.

.

جــــعــلونـــى مـــــدونـاً ...3  

Posted by: فاتيما in


 
 
صباح الورد عليكو 
يا أهـــل بلوجــــر الكـــرام 
صبّحنا خلاص ؟
وعم محمد جابلى فنجان القهوة
الدوبل أهو 
أرغى بقى وانا بروق الجيه 
 
آل انا آل امبارح كنت قاعدة لا بيا ولا عليا 
ف غاية البراءة أجلس امام حاسوبى
و بحضر ف بوست جديد
و بضبط ف الصور 
و أبص الاقى رسالة جايلى 
من سخص عزيز لدى 
بتقولى اقفلى مدونتك يا فاتيما 
و غيرى بياناتها بسرعة 
عشان فيه حد بيمسح ف المدونات 
و ماشى ورا ناس بعينها منهم انتى 
وست الكل ستيتة حسب الله الحمش 
و مدونين آخرين ....
لم يذكرهم بالإسم 


طبعا بعد حالة ذعر سريعة واتلمت 
 ولا كأن فيه أى حاجة خالث 
سألت ...
مين ليه فين ازاى 
و عشان ايه يا فتى ؟
قالى مفيش وقت للنقاش
غيرى الباسورد 
واعملى نسخة من المدونة 
والحقى الموقف احتياطياً
وبعدين ابقى .. اقولك التفاصيل


بصراحة 
نظراً لأن هذه السخصية ... انا بثق فيها 
فبالتالى .. عملت اللى قالى عليه 
و صحيح لحد دلوقتى معرفتش تفاصيل 
و مش لازم  مش مستعجلة
بس ما دام الدنيا بقت لبش كدا 
فخلينا ف الاهم دلوقتى 
وهو الآتى 
 
(1)
كل نفر منينا يعمل مدونة بديلة
ع الورد بريس 
دا لو مكنش عملها بالفعل
او عملها ومحدثهاش كسلاً .. زى حالاتى 
الخطوات مشروحة بمنتهى البساطة 
ف بوست الغالى ... الأستاذ 
عصفور المدينة 




(2)
اعملوا نسخة م المدونة تتشال 
على جهازكم 
 خطواتها كالآتى

الدخول من لوحة التحكم الرئيسية 
على اعدادات المدونة
والضغط على
تصدير مدونة اكترونية  
موجودة أعلى الصفحة
بين استيراد مدونة الكترونية وحذف مدونة الكترونيه
  ثم تحديد مكان على الجهاز يسمح بالانزال
ثم الموافقة  
وبذلك يتم حفظها على الجهاز


معلش هيا هتاخد وقت
حسب تقل المدونة بتاعتكم
بس المهم انها هتكون نسخة للطوارىء




(3)
تغيروا الباسورد كل شوية 
تحسباً لأى حاجة 
و مش هتضر يعنى 



و بكدا حتى لو المخفى اللى عاوز 
يمسح مدوناتنا من البلوج سبوت .. نجح
نعرف نرجعها تانى و تالت وعاشر 
و عادى ....

ومش عارفة انا فيه ايه ؟
هيا الدنيا فضيت
و الناس بقى عندها فراخ للدرجة دى ؟!!!



عمومااااااااااا
انا قولت أصبح عليكو 
و اقولكوا ع المفيد 
و أروح اضبط البوست الجديد 
واتمنالكم يوم سعيد
يا عينى ع السجع دنا بقول شعر !!



اما بقى اللى ينشكوا ف معاميعهم 
و عاوزين يمسحونا دولم
فإلهى يا رب 
يتمسح بيهم أسفلت التحرير 
ف يوم درجة حرارته 50 مئوية 
و بعد ما كل مللى ف الميدان ينضف
يروحوا مقعدينهم يستريحوا 
ف نص الشارع ..
ف مجــــية أتوبيس سياحى فاخـــر .. 
و انتوا عارفين الباقى 




آه أستنوااااااااا
كنت هنسى 


ف إطار الحديث الدائر والدعوات 
لعمل نقابة للمدونين
مع كامل احترامى لأصحاب الدعوة والمتحمسين ليها
و كلهم على راسى 
 يا جماعة أختكم 
ضد الموضوع دا من زمان 
لما قالوا نعمل اتحاد للمدونين
الكتابة ف المدونة عندى 
مش مهنة و لا وظيفة 
انا شخصيا .... مش بعتبرها كدا 
و بالتالى ... لن أقبل أن أنضم لأى حزب 
او كيان او  تجمع يتكلم بإسمى 
ولو عشان مصلحتى 

لأنه جرت العادة ان هذه الكيانات 
و للأسف ... مبتعبرش عن اصحابها الحقيقين
وغالبا هدفها بيبدأ بناس نيتهم طيبة 
ثم ينتهى ف يد ناس طامعين ف لقب 
وامتيازات و سطو غاشم من النظام الحاكم
أى كان هوه مين اللى بيحكم ....
او حتى بعض التيارات اللى عاوزة 
تسيطر ع الدماغ و تحجم الافكار
والنقابات عادة ... هيا ملعبها المفضل لذلك
و دول روخرين بقى عاوزين لهم ....
نفس الأتوبيس السياحى الفااااااخــر 



و حرام اللى بيحصل فينا دا  
كدا فيه تشتيت جامد
هوه احنا هنلاقى وقت يكفى 
عشان ندونّ وندوس ف الناس دى كلها
ف ذات الوقت ... منين ؟؟؟!!





و اما مسألة حقوق الملكية الفكرية دى 
والمخاوف منها 
فاحب أقول ان دا قانون عام 
و المفروض ينطبق ع المدونات كمان 
بس احنا ف مصر بنهدره على كافة المستويات
مش على مستوى التدوين بس 
لما يرجع للقانون سلطته 
هيتحافظ على حقوقنا الفكرية تلقائياً
ولحين حدوث ذلك ....
محدش يطلب منى الإنضمام للنقابة دى 
ولا الترويج ليها



حد ييجى يقولى بعد كل دا
يا كابتن لطيشف يعنى لو عرفتى مين
اللى بيعمل كدا هتبقى تقوليلنا ؟؟!!!
ارد عليه سريعا و أقوله ...


و لا أعرفكم


من أنتــــم  ؟





حاجة تانى ؟
لأ
  خلاص كدا 


-----------------------------
 

This entry was posted on الأحد, أكتوبر 09, 2011 and is filed under . You can leave a response and follow any responses to this entry through the .

13 كــــلام بيطــبطـــب عـــلى قــــلبى و روحــــى

على فكرة انا من الداعين لفكرة النقابة ومفكرتش اصلا في حكاية الاتوبيس السياحي دي ولا فكرت في اللي حضرتك بتقوليه
الفكرة كلها اننا بنتسرق واحنا مش بنعمل حاجة
غير اننا بنتفرج وساكتين
من حقنا كشريحة مجتمعية ان المجتمع يحفظ حقوقنا ويكون في حاجة عامة لينا تحفظ حرية الراي علشان بكرة ميتحاكمش مايكل نبيل تاني
تحياتي اختي العزيزة بس احنا الداعين للفكرة محدش فينا فكر التفرد بيها او فرض نفسه على الباقيين بالعكس كلنا من اقاليم ومحدش فينا فاضي كل يوم ينزل القاهرة علشان يخلص ورقها او يدور على مقر
احنا بنعرض فكرة بس

حاضر

بالرغم من انى مش عارف

هأعملها أزاى دى

يا مُسهل

((:


شكراً ليكى يا غالية

و شكراً للغالى اللى حذرنا

مصطفى سيف الدين
---------------

صباح الورد يا مصطفى

ازيك ؟

اولا أتمنى متكونش متضايق من هزارى
عشان لو تلاحظ بين سطورى انى قولت
ان الفكرة بتبدأ بناس نيتها طيبة وخير
وكنت أقصدك انتا وغيرك م اللى قريت عندهم الدعوة

لكنها للأسف هتنتهى عند ناس زى الغربان هتحط ع النقابة دى وتخطفها
لأغراض خاصة ...
كالعادة


الموضوع واخد اكبر من شق

اولهم
انتا بتقول اننا شريحة من المجتمع
ومحتاجين اللى يحفظ حقوقنا

احنا مين يا مصطفى ظ
يعنى احنا المدونين ..اللى هما مين ؟
اللى فيه دكتور ومحامى ومهندس ومدرس او صحفى او تجارى ...الخ الخ

ولا احنا المؤلفين او الناس اللى بتكتب قصص وأشعار وخواطر ومقالات ؟


لو احنا الفئة الاولى
فكل حد من هولاء
أصلا عنده نقابة خاصة بيه


اما لو احنا الفئة التانية
ففى اتحاد للكتاب
او نقابة للصحفيين لو اعتبرت المدونة شكل من اشكال الكتاب الصحفية
او نقابة الاعلاميين لو اعتبرنا التدوين نوع من الاعلام المكتوب ...


ف كل الاحوال السابقة
احنا لا دول
ولا دول
ولا دول

احنا رقصنا ع السلم


واللى انا شخصيا فهماه من 3 سنين وزيادة هى عمرى ف التدوين واتسرق منى حاجات واتحطت ف منتديات ...
انى طالما وافقت احط ما أكتبه على مدونتى
يبقى خلاص
انا وافقت على المخاطرة
طالما لم أنشره ف كتاب
وناس أكثر ذكاء منى عملت دا
نشرت القصص والأشعار ف كتب
وريحت بالها
لأنهم حاطين الموضوع ف دماغهم يا مصطفى وناويين عليه ....

ودى احدى المعضلات
الناس فاهمة ان التدوين دا اوضة مقفولة ومحدش بيدخلها غيرهم وبالتالى اسرارهم وما يكتبونه ملكهم لوحدهم

ودا مش حقيقى خااااالص
التدوين يختلف عن أى شكل تانى للكتابة بالعكس
انتا بتدون جزء من حياتك وشخوصها ومواقفها اللى مبتعرفش تطلعها ف حياتك العادية
واللى لو فكرت تكتبها ف جرنال او مجلة هيرفضوا لأنها لن تهم كل القراء ولن تخضع لسوق النشر الصحفى اليومى ...
معندكش رئيس تحرير يقرفك بمعاد
ولا بموضوعات
وعندك سلطة ف حاجات كتير
بس كمان عندك تواصل مع اشخاص
مش قراء عابرين
أبدا
دول ناس بيتحولوا لأصدقاء بمرور الوقت ....


الملخص عشان برغى كتير ...

ما دمت قررت تنشر على مدونتك
اللى ممكن يدخلها نفر ما من أقصى الكرة الأرضية وانتا متعرفوش وارتضيت متعرفوش ...
وما دمت فتحتها هكذا ع الملأ
وما زلت تكتب
حتى ف ادق الاشياء ...
لإنت يا عزيزى أرتضيت ان تتنازل عن جزء من نفسك ...
وخصعت لغواية نداهة الكتابة


خايف على كتاباتك من السرقة
أقصر المدونة على من تثق بهم فقط
او متنشرش حاجة الا بعد نزولها ف كتاب
وان كان ساعتها هتلاقى نفسك برضوووو
بتخضع لأقتصاديات سوق الكتب اللى هتجبرك متنشرش عشان الكتاب يتباع ...

بص
م الآخر
لما الملكية الفكرية ف البلد كلها تحترم ...
ساعتها اللى هيسرقك ..تروح تقاضيه
بس انا اصلا عاوزة اقول
ان دلوقتى قد تنشر كتاب
او رسالة علمية ومتسجلة
وبرضو تنسرق
وتروح للقضاء
وحلنى على ما تلاقى حقك


مش ببرر للاخوة السارقين

بس انا عندى وجهة نظر ف حكاية السرقة دى
ابقى اقولهالك
ف تعليق أخر
لو لسه عاوز تسمع

انا رغاية قوى
ايه دا ؟!!!!

اهم حاجة

متكونش زعلان منى
انتا ملكش دعوة بالأتوبيس دا
دا لناس تانية خالص والله

:)

Ramy
----

صباح الخير يا ر ر
:)))

ازيك يا غالى


لأ المسالة مش صعبة
هيا بتاخد وقت بس مش اكتر
انما ضرورية
عشان محدش يضيع كتابة سنين
هدر كدا ....

يلا ابتدى

وصباح الفل عليك

حضرتك بتقولي لما الملكية الفكرية في البلد تحترم
وحضرتك ماقلتيش ازاي وامتى تحترم وانتي خير العارفين مفيش اي حق بيكتسب في البلد دي من غير مطالب
حضرتك بتقولي في نقابة صحفيين واعلاميين واتحاد كتاب وحضرتك ماقلتلناش ازاي يعترفوا بينا
حضرتك عمال مصانع القصب بيعملوا نقابة والجزارين ليهم نقابة والصحفيين ودول مش كلهم نفس الؤهل لهم نقابة
اشمعنا جت عندنا وقفلت
حضرتك بتقولي في غربان هيخطفو الكعكة ويجروا وحضرتك ماقلتيش لنفسك ان البلد مليانة غربان وان الريس هيبقى غراب ومجلس الشعب كله غربان يبقى بلاها مجلس شعب ورياسة وخلينا كده حقوقنا مهضومة
اللي اتعلمته منك انتي مش من حد تاني اننا صامدين وواقفين على حقنا محدش هيسرقوا مننا
بس اللي شايفه النهاردة منك مناقضة لكل كلامك اللي فات عن التحرير والعباسية وغيره وغيره
معلش تقبلي كلامي واعتبريني اخ
انا هابطل تدوين اصلا واريح دماغي بلا قصص بلا خواطر بلا بتاع واحتفظ بكلامي لنفسي وتمام على كده بس حبيت اقول لحضرتك مش كل الناس تقدر تنزل كلامها في كتب
ومعتقدش حضرتك بتبقي مبسوطة وانتي شايفة كلامك بيتنقل في المنتديات وبيشكروا غيرك
اسف على حدتي
واشكرك على انك اعتبرتيني من الناس الطيبين
تحياتي

طب ياريت لما تعملى نسخة تبقى تعمليها والنبي من غير موسيقى كل ما باخش عندك باترعب من الموسيقى اللي بتتطلع مرة واحدة...فكرتيني بنظام الموسيقى اجباري ع الترمس....

مصطفى سيف الدين
---------------

اولا
ممكن تهدى شوية
عشان انا حساك متعصب جدا

وانا أسفة اذا كنت اتكلمت بطرسقة
او اسلوب
او بأفكار تضايقك


انا أسفة
لأنى اخترت اسلوب
وتوقيت غلط
معلش


أعذرنى
بس انتا م الناس اللى المناقشة معاهم
مبتخوفنيش يزعلوا منى


بص
انا مش بناقض نفسى ولا حاجة
ولو بصيت ع اللينك الى حطتيه
عن رفضى زمان لإتحاد المدونين المصريين
هتعرف انى ثابتة على مبدئى
متغيرش

الكتابة ف التدوين
عندى يعنى حرية
مفيش رئيس تحرير
ولا معاد نشر
ولا اكل عيش يوطى راسى
ولا ناس أرضيهم على حساب مبادىء


التدوين عندى حرية
ولا زلت شيفاه كدا
ومفيش حاجة هتغير وجهة
نظرى
لأنها زمان مكنتش رفض بسبب احوال البلد ...
فلما تغيرت الاحوال ..هتغير


دا بالنسبة للمبدأ
والثبات عليه


بالنسبة بقى لحكاية حقوق الملكية
انتا بتسالنى
انى مقولتش ازاى وامتى تحترم
وازاى النقابات دى تعترف بينا
دى مش شغلتى يا مصطفى ...
انا أصلا مش مهتمية انضملهم
فبالتالى ..متفرقش معايا

لكن لو هتفرق مع غيرى
فغيرى دا ايه يمنعه يدور على قانون كل نقابة من دول ويشوف هتنطبق عليه ولاّ لأ ؟!!!
غالبا
مش هتنطبق
لإن أغلبنا خريج كليات ملهاش علاقة بالاعلام
وأغلبنا مشترك بالفعل ف نقابة ما
او ينفع يشترك ...

مش هصادر ع المستقبل
بس اللى عاوز يعمل نقابة او رابطة
يعمل ...
انا مش همنعه
بس ميتكلمش بإسمى ويلزمنى بقواعد وحاجات هتخلينى اعمل زيك انتا كدا واقول انى هبطل تدوين اصلا وأريح دماغى
:)

وهذا ما أرفضه بالمناسبة
انك تبطل


وبخصوص ربطك الحكاية بما يحدث ف البلد
يعنى سؤال يا استاذ مطصفى وجاوبنى
حضرتك متخيل
ان مجلس الشعب والرياسة القادمين
هيحققوا ما نتمناه ؟!!!!

ابدا

بالمنظر اللى احنا فيه دا
مش هيحصل طبعا


حصاد الثورة مش هيبان دلوقتى
ولسه قصاده وقت

عشان كدا انا رغم كل اليأس اللى حواليا شايفة ف آخرها نور
لأن لو بصيت تحت رجلى بس
هكئتب واموت كمدا


اتجاه الريح بيقولى كدا
ومن ملاحظات شخصية
وقول عليا ست مرووشة عادى ...
بقولك ان النقابة دى هتبتدى بمطالب ناس برئية ومنزوعة الهوى من الأطماع
ثم ...
هتروح بيضا مقشرة للاوغاد

زى ما الثورة عملت كدا
ناس اتبهدلت
واتسلمت لمين ؟

مش معنى كدا انى استسلم كبعا

بس أخد حذرى بقى
ومش كل مرة
هبقى حسنة النية كدا


التجاه العام الىن بيقول
ان أى تجمع او توجه
هيتم السيطرة عليه
وافساده بفكرة ..حصان طروادة
الحكاية تبقى حلوة وشيك ف الاول
وبعدين نحطلهم وسط العسل سم
وبعدين يضرب السم ف الطبق كله
والشعب ياكله بالهنا والشفا

ف النقابات
والأتحادات
والوزرات
والشركات
والجامعات
والمؤسسات الصحفية
الخ الخ الخ


هتقولى قفلتيها با فاطمة كدا

هقولك
لأ

بس مش هشترك ف كيانات
من هذا النوع
ع الأقل
لحد ما تتضح الصورة قصادى

جايز تكون واضحة قصاد حضرتك
وانتا شايفها أوضح منى

بس انا بقول رأيى
الشخصى

ليه زعلت كدا ؟



لما بشوف كتاباتى ف المنتديات
مببقاش مبسوطة طبعا

بس هقولك رأيى ف حكاية السرقة دى
وانا عارفة انها قد تكون حالمة شوية
بس انا مقتنعة بيها جداااااااا

اللى بيسرق ف عالم الكتابة
دايما نفسه قصيره
وملوش رجلين
وسهل ينكشف

وهذا ما يحدث على الجهة المقابلة

اللى عنده اسلوب ومتميز ف الكتابة مهما عدى الوقت تلاقيه بينضج والناس بتألف كتابته و بيعمل مكانة


انا عارفة ان اللى بيسرقنى
هيسرقنى مرة
اتنين ويتعب
وينكشف
ويذهب جفاء ...

اما اللى كتبته انا
مهما كان تافه
وبسيط
ولا يعنى احد
لكن هوه فيه من روحى
وهيفضل ....

الكتابة بالذات بقى
فيها الميزة دى
محدش يعرف يسرق روح حد

ودا بعد 3 سنين ونص بس
ف التدوين
واكتر من 30 سنة قراية كتب وجرايد


المسألة عاوزة طولة بال
ونفس بس يا استاذنا

وهو ما اطالبك بيه
بعد ما تهدى
وتروق


وان شاء الله
حد من الناس الحلوة
الطيبة اللى متحمسة للنقابة
ويكون قاهرى يروح يسأل
ويعرف التفاصيل
وتبدأ الحكاية وتسمتر بنجاح
وساعتها يا عم لو جيت أتقدم
ابقوا قولولى ... أبدااااااااااااااااااا

انتى من الأعدقاء


:)

تحياتى ليك

واسفة تانى
لو النقاش ضايقك

انا النقاش مضايقنيش وانا فاهم وجهة نظرك يا استاذة
بس متضايق من نظرتك السوداوية دي للحكاية وانتي االلي دايما بتتكلمي عن التفاؤل
بالنسبة للرياسة والمجلس قلت مليون مرة مفيهمش امل وهتيجي غربان بس ده معناه اننا نطنش ونقول بلاها مجلس ورياسة؟
حضرتك بتقولي النقابة حاجة متهمكيش بس كنت متوقع ان اللي بيفكر في الحياة العامة مش لازم يبص للحاجات اللي تهمه بس على العموم انا آسف وطبعا انتي تعرفي بحترم حضرتك قد ايه
وده اللي مخليني اتكلم براحتي
بس حكاية توقفي عن التدوين غالبا ممكن تبقى نهائية من كترة الاحباطات اللي شايفها في عالم التدوين
امبارح لقيت شخص سارق كل قصصي وحاططها في مدونته انا مش مستعد اضيع وقتي ومجهودي علشان اكتبله تاني
تحياتي

مصطفى سيف الدين
---------------

مين دا اللى سوداوى ؟!!!!

يا خراااااااااااااااشى
لأ
دنتا متعرفنيش بقى
دنا التفائل ... أسمى الاوسط

انا اسمى اللى يبيندهونى بيه ف البيت من وانا لسه مولودة ... أمل
فاطمة دا ف البطاقة بس

ولكل انسان نصيب من اسمه

:)

وانا مقولتش النقابة متهمنيش يا جدع ....
انا قولت انى مش مهتمية حاليا
حاااااااليا
لأنى شايفة المناخ العام اتجاهه ايه
انما مش ضدها
اللى عاوز يعملها
يعملها ...
لعل وعشى تبقى خير
واطلع انا اللى مش شايفة كويس ..

و بعدين انا بتكلم عن وجهة نظرى الشخصية يا استاذ مصطفى ...
اهتمامى بالحياة العامة
لن يلغى نظرتى الخاصة
ف ان الكتابة دى شأنى الخاص
لم امتهنها ولن يحدث ...

حضرتك متعرفش ان والدى الله يرحمه كان صحفى ...
وكل العيلة كان بتتوقع انى اكون صحفية لأنى من زماااان وانا غاوية كتابة و شكلى مدى على صحافة
واتعرض عليا بعد تخرجى انى اشتغل صحفية ومذيعة و غيره ...
اكراما لبابا طبعا العروض دى
مش عشان سواد عيونى ....

بس انا قولت ساعتها لأ
لأنى بحب مجال المكتبات
وشغلانتى فيه كانت عجبانى
ثانياً
انا بعتبر الكتابة دى هوايتى
ومحبش احترفها
عشان لا أفسدها


مش بلزم حد بوجهة نظرى
لكن بعرضها هنا ف مدونتى
عشان محدش ييجى يقولى يا فاتيما
تعالى معانا اشتركى

بس
مش اكتر


وروق بقى
لاحطلك نفسى
قصاد الاتوبيس السياحى الفاخر ...

:)

Tarkieb
-------


صباح الترمس


مالها المزيكا بقى ؟!!!!!!!

بتغلطوا ف المزيكا بتاعتنا ليه ان شاء الله ؟!!!!

الحق علينا اللى عاوزين نروقكوا


ويا عم ابقى اول ما تدخل على مدونتى أعمل
mute

خسارة فينا كبسة زر
لحد ما تخلصوا قراية البوست ؟!!!!

ايه دا !!!
يا خراشى
يا ساااااتر
البلوجر ماله
شيكله عاوز ينضرب النهاردة
ولا إيه ؟!!!!



---------
ما سبق مزاح يا تركيب
ماشى ؟

تعرفى انا امبارح جيت ادخل مدونتك لقيتك عامله حجب وانا افتكرتك عاملالى ليا انا بس مش قدره اقولك كميه الضيق الى كنت فيها امبارح بسبب الموضوع ده
طبعا مجاش فى دماغى الى حصل والى قولتيه خالص بس الحمد لله على كل شىء:)
وربنا يهدى الناس للخير
ويبعد عننا اى حد يحاول يدمرنا او يجرح فينا
واتمنالك التوفيق دايما وابدا
تحيـــــ yara ـاتى

اما بقى اللى ينشكوا ف معاميعهم
و عاوزين يمسحونا دولم
فإلهى يا رب
يتمسح بيهم أسفلت التحرير
ف يوم درجة حرارته 50 مئوية
و بعد ما كل مللى ف الميدان ينضف
يروحوا مقعدينهم يستريحوا
ف نص الشارع ..
ف مجــــية أتوبيس سياحى فاخـــر ..
و انتوا عارفين الباقى
************************

اكتر فقره فى البوست كله ضحكتنى ههههههههههه والله انتى سكررررررر

علفكرة المدونات حلوة اوي :)

انا بدأت فى المدونة بتاعتي اهو وبحط فيها حاجات

http://ywmyeatmaghol.blogspot.com/

إرسال تعليق