبل الفطار هادعيلك وانا موقن ان ربنا هيستجيب

زمان الدعا عـــندى
كان رسالة متشالة
على جـــناحات حـــمامة بيضا
دلوقتى و بسببك
بقى عـندى كمان
ســـلم للســـما
أشـــيل الامــنية على كـــفى
والحمـــامة تيجــى تقـــف عــــلى كـــتفى
تونســـنى و تحـــكى معـــايا
طول السكــــة ف حكــايات عنك
و نطـــلع ســـوا لآخــــر سلـــمة
و نسيـــب الدعــا على عتبة الباب ... وننــزل
وأنــــا راضـــية واثــــقة
مطــــمئن قلـــــبى



الجزء ده
شبهك اوي
انتي اوي
انتي اوي في حكايتك معاه
دايما حكاياتك عنه
دايما متونسة بسيرته
ودايما راضية بيه
ودايما بتدعيله وتتمنيله الخير
ودايما انتي

البوست كله رائع
رومانسي كتيييييييييييير
وكم جملة فيه يخلوا اللي مش بيحب
يتمنى يحب

:)

مصطفى سيف الدين
---------------


ازيك يا مصطفى ؟

انا مش عارفة اشكرك على كل حاجة كتبتها
وع الدعوة اللى متشالة عشانى قبل الفطار ...
:)

بس هيا دى تحديدااا بقى
اللى بيخلينى مدعيش لروحى ...

عارف ليه ؟

عشان ربنا كارمنى بقلوب كتير بتحبنى
ومتكفلة بهذا واكتر


لو قولتلك من ساعة ما ابتديت المدونة دى كام حد دعا ليوسف وليا
ولو قولت الالاف الدعوات أبقى مش ببالغ ...
لأنى عارفة ان فيه ناس مبتقولش
وبتفاجىء بعدين بيهم

عارف لما تروح لقاء تدوينى وبالصدفة تلاقى انسناة جميلة زى إنجى (مدونة تكب لتحكى ) واللى ساعتها كنت بشوفها لأول مرة واذا بيها تقولى ان مامتها بتقرالى وبتدعيلى كل يوم تقريباً ....
وانا لا اعرفها ولا تعرفنى !!!

قيس على كدا قلوب كتير قوى
ربنا كرمنى بيهم
ومن سنين ...
بس انا مكنتش حاسة ولا عارفة

الكرم دا
بيخلينى اتلجم
وابطل أطلب لنفسى
عشان بحس انه طمع
وبزيادة قووووى
واقول حد غالى عليا ..يمكن
يكون اولى منى ..بدعوتى
وأعمل شوية م اللى بيتعمل عشانى

ولما بدور حواليا
بلاقى الإنسان اللى حبيته دا
ساعات كتييييير بيكون عندى أغلى من روحى
مش رومانسية ودلع او استعراض والله
دى حقيقة
لأنى اكتشفت ان وقت الزعل
مبعرفش
مبقدرش
مبينفعش أزعل منه
مبعرفش أفكر ف نفسى وكرامتى وبرستيجى ووضعى وظروفى والف حاجة ...
وميبقاش هوه اولا ..قبلى
ربنا بيحنن قلبى عليه
ولو ف عز ما المفروض اكون قاسية

المحبة دى
مش بالساهل
ناس بتعيش وتموت ولا تدوقش طعمها
وتحسها
او حتى تشوفها ....

عشان كدا دى نعمة
و انا بها احدث ...وبس


منحرمش منك
ومن دعواتك

:))

Baskouta
--------


الاول
وحشتينىىىىىىىىىى


ثانياً
مش هعرف أقول حاجة
لأنك أكتر حد كان بيسمعنى ويشوفنى
ويحس بيا


ثالثاً
عقبال ما تكتبى بوست كدا
عن مستر كوكيز
قريبا ان شاء الله


رابعا
ميرسى ع التعليق
كان مفاجأة حلوة
جدااااااااااااااااااااااا

خامساً
بحبك يا بسكــ♥ـــوتة
قلبى البمبى

أفتح كفوفي و أدعي ربنا الأعلى
لصحابي و لأسرتي ولناس كتير أغلى
ولما ييجي الدور عليا في الدعوة
ألم كفي و أقول "ماهياش مستاهله"
وعجبي
______________________
KING TOOOT

KINGTOOOT
---------
الله يا وليد !!!!!!!!

الرباعية دى
تحففففففففففففة
بجــــد

طب انا كتبت البوست دا ليه بقى
ما احط رباعياتك و خلاص
هيا إختصرت كل حاجة

:)

ربنا يخليك لأختك
يا رب

أزيك يا فاتيما

طب اقول لك ايه انا كنت على اخر البوست دموعى بتنزل

مش هقدر أقول أى حاجة

او مش عارف

ربنا معاكى دايماً يا فاتيما
و ينورلك سكتك

السلام عليكم
ربنا يستجيب كل دعائك ودا وعده لينا ( وقال ربكم ادعونى أستجب لكم ) وكمان النبى اخبرنا ان الدعاء بيستجاب فى كل الاحوال (بإحدى ثلاث )
ربنا يحقق لك كل امانيك ويقدر لك الخير دايما ويرزقك الرضا بما قدره لك
جميل قوى الحب بالشكل دا ربنا يفرح قلبك
دومتى بخير

لما اقول فاتيما ام قلب دهب
ازهري يتريق
:))

ده انتي الدهب نفيه
ربنا ميخيب لك ظن ولا يرد لك دعا
ده دعاء كانت دادة اللي مربيانا كانت بتدعيهولي لما تشوفني وانا بدعي
:))

ربنا يجعل لك كل الخير

قلبى اترعش مليون مره فى كل كلمه قولتيها يا تيما ربنا يجبر بخاطرك ديما وينولك اللى فى بالك

السلام عليكم
انا لما قريت البوست للاخر بصراحة لقيت نفسي انا كمان بتمني امنيه من ربنا انه يحققلك الدهوة الرابعة لاني بجد حسيت قد ايه انتي مخلصة بينك وبين نفسك قداك ربنا وانك مش بتفضلي مصلحتك الشخصية رغم ان دعوتك مفيهاش اي نوع من الرياء
ربنا يعطيكي اللي تحبيه
وتحياتي لشخصكم الجميل

ياريت كل القلوب زى قلبك يابطه
:)
طول البوست وانا بنقرا كنت حاسه بحاله رضا واطمئنان غريبه وكأن قلبك اتنقل فى ضلوعى بكل اللى فيه
وابتسامه حلوه كانت ماليه وشي
البوست ده ناااااااااااعم قوووووووى
عارفه احساسك لما تلمسى حاجه ناعمه قوى ؟؟
انا مش عارفه اتكلم بجد وحاسه انى بخرف بس مش عارفه برضه اوصل احساسى

اسمحى لى ادعى ربنا بالدعوه الرابعه

يارب ياكريم يارحيم جمع بين فاطمه بنت حواء وادم وحبيب قلبها على خير وريح بالها وقلبها بعطفك وكرمك وجودك ياارحم الراحمين يارب العالمين
ورد لها يوسف زى ما رديت سيدنا يوسف لسيدنا يعقوب قاااااااادر ياكريم

بحببببببببك

مش عارفه اعلق على اني جزء لاني البوست كله حلو اوي
تقبلي مروري وصداقتي

فاتيماااااااا


لما اقرا لكى حاجات جوانيه اوى افكر كده مع نفسى واقول معقول يارب هو فى ناس كده قلبها مليان خير اوى كده ....
كنت باتعجب لما ادعى لربنا دعوه ومش يحققها فى وقتها او حتى بعدها بشويه لكن لما بدات اقرا اكتر وافهم اكتر عرفت انها حكمه من ربنا وتمنيت ان كل دعواتى تتاجل ليوم القيامه لانى اكيد هاكون فى عرض دعوه منهم ...

فى جزء فى البوست قراته 5 مرات وفى كل مره اقول هو ده انا هو ده ؟؟؟ استغرب واستعجب واقول شكلها كده تقصدنى انا

بصى بقى هاقولك على سر ان اول دعوه ليا لما شوفت الكعبه مش كانت ليا وكانت لحد غالى عليا اوى واتفقت معاه انى يوم ما هاسافر هتكون اول دعوه له هو وبعدا ما انتهيت من العمره اتصلت قولت له يا اسلام " ده اخويا على فكره عشان ماحدش بس دماغه تروح لبعيد " قولت له اول دعوه كانت لك انت وبنتك مش مهم ادعى لنفسى لانى لما بادعى لغيرى فى ملاك بيقول ولكى مثلها ^_^ شوفتى بقى انى طماعه

ربنا يحقق كل دعواتك اللى بينطق بها لسانك واللى بيحس بها قلبك واى دعوه تيجى فى بالك ربنا يحققها لكى

مش عارفه اقولك ايه غير جمله باعشقها بتقول
" احلم بيوم جميل لم يأت بعد وسوف يأتيك فيه تعويض السماء "


زهــــراء

والله العظيم
انا بقرأ البوست وبعيط
وبدعي

يارب
حفف الامنيه الرابعه

نفسي تتتحقق ليكي بجد

طمنيني عليكي
عوزا اطمن عليكي

إيه الرقة دى كلها !!

فعلا أروع حالات الحب اللى بتبقى مش عايزة من المحبوب حاجة ..

ودى درجة حب ربنا لينا.

ربنا بريح قلبك ويفرحك دايماً :)

البوست أبكى قلبي :'(

زي ما قال رامي:
"مش هقدر أقول أى حاجة

او مش عارف

ربنا معاكى دايماً يا فاتيما
و ينورلك سكتك"

بس خلاص، الأربع دعوات دول بقوا أساسي عندي و أنا ساجد في الصلاة.

السلام عليكم
هو فيه ايه بالظبط؟؟؟؟؟
كل مااكتب الكومنت على باقى الموضوع يحصل حاجه ومايوصلش
اشمعنى الكومنت اللى على الصورة بس وصل؟؟؟؟
انا كده هشك انه فيه مؤامرة على الكومنتات بتاعتى من الفلول
من امبارح مش عارف اكتب كومنت يااخواننا

تنهيـــــــــــــــــــــدة
سبحان الله فى كل مرة كلامك بيعمل جوايا حاجة غريبة
زى ماتكونى دوا
او حبة هوا
..
ربنا يحققلك امنياتك ويستجيب لدعواتك ويجعلك اللى فيه الخير دايما يارب
..
فاتيما.. افضلى اكتبى على طول
اوعى تبطلى كتابة

ياااااااااااه على جمال البوست ده
مش عارفة خدني من حالة عشق متناهي و ايثار الحبيب على النفس لثقة في الله سبحانه و تعالى لاطمئنان بانه عالم بحالنا و حاسس بينا
لقيت نفسي بحط معاكي الحمامة على كتفي انا كمان و بشيل امنياتي برقة و اطلع على السلالم و احطها على عتبة الباب و كلي ثقة في الله سبحانه انه هيعمل الافضل
ما بين ابتسامة على وجهي و تنهيدة و دمعة في عيني قريت البوست بتاعك
بجد بجد ربنا يريح قلبك و بالك و يكتب لك كل الخير و يرضيكي دايما و يملا قلبك بالطمأنينة و يحفظلك ابنك
و يوسع رزقه و يحفظه من اعداؤه و يحبب فيه خلقه و .... هدعيهالك انا :)
تحياتي لقلبك الابيض

:)
مش عارفة أعلق غير بالابتسامة دى

بس هى جميلة اوى ياطمطم ورايقة وتحسى انك شايفة الحمامة البيضا والسما الصافية والسلالم

عجبنى اوى مع انى كنت معترضة فى الاول انك عايزة الدعوات توصل للسما فبتحرمى نفسك من دعوتك انت علشانها
لكن ادعى ياطمطم ياحبيبتى وكل شىء بقدر ووقت وميعاد

أنا مبسوطة كمان ان جو البوست بعيد عن المحدش :)

انتى عارفة بقى ان الدعوة الرابعة دى شغلتنا احنا ..ماتقلقيش

أنا اخدتها من امبارح فيس بوك

أنا الحمد لله كويسة جدا ياحبيبتى وماما وكلنا الحمد بخير
كنت مشغولة بس فى رجوعنا المدارس مع الاخ فيس بوك اللى شافط وقتنا
ساعات ببقى مش مركزة مع الموبايل معلش
تسلمى ياطمطومة ياحبيبتى :)

المدونة دي لسه عظيمة كده ورقيقة زي ما هي
ربنا يحميكي

يمكن انتي لأسبابك مش عاوزة تكملي الدعاء ده عشان ماتحسيش فيه برياء أو طمع ويمكن انتي مكتفيه ومش عاوزة تتقلي أجنحة الحمامة الرقيقة

لكن في قلوب تانيه هاتتمني لك ده بإخلاص يا فاتيما وهاتحمّل أجنحة طيورها البيضا الأمل الصغير ده .. ربنا يحققهولك :)

Lyssa

شقيقة الروح

ادعوه يستجب لكم
ونعم بالله .. مجيب المضطر اذا دعاه

صديقتي افتقدك جدا .. اوجعتني حروفك
اشعرتني انني بلا مناقشة انانية جدا ووغدة احياناً هههههههه
لانني غالبا ما ادعو بالدعاء الرابع واصر والح واكرر وابكي
ثم اصاب بالصمت ايام طويلة لا ادعو بأي شيء حزناً والماً

انتِ جميلة جدا فاتيما .. ربنا يستجب لكِ وان شاء الله سأدعو لكِ وله بظاهر الغيب ان يجمعكما على خير ويرضيكما ويرضى عنكما

حضونات وسع السما
:*
3>

حاسة إن البوست دا مكتوب من جوااا أوى .. من أبعد حتة فى قلبك

حبيت حالة ال _ مش عارفة اسميها ايه _
بس ممكن اقول السلام النفسى .. لما اتكلمتى عن يوسف وشكل دعوتك ليه :)

عاجبنى البوست جدا بتفاصيله الصغيرة اللى طالعة من قلب كبير

الدعوة الرابعة .. ربنا يكتبلك الخير فيها
يارب .. :)

فاتيما
روح القلب الملائكية

يا اللى بتبحث عن اله تعبده
بحث الغريق عن اى شىء ينجده
الله جميل و عليم و رحمن رحيم
اجمل صفاته و انت راح توجده
عجبى ؟؟؟

انت مش محتاجة ان تدعى انتى ترفعى ايديكى بس للسماء بدوا اىسلالم و الرحمن العليم الذى يعلم ما تخفيه الانفس و الصدور
اما من يحمل الدعوة فهم الملائكة لان روحك ملائكية
معلش يا فاتيما لتأخيرى عليكى لكنها الظروف
ربنا يخليكى و يحفظ لكى شريف و يهدى بالك

الغالية ام يوسف
اغيب وارجع الاقى ام قلب جميل كاتبة احلى كلام
ربنا يتقبل كل دعواتك اللى بتقوليها واللى جايشها
ويتقبل دعواتى ليكى كمان
وحشتينى وبوسات وحضونات كثير

Ramy
----

معلش يا رامى
اعملك ايه وانتا ر ر طيب ؟!!!!

ميرسى ع الدعوة
منحرمش منك ابدا

مدونة رحلة حياة
---------------

وعليكم يالسلام يا ابو معاذ
أزيك ؟

وربنا يستجيب ان شاء الله
مظنش ان الطريقة تفرق
قد ما يفرق العشم

والحمدلله عشمى لا ينقطع
او بمعنى ادق
مبقاش ينقطع .. زى زمان

خالص ودى ليك
ولك الجمهورية ف الجروب الحلو بتاعكم

شمس النهار
---------

ربنا يخليكى ليا يا شمس نهار المدونات
وقمرها
والدعوة بتاعت الدادة
بتاعتك حلوة قوى
ربنا يجعلها من حظ كل حد ونصيبه

بس حد كويس
مش ظالم يعنى
:)


الواد ازهرى انا قلقانة عليه
بس مقدرة حالة الـ هه
على رأى ستوتة


بوسيلى البنات
والحفيد الجميل

richardCatheart
---------------

وحشتينى يا قطاقيطوووو
وعارفة ان البوست هيلمس حاجة جواكى ...
الله يخربيت الحب وسنينه

ربنا يسعد قلبك
وينولك اللى ف بالك انتى كمان
سلامى للحاج ريتشارد الغالى
بوسيلى مروان وميرهان
وحشونى والله

beautiful mind
--------------

وعليكم السلام


و الف شكر ليك على شعورك الطيب
ودعوتك الاطيب


نورت المطرح يا فندم
:)

عاشقة الرومانسية
----------------

لو انتى اللى متككتبيش التعليق دا
أومال مين اللى يكتبه ؟!!!!

مبسوطة جدا
ان التدوينة عجبتك
انا فعلا كتباها من قلب قلبى
ومن زمان كنت ناوية
بس جه وقتها لوحده بقى
فحصل
:)

دعوتك حلوة قوى
صياغة وروحاً وكل حاجة

منحرمش منك يا قطتى
أبدااااا

انا كمان بحبك يا عروسة البحور

ريرى كربكه
---------


ميرسى يا ريرى
والحمدلله
ان البوست خفيف ع القلب
عكس ما كنت اتوقع ...
:)

لولا وزهـــراء
-------------

أيوه انتى دى يا ذات الوجه المشرق
انتى ...
ومهندس مصرى ...
وكام حد تانى
مهندس مصرى صديق مشترك هوه وناس تانية حلوة ..
لما بطلب منهم يدعوله ..بيبقى شبه مقبول وعادى لأنهم بيعرفوه ويحترموه ويعزوه بزيادة عشانه وعشانى بالمرة ..

لكن انتى
مكنتيش تعرفيه
ولا حاجة
ولما طلبت منك ف ساعة خوف عليه وكانت اوقات صعبة وحرجة فعلاً ...
وكأنك حبل واتمد
او شباك وانفتح
لأن ربنا كرمنى فعلا بسببك
والحمدلله كف أذى المؤذين عنه ...
ولو مؤقتاً ...
بس انا عشمى ان ربنا يحفظه من كل شر
طول الوقت ..ان شاء الله

وعلى فكرة
انا كمان طماعة زيك
:)
بس بقول ان اللى عندى فعلا كتير
بس لما اعقد مقارنة بينى و بين غيرى ف ظروف مشابهة واكتشف انى كان ممكن ابقى ف حالة بشعة و مرعبة وان ربنا رحمنى وكرمنى ولحقنى من مصير اسود كان ممكن اشوفه ....
بحمد ربنا واحس انه كفاية
وابتدى افكر انى مش محتاجة قوى لمساعدة اكتر ما فيه حد دايما غيرى حواليا محتاجلها ...
وربنا كرمه واسع والحمدلله
فبراحتى بقى
:)

بوسيلى لولا
واحضنيلى روحك

sony2000
-------

معلش يا سنسن
حقك عليا مقصدتش
بس معلش
الدموع احيانا بتريح برضو

انا ؟


انا كويسة
الحمدلله

متقلقيش عليا
وخلى بالك بس من نفسك انتى يا بنتى
ومتشيليش همى كفاية اللى عندك ..
وانا كويسة

الحمدلله

candy
-----

لا رقة ولا حاجة يا كاندى
انتى اللى قلبك بيقرى
بنضارة الرقة
لأنك كدا

:)

ميرسى ع الدعوة الحلوة

Nour Sherif Mohammad
--------------------


تعليقك ....
حلو قوى يا نور
انا مش عارفة ارد ...
بجد


منحرمشى منك

انا مش عارفة بجد أرد

المعتصم
------

وصل اهو يا معتصم
مفيش حاجة يا جدع
ولا تستجرى المدونة تتجاهل تعليقاتك
دنا اقفلها بقى ..
وانا بتلكك
:)

حمدلله ع السلامة

sara adel draz
--------------

ميرسى يا سارة
ع الدعوة
وع التشجيع الحار دا
لنكش فراخى اللى بكتبه
و على أى تعليق ليكى هنا


وان شاء الله
نكش الفراخ الجاى
غالباااااا
خطاريف 10 او يوسفيات
ايهما أقرب
:)

افكار مبعثرة
------------

ميرسى يا افكار
على كل كلمة ف تعليقك
اللى حسستنى ان اللى كتبته واصل
و محسوس وفارق ...
وكمان بيترد عليه ...
بلى مكنتش منتظراه بجد ...
وهوه دعواتكم يا حبيبتى


منحرمش منك

حفيدة عرابى
----------

الحمدلله انك بخير يا فيدو
وماما والكل
وانه انشغال مش اكتر ...


وحشتينى


و تعرفى بقى ان تعليقك
وتعليقات الناس الحلوة خلتنى أفكر
ان البوست دا كان لازم أسميه
الدعوة الرابعة ...

:)

old friend
----------

انا حاولت بالحيلة كدا
وبقراية تعليقك عند المراكبى
وعندى هنا ...
وبالرجوع للعداد بتاع المدونة
اخمن انتا مين ...
واتصور وازعم انى عرفت

وعاوزة اقولك ان آخر حفل توقيع حضرته
كان اسمك بمجرد ما يتردد الكل يبتسم ويفتكرك بالخير ....


مش هقولك شكرا على رأيك
عشان لو انتا مش شايفنى كدا
هزعل من نفسى قوى لأنى بقيت حاسة ان احوال البلد خلتنى عصبية وغجرية وعنيفة وكل حاجة ف الإتجاه المعاكس لأى رقة خالص ....

:)

ترجعلنا بألف سلامة
مجبور الخاطر
ان شاء الله

Lyssandra
----------


ليسا
انا فرحااااااااانة جدا
بالتعليق دا ...
لأكتر من سبب
اولهم
انك ف صفحة تعليقاتى وليكى وحشة
تانيهم
ان تعليقك حسسنى انك انتى الحمامة دى اللى واقفة على كتفى ....
تالتهم
تعليقك ف البوست دا تحديداً
فارق معايا قوى
.. معرفش ليه
بس يمكن لأنى لما قريت آخر حاجات انتى كتبتيها حسيت بوجع ف القلب معرفتش بعده أكتب أى حاجة ممكن أطبطب بيها عليكى ....


ورابعا
انك وحشتينى يا رقيقة

ربنا يسعدك ويريح قلبك يا حبيبتى

rainbow
-------

لا انانية ولا وغدة ولا حاجة
انتى يمكن او أكيد عشمك ف ربنا اكبر منى ....

حد غالى عليا لما قولتله زمان انى ساعات بتكسف ..
ودا بجد
بتكسف اطلب من ربنا حاجة
هوه وقتها قالى نظرية جميلة

قالى ان اللى معاه الف جنيه
لما انتى تيجى تستلفى منه مثلاً ..
هتطلبى كام ...
عشرة ..مية
يا دوب
لكن لو واحد معاه مليون جنيه ...
هتطلبى منه كام ؟
الالف هتفرق معاه او العشرتلاف ؟

طب لو ملياردير
هتفكرى تستلفى منه كام ؟!!!


طيب نيجى بقى لربنا سبحانه
وهو الغنى ...
تفتكرى لما تيجى تطلبى
أى طلب ...
هتفرق معاها وهيبخل عليكى وهوه الكريم ؟!!!

قالى ساعتها ...
اطلبى يا فاطمة منه
ومتخافيش


بس انا رديت عليه
بإنى مش خايفة يترد طلبى ويترفض
انا خجلانة ..مش اكتر

ينفع حد يطلب حاجة وهوهو واخد كتييييير قوى قبل كدا ؟!!

ساعات كتير اللى قدامك بكرمه ...
بيخليكى تحسى انك مينفعش تطلبى تانى والا تبقى بتستغلى الكرم دا ...

معرفش
هيا مشكلة فلسفية
او معرفش ايه وليه ...

بس زمان قريت حديث قدسى فيما معناه ان ربنا بيخلى الأشياء تسعى للإنسان ..بامره سبحانه
انما لو الواحد قعد يجرى ...
ممكن قوى ميحصلهاش..
لأنها مش نصيبه ..

ولو نصيبى ف شىء
هشوفه


انا رغيت وخرفت ...
معلش

انتى كمان وحشتينى
و وحشنى اتكلم معاكى ...

بوسات وانا كمان وحضونات
قد نجوم سماكى الواسعة
:)

Sarah..
------

دى حقيقة يا سارة
انا كتبته من جوا قلبى
لأنى عايشاه بكل تفاصيله
ولامساه جدا
و لماشوفته حقيقة بتتجسد قصادى
مكنش فاضل غير انى اكتبها
ف جمل وعبارات

عشان اقول الحمدلله
بشكل ما

ميرسى على ذوقك
و كل كلمة حلوة انكتبت
ف تعليقك الاحلى

ابراهيم رزق
-----------


اولاً
انتا تتاخر زى ما تحب
دى مدونة اختك وبراحتك
المهم انك بخير


ثانياً
بفرح جداااااااااا
لما ساعات تكتب اسم شريف
بدل اسم يوسف
بحس ان انا وخيخة اخوات
ويوسف وشريف ولاد خالة ..
وانتا بتنده دا بإسم دا ساعات ..
:)


ثالثاُ
بشاطر خيخة الأعجاب بإختيارات
لصلاح جاهين بلى يليق ع البوست


رابعا

انا فعلا ساعات اقول
ليه ادعى وربنا مطلع ع المخفى
وما ف الصدور
ساعات
اقف ف البلكونة كدا
وابص للسما
واعيط
ومقولش حاجة خالص
وافتكر الجملة دى :

حالى يغنيه عن سؤالى

واسكت


خامساً
سلامى لساليناز القمر
وانا بخير متقلقش عليا

أم مالك
-------


حمدلله ع السلامة
يا غااااااااااااااااااالية

مش عارفة اقول
غير انك وحشتينا كلنا
ووحشتنا تعليقاتك
اللى بتحضننى أنا شخصياً
زى ما عمل التعليق دا


يا رب تكونى دايما بخير
والحفيد الغالى ف أحسن حال
يا رب

انا كمان بوسات وحضونات
كتيييييييييييييييييييييييييييير
قوى

انتى رقيقه كده ازاى

وازاى انتى شفافه كده يا طماطم

اكيد ناس كتير قوى قالولك

انك حلوة قوى قوى

بس انا فعلا عاوزة اقولهالك انتى حلوة قوى

وقلبك حلو قوى

ومشاعرك دافيه وصافيه ونقيه ومجنونه وحلوة قوى قوى

وعلشان كده انا باحبك يا تيما

لا هو انا بصراحه باموت فيكى

انتى مش هتدعى لنفسك بس انا هادعيلك

ربنا يسعدك ويفرحك ويبارك فيكى

ويقر عنيكى وقلبك بكل حاجه بتحبيها

يا بخته يا ستى بكل الحب والحنيه دول

المفروض يمسك فيهم بكل خليه فى جسمه

انتى عامله ايه يا غاليه ؟ وحشتينى قوى يا ست الستات

ربنا يستجيب دعاكي يا رب لكل اللي بتحبيهم .....

انتي طيبه على فكره وكده ماينفعش :((

وارد قـــوى انى العـــن القـــدر

الجملة دى بسجل لشخصكم الكريم اعتراضى عليها

غير كدة انتى دايما رائعة فى مدونتك رائعة وفى احساسك رائعة وفى كلماتك رائعة وفى الحقيقة اروع و اروع

انتى ربنا بيحبك يا فاتيما
بحب الناس دى كلها ربنا بيحبك
بعتلك الناس دى كلها عشان يقولك انة بيحبك
الله يديم عليكى المحبة دى يارب
ويحفظك ويحفظ يوسف من كل سوء
وحشتينى

ربنا كريم وقادر انه يسعدك ويرجع ليكي كل اللي بعد عنك وممكن يزود غلاوتك في قلبه ويرزقك الصبر على كل اللي بتمر بيه ويرزقك اللي يسعدك ويحلي دنيتك
فعلا الانسان بيحس بفرح كبير وهو بيدعي لحد غيره وبيفرح اكتر لما تتحقق دعوته
تحياتي

ليس فقيرا من يحب
--------------


ايه دا كله يا رانيا ؟؟!!!

انتى يا حبيبتى اللى بتحبينى
وشايفنى بعيون المحبة
محدش حلو قوى كدا
بس فيه حد تقابليه
فتلاقيه بيطلع منك اللى متتصوريهوش
حد يحسسك انك عاوزة تكونى أحسن
عاوزة تكون كويسة
وطيبة
ورقيقة
عشان تعرفى تحبيه كويس
تعرفى تعرفيه ازاى انك بتحبيه
تعرفى حتى لو مكنلكوش نصيب ف بعض
انك متحسيش انك كنتى تقدرى تعملى حاجة
ومعملتيهاش

حكاية يمسك فيه دى بقى
معرفش
زمان كتبت عند المراكبى
ان اسطورية الحب الحقيقة جاية من عدم اكتماله
يعنى اغلب المحبين ف التاريخ
حبهم كان رهيب واتخلد
لما مقدروش يعيشوا مع اللى بيحبوهم
خيالهم اشتغل وصور سعادات زيادة
يمكن واكيد مكنتش هتتحقق ف الواقع

بس الرأى دا على قدر عقلانيته
على قدر مانا مش شيفاه واقعى
لأن الدنيا ربنا خالقها عشان نعيشها
مش عشان نتخيلها
او نتفرج عليها
لما بننزل للواقع
طبيعى تلاقى الإنسان اللى بتحبيه
عصبى شوية
بارد شوية
انانى شوية
زهقان منك شوية
عيوب ...
هتلاقى عيوب ف شخصيته زى أى بشر
المهم ..
هتتحمليها زى ما هتتحملى محبته واهتمامه بيكى ف الاوقات التانية
ولاّ لأ
انتى كمان ...
فيكى عيوب زى كل الناس
هوه هيقبلك ويفضل يحبك بيها
ولاّ لأ

دا من وجهة نظرى الحب الحقيقى
ان اتنين بعد كل ما يعرفوا عيوب بعض ونواقصها ...
يفضلوا سوا
ويفضلوا عاوزين يكملوا الحياة سوا
بكل ما فيها ....

رغيت كتير انا
معلش بقى
اعمل ايه
بتوحشونى وبيوحشنى الكلام معاكو

ربنا يسمعنى عنك دايما
كل خير يا حبيبتى

فتاه من الصعيد
--------------

ميرسى يا فاتى
وانتى بالذات لو تعرفى الشخص اللى بدعيله يكون مين ...
مش هتكشرى كدا
وهتقوليلى مبطلش دعا ...

منحرمش منك يا حبيبتى
وعودا حميدا للمدونة ..

نبض اسكندرية
-------------

ازيك يا أسماء

واسفة لو جملتى ضايقتك
بس يا حبيبتى انا لا أروج لهذه الفكرة
انا بس بوثقها لأنى مريت بيها
للأسف كتير

كان فيه لحظات
خصوصا وانا صغيرة أكتر
عن ما كنت كبيرة
كنت بطلب فيها من ربنا بلحقنى
كنت بكلمه وكأنه ماما مثلاً
او مدرسة بحبها جدا ...
كنت بستنجد بيه بكل ما فى الكلمة من معنى
وكان الألم برضو بيحصل
رغم انى كنت بحاول اكون كويسة

ومكنتش بفهم ليه مبيساعدنيش !!!

لما كبرت
مريت بشوية مصايب جت ورا بعضها
بشكل مزعج
لو كانت جاتلى لوحدى
كان ممكن استوعب انها عقاب ولا حاجة
بس لما كانت بتتضمن يوسف مثلا
كنت بتجنن واحس انها موجعة اكتر مما أحتمل ....

بس كله الحمدلله راح
واستوعبت خلاص
بس الحكاية كانت عاوزة وقت يمكن

ومش بلعن القدر دلوقتى أكيد
لأن القدر مكتوب بأمر ربنا
ولو هلعن شىء
فعلن نظرتى الضيقة اوقات
عشان مبفهمش ..
اللى بيحصل دا بيحصل ليه ...
بس

انما خير
كله خير ...
والشر مستخبى فيه الخير ...


انتى كمان وحشتينى والله
وعاوزة أعلق عندك ف آخر بوست
واقول كلام كتيييييييييييييير قوى
محوشاه
وهروح حالااااااا اعمل كدا
بعد ما اخلص رد على اسامة الطيب ...

eng-semsem
----------


فعلا يا أسامة
الواحد لما بيعمل حاجة لحد تانى
المفروض يكون سعيد
وحاسس بالقوة كمان
لأنه بيعملها
وهوه عارف انه مش مستفيد منها
يمكن عشان كدا
لما بنعمل التبرع بالدم
او بؤجة الخير صيف وشتا
وبنروح ابو الريش ف رمضان
الواحد بيبقى حاسس بفرحة كبيرة
وبيبقى متحمس جدا وكأنه رايخ ياخد حاجة
مش يدى حاجة ....

متهيألى المسألة فعلا كدا
ربنا بيكافئك
ويحسسك انك كسبان
حتى لو مفيش شىء ملموس

تخيل دا كله مع غريب


اومال لما يكون مع أقرب الناس ليك
وربنا ميخذلكش ...
يبقى احساسك ايه ؟

الحمدلله

حمدلله ع السلامة
والمرة الجاية نشوفك
ومعاك المودام بقى ...
بحكم ما سيكون ان شاء الله

انا سعيدة بمعرفتك والله
اسكندرية دايما وشها حلو
وناسها احلى

البوست ده

ماشى قوى معه الغنوه دى


http://www.youtube.com/watch?v=W4uylrbCGqM

Ramy
-----

يا غالى
انتا بتكتب الكلام دا
وانا عندك كنت بكتبلك تعليق

القلوب عند بعضيها

حلوة الغنوة
اصالة ليها اغانى حلوة قوى
بس تخيل انى مبحبش غير النكد بتاعها
و بس
يعنى مثلا

نص حالة
عادى
وفات الوقت
حكاية
سنين


بإختصار
كل ما ينتمى للغناء
الحزاينى والنكدى والكئيب
ويمكن لأن أصالة بعد جوازها التانى
بقت فرحانة وسعيدة ومنشرحة كدا
مبقتش أفتاعل معاها قوى
لأن حالة الشجن اللى كانت عندها اختفت من غناها وصوتها ...

فبقيت اقول كمستمعة
يعنى نحطم سعادة الست
ولا نستعوض ربنا ونسيبها تهنأ بالسعادة العائلية والأسرية والعاطفية وخلاص ...

فإخترت الطريق التانى

ربنا يسعدها
يلا
اى حد يتنيل ينبسط
مش هنبقى كلنا مبتئسين يعنى
ومحطمشين عاتيشفيا كدا

موشكرين يا ر ر

فاتيما ..انا باحبك قوي ...قلبي بيدعيلك بالخير ..انا في انتظارك ..حبي ودعواتي بالخير ..

وحشانى يا ارق طمطم :)

عارفة يا فاطيما
يمكن اللى بيخليكى متدعيش الدعوة الرابعة دى
ان عندك يقين بأن الخيط اللى رابط بينكوا هيقوى مع الايام وان ربنا هيحققلك اللى بتتمنيه
عشان فيه حاجة رابطة بينكوا
فمش بتملى من كثرة الدعا وبتدعى من قلبك وانتى حاساها
بقينك بربنا وبالحب اللى جواكى يخليكى تعملى كدا من قلبك
بس لما يكون مفيش رابط وان الخيط مربوط فى طرف واحد بس وبتدعى ربنا من قلبك لمدة سنة ونص عشان عندك أمل ان حاجة حلوة تحصل
ولمدة سنتين بعدها بتدعى بردو وانتى شايفة الخيط بيتربط بين طرفين تانيين ولسه بتدعى بردو بس من غير احساس
عشان اللى جواكى انتى عمره ما هيتغير رغم ان مبقاش فى أمل ان الحدوتة دى تكمل
بس دلوقتى بطلتى تدعى او يمكن قل شوية عشان القلب خلاص اتقفل بس اتقفل عليه وهو لسه جوه
انا سبتها لربنا لانى مبقتش شايفة اى نور


وحشتنى خطاريفك أوى

انتى أحد الناس القلائل اللى تدعى و إحنا نأمن وراكى و احنا مغمضين :)

ربنا ينولك اللى انتى عاوزاه يا فاطيما و اكتر....امين

zizi
----


انا ممتنة لمشاعرك دى يا ست الكل وعلى راسى من فوق ...

ربنا يقدرنى
واكون عند حسن ظنك
وان شاء الله اكون عندك قريب
ان شاء الله

نورتينىىىىىى

مى
---

وانتى اكترررررر يا اوراق الورد
انتى فيييين
وحشتينا كلنا والله

يا رب تكونى ف احسن حال
ومشغولة عننا بالخير والهنا يا رب

غير معرف
-------

مش عارفة قولك ايه ؟!!!

بس يمكن

معرفش

بس اللى متأكدة منه
ان القلوب بإيد ربنا
ف ول الأمر وآخره

وهوه عالم بلى ف قلبى

ربنا يريح بالك انتى كمان

والخطاريف حصلت ووصلت
ف البوست الجديد

اتمنى تعجبك

اياكش تولع
----------

اهلا يا دكتور

وحشتنى والله
ووحشتنى تعليقاتك الحلوة

بجد

ويا عم لو ع الدعوات
أدعيلك بقى
ربنا يفرح قلبك
ويذهب همك
ويكتر عيانينك قادر يا كريم
بس بشرط
تخففهم وبلاش إفترا وكدا

وش بيضحك وبيغمز وبيتوعد فى آن واحد معرفش ازاى
!!!!!


نورتنى والله
وسؤالك عنى كدا كل فترة
بيطمنى على غلاوتى عندك

ربنا يعوض صبرك خير وعلى قد الوجع بتيجى الفرحه "ولسوف يعطيك ربك فترضى"

إرسال تعليق