.

.

الخـــيـر خـــيـريـــن  

Posted by: فاتيما in






و الخيرين إتلموا سوا 
عشان يكونوا ف يوم  مميز 
11 -11 - 2011
و اللى فيه هنتجمع ان شاء الله
عشان البؤجة الشتوية 
وعشان التبرع الخيخى بالدم 


و عاوزة الاول أتشكر لكل من
نوران الشاملى بت خيخة 
 و داليا قوس قزح وش الخير
و خالد همس الأحباب
 عشان لمولنا المناسبتين سوا
ف يوم واحـــد 
عشان يبقى التركيز واحد
و المشوار واحد و المجهود واحــد 



و اللطيف بقى ان اليوم دا جاى
 لازق كدا ف ضهر اجازة العيد
كل سنة وانتوا طيبين 
يعنى محدش يبقاله أى حجة 


آه 
يعنى مش عاوزة أقرى تعليقات
 من عينة ...
أصل ملحقتش احضر نفسى
و مقولتوش ليه من بدرى و ابصر ايه 
 أدينا بنقول أهو
من قبلها بمدة طويلة 


ومش عاوزة اسمع 
 أصل احنا رايحين لحماتى ف العيد
و كدا هتزعل وتضرب بوز ف وشنا 
لأ .. معادنا بعد العيد بيوم 
 و متلككوش بينا 
اللى حماته مش طيقاه
هتفضل مش طيقاه برضو ...


اللى هيقولى المدارس و بنستعد
هقوله عندك تانى يوم فاضى 
يوم السبت بطوله
ويعنى هتستعدوا تعملوا ايه 
انا مش فاهمة يعنى ؟!!


و مش عايزة حد يقولى
أصلى مينفعش اتبرع
عشان احنا خارجين من عيد يا ظلمة 
وكله متغذى بلحم الضأن
و مطرح ما يسرى يمرىمش بقر
 ولا احسد لا سمح الله انا بس بقول 
 عيّدنا وإنبسطنا وشبعنا 
نزكى بقى عن صحتنا شويتين ...



ومحدش يقولى معنديش حاجة
 احطها ف البؤجة بتاعتى 
أى حاجة يا جماعة تفى بالغرض 
هدوم اطباق كتب لعب جرايد قديمة 
أى شىء انتوا مستغنيين عنه
هينفع حد تانى أكيد .. 
محدش يستقل 
او يحس ان اللى جايبه بسيط
 كله بيتجمع ف النهاية وبيعمل فرق 


واللى مش نافع يتبرع بالدم 
 ولا عندوش بؤجة
 تعالوا شرفونا ونورنا
 واعرفوا اماكن التبرعات 
لعل وعسى لما يتيسر الحال ف يوم
 تروحوها لوحدكم 




خط سيرنا هيكون كالآتى
البؤجة اولا 
ف مكانها المعتاد فى
جمعية صحبة خير 
مسجد زهراء مصر القديمة
20 شارع أحمد خيرى 
فوق كافيتريا السرايا 
و اللى لأول مرة هينورنا ..
كل ما عليكم انكم هتركبوا المترو 
خط حلوان
 وتنزلوا المحطة بتاعة الزهراء 
و لو معرفتوش المكان بسهولة
ابقوا اتصلوا بخالد على نمرته
او أى نمرة من المذكورين ادناه
وهوه هيوصفلكم السكة كويس
المعاد من عشرة يا جماعة
...........
الساعة كام؟!!  
العاشرة صباحااااااااااااا



بعد ما نسلم البؤج ان شاء الله
والناس الحلوة هتروح تصلى الجمعة 
هناخد بعضينا بعدها
و طيراااااان على المصل واللقاح 
فى الدقى شارع احمد عبعزيز
البطل مش الممثل
 و الشارع مش المسلسل .. 
قصاد توكيل عربيات هيونداى 
وبرضو اللى ملحقناش ف البؤجة 
يحصلنا ع التبرع بالدم مجراش حاجة
ع الساعة اتنين كدا تقريبا هنكون هناك
.............
الساعة كام ؟!!
الثانية عصراااااااااااااااا 



وبعد كده هنشوف و نقرر هنكمل يومنا
فين وازاى بس اللى عاوز ييجى
بعد البؤجة والتبرع طبعا اهلا وسهلا
 بس يتصل يشوفنا الاول .. احنا فين 



و التفاصيل هتلاقوها 
ف التدوينات اللى لينكاتها تحت دى 
و دى نمر الموبايلات اللى هتكون 
مفتوحة لأستقبال مكالمتكم يوميها 

نمرة خالد همس الاحباب 
01012454140
نمرة نوران الشاملى 
01019790270




التعليمات المعتادة من عند خوخة 
تفطروا كويس يومها و تتغذوا 
الاخوة المدخنين يخففوا من التدخين 
قبل التبرع عشان دمهم
 يبقى خالى قدر الممكن م النيكوتين 
و يخففوا بعد التبرع شفخت بينا
 من دخان السجاير احنا اخواتكوا برضك 



اللى جاى لأول مرة
اهلا بيكم مقدما 
و مش مهم تتبرعوا
ولا تجيبوا بؤجة ... تعالوا شرفونا






اما اللى جاى لأول مرة 
و يظنو .. انها قعدة سبهللة 
و هيستظرف و فاكرها فرصة لكى يتصاحب
فأحب ابلغه اننا لسنا كذلك بالمرة
زائد ان معانا رجالة بجد ..
 رجالة م اللى هما دول بيبقى عندهم 
بالفطرة والتربية .. شهامة و نخوة وكرامة
و اخلاق و غيرة ع اخواتهن فى الله
و بياكلوا الزلط
 و هيعرفوه ان الله حق 
فمن قصيره ..  اللى جاى و ف ضميره
 نوايا سودة ف بنفسجى مقلم 
فليعلم جيدا ان زعلهم وحش و هيغضبوا
والغضب حماقة يا حورية 
فالظريف ميجيش ...  أحسنننله






الناس الحلوة اللى عندها اسباب قوية 
تمنعها من المجى 
يكفينا دعواتهم بالتوفيق 
و نشر معلومات عن اليوم ف مدوناتهم
وصفحاتهم الفيسبوكية وتويتاتهم 
و يبقى كتر الف خيرهم 
بس حاولوا يا جماعة 
دول مناسبتين ف مناسبة 
اتنين ف واحد زى الشامبو 
خليكوا حلوين بقى وتعااااااااااالوا 




و بالنوسبة لمدونى عموم الجمهورية
يا شعب بورسعيد العظيم
 احنا منتظرينكم تنورنا 
و يا اهل المنصورة الطيبين 
و يا إسكندرانيييييييييية 
يا دودو ويا قلب القطة و قاطنى الماريا 
ويا اهل الخير فى كل حتة فيكى يا مصر
يا ريت تحاولوا تيجوا
 و تزيدوا الخير خيرين تلاتة اربعة عشرة



هه .. 
ايه تانى ..  ايه تانى ؟
آه .. الممنوعين عموما من التبرع
 هم الاطفال واللى عاملين عمليات قريبا 
و اللى بيتعالجوا ف سنانهم 
و طبعا اللى عندهم فقر دم 
والمركز اللى هنتبرع فيه بيعمل تحليل
وبيقيس ضغط الدم عشان يتاكد
من أن المتبرع صحته تسمح و مش هيتضرر 




كمان مستوى النضافة تمام
والناس استقبالهم لينا دايما ممتاز
دول نقاوة خيخة خوخة ام شريف  
 فمن الآخر ... فمتقلقوش 






و بؤجة الخير اللى اتعودنا عليها
صيف وشتا 
جمعية صحبة خير اللى بتتلقى التبرعات
عينية ومادية .. جمعية موثوق فيها
و نقاوة داليا وش الخير 
يعنى برضو  م الآخر ... متقلقوش 


ان شاء الله الخير 
سيذهب إلى مستحقيه 


و لا يسعنى ف النهاية 
غير إنى أفتكر ناس حلوة ليها أسهم
فى هذا اليوم و حاضرين دايما فيه
و ان كانوا بيغيبوا زى 
م.أحمد كمال .. مدونة رحايا العمر 
وآبى هانم بتنجانى .. بكوكبها وخرفانها
 اللى عندهم عقد عمل دلوقتى فل كويت
و عقبال ما يرجعوا ينوروا الأيام دى تانى


 يلا كله يستعد من دلوقتى
و يفتح الدواليب و يطلع الشتوى
و يفتش ف الكراكيب عما قد يستغنى عنه 
واللى عاوز يتبرع بفلوس
و ماله برضو تنفع .... 
و يجيبها معاها او يبعت لخالد حوالة 
و المهم تفضوا نفسيكم تماماااااااا
ف يوم
11-11-2011
و زى الاخ ميعتز الدمرداش ما بيقول  
أوعــــوا تروحـــوا ف أى حتتتتتة 



و أخير محدش يفتكر بعد كل دا 
انى كتبت البوست دا لله و للوطن 
أتلاكا دنا خضعت لإبتزاز عاتفشى 
و مقدرتش أكاومه نوهااائى  
أصل البت خيخة وعدتنى بشكولاتية كورونا
من القطع الكبير  
وفيما يبدو من شكلها انها رشوة ...
 والعياذ بالله 


وصحيح انا كنت هكتب البوست
 من غير حاجة يعنى بس بما انها
كالعادة ام الكرم كله 
فمن هذا المنطلق
 احب أشكرها واقولها منحرمشى


واحب كمان أقول لو كل بوست هكتبه
هتشكلت عليه  .. فمستعدة كل يوم
على غيار الريق أكتبلى بوست


وأحب اقول كمان لأى حد 
هتسول إليه نفسه ييجى جنبى يوميها 
و يقولى هاتى حتة يا فاتيما
 مكعب واحد بس يا طمطم  
دحنا اخواتك يا أم يوسف 
طب الحقى دنا هيغمن عليا والافلام دى 
فيؤسوفنى اقوله من دلوقتى
 متحاولش وانى و لا أعرفه ... 
و ف الشكولاتة انا اندل خلق الله 


 و اللى هيصمم ياخد حتة هصوت
و الم عليه الناس و اقول بيعاكسنى 
وهجيبلوا واحد امين شرطة اصمالله
و هما اصلا على آخرهم و بيقولوا يا شر أشتر


وساعتها اللى ينضرب ينضرب بقى
و مش هيصعب عليا 
عشان أنا حذرت من بدرى اهو  
ومحدش سمع كلامى ..
 ماشى ؟



كل لقاء تدوينى ف الخـــير 
و إنتوا طيبين و بألف خـــير 
و أشوفكم على ألف خـــير 
يا احلى صحبة وناس وعالم 

--------------------------------------

على هامش البوست
محمد غاليه
 حفل توقيع كتابه التانى 
يوم الاربعاء 
و التفاصيل هـــنا
و الواد أزهرى هيجوز أخته
يوم الخميس 
والتفاصيل هـــنا 
الدعوة عامة 


------------------------------------------
--------------------------------------------
----------------------------------------------------

خــــطــــاريـــف ..... 14  

Posted by: فاتيما in