.

.

مـظـنـــــش ...  

Posted by: فاتيما in

ـ


أزيكـــــم ؟
 
إيـــه ...
زعــــلانين ؟
محــــبطين ؟
قرفانين و تعبانين؟
مجـــهدين و مســتنزفين ؟
داخــــلين على دور اكــــتئاب ؟
حاسـين ان خلاص مفيش فــايدة ؟
و بعد ما نضـفت رجعوا نطــوا عليها الكــــلاب ؟
شايفنها بتخــــرب ؟
إيدكــــم مغــــلولة ؟
نفســـكم قــد أوشـــك ينقطـــع ؟
مرعـــــوبين ؟
محـــدش فاهـــم حـــاجة ؟
و مين معـــاها و مين عـــليها ؟
مصــدومين ف أشخاص ومبادىء و كيانات ؟
ومحدش قادر يخـــمن بكـــرة إيه ؟؟

طـــــيب 
أقولكــــم حـــاجة
 الاول ... 
بصـــــوا ع الصــــــورة دى



فاكــــرينها ؟


فاكـــرين تاريخـــها
و كانت ف أنهــى شــارع ؟
فاكــرين اول مرة شوفنا الفـــيديو بتاعها ؟
فاكــــرين الجــــدع دا ؟
فاكــــرين خــــوفنا علـــيه لحـــد لما 
كمـــلنا المشــــهد لنهــــايته ؟
فاكــــرين مشــاعر الزهـــو اللى سببهــلنا ؟
فاكـــرين الامــل اللى زرعـــه فينا ؟
فاكـــرين كم الشجاعة اللى ضخــها ف عـروقنا ؟
و فاكـــرين كم الطـــمأنينة اللى بيها 
الولد دا خلانا لأول مـــرة و من عمـــر 
نستشعر ... ان بكـــرة الجـــاى 
ممكــــن يكـــون بتاعــــنا احــنا
و مش بتاعـــــهم  ؟





فاكــــرين لما أغـــــلبنا
بعد ما شــــاف هـــذا المشهد 
إزاى تيقــــن ان ربنا مع الثــورة دى 
وحافظــــــها 
و ازاى كرم هـــذا البـــلد
بشـــباب و رجــــالة و بشـــر كتير زيه
حـــريتهم وكــــرامتهم 
عندهـــم اهـــم من الحـــياة نفســـها 
 الموقف كـــان تثبيت للقلـــوب المهزوزة
 كـــان زيادة إيمان بربـنا قبــل إيمان بنفسنا 
و كــان مــــدد ربانى
بطــعم اليقــــين 
فاكـــــرين؟ 



ولهــــذا كـــلامى الآتـــى  
لكل اللى محـــبط من الحاصـــل 
وللى هيستسلم لليــــأس 
وللى خـــــايف م المجــــهول
وللى حاسـس انها إتخطــــفت
وللى بيشــارك ف كل وقـــت 
وللى بيتفــــرج طـــول الوقـــت
وللى ملـوش ف الثــورة وكارهـها لله ف لله 
وللى بيحــــاربها عشان مصالحـــه 
وللى لا فـارقة معــاه وياكش تولع 
وللى فاكـــرها لقـــية وقعت ع الحجـــر
و بيستعــــد عشان يغـــرف
و للى عاشقـــها صـــبابة ومغـــرم 
وللى بيحـــبها بالعقـــل و بس
وللى بايعـــــها ...
و للى بيجــــيلها ضــــيف يتفسح
وللى ف البعــد عنها بيمــوت كــل ثانية
وللى دمـــه معجــــون بطـــينها
و للى عايش فيها عشان يحلب لبنها 
وللى بيدفــــع فيـــها ومبيخـــــدش
و للى مستنى يحصد زرع غـــيره 
و للى إتعود ع الذل وبقى كيف 
وللى حـــالف ما يحنى راسه تانى
وإنشـــالله يقطــــعوهـــا
للى و للى و للى ...




يا كــــل اهلها ....
احــــنا عمـــلنا الأصــــعب 
لا خـــططنا ولا حــسبناهــا 
ولا فكـــرنا كــــتير 
بس دفــعنا الـــدم 
و قررنـــا نسترد تمنه ... كرامـــة وحـــرية
ولسه فــينا اللى مســـتعدين يدفـــعوا 
تــــانى و تــالـــت 
وعــاشــــــــــــر
وميحســــبوهاش حــتى 
لو شكلـــها هتطـــلع خســـرانة 
لإن عمــر الاوطـــان ما كانت 
ولا هتكــــون فـــرن أو مصــــنع أسمنت





 للى مش فــــارق معــــاهم 
غير المكـــسب
رافضــين يخـــسروا 
و صعبان عليهم يتحـــملوا ويشــــيلوا 
  للى فاكــــرين اســـقاط مبــارك وكــلابه
 كـــان اسهل من اسقاط ديوله 
وعاوزين يحبطــــونا
ويفهــــمونا انه كفـــاية و السكــة طويلة 
و صعــــبة و جـــدا و مستحــــيلة 




للغجـــــر دول 
يسمحــــولى أقـــولهم 
ان مكـــانهم مش هــــنا
لا معـــنا ولا وسطـــنا 
دول أحســـن ييجــــوا على جـــنب  
وبسكــــاتهم ينقطـــــونا 
عشان مش طالـــبة إحـــباط 
من اللى هــما أصـــلاًًً متحـــركوش م الاول 
ولا منتظـــر منهم يتحــركوا ف الآخـــــر
وقلـــتهم ...أكـــيد أحســـن




دول يسكـــتوا لأنهم فعـــلاً
غــــلابة قــــوى  
ومش قادرين مهــــما عـــــدى الوقـــت 
إنهـــم يستوعـــــــبوا
اننــــا إتغـــــــيرنا





اما اللى ....  خـــايف ومـرعـــوب
فيرجــــع يبـــص تانى كـــــدا
ع الشاب
اللى وقف قصــــاد العــــربية 
و عـــامل حــسابه انها هتفـــــرمه 
ومع ذلك ... مهمـــوش حاجــــة 
مترعــــبش
مترعشش 
ولا خــــفش على شـــبابه 
ونســى نفسه و ماضيه
و نسى دراسته وكلـــيته 
وشغــــلانة المســــتقبل واحــلامه
هواياته و حاجاته و البنـــت اللى بيحـــبها 
وابــوه وامــه واخـــواته 
وحـــياته كـــلها 
بس متأكـــدة ....
انه إفتكـــر حاجـــة واحــدة ساعتها
هيا
مصــــر




 هـــــل تفتكـــــروا 
و تظـــنوا 
ان هـــوه و كـــل اللى زيه 
هيرضــــوا
يســــيبوها كـــدا بعـــد ما لاقـــوها 
للضــــباع تانى ينهشـــوها  ؟!!!!



هـــــل تفتكـــــروا 
و تظــــنوا  ...
ان لما تيجــــى عـــربية تانية مصفحة 
توقــفه
هيخــــاف مثــلا
و يكــــش 
ويرجــــع للخـــلف 
ويجـــرى يستخـــبى 


ولاّ الحـــــكاية 
هتبقى أســـهل بكتـــير عـن الأول
وهـيقف تانى كـــدا زى الأســــد
بس أســـد بجـــد 
مش زى المبتلاة بيه ســـوريا ؟؟!!





للى معــــندوش اجـــابة 
و لسه هيفكـــر
 إجابتى أنا جــــاهــــزة 
وواضحــــة وضــــوح الشـــــمس



الســــؤال :
هل تفتكـــــروا 
و تظـــنوا ؟!!



الاجــــابـــة و ببســـاطة  
مظــــنش 


 
----------------------------------
------------------------------------

This entry was posted on الاثنين, سبتمبر 12, 2011 and is filed under . You can leave a response and follow any responses to this entry through the .

51 كــــلام بيطــبطـــب عـــلى قــــلبى و روحــــى

ازيك يا فاتيما..وحشاني و الله معلش أنا مقدرتش أجي تجمع اسكندرية عشان كنت لسة في القاهرة..أختلف معاكي في حاجة واحدة في البوست الحلو اللي كله أمل ده..ان الصعب عدى..الصعب لسة جاي يا فاتيما..و يا رب الناس تكون نفسها طويل و مستعداله

السلام عليكم
فاتيما
ازيك اخبارك ايه ويوسف عامل ايه
نيجى بقى للبوست
عجبتنى الداخلخ بتاعته بصراحة تحفة
وسؤالك الوحيد اللى بنيتى عليه البوست رائع واجابته واقع
عارفة لو سالتى كل اللى قلتى عليهم واللى مقولتيش هتلاقى نفس الاجابة مهما كان المبرر ومهما كان التوجه ومهما كان التفاعل مع الاحداث
للاسف كل خطوة ببتاخد لقدام بتلاقى قصادها عشرة للخلف وبسرعة البرق لازم نتأخر فى اتخاذ كل قرار لازم نعمل حاجات مستفزة لازم نخون ونشكك
ومشكلتنا اننا بننساق ورا كل دا
مجرد ما بنسمع الكلمة مبنسيبش لنفسنا فرصة انها تعدى على عقولنا لمدة ثوانى حتى
بس هقولك الموضوع اصله خلصان
ويمكرون ويمكر الله والله خير الماكرين
دومتى بخير

وسط الميدان عرقان فارد لجام صوتي
رافض أخون كلمتي و أحبسها بسكوتي
طاب أنت ليه زعلان يا عسكري يا جبان
إذا كنت أنا إنسان مايهمنيش موتي
وعجبي
________________________________

عسكر و ناس أخوان و جماعة سلفيين
منهم عبيد احسان و منهم ستاير دين
الثورة جت على غفله عملت لهم قفله
كأنها في الحفلة مصباح علاء الدين
وعجبي
________________________________
KING TOOOT

مظنيش

طبعاً متظنيش و لا حد هيظن غير كده

لأن اللى كان خايف قبل كده خلاص سلاسل الخوف اتفكت مش بس من منظر الشاب ده لا من مناظر كتييير

بس هى هتاخد وقت لحد ما الكل يفهم صح

لأن برضه لازم نبقى حاسيين باللى خايفين

دا جزء من ثورتنا

أننا نكون حاسين ببعض حتى لو هما لسه مش حاسين

ربنا يوفقك يا مامت يوسف يا غالية

فاتيما
روح القلب الملائكية

تعرفى يا فاتيما انا من ساعة ما كنت فى التحرير تقريبا باكتب كل يوم بوست
و تقريبا عايز اكتب كل ساعة
جوايا حاجات كتير صابتنا بالاحباط
و حاجات كتير بتخلينى متفائل
لكن لان الواحد زى ما انتى عارفة جيناته بتميل للنكد فهو مكتئب قليلا
لكن الصورة فيها مؤمرة لا شك و لاحظى البلطجى اللى طلع من وسط الالتراس
لما رجعت البيت و حطيت الصور جنب بعض عرفت ان فى ناس بتخطط
فاتيما ربك كبير
ساليناز قاعدة جنبى و بتسلم عليكى
مع السلامة يا ام جو

ازيك يا فاتيما .. يارب تكوني بالف مليون خير وكل ال بتحبيهم بمليون مليون خير وخير
في الاول بشكرك علي كلماتك الجميلة انتي والناس الحميلة ال بحبها علي مدونتي ومازلت كل ما اجي ارد يلبخني الفيس بوك و الكروت ال بعملها معايدة لاصحابي و زحمة المشاوير يا اهل السماح سامحوني انا ال خسران بجد كلامكم الحلو و تعليقاتكم والتواصل معكم متعه يارب يرزقني بيها
الحقيقه انتي قولتي كل اللي في القلوب الاحباط والاجهاد وحاجات كتير نفسي ابعتهالك لو انتشرت من عندك هتعلم صدي اكبر هديكي الفكرة وانتي اعلميها مقال و هنشرها عندي بس باسلوبك هتنجح اكتر ان شاء الله
يعني النهارده مثلا عندنا في شركة الدلتتا للاسمدة شباب زي الورد شاركوا في الاعتصام في المنصورة و في التحرير و بيطالبوا بحقهم المشروع في الشركة اللي اتوعدوا بيه ولانهم ميزيدوش عن 50 واحد الكل داخل عليهم و عاوز يحبطهم اخرهم واحد الصبح جه وهو عنده كدمه بسبب ظابط جيش احتياطي فتح السمكي عليه و هو مش من حقه يدخل يفض اعتصام مشورع وثورة سلمية لشباب احنا مانجيش جمبهم حاجه واحنا قاعدين في مكاتبنا وفي التكييف علي رأيهم المفروض 40000 عامل كانوا ساندوهم مش هي ثورة سلمية ليه ميتنازلش الكبار ويردوا عليهم ؟
ليه يعني بيضطروا الشباب يحسوا انهم محبطين وان محدش مساندهم يعين ايه مصنع 4000 عامل ومظلومين في حاجات كتيره و ما صدقوا لقوا مرتبهم زاد 150 جنيه ولا اكتر وسكتوا وبسبب مين بسبب الناس دي وييجي واحد يقولهم وبكل استفزاز انتوا لولا الثورة مكنتوش فتحتوا بقكم وهي الثصورة دي مش نعمه من ربنا سبحانه وتعالي وهو حد قال انا ال مخترعها ما اكيد كلنا بنحمد ربنا علي هبة الله في الثورة لينا كلنا وعشان كدا لازم نساندهم اللنك دا فيه التفاصيل و وعدتهم اشير كلامهم و فكرتهم و كلمت صديق في اليوم السابع يشوف ان كان في مظلوم يتقال كلامه وان كان فيهم حد عاوز مطالب فئوية محدش فينا هيقف معاه خصوصا النهارده لما دخل ظابط احتيط جيش و بيفض اعتصام سلمي مالوش حق يفضه ادي الي سقوط شاب بكدمة في ايده و تمزق قميصه وانا ال استقبلته واطمنت عليه الحمدلله
مظنش ولن اظن للحظة ان ربنا سبحانه وتعالي سيعطي الفرصه لهءلاء المندسين لاسقاط روح الثورة وكلنا هنبقي ايد واحده و هننتصر مهما طلعوا بلطجية ومهما سؤوا السمعه و مهما عملوا قوانين قانون الله اقوي
ومصر هتعيش رغم انف الجميع بحريه وحب وخير وهنتلاقي في القاهره والمنصورة واسكندرية و هنحب بعض في الله

يالله
افتكرته

مسمياه المصري الشجاع

لانه فعلا..شجاع جدا
ومصري اصيل

ومهما حصل
لازالت مؤمنه
ان لسا الاحلي ماجاش

ومدام بنقول يارب
وفينا نفس طالع

يبقي بأذن الله
الثوره هتكمل علي خير

بس نبطل يأس ونثق فنفسنا ونشتغل بجد

ونسيت حاجه

وحشااني اوي

من بدري الواحد مقراش بوست متفائل كده
او تشاؤم مختفي بين سطور تفاؤلية
علشان لو بصينا للبوست هتلاقي السطور اللي بتخلي اي حد يتشائم منها اكتر كتير من السطور اللي بتدعو للتفاؤل
فعلا مظنيش بس يمكن اكون عكسك شوية وشايفها بصورة تشاؤمية اكبر وان في ناس من اللي اشتركت في الثورة بدات تاخد اجر وتبيعها
شايف ناس غيرت مبادئها
انا مش معاكي في كلامك عن الناس اللي تعبت وبتقول كفاية وانك توصفيهم انهم مشتركوش في الثورة لانهم مصريين بيوصفوهم بالاغلبية الصامتة وبوصفهم بالمغلوبين على امرهم من حقهم يقولوا رايهم ومن حقهم علينا نفهمهم مش نقولهم ارتاحوا انتو وخليكم على الكنبة
ثورتنا كانت لحرية الراي اهلا باللي عارضوا الثورة واهلا باللي زهقوا منها واهلا بالكل وكل واحد يطلع اوراقه ونتناقش واللي معاه حجة يقنع التاني هي دي الديمقراطية اللي ثورنا علشانها واللي لازم تتحقق اما التهميش وعدم الاعتراف بالآخر هيرجعنا لنقطة الصفر وده اللي استغله المجلس العسكري الانشقاقات بين كل طوائف الشعب وعدم اعتراف اي طائفة باللي بتقوله الطائفة الاخرى واسمحيلي اقول مصطلح غريب احنا عايشين في زمن ديكتاتورية المواطن كل مواطن بسم الله ما شاء الله بقي ديكتاتور ننوس عين امه شايف اي راي بيخالف رايه غلط وخلصنا من فرعون علشان يطلعلنا 80 مليون فرعون ولسان حاله هو نفس لسان حال فرعون زي ما قال القرآن ما أريكم إلا ما أرى .. وما أهديكم إلا سبيل الرشاد
طول ما الانشقاقات وديكتاتورية المواطن موجودة فاحنا هدف سهل للضباع ومظنيش ان الحال هيتعدل لو فضلنا على الحال ده
تحياتي

أنا لا زعلان ولا مُحبط ولا حاجة
بالعكس
أنا شايف إن كُل اللي بيحصل ده طبيعي
أكيد مش كُل حاجة هتكون مثالية من أول مرة كده
ده إحنا لسه في سنة أولى حُريَّة
وبالتالي مش هنتقل من دولة الفساد الرهيبة اللي كُنا فيها لليوتوبيا على طول كده
يعني هتكون فيه شوائب في كل حاجة
هتبدأ كبيرة وهتقل مع الزمن
بكرة أحلى بس نُصبر

السلام عليكم
ازيك يا فاتيما
الحمد لله على السلامه من رحلة اسكندريه

والله يا فاتيما خايف من اللى جاى وخايف من الفلول وخايف مننا

المشكله يا فاتيما انهم غرفوا فلوسنا بالهبل وبيصرفوها عشان يحاربونا وفلوس كتيره ما بتخلصش ولا حتخلص

ربنا يسترها علينا

تحياتى وكل عام وانت بخير

انا فعلا مش بقيت فاهمه حاجه حاسه بسيراليه مواقف

وحشتيني اوووووووووووي :))

عارفة يا فاتيما
انا مستنية البوست دا من اول ما شوفت اللى حصل يومها
كنت مستنية اعرف رأيك
واقرا كلامك اللى بيطبطب على قلبى بجد
وبعد ما اقراه اخد تنهييييييييدة
واهدى
..
ربنا يسترها علينا وعلى مصر يارب
ودمتِ فاتيما

اللي بيظن ده مش بيبص للثورة علي المدي البعيد ، ده بيبص للحال دلوقتي ، و فاكر انها وقفت خلاص علي كده...

بحيكى على البوست الجميل دا
شعلة أمل فى ليلة قرف ..

أنا عن نفسى متفائلة ..
أصل أنى لو فكرتى لو اتشائمتى هاتعملى إيه ؟؟؟ أهاجر ؟؟
إيه الندالة دى بسهولة كدة أسيب الدنيا وأمشى.
ولا أعيش فيها ويلا نفسى ؟؟ لأ الحياة أجمل وأغنى وأمتع من أن حد يعشها لنفسه بس ..

بحب مصررررررررررر .. بعشق زى الداء.

فا تى ما

""يا كــــل اهلها ....
احــــنا عمـــلنا الأصــــعب
لا خـــططنا ولا حــسبناهــا
ولا فكـــرنا كــــتير
بس دفــعنا الـــدم
و قررنـــا نسترد تمنه ... كرامـــة وحـــرية
ولسه فــينا اللى مســـتعدين يدفـــعوا
تــــانى و تــالـــت
وعــاشــــــــــــر


انه لا ييأس من روح الله الا القوم الكافرون


كامل تقديرى يا ام الخير

بكره احلى ان شاء الله لاننا مصممين مش نسيبها تاني لكلاب تنهش فيها وفينا
ومهما طال المشوار احنا شايلين جبال الصبر عشان نحقق امانينا
تحياتي

dahlia...
---------

ازيك انتى يا داليا

ويا حبيبتى انتى لو ركزتى ف المكتوب
هتلاقينى مش مختلفة معاكى خالص
انا قولت
احنا عملنا الأصعب ...
لكن الصعب ...لسه
وعارفة اننا قدها
اللى شوفناه وعرفناه ولمسناه
وربنا حطه قصاد عينينا وقلبنا
بيقول
اننا نقدر جدا
اذا كنا قدرنا ع الأصعب
مش هنعرف نعمل الصعب ؟!!!


عارفة ؟
رغم انى مش بعرف اشوفك
بس كفاية احس انك معايا على أرض الميدان

انتى وليكتر وناس كتير
مبشوفهاش
لكن عارفة انها موجودة
وبتونسنى وتاخد بحسى

يا رب تكونى انتى والولاد وزوجك العزيز بألف خير

والمرة الجاية ف اسكندرية
ان شاء الله اشوفك
والمرة الجاية تحرير
ان شاء الله تشوفينى

مدونة رحلة حياة
---------------

ازيك يا ابو معاذ

انا بخير
وأحسب يوسف كذلك
ما دام ف رعاية الله
يبقى هو الحافظ ان شاء الله


اصل احنا خلاص
كبرنا ع التهويش دا
وجمدنا على انهم يهزونا
و عدينا مرحلة اننا نتراجع
الدنيا اتغيرت

وانا شخصياً
معنديش أى استعداد انى ارجع لورا تانى
واوافق أسكت ...
اموت احسن
لأن الرجوع لورا
هوه والموت واحد
واحنا شعب يستحق الحياة

فليه حد يتصور ويظن

المفروض ميطنش !!!


دمت بكل الخير يا فندم

KINGTOOOT
---------
يا رباعـــــياتــك
يا وليد

انتا من الناس القليلة اللى بترفعلى معنوياتى يا غالى
كل مرة اشوفك ...
وآخـــر جمعة دى فرقت معايا
خصوصا فيما يتعلق بعبيد الإحسان وبتوع الستاير دول اللى خاضينى انا وكل الناس اللى زى حالاتى ...


سلامى للغالية
أرق مخلوقات الله
وعمورى حبيبى عمر بيكا

Ramy
----


انا عارفة رأيك من زمان يا رامى
انتا من حزب المتفائلين
يا غالى

متبقاش ر ر أصلاً يعنى
ومتظنش
الا إنتا

:)))

ابراهيم رزق
-----------

عارفة يا ابراهيم

انا كمان لحد الفجر بتفرج واتابع الحاصل بين اليقظة والنوم وانا قلبى بيوجعنى

بس الواحد لازم يحسبها بشكل مختلف
ويحاول يوسع الصورة
ويحلل الحكاية
وقبل كل دا
يثبت ع المبدأ
وميزهقش

اصلها مش فسحة وخلصت
ولا رحلة وباظت
ولا فرح وهيقلب غم

دى حياة ومستقبل
واللى تعبان يروح
واللى زهقان ..يدورله على حاجة يتسلى بيها ...
لكن الثورة ...
يعنى اصرار
وثبات
وامل
وعمل
وكل حاجة ف حكم الإستمرار
ومحدش يروح


سلامى لست البنات كلهن
سالينازى القمررررررر

فاتيما أنا عايزة أقول تعليق على صباحياتك بما أن هناك مافيش تعليقات ...
أنا بجد بتابعها بشوق وبستناها ، وأو ما بفتح بدور عليها قبل ما أفتح أى جريدة علشان بتوفرى عليا وبتقى مختارة من المنقى يا خيار :)

بس أنتى كل شوية بتأخرى فى معادها وبتنزيلها متأخر قوى ..

مجهود مشهور ، وبجد فكرة جميلة قوى التجميعة من كل لون دى :)

هناك شخصين لم انسهما في هذه الثورة وظلا مجهولين حتى الاعلام لم يحاول الكشف عن شخصيتيهما هذا الشاب الواقف امام المدرعة والشاب بالجلباب الابيض الذي أم الصلاة على كوبري قصر النيل في عز المواجهات مع الامن المركزي هذان الشخصان هما رمز لهذه الثورة ورمز لقوتها وبسالتها وصمودها وغيرهما كثير ممن لم تخلدهم الصور لذا انا عندي يقين ان الله لن يضيع مصر ولا ثوارها وانهم ان شاء الله سيحققون دولة الحق والقانون والعدل التي يريدون فقط يلزم قليل من الصبر والمثابرة واليقظة ايضا
دمت بكل الود عزيزتي

يبقى ننزل من تانى ونشوف الدنيا من تانى

بصراحة وحشنا الميدان والحر بدأ يخف من تانى
وبلا طوارئ
ولا نيلة
ولا أحكام عسكرية


إحنا عندنا عمر واحد
هياخده رب واحد
فى وقت واحد


ونتقابل عند عم مجاهد

أزال المؤلف هذا التعليق.

و لا أنا أظن إننا حنسيب ثورتنا تضيع

ولا انا اظن

ربنا ييسر ونروح كلنا التحرير

يااااااااااااه من زمان مدخلتش وقرات كلام فاتيما حبيبتى
وحبيبت الكل هنا
يارب يارب تبقى بالف مليون سلامه وسعاده يارب
وحشتينى كتير
والبوست دا بقا اقل كلمه فيه انى ما اظنش بجدفى الايام دى ومش صعب من الا فات
لاء لسه القادم اصعب
وبرضو ما اظنش
بجد وحشتينى اوووى

مونتى بوكيه ورد
--------------

ازيك يا محمد
ومبسوطة انى سمعت صوتك ف اسكندرية

مفيش لينك مع التعليق
بس يا ريت تبقى تطمنا على زمايلك وتقولنا عملوا ايه ...

او قولهم ييجوا التحرير يا بنى
دى بلد مبتمشيش غير بالضغط والمليونيات
ربنا ياخدهم
يا ياخدنا احنا بقى
ويريحهم مننا


اشوفك دايما على خير

sony2000
--------

عاجبنى روح التفاؤل دى جدا
أيوه كدا


وعلى فكرة
انتى كمان يا سنسن
وحشتينى

مصطفى سيف
---------

ازيك يا مصطفى ؟
يا رب دايما تكون بخير

اختك فاتيما دايما متفائلة
خصوصا بعد ما شوفنا الكرامات دى
ايمام الثورة وما بعدها

الكرامات ف البنى آدمين يا مصطفى
المصرى اللى فاجىء الكل
مش بس فاجئنا احنا كشعب

احنا حلوين قوى
وجدعان قوى
ولسه قادرين نطلع اللى احسن من كدا

بالنوسبة لحكاية الفراعين و المواطن الديكتاتور دى
انا عندى رأى وتسمحلى اقوله
وطبعا انتا ممكن تشوفه غلط زى ما تحب

بس الديكتاتورية دى يا مصطفى
انا مش شيفاها كدا
انا شيفاها ثبات ع المبدأ

يعنى اديك مثل
فاكر الصورة دى ؟
----------------------------
http://www.marefa.org/images/thumb/7/74/%D9%8A%D9%88%D9%85_%D8%A7%D9%84%D8%BA%D8%B6%D8%A8_%D8%A7%D9%84%D8%AB%D8%A7%D9%86%D9%8A_%D8%A8%D9%85%D9%86%D8%B7%D9%82%D8%A9_%D9%85%D8%B9%D8%B1%D9%88%D9%81_%D8%A8%D9%88%D8%B3%D8%B7_%D8%A7%D9%84%D9%82%D8%A7%D9%87%D8%B1%D8%A9.jpg/300px-%D9%8A%D9%88%D9%85_%D8%A7%D9%84%D8%BA%D8%B6%D8%A8_%D8%A7%D9%84%D8%AB%D8%A7%D9%86%D9%8A_%D8%A8%D9%85%D9%86%D8%B7%D9%82%D8%A9_%D9%85%D8%B9%D8%B1%D9%88%D9%81_%D8%A8%D9%88%D8%B3%D8%B7_%D8%A7%D9%84%D9%82%D8%A7%D9%87%D8%B1%D8%A9.jpg
-------------------------------
الجدع دا فاكره ؟
يا ترى الراجل دا لما عمل الحركة المجنونة دى مكنش عارف انه هيتعجن ؟!!!

محدش حاول يمنعه مثلاً
وقاله ارجع يا مجنون ؟!!!

طب نرجع كام خطوة لورا
لما فكر ينزل وقال للى حواليه
كام واحد حاول يغيرله الخطة

لو عنده اهل زى امى واخواتى مثلاً
وامه عملت زى الحاجة ام فاتيما لما مسمرت باب الشقة بلوحين خشب وقعدت تعيط لأخويا ف التليفون وعملت مناحة ومنزلتش يوم 28 يناير وقعدت مقطعاها لحد ما بعد مبارك ما غار ....


تفتكر كل واحد بياخد قرار بناء على وجهة نظر ومبدأ وقد يكون صح او غلط .. بس خده ومقتنع بيه ومصر عليه
دا يبقى ديكتاتورية ؟!!!

طب نوسعها شوية
لما مجموعة من هولاء الديكتاتوريين ينزلوا ف يوم زى 25 ويعملوا اللى عشرات الملايين ف البيوت معمولش لأسباب مختلفة تتراوح بين الجبن وعدم الإقتناع وعدم الإكتراث ...الخ
لما المجموعة دى تصر على رأيها وتفرضه على الاغلبية وتكمل ثورتها لحد ما تحقق اجازء كبيرة من هدفها
وتفرض دا ع الباقى
دى تبقى ديكتاتورية ؟!!

يمكن

بس انا ساعتها مش هسميها كدا
هسميها ثورة ع الجمود
وع الطغيان
ولو ان الطريقة تبدو احيانا حالمة
او مجنونة
او غوغائية
او دموية
الخ الخ الخ
بس هيا دى الثورة
فعل عاقل بيرتكبه مجناني عشان الدنيا تتوازن ...
والحق لهذا له جنود ورجال
بيحاربوا
والحرب فيها من الأشياء الإستثنائية
ما يعجز الشخص العادى عن قبولها ف الاحوال العادية

عندك قواعد و محرمات اكيد
بس ما بعد ذلك
انتا حر
ما لم تضر
وهذه الثورة لم تضر سوى الضباع
ولهذا يقاومون بآخر ما لديهم


انا شخصياً
مستعدة اقبل الشطط والجنان والغوغائية والديكتاتورية احيانا
لو هتوصلنا للحرية والعدل ...


ولهذا قبلت التيار الإسلامى
بشططه وانتهازيته
وبحاربه بفكرى
وقناعاتى الخاصة
بإنى اثبت على مبدئى
وانشره لو قدرت
ونتشارك ف الوطن
بس مقبلش يدوس عليا
ولو داس
ابقى ع الأقل قاومت
انشالله اعمل ثورة ...

مش عارفة وصلت وجهة نظرى ولاّ خطرفت ؟!

بس ف كل الأاحوال
انتا منور يا مصطفى
ودايما تعليقاتك ..مميزة زيك

يا مراكبى
--------

آه يا نبع الحكمة
الله يفتح عليك
انتا جبت الملخص

بكرة احلى
بس نصـــــــبــر

فشكووول
-------

الله يسلمك ويبارك فيك يا عم صلاح
ومتخافش يا راجل يا طيب
دنتا راجل محارب قديم وعارف
عدوك بيحارب لحد آخر نفس
والشر لما يكون مستفحل ومستوحش كدا
لا يقتل الا بعدة ضربات

نصبر احنا ونتماسك ونقاوم
ولا نقول مش لاعبين ؟!!!

تحياتى ليك ولسومة الجميلة
وحشتنا بنت الإيه

اميرة على كوكب مجهول
------------------

اميررررررررة
وحشتينى يا قمراية
ازييييييييييييييييييك ؟
وازاى اختك وبنوتتها الجميلة ؟

يا رب تكونى بخير

ومتتخضيش يا مرمر
هيا كدا يا بنتى
مراجيح وكل شوية فوق وتحت
دا العادى
بس خلاص بقى احنا خدنا عليها
ومش بعد كل اللى فات
هنخاف تانى


انتى كمان وحشتينى والله

sara adel draz
--------------

ازيك يا سارة
ومتخافيش يا حبيبتى
مصر هتشوف خير ان شاء الله
بس هوه التمن
محدش يخاف انه يدفع التمن


تعرفى ؟
زمااااان
قريت قصة لنجيب محفوظ اسمها
تحت المظلة
مجموعة قصص
واول واحدة كانت بتحكى بشكل رمزى كدا
عن مجموعة من البشر واقفين تحت مظلة محطة منتظرين اتوبيس يروحهم
وهما واقفين شافوا مشاهد كتييييير كدا غريبة ...
ناس بتجرى ورا بعضها
حد بيقتل حد
حد بيحب حد تحت المطر
قاضى بيحكم و حد بيزعق وشيخ بيخطب وحاجات ومناظر عجيبة متتجمعش سوا
وحد ييجى يبنى عليهم شاهد ويدفنهم وناس لابسشة ميرى تيجى بدل ما تجرى ورا الحرامى تجرى ورا اللى بيلاحقوه وتقتلهم ومشاهد عجيبة غريبة
والناس اللى واقفة تحت المظلة دول قاعدين يتفرجوا يتفرجوا يتفرجوا
و شوية يخافوا وشوية يقولوا احنا مالنا وشوية يشمتوا وشوية يسشتهبولوا ويقولوا دا فيلم سينما وبيتصور
..الخ
لحد ما ف النهاية لما الموقف بقى دموى بجد ومبقاش ينفع يبقى مجرد فيلم .. قرروا يسألوا الضابط ...
فالضابط بصلهم بمنتهى الغحتقار وسابهم
وركب عربيته
والعربية عدت من قصادهم وطلع منها رشاش وراح فاتح النار عليهم كلهم عشان يموتوا مقتولين تحت المطر وتحت المظلة .....

القصة دى كنت كل ما اشوف احوالنا بتتنيل افتكرها واقول مصر بقت كدا
وفاضلها طلقة النهاية

كنت حاسة اننا بنتحول لهولاء
المقتولين احياء ويستاهلوا لأنهم واقفين يتفرجوا ...
لحد ما بقوا جزء من المذبحة

لكن جت الثورة
و الناس اتحركت
رفضت تفضل تحت المظلة
وخرجت تقاوم
ولو فيها موتها

ولهذا يا عزيزتى
متخافيش
البلد دى ان شاء الله
محروسة بأهلها
شريطة ان يبقى عندهم دايما استعداد يكونوا شجعان ..
والشجاعة لو تمنها موتهم ... حتى


دمتى انتى بكل الخير يا سارة

ELMOSTAFZ
---------

ازيك يا حسنىىىىىىىىىى

وحشتنا يا فتى

واحييك على رأيك
وبحب الناس الرايقة
اللى بتتفائل ... علطول
اما الناس المتشائمة
فلأ انا انط ف كرش دول
ومعنديش ياما ارحمينى

مش وقته خااااااااالص الصراحة

يا رب تكون دايما بخير

candy
-----

مسن اللى شعلة بقى فينا ؟!!!!
انتا يا جمييييييييييل

وكل سنة وانتى طيبة
وعيد ميلاد سعيد يا حبيبتى


بخصوص الصباحات
معلش انا بتأخر لعدة اسباب
اولهم
انى عشان اكتب الجمل المنتقاة دى فى 15 خبر ورابط ...لازم اكون قريت 40 حاجة الاول عشان استبعد حاجات واستقر على حاجات والقراية بتاخد وقت
ثانياً
فيه جرايد بتتأخر فى نشر المقالات زى الشروق والدستور ...
ثالثاً
ودا السبب الرئيسى انى بكتب الصباحات من الشغل ... وعادة بكتبها وانا بعمل حاجة جنبها
وبالتالى ف كل الاحوال غصب عنى باخد وقت لإنى ببدأ من عشرة تقريباً ...
وغالبا بخلص اتناشر ونص ...
يعنى
كتر خير الدنيا
واوعدك احاول اكون اسرع
ان شاء الله
بس موعدكيش قوى لأن كل فترة بتطلع مصادر وجرايد جديدة ودا بياخد وقت ف القراية برضو ...

عموما
ميرسى على انك بتتابعي الصباحات
وانها مهمة عندك
دا الهدف من وجودها اصلاً
والحمدلله انه حاصل اهو


سلام يا شمعة يا منورة
يللى بقى عندك 23

sal
---

الله يكرمك يا سال
يا غـــال

وحشتنى تعليقاتك
ووحشتنى فا تى ما دى جدااااااااا

الف حمدلله على سلامتك

eng_semsem
----------

الله يفتح عليك يا باشمهندس
تمام كدا

وتحياتى انا اكتر
ليك وللعروسة

خواطر شابة
----------

والشاب دا يا خطورة
----------------
http://www.marefa.org/images/thumb/7/74/%D9%8A%D9%88%D9%85_%D8%A7%D9%84%D8%BA%D8%B6%D8%A8_%D8%A7%D9%84%D8%AB%D8%A7%D9%86%D9%8A_%D8%A8%D9%85%D9%86%D8%B7%D9%82%D8%A9_%D9%85%D8%B9%D8%B1%D9%88%D9%81_%D8%A8%D9%88%D8%B3%D8%B7_%D8%A7%D9%84%D9%82%D8%A7%D9%87%D8%B1%D8%A9.jpg/300px-%D9%8A%D9%88%D9%85_%D8%A7%D9%84%D8%BA%D8%B6%D8%A8_%D8%A7%D9%84%D8%AB%D8%A7%D9%86%D9%8A_%D8%A8%D9%85%D9%86%D8%B7%D9%82%D8%A9_%D9%85%D8%B9%D8%B1%D9%88%D9%81_%D8%A8%D9%88%D8%B3%D8%B7_%D8%A7%D9%84%D9%82%D8%A7%D9%87%D8%B1%D8%A9.jpg
----------------

والشاب دا كمان
----------------
https://lh5.googleusercontent.com/-QAY_LPIEcLk/TYYaZ733qVI/AAAAAAAAHKA/xyCrrq-GCMU/yg5ku.jpg
-----------------

ومشاهد تانية كتييييير
صحيح منعرفش وشوش اصحابها
بس نعرف الاهم
عملهم
وقيمته
وعظمته


دمت انتى بكل الخير
يا أطيب اهل المغرب
و .... انتى وحشتينى قوى

الأزهرى
------

طيب ياخويا
نلتقى بكرة ان شاء الله
وعم مجاهد عشام تبقى عارف خلاص
طلب ايدى
وانا وافقت
واهو نطلع بحاجة من ام الثورة دى
ولاّ كله شحططة و وقفة بالساعات و هتاف و مناقشات وصداع بوستات و حرقة دم و عُلق احيانا و حر وضربة شمس
و مفيش أى حاجة عدلة كدا ؟!!!!

مهندس مصرى
---------


ان شاء الله يا محمد
ما ضاعت ثورة وراءها ناس مخلصة

الطائر الحزين
------------


ماشى يا فندم

كلنا لا نظن ...
وبكرة تحرير ان شاء الله

بنت قلبى
-------

انتى كمان يا بنت قلبى
وحشتينى يا بنوتة
وبفرح لما ادخل عندك والاقيكى كويسة
وان شاء الله كلنا نطلع منطنش
عشان بكرة يبقى احلى
ان شاء الله

يا رب تكونى دايما بخير
وقلبك مرتاح يا حبيبتى

متغبيش عليا
تعليقاتك بتفرحنى جداااااا
ويا رب تسمعينى عنك خبر حلو قريب
انا بدعيييييييلك
ويتحقق بإذن الله

فاتيما
واضح انك فهمتيني غلط
عندي ليكي سؤال هو الثبات على المبدأ يلغي الديمقراطية؟
يعني الثبات على المبدا معناه ماسمعش غير صوتي؟ واتخذ قرارات البلد كلها حسب اهوائي انا ؟
مش في تمانين مليون معايا؟
انا مش بتكلم عن الثورة واللي حصل فيها لأن الثورة كنا كلنا لينا قلب واحد وفكر واحد صحيح بتختلف طرق المقاومة بس الكل كان هدفه واحد
لكن دلوقت الاهداف اتغيرت واتضاربت مع بعض وبتناقض بعض والكل مش بيسمع بعض
يعني انتي تقبلي التيار الاسلامي بشططه وممكن غيرك ميقبلوش ولا يقبل يتحاور معاه وفي الناحية التانية ناس من التيار الاسلامي مش قابلة حضرتك ولا قابلة تتحاور معاكي
وبعدين تبدا الوقائع والدسائس ويتم زرع ناس في الطرفين مالهمش دعوة بالجهتين هدفهم حاجة واحدة زراعة الفتنة لطرف تالت غير معلوم الهوية
الحل علشان مقاومة الطرف التالت المجهول ان الطرفين الاولانين يقبلوا بعض وكل واحد فيهم يعترف بالطرف التاني وحتى ان عارضه
وجهة نظري وصلت ولا خطرفت :)

مصطفى سيف
---------

صباح الورد يا مصطفى

لأ
مظنش انى فهمتك غلط ولا حاجة
ولا انتا كمان خطرفت
الخطرفة دى تخصصى انا ...
هههه

بص يا فندم
انتا كتبت جملة تلخص سبب الإختلاف ما بينى وبينك

انتا بتقول اننا كلنا كنا وقت الثورة على قلب واحد
ودلوقتى الاهداف اتغيرات واختلفت المشارب والأساليب


هوه دا مربط الفرس يا مصطفى

اختك فاتيما
شايفة ان الثورة لم تنتهى بعد
احنا لسه بنثور
لسه بنقتنص مطالبنا
لسه بننضف ونكنس ونطهر

الثورة لسه على قدم وساق و.. رقبة
الأهداف واحدة صحيح
بس الطريقة بتاعت الناس الهادية اللى عاةوزة تمشى بالتفاوض والسلمية والمدنية والكلام الحلو دا ...
على عينى وعلى راسى
بس مش دلوقتى
مش لما اخلص الاول من الضباع

الإنتخابات كمثال
عاوزنى انتبه ليها وابتدى اشتغل عليها ازاى وانا عارفة انها مترتبة عشان تتعمل بلا أدنى نزاهة ممكنة
ازاى واللى هيعملوها نفس الوجوه تقريبا
ازاى ومفيش اشراف دولى
ازاى و البلطجية يستعدون لحماية اسيادهم
ازاى والإخوان يستعدون للإنقضاض وبيهددوا يخلوها خراب لو متعملتش زى ما هما عاوزين ف معادها ...

ازاى ف وسط كل هذا الجنون
تطالبنى ابقى عاقلة ؟!!!

انا بتكلم عن شق واحد بس على فكرة
اللى هوه الانتخابات
اللى هتجيب مجلس
يعمل لجنة
تبتدى ال
الدستور ...

لسه مكلمناش على باقى الحاجات

دى حكومة وحكام متعمدين يقعدونا ف فوضى و رعب عشان نقبل بأى حاجة

مش هياحكمونا عسكريا اه
لكن سيف الطوارىء بقى مسلط
واللى سابوه باليمين خدوه بالشمال
وقيس كدا بقى على كل حاجة بتحصل تقريبا


قوم بعد كدا حد ييجى يقولى اهدى
ولا نستنى شوية لما السلطة تنتقل لحد مدنى والإفلام دى ؟!!!!!!


ازاى
هما
اللى ماسكينها
وتحديدا العسكر
مش هيسلموها لمدنى
الا لما يبقوا متاكدين ان الامور هتفضل زى ما هيا والملفات هتفضل معلقة او تغلق للأبد
وان الرئيس اللى جاى هيكون طوع وعلى قد ايدهم
زى ما اختارو عصام شرف طوع
وزى ما جابوا العيسوى طوع
ووزير العدل طوع
وعاوزين كل الشعب يبقى طوع

طيب

الشعب الأغلبية ..
قد يرضى
او مياخدكش باله
او تعبان ومرهق
وبلاها ثورة دلوقتى


الثوار بقى
والناس اللى شايفة الخطر
تعمل ايه ؟!!!!

تسكت
ولاّ تثور ....
واللى مش عاجبه تقوله معلش
احنا كدا
وحقك علينا
وخليك ورانا يمكن احنا اللى ننفعك
منتا سمعت كلامنا 18 يوم ثورة ومشينالك مبارك ...
اسمع كلامنا تانى
يمكن احنا نبقى احسن
ليه لأ ؟!!!!

اللى يرفض حقه

بس انا كمان من حقى
اعيش حياتى
واكون ديكتاتورة وأفتخر
واثبت على مبدئى

لأن الملخلص هوه
ان الثورة لسه منتهتش يا مصطفى


رغيت تانى
بس كان لازم ارد
عشان نازلة التحرير كمان شوية
وغالبا مش هلحق ارد بعد ما ارجع ..

اشوفك على خير
انتا وكل الناس الطيبة

طب دى بقا تيجى ازاى
لو كنت بجد متبعانى كنت اطمنتى عليا وعرفتى اخبارى
بس انا عمرى عمرى ما ازعل منك
ابداا ابداا
لانك دلوقت بقيتى امى بجد بجد
لانى امى اتوفت فى شهر 5 الا فات
وانا اتجوزت من شخص بحبه جداااااااااااا
فى شهر
وفرحانه جدا بيه وكتبت كتير عن الا حصلى وعن امى وجوازى
عرفتى بقا انك مش مبعانى
بس والله ك عزراكى
يكفى بس انك لسه فكرانى
ويكفى برضو انى بحكى كتير عنك لجوزى
وبقله عمرى ما كلمتها ولا شفتها بس حبيتها من حروفها
وحنيتها فى كلامها
ودى نعمه ربنا هدهالك
بحبك اووى

ربنا يستر على اللي جاي
ويارب يحفظ بلدنا مصر
انا عندي امل علشان ربنا قال في كتابه
ادخلوا مصر امنين
تقبلي مروري وصداقتي يا ام يوسف

انا ماقلتش الثورة انتهت انا قصدي ال18 يوم الاولانين من الثورة
انتي مش ملاحظة ان حضرتك اللي مش متفائلة زيي؟
يعني مثلا قلتي الاخوان عايزين يقفزوا على الكراسي ويسعوا في خراب الانتخابات ويعملوها باي شكل
مش ده اللي انا قلته برضه؟ ان كل واحد عايز ينفذ اللي في دماغه
الفرق بقى بين اللي قلته واللي قلتيه حاجة واحدة انا شايف ان الحل هو الوصول لحلول وسط ترضي الجميع وحضرتك شايفة انهم يسيبوكم تعملوا اللي شايفينه وانكم مشيتوا مبارك يمكن تمشوا البلد احسن
وانا موافق على كده وعلى فكرة انا اصلا مش اخواني و باختلف معاهم اكتر ما باتفق معاهم بس ميمنعش انهم شاركوا في الثورة وميمنعش انهم مواطنين مصريين ليهم رؤية ووجهة نظر تحترم كفكرة وتناقش كمضمون للوصول لحل وسط
حضرتك بعد اللي قلتيه ده كله بتقولي انك متفائلة
طيب ازاي ؟ وجبتي التفاؤل ده منين؟ يعني هنعامل الاخوان زي ما عاملنا مبارك والصور بتاعت البطل اللي وقف قدام المدرعة هنكررها ونخليها قصاد الاخوان؟
انا شايف ان قدامنا حيط سد له باب متسكر بسبع اقفال ومفاتيحه بس في الوسطية بين كل طوائف الشعب والا الضباع المتمثلة في احنا اسفين ومن وراهم الشرطة والمجلس العسكري هيستفردوا بكل طائفة على حدا شوية منهم بالترغيب وشوية منهم بالترهيب
ده رايي يا فاتيما يا رب اكون وضحت وجهة نظري

إن شاء الله هنقدر نحقق كل اللي بدأت الثورة علشانه

الموضوع بس إننا ناخد الأمور واحدة واحدة ومنبصش لقمة الجبل ونقول مستحيل نطلعه

والخطوة الجاية .. والميدان الجاي هو مجلس الشعب

لازم نركز على الخطوة دي علشان هي الخطوة الأهم اللي هتشكل تاريخ مصر لعقود جاية

لازم نختار صح
وكل واحد يوعي اللي حواليه من جماعة الكنبة
علشان يوصل من يستحق

إرسال تعليق